AEN BAUGAU GVENDAENGZ 2019 NIENZ GOZMINZ GINGHCI CAEUQ
SEVEI FAZCANJ GIVA CAEPHENGZ CINGZGVANG NEM 2020 NIENZ
GOZMINZ GINGHCI CAEUQ SEVEI FAZCANJ GIVA CAUJAN
—— 2020 Nienz 5 Nyied 22 Hauh Youq Gwnz Gaiq Cibsam Daengx Guek Yinzminz Daibyauj Daihhoih Baez Hoih Daihsam
Guekgya Fazcanj Caeuq Gaijgwz Veijyenzvei
Gak boux daibyauj:
Souh Gozvuyen dak, seizneix dawz faenh 2019 nienz gozminz ginghci caeuq sevei fazcanj giva caephengz cingzgvang nem 2020 nienz gozminz ginghci caeuq sevei fazcanj giva caujan daezcingj Gaiq Cibsam Daengx Guek Yinzda Baez Hoih Daihsam saemjlwnh, caemhcaiq cingj daengx guek cwnghez gak boux veijyenz daezok yigen.
It、 Gij gozminz ginghci caeuq sevei fazcanj giva caephengz cingzgvang 2019 nienz
2019 nienz, youq aen Dangjcunghyangh aeu Siz Ginbingz dungzci guh cehsim akmaenh daiqlingx baihlaj, gak dieg gak bouhmonz aeu Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz guh dazyinx, haeujlaeg gvancez gij cingsaenz Cibgouj Daih caeuq Cibgouj Gaiq Ngeih Cung、 Sam Cung、 Seiq Cung Cienzhoih aen dangj, dem’ak “seiq rox”、 giendingh “seiq aen gagsaenq”、 guhdaengz “song aen henhoh”, cienzmienh gvancez doeksaed gij gezcwz baijbouh Dangjcunghyangh、 Gozvuyen, nyinhcaen caephengz faenh 《Cwngfuj Gunghcoz Baugau》、 faenh gozminz ginghci caeuq sevei fazcanj giva 2019 nienz Gaiq Cibsam Daengx Guek Yinzda Baez Hoih Daihngeih saemjlwnh baecinj haenx, doeksaed gij saemjcaz yigen Daengx Guek Yinzda Caizcwng Ginghci Veijyenzvei, genhciz aen gunghcoz goekdiuh youq ndaw onjdingh gouz baenaj, haeujlaeg gvancez aen leixniemh fazcanj moq, genhciz aeu gij gaijgwz gezgou mbiengj gunghawj guh diuz sienqdaeuz, doidoengh gij fazcanj caetliengh sang, netsaed guh ndei hong “roek onj”, doengbuenz suenqveh cengjnyoengx onj demmaj、 coi gaijgwz、 diuz gezgou、 ik beksingq、 fuengz fungyiemj、 bauj onjdingh, gij cujyau muzbyauh yinvu ginghci sevei fazcanj daengx bi guhbaenz haemq ndei, gij cujyau cijbyauh “cibsam haj” gveihva guhbaenz vaiqmenh hab yawhgeiz, vih cienzmienh hwnqbaenz aen biengz siujgangh dwk roengz giekdaej maenhsaed.
（It） Gohyoz bae saedhengz hungzgvanh diuzgung, ginghci yinhhengz baujciz youq ndaw duenh hableix. Lai yunghrengz guh ndaw duenh diuzgung、 dinghyiengq diuzgung、 yawj seiz diuzgung、 dawzcinj diuzgung, lai yunghrengz haeuj cwngcwz doxdaengh boiqhab, dawzrem yawhgeiz guenjleix, coihawj ginghci bingzonj cangqndei fazcanj.
It dwg cujyau hungzgvanh cijbyauh guhbaenz haemq ndei. Gij swnghcanj cungjciz ndaw guek dabdaengz 99.1 fanh ik maenz, demmaj 6.1％, hab muzbyauh yawhgeiz. Hawsingz caiq demgya couhnieb 1352 fanh boux, byaibi hawsingz diucaz saetnieb beijlwd、 hawsingz daenghgeiq saetnieb beijlwd faenbied dwg 5.2％ caeuq 3.62％. Aen gyagwz cijsu gihminz sawjngaenz hwnjsang 2.9％. Gozci soucei daihdaej doxbingz, cienzguekrog bwhcwk cungj ndaej miz 3 fanh ik meijyenz doxhwnj.
Ngeih dwg hungzgvanh cwngcwz nyig hopgeiz diuzcez mizrengz mizyauq. Aeu gemj gvaeh gyangq feiq guh gaiqnaek, gij caizcwng cwngcwz coi ndei haenx gya rengz swng yauq, gij gezgou caizcwng ceiok laebdaeb bienq ndei, beksingq gwndaenj doengh gij lingjyiz hungnaek neix cienzngaenz aeuyungh ndaej bauj rengzrwd. Daengx guek gij souhaeuj itbuen goenggungh yawhsuenq 19.04 fanh ik maenz, demmaj 3.8％； daengx guek gij ceiok itbuen goenggungh yawhsuenq 23.89 fanh ik maenz, demmaj 8.1％； caizcwng yiemqsoq 2.76 fanh ik maenz, caeuq yawhsuenq doxbingz. Daengx bi gemj gvaeh gyangq feiq 2.36 fanh ik maenz. Hableix gyadaih sawjyungh gij caiqgienq cienhangh, gyavaiq fathengz sawjyungh gij caiqgienq cienhangh. Doengh gij hobi cwngcwz onjmaenh haenx baujciz soeng ndaet habngamj, nyig hopgeiz diuzcez laebdaeb raen miz yaugoj, gezgou sindai mboujduenh bienq ndei, doiq saeddaej ginghci daegbied dwg giyez iq、 giyez minzyingz sindai douzcuengq caiq yaek lai gyadaih. Byaibi gvangjyi hobi （M2） yawzsoq demmaj 8.7％, ndawbiengz yungzswh gveihmoz aen soq gaemmiz demmaj 10.7％. Roengz rengz engq hung bae hengzguh gij cwngcwz couhnieb guh gonq, rengz coengh giyez onj gangvih caiq lai gya hung, gij cwngcwz onjdingh gangvih boizdauq saetnieb baujyiemj gihginh cienzmienh doeksaed, gij bizyezswngh gauhdwngj hagdangz、 nungzminzgungh、 bouxbing duiyiz doengh gyoengq vunz cungdenj neix couhnieb cungjdaej baujciz onjdingh.
（Ngeih） Haeujlaeg cengjnyoengx gij gaijgwz gezgou mbiengj gunghawj guh baenaj, coicaenh cauxbaenz gij hawciengz ndaw guek bienq ak. Genhciz “gyamaenh、 dem’ ak、 daezswng、 sodoeng” bet cih fuengcim, laebdaeb cengjnyoengx canjnieb gezgou diuzcingj, roengzrengz sodoeng gunghawj aeuyungh baenqcienj baedauq.
It dwg gij gaijgwz gezgou mbiengj nungzyez gunghawj haeujlaeg guh baenaj. Mbouj cuengqsoeng saek di ca ndei haeuxgwn swnghcanj, haeuxgwn cungjcanjliengh lienzdaemh bi daihhaj ndaej miz 1.3 fanh ik gaen doxhwnj. Haidoengh hengzguh aen canloz bauj nungzcanjbinj youqgaenj, saedhengz aen giva saenqhwng duhhenj. Dieg veh guh swnghcanj haeuxgwn、 dieg baujhoh swnghcanj nungzcanjbinj youqgaenj daihdaej vehdingh. Laebdaeb gya rengz hwnqguh suijli reihnaz, guhbaenz gij yinvu dwkraemx reihnaz biucinj sang 8000 fanh moux caeuq mbaet raemx dwk naz yauqlwd sang 2000 fanh moux. Lai yunghrengz bae fuengzre gaemhanh mouraq Feihcouh, gyavaiq mouseng dauq ciengx, caenh’itbouh laebndei aen dijhi swnghcanj gunghawj siugai byaekheu. Laebndei gij cwngcwz gyaqcienz ceiq daemq soucawx haeuxgwn caeuq gij cwngcwz gyaqcienz hab miz faiq, gaijgwz aen cidu soucwk nungzcanjbinj youqgaenj caeuq aen cidu bwhcwk nungzswh youqgaenj haeujlaeg doi baenaj. Nungzcanjbinj lwngjlen vuzliuz cangcwk sezsih caeuq lwngjlen daehyinh fatmaj haemq vaiq. Lajmbanj canjnieb yungzhab fazcanj laebdaeb doi baenaj, gyoebsuenq cauhlaeb 107 aen yienhdaih nungzyez canjyezyenz、 210 aen lajmbanj canjnieb yungzhab fazcanj sifanyenz. Aen cwngcwz dijhi haeujcoengh baujhoh nungzyez yienghmoq gyavaiq laebhwnj laebcaez.
Ngeih dwg hangznieb ceiqcauh yamqdin cienjhingz swnggaep gyavaiq. Okdaiz gij cwngcwz cosih doidoengh hangz ceiqcauh caetliengh sang bae fazcanj, fatbouh canjnieb gezgou diuzcingj cijdauj moegloeg （bonj 2019 nienz）. Yungh gij banhfap youz hawciengz dingh、 baengh fapceih bae guh, youh raengcawz gij swnghcanj naengzlig doeklaeng meizdan 1 ik dunh baedauq, onjdangq doicaenh giyez gangdiet gyan’gyoeb dauqlaeb, doidoengh hwnqguh gij hanghmoeg hungloet sizva. Saedhengz lwnz moq gisuz gaijcauh gunghcwngz, doidoengh gij ci A hingz deihdiet Cungguek biucinj daengj buek gisuz canghbei daiz (dauq) daih’it ndaw guek gag cauh haenx guhyiengh wngqyungh.
Sam dwg hangz fugsaeh caetliengh sang fazcanj maenhsaed doi baenaj. Okdaiz gij cwngcwz cosih haeujcoengh hangz fugsaeh caetliengh sang bae fazcanj、 hangznieb fugsaeh conzdungj gaijcauh swnggaep, roengzrengz gungganq yienghnieb moq vunqsik moq, doidoengh hangz ceiqcauh senhcin caeuq hangz fugsaeh yienhdaih laegdaeuq yungzhab fazcanj, haeujcoengh hwnqguh gij bingzdaiz yenzgiu haifat cungj gisuz doxcaemh、 gunghyez sezgi、 gunghyez hulenzvangj.
Seiq dwg gij rengz haeujcoengh saeddaej ginghci gyangqdaemq cingzbonj gyadaih. Gij suiqlwd cwnghcizsui hangz ceiqcauh daengj daj 16% gyangq daengz 13%, hangz gyaudoeng daehyinh、 hangz dajhwnq daengj daj 10% gyangq daengz 9%, saedhengz gemjmienx gij cienzgvaeh giyez iq caeuq giyez iqet ndaej ik doh, aen soqgiek nab cwnghcizsui bouxnabgvaeh cienzsoq iq haenx daj ndwen siugai cienzsoq 3 fanh maenz daezsang daengz 10 fanh maenz. Doengh aen sengjfaenh giyez cizgungh gihbwnj ciengxlaux baujyiemj danhvei gyaucienz beijlaeh sang gvaq 16% haenx gaenq cienzbouh doekdaemq daengz 16%, gij cwngcwz youq saek duenh seizgan gyangqdaemq gij feiliz saetnieb、 goengsieng baujyiemj riengzlaeng gya bi ndeu. Gyalaeg guh gij gaijgwz youz hawciengz bae dingh liliz, gij cingzbonj ndawbiengz gyoebhab yungzswh mingzyienj gyangqdaemq. Cingleix gij cienz bouhmonz cwngfuj caeuq giyez guekmiz niengqyiemq giyez minzyingz、 giyez rauh iq 6647 ik maenz. Caiq lai atgemj gij moegloeg soufeiq cwngfuj dinghgyaq ginghyingz fugsaeh, gemjmienx mbangj cungj hingzcwng saehnieb soufeiq caemhcaiq gyangqdaemq aen biucinj soufeiq. Itbuen gunghsanghyez bingzyaenz gyaqdienh caiq gyangq 10%, daengx bi gyangqdaemq giyez gij cingzbonj yungh dienh 846 ik maenz. Gyadaih aen gveihmoz cigsoh gaicawx dienh, gyangqdaemq giyez gij cingzbonj cawx dienh daih’iek 790 ik maenz. Gyangqdaemq gij gyaqcienz cwngzbinjyouz、 denhyenzgi mwnzcan caeuq gij gyaqcienz hamj sengj yungh gvanjdau daehyinh, gemjmbaeu diuzrap bouxyungh daih’iek 650 ik maenz. Siubae caeuq gyangqdaemq dietloh、 sokruz、 minzyungh gihcangz mbangj cungj soufeiq, gungh gemjmbaeu diuzrap giyez 100 lai ik maenz.
Haj dwg diemj demmaj moq sawjngaenz ik beksingq mboujduenh haigvangq. Okdaiz doengh gij cwngcwz cosih gyavaiq fazcanj riuzdoeng coicaenh sanghyez sawjngaenz、 coicaenh hangz fugsaeh gyahcwng guh ndei guh hung、 gikfat gij rengzndumj sawjngaenz haeuj vwnzva caeuq lijyouz、 coicaenh daengxcungq yinzminz sawjngaenz cangqndang caeuq guh dijyuz、 coicaenh “hulenzvangj + ndawbiengz fugsaeh” fatmaj, gyarengz bae coengh gyanghwnz sawjngaenz, gikcoi giceh、 gyahden、 denswj canjbinj cawx moq vuenh gaeuq. Denswj sanghvu haeuj lajmbanj gyoebhab guhyiengh haeujlaeg hengzguh, dieg lajmbanj gij vangjdenj vaiqsoengq mauhgvaq 3 fanh aen, dieg yanghcin ndaej soengq daengz dabdaengz 96.6%. Daengx bi ndawbiengz huqyiengh gailingz cungjngeg mauhgvaq 40 fanh ik maenz, demmaj 8.0%. Daengx guek gwnz vangj gailingz soqngeg dabdaengz 10.6 fanh ik maenz, demmaj 16.5%, ndawde, gij sanghbinj saedhuq youq gwnz vangj gailingz soqngeg demmaj 19.5%, ciemq ndawbiengz huqyiengh gailingz cungjngeg 20.7%. Baenzgoeng gawjbanh 2019 nienz ngoenz binjbaiz Cungguek baenzroix hozdung.
Roek dwg cungdenj lingjyiz mizyauq douzswh hableix gyahung. Fatbouh saedhengz 《Aen Diuzlaeh Cwngfuj Douzswh》, habdangq gyangqdaemq gij beijlaeh cienzgoek dwkhaeuj aen hanghmoeg cungdenj lingjyiz. Laebcaez aen gihci bwhcwk hanghmoeg hungnaek, gaenxmaenx doicaenh laebguh cienhangh caiqgienq hanghmoeg. Gveihfan miz bouhloh bae doicaenh cwngfuj caeuq gij swhbwnj ndawbiengz doxgap （PPP）, gujli gij swhbwnj ndawbiengz caeuqfaenh hwnqguh cungdenj lingjyiz bouj gizvauq. 172 hangh suijli gunghcwngz hungnaek gaenq itgungh haihong 144 hangh. Yaenqfat saedhengz aen ganghyau hwnqguh gyaudoeng hawj guekgya bienq ak. 23 aen cotsim vuzliuz guekgya gaep hwnqguh onjbouh doi baenaj. Gij hong geizgonq Conh Cang dietloh netsaed doi baenaj, Baekging Dahingh Gozci Gihcangz hwnqbaenz lij gaenq guh daehyinh, Vuhdunghdwz、 Bwzhozdanh daengj suijdencan hung ndaej gyavaiq haiguh. 2019 nienzdaej, dietloh ndaej byaij ci dabdaengz 13.9 fanh goengleix, ndawde gauhsuz dietloh 3.5 fanh goengleix, minzyungh daehyinh gihcangz dabdaengz 235 aen, lai demgya gij denvangj 220 cenhfuz caeuq doxhwnj roen raez 3.4 fanh goengleix, sienqmeh youz heiq roen raez 0.4 fanh goengleix. Daengx bi guding swhcanj douzswh （mbouj hamz nungzhoh） demmaj 5.4％, ndawde ndawbiengz douzswh demmaj 4.7％；douzswh gezgou laebdaeb bienq ndei, gauhgisuz canjnieb douzswh caeuq sevei lingjyiz douzswh faenbied demmaj 17.3％ caeuq 13.2％.
（Sam）Haenqrengz ca gaiqnaek bouj gizvauq gej nanzdaez, sam ciengz ciengq haenq hung ndaej guh baenaj gig daih. Dawzcinj duetgungz cingzyauq gig mingzyienj, swnghdai vanzging caetliengh cungjdaej gaijndei, ginhyungz fungyiemj mizyauq fuengzre gaemhanh.
It dwg gij hong haenqrengz duetgungz netsaed doi baenaj. Lai yunghrengz guh canjnieb、 couhnieb、 sawjngaenz daengj banggungz, conz rengz gungroengz gij vwndiz “song mbouj you sam baujcang” haenqrem ndaw dieg “sam gih sam couh” daengj doengh giz dieg gig gungzhoj neix. Gyoebsuenq haeujcoengh 733 fanh hoh ranz gungzhoj laeb dangjan laeb gaj haenx hengzguh ranzvaih lajmbanj gaijcauh. Gyoebsuenq hwnqguh aen dieg anceiq senj dieg buen ranz banggungz 3.5 fanh aen、 ranzyouq 260 lai fanh dauq, ndaej anceiq 947 fanh boux laeb dangjan laeb gaj senj dieg buen ranz banggungz, daezgonq bi ndeu daihdaej guhbaenz gij yinvu “cibsam haj” gveihva gensez. Gyarengz cieplaeng guh canjnieb fuzrex caeuq couhnieb bangfuz, gij hong dinghdiemj bangfuz miz rengz doi baenaj. Daengx bi lajmbanj vunz gungzhoj gemjnoix 1109 fanh, aen yienh gungzhoj duetmauh 344 aen, gungzhoj fatseng beijlwd gyangq daengz 0.6%. Gat daengz 2019 nienzdaej, gij vunz gungzhoj ciuq biucinj seizneix dingh haenx miz 97% ndaej daengz duetgungz, 94% aen yienh gungzhoj ndaej duetmauh, gij gungzhoj baenz rangh dieg de daihdaej ndaej gaijgez.
Ngeih dwg baujhoh swnghdai vanzging caeuq fuengzceih uqlah doi baenaj rengzrwd. Roengzsim hoenx ndei ciengz ciengq henhoh mbwn lamz、 raemx saw、 namh seuq, gij naedfaenx saeq （PM2.5） aen hawsingz digih gaep caeuq digih gaep doxhwnj caengz dabdaengz biucinj de moix bi bingzyaenz noengzdoh doekdaemq 2.4%, raemx gwnznamh caetliengh dabdaengz roxnaeuz ndei gvaq Ⅲ loih raemx beijlaeh dwg 74.9%. Gij nwngzyenz mbouj dwg vaqsig nwngzyenz ciemq nwngzyenz sawjyungh lainoix dabdaengz 15.3%, daezgonq bi ndeu guhbaenz aen muzbyauh “cibsam haj” gveihva. Haiguh lwnz daihngeih cunghyangh ciuq gvenqlaeh dukcaz swnghdai vanzging baujhoh. Doeksaed aen cidu bouxdaeuz guenj dah caeuq aen cidu bouxdaeuz guenj huz. Cingjceih gij swnghdai vanzging vwndiz dieg goekraemx yienhgaep daihdaej guhbaenz, siucawz gij raemxndaem raemxhaeu aen hawsingz digih gaep caeuq digih gaep doxhwnj yaek rim 87％. Giendingh mbouj bienq doicaenh gimqhaed labsab rog guek haeuj ndaw guek daeuj, daengx guek daj rog guek cawx haeuj huqfeiq baenzndaek gemjnoix 40.4%. Hainduj genj dieg sawq hwnq “aen singz mbouj miz huqfeiq”. Gyavaiq hengzguh aen cidu cinjhawj baizuq. Fatbouh aen moegloeg dazyinx canjnieb saekheu（banj 2019 nienz）. Haiguh aen hengzdoengh nwngzyenz siuhauq cungjliengh caeuq giengzdoh “sueng gaemhanh”、 aen hengzdoengh mbaet raemx guekgya、 aen hengzdoengh cauhlaeb yiengh swnghhoz saekheu. Danhvei swnghcanj cungjciz ndaw guek nwngzyenz siuhauq doekdaemq 2.6%, fanh maenz swnghcanj cungjciz ndaw guek yungh raemx soqliengh doekdaemq 6.1%. Caezcienz aen cidu baujhoh gij ndoengfaex gag hwnj, gyadaih doiq reih ndaem faex ndaem nywj, gyoebhab ceihleix dieg bienq fwz bienq req. Hainduj sawqguh gyoebhab boizbouj swnghdai. Danhvei swnghcanj cungjciz ndaw guek baizcuengq wyangjvadan soqliengh doekdaemq 4.1%.
Sam dwg ginhyungz daengj lingjyiz fungyiemj hungnaek ndaej mizyauq fuengzre gaemhanh. Cawqceq yiengh fungyiemj gij dawzcaiq ndumj deihfueng cwngfuj caeuq gij dawzcaiq giyez ndaej onjdangq doi baenaj, aen seiqdaeuz hungzgvanh gangganj beijlwd hwnjsang vaiq gvaqbouh ndaejdaengz naenxhaed. Ngaenzhangz ngumhngaeuz mbouj ciuq bouhloh hwngfat ndaej daengz mizyauq ceihleix, mbangj aen ginhyungz gihgou fungyiemj sang daegbied dwg ngaenzhangz rauh iq “cinjdeng cek danq” aeundaej cwngzgoj duenhseiz, gij fungyiemj hulenzvangj ginhyungz daengj nangq daengz vunzlai haenx ndaej daengz ceihleix. Hawciengz ginhyungz yinhhengz bingzonj miz bouhloh, hawciengz vaivei caeuq gij veiliz yinzminzbi cungjdaej onjdingh. Gij cidu gamguenj ginhyungz ndaej caiq laeb caezcienz.
（Seiq） Haeujlaeg hengzguh aen canloz cauhmoq doidoengh fazcanj, gij naengzlig gohgi cauhmoq caiq ndaej daezswng. Mboujduenh gyalaeg gaijgwz gohgi dijci, gyarengz haeujcoengh gij yenzgiu dwkgiek caeuq gij yenzgiu wngqyungh dwkgiek, daengx guek gij cienzngaenz douzhaeuj yenzgiu caeuq sawqniemh de lai daengz 2.19%, gohgi cinbu gunghawj beijlwd daezsang daengz 59.5%.
It dwg gij yamqdin gag cauhmoq gyavaiq. Gohgi cwngzgoj hungnaek laebdaeb nyoenx okdaeuj, Cangzngoz Seiq Hauh baenzgoeng roengz deih baihlaeng ronghndwen, gij singhco haedsim aen cenzgiuz hidungj Bwzdouj Sam Hauh ndaej baijbouh baenz caez, 5G sanghyung ndaej gyavaiq doiok, Cangzcwngh Haj Hauh Yauz Sam Daehsoengq Hojcen nyingz hwnj mbwn baenzgoeng, “Sanhdungh Gen” aen hangzmuj daih’it guek raeuz gag cauh haenx cingqsik liedcang. Gij hanghmoeg hungnaek gohgi cauhmoq 2030 — caeuq gij cienhangh hungnaek guekgya gohgi ndaej haeujlaeg hengzguh, gij goekrongh doengzbouh fuzse naengzliengh gig lai daengj buek gohgi giekdaej sezsih hungnaek guekgya ndeu haigoeng hwnqguh. Gij sawqniemh cienzmienh cauhmoq gaijgwz onjbouh doi baenaj, daihdaej guhbaenz 169 hangh gaijgwz cosih hengz gonq sawq gonq haenx. Baekging、 Sanghaij gohgi cauhmoq cungsim hwnqguh ndaej miz cincanj youqgaenj, Yez Gangj Au Davanhgih gozci gohgi cauhmoq cungsim hwnqguh ndaej swnhleih hwnjdin. Baekging Vaizyouz、 Sanghaij Canghgyangh、 Anhveih Hozfeiz daengj doengh aen guekgya gohyoz cungsim goengnaengz gyoebhab de ndaej cienzmienh gyavaiq hwnqguh, Davanhgih aen guekgya gohyoz cungsim goengnaengz gyoebhab de ndaej gyavaiq maeuzveh hwnqguh.
Ngeih dwg rengznyoengx moq ndaej gyavaiq gungganq. Haidoengh hwnqguh dieg sawqniemh soqcih ginghci cauhmoq hwngfat guekgya, doengbuenz suenqveh doicaenh hwnqguh gij gunghcwngz sinsizva hungnaek, hengzguh buek gunghcwngz “cibsam haj” cwngvu sinsizva hungnaek ndeu. Haeujlaeg hengzguh aen gunghcwngz gij canjnieb saenhwng miz canlozsing comzgyoengq haenx hwngfat.
Sam dwg gij rengzhoengh cauhmoq cauhnieb cauhguh laebdaeb dem’ak. Genj dieg sawq guh gij gaijgwz doenggvaq “bauhong” caeuq “diuz doengloh saekheu” bae sawjyungh gij ginghfei gohyenz hanghmoeg, gikfat boux guh gohyenz gaenx bae cauhmoq cauhguh. Banh baenz aen hozdung caet ngoenz sueng cauh daengx guek 2019 nienz. Gat daengz 2019 nienzdaej, daengx guek miz gij giyez gauhsinh gisuz mauhgvaq 22.5 fanh aen, miz gij giyez rauh iq guh gohgi haenx mauhgvaq 15.1 fanh aen, faenbied demmaj daih’iek 24% caeuq 15%. Guek raeuz aen cijsu cauhmoq youq seiqgyaiq baizmingz daezswng daengz daih 14 vih, giyez soqliengh moix ngoenz lai demgya baenz fanh hoh doxhwnj.
（Haj） Guh saed guh saeq gij canloz hungnaek, dieg singz dieg mbanj dox boiqhab fazcanj mboujduenh dem’ak. Doidoengh gij canloz hungnaek saenqhwng lajmbanj caeuq rangh dieg fazcanj de doekdeih raen yaugoj, roengzrengz daezswng gij caetliengh hawsingzvaq yienghmoq, roengzrengz sukiq gij cengca dieg singz dieg mbanj fazcanj.
It dwg aen canloz saenqhwng lajmbanj gyavaiq hengzguh. Haidoengh hengzguh gij gunghcwngz hungnaek、 giva hungnaek caeuq hengzdoengh hungnaek ndaw aen canloz gveihva saenqhwng lajmbanj doekdingh haenx. Roengz mbanj bae youz、 dajndaem guhcaemz daengj yienghnieb moq ndaej mboujduenh nyoenx okdaeuj. Laebdaeb doicaenh ywnon vafeiz gemjliengh demsou, gyavaiq doicaenh gij ganj nyaq gomiuz、 bwnh uq doihduz bienqbaenz swhyenz dawz daeuj yungh. Lajmbanj gij diuzgen raemx dienh roen daengj ndaej gaijndei yienhda, aen hengzdoengh haenqrengz bae ceihleix gij uqlah nungzyez lajmbanj cienzmienh mbeguh, cingjceih gij vanzging vunzyouq lajmbanj gyavaiq doicaenh. Gij vwnzva gensez lajmbanj caeuq ceihleix lajmbanj ndaej haeujlaeg doi baenaj.
Ngeih dwg gij caetliengh hawsingzvaq yienghmoq onjbouh daezsang. Yaenqfat saedhengz gij cwngcwz cosih gvendaengz laebhwnj laebcaez gij dijci gihci singz mbanj yungzhab fazcanj. 1000 lai fanh vunz daj nungzyez senj okdaeuj haenx roengzhoh hawsingz, gij hong 1 ik vunz mbouj miz huciz haenx youq hawsingz roengzhoh aeundaej cincanj hungnaek, daengx guek aen beijlwd gij vunz ciengz youq hawsingz dabdaengz 60.60%, aen beijlwd gij vunz miz huciz hawsingz dabdaengz 44.38%. Aen hawsingz cungsim caeuq aen hawsingz baenzgyoengq gij naengzlig comz vunz de ndaej cugbouh daezswng, hwnqguh gvaengx hawsingz hung ndaej miz bouhloh doi baenaj, doengh aen cin daegbied hung haenx laebbaenz si ndaej miz cungbyoengq, doengh aen cin iq miz daegsaek haenx fatmaj caiq lai ndaej gveihfan.
Sam dwg aen gihci moq ranghdieg doxdaengh hwngfat gyavaiq cauhlaeb. Gij cwngcwz dijhi haeujcoengh Baihsae daih haifat、 Doengbaek saenqhwng、 Cungqgyang hwnghwnj、 Baihdoeng daiqdaeuz haenx engqgya caezcienz. Gingh Cinh Gi doxdaengh fazcanj miz bouhloh rengzrwd doi baenaj, Yungzanh Sinhgih cienjhaeuj mboengq hwnqguh. Cingjgaij gij vwndiz haenqrem swnghdai vanzging caeuq ceihleix gij uqlah swnghdai vanzging rangh dieg ginghci Dahcangzgyangh ndaej cingzyauq yienhda. Aen cwngcwz dijhi gensez gveihva Yez Gangj Au Davanhgih caiq lai laeb caezcienz. Aen gveihva ganghyau rangh dieg Cangzgyangh Sanhgozcouh baenz aen cingjdaej ndeu bae fazcanj yaenqfat hengzguh, dieg guhyiengh swnghdai loegsaek baenz aen cingjdaej ndeu bae fazcanj haidoengh hwnqguh. Aen gveihva ganghyau baujhoh gij swnghdai rangh dieg Dahvangzhoz caeuq hawj dieg de ndaej caetliengh sang fazcanj haidoengh bienguh. Loih dieg daegbied lauj sauj bien gungz daengj ndaej gyavaiq saenqhwng fazcanj, giz doiq giz bangcoh ndaej doi baenaj rengzrwd. Hwnqguh dieg guhyiengh fazcanj haijyangz ginghci cienzmienh haidoengh.
（Roek） Cienzmienh cengjnyoengx gij gaijgwz aeu hawciengz dazyinx haenx, gij rengzhoengh hawciengz cawjdaej caiq lai fat hoengh. Genhciz caeuq laebndei gij gihbwnj ginghci cidu sevei cujyi, gaijgwz gij lingjyiz cungdenj、 gij vanzcez ceiq youqgaenj de ndaej cienzmienh doi baenaj.
It dwg gij vanzging guh seng’eiq laebdaeb bienq ndei. Gij gaijgwz “cuengqgienz gamguenj fugsaeh” doinyoengx haeujlaeg. Fatbouh 《Aen Diuzlaeh Gaijndei Gij Vanzging Guh Seng’eiq》, laebhwnj aen dijhi bingzgyaq gij vanzging guh seng’eiq Cungguek, youq daengx guek 41 aen hawsingz haiguh bingzgyaq aen vanzging guh seng’eiq. Yaenqfat saedhengz mbawdan gimq haeuj hawciengz （banj 2019 nienz）, gij saehhangh mbawdan atgemj daengz 131 hangh. Gveihfan gij hingzveiz saemjbae douzswh, gij suijbingz saemjbae douzswh “aen vangj ndeu banh caez” mboujduenh daezsang. Gij bouhsoq saemjbae gunghcwngz gensez hanghmoeg laebdaeb cinggemj. Cungj gamguenj bouhmonz lienzhab “song couaeu、 it goenghai” ndaej cugbouh doihengz, mbawdan saehhangh “hulenzvangj + gamguenj” ndaej gyavaiq ceiqdingh, gij goengnaengz caeuq fugsaeh aen bingzdaiz caezyiengj saenqyungh saenqsik daengx guek mboujduenh laebndei, yiengh gamguenj gihci moq aeu saenqyungh guh giekdaej haenx ndaej gyavaiq cauhlaeb. Aen bingzdaiz daengx guek caemh aen dog guh cwngvu fugsaeh haenx ndaej hwnj vangj sawq yinhhengz, aen vangjloz fugsaeh ginhyungz saenqyungh saenqsik sugigu cwgoemq daengx guek.
Ngeih dwg doengh gij gaijgwz baudaengz gaijgwz yiengh sojyoujci doxgyaux、 baujhoh canjgienz、 gikfat baujhoh gij cingsaenz canghgiyez ndaej lienzdoengh doi baenaj. Haidoengh hengzguh gij gaijgwz sawqdiemj sojyoujci doxgyaux buek daihseiq 160 hoh. Gyagiengz baujhoh canjgienz caeuq cihsiz canjgienz, cazok gaijcingq gij anquengj anqloek nangqdaengz canjgienz de aeundaej cungbyoengq youqgaenj, hangh hengzdoengh cienmonz ceihleix gij vwndiz canjgienz cengnauh nangqdaengz cwngfuj haenx miz bouhloh bae guh. Okdaiz gij cwngcwz cosih haeujcoengh minzyingz giyez gaijgwz fatmaj、 coicaenh giyez rauh iq fatmaj ndei, laebhwnj laebcaez gij gihci canghgiyez caeuqfaenh ceiqdingh yiengh cwngcwz nanangq giyez.
Sam dwg yausu hawciengzvaq gaijgwz gyavaiq doeksaed. Ceiqdingh gij yigen gaijgwz aen dijci gihci coicaenh lauzdungliz caeuq vunzcaiz youq ndawbiengz riuzdoengh. Coihdingh aen fap cwnggen, ndalaeb gohcangbanj caemhcaiq sawqdiemj cucwzci, gaijgwz laebndei aen gihci cauxbaenz daigvanj hawciengz bauqgyaq liliz （LPR）. Lai hawj gauhyau caeuq gohyenz yensoj miz gienz gag guh gohyenz, guh yiengh sawqdiemj hawj gohyenz yinzyenz miz gij gienzgaemmiz roxnaeuz ndaej ciengzgeiz sawjyungh aen gohgi cwngzgoj seiz de dangsaeh guh ok haenx, cauhlaeb aen dijhi fugsaeh gisuz cienjhaeuj cienjok. Coihdingh aen fap guenjleix diegdeih、 aen fap guenjleix fangzdicanj, gij gienz yungh dieg dajhwnq cienjnyiengh、 okco、 dingjat ngeih gaep hawciengz caiq ndaej caezcienz, aen dijhi lai cungj fuengsik cienjnyiengh caeuq hawciengz gunghawj dieg guh gunghyez engqgya caezcienz.
Seiq dwg cungdenj lingjyiz gaijgwz doicaenh haeujlaeg. Guekgya Sizyouz Denhyenzgi Gvanjvangj Cizdonz Youjhan Gunghswh gaenq gaplaeb baenz. Cienzmienh cuengqhai cinjhaeuj damqcaz haivat sizyouz denhyenzgi duenhgwnz. Okdaiz gij fueng’anq youq gij lingjyiz gyauyuz、 gohgi、 gyaudoeng daehyinh guh yiengh gaijgwz vehfaen gij caizcwng saehgienz caeuq ceiok cwzyin cunghyangh nem deihfueng. Denliz gaicawx engqgya youz hawciengz bae dingh, gaijgwz gij boiqdienh yezvu demliengh caeuq laebhwnq denliz yienhhuq hawciengz sawqdiemj miz bouhloh doi baenaj. Gyalaeg gaijgwz aen gihci cauxbaenz gij dienhgyaq coemh meiz fatdienh hwnj vangj, dienhrumz caeuq gvanghfuz hwnj vangj dienhgyaq gaijgwz、 nungzyez raemxgyaq gyoebhab gaijgwz、 gyaudoeng daehyinh gyagwz gaijgwz miz bouhloh doi baenaj. Gaijci laebbaenz Cungguek Guekgya Dietloh Cizdonz Youjhan Gunghswh caeuq Cungguek Youzcwng Cizdonz Youjhan Gunghswh. Hangh gaijgwz hangznieb hezvei sanghvei caeuq hingzcwng gihgvanh doxfaen okbae cienzmienh doihai.
（Caet） Lienzdaemh gyalaeg yiengh hailangh suijbingz sang, aen gwzgiz moq yiengh ginghci hailangh gyavaiq cauhlaeb. Doiq rog hailangh coh aen gvaengx engq hung、 aen hangznieb engq gvangq、 aen caengzmbaek engq laeg guh baenaj, gozci ginghci doxgap caeuq gij ak moq doxdax gyavaiq gungganq.
It dwg caezlaeb “it rangh it loh” maenhsaed doi baenaj. Gaiq Daihngeih “It Rangh It Loh” Gozci Doxgap Gauhfungh Lundanz hai baenz. Gyoebsuenq caeuq 138 aen guekgya nem 30 aen gozci cujciz ciemdingh 200 faenh vwnzgen doxgap caezlaeb “it rangh it loh”. Rangh ginghci Cungh Bah daengj gensez guh ndaej swnhleih. Gij hanghmoeg hungnaek lumjbaenz Yaj Van Gauhdez、 Cungh Lauj Dietloh、 Gvahdazwj Gangj ndaej guh doxbae swnh, Cungh Ngoz denhyenzgi gvanjdau duenh baihdoeng douzcanj doengheiq. Caeuq Fazgoz、 Yinghgoz、 Yizbwnj daengj 14 aen guekgya laebhwnj aen gihci daihsam fueng hawciengz doxgap. Aen “It Rangh It Loh” Loegsaek Fazcanj Gozci Lenzmungz cingqsik haidoengh, “Diuz Roen Seicouz Soqcih” “Densangh Roensei” gensez doxgap miz bouhloh doi baenaj. Cungh Ouh yinhhuq lezceh gyoebgeiq haibyaij cungbyoengq 2 fanh lied, doeng daengz Ouhcouh 18 aen guekgya 57 aen hawsingz, gyoebhab siengnaek beijlwd dabdaengz 94%. Aen cungjdaej gveihva diuz doengloh moq dieghawq Baihsae doeng daengz haij yaenqfat saedhengz.
Ngeih dwg vaimou fazcanj youq ndaw onjdingh daezsang caetliengh. Aen cijdauj yigen gvendaengz doicaenh mouyiz caetliengh sang bae fazcanj haenx yaenqfat saedhengz. Gaiq Daihngeih Cungguek Gozci Cingouj Bozlanjvei banh baenz. Gihyiz Cienzmienh Ginghci Guhdoih Gvanhaeh Hezding （RCEP） damzbuenq damz baenz haujlai. Doiq Ouhmungz、 Dunghmungz caeuq gij guekgya henzsienq “it rangh it loh” cingouj cuzgouj baujciz demmaj haemq vaiq, gij canjbinj cizcwngz denlu fu’gyahciz sang neix caeuq yiengh fugsaeh cihsiz hamzliengh sang haenx cuzgouj baujciz demmaj riengjvaiq. Caiq laeb 24 aen dieg cunghab sawqniemh hamj gyaiq densangh, hawciengz dajcawx mouyiz sawqdiemj、 fugsaeh mouyiz cauhmoq fazcanj sawqdiemj netsaed doi baenaj, aen dieg gyoebhab baujsuiq daengj giz haijgvanh daegbied gamguenj de fazcanj caetliengh caiq ndaej daezswng.
Sam dwg aen suijbingz leihyungh vaiswh laebdaeb daezswng. Aen fap vaisangh douzswh caeuq saedhengz diuzlaeh okdaiz saedhengz. Caiq lai gya’gvangq gij fanveiz gikcoi vaisangh douzswh, gikcoi vaiswh douz haeuj hangznieb ceiqcauh caeuq hangznieb fugsaeh swnghcanj bae, haeujcoengh dieg Cungqgyang dieg Baihsae ciepcoux gij canjnieb vaiswh senj haeuj. Mbawdan gimq vaiswh haeuj daengx guek caeuq swmou siyengih faenbied sukgemj daengz 40 diuz、 37 diuz. Cuengqsoeng gij hanhhaed vaiswh ginhyungz gihgou youq Cungguek gaemguj beijlaeh caeuq yezvu fanveiz, gyadaih ginhyungz hawciengz suengyiengq hailangh. Doicaenh gij ginghci gisuz gaihfazgih guekgya gaep cauhmoq daezswng. Caezcienz giyez caiqrog bwh’anq daenghgeiq guenjleix, lai fuengzre cungdenj hangznieb caiqrog fungyiemj. Daengx bi saedsaeh sawjyungh gij cienz vaisangh cigsoh douzswh 1381 ik meijyenz.
Seiq dwg hwnqguh swmou siyengih aeundaej cingzyauq ndei. Gyalaeb Sanghaij Swmou Siyengih dieg moq henzgyawj, gya laeb Sanhdungh daengj 6 aen swmou siyengih, guhdaengz gij sengj henzhaij cw doh, caemhcaiq baez daih’it youq giz dieg henzguek baijbouh. Hawj daengx guek ciuqcau doigvangq gij cwngzgoj cidu cauhmoq swmou siyengih 49 hangh, gyoebsuenq ciuqcau doigvangq 223 hangh. Haijnanz Swmou Siyengih hwnqguh baenaj swnhndei.
Haj dwg rog guek douzswh bingzonj fazcanj. Dazyinx giyez youq rog guek ginghyingz habgvi guenjleix, gij canghbei、 gisuz、 biucinj caeuq fugsaeh Cungguek onjbouh “byaij okbae”, daengx bi gij mbouj dwg ginhyungz de youq rog guek cigsoh douzswh 1106 ik meijyenz. Gij roenloh yinzminzbi hamj gyaiq yungzswh cugbouh haigvangq, yinzminzbi byaij hwnj seiqgyaiq miz bouhloh doi baenaj.
（Bet） Yunghrengz baujcang caeuq gaijndei saedceij beksingq, gyoengq yinzminz engq roxnyinh ndaejdaengz roxnyinh vuenyungz roxnyinh ancienz. Dawzmaenh cungj fazcanj swhsiengj aeu yinzminz guh cungsim, baujcang gij gwndaenj ceiqdaemq yinzminz daegbied dwg yinzminz hojnanz, hawj gak hangh cosih ikleih beksingq haenx ndaej doeksaed.
It dwg gij rengz onj couhnieb coi demsou gyadaih. Doeksaed aen cwngcwz couhnieb guh gonq, okdaiz saedhengz gij yigen caiq bae guh ndei gij hong onj couhnieb. Lai bae bangcoh gyoengq vunz cungdenj caeuq doengh boux couhnieb hojnanz, daj gak fuengmienh engq ndei bae fugsaeh goenggungh couhnieb, gya’gvangq gij hoenggan bouxguhhong riuzdoengh couhnieb. Daengx bi sawjyungh saetnieb baujyiemj gihginh yiengq 115 fanh hoh giyez fatcuengq gij boizdauq onj gangvih 552 ik maenz, hawj 7290 fanh boux cizgungh ndaej ndeicawq; hawj 126 fanh vunzbaez boux cizgungh camgya saetnieb baujyiemj haenx fat roengz gij boujdiep saetnieb baujyiemj daezswng ginwngz 20 ik maenz, daj saetnieb baujyiemj gihginh gietyawz ndawde dawz ok mauhgvaq 1000 ik maenz haeujcoengh daezswng cizyez ginwngz, mauhsoq guhbaenz aen muzbyauh yinvu boujdiep cizyez ginwngz beizyin 1500 fanh vunzbaez doxhwnj. Haeujlaeg doihengz aen cidu baenzciuh beizyin cizyez ginwngz, laebdaeb engq lai laebguh giz dieg vunzlai caezcaemh gyauqlienh cizyez ginwngz. Doengzcaez yungh lai cungj banhfap coihawj gihminz lai ndaej souhaeuj, roengzrengz demgya cienzhong hawj bouxguhhong daegbied dwg boux youq itsienq guhhong, gij souhaeuj gihminz moix vunz bingzyaenz ndaej ceiyungh de mauhgvaq 3 fanh maenz.
Ngeih dwg sevei baujcang dijhi caiq ndaej laebndei. Gihbwnj ciengxlaux baujyiemj vunzsoq camgya dabdaengz 9.68 ik vunz, aen beijlaeh cunghyangh diuzbouj giyez cizgungh gihbwnj ciengxlaux baujyiemj gihginh daj 3% daezsang daengz 3.5%, gij cienz gihbwnj ciengxlaux boux daj giyez duiyouh onjbouh daezsang. Cienzmienh haiguh gij hong vehcienj mbangj swhbwnj guekmiz bae cungsaed sebauj gihginh. Gij cidu hawsingz lajmbanj gihminz yihliuz baujyiemj caeuq bingh hung baujyiemj engqgya caezcienz, gij hong yihliuz baujcang banggungz、 diuzcingj moegloeg yw yihbauj netsaed guh baenaj. Doenggvaq hongsieng baujyiemj vih 194 fanh cizgungh hongsieng caeuq vunz ndaw ranz de ciengx daezhawj le daiyi baujcang. Daengx bi gungh miz 461.2 fanh boux saetnieb lingx ndaej gij cienz saetnieb baujyiemj geizhanh mbouj doengz, bingzyaenz moix vunz moix ndwen 1393 maenz, suijbingz baujcang onjbouh daezsang. Onjbouh bae guh singzmbanj dungjcouz dihbauj cidu, laebcaez aen gihci ciuq cingzgvang diuzcingj gij biucinj swnghhoz baujcang ceiq daemq, cienzmienh saedhengz aen cidu gouqbang gungciengx boux daegbied gungzhoj. Doicaenh gaijcauh gij siujgih gaeuq ndaw hawsingz, haigoeng gaijcauh gij ranzdiengz hawsingz 316 fanh dauq, gyavaiq gungganq aen hawciengz co ranzyouq ndaw hawsingz hung rauh.
Sam dwg yiengh fugsaeh vunzlai caezcaemh ndaej bouj gizvauq ak hangh nyieg daez caetliengh doinyoengx haeujlaeg. Aen beijlaeh caizcwng gyauyuz ginghfei ceiok ciemq gij swnghcanj cungjciz ndaw guek laebdaeb mauhgvaq 4%, doiq dieg hojnanz caeuq giz nyieg gyauyuz mboujduenh gyalai douzhaeuj, gouj bi yivu gyauyuz bauj youq hag dabdaengz 94.8%, duenh gauhcungh gyauyuz lwghag haeujhag beijlwd dabdaengz 89.5%, gauhdwngj gyauyuz lwghag haeujhag beijlwd mauhgvaq 50%, gauhciz yenyau aen muzbyauh lai ciu 100 fanh vunz swnhleih guhbaenz, faen caengz faen loih sawq guh guekgya canjnieb sonhag yungzhab gensez. Gij hengzdoengh Cungguek cangqmaenh haidoengh saedhengz, hwnqguh aen yihliuz cungsim ndaw ranghdieg onjbouh haiguh, sawqguh gyonjcomz dajcawx caeuq sawjyungh gijyw guh ndaej ndei, gij yigen coicaenh cunghyihyoz cienzciep cauhmoq fazcanj haenx yaenqfat saedhengz. Gij cwngcwz dijhi doicaenh fugsaeh ciengxlaux hwngfat haenx engqgya caezcienz. Gij hong baujcang gienzik mehmbwk lwgnyez mboujduenh gya rengz guh, gveihfan ndalaeb caeuq guenjleix gij gihgou dakganq, coicaenh gij fugsaeh ciuqhoh lwgnomj 3 bi doxroengz haenx fatmaj. Gamguenj gijgwn、 gijyw doengh aen lingjyiz cungdenj neix mboujduenh gyaak. Yiengh fugsaeh vwnzva vunzlai caezcaemh bouxboux doxdoengz mboujduenh daezsang. Cingjdaej doinyoengx Cangzcwngz、 Dayinhoz、 Cangzcwngh Guekgya Vwnzva Gunghyenz gensez. Lai roengzrengz haeujcoengh hwnqguh aen cungsim cienzminz lienhndang doengh yiengh hanghmoeg neix, miz bouhloh doicaenh hwnqguh gij cangzgvanj Auyinvei Seizdoeng. Aen gveihva cungciengzgeiz guekgya gaenxmaenx wngqdoiq vunzgyaeuj bouxgeq bienq lai yaenqfat saedhengz. Byaibi vunzgyaeuj cungjsoq dabdaengz 14.0005 ik vunz, vunzgyaeuj gag demmaj beijlwd 3.34‰.
Daj gij cingzgvang 2019 nienz ginghci sevei fazcanj daeuj yawj, gij cujyau cijbyauh ginghci demmaj、 couhnieb、 huqgyaq、 gozci soucei daengj caeuq gij cijbyauh doengh aen lingjyiz cauhmoq doidoengh、 swhyenz mbaetyungh、 vanzging baujhoh、 minzswngh baujcang daengj guhbaenz haemq ndei. Gij cijbyauh miz hanhhaed ndawde, souh gangdiet、 gencaiz、 youjswz、 vagungh daengj hangznieb swnghcanj caeuq hangz fugsaeh baujciz demmaj haemq vaiq daengj lai cungj yinhsu yingjyangj, danhvei swnghcanj cungjciz ndaw guek nwngzyenz siuhauq gyangqdaemq cijbyauh saedsaeh doekdaemq 2.6%, daemq gvaq aen muzbyauh giva 3% baedauq, hoeng aen cijbyauh neix 2016—2019 nienz gyoebsuenq gyangqdaemq fukdoh gaenq guhbaenz aen muzbyauh yinvu “cibsam haj” gveihva 87.1%, hab cindu iugouz. Gij cijbyauh yawhgeiz ndawde, doengh aen cijbyauh gij cwnghgyahciz daih’ it canjnieb、 aen cungjngeg huqyungh ndawbiengz gailingz、 gij souhaeuj itbuen goenggungh yawhsuenq caeuq gij souhaeuj gihminz hawsingz moix vunz bingzyaenz ndaej ceiyungh haenx aen soq saedsaeh yinhhengz caeuq aen soq yawhgeiz miz itdingh cengca. Gij cwnghgyahciz daih’it canjnieb muzbyauh yawhgeiz dwg “demmaj 3.5% baedauq”, saedsaeh demmaj 3.1%, cujyau yienzaen dwg nohmou daengj mbangj di nungzcanjbinj canjliengh doekdaemq haujlai, nohmou canjliengh doekdaemq 21.3%. Aen cungjngeg huqyungh ndawbiengz gailingz muzbyauh yawhgeiz dwg “demmaj 9.0% baedauq”, saedsaeh demmaj 8.0%, cujyau yienzaen dwg giceh、 gyahden daengj conzdungj siufeiq demmaj suzdu bienq menh, gizyawz siufeiq diemj demmaj moq lij cingq gungganq. Gij souhaeuj itbuen goenggungh yawhsuenq muzbyauh yawhgeiz dwg “demmaj 5.0%”, saedsaeh demmaj 3.8%, cujyau yienzaen dwg vih haeujcoengh saeddaej ginghci fazcanj, gemj gvaeh gyangq feiq gveihmoz mauhgvaq yawhgeiz. Gij souhaeuj gihminz hawsingz moix vunz bingzyaenz ndaej ceiyungh demmaj vaiqmenh muzbyauh yawhgeiz dwg “caeuq ginghci demmaj daihdaej doengzbouh”, saedsaeh demmaj 5.0%, daemq gvaq aen suzdu swnghcanj cungjciz ndaw guek demmaj 6.1%, cujyau yienzaen dwg deng gihminz hawsingz ginghyingz cingh souhaeuj caeuq caizcanj cingh souhaeuj demmaj suzdu miz di bienq menh、 huqgyaq hwnjsang fukdoh sang gvaq bigonq daengj yinhsu yingjyangj.
Gak boux daibyauj:
Bineix doxdaeuj, binghraq bwtndat sawqmwh miz ok, doiq guek raeuz ginghci sevei fazcanj cauhbaenz cungdongj hungloet. Baez binghraq neix dwg aen saehgienh goenggungh veiswngh Cungguek moq laebbaenz doxdaeuj guek raeuz deng lah ceiq vaiq、 lahdawz gij dieg ceiq gvangq、 fuengzre gaemhanh nanzdoh ceiq daih ndeu. Mienhdoiq gij gaujniemh yiemzhaenq youz binghraq daiq daeuj haenx, Siz Ginbingz cungjsuhgi caenndang cijveih、 caenndang baijbouh, gig vaiq laebbaenz aen lingjdauj siujcuj cunghyangh wngqdoiq binghraq, caemhcaiq baij cunghyangh cijdaujcuj bae Huzbwz, cungfaen fazveih gij gihci cozyung Gozvuyen lienz fuengz lienz guenj, itcig dawz diuzmingh ancienz caeuq ndangcangq yinzminz ginzcung cuengq youq vih daih’it. Baengh aen Dangjcunghyangh aeu Siz Ginbingz dungzci guh cehsim akmaenh lingjdauj, gak dieg、 gak bouhmonz nyinhcaen gvancez gij gezcwz baijbouh Dangjcunghyangh、 Gozvuyen, daengx guek gwnz laj caez sim gap rengz、 doxhen doxbang, ciuq aen cungjiugouz “giendingh saenqsim、 caemh ruz gvaq dah、 gohyoz fuengzyw、 cinjdeng yungh geiq”, gig vaiq dwk le ciengz ciengq daengxcungq yinzminz caez bae laengzhoenx fuengzre gaemhanh binghraq.
Aeu cienzbouh goengrengz bae guh ndei gij hong fuengzre gaemhanh gouqyw. Yungh gij rengz daengx guek bae bangcoengh Huzbwz Swngj、 Vujhan Si dieg binghraq youqgaenj neix, cujciz 4 fanh lai boux canghyw bae bang, gig vaiq hwnqbaenz Hojsinzsanh、 Leizsinzsanh daengj yihyen caeuq fanghcangh yihyen guh gyonjcomz souyw, roengzrengz lai souyw caeuq yw’ndei、 gemjnoix lahdawz caeuq binghdai. Haiguh lienz fuengz lienz guenj caeuq caez fuengz caez guenj, gak sengj （gih、 si） lienzdaemh haidoengh veiswngh saehgienh hungnaek fwt fat guh itgaep yangjying, cujciz ganbu caem roengz segih guh ndei fuengzre gaemhanh, dazyinx gak loih cujciz ndawbiengz、 boux conhyez gunghcozcej ndawbiengz caeuq gij ligliengh gagnyienh fugsaeh ciuqfap miz bouhloh bae camgya fuengzre gaemhanh binghraq caeuq fugsaeh ndawbiengz. Maenhsaed guh ndei gij hong baujcang doxgaiq ywbingh caeuq doxgaiq gwndaenj noix mbouj ndaej haenx, riengjvaiq saedyienh le goujcau daengj gij doxgaiq ywbingh fuengzhoh、 sezbei ywbingh gouqyw、 congz ywbingh daj gig giepnoix daengz daihdaej gaeuq fuengzre gaemhanh binghraq aeuyungh; siengj caenh banhfap baujcang haeux youz caeuq noh bitgaeq gyaeq byaek daengj gijgwn gunghawj hawciengz caeuq gyaqcienz daihdaej onjdingh. Lai roengzrengz baengh gohgi gunggvan bae fuengzre gaemhanh binghraq, youq duenh seizgan dinj ndeu ndawde yenzgiu haifat gij yw niemhgienj riengjvaiq caemhcaiq gvangqlangh wngqyungh, genhciz cunghyih sihyih giethab, genhciz “seiq comzgyonj”， caenh ceiq daih goengrengz engq lai gouqdauq diuzmingh bouxbingh. Cimdoiq gij cingzgvang rog guek binghraq banhlah, gya rengz fuengzre gaemhanh gij fungyiemj daj rog guek cienz haeuj, gvansim gyaezhoh doengh boux gunghminz guek raeuz youq rogguek haenx, hai ok diuz roenruz roenmbwn laemzseiz miz bouhloh ciep dauq guek raeuz doengh boux youq rog guek hojnanz haenx, gaenxmaenx doicaenh fuengzre gaemhanh binghraq gozci doxgap, lai caeuq Seiqgyaiq Veiswngh Cujciz doxgap, aenq rengz bangcoengh doengh aen guekgya miz binghraq banhlah haenx.
Doengbuenz suenqveh doicaenh gij hong fuengzre gaemhanh binghraq caeuq ginghci sevei fazcanj. Faen dieg faen gaep miz bouhloh bae doidoengh dauq haihong dauq haihaw dauq hainieb. Youq guh ndei fuengzre gaemhanh binghraq le, gaenxmaenx bangcoh gaijgez gij vwndiz giyez ra vunzhong、 daehhuq、 ngaenzgoek caeuq yenzcaizliu、 lingzbugen gunghawj, caenhrengz baujcang diuz loh hawsingz lajmbanj、 gyaudoeng caemhyungh doengrat, lai yunghrengz bae fugsaeh gij giyez rauh iq iqet caeuq bouxseng’eiq gagguh guh wngqgip gej nanz, doidoengh diuz lienh canjnieb duenhgwnz duenhlaj、 giyez hung rauh iq dox boiqhab dauq haihong. Daengz 4 nyied daej, gij gunghyez giyez dabdaengz gveihmoz doxhwnj de dauq haihong beijlwd、 yenzgungh daengz hong beijlwd faenbied dabdaengz 99.4% caeuq 94.3%. Lai guh douzswh hanghmoeg daj gyae saemjbae fugsaeh, guh ndei boux guhhong、 diegdeih、 ngaenzgoek、 yungh nwngzyenz、 vanzging bingzguj daengj fuengmienh baujcang, gibseiz bangcoh gaijgez gij vwndiz hojnanz ndaw hanghmoeg hungnaek dauq haihong bungzdaengz haenx. Gibseiz doiok baenzroix cwngcwz doxsiu gej nanz haenx. Youq gwnz giekdaej bi’gvaq gaenq daezgonq fatroengz 2020 nienz deihfueng cwngfuj cienhangh caiqgienq ngegdoh 1.29 fanh ik maenz, caiq demgya daezgonq fatroengz hanhngeg 1 fanh ik maenz. Gya rengz bae guh gemj gvaeh gyangq feiq, faen duenh gemjmienx gij cwnghcizsui bouxnabsuiq noix, faen duenh gemjmienx gij cienzsebauj giyez、 doilaeng gyau ranzyouq gunghcizginh, gyangqdaemq gij cingzbonj giyez yungh dienh daengj, geiq daih’it gemj gvaeh gyangq feiq soqliengh mauhgvaq 7000 ik maenz. Saedhengz gij cosih 3 baez bujben gyangqdaemq cunjbeiginh、 dinghyiengq gyangqdaemq cunjbeiginh, youhcaiq demgya aen soqngeg caiq daigvanj caiq diepyienh 1.8 fanh ik maenz, caenh’itbouh dawzrem gij cosih doenggvaq yiengh ginhyungz ik doh haenx haeujcoengh gij giyez rauh iq iqet. Doiq giyez rauh iq daigvanj saedhengz yienzgeiz boiz bonj hawj leih. Okdaiz gij cwngcwz cosih coicaenh siufeiq gyadaih gveihmoz daezsang caetliengh gyavaiq cauxbaenz aen hawciengz hung’ak ndaw guek, ietraez gij cwngcwz nienzhanh hawj boujdiep cawx cungj giceh yungh nwngzyenz moq caeuq mienx sou cienzgvaeh cawx ci. Doengzseiz, gibseiz gejgangj hingzseiq caeuq cwngcwz, cizgiz hoizwngq ndawbiengz gvansim, onjdingh gij saenqsim hawciengz cawjdaej fatmaj. Ca ndei seizcin nungzyez swnghcanj. Baujcang cehfaen、 vafeiz、 nungzyoz、 nungzgih daengj swnghcanj gunghawj, seizcin dajndaem guh ndaej swnhleih, haeuxcaeux yawhgeiq ndaem daengz 7100 fanh moux， gomeg seizdoeng、 byaek seizdoeng maj ndaej ndei, roengzrengz gaijgez doengh gij gunnanz gunghawj gij swzliu ciengx doihduz doenghduz ndaw raemx caeuq mbangj nungzcanjbinj gai mbouj okbae daengj. Conz sim gyonj rengz guh ndei gij hong haenqrengz duetgungz. Gyavaiq doicaenh gij boiqdauq sezsih gizdieg senj dieg banggungz anceiq、 aen cehgenh banggungz、 lajmbanj gwn raemx ancienz、 aeu hong dingj gouqcaeq doengh yiengh hanghmoeg haenqrengz duetgungz neix haihong dauq haihong, yunghsim vat ok gij rengzndumj gangvih goeng’ik, coicaenh boux gungzhoj youq dangdieg youq henzgyawj couhnieb, sien cujciz gij lauzdungliz gungzhoj dauqma hawsingz dauq hwnjhong caeuq ok rog guhhong, doiq boux aenvih binghraq dauq gungz bienq gungz de gibseiz bangfuz. Guhmaenh gij hong bauj gihminz couhnieb caeuq dakdaej beksingq gwndaenj. Cukgaeuq fatok gij cozyung saetnieb baujyiemj gihginh bang giyez onjdingh gangvih, gyadaih aen soqliengh gveihmoz giyez guekmiz ciusou、 sozsw yenzgiuswngh ciuseng、 conhgoh swng bwnjgoh、 dayozswngh bae dangbing, doenggvaq “diemj doiq diemj” daehyinh doengh yiengh fuengsik neix dazyinx nungzminzgungh miz bouhloh ma dieghong dauq guhhong. Cujciz daengx guek dayoz、 cunghyoz、 siujyoz miz bouhloh guh gwnz vangj sonhag. Doiq doengh boux ginzcung hojnanz deng binghraq yingjyangj haenx saedhengz gouqbang bangfuz, gibseiz haidoengh aen gihci ndawbiengz gouqbang nem baujcang biucinj caeuq huqgyaq hwnjsang dox lienzdoengh, faen mboengq daezsang boujdiep biucinj、 gyadaih gouqbang fanveiz.
Ginggvaq daengx dangj daengx guek gwnz laj gig sinhoj roengzrengz, ciengz ciengq henhoh Vujhan、 ciengz ciengq henhoh Huzbwz aeundaej gij cwngzgoj miz gietdingh yiyi, ciengz ciengq fuengzre gaemhanh laengzlanz binghraq aeundaej canloz cwngzgoj hungnaek, doengbuenz suenqveh doicaenh gij hong fuengzre gaemhanh binghraq caeuq ginghci sevei fazcanj aeundaej cingzyauq ndei. Sizcen caiq baez cwngmingz, Cunghgoz Gungcanjdangj lingjdauj caeuq aen cidu sevei cujyi miz gij daegsaek Cungguek、 aen dijhi ceihleix guekgya guek raeuz miz rengzmingh giengzak caeuq gij ndei yienhda, ndaej hoenxhingz sojmiz gannanz yungyiemj, ndaej vih vunzloih vwnzmingz cinbu ok goengrengz engq hung.
Doengzseiz, raeuz hix singjsag rox daengz, caenhguenj guek raeuz gaenq mizyauq gaemhanh binghraq, hoeng rog guek binghraq fat sanq banhraih riengjvaiq, seiqgyaiq ginghci doekbaih youqgaenj, gij yinhsu mbouj doekdingh mbouj onjdingh de demlai yienhda, guek raeuz ginghci yinhhengz bungzdaengz diuhcan hungloet. Daj gozci daeuj yawj, binghraq doiq diuz lienh canjnieb diuz lienh gunghawj daengx seiqgyaiq cauxbaenz cungdongj haemq hung, gozci ginhyungz hawciengz saenqdoengh haenqrem, danhbenh cujyi、 mouyiz baujhu cujyi ngiengxhwnj, gozci ginghmou gveihcwz bungzdaengz diuhcan, gij cwngci fungyiemj aenvih diegyouq cauhbaenz de vanzlij haemq sang, doengh gij neix cungj yaek gyadaih gij fungyiemj baihrog yingjyangj guek raeuz fazcanj. Daj ndaw guek daeuj yawj, binghraq daj rog guek cienz haeuj hawj raeuz atlig gyanaek, ginghci fazcanj daegbied dwg diuz lienh canjnieb diuz lienh gunghawj hoizfuk bungzdaengz diuhcan moq. It dwg ndaw guek rog guek aeuyungh doekdaemq yinxhwnj ginghci sinzvanz deng laengzlanz. Gihminz cawxyungh gij doxgaiq mbouj dwg bietdingh aeu yungh haenx daengj aenvih binghraq cungdongj deng naenxhaed youqgaenj, giceh daengj sanghbinj hung cawxyungh daih fukdoh doekdaemq, yaek lai dajcawx cix deng hanhhaed. Aenvih giyez ginghyingz gunnanz gyadaih、 dinghdan gemjnoix, caiq gya deihfueng douzswh naengzlig deng hanhhaed, douzswh demmaj bungzdaengz gunnanz haemq daih. Deng rog guek aeuyungh lienzdaemh unqnyieg caeuq daengx seiqgyaiq diuz lienh gunghawj gatduenh yingjyangj, gij atlig onjdingh vaimou onjdingh vaiswh lai naek haujlai. Ngeih dwg hangznieb giyez yinhhengz gunnanz haemq lai. Gij leihyinh giyez doekdaemq gig daih, daegbied dwg hangz fugsaeh swnghhoz deng binghraq cungdongj ceiq haenq. Mbouj noix giyez rauh iq iqet bungzdaengz swhginh lienhciep gatduenh、 gvendou dingzcanj daengj cingzgvang, aiq miz mbangj giz dieg、 mbangj aen hangznieb giyez rauh iq iqet loemqbaih demlai. Sam dwg goenggungh veiswngh caeuq wngqgip dijhi gizvauq doedyienh. Aen dijhi guenjleix fuengzre gaemhanh baenzbingh mbouj caezcienz, gij naengzlig gamcaek yawhgingj binghlah moq caeuq gij naengzlig wngqdoiq mbouj gaeuq, gij giekdaej sezsih goenggungh veiswngh ndaw yienh cin cunh doxdoiq nyieg lai, aen dijhi guekgya bwhcwk doxgaiq youqgaenj lij mbouj caezcienz. Seiq dwg gohgi cauhmoq naengzlig mbouj ak vanzlij haemq doedok. Yenzgiu haifat douzhaeuj lainoix caeuq iugouz hwnqguh yiengh guekgya ak cauhmoq doxbeij lij aeu daezsang, gij cidu gazngaih caengzlaeg ikleih gohgi cauhmoq haenx lij caengz buqcawz, yiengh cingzgvang gij gisuz maenh’ak deng vunz gaemguenj haenx lij caengz ndaej daj goekgaen bae gaijbienq. Haj dwg cungdenj lingjyiz gaijgwz vanzlij aeu gya rengz. Aen gihci youz hawciengz gietdingh yausu gyagwz lij aeu caj laebcaez. Aeu laebdaeb youq giyez guekmiz swhbwnj guekmiz、 caizsui ginhyungz、 vanzging guh seng’eiq、 minzyingz ginghci、 gyahung ndaw guek aeuyungh、 hawsingz lajmbanj yungzhab doengh aen lingjyiz cungdenj gaijgwz neix gunghoenx nanzdaez. Roek dwg gij fungyiemj ndaw cungdenj lingjyiz miz di gyonjcomz. Gij fungyiemj daj baihrog cienz haeujdaeuj haenx swngsang, gij fungyiemj saenqyungh byonjbak aiq gyadaih, mbangj di ginhyungz gihgou rauh iq fungyiemj haemq sang. Deng binghraq yingjyangj, gak gaep caizcwng wngqgip ceiok demlai、 cienzgvaeh souhaeuj gemjnoix, mbangj di deihfueng gihcwngz caizcwng yinhcienj gunnanz. Caet dwg sevei minzswngh lingjyiz bungzdaengz diuhcan haemq hung. Onj gangvih onj couhnieb lai hojnanz, gauhyau bizyezswngh daengj gyoengq vunz cungdenj couhnieb atlig mingzyienj hwnjsang, mbangj deihfueng saetnieb caiqcouhnieb lai hojnanz. Mbangj bouxguhhong gunghswh souhaeuj gyangqdaemq, gihminz demsou lai hojnanz. Gij yinvu hawj gyoengq vunz lij gungzhoj de duetgungz gannanz naekcaem, dieg daegbied gungzhoj yaek guhbaenz “sam aen baujcang” bungzdaengz nanzdaez moq. Ceihleix swnghdai vanzging lij miz gizvauq caeuq giznyieg. Aen dijhi goenggungh fugsaeh ciengxlaux、 dakganq、 gyauyuz daengj caeuq vunzlai maqmuengh doxbeij lij miz cengca yienhda. Doengzseiz, raeuz youq ndaw guhhong lij miz mbangj di guh ndaej mbouj ndei, beijlumj, fuengzre gaemhanh binghraq cwngcwz doxdaengh boiqhab lij mbouj gaeuq, miz di cwngcwz saepsoiq、 gak fueng gak guh, miz di cwngcwz cosih doeksaed mbouj gaeuq daengzvih, miz mbangj giz gij soujduenh ceihleix caeuq naengzlig ceihleix lij aeu deq bae gaijndei caeuq gyagiengz, mwh guh gunghcoz lij miz doengh yiengh vwndiz hingzsiz cujyi、 gvanhliuz cujyi.
Youq mwh yawjdaengz hojnanz caeuq hojcawq, doengzseiz raeuz engq aeu yawjdaengz, binghraq cungdongj caeuq yingjyangj cungj dwg saek duenh seizgan、 daihdaej gaemhaed ndaej, mbouj gaijbienq ndaej aen daihbuenz guek raeuz fazcanj rengzndumj daih、 rengznyangq maenh、 ginghci ciengzgeiz yiengq ndei. Yungyiemj caeuq seizgei ndei caez miz caemh youq, siucawz yungyiemj bae couh dwg seizgei ndei. Miz aen Dangjcunghyangh aeu Siz Ginbingz dungzci guh cehsim akmaenh lingjdauj, miz gij ndei yienhda aen cidu sevei cujyi miz gij daeksaek Cungguek, miz gij naengzlig heuhhwnj giengzdaih caeuq gij saedlig gyoebhab rem’ak, miz daengx dangj daengx ginh daengx guek gak cuz yinzminz doxgiet buekguh, raeuz itdingh ndaej dwkhingz ciengz binghraq neix, hix itdingh ndaej baujmaenh aen fazcanj seiqdaeuz ndei ginghci sevei guek raeuz, saedbauj gietsat guhbaenz gij muzbyauh yinvu haenqrengz duetgungz, cienzmienh hwnqbaenz aen biengz siujgangh.
Ngeih、 Gij cungjdaej iugouz、 cujyau muzbyauh caeuq cwngcwz byaijyiengq ginghci sevei fazcanj 2020 nienz
2020 nienz dwg bi cienzmienh hwnqbaenz aen biengz siujgangh caeuq guhsat “cibsam haj” gveihva, aeu guhbaenz gij muzbyauh buekguh aen bak bi daih’it, vih “cibseiq haj” fazcanj caeuq guhbaenz gij muzbyauh buekguh aen bak bi daihngeih roengz giek maenhsaed, guh ndei gij hong ginghci sevei fazcanj cibfaen youqgaenj.
（It） Cungjdaej iugouz.
Aeu youq aen Dangjcunghyangh aeu Siz Ginbingz dungzci guh cehsim akmaenh lingjdauj baihlaj, aeu Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz daeuj dazyinx, cienzmienh gvancez gij cingsaenz Cibgouj Daih caeuq Cibgouj Gaiq Ngeih Cung、 Sam Cung、 Seiq Cung Cienzhoih aen dangj, genhgez gvancez gij lijlun giekbonj、 lohsienq giekbonj、 fanghloz giekbonj aen dangj, demgiengz “seiq rox”、 giendingh “seiq aen gagsaenq”、 guhdaengz “song aen henhoh”, dawzrem aen muzbyauh yinvu cienzmienh hwnqbaenz aen biengz siujgangh, doengbuenz suenqveh doicaenh gij hong fuengzre gaemhanh binghraq caeuq ginghci sevei fazcanj, youq guh ndei cingqciengz fuengzre gaemhanh binghraq, genhciz aen gunghcoz goekdiuh youq ndaw onjdingh gouz baenaj, genhciz aen leixniemh fazcanj moq, genhciz aeu gij gaijgwz gezgou mbiengj gunghawj guh sienqmeh, genhciz aeu gaijgwz hailangh guh rengznyoengx doidoengh yiengh fazcanj caetliengh sang, dinghmaenh dwk ndei sam ciengz ciengq haenq hung, gyarengz bae guh gij hong “roek onj”, bauj gihminz couhnieb、 bauj beksingq gwndaenj、 bauj hawciengz cawjdaej、bauj haeuxgwn nwngzyenz ancienz、 bauj diuz lienh canjnieb diuz lienh gunghawj onjdingh、 bauj gihcwngz yinhcienj, giendingh saedhengz aen canloz gya’gvangq ndaw guek aeuyungh, henhoh aen daihbuenz ginghci fazcanj caeuq ndawbiengz onjdingh, saedbauj guhbaenz gij muzbyauh yinvu buekrengz dwkhingz gungnanz duetgungz, cienzmienh hwnqbaenz aen biengz siujgangh.
Youq mwh guh hong gidij, bietdingh aeu lai ngeixnaemj daejsienq, youq wngqdoiq gak cungj geizseiq fukcab, guh ndei swhsiengj caepcawq caeuq gunghcoz caepcawq, haeujlaeg nyinhrox “roek onj” caeuq “roek bauj” dwg doxdoeng doxlienz, “roek bauj” dwg bineix giz comzrengz guh hong “roek onj”, souj maenh gij daejsienq “bauj”, gaem onj aen daihbuenz giekbonj ginghci, caiq bae bauj coicaenh onjdingh、 youq ndaw onjdingh gouz baenaj, couh ndaej vih cienzmienh hwnqbaenz aen biengz siujgangh cuk net giekdaej. Aeu hopheux “roek bauj” gyarengz saedhengz hungzgvanh cwngcwz, doeksaed ndei gij cwngcwz wngqgip gejnanz gaenq okdaiz, gaengawq hingzseiq bienqvaq gibseiz doiok cwngcwz doxsiu moq, daizdawz diuz daejsienq gwndaenj yinzminz. Doengzseiz, bietdingh aeu liuqcinj cujyau muzbyauh, yawjnaek cwzloz fuengfap, guhdaengz wngqdoiq fungyiemj baihrog caeuq siucawz hojnanz baihndaw dox giethab、 gaijgez vwndiz dangqnaj caeuq vaqgej mauzdun ciengzgeiz dox giethab、 hawciengz mizyauq caeuq cwngfuj guh ndei dox giethab、 caenh rengz bae guh caeuq aenq rengz bae guh dox giethab, maenhrox dawz yungyiemj bienqbaenz seizgei ndei, saedbauj gij gezcwz baijbouh Dangjcunghyangh、 Gozvuyen doek daengz gizsaed、 raen miz saedyauq.
（Ngeih） Gij cujyau muzbyauh yawhgeiz.
Ciuq gij cungjdaej iugouz caeuq roennaemj guhhong gwnzneix gangj, gaengawq aen yenzcwz aeueiq ginghci gvilwd caeuq ciuq saedsaeh guh, gyoebhab ngeixnaemj rog guek caeuq ndaw guek、 dangqnaj caeuq gyaeraez、 aeuyungh caeuq guh ndaej, daezok gij cujyau muzbyauh yawhgeiz ginghci sevei fazcanj 2020 nienz:
—— Onjdingh couhnieb bauj beksingq gwndaenj baiz youq gonq, baenzbaenz aeu dwkhingz ciengz ciengq haenqrengz duetgungz, roengzrengz guhbaenz gij muzbyauh yinvu cienzmienh hwnqbaenz aen biengz siujgangh. Lai ngeixnaemj daengz: Gij binghraq daengx seiqgyaiq caeuq aen hingzseiq ginghmou gig mbouj doekdingh， hawj guek raeuz fazcanj bungzdaengz haujlai yinhsu yingjyangj nanz ndaej liuh daengz, mbouj iugouz dingh roengz aen soq ginghci yaek demmaj geijlai, ikleih dazyinx gak fuengmienh laebdaeb nyinhcaen gvancez doeksaed gij gezcwz baijbouh Dangjcunghyangh、 Gozvuyen, cimdoiq gij cujyau mauzdun、 gunnanz、 vwndiz dangqnaj bungzdaengz, dawz goengrengz guhhong cuengq youq doeksaed aen yinvu “roek bauj” caeuq doidoengh ginghci caetliengh sang fazcanj fuengmienh. Doengzseiz, bineix mbouj daez aen soq ginghci demmaj geijlai, mbouj dangq naeuz mbouj aeu ginghci demmaj, bauj gihminz couhnieb、 bauj beksingq gwndaenj ceiq daemq, guhbaenz aen muzbyauh yinvu haenqrengz duetgungz gaenq dingh、 guhbaenz cienzmienh hwnqbaenz aen biengz siujgangh, caeuq fuengzre hoizgej gak cungj fungyiemj, cungj aeu miz ginghci demmaj daeuj guh daemxcengj.
—— Hawsingz caiq demgya couhnieb 900 fanh vunz doxhwnj, daengx guek hawsingz diucaz saetnieb beijlwd caeuq hawsingz daenghgeiq saetnieb beijlwd faenbied dwg 6% baedauq caeuq 5.5% baedauq. Lai ngeixnaemj daengz: Gvendaengz aen cungjliengh hawsingz caiq demgya couhnieb, deng binghraq cungdongj caeuq ginghci gyodroengz atnaenx gyadaih yingjyangj, gij atlig hawsingz caiq demgya couhnieb bienq haenq yienhda, hoeng naemj daengz aen soq gyoengq vunz ngamq daeng guhhong yaek youq hawsingz ra hong guh, baujciz demgya couhnieb maqhuz lai dwg noix mbouj ndaej、 hix dwg bietdingh aeu miz, hix yienh’ok cungj cwngcwz dazyinx couhnieb guh gonq. Gvendaengz saetnieb beijlwd, caenhguenj binghraq yingjyangj couhnieb lij yaek laebdaeb duenh seizgan ndeu dem, hoeng raeuz miz sim miz rengz fuengzre vaqgej gij fungyiemj saetnieb bienq lai, guh ndei gij hong onjdingh couhnieb.
—— Gij gyagwz gihminz sawjngaenz swnghwnj lainoix dwg 3.5% baedauq. Lai ngeixnaemj daengz: 2019 nienz gij gyagwz gihminz sawjngaenz swnghwnj ndiengqrieng yingjyangj haemq daih, deng binghraq yingjyangj, 2020 nienz lij miz mbangj cungj yinhsu moq coi hwnjgyaq, gyaqcienz cungjdaej hwnj sang lij haemq youqgaenj; doengzseiz, aen muzbyauh yawhgeiz 3.5% baedauq hix giemgoq le gij aeuyungh onjdingh hawciengz yawhgeiz.
—— Gihminz souhaeuj demmaj caeuq ginghci demmaj daihdaej doengzbouh. Lai ngeixnaemj daengz: Caeuq gij muzbyauh iugouz cienzmienh hwnqbaenz aen biengz siujgangh dox hamzciep, engq ndei bae muenxcuk yinzminz gij siengjmuengh gwndaenj engq ndei cug ngoenz demmaj haenx, engq ndei daejyienh cungj fazcanj swhsiengj aeu yinzminz guh cungsim. Doengzseiz, gaenriengz aen canloz saenqhwng lajmbanj ndaej hengzguh haeujlaeg、 gij cwngcwz cosih coicaenh gihminz demsou cugbouh doek daengz dieg, 2020 nienz saedyienh aen muzbyauh yawhgeiz gihminz souhaeuj demmaj dwg daemxcengj ndaej hwnj.
—— Coihawj cingouj cuzgouj onjdingh caemhcaiq daezsang caetliengh, gozci soucei daihdaej doxdaengh. Lai ngeixnaemj daengz: 2020 nienz vaimou baujciz demmaj haemq hojnanz, gawq aeu roengzrengz coicaenh vaimou onjdingh fatmaj、 onjdingh gij yawhgeiz hawciengz caeuq gij saenqsim giyez, hix aeu gyavaiq gungganq gij ak moq vaimou gingcwngh, doidoengh vaimou caetliengh sang bae fazcanj.
—— Danhvei swnghcanj cungjciz ndaw guek siuhauq nwngzyenz caeuq doxgaiq uqlah youqgaenj baizcuengq soqliengh laebdaeb doekdaemq, roengzrengz guhbaenz gij muzbyauh yinvu “cibsam haj” gveihva. Lai ngeixnaemj daengz: Yienznaeuz daengz 2019 nienzdaej gij muzbyauh yinvu danhvei swnghcanj cungjciz ndaw guek siuhauq nwngzyenz doekdaemq 15% ndaw “cibsam haj” gveihva doekdingh haenx gaenq guhbaenz 87.1%, hoeng bineix yinvu lij naekcaem raixcaix, daegbied dwg binghraq yingjyangj ginghci demmaj aiq hung gvaq yungh nwngzyenz cungjliengh demmaj, guhbaenz gij muzbyauh yinvu gveihva aeu ganhoj roengzrengz bae guh cij ndaej.
（Sam） Gij byaijyiengq cwngcwz youqgaenj.
Vih guhbaenz gij muzbyauh gwnzneix gangj, yaek aeu cungfaen gujsuenq binghraq cungdongj yingjyangj seiqgyaiq geijlai, guhdaengz dawzcinj fuengfap wngqdoiq le, gyarengz diuzcingj caeuq saedhengz hungzgvanh cwngcwz, coisawj hungzgvanh cwngcwz boiqhab ndei bae, comzrengz onjdingh ginghci bauj beksingq gwndaenj, fuengzre geizdinj cungdongj yienjbienq baenz yiengh byaijyiengq bae.
—— Gij caizcwng cwngcwz coi ndei aeu engqgya habdangq habyungh. 2020 nienz aen beijlwd caizcwng yiemqsoq dajsuenq ciuq 3.6% doxhwnj anbaiz, caizcwng yiemqsoq gveihmoz beij bi’gvaq demlai 1 fanh ik maenz; cunghyangh caizcwng fathengz 1 fanh ik maenz daegbied gozcai fuengzyw binghraq, mbouj suenq haeuj caizcwng yiemqsoq bae. Gij cienzngaenz song hangh cosih lai demgya neix cienzbouh hawj deihfueng, cujyau yungh youq bauj gihminz couhnieb、 bauj beksingq gwndaenj、 bauj hawciengz cawjdaej nem haeujcoengh gemj gvaeh gyangq feiq、 gemj cienzco gyangq leihsik、gyalai sawjngaenz caeuq douzswh daengj. Gyarengz gaijndei gij gezgou caizcwng ceiok, dawzmaenh atsuk gij ceiok itbuen, yiemzgimq hwnq laeuz dangz gvanj soq moq, yiemzgimq saj baizciengz saisaengq, doengzseiz baujciz gij ceiok beksingq gwndaenj mizgven banggungz、 yivu gyauyuz、 gihbwnj ciengxlaux、 gihbwnj ywbingh、 singzmbanj baujcang ceiq daemq doengh yiengh neix dan gya mbouj gemj. Cingjdaej suenqveh yungh ndei gij cienzngaenz binaengz cunghyangh caizcwng gietcienj, yungh bae haeujcoengh guhbaenz aen yinvu cienzmienh hwnqbaenz aen biengz siujgangh、 siucawz binghraq yingjyangj ginghci、 gij cungdenj hanghmoeg “cibseiq haj” gveihva daengj. Doiq doengh giz deihfueng caizcwng deng binghraq yingjyangj haemq daih de, lai gya cienjnod ceihawj, bauj gij gwndaenj giekbonj、 bauj cienzhong、 bauj yinhcienj.
—— Gij hobi cwngcwz onjmaenh aeu engqgya lingzvued habdoh. Dazyinx gvangjyi hobi gunghawj soqliengh（M2） caeuq aen soq gaemmiz ndawbiengz yungzswh lainoix de demmaj vaiqmenh mingzyienj sang gvaq bi’gvaq. Gyoebhab yinhyungh yiengh soujduenh goenghai gij guhfap hawciengz、 gyangqdaemq leihsik、 gyangqdaemq cienzbwh、 caiq daigvanj、 caiq diepyienh daengj, itcig hawj cienzngaenz riuzdoengh hableix cungcuk, dazyinx gij liliz daigvanj laebdaeb roengzdaemq, daiqdoengh giyez gij cingzbonj gyoebhab yungzswh de doekdaemq yienhda. Gyaraez aen cwngcwz hawj giyez rauh iq iqet doilaeng boiz bonj hawj leih, doiq yiengh daigvanj cienzsoq noix ik doh haenx roengzrengz guhdaengz wngdang gyaraez couh gyaraez, doiq mbangj giyez hung rauh haemq hojnanz haenx doxyaeng doilaeng. Cauhmoq gij hobi cwngcwz gunghgi cigsoh cimdoiq saeddaej ginghci, hawj guh wngqgip yungzswh. Dazyinx ginhyungz gihgou lai cuengq saenqyungh daigvanj hawj giyez rauh iq iqet, gikcoi fatcuengq cungj saenqyungh daigvanj cienzsoq noix ik doh haenx. Baujciz yinzminzbi veiliz youq gwnz suijbingz hableix bingzyaenx daihdaej onjdingh, baujciz aen soqliengh rombwh vaivei hableix habdoh. Guh ndei gij hong onjdingh ginhyungz caeuq cawqceq fungyiemj, souj maenh diuz daejsienq mbouj fatseng cungj fungyiemj nangq daengz hidungj.
—— Aen cwngcwz couhnieb baiz youq gonq aeu cienzmienh gyagiengz. Dawz bauj gihminz couhnieb baij youq giz diegvih doedyienh, gaengawq couhnieb hingzseiq bienqvaq habdoh diuzcingj cwngcwz, onjdingh couhnieb cungjliengh, gaijndei gij gezgou couhnieb, daezswng gij caetliengh couhnieb. Gyarengz bae bang giyez onjdingh gangvih, yawj dieg yawj giyez yawj vunz bae guh faenloih bangfuz, roengzrengz fuengzre vaqgej gij fungyiemj baenz buek saetnieb. Engq ndei fatok gij cozyung vunzlai cauhnieb、 vunzlai cauhmoq daemxcengj bauj hawj gihminz couhnieb, damqra mizgven cwngcwz gikcoi gauhyau bizyezswngh cauhmoq cauhnieb. Dazyinx lingzvued couhnieb、 yiengh moq couhnieb cangqheiq hwngfat. Gyagiengz bangfuz gauhyau bizyezswngh、 nungzminzgungh、 bouxbing doiq ok bingdoih daengj gyoengq vunz cungdenj neix, saedhengz gij cosih faen mboengq hawj mbangj cizyez swhgwz “sien hwnjgang、 caiq gauj cingq”, yungh ndei gij cienzngaenz ndaw bouh cienmonz yungh bae daezswng bonjsaeh guhhong, lai yunghrengz bangcoengh boux hojnanz couhnieb daegbied dwg boux lauzdungliz gungzhoj de couhnieb, saedbauj doengh aen gyadingz mbouj miz saek boux guhhong ra cienz de cungj ra ndaej hong guh.
—— Lai yunghrengz bae cingjdaej hezdiuz hungzgvanh cwngcwz. Lai guh yawhsien yenzgiu bwhcwk cwngcwz, coihawj gij cwngcwz caizcwng、 hobi、 couhnieb caeuq gij cwngcwz sawjngaenz、 douzswh、 canjnieb、 ranghdieg daengj doxgap ok rengz、 cauxbaenz rengzgyoeb. Giendingh saedhengz aen canloz gyadaih gij aeuyungh ndaw guek, lailai vatok gij rengzndumj aen hawciengz hunggaiq, fatok gij cozyung guhgiek cawxyungh caeuq gij cozyung baenzndiengq douzswh, dazyinx cienzngaenz douzhaeuj doengh giz gunghawj aeuyungh doengzcaez souh’ik、 miz gij yauqwngq baenzdoeb demlai haenx bae, doidoengh gij aeuyungh ndaw guek onjbouh gyadaih. Canjnieb cwngcwz aeu hopheux doidoengh hangz ceiqcauh caetliengh sang bae fazcanj, genhciz cwngfuj dazyinx caeuq hawciengz gihci dox giethab, genhciz doglaeb gag guhcawj caeuq hailangh gapguh dox coicaenh, roengzrengz coi baenz gij giekdaej canjnieb bienq gaepsang、 diuz lienh canjnieb hab seizhwng bae. Hawj gij cwngcwz gingcwngh gyaak yiengh diegvih guhgiek, dajcauh aen cidu vanzging goengbingz gingcwngh, caiq lai gikfat gij rengzhoengh hawciengz. Gij cwngcwz ranghdieg aeu lailai fatok gij ak gak dieg, aeu hanghmoeg hungnaek、 cwngcwz hungnaek guh yienrag doidoengh gij canloz ranghdieg hungnaek doekdeih, gyavaiq cauxbaenz goekrengz moq ndaej daiqdoengh daengx guek caetliengh sang bae fazcanj.
Sam、 Gij cujyau yinvu gozminz ginghci caeuq sevei fazcanj giva 2020 nienz
2020 nienz, aeu ciuq gij gezcwz baijbouh Dangjcunghyangh、 Gozvuyen, cingjdaej suenqveh doicaenh gij hong fuengzre gaemhanh binghraq caeuq ginghci sevei fazcanj, comzrengz guh ndei gouj fuengmienh hongsaeh.
（It） Laebdaeb gyamaenh caeuq haigvangq gij cingzyauq mboengq fuengzre gaemhanh binghraq neix, baenzbaenz aeu guh ndei cingqciengz fuengzre gaemhanh binghraq. Ciuq cienzmienh doeksaed gij cwzloz “baihrog fuengz cienz haeuj、 baihndaw fuengz dauq lah” bae guh cungjdaej fuengzre gaemhanh, gibseiz yungh gij banhfap miz cimdoiq caeuq miz saedyauq bae fuengzre gaemhanh, laebdaeb ca rem ca saed ca saeq gak hangh hong fuengzre gaemhanh binghraq.
It dwg giengiet bae gyamaenh gij cwngzgoj fuengzre gaemhanh binghraq ndaw guek. Laebcaez aen gihci ciengzseiz fuengzre gaemhanh ndaej gibseiz fatyienh、 cawqceq riengjvaiq、 guenjhaed cinjdeng、 gouqyw mizyauq haenx, laebndei caemhcaiq gibseiz haidoengh aen fueng’anq yawhbwh mizgven fuengzre gaemhanh, gohyoz fuengzre， saek caez conghroh. Dawz aen giekdaej segih fuengzre gaemhanh cukmaenh caezcup, gyaak gij naengzlig yungh sinsizva、 cinwngzva guh fuengzre gaemhanh. Laebdaeb haenqrengz guh ndei gij hong gouqyw bouxlumjdengraq caeuq bouxdengraq, laebdaeb guh ndei gij hong nai bouxbingh yw ndei、gyoengq vunz deng gekliz caeuq gyoengq canghyw youq itsienq dingjhoenx binghraq haenx. Gyavaiq doicaenh yenzgiu haifat yizmyauz.
Ngeih dwg gaemndaet caeuq laebndei gij guhfap fuengzre daj rog guek cienz binghraq haeujdaeuj. Laebdaeb lai gvansim gyaezhoh gij vunz guek raeuz youq rog guek haenx. Haenqrengz henmaenh henndei hawsingz baksok, hawj yihliuz swhyenz caeuq goengrengz gouqyw baijbouh bienq ndei, haeujcoengh dieg henzguek hwnqguh gaiq sezsih veiswngh vunzlai yungh, haenqrengz gensez gij naengzlig genjniemh gamcaek binghraq, riengjvaiq cinjdeng faennyinh caeuq guenjhaed goek fungyiemj giz fungyiemj. Roengzrengz bauj hawj gij vunz gyonjcomz gekliz ndaej ancienz, guh ndei ndangvunz gamcaek caeuq lai rox gvansim aeueiq vunz.
Sam dwg haeujlaeg doicaenh guek caeuq guek doxgap fuengzre gaemhanh binghraq. Caeuq Seiqgyaiq Veiswngh Cujciz lai gyaulouz caeuq doxgap, damqra laebhwnj gij guhfap ranghdieg goenggungh veiswngh dox lienzhaeh gouqgip, laebdaeb caenhrengz bae bangcoengh mizgven guekgya caeuq digih, doicaenh hwnqguh diuz roen seicouz ndangcangq, yungh lai cungj fuengsik bae caeuq guek wnq doxgap okrengz fuengzre binghraq. Guenj yiemz gij caetliengh yiengh doxgaiq fuengz binghraq gai ok rog guek. Roengzrengz caeuq lai guek doxgap guh gohyenz gunggvan, ceng’aeu youq yenzgiu haifat gij yw ndeivaiq caeuq yenzgiu cauhguh yizmyauz doengh fuengmienh neix ndaej miz cungbyoengq.
（Ngeih） Laemxsim dwkhingz sam ciengz ciengq haenq hung, saedbauj ciuq seiz guhbaenz gak hangh muzbyauh yinvu. Saedbauj aen yinvu haenqrengz duetgungz ndaej ciuq seiz guhbaenz caezcup, saedbauj guhbaenz aen muzbyauh mboengq dwkhoenx ciengz ciengq haenqrengz fuengzceih uqlah, saedbauj mbouj miz hidungjsing ginhyungz fungyiemj.
It dwg laebsim dwkhingz ciengz ciengq haenqrengz duetgungz. Hawj aen gihci guhhong cunghyangh gyonjcomz suenqveh、 sengj rap cungjdaej cwzyin、 si yienh ca saedhengz ndaej doeksaed ndei, laebdaeb comzrengz haeuj “sam gih sam couh” daengj dieg gig gungzhoj bae, doiq aen yienh caeuq aen mbanj gungzhoj caengz duet mauhgungzhoj de venjbaiz coi banh, baujmaenh ciuq aen biucinj seizneix gyoengq vunz gungzhoj lajmbanj ndaej duetgungz caez、aen yienh gungzhoj ndaej duetmauh caez. Lai roengzrengz hawj vunz ndaej hong banggungz, sien bang bouxhong gungzhoj dauq gangvih guhhong gonq. Hawj duetgungz gunggan hanghmoeg lai vaiq doenghgoeng caeuq dauq haihong, gikcoi giyez lai yungh gij vunz dieg gungzhoj daegbied dwg gij vunz ndaw ranz gungzhoj laeb dangjan laeb gaj de, banghaeuj aen giyez lingxdaeuz banggungz、 aen cehgenh banggungz sou vunz dangdieg guhhong. Lai bae guh dajcawx banggungz, doxciep ndei swnghcanj caeuq siugai, hawj dieg gungzhoj gij doxgaiq reihnaz ok aenvih binghraq hoj gai de ndaej gai bae. Lai roengzrengz guh canjnieb banggungz, yungh ndei gij cienzngaenz bangfuz canjnieb caeuq gij cwngcwz saenqyungh daigvanj soqnoix banggungz, cinjhawj gak dieg youq bineix yawj cingzgvang diuzcingj gaijndei gij cwngcwz cienzngaenz caizcwng cienhangh banggungz, lai roengzrengz dajciengj bangbouj aen hanghmoeg canjnieb banggungz. Lai vaiq guh aen gunghcwngz “satbyai” haenqrengz duetgungz, hawj senjdieg banggungz、 lajmbanj gwn raemx ancienz ndaej hwnqguh caeuq dauq haihong, baujmaenh byonghbigonq daihgaiq guh liux sojmiz hong satbyai, lai sijsaeq hengzguh cieplaeng bang senjdieg duetgungz, youq giz dieg anbaiz vunz senjdieg youq lai haenx, boujcaez gizvauq boiqdauq gyauyuz、 yihliuz sezsih daengj. Gyaak hwnqguh gij giekdaej sezsih yiengh fugsaeh vunzlai caezcaemh dieg gungzhoj. Haeujlaeg doi hong gyauyuz haenqrengz banggungz baenaj， gyamaenh gyalaeg gij cwngzgoj gaiq hong gaemhanh buenqbangh dingz hag. Laebdaeb doi hong lajmbanj gaijcauh ranzvaih baenaj, guhbaenz aen muzbyauh yinvu ranz gungzhoj bauj miz ranzyouq onjmaenh. Hawj aeu hong dingj gouqcaeq lai miz giz guh、 lai miz vunz ndaejik. Bangfuz gyoengq vunz aenvih binghraq cix deng gungz caeuq dauq deng gungz, bauj gyoengqde ndaej miz gwndaenj. Doiq gij vunz daegbied gungzhoj guh mbouj ndaej hong de aeu gyaak sevei baujcang, guh daengz hab bauj couh bauj caez. Gyalaeg guh dinghdiemj banggungz. Banghaeuj gwzming laujgih haenqrengz duetgungz caeuq saenqhwng fazcanj. Laebdaeb hengz gij cwngcwz cujyau bangcoh gij yienh ngamq duetgungz. Yenzgiu laebhwnj aen gihci ciengzgeiz mizyungh gaijgez siengdoiq gungzhoj.
Ngeih dwg laebdaeb lai roengzrengz bae fuengzceih uqlah. Dingjmaenh fuengyiengq mbouj bienq、 goengrengz mbouj noix, ca ndei fuengzre gaemhanh gyaeujgoek, doi gij caetliengh swnghdai vanzging laebdaeb bienq ndei, gyavaiq cauhlaeb aen dijhi ceihleix yienhdaih vanzging. Gyamaenh gij soundaej ciengz ciengq hen mbwn gvengq、 raemx saw、 namh seuq. Miz bouhloh bae doi gaiq hong hwnqguh aen gihci ciengzgeiz mizyungh dieg baihbaek seizdoeng aeu raeuj cinghseuq, gyahung gij gveihmoz gaijcauh hangz gangdiet hawj de baizcuengq uqlah gig noix, lai roengzrengz ceihleix gij uqlah cihuq yungh caizyouz, hwnqguh diuz sienq dietloh cienyungh, laebdaeb doi daehhuq “goengloh cienj dietloh”guh doxbae. Gij beijlwd ngoenzsoq hoengheiq caetliengh ndei ndaw hawsingz digih gaep caeuq doxhwnj saedbauj guhbaenz aen muzbyauh “cibsam haj” gveihva. Caiq lai yunghrengz cawqleix raemxuq hawsingz、 ceihleix gij raemx ndaem raemx haeu hawsingz、 gyoebhab ceihleix Bozhaij、 ceihleix gij uqlah nungzyez lajmbanj、 baujhoh dieg goekraemx, haidoengh guh buek gunghcwngz hungloet ndeu bae baujhoh swnghdai vanzging Dahcangzgyangh、 Dahvangzhoz. Netsaed bae fuengzceih namh uqlah, dawz gij hong ancienz bae yungh gaiq reihnaz deng uqlah caeuq gaiq dieg deng uqlah doi baenaj. Bienguh aen gveihva cienhangh hwnqguh gij gunghcwngz hungnaek baujhoh caeuq coih ndei daengx guek swnghdai hidungj youqgaenj, laebndei aen cidu bouxdaeuz guenj dah bouxdaeuz guenj huz, gyavaiq doinyoengx doeksaed aen cidu bouxdaeuz guenj ndoeng， laebdaeb miz bouhloh bae ceihleix bya raemx ndoeng naz huz nywj, dawz gaiq hong gyoebhab ceihleix gij vwndiz cou raemx lajnamh gvaqbouh doi baenaj. Fanh maenz swnghcanj cungjciz ndaw guek yungh raemx soqliengh doekdaemq 1.2％. Gyaak gamguenj baujhoh swnghdai, doidoengh laebcaez aen dijhi biucinj caeuq gij cwngcwz boiqdauq gamguenj diuz sienqhoengz baujhoh swnghdai haenx. Laebcaez gij gihci boizbouj swnghdai, dajgauj gij diuzlaeh boizbouj baujhoh swnghdai, doi gij hong sawqdiemj cunghab boizbouj swnghdai baenaj. Haeujlaeg hwnqguh diegsawqniemh guekgya swnghdai vwnzmingz. Gaenxmaenx wngqdoiq daengx seiqgyaiq dienheiq bienqvaq, lai vaiq hwnqguh aen hawciengz danq daengx guek. Fazcanj canjnieb saekheu, fatbouh aen moegloeg doigvangq gisuz saekheu, banghaeuj fueng daihsam ceihleix yenzgih vanzging uqlah. Lai vaiq boujcaez gizvauq hawsingz vanzging giekdaej sezsih, cawqceq ndei raemxuq nyapnyaj caeuq soucomz cawqleix ndei huqfeiq ywbingh、 huqfeiq yungyiemj. Cienzmienh doi gaiq hong faen labsab baenaj, yenzgiu baenzlawz guenjleix gij uqlah baucang vaiqsoengq caeuq gij sanghbinj baucang gvaqbouh, daezsang aen beijlwd cawqleix gij nyapnyaj gwndaenj ndaw hawsingz bienq mbouj miz haih bae.
Sam dwg souj maenh diuz daejsienq mbouj fatseng hidungjsing fungyiemj. Seizseiz louzsim gij fungyiemj daj daengx seiqgyaiq ginhyungz hawciengz caeuq daihbuek sanghbinj hawciengz saenqdoengh aiq daiq daeuj de, caezcienz aen gihci doiq gij swhginh hamj guek riuzdoengh sien guh daezsingj hoizwngq. Gaenriz gamcaek gij liuzdungsing fungyiemj doengh aen hangznieb giyez gangganj beijlwd haemq sang、 naengzlig canhcienz haemq nyieg de, fuengzre diuz lienh swhginh gatduenh yinxfat bienqvaq doxrangh. Laebdaeb miz bouhloh bae cawqceq gij fungyiemj aen ginhyungz gihgou miz fungyiemj lai de. Hwnjheiq henhoh aen hawciengz caigen onjdingh, lai vaiq laeb ndei aen gihci aeu hawciengz、 fapceih daeuj cawqceq caiqgienq famh iekdingh, laebhwnj aen dijhi fuengzre gaemhanh fungyiemj ndaej rox gonq、 re gonq、 raen gonq、 cawqceq gonq. Caensaed hengz hangh cwngcwz haedcaz siu bae gij daigvanj mbouj ndei ngaenzhangz, gikcoi hawciengz cawjdaej caeuqfaenh cawqceq gij daigvanj mbouj ndei. Laebndei aen gihci hoizfuk caeuq cawqceq ginhyungz gihgou, haeujcoengh ngaenzhangz daj lai cungj daeuzloh bouj haeuj swhbwnj. Onjdangq vaqgej gij caiq ndumj deihfueng cwngfuj gaemmiz. Dawzmaenh aen dinghvih “ranz dwg aeu daeuj youq、 mbouj dwg aeu daeuj cauj”, onjdangq laebhwnj laebcaez aen gihci ciengzgeiz mizyungh yawj hawsingz hai banhfap doi aen hawciengz fangzdicanj bingzonj cangqheiq fazcanj, roengzrengz hawj gyaq dieg onjdingh、 hawj gyaq ranz onjdingh、 hawj deqmuengh onjdingh.
（Sam）Giendingh mbouj bienq bae saedhengz aen canloz hawj vunz ndaw guek ak cawxyungh, roengzrengz coicaenh cauxbaenz aen hawciengz ndaw guek daih hoengh. Hopheux binghraq cungdongj caeuq yingjyangj, haeujlaeg haivat caeuq gikfat gij rengzndumj gunghawj caeuq cawxyungh hawciengz ndaw guek, guhbaenz gij rengz vunz ndaw guek cawxyungh ndaej rag hwnj ginghci demmaj.
It dwg cuengq ok gij rengzndumj sawjngaenz. Youq mwh guh ndei fuengzre gaemhanh, miz bouhloh bae doidoengh gak loih diemqhuq dauq gaicawx、 hawciengz dauq haihaw, coicaenh laj vangj dajcawx vaiqdi dienz dauq. Gungganq guhhung gwnz vangj dajcawx, doicaenh hulenzvangj caeuq gak yiengh sawjngaenz yungzhab haeujlaeg. Coicaenh gyauyuz、 yihliuz、 ciengxlaux、 gyahcwng、 vwnzva lijyouz、 dijyuz doengh yiengh fugsaeh sawjngaenz neix gwnz vangj laj vangj yungzhab fazcanj, caiq lai haeujcoengh ingbaengh hulenzvangj guh hangz hong moq soengq ngaiz hwnjdou、 gwnz vangj iek ci. Fazcanj gij canjnieb dagengangh. Gya’gvangq gij dieg densangh、 vaiqsoengq haeuj lajmbanj, deudoeng diuz roenloh doxgaiq gunghyez roengz mbanj、 doxgaiq dajndaem haeuj singz. Gyavaiq hwnqguh 5G vangjloz caeuq ciengzdieg dawzyungh, guhndei gij ndabaij giekdaej sezsih yienghmoq, doidoengh sibinz seuqsaw、 biencauh yienhsaed doengh yiengh sawjngaenz ngamqhwng neix. Gaenxmaenx gyadaih yiengh sawjngaenz cawx giceh, cinjhawj cingouj gij giceh gienjniemh heiqfeiq baizcuengq hab biucinj guekroek haenx youq ndaw guek doengzcaez siugai. Doiq Gingh Cinh Gi doengh dieg cungdenj neix vutyungh gij cidaehhuq caizyouz biucinj baizcuengq dwg gueksam nem doxroengz de anbaiz cienzngaenz bae haeujcoengh. Gyarengz yungh ginhyungz bangcoengh cawxyungh giceh、 gyahden cinwngz saekheu. Gikcoi gij dieg miz diuzgienh saedhengz aen cwngcwz boujdiep gaiq yunghdienh ndawranz aeu gaeuq vuenh moq. Gyavaiq hwnqguh aen dijhi soudauq gaiq yunghdienh ndawranz gaeuqvaih. Lailai gunghawj gij canjbinj cinwngz、 gij canjbinj dinghguh caeuq gij canjbinj saekheu, coicaenh yiengh sawjngaenz saekheu fazcanj. Gungganq hwnqguh gij hawsingz lai guek sawjngaenz cungsim, ciuq dangdieg cingzgvang bae dingh banhfap, cauxbaenz lai dieg sawjngaenz cungsim. Gaenxmaenx fazcanj “gvaengx gaicawx civei”, gyavaiq hwnqguh giz gyoebcomz sawjngaenz vwnzva lijyouz sanghyez yienghmoq. Gyavaiq dauqhoiz gij youzangq lajmbanj caeuq gij dajndaem guhcaemz yietnaiq. Gikcoi fathoengh yiengh ginghci gyanghwnz. Miz bouhloh bae cuengqsoeng hanhhaed giz daemq gyangmbwn, gyavaiq hwnqguh gij vangjloz roenloh gwnzmbwn doengyungh, doinyoengx roenloh gwnzmbwn doengyungh fazcanj. Haenqrengz hwnqguh aen cotsim daehhuq guekgya、 aen dieggoek hung caepgyoet daehhuq guekgya caeuq gij vangjloz gaicawx doxgaiq, coihawj caepgyoet daehhuq、 coengmingz daehhuq、 lai guek daehhuq、 diuz lienh gaihuq fazcanj. Doicaenh denswj sanghvu caeuq daehhuq vaiqsoengq dox boiqhab fazcanj. Haeujlaeg doicaenh diuz gai vunz byaij guh gaijcauh daezswng. Lai yunghrengz laebguh yiengh dijhi sawjngaenz saenqyungh, roengz rengz hung ceihleix gij vwndiz huq gyaj huq yaez、 ciemqgienz hag cauh, gya rengz gamguenj gij hawciengz cizsi sanghbinj lajmbanj riuzdoeng， laeb caezcienz gij faplwd cidu caeuq cwngcwz dijhi henhoh gienzik sawjngaenz, cauhbaenz seiqlengq ancienz cuengqsim sawjngaenz.
Ngeih dwg gaenxmaenx gyadaih gij roengzcienz yungh ndaej mizyauq haenx. Anbaiz gij roengzcienz ndaw cunghyangh yawhsuenq 6000 ik maenz, beij bigonq demgya 224 ik maenz. Daengx bi anbaiz gij cienhangh caiqgienq deihfueng cwngfuj 3.75 fanh ik maenz, beij bigonq demgya 1.6 fanh ik maenz. Ciuq gij iugouz “cienzngaenz riengz hanghmoeg byaij”, anbaiz ndei gij hanghmoeg cienhangh caiqgienq deihfueng cwngfuj, gyonjcomz haeujcoengh gij hanghmoeg guh giekdaej sezsih caeuq goenggungh fugsaeh miz itdingh souik haenx. Lai bae bouj gizvauq ndaw goenggungh veiswngh、 swnghvuz ancienz、 vuzswh gouqgip baujmiz、 vuzswh caeuq nwngzyenz bwhcwk、 sezsih daehhuq、 nungz linz suijli、giekdaej sezsih hawsingz lajmbanj. Okdaiz mizgven cwngcwz vwnzgen doinyoengx hwnqguh giekdaej sezsih yienghmoq, doicaenh roengzcienz haeuj gij giekdaej sezsih yienghmoq baudaengz 5G、 vuzlenzvangj、 cehlenzvangj、 gunghyez hulenzvangj、 yinzgungh cinwngz、 daihsoqgawq gyoebcomz cungsim daengj. Guh ndei gaiq hong gaijcauh gij siujgih gaeuq ndaw hawsingz, cungdenj gaijcauh daezswng siujgih gij sezsih raemx、 dienh、 heiq、 roen、 doengsaenq boiqdauq fuengbienh gihminz, giz miz diuzgienh de gya cang dendih、 gya boiq giz dieg daengx ci. Doinyoengx hawsingz cawz gaeuq vuenh moq, lai roengzrengz bae hwnqguh gij ciengzdieg daengx ci caeuq honggaiq cungdienh ndaw singz、 honggaiq cawqleix raemxuq nyapnyaj ndaw singz ndaw mbanj、 gyonjgyoeb ceihleix giz dieg vat meiz deng loemq、 beujsenj gaijcauh giz dieg cangj gvang doglaeb caeuq giz dieg gunghyez gaeuq ndaw singz. Onjdangq bae gaijcauh dieg ranzdiengz. Saedhengz ndei 165 hangh gunghcwngz hanghmoeg hungnaek ndaw“cibsam haj” gveihva caeuq gij hanghmoeg hungnaek ranghdieg youqgaenj ndaw guekgya canloz. Lai roengzrengz hwnqguh gij hanghmoeg gauhdez henzdah、 henzhaij. Gaenxmaenx doidoengh Conh Cang Dietloh haihong, gyavaiq gveihva hwnqguh gij dietloh singzgyoengq cungdenj、singzgien singz daengz singz caeuq gvaegdieg hawsingz (rog singz). Gyavaiq cengjnyoengx gij suijli gunghcwngz hungnaek cingq hwnqguh haenx guh baenaj, haihong hwnq buek suijli gunghcwngz hungnaek moq ndeu. Gyavaiq doicaenh aen gihcangz cotsim guh gij hanghmoeg lingh hwnq、 senj hwnq caeuq gaij hwnq gya hwnq, miz bouhloh bae doicaenh hwnqguh gihcangz roennga caeuq gihcangz doengyungh. Gyavaiq doicaenh hwnqguh gij hanghmoeg guekgya gauhsuz goengloh、 roenhung ndaw guek ndaw sengj、 goengloh lajmbanj caeuq roenraemx dahndaw. Dawzmaenh “yausu gaenriengz hanghmoeg bae”， yunghrengz baujndei hanghmoeg yungh dieg yungh haij yungh nwngzyenz, doiq gij hanghmoeg roengzcienz lai haenx hailaeb diuz roenloh saekheu. Laebdaeb gyadaih ginhyungz haeujcoengh, fatok gij cozyung cwngfuj okcienz dazyinx, gveihfan caeuq cauhmoq gij vunqsik cwngfuj caeuq swhbwnj ndawbiengz doxgap（PPP）, haeujcoengh swhbwnj ndawbiengz caeuqfaenh bouj gizvauq caeuq hwnqguh giekdaej sezsih yienghmoq. Onjdangq doinyoengx youq ndaw gvaengxdieg giekdaej sezsih sawq guh mboujdoenghcanj douzswh sindoz gihginh（REITs）, doinyoengx gak loih ndawbiengz roengzcienz engqgya remcieng bae guh, buenzhoengh gij swhcanj gaenq miz.
Sam dwg roengzrengz onjdingh gij cajmuengh ndawbiengz. Laebndei gij guhfap fatbouh saenqsik binghraq, laebdaeb guh daengz ciuqfap、 goenghai、 ronghcingx、 gibseiz、 cinjdeng. Lai roengzrengz doiq aen fap fuengzyw binghlah guh senhconz gyauyuz, lai caengzluep、 deihdeih fatbouh saenqsik gienzvi, engq ndei bae henhoh daengx biengz onjdingh. Hawj cwngcwz lai onjdingh caeuq ndaej aenqliuh daengz, laebcaez gij guhfap guenjleix cwngcwz muzbyauh caeuq goenghai gezcwz hungnaek, mboujduenh hawj cwngcwz lai ronghcingx. Coi hawj cwngcwz youq bouhmonz caeuq bouhmonz、 cunghyangh caeuq deihfueng ndaej lienzdoengh, lai guh cwngcwz fuengyiengq、 muzbyauh、 gonq laeng、henzbien dox boiqhab. Caiq lai gyarengz bae yawhgeiz guenjleix, cauhmoq bae guh senhconz, guh ndei fatbouh saenqsik caeuq gejdoeg cwngcwz, gibseiz handauq gij saeh ndawbiengz gvansim, onjdingh gij saenqsim hawciengz cawjdaej.
（Seiq）Haeujlaeg doicaenh gij gaijgwz gezgou mbiengj gunghawj, onjdingh daezswng gij suijbingz diuz lienh canjnieb diuz lienh gunghawj. Haenqrengz saenqhwng saeddaej ginghci, laebdaeb daezswng gij naengzlig canjnieb giekdaej caeuq gij suijbingz diuz lienh canjnieb yendaiva, hawj diuz lienh canjnieb diuz lienh gunghawj guek raeuz ndaej onjdingh youh miz rengz beijak.
It dwg lai coengh gak loih giyez daegbied dwg giyez rauh iq iqet caeuq bouxseng’eiq gagguh. Gemjnoix gij banhsaeh bouhloh gak hangh cwngcwz bangcoh giyez gejrungq gunnanz, cwngfuj gij saehhangh nangqdaengz giyez de, caenhliengh youq gwnz vangj banhleix. Gyarengz cingleix cwngjdun gij soucienz yiengh fugsaeh youzyaz, giengiet haeddingz gak cungj soucienz famh gvidingh nangqdaengz giyez. Doidoengh gyangqdaemq gij cingzbonj giyez yungh nwngzyenz、 yungh vangjloz、daehhuq、coranz daengj, aen cwngcwz dawz gij gyaqcienz yungh dienh aen gunghyez hung hauqsied nwngzyenz noix caeuq aen gunghsanghyez bingzciengz haenx gyangqdaemq 5% ietraez daengz bineix nienzdaej， gvanhdai caeuq conhsen bingzyaenz hai cienz gyangqdaemq 15%. Gemjmienx gij cienzco aen ranz guekmiz， coihawj gak loih bouxcawj gemjmienx roxnaeuz doilaeng sou cienz coranz. Hanhgeiz guhbaenz cwngfuj gihgou、 giyez guekmiz boiz caez gij ngaenz gwnz soqbouh yiemq aen giyez rauh iq minzyingz. Dazyinx ngaenzhangz nyienghleih hawj saeddaej ginghci，gikcoi sanghyez ngaenzhangz doiq aen giyez deng binghraq cungdongj haemq lai haenx caeuq doengh aen hangznieb giyez guh gaibued gailingz、 dozyouq、 gwnndoet、daehhuq、 vwnzva guh’angq youzdieg daengj， youq saek duenh seizgan ciuq itdingh beijlaeh gemjmienx daigvanj leihsik. Gaijndei aen cwngcwz cauhnieb danhbauj daigvanj diepsik, daezsang gij beijlaeh hawj aen giyez iq iqet cuengq saenqyungh daigvanj、 swnj daigvanj, haeujcoengh gyahung baeznduj daigvanj，sanghyez ngaenzhangz hung yiengh daigvanj ndei doh giyez iq iqet haenx demmaj aeu sang gvaq 40％. Haeujcoengh ginhyungz gihgou fathengz 3000 ik maenz ginhyungz caiqgienq soq noix daeuj cuengq daigvanj soq noix. Dazyinx gunghswh yungh gij caiqgienq loih saenqyungh haenx cingh yungzswh beij bigonq lai dem 1 fanh ik maenz. Coicaenh giyez iq iqet daengx bi ndaej gij cienz yungzswh wngdang sou haenx 8000 ik maenz. Gikcoi swhbwnj hawciengz lai yungzswh coengh gij giyez gohgi rauh iq dingjdoiq binghraq haenx. Gikcoi giyez hung yungh gij yungzswh gaenq ndaej, yungh gij yienghsik hai cienzdemh, hai yienhcienz hawj gij giyez rauh iq iqet duenh gwnz duenh laj. Okdaiz gij yigen coengh hangz ceiqcauh giyez minzyingz onjmaenh demmaj caeuq cienjhingz swnggaep, coi hawj deihfueng doenggvaq hawciengz bae gejrungq hojnanz gouqbang gij giyez minzyingz ndei nanz guh baenaj haenx.
Ngeih dwg coi hawj hangz ceiqcauh ndaej caetliengh sang bae fazcanj. Lai roengzrengz bae coengh hangz ceiqcauh ndaej daigvanj duenh seizgan raez roxnaeuz duenh seizgan haemq raez, cungdenj haeujcoengh doengh aen lingjyiz youqgaenj cauhguh canghbei gaepsang、 gaijcauh daezswng canjnieb gaeuq、 cauhguh denswj saenqsik. Saedhengz ndei aen gunghcwngz daezsang gij naengzlig haedsim beijak hangz ceiqcauh, laebndei gij dijhi fugsaeh gisuz gaijcauh. Saedhengz aen gunghcwngz cinwngz dajcauh, yenzgiu okdaiz gij cijdauj yigen doicaenh hangz ceiqcauh gaijcauh baenz cinwngz. Gaenxmaenx doicaenh gij giyez gangdiet “coi dauqlaeb、 coi cienjhingz”, laebdaeb hawj sizva canjnieb baijbouh bienq ndei, laebdaeb saedhengz beujsenj gaijcauh gij giyez swnghcanj doxgaiq yungyiemj ndaw dieg vunz lai vunz deih haenx. Hengzguh gij gunghcwngz cauhguh saekheu. Doigvangq yiengh dajhwnq aeu gang gapgyaq cangboiq, doinyoengx cinwngz dajcauh caeuq gunghyez dajhwnq yungzhab fazcanj. Haeujcoengh hwnqguh dieg yienghbanj aen singz gunghyez gaeuq caeuq aen singz baengh swhyenz guh canjnieb cienjhingz swnggaep. Sawq bae ganq ok aen yienghbanj hangz ceiqcauh ndei baenzgyoengq.
Sam dwg bauj diuz lienh canjnieb diuz lienh gunghawj onjdingh. Roengzrengz laebndei gij roenloh daehhuq hawj de doengrat bae, haeujcoengh giyez gyalai bwh gij huqliuh youqgaenj. Hengzguh gij gunghcwngz caiq cauh giekdaej canjnieb. Roengzrengz gungganq gij giyez canjnieb swnghdai daiqyinx haenx, gungganq buek hangz ceiqcauh comzgyoengq senhcin ndaej caeuq guek wnq beijak ndeu， hawj diuz lienh canjnieb engqgya gietcomz ndaej. Gungganq buek giyez rauh giyez iq “ciennieb maenhndei daegsaek yienghmoq” ndeu. Yenzgiu bingzguj gij ancienz fungyiemj diuz lienh gunghawj, gaijndei gij baijbouh swnghcanjliz, gyalai rombwh huq gouqgip, caiq hawj diuz lienh gunghawj engq onjdingh engq nyangqnywt. Haeujlaeg saedhengz aen gunghcwngz cauhmoq fazcanj gunghyez hulenzvangj, dajcauh aen dijhi gunghyez hulenzvangj bingzdaiz, hawj gunghyez hulenzvangj bingzdaiz gyangde ndaej doiqciep biucinj. Doidoengh hangz ceiqcauh senhcin caeuq hangz fugsaeh ciuhneix yungzhab fazcanj, roengzrengz fazcanj yiengh ceiqcauh ak fugsaeh. Gyavaiq doidoengh hwnqguh aen bingzdaiz hawj hangz fugsaeh guh swnghcanj haenx bae fugsaeh vunzlai， hwngfat yenzfat sezgi、 yienhdaih vuzliuz、 gienjniemh gienjcaek nyinhcingq daengj hangz fugsaeh swnghcanj.
Seiq dwg roengzrengz ganq hung rengznyoengx moq. Haeujlaeg doicaenh aen gunghcwngz fazcanj gij canjnieb comzgyoengq ngamqhwng hab guekgya canloz, gyarengz hwnqguh yiengh cauhmoq caeuq fugsaeh vunzlai doxgyoeb haenx. Cauhmoq gij ginhyungz canjbinj caeuq gij fugsaeh gunghawj yiengh canjnieb ngamqhwng miz canloz singqcaet. Haeujlaeg doicaenh “hwnjvangj yunghsoq hawjgvai”, hengzguh aen hengzdoengh suswva cienjhingz guhdoih、 aen cienhangh hengzdoengh giyez rauh iq suswva gunghawj rengznyoengx caeuq aen hengzdoengh gungganq ginghci soqcih yienghnieb moq, haeujlaeg doicaenh hwnq baenz diegsawqniemh cauhmoq fazcanj soqcih ginghci, coi hawj ceiqcauh、 gaicawx riuzdoeng doengh aen lingjyiz cungdenj ndaw ginghci seivei neix cienjhingz guhbaenz soqcih, fazcanj soqcih seng’eiq, cengjdaemx hwnqguh diuz lienh gunghawj soqcih. Haeujlaeg hengzguh guekgya daihsoqgawq canloz、 “hulenzvangj +” hengzdoengh, doinyoengx hwnqguh yiengh hawsingz civei moq, doicaenh lailai sawjyungh 5G. Roengzrengz fazcanj swnghvuz ginghci, lai bae haifat caeuq leihyungh swnghvuz swhyenz, gungganq lai giz diegsang comzgyoengq fazcanj swnghvuz ginghci. Gyavaiq fazcanj doengh gij canjnieb ngamqhwng beijlumj cinwngz dajcauh、 mbouj aeu vunz boiqsoengq、 youq gwnz vangjloz sawjngaenz、 ywbingh ndangcangq、 vunzgihgi daengj. Haeujcoengh hwngfat sanghyez hangzdenh, ietraez diuz lienh canjnieb hangzdenh，haigvangq wngqyungh doengh cungj veisingh doengsaenq、 daujhangz、 yauzganj. Ceiqdingh gij canloz gveihva guekgya gingh nwngzyenz canjnieb fazcanj. Haeujcoengh gij giceh yungh nwngzyenz moq、aen canjnieb cwkce nwngzyenz fatmaj, doidoengh saedhengz aen canloz cauhmoq fazcanj cinwngz giceh. Gyavaiq cauhmoq fazcanj gaiq yungh youq giz haij laeggyae dwkaeu dajciengx, hwnqguh rangh dieg dajciengx ndaw haij habngamj seizdaih haenx.
Haj dwg roengzrengz bauj haeuxgwn ancienz caeuq gunghawj hawciengz gij doxgaiq ok laeng nungzyez. Lai haeujlaeg bae guh gij gaijgwz mbiengj nungzyez gunghawj, netsaed hengz aen cidu swngjcangj rap cwzyin bauj haeuxgwn ancienz、 aen cidu sicangj fucwz “lamzbyaek”. Bienguh aen ganghyau guekgya haeuxgwn ancienz cungciengzgeiz gveihva lwnz moq、 aen gveihva seizgeiz moq diuzcingj gij baijbouh caeuq gezgou nungzyez swnghcanjliz, dingh ndei gij fueng’anq wngqdoiq daengx seiqgyaiq deng binghraq yingjyangj baenzlawz baujmaenh guek raeuz haeuxgwn ancienz, lai vaiq doidoengh okdaiz aen fap bauj haeuxgwn ancienz, doi aen gunghcwngz haeuxgwn ndei guh haeuj laeg bae， laebdaeb saedhengz aen giva saenqhwng duhhenj， demgya gunghawj gij canjbinj haeuxgwn youzgwn saekheu， coihawj nungzminz demsou、 giyez demyauq、 bouxsawjngaenz ndaej leih. Netsaed hwnqguh gij reihnaz biucinj sang, hengzguh aen giva caerauq dajndaem baujhoh ndei dieg namhndaem Doengbaek, hengzguh aen gunghcwngz gyaak bonjsaeh baujhoh canjnieb cehfaen yienhdaih caeuq doenghduz doenghgo, gyaak gamyawj cazniemh caeuq fuengzre gaemhanh binghhaih nonhaih. Laebndei gij cwngcwz boujdiep nungzgih. Haeujlaeg doinyoengx lajmbanj gohgi cauhmoq yamq baenaj, gyaak gungganq vunzcaiz nungzyez gohgi， doidoengh gak loih nungzyez gohyenz yensoj caeuq gauhyau lienzhab gapguh gyavaiq gungganq nungzyez vunzcaiz caengzsang，hawj gohgi lai ak bae cengjdaemx haeuxgwn ancienz. Cauhmoq laebndei gij dijhi “swnghcanj cawxhaeuj romcwk gyagoeng siugai” haeuxgwn guhdoih lienzdoengh, gyaak gamcaek yawhgingj caeuq gamguenj hawciengz haeuxgwn, caezcienz gij dijci guenjleix ancienz rom haeuxgwn, hwnjheiq buqgej gij mauzdun aencang coux haeuxdaeuzmiuz mbouj gaeuq yungh. Guh ndei doeksaed gij cwngcwz boujdiep nungzyez baujyiemj baujfeiq. Doeksaed gij cwngcwz gyaq ceiq daemq soucawx haeuxmeg、 haeuxgok, caezcienz gij gihci hawj boujdiep caiq yungh gyaqcienz hawciengz soucawx haeuxyangz、 duhhenj, doeksaed gij cwngcwz dingh gyaqcienz soucawx vafaiq. Laebdaeb gaemndei swnghcanj mouseng, laebdaeb gyaak gamcaek caeuq fuengzhaed mouraq Feihcouh、 binghgaeqraq lah dawz vunz gig vaiq daengj gij binghraq haenq doenghduz neix, coi aen canjnieb ciengx doihduz、 ciengx doenghduz doenghgo ndaw raemx ndaej caetliengh sang bae hwngfat, lai vaiq hwnghwnj aen canjnieb cijvaiz. Hengzguh aen gunghcwngz hwnqguh gij sezsih hawj yiengh doxgaiq reihnaz ok ndaej bauj cwkcuengq singjsien caeuq caepgyoet daehhuq, haeujcoengh fazcanj densangh lajmbanj. Doicaenh lai giz baijbouh cingouj yiengh doxgaiq reihnaz ok, guh ndei gaiq hong diuhdoh bauj beksingq miz gij doxgaiq gvaq saedceij aeu yungh de, bauj haeux youz noh gyaeq mak byaek daengj gij doxgaiq reihnaz ok youqgaenj neix ndaej caetliengh ancienz、 onjdingh gunghawj.
Roek dwg roengzrengz bauj nwngzyenz ancienz. Yamqonj doi gaiq hong hwnqguh gij dijhi swnghcanj gunghawj cwkcuengq siugai meiz、 sizyouz、 denhyenzgi caeuq denliz nem aen dieggoek cwkcuengq sizyouz, gyaak diuzcez meiz dienh youz heiq yinhhengz. Laebcaez gij fueng’anq dingh gonq wngqdoiq ndaw guek rog guek gunghawj caeuq aeuyungh miz gij bienqvaq hungloet de, baujmaenh gunghawj caeuq aeuyungh cungjdaej doxbingz caeuq hawciengz bingzonj yinhhengz. Laebdaeb guh ndei hong damqra haifat youz heiq, lai vaiq doicaenh gij gienz youz heiq gvangqnieb gvaengxdieg doxdax nyiengh’ok. Lai vaiq hwnqguh gij guenjvangj caeuq gunghcwngz cwkcuengq youz heiq, laebcaez gij gihci yinyingz guenjvangj youz heiq, doidoengh gij sezsih guenjvangj goengbingz hailangh. Roengzrengz gaijcauh swnggaep meiz den, hwnjheiq onjndei fazcanj suijden, ancienz fazcanj hwzden senhcin, bauj hawj aeu rumz fat dienh caeuq yungh ndit fat dienh hableix fazcanj, doinyoengx gij nwngzyenz mbouj dwg vasiz de baenz gij cawjdaej gyaliengh. Laebcaez aen gihci mizyungh naihnanz bae yungznab leihyungh gij denliz nwngzyenz ndaej caiqseng, hwnjheiq doi aen vunqsik moq youq henzgyawj dangdieg yungznab. Miz bouhloh hwnqguh diuzloh hamj swngj hamj gih soengqdienh, daezsang gij naengzlig aen hidungj nwngzyenz guh yinhsoengq caeuq diuzcez. Laebdaeb doinyoengx hwnqguh aen dijhi wngqgip denliz, hawj de ndaej hoizwngq riengjrit. Doidoengh gij gihgou gaicawx denliz doglaeb gveihfan yinhhengz, hwnqguh aen hawciengz denliz daengx guek doengzcaez, cienzmienh cuengqhai giva hawj yunghhoh ginghyingz denliz fat dienh yungh dienh, doidoengh gyaliengh boiq dienh gaijgwz sawqdiemj hengz ndaej mizyauq. Haeujlaeg gaijgwz denvangj giyez cauhguh canghbei、 dajveh guhhong doengh gij yezvu miz gingcwngh neix.
（Haj）Giendingh saedhengz aen canloz aeu cauhmoq doidoengh fazcanj, hawj gohgi cauhmoq engq ak bae dingjcengj ginghci fazcanj. Caenhrengz langh ok gij cozyung cauhmoq yiengh doenghlig daih’it neix、 vunzcaiz yiengh swhyenz daih’it neix, roengz rengzhung haenhgangj gij cingsaenz gohyoz caeuq gij cingsaenz lauxcangh, cauh’ok gij sevei funghsang guhhong miznaj caeuq gij fungheiq gingqnieb ndei le siengj aeu engq ndei，gyavaiq hwnqguh yiengh guekgya ak cauhmoq.
It dwg gyavaiq gungroengz gij gisuz haedsim ceiq youqgaenj. Youq sevei cujyi hawciengz ginghci diuzgienh baihlaj cauhlaeb aen dijci daengx guek yienghmoq gungroengz gij gisuz haedsim ceiq youqgaenj. Haiguh gij hong mizgven gohgi cienhangh hungnaek cug mbaek hamzciep, lai vaiq anbaiz vunz guh aen hanghmoeg hungnaek gohgi cauhmoq 2030—. Haeujcoengh cauhlaeb aen bingzdaiz daemxcengj giekdaej yiengqcoh daengx hangznieb youz bonj guek cauh’ok sawjyungh haenx. Laebcaez gij dijci gihci dajciengj haeujcoengh gihcuj yenzgiu、 codaeuz cauhmoq, fazcanj gij yenzgiu haifat gihgou yienghmoq coh haeuj hawciengz de, gikcoi giyez daengj gij rengz ndawbiengz gya roengz cienzngaenz. Lai vaiq hawj giyez miz rengz cauhmoq gisuz, yenzgiu baenzlawz dawz gij cingzgvang giyez guekmiz gisuz cauhmoq lied haeuj ndaw gaujhaed gihci bae. Lai vaiq guh gij hong yenzgiu cauh’ok daiz (dauq) daih’it gisuz canghbei hungnaek、 caizliuh moq giepnoix caeuq cauhlaeb aen bingzdaiz gisuz youqgaenj doxcaemh de. Laebndei aen cwngcwz cwngfuj dajcawx haeujcoengh yungh gij canjbinj cauhmoq. Gyoebhab gij ligliengh lai aen yozgoh guh gohyenz gunggvan, gya rengz bae yenzgiu gij goekbingh binghraq bwtndat caeuq de baenzlawz cienzlah hawj vunz, lai ok rengz yenzgiu haifat gijyw、 yizmyauz caeuq gungganq yiengh naengzlig lai ak swnghcanj gouqgaenj. Cuknet gij giekdaej sezsih swnghvuz ancienz gensez, doengbuenz suenqveh guh ndei gij hong swnghvuz ancienz gohgi gunggvan. Gyavaiq laebndei gij cidu mbawdan guenjleix guekgya gisuz ancienz.
Ngeih dwg gyaak gungganq gij bonjsaeh cauhmoq. Bienguh lwnz moq aen gveihva cungciengzgeiz gohgi fazcanj guekgya caeuq aen gveihva hwnqguh gij giekdaej sezsih gohgi hungnaek guekgya. Gyaak giekdaej yenzgiu caeuq baeznduj cauhmoq、gisuz ndaej boekbuenz cauhmoq, lai vaiq cujlaeb guekgya sizyensiz, dauqcungz gyoeblaeb guekgya cungdenj sizyensiz dijhi, lai vaiq hwnq baenz aen giekdaej bingzdaiz ndaej hamj yozgoh、 daih doxgap、 giengzdoh sang bae guhdoih cauhmoq haenx. Doidoengh hwnqguh gohgi cauhmoq cungsim caeuq cunghhozsing guekgya gohyoz cungsim, ciuq gohyoz bae baijbouh hwnqguh gohgi giekdaej sezsih hungnaek、 gohyoz gyauyuz giekdaej sezsih caeuq guekgya canjnieb cauhmoq cungsim、 gunghcwngz yenzgiu cungsim、 gisuz cauhmoq cungsim、 hangz ceiqcauh cauhmoq cungsim、 diuz lienh gunghawj gohyoz cauhmoq cungsim. Saedhengz hanghmoeg youqgaenj gunggvan “goenghai douxdaeuz”. Gaijgwz gij gihci cienjvaq gohgi cwngzgoj， hawj diuz lienh cauhmoq bienq doeng， cauh’ok aen gohyenz vanzging gikcoi cauhmoq yungzhawj saetbaih. Dingh ok cwngcwz doxboiq haeujcoengh gij cienhangh cwngzgoj hungnaek bienqbaenz canjnieb, laebndei gij gihci caeuq cwngcwz haeujcoengh gungganq gij vunzcaiz ak cauhmoq，laebcaez aen dijhi faenloih bingzgyaq vunzcaiz. Hawj aen sifangih caeuq aen gauhsinhgih gag guhcawj cauhmoq guekgya raeuz ndaej fazcanj hwnj sang.
Sam dwg doinyoengx cauhmoq cauhnieb cauhguh ciuq caetliengh sang bae fazcanj. Guh lwnz moq sawqniemh cienzmienh cauhmoq gaijgwz. Laebhwnj laebcaez aen dijhi gisuz cauhmoq aeu giyez guh cawjdaej、 hawciengz guh dazyinx、 swnghcanj sonhag gohyenz yungzhab haeujlaeg, haeujcoengh giyez hung rauh iq caeuq gak loih cawjdaej doxyungz cauhmoq. Hwnqguh buek dieggoek cauhnieb cauhmoq guhyiengh ndeu, hengzguh buek hanghmoeg cengjdaemx bingzdaiz cauhnieb cauhmoq ndeu. Youq ndaw dieggoek guhyiengh hengz aen cienhangh hengzdoengh “daj hagdangz haeuj giyez”. Lai vaiq dawz gaijgwz gij dijci gihci aen lingjyiz cauhnieb douzswh doi baenaj. Yenzgiu baenzlawz lai roengzrengz aeu cwngcwz haeujcoengh “aenfaeggyaeq”、 aen diendeih vunzlai cauhnieb daengj gij gihgou fugsaeh cauhmoq cauhnieb. Lai roengzrengz bangfuz gij giyez deng binghraq yingjyangj de, gyalai gij vunz ndaej danbauj daigvanj bae cauhnieb, doiq gij hanghmoeg caetliengh ndei de mienx bae fanjdanbauj iugouz, gyarengz haeujcoengh gyoengqvunz cungdenj cauhnieb yungh ciengzdieg.
（Roek） Laebdaeb guh hawciengzvaq gaijgwz, caiq bae gikfat gij rengzhoengh rengzdoengh fazcanj ginghci. Gaemndaet okdaiz gij banhfap caiq lai gyalaeg gaijgwz, roengzrengz byoengqgej gij gazlaengz dijci gihci hanhhaed fazcanj, dawzmaenh caeuq laebndei sevei cujyi gihbwnj ginghci cidu.
It dwg gyalaeg gaijgwz “cuengqgienz gamguenj fugsaeh”. Cienzbouh hengz ndei 《Aen Diuzlaeh Gaijndei Gij Vanzging Guh Gaicawx》, cungjgez caeuq doigvangq gij gingniemh guhfap youq mboengq fuengzre gaemhanh binghraq gak dieg fugsaeh giyez yauqlwd sang de. Laebndei aen cijbyauh dijhi caeuq aen fuengfap bingzgyaq gij vanzging guh gaicawx, youq daengx guek mbangj hawsingz digih gaep caeuq doxhwnj、 aen sinhgih guekgya gaep dinghgeiz bingzgyaq gij vanzging guh gaicawx Cungguek. Doidoengh gak dieg haidoeng aen bingzdaiz haibanh giyez “aen vangj ndeu banh caez”, caiq gemjnoix gij soujsuz saemjbae caeuq daenghgeiq, hawj gij saeh haibanh giyez youq gwnz vangj ndaej banh caez. Cuengqsoeng hanhhaed giyez iq iqet、 bouxseng’eiq gagguh daenghgeiq dieg ginghyingz，fuengbienh gak loih bouxcauhnieb cucwz ginghyingz，gibseiz yiengjsouh gij cwngcwz bangfuz. Haeujlaeg guh gij gaijgwz “cingq ciuq faenliz”. Caiq lai gemjnoix gij hingzcwng cinjhawj nem beian、 daenghgeiq、 nienzgienj、 nyinhdingh daengj saeh youz cunghyangh caeuq deihfueng ndadingh de. Haeujlaeg gaijgwz aen cidu saemjbae douzswh, laebhwnj laebcaez aen cidu mbawdan saemjbae douzswh, laebndei gij cidu douzswh hanghmoeg doengjit daimaj. Doihengz gyoebloih saemjbae, maeuzveh gaijgwz wngqcingz cidu, caiq lai vaiq hawj hanghmoeg doekdeih. Aeu “lai cungj gveihva gyoebbaenz yiengh ndeu” guh giekdaej, gyalaeg gaijgwz gveihva yungh dieg, guh daengz “lai yiengh saemjbae gyoebbaenz yiengh ndeu” “lai mbaw cingq gyoebbaenz mbaw ndeu”, doinyoengx “lai yiengh gamcaek gyoebbaenz yiengh ndeu” “lai yiengh genjniemh gyoebbaenz yiengh ndeu” guh baenaj. Lai vaiq doinyoengx coihdingh aen fap cwngfuj dajcawx caeuq aen fap ciubiu roengzbiu guh baenaj. Youq ndaw gvaengx hawciengz gamguenj guh daengz aen bouhmonz sienggven “song couaeu、 it goenghai”gamguenj guh doh caez. Coi hawj aen hawciengz gaicawx swhyenz doxcaemh de ndaej cangqheiq miz bouhloh fazcanj, cienzbouh guh denswjva gaicawx. Haeujlaeg doicaenh “hulenzvangj + cwngvu fugsaeh”, lai vaiq dajcauh daengx guek cwngvu fugsaeh “aen vangj ndeu”, caiq bae gemjnoix gij saehhangh banh gvaeh、 gij seizgan nab gvaeh, cingjhab gak loih hidungj daenghgeiq fouzcaiz caeuq daenghgeiq danbauj gienzleih, mboujduenh hawj cwngvu fugsaeh engq ak. Roengz rengz hung doihengz aen cidu saenqyungh wngqcingz, haeujlaeg mbeguh gij hong “miz saenqyungh heih ciq cienz”, daezsang gij suijbingz hwnqguh sevei saenqyungh dijhi, sawj de byaij coh fazci、 hab gveihfan. Daihdaej guhbaenz gij gaijgwz hawj hangznieb hezvei sanghvei caeuq hingzcwng gihgvanh duetngaeu.
Ngeih dwg hwnqguh aen hawciengz dijhi biucinj sang. Saedhengz gij yigen youq seizdaih moq vaiq bae laebndei sevei cujyi hawciengz ginghci dijci. Dingh ok saedhengz aen hengzdoengh fueng’anq hwnqguh aen hawciengz dijhi biucinj sang. Cauhlaeb gij gihci dijci ciuq hawciengz ndaboiq yausu engqgya caezcienz haenx, sawqdiemj gyoebhab gaijgwz ciuq hawciengz ndaboiq yausu. Cienzmienh saedhengz gij cidu mbawdan gimq cinjhaeuj hawciengz, aeu hangz fugsaeh guh cungdenj mbeguh gij sawqdiemj cuengqsoeng cinjhaeuj hawciengz, damqra youq gwnz vangj gamguenj caeuq gyoebhab bingzguj saemjbae gij saehhangh mbawdan gimq cinjhaeuj hawciengz. Doidoengh deihfueng laeb bonj bouh cug hangh geiqsij gij gazngaih ndumjyouq gazlaengz cinjhaeuj hawciengz, cungdenj dwg buqcawz gij gazngaih laengz minzyingz giyez daegbied dwg giyez rauh iq iqet cinjhaeuj. Yenzgiu dingh ok gij yigen vixyinx gingcwngh cwngcwz, coihgaij caezcienz aen cidu saemjcaz goengbingz gingcwngh saedhengz sicwz. Lai baengh faplwd gvidingh bae bingzdaengj baujhoh gak loih canjgenz. Laebcaez aen fapceih vanzging bangcoengh minzyingz ginghci fazcanj, baujhoh gij gienzcaizcanj caeuq gienzginghyingz habfap minzyingz giyez、 minzyingz giyezgyah. Gyaak caeuq gaijndei gij hong ciuq fap hengz fanj lungjdon caeuq fanj mbouj cingqdangq gingcwngh, engq ndei baujhoh gij sanghyez mimiz aen giyez. Laebhwnj laebcaez aen cidu doiq cihsiz canjgenz ciemqgienz guh ceihfad dienzboiz, lai roengzrengz hengzfap baujhoh cihsiz canjgenz, gyaak cienjvaq caeuq wngqyungh conhli.
Sam dwg gyavaiq gaijgwz swhbwnj guekmiz giyez guekmiz caeuq cungdenj hangznieb. Ceiqdingh saedhengz aen fueng’anq sam bi gaijgwz giyez guekmiz, gyavaiq bae gaijndei baijbouh caeuq diuzcingj gezgou ginghci guekmiz, laebcaez yienhdaih giyez cidu. Dawznaek guhbaenz aen dijci gamguenj swhcanj guekmiz aeu guenj swhbwnj guh goek haenx. Gaenxmaenx haeujlaeg bae gaijgwz gij sojyoujci doxgyaux giyez guekmiz, guh laeg guh saed seiq buek sawqdiemj, ceiqdingh okdaiz gij saedhengz yigen gyalaeg gaijgwz gij sojyoujci doxgyaux giyez guekmiz. Doidoengh doenggvaq hawciengz gyalai soqliengh gya ndei caetliengh dawz caiqgienz cienj baenz gujgienz, dazyinx ginhyungz swhcanj douzswh gunghswh caeuqfaenh youq ndaw hawciengz bae dauqcungz gyoebhab conzdungj canjnieb. Gyavaiq bae guhbaenz ndawbiengz guenjleix gij vunz duiyouh ndaw giyez guekmiz，daihdaej guhbaenz bokliz banh sevei ciznwngz caeuq gaijgez gij vwndiz lizsij louz roengzdaeuj.
Seiq dwg haeujlaeg bae gaijgwz caizsui、 ginhyungz、 gyagwz dijci. Caensaed doicaenh gaijgwz vehfaen gij caizcwng saehgienz caeuq cwzyin haiok cunghyangh nem deihfueng, laebcaez aen dijhi cienzgvaeh deihfueng, baez yamq nodlaeng gij mbaekyamq souaeu siuhfeisui caemhcaiq menhmenh veh roengz hawj deihfueng. Damqra yungh gij leixniemh yawhsuenq vut giek, dwkbyoengq yiengh haiok dingh gyaeuj haed rieng. Caiq daezsang gij beijlaeh swhbwnj guekmiz ginghyingz yawhsuenq diuhhaeuj itbuen goenggungh yawhsuenq. Gyalaeg gij gaijgwz gezgou mbiengj ginhyungz gunghawj, gaijndei gij gezgou yungzswh caeuq gij dijhi ginhyungz gihgou、 gij dijhi hawciengz、 gij dijhi canjbinj, miz bouhloh bae doicaenh cienjvuenh gij liliz daigvanj dinghgyaq gihcunj ciuq cunz cienz lainoix fouzdoengh. Okdaiz aen fueng’anq cungjdaej saedhengz gaijgwz cangyezbanj caemhcaiq sawqdiemj cucwzci, laebdaeb daezsang gij beijlaeh cigsoh yungzswh daegbied dwg gujgenz yungzswh. Guhbaenz gyaqcienz soengqdienh boiqdienh hopgeiz gamguenj daihngeih gaijgwz, gyalaeg gaijgwz gyaqcienz saehnieb goengyungh, cingleix gveihfan gij soucienz hangznieb gung raemx、 gung dienh、 gung heiq、 gung raeuj ndaw hawsingz, caencingq gaijgwz gij gihci gyaqcienz coemh meiz fatdienh, coi giz dieg miz diuzgienh haenx damqra hengzguh aen cwngcwz cawqleix nyapnyaj gwndaenj hawsingz soucienz mbouj doengz, laebdaeb gyalaeg gaijgwz gyaqcienz dienh、 gyaqcienz raemx. Laebndei gij gihci cauxbaenz gyaqcienz sizyouz denhyenzgi gvanjvangj.
（Caet） Doengbuenz suenqveh doicaenh dieg singz dieg mbanj hezdiuz fazcanj, ganq hung aen goekrengz caetliengh sang bae fazcanj. Yungh gijndei doxbeij gak dieg, doidoengh aen canloz saenqhwng lajmbanj caeuq aen canloz hawsingzvaq yienghmoq ndaej guhbaenz.
It dwg guh saed guh saeq aen canloz fazcanj rangh dieg youqgaenj. Doeksaed aen gihci moq ranghdieg doxdaengh fazcanj, laebdaeb doicaenh Baihsae daih haifat cauxbaenz yiengh baijbouh moq, haeujcoengh fueng dieg Doengbaek gizgiz saenqhwng, laebcaez gij cwngcwz dijhi caeuq gunghcoz gihci hwnghwnj fueng dieg Cungqgyang, laebdaeb coi hawj fueng dieg Baihdoeng fazcanj gonq. Daj caengzlaeg bae coi Baekging Denhcinh Hozbwz guhdoih fazcanj, vaiqvaiq hwnqguh gij cungdenj hanghmoeg Yungzanh Sinhgih, laebndei aen cwngcwz dijhi gejsoeng Baekging gij goengnaengz mbouj dwg gingsingz haenx. Roengz rengz hung doicaenh cingjgaij gij vwndiz doedok caeuq baenz hidungj bae baujhoh coihndei swnghdai vanzging rangh ginghci Dahcangzgyangh, gyavaiq laebhwnj aen dijhi lai yiengh roenloh daehyinh, coicaenh gaijcauh gij ruz byaij dahndaw. Coi hawj gij giekdaej sezsih Yez Gangj Au Davanhgih doxlienz doxdoeng, miz bouhloh bae hwnqguh gozci gohgi cauhmoq cungsim, gyavaiq hwnqguh Hwngzginz、 Hozdau daengj bingzdaiz doxgap hungnaek. Aeu biucinj sang bae hwnqguh aen dieg yienghbanj Cangzsanhgoz swnghdai saekheu baenz aen dog, doidoengh Cangzsanhgoz roenloh baenz aen dog ndeindei fazcanj, hwnqguh Hungzgyauz gozci hailangh cotsim. Vaiq bae guhndei gij hong bienceiq、 okdaiz aen gveihva ganghyau baujhoh swnghdai rangh Dahvangzhoz caeuq hawj de ndeindei fazcanj. Roengzrengz haeujcoengh Hwnqguh gvaengx ginghci suengsingz dieg Cwngzduh Cungzging, dajcauh giz demmaj youqgaenj daengx guek ndeindei fazcanj. Gaenxmaenx doicaenh hwnqguh gij roenloh moq Baihsae gwnzhawq doengh daengz haij. Haeujlaeg bae guh giz doiq giz bangcoengh. Haeujcoengh siujsoq minzcuz caeuq dieg minzcuz gyavaiq fazcanj. Doidoengh gij goengnaengz bingzdaiz aen sinhgih、 gaihfazgih guekgya gaep cauhmoq daezswng fazcanj, vaiq di coi hawj dieg baengh swhyenz guh ginghci cienjhingz caeuq hawj hawsingz dieg gunghyez gaeuq vuenhmoq gaijcauh. Doidoengh Sanhsih sawq bae gyoebhab gaijgwz nwngzyenz gwzming. Laebdaeb doicaenh hwnqguh gij dieg yienghbanj ciepcoux canjnieb senjnod, youq doengh aen hawsingz diegndaw miz diuzgienh haenx, dajcauh buek dieg hangznieb cauhguh daengjgaep sang ndeu. Ceiqdingh gij yigen gvendaengz fazcanj haijyangz ginghci gyavaiq gensez haijyangz guekak. Laebndei gij canloz caeuq cidu cawjdaej gunghnwngzgih, bienceiq 《Aen Gveihva Ganghyau Gyangdien Diegguek Daengx Guek （2021—2035）》.
Saedhengz ndei baenzroix cwngcwz haeujcoengh Huzbwz Swngj ginghci sevei fazcanj, haeujcoengh bauj couhnieb、 bauj gwndaenj beksingq、 bauj hongsaeh guhswnh caeuq diuz lienh canjnieb diuz lienh gunghawj mbouj duenh， coicaenh Huzbwz Swngj ginghci sevei yienghyiengh guh swnh dauq ndei.
Ngeih dwg doicaenh hwnqguh gij hawsingz yienghmoq aeu vunz guh cehsim. Daezsang gij caetliengh vunz nungzyez cienjbaenz vunz hawsingz, caiq laebndei boiqdauq cwngcwz, hawj baenz ik boux mbouj miz hugouj ndaw singz ndaej an’gya youq hawsingz. Dazyinx doengh aen hawsingz hunggaiq hungfag daezsang gij naengzlig boiqhawj yausu daengjgaep sang caeuq gij naengzlig youq seiqgyaiq beijak, gyavaiq gejsoeng gij goengnaengz mbouj dwg cehsim okbae. Hawj gij si sengj caeuq digih gaep doengh gij hawsingz hung rauh haenx ndaej gaijndei hawsingz goengnaengz, bouj giz dinj ak hangh nyieg, gaijndei gij binjcaet goenggungh fugsaeh, daezswng gij suijbingz hab youq hab cauhnieb. Gyavaiq coihawj yienhsingz hwnq baenz hawsingz yienghmoq, youq veiswngh、 sicwng goengyungh、 goenggungh fugsaeh、 canjnieb boiqdauq fuengmienh boujgouq doengh hangh mbangnyieg, bae hab’wngq gij aeuyungh nungzminz daengz ndaw singz couhnieb an’gya ngoenz lai gvaq ngoenz de. Doidoengh doengh giz cungdenj hawsingz gapgyoengq youq duenhgyang Cangzgyangh、 Cunghyenz、 Gvanhcungh Bingzyenz、 Sanhdungh Bandauj、 Bwzbuvanh fatmaj, haidaeuz guh buek hanghmoeg youq gvaengx hawsingz cungdenj hawj roenci doxlienz doxdoeng ndeu, haeujcoengh hawsingz gapgyoengq caeuq hawsingz cungsim daezsang gij naengzlig gyoebhab rapdawz caeuq engqndei boiqceiq swhyenz. Daezswng gij suijbingz hawsingz ceihleix yendaiva, gyaak gij rengz hawsingz dingjsouh cungdongj, doicaenh hwnqguh hawsingz coengmingz yienghmoq, dajcauh aen uk soqgawq hawsingz. Doidoengh hengzndei gij dijci gihci caeuq cwngcwz dijhi singz mbanj yungzhab fazcanj, dazyinx doengh aen siyengih guekgya singz mbanj yungzhab fazcanj de bae guh gaijgwz.
Sam dwg buek dem buek bae doicaenh aen canloz saenqhwng lajmbanj, henmaenh gij duetgungz gaenq guhbaenz. Hawj lajmbanj it ngeih sam canjnieb yungzhab fazcanj lai guh baenaj, haeujcoengh hwnqguh nungzcanjbinj gyagoeng yenzgih, gyavaiq hwnqguh dieg nungzyez canjyezyenz ciuhneix, hwnqguh buek dieg yienghbanj canjnieb lajmbanj yungzhab fazcanj、 aen cin ak nungzyez caeuq dieg nungzcanjbinj ndei miz gij daegsaek Cungguek, gungganq buek mbanj cungdenj baenz dieg youzangq lajmbanj, cauhmoq fazcanj gij canjnieb daegsaek lumjbaenz hangz youzangq guhcaemz lajmbanj、 hangz diengzcangh cauhguh miz minzcuz caeuq dangdieg daegsaek, vaiq bae fazcanj hangz fugsaeh yienghmoq lajmbanj, laeb ndei guh hung gij binjbaiz nungzyez. Laebndei gij cwngcwz baujcang diegyungh fazcanj canjnieb lajmbanj. Hawj cizdij ginghci ndaej bienq ak bae. Lai yunghrengz hwnqguh gij sezsih yienhdaih nungzyez，ciuq seiz guhbaenz gij boiqdauq ciepguh caeuq mbaetraemx gaijcauh aen guenqgih hung rauh. Laebdaeb doicaenh swnggaep gaijcauh denvangj lajmbanj caeuq hwnqguh roenloh lajmbanj, vaiq hawj gij vangjloz gvanhdai caeuq yizdung dunghsin lajmbanj gizgiz daengz caez. Aeu fuengzre binghraq guh giz roengzfwngz, haeujlaeg haiguh gij saeh hawj lajmbanj gizgiz seuq caez. Yawj dieg bae gaijndei diengzhaex lajmbanj, haenqrengz bae ceihleix nyapnyaj gwndaenj caeuq raemxuq, aeu sam bi guhbaenz yiengh hong gvatseuq diegyouq vunz lajmbanj. Damqra buenzhong dingjcengj hawj nungzyez saekheu fazcanj, lai roengzrengz gamcaek caeuq ceihleix gij uqlah giz goek baenz benq nungzyez. Ndaveh ndei aen mbanj ndaw yienh baenzlawz baij, gyavaiq bienguh gij ndaveh aen mbanj habyungh miz lai cungj gveihva doxcaemh. Hai hwnq aen yienh sawqhengz gyoebhab ceihleix gij diegraemx lajmbanj. Coihawj nwngzyenz lajmbanj fazcanj, gyavaiq doicaenh huqfeiq nungzyez ndaej yungh guh nwngzyenz、 swhyenz. Haeujlaeg haiguh gij sawqdiemj guhyiengh laebguh aen dijhi ceihleix lajmbanj.
（Bet） Gyavaiq hwnqguh aen dijci moq yiengh ginghci hailangh suijbingz engq sang, doinyoengx doiq rog hailangh aeundaej cincanj moq. Gaenxmaenx dingjdoiq saeh mbouj ndei youz binghraq banhraih daengx seiqgyaiq ngaih daengz, ndeindei doicaenh caez hwnq “it rangh it loh”, dawzmaenh aen buenzgoek vaimou vaiswh.
It dwg baujciz cingouj cuzgouj gihbwnj onjdingh. Roengz rengz hung bae haigvangq gij hawciengz lai cungj lai yiengh, coengh giyez doenggvaq gwnz vangj bae guh doxyaeng doxdamz、 gwnz vangj banh canjlanj, coicaenh doxgap、 haivat hawciengz. Haeujcoengh caeuq gikcoi gij giyez gai huq ok guek haenx gaenxmaenx haigvangq hawciengz ndaw guek, gaenxmaenx siubae gij saeh guek rog cawxaeu gemjnoix. Haeujcoengh gij seng’eiq denswj、 seng’eiq hawciengz dajcawx hamj guek doengh yiengh seng’eiq rog guek yienghnieb moq vunqsik moq neix gyavaiq fazcanj. Caiq lai doidoengh gij baujsuigih laiyiengh neix hailangh suijbingz sang ndeindei fazcanj. Hawj gij fugsaeh seng’eiq gaicawx cauhmoq fazcanj neix caiq hwnq giz sawqguh lwnz moq. Henmaenh seng’eiq gyagoeng fazcanj. Youq mwh fungyiemj ndaej gaemhanh, haeujcoengh gyahung hangz hong saenqyungh baujyiemj seizdinj cuzgouj caemhcaiq gyangqdaemq bijliz cienzbauj, laebhwnj gij anbaiz cienhangh saenqyungh baujyiemj cuzgouj dwg cwngcwz cinjhawj baenzduenh roxnaeuz ciengxlwenx. Gaenxmaenx couzbanh Gaiq Daihsam Cungguek Gozci Cingouj Bozlanjvei. Gaenxmaenx caeuqfaenh hwnqguh diuz lienh gozci vuzliuz gunghawj, baujndei gozci daehhuq doengrat.
Ngeih dwg gaenxmaenx yungh cienzrogguek. Cienzmienh saedhengz aen fap vaisangh douzswh caeuq boiqdauq fazgveih. Daihdaih sukgemj mbawdan gimq cienzrogguek haeujdaeuj, lai hawj hangz fugsaeh、 hangz ginhyungz、 hangz ceiqcauh、 hangz dajndaem doiq rog guek hailangh. Guh ndei gij hong ciuyinx seng’eiq、 anndei seng’eiq、 dinghmaenh seng’eiq, lai coi guh gij canjnieb ndaw moegloeg dwg canghseng’eiq rog guek okcienz, laebdaeb hawj buek hanghmoeg hungnaek cienzrogguek ndeu ndaej guh ndei. Doigvangq gij gingniemh hangz fugsaeh sawqguh gyalai hailangh. Lai bae fugsaeh gij giyez cienzrogguek, saedbauj gij giyez cienzndawguek caeuq gij giyez cienzrogguek caemh ndaej yungh daengz gij cwngcwz bang giyez gouq hoj. Lai senhconz gaisau gij douzswh vanzging caeuq cwngcwz raeuz, supyinx swhyenz dieg wnq miz bouhloh haeuj guek raeuz daeuj. Caiq lai hawj gij daigvanj rog guek、 gij cienzcaiq gaem baenz mboengq roxnaeuz gaem nanz doengh cungj cienzngaenz goekcienz daemq neix miz ok cozyung, fuengzre gij fungyiemj cienzcaiq rog guek.
Sam dwg doinyoengx caezlaeb “it rangh it loh”ndaej caetliengh sang fazcanj. Doeksaed ndei gij cwngzgoj Gaiq Daihngeih “It Rangh It Loh” Gozci Gapguh Gauhfungh Lundanz. Haeujlaeg doicaenh caeuq cungdenj guekgya nem gozci cujciz caensaed gapguh, daezsang gij naengzlig fuengzre gaemhanh caeuq cawqceq fungyiemj. Maenhsaed guhbaenz caeuq guekgya seiqhenz doxlienz doxdoeng, onjdangq doicaenh hwnqguh diuzroen rangh ginghci Cungh Mungz Ngoz、 Cungh Bah、 Cungguek — Cungh Nanz Bandauj. Lienzdaemh hawj gij hojceh daeh huq Cungguek caeuq Ouhcouh ndeindei fazcanj, lai hawj diuz roenloh seicouz soqcih hwnqbaenz gapguh. Gikcoi haiguh yinzvwnz baedauq, cuknet aen giekdaej aensim vunzbiengz caezlaeb “it rangh it loh”. Engq haenqrengz caeuq aen diegbouj biengz caeuq biengz doxgap.
Seiq dwg gyavaiq hwnqguh aen diegsang doiq rog hailangh. Gyalaeg ginghci dwzgih guh gaijgwz hailangh. Gyavaiq doeksaed gij gij yinvu swmou siyengih gaijgwz sawqdiemj, hawj swmou siyengih lai miz gienz gag guhcawj gaijgwz, guhbaenz gij cwngzgoj cidu cauhmoq ndaej raemhcauh ndaej doigvangq caetliengh engq sang. Fatbouh saedhengz aen cungjdaej fueng’anq hwnqguh Haijnanz Swyouz Mouyiz Gangj， hawj gij cwngcwz geizcaeux anbaiz de ndaej guh ndei. Okdaiz mbawdan gimq guh gij fugsaeh gaicawx hamj gyaiq gvendaengz Haijnanz Swyouz Mouyiz Gangj. Youq dieg Cungqgyang dieg Baihsae gyalaeb dieg swmou siyengih、cunghab baujsuigih. Daezsang gij siujbingz haifat hailangh dieg henzguek， haeujcoengh dieg henzguek ndaej hwnqguh dieg sawqguh haifat hailangh youqgaenj.
Haj dwg doidoengh rog guek douzswh bingzonj cangqheiq fazcanj. Dingjmaenh giyez cawjdaej, caezcienz faenloih dazyinx, gaijndei gij gezgou rog guek douzswh. Onjbouh bae guh gozci canjnwngz doxgap, haigvangq gij hawciengz lai yiengh, daiqdoengh canghbei、 gisuz、 fugsaeh、 binjbaiz、 biucinj “byaij okbae”. Laebcaez gij cwngcwz caeuq fugsaeh dijhi youq rog guek ok goekcienz, bang hangz fugsaeh swnghcanj guh sezgi、 damqcam、 gvaigi、 nyinhcingq、 faplwd neix gyaivaiq byaij coh seiqgyaiq cauh aen vanzging ndei, fuengbienh giyez ciuq saeh dingh geiq youq rog guek hwnqguh aencang cwkhuq. Gaenxmaenx haigvangq gij hawciengz doxgap fueng daihsam. Dazyinx giyez laebcaez aen dijhi rog guek guenjleix hab gveihfan, gveihfan gij saeh giyez youq rog guek guh hong， lai bae fuengzre gij fungyiemj rog guek.
Roek dwg gaenxmaenx caeuqfaenh ceihleix gozci ginghci. Giendingh henhoh aen dijci lai mbiengj gaicawx, gaenxmaenx caeuqfaenh gaijgwz Seiqgyaiq Mouyiz Cujciz （WTO）daengj lai mbiengj gihgou. Coi hengz aen canloz swmougih suijbingz engq sang, ceng’aeu ranghdieg cienzmienh ginghci guhdoih gvanhaeh hezding （RCEP） ciuq seiz ciemdingh, gyavaiq doicaenh Cungh Yiz Hanz daengj swmougih damzbuenq.
（Gouj）Netsaed guhndei gaiq hong baujdaej beksingq gwndaenj, baujndei gij gwndaenj beksingq haethaemh aeuyungh. Doiq gij vwndiz gwndaenj beksingq aenvih binghraq cauxbaenz, doenggvaq gyalai roengzcienz、 hengzndei cwngcwz bae gaijgez ndei.
It dwg caenh cekeiq onjdingh couhnieb. Gyarengz bangrex doengh gij giyez rauh iq deng binghraq yingjyangj, haeujcoengh giyez onjdingh gangvih, gveihfan gij hongsaeh giyez gemj vunz. Doicaenh gij fugsaeh vunzlai couhnieb vunz hawsingz lajmbanj ndaej daengz caez, deudoeng diuz roenloh daenghgeiq saetnieb, haeujcoengh laebhwnj aen bingzdaiz fugsaeh vunzhong caemh yungh、 baujndei couhnieb, hawj gij gihgou bang vunz ra hong dwg gai fugsaeh aeu cienz neix lai okrengz guhhong. Gyavaiq hengzndei doengh hangh giva lai ciu lwghag、 lai ciu bouxbing gaenq okdaiz haenx, giyez guekmiz bineix bimoq lienzdaemh gyalai ciusou lwghag gauhyau. Gikcoi daihhagseng okhag bae caengzlaj ra hong guh, gyahung gij hanghmoeg fugsaeh caengzlaj caeuq gij gveihmoz lienhguh hengzguh aen giva “sam bang it rex”. Hawj gij saeh cauhnieb ndaej daiqhwnj couhnieb lai baenz boix, hengzguh aen hengzdoengh gungganq bouxdaiqdaeuz cauhmoq cauhnieb lajmbanj, haeujcoengh nungzminzgungh、 gauhyau bizyezswngh caeuq bouxbing ok budui gyoengq vunz neix dauqma ranzmbanj cauhnieb, coi baenz lai roen lai giz ndaej hong guh，hableix bae laeb gizdieg hawj boux riuzdoengh buenqgai de youq gizhaenx guh gaicawx. Youq mwh hwnqguh goenggungh giekdaej sezsih, caenhliengh hawj bouxguhhong lajmbanj youq giz gyawj mbanj ra ndaej hong guh. Doicaenh aen bingzdaiz sonlienh dinfwngz hwnjhong guhbaenz vunzlai hwnq vunzlai yungh, lai roengzrengz haeujcoengh sonlienh gij dinfwngz hwnjhong, doiq gij hagseng ngamq doeg sat cuhcungh、 gauhcungh caeuq bouxcoz daenghgeiq saetnieb, gangjdoeng gyoengqde caeuqfaenh sonlienh dinfwngz caepcawq ra hong. Bineix bimoq sonlienh dinfwngz hwnjhong 3500 fanh vunzbaez doxhwnj, guhbaenz sam bi ndaej beizyin 5000 fanh vunzbaez. Gauhciz yenyau gyalai ciusou 200 fanh vunz.
Ngeih dwg gyavaiq boujcaez gizvaiq goenggungh veiswngh. Laebcaez aen dijhi fugsaeh goenggungh veiswngh, lai yungh faplwd baujndei goenggungh veiswngh, habdangq daezsang gij biucinj caizcwng bangbouj hangh cienz fugsaeh gihbwnj goenggungh veiswngh, laeb ndei aen doih vunzcaiz guh goenggungh veiswngh caeuq gyaak gij rengz fuengzre gaemhanh caengzlaj. Gaijgwz gij dijci yawhfuengz gaemhanh baenzbingh. Laebcaez gij dijci gihci fuengzhen gaemhanh binghraq hungnaek, laebcaez aen dijhi gouqgip guenjleix goenggungh veiswngh ndaw guek, cienzmienh gyaak gij naengzlig aen cungsim gaemhanh binghvanh, caenhliengh hawj gak sengj cungj miz aen sizyensiz dabdaengz gij suijbingz swnghvuz ancienz sam gaep, cauhlaeb yiengh gihci aeu aen yihyen cienmonz yw binghlah caeuq doengh aen cunghhoz yihyen aen gohsiz gyonj yw binghlah、 aen gohsiz yw binghdiemheiq、aen yihliuz gihgou wnq guh rengz bwh haenx, ndaveh baijbouh dieg gouqyw binghraq youqgaenj guekgya gaep. Lai bae gyoebhab gaijgwz yihyen goenglaeb. Fazcanj ‘hulenzvangj＋ywbingh ndangndei’. Daezsang gij naengzlig fugsaeh segih ywbingh singzmbanj. Doicaenh faengaep yawjbingh ywbingh. Hawj canghyw caeuq bouxbingh ndaej doxhuz. Coicaenh cunghyizyoz saenqhwng fazcanj， laebndei gij fugsaeh dijhi cunghyih ywbingh. Caiq bae coengh hawj daengxcungq yawhfuengz baujgen. Caiq bae coengh guh daengxcungq yawhfuengz baujgen. Gyalaeg hengzguh gij saeh Cungguek cangqndei.
Sam dwg gyavaiq hwnqguh aen dijhi sevei baujcang. Onjbouh daezsang caengzmbaek caemhcomz gihginh gihbwnj yihbauj, coicaenh caemhcomz ndei digiz si yihbauj, gujli giz dieg miz diuzgienh de damqra gij fuengfap sengjgaep caemhcomz. Laebhwnj gij gihci yawjseiz diuzcingj moegloeg gijyw yihbauj guekgya. Hawj cienz yihbauj mbouj deng sai, guhndei cungjsoq yawhsuenq guenjleix, doihengz yiengh fuengsik haihawj yihbauj hab gij yihliuz fugsaeh daegdiemj dangdieg, lai roengzrengz gaujhaed gij cizyau gihgou ywbingh dinghdiemj, haeujlaeg mbeguh youq dieg wnq yawjbingh ndaej cigsoh gietsuenq. Aen biucinj caizcwng bangbouj gihminz yihbauj bingzyaenz moix vunz daezsang 30 maenz. Guh daengz gijyw giepnoix ndaej bauj hawj caez, caiq gyalaeg yihliuz、 yihbauj、 yihyoz guh lienzdoengh gaijgwz. Miz bouhloh bae gya’gvangq aen gvaengx guekgya cujciz gijyw comz cawx caeuq yungh gijyw lawz, haiguh gij sawqdiemj guekgya cujciz comz cawx gij huq ywbingh yungh gyaq sang. Doicaenh sengjgaep caemhcomz saetnieb baujyiemj, cienzmienh guhdaengz sengjgaep caemhcomz goengsieng baujyiemj. Gyavaiq ciengxlaux baujyiemj daengx guek caemhcomz, guhbaenz gij gihginh gihbwnj ciengxlaux baujyiemj cizgungh giyez youz sengjgaep caemh sou caemh yungh, habdangq daezsang aen biucinj ceiq daemq gij cienz gihbwnj ciengxlaux vunz singz vunz mbanj. Guh ndei doengh hangh cwngcwz faen duenh bae siugemj、 doilaeng gyau caeuq gyangqdaemq bijli hangh cienz sevei baujyiemj, saedbauj sebauj daiyi ndaej ciuqseiz gaeuqsoq fat hawj. Gyavaiq vehcienj mbangj cienzngaenz guekmiz bae bouj sebauj gihginh. Gyavaiq hwnqguh aen dijhi lai caengz bae baujndei ndawbiengz, roengzrengz fazcanj gij giyez （hangzhong） lwnh bi hawj cienz、 bangbouj baujyiemj ywbingh, laebhwnj caemhcaiq doidoengh diuzsaeu daihsam baujyiemj ciengxlaux ndaej fazcanj. Gyahung gvaengx bauj saetnieb baujyiemj，aeu doengh boux nungzminzgungh camgya baujyiemj mbouj gaeuq bi ndeu daengj gij vunz saetnieb cungj dawz haeuj dieg ciengzseiz youq bae guh baujcang. Gyahung aen gvaengx swnghhoz baujcang ceiq daemq， doiq gij ranz gungzhoj singz mbanj wngdang bauj caenhliengh bauj， dawz gij vunz saetnieb caeuq dauqranz singz mbanj hab diuzgienh de gibseiz nabhaeuj ndaw dihbauj bae gouqbang. Guh ndei gij hong hawj cienz daihndei vunzranz doengh boux vih guh saeh guekgya vutmingh. Baujndei gij gienzik habfap mehmbwk、 lwgnyez、bouxndangcanz, laebcaez aen dijhi gvansim gyaezhoh gij lwgnyez caeuq mehmbwk、 bouxgeq louz youq lajmbanj. Coiguh gij hong hwnq ranz bauj youqonj, roengzrengz bae gungganq caeuq fazcanj ranzco, lai roengzrengz bae guh gij hong bauj ranzyouq gyoengqvunz gungzhoj hawsingz.
Seiq dwg henmaenh gij demmaj souhaeuj gihminz caeuq baujndei gij gwndaenj giekbonj gyoengq vunz youqgaenj. Caiq bae henmaenh yiengh demmaj dwg caizcanj souhaeuj gihminz liuh daengz haenx, habdoh doiq gagboux okcienz gya fat guekcaiq、 yiengh caiqgienq deihfueng cwngfuj. Gikcoi doengh giz dieg miz diuzgienh caiq daezsang gij souhaeuj cienjnod hawj gihminz. Caemhcomz coiguh gij gaijgwz hangz youqgaenj souhaeuj faenboiq, laebcaez diuzsienq dingh gunghswh caeuq aen cidu diucaz ngaenzhong giyez. Bauj nungzminzgungh youq dieg ciengzlwenx youq ndaej yungh gij cwngcwz couhnieb cauhnieb caeuq vunz ndaw hawsingz doxdoengz, ciuqfap baujndei gij gienzik nungzminzgungh aeundaej cienzhong, daj giz goek fuengzre gij saeh caiq niengqyiemq cienzhong nungminzgungh, hawj nungzminzgungh haeuj singz engq ndei yungz haeuj ndaw hawsingz. Guh ndei gij hong gaemhanh gyaqcienz nungzcanjbinj youqgaenj、seizduenh youqgaenj, guhndei gij hong ndawbiengz gouqbang caeuq baujndei biucinj riengz huqgyaq hwnjsang doxrangh doxning, haenqrengz daizdaej baujcang gij gwndaenj gyoengq vunz gunnanz. Caiq bae doengbuenz suenqveh laebndei aen cidu banggouq ndawbiengz hawsingz lajmbanj, onjbouh daezsang gij biucinj dihbauj hawsingz lajmbanj, laebdaeb doicaenh guhndei gij cwngcwz banggouq dihbauj caeuq gij cwngcwz banggungz dox hamzciep.
Haj dwg lienzdaemh daezsang gij suijbingz goenggungh fugsaeh. Doidoengh okdaiz aen biucinj goenggungh fugsaeh guekgya gaep, coi baenz gij gihgou fugsaeh caengzlaj guh biucinjvaq sawqdiemj. Onjdingh gyauyuz douzhaeuj， gaijndei douzhaeuj gezgou， hawj singz mbanj、 gak dieg、 gak hagdangz cengca ndaej bienq iq. Gyamaenh gij gihci bauj hawj gij cienz yivu gyauyuz hawsingz lajmbanj, gaenxmaenx vaqgej yiengh yivu gyauyuz hawsingz hagdangz ban hung mauhsoq, lai roengzrengz hwnqguh gij hagdangz ndaw yangh ndaw cin hagseng gwnninz youq ndaw hag caeuq gij hagdangz iq ndaw mbanj、 gij hagdangz ndaw yienhsingz， laebndei gij cwngcwz hawj gyoengq lwgnyez riengz bohmeh buensenj de ndaej haeuj hag ciepsouh yivu gyayuz. Guh ndei daegbied son’gyauq、 laebdaeb son’gyauq. Lai roenloh bae gyahung gij swhyenz ik doh gyoengq lwgnyez yaek haeuj hag, haeujcoengh dieg gig gungzhoj gyahung gveihmoz son’gyauq gyoengq lwgnyez yaek haeuj hag， bangcoengh youwzyenz minzbanh hoizsoeng hojnanz. Gyavaiq haenqrengz hengzguh bujgiz duenh gauhcungh gyauyuz, lienzdaemh gaijndei gij diuzgienh banhhag noix mbouj ndaej aen hagdangz dieg gungzhoj haenx. Onjdangq fazcanj bujdungh bwnjgoh gyauyuz caeuq yenzgiuswngh gyauyuz. Haeujcoengh gij gauhyau dieg Cungqgyang dieg Baihsae hwngfat. Hawj gauhdwngj yozyau lai youq lajmbanj caeuq dieg gungzhoj ciu hagseng. Ciuaeu bujdungh gauhdwngj gyauyuz bwnjgoh conhgoh hagseng 920 fanh vunz， ciuaeu yenzgiuswngh 111.4 fanh vunz. Lai roengzrengz coihawj guekgya hwnqguh giz sawq swnghcanj caeuq gyauyuz yungzhab. Gyaak gensez aen doih lauxsae. Doicaenh guhbaenz saenqsikvaq son’gyauq. Gaenxmaenx wngqdoiq vunzgyaeuj bienq geq, haeujcoengh gyoengq vunz ndawbiengz bae fazcanj gij fugsaeh ndei ciengxlaux、ndei dakciengx. Guhhwng guhhoengh cezyoz sevei gohyoz. Lai bae baujhoh yungh ndei vwnzvuz caeuq swnjcienz feihvuzciz vwnzva yizcanj. Laebdaeb guh gaiq hong daezswng vwnzva lijyouz, gaenxmaenx doidoengh vwnzva Dahvangzhoz ndaej baujhoh swnjcienz haenhgangj, gyavaiq coi hwnq gij hanghmoeg vwnzva sezsih youqgaenj, coihawj gij youzyawj daengx dieg、 gij youzyawj lajmbanj caeuq gij youzyawj dieg gwzming fazcanj. Gaenxmaenx doicaenh hwnqguh Haijnanz Gozci Lijyouz Siuhfei Cungsim、 Hwngzginz Gozci Youhhanz Lijyouz Dauj、 Bingzdanz Gozci Lijyouz Dauj. Gyavaiq doicaenh “hulenzvangj + lijyouz” fazcanj. Haeujlaeg haiguh yiengh saeh “bouxlingxdaeuz”, dohdaengz bae doicaenh hangz fugsaeh ndawranz guh ndei guh hung. Doicaenh hwnqguh aen ciengzdieg Dungh’auvei. Hengzguh gouqgip guenjleix naengzlig biucinj gensez, gyavaiq doidoengh gaijgwz gij dijci gihci canloz ancienz guenjleix gij doxgaiq bwhcwk canloz gouqgip. Lai roengzrengz gamcaek yawhgingj swyenz caihaih, gyavaiq saedhengz aen gunghcwngz hungnaek fuengzre swyenz caihaih, guhndei gij hong fuengz cai gemj cai caeuq gouq cai. Gyagiengz caeuq cauhmoq ndawbiengz ceihleix，laebcaez aen gihci guenjleix caeuq fugsaeh segih， hawj gij naengzlig wngqgip caengzlaj bienq ak. Haeujlaeg bae laeb aen fugsaeh dijhi goenggungh faplwd. Gyagiengz caeuq gaijndei gijgwn、 gijyw ancienz gamguenj. Yiemzgek hengz ndei ancienz swnghcanj cwzyinci, guh ndei ancienz swnghcanj caeuq huxndumj baizcaz, baenzbaenz aeu fuengzre miz ok gak yiengh saehhux cainanh hungnaek caeuq daegbied hungnaek.
Cienzmienh cinjdeng saedhengz gij fuengcim “aen guekgya ndeu song cungj cidu”、 “vunz Yanghgangj guenj Yanghgangj”、 “vunz Aumwnz guenj Aumwnz”、 gagguenj cingzdoh gig sang neix, giendingh mbouj bienq bae haeujcoengh caeuq doinyoengx Yanghgangj、 Aumwnz yungzhaeuj aen daihbuenz guekgya fazcanj bae. Aeu gozci ginhyungz、 hangzyin、 mouyiz cungsim gij ndei Yanghgangj guh baengh, doeksaed ndei gij hezding baenzroix anbaiz diegndaw caeuq Yanghgangj laebhwnj gij ginghmou gvaenhaeh engq gaenjmaed（CEPA）. Haeujcoengh Aumwnz hwnqguh seiqgyaiq lijyouz youhhanz cungsim、 hwnqguh aen bingzdaiz fugsaeh Cungguek caeuq doengh aen guekgya gangj Vahbuzdauzyaz doxgap guh seng’eiq. Gyalai song hamq ginghci vwnzva gyaulouz doxgap, hawj gyoengq beixnuengx Daizvanh giyez Daizvanh miz seizndei fazcanj engq lai、 dakdaih doxdoengz.
Bineix lij miz hangh yinvu youqgaenj ndeu, couh dwg aeu ciuq gij gezcwz baijbouh Dangjcunghyangh、 Gozvuyen, doenggvaq cienzmienh bingzguj “cibsam haj” gveihva guh ndaej baenzlawz yiengh le, cam’aeu yigen vunzlai, gyonjcomz dungxcaiz beksingq, bienguh gozminz ginghci caeuq sevei fazcanj daih cibseiq aen haj bi gveihva 《Ganghyau》, caemhcomz guhndei gij hong bienguh “cibseiq haj” guekgya gaep cienhangh gveihva、 ranghdieg gveihva、 hoenggan gveihva、 deihfueng gveihva, guh ndei caepcawq daezgyau“cibseiq haj” gveihva 《Ganghyau Caujan》hawj Gaiq Cibsam Daengx Guek Yinzda Baez Hoih Daihseiq saemjcaz.
Gak boux daibyauj：
Doengbuenz suenqveh guh ndei gij hong fuengzre gaemhanh binghraq bi 2020 caeuq ginghci sevei fazcanj gig miz yiyi, yinvu gannanz hungnaek. Raeuz aeu engqgya gaenjmaed doxgiet youq seiqhenz aen Dangjcunghyangh aeu Siz Ginbingz dungzci guh cehsim, yaengx sang mbaw geiz hungmbwk yiengh sevei cujyi miz gij daegsaek Cungguek, aeu Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz daeuj dazyinx, demgiengz “seiq rox”、 giendingh “seiq aen gagsaenq”、 guh daengz “song aen henhoh”, ciuq gij gezcwz baijbouh Dangjcunghyangh、 Gozvuyen, gagrox hawj Daengx Guek Yinzda gamduk, nyinhcaen dingqaeu gij yigen caeuq genyi Daengx Guek Cwnghez, dingj nanz bae guh、 gouz caen guh saed, gagrox dawzrap、 gungroengz hojnanz, youq ciengzseiz fuengzre gaemhanh binghraq le, roengzrengz ca ginghci、 coi swnghcanj、 gya aeuyungh, roengzrengz guhbaenz gij muzbyauh yinvu daengx bi ginghci sevei fazfanj, cienzmienh hwnqbaenz aen biengz siujgangh, vih hai ok diuz roenloh moq cienzmienh hwnqbaenz sevei cujyi yendaiva guekgya dwk roengz giekdaej maenhsaed.
（Sinhvazse Baekging 5 nyied 30 hauh dienh）
