Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

AEN DANGJ CAEUQ GUEKGYA MINZCUZ CWNGCWZ SENHCONZ GYAUYUZ DAEZGANG 2

  
【Cihsaw Hung’iq : hung rauh iq】  Dajyaenq
      
  Sam、Cienzmienh Lijgaij、Dawz Cinj Gij Gihbwnj Neiyungz Minzcuz Cwngcwz Aen Dangj Caeuq Guekgya

  7. Minzcuz bingzdaengj、minzcuz doxgiet、giz dieg siujsoq minzcuz gagguenj caeuq gak minzcuz doengzcaez mwnhoengh, dwg doengh aen gihbwnj yenzcwz bae cawqleix gij minzcuz vwndiz guek raeuz, dwg ndaw 《Aen Fapgoek Cunghvaz Yinzminz Gunghozgoz》caeuq《Aen Canghcwngz Cunghguek Gungcanjdangj》gaenq mingzbeg gvidingh. Doengh aen gihbwnj yenzcwz neix, daejyienh le gij gihbwnj yienzleix Majgwzswhcujyi, daejyienh le gij bonjcaet iugouz seveicujyi, daejyienh le gij gaenbonj cunghcij aen dangj raeuz. Aen dangj raeuz genhciz doengh hangh gihbwnj yenzcwz neix, byaij ok le diuz roen gaijgez minzcuz vwndiz cingqdeng youh miz daegsaek Cungguek.

  8. Minzcuz bingzdaengj, couh lumj ndaek rin roengz giek gij minzcuz cwngcwz aen dangj. Youq guek raeuz, minzcuz bingzdaengj couh dwg naeuz, gak minzcuz mboujlwnh vunz lai roxnaeuz vunz noix, diegyouq hung roxnaeuz iq, ginghci fazcanj cingzdoh sang roxnaeuz daemq, gangjvah cihsaw caeuq cunghgyau saenqyiengj、fungsug sibgvenq doengz mbouj doengz, gij diegvih ndawbiengz cungj dwg bingzdaengj, yiengjsouh gienzleih hix doxdoengz, rapdawz yivu caemh doxdoengz. Bouxgun caeuq siujsoq minzcuz cungj bingzdaengj, gak aen siujsoq minzcuz hix cungj bingzdaengj; aen minzcuz lawz cungj mbouj miz daeggienz, gij gienzleih aen minzcuz lawz hix mbouj deng hanhhaed; minzcuz bingzdaengj mboujdanh baudaengz cwngci、faplwd fuengmienh bingzdaengj, caemhcaiq baudaengz ginghci、vwnzva gak fuengmienh bingzdaengj.

  Aen fapgoek、aen fap giz dieg siujsoq minzcuz gagguenj caeuq mizgven faplwd fapgvi, doiq minzcuz bingzdaengj gaenq guh ok mingzbeg gvidingh. Gak aen minzcuz cungj miz gienzleih bingzdaengj bae caeuqfaenh guenjleix gij hongsaeh guekgya. Gak aen siujsoq minzcuz youq ndaw daengx guek yinzminz daibyauj daihhoih cungj miz gij daibyauj mingzngeg habdangq, ceiq noix cungj miz boux daibyauj ndeu. Gak aen minzcuz cungj miz gienzleih sawjyungh caeuq fazcanj gij vah caeuq cihsaw aen minzcuz bonjfaenh. Cungguek Gungcanjdangj daengx guek daibyauj daihhoih、daengx guek yinzminz daibyauj daihhoih、Cungguek Yinzminz Cwngci Hezsangh Veiyi daengj veiyi youqgaenj, cungj daezhawj gij vwnzgen cihsaw doengh aen siujsoq minzcuz mizgven roxnaeuz fanhoiz baenz gij vah doengh aen siujsoq minzcuz mizgven. Siujsoq minzcuz miz gienz yungh gij vah caeuq cihsaw aen minzcuz bonjfaenh bae guh hwnjgauq caeuq bienqbuek. Guekgya baujcang gyoengq gunghminz siujsoq minzcuz youq souh gyauyuz、couhnieb daengj fuengmienh miz gienzleih bingzdaengj. Gak aen siujsoq minzcuz cungj miz swyouz bae baujciz roxnaeuz gaijgwz gij fungsug sibgvenq bonjfaenh.

  Vihliux ciuqgoq siujsoq minzcuz youq dajgwn、begsaeh daengj fuengmienh gij aeuyungh daegbied de, guekgya cienmonz gaenq guh ok mizgven gvidingh. Vihliux fuengzre fatseng doengh cungj vwndiz ciemqfamh gij fungsug sibgvenq gyoengq siujsoq minzcuz haenx, aen dangj caeuq cwngfuj gaenq doiq sinhvwnz、okbanj、vwnzyi、yozsuz yenzgiu daengj mizgven danhvei caeuq gij vunz guh cungj hongsaeh neix daez ok le mingzbeg iugouz. Aen fap hingzfaz cienmonz laeb miz “aen coih feihfaz ciemqfamh gij fungsug sibgvenq gyoengq siujsoq minzcuz”, doiq gij hingzveiz ciemqfamh gij fungsug sibgvenq gyoengq siujsoq minzcuz, ndaej guh hingzsaeh cawqfad. Vihliux baujcang aen gienzleih siujsoq minzcuz ndaej angq gvaq gij ngoenzciet bonj minzcuz, aen yinzminz cwngfuj giz dieg minzcuz gagguenj, ndaej ciuq gij sibgvenq doengh aen siujsoq minzcuz mizgven, bae gvidingh gij banhfap cuengqgyaj; gyoengq cizgungh siujsoq minzcuz bae caeuqfaenh gij hozdung ngoenzciet hungnaek aen minzcuz bonjfaenh, ndaej ciuq guekgya mizgven gvidingh cuengqgyaj hawj bae, caemhcaiq ciuq bingzciengz fat gunghswh hawj. Guekgya gingqcungh caeuq baujcang gij cunghgyau saenqyiengj swyouz gienzleih gyoengq gunghminz siujsoq minzcuz. Mboujlwnh aen guekgya gihgvanh、aen ndawbiengz donzdij lawz caeuq bouxvunz lawz, cungj mbouj ndaej ep gunghminz saenqyiengj cunghgyau roxnaeuz mbouj saenqyiengj cunghgyau, mbouj ndaej yawjcuij doengh boux gunghminz saenqyiengj cunghgyau roxnaeuz doengh boux gunghminz mbouj saenqyiengj cunghgyau haenx.

  Aen vwndiz aeu daegbied ceijok de dwg, gingqcungh gij fungsug sibgvenq gyoengq siujsoq minzcuz, doiq baujcang minzcuz bingzdaengj miz gij eiqngeih youqgaenj youh daegbied. Fungsug sibgvenq dwg aen geiqhauh youqgaenj gapbaenz minzcuz daegdiemj caeuq minzcuz cabied haenx, gingqcungh gij fungsug sibgvenq gak aen minzcuz, couh dwg gingqcungh gij gamjcingz gak aen minzcuz; gingqcungh gij gamjcingz gak aen minzcuz, bietdingh aeu gingqcungh gij fungsug sibgvenq gak aen minzcuz. Yaek baujciz roxnaeuz gaijgwz fungsug sibgvenq, cungj wnggai youz gyoengq vunz bonj minzcuz gag bae gietdingh, aen minzcuz wnq caeuq bouxwnq mbouj ndaej luenh guenj haeujbae, engq mbouj ndaej aeu hingzcwng minghlingh bae giengzbik gaijgwz.

  9. Minzcuz doxgiet, dwg hangh yenzcwz hungnaek bae gaijgez gij minzcuz vwndiz guek raeuz. Gyagiengz minzcuz doxgiet, couh dwg aeu gauj ndei minzcuz gvanhaeh, coicaenh gak minzcuz doxhuz caemhyouq、caezsim gaprengz bae haekfug gunnanz、huzciz fazcanj, gyagiengz gij rengzlig comzgiet aen Cunghvaz Minzcuz. Aen dangj caeuq guekgya yungh gak cungj cosih daeklig, mboujduenh gyagiengz gak minzcuz daih doxgiet. Aeu daihlig gyagiengz guh gij senhconz gyauyuz “sam aen liz mbouj ndaej”, cienzmienh coicaenh minzcuz doxgiet cinbu. Doiq gyoengq siujsoq minzcuz ndaw hawsingz caeuq gyoengq siujsoq minzcuz sanqyouq, ciuq faplwd bae baujcang gij gienzik cingqdangq gyoengqde, lai roengzrengz bae fugsaeh caeuq guenjleix gij vunz siujsoq minzcuz riuzdoengh haeuj hawsingz haenx. Hawj gyoengq ganbu siujsoq minzcuz、gyoengq bouxdaeuz minzcuz cunghgyaugai youq ndaw hezdiuz minzcuz gvanhaeh、henhoh minzcuz doxgiet caeuq ndawbiengz onjdingh, cungfaen fazveih gij cozyungh youqgaenj de.

  Genhciz diuz yenzcwz henhoh gij leih’ik yinzminz、henhoh gij coenyiemz faplwd、henhoh minzcuz doxgiet、henhoh guekgya doengjit, cawqleix ndei doengh gij vwndiz yingjyangj minzcuz doxgiet haenx. Youq aen duenhmbaek seizneix, guek raeuz ndawgyang minzcuz caeuq minzcuz gij mauzdun de caeuq gij vwndiz yingjyangj minzcuz doxgiet de, daihdaej cungj gvihaeuj gij mauzdun baihndaw yinzminz, bae cawqleix doengh cungj mauzdun caeuq vwndiz neix, bietdingh aeu gangj yenzcwz、gangj fazci、gangj cwngcwz、gangj cwzloz. Genhciz gidij vwndiz gidij faensik, dwg yiengh vwndiz lawz couh ciuq yiengh vwndiz de bae cawqleix. Laebhwnj caeuq laeb caezcienz yiengh gihci ndaej ciengzgeiz mizyauq cawqleix doengh gij vwndiz yingjyangj minzcuz doxgiet haenx, roengzrengz dawz gak cungj saehgienh sawqmwh fatseng haenx gaijgez youq dangdieg、gaijgez youq gihcwngz、gaijgez youq mwh ngamq hainduj. Henhoh minzcuz doxgiet caeuq guekcoj doengjit, bietdingh aeu geizhauh sienmingz bae fanjdui caeuq daeqceih doengh gij hozdung gyoengq digdoiq seiqlig rog guek, mbouj hawj gyoengqde yaengx doengh fan geizhauh “minzcuz”、“cunghgyau”、“vunzgienz”, daeuj faenvaq caeuq saevaq guek raeuz; bietdingh aeu yiemzmaed daezfuengz caeuq genhgez dwkceih doengh gij hozdung minzcuz faenmbek seiqlig、cunghgyau gizdonh seiqlig、bauqlig gungjbu seiqlig, mbouj hawj gyoengqde doenggvaq gak cungj soujduenh daeuj iemqhaeuj caeuq boqvaih guek raeuz.

  10. Giz dieg siujsoq minzcuz gagguenj, dwg hangh gihbwnj cwngcwz bae gaijgez gij minzcuz vwndiz guek raeuz, dwg hangh gihbwnj cwngci cidu guek raeuz. Yiengh giz dieg siujsoq minzcuz gagguenj aen guek raeuz, dwg youz guekgya bae cizcungh doengjit lingjdauj, caiq youq doengh giz dieg siujsoq minzcuz comzyouq haenx, laeb giz deihfueng gagguenj, laeb aen gihgvanh gagguenj, hengzsawj gij gienzlig gagguenj. Seizneix, guek raeuz gaenq laeb miz 155 giz deihfueng minzcu gagguenj, baudaengz 5 aen swcigih gagguenj、30 aen swcicouh gagguenj、120 aen swciyienh gagguenj. Linghvaih, lij laeb le 1173 aen minzcuzyangh, dangguh yiengh hingzsik youqgaenj bae bangbouj giz dieg siujsoq minzcuz gagguenj haenx.

  Genhciz caeuq laeb caezcienz giz dieg siujsoq minzcuz gagguenj, bietdingh aeu baujcwng giz deifueng siujsoq minzcuz gagguenj haenx ciuq faplwd hengzsawj gij gienzlig gagguenj. Cunghyangh caeuq guekgya gihgvanh gak aen bouhmonz、deihfueng gak gaep dangjveij caeuq cwngfuj, youq mwh ceiqdingh mizgven gezyi、gietdingh、minghlingh, aeu habngamj gij saedsaeh cingzgvang giz deihfueng siujsoq minzcuz gagguenj haenx, ciuqgoq gij daegdiemj caeuq sihyau giz deihfueng siujsoq minzcuz gagguenj haenx; aeu cungfaen gingqcungh giz deihfueng siujsoq minzcuz gagguenj haenx gij gienzleih bienqdoeng caephengz roxnaeuz dingzcij mbouj caephengz de, caemhcaiq cizgiz bae cijdauj caeuq bangcoh; aeu ciuq gij iugouz aen fap giz dieg siujsoq minzcuz gagguenj, ceiqdingh gij faplwd fapgvi、gidij cosih caeuq banhfap dox boiqdauq haenx. Doengzseiz, giz deihfueng siujsoq minzcuz gagguenj haenx gawq aeu baujcwng aen dangj caeuq guekgya gij fuengcim cwngcwz hungnaek de ndaej youq bonjdieg gvancez caephengz, youh aeu coengz saedsaeh bae ngeixnaemj banhsaeh, saedcaih hengzsawj ndei gij gienzlig gagguenj youz aen fapgoek caeuq aen fap giz dieg siujsoq minzcuz gagguenj soj gyauhawj haenx.

  
[1] [2] [3]
Dozsiengq