Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

AEN DANGJ CAEUQ GUEKGYA MINZCUZ CWNGCWZ SENHCONZ GYAUYUZ DAEZGANG 1

  
【Cihsaw Hung’iq : hung rauh iq】  Dajyaenq
      
  Gauj ndei minzcuz gvanhaeh, gyagiengz minzcuz doxgiet, gvanhaeh daengz saedyienh aen muzbyauh haenqrengz cienzmienh hwnqguh aen biengz siujgangh, gvanhaeh daengz aen daihbuenz hwnqguh yiengh seveicujyi saehnieb miz daegsaek Cungguek, gvanhaeh daengz guekgya ciengzgeiz andingh. Vihliux bangcoh guengjdaih ganbu ginzcung cingqdeng lijgaij dem caephengz gij minzcuz cwngcwz aen dangj caeuq guekgya, cietsaed henhoh minzcuz doxgiet、guekcoj doengjit caeuq ndawbiengz onjdingh, daegdaengq biensij faenh senhconz gyauyuz daezgang neix.

  It、Minzcuz Doxgiet Dwg Aen Vwndiz Hungnaek Gvanhaeh Daengz Guekgya Roennaj Caeuq Minghyinh Haenx

  1. Guek raeuz dwg aen guekgya minzcuz lai youh doengjit、youz gak cuz yinzminz doengzcaez cauhlaeb haenx. Gij roennaj dem minghyinh gak minzcuz caeuq gij roennaj dem minghyinh guekcoj itcig gaenjmaed doxlienz youq itheij. Yienznaeuz gwnz lizsij Cungguek hix miz gvaq geij baez faenmbek, hoeng seizgan cungj gig dinj, doeklaeng hix cungj dwg dauqgvi doengjit lo. Guekgya doengjit itcig cungj dwg aen cawjlouz Cungguek lizsij fazcanj, hab gij leih’ik goekgaen gak cuz yinzminz, ndaej daengz gak cuz yinzminz caensim yungjhu. Youq aen daih gyadingz minzcuz lai raeuz, siujsoq minzcuz miz it ik lai vunz, ciemq daengx guek cienzbouh vunzsoq 8% doxhwnj, faenbouh youq daengx guek gak dieg; giz dieg siujsoq minzcuz gagguenj ciemq diegguek cienzbouh menciz 64% baedauq, fueng dieg baihsae caeuq henzguek daih dingzlai deihfueng cungj dwg giz dieg siujsoq minzcuz comzyouq; miz 30 lai aen siujsoq minzcuz caeuq guekwnq doengz it minzcuz doxrangh youq. Aen gihbwnj guekcingz neix, gietdingh le minzcuz vwndiz itcig cungj dwg aen vwndiz hungnaek raeuz youq mwh hwnqguh yiengh seveicujyi miz daegsaek Cungguek haenx bietdingh aeu nyinhcaen bae cawqleix ndei ndeu, gietdingh le minzcuz gunghcoz itcig cungj dwg hangh hong hungnaek gvanhaeh daengz aen daihbuenz dangj raeuz caeuq yinzminz saehnieb fazcanj ndeu, gietdingh le gyagiengz minzcuz doxgiet itcig cungj dwg hangh yinvu hungnaek gvanhaeh daengz guekcoj doengjit、diegguek caezcingj、henzguek fuengzhen gaenjmaenh ndeu.

  2. Aen dangj raeuz itcig cungj cibfaen yawjnaek gauj ndei minzcuz gvanhaeh, cibfaen yawjnaek henhoh minzcuz doxgiet. Cungguek moq laebbaenz caeuq seveicujyi cidu laebmaenh, haicauh le aen seizdaih moq minzcuz doxgiet. Mauz Cwzdungh dungzci laegdaeuq ceijok: “Yinzminz doxgiet, ndaw guek gak minzcuz doxgiet, dwg aen gihbwnj baujcwng saehnieb raeuz bietdingh ndaejhingz”. Caemhcaiq fat ok aen haucau hungmbwk “Cunghvaz Yinzminz Gunghozgoz gak minzcuz doxgiet hwnjdaeuj”. Dwng Siujbingz dungzci ceijok, aen duenhmbaek seizneix gij minzcuz gvanhaeh guek raeuz dwg gij gvanhaeh ndawgyang gak cuz lauzdung yinzminz. Gyangh Cwzminz dungzci daezok, Bouxgun liz mbouj ndaej siujsoq minzcuz, siujsoq minzcuz liz mbouj ndaej Bouxgun, gak siujsoq minzcuz hix dox ingbaengh. Huz Ginjdauh dungzci ceijok, gak minzcuz doengzcaez doxgiet haenqrengz buek guh、doengzcaez mwnhoengh fazcanj dwg sigij moq duenhmbaek moq gij cawjdaez minzcuz gunghcoz. Giengzdiuh minzcuz gvanhaeh dwg guek raeuz aen guekgya minzcuz lai neix cungj cwngci caeuq ndawbiengz gvanhaeh cibfaen youqgaenj ndeu. Giengzdiuh minzcuz doxgiet ndaej baujcwng guekgya ciengzgeiz andingh、hwng’vuengh fatdad, coicaenh minzcuz doxgiet、saedyienh doengzcaez cinbu dwg aen gaenbonj yinvu minzcuz gunghcoz, mboujlwnh youq laj cungj cingzgvang lawz, cungj aeu giendingh mbouj bienq bae henhoh minzcuz doxgient, daihlig senhconz gij senhcin denjhingz minzcuz doxgiet, caenh’itbouh cauhlaeb yiengh minzcuz gvanhaeh bingzdaengj doxgiet doxhuz doxbang haenx. Aen dangj cibcaet daih iugouz, gaemndaet aen cawjdaez gak minzcuz doengzcaez doxgiet haenqrengz buek guh、doengzcaez mwnhoengh fazcanj, mboujduenh gyamaenh caeuq fazcanj gij daih doxgiet daengx guek gak cuz yinzminz, gyadaih gyaezguek doengjit cansen, demgiengz gij rengzlig comzgiet Cunghvaz Minzcuz. Cungguek moq laebbaenz gaenh 60 bi daeuj, daegbied dwg gaijgwz hailangh 30 bi daeuj, gij yienghsiengq siujsoq minzcuz, gij yienghsiengq minzcuz gvanhaeh, gij yienghsiengq minzcuz doxgiet cinbu saehnieb, miz le lizsijsing bienqvaq hungnaek, vih fazcanj yiengh saehnieb seveicujyi hungmbwk miz daegsaek Cungguek dwk roengz le giekdaej gaenjmaenh.

  3. Guek raeuz cingq cawqyouq caemhcaiq yaek ciengzgeiz cawqyouq aen duenhmbaek cogaep seveicujyi, gunghyezva、sinsizva、cwngzcinva、sicangzvaq、gozciva baeyiengq haeujlaeg fazcanj, cingqdeng cawqleix minzcuz vwndiz, nangq daengz guek raeuz yendaiva gensez gak aen fuengmienh, cietsaed henhoh minzcuz doxgiet yinvu hungloet lairaeuh youh gannanz. Gak minzcuz youq baihlaj yiengh cidu seveicujyi bae danggya guhcawj, youq cwngci fuengmienh cienzbouh bingzdaengj, hoeng gij yingjyangj minzcuz yawjcuij caeuq minzcuz haekhawz daj gwnz lizsij louz roengzdaeuj haenx, lij caengz ndaej siucawz liuxseuq, baez miz diuzgienh couh lij yaek biujyienh okdaeuj; gij leih’ik goekgaen gak minzcuz cungj dwg doxdoengz, hoeng youq mbouj noix gidij gienzik fuengmienh, daegbied dwg ginghci vwnzva fazcanj suijbingz fuengmienh lij cengca haemq daih, minzcuz caeuq minzcuz gyangde lij miz saek di mauzdun caeuq doxdawz; gak minzcuz dox gvansim doxmaij、lumj beixnuengx ityiengh, doengh fuengmienh doxdoengz de mboujduenh gyalai, hoeng aenvih fungsug sibgvenq、gangjvah caeuq cihsaw、cunghgyau saenqyiengj daengj fuengmienh dox liujgaij mbouj gaeuq, caiqgya dieg caeuq dieg、hawsingz caeuq lajmbanj、minzcuz caeuq minzcuz gyoengq vunz riuzdoengh gyavaiq, seiz mbouj seiz hix miz saekdi lijgaij loengloek、doxceng doxnauh; minzcuz fazci gensez mboujduenh gyagiengz, hoeng aenvih miz mbangj di vunz fazci gvanhnen mbouj giengz、caephengz cwngcwz biennaek moux fuengmienh daengj yienzaen, gij saehcingz sienghaih minzcuz gamjcingz、sonjhaih minzcuz doxgiet haenx seiz mbouj seiz raen miz; huzbingz、fazcanj、hozcoz dwg diuz cawjdaez aen seiqgyaiq ngoenzneix, hoeng gyoengq digdoiq seiqlig rog guek gij cwngci maeuzsuenq doiq guek raeuz guh saevaq、faenvaq haenx it seiz cungj mbouj cuengqsoeng gvaq, caiq caeuq gij minzcuz faenmbek seiqlig ndaw guek doxyuk dwk, siengj caenh banhfap bae leihyungh gij minzcuz、cunghgyau、vunzgienz daengj vwndiz gyoengqde soj gangj, gyagaenj doiq guek raeuz guh gij hozdung iemqhaeuj、faenmbek、buqvaih caeuq boekfan. Aen Lahsaz “3•14” Saehgienh 2008 nienz fatseng haenx, caiq daezsingj raeuz mbat ndeu lo.

  Ngeih、Gij Minzcuz Cwngcwz Aen Dangj Dwg Diuz Minghmeg Minzcuz Doxgiet

  4. Aen dangj raeuz aeu gij minzcuz lijlun Majgwzswhcujyi guh cijdauj, ceiqdingh caeuq saedhengz gij minzcuz cwngcwz cingqdeng, hai ok le diuz roenloh cingqdeng hab gij guekcingz Cungguek、miz daegsaek Cungguek、 gaijgez ndaej minzcuz vwndiz haenx. Raeuz laebbaenz le Cungguek moq, cienzbouh gietsat le aen gizmen sik sinz sanq danh Cungguek gaeuq, saedyienh le guekgya doengjit cingzdoh gig sang caeuq gak minzcuz fanndang gaijfang; daz gak cuz yinzminz doengzcaez byaij hwnj diuz roen seveicujyi bae, saedyienh le Cunghvaz Minzcuz fazcanj lizsij gwnzde mbat ndawbiengz bengwz ceiq gvangqlangh ceiq laegdaeuq haenx; nyinhdingh 56 aen minzcuz cingzfaenh, saedyienh le gak cuz yinzminz doengzcaez danggya guhcawj、guenjleix gij hongsaeh guekgya; laebhwnj、gyamaenh caeuq fazcanj yiengh minzcuz gvanhaeh seveicujyi, saedyienh le yiengh minzcuz daih doxgiet coengzlaiz caengz miz gvaq; saedhengz giz dieg siujsoq minzcuz gagguenj, saedyienh le aen gienzleih giz dieg siujsoq minzcuz gagguenj haenx youq guekgya doengjit lingjdauj baihlaj gag guhcawj bae guenjleix gij hongsaeh baihndaw bonjdieg; bangcoengh caeuq bangcoh giz dieg siujsoq minzcuz fazcanj swnghcanjliz, sawj gij swnghcanj fuengsik caeuq swnghhoz suijbingz gyoengq vunz siujsoq minzcuz ndaej yathamj baenaj, neix youq gwnz lizsij caemh caengz miz gvaq; daihlig fazcanj gij ndawbiengz vwnzva saehnieb giz dieg siujsoq minzcuz, saedyienh le gij swhsiengj daudwz suciz、gohyoz vwnzva suciz caeuq ndangdaej suciz gyoengq vunz siujsoq minzcuz cungj ndaej cienzmienh daezsang; daihlig gungganq gij ganbu caeuq vunzcaiz siujsoq minzcuz, maedcaed le gij gvanhaeh aen dangj caeuq gyoengq vunz siujsoq minzcuz. Cungguek moq laebbaenz gaenh 60 bi daeuj, mboujguenj roeb daengz yiengh fung’yiemj caeuq gaujniemh lawz, guek raeuz itcig cungj baujciz le minzcuz doxgiet、cwngci andingh、ndawbiengz onjdingh.

  5. Gij minzcuz cwngcwz aen dangj, gawq cienzmienh naemj daengz le yiengh gihbwnj saedsaeh aen guekgya minzcuz lai youh doengjit raeuz byaij hwnj diuz roen seveicujyi, youh cienzmienh naemj daengz le yiengh gihbwnj saedsaeh guek raeuz 56 aen minzcuz youq fazcanj suijbingz caeuq vwnzva fungsug fuengmienh miz lai yiengh caeuq miz cengca; gawq haeujlaeg cungjgez gwnz lizsij guek raeuz gij gingniemh gyauyin cawqleix minzcuz vwndiz haenx, hix cizgiz beijciuq caeuq hag’aeu le gwnz seiqgyaiq mbangj di guekgya gij gingniemh gyauyin cawqleix minzcuz vwndiz de; gawq baujciz gihbwnj yenzcwz、gihbwnj leixniemh onjdingh、gonqlaeng hamzciep, youh gaenriengz gij gunghcoz cungqsim gaenq cienjvuenh caeuq gij sizcen gaenq fazcanj haenx bae mboujduenh cungsaed、mboujduenh vuenhmoq、mboujduenh laeb caezcienz, ndigah miz gij gohyoz baengzgawq lizsij caeuq yienhsaed, miz gij rengzhoengh fazcanj caeuq gij rengzlig gamjciu gig daih. Gij minzcuz cwngcwz aen dangj raeuz, comzgyonj le geij daih vunz Cungguek Gungcanjdangj cawqleix minzcuz vwndiz gij dungxcaiz caeuq lwedhanh de, dwg gij gihbwnj lijlun、gihbwnj lohsienq、gihbwnj ganghlingj、gihbwnj gingniemh aen dangj ndawde aen gapbaenz bouhfaenh youqgaenj haenx, dwg gij cingsaenz caizfouq ceiq dijbauj ndaw minzcuz gunghcoz aen dangj caeuq guekgya, dwg aen gaenbonj baujcwng raeuz mboujduenh bae doicaenh caeuq fazcanj minzcuz doxgiet cinbu saehnieb.

  6. Yiemzgek caephengz minzcuz cwngcwz, cigciep gvanhaeh daengz gij visaenq caeuq yienghsiengq aen dangj youq ndaw gyoengq vunz siujsoq minzcuz, cigciep yingjyangj daengz gij minzcuz gunghcoz aen dangj ndaej baenz roxnaeuz deng baih, cigciep gietdingh minzcuz caeuq minzcuz ndaej mbouj ndaej doxsaenq caeuq doxgiet. Lizsij gingniemh cwngmingz, gij minzcuz gvanhaeh caeuq minzcuz doxgiet guek raeuz, cijmiz cienzmienh gvancez caephengz gij minzcuz cwngcwz aen dangj caeuq guekgya, cij ndaej guh daengz caencingq gauj ndei caeuq caensaed gyagiengz; gij minzcuz cwngcwz aen dangj caeuq guekgya, hix cijmiz youq gwnz giekdaej gauj ndei minzcuz gvanhaeh、gyagiengz minzcuz doxgiet, cij ndaej guh daengz caencingq gvancez caephengz. Famzdwg mwh minzcuz cwngcwz caephengz ndaej ndei, minzcuz gvanhaeh couh fazcanj ndaej cangqheiq, minzcuz doxgiet couh mboujduenh gyamaenh; famzdwg mwh minzcuz cwngcwz caephengz ndaej mbouj ndei, minzcuz gvanhaeh couh roeb daengz daemdengj, minzcuz doxgiet couh deng buqvaih.

  
[1] [2] [3]
Dozsiengq