AEN BAUGAU GVENDAENGZ GIJ CINGZGVANG
CAEPHENGZ AEN YAWHSUENQ
CUNGHYANGH NDIJ DEIHFUENG BI 2019
CAEUQ GIJ YAWHSUENQ CAUJAN
CUNGHYANGH NDIJ DEIHFUENG BI 2020
——2020 Nienz 5 Nyied 22 Hauh Youq Gwnz Gaiq Cibsam Daengx Guek Yinzminz Daibyauj Daihhoih Baez Hoih Daihsam
Caizcwngbu
Gak boux daibyauj:
Gozvuyen dak gou, seizneix dawz gij cingzgvang caephengz aen yawhsuenq cunghyangh ndij deihfueng bi 2019 caeuq gij yawhsuenq caujan cunghyangh ndij deihfueng bi 2020 daezcingj Gaiq Cibsam Daengx Guek Yinzda Baez Hoih Daihsam saemjlwnh, caemhcaiq cingj boux veijyenz Daengx Guek Cwnghez daezok yigen.
It、 Gij Cingzgvang Caephengz Aen Yawhsuenq Cunghyangh Caeuq Deihfueng Bi 2019
Bi 2019, naj doiq yiengh fukcab fungyiemj ndaw guek rog guek deuyex daraen hwnjsang, youq aen Dangjcunghyangh aeu Siz Ginbingz dungzci guh cehsim akrem lingjdauj lajde, gak dieg gak bouhmonz aeu Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz daeuj dazyinx, yienghyiengh ciuqhengz gij cingsaenz Cibgouj Daih caeuq Cibgouj Gaiq Ngeih Cung、 Sam Cung、Seiq Cung Cienzhoih aen Dangj, dem ak “seiq aen eiqsik”、dinghmaenh “seiq aen gagsaenq”、guhdaengz “song aen henhoh”，doeksaed aen gezcwz baijbouh Dangjcunghyangh、 Gozvuyen, dawzyiemz gij yawhsuenq Gaiq Cibsam Daengx Guek Yinzda Baez Hoih Daihngeih saemjcaz baecinj haenx, dingjmaenh aen cungj goekdiuh youq ndaw onjdingh gouz baenaj, haeujlaeg daengzdaej ciuqhengz yiengh swhsiengj hwngfat moq, dingjmaenh aeu gaijgwz gij gapgyaq mbiengj gunghawj guh sienqmeh, doinyoengx hwngfat ndaej engq ndei, lauxsaed guh ndei gij hong “roek onj”, dungjcouz doinyoengx onj demmaj、 coi gaijgwz、 diuz gapgyaq、 leih lwgminz、 re fungyiemj、 bauj onjdingh, baujciz ginghci ndawbiengz lienzdaemh hwngfat cangqheiq, guhbaenz gij cujyau moegbiu yinvu daengx bi, vih cienzmienh hwnqbaenz aen biengz siujgangh dwk roengz aen giekdaej dinghhingz he. Gij cingzgvang caephengz aen yawhsuenq cunghyangh caeuq deihfueng haemq ndei.
(It) Gij soucei cingzgvang aen yawhsuenq itbuen goenggungh bi 2019.
1. Gij yawhsuenq itbuen goenggungh daengx guek.
Gij yawhsuenq itbuen goenggungh daengx guek souhaeuj 190382.23 ik maenz, dwg yawhsuenq 98.9%, beij bi 2018 demmaj 3.8%. Ndawde, cienzgvaeh souhaeuj 157992.21 ik maenz, demmaj 1%; gij souhaeuj mbouj dwg cienzgvaeh 32390.02 ik maenz, demmaj 20.2%, cujyau dwg cunghyangh caizcwng demlai sanggyauj gij leihyinh aen ginhyungz gihgou guekmiz caeuq aen giyez cunghyangh daegdingh、deihfueng lai roengzrengz buenzhoengh gij swhyenz swhcanj guekmiz. Caiq gya gij cienz diuhhaeuj nem sawj gij cienz gietcienj gietlw haenx 22160.95 ik maenz (baudaengz gij cienz cunghyangh caeuq deihfueng caizcwng daj aen gihginh diuzcez yawhsuenq onjdingh、gij yawhsuenq aen gihginh cwngfuj、gij yawhsuenq ginghyingz swhbwnj guekmiz diuhhaeuj, nem gij cienz gietcienj gietlw caizcwng deihfueng sawjyungh), souhaeuj cungjliengh 212543.18 ik maenz. Gij yawhsuenq itbuen goenggungh daengx guek ceiyungh 238874.02 ik maenz, guhbaenz yawhsuenq 101.5%, demmaj 8.1%. Caiq gya boujcung aen gihginh diuzcez yawhsuenq onjdingh cunghyangh 1269.16 ik maenz, ceiyungh cungjliengh 240143.18 ik maenz. Soucei cungjliengh doxsiu, ceiyungh lai gvaq souhaeuj 27600 ik maenz, caeuq yawhsuenq doxbingz.
2. Gij yawhsuenq itbuen goenggungh cunghyangh.
Gij yawhsuenq itbuen goenggungh cunghyangh souhaeuj 89305.41 ik maenz, dwg yawhsuenq 99.4%, demmaj 4.5%. Caiq gya daj aen gihginh diuzcez yawhsuenq onjdingh cunghyangh diuhhaeuj 2800 ik maenz, daj gij yawhsuenq aen gihginh cunghyangh cwngfuj、 gij yawhsuenq ginghyingz swhbwnj guekmiz cunghyangh diuhaeuj 394 ik maenz, souhaeuj cungjliengh 92499.41 ik maenz. Gij yawhsuenq itbuen goenggungh cunghyangh ceiyungh 109530.25 ik maenz, guhbaenz yawhsuenq 98.4%, demmaj 7%, ndawde, bonjgaep ceiyungh 35115.15 ik maenz, guhbaenz yawhsuenq 99.2%, demmaj 6%； senjnod ceihawj deihfueng 74415.1 ik maenz, guhbaenz yawhsuenq 98.7%, demmaj 7.5%. Caiq gya boujcung aen gihginh diuzcez yawhsuenq onjdingh cunghyangh 1269.16 ik maenz, ceiyungh cungjliengh 110799.41 ik maenz. Soucei cungjliengh doxsiu, cunghyangh caizcwng ceiyungh lai gvaq souhaeuj 18300 ik maenz, caeuq yawhsuenq doxbingz.
Gij yawhsuenq itbuen goenggungh cunghyangh yiengh saeq hangh hung souhaeuj de dwg: Ndaw guek cwnghcizsui 31161.01 ik maenz, dwg yawhsuenq 103.7%. Ndaw guek siuhfeisui 12561.52 ik maenz, dwg yawhsuenq 108.5%. Doxgaiq haeuj guek cwnghcizsui、 siuhfeisui 15812.3 ik maenz, dwg yawhsuenq 93.1%. Gvanhsui 2889.11 ik maenz, dwg yawhsuenq 105.1%. Giyez sojdwzsui 23786 ik maenz, dwg yawhsuenq 97.4%. Goyinz sojdwzsui 6234.14 ik maenz, dwg yawhsuenq 80.5%, cujyau dwg daezsang gij biucinj gemjcawz goekdaej cienzyungh caeuq gij gemjgvaeh saedhengz aen cwngcwz goucawz cienhangh bengxgya haenx mauhgvaq yawhgeiz. Doxgaiq ok guek doiq cwnghcizsui、siuhfeisui 16503.2 ik maenz, dwg yawhsuenq 103.5%.
Gij yawhsuenq itbuen goenggungh cunghyangh bonjgaep yiengh saeq hangh hung ceiyungh de dwg: Itbuen goenggungh fugsaeh ceiyungh 1985.16 ik maenz, guhbaenz yawhsuenq 99.7%. Vaigyauh ceiyungh 615.39 ik maenz, guhbaenz yawhsuenq 98.1%. Gozfangz ceiyungh 11896.56 ik maenz, guhbaenz yawhsuenq 100%. Goenggungh ancienz ceiyungh 1839.45 ik maenz, guhbaenz yawhsuenq 102.3%. Gyauyuz ceiyungh 1835.88 ik maenz, guhbaenz yawhsuenq 100%. Gohyoz gisuz ceiyungh 3516.18 ik maenz, guhbaenz yawhsuenq 99.2%. Bwhcwk haeux youz doxgaiq ceiyungh 1204.04 ik maenz, guhbaenz yawhsuenq 102.3%. Ngaenzcaiq leihsik ceiyungh 4566.62 ik maenz, guhbaenz yawhsuenq 91.4%.
Yiengh saeq cunghyangh senjnod ceihawj deihfueng de dwg: Yiengh itbuen senjnod ceihawj 66849.37 ik maenz, guhbaenz yawhsuenq 98.7%, ndawde, caizcwng saehgienz caezcaemh senjnod ceihawj 31903.25 ik maenz, guhbaenz yawhsuenq 100.2%; cienhangh senjnod ceihawj 7565.7 ik maenz, guhbaenz yawhsuenq 99.1%.
Bi 2019, gij yawhsuenq itbuen goenggungh cunghyangh gietlw 1269.16 ik maenz (ndawde, gij yawhsuenq cienzbwh cunghyangh dangbi satbyai mbouj ceiyungh, cauxbaenz gietlw 500 ik maenz), cienzbouh cienjhaeuj aen gihginh diuzcez yawhsuenq onjdingh cunghyangh bae. Doenggvaq soudauq gij cienz cunghyangh caizcwng gietcienj boujcung 3000 ik maenz. Bi 2019 satbyai, gij ngaenzyawz aen gihginh diuzcez yawhsuenq onjdingh cunghyangh miz 5272.49 ik maenz.
3. Gij yawhsuenq itbuen goenggungh deihfueng.
Gij yawhsuenq itbuen goenggungh deihfueng souhaeuj 175491.92 ik maenz, ndawde, bonjgaep souhaeuj 101076.82 ik maenz, demmaj 3.2%; cunghyangh senjnod ceihawj deihfueng 74415.1 ik maenz. Caiq gya gij cienzngaenz deihfueng caizcwng daj aen gihginh diuzcez yawhsuenq onjdingh deihfueng、 gij yawhsuenq aen gihginh cwngfuj、 gij yawhsuenq ginghyingz swhbwnj guekmiz diuhhaeuj nem sawj gij cienz gietcienj gietlw 18966.95 ik maenz, souhaeuj cungjliengh 194458.87 ik maenz. Deihfueng gij yawhsuenq itbuen goenggungh ceiyungh 203758.87 ik maenz, demmaj 8.5%. Soucei cungjliengh doxsiu, deihfueng caizcwng ceiyungh lai gvaq souhaeuj 9300 ik maenz, caeuq yawhsuenq doxbingz.
(Ngeih) Gij soucei cingzgvang aen gihginh cwngfuj yawhsuenq bi 2019.
Ciuq doengh gij gvidingh guenjleix ngaenzcaiq deihfueng cwngfuj, gij souhaeuj cienhangh ngaenzcaiq deihfueng cwngfuj nabhaeuj gij yawhsuenq guenjleix aen gihginh cwngfuj bae.
Daengx guek gij yawhsuenq aen gihginh cwngfuj souhaeuj 84515.75 ik maenz, demmaj 12%. Caiq gya bi 2018 gietcienj souhaeuj 360.4 ik maenz caeuq gij cienhangh caigen deihfueng cwngfuj fathengz couz ndaej 21500 ik maenz, daengx guek aen gihginh cwngfuj souhaeuj cungjliengh 106376.15 ik maenz. Daengx guek gij yawhsuenq aen gihginh cwngfuj ceiyungh 91364.8 ik maenz, demmaj 13.4%.
Gij yawhsuenq aen gihginh cunghyangh cwngfuj souhaeuj 4039.62 ik maenz, dwg yawhsuenq 96.3%, demmaj 0.1%. Caiq gya bi 2018 gietcienj souhaeuj 360.4 ik maenz, aen gihginh cunghyangh cwngfuj souhaeuj cungjliengh 4400.02 ik maenz. Gij yawhsuenq aen gihginh cunghyangh cwngfuj ceiyungh 4178.86 ik maenz, guhbaenz yawhsuenq 91.9%, demmaj 3.9%, ndawde, bonjgaep ceiyungh 3113.41 ik maenz, senjnod ceihawj deihfueng 1065.45 ik maenz. Diuhhaeuj gij yawhsuenq itbuen goenggungh 4.23 ik maenz. Gij yawhsuenq aen gihginh cunghyangh cwngfuj sou lai gvaq cei 216.93 ik maenz, ndawde, gietcienj bi baihlaj laebdaeb sawjyungh 180.04 ik maenz; dingz dan aen hanghmoeg yungh gij gihginh cwngfuj gietcienj mauhgvaq dangbi souhaeuj 30% haenx, gyoebsuenq 36.89 ik maenz, ciuq gvidingh boujcung aen gihginh diuzcez yawhsuenq onjdingh cunghyangh.
Gij yawhsuenq aen gihginh deihfueng cwngfuj bonjgaep souhaeuj 80476.13 ik maenz, demmaj 12.6%, ndawde, cienjnyiengh gij gienz yungh dieg guekgya souhaeuj 72584.42 ik maenz, demmaj 11.4%. Caiq gya gij yawhsuenq aen gihginh cunghyangh cwngfuj senjnod ceihawj deihfueng souhaeuj 1065.45 ik maenz caeuq gij cienhangh caigen deihfueng cwngfuj fathengz couz ndaej 21500 ik maenz, souhaeuj cungjliengh 103041.58 ik maenz. Gij yawhsuenq aen gihginh deihfueng cwngfuj ceiyungh 88251.39 ik maenz, demmaj 13.9%.
(Sam) Gij soucei cingzgvang aen yawhsuenq ginghyingz swhbwnj guekmiz bi 2019.
Daengx guek gij yawhsuenq ginghyingz swhbwnj guekmiz souhaeuj 3960.42 ik maenz, demmaj 36.3%. Daengx guek gij yawhsuenq ginghyingz swhbwnj guekmiz ceiyungh 2287.43 ik maenz, demmaj 6.2%.
Gij yawhsuenq ginghyingz swhbwnj guekmiz cunghyangh souhaeuj 1635.93 ik maenz, dwg yawhsuenq 99.9%, demmaj 23.3%. Caiq gya gij souhaeuj bi 2018 gietcienj 6.7 ik maenz, souhaeuj cungjliengh 1642.63 ik maenz. Gij yawhsuenq ginghyingz swhbwnj guekmiz cunghyangh ceiyungh 1108.8 ik maenz, guhbaenz yawhsuenq 88.4%, doekdaemq 0.3%, ndawde, gij ceiyungh bonjgaep 986.55 ik maenz, senjnod ceihawj deihfueng 122.25 ik maenz. Diuhhaeuj ndaw yawhsuenq itbuen goenggungh 389.77 ik maenz, gij beijlaeh diuhhaeuj daez daengz 28%. Gietcienj bilaeng ceiyungh 144.06 ik maenz.
Gij yawhsuenq ginghyingz swhbwnj guekmiz deihfueng bonjgaep souhaeuj 2324.49 ik maenz, demmaj 47.2%. Caiq gya gij souhaeuj daj aen yawhsuenq ginghyingz swhbwnj guekmiz cunghyangh senjnod ceihawj deihfueng 122.25 ik maenz, souhaeuj cungjliengh 2446.74 ik maenz. Gij yawhsuenq ginghyingz swhbwnj guekmiz deihfueng ceiyungh 1300.88 ik maenz, demmaj 15.3%. Gij cienzngaenz diuhhaeuj ndaw yawhsuenq itbuen goenggungh haenx demlai daengz 943.19 ik maenz. Gietcienj bilaeng ceiyungh 202.67 ik maenz.
(Seiq) Yiengh soucei gij yawhsuenq aen gihginh ndawbiengz baujyiemj bi 2019.
Daengx guek aen gihginh ndawbiengz baujyiemj souhaeuj 80844.09 ik maenz, demmaj 2.3%. Ndawde, gij cienz baujyiemj souhaeuj 57849.05 ik maenz, gij souhaeuj caizcwng boujdiep 19392.61 ik maenz. Daengx guek aen gihginh ndawbiengz baujyiemj ceiyungh 74989.23 ik maenz, demmaj 11.3%. Dangbi soucei gietlw 5854.86 ik maenz, byaibi romringx gietlw 94026.97 ik maenz.
Aen gihginh ndawbiengz baujyiemj cunghyangh souhaeuj 688.61 ik maenz, ndawde, gij cienz baujyiemj souhaeuj 354.44 ik maenz, caizcwng boujdiep souhaeuj 319.36 ik maenz. Caiq gya gij souhaeuj deihfueng gyauj hawj aen gihginh diuznoiz gihbwnj ciengxlaux baujyiemj cunghyangh 6280 ik maenz, souhaeuj cungjliengh 6968.61 ik maenz. Aen gihginh ndawbiengz baujyiemj cunghyangh ceiyungh 663.2 ik maenz, caiq gya gij ceiyungh aen gihginh diuznoiz gihbwnj ciengxlaux baujyiemj cunghyangh anbaiz hawj deihfueng 6273.8 ik maenz, ceiyungh cungjliengh 6937 ik maenz. Dangbi soucei gietlw 31.61 ik maenz, byaibi romringx gietlw 358.75 ik maenz.
Aen gihginh ndawbiengz baujyiemj deihfueng souhaeuj 80155.48 ik maenz, ndawde, gij cienz baujyiemj souhaeuj 57494.61 ik maenz, caizcwng boujdiep souhaeuj 19073.25 ik maenz. Caiq gya gij souhaeuj aen gihginh diuznoiz gihbwnj ciengxlaux baujyiemj cunghyangh 6273.8 ik maenz, souhaeuj cungjliengh 86429.28 ik maenz. Aen gihginh ndawbiengz baujyiemj deihfueng ceiyungh 74326.03 ik maenz, caiq gya gij ceiyungh aen gihginh diuznoiz gihbwnj ciengxlaux baujyiemj cunghyangh 6280 ik maenz, ceiyungh cungjliengh 80606.03 ik maenz. Dangbi soucei gietlw 5823.25 ik maenz, byaibi romringx gietlw 93668.22 ik maenz.
Bi 2019 satbyai, gij yawzngeg caiqguek cunghyangh caizcwng 168083.04 ik maenz, gaemhanh youq 175208.35 ik maenz dauqndaw aen hanhsoq yawzngeg ngaenzcaiq Daengx Guek Yinzda baecinj neix; gij yawzngeg ngaenzcaiq cwngfuj deihfueng 213072.26 ik maenz, baudaengz aen yawzngeg ngaenzcaiq baeznaengz 118649.14 ik maenz、 gij yawzngeg ngaenzcaiq cienhangh 94378.12 ik maenz, gaemhanh youq 240774.3 ik maenz dauqndaw aen hanhsoq yawzngeg ngaenzcaiq Daengx Guek Yinzda baecinj neix.
Gij ciengzsaeq cingzgvang nem gij gangjmingz doxgven caephengz yawhsuenq gwnzneix raen youq 《Gij Cingzgvang Caephengz Aen Yawhsuenq Daengx Guek Bi 2019 Caeuq Aen Yawhsuenq Daengx Guek Bi 2020 Cunghvaz Yinzminz Gunghozgoz (Caujan)》.
(Haj) Gij cingzgvang doeksaed cujyau caizsui cwngcwz caeuq gij hong caizcwng cungdenj bi 2019.
Bi 2019, caizcwng bouhmonz nyinhcaen doeksaed aen gezcwz baijbouh Dangjcunghyangh、Gozvuyen, ciuq aen fap yawhsuenq caeuq 《Gij Yigen Dazyinx Yinzda Aen Cungdenj Saemjcaz Gamduk Yawhsuenq Mbe Gvangq Daengz Yawhsuenq Caeuq Cwngcwz Ceiyungh》, yiemzyiemz doeksaed gij gezyi yawhsuenq、gietsuenq caeuq gij saemjlwnh yigen iugouz Daengx Guek Yinzda, gya rengz saedhengz aen caizcwng cwngcwz gaenxmaenx raen hamq de, gyahung haeujcoengh gvaenghdieg cungdenj, gyavaiq doinyoengx gaijgwz aen dijci caizsui, mboujduenh daezsang gij suijbingz guenjleix caizcwng.
Saedhengz yiengh gemj gvaeh gyangq feiq engq hung. Gemj gvaeh gyangq feiqcigsoh leih giyez ik beksingq、 goengbingz raen hamq, baenz gaiq banhfap hungnaek wngqdoiq ginghci gyodroengz he. Yiengh gemj gvaeh gyangq feiq engq hung neix, gak gaep caizsui bouhmonz dawz de dangguh gienh saeh daeuzloet hengzguh gij caizcwng cwngcwz gaenxmaenx bi 2019 daeuj ca gaenj guh ndei. 1 nyied 1 hauh hainduj saedhengz hawj ndei giyez iq saeq gemj gvaeh、 goyinz sojdwzsui cienhangh bengxgya goucawz, 4 nyied 1 hauh hainduj saedhengz gij cosih gaijgwz cwnghcizsui，doengh hangz dajcauh gij suiqlwd cwnghcizsui daj 16% doek daengz 13%, doengh hangz daehyinh、 dajhwnq daj 10% doek daengz 9%; 5 nyied 1 hauh hainduj gyangqdaemq aen beijlwd ndawbiengz baujyiemj. Laebdaeb cingleix gveihfan gij hingzveiz soucienz hingzcwng saehnieb caeuq gij gihginh miz singqcaet cwngfuj.
Gij cwngcwz gemj gvaeh gyangq feiq youq doengh fueng gemjmbaeu diuzrap giyez、coihawj beksingq sawjcienz、 onjdingh hawciengz yawhgeiz caeuq gyahung couhnieb de miz yungh dangqmaz, rengzrwd haeujcoengh hwngfat saeddaej ginghci onjdingh. Bi 2019 daengx bi gemj gvaeh gyangq feiq 2.36 fanh ik maenz， ndawde saen dem gemj gvaeh 1.93 fanh ik maenz. Hangz dajcauh caeuq gij hothoh doxgven de ndaej gemj cwnghcizsui 5928 ik maenz， gemj bae 24.1％；hangz dajhwnq caeuq hangz daehyinh faenbied gemj cwnghcizsui 257 ik maenz、 44 ik maenz， gemj bae 5.2％、 6.7％； hangz fugsaeh yienhdaih caeuq hangz fugsaeh gwndaenj daengj hangz wnq hix lailai noixnoix ndaej gyangq cwnghcizsui. Giyez minzyingz itgungh ndaej gemj gvaeh 1.26 fanh ik maenz， daengx aen soq gemj gvaeh ndawde， ciemq daengz 65.5％. Giyez iq saeq gemj gvaeh 2832 ik maenz， bouxnabgvaeh caen ndaej gemjmienx giyez sojdwzsui de 626 fanh hoh， bouxnabgvaeh gveihmoz iq ndaej mienx cwnghcizsui de lai dem 456 fanh hoh. Saedhengz aen cwngcwz cienhangh bengxgya gaeucawz goyinz sojdwzsui， caiq gya 2018 nienz 10 nyied 1 hauh gyangqdaemq aen gamx noix gyau goyinz sojdwzsui caeuq gaijndei yiengh ndiengqrieng aen gapgyaq suiqlwd， itgungh gemj gvaeh 4604 ik maenz, hawj 2.5 ik bouxnabgvaeh cigsoh ndaej ik， moix boux bingzyaenz gemj gvaeh 1842 maenz baedauq.
Vih haeujcoengh doeksaed gij cwngcwz gemj gvaeh gyangq feiq， gak gaep cwngfuj daih gemj yiengh ceiyungh baeznaengz， lai roenloh couz cienz bouj gemj sou， roengzrengz guhdaengz yawhsuenq soucei doxdaengh. Cunghyangh caizcwng gya rengz senjnod ceihawj deihfueng， caemhcaiq youq mwh faenboiq yiengh senjnod ceihawj doxdaengh、 gij cienz ciengjbouj baujcang gij caizlig giekbonj yienhgaep， nyeng coh goekdaej dieg caizcwng gunnanz de caeuq giz dieg deng gemj gvaeh gyangq feiq yingjyangj haemq hung de， hawj gij caizcwng de engq miz baujcang. Laebhwnj saedhengz aen gihci gamcaek yawhgingj caeuq fungyiemj bingzguj, baenzneix bae bauj gij cienzhong caizcwng yienhgaep， doengjit suenqveh caizcwng soucei caeuq guenj ndei cienz cang， hableix nda baij hangh lawz cei gonq， saedcaih lamx maenh diuz sienqdaej “sam bauj” (bauj gwndaenj、 bauj cienzhong、 bauj guhsaeh).
Laebdaeb haeujcoengh dwk ndei sam ciengz ciengq gunggeng. Lai roengzrengz haeujcoengh duetgungz. Doeksaed caeuq caezcienz gij banhfap dawzcinj banggungz，hopheux bouj hwnj giz buegnyieg “song mbouj you，sam baujcang”， gyarem baujcang gij cienzngaenz douz haeuj duetgungz bae. Gij cienzngaenz cienhangh banggungz cunghyangh caizcwng bouj hawj deihfueng 1261 ik maenz， demmaj 18.9％， caiq lai yamq nyeng coh dieg gungzheq “sam gih sam couh”. Leihyungh gij souhaeuj hamj sengj boujcung reihnaz caeuq gij souhaeuj diuznoiz aen cijbyauh dieg dajhwnq singzmbanj haenx anbaiz 817 ik maenz， cienzbouh yungh haeuj duetgungz caeuq saenqhwng lajmbanj. Fat roengz gij itbuen caigen deihfueng cwngfuj senj dieg banggungz 1294 ik maenz， haeujcoengh daezgonq bi ndeu guhbaenz gij yinvu hwnqguh “cibsam haj” gveihva. Ok doengh gij cwngcwz caengz nab sojdwzsui gaxgonq ciuq saed gaeucawz gij ceiyungh giyez banggungz gienlok、 gienlok doxgaiq banggungz mienx nab cwnghcizsui、 cwngfuj dajcawx haeujcoengh duetgungz， laebdaeb haeujlaeg guh sawqdiemj cingjhab gij cienz nangqdaengz bouxguhnaz aen yienh gungzhoj. Doinyoengx aeu miz mbouj miz yaugoj bae guenjleix daengx aen hanghmoeg banggungz. Hwnqguh aen bingzdaiz seizseiz gamcaek gaemhanh gij cienz caizcwng banggungz de hainduj raenyauq. Daengx bi gemj noix gij vunz gungz aeu laeb dangj laeb gaj de 1109 fanh boux， gij yienh gungzhoj ndaej duetgungz de 344 aen. Gaenxmaenx haeujcoengh fuengzceih uqlah. Cungqdiemj baujcang caeuq sien douzcienz gij hong fuengzceih uqlah， haeujcoengh dwk ndei ciengz ciengq hungnaek fuengzceih hoengheiq、 raemx、 namh uqlah daengj. Dieg baihbaek gya’gvangq gvaengh guh sawqdiemj cenghseuq aeu raeuj. Faen song buek nab 40 aen hawsingz haeuj gvaengh cwngcwz guhbanj ceihleix raemx haeu. Laebdaeb hengz aen cwngcwz dajciengj baujhoh coihfuk gij swnghdai ranghdieg ginghci Dahcangzgyangh， lai vaiq doinyoengx cauxbaenz aen gwzgiz hung baujhoh Dahcangzgyangh. Cengjnyoengx haeujlaeg guh gij sawqdiemj baujhoh coihfuk gij swnghdai bya raemx ndoeng naz huz nywj. Gyoebhab cingjceih “haijvanh saeklamz” caeuq ceihleix Bozhaij， haeujcoengh baujhoh coihfuk gij swnghdai haijyangz. Doiq aen giyez fueng daihsam guh hong fuengzceih uqlah youh hab diuzgienh de，ndaej gemj noix ciuq 15％ suiqlwd nab giyez sojdwzsui. Gaenxmaenx doinyoengx ndalaeb yiengh cienzgoek saekheu hwngfat guekgya. Fuengzre vaqgej gij ginhyungz fungyiemj caizcwng. Ciuq diuz lohnaemj “hai dounaj、saek doulaeng”， doengjit suenqveh guh ndei gij hong fathengz sawjyungh gij caigen deihfueng cwngfuj caeuq fuengzre gaemhanh gij fungyiemj de. Doinyoengx gak dieg yiemzgek doeksaed gij gvidingh caeuq iugouz guenjleix gij ngaenzcaiq yawhsuenq deihfueng cwngfuj， gagrox hawj yinzda daengx mboengq bae gamduk ciq、yungh、boiz gij ngaenzcaiq deihfueng cwngfuj. Ciuq gij yenzcwz byawz yungh byawz rap，yiemzgek doeksaed gij cwzyin youz aen danhvei fucwz cienhangh caigen hanghmoeg de boiz caiq， yiemzfuengz gij fungyiemj cienhangh caigen. Caezcienz aen gihci ciengzseiz gamcaek gaemhanh， gyarem gyaepcaz gij cwzyin deihfueng cwngfuj famh gvidingh ciq caiq. Baengh gak fueng doxcaez roengzrengz， aen fungyiemj gij ngaenzcaiq ndumj deihfueng cwngfuj ndaej fuengzre raenyauq. Doengzseiz，bang onjdangq cawqceq vaqgej ginhyungz fungyiemj， gyarem gamguenj gij caizvu ginhyungz giyez， doinyoengx daezsang gij caetliengh gvaigi saenqsik ginhyungz giyez.
Haeujcoengh gyalaeg gaijgwz aen gapgyaq mbiengj gunghawj. Haeujlaeg doinyoengx aen sawqdiemj dienzbouj gij baujyiemj aen（dauq）gisuz canghbei hungnaek nduj. Hawj gvaengh habyungh guding swhcanj lai vaiq cietgaeuq ndaej leih de dohdaengz hangz dajcauh liux. Yungh gij soujduenh hawciengz haeujcoengh hwngfat gij canjnieb cizcwngz denlu. Hah gaenj gij cwngzgoj “sam siu it gyangq it bouj”， gibseiz bued gij cienz cienhangh ciengjbouj 20 ik maenz， haeujcoengh daezgonq guhbaenz aen moegbiu gemjnoix gij canjnaengz hangz gangdiet、meizdan daengj. Doiq gohyoz gisuz aen yawhsuenq itbuen goenggungh cunghyangh bonjgaep ceiyungh 3516.18 ik maenz， demmaj 12.5％， haeujcoengh daezswng gij naengzlig gohgi daemxcengj caeuq lai vaiq gunggeng cienhangh hungnaek gohgi. Baengh gij diuzgienh sevei cujyi hawciengz ginghci, doinyoengx cauhlaeb yiengh dijci moq guekgya comz rengz gunggeng gij gisuz ceiq youqgaenj. Caiq dem haeujcoengh 58 aen gaihfazgih daezswng gij fugsaeh suijbingz gak cungj caidij hab hawciengz hab ciennieb， dajcauh yiengh caidij cauhmoq cauhnieb mbouj doengz haenx. Hawj gij canjnieb lakhwng guekgya yungh cauhnieb douzcienz dazyinx cienzgoek， gyoebsuenq haeujcoengh gij giyez cauhnieb mauhgvaq 5100 aen. Haeujcoengh hwnqlaeb aen dijhi vih giyez rauh iq daezhawj goenggungh fugsaeh caeuq couzcienz fugsaeh. Ciengjbouj giz dieg bi gonq vih giyez iq saeq couzcienz danbauj gij beijlwd cienzdanbauj mbouj mauhgvaq 2％. Haeujcoengh 59 aen si（couh、 gih）guh sawqdiemj gyoebhab gaijgwz ginhyungz fugaeh giyez minzyingz caeuq giyez iq saeq. Doinyoengx gaijgez gij vwndiz doedyienh rag yiemq gij ngaenzsi giyez minzyingz、giyez rauh iq.
Coisawj gyahung yiengh aeuyungh douzcienz sawjcienz. Daengx bi cuengq gij cienz cunghyangh douzhaeuj gihgen bae 5776 ik maenz， dingzlai haeujcoengh aen gunghcwngz baujcang youqonj、 hwnqguh “sam nungz”、 hwnqguh gij sezsih giekdaej hungnaek、 cauhmoq nyoengxdoengh caeuq diuzcingj gapgyaq、 saehnieb ndawbiengz caeuq ceihleix ndawbiengz、 mbaetnaengz vanzbauj caeuq hwnqguh swnghdai daengj. Caiq dem gij hanhngeg cienhangh ngaenzcaiq deihfueng cwngfuj 21500 ik maenz， beij 2018 nienz lai dem 8000 ik maenz. Cinjhawj dawz gij cienz deihfueng cwngfuj fat cienhangh caigen couz ndaej de dangguh gij cienzgoek aen hanghmoeg hungnaek hab diuzgienh de， gyarem baujcang gij cienz aen hanghmoeg cingq hwnq youqgaenj caeuq aen gunghcwngz bouj giz buegnyieg. Hawj hangz fugsaeh segih gyadingz lumjbaenz ciengxlaux、 daknyez、 gyasaeh daengj ndaej gemj cienzgvaeh engq lai，doinyoengx yiengh sawjcienz bae youz guhcaemz swnggaep. Haeujcoengh doigvangq yungh gij giceh sawj nwngzyenz moq， diepbouj gij ci gunghgyauh sawj nwngzyenz moq de， dajciengj giz dieg hwnqguh gij sezsih hawj ci cungdienh de. Gaebhab guhbanj doi denswj sanghvu haeuj lajmbanj， guhdaengz cw doh aen yienh gungzhoj guekgyagaep. Bangbouj hwnqlaeb diuz lienh gunghawj nungzcanjbinj， lailai haeujcoengh hwnqguh gij sezsih gyagoeng nungzcanjbinj baenz sanghbinj caeuq hwngfat yiengh vuzliuz aeu caepgyoet daehyinh nungzcanjbinj.
Coisawj singzmbanj gvaenghdieg doxngamj hwngfat. Haeujcoengh nungzyez lajmbanj hwngfat gonq. Cuengq roengz cienz bangbouj hwnqguh diegnaz 671 ik maenz， haeujcoengh hwnqguh yiengh diegnaz caeuq suijli biucinj sang. Gibseiz bued cienz dajciengj aen yienh diuhok mouseng lai caeuq bangbouj ap gaj gij mou deng binghraq Feihcouh， haeujcoengh mouseng ndaej onj ok bauj gunghawj. Lai haeuj yamq caezcienz gij cwngcwz diepbouj cawx nungzgih. Gya hung dajciengj aen yienh ok haeux lai. Haeujcoengh guekgya cauhlaeb gij nungzyez canjyez yenzgih yienhdaih caeuq gij cin nungzyez canjyez ak， hawj it ngeih sam canjnieb lajmbanj ndaej yungzhab engq laeg. Nab gij ginghfei coih hoh aen gunghcwngz gwn raemx lajmbanj haeuj aen gvaengh cunghyangh caizcwng haeujcoengh bae， lai hawj bangbouj dieg cungqgyang baihsae. Gyarengz hengzguh yiengh saeh sam bi cingjceih seiqhenz vunzyouq lajmbanj. Nienznaemj ok gij cwngcwz caizsui haeujcoengh, doinyoengx hengzguh aen canloz gvaenghdieg youqgaenj. Gyahung aen gveihmoz cunghyangh senjnod ceihawj deihfueng， caemhcaiq lai nyeng coh dieg cungqgyang baihsae caeuq dieg gungzhoj， lai haeuj yamq daezsang gij suijbingz goekdaej goenggungh fugsaeh dieg caeuq dieg gyangde doxdaengh. Haeujcoengh dieggeq gwzming、 dieg minzcuz、 dieg henzguek、 dieg gungzhoj lai vaiq hwngfat.
Onjbouh daezsang gij suijbingz baujcang beksingq gwndaenj. Coicaenh gyalai couhnieb. Haeujcoengh hengz gij cwngcwz couhnieb baiz youq gonq， cunghyangh caizcwng ceiyungh gij cienz bangbouj couhnieb 539 ik maenz， demmaj 14.9％. Daj gij cienzgoek saetnieb baujyiemj gietlw dawz ok 1000 ik maenz haeujcoengh daezsang gij dinfwngz guhhong， lai vaiq gungganq gak loih bouxcaiz rox dinfwngz. Daezswng guhhong dinfwngz caeuq gungganq boux cienj gangj vuenh hong mauhgvaq 1500 fanh vunzbaez. Daezsang aen soq gaeugemj gij suiqngeg bouxbing duiyiz gag ra hong caeuq gyoengq vunz ndaej daegbied gvansim de cauhnieb couhnieb haenx， gyahung aen gvaengh gij giyez ndaej yiengj gij cwngcwz hawj ndei. Caizcwng lienzdaemh gyalai douzcienz gyauyuz. Gyamaenh singz mbanj doengjit cujyau aeu baujcang gij cienzyungh yivu gyauyuz lajmbanj， doinyoengx hwngfat yozcenz gyauyuz、 cizyez gyauyuz、 gauhdwngj gyauyuz. Daengx guek daihgaiq miz 1.5 ik boux hagseng singzmbanj ciepsouh mboengq yivu gyauyuz de ndaej mienx yozcazfei caemhcaiq mienx cienz aeu ndaej sawsonhag， miz 1900 fanh boux hagseng ndawranz gunnanz de ndaej cienz bangbouj gwndaenj， miz 1400 fanh boux lwgnyez riengz bohmeh haeuj singz guhhong de ndaej raek cienzyungh gyauyuz haeuj hag， miz 3700 fanh boux hagseng ciepsouh mboengq yivu gyauyuz lajmbanj ndaej bangbouj gwn haeuxdonq yingzyangj. Ndalaeb cunghdwngj cizyez gyauyuz gozgyah ciengjyozginh，gauhciz yenyau gya’gvangq mienh fat ciengjyozginh cuyozginh、 daezsang gij biucinj bangbouj， aen moegbiu haeujcoengh gauhciz yenyau lai ciu hagseng mauhgvaq 100 fanh vunz swnhleih guhbaenz. Daezsang gij suijbingz baujcang ciengxlaux. Ok aen cungjdaej fueng’anq gaijgwz caeuq caezcienz aen cidu ciengxlaux baujyiemj，doengjit suenqveh gij ciengxlaux baujyiemj sengjgaep. Aen beijlaeh cunghyangh diuznoiz cienzgoek ciengxlaux baujyiemj daezsang 3.5％， 22 aen sengj giz dieg cungqgyang baihsae caeuq gunghyez dieggeq daengx bi ndaej ndei 1512 ik maenz. Netsaed doinyoengx gij hong vehcienj dingz swhbwnj guekmiz ndeu cungrim aen gihginh ndawbiengz baujyiemj. Daezsang gij biucinj cienz ciengxlaux gyoengq vunz daj giyez caeuq gigvanh swyez danhvei duiyouh de， bingzyaenx ndaej demlai 5％ baedauq. Doinyoengx hwnqguh Cungguek cangqheiq. Doinyoengx laebhwnj aen cidu ywbingh baujyiemj vunzsingz vunzmbanj doengjit， aen biucinj caizcwng bangbouj ywbingh baujyiemj moix vunz lai dem 30 maenz. Ok gij cwngcwz gemjmienx gij cwnghcizsui gijyw bingh gig noix raen， haeujcoengh hawj gij yw gauhhezyaz caeuq dangzniubing mwnzcinj hai de nabhaeuj yihbauj bauqsiu， miz 3 ik lai bouxbingh ndaej ik. Gyarem aen cwngcwz lamxdaej beksingq gwndaenj. Laebdaeb daezsang gij suijbingz banggouq ndawbiengz boux gwn dihbauj caeuq gij biucinj bangbouj gyoengq vunz ndaej youhfuj daengj de， ok gij cwngcwz gaijgez gij ndawbiengz baujyiemj bouxbing duiyiz gatduenh caiq ciep daengj. Gya rengz baujcang daihdaej miz ranz youq. Haeujcoengh gaij ranzdiengz hwnqguh 316 fanh dauq， gaijcauh gij ranzyiemj lajmbanj hawj bouxgungzhoj laeb dangj laeb gaj daengj seiq cungj vunz youqgaenj de 135.5 fanh hoh， 27 aen digih gaijcauh giz ranz gaeuqgeq 352 fanh hoh、3.2 ik bingzfuengmij. Cunghyangh caizcwng guh sawqdiemj haeujcoengh hwngfat aen hawciengz coranz. Doinyoengx hwngfat gij saehnieb vwnzva dijyuz. Gij cienz cienhangh cunghyangh bangbouj deihfueng hwnqguh aen dijhi fugsaeh goenggungh vwnzva ceiyungh 147 ik maenz， demmaj 14％. Haeujcoengh ciepswnj hwngfat yiengh vwnzva ndei Cunghvaz daj ciuhgonq cienz roengzdaeuj de， gyarem baujhoh gij vwnzva ciuhgeq lwlouz haenx.
Doinyoengx haeujlaeg gaijgwz aen dijci caizsui. Lai haeuj yamq roiswnh gij caizcwng gvanhaeh cunghyangh caeuq deihfueng. Gaenxmaenx doinyoengx baen lingjyiz gaijgwz vehfaen gij caizcwng saehgienz caeuq ceiyungh cwzyin cunghyangh caeuq deihfueng， ok gij gaijgwz fueng’anq doengh aen lingjyiz gyauyuz、 gohgi、 daehyinh daengj. Doinyoengx gaijgwz vehfaen gij souhaeuj cunghyangh caeuq deihfueng，baujciz cwnghcizsui “faen boux dingz” mbouj bienq， diuzcingj caezcienz aen gihci faen rap cwnghcizsui louz dingj doiq gvaeh， mingzbeg doekdingh doilaeng hot sou suiqsiufeiq caemhcaiq onjdup veh hawj deihfueng. Caezcienz aen cidu guenjleix yawhsuenq. Gyarengz doengjit suenqveh gij yawhsuenq aen gihginh miz singqcaet cwngfuj caeuq gij yawhsuenq itbuen goenggungh，lai haeuj yamq gya’gvangq aen gvaengh guh yawhsuenq ginghyingz gij swhbwnj guekmiz cunghyangh. Yienghyiengh saedhengz yawhsuenq cikyauq guenjleix，laeb caezcienz aen dijhi cikyauq cijbiuh caeuq biucinj，laebdaeb gya’gvangq aen gvaengh bingzgyaq cikyauq youqgaenj，hawj bingzgyaq gezgou ndaej yungh engq ndei. Lienzdaemh doinyoengx aeu hawciengz soujduenh bae guenjleix guekcaiq，hawj aen gapgyaq binjcungj geizhanh guekcaiq engq habbanj. Gya’gvangq aen gvaengh sawqdiemj bienguh gij caizvu baugau cwngfuj dohdaengz 40 aen cunghyangh bouhmonz caeuq 36 giz deihfueng. Lai haeuj yamq gaijgwz aen cidu cwngfuj dajcawx. Yienghyiengh haeujbanj gyarem bae guenjleix cwngfuj dajcawx. Yunghrengz doinyoengx gaijgwz gij cidu sougvaeh. Caezcienz aen cidu cwnghcizsui， cobouh laebhwnj aen cidu goyinz sojdwzsui gyoebhab caeuq faenloih dox giethab. Aen fap swhyenzsui ginggvaq Daengx Guek Yinzda Cangzveijvei saemjlwnh doenggvaq, aen fap gensezsui henhoh hawsingz、 aen fap gisui caujan ciuq bouhloh daezcingj Daengx Guek Yinzda Cangzveijvei baeznduj saemjlwnh. Yenzgiu cugyamq laebhwnj gij dijhi cienzgvaeh deihfueng onjdingh、 ndaej lienzdaemh haenx. Gaenxmaenx doidoengh gaijgwz swhcanj guekmiz、giyez guekmiz. Yiengq Daengx Guek Yinzda Cangzveijvei bauq yiengh guenjleix sojmiz swhcanj guekgya gaemmiz haenx. Gaenxmaenx doidoengh laebhwnj guekmiz ngaenzbonj douzswh、 yinyingz gunghswh, doidoengh aeu gunghswhci bae gaij laeb Cungguek Guekgya Dietloh Cizdonz、 Cungguek Youzcwng Cizdonz. Lai haeuj yamq roi ndei aen dijci guenjleix gij ginhyungz swhbwnj guekgya gaemmiz.
Mboujduenh daezsang gij suijbingz guenjleix caizcwng. Roengz rengzhung guenj ndei yawhsuenq caephengz. Gibseiz baefuk nienzco yawhsuenq, gyavaiq fatbouh senjnod ceihawj yawhsuenq, dukcoi deihfueng caenhvaiq dawz cienzngaenz faen daengz dieg hanghmoeg bae, caenhvaiq fazveih cienzngaenz yauqik caeuq cwngcwz cozyung. Maedcaed gaenriengz yawj yawhsuenq caephengz ndaej baenzlawz yiengh, gyaak yawhsuenq caephengz faensik, ciuq aen yenzcwz ndaej mbaet couh mbaet, dawz gij ceiyungh nienzdaej gaxgonq ndaej mbouj caiq anbaiz haenx mbaet roengzdaeuj, dingjmaenh fuengzre nienzdaej “cacaemj yungh cienz”. Dazyinx deihfueng gaengawq saedsaeh ciuqfap guh ndei hong yawhsuenq diuzcingj. Gyamaenh hong giekdaej caizcwng guenjleix. Doicaenh laebguh aen hidungj guenjleix yawhsuenq baenz cingjdaej bae, doidoengh guhbaenz aen dijhi yawhsuenq guenjleix dawzbanj caeuq gisuz biucinj daengx guek doengjit haenx. Gyarem seizseiz gamhanh gij cienzngaenz cang guek gyoebcomz ceihawj haenx, cobouh hwnqbaenz aen dijhi seizseiz gamhanh caephengz yawhsuenq ndaej goq daengz gak gaep caizcwng. Ciuqfap ciepsouh yinzda gamduk yawhsuenq. Doeksaed gij gezyi mizgven yawhsuenq yinzda nem aen cangzveijvei de. Dingh’aeu dawz gaijgez gij vwndiz daengz dieg caeuq laebhwnj gij gihci ciengzgeiz mizyauq haenx doengzbouh doicaenh, gibseiz yiengq Daengx Guek Yinzda Cangzveijvei bauqgangj saemjgeiq cazok gij vwndiz doedok haenx cingjgaij ndaej baenzlawz yiengh. Gaenxmaenx boiqhab yinzda guh hong yawhsuenq saemjcaz. Gaenxmaenx guh ndei yiengq yinzda daibyauj doengbauq yiengh hong bienguh yawhsuenq. Mboujduenh gaijndei caezcienz gij hong bienguh yawhsuenq. Gyarem caeuq yinzda daibyauj gaeudoeng lienzhaeh, cungfaen dingqaeu yigen genyi, gibseiz hoizwngq gij gvansim de.
Gyonj daeuj yawj, bi 2019 caephengz yawhsuenq ndaej haemq ndei, doengh gij hong caizcwng gaijgwz hwngfat cungj ndaej baenaj, rengzrwd dwk bauj ginghci lienzdaemh cangqheiq hwngfat caeuq aen biengz huzndei onjdingh. Neix dwg aen Dangjcunghyangh aeu Siz Ginbingz dungzci guh cehsim giengzak lingjdauj ndaej daeuj, dwg Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz gohyoz dazyinx ndaej daeuj, dwg Daengx Guek Yinzda、 Daengx Guek Cwnghez caeuq gyoengq daibyauj veijyenz gamduk dazyinx ndaej daeuj, dwg gak dieg、 gak bouhmonz nem daengx guek gak cuz yinzminz caezcaemh roengzrengz ndaej daeuj.
Doengzseiz, caephengz yawhsuenq caeuq ndaw hong caizcwng lij bungzdaengz mbangj di vwndiz caeuq deuyex. Cujyau dwg: Mbangj deihfueng gihcwngz caizcwng soucei doxdingj haenqrem, gyahung gij aplig “sam bauj”. Mbangj aen gvaenghdieg vanzlij miz gij yienhsiengq ceiyungh dinghmaenh bienq gyaengj, miz mbangj cienzngaenz yungh ndaej mbouj gaeuq ndei. Yawhsuenq cikyauq moegbiu laebdingh lij caengz gaeuq gohyoz、cikyauq gag bingz lij caengz gaeuq cinjdingh dawzbanj, cikyauq ndaej yungh lij aeu haenqrengz dem. Mbangj di deihfueng diuzrap dawzcaiq haemq naek, gij fungyiemj ngaenzcaiq ndumj youq haenx mbouj ndaej yawjlawq. Dou gig yawjnaek doengh gij vwndiz neix, yaek gaenxmaenx yungh banhfap bae gaijgez.
Gak boux daibyauj:
Bineix doxdaeuj, binghraq bwtndat sawqmwh fatseng haenx doiq guek raeuz ginghci ndawbiengz hwngfat daiqdaeuj gij cungdongj de cungj caengz miz gvaq. Dangjcunghyangh dawz fuengzgaemh binghraq dangguh gaiq saeh hung daih’it daeuj ca, Siz Ginbingz cungjsuhgi caenndang cijveih、caenndang baijbouh, dinghmaenh dawz beksingq cungqvunz sengmingh ancienz caeuq ndangdaej cangqgenq cuengq youq daih’it, daiq daengx dangj daengx ginh daengx guek gak cuz yinzminz hoenx ndei ciengz ciengq lwgminz、 ciengz ciengq cungjdaej、 ciengz ciengq lanzdangj. Ginggvaq dwgrengz saenhoj buek hoenx, bauj Vujhan、 bauj Huzbwz aeundaej gij cwngzgoj dingh hingz he, ciengz ciengq fuengzgaemh binghraq aeundaej aen canloz cwngzgoj hungnaek, gij hong dungjcouz doinyoengx fuengzgaemh binghraq caeuq hwngfat ginghci ndawbiengz aeundaej cingzyauq gaenxmaenx.
Caizcwng bouhmonz nyinhcaen doeksaed aen gezcwz baijbouh Dangjcunghyangh、 Gozvuyen, ciuq gij iugouz dinghmaenh saenqsim、 caezsim doxbang、gohyoz fuengzceih、dawzcinj maeuzveh, gyarem bauj gij cienz fuengzgaemh binghraq, hopheux gemjmbaeu diuz rap hangh feiqyungh gouqyw vunzbingh、 daezsang gij daiyi doengh boux fuengzyw binghraq、 bauj hawj doxgaiq fuengzgaemh binghraq、 gyavaiq yenzgiu haifat yizmyauz caeuq yw fuengzgaemh binghraq doengh gij neix, okdaiz baenzroix caizcwng sougvaeh cwngcwz bae haeujcoengh, caenhrengz haeujcoengh hoenxhingz ciengz ciengq fuengzgaemh lanzdangj binghraq. Gat daengz 4 nyied daej, gak gaep caizcwng gungh anbaiz 1499 ik maenz fuengzgaemh binghraq, saedbauj beksingq cungqvunz mbouj yungh yousim aenvih feiqyungh lai cix mbouj gamj daeuj yawjbingh, saedbauj gak dieg mbouj yungh aenvih cienzngaenz vwndiz cix yingjyangj yw bingh gouq vunz caeuq fuengzgaemh binghraq.
Youq mwh guh ndei gij hong mizgven fuengzgaemh binghraq, doengzseiz saedhengz buek cwngcwz duenhmbaek lamxdaej bangcoh giyez onjdingh gangvih, haeujcoengh giyez gejrungq hojnanz hwngfat doxbae, miz bouhloh dauq haihong, gyavaiq swnghcanj swnghhoz hoizfuk cingqciengz. Faen sam buek daezgonq cuengq roengz 2020 nienz demgya ngaenzcaiq hanhngeg 28480 ik maenz, baudaengz itbuen ngaenzcaiq hanhngeg 5580 ik maenz caeuq cienhangh ngaenzcaiq hanhngeg 22900 ik maenz, haemq goq doengh giz cungdenj hanghmoeg lai、 fungyiemj suijbingz daemq、mizyauq douzswh ragdoengh cozyung lai de, gyavaiq bae guh hanghmoeg hungnaek caeuq minzswngh gunghcwngz hungnaek, doinyoengx caenhvaiq cauxbaenz hong soq bienq saedhuq, ragdoengh ginghci demmaj. Daj 3 nyied 1 hauh daengz 6 nyied daej, faen duenh daezsang deihfueng caizcwng swhginh louzyungh beijlaeh 5 aen bakfaendiemj, saen dem gij cienz ce yungh 1100 ik maenz baedauq, cienzbouh ce hawj yienhgaep sawjyungh, hawj gihcwngz caizcwng ndaej bingzonj guhhong.
Ngeih、 Aen Yawhsuenq Caujan Cunghyangh Caeuq Deihfueng Bi 2020
Bi 2020 dwg bi sousat cienzmienh hwnqbaenz aen biengz siujgangh caeuq “cibsam haj” gveihva, hix dwg bi hingzdingh ciengz ciengq gunggeng duetgungz de, guh ndei bienguh yawhsuenq caeuq hong caizcwng yiyi hungnaek. Aeu gij baijbouh iugouz Dangjcunghyangh、 Gozvuyen, dungjcouz doinyoengx gij hong fuengzgaemh binghraq caeuq ginghci ndawbiengz hwngfat, gohyoz duenqdingh gij byaijyiengq caizcwng, hableix bienguh caizcwng yawhsuenq, daengxbuenz bae maeuzveh gij hong caizcwng, saedbauj guhbaenz gij yinvu hingzdingh ciengz ciengq gunggeng duetgungz, cienzmienh hwnqbaenz aen biengz siujgangh.
（It） Faencek aen byaijyiengq caizcwng soucei bi 2020.
Seizneix, deng gij binghraq daengx seiqgyaiq cungdongj, seiqgyaiq ginghci doekbaih youqgaenj, diuz lienh canjnieb、diuz lienh gunghawj baenqcienj deng lanz, gozci gaicawx douzcienz sukreuq, aen hawciengz daihbuek sanghbinj rubhwnj rubroengz. Ndaw guek sawjcienz、 douzcienz、 ok guek gyodroengz, gij aplig couhnieb daraen gyahung, giyez daegbied dwg aen giyez minzyingz、 aen giyez rauh iq saeq hojnanz doedok, caizcwng soucei doxdingj gyahaenq, caizcwng yinhhengz aplig demlai.
Daj caizcwng souhaeuj daeuj yawj, deng doengh gij yinhsu binghraq cungdongj、gemj gvaeh gyangq feiq yingjyangj, bineix 1—4 nyied caizcwng souhaeuj doekdaemq 14.5%, ndawde, 1 nyied doekdaemq 3.9%, 2 nyied doekdaemq 21.4%, 3 nyied doekdaemq 26.1%, 4 nyied doekdaemq 15%, gyangqdaemq fukdoh aen geiqdoh daih’it cug ndwen gyahung le seizneix okyienh yiengh sukiq. Yawhgeiq bineix geij ndwen laeng de, gaenriengz swnghcanj swnghhoz dauqcungz hoizfuk, caizcwng souhaeuj hainduj onjmaenh hoizswng, hoeng lij miz gij mbouj doekdingh haemq. Gij souhaeuj itbuen goenggungh yawhsuenq aen geiqdoh daihngeih aiq lij daengx youq mbouj miz demmaj, buenq bi laeng aiq dauqfuk demmaj caemhcaiq dauq bouj dingz buenq bi gonq gemjsou de.
Daj caizcwng ceiyungh daeuj yawj, dungjcouz doicaenh gij hong fuengzgaemh binghraq caeuq ginghci ndawbiengz hwngfat, caenhrengz bauj ndei guhbaenz aen moegbiu yinvu dwkhoenx hingzdingh ciengz ciengq gunggeng duetgungz、cienzmienh hwnqbaenz aen biengz siujgangh, caizcwng ceiyungh lij aeu baujciz itdingh giengzdoh, daegbied dwg gak gaep caizcwng vih fuengzgaemh binghraq douzhaeuj cienzngaenz gig lai, doeksaed gij yinvu “roek bauj”、 saedhengz gemj gvaeh gyangq feiq hix aeu caizlig cengjdaemx, mbangj dieg aenvih duenhmbaek mienx gij cienz ndawbiengz baujyiemj hix aeu caizcwng bae bangbouj aen gihginh de.
Baihnaj caeuq baezlaeng mboengq ndeu, raeuz hwngfat bungz daengz fungyiemj deuyex cungj caengz miz gvaq, hoeng raeuz miz gij cwngci daegbied caeuq cidu ndei raeuh、 miz gij ginghci giekdaej cungcuk、 miz gij hawciengz rengzndumj hungloet, ik fanh lwgminz gaenxguh coengmingz. Cijaeu raeuz najdoiq deuyex, dinghmaenh aen sim hwngfat, demgya hwngfat rengzlig, itdingh ndaej roemx gvaq nanzguen, Cungguek hwngfat bietdingh maqmuengh rimrwd. Neix dwg aen giekdaej maenhsaed caeuq aen cengjhwet rengzloet guh ndei hong caizcwng、dawz ok gij yungh caizcwng raeuz.
（Ngeih）Gij swhsiengj caeuq yenzcwz dazyinx bienguh yawhsuenq caeuq guh hong caizcwng bi 2020.
Bienguh yawhsuenq caeuq guh hong caizcwng bineix, youq aen Dangjcunghyangh aeu Siz Ginbingz dungzci guh cehsim akrem lingjdauj lajde, aeu Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz guh dazyinx, cienzmienh daengzdaej doeksaed gij cingsaenz Cibgouj Daih caeuq Cibgouj Gaiq Ngeih Cung、 Sam Cung、Seiq Cung Cienzhoih aen Dangj, dingjmaenh doeksaed gij gihbwnj lijlun、 gihbwnj lohsienq、 gihbwnj fanghloz aen Dangj, gya’ak “seiq aen eiqsik”、 dinghmaenh “seiq aen gagsaenq”、 guh daengz “song aen henhoh”, gaeugaenj gij moegbiu yinvu cienzmienh hwnqbaenz aen biengz siujgangh, dungjcouz doicaenh gij hong fuengzgaemh binghraq caeuq ginghci ndawbiengz hwngfat, youq laj yiengh cingqciengz fuengzgaemh binghraq, dingjmaenh gij goekdiuh aenhong youq ndaw onjdingh gouz baenaj, dingjmaenh hwngfat leixniemh moq, dingjmaenh gaijgwz aen gapgyaq mbiengj gunghawj guh cawjsienq, dingjmaenh gaijgwz hailangh guh doenghlig, doidoengh hwngfat caetliengh engq ndei, nyengh aeu dwk ndei sam ciengz ciengq gunggeng, gya rengz gij hong “roek onj”, bauj gihminz couhnieb、 bauj gihbwnj gwndaenj、 bauj hawciengz cawjdaej、 bauj haeuxgwn nwngzyenz ancienz、 bauj diuz lienh canjnieb diuz lienh gunghawj onjdingh、 bauj gihcwngz yinhcienj, dingjmaenh saedhengz aen canloz gyahung gij aeuyungh ndaw guek, aeu gij hungzgvanh cwngcwz engq rengz ak bae cungsiu gij yingjyangj binghraq, gij caizcwng cwngcwz gaenxmaenx aeu engqgya gaenxmaenx miz yungh, daezsang aen beijlwd cihhoengz, fat gij guekcaiq daegbied dingjhoenx binghraq, demlai gij cienhangh caigen deihfueng cwngfuj, dingjmaenh ndaek cing suenq saeq、cienz yungh haeuj bakcax, daezsang gij yauqlwd sawhyungh cienzngaenz, cingqcaen dawz ok gij cozyung youqgaenj onjdingh ginghci, henhoh aen daihbuenz ginghci hwngfat caeuq ndawbiengz onjdingh, saedbauj guhbaenz aen moegbiu yinvu hingzdingh ciengz ciengq gunggeng duetgungz, cienzmienh hwnqbaenz aen biengz siujgangh.
Daengzdaej doeksaed gij swhsiengj dazyinx neix, aeu daegbied dawz ndei gij yenzcwz lajneix: It dwg ganhoj haenq guh、 gaenxguh mbaetyungh. Dingh’aeu doeksaed gij iugouz cwngfuj caen haed saivaq gvaq saedceij, lai sou mbaet yungh、ndaek cing suenq saeq, naih hoj gaiq fouz, mbaet cienz banh saeh. Ngeih dwg yawj sou dingh cei、 swng ndei dem yauq. Ciuq saed bienguh gij yawhsuenq souhaeuj, hawj caizcwng souhaeuj lai ndei. Dingjmaenh aenq haeux roengz rek、miz bauj miz at、ndaej at caenh naenx, dwkbyoengq gieksoq siengjfap caeuq ceiyungh dinghmaenh gwzgiz. Sam dwg gyarem guenjleix、 yiemzsuk gijliz. Dingh’aeu sien miz yawhsuenq caiq miz ceiyungh, yiemzgek gaemhanh gij saeh boujgya yawhsuenq. Yiemzgek ciuqsouj gij faplwd fapgvi caeuq cidu gvidingh caizcwng ginghci, doiq doengh boux boihfamh caizgingh gijliz de, yiemzsuk cazdawz cwzyin. Seiq dwg gwnz laj lienzdoengh、 caezsim gaprengz. Guh’ak aen swhsiengj daengx guek “buenz geiz ndeu”, gyaak cunghyangh caeuq deihfueng dox boiqhab, youq doengh yiengh wngqdoiq binghraq cungdongj、doeksaed baijbouh gaijgwz caizsui、gyarem guenjleix caizcwng soucei、gyaak caizcwng ndaej lienzdaemh caeuq rengzlaeng hwngfat ginghci ndawbiengz neix cauxbaenz hablig akhung.
(Sam) Gij cwngcwz caizcwng caeuq gij hong caizcwng bi 2020.
Gij cwngcwz caizcwng gaenxmaenx bi 2020 aeu engqgya gaenxmaenx miz yungh， hopheux guh ndei hong “roek onj”、 doeksaed gij yinvu “roek bauj”， yungh gij rengz cwngcwz engq hung bae cungcawz binghraq yingjyangj， caencingq fatok gij cozyung youqgaenj onjdingh ginghci. Gij cwngcwz caizcwng bi 2020 cungdenj baudaengz:
It dwg gyahung reng gemj gvaeh gyangq feiq. Gyarem gij cwngcwz duenhmbaek, caeuq yiengh cidu anbaiz dox giethab, cungdenj gemjmbaeu diuzrap dawz gvaeh aen giyez rauh iq saeq、 godij gunghsanghhu caeuq aen giyez hangz hojnanz. Gij gemj gvaeh gyangq feiq cwngcwz roek nyied gaxgonq daengz geiz de, aen geiz caephengz ietraez daengz bineix satbyai, haeujcoengh aen cawjdaej hawciengz hoirwnh hojnanz bae hwngfat, roengzrengz onj giyez bauj couhnieb. Gyaqguj daengx bi vih aen cawjdaej hawciengz lai gemjmbaeu yaek mauhgvaq 2.5 fanh ik maenz.
Ngeih dwg lai miengloh couzcwk cienzngaenz. Youq mboengq daegbied aeu yungh banjdaeuz daegbied, dawz gij beijlwd cihhoengz daj 2.8% daezsang daengz 3.6% doxhwnj, aen gveihmoz cihhoengz caizcwng beij bigonq demlai 1 fanh ik maenz, gaenxmaenx cungsiu gij yingjyangj gemjsou dem cei binghraq cauxbaenz haenx, onjdingh caemhcaiq gikhwnj hawciengz saenqsim. Doengzseiz fathengz gij guekcaiq daegbied dingjhoenx binghraq 1 fanh ik maenz. Gya rengz buenzhoengh sawjyungh gij cienzngaenz gak loih gietcienj gietrom haenx, roengzrengz demlai gij caizlig ndaej yungh de, bouj conghvauq caizcwng gemj sou lai cei cauhbaenz de.
Sam dwg diuzcingj gaijndei aen gapgyaq ceiyungh. Gij ceiyungh bauj gwndaenj de cij lai mbouj noix, gij ceiyungh gvaenghdieg youqgaenj de aeu ndeindei baujcang, gij ceiyungh itbuen de dingh’aeu atgemj, yiemzgimq saen hwnq gij louz dangz gvanj soj duh cwngfuj, yiemzgimq saisaengq. Cunghyangh cwngfuj bouhmonz daiqdaeuz haed saivaq gvaq saedceij， cunghyangh bonjgaep ceiyungh gyangqdaemq 0.2%，ndawde gij ceiyungh mbouj gaenj de atgemj 50% doxhwnj. Deihfueng caizcwng hix aeu daihlig atgemj baeznaengz ceiyungh， laebdaeb atgemj gij cienzyungh “sam goeng”， yiemzhaed gij cienzyungh haihoih okcai、swhsinz beizyin、 lundanz canvei daengj. Doengh gij cienzngaenz gietlw、 caemdingh de aeu sou caenh sou, dauqcungz anbaiz. Gij cienzngaenz caizcwng aeu gyarengz daezsang caetliengh demlai yauqik, itdingh aeu ndaek cing suenq saeq, dawz cienz yungh haeuj bakcax bae.
Seiq dwg hoizgej gij hojnanz deihfueng caizcwng. Gij caizcwng cihhoengz saen demgya caeuq gij guekcaiq daegbied dingjhoenx binghraq haenx cienzbouh anbaiz hawj deihfueng， aeu cib cuk cib yungh youq aen fuengmienh doeksaed gij yinvu “roek bauj” caeuq gemj gvaeh gyangq feiq daengj. Laebhwnj aen gihci senjnod ceihawj daegbied he, cienzngaenz cigsoh cuengq daengz gij gihcwngz singz yienh, cigsoh ik giyez leih beksingq, cujyau yungh haeuj bauj couhnieb、 bauj beksingq gwndaenj、 bauj hawciengz cawjdaej, baudaengz haeujcoengh gemj gvaeh gyangq feiq、 gemj co gyangq leih、 gyalai sawjcienz caeuq douzcienz daengj, gyarem gij singqcaet caizcwng goengyungh, nyengh mbouj ndaej gyaegroengz noizyungh.
Haj dwg gyahung aen gveihmoz cwngfuj douzcienz. Gij guekcaiq daegbied dingjhoenx binghraq cujyau yungh haeuj deihfueng hwnqguh gij giekdaej sezsih goenggungh veiswngh caeuq gij ceiyungh doxgven dingjhoenx binghraq, caemhcaiq sien louz dingz cienz ndeu yungh bae gaijgez gihcwngz gij hojnanz daegbied de. Anbaiz deihfueng cwngfuj cienhangh caigen 3.75 fanh ik maenz， beij bigonq demlai 1.6 fanh ik maenz, mizyauq haeujcoengh bouj giznyieg、 ik gwndaenj、 coi sawjcienz、 hoengh ndawyungh.
Bi 2020 cujyau ceiyungh cwngcwz caeuq duenh laeng cungdenj caizcwng gunghcoz:
1. Haeujcoengh hoenx ndei sam ciengz ciengq haenq.
Genhgez dwkhingz ciengz ciengq haenq bang duetgungz. Laebdaeb gyarengz guh caizcwng banggungz douzhaeuj， cunghyangh caizcwng bangbouj deihfueng cienhangh banggungz swhginh anbaiz 1461 ik maenz， lienzdaemh haj bi moix bi demgya 200 ik maenz， caemhcaiq doenggvaq cienzngaenz gietcienj caiq baez dog demlai 300 ik maenz, lai ngeng coh “sam gih sam couh” daengj giz dieg gungzheq、 giz dieg venj baiz coi banh caeuq giz dieg deng binghraq saegsomx haemq naek. Gyarengz cingjhab gij cienzngaenz nangqdaengz nungzyez aen yienh gungzhoj， doeksaed gij cwngcwz canjnieb banggungz、 couhnieb banggungz、 siufeiq banggungz、 gyauyuz banggungz，gyagiengz senj dieg banggungz gvaqlaeng laebdaeb bangfuz. Laebdaeb gaijndei laebndei aen bingzdaiz seizseiz gamcaek gaemhanh，gyagiengz gamguenj gij cienz banggungz caizcwng hawj，gyahaenq guenjleix gij cikyauq daengx aen gocwngz gij cienz yungh youq banggungz hanghmoeg. Laebdaeb caephengz gij cujyau fuzre cwngcwz aen yienh duet mauh de. Haeujcoengh guh ndei gaiq hong gamcaek dauq gungz caeuq bangfuz，cagaenj yenzgiu yungh cwngcwz haeujcoengh gyamaenh gij cwngzgoj duetgungz gunggeng、 ciepswnj doicaenh gaijgez siengdoiq gungzhoj, doinyoengx gunggeng duetgungz caeuq hawj lajmbanj hwnghoengh ndeindei doxciep.
Doidoengh guhbaenz aen moegbiu duenhmbaek gunggeng fuengzceih uqlah. Genhciz fuengyiengq mbouj bienq、 ligdoh mbouj gemj， doedyienh ciuqfap ceih uq、 gohyoz ceih uq、 cingcinj ceih uq， doidoengh seiqhenz swnghdai laebdaeb bienq ndei. Cungdenj haeujcoengh hoenx ndei ciengz ciengq henhoh mbwngvengq、 raemxsaw、 namhseuq， faenbied anbaiz swhginh 250 ik maenz、 317 ik maenz、 40 ik maenz yungh youq hoengheiq、 raemx、 namh daengj fuengmienh fuengzceih uqlah. Gyavaiq doinyoengx gij hong cungdenj ceihleix raemx ndaem raemx haeu hawsingz、 cawqleix gij raemxuq hawsingz dieg cungqgyang baihsae sawj ndaej bienq ndei raen yauq、baujhoh coihfuk rangh dieg Dahcangzgyangh caeuq Dahvangzhoz、 ceihleix nungzyez lajmbanj uqlah、 raengcawz gij cihuq caizyouz gaeuq daengj. Haeujlaeg doicaenh aen gunghcwngz sawqdiemj coihfuk baujhoh gij swnghdai bya raemx ndoeng naz huz nywj， laebdaeb hengzguh yiengh cingjceih hawj “haijvanh saeklamz” caeuq gyoebhab ceihleix Bozhaij. Haeujcoengh laebhwnj aen dijhi baujhoh dieg swyenz aeu guekgya gunghyenz guh cawjdaej haenx， saedhengz aen hengzdoengh fuengz sa ceih sa caeuq sawj diegguek bienq heu，gyarengz baujhoh coihfuk gij swnghdai diegnywj linzyez. Doidoengh venjbaiz haiguh aen gihginh guekgya saekheu hwngfat. Gya rengz dienzbouj giz swnghdai gunghnwngzgih youqgaenj. Gyavaiq doicaenh laebhwnj aen gihci yiengq vang dienzbouj gij swnghdai rangh dieg Dahcangzgyangh、 Dahvangzhoz.
Cietsaed guh ndei gij hong fuengzre vaqgej fungyiemj. Laebcaez aen gihci ciengzseiz gamcaek gij ngaenzcaiq deihfueng cwngfuj，yenzcwz doxdoengz、 gamguenj ityiengh，gibseiz yawjok caeuq cawqceq gij fungyiemj ndumjyouq. Gyoebhab yungh ndei banhfap onjdangq vaqgej gij caiq ndumj gaemmiz haenx， yiemzgimq guh gyaj vaqgej dawzcaiq， nyengh mbouj ndaej aen vwndiz baihnaj cix ce saeh ndumj. Gyarem gamduk gyaepdawz cwzyin， guh daengz gyaepdawz cwzyin baenzciuh、 dauqcaz cwzyin. Dojdangq cawqceq gij fungyiemj aen ginhyungz gihgou gwnz deihfueng miz fungyiemj sang de， leix cingcuj gij cwzyin gak fueng， ciuqfap rapdawz sonjsaet fungyiemj. Roengzrengz fuengzre gij fungyiemj ndaw guek caeuq gij fungyiemj daj rog guek cienz haeuj haenx doxdaeb caez doengh. Genhgez souj maenh diuz daejsienq mbouj fatseng fungyiemj.
2. Haeujcoengh saedhengz aen canloz gyahung gij aeuyungh ndaw guek.
Coicaenh dauq hoengh siuhfei. Aeu gohyoz fuengzre gaemhanh binghraq guh ingbaengh，haeujcoengh gak loih sanghcangz、hawciengz cienzmienh dauqfuk seng’eiq dauqfuk haihaw、 sawj hangz fugsaeh gwndaenj hoizfuk lumj doenghbaez. Gujli fathoengh yiengh yezvu moq youq gwnz vangj guh siuhfei，gyadaih yiengh siuhfei loegsaek、 gengangh. Dawz aen geizhanh saedhengz gij cwngcwz aeu caizcwng boujdiep bae doigvangq sawjyungh yiengh giceh yungh nwngzyenz moq gyaraez daengz 2022 nienzdaej，hoizrwnh yamqdin gemjnoix boujdiep，gyavaiq youq ndaw gvaengxdieg goenggungh gyaudoeng hawsingz yungh gij ci dendung, laebdaeb haeujcoengh hwnqguh donghcungdienh、gizvuenhdienh daengj. Haeujcoengh densangh、 vaiqsoengq haeuj lajmbanj，bouj caez giznyieg nungzcanjbinj lwngjlen vuzliuz sezsih. Gyavaiq hwnqguh aen dijhi fugsaeh ciengxlaux，haeujlaeg doicaenh ywbingh caeuq ciengxlaux、 fukcangq caeuq ciengxlaux giethab，onjbouh gyalai sawq guh aen cidu ciengzgeiz ganqguenj baujyiemj.
Gaenxmaenx gyadaih douzcienz raen hamq. Cunghyangh caizcwng fat gij guekcaiq daegbied dingjhoenx binghraq 10000 ik maenz， cienzbouh cienj hawj deihfueng cujyau yungh daeuj hwnqguh gij giekdaej sezsih goenggungh veiswngh caeuq dingjhoenx binghraq gwnz deihfueng. Gyarem gij guekcaiq daegbied dingjhoenx binghraq caeuq gij cienzngaenz caizcwng wnq ndeindei hamzciep， hawj deihfueng engq miz gienz gag guhcawj sawjyungh cienzngaenz. Gij cienhangh caigen deihfueng cwngfuj demlai de, aeu dingjmaenh aen yenzcwz “cienzngaenz riengz hanghmoeg byaij”，naemj caez gij saeh deihfueng cwngfuj dawzcaiq fungyiemj suijbingz caeuq hanghmoeg yawhbwh bae hableix faenboiq， cujyau yungh youq gvaenghdieg cungdenj、canloz hanghmoeg hungnaek Dangjcunghyangh、Gozvuyen doekdingh de， daiqdoengh ndawbiengz douzcienz， hawj yiengh bouj giznyieg、ik gwndaenj、 coi sawjcienz、 hoengh ndawyungh haenx ndaej raen hamq. Cunghyangh anbaiz ndaw yawhsuenq douzcienz 6000 ik maenz， beij bigonq demgya 224 ik maenz. Cunghyangh caizcwng coq cienz 500 ik maenz hawj Cungguek Guekgya Dietloh Cizdonz， haeujcoengh fathengz 500 ik maenz caigen dangguh cienzbonj hwnqguh dietloh， gyarengz hwnqguh gij gauhdez gansen henzhaij、 gij dietloh singz daengz singz caeuq gij gauhdez hanghmoeg henzdah.
3. Haeujcoengh bauj gihminz couhnieb.
Cien fueng bak geiq onjdingh caeuq gyadaih couhnieb. Dawz bauj miz hong guh dangguh gij hong ceiq youqgaenj， onjdingh couhnieb cungjliengh， gaijndei couhnieb gezgou，daezswng couhnieb caetliengh. Cunghyangh caizcwng anbaiz cienz bangbouj couhnieb 539 ik maenz， yungh ndei gij cienz daj aen gihginh baujyiemj saetnieb gietlw dawz ok mauhgvaq 1000 ik maenz haenx bae daezsang gij dinfwngz guhhong， couqlienz gij cienz cienmonz dajciengj bangbouj diuzcingj aen gapgyaq gunghyez giyez haenx aeu laebdaeb yungh ndei， coicaenh deihfueng doeksaed doengh gij cwngcwz couhnieb cauhnieb. Doedok guh ndei gij hong bang gyoengq vunz cungdenj couhnieb，lumjbaenz gyoengq vunz gauhyau bizyezswngh、 bouxbing duiyiz、 bouxguhnaz haeuj singz guhhong daengj， lai miengloh coicaenh couhnieb cauhnieb. Laebdaeb haeujcoengh daezswng cizyez ginwngz caeuq haeujcoengh aen hag gauhciz gyalai ciusou hagseng daezsang caetliengh， bineix bimoq song bi cizyez ginwngz beizyin 3500 fanh vunzbaez doxhwnj、 gauhciz yenyau lai ciu 200 fanh vunz. Dawz bouxguhnaz haeuj singz guhhong daj hawsingz dauqma ranzmbanj cauhnieb haenx ciuq gvidingh nabhaeuj ndaw gvaengh boujdiep cauhnieb mbat dog bae.
Bauj gij gwndaenj boux saetnieb. Laebdaeb yungh ndei gij gihginh baujyiemj saetnieb, gyarem bauj gij gwndaenj boux saetnieb caeuq fugsaeh de caiq ra hong guh, gij banhfap ietraez mboengq boux saetnieb nienzgeij hung lingx cienz baujyiemj saetnieb bineix okdaiz、 gij cienz duenhmbaek bangbouj saetnieb、 gij biucinj laemzseiz boujdiep huqgyaq hwnjsang daengj aeu doeksaed guh saeq, gyahung aen gvaengh baujyiemj saetnieb cwgoemq haenx.
4. Haeujcoengh bauj gij ndwenngoenz beksingq.
Haeujcoengh hwngfat yiengh gyauyuz goengbingz cix ndei de. Gaijndei aen gapgyaq sawj gij cienzyungh gyauyuz, gyarem aeu cikyauq guenjleix gyauyuz ginghfei, ceiq youqgaenj de dwg baujcang doeksaed gij gunghswh gyoengq lauxsae yivu gyauyuz, laebdaeb haeujcoengh dieg cungqgyang baihsae gaijndei gij diuzgen banhhag, mboujduenh sukiq gij cengca singzmbanj、gvaenghdieg、hagdangz. Gyadaih senjnod ceihawj deihfueng gyauyuz lingjyiz, gij cienz boujhawj singzmbanj yivu gyauyuz demmaj 8.3%、gij cienz haeujcoengh haiguh yozcenz gyauyuz demmaj 11.8%、gij cienz bangbouj hagseng demmaj 9.6%、gij cienz boujhawj gaijndei gij diuzgen bujdungh gauhcungh banhhag de demmaj 9.2%. Gyavaiq doicaenh singzmbanj yivu gyauyuz guh caemhyiengh，daj bi 2020 aen haggeiz seizcin hwnj, daengx guek doengjit dingh aen gieksoq hagseng bingzyaenz goeng’yungh ginghfei yivu gyauyuz. Gyarem hwnqguh yanghcin aen hag hagseng dozyouq、 lajmbanj aen hag loq iq caeuq aen hag yienhsingz. Ndaej gaijgez le aen vwndiz gyoengq haeuj singz guhhong lwgnyez doegsaw nanz de. Caenh’itbouh demgya gunghawj gij yozcenz gyauyuz swhyenz cungj ik doh de, laebdaeb ngengcoh dieg gungzheq. Gyavaiq doicaenh gunggan duenh gauhcungh gyauyuz bujgiz, coicaenh cizyez gyauyuz daezsang caetliengh gungganq ndaej ndei, haeujcoengh gyavaiq hwnqguh ceiq ndei dayoz caeuq ceiq rem yozgoh, haeujcoengh gij gauhyau dieg cungqgyang baihsae hwngfat, daezswng gij suijbingz caen daj baihndaw bae hwngfat gauhdwngj gyauyuz.
Doicaenh aen canloz Cungguek cangqheiq. Genhciz dawz yinzminz ginzcung sengmingh ancienz caeuq ndangdaej cangqheiq cuengq youq vih daih’it，dingh’aeu doeksaed gij iugouz fuengzgaemh binghraq bienq ciengzseiz bae, gyadaih caizcwng douzhaeuj ligdoh，doedok ndaej lienzdaemh、bauj daejsienq，coicaenh daezsang yinzminz ndangcangq caeuq yihliuz veiswngh suijbingz. Aen biucinj caizcwng boujhawj gihminz yihbauj daezsang 30 maenz，dabdaengz moix vunz moix bi 550 maenz，doengzbouh daezsang aen biucinj bonjfaenh gyau cienz de. Gij cienz fugsaeh gihbwnj goenggungh veiswngh caizcwng boujhawj biucinj moix vunz bingzyaenz daezsang 5 maenz，dabdaengz moix vunz moix bi 74 maenz，saen gya gij cienz caizcwng boujhawj fugsaeh gihbwnj goenggungh veiswngh neix cienzbouh yungh youq singzmbanj segih, gyarem gihcwngz veiswngh fuengz binghraq. Gyamaenh laebndei aen gihci gihbwnj yihbauj dieg wnq ywbingh cienz louzyih cigsoh gietsuenq. Onjbouh daezsang gij cwngzsw dungjcouz ywbingh baujyiemj gihginh，netsaed doicaenh si gaep dungjcouz. Haeujcoengh gyalaeg ywbingh、 yihbauj、 gijyw lienzdoengh gaijgwz. Miz bouhloh gyahung gvaengh gij yw guekgya diemj comz gyoeb cawx caeuq sawjyungh，mbehai sawq guh gij doxgaiq dajyw yungh cix bengz de youz guekgya cujciz dajcawx. Gaijndei aen gezgou douzcienz laeng yihliuz veiswngh swhyenz de，laebdaeb haeujcoengh gyalaeg gyoebhab gaijgwz aen yihyen goenglaeb de. Coi hawj cunghyihyoz hwnghoengh. Gyagiengz hwnqguh goenggungh veiswngh dijhi，doidoengh hwnqguh aen dijhi gouqyw binghraq youqgaenj caeuq bwh ndei doxgaiq caj mwh gip de yungh, onjbouh doinyoengx hwnqguh gvaenghdieg ywbingh cungsim. Haeujcoengh guh ndei gij hong gungganq beizyin gij vunzcaiz veiswngh cangqheiq.
Onjbouh daezsang gij suijbingz baujcang ciengxlaux. Ciuq gij fukdoh 5% diuzsang doengh boux duiyouh gihbwnj cienz ciengxlaux，doengzseiz habdangq daezsang gij biucinj ceiq daemq cienz ciengxlaux gyoengq vunz hawsingz lajmbanj. Cienzmienh doicaenh gihbwnj ciengxlaux baujyiemj sengjgaep dungjcouz， saedbauj byaibi 2020 gaxgonq saedyienh gihginh sengjgaep gyonj sou gyonj cei. Gyavaiq doicaenh ciengxlaux baujyiemj daengx guek dungjcouz. Dawz gij beijlaeh cunghyangh diuznoiz giyez cizgungh ciengxlaux baujyiemj gihginh daezsang daengz 4%，gyarengz haeujcoengh dieg hojnanz，saedbauj gij gihbwnj cienz ciengxlaux boux duiyouh ndaej ciuqseiz cuksoq fathawj. Gyagiengz gij gunghawj ciengxlaux fugsaeh caeuq sezsih gensez yiengqcoh segih，laemxdaemh doidoengh ywbingh caeuq ciengxlaux doxhab, haeujcoengh hwngfat gij saehnieb ciengxlaux.
Guh ndei gij hong lamxdaej beksingq gwndaenj. Dawz baujcang doengh gij gihbwnj gwndaenj gyoengqvunz hojnanz cuengq youq vih youqgaenj aeu sien bauj de，cunghyangh caizcwng gij cienz gouqbang boujhawj gyoengqvunz hojnanz de anbaiz 1484 ik maenz，haeujcoengh gak dieg guh ndei gij hong gouqcoengh gungciengx boux dihbauj、 boux gungzhoj、 laemzseiz gouqcoengh、gouqcoengh boux louzlangh gaujvaq、baujcang gij gihbwnj gwndaenj boux lwggyax daengj. Haeujcoengh hwngfat gij saehnieb bouxndangcanz. Gyahung aen gvaengh baujcang dihbauj, doiq doengh ranz hojnanz singzmbanj hab bauj couh caenhliengh bauj, gibseiz dawz doengh boux saetnieb hawsingz caeuq boux dauq ma mbanj hab diuzgen de nabhaeuj dihbauj gouqcoengh baujcang bae. Gibseiz haidoengh aen lienzdoengh gihci ndawbiengz gouqcoengh caeuq baujcang biucinj dem huqgyaq hwnjsang doxngaeu，duenhmbaek gyadaih yiengh laemzseiz boujdiep huqgyaq，roengzrengz gyangqdaemq huqgyaq hwnjsang yingjyangj gij gwndaenj doengh boux gungzhoj. Cunghyangh caizcwng anbaiz gij cienz bangbouj gouqcoengh ywbingh 286 ik maenz，yungh youq gemjmbaeu diuzrap ywbingh gyoengq vunz gungzhoj，guh ndei dakdaej bauj ywbingh.
Laebndei aen dijhi baujcang daihdaej miz ranz youq. Cunghyangh caizcwng gij cienz bangbouj hawsingz guh aen gunghcwngz baujcang youqonj de anbaiz 707 ik maenz， cungdenj haeujcoengh hawsingz gaijcauh siujgih gaeuq caeuq hwngfat gij ranz cook， gyagiengz baujcang gij ranzyouq gyoengq vunz gungzhoj hawsingz, laebdaeb haeujcoengh gaijcauh dieg ranzdiengz. Cunghyangh caizcwng anbaiz cienz bangbouj gaijcauh gij ranzvaih lajmbanj 185 ik maenz， laebdaeb doicaenh gaijcauh gij ranzvaih lajmbanj caeuq gaijcauh ranz mbanj dingj deihdoengh.
Gyagiengz hwnqguh aen dijhi fugsaeh goenggungh vwnzva. Cunghyangh anbaiz gij cienz bangbouj haeujcoengh deihfueng hwnqguh aen dijhi fugsaeh goenggungh vwnzva de 152 ik maenz，haeujcoengh daezsang mienh cwgoemq caeuq yiengh habyungh cungj fugsaeh gihbwnj goenggungh vwnzva，coicaenh yiengh fugsaeh gihbwnj goenggungh vwnzva bienq doxbingz bae. Gaenxmaenx bangfuz bouhfaenh vwnzva canjyez deng ciengz binghraq yingjyangj de dauqcungz haiguh. Haeujcoengh doicaenh aen gunghcwngz ciepswnj hwngfat Cunghvaz conzdungj vwnzva maenhndei de. Guh ndei gij hong caizlig baujcang couzbanh Baekging aen Auyinvei seizdoeng、 aen Auyinvei bouxndangcanz caeuq aen doih guekgya bwhhoenx Auyin.
5. Haeujcoengh bauj gij cawjdaej hawciengz.
Gya rengz gemj gvaeh gyangq feiq. Bineix laebdaeb caephengz gij suiqlwd cwnghcizsui caeuq gij feiqlwd ciengxlaux baujyiemj giyez bi 2019 diuzroengz de， gemj gij cienz gemj gvaeh gyangq feiq daih’iek 5000 ik maenz. Mbangj dingz cwngcwz duenhmbaek gemj gvaeh gyangq feiq youq duenh gonq okdaiz de， baudaengz mienx sou giyez rauh iq gihbwnj ciengxlaux、 saetnieb caeuq hongsieng baujyiemj danhvei gyau cienz，gemjmienx gij cwnghcizsui bouxnabgvaeh gveihmoz iq de, mienx sou gij cwnghcizsui doengh yiengh fugsaeh goenggungh gyaudoeng daehyinh、 gwnndoet dozninz、 lijyouz guhcaemz、 vwnzva dijyuz daengj， gemjmienx gij cienzgoek hwngfat minzhangz aen hangzgungh gunghswh、gij cienz hwnqguh sokruz， caephengz geizhanh cienzbouh gyaraez daengz bineix satbyai. Gij sojdwzsui giyez iq saeq、godij gunghsanghhu ietraez daengz bimoq gyaunab. Dingh’aeu dawz gij cwngcwz gemj gvaeh gyangq feiq guh daengz giz saed bae, caenhrengz bang giyez daegbied dwg giyez rauh iq saeq、 godij gunghsanghhu dingj gvaq hojnanz.
Doinyoengx gyangqdaemq gij cingzbonj giyez swnghcanj ginghyingz. Caeuq cienzngaenz、canjyez cwngcwz doxgap boiqhab，gyagiengz haeujcoengh aen hangznieb giyez deng binghraq yingjyangj haemq hung haenx, haeujcoengh gaijgez giyez hoj couzcienz、couz cienz bengz. Gemjmienx gij cienzco ranz guekgya， gikcoi gak loih ranzcawj gemjmienx roxnaeuz nod laeng sou cienzco. Cwngfujsing yungzswh danhbauj hangznieb gemj buenq soufeiq，dawz cunghab yungzswh danhbauj feiqlwd gyangq daengz 1% doxroengz. Guekgya yungzswh danhbauj gihginh bi 2020 saen dem caiq danhbauj yezvu gveihmoz mbouj daemq gvaq 4000 ik maenz. Cinjhawj doengh gij danhbauj daigvanj aeu daeuj cauhnieb hab diuzgen haenx gya raez geizhanh，caiq gya lai gyoengqvunz ndaej haeujcoengh、 gyangqdaemq giemxdou bae haeujcoengh， dawz doengh hoh godij gunghsanghhu、 boux swhgih cuzcuhceh deng binghraq yingjyangj haenx nab haeuj ndaw gvaengh ndaej haeujcoengh bae.
Laebdaeb gikfat gij rengzhoengh hawciengz cawjdaej. Gyalaeg gaijgwz “cuengqsoeng guenjleix fugsaeh”, haeujlaeg doinyoengx cungqvunz cauhnieb cauhmoq, haeujcoengh dajcauh aen bingzdaiz goenggungh fugsaeh cienz lienzciep、miz ciennieb，fazveih ndei gij cozyung ak daiqdoengh aen sinhgih、gauhsinhgih、 gizdieg guhbanj cauhnieb cauhmoq guekgya gaep. Doeksaed gij cwngcwz hawj ndei nabgvaeh gikhwnj daeuzcienz cauhnieb. Laebdaeb saedhengz hangh cwngcwz ciengj bouj giyez iq saeq gyangq gij cienzyungh yungzswh danhbauj，gujli gyadaih aen gveihmoz gaiq yezvu yungzswh danhbauj aen giyez iq saeq ndaw saeddaej ginghci lingjyiz，gyangqdaemq gij beijlwd cienz yungzswh danhbauj giyez iq saeq. Laebdaeb guh ndei gij hong cingleix niengqyiemq gij ngaenzsi minzyingz giyez、 giyez rauh iq.
6. Haeujcoengh bauj haeuxgwn nwngzyenz ancienz.
Caenhrengz bauj gung haeuxgwn daengj nungzcanjbinj youqgaenj. Onjdingh gij canjliengh caeuq gij menciz doekceh haeuxgwn，daezswng gij rengzlig bauj gij haeuxgwn guekgya ancienz，vanjhaeux bonjfaenh gag gaemmaenh. Gyarengz baujhoh reihnaz caeuq hwnqguh suijli reihnaz， haeujcoengh saen hwnq 8000 fanh moux reihnaz biucinj sang，hengzguh baujhoh 4000 fangh moux reihnaz namhbiz Doengbaek. Haeujlaeg dawz aen giva hwng ndaem duhhenj doi baenaj，gyalaeg gaijgwz gij cidu haeuxgwn soucwk，laebndei aen cwngcwz gij gyaq ceiq daemq soucawx haeux、 meg de caeuq gij gihci boujdiep boux ndaem dem boux ciuq hawgyaq daeuj sou haeuxyangz、 duhhenj de. Haeujcoengh bauj ndaw guek haeuxgwn gunghawj caeuq hawciengz onjdingh. Doeksaed gij cwngcwz hoizfuk fuzrex ciengx mou，onjdingh caeuq baujcang ndaw guek nohmou hawciengz gunghawj. Lienzdaemh gyagiengz fuengzre cungj mouraq feihcouh、 binghgaeqraq ak fat daengj doengh gij binghraq youqgaenj doenghduz，coicaenh doengh aen hangznieb ciengx doihduz、ciengx gij doenghduz doenghgo ndaw raemx de yienghyiengh fatmaj.
Lai roengzrengz bauj nwngzyenz ancienz. Laebdaeb haeujcoengh hai yungh gij heiqringyap、 heiqmeizcwngz doengh gij heiqdienyienz mbouj bingzciengz neix, haeujcoengh hwngfat gij nwngzyenz cinghseuq ndaej caiq miz de, coinyoengx diuzcingj aen gapgyaq nwngzyenz. Laebhwnj caeuq caezcienz aen cidu bwhcwk nwngzyenz ancienz. Gyangqdaemq gij cienzbonj giyez yungh dienh yungh heiq, laebdaeb dawz gij gyaqdienh cawz ok gij gunghyez hung sai dienh lai caixvaih caeuq itbuen gunghsanghyez haenx gyangqdaemq 5%; saedhengz haeujcoengh gij cwngcwz gyaqdienh songbouhceiq, cungdenj gemjmienx gij cienzdienh hoh yungh yiengh dienhlig songbouhceiq de, doengh giz ywbingh saen hwnq gya hwnq de mienx sou yiengh cienz baujcingq baenzbaenz miz dienh haenx; duenhmbaek gyangqdaemq gij gyaqcienz heiqdienyienz mbouj dwg gihminz yungh de, daezgonq saedhengz gij cwngcwz seiznaeb heiqgyaq, doengh hangznieb vafeiz nangqdaengz nungzyez swnghcanj caiqlix deng binghraq saegsomx youqgaenj de heiqgyaq engq daemq dem.
7. Haeujcoengh bauj diuz lienh canjnieb diuz lienh gunghawj onjdingh.
Haeujcoengh hangz dajcauh fat ndei fat hoengh. Doinyoengx gyavaiq dauqfuk caeuq onjdingh diuz lienh canjnieb diuz lienh gunghawj. Gikcoi gyalai douzhaeuj vuenhmoq sezbei caeuq gaijcauh gisuz，doidoengh hangz dajcauh conzdungj swnggaep bienq ndei，haeujcoengh youq aen canloz lingjyiz youqgaenj gung roengz hojcawq hwnq baenz gunghcwngz、hwnqguh aen bingzdaiz fugsaeh canjnieb cungdenj swnggaep. Haeujcoengh hwngfat gunghyez hulenzvangj, doinyoengx cinwngz dajcauh. Doeksaed aen cwngcwz sawqdiemj doiq gyaq (dauq) gisuz canghbei hungnaek baez daih’it yungh guh baujyiemj boizbouj，haenqrengz coicaenh doigvangq wngqyungh gij canjbinj cauhmoq. Ganq ok yiengh yezvu moq soqcih ginghci， haeujcoengh hwnq baenz lienh gunghawj soqcih. Haeujcoengh ndeindei hwngfat aen canjnieb cizcwngz denlu caeuq yonjgen. Yenzgiu laebhwnj aen cidu cwngfuj dajcawx、aen gihci guenjleix cingzbonj nem faenrap fungyiemj caeuq haeujcoengh cauhmoq dox hab’wngq haenx. Coicaenh hangz dajcauh byaijgonq haenx caeuq hangz fugsaeh ciuhneix yungzhab fatmaj haeujlaeg， dajcauh gij fugsaeh binjbaiz mbaeksang Cungguek.
Daezsang gij naengzlig cengjdaemx gohgi cauhmoq. Gyarengz haeujcoengh gohyenz gung roengz gij yizmyauz binghraq bwtndat、gijyw caeuq gisuz riengjvaiq gienjcaek，bauj hawj cienzngaenz aeuyungh. Laebcaez gij dijci gihci gikcoi haeujcoengh gihcuj yenzgiu、codaeuz cauhmoq，gya rengz gung roengz gaiq gisuz gvanhgen haedsim. Haeujcoengh hwnqguh guekgya sizyensiz caeuq dauqlaeb aen dijhi guekgya cungdenj sizyensiz，gyaak gij rengzlig canloz gohgi guekgya. Mbeguh mizgven gij hong faen mbaek ciepswnj gij gohgi cienhangh hungnaek, doidoengh vaiqdi hengzguh aen hanghmoeg hungnaek gohgi cauhmoq 2030. Gyalaeg gozci gohgi doxgap. Gyarem baujhoh cihsiz canjgenz. Haeujcoengh saedhengz aen hanghmoeg hungnaek gunggvan “sik buengj guh daeuz”. Doicaenh sawqdiemj hawj boux guh hong gohyenz miz gienz gaemmiz cizvu gohgi cwngzgoj roxnaeuz miz gienz ciengzgeiz sawjyungh，cuengqok gij rengzhoengh cauhmoq gohyenz gihgou caeuq gohyenz yinzyenz.
Onjmaenh aen gaenbonj vaimou vaiswh. Laebdaeb haeujcoengh dazyinx sawq guh dieg gyoebhab hamj gyaiq denswj sanghvu，gyavaiq gungganq vaimou giz demmaj moq. Gyavaiq hwnqguh Haijnanz sokdieg swyouz gaicawx. Haeujcoengh henzguek ginghci hozcozgih daengj cungdenj digih daezswng gij suijbingz goenggungh fugsaeh， gikcoi gyadaih cingouj senhcin sezbei caeuq gisuz、 gvanhgen lingzbugen daengj. Gyalaeg sawqdiemj cauhmoq fazcanj fugsaeh gaicawx， gikcoi ciepcoux gij yezvu gwnz gozci bau hawj rog guek guh、cuzgouj gisuz caeuq gisuz fugsaeh daengj. Laebhwnj laebcaez aen dijhi goenggungh fugsaeh coicaenh canghseng’eiq guekrog douzswh，dazyinx miz bouhloh bae guh doiq rog douzswh doxgap，doidoengh caez hwnq “it rangh it loh”.
8. Haeujcoengh baujcang gihcwngz ciuqciengz guhhong.
Cunghyangh caizcwng dungjcouz saen gya cihhoengz、 aeu gij cienz nienzdoh gietcienj doenghbaez、atgemj bonjgaep ceiyungh ndaej ngaenz daengj roenloh，cietsaed gyarengz haeujcoengh deihfueng caizlig，hoizsoeng gij caizcwng ceiyungh atlig deihfueng souhaeuj demmaj bienq menh daiq daeuj de. Cunghyangh senjnod ceihawj deihfueng demmaj 12.8%，ndawde itbuen senjnod ceihawj (mbouj hamz caezcaemh caizcwng saehgienz senjnod ceihawj) demmaj 7.5%，sang gvaq cunghyangh bonjgaep ceiyungh 7.7 aen bakfaendiemj，cungdenj ngengcoh dieggeq gwzming、 dieg minzcuz、 dieg henzguek、 dieg gungzhoj caeuq giz dieg deng binghraq yingjyangj haemq hung de，haeujcoengh deihfueng daegbied dwg dieg gungzhoj ciuqciengz guhhong. Youq itbuen senjnod ceihawj ndawde，doxdaengh senjnod ceihawj anbaiz 17192 ik maenz，demmaj 10%；aen gihci baujcang gij goekdaej caizlig yienhgaep anbaiz cienz ciengj bouj 2979 ik maenz，demmaj 10%；gizdieg geq sauj bien gungz senjnod ceihawj 2796.1 ik maenz，demmaj 12.4%. Anbaiz daegbied senjnod ceihawj 6050 ik maenz，yungh daeuj haeujcoengh deihfueng doeksaed gij yinvu “roek bauj”, wngqdoiq ndaw caephengz gij mbouj doekdingh de. Doengzseiz，gaenxmaenx cauhmoq yiengh faenboiq cienz caizcwng, hawj caizlig lailai caem daengz laj bae, baujmaenh cienzngaenz cigsoh cuengq daengz gij gihcwngz singz yienh, cigsoh ik giyez leih beksingq.
9. Haeujcoengh singzmbanj gvaenghdieg doxngamj hwngfat.
Gyarem lajmbanj goenggungh fugsaeh. Aeu fuengzceih binghraq guh giz roengzfwngz，gyarem cingjceih seiqhenz vunzyouq lajmbanj caeuq hwnqguh goenggungh veiswngh dijhi，yawj dieg guh saeh doicaenh lajmbanj hwnqguh diengzhaex，gyagiengz cawqleix gij nyapnyaj ndawranz caeuq raemxuq lajmbanj，doidoengh swnggaep hwnqguh mbanj gyaeu mbanj seuq. Haeujheiq coengh coih guenj gij gunghcwngz gwn raemx lajmbanj caemhcaiq lai nyengq coh dig gungz，haiguh aen sawqdiemj gyoebhab cingjceih raemx byaij doxdoeng caeuq doengh nga raemx lajmbanj. Doidoengh gyavaiq hwnqguh “roen lajmbanj seiq yiengh ndei” daengj lajmbanj giekdaej sezsih. Haeujlaeg doicaenh giz sawqdiemj sawqguh gyoebhab gaijgwz lajmbanj，gyagiengz baujcang gij cienzyungh gihcwngz cujciz lajmbanj，damqra gij fuengsik ndei ceihleix lajmbanj doqguh doqbaenz de.
Coicaenh bouxguhnaz lienzdaemh demsou. Gya rengz haeujcoengh lai cungj ginghyingz cawjdaej miz habdoh gveihmoz de，gyagiengz fugsaeh doengh hoh dajndaem dajciengx haemq noix de. Haeujlaeg doicaenh lajmbanj it ngeih sam canjyez yungzhab ndeiraeuh，laebdaeb haeujcoengh cauxlaeb aen suen nungzyez canjyez ciuhneix caeuq hwnqguh aen cin nungzyez canjyez ak de，haidoengh hwnqguh yiengh daegsaek canjyez comzgyoengq hwngfat，daezsang gij gingyingz yauqik nungzyez. Haeujcoengh bouxguhnaz couh gaenh cauhnieb ra ndaej hong guh，gyadaih aen gveihmoz beizyin gij dinfwngz bouxguhnaz，gyagiengz bang bouxguhnaz daj hawsingz dauqma ranzmbanj hwngfat de danhbauj daigvanj caeuq boujdiep cauhnieb.
Haeujlaeg doinyoengx hawsingz yienghmoq. Roengzrengz daezsang gij giekdaej sezsih hawsingz caeuq gij suijbingz goenggungh fugsaeh, gyalai cwngfuj douzcienz, gaenxmaenx sup gij cienzngaenz ndawbiengz douzhaeuj. Caezcienz gij cwngcwz caizcwng haeujcoengh gyoengq daj nungzyez cienj okdaeuj bienqbaenz vunz hawsingz，cunghyangh caizcwng anbaiz gij cienz dajciengj gyoengq daj nungzyez senj okdaeuj bienqbaenz vunz hawsingz de 350 ik maenz，dazyinx gak deihfueng daegbied dwg doengh aen cwngfuj hawsingz gaenxmaenx sou gyoengq daj nungzyez senj okdaeuj de roengzhoh，cietsaed daezsang gij caetliengh boux daj nungzyez senj okdaeuj bienqbaenz vunz hawsingz. Gya rengz caizcwng baujcang，haeujcoengh deihfueng cwngfuj daezsang gij caetliengh gihbwnj goenggungh fugsaeh hawj gyoengq daj nungzyez senj okdaeuj de miz hong guh、miz ndawbiengz baujyiemj、miz ranz youq、lwgnyez ndaej dogsaw.
Doidoengh guekgya aen canloz gvaenghdieg youqgaenj ndaej doekdingh. Laebdaeb doihaeuj cauxbaenz yiengh moq daih haifat dieg baihsae、cienzmienh saenqhwng doengbaek、dieg cungqgyang goengqhwnj、dieg baihdoeng sien fatmaj. Caizsui cwngcwz gya rengz haeujcoengh, laebdaeb haeujcoengh doinyoengx doengh aen canloz hwngfat gvaenghdieg youqgaenj guekgya, lumjbaenz Gingh Cinh Gi doxngamj hwngfat、hwnqguh Yez Gangj Au Davanhgih、Dahcangzgyangh Sanhgozcouh doengzcaemh hwngfat, netsaed doinyoengx hwngqguh Yungzanh Sinhgih, doeksaed gij banhfap caez guenj caez hoh ranghdieg ginghci Dahcangzgyangh, doidoengh baujhoh caeuq hwngfat ndei gij swnghdai ranghdieg Dahvangzhoz, doidoengh gvaengh ginghci Cwngzduh Cungzging song aen singz neix. Haeujcoengh aen hawsingz swhyenz ciedraed de cienjhingz hwngfat. Coinyoengx vaiqdi hwngfat dieggeq gwzming、 dieg minzcuz、 dieg henzguek、 dieg hojndoq. Yenzgiu ceiqdingh gij caizsui cwngcwz mboengq “cibseiq haj” haeujcoengh Sihcang、Sinhgyangh ndawbiengz ginghci hwngfat.
Caemh mwh neix, hengz ndei gak hangh caizsui cwngcwz haeujcoengh Huzbwz Swngj ginghci ndawbiengz hwngfat, yunghrengz haeujcoengh guh ndei gij hong bauj couhnieb、 bauj gwndaenj、 bauj yinhcienj，doidoengh gyavaiq dauqcungz haihong、dauqcungz haihaw caeuq onjdingh diuz lienh canjnieb diuz lienh gunghawj，coicaenh Huzbwz Swngj ginghci ndawbiengz dauqhoiz liux、caizcwng bingzonj yinhhengz.
10. Roengzrengz haeujcoengh gij hong gozfangz、 vaigyauh.
Hopheux engq ndei bae fugsaeh aen daihbuenz dangj caeuq guekgya, cungdenj baujcang gozfangz ceiyungh，haeujcoengh gozfangz caeuq ginhdui yendaiva gensez. Gyavaiq doinyoengx bing minz yungzhab engq ndei, guh ndei cienzngaenz baujcang, laebcaez gij cwngcwz boiqdauq. Caezcienz gij cwngcwz youhfuj anbaiz, haeujcoengh hwnqguh aen dijhi fugsaeh baujcang bouxbing duiyiz，cietsaed baujcang ndei gij daiyi bouxbing duiyiz. Haeujcoengh yiengh vaigyauh guekhung miz gij daegsaek Cungguek，gagrox caeuqfaenh bienqgwz ceihleix gij ginghci daengx seiqgyaiq.
（Seiq） Gyajguj gij souhaeuj caeuq anbaiz gij ceiyungh itbuen goenggungh yawhsuenq bi 2020.
1. Gij yawhsuenq itbuen goenggungh cunghyangh.
Gij yawhsuenq itbuen goenggungh cunghyangh souhaeuj 82770 ik maenz，beij gij soq bi 2019 caephengz de doekdaemq 7.3%. Caiq gya gij cienz daj aen gihginh diuzcez yawhsuenq onjdingh cunghyangh diuhhaeuj 5300 ik maenz (baudaengz gij cienz duenh gietsuenq doenggvaq demsou mbaetcei demgya boujcung haenx)，daj gij yawhsuenq aen gihginh cunghyangh cwngfuj、gij yawhsuenq ginghyingz swhbwnj guekmiz cunghyangh diuhhaeuj 3580 ik maenz，souhaeuj cungjliengh 91650 ik maenz. Gij yawhsuenq itbuen goenggungh cunghyangh ceiyungh 119450 ik maenz，demmaj 9.1%. Soucei cungjliengh doxsiu，cunghyangh caizcwng ceiyungh lai gvaq souhaeuj 27800 ik maenz，beij bi 2019 demgya 9500 ik maenz.
Bi 2020 gij yawhsuenq itbuen goenggungh cunghyangh ceiyungh faen cunghyangh bonjgaep ceiyungh、senjnod ceihawj deihfueng、gij cienz bwhyungh cunghyangh.
(1) Cunghyangh bonjgaep ceiyungh 35035 ik maenz，doekdaemq 0.2%. Ndawde，itbuen goenggungh fugsaeh ceiyungh 1721.76 ik maenz，doekdaemq 13.3 %；vaigyauh ceiyungh 543.05 ik maenz，doekdaemq 11.8%；gozfangz ceiyungh 12680.05 ik maenz，demmaj 6.6%；goenggungh ancienz ceiyungh 1832.72 ik maenz，demmaj 0.7%；gyauyuz ceiyungh 1699.09 ik maenz，doekdaemq 7.5% （caiq gya deihfueng ceiyungh le, daengx guek gyauyuz ceiyungh demmaj 5.4%）； gohyoz gisuz ceiyungh 3196.51 ik maenz，doekdaemq 9.1%（caiq gya deihfueng ceiyungh le, daengx guek gohyoz gisuz ceiyungh demmaj 3.1%）； bwhrom haeux youz doxgaiq ceiyungh 1216.18 ik maenz，demmaj 1%； ngaenzcaiq boiz leih ceiyungh 5399.43 ik maenz，demmaj 18.2%.
(2) Senjnod ceihawj deihfueng 83915 ik maenz，demmaj 12.8%. Itbuen senjnod ceihawj 70107.62 ik maenz，demmaj 4.9%，ndawde，gij caizcwng saehgienz caezcaemh senjnod ceihawj 32620.01 ik maenz，demmaj 2%，cujyau dwg haeujcoengh deihfueng doeksaed ndei gij cwngcwz mizgven caizcwng saehgienz caezcaemh, lumjbaenz doengh giz gyauyuz、ciengxlaux、yihbauj haenx，coicaenh gihbwnj goenggungh fugsaeh bienq doxbingz bae；gizyawz itbuen senjnod ceihawj 37487.61 ik maenz，demmaj 7.5%， sang gvaq cunghyangh bonjgaep ceiyungh demfuk 7.7 aen bakfaendiemj，daejyienh le cunghyangh caizcwng gij cwngcwz dazyinx gya rengz bang deihfueng caizlig、 demgiengz baujcang gij caizcwng dieg hojnanz. Cienhangh senjnod ceihawj (bauhamz cunghyangh gij douzcienz ndaw yawhsuenq) 7757.38 ik maenz，demmaj 2.5%，caebconz cienzngaenz dazyinx deihfueng doeksaed gij gezcwz baijbouh hungnaek Dangjcunghyangh、Gozvuyen， haeujcoengh hwnqguh giekdaej sezsih、 ceihleix uqlah、 saenqhwng lajmbanj daengj.
Linghvaih, cunghyangh youq ndaw senjnod ceihawj deihfueng saen laeb le yiengh senjnod ceihawj daegbied he, dangguh gij caizlig anbaiz mbat dog, yungh guh haeujcoengh deihfueng doeksaed gij yinvu “roek bauj”, cungdenj yungh youq bauj beksingq gwndaenj、bauj gihcwngz yinhcienj、hwnqguh aen dijhi goenggungh veiswngh、 hwnqguh aen dijhi fuengzgaemh gouqyw binghraq hungnaek、 hwnqguh aen dijhi baujcang doxgaiq mwh gip yungh caeuq wngqdoiq buenq bi laeng gij mbouj doekdingh de. Bi 2020 anbaiz cienzngaenz 6050 ik maenz, caephengz ndawde yaek ciuq gij yunghcawq gwnzneix gangj de guh saeq bae.
(3) Cunghyangh gij cienz bwhyungh 500 ik maenz，caeuq gij yawhsuenq bi 2019 doxbingz. Ndaw caephengz cienz bwhyungh yaek ciuq gij yunghcawq de faen suenq haeuj gij ceiyungh cunghyangh bonjgaep caeuq gij senjnod ceihawj deihfueng.
2. Gij yawhsuenq itbuen goenggungh deihfueng.
Yawhsuenq itbuen goenggungh deihfueng bonjgaep souhaeuj 97500 ik maenz，doekdaemq 3.5%. Caiq gya gij souhaeuj cunghyangh senjnod ceihawj deihfueng 83915 ik maenz、gij cienzngaenz deihfueng caizcwng diuhhaeuj caeuq sawjyungh gietcienj gietlw 21100 ik maenz，souhaeuj cungjliengh 202515 ik maenz. Yawhsuenq itbuen goenggungh deihfueng ceiyungh 212315 ik maenz，demmaj 4.2%. Deihfueng caizcwng ceiyungh lai gvaq souhaeuj 9800 ik maenz，beij bi 2019 demgya 500 ik maenz，doenggvaq fathengz deihfueng cwngfuj itbuen caigen boujdauq.
3. Gij yawhsuenq itbuen goenggungh daengx guek.
Gyoebgyonj gij yawhsuenq cunghyangh caeuq deihfueng，gij yawhsuenq itbuen goenggungh daengx guek souhaeuj 180270 ik maenz，doekdaemq 5.3%. Caiq gya gij cienz diuhhaeuj caeuq sawjyungh gietcienj gietlw 29980 ik maenz，souhaeuj cungjliengh dwg 210250 ik maenz. Gij yawhsuenq itbuen goenggungh daengx guek ceiyungh 247850 ik maenz (hamz cunghyangh gij cienz bwhyungh 500 ik maenz)，demmaj 3.8%. Ceiyungh lai gvaq souhaeuj 37600 ik maenz，beij bi 2019 demgya 10000 ik maenz.
(Haj) Gyajguj gij souhaeuj caeuq anbaiz gij ceiyungh aen gihginh cwngfuj yawhsuenq bi 2020.
Gij yawhsuenq aen gihginh cunghyangh cwngfuj souhaeuj 3611.41 ik maenz，doekdaemq 10.6%. Caiq gya bigonq gietcienj souhaeuj 180.04 ik maenz caeuq gij daegbied guekcaiq dingjhoenx binghraq souhaeuj 10000 ik maenz，souhaeuj cungjliengh 13791.45 ik maenz. Gij yawhsuenq aen gihginh cunghyangh cwngfuj ceiyungh 10788.95 ik maenz，ndawde, bonjgaep ceiyungh 2781.32 ik maenz， doekdaemq 10.7％； senjnod ceihawj deihfueng 8007.63 ik maenz，cujyau dwg anbaiz gij daegbied guekcaiq dingjhoenx binghraq haenx ceiyungh demlai. Diuhhaeuj itbuen goenggungh yawhsuenq 3002.5 ik maenz.
Gij yawhsuenq aen gihginh deihfueng cwngfuj bonjgaep souhaeuj 77834.64 ik maenz，doekdaemq 3.3%， ndawde， gij souhaeuj cienjnyiengh gienz yungh diegdeih guekgya 70406.89 ik maenz，doekdaemq 3%. Caiq gya gij yawhsuenq aen gihginh cunghyangh cwngfuj senjnod ceihawj deihfueng souhaeuj 8007.63 ik maenz、gij cienhangh ngaenzcaiq deihfueng cwngfuj souhaeuj 37500 ik maenz，souhaeuj cungjliengh dwg 123342.27 ik maenz. Gij yawhsuenq aen gihginh deihfueng cwngfuj ceiyungh 123342.27 ik maenz，demmaj 39.8%.
Gyoebgyonj gij yawhsuenq cunghyangh caeuq deihfueng，daengx guek gij yawhsuenq aen gihginh cwngfuj souhaeuj 81446.05 ik maenz，doekdaemq 3.6%. Caiq gya bigonq gietcienj souhaeuj 180.04 ik maenz、 guekcaiq daegbied dingjhoenx binghraq souhaeuj 10000 ik maenz caeuq deihfueng cwngfuj cienhangh ngaenzcaiq souhaeuj 37500 ik maenz，daengx guek aen gihginh cwngfuj souhaeuj cungjliengh 129126.09 ik maenz. Daengx guek gij yawhsuenq aen gihginh cwngfuj ceiyungh 126123.59 ik maenz，demmaj 38%. Diuhhaeuj itbuen goenggungh yawhsuenq 3002.5 ik maenz.
(Roek) Gyaqguj gij souhaeuj caeuq anbaiz gij ceiyungh aen yawhsuenq ginghyingz swhbwnj guekmiz bi 2020.
Gij yawhsuenq ginghyingz swhbwnj guekmiz cunghyangh souhaeuj 1691.65 ik maenz， demmaj 3.4%.Caiq gya bigonq gietcienj souhaeuj 144.06 ik maenz， souhaeuj cungjliengh dwg 1835.71 ik maenz. Gij yawhsuenq ginghyingz swhbwnj guekmiz cunghyangh ceiyungh 1258.21 ik maenz， demmaj 13.5%， ndawde， bonjgaep ceiyungh 1197.6 ik maenz， demmaj 21.4%； senjnod ceihawj deihfueng 60.61 ik maenz. Diuhhaeuj ndaw yawhsuenq itbuen goenggungh 577.5 ik maenz， diuhhaeuj beijlaeh daihgaiq 35%， cujyau dwg vih baujcang doeksaed gemj gvaeh gyangq feiq gvaqlaeng hawj gij yawhsuenq itbuen goenggungh doxdaengh， gyahung le gij rengz dungjcouz cienzngaenz.
Gij yawhsuenq ginghyingz swhbwnj guekmiz deihfueng bonjgaep souhaeuj 1946.61 ik maenz， doekdaemq 16.3%. Gya gij yawhsuenq ginghyingz swhbwnj guekmiz cunghyangh senjnod ceihawj deihfueng souhaeuj 60.61 ik maenz、 bigonq gietcienj souhaeuj 202.67 ik maenz， souhaeuj cungjliengh dwg 2209.89 ik maenz. Gij yawhsuenq ginghyingz swhbwnj guekmiz deihfueng ceiyungh 1417.32 ik maenz， demmaj 9%. Diuhhaeuj ndaw yawhsuenq itbuen goenggungh 792.57 ik maenz.
Gyoebgyonj gij yawhsuenq cunghyangh caeuq deihfueng， daengx guek gij yawhsuenq ginghyingz swhbwnj guekmiz souhaeuj 3638.26 ik maenz， doekdaemq 8.1%. Caiq gya bigonq gietcienj souhaeuj 346.73 ik maenz， souhaeuj cungjliengh dwg 3984.99 ik maenz. Daengx guek gij yawhsuenq ginghyingz swhbwnj guekmiz ceiyungh 2614.92 ik maenz， demmaj 14.3%. Diuhhaeuj ndaw yawhsuenq itbuen goenggungh 1370.07 ik maenz.
(Caet) Gyaqguj gij souhaeuj caeuq anbaiz gij ceiyungh aen gihginh ndawbiengz baujyiemj yawhsuenq bi 2020.
Aen gihginh ndawbiengz baujyiemj cunghyangh souhaeuj 1384.44 ik maenz， demmaj 101%， cujyau dwg cunghyangh gihgvanh swyez danhvei gyonjcomz boujgyau gij cienz baujyiemj ciengxlaux doengh bi gaxgonq, ndawde， gij cienz baujyiemj souhaeuj 741.61 ik maenz， caizcwng boujdiep souhaeuj 630.92 ik maenz. Caiq gya gij gihbwnj ciengxlaux baujyiemj cunghyangh diuznoiz gihginh deihfueng gyauj hwnjdaeuj haenx souhaeuj 7379.55 ik maenz， souhaeuj cungjliengh dwg 8763.99 ik maenz. Cunghyangh ndawbiengz baujyiemj gihginh ceiyungh 1407.82 ik maenz， demmaj 112.3%. Caiq gya gij gihbwnj ciengxlaux baujyiemj cunghyangh diuznoiz gihginh anbaiz hawj deihfueng ceiyungh 7370.05 ik maenz， ceiyungh cungjliengh dwg 8777.87 ik maenz. Bi neix ceiyungh lai gvaq souhaeuj 13.88 ik maenz， nienzdaej romringx gietlw 344.87 ik maenz.
Aen gihginh ndawbiengz baujyiemj deihfueng souhaeuj 75902.94 ik maenz， doekdaemq 5.3%，ndawde，gij cienz baujyiemj souhaeuj 51676.28 ik maenz， caizcwng boujdiep souhaeuj 20998.04 ik maenz.Caiq gya gij souhaeuj gihbwnj ciengxlaux baujyiemj cunghyangh diuzboiq gihginh souhaeuj 7370.05 ik maenz， souhaeuj cungjliengh dwg 83272.99 ik maenz. Aen gihginh ndawbiengz baujyiemj deihfueng ceiyungh 80876.29 ik maenz， demmaj 8.8%. Caiq gya gihbwnj ciengxlaux baujyiemj cunghyangh diuzboiq gihginh ceiyungh 7379.55 ik maenz，ceiyungh cungjliengh dwg 88255.84 ik maenz. Bi neix ceiyungh lai gvaq souhaeuj 4982.85 ik maenz，nienzdaej romringx gietlw 88685.37 ik maenz.
Gyoebgyonj gij yawhsuenq cunghyangh caeuq deihfueng，daengx guek aen gihginh ndawbiengz baujyiemj souhaeuj 77287.38 ik maenz，doekdaemq 4.4%， ndawde， gij cienz baujyiemj souhaeuj 52417.89 ik maenz，caizcwng boujdiep souhaeuj 21628.96 ik maenz. Daengx guek aen gihginh ndawbiengz baujyiemj ceiyungh 82284.11 ik maenz，demmaj 9.7%. Bi neix ceiyungh lai gvaq souhaeuj 4996.73 ik maenz，nienzdaej romringx gietlw 89030.24 ik maenz. Gij aeu gangjmingz de dwg，daengx guek gij yawhsuenq aen gihginh ndawbiengz baujyiemj ciuq gij cwngcwz gaenq ok de bienguh, caengz baudaengz gij cwngcwz cingqcaih nienznaemj ietraez duenhmbaek mienx gyau gij cienz baujyiemj ciengxlaux、 saetnieb caeuq goengsieng aen giyez rauh iq saeq.
Bi 2020，cunghyangh caizcwng guekcaiq yawzsoq hanhngeg 213008.35 ik maenz；deihfueng cwngfuj itbuen dawzcaiq yawzsoq hanhngeg 142889.22 ik maenz、cienhangh ngaenzcaiq yawzsoq hanhngeg 145185.08 ik maenz.
Gij aeu gangjmingz de dwg，aen yawhsuenq deihfueng youz deihfueng gak gaep yinzminz cwngfuj bienguh， bauq hawj bonj gaep yinzminz daibyauj daihhoih baecinj， seizneix lij caih guh gyoebgyonj， ndaw baugau deihfueng gij soq yawhgeiq souhaeuj caeuq gij soq anbaiz ceiyungh cungj dwg aen soq cunghyangh caizcwng cobouh gyoebgyonj.
Yawhsuenq ciengzsaeq anbaiz caeuq mizgven gangjmingz raen youq 《Gij Cingzgvang Caephengz Aen Yawhsuenq Daengx Guek Bi 2019 Caeuq Aen Yawhsuenq Daengx Guek Bi 2020 Cunghvaz Yinzminz Gunghozgoz (Caujan)》.
Gaengawq gij gvidingh aen fap yawhsuenq， yawhsuenq nienzdoh hainduj le， youq Daengx Guek Yinzminz Daibyauj Daihhoih baecinj aen yawhsuenq caujan neix gaxgonq，ndaej anbaiz gij ceiyungh lajneix： Gij gietcienj ceiyungh bigonq；gij bouhmonz gihbwnj ceiyungh、hanghmoeg ceiyungh bonj nienzdoh bietdingh aeu ceiyungh haenx， ciuq aen soq yawhsuenq ceiyungh bigonq doengzgeiz bae anbaiz， caeuqlienz yiengh ceiyungh senjnod hawj aen cwngfuj gaeplaj；gij ceiyungh faplwd gvidingh bietdingh aeu hengzguh ceihawj yivu haenx，caeuq gij ceiyungh yungh daeuj cawqleix swyenz caihaih doengh yiengh saeh sawqmwh fatseng haenx. Gaengawq gij gvidingh gwnzneix， 2020 nienz 1－4 nyied， daengx guek itbuen goenggungh yawhsuenq ceiyungh 73595.89 ik maenz， doengzbeij gemjnoix 2071.32 ik maenz， doekdaemq 2.7%. Ndawde， cunghyangh itbuen goenggungh yawhsuenq bonjgaep ceiyungh 10314.55 ik maenz， doengzbeij demmaj 0.1%； cawz ok gij ceiyungh gozfangz、leihsik ngaenzcaiq le doengzbeij doekdaemq 9.3%; deihfueng itbuen goenggungh yawhsuenq ceiyungh 63281.34 ik maenz， doengzbeij doekdaemq 3.2%. Deihfueng caizcwng ceiyungh doekdaemq，cujyau dwg deng binghraq gauxca， cawz bae fuengzgaemh binghraq caeuq “sam bauj” ceiyungh caixvaih，bouhfaenh hanghmoeg ceiyungh menh gvaq bigonq doengzgeiz. Caj Daengx Guek Yinzminz Daibyauj Daihhoih baecinj yawhsuenq le, yaek ciuq gij yawhsuenq baecinj bae caephengz.
Sam、Netsaed Guh Ndei Gij Hong Caizcwng Gaijgwz Caeuq Yawhsuenq Guenjleix Bi 2020
(It) Nyinhcaen gvancez saedhengz aen fap yawhsuenq.
Cienzmienh doeksaed gij iugouz Aen Fap Yawhsuenq，lai haeuj yamq gyarem yawhsuenq hanhhaed，gveihfan cwngfuj soucei. Gyalaeg gaijgwz aen cidu guenjleix yawhsuenq， yungh aen leixniemh yawhsuenq mbouj miz gieksoq， dwkbyoengq aen gwzgiz dinghmaenh ceiyungh，hawj yawhsuenq bienguh engqgya gohyoz caeuq cinjdeng. Ciuq fap ciuq gvidingh cujciz caizcwng souhaeuj， yiemzgek caephengz gij yawhsuenq ginggvaq bonj gaep yinzda baecinj haenx，yiemzhaed yawhsuenq diuznoiz boujgya. Riengjvaiq cuengq roengz gij cienzngaenz yawhsuenq. Gyagiengz gamhaed yawhsuenq caephengz， caezcienz aen gihci gaemhanh gij cienz caizcwng banggungz、 gij cienz gozgu gyoebcomz ceihawj、 gij cienz doengh aen danhvei sawqdiemj saedmiz daengj. Cietsaed gyagiengz yawhsuenq caephengz caeuq caizcwng swhginh ancienz guenjleix. Haenqrengz buenzhoengh gij cienz caizcwng gaemmiz，ciuq gvidingh gibseiz soudauq gij cienzcaem，yungh youq gizyawz gvaenghdieg gaenj aeu swhginh bangcoengh haenx. Yiemzgek caephengz gij gvidingh goenghai yawhsuenq gietsuenq，doinyoengx goenghai yawhsuenq gietsuenq baenz gveihfan、baenz bingzciengz、 baenz cidu bae， hawj caizcwng bienq ndaej engqgya ronghcingx， cawjdoengh ciepsouh gak fuengmienh gamduk.
(Ngeih) Caencaen lamxmaenh diuz sienqdaej “sam bauj”.
Vih bauj gihcwngz cwngfuj cingqciengz guhsaeh caeuq hengzguh gak hangh cwngcwz raen hamq, cunghyangh caizcwng youq mwh lai gya haeujcoengh deihfueng caizlig, gyarem gaenriz faencek deihfueng caizcwng yinhhengz, gyarem doengjit diuhdoh caeuq gamguenj, laebhwnj aen gunghcoz gihci guenjleix “sam bauj” yawhsuenq, dazyinx dukcoi deihfueng guh ndei saeh gonq saemjhaed、saeh gyang gamhaed、saeh laeng cawqleix, gyarem diuhdoh cienz ndaw cang, laebhwnj caezcienz aen gamhaed gihci “cunghyangh daengz sengj、sengj daengz singz yienh”. Sengjgaep caizcwng aeu caencaen raphwnj cawjdaej cwzyin, gya rengz douzhaeuj yienhgaep “sam bauj”, doiq gak yienh “sam bauj” yawhsuenq dauqcungz roi gvaq saemjhaed, saedcaih baujcingq cuksoq anbaiz “sam bauj” yawhsuenq, maedciet gaenriz gihcwngz “sam bauj” ceiyungh guh ndaej baenzlawz yiengh, cimdoiq gizdieg fungyiemj daezgonq dingh ok yawh’anq wngqdoiq. Yienhgaep caizcwng aeu yienghyiengh doeksaed gij cwzyin baujcang, dingjmaenh “sam bauj” ceiyungh youq ndaw caizcwng ceiyungh aeu cuengq baihgonq, dinghmaenh yiengh “sam bauj” ceiyungh guekgya biucinj youq “sam bauj” ceiyungh aeu cuengq baihgonq, guh ndei yawhsuenq anbaiz caeuq ngaenz cang diuhdoh, fuengz “sam bauj” ok vwndiz.
(Sam) Guenj ndei yungh ndei gij cienzngaenz caigen deihfueng cwngfuj.
Sengjgaep caizcwng bouhmonz cietsaed hengzguh ndei gij cwzyin fapdingh guenjleix deihfueng cwngfuj caigen， gyarem guenjleix、 hawj de miz yungh、 souj ndei sienqdaej. Hawj cienhangh caigen engq ndei coicaenh ginghci ndawbiengz hwngfat，caezcienz aen gihci guenjleix，comzrengz haeuj doengh gvaenghdieg youqgaenj，gaijndei aen gapgyaq douzyiengq，habdangq daezsang aen beijlaeh cienhangh caigen dangguh hanghmoeg cienzgoek， daiqdoengh gij cienz ndawbiengz gyadaih douzhaeuj. Gyagiengz bouhmonz gaeudoeng hezdiuz boiqhab，gyavaiq fathengz caeuq sawjyungh caigen， doinyoengx hwnqguh buek hanghmoeg hungnaek ndeu，caenhvaiq guh baenz hong. Dawzyiemz saemjhaed cienhangh caigen hanghmoeg hab mbouj hab gvidingh caeuq dawzred fungyiemj，cienhangh caigen bietdingh aeu yungh youq gij hanghmoeg hungnaek ndaej miz di souik de，aeu baujciz yungzswh gveihmoz caeuq hanghmoeg souik doxdaengh. Dingjmaenh gij caigen deihfueng cwngfuj ciuqfap cij ndaej yungh youq gij goekcienz goeng’ik bae ceiyungh，mbouj ndaej yungh youq bingzciengz ceiyungh，yiemzgimq dawz gij cienzngaenz caigen yungh guh fat cienzhong、 gij cienz danhvei yinhhengz、 fat cienz ciengxlaux daengj. Yiemzgek doeksaed aen cwzyin daengzgeiz dienzboiz gij ngaenzcaiq deihfueng cwngfuj，saedbauj gij caigen deihfueng cwngfuj mbouj ok saek di fungyiemj.
(Seiq) Gyavaiq gaijgwz caizsui dijci.
Hopheux doicaenh guekgya ceihleix dijhi caeuq ceihleix naengzlig yendaiva， laebdaeb gyalaeg gaijgwz caizsui dijci. Netsaed doicaenh gaijgwz vehfaen gij caizcwng saehgienz caeuq ceiyungh cwzyin cunghyangh nem deihfueng， saedhengz yiengh gemj gvaeh gyangq feiq hungloet gvaqlaeng, doeksaed aen fueng’anq doicaenh gaijgwz vehfaen gij souhaeuj cunghyangh caeuq deihfueng，doinyoengx laebhwnj cungj caizcwng gvanhaeh ndawgyang cwngfuj gienz cwz cingcuj、 caizlig hezdiuz、 gak dieg doxdaengh. Lai haeuj yamq ndalaeb ndei gij hanghmoeg senjnod ceihawj， daezsang guenjleix senjnod ceihawj engq dawzbanj、 gohyoz caeuq raen hamq. Caezcienz aen cidu yawhsuenq biucinj gohyoz、 dawzbanj ronghcingx、hanhhaed rengzrwd，laebcaez yawhsuenq ceiyungh biucinj dijhi， caezcienz ceiyungh biucinj wngqyungh gihci. Cienzmienh mbeguh gij hong bienguh cwngfuj caizvu baugau. Onjbouh doicaenh gaijgwz aen dijhi gvaehsuiq deihfueng，leixswnh gij gvanhaeh gvaeh feiq，hawj deihfueng caizcwng miz giz souhaeuj engq lai onjdingh he. Doeksaed gij yenzcwz iugouz suisouh fapdingh，gyavaiq doinyoengx gij hong laebfap cwnghcizsui、 siuhfeisui、 gisui daengj suicungj. Mboujduenh caezcienz gij gvanhsui cidu caeuq gij ginghci hwngfat suijbingz guek raeuz dox hab’wngq. Gyalaeg gaijgwz swhcanj guekmiz、 giyez guekmiz， doidoengh caezcienz aen dijci gamguenj swhcanj guekmiz aeu guenj swhbwnj guhcawj. Netsaed doicaenh ginhyungz swhbwnj guekmiz gyoebcomz doengjit guenjleix，cugbouh guhsaed ginhyungz swhbwnj guekmiz ginghyingz yawhsuenq. Daihdaej guhbaenz hangh hong vehcienj bouhfaenh swhbwnj guekmiz cungsaed aen gihginh ndawbiengz baujyiemj.
(Haj) Cienzmienh saedhengz yawhsuenq cikyauq guenjleix.
Gyavaiq laebhwnj aen dijhi guenjleix cikyauq yawhsuenq yienghyiengh、 seizseiz goemq doh，hawj yawhsuenq guenjleix suijbingz engq sang caeuq cwngcwz saedhengz yauqgoj engq ndei. Laebcaez aen gihci guenjleix cikyauq yawhsuenq gienzlig caeuq cwzyin doiqdaengj、gikcoi doxyungz haenx，caezcienz cikyauq guenjleix cidu、cikyauq cijbyauh caeuq biucinj dijhi，yenzgiu faensik cingzbonj yauqik， vih gaij ndei yawhsuenq bienguh daezhawj baengzgawq. Damqra baenzlawz guenjleix gij cikyauq ceiyungh daengx aen bouhmonz， doiq gij cwngcwz hungnaek、 hanghmoeg ceiyungh hungnaek ngamq okdaiz haenx guh cikyauq bingzguj gaxgonq， gyagiengz saemjhaed cikyauq moegbiu，hawj cikyauq moegbiu engq miz rengz hanhhaed，guh ndei gij hong gamhanh cikyauq. Netsaed mbeguh gij hong cungdenj cikyauq bingzgyaq，doinyoengx cikyauq bingzgyaq caetliengh engq sang、fanveiz engq gvangq，hawj gij bingzgyaq de engq miz caetliengh caeuq engq ndaej saenq. Gyarem yungh gij gezgoj de，laebhwnj caezcienz aen gihci yawj bingzgyaq gezgoj daeuj diuzcingj yawhsuenq、gaijndei guenjleix、caezcienz cwngcwz, guh daengz yungh cienz itdingh aeu cam yauqgoj, mbouj miz yauqgoj aeu gyaep cwzyin, yauqgoj noix couh atgemj lai, miz yauqgoj couh anbaiz lai. Lai roengzrengz doinyoengx goenghai saenqsik cikyauq，aen gihgou fueng daihsam caeuqfaenh bingzgyaq cikyauq aeu lai dazyinx guh dawzbanj bae.
(Roek) Gagrox ciepsouh yinzda mbeguh saemjcaz gamduk yawhsuenq.
Haeujlaeg gvancez doeksaed 《Gij Yigen Dazyinx Yinzda Aen Cungdenj Saemjcaz Gamduk Yawhsuenq Mbe Gvangq Daengz Yawhsuenq Caeuq Cwngcwz Ceiyungh》 caeuq Daengx Guek Yinzda mizgven iugouz， gagrox ciepsouh gamduk saemjcaz yawhsuenq gietsuenq. Nyinhcaen dingqaeu gij yigen genyi yinzda daibyauj caeuq ndawbiengz gak gyaiq，gaenjndaet hopheux gvancez doeksaed gij gezcwz baijbouh hungnaek Dangjcunghyangh、Gozvuyen，gaijndei gij hong bienguh yawhsuenq baugau caeuq caujan， hawj gij yawhsuenq caeuq cwngcwz ceiyungh guh ndaej engq dawzbanj raen hamq. Nyinhcaen doeksaed gij yawhsuenq gezyi caeuq gietsuenq gezyi mizgven yinzda caeuq aen cangzveijvei de. Gaenxmaenx boiqhab doicaenh yawhsuenq lienzvangj gamduk. Guh ndei gij hong cunghab baugau gij cingzgvang guenjleix swhcanj guekmiz caeuq gij baugau cienhangh doxgven. Gaenxmaenx gag bae hoizwngq gij gvansim yinzda daibyauj，guh ndei gij hong gejhoiz gangjmingz，engq ndei fugsaeh yinzda daibyauj ciuqfap hengzguh cizcwz.
Gak boux daibyauj：
Baihnaj caeuq baezlaeng mboengq ndeu, yiengh deuyex yiemzhaenq neix, guek raeuz doenghbaez hwngfat cungj caengz nyangz gvaq，guh ndei gij hong caizcwng yawhsuenq bi 2020 yinvu gannanz naekcaem. Raeuz aeu humx youq aen Dangjcunghyangh aeu Siz Ginbingz dungzci guh cehsim de engqgya gaenjndaet dwk， dingjmaenh aeu Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz guh dazyinx， gagrox ciepsouh Daengx Guek Yinzda gamduk， nyinhcaen dingqaeu gij yigen caeuq genyi Daengx Guek Cwnghez，ciengj haet ciengj haemh、 caen ca saed guh， comz sim comz rengz、gung geng gung nanz， youq ndaw hong caizcwng gaijgwz hwngfat seizdaih moq aeundaej gij yienghmoq、 guhbaenz gij saeh moq， vih saedyienh aen moegbiu buekguh “song aen bak bi”、 saedyienh aen loqsiengj Cungguek fukhwng Cunghvaz Minzcuz ok rengz.
（Sinhvazse Baekging 5 nyied 30 hauh dienh ）
