Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CUNGHGUNG CUNGHYANGH、DAENGX GUEK YINZDA CANGZVEIJVEI、GOZVUYEN、DAENGX GUEK CWNGHEZ、CUNGHYANGH GINHVEIJ AEN HOHDIENH GVENDAENGZ ANGQHOH GVANGJSIH BOUXCUENGH SWCIGIH LAEBBAENZ 50 HOPBI

  
【Cihsaw Hung’iq : hung rauh iq】  Dajyaenq
      
Cunghgung Gvangjsih Bouxcuengh Swcigih Veijyenzvei、Gvangjsih Bouxcuengh Swcigih Yinzda Cangzveijvei、Gvangjsih Bouxcuengh Swcigih Yinzminz Cwngfuj、Gvangjsih Bouxcuengh Swcigih Cwnghez、Gvangjsih Ginhgih:

  Youq mwh Gvangjsih Bouxcuengh Swcigih laebbaenz 50 hopbi daeuj daengz, Cunghgung Cunghyangh、Daengx Guek Yinzda Cangzveijvei、Gozvuyen、Daengx Guek Cwnghez、Cunghyangh Ginhveij, angqyangz nai hoh gyoengq gunghyinz、nungzminz、cihsiz fwnswj、ganbu gak aen minzcuz daengx gih caeuq gyoengq yinzsw gyaezguek gak gyaiq; angqyangz nai hoh gyoengq yinzminz gaijfangginh cijcanyenz doengh aen budui cap youq Gvangjsih、gyoengq guenbing aen vujgingj budui caeuq gungh’anh minzgingj Gvangjsih; angqyangz nai hoh sojmiz gij dungzci caeuq baengzyoux gvansim dem bangcoengh Gvangjsih Bouxcuengh Swcigih gaijgwz hailangh caeuq seveicujyi yendaiva gensez haenx!

  50 bi gaxgonq Gvangjsih Bouxcuengh Swcigih laebbaenz, dwg gyoengq ganbu cungqvunz gak aen minzcuz Gvangjsih cwngci swnghhoz ndawde gienh daihsaeh ndeu, hix lumj guek raeuz minzcuz gvanhaeh fazcanj lizsij gwnzde ndaek lohbaiz ndeu, hainduj le aen duenhmbaek fazcanj moq Gvangjsih. 50 bi neix daeuj, daegbied dwg daj gaijgwz hailangh doxdaeuj, miz cunghyangh cingqdeng lingjdauj caeuq gyoengq beksingq gak aen minzcuz daengx guek daihlig bangcoengh, gyoengq ganbu cungqvunz Gvangjsih doengzsim gaprengz、ganhoj buek guh, sawj gij yienghsiengq Gvangjsih fatseng le gij bienqvaq gwnz lizsij caengz miz. Daengx gih ginghci saedlig lai giengz haujlai, beksingq gwndaenj daih fukdoh gaijndei; hangh cidu giz dieg siujsoq minzcuz gagguenj mboujduenh laeb caezcienz, gyoengq cungqvunz gak aen minzcuz gij gienzik habfap de ndaej daengz cungfaen gingqcungh caeuq saedcaih baujcang; gyoengq cungqvunz gak aen minzcuz gij swhsiengj daudwz suciz、gohyoz vwnzva suciz caeuq ndangdaej suciz de bujben daezsang, gak hangh saehnieb ndawbiengz lienzdaemh fazcanj; gij saehnieb minzcuz doxgiet cinbu mboujduenh doicaenh baenaj, gyoengq cungqvunz gak aen minzcuz doxhuz caemhyouq、gap guh doihndei、huzciz fazcanj, vunzlai engqgya roxyiuj“Bouxgun liz mbouj ndaej siujsoq minzcuz、siujsoq minzcuz liz mbouj ndaej Bouxgun、gak aen siujsoq minzcuz hix doxliz mbouj ndaej”yiengh swhsiengj neix. Aen Gvangjsih ngoenzneix, gij hongsaeh cwngci doenghswnh, gyoengq beksingq huzheiq, gak hangznieb hwng’vuengh, gaijgwz hailangh mboujduenh haeujlaeg, gyoengq ganbu cungqvunz gak aen minzcuz cingqcaih goengrengz rim ndang, vih saedyienh aen muzbyauh hungmbwk cienzmienh hwnqguh aen biengz siujgangh bae doxgiet buek guh.

  Gvangjsih Bouxcuengh Swcigih laebbaenz 50 bi neix daeuj miz cingzcik lairaeuh, dwg gyoengq ganbu cungqvunz gak aen minzcuz daengx gih doengzcaez doxgiet buek guh cij aeu ndaej, dwg gij minzcuz cwngcwz aen dangj hengz ndaej gig baenz, dwg yiengh seveicujyi miz daegsaek Cungguek guh ndaej daih hingz. Lizsij caeuq yienhsaed cungj cungfaen cwngmingz: Cijmiz genhciz youz Cungguek Gungcanjdangj bae lingjdauj, genhciz byaij diuz roen seveicujyi miz daegsaek Cungguek, genhciz hengz hangh cidu giz dieg siujsoq minzcuz gagguenj, genhciz gak aen minzcuz doengzcaez doxgiet buek guh、doengzcaez mwnhoengh fazcanj, cij ndaej guh daengz Gvangjsih ginghci fazcanj caeuq ndawbiengz cienzmienh cinbu.

  Gij gaijgwz fazcanj guek raeuz, gaenq haeuj daengz giz lizsij hainduj moq ndeu. Coemjdawz seizgei ndei, swngzseiq ganj hwnjbae, gyavaiq Gvangjsih ginghci ndawbiengz fazcanj, gyamaenh caeuq fazcanj yiengh minzcuz gvanhaeh seveicujyi bingzdaengj doxgiet doxhuz doxbang haenx, dwg gij gaenbonj leih’ik nemndang gyoengq cungqvunz gak aen minzcuz Gvangjsih, hix dwg aen nyienhmuengh caezcaemh cunghyangh caeuq gyoengq beksingq gak aen minzcuz daengx guek. Dangj caeuq guekgya yaek lumj doenghbaez ityiengh, daihlig bangcoengh gak hangh gensez saehnieb Gvangjsih, vih Gvangjsih ndaej youh ndei youh vaiq fazcanj cauh ok diuzgienh engq ndei. Maqmuengh gyoengq ganbu cungqvunz gak aen minzcuz Gvangjsih, gaenjmaed comzgiet youq seiqhenz aen dangj cunghyangh aeu Huz Ginjdauh dungzci guh cungjsuhgi haenx, cienzmienh gvancez gij cingsaenz cibcaet daih aen dangj, yaengx sang mbaw geizhauh hungmbwk yiengh seveicujyi miz daegsaek Cungguek, genhciz aeu Dwng Siujbingz Lijlun caeuq “Sam Aen Daibyauj” Cung’yau Swhsiengj bae ceijyinx, haeujlaeg gvancez lozsiz gohyoz fazcanjgvanh, aeu angqhoh Gvangjsih Bouxcuengh Swcigih laebbaenz 50 hopbi guh aen seizgei hainduj moq, roengzrengz youq laebdaeb gaijfang swhsiengj fuengmienh byaij ok yamqdin moq, youq genhciz gaijgwz hailangh fuengmienh roemx ok roenloh moq, youq doidoengh gohyoz fazcanj fuengmienh ndaej miz cincanj moq, youq coicaenh ndawbiengz huzciz fuengmienh raen miz cingzyauq moq, youq gyamaenh minzcuz doxgiet caeuq ginhcwng ginhminz doxgiet fuengmienh cauh ok niebcik moq, vih hwnqguh aen Gvangjsih moq engq mwnhoengh fouqmiz、engq doxgiet huzciz haenx, vih cienzmienh hwnqguh aen biengz siujgangh caiq ndaej hingz moq、cauh ok aen gizmen moq yiengh saehnieb seveicujyi miz daegsaek Cungguek、saedyienh Cunghvaz Minzcuz daih fukhwng caiq guh ok gung’yen engq hung dem!

  Cukhoh Gvangjsih Bouxcuengh Swcigih mwnhoengh fatdad!

  Cukhoh gyoengq beksingq gak aen minzcuz Gvangjsih ndangcangq vuenyungz!

                Cunghgung Cunghyangh

                Daengx Guek Yinzda Cangzveijvei

                Gozvuyen

                Daengx Guek Cwnghez

                Cunghyangh Ginhveij

                2008 nienz 12 nyied 11 hauh

  (Gij swhliu Yinzminzvangj)
Dozsiengq