Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

AEN FAP FANJ FAENMBEK GUEKGYA

(2005 nienz 3 nyied 14 hauh Daihcib Gaiq Daengx Guek YinzminzDaibyauj Daihhoih Daihsam Baez Veiyi doenggvaq)

  
【Cihsaw Hung’iq : hung rauh iq】  Dajyaenq
      
  Daih 1 diuz Vihliux fanjdui caeuq naenxroengz “Daizduz” faenmbek seiqlig faenmbek guekgya, coicaenh guekcoj huzbingz doengjit, henhoh Daizvanh Haijyaz Digih huzbingz onjdingh, henhoh guekgya cawjgienz caeuq diegguek caezcingj, henhoh gij gaenbonj leih’ik Cunghvaz Minzcuz, gaengawq fapgoek, ceiqdingh bonj fap.

  Daih 2 diuz Gwnz seiqgyaiq ngamq miz aen Cungguek dog, daluz caeuq Daizvanh doengz gvi aen Cungguek ndeu, gij cawjgienz caeuq diegguek caezcingj Cungguek mbouj yungzhawj faengat. Henhoh guekgya cawjgienz caeuq diegguek caezcingj, dwg aen yivu doengzcaez daengx Cungguek yinzminz, hamz gyoengq beixnuengx Daizvanh youq ndawde.

  Daizvanh dwg Cungguek ndawde aen bouhfaenh ndeu.Guekgya baenzlawz cungj mbouj cinjhawj “Daizduz” faenmbek seiqlig yungh cungj mingzdaeuz lawz、 cungj fuengsik lawz dawz Daizvanh daj ndaw Cungguek faenmbek okbae.

  Daih 3 diuz Daizvanh vwndiz dwg aen vwndiz daj mwh Cungguek neican lwlouz roengzdaeuj haenx. Gaijgez Daizvanh vwndiz, saedyienh guekcoj doengjit, dwg gij saehcingz baihndaw Cungguek, mbouj souh aen seiqlig guekwnq lawz ganhsez.

  Daih 4 diuz Guhbaenz aen daihnieb doengjit guekcoj, dwg aen saenzsingq cizcwz daengx Cungguek yinzminz, hamz gyoengq beixnuengx Daizvanh youq ndawde.

  Daih 5 diuz Genhciz diuz yenzcwz aen Cungguek dog, dwg aen giekdaej saedyienh guekcoj huzbingz doengjit.

  Yungh huzbingz fuengsik bae saedyienh guekcoj doengjit, ceiq hab gij gaenbonj leih’ik gyoengq beixnuengx song hamq Daizvanh Haijyaz. Guekgya yungh gij caensim ceiq daih, caenh gij goengrengz ceiq daih, bae saedyienh huzbingz doengjit.

  Guekgya huzbingz doengjit le, Daizvanh ndaej saedhengz gij cidu caeuq daluz mbouj doxdoengz haenx, gagguenj cingzdoh gig sang.

  Daih 6 diuz Guekgya yungh gij cosih lajneix, bae henhoh Daizvanh Haijyaz Digih huzbingz onjdingh, fazcanj gij gvanhaeh song hamq:

  (1) Gujli caeuq doidoengh gij vunz song hamq dox baedauq, gyalai doxrox, engq lai doxsaenq;

  (2) Gujli caeuq doidoengh song hamq ginghci gyaulouz caeuq hozcoz, cigciep dunghyouz dunghhangz dunghsangh, maedcaed gij ginghci gvanhaeh song hamq, doxndei doxik;

  (3) Gujli caeuq doidoengh song hamq gyauyuz、 gohgi、 vwnzva、 veiswngh、 dijyuz gyaulouz, doengzcaez hungzyangz gij conzdungj ndei Cunghvaz vwnzva;

  (4) Gujli caeuq doidoengh song hamq doengzcaez dwkceih famhcoih;

  (5) Gujli caeuq doidoengh gizyawz doengh gij hozdung doiq henhoh Daizvanh Haijyaz Digih huzbingz onjdingh、fazcanj gij gvanhaeh ik song hamq haenx.

  Guekgya ciuq faplwd baujhoh gij gienzleih caeuq leih’ik gyoengq beixnuengx Daizvanh.

  Daih 7 diuz Guekgya cawjcieng doenggvaq Daizvanh Haijyaz song hamq bingzdaengj doxyaeng caeuq damzbuenq, bae saedyienh huzbingz doengjit. Doxyaeng caeuq damzbuenq ndaej miz bouhloh、 faen duenhmbaek bae guh, gij fuengsik de ndaej lingzvued lai yiengh.

  Daizvanh Haijyaz song hamq ndaej couh gij saehhangh lajneix bae doxyaeng caeuq damzbuenq:

  (1) Cingqsik gietsat gij digdoiq cangdai song hamq;

  (2) Suenqveh fazcanj gij gvanhaeh song hamq;

  (3) Gij bouhloh caeuq anbaiz huzbingz doengjit;

  (4) Gij cwngci diegvih Daizvanh danghgiz;

  (5) Daizvanh Digih youq gwnz seiqgyaiq gij hozdung gunggan caeuq aen diegvih de doxdaengh haenx;

  (6) Gizyawz sojmiz gij vwndiz caeuq saedyienh huzbingz doengjit mizgven haenx.

  Daih 8 diuz “Daizduz” faenmbek seiqlig mboujlwnh yungh cungj mingzdaeuz lawz、 cungj fuengsik lawz, cauhbaenz gij saehsaed Daizvanh daj ndaw Cungguek faenmbek okbae, roxnaeuz fatseng gij saehbienq hungnaek yaek sawj Daizvanh daj ndaw Cungguek faenmbek okbae, roxnaeuz gij gojnwngzsing huzbingz doengjit gaenq mbouj miz saek di, guekgya ndaej yungh gij fuengsik mbouj huzbingz caeuq gizyawz gij cosih noix mbouj ndaej haenx, bae henhoh guekgya cawjgienz caeuq diegguek caezcingj.

  Ciuq gij gvidingh gvanj gaxgonq yungh gij fuengsik mbouj huzbingz caeuq gizyawz gij cosih noix mbouj ndaej haenx, youz gozvuyen、cunghyangh ginhsw veijyenzvei gietdingh caeuq cujciz saedhengz, caemhcaiq gibseiz yiengq daengx guek yinzminz daibyauj daihhoih cangzvu veijyenzvei baugau.

  Daih 9 diuz Youq mwh ciuq gij gvidingh bonj fap yungh gij fuengsik mbouj huzbingz caeuq gizyawz gij cosih noix mbouj ndaej haenx caemhcaiq bae cujciz saedhengz de, guekgya caenh ceiq daih gojnaengz, bae baujhoh gij sengmingh caizcanj ancienz dem gizyawz gij gienzik cingqdangq gyoengq beksingq Daizvanh caeuq gyoengq vunz guekwnq youq Daizvanh haenx, gemjnoix sonjsaet; doengzseiz, guekgya ciuq fap baujhoh gyoengq beixnuengx Daizvanh youq Cungguek gizyawz digih gij gienzleih caeuq leih’ik de.

  Daih 10 diuz Bonj fap daj ngoenz fatbouh de hwnj saedhengz.

  (Gij swhliu Yinzminzvangj)
Dozsiengq