Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CWNGFUJ GUNGHCOZ BAUGAU 2

——2008 Nienz 3 Nyied 5 Hauh Youq Gwnz Aen Hoih Daih Cib’it Gaiq Daengx Guek Yinzminz Daibyauj Daihhoih Daih’it Baez Veiyi

Gozvuyen cungjlij  Vwnh Gyahbauj
  
【Cihsaw Hung’iq : hung rauh iq】  Dajyaenq
      
  (2) Daihlig doicaenh gaijgwz hailangh, yawjnaek cidu gensez caeuq cauhmoq

  Cienzmienh gyalaeg lajmbanj gaijgwz. Gij lajmbanj gyoebhab gaijgwz aeu yanghcin gihgou、lajmbanj yivu gyauyuz caeuq yienh yangh caizcwng guenjleix dijci gaijgwz guh cujyau neiyungz haenx, aeundaej gaihdonsing cingzgoj youqgaenj. Cuengqlangh haeuxgwn soucawx hawciengz, saedyienh haeuxgwn gai cawx sicangzva. Cizdij linzgenz cidu gaijgwz damqra ndaej baenz. Gungsiuh hozcozse、guekmiz nungzcangz daengj gaijgwz guh ndaej swnhleih.

  Genhciz laeb caezcienz gihbwnj ginghci cidu. Gyamaenh caeuq fazcanj gunghyoujci ginghci, doicaenh guekmiz swhcanj guenjleix dijci gaijgwz caeuq guekmiz ginghci baijbouh dem gezgou diuzcingj, laebhwnj caeuq laeb caezcienz guekmiz swhcanj cuzswhyinz cidu. Gyavaiq guekmiz giyez gujfwnci gaijgwz, buek gunghswh hung giyez cizdonz hung miz gozci gingcwngh naengzlig ndeu ndaej fazcanj hungcoek. Youzcwng dijci gaijgwz swnhleih bae guh, denliz、densin、minzhangz、dietloh daengj hangznieb gaijgwz ndaej cizgiz fazcanj baenaj. 2006 nienz, daengx guek guekmiz giyez swhcanj cungjngeg beij 2002 nienz demmaj 60.98%, saedyienh leihyinh demmaj 2.23 boix, suisouh demmaj 1.05 boix. Guekmiz ginghci gij rengzlig hwnghoengh、rengzlig gaemguenj、rengzlig yingjyangj de mingzyienj lai giengz. Ceiqdingh caeuq saedhengz baenz gyoengq cwngcwz cosih, caenh’itbouh cauxok aen fazci vanzging caeuq hawciengz vanzging goengbingz gingcwngh haenx, gujli、cihciz caeuq dazyinx godij swhyingz daengj gij ginghci mbouj dwg gunghyoujci haenx fazcanj. Gij ginghci mbouj dwg gunghyoujci haenx youq coicaenh ginghci demmaj、gyadaih couhnieb、demgya suisouh caeuq gaujhoengh hawciengz daengj fuengmienh, miz cozyungh yied baez yied daih.

  Daihlig doicaenh ginhyungz、caizsui dijci gaijgwz. Cimdoiq gij canggvang guekmiz sanghyez ngaenzhangz ginghyingz guenjleix mbouj ndei、ginhyungz fung’yiemj gyahaenq, raeuz gojdon doicaenh le gaijgwz. Cungguek Gunghsangh Yinzhangz、Cungguek Yinzhangz、Cungguek Gensez Yinzhangz caeuq Gyauhdungh Yinzhangz guhbaenz gujfwnci gaijcauh caemhcaiq hwnjhaw ndaej baenz, swhcanj caetliengh caeuq canhcienz naengzlig daezsang yienhda, yinzhangz hangznieb miz bienqvaq hungloet. Giendingh bae guh gij gunghswh hwnjhaw gujgenz faen nda gaijgwz, gaijgez le gij cidusing vwndiz ciengzgeiz gauxca cwnggen hawciengz fazcanj neix. Cungdenj guekmiz baujyiemj giyez cungzcuj gaijci hwnjhaw, coicaenh le baujyiemj hangznieb riengjvaiq fazcanj. Liliz sicangzva gaijgwz byaij ok gij yamqdin miz sizcizsing. Saedhengz yinzminzbi veiliz cauxbaenz gihci gaijgwz, veiliz danzsing cugbouh demgiengz. Vaivei guenjleix dijci gaijgwz cienzmienh doicaenh. Caizsui dijci gaijgwz caenh’itbouh gyalaeg, caizcwng senjdieg ceihawj cidu caeuq goenggungh caizcwng cidu cugbouh caezcienz. 2003 nienz daengz 2007 nienz, cunghyangh caizcwng doiq deihfueng senjdieg ceihawj gyoebsuenq 4.25 fanh ik maenz, 87% yungh bae cihciz fueng dieg cungqgyang dem fueng dieg baihsae. Youq mbangj giyez sawqhengz guekmiz swhbwnj ginghyingz yawhsuenq cidu. Hainduj guh caeuq gyadaih cwnghcizsui cienjhingz gaijgwz sawqdiemj. Doengjit neiswh vaiswh giyez sojdwzsui cidu. Laebhwnj gij gunghvuyenz gunghswh cidu youz cizvu caeuq gaepbied dox giethab guekgya doengjit haenx, cobouh gveihfan le cinhdez boujdiep cidu. Douzswh dijci gaijgwz caeuq gyagwz gaijgwz caiq ndaej fazcanj baenaj.

  Gyagiengz hawciengz dijhi gensez. Swnghcanj yausu sicangzva cingzdoh onjbouh daezsang. Gij yamqdin sanghbinj riuzdoeng gyavaiq bienq yienhdaih bae. Diegdeih caeuq gvangcanj swhyenz hawciengz cizsi、canjbinj caetliengh caeuq gijgwn gijyw ancienz daengj cienhangh cingjceih aeundaej cingzyauq yienhda, baujhoh cihsiz canjgenz ligdoh gyadaih, yiemzhaenq dwkceih le doengh gij famhfap famhcoih hozdung cauh gyaj gai gyaj、famhfap conzsiuh、sanghyez yaeuh vunz、daubanj ciemqfamh gij gienzik habfap bouxwnq daengj.

  Genhciz gyadaih doiqrog hailangh. Raeuz nyinhcaen ciuqhengz gak hangh wngqcingz mwh gyahaeuj Seiqgyaiq Mouyiz Cujciz, cizgiz guh ndei gvaqdoh seizgeiz gak hangh gunghcoz. Gyalaeg gaijgwz gij ginghci dijci nangqdaengz rog guek, coicaenh mouyiz douzswh lai fuengbienh. Cuengqlangh vaimou ginghyingzgenz, daih fukdoh gyangqdaemq gvanhsui, siu cingouj boiqngeg、hijgojcwng daengj gij cosih mbouj dwg gvanhsui haenx bae, ginhyungz、sanghyez、densin daengj fuzvu hangznieb hailangh mboujduenh gyadaih. Cingouj cuzgouj sanghbinj gezgou cugbouh bienq ndei. Leihyungh vaiswh caetliengh caenh’itbouh daezsang. Saedhengz aen canloz “byaij okbae” byaij ok yamqdin maenhsaed, doiqrog ginghci doxik hozcoz aeundaej cingzyauq yienhda.

  (3) Cienzmienh gyagiengz ndawbiengz gensez, cietsaed baujcang caeuq gaijndei gij saedceij beksingq

  Raeuz genhciz dungjcouz ginghci ndawbiengz fazcanj, gyavaiq gyauyuz、veiswngh、vwnzva、dijyuz daengj ndawbiengz saehnieb fazcanj caeuq gaijgwz, cizgiz gaijgez gij vwndiz nangqdaengz yinzminz ginzcung nemndang leih’ik haenx.

  Youq gyauyuz fuengmienh. Daengx guek caizcwng gij ceiok yungh haeuj gyauyuz bae haenx haj bi gyoebsuenq 2.43 fanh ik maenz, beij haj bi gonq demmaj 1.26 boix. Lajmbanj yivu gyauyuz gaenq cienzmienh nabhaeuj caizcwng baujcang fanveiz, doiq daengx guek lajmbanj yivu gyauyuz duenhmbaek hagseng cienzbouh mienx sou yozfei cazfei、cienzbouh mienx cienz hawj saw, doiq gij hagseng ndawranz ginghci gunnanz youq ranzhag gwnninz haenx hawj swnghhoz bangbouj, sawj 1.5 ik hagseng caeuq 780 fanh boux hagseng ndawranz ginghci gunnanz youq ranzhag gwnninz haenx souh’ik. Aen gunghgenh giva fueng dieg baihsae gihbwnj bujgiz gouj bi yivu gyauyuz、gihbwnj baetcawz bouxcoz bouxcungnienz vwnzmangz haenx ciuqgeiz guhbaenz. Guekgya anbaiz cienhangh swhginh cihciz 2.2 fanh lai aen lajmbanj cunghyoz siujyoz gaijcauh gij ranz yung’yiemj、gensez 7000 lai aen hagdangz hawj hagseng ndaej youq ranzhag gwnninz, yenjcwngz gyauyuz gaenq doing daengz 36 fanh aen cunghyoz siujyoz lajmbanj, engq lai hagseng lajmbanj ndaej yiengjsouh gij gyauyuz swhyenz ndei. Engqgya yawjnaek cizyez gyauyuz fazcanj, 2007 nienz cungh、gauhdwngj cizyez gyauyuz gij hagseng youq hag de faenbied dabdaengz 2000 fanh vunz caeuq 861 fanh vunz. Bujdungh gauhdwngj gyauyuz bwnjgohswngh caeuq yenzgiuswngh gveihmoz dabdaengz 1144 fanh vunz. Gauhyau cungdenj yozgoh gensez laebdaeb gyagiengz. Laebhwnj laeb caezcienz bujdungh bwnjgoh gauhyau、gauhdwngj caeuq cunghdwngj cizyez yozyau guekgya ciengjyozginh cuyozginh cidu, cunghyangh caizcwng hangh ceiok neix daj 2006 nienz 20.5 ik maenz demgya daengz bi’gvaq 98 ik maenz, gauhyau hagseng miz 20% doxhwnj ndaej daengz bangcoh, cunghdwngj cizyez yozyau cix mauhgvaq 90%, bangcoh byauhcunj daih fukdoh daezsang. 2007 nienz hainduj youq gyauyuzbu cigsug swhfan dayoz saedhengz swhfanswngh gyauyuz mienx cienz sawqdiemj. Raeuz youq saedyienh gyauyuz goengbingz fuengmienh byaij ok le yamqdin hungnaek.

  Haeujlaeg saedhengz aen canloz baengh vunzcaiz sawj guekgya giengzdaih, daihlig gungganq、cizgiz yinxhaeuj caeuq hableix sawjyungh gak loih vunzcaiz, aen vunzcaiz duivuj cwngzsw sang、ginwngz ak haenx mboujduenh hungcoek.

  Youq veiswngh fuengmienh. Daengx guek caizcwng gij ceiok yungh haeuj yihliuz veiswngh bae haenx haj bi gyoebsuenq 6294 ik maenz, beij haj bi gonq demmaj 1.27 boix. Cungdenj gyagiengz goenggungh veiswngh、yihliuz fuzvu caeuq yihliuz baujcang dijhi gensez, aen binghvanh yawhfuengz gaemhanh caeuq wnggip yihliuz gouqyw dijhi guenj doh hawsingz lajmbanj、gunghnwngz haemq caezcienz haenx daihdaej guhbaenz. Gij bingh guekgya gveihva menjyiz yawhfuengz haenx daj 7 cungj gyadaih daengz 15 cungj, doiq boux baenz binghaiswhbing、binghgezhwz、binghhezgizcungz doengh gij binghlah youqgaenj haenx saedhengz mienx cienz gouqyw. Guekgya anbaiz swhginh gaijcauh caeuq saen hwnq 1.88 fanh aen yanghcin veiswnghyen、786 aen yienh yihyen、285 aen yienh cunghyihyen caeuq 534 aen yienh fuyou baujgenyen, vih 1.17 fanh aen yanghcin veiswnghyen boiq le yihliuz sezbei, lajmbanj yihliuz veiswngh diuzgienh gaijndei yienhda. Daengx guek laebhwnj le 2.4 fanh lai aen segih veiswngh fuzvu gihgou, cungj hawsingz yihliuz veiswngh fuzvu dijhi yienghmoq haenx caenh’itbouh laeb caezcienz. Yinzgouj caeuq giva senglwg saehnieb caiq ndaej fazcanj baenaj, aen suijbingz senglwg noix laebdaeb baujciz onjdingh. Yinzminz ndangcangq suijbingz mboujduenh daezsang, lwgnding dainomj bijliz caeuq mehmbwk daiqndangdumz bijliz mingzyienj doekdaemq, 2005 nienz moix vunz bingzyaenz ndaej gyaeu daengz 73 bi, doiq raeuz aen guekgya cingqcaih fazcanj youh miz 13 ik vunz baenzneix, dwg aen cingzcik gig mbouj genjdanh ndeu.

  Youq couhnieb fuengmienh. Genhciz saedhengz caeuq laebndei gij couhnieb cwngcwz cizgiz haenx, daj caizsui、ginhyungz daengj fuengmienh gyadaih cihciz ligdoh, cunghyangh caizcwng anbaiz couhnieb bangbouj swhginh haj bi gyoebsuenq 666 ik maenz. Hawsingz lajmbanj goenggungh couhnieb fuzvu dijhi gensez caenh’itbouh gyagiengz. Dungjcouz guh ndei couhnieb caeuq caiq couhnieb gunghcoz, cienzmienh gyagiengz cizyez ginwngz beizyin, bingzyaenz moix bi hawsingz saen demgya couhnieb 1000 lai fanh vunz、lajmbanj lauzdungliz gaijhangz couhnieb 800 fanh vunz. Daihdaej gaijgez guekmiz giyez yagangh cizgungh caiq couhnieb vwndiz, guhbaenz yagangh cizgungh gihbwnj swnghhoz baujcang gyonj haeuj saetnieb baujyiemj bae. Youq lauzdungliz cungjliengh demgya haemq lai、 couhnieb atlig gig daih cungj cingzgvang neix, baujciz couhnieb hingzsi gihbwnj onjdingh.

  Youq ndawbiengz baujcang fuengmienh. Daengx guek caizcwng gij ceiok yungh youq ndawbiengz baujcang haenx haj bi gyoebsuenq 1.95 fanh ik maenz, beij haj bi gonq demmaj 1.41 boix. Hawsingz cizgungh gihbwnj ciengxlaux baujyiemj cidu mboujduenh caezcienz, 2007 nienz camgya baujyiemj vunzsoq mauhgvaq 2 ik vunz, beij 2002 nienz demgya 5400 lai fanh vunz; guhsaed gihbwnj ciengxlaux baujyiemj goyinz canghu sawqdiemj gyadaih daengz 11 aen sengjfaenh; daj 2005 nienz hainduj lienzdaemh sam bi daezsang giyez duiyouh yinzyenz gihbwnj yangjlaujginh byauhcunj. Cunghyangh caizcwng haj bi gyoebsuenq bangbouj ciengxlaux baujyiemj cienhangh swhginh 3295 ik maenz. 2007 nienz hawsingz cizgungh gihbwnj yihliuz baujyiemj camya baujyiemj vunzsoq dabdaengz 1.8 ik vunz, beij 2002 nienz demgya yaek rim boix ndeu; 88 aen hawsingz hainduj guh hawsingz gihminz gihbwnj yihliuz baujyiemj sawqdiemj; lajmbanj hozcoz yihliuz cidu yienghmoq mboujduenh caezcienz, gaenq gyadaih daengz daengx guek 86% yienhfaenh, gij nungzminz camgya hozcoz yihliuz haenx dabdaengz 7.3 ik vunz. Daengx guek ndawbiengz baujcang gihginh rom ndaej 4140 ik maenz, beij 2002 nienz demgya 2898 ik maenz. Hawsingz lajmbanj ndawbiengz banggouq dijhi gihbwnj laebbaenz. Hawsingz gihminz ceiqdaemq swnghhoz baujcang cidu mboujduenh caezcienz, baujcang byauhcunj caeuq bangbouj suijbingz cugbouh daezsang. 2007 nienz youq daengx guek lajmbanj cienzmienh laebhwnj ceiqdaemq swnghhoz baujcang cidu, 3451.9 fanh lajmbanj gihminz nabhaeuj baujcang fanveiz. Neix dwg hangh gwnhbwnjsing cidu gensez baujcang hawsingz lajmbanj gunnanz ginzcung gihbwnj swnghhoz ndeu. Ndawbiengz fukleih、youhfuj anhci、swzsienh caeuq bouxndangcanz saehnieb caiq ndaej fazcanj baenaj. Dingj cai gouq cai gunghcoz cienzmienh gyagiengz, cunghyangh caizcwng haj bi ceiok 551 ik maenz, gyoengq ginzcung deng cai haenx gij swnghcanj swnghhoz de ndaejdaengz dojdangq anbaiz.

  
[1] [2] [3] [4] [5] [6] [7] [8]
Dozsiengq