Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CWNGFUJ GUNGHCOZ BAUGAU 1

——2008 Nienz 3 Nyied 5 Hauh Youq Gwnz Aen Hoih Daih Cib’it Gaiq Daengx Guek Yinzminz Daibyauj Daihhoih Daih’it Baez Veiyi

Gozvuyen cungjlij  Vwnh Gyahbauj
  
【Cihsaw Hung’iq : hung rauh iq】  Dajyaenq
      
Gak boux daibyauj:

  Seizneix, gou daibyauj gozvuyen, yiengq daihhoih baugau bonj gaiq cwngfuj gij gunghcoz haj bi gvaqbae neix, doiq gij gunghcoz bineix daezok genyi, cingj saemjlwnh, caemhcaiq cingj daengx guek cwnghez gak boux veijyenz daez yigen dem.

  1、Dauqyawj Gij Gunghcoz Haj Bi Gvaqbae Neix

  Daihcib gaiq daengx guek yinzminz daibyauj daihhoih daih’it baez veiyi doxdaeuj haj bi neix, dwg haj bi gig mbouj bingzciengz. Miz Cungguek Gungcanjdangj lingjdauj, gak gaep cwngfuj caeuq daengx guek gak cuz yinzminz nyinhcaen gvancez aen dangj cibroek daih cingsaenz, caezsim okrengz, giengiengz buekguh, cizgiz wngqdoiq gij gozci vanzging fukcab lai bienq, roengzrengz haekfug gak cungj gunnanz ndaw ginghci ndawbiengz fazcanj, dwkhingz le gij binghlah feihdenj youqgaenj sawqmwh fatseng caeuq gij swhyienz caihaih daegbied youqgaenj gig nit miz fwn siet naehang lizsij noix raen haenx, gaijgwz hailangh caeuq yendaiva gensez aeundaej le gij cingzcik hungloet daengx biengz cungj cimyawj.

  —— Ginghci hamj hwnj mbaek moq. 2007 nienz, ndaw guek swnghcanj cungjciz dabdaengz 24.66 fanh ik maenz, beij 2002 nienz demmaj 65.5%, moix bi bingzyaenz demmaj 10.6%, daj seiqgyaiq daihroek vih swnghwnj daengz daihseiq vih; daengx guek caizcwng souhaeuj dabdaengz 5.13 fanh ik maenz, demmaj 1.71 boix; vaivei bwhcwk mauhgvaq 1.52 fanh ik meijyenz.

  —— Siu nungzyezsui bae, gietsat le gij lizsij nungzminz ndaem naz aeu gyau suiq haenx. Daengx guek haeuxgwn lienzdaemh seiq bi demcanj, 2007 nienz canjliengh dabdaengz 50150 fanh dunh.

  —— Guekmiz giyez、ginhyungz、caizsui、vaiginghmou dijci caeuq hingzcwng guenjleix dijci doengh hangh gaijgwz neix byaij ok yamqdin youqgaenj. Cungj ginghci dwg hailangh haenx haeuj daengz duenhmbaek moq. 2007 nienz cingouj cuzgouj cungjngeg dabdaengz 2.17 fanh ik meijyenz, daj seiqgyaiq daihroek vih swnghwnj daengz daihsam vih.

  —— Gensez aen guekgya ak cauhmoq haenx fazcanj baenaj gig ndei, danh ok buek gohgi cauhmoq cingzgoj miz gozci yingjyangj hungloet ndeu. Doengh hangh gunghcwngz dapvunz mbin hwnj dingjmbwn caeuq baez daih’it damqcaz ronghndwen guh ndaej baenz caez.

  —— Cienzmienh saedyienh lajmbanj mienx cienz yivu gyauyuz, youq guek raeuz gyauyuz fazcanjsij gwnzde, neix dwg ndaek lohbaiz youqgaenj ndeu. Gij goenggungh veiswngh dijhi caeuq gihbwnj yihliuz fuzvu dijhi guenj doh hawsingz lajmbanj haenx cobouh laebbaenz.

  —— Hawsingz lajmbanj goenggungh vwnzva fuzvu dijhi cugbouh laeb caezcienz. Vwnzva dijci gaijgwz ndaej fazcanj baenaj youqgaenj, vwnzva saehnieb caeuq vwnzva canjnieb fazcanj riengjvaiq. Sanghaij Dwzauvei banh ndaej baenz. Baekging Auyinvei、Canzauvei caeuq Sanghaij Sibozvei couzbanh gunghcoz guh ndaej swnhleih.

  —— Minzcuj fazci gensez aeundaej cinbu moq, ciuqfap hingzcwng netsaed doicaenh, baujcang yinzminz gienzik caeuq henhoh ndawbiengz goengbingz cingqngeih ndaejdaengz gyagiengz.

  —— Yinzminz swnghhoz mingzyienj gaijndei. Haj bi daengx guek saen demgya hawsingz couhnieb 5100 fanh vunz. Hawsingz gihminz moix vunz bingzyaenz gij souhaeuj ndaej ceiboiq haenx daj 2002 nienz 7703 maenz demgya daengz 2007 nienz 13786 maenz, lajmbanj gihminz moix vunz bingzyaenz cingh souhaeuj daj 2476 maenz demgya daengz 4140 maenz. Aen gvaengxgyaq ndawbiengz baujcang dijhi cobouh guhbaenz. Gij vunz gungzhoj cug bi gemjnoix.

  Saehsaed cungfaen gangjmingz, haj bi gvaqbae neix dwg haj bi gaijgwz hailangh caeuq cienzmienh gensez aen biengz siujgangh ndaej fazcanj baenaj hungloet, dwg haj bi ndawbiengz swnghcanjliz caeuq gyoebhab gueklig demgiengz gig yienhda, dwg haj bi ndawbiengz saehnieb cienzmienh fazcanj caeuq yinzminz ndaejdaengz saedcaih ndeicawq engq lai, dwg haj bi gij gozci diegvih caeuq yingjyangj guek raeuz mboujduenh daezsang.

  Haj bi daeuj, raeuz laebhwnj caeuq lozsiz gohyoz fazcanjgvanh, roengzrengz fazcanj ginghci、gyalaeg gaijgwz hailangh、baujcang caeuq gaijndei gij saedceij beksingq, coicaenh ndawbiengz huzciz, ok le gig daih goengrengz, guh le haujlai gunghcoz.

  (1) Gyagiengz caeuq gaijndei hungzgvanh diuzgung, coicaenh ginghci onjmaenh riengjvaiq fazcanj

  Raeuz hopheux gaijgez gij mauzdun doedyienh ndaw ginghci yinhhengz, yawjnaek hungzgvanh diuzgung ndaej guh daengz sien liuhdaengz caeuq gibseiz、mizyauq. Geij bi daeuj, cimdoiq guding swhcanj douzswh demmaj vaiq gvaqbouh、hobi sindai douzcuengq lai gvaqbouh、vaimou swnhca lai gvaqbouh, dem nungzyez giekdaej buegnyieg daengj ginghci fazcanj ndawde gij vwndiz mbouj onjdingh、mbouj hezdiuz、mbouj ndaej lienzdaemh neix, dawzrem diegdeih、sindai song aen doucap, daezsang aen giemxdou hawciengz cinjhaeuj, habseiz diuzcingj caizcwng cwngcwz、hobi cwngcwz, laeb caezcienz canjnieb cwngcwz caeuq diegdeih cwngcwz, diuzcingj ginghci gezgou, gyagiengz doengh giz buegnyieg, guh ndei ginghci yinhhengz diuzcez. Gaengawq ginghci hingzsi bienqvaq, lai baez gibseiz diuzcingj ginhyungz gihgou cunzcienz cunjbeiginh bijliz、cunzgvanj daigvanj gihcunj liliz, doiq gij canjbinj siuhauq nwngzyenz lai、baizcuengq uqlah lai caeuq swhyenzsing canjbinj, siubae roxnaeuz gyangqdaemq cuzgouj doiqsuiq. Doengh gij hungzgvanh diuzgung cosih neix aeundaej cingzyauq yienhda, ginghci lienzdaemh haj bi baujciz bingzonj riengjvaiq fazcanj, mbouj okyienh daih hwnj daih roengz.

  Raeuz daj gyagiengz gij giekdaej nungzyez roengzfwngz, dawz coicaenh haeuxgwn demcanj caeuq nungzminz demsou dangguh aen yinvu ceiq youqgaenj, youq cidu、cwngcwz caeuq douzhaeuj fuengmienh yungh haujlai mizgven cosih hungnaek. Cienzbouh siu nungzyezsui、muzyezsui caeuq dwzcanjsui bae, moix bi gemjmbaeu diuz rap nungzminz 1335 ik maenz. Doengzseiz, laebhwnj nungzyez boujdiep cidu, doiq nungzminz saedhengz haeuxgwn cigciep boujdiep、ceh ndei boujdiep、cawx nungzgih hongdawz boujdiep caeuq nungzyez swnghcanj swhliu gyoebhab boujdiep, doiq doengh aen yienh swnghcanj haeux lai caeuq doengh aen yienh yangh caizcwng gunnanz de saedhengz dajciengj bangbouj. Doiq nungzyez caeuq lajmbanj daih fukdoh demgya douzhaeuj, cunghyangh caizcwng gij ceiok yungh youq “sam nungz” haenx haj bi gyoebsuenq 1.6 fanh ik maenz, ndawde gij yungh youq lajmbanj gihcuj sezsih gensez haenx yaek rim 3000 ik maenz, deihfueng hix haemq lai demgya le douzhaeuj. Haj bi saen demgya gij menciz mbaet raemx dwknaz haenx 666.7 fanh gunghgingj、saen demgya gij ranz yungh caujgi haenx 1650 fanh hoh、saen guh gaijcauh lajmbanj goengloh 130 fanh goengleix, gaijgez le 9748 fanh vunz lajmbanj gwn raemx gunnanz caeuq gwn raemx ancienz vwndiz, laebhwnj le doihduz binghlah hungloet fuengzre gaemhanh dijhi, fuengzre le gij ginzliuzganj gig yungzheih fatbingh daengj binghlah banhraih. Doengh gij cosih neix, gig daih diuhdoengh gij cizgizsing gyoengq nungzminz, rengzrwd doidoengh gensez yiengh lajmbanj moq seveicujyi, lajmbanj fatseng le lizsijsing bienqvaq, ik fanh nungzminz caencingq roxnyinh gig sim’angq. Nungzyez ndaej fazcanj, vih daengx aen ginghci ndawbiengz onjdingh caeuq fazcanj miz cozyungh youqgaenj.

  Raeuz ceiqdingh le guekgya cunggeiz ciengzgeiz gohyoz caeuq gisuz fazcanj gveihva ganghyau, doiq 2006 — 2020 nienz guek raeuz gohgi fazcanj guh’ok le cienzmienh baijbouh, hainduj guh le buek cienhangh hungloet ndeu. Neix doiq demgiengz gij naengzlig gag cauhmoq, doicaenh gensez aen guekgya ak cauhmoq, miz gij yingjyangj youqgaenj youh gyaeraez. Gihcuj gohyoz caeuq cenzyenz gisuz yenzgiu ndaejdaengz gyagiengz, aeundaej gauhsingnwngz gisongih、daihsam daih yizdung doengsaenq、cauhgiz haeuxnaz cabgyau daengj buek cauhmoq cingzgoj hungloet ndeu, guhbaenz buek canjbinj gag miz cihsiz canjgenz caeuq miz hawciengz gingcwngh naengzlig ndeu. Haj bi cunghyangh caizcwng gij douzhaeuj yungh youq gohgi haenx dabdaengz 3406 ik maenz. Daengx biengz gij ginghfei yungh haeuj yenzgiu caeuq sawqniemh fazcanj bae haenx, daj 2002 nienz 1288 ik maenz demgya daengz 2007 nienz 3664 ik maenz, ciemq ndaw guek swnghcanj cungjciz bijcung daj 1.07% daezsang daengz 1.49%. Gij gisuz cauhmoq dijhi gensez aeu giyez guh cawjdaej haenx ndaej fazcanj baenaj gig daih. Gij naengzlig gohgi cauhmoq daemxcengj caeuq dazyinx ginghci ndawbiengz fazcanj haenx mingzyienj demgiengz.

  Raeuz ceiqdingh caeuq saedhengz le baenz gyoengq canjnieb cwngcwz caeuq cienhangh gveihva, coicaenh canjnieb gezgou youhva swnggaep. Saenqsik、swnghvuz、hangzgungh hangzdenh、nwngzyenz moq、caizliuh moq、haijyangz daengj gauhsinh gisuz canjnieb gyavaiq fazcanj. Saenhwng canghbei ceiqcauh hangznieb cingzyauq gig yienhda. Lijyouz、ginhyungz、vuzliuz daengj yienhdaih fuzvu hangznieb fazcanj hoenghhwd. Gihcuj sezsih gihcuj canjnieb gensez fazcanj riengjvaiq, buek gunghcwngz hungloet ndeu lienzdaemh guhbaenz roxnaeuz guh ndaej swnhleih. Cingh-Cang Dietloh daezgonq bi ndeu guhbaenz doeng ci, Sanhyaz Gunghcwngz fuengz raemxrongz、fatdienh、hangzyin daengj gyoebhab yauqik cienzmienh fazveih, dienh baihsae soengq bae baihdoeng、heiqdenhyenzgiq baihsae soengq bae baihdoeng cienzmienh douzcanj, aen gunghcwngz raemx baihnamz diuh bae baihbaek guh ndaej swnhleih, Hihlozdu Suijdencan、Hungzyenzhoz Hwzdencan、Gingh-Hu Gauhsuz Dietloh caeuq cien fanh dunh gaep lenyouzcangj、bak fanh dunh gaep yizhih daengj buek hanghmoeg hungloet ndeu lienzdaemh haigoeng gensez, Bujgvangh Gidenz、Nanzbauj Youzdenz daengj damqcaz haifat ndaej daengz cincanj gig daih. Haj bi saen demgya dienhlig canggih 3.5 ik cenhvaj, dwg 1950 nienz daengz 2002 nienz 53 bi cungjhab; saen demgya goengloh 19.2 fanh goengleix, ndawde gauhsuz goengloh 2.8 fanh goengleix; saen demgya dietloh yingzyin lijcwngz 6100 goengleix; guhbaenz gij sokruz fanh dunh gaep doxhwnj haenx 568 aen; saen demgya densin yunghhoh 4.94 ik hoh. Doengh gij neix mizyauq gaijndei le nwngzyenz gyaudoeng doengsaenq canggvang, demgiengz le gij rengzlaeng ginghci ndawbiengz fazcanj.

  Raeuz gig yawjnaek mbaet yungh swhyenz caeuq baujhoh vanzging. “11•5” gveihva ganghyau dawz mbaet yungh nwngzyenz caeuq gemjnoix baizcuengq uqlah dangguh aen muzbyauh miz hanhhaed cozyungh haenx. Gaenh song bi neix, youh daezok caemhcaiq saedhengz mbaet yungh nwngzyenz gemjnoix baizcuengq uqlah gyoebhab gunghcoz fueng’anq, laebhwnj mbaet yungh nwngzyenz gemjnoix baizcuengq uqlah cijbyauh dijhi、gamcaek dijhi、gaujhaed dijhi caeuq muzbyauh cwzyinci, fatbouh le wngqdoiq dienheiq bienqvaq guekgya fueng’anq. Ciuqfap cawz daihbuek swnghcanj naengzlig doeklaeng bae, gven dingz siuj hojden 2157 fanh cenhvaj、siuj meizgvang 1.12 fanh giz, raengcawz gij lienh diet canjnwngz doeklaeng 4659 fanh dunh、lienh gang canjnwngz 3747 fanh dunh、suijniz canjnwngz 8700 fanh dunh. Hainduj guh 10 daih cungdenj mbaet yungh nwngzyenz gunghcwngz. Doengh aen dencangj coemh meiz gij dozliuz gunghcwngz de ndaej cungbyoengq fazcanj baenaj. Cunghyangh cwngfuj douzswh cihciz cungdenj liuzyiz raemx uqlah fuengzceih hanghmoeg 691 aen. Laebdaeb doicaenh baujhoh gij ndoengfaex sengcingz、ceihleix gij goek rumzsa Baekging Denhcinh daengj swnghdai gensez, haj bi gyoebsuenq doiq reih fuk ndoeng、ndaem faex cauh ndoeng 3191 fanh gunghgingj, doiq langh fuk nywj 3460 fanh gunghgingj. Gyagiengz baujhoh diegdeih caeuq raemx swhyenz, haj bi cingjleix dauqfuk haifat dembouj reihnaz 152.6 fanh gunghgingj. Ginggvaq gak fuengmienh roengzrengz, mbaet yungh nwngzyenz gemjnoix baizcuengq uqlah ndaej cizgiz fazcanj baenaj, 2007 nienz danhvei ndaw guek swnghcanj cungjciz nwngzyenz siuhauqq beij bigonq doekdaemq 3.27%, vayoz yungh heiqyangj soqliengh、wyangjvaliuz baizcuengq cungjliengh gaenh bi daeuj baez daih’it okyienh song yiengh caez doekdaemq, beij bigonq faenbied doekdaemq 3.14% caeuq 4.66%. Mbaet yungh nwngzyenz caeuq baujhoh vanzging, daj yinsiz daengz sizcen cungj miz cienjbienq youqgaenj.

  Raeuz saedhengz gihyiz fazcanj cungjdaej canloz. Fueng dieg baihsae daih haifat laebdaeb doicaenh, haj bi cunghyangh caizcwng cihciz cungdenj gensez douzswh 2800 lai ik maenz, gihcuj sezsih caeuq swnghdai vanzging gensez aeundaej fazcanj baenaj yienhda, cungdenj digih caeuq daegsaek youhsi canjnieb gyavaiq fazcanj. Ceiqdingh caeuq saedhengz aen canloz saenqhwng fueng dieg doengbaek daengj laux gunghyez gihdi, daihhingz haeuxgwn gihdi gensez mboujduenh gyagiengz, guekmiz giyez gaijgwz gaijcuj gaijcauh ndaej cungbyoengq fazcanj baenaj, gisuz canghbei hungnaek gozcanjva cingzyauq gig yienhda, swhyenzhingz hawsingz ginghci cienjhingz sawqdiemj guh ndaej swnhleih, laux gunghyez gihdi youh caiq dauq miz rengzhoengh. Ceiqdingh caeuq saedhengz gij cwngcwz cosih coicaenh fueng dieg cungqgyang hwnghwnj, dieg cujyau swnghcanj haeuxgwn gyavaiq yamqdin gensez yienhdaih nungzyez, cung’yau nwngzyenz yienzliuh caizliuh gunghyez、canghbei ceiqcauh hangznieb caeuq gyoebhab gyaudoeng yinsuh dijhi caenh’itbouh fazcanj. Fueng dieg baihdoeng laebdaeb sien fazcanj gonq, ginghci saedlig caeuq cingjdaej suciz daezswng gig yienhda. Ginghci dwzgih、Sanghaij Bujdungh Sinhgih、Denhcinh Binhhaij Sinhgih haifat hailangh gyavaiq doicaenh. Doengh gij cosih hungnaek neix, coicaenh le gihyiz ginghci hableix baijbouh caeuq hezdiuz fazcanj.

  
[1] [2] [3] [4] [5] [6] [7] [8]
Dozsiengq