Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CWNGFUJ GUNGHCOZ BAUGAU 8

——2009 Nienz 3 Nyied 5 Hauh Youq Gwnz Aen Hoih Daih Cib’it Gaiq Daengx Guek Yinzminz Daibyauj Daihhoih Daihngeih Baez Veiyi

Gozvuyen cungjlij  Vwnh Gyahbauj
  
【Cihsaw Hung’iq : hung rauh iq】  Dajyaenq
      
  (7) Doicaenh cwngfuj bonjndang gensez, daezsang gij naengzlig gaemguenj daengxbuenz ginghci ndawbiengz fazcanj

  Bi gvaq bae neix, cwngfuj bonjndang gaijgwz caeuq gensez ndaej miz cingzcik moq, hoeng liz gij maqmuengh gyoengq beksingq lij mbouj suenq gyawj. Cwngfuj ciznwngz cienjbienq lij mbouj daengz dieg, hingzcwng yauliz lij aeu daezsang dem, hingzsizcujyi、gvanhliuzcujyi haemq youqgaenj, gij yienhsiengq nduknaeuh youq mbangj di deihfueng、bouhmonz caeuq lingjyiz haemq yiemzcungh. Doengh gij vwndiz neix bietdingh aeu daih roengzrengz bae gaijgez. Aeu gaenjgaenj hopheux bauj ginghci laihwnj、bauj beksingq swnghhoz、bauj ndawbiengz onjdingh aen daihbuenz neix, gyagiengz cwngfuj bonjndang gensez.

  Genhciz ciuq fap hingzcwng. Gveihfan hingzcwng hingzveiz, guh daengz habfap hingzcwng、hableix hingzcwng、cwngzsi cingqdangq、fuengbienh beksingq yauliz sang、lauxsaed souj saenqyungh、gienzlig caeuq cwzyin dox doengjit. Haeujlaeg gvancez aen fap hingzcwng cinjhawj, laebdaeb doicaenh hingzcwng saemjbae cidu gaijgwz, gemjnoix hingzcwng cinjhawj caeuq saemjbae saehhangh, daegbied aeu gemjnoix douzswh saemjbae、hanghmoeg haedcinj, lozsiz aen douzswh cawjdaej diegvih hawj giyez. Coicaenh goengbingz gingcwngh, siucawz digih fungsaek, dwkbyoengq hangznieb gagciemq, cujciz diuhdoengh gak cungj swhyenz ndawbiengz, coicaenh ginghci laihwnj. Doenggvaq cienzmienh cingqdeng hengzsawj gij ciznwngz aen cwngfuj, cauh’ok aen fazcanj vanzging maenhndei, hawj giyez lai miz saenqsim bae douzswh, hawj ndawbiengz lai miz saenqsim bae siuhfei, hawj beksingq cungqvunz doiq guekgya fazcanj lai miz saenqsim.

  Saedhengz gohyoz minzcuj gezcwz. Gak hangh gezcwz cungj aeu guh daengz cwngzsi ciuq fap gveihfan、gocwngz minzcuj goenghai、gezgoj gohyoz goengcingq. Cwngfuj yaek cauxbaenz caeuq caephengz gij gezcwz hungnaek, cungj aeu gyagiengz diucaz yenzgiu, guh daengz caz rox gij simcingz gyoengq beksingq、lai dingq gij cawjeiq gyoengq beksingq、gyonjcomz gij dungxcaiz gyoengq beksingq, gingqcungh gwzgvanh gvilwd, sawj gezcwz guh ndaej lai liuhraen gonq、lai gohyoz、lai mizyauq. Aeu doicaenh cwng’vu goenghai, sawj gij hongsaeh goenggya bienq lai ronghcingx, baujcang gij gienzleih rox cingzgvang、gij gienzleih bae caeuqfaenh guh、gij gienzleih baij ok yigen caeuq iugouz、gij gienzleih guh gamduk gyoengq beksingq cungqvunz, hawj gyoengq beksingq cungqvunz rox cwngfuj cingqcaih siengj gijmaz、guh gijmaz, hawj gyoengq beksingq cungqvunz cungj ndaej cungfaen lijgaij、gvangqlangh haeujcoengh caeuq cizgiz caeuqfaenh guh. Bineix cwngfuj douzswh ligdoh daih、guh hanghmoeg moq lai, aeu saedbauj gamguenj daengz dieg, ciengeiz mbouj ndaej gauj doengh gij “yienghsiengq gunghcwngz” dwgrengz beksingq sainyaix cienzcaiz caeuq doengh gij “cwngciz gunghcwngz” duetliz saedsaeh haenx, baenzbaenz cungj mbouj cinjhawj leihyungh gyadaih goenggungh douzswh vih danhvei caeuq goyinz maeuzaeu seileih. Gak gaep cwngfuj cungj aeu gagrox ciepsouh yinzda gamduk caeuq cwnghez minzcuj gamduk, giengzvaq gamcaz、saemjgeiq daengj cienmonz gamduk, gig yawjnaek beksingq cungqvunz gamduk caeuq sinhvwnz yizlun gamduk, guh daengz hingzcwng gienzlig yinhhengz daengz gizlawz, gamduk couh lozsiz daengz gizde, caizcwng swhginh yungh daengz gizlawz, saemjgeiq couh gaen bae daengz gizde.

  Saedcaih cienjbienq gunghcoz cozfungh. Gak gaep cwngfuj aeu giendingh gvancez gij gezcwz baijbouh cunghyangh, gaenjmaed giethab saedsaeh, ak cauhmoq guh gunghcoz, sawj cunghyangh gak hangh cwngcwz ndaej lozsiz daengz giz dieg saedcaih, cungj sou ndaej yauqgoj saedcaih. Lingjdauj ganbu aeu haeujlaeg diucaz yenzgiu, gibseiz yawj ok vwndiz, gaijgez vwndiz; maedcaed lienzhaeh cungqvunz, gvansim gij haemzhoj cungqvunz, sijsaeq dingq gij yigen caeuq iugouz cungqvunz, vih cungqvunz siu you gej hoj. Cwngfuj gunghcoz yinzyenz aeu itcig cungj baujciz yiengh cingsaenz cangdai caengqhwnj sadsad、haenqrengz banh goengsaeh, caeuq guengjdaih beksingq cungqvunz itheij, mingz rox hojnanz hix mbouj doiqdauq, hailoh cauhmoq, ganhoj buekguh, doengzcaez hoenxhingz gij seizseiq gannanz.

  Gyagiengz gij hong lenzcwng gensez caeuq fanjdui nduknaeuh. Aeu gveihfan cidu caeuq hanhhaed gienzlig guh haedsim, cimdoiq doengh aen lingjyiz caeuq vanzcez yungzheih fatseng gij yienhsiengq nduknaeuh lai, daj giz goek de bae fuengzceih nduknaeuh. Genhgez cazbanh cawqleix gij anqgienh nduknaeuh, ciuq fap cawqfad doengh boux nduknaeuh. Raeuz itdingh aeu gaenx guh caenh cwzyin, yungh saedsaeh hengzdoengh caeuq gunghcoz niebcik, hwnqguh aen cwngfuj vih beksingq、guh saedsaeh、cinghseuq、yauliz sang, hawj beksingq cuengqsim, hawj yinzminz hab’eiq.

  Gak boux daibyauj!

  Coicaenh gak aen minzcuz doengzcaez doxgiet buekguh、doengzcaez mwnhoengh fazcanj, dwg hab gij gaenbonj leih’ik gyoengq beksingq gak aen minzcuz. Aeu cienzmienh gvancez aen fap giz dieg siujsoq minzcuz gagguenj, saedbauj cunghyangh gij cwngcwz cosih bangcoengh siujsoq minzcuz caeuq giz dieg siujsoq minzcuz ginghci ndawbiengz fazcanj haenx, ndaej lozsiz daengz giz dieg saedcaih bae. Laebdaeb gyarengz bangfuz doengh aen minzcuz vunz haemq noix haenx. Doicaenh aen hengzdoengh gauj hwng henzguek sawj beksingq bienq fouqmiz, hawj de guh doh sojmiz gij yienhfaenh henzguek caeuq Sinhgyangh Swnghcanj Gensez Binghdonz doengh aen nungzcangz youq henzguek haenx. Bangcoengh doeng fueng dieg langhciengx doihduz caeuq gij diegbya siujsoq minzcuz conzyouq haenx gyavaiq fazcanj. Giendingh mbouj bienq bae henhoh minzcuz doxgiet, caenh’itbouh cauhlaeb yiengh minzcuz gvanhaeh seveicujyi bingzdaengj、doxgiet、doxhuz、doxbang.

  Cienzmienh gvancez diuz cunghgyau gunghcoz gihbwnj fuengcim aen dangj, hawj gyoengq cunghgyaugaiq yinzsw caeuq gyoengq vunzlai saenq gyauq haenx, youq coicaenh ginghci ndawbiengz fazcanj ndawde fazveih gij cozyungh cizgiz.

  Nyinhcaen gvancez gij gyauzvu cwngcwz aen dangj, bangcoengh gyoengq beixnuengx vazgyauz youq rog guek、gyoengq vazgyauz ma guek caeuq gij vunz ndaw ranz de gvansim dem caeuqfaenh guh guekcoj yendaiva gensez lienz huzbingz doengjit daihnieb.

  Bi gvaq bae neix, gozfangz caeuq bingdoih yendaiva gensez ndaej miz cincanj youqgaenj. Yinzminz gaijfangginh vih henhoh guekgya cawjgienz、ancienz caeuq diegguek caezcingj, bangcoengh guekgya yendaiva gensez, guhbaenz gij yinvu gaenjgip hojnanz yung’yiemj hungnaek, fazveih le cozyungh youqgaenj. Youq ndaw bi moq, aeu naemqsim cienzmienh hengzguh gij lizsij sawjmingh aen bingdoih sigij moq duenhmbaek moq, doicaenh bingdoih gwzming’va、yendaiva、cwnggveihva gensez. Daihlig gyagiengz bingdoih swhsiengj cwngci gunghcoz. Netsaed doicaenh yiengh bingsaeh gyauqlienh baihlaj gij diuzgienh gihgaiva, cienjbienq baenz yiengh bingsaeh gyauqlienh baihlaj gij diuzgienh sinsizva, mboujduenh daezsang gij naengzlig wngqdoiq lai cungj yung’yiemj、guhbaenz lai yiengh bingsaeh yinvu. Cienzmienh daezsang vujgi canghbei caeuq houginz baujcang yendaiva suijbingz. Laeb caezcienz gij gozfangz gohyenz caeuq vujgi canghbei swnghcanj dijhi、bingdoih vunzcaiz gungganq dijhi caeuq bingdoih baujcang dijhi raeuz, dawz bingdoih caeuq beksingq giethab youq itheij, hawj bingdoih hamz youq ndaw beksingq. Cizgiz onjdangq bae doicaenh bingdoih gaijgwz, dawz bingdoih gensez ndaej engqgya miz rengzhoengh bae. Gyagiengz hwnqguh yinzminz vujcangh gingjcaz budui, gyaak gij naengzlig caephengz ginzvu、cawqceq gij saehgienh sawqmwh fatseng、fanjdui gungjbucujyi、henhoh ndawbiengz onjdingh. Gyagiengz gozfangz dung’yenz caeuq hwnqguh gij ligliengh bwhlaeng. Gyamaenh fazcanj bingdoih caeuq cwngfuj、bingdoih caeuq beksingq doxgiet.

  Gak boux daibyauj!

  Raeuz giendingh mbouj bienq bae gvancez doengh diuz fuengcim “aen guekgya ndeu, song cungj cidu”、“vunz Yanghgangj guenjleix Yanghgangj”、“vunz Aumwnz guenjleix Aumwnz”、gagguenj cingzdoh gig sang, caenhrengz bangcoengh Yanghgangj、Aumwnz song aen daegbied hingzcwnggih cizgiz wngqdoiq gozci ginhyungz veizgih, baujciz mwnhoengh onjdingh. Caenh’itbouh gyagiengz neidi caeuq Gangj Au doxgap guh, gyamaenh aen gozci ginhyungz cungsim diegvih Yanghgangj, coicaenh gij ginghci Aumwnz habdoh lai yiengh fazcanj. Gyavaiq doicaenh caeuq Gangj Au digih guh huqcingz mouyiz cix sawq yungh yinzminzbi bae gietsuenq. Mboujduenh gyalaeg caeuq gya’gvangq Gvangjdungh Yanghgangj Aumwnz sam dieg doxgap guh. Gyavaiq doidoengh hwnqguh diuz daihgiuz lienzdoeng Yanghgangj Cuhhaij caeuq Aumwnz、diuz dietloh lienzdoeng Yanghgangj caeuq Sinhcin feihgihcangz、diuz gauhsuz dietloh lienzdoeng Gvangjcouh Sinhcin caeuq Yanghgangj daengj giekdaej sezsih. Gyadaih neidi fuzvu hangznieb doiq Yanghgangj Aumwnz hailangh. Yungh gij cosih mizyauq, bae bangcoengh gij Yanghgangj Aumwnz giyez youq neidi haenx daegbied dwg gij giyez rauh iq de fazcanj, hoizsoeng ginghyingz gunnanz. Aen guekcoj hungmbwk raeuz, ciengzlwenx vih Yanghgangj、Aumwnz gaenjmaenh daemx hwet. Raeuz gig siengsaenq, gyoengq beixnuengx Yanghgangj、Aumwnz itdingh ndaej haekfug gij gunnanz daengjnaj, cauh’ok gij daengzcog engqgya gyaeundei dem!

  Bi gvaq bae neix, gij hong doiq Daizvanh ndaej miz cincanj youqgaenj, gij gizsi Daizvanh miz cizgiz bienqvaq, song hamq gvanhaeh dwk byoengq ciengzlad, yamq hwnj roenmoq. Aeu “92 gungsiz” guh giekdaej, song hamq gaenq hoizfuk dox siengliengz, yiengh “sam doeng” cienzmienh cigciep sueng’yiengq haenx gaenq ndaej saedyienh. Gyoengq beixnuengx song hamq baedauq engq lai engq deih、ginghci lienzhaeh engq maedcaed、vwnzva gyauhliuz engq mwn、leih’ik caezcaemh engq gvangqlangh, song hamq gvanhaeh hainduj yamq haeuj diuz roenloh huzbingz fazcanj bae. Youq ndaw bi moq, raeuz yaek laebdaeb genhciz diuz daih fuengcim cwngcwz fazcanj song hamq gvanhaeh、coicaenh guekcoj huzbingz doengjit, dawz song hamq gvanhaeh huzbingz fazcanj aen cawjdaez neix gaem youq ndaw fwngz ndaetndaet bae, cizgiz ndalaeb aen gvaengxgyaq song hamq gvanhaeh huzbingz fazcanj, roengzrengz cauh’ok aen gizmen moq song hamq gvanhaeh huzbingz fazcanj. Raeuz aeu laebdaeb cienzmienh gyagiengz song hamq ginghci hozcoz, doengzcaez wngqdoiq ginhyungz veizgih. Cizgiz doicaenh song hamq ginhyungz hozcoz, bangcoengh gij daizswh giyez youq daluz haenx fazcanj, doiq doengh aen hab diuzgienh de daezhawj yungzswh fuzvu, gujli giyez gag cauhmoq caeuq cienjhingz swnggaep. Gyagiengz song hamq sueng’yiengq douzswh caeuq canjnieb hozcoz, haigvangq caeuq gyalaeg nungzyez hozcoz. Bangcoengh mbiengj hamq baihsae haijyaz caeuq gizyawz doengh giz deihfueng lauxbanj Daizvanh douzswh haemq conz haenx fazcanj ginghci. Gyavaiq doicaenh song hamq ginghci gvanhaeh bienq cingqciengz bae, doidoengh ciemdingh cunghhozsing ginghci hozcoz hezyi, cugbouh laeb hwnj yiengh ginghci hozcoz gihci miz gij daegsaek song hamq haenx. Aeu lai hawj gij vunz song hamq dox baedauq, gyadaih ndawbiengz gak gyaiq dox gyauhliuz, daihlig hungzyangz gij vwnzva Cunghvaz, gyamaenh gij cingsaenz lienzhaeh song hamq. Aeu youq gwnz giekdaej diuz yenzcwz aen Cungguek dog, roengzrengz gyagiengz song hamq cwngci doxsaenq. Youq gwnz aen giekdaej neix, raeuz nyienh’eiq doenggvaq dox siengliengz, doiq aen vwndiz hawj Daizvanh caeuqfaenh guh gij hozdung gozci cujciz, guh’ok gij anbaiz habcingz hableix, damqra yaenglwnh gij cwngci、bingsaeh vwndiz song hamq, vih gietsat yiengh doxhaemz digdoiq、dinghlaeb huzbingz hezyi cauh’ok diuzgienh. Raeuz gig siengsaenq, miz gyoengq lwglan Cunghvaz song hamq doxgiet buekguh, couh itdingh ndaej saedyienh guekcoj vanzcienz doengjit, saedyienh Cunghvaz Minzcuz daih fukhwng!

  Gak boux daibyauj!

  Bi gvaq bae neix, gij hong vaigyauh ndaej miz cingzcik yienhda. Raeuz caeuq gozci sevei dazfwngz wngqdoiq ginhyungz veizgih. Banh baenz Aen Hoih Ya Ouh Soujnauj Veiyi, gyalai gij cwngci doxsaenq caeuq saedcaih hozcoz ndawgyang gij guekgya Yacouh caeuq Ouhcouh. Cizgiz doicaenh song mbiengj、lai mbiengj vaigyauh, youq daengx seiqgyaiq caeuq digih yezdenj vwndiz fuengmienh fazveih gensezsing cozyungh. Giendingh henhoh guekgya cawjgienz、ancienz caeuq fazcanj leih’ik, baujcang gyoengq gunghminz caeuq fazyinz guek raeuz youq rog guek gij gienzik habfap de. Cienz fueng’vih vaigyauh caiq lingh miz cincanj hungnaek, gozci diegvih caeuq yingjyangj daihdaih daezsang gvaq doenghbaez. Youq ndaw bi moq, raeuz yaek laebdaeb dawz huzbingz、fazcanj、hozcoz mbaw geizhauh neix yaengx sangsang dwk, genhciz byaij diuz roen huzbingz fazcanj, genhciz ciuqhengz gij huzbingz vaigyauh cwngcwz doglaeb gag guhcawj, genhciz doicaenh aen hailangh canloz doxik caez hingz. Gyagiengz caeuq seiqgyaiq gak guek doxndei baedauq, vih gij ginghci ndaw guek ndaej bingzonj haemq vaiq fazcanj cauh’ok aen vanzging baihrog mizleih ndeu. Raeuz yaek laebdaeb caeuq gak fueng gyalaeg guh saedcaih hozcoz, doengzcaez naenxroengz gij banhraih gozci ginhyungz veizgih, doidoengh gaijgwz gozci ginhyungz dijhi, fanjdui mouyiz caeuq douzswh baujhucujyi, coicaenh gij ginghci gwnz seiqgyaiq vaiq di dauqcungz hoizseng didmaj. Raeuz yaek laebdaeb goq gij gaenbonj leih’ik gyoengq beksingq Cungguek caeuq gyoengq beksingq gwnz seiqgyaiq gak guek, vih gaijgez yezdenj vwndiz caeuq cenzgiuzsing vwndiz guh’ok gung’yen moq. Aen cwngfuj caeuq gyoengq beksingq Cungguek, nyienh’eiq caeuq gij cwngfuj caeuq gyoengq beksingq gak guek itheij, doengzcaez wngqdoiq fung’yiemj diuhcan, doengzcaez faenyiengj aen seizgei ndei fazcanj, roengzrengz hwnqguh aen seiqgyaiq huzciz、ciengzlwenx huzbingz、doengzcaez mwnhoengh ndeu.

  Gak boux daibyauj!

  Gij yinvu daengjnaj raeuz gannanz hungloet youh lairaeuh, gij cwzyin gwnz mbaq raeuz hungnaek youh miznaj. Cingj raeuz youq aen dangj cunghyangh aeu Huz Ginjdauh dungzci guh cungjsuhgi haenx lingjdauj baihlaj, giendingh gij saenqsim bietdingh ndaej hingz, gamj bae najdoiq diuhcan, guh net guh saed, itsim gouz cinbu, cauh’ok gij niebcik moq doiq ndaej hwnj seizdaih、doiq ndaej hwnj lizsij、doiq ndaej hwnj gyoengq beksingq raeuz, haenqrengz dawz gaijgwz hailangh caeuq yendaiva gensez aen saehnieb hungmbwk neix caiq nyoengx baenaj, ciepcoux Cunghvaz Yinzminz Gunghozgoz laebbaenz 60 hopbi!

  (Gij swhliu Yinzminzvangj)

  
[1] [2] [3] [4] [5] [6] [7] [8]
Dozsiengq