CUIGAUH YINZMINZ GENJCAZYEN GUNGHCOZ BAUGAU
—— 2020 Nienz 5 Nyied 25 Hauh Youq Gwnz Gaiq Cibsam Daengx Guek Yinzminz Daibyauj Daihhoih Baez Hoih Daihsam
Cuigauh Yinzminz Genjcazyen genjcazcangj Cangh Ginh
Gak boux daibyauj：
Seizneix， gou daibyauj Cuigauh Yinzminz Genjcazyen， bauq gij hong dou hawj daihhoih， cingj saemjlwnh， caemhcaiq cingj gak boux veijyenz Daengx Guek Cwnghez daezok yigen.
Bi’gvaq doxdaeuj， ndaej aen Dangjcunghyangh aeu Siz Ginbingz dungzci guh cehsim haenx maenh’ak lingjdauj， miz Daengx Guek Yinzda nem aen cangzveijvei de gamduk rengzrwd， Cuigauh Yinzminz Genjcazyen dingjmaenh aeu Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz guh cijdauj， cienzmienh gvancez gij cingsaenz Cibgouj Daih caeuq Gaiq Cibgouj Ngeih Cung、 Sam Cung、 Seiq Cung Cienzhoih aen Dangj， nyinhcaen doeksaed gij gezyi Gaiq Cibsam Daengx Guek Yinzda Baez Hoih Daihngeih， gaenjndaet hopheux dungjcouz doicaenh aen cungjdaej baijbouh “haj yiengh caez guh” caeuq boiqhab doicaenh aen canloz baijbouh “seiq aen cienzmienh”， dawz gyaak “seiq aen eiqsik”、 giendingh “seiq aen gagsaenq”、 guh daengz dawz “song aen henhoh” daejyienh youq hengz ndei cizcwz， dawz youq mwh angqhoh Cungguek moq laebbaenz 70 hopbi、 mbeguh cawjdaez gyauyuz caeuq mbeguh ciengz doucwngh fuengzre gaemhanh binghraq bwtndat biufat ok gij cingzganj haenqrem de， cienjvaq baenz gij hengzdoengh maenhsaed souj simnduj、 rap sawjmingh， gangj cwngci、 goq daihbuenz、 maeuz hwngfat、 rox gag’ak， gak hangh hong genjcaz caiq ndaej guh baenaj.
Yienghsaeh Hengz Genjcaz Cizcwz Hoenx Binghraq
Cuigauh Yinzminz Genjcazyen genhgez gvancez aen cijsi youqgaenj Siz Ginbingz cungjsuhgi caeuq aen gezcwz baijbouh Dangjcunghyangh，youz Cunghyangh Cwngfazveij lingjdauj， daiqdaz gak gaep genjcaz gihgvanh gag bae fugsaeh aen daihbuenz fuengzre gaemhanh binghraq， youq mwh ciuqfap hoenx binghraq， souj simnduj、 rap sawjmingh. 2020 nienz 2 nyied daengz 4 nyied， gungh baecinj gaebdawz gij hingzsaeh famhcoih nangqdaengz binghraq haenx 3751 vunz、 hwnjgauq 2521 vunz， youq ndaw gvaengxdieg dajgauq vih vunzlai， lumjbaenz gamguenj gij doxgaiq fuengzraq nangqdaengz gaiqgoemqbak、 cawqceq gij huqfeiq ywbingh、baujhoh duzdoengh daengj， banhleix anqgienh 2829 gienh. It dwg gig vaiq okdaiz banh’anq gveihfan. Binghraq doiq ginghci ndawbiengz cauhbaenz cungdongj haemq haenq， ciuqfap fuengzre gaemhanh engq raen youqgaenj. Vih hab’wngq banh’anq aeuyungh， Cuigauh Yinzminz Genjcazyen 1 nyied 30 hauh okdaiz cienmonz gveihfan. Gvaqlaeng， caeuq mizgven cwngfaz bumwnz itheij fatbouh cijdauj yigen， ciuqfap fadceih gij famhcoih sienghaih fuengzre gaemhanh binghraq； caeuq Gozgyah Veigenveij daengj guh’ok baijbouh， doiq gij famhcoih sienghaih canghyw nyauxluenh yiyen haenx itlwd ciuqfap coengzyiemz gyaepgauq； caeuq Haijgvanh Cungjsuj daengj doengzcaez gveihfan fadceih gij famhcoih gazngaih henz gyaiqguek guh veiswngh cazniemh binghraq， yiemzfuengz gij fung’yiemj daj rog guek cienz haeujdaeuj； caeuq doengh aen lingjdauj gihgvanh、 cwngfaz bouhmonz doxgven haenx doengzcaez fatbouh cijdauj yigen， ok rengz bang dauq hwnjhong dauq haihong， vih dawz fuengzre gaemhanh binghraq guh baenz yienghsaeh cingqciengz caeuq fathoengh ginghci ndawbiengz gyonjcomz doi baenaj daezhawj swhfaz baujcang. Ngeih dwg cauhmoq aeu anqgienh daeuj gejfap. Wngqdoiq gij saehgienh hungnaek goenggungh veiswngh sawqmwh fatseng haenx mbouj ndaej ciuq lohsoq gaeuq bae banh. Daj 2 nyied 11 hauh hwnj， Cuigauh Yinzminz Genjcazyen baez daih’it aeu gij anqgienh baecinj gaebdawz hwnjgauq cingq banh haenx daeuj gejfap， baez daih’it caeuq Gungh’anhbu itheij fatbouh denjhingz anqlaeh， baez daih’it moix singhgiz buek ndeu， gaengawq gij daegdiemj duenhmbaek mbouj doengz fuengzre gaemhanh binghraq， faen ciendaez fatbouh 10 buek 55 aen denjhingz anqlaeh， doedok henhoh ywbingh cizsi、 fuengzraq cizsi、 hawciengz cizsi、 sevei cizsi， doiq gveihfan swhfaz、 daezsingj bouxfamh、 son’gyauq ndawbiengz ndaej gij yaugoj boq reb raen haeux. Sam dwg baujmaenh gij gienzik habfap boux nangqdaengz anqgienh. Daj hainduj couh louzsim dawzcinj faplwd cwngcwz， caenhrengz fuengzre cungbyoengq faplwd “coengzyiemz” “coengznaek” “coengzvaiq”. Bouxdengngeiz famhcoih danghnaeuz dwg bouxdengraq roxnaeuz bouxlumjdengraq， sien bauj gouqyw， daejyienh swhfaz dawz leih’ik cungqvunz cuengq haeuj sim. Doiq gij famhcoih mbaeu nangqdaengz binghraq haenx hengz aen cwngcwz cuengqsoeng cawqleix， ciuqfap mbouj baecinj gaebdawz 576 vunz、mbouj hwnjgauq 117 vunz. Youq ciengz doucwngh yiemzhaenq dingjhoenx binghraq neix， gak dieg daegbied dwg doengh aen genjcaz gihgvanh Huzbwz， baez roengzlingh couh dingq， dinghmaenh bonjndang fuengzraq caeuq ciuqfap hengzsaeh song yiengh itheij guh， haeujlaeg daengz segih caeuqfaenh guh lienzhab fuengzre lienzhab gaemhanh， yungh faplwd caeuq gamjcingz sij baenz gij gojgaeq Cungguek genjcaz dingjhoenx binghraq. Ginggvaq baez gaujniemh hung neix， dou engqgya laegdaeuq roxnyinh daengz gij ndeicawq yienhda Cunghgoz Gungcanjdangj lingjdauj caeuq yiengh cidu sevei cujyi guek raeuz， engqgya laegdaeuq roxnyinh daengz fapceih youq mwh guenj guek miz cozyung youqgaenj.
Dauqyawj Gij Hong 2019 Nienz
2019 nienz， daengx guek genjcaz gihgvanh gaenjndaet hopheux aen daihbuenz gaiq hong Dangj caeuq guekgya， lauxsaed hengzguh gij cizcwz faplwd gamduk dwg yenfaz faplwd gyauhawj haenx. Daengx bi gungh banhleix gak loih anqgienh 3146292 gienh， doengzbeij swnghwnj 9.7%. Ndawde， saemjcaz gij anqgienh gaebdawz 935432 gienh， saemjcaz gij anqgienh hwnjgauq 1413742 gienh， gij anqgienh hingzsaeh、 minzsaeh、 hingzcwng sinhsu 258520 gienh， gij anqgienh goeng’ik dajgauq 126912 gienh， gamduk gij anqgienh famhfap dajgauq 411686 gienh.
It、 Hwnjheiq caeuqfaenh ceihleix guekgya， fugsaeh aen daihbuenz hwngfat ginghci ndawbiengz
Caenhrengz hwnqguh aen Cungguek bingzan、 aen Cungguek fapceih， youq mwh doidoengh ciuq fap ceihleix aeu souj simnduj、 rap sawjmingh. Baecinj gaebdawz gak loih bouxdengngeiz famhcoih 1088490 vunz、 hwnjgauq 1818808 vunz， doengzbeij faenbied swnghwnj 3% caeuq 7.4%.
Giengiet henhoh guekgya cwngci ancienz caeuq ndawbiengz onjdingh. Gvancez cungjdaej guekgya anhcenzgvanh， ciuqfap yiemzfad gij famhcoih faenmbek guekgya、 guh diemjyaet daengj. Haeujcoengh Sinhgyangh daengj dieg genjcaz gihgvanh laeb caezcienz aen gihci dinghmaenh fanj gungjbu hen onjdingh. Giengiet fadceih “Fazlunzgungh” daengj sezgyau cujciz famhcoih. Yiemzfad gij famhcoih bauliz youqgaenj， hwnjgauq 60654 vunz， doengzbeij swnghwnj 1.6%. Ciuqfap fadceih guhcaeg daengj gij famhcoih ciemqfamh caizcanj fatseng lai neix， hwnjgauq 393587 vunz， doengzbeij swnghwnj 5.1%. Doedok fadceih gij famhcoih ndaw gvaengxdieg ancienz swnghcanj lumjbaenz cwzyin saehhux hungnaek daengj， hwnjgauq 3543 vunz， doengzbeij swnghwnj 5.9%. Gyarengz fadceih yungh densin vangjloz guh caqbenq caeuq yungh vangjloz guhdoj、 laeuh ok goyinz saenqsik daengj， hwnjgauq 71765 vunz， doengzbeij swnghwnj 33.3%， gwnz vangj mbouj hawj famhcoih ndojndang.
Yiemzgek ciuqfap dawz hangh doucwngh cienmonz baetcawz hwzsevei conxcawz seiqlig yak doi baenaj. Caeuq mizgven bouhmonz itheij ceiqdingh 8 aen vwnzgen guh cijdauj， doiq 107 aen anqgienh hungnaek cigsoh venjbaiz dukbanh， baijok conhgyahcuj gamduk daezdiemj aen anq Sunh Siujgoj、 aen anq youq cauhcangz haem gij seihaiz Du Saubingz、 aen anq fuengzcug Vangz Hungzfaz daengj anqgienh hungnaek. Gungh hwnjgauq gij famhcoih nangqdaengz hwzsevei 30547 vunz、 gij famhcoih nangqdaengz seiqlig yak 67689 vunz， doengzbeij faenbied swnghwnj 194.8% caeuq 33.2%. Genhciz “dwg hwzsevei caeuq seiqlig yak famhcoih mbouj cuengq gvaq saek boux、 mbouj dwg hwzsevei caeuq seiqlig yak famhcoih mbouj aeu saek boux dingjgaz”， sengjgaep genjcazyen gaemguenj caez gij anqgienh nangqdaengz hwzsevei caeuq nangqdaengz seiqlig yak youqgaenj haenx. Cinhcaz gihgvanh dawz gij anqgienh dangq nangqdaengz hwzsevei caeuq seiqlig yak cienjsoengq daeuj saemjcaz hwnjgauq de， genjcaz gihgvanh ciuqfap mbouj nyinhdingh 9007 gienh； dawz gij anqgienh mbouj dangq nangqdaengz gij hwzsevei caeuq seiqlig yak cienjsoengq daeuj de， ciuqfap nyinhdingh 2148 gienh. Coicaenh vat rag yw goek， hwnjgauq “bouxhaeujhah” 1385 vunz， doengzbeij swnghwnj 295.7%.
Netsaed fugsaeh hoenx ndei sam ciengz ciengq hung. Bauj ginhyungz ancienz. Hwnjgauq gij famhcoih guh ginhyungz yaeuhlox、 buqvaih ginhyungz guenjleix cizsi de 40178 vunz， doengzbeij swnghwnj 25.3%. Cuigauh Yinzminz Genjcazyen yiengq cunghyangh mizgven bouhmonz fatok hauh daihsam genjcaz genyi， doidoengh gyaak gamguenj、 daj goekgaen bae fuengzre gaemhanh. Okrengz bangcoh duetgungz gunggeng. Hwnjgauq gij “hak iq dam’aeu” ndaw gvaengxdieg banggungz 877 vunz， iet fwngz dam’aeu gij cienzngaenz doxgaiq banggungz bietdingh aeu yiemzfad. Fat swhfaz cienzgouqbang 7589 fanh maenz hawj 6000 ranz aen gya aenvih anqgienh bienq hoj dauq gungz de， doengzbeij faenbied swnghwnj 54.7% caeuq 42.4%. Engq louzsim aen vwndiz niengqyiemq cienzhong nungzminzgungh， hwnjgauq gij famhcoih yakeiq yiemq cienzhong 902 vunz， haeujcoengh nungzminzgungh hwnjgauq 10322 gienh. Vih aen Cungguek gyaeundei dem saek. Coengzyiemz fadceih gij famhcoih beijlumj uqlah vanzging、 coujswh labsab guek rog、 mbouj habfap vatgvangq， hwnjgauq 50800 vunz， doengzbeij swnghwnj 20.4%. Banhleix gij anqgienh yiengh dajgauq vih vunzlai ndaw gvaengxdieg swnghdai vanzging 69236 gienh， doengzbeij swnghwnj 16.7%. Sanhsih Vwnzyenz 32 aen giyez caeg vat gvangq luenh vat gvangq， Cuigauh Yinzminz Genjcazyen venjbaiz dukbanh， swngjveij caeuq swngj cwngfuj yawjnaek、 haeujcoengh， sam gaep genjcazyen caez guh， aeu yiengh dajgauq vih vunzlai bae coi ceihleix swnghdai 4 fanh lai moux.
Engq saedcaih haeujcoengh giyez ginghyingz fazcanj. Fapceih dwg aen vanzging ceiq ndei guh seng’eiq. Dingjmaenh doengzcaez yawjnaek ciuqfap baujcang gienzik giyez caeuq soujfap habgvi guh seng’eiq， doengzdaengj doiqdaih caeuq baujhoh guekmiz giyez minzyingz giyez、 swhbwnj ndaw guek rog guek、 giyez hung rauh iq. Maenhdingh haeujcoengh guekmiz giyez gaijgwz hwngfat， ciuqfap henhoh guekmiz swhcanj ancienz. Laebdaeb guh saed 11 hangh genjcaz cwngcwz fugsaeh minzyingz ginghci， cietsaed guh daengz siujsim gaeb vunz siujsim hwnjgauq， caemhcaiq fatbouh denjhingz anqlaeh lai gya cijdauj dem； doiq 1971 boux minzyingz giyez fucwzyinz ciuqfap ndaej mbouj caiq gyaeng haenx， genyi banh’anq gihgvanh hawj de bauj ok deq saemj； cujciz cienhangh cingleix gij anq gawq caengz siubae youh caengz cienjsoengq saemjcaz hwnjgauq、 ciengzgeiz daengx guh haenx， baizcaz ok 2687 gienh， dukcoi gietanq 1181 gienh. Huznanz Sienghdanz 57 aen minzyingz giyez nangqdaengz dengngeiz famh aen coih hai cwnghcizsui cienyungh fazbyau gyaj， deng laeb’anq cinhcaz 6 bi，aenvih saedsaeh mbouj cingcuj、baengzgawq mbouj cukgaeuq， lij caengz hawj gietanq， aen giyez nangqdaengz anqgienh de nanz yungzswh、 nanz ginghyingz. Genjcaz gihgvanh fatok gamduk yigen， 57 aen anqgienh ndaej siu caez caemhcaiq doiqboiz gij cienzhuq deng gaeuat haenx. Gij genjcaz gihgvanh caeuq swhfaz hingzcwng gihgvanh giz dieg Sanghaij Gyanghsuh Cezgyangh Anhveih okdaiz cwngcwz， hawj gij vunz giyez cingq youq mboengq segih niujcingq de bae dieg’wnq guh yiengh saeh swnghcanj ginghyingz.
Gaenx guh lai guh coi cauhmoq. Gyarengz aeu swhfaz baujhoh cihsiz canjgenz，hwnjgauq gij famhcoih ciemqfamh sanghbyauhgenz、 conhligenz、 cucozgenz caeuq sanghyez mimiz daengj 11003 vunz， doengzbeij swnghwnj 32.2%. Daj banh gij anqgienh ciemqfamh cihsiz canjgenz rox daengz， mbangj di giyez deng ciemqgienz aenvih mbouj liujgaij gij saenqsik anqgienh、 nanz bae hengz gienzgouqcaeq， yienghneix cix doigvangq gij guhfap ndei Sanghaij， youq 6 aen swngj si sawq guh youq mwh saemjcaz hwnjgauq， gag bae gangj hawj aen giyez deng ciemqgienz rox de miz gienz hwnjgauq， doengzcaez yawjnaek hingzsaeh gyaepgauq caeuq minzsaeh hengienz. Dojdangq banhleix gij anqgienh nangqdaengz gisuz cauhmoq. Cezgyangh aen giyez ndeu cauhmoq yenzgiu haifat “aenbyaijyamq bingzbanj”， aenvih caengz miz guekgya biucinj， deng loek laeb’anq dwg famh aen coih caux、 gai gij canjbinj gyaj rwix. Genjcaz gihgvanh gag bae yaeng aen bouhmonz guenj canjbinj ndeirwix de， yienghneix Gozgyah Sicangz Genhgvanj Cungjgiz daj neix cix dingh roengz gij guekgya biucinj aenbyaijyamq. Aen anq neix ciuqfap mbouj hwnjgauq，ndaej doidoengh hangznieb cauhmoq hwngfat.
Maenhsaed doinyoengx fanj nduknaeuh doucwngh guh baenaj. Genhveij caeuq genjcazyen dox boiqhab、 dox hanhhaed banh’anq， neix dwg cwngci aeu guh caemh dwg fapdingh wngdang guh. Souhleix gak gaep genhveij cienjsoengq yiengh famhcoih cizvu 24234 vunz， doengzbeij swnghwnj 50.6 %. Gaenq hwnjgauq 18585 vunz， doengzbeij swnghwnj 89.6%； mbouj hwnjgauq 704 vunz， doiqdauq bouj diucaz 7806 vunzbaez， gij beijlwd mbouj hwnjgauq、 doiqdauq bouj diucaz haenx doengzbeij faenbied demgya 1.1 caeuq 16.3 aen bakfaendiemj. Doiq Cinz Gvanghyungz、 Cinz Gangh gungh 16 boux danggvaq swngjbugiz ganbu de guh hwnjgauq. Doiq 13 aen anqgienh bouxdengngeiz famhcoih dam’aeu gwn’oet deuzndoj、 dai bae， daezok cingjgouz aeu muedsou gij famhfap sojndaej gyoengqde. Doiq gij famhcoih boux guh hong swhfaz famh daengz gienzleih gunghminz、haih daengz dawzfap goengcingq， laeb’anq cinhcaz 871 vunz， dingh aeu cawzseuq gij vunz haih doih ndaw swhfaz.
Lienzdaemh guh saed “gij genjcaz genyi hauh daih’it”. Cuigauh Yinzminz Genjcazyen youq 2018 nienz doiq fuengzceih ndaw hag ej loengh fatok gij genjcaz genyi hauh daih’it gvaqlaeng， bi’gvaq youh caeuq Gyauyuzbu itheij bae 8 aen swngj gih si guh duzdauj， caeuq doengh bouxdaeuz aen sengj dieg Hozbwz、 Hoznanz、 Sanjsih daengj ndaw haemh daengz gij hagdangz dozninz cazyawj ancienz guenjleix；gij genjcaz gihgvanh caeuq gyauyuz bumwnz deihfueng lienzhab cazdamq cunghsiujyoz hagdangz、 youwzyenz 3.8 fanh lai aen， doidoengh hwnqguh aen hagdangz bingzan. Doigvangq gij guhfap ndei doengh dieg Sanghaij、 Huzbwz、 Cungzging， caeuq Gungh’anhbu、 Gyauyuzbu caez dingh aen cidu doiq boux yaek baenz gyaucizgungh sien caz miz maz famhfap gonq； caeuq Gyauyuzbu、 Gozgyah Veigenveij daengj 8 aen buveij caez dingh aen cidu ap bauq bouxcaengzhung deng ciemqhaih， dawz gienh saeh baujhoh lwgnyez guh ndaej engq netsaed、engq sijsaeq. Hwnjgauq gij famhcoih ciemqhaih bouxcaengzhung beijlumj eij loengh、 gvaijgai、 yakdaih daengj 62948 vunz ， doengzbeij swnghwnj 24.1%. Cienmonz fat ok genjcaz cwngcwz： Fanzdwg yaeuh、 bik bouxcaengzhung caeuqfaenh miz cujciz famhcoih， gyonq ciuqfap coengzyiemz gyaepgauq、 daj naek daezok lienghhingz genyi. Eifap fadceih bouxcaengzhung famhcoih， doiq gij yiengh simyak、 guhsaeh doeg、 hougoj youqgaenj de baenzbaenz cungj mbouj yungz saekdi； caengz daengz nienzgeij dawz hingzsaeh cwzyin mbouj gyaepgauq ne， ciuqfap soengq bae souyungz gyauyangj roxnaeuz bae cienmonz yozyau coengzyiemz niujcingq. 3 fanh lai boux genjcazgvanh youq cunghsiujyoz dang fazci fuyaucangj， guh daengz son’gyauq fapceih daj lwgnyez guh hwnj.
Yungh caencingz guh daengz aen cidu beksingq daeuj saenq cungj hoizvah. Gij saeh beksingq yousim de， vunz caiq mbouj gaeuq hix aeu guh daengz， hong caiq nanz guh hix aeu guh ndei. Daengx guek genjcaz gihgvanh sou ndaej saenq beksingq 491829 gienh， cungj youq 7 ngoenz dauqndaw naeuz hawj boux sijsaenq rox “sou daengz lo、 bouxlawz banh”； gij beijlwd 3 ndwen dauqndaw hoizvah baenzlawz banh roxnaeuz banh ndaej baenzlawz yiengh miz daengz 99.2%. Gienh gienh hoizvah mbouj dwg ceiq gaenjyiuq， anq giet saeh liux cij dwg gaenbonj. Seiq gaep genjcazcangj ciepdaih vunzlai daeuj saenq daeuj cunz 16135 baez. Doiq gij anqgienh ngeiznanz youh gauq lai bi de， cingj yinzda daibyauj、 cwnghez veijyenz、 yinzminz genhduzyenz、 segih daibyauj daengj caez daeuj dingqaeu gangjmingz 1244 gienh， baij saehsaed、 ok baengzgawq、 gej fapleix. Bi’gvaq nienzdaej youh haidoeng lenzvangj banh saenq， riuzcienj、 cazcam、 lwnh dauq daj goek daengz byai banh engq vaiq.
Doenggvaq banh’anq dazyinx gij gvanhnen fapceih ndawbiengz，fathoengh gij hwzsinh gyacizgvanh sevei cujyi. Cijdauj deihfueng genjcaz gihgvanh caz cingcuj doengh gij anqgienh yingjyangj hung haenx， beijlumj aen anq fanj gaj dieg Laizyenz、 aen anq Dungj Minzgangh dieg Hingzdaiz、 aen anq Swng Cunhbingz dieg Hangzcouh、 aen anq Dangz Sez dieg Li’gyangh， ciuqfap nyinhdingh dwg cingqdangq fuengzhen， dazyinx caeuq dauqcungz dajcauh aen leixniemh cingqdangq fuengzhen， hawj bouxboux cungj rox “faplwd mbouj ndaej nyienghbouh hawj mbouj soujfap”. Gij genjcaz gihgvanh dieg Gyanghsih、 Gvangjsih daengj doiq ciemqhaih gij gienzik Fangh Ciminj、 Leiz Fungh daengj yinghlez daezhwnj yiengh minzsaeh dajgauq vih vunzlai 48 gienh； gij genjcaz gihgvanh dieg Sanhsih、 Sanjsih daengj caeuq ginhsw genjcaz gihgvanh doxboiqhab， doiq gaijndei guenjleix gij gaiqhwnq geiqniemh yinghlez daezok genjcaz genyi 1047 gienh. Diuz daejsienq gijgwn gijyw ancienz mbouj hawj bungq， vih vunzlai banh yiengh gijgwn gijyw dajgauq 35778 gienh； damqra baenzlawz yungh yiengh minzsaeh dajgauq vih vunzlai， fad yiengh saeh haih daengz gijgwn ancienz， fad couh fad haenq daengz mbouj gamj caiq famh bae. Caeuq aen bouhmonz mizgven caez fat aen cijdauj yigen fadceih yiengh famhcoih hoenx moeb gingjcaz， henhoh minzgingj caepfap ancienz couh dwg henhoh gaiq naj fapceih guekgya.
Fugsaeh baujcang saedhengz guekgya canloz. Ceiqdingh gij cwngcwz swhfaz fugsaeh baujcang gensez Yez Gangj Au Davanhgih. Guhsaed doihaeuj genjcaz giz bang giz， hawj gaiq hong genjcaz dieg Sinhgyangh、 Sihcang、 Cinghhaij caeuq dieg Gyanghsih Fuzgen Gvangjdungh aen Cunghyangh Suhgih yienzlaiz youq haenx engq ndei hwngfat. Gij genjcaz gihgvanh dieg Liuzningz Gizlinz Hwzlungzgyangh guhdoih coengh fathoengh caez Doengbaek. Gij genjcaz gihgvanh dieg Bwzgingh Denhcinh Hozbwz caez fugsaeh minzyingz ginghci、 caez banh gij anqgienh doxnangq、 ciuqfap baujcang lizswh hamj dieg guh saeh. Rangh dieg ginghci Dahcangzgyangh 11 sengj si genjcaz haeujlaeg doxbang， dawz buqgej “duenh gwnz duenh laj mbouj doengzyamq、 hamq swix hamq gvaz mbouj caezbyaij” aen saeh nanz guenj vanzging neix doi baenaj. Youq dieg gizsawqguh swmou gyalaeg aen gihci dawz genjcaz gihgvanh doxgap baez cingjdaej，haeujcoengh Haijnanz hwnqguh aen sok mbouj hanhhaed gaicawx，Denhcinh genjcaz gihgvanh youq swmougih anbaiz bang vunz miz dungxcaiz ndeu hoizdap gij saeh nangqdaengz genjcaz.
Ngeih、 Gagrox hab’wngq seizdaih hwngfat， guhsaed hengz ndei gij saeh genjcaz fapdingh
Gvancez caephengz aen gezyi Gaiq Cibsam Daengx Guek Yinzda Baez Hoih Daihngeih yiengh iugouz moq aeu “engq ndei guhbaenz gij hong yinzminz genjcazyen， baudaengz genjcaz hingzsaeh、 minzsaeh、 hingzcwng、gij dajgauq vih vunzlai”， guh daengz gij gvidingh moq aen cujcizfaz yinzminz genjcazyen， mwh banh’anq aeu souj simnduj、 rap sawjmingh.
Roengzrengz guh ndei hingzsaeh genjcaz. Daj Cungguek moq laebbaenz 70 bi daeuj， Cunghgoz Gungcanjdangj lingjdauj yinzminz guh ok le gij saeh mbouj bingzciengz hawj ginghci riengjvaiq hwngfat， youh baujciz aenbiengz ciengzgeiz onjdingh. 1999 nienz daengz 2019 nienz， genjcaz gihgvanh hwnjgauq gij famhcoih bauliz youqgaenj de daj 16.2 fanh vunz doekdaemq daengz 6 fanh vunz， moix bi bingzyaenz doekdaemq 4.8%； buenq naenghlauz sam bi doxhwnj daj 45.4 % doekdaemq daengz 21.3%. Caeuq neix doengzseiz， gij famhcoih yiengh moq demlai， “laeujfiz haici” dingjlawh guhcaeg baenz yiengh hingzsaeh gyaepgauq ceiq lai， gij famhcoih nyauxluenh hawciengz de demmaj 19.4 boix， gij famhcoih cauh、gai sanghbinj gyaj sanghbinj yaez demmaj 34.6 boix， gij famhcoih ciemqfamh cihsiz canjgenz demmaj 56.6 boix. Gij famhcoih dub vunz gaj vunz caeuq gij deng buenq naek de yied daeuj yied noix， fanjyingj le ndawbiengz cianh lienzdaemh bienq ndei， beksingq saedsaed caihcaih roxnyinh ancienz；cungj famhcoih sienghaih ginghci sevei guenjleix cizsi yienghmoq yied daeuj yied lai， biujmingz sevei ceihleix haeuj daengz gaihdon moq， beksingq maqmuengh raen daengz ndawbiengz miz yiengh hwngfat moq. Hingzsaeh famhcoih daj laebfap gveihfan daengz swhfaz gyaepgauq bienqvaq gig daih， gij leixniemh caeuq cwngcwz hingzsaeh genjcaz bietdingh aeu cienzmienh hab’wngq、 roengzrengz riengz guh. Aeu guhdaengz gwzgvanh goengcingq. Genjcazgvanh eifap hengzguh gij cwzyin dazyinx ceijgauq cwngmingz famhcoih， gawq dwg boux gyaepgauq famhcoih youh dwg boux baujhoh bouxfouzcoih. 2019 nienz，daengx guek genjcaz gihgvanh doiq gij mbouj gapbaenz famhcoih roxnaeuz baengzgawq mbouj gaeuq de gietdingh mbouj baecinj gaebdawz 191290 vunz、 mbouj hwnjgauq 41409 vunz， caeuq 5 bi gonq doxbeij faenbied swnghwnj 62.8% caeuq 74.6%. Doiq gij vunz youq mwh cinhcaz、 saemjbuenq mbouj yungh laebdaeb gyaeng haenx， genyi bauj ok deq saemj 75457 vunz， caeuq 5 bi gonq doxbeij swnghwnj 279%. Cuigauh Yinzminz Genjcazyen Genjcaz Veijyenzvei yaenglwnh “aen anq Cangh Cicauh gaemh’ej”， nyinhnaeuz baez hwnjgauq、 baez caizbuenq yienzlaiz baengzgawq mbouj gaeuq， ciuq aen yenzcwz coih ngeiz dangq ndwi， haeujcoengh aen yigen gaijbuenq fouzcoih Sanhdungh genjcaz gihgvanh daezok haenx. Cienzmienh gvancez aen hingzsaeh cwngcwz soeng yiemz doxbouj. Aen cidu nyinh coih nyinh fad ciuq soeng cawqfad ndaw Aen Fap Hingzsaeh Dajgauq doekdingh haenx iugouz genjcaz gihgvanh aeu gij saedsaeh、 baengzgawq gaenq daenghgeiq de daeuj coi bouxdengngeiz famhcoih gagnyienh nyinh coih、 nyinh aen lienghhingz genyi， doengzseiz dingqaeu gij yigen lizswh、 nai ndei bouxdenghaih， gij nanzdoh banh’anq engq hung、 gij cwzyin genjcaz engq naek. Cuigauh Yinzminz Genjcazyen caeuq mizgven bouhmonz ceiqdingh saedhengz yigen， haenqrengz doicaenh doeksaed. Bi’gvaq 12 nyied habyungh beijlwd dabdaengz 83.1%， lienghhingz genyi ndaej yungh beijlwd 79.8%； itsaemj fugbuenq beijlwd 96.2%， sang gvaq gij hingzsaeh anqgienh wnq 10.9 aen bakfaendiemj， hawj mauzdun vaqgej engq vaiq engq ndei、 hawj ndawbiengz engq huzndei. Hingzsaeh dajgauq gamduk aeu ndaej saedyauq. Dawz gij gingniemh Bwzgingh、 Sanhsih、 Gvangjdungh doigvangq daengz gizwnq， youq gungh’anh gihgvanh caepfap banh’anq guenjleix cungsim、 fapceih bouhmonz roxnaeuz baicuzsoj laeb genjcazsiz caemhcaiq baiq vunz bae capyouq， roengzrengz daj hainduj couh bae gamduk laeb’anq caeuq cinhcaz hozdung. Doiq gij hingzsaeh caizbuenq nyinhnaeuz miz loeng dahraix de daezok dingjgauq 8302 gienh， fazyen gaenq gaijbuenq、 fatdauq dauqsaemj 4364 gienh. Ciengzseiz cingleix gij anqgienh at nanz mbouj giet， doiq 367 vunz youq mwh cinhcaz、 saemjbuenq deng gyaeng 5 bi doxhwnj lij caengz gietanq de guh aen guh aen anqgienh bae haedcaz， gaenq ciuqfap niujcingq 189 vunz. Niujcingq gij mbouj habdangq gemjhingz、 gyajcuengq、 camhseiz hawj youq rog lauz caephengz hingzfad 38035 vunzbaez. Doekdingh mbouj bienq bae hengz aen lingh mienxcoih youz Siz Ginbingz cujsiz fatok caeuq aen gietdingh mienxcoih youz Daengx Guek Yinzda Cangzveijvei fatok， daj goek daengz byai gamduk mienxcoih guh ndaej baenzlawz， saedbauj guh ndaej cinjdeng mbouj loek hengz ndaej habngamj.
Roengzrengz engq guh ndei minzsaeh genjcaz. Genjcaz gihgvanh souhleix minzsaeh caiqgauq yied daeuj yied lai， bi’gvaq souhleix 142203 gienh， doengzbeij swnghwnj 23.9%. Yawjnaek cingcinj gamduk. Roengzrengz banh ndei gij anqgienh denjhingz ndaej dazyinx hwngfat ginghci ndawbiengz， yungh de daeuj daiqyinx banhleix cungj anqgienh doxlumj. Daezok minzsaeh dingjgauq 5103 gienh， doengzbeij swnghwnj 29.8%； fazyen gaenq gaijbuenq、 fatdauq cungzsaemj、 diuzgaij、 huzgaij soudauq hwnjgauq 3172 gienh， gaijbienq beijlwd doengzbeij gyalai 1.9 aen bakfaendiemj. Daezok caiqsaemj genjcaz genyi 7972 gienh， doengzbeij swnghwnj 95.1%； fazyen gaenq caizdingh caiqsaemj 4583 gienh， caijyungh yigen beijlwd doengzbeij gyalai 5.3 aen bakfaendiemj. Haenqrengz cingjceih gij dajgauq gyaj. Cuigauh Yinzminz Genjcazyen cujciz guh cienhangh gamduk， niujcingq gij dajgauq gyaj 3300 gienh， hwnjgauq gij dengngeiz famhcoih de 1270 boux，doengzbeij faenbied swnghwnj 122.4% caeuq 154%. Cezgyangh Sauhingh genjcaz gihgvanh raen miz bouxnangqsaeh ndeu hwnjgauq deih lai， caemh aen fazyen vihneix buenq suenqsoq 50 gienh. Gij ciqdiuz nangqdaengz anqgienh haenx mbouj miz coh bouxciq、 mbouj iekdingh leihsik， mbouj miz gij baengzcingq gaenq ceihawj， bouxdenggauq hix mbouj daengz fapdingz ciepsouh saemjbuenq， gijneix gizsaed dwg bang gauj “canghongx daigvanj” de vih aeundaej leih’ik mbouj habfap cix bae guh dajgauq hawgyaj. Ndigah couh gamduk siu aen buenqgiet baeznduj bae caemhcaiq dawz gij raizriz nangqdaengz hwzsevei haenx cienjgyau hawj gungh’anh gihgvanh， bang vunz neix 14 boux deng gaeb lo. Caez bae buqgej nanz caephengz. Doiq gij yiengh youq mwh caephengz buenqgiet famhfap de daezok genjcaz genyi 23437 gienh， baecinj gaemhdawz 2318 vunz dingj mbouj caephengz buenqgiet、caizdingh haenx， doengzbeij faenbied doekdaemq 1.6% caeuq 2.4%.
Roengzrengz guhsaed hingzcwng genjcaz. Doiq gij hingzcwng buenqgiet、 caizdingh nyinhnaeuz miz loengloek dahraix daezok dingjgauq 156 gienh， doengzbeij swnghwnj 33.3%， daezok caiqsaemj genjcaz genyi 83 gienh， doengzbeij doekdaemq 7.8%. Cimdoiq mbangj di hingzcwng dajgauq anqgienh mbouj hab diuzgen hwnjgauq cix deng buekdauq， aen vwndiz dajgauq doxceng caengz ndaej gaijgez， anqgienh yienznaeuz giet le saeh nanz gaijgez， bi’gvaq 10 nyied hainduj guh cienhangh gamduk， doenggvaq coi huzgaij、 coi niujcingq gij saeh famhfap、 daezhawj swhfaz gouqbang daengj fuengsik， gaenq vaqgej hingzcwng doxceng 378 gienh， roengzrengz guh daengz anq giet saeh liux biengz huz. Miz bouxnangqsaeh ndeu nyinhnaeuz gij cienz ciengxlaux baujyiemj de ndaej hingzcwng gihgvanh haedcinj le cij fat， yienghneix mbouj deng， iugouz daj mwh duiyouh hwnj couh bouj fat， aenvih mauhgvaq aen geizhanh hwnjgauq deng buekdauq. Genjcaz gihgvanh saemjcaz le nyinhnaeuz anqgienh nangqdaengz gij gienzik hungnaek bouxnangqsaeh， aen geizhanh hwnjgauq yienznaeuz gvaq le， hoeng hingzcwng hingzveiz miz giz mbouj habdangq dahraix， genyi bouj fat， vwndiz doeksat ndaej gaijgez.
Roengzrengz guhndei goeng’ik dajgauq genjcaz. Geiqmaenh genjcazgvanh miz aen cizcwz sinzswng daibyauj gij leih’ik goenggungh， hawj cungj leixniemh song hingz lai hingz caez hingz haeuj daengz simvunz bae， banhleix minzsaeh goeng’ik dajgauq 7125 gienh、 hingzcwng goeng’ik dajgauq 119787 gienh， doengzbeij faenbied swnghwnj 62.2% caeuq 10.1%. Genhciz dawz caengz dajgauq couh guhdaengz henhoh goeng’ik dangguh aen swhfaz cangdai ceiq ndei. Genjcaz gihgvanh caeuq cwngfuj bouhmonz yienznaeuz faengoeng mbouj doengz， hoeng aen moegbiu fugsaeh vunzlai、 gyaepgouz fapceih doxdoengz， goeng’ik dajgauq bingq mbouj dwg “mbouj hingz couh saw”. Doigvangq gij gihci mbouj faen gwnzlaj itlwd bingzdaengj caeuq goenghai soengqdaengz dieg Fuzgen、 Sanhdungh daengj， gaprengz bae cingjgaij. “Nyeux gyaeuj dauq yawj” gij anq 10 lai fanh gienh caengz dajgauq couh guh’ok genjcaz genyi 2018 nienz banhleix de doeksaed ndaej baenzlawz， raen miz 8751 gienh gvaqgeiz caengz hoizfuk、 saedsaeh caengz cingjgaij、 cingjgaij mbouj daengzdaej， riengz bae dukcoi hengzguh cizcwz. 2019 nienz fatok 103076 gienh gij anqgienh caengz dajgauq couh guh’ok genjcaz genyi de，doengzbeij swnghwnj 1.8％； hoizfuk cingjgaij beijlwd dabdaengz 87.5%，doengzbeij swnghwnj 15.8 aen bakfaendiemj，daih dingzlai vwndiz youq dajgauq gaxgonq couh ndaej gaijgez， douzhaeuj swhfaz ligliengh ceiq noix ndaej sevei yaugoj ceiq ndei. Hwzlungzgyangh Swngj Yinzminz Genjcazyen cienhangh diucaz baez gung raemx daihngeih ancienz mbouj ancienz， aeu genjcaz genyi fat hawj swngj cwngfuj le ndaej yawjnaek raixcaix， coi baenz cingjgaij doeksaed. Doiq gij fatok goenggauq caeuq genjcaz genyi le goeng’ik deng sonjhaih caengz ndaej gaijgez de， guh goeng’ik dajgauq 4778 gienh，doengzbeij swnghwnj 48%. Fazyen gaenq saemjgiet 3238 gienh， haeujcoengh gij yigen hwnjgauq 3225 gienh. Gaenxmaenx、 onjdangq haigvangq aen gvaengh banh’anq. Doiq gij vwndiz goeng’ik deng sonjhaih beksingq fanjyingj haenqrem hoeng mbouj youq ndaw gvaengh faplwd mingzbeg doekdingh hawjgienz de， ngeixnaemj le sawq bae laeb’anq 7950 gienh. Bwzgingh Haijden、 Huzbwz Ginghmwnz daengj dieg genjcaz gihgvanh doiq doengh aen bouqdaeuz seiqhenz hagdangz gai ien hawj lwgnyez fatok genjcaz genyi， dukcoi mizgven bouhmonz cawqleix； Gozgyah Veigenhveij daengj 8 aen buveij cawjdoengh gyalaeg baijbouh gaemhanh mbouj hawj bouxcoz nyezrauh gwn ien. Yiengh hongsaeh genjcaz goeng’ik dajgauq ndaej gak gaep yinzda yawjnaek haeujcoengh. Daengx Guek Yinzda Cangzveijvei dingqaeu saemjlwnh cienhangh baugau caemhcaiq guh ciendaez cazcam， 435 boux Daengx Guek Yinzda daibyauj daezok yigen genyi； 15 aen sengjgaep yinzda cangzveijvei dingqaeu cienhangh baugau， 11 aen sengjgaep yinzda cangzveijvei guh’ok cienhangh gietdingh， mizrengz bae gamduk caeuq haeujcoengh.
Sam、 Haenqrengz guhndei bonjndang，roengzrengz daezswng gij naengzlig hengzguh genjcaz cizcwz
Nyinhcaen doeksaed gij iugouz youqgaenj “seiq yiengh ndongj lumj diet” Siz Ginbingz cungjsuhgi daezok， haeujlaeg gvancez Aen Fap Genjcazgvanh， yungh gij bonjsaeh dingj ndaej geng bae souj simnduj、 rap sawjmingh.
Aeu gij cwngci gensez Dangj raeuz cuengq youq baih gonq. Aeu aen leixniemh moq swhsiengj moq canloz moq cienzmienh ciuqfap guenj guek Siz Ginbingz cungjsuhgi geiq haeuj ndaw sim bae， dingjmaenh hawj Dangj raeuz baenzbaenz cungj ndaej lingjdauj yiengh hong genjcaz. Gagrox ciepsouh cunghyangh liebyawj， yiemzgek bae hengz cwngci cwzyin guh cingjgaij. Maenhsaed bae guh “mbouj lumz simnduj、 geiq maenh sawjmingh” cawjdaez gyauyuz， hagsib “bouxbuekguh ceiq gyaeundei” Cangh Byauh、 Fangh Gungh， Banh Ciyungz、 Sih Cinglanz、 Vangz Yungj daengj yienghsiengq genjcazgvanh seizdaih moq boux boux cungj haenh. 12 boux genjcaz yinzyenz vih Dangj caeuq yinzminz gien ok diuz mingh dijbauj， Gvangjsih Yiz Yenbingz hengzguh cizcwz vutmingh youq aen gangjvei guh gunghsu de ceiqgyaez haenx， Huzbwz Yungz Cwngzveij、 Fuzgen Lij Vang’ya vutmingh youq mwh guh gaiq hong fuengzre gaemhanh binghraq， Haijnanz Vangz Caizdungh laemx youq mwh guh banggungz， soujmaenh simnduj、 raphwnj sawjmingh couhdwg ceiq ndei bae siengjniemh gyoengqde.
Swhfaz dijci gaijgwz ndaej gyamaenh caeuq guhndei. Yunghsim gvancez gij cingsaenz Gaiq Cibgouj Sam Cung Cienzhoih aen Dangj raeuz， cienzmienh bae guhbaenz gij gaijgwz dauqcungz laeb aen gihgou baihndaw genjcazyen swngj si yen sam gaep， hawj de bienq ndaej engq ciennieb. Gyalaeg swhfaz cwzyinci gyoebhab boiqdauq gaijgwz， ceiqdingh aen banhfap hawj yenzngwz genjcazgvanh doiqok， laebhwnj aen gihci sengjgaep caezguenj、 yawj seiz diuzcingj yenzngwz. Boux genjcazgvanh nyaemh lingjdauj cizvu de daiqdaeuz banhleix gij anqgienh ngeiznanz fukcab de， seiq gaep genjcazcangj banhleix anqgienh 57636 gienh、 lezsiz sinjveijvei 5682 baez， doengzbeij faenbied swnghwnj 57.2% caeuq 56.4%. Hawj aen diegvih cawjdaej boux genjcazgvanh banh’anq ndaej engq doedyienh， caemh hawj genjcazcangj、 bouxfucwz yezvu bumwnz ndaej lai miz cwzyin guh gamduk.
Hwnqlaeb aen biucinj bingzgyaq caetliengh yauqlwd “anq — gienh beij”. Aen anq bouxnangqsaeh， hawj banh’anq gihgvanh gvaq geij fwngz byaij geij aen cwngzsi le， couh deng gyoebsuenq baenz geij aen “anqgienh”， hoeng doiq bouxnangqsaeh daeuj gangj vanzlij dwg aen “anqgienh” ndeu. “Anqgienh” ndaej gvaq swhfaz cwngzsi yied lai、 “anqgienh” deng gyoebsuenq yied lai， hauqfeiq swhfaz swhyenz yied lai， bouxnangqsaeh lai baez dajgauq hix yied naiq. “anq — gienh beij” ceiq ndei dwg 1 beij 1， couhdwg bouxnangqsaeh aen “anqgienh” ndeu， danghnaeuz daengz genjcaz cwngzsi le baez ndeu banh liux， swhfaz swhyenz douzhaeuj ceiq noix， bouxnangqsaeh gamjsouh ceiq ndei. Laeb aen bingzgyaq biucinj neix， couh siengj bae gamduk dazyinx genjcazgvanh hawj gyoengqde cwzyin eiqsik bienq ak、 swhfaz naengzlig bienq rengz， roengzrengz dawz hong guh daengz ceiq ndei， baexmienx guh ndwi gij cwngzsi mbouj yungh miz haenx. Gij “anq — gienh beij” hingzsaeh genjcaz bi 2019 dwg 1 beij 1.87， “gienh” doengzbeij roengzdaemq 0.02， gemjnoix le baez banh’anq mboujyungh miz de daihgaiq 3 fanh gienh.
Cauhmoq guhndei hongsaeh genjcaz. Coihdingh gij hingzsaeh susung gveihcwz yinzminz genjcazyen. Caeuq Cuigauh Yinzminz Fazyen gapbanh 10 geiz yenzsiuhbanh， fazgvanh、 genjcazgvanh caemh aen ban beizyin， hawj gyoengqde miz aen swhfaz leixniemh doxlumj； caeuq Swnghdai Vanzging Bu、 Suivu Cungjgiz、 Sicangz Genhgvanj Cungjgiz、 Gozgyah Cihsiz Canjgenz Giz daengj doxbaij ganbu bae gvaciz gyaulouz； hawj genjcazgvanh caengzgiek Neimungzguj、 Haijnanz caeuq doengh aen sengj wnq ndaej doxbaij doxbouj ndei. Gaenxmaenx caeuqfaenh “aen dangz gangj hongsaeh Cunghgoz cwngfaz”， hawj hongsaeh genjcaz yungzhab haeuj ndaw fazyoz gyauyuz bae， okrengz gungganq gij fapceih vunzcaiz sevei cujyi.
Dingjmaenh cienzmienh yiemzhaenq guenj genj. Miz camguenj roxnaeuz capfwngz swhfaz banh’anq daengj saehhangh hungnaek aeu geiqloeg baugau， cunghyangh caeuq mizgven bouhmonz gaenq miz “sam aen gvidingh” gvaq. “Camguenj” cujyau dwg lwnhgangj cingzgvang、 cam ndaej gij saeh guh daengz yienghlawz， dingz lai cungj dwg gamduk goengcingq dawzfap； “geiqloeg、 baugau” doiq hanhhaed genjcazgvanh miz leih， fuengzre anqseicingz、 anqgvanhaeh、 anqcienzngaenz. Mienhdoiq dingzlai dwg gij “lingz baugau” mbouj caensaed de， Cuigauh Yinzminz Genjcazyen daiqlingx gaeplaj， iugouz “bungz miz camguenj itdingh geiqloeg”， mbouj hawj “lingz baugau” gyaqhoengq aen gvidingh ndei. Seiq gaep genjcazyen boux boux cungj aeu ndwen ndwen baugau， gungh geiqloeg baugau 2018 nienz doxdaeuj mizgven saehhangh 18751 gienh. Gagrox ciepsouh gak gaep gijveij genhveij caeuq aen gijgenj genhcaz cuj baijcap haenx gamduk， aeu cungj damjliengh gvet ndok yw doeg bae gemj aen liengh gaenq miz、haed aen liengh demgya， miz 1290 boux genjcaz yinzyenz baudaengz Cuigauh Yinzminz Genjcazyen gihgvanh caeuq swyez danhvei 6 vunz youq ndaw， aenvih famhgawj famhfap deng laeb’anq cazcawq， doengzbeij swnghwnj 66.7%， 54 vunz deng cazdawz gij cwzyin hingzsaeh. Dingjmaenh dawz bakcax doiq baihndaw， daj yiemz cazcawq 42 boux genjcaz yinzyenz cengjhwet seiqlig yak. Dinghmaenh ciuq saedsaeh bae guh， haengjdingh boux yiemz ca yiemz guenj cazcawq anqgienh ndaej lai de， gujli ca caeux ca iq， dingh ndei gij cawjdaej cwzyin guenj Dangj ceih Dangj.
Seiq、 Gagrox ciepsouh yinzminz gamduk， youq lajda lwgminz yungh gienzgenjcaz
Geiqmaenh dizdiet bietdingh aeu bonjndang ak， hawj yinzminz gamduk bae souj simnduj、 rap sawjmingh.
Gagrox ciepsouh yinzda gamduk. Seiq gaep genjcazyen doengzseiz cienzdaengz caeuq hagsib gij cingsaenz Gaiq Cibsam Daengx Guek Yinzda Baez Hoih Daihngeih； yunghsim gvancez gij saemjlwnh yigen Daengx Guek Yinzda Cangzveijvei； cienzmienh leixswnh 5836 diuz yigen genyi youz boux daibyauj Daengx Guek Yinzda saemjlwnh baugau、 cazyawj codanz daezok haenx， youq mwh guh hong ngoenznaengz bae cingjgaij guh daengz. Yunghsim banhleix gij ok cih genyi boux daibyauj Daengx Guek Yinzda daezok haenx 150 gienh， doiq 36 gienh genyi doenghbaez daezok seizneix guh ndaej bae haenx guh gaenhaeuj fukdauq. Iucingj 376 boux daibyauj Daengx Guek Yinzda cazyawj hongsaeh genjcaz、 caeuqfaenh goenghai saemjcaz anqgienh， ndaej daengz gamduk、 ndaej daengz haeujcoengh.
Gagrox ciepsouh minzcuj gamduk.Gaenxmaenx caeuqfaenh Daengx Guek Cwnghez Song Singhgiz Hezsangh Codanzvei， baugau gij vwndiz caeuq gunnanz guh hongsaeh genjcaz goeng’ik dajgauq bungzdaengz de. Yunghsim banhleix 56 gienh daezanq boux veijyenz Daengx Guek Cwnghez daezok haenx. Laebdaeb dangqnaj bae doengbauq hongsaeh youqgaenj hawj gak minzcuj dangjbai cunghyangh， caen sim caen eiq dingqaeu yigen. Laebcaez aen gihci caeuq Daengx Guek Gunghsanghlenz gaeudoeng lienzhaeh haenx，doidoengh sengj si song gaep genjcazyen caeuq dangdieg Gunghsanghlenz doxgap， caemh bae vih minzyingz giyez baiz you gej nanz.
Gagrox youq mwh hengzguh cizcwz ciepsouh hanhhaed. Doiq doengh gij anqgienh mbouj hwnjgauq youz genhcaz gihgvanh daezcingj fuklwnh de caeuq doengh gij anqgienh mbouj baecinj gaebdawz、 mbouj hwnjgauq youz gungh’anh gihgvanh daezcingj fuklwnh fukhaed de， yiemzgek ciuqfap bae dauqcungz saemjcaz， gaijbienq aen gietdingh gaeuq 740 vunz， doengzbeij roengzdaemq 4.8%. Danghnaeuz fazyen buenq de mbouj miz coih， couh baez aen anq bae bingzbuenq haedcaz、 doeksaed swhfaz cwzyin. Caeuq swhfazbu laebhwnj aen gihci caemh daiz hai hoih， doxcaeuq bae coi hingzfad caephengz ndaej yiemzgek goengcingq.
Gagrox ciepsouh ndawbiengz gamduk. Dinghmaenh bae guh ngoenz hailangh genjcaz， iucingj vunz gak gyaiq byaij haeuj genjcaz gihgvanh. Cingjdaej hwnqguh 12309 Cungguek Genjcaz Vangj、 diuz sienq fugsaeh genjcaz caeuq aen cungsim fugsaeh genjcaz， seiq gaep genjcazyen cungj aeu aen cueng ndeu、 aen bingzdaiz ndeu fugsaeh beksingq. Laebndei aen cidu hawj lwgminz guh bouxgamduk， dawz gij hongsaeh genjcaz cienzbouh cuengq youq ndaw gvaengh gamduk bae. Cawjdoengh caeuq meizdij gyaulouz， ciepsouh baklinx gamduk， yienghneix ndaej bik genjcaz banh’anq caetliengh engq ndei、 yauqlwd engq sang、 yauqgoj engq ndei.
Caensim aeueiq、 ciuqfap henhoh gij gienzleih caepnieb lizswh. Doeksaed gij genyi boux daibyauj Daengx Guek Yinzda， aeu cienhangh gamduk bae niujcingq caepfap swhfaz gihgvanh gazngaih lizswh hengzsawj susung gienzleih 734 gienh. Doi aen gihci sengjgaep genjcaz caeuq lizswh doxyaeng ndaej laebhwnj； laeb miz haujlai diuz loh fuengbienh lizswh、 aen fuengz ciepdaih lizswh； youq mwh banh’an yunghsim dingqaeu gij yigen lizswh， caemh bae henhoh swhfaz goengcingq. Iucingj 2.9 fanh lai boux lizswh capyouq genjcazyen caeuqfaenh ciepdaih daeuj cunz. Genjcaz gihgvanh caensim saenqbaengh yinzminz lizswh.
Bi ndeu daeuj， dou ciuqfap henhoh gij gienzik habfap gyoengq beixnuengx Yanghgangj Aumwnz Daizvanh、 gyoengq beixnuengx vazgyauz rog guek caeuq gyoengq vazgyauz dauq guek raeuz nem vunzranz de. Fuzgen Yamwnz daengj dieg laeb aen fuengz genjcaz lenzloz nangqdaengz Daizvanh haenx， cingj gyoengq beixnuengx Daizvanh guh bouxlienzhaeh. Itcig gig yawjnaek bae baujcang gij gienzik gyoengq vunz daegbied. Caeuq Daengx Guek Fulenz doxgap， gyoebhab cingjceih ndaw ranz guhyak、 gaemh’ej moloengh daengj famhfap famhcoih. Cungjgez gij gingniemh Gyanghsuh、 Swconh， caeuq Minzcwngbu daengj 11 aen buveij， dawz gij lwg caengz hung bouxdenggyaeng nabhaeuj aen gvaengh gouqbang bae. Hwnjgauq gij famhcoih ciemqhaih gienzik bouxndangcanz 5928 vunz， doengzbeij swnghwnj 9%. Hwnjgauq gij famhcoih ciemqhaih gienzik bouxgeq 46610 vunz， doengzbeij swnghwnj 12.4%. Laemxsim fadceih gij famhcoih daegdaengq sienghaih lauxsae，dingh deng loek、veh sienqdaej，fathoengh gij cienzdungj gingqgyaez lauxsae yawjnaek son’gyauq. Laebdaeb bae hwnqguh aen yihyen bingzan. Hwnjgauq gij famhcoih nangqdaengz canghyw caeuq yihyen lumj sienghaih canghyw、 comz vunzlai bae yihyen nauhsaeh daengj 1637 boux， doengzbeij doekdaemq 48.9 %. Doiq gij famhcoih sienghaih canghyw nyauxluenh yihyen itdingh “mbouj yungznyaenx saek di”， Bwzgingh genjcaz gihgvanh doiq aen anq Sunh Vwnzbinh gaj canghyw ciuqfap gaeb vaiq gauq vaiq， bouxdenggauq deng buenqdai. Laemxsim henhoh gij leih’ik gozfangz caeuq gij gienzik habfap bouxbing nem vunzranz bouxbing. Hwnjgauq 510 boux famh gij coih nangqdaengz bingdoih lumjbaenz vaih ginhsw sezsih、vaih aengya bouxbing daengj， doengzbeij swnghwnj 23.5％. Aeu swhfaz gouqbang 126 vunz bouxbing caeuq vunzranz bouxbing、bouxbing duiyiz aenvih deng mbouj habfap ciemqhaih cix hoj gwndaenj haenx， doengzbeij swnghwnj 38.5％. Caeuq Cunghyangh Ginhveij Cwngfazveij guhdoih dawz bingdoih caeuq deihfueng gapguh hong genjcaz doi baenaj. Hai “diuz loh ndaej vaiq gvaq” hawj bouxbing duiyiz daeuj saenq daeuj cunz， haeujsim yungh cingz yungh fap fugsaeh “gij vunz ceiq ndeigyaez”. Caenhrengz bauj doiq rog hailangh guh baenaj. Henhoh cawjgienz dawzfap， guhdoih hwnq doengzcaez yungh aen gihci lai mbiengj roxnaeuz song mbiengj gapguh， banh 190 gienh gij saeh bangcoengh dawzfap、bangcoengh cazbanh mbangj aen anqgienh， rengzrwd fugsaeh “it rangh it loh” maenhndei hwngfat. Ganhsuz daengj Saebaek haj aen swngjgih genjcaz gihgvanh doengzdoih okrengz bangcoengh hwnqguh rangh dieg ginghci diuzroen seicouz. Gvangjsih genjcaz gihgvanh doidoengh laebhwnj aen gihci hamj gyaiqguek baujhoh swnghdai vanzging， ciepbanh 3 geiz Dunghmungz Gozgyah Genjcazgvanh Fazgvanh Yenzsiuhbanh.
Gak boux daibyauj， Bi ndeu daeuj， dou ciuq gij iugouz Dangj caeuq yinzminz bae guh， caenhliengh langh’ok gij ciznwngz mizyungh genjcaz， youq mbiengj lai ndei lai ak bae fugsaeh hwngfat ginghci ndawbiengz caiq ndaej byaij baenaj. Guh daengz gijneix， goekgaen dwg ndaej aen Dangjcunghyangh aeu Siz Ginbingz dungzci guh cehsim de maenh’ak lingjdauj， goekgaen dwg ndaej Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz vixyinx；liz mbouj ndaej Daengx Guek Yinzda caeuq aen cangzveijvei de gamduk rengzrwd、Gozvuyen roengz rengz hung banghaeuj、Daengx Guek Cwnghez minzcuj gamduk， Gozgyah Genhcaz Veijyenzvei、Cuigauh Yinzminz Fazyen doxhab caeuq hanhhaed， gak minzcuj dangjbai、Gunghsanghlenz caeuq gyoengq vunz mbouj haeuj dangjbai、gak yinzminz donzdij caeuqlienz deihfueng gak gaep dangjcwng gihgvanh、gak boux daibyauj、gak boux veijyenz caeuq sevei gak gyaiq mizsim gvansim bangcoh. Gou daibyauj Cuigauh Yinzminz Genjcazyen caensim docih！
Dou roxnyinh cingcuj， gij hong genjcaz seizdaih moh， lij miz vwndiz caeuq gizvauq mbouj noix. It dwg genjcaz leixniemh lij aeu lawhmoq、guhsaed， lij ca haujlai cij ndaej yungzhab haeuj aen dijhi ceihleix guekgya、coi hawj ginghci ndawbiengz hwngfat. Ngeih dwg hengz cizcwz gamduk faplwd mbouj daengzdieg， yawjnaek boiqhab ngamjndei yawjmbaeu gamduk hanhhaed. Sam dwg caengz ndaej bouj gijyaez genjcaz yezvu hawj de bienq ak， hingzcwng genjcaz、minzsaeh genjcaz lij dwg gijyaez mingzyienj. Seiq dwg dungjcouz doicaenh gaijgwz swhfaz dijhi guh ndaej mbouj gaeuq， gij guhfap boiqdauq mbouj caezcienz. Haj dwg gij dungxcaiz ciennieb boux genjcazgvanh mbouj hab’wngq gij iugouz lai sang seizdaih moq， gij bonjsaeh banh anqgienh minzsw sanghsw、ginhyungz、vangjloz daengj engqgya mbouj gaeuq. Roek dwg aen gihci gamduk hanhhaed gienzgenjcaz lij caengz caezcienz， gij saeh famh gvidingh banh’anq， baengh anqgienh maeuz seileih ciengzseiz miz， Yangz Gwzginz daengj gij anqgienh famhgawj famhfap haenq dangqmaz de yingjyangj yakrwix、roxhit laegdaeuq. Caet dwg gij hong giekdaej caengzlaj lij aeu roengz rengz hung hawj de lai ak， mbangj di anbaiz guh mbouj daengz dieg. Naihnanz guh ndei saeh moq、guh ndei saeh hoj， dwg cungj rausawq hungnaek dag dou dwg mbouj dwg rap ndaej hwnj cwzyin.
Nda Hong Duenh Laeng
Bineix dwg bi buekrengz dwkhingz cienzmienh hwnqbaenz aen biengz siujgangh、dwg bi dingh saw hingz ndaej mbouj ndaej gunggeng duetgungz. Binghraq bwtndat cauhbaenz hojnanz moq， genjcaz gihgvanh itdingh aeu gamj dawz rapnaek guh ok cingzcik. Aeu daj gyaeuj daengz rieng dingjmaenh aen Dangj baenzbaenz cungj ndaej lingjdauj hong genjcaz， aeu Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz vixyinx， haeujlaeg hagsib caeuq gvancez gij cingsaenz Cibgouj Daih caeuq Gaiq Cibgouj Ngeih Cung、Sam Cung、Seiq Cung Cienzhoih aen Dangj， gya’ak “seiq aen eiqsik”、dingjmaenh “seiq aen gagsaenq”、 guh daengz “song aen henhoh”， dawz gyoengqde yungzhab haeuj ndaw hong genjcaz bae；aeu daj gyaeuj daengz rieng dingjmaenh “souj simnduj、 rap sawjmingh”， hawj gij fazcanj swhsiengj aeu beksingq guh cungsim de roengz daengz giz mizyungh caensaed. Dawz gij hong gaijgez saeh yousim、saeh fanzsim、saeh gaetsim vunzlai guh baenaj；aeu daj gyaeuj daengz rieng dingjmaenh “yamqonj、guhsaed、hwnjsang”， baengh gij gagrox cwngci、gagrox fazci、gagrox genjcaz sangsat de， hawj gij gezcwz baijbouh Dangjcunghyangh caeuq gij cizcwz Yenfaz faplwd dingh hawj de guh daengz saedcawq， vih doicaenh guekgya ceihleix dijhi caeuq ceihleix naengzlig yendaiva daezhawj fapceih baujcang rengzrwd.
Daih’it， dingjmaenh “yamqonj baenaj”， dawz fugsaeh daihbuenz dangguh diuzrap ceiq youqgaenj ndaw hong genjcaz. Comzrengz coq aen muzbyauh yinvu cienzmienh hwnqbaenz aenbiengz siujgangh， gagrox guh fugsaeh “roek onj” “roek bauj”， dawz binghraq doiq hwngfat ginghci ndawbiengz cauhbaenz gij yingjyangj de gyangq daengz ceiq noix. Laebsim fad gij famhcoih sienghaih guekgya ancienz. Gyonj rengz banh gij anqgienh nangqdaengz hwzsevei nangqdaengz seiqlig yak haeuj daengz mwh hwnjgauq ceiq lai de， bangcoengh doi aenbiengz ndaej onjdingh naihnanz. Lai haenq fad gij famhcoih dam’aeu ciemqaeu cienz huq banggungz， doidoengh youq ndaw gvaengxdieg banggungz vaiqdangq boizdauq gij cienz huq nangqdaengz anqgienh； mauhgvaq bingzciengz banh ndei gij anqgienh sienghai goeng’ik ndaw swnghdai vanzging caeuq gijgwn gijyw； yiemzfad ginhyungz famhcoih. Laemxsim fadceih gij famhcoih ciemqfamh cihsiz canjgenz. Roengzrengz fugsaeh minzyingz ginghci hawj de lai ndei fazcanj， dajcauh ok aen hawciengz vanzging cungj ndaej faplwd baujhoh caeuq hanhhaed doxdoengh，coi hwngfat bauj couhnieb bauj beksingq gwndaenj. Hawj genhcaz caeuq genjcaz engq ndei doxciep， ciuq faplwd fadceih cizvu famhcoih. Haenq fad gij famhcoih sienghaih fuengzre binghraq、mbouj habfap gaeb gaj caeuq gaicawx duzdoengh daengj. Genhciz gij “Funghgyauz gingniemh” seizdaih moq， gaenxmaenx doicaenh ceihleix aenbiengz dieg hawsingz； doeksad aen cwzyinci “byawz hengzfap byawz cienzboq faplwd”， guhsaed genjcazgvanh aeu anqgienh gejhoiz faplwd， dauqcawq guh yienghsaeh fapceih haeuj hagdangz、haeuj segih、 haeuj lajmbanj、 haeuj giyez，gyahaenq cienzgangj fapceih； caeuqfaenh bae caz bae vaqgaij gij cengnauh nangqdaengz binghraq de， engq yunghrengz bae coicaenh ceihleix aenbiengz gaenq deng binghraq haenx. Laemxsim fadceih gij famhcoih nangqdaengz bingdoih、 bouxbing，giendingh henhoh leih’ik gozfangz caeuq gienzik habfap bouxbing nem vunzranz de、bouxbing duiyiz.
Daihngeih， haeujlaeg “doeksaed”， lai gagrox guh ndei gij cizcwz yenfaz faplwd dingh hawj de. Haeujlaeg hengz aen cidu nyinhcoih nyinhfad couh fad mbaeu. Minzfazdenj saemjlwnh doenggvaq le， dou yaek nyinhcaen cujciz daengxcungq vunz hagsib beizyin， youq gak hangh hongsaeh genjcaz ndawde guhndei gvancez caephengz， baujcang gij gienzleih minzsaeh bouxnangqsaeh anqgienh，henhoh goengbingz cingqngeih. Haeujlaeg bae guh gij hong caen vaqgaij hingzcwng doxceng， henhoh dawzfap goengcingq、coi ciuqfap hingzcwng baenaj. Gveihfan gaiq hong goeng’ik dajgauq genjcaz， hai gvangq aen gvaengh banh’an， hwnjheiq、yamqonj banh gij anqgienh sienghaih goeng’ik ndaw ancienz swnghcanj、gunghgung veiswngh、swnghvuz anhcenz、baujhoh gienz’ik mehmbwk lwgnyez caeuq bouxndangcanz、vangjloz ciemqhaih、banggungz、baujhoh vwnzvuz caeuq vwnzva yizcanj daengj. Doiq beksingq daeuj saenq， caen guh daengz fung fung cungj hoiz， caenhrengz coi baenz anq giet saeh liux vunz doxhuz. Lai haenq bae fad gij famhcoih ej loengh bouxcaengzhung， gamduk vixyinx hengz “gij genjcaz genyi hauh daih’it”， hawj de ndaej guhsaed caiq guhsaed. Lai dawz gaiq hong guhsaed genjcazgvanh nyaemh fapceih fuyaucangj doi baenaj.
Daihsam， laebdaeb doxriengz “hwnj sang”， ciuq gij iugouz lai sang lai moq vunzlai youq seizdaih moq daezok de guhndei bonjndang. Hawj gij caetliengh caeuq yauqlwd gaijgwz dawzfap dijci ndaej hwngsang. Hawj gij suijbingz guenjleix hong genjcaz ngamjndei de hwnjsang， hawj hong genjcaz coengmingz lai hwnj mbaek， cienzmienh cauhmoq fazcanj gij hong gihcwngz genjcaz seizdaih moq. Guhsaed gij cawjdaej cwzyin caeuq gamduk cwzyin cienzmienh yiemzhaenq guenj Dangj， haeujlaeg bae ciuq gij yigen cunghyangh liebyawj gvaqlaeng fukdauq de saedguh cingjgaij， youq gihbwnj cingsaenz dwg “yiemz” baihlaj daengx hidungj caen guh dangjfungh lenzcwng gensez， haeujlaeg bae gyauyuz cwngjdun aen doih genjcaz， dajcauh aen bingdoih genjcaz cungcig ndangseuq rengzak.
Gak boux daibyauj， 70 bi daeuj， gaenriengz Gunghozgoz youq gwnz lizsij byaij diuz roen singseiq hoenghhwd， yinzminz genjcazyen daj gyaeuj daengz rieng ciuq aen simnduj caeuq sawjmingh “fugsaeh daihbuenz、dawzfap vih lwgminz” bae guh. Bungzdaengz hengz aen canloz daengxbuenz Cunghvaz Minzcuz fukhwng hungmbwk caeuq yiengh hingzseiq boekbienq seiqgyaiq bak bi caengz miz gvaq， dou yaek engqgya gaenjmaed doxgiet youq seiqhenz aen Dangjcunghyangh aeu Siz Ginbingz cungjsuhgi guh cehsim de， aeu Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz vixyinx， nyinhcaen saedguh gij iugouz baez hoih Daengx Guek Yinzda neix， gagrox hawj lwgminz gamduk， muzlienh simnduj、cungcig guh hong， vih cienzbouh hwnqbaenz aenbiengz siujgangh、guhbaenz gij muzbyauh buekguh aen bak bi daih’it caiq guh gunghawj！
（Sinhvazse Baekging 6 nyied 1 hauh dienh）
