Cwngfuj Gunghcoz Baugau
2019 Nienz 3 Nyied 5 Hauh Youq Gwnz Gaiq Cibsam Daengx Guek Yinzminz Daiqbiuj Daihhoih Baez Hoih Daihngeih
Gozvuyen cungjlij Lij Gwzgyangz
Gak boux daiqbiuj:
Seizneix, gou daiqbiuj Gozvuyen, yiengq daihhoih bauqgangj gij hong cwngfuj, cingj saemjlwnh, caemhcaiq cingj gyoengq veijyenz Daengx Guek Cwnghez daezok yigen.
It、Ngeuxyawj Gij Hong 2018 Nienz
Bi gvaqbae neix dwg bi hainduj cienzmienh gvancez gij cingsaenz Cibgouj Daih Cunghgoz Gungcanjdangj, dwg bi daih'it bonj gaiq cwngfuj ciuqfap hengzguh cizcwz. Guek raeuz hwngfat bungzdaengz yiengh hingzseiq fukcab yiemzhaenq ndawguek rogguek, neix lai bi noix raen, ginghci miz ok gij rengz gyodroengz moq. Ndaej aen Dangjcunghyangh aeu Siz Ginbingz dungzci guh cehsim dazyinx giengzak, daengx guek gak cuz lwgminz ciuq gij ceijyinx Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz, coh nanz roemx bae, gunggeng cawz hoj, guhbaenz le gij hong ceiq youqgaenj daengx bi ginghci sevei hwngfat nienzco doekdingh, doeksat gietdingh cienzmienh cauhlaeb aen biengz siujgangh ndaejbaenz caiq aeundaej baenaj hungnaek moq.
—— Ginghci yinhhengz ndaej youq ndaw gvaengh daegdingh hableix. Gij swnghcanj cungjciz ndawguek demmaj 6.6%, cungjliengh mauhgvaq 90 fanh ik maenz. Ginghci demmaj vaiqmenh caeuq gij cijbyauh soqliengh saedhuq lumjbaenz yungh dienh、yinh huq daengj doxdaengh. Gij gyaqcienz siuyungh gihminz hwnjsang 2.1%. Gozci soucei daihdaej doxdaengh. Hawsingz caiq miz 1361 fanh vunz miz hong guh, aen beijlwd diucaz saetnieb onjdingh youq 5% baedauq, neix suenq haemq daemq. Aen guek hung cingqcaih hwngfat gaenh 14 ik vunz ndeu, guhdaengz cukgaeuq miz hong guh.
—— Aen gvaenghgyaq ginghci mboujduenh bienqndei. Geu rengz siuyungh ragdoengh ginghci demmaj caiq ndaej dem'ak. Hangznieb fugsaeh gunghawj ginghci demmaj ciepgaenh 6 cingz, canjnieb gisuz sang、hangznieb dajcauh cangboiq demmaj yienhda vaiq gvaq itbuen gunghyez, nungzyez soucingz youh caiq raen ndei. Danhvei swnghcanj cungjciz ndawguek siuyungh nwngzyenz doekdaemq 3.1%. Caetliengh caeuq yauqik laebdaeb daezswng.
—— Gij rengz moq doinyoengx hwngfat majbaenz riengjvaiq. Cangzngoz Seiq Hauh daengj buek soundaej cauhmoq gohgi hungnaek ndeu lienzdaemh guhbaenz. Canjnieb ngamqhwng hwngfat hoenghhwd, canjnieb cienzdoengj ndaej gyavaiq cienjhingz swnggaep. Vunzlai cauhnieb、cauhmoq ndaej doi haeuj gizlaeg, bingzyaenz moix ngoenz laeb giyez moq mauhgvaq 1.8 fanh aen, cawjdaej hawciengz gyoebsuenq mauhgvaq ik aen. Geu rengz doinyoengx moq cingqcaih laegdaeuq gaijbienq gij fuengsik swnghcanj swnghhoz、gungcauh gij ak moq hwngfat Cungguek.
—— Gaijgwz hailangh caiq ndaej cungbyoengq. Gaijgwz gij gihgou Gozvuyen caeuq deihfueng cwngfuj guh ndaej swnh fwngz swnh din. Gaijgwz aen lingjyiz ceiq youqgaenj de yamqok yamq moq, aen cidu mbawdan gimqhaed ndaej cienzmienh saedhengz, gij rengz gaijgwz gemj cwng cuengq gienz、cuengq guenj giethab、fugsaeh bienqndei ndaej gyadaih, aen vanzging gaicawx youq gwnz seiqgyaiq baizmingz bonghyat haeuj gonq. Doiq rog hailangh ndaej daj gak fuengmienh gya'gvangq, caezlaeb “it rangh it loh”caiq guh ndaej baenaj. Gaiq Daih'it Cungguek Gozci Cingouj Bozlanjvei banh ndaej ndeindumq, Haijnanz Swmou Siyengih ndaej doenghfwngz cauhlaeb. Doxgaiq cingouj cuzgouj cungjngeg mauhgvaq 30 fanh ik maenz, saedsaeh yungh gij cienzngaenz guekrog 1383 ik meijyenz、youq ndaw gij guekgya cingqcaih hwngfat de naengh onj vih daih'it.
—— Sam ciengz ciengq hung ceiq hoj gung haenx haihoenx raen ndei. Fuengzre siucawz fungyiemj hungnaek, aen beijlwd dawzcaiq ciemq swnghcanj cungjciz ndawguek coh yiengq onjdingh, ginhyungz yinhhengz daihdaej bingzonj. Dawzcinj duetgungz doicaenh mizrengz, gij vunzsoq gungzhoj lajmbanj gemjnoix 1386 fanh, miz 280 fanh vunz ndaej senjdieg banggungz. Fuengzceih uqlah ndaejdaengz gyahaenq, naedfaenx mokmong (PM2.5) laebdaeb bienq daemq, cauhlaeb swnghdai vwnzmingz cingzyauq yienhda.
—— Gij gwndaenj lwgminz ndaej laebdaeb gaijndei. Gij souhaeuj ndaej ceiyungh gihminz bingzyaenz moix vunz saedsaeh demmaj 6.5%. Daezsang aen soq mauhgvaq couh aeu cwngsou goyinz sojdwzsui, ndalaeb gaeucawz 6 hangh cienhangh bengxgya. Gyarengz baujcang gij ciengxlaux giekbonj、yihbauj giekbonj daengj, yungh cienzcaiz bae bang gij hagseng ndaw ranz hojnanz gak loih hagdangz, gyoebsuenq gaenh ik vunz baez. Gaijcauh 620 lai fanh dauq ranzyouq dieg ranzdiengz, gaijcauh ranzvaih lajmbanj 190 fanh hoh. Gij gwndaenj gihminz singzmbanj youh caiq raen bienq ndei.
Raeuz gig hoengh bae angqhoh gaijgwz hailangh 40 hopbi, laegdaeuq bae cungjgez gij cingzcik hungmbwk caeuq gingniemh dijbauj gaijgwz hailangh, yiemzsuk nyinhcaen gangjok youq seizdaih moq laemxsim guh gaijgwz hailangh, gikcoi daengx guek gak cuz lwgminz laebdaeb buekguh, youq gwnz roen lizsij fazcanj caiq cauh ok yiengh niebcik hungmbwk moq.
Ngeuxyawj bi gvaqbae neix, cingzcik ndaej daeuj mbouj yungzheih. Gij raeuz najdoiq dwg gij vanzging baihrog bienqvaq laegdaeuq. Ginghci byaijcoh seiqgyaiq bungzdaengz daemdengj, lai mbiengj caeuqfaenh caez guh deng cunggik, aen hawciengz gozci ginhyungz fubfab mbouj dingh, daegbied dwg Cungguek Meijgoz ginghci mouyiz doxdawz hawj di giyez ndeu swnghcanj ginghyingz、hawciengz yawhgeiz daengj daiq daeuj yingjyangj mbouj ndei. Gij raeuz najdoiq dwg cungj deuqnyex yiemzhaenq raq in ginghci cienjhingz yienhloh okdaeuj. Mauzdun gaeuq moq doxgeuj, gij vwndiz hopgeiz miz ok、gvaenghgyaq miz ok doxdab doxdaeb, ginghci yinhhengz bingzonj miz bienq、ndaw bienq miz you. Gij raeuz najdoiq dwg aen geizseiq fukcab yiengh vwndiz song cungj hojguh lai cungj hojguh gyalai. Guhbaenz onjdangq demmaj、fuengzre fungyiemj daengj lai caengz moegbiu, guhbaenz ginghci sevei hwngfat daengj lai hangh yinvu, cawqleix ndei dangqnaj caeuq gyaeraez daengj lai cungj gvanhaeh, gij nanzdoh genjdingh cwngcwz caeuq doicaenh hongsaeh gyadaih yienhda. Ginggvaq daengx guek gwnz laj doengzcaez roengzrengz, gij ginghci hwngfat guek raeuz youq gwnz soqgiek sang daihdaej bingzonj youh ndaej baenaj, aen daihbuenz ndawbiengz baujciz onjdingh. Gijneix caiq biujmingz baez ndeu, ndaej Cungguek Gungcanjdangj dazyinx, lwgminz Cungguek miz damjliengh、dungxcaiz caeuq naengzlig siucawz sojmiz gannanz yungyiemj, gij hwngfat Cungguek mboujmiz yiengh hojnanz lawz siucawz mboujndaej.
Bi ndeu daeuj, raeuz haeujlaeg gvancez gij gezcwz baijbouh aen Dangjcunghyangh aeu Siz Ginbingz dungzci guh cehsim, dingjmaenh aen diuhgoek guhhong ndaw bingzonj gouz baenaj, cingjdaej suenqveh bingzonj demmaj、coicaenh gaijgwz、diuzcingj gvaenghgyaq、 hawj leih lwgminz、fuengzre fungyiemj, onjdangq wngqdoiq gij ginghci mouyiz doxdawz Cungguek Meijgoz, roengzrengz coisawj couhnieb onjdingh、 ginhyungz onjdingh、vaimou onjdingh、vaiswh onjdingh、douzswh onjdingh、yawhgeiz onjdingh, cujyau guh le hongsaeh lajneix.
It dwg cauhmoq caeuq laebndei hungzgvanh diuzgung, ginghci baujciz yinhhengz bingzonj. Najdoiq cingzgvang moq bienqvaq moq, raeuz dingjmaenh mbouj guh cungj gikcoi haenqrem lumj “hai raemx hung guenq roenx”, hawj hungzgvanh cwngcwz ndaej lienzdaemh ndaej onjdingh, youq gwnz giekdaej ndaw gvaengh daegdingh diuzgung gyarengz dinghyiengq、yawjseiz diuzgung, gagrox yawhdiuz、diuzgung saek di. Dingjmaenh saedhengz aen cwngcwz caizcwng gaenxmaenx, comzrengz gemj gvaeh gyangq feiq、bouj benjdinj diuz gvaenghgyaq. Diuzdaemq aen suiqlwd cwnghcizsui, gya'gvangq aen gvaengh giyez iq saeq yiengjsouh gemjnoix sou gvaeh, fatbouh saedhengz aen cwngcwz suisouh lumjbaenz gikcoi yenzgiu haifat cauhmoq daengj. Daengx bi doiq giyez caeuq dan boux vunz gemj gvaeh gyangq feiq daihgaiq 1.3 fanh ik maenz. Coisawj gij gvaenghgyaq caizcwng ceiok bienq ndei, yungh ndei gij cienz caizcwng gaenq miz, gij ceiok aen lingjyiz ceiq youqgaenj de ndaejdaengz baujcang. Dingjmaenh saedhengz aen cwngcwz cienzngaenz onjmaenh, dazyinx ginhyungz haeujcoengh yiengh ginghci saeddaej. Cimdoiq gij vwndiz hojnanz couzcienz、 couzcienz cingzbonj sang, gonqlaeng 4 baez gyangqdaemq aen beijlwd cienzbwh romngaenz, yungh lai cungj guhfap hoizsoeng yiengh yungh ngaenz gaenjcieng doengh aen giyez minzyingz caeuq giyez iq saeq， aen seiqdaeuz couzcienz cingzbonj hwnjsang de ndaej menhmenh naenxhaed. Gibseiz wngqdoiq gij fubfab mbouj cingqciengz haw gujbyau、haw caigen，yinzminzbi veiliz daihdaej onjdingh， vaivei bwhcwk baujciz youq 3 fanh ik meijyenz doxhwnj.
Ngeih dwg netsaed dwk ndei sam ciengz ciengq hung ceiq hoj gung， gij hong ceiq youqgaenj de ndaej guh baenaj. Dingh'ok caemhcaiq miz bouhloh bae saedhengz aen fueng'anq sam bi hengzdoengh dwk sam ciengz ciengq hung ceiq hoj gung. Yamqonj doicaenh gaiq hong daj gwnz gvaenghgyaq bae gemjnoix dawzcaiq，onjdangq cawqceq gij fungyiemj ginhyungz lingjyiz，fuengzre gaemhanh gij fungyiemj ngaenzcaiq deihfueng cwngfuj，gaijgwz laebndei aen gihci diuzgung hawciengz fangzdicanj. Gyalaeg doicaenh dawzcinj duetgungz， gyarengz banggungz，gyalai douzhaeuj cienzngaenz， gyaak gij bangfuz ndawbiengz，geu rengz gag bae hwngfat dieg gungzhoj onjmaenh demhung. Cienzmienh mbeguh ciengz ciengq henhoh mbwn lamz、raemx saw、namh seuq. Coisawj gij gvaenghgyaq nwngzyenz caeuq daehyinh bienq ndei. Onjdangq doicaenh ranghdieg Baihbaek guh“meiz gaij heiq” “meiz gaij dienh”. Cienzmienh laebhwnj aen cidu bouxdaeuz guenj dah、 bouxdaeuz guenj huz. Aen soqliengh yungh vafeiz、 nungzyoz cungj ndaej gemjnoix. Gyarengz dawzfap dukcaz baujhoh swnghdai vanzging. Gaenxmaenx wngqdoiq dienheiq bienqvaq.
Sam dwg gyalaeg gaijgwz aen gvaenghgyaq mbiengj gunghawj，hawj gij rengzhoengh yiengh ginghci saeddaej mboujduenh cuengqok. Roengz rengz hung guh“buq、 laeb、gyangq”. Doicaenh ciuq hawciengz bae siugemj gij swnghcanj nwngzliz laiyawz hangznieb gangdiet、 meizdanq. Saedhengz gij guhfap coisawj douzswh onjdingh，gij douzswh hangznieb dajcauh、gij douzswh ndawbiengz demgya hoizswng yienhda. Fatbouh saedhengz aen cwngcwz gikcoi gihminz siuyungh. Cienzmienh doicaenh “hulenzvangj ＋”， yungh gisuz moq vunqsik moq bae gaijcauh aen canjnieb cienzdoengj. Haeujlaeg doicaenh gemjnoix saemjbae、gemj gvaeh gemj feiq. Siubae buek saehhangh hingzcwng cinjhawj ndeu， gij gaijgwz “cwng cau faenliz”ndaej youq daengx guek doihai， gij seizgan haibanh giyez gemjnoix fukdoh lai， gij cingq cinjhawj guh gunghyez swnghcanj de cungjloih gemj bae sam faenh cih it doxhwnj. Cungj gamguenj “song yiengh seizbienh、aen goenghai ndeu” ndaej cienzmienh hengzguh. Cingleix gvidingh gak cungj soucienz nangqdaengz giyez，doinyoengx gyangqdaemq cingzbonj lumjbaenz yungh dienh、yungh vangjloz caeuq doxgaiq riuzdoengh daengj. Gyalaeg “hulenzvangj ＋ gij fugsaeh hongsaeh guenjleix guekgya”, gak dieg damqra doigvangq buek guhfap gaijgwz miz daegsaek ndeu, giyez caeuq vunzlai banhsaeh yied daeuj yied fuengbienh.
Seiq dwg haeujlaeg hengzguh aen canloz cauhmoq doinyoengx hwngfat， gij naengzlig caeuq yauqlwd cauhmoq caiq ndaej gyaak. Haenqrengz coisawj aen swnghdai cauhmoq bienq ndei，diuhdoengh gak loih cawjdaej gaenxguh cauhmoq. Gyalaeg gaijgwz aen dijci guenjleix gohgi, doicaenh gungroengz gij gisuz cehsim ceiq youqgaenj de， gyarengz hwnqguh gij sezsih giekdaej hawj gohgi hungnaek、aen cungsim cauhmoq gohgi daengj. Gyamaenh aen diegvih doengh aen giyez guhbaenz cawjdaej guh cauhmoq gisuz， dawz aen cwngcwz daezsang aen beijlaeh gya suenq gaeucawz gij feiqyungh yenzgiu haifat gya'gvangq daengz sojmiz giyez. Dingh'ok gij cwngcwz guhfap haeujcoengh cauhmoq cauhnieb hwngfat haeuj laeg bae. Aen soqngeg gisuz habdoengz gaicawx demmaj 3 cingz doxhwnj. Aen beijlwd gohgi cinbu gunghawj daengzsang daengz 58.5%.
Haj dwg gyarengz gyadaih gaijgwz hailangh， geu rengz doinyoengx hwngfat ndaej lienzdaemh dem'ak. Gyalaeg gaijgwz gij swhcanj guekmiz、giyez guekmiz， giyez guekmiz dauqcungz cujhab bienqndei、daez caet dem yauq caiq ndaej guh baenaj. Cimdoiq gij gunnanz caeuq vwndiz giyez minzyingz hwngfat bungzdaengz， siengj ok gak cungj banhfap bangcoengh siu hoj gej you. Doicaenh gaijgwz aen dijci caizsui, cienzmienh doenghfwngz bae gaijgwz gaiq hong guenjleix cikyauq yawhsuenq. Gaijgwz aen dijci gamguenj ginhyungz， laebndei aen gihci youz hawciengz cauxbaenz leihlwd、 veiqlwd. Gij gaijgwz nungzyez lajmbanj、saehnieb ndawbiengz、baujhoh vanzging swnghdai daengj lingjyiz ndaej mboujduenh haeuj laeg. Doiok baenzroix guhfap hungnaek doiq rog hailangh. Geu rengz dazyinx caezlaeb“it rangh it loh” lienzdaemh cuengqok，aen gihci caeuq gij guekgya song henz loh de gapguh ndaej mboujduenh caezcienz， ginghci mouyiz gapguh caeuq yinzvwnz gyaulouz ndaej gyavaiq doicaenh. Fatbouh saedhengz gij cwngcwz coisawj vaimou bingzonj, gij seizgan doxgaiq doenggvan ndaej atsuk dingz ndeu doxhwnj. Diuz daemq gij gvansuiq cingouj hawj mbangjdi sanghbinj，aen cungjsuijbingz gvansuiq daj 9.8％ gyangq daengz 7.5％. Caiq cauhlaeb buek siyengih gyoebhab densangh hamj gyaiq ndeu. Fukceiq doigvangq gij gingniemh gaijgwz swmou siyengih. Lailai atsuk mbaw dan gimqhaed swhbwnj guekrog haeujbae， gya'gvangq hailangh ginhyungz、giceh daengj hangznieb， hawj buek hanghmoeg swhbwnj guekrog hungnaek ndeu ndaej hwnqguh, gij giyez swhbwnj guekrog douzswh saen laeb de demmaj gaenh 7 cingz.
Roek dwg cingjdaej suenqveh singzmbanj hwngfat， gyavaiq guhbaenz aen gvaenghgek doxnyoengx ndeindei. Mizrengz bae saedhengz aen canloz saenqhwng lajmbanj，aen cungjcanjliengh haeuxgwn sou ndaej 1.3 fanh ik gaen doxhwnj. Netsaed doicaenh hwnqguh hawsingz yiengh moq，ca mbouj geij miz 1400 fanh nungzminz senj haeuj hawsingz bae an'gya. Doicaenh haifat Baihsae、 saenqhwng Doengbaek、Cungqgyang hwnghwnj、 Baihdoeng sien hwng，fatbouh saedhengz buek guhfap gaijgwz cauhmoq ndeu. Baekging Denhcinh Hozbwz gapfwngz hwngfat caiq ndaej guh baenaj yienhda，gij swnghdai ranghdieg ginghci Dahcangzgyangh ciemqgonq、aen gvaenghgek saekheu hwngfat ndaej mboujduenh gyamaenh. Gviveh hwnqguh Yez Gangj Au Davanhgih ndaej doekdingh saedhengz，Gangj Cuh Au Da'gyauz ndaej hwnqbaenz doeng ci. Gya rengz hung haeujcoengh dieg doenghbaez guh gwzming、dieg minzcuz、dieg henz guek、dieg gungzhoj gaijgwz hwngfat. Caiq miz 4100 goengleix dietloh gauhsuz doeng ci, saen hwnq gaij hwnq 6000 lai goengleix goengloh gauhsuz、30 lai fanh goengleix goengloh lajmbanj. Ranghdieg singzmbanj doxdaengh hwngfat ndaej laebdaeb demhaenq.
Caet dwg dingjmaenh youq mwh hwngfat baujcang caeuq gaijndei gij gwndaenj lwgminz，gij soundaej gaijgwz hwngfat ndaej engq lai engq goengbingz ndei daengz beksingq. Cimdoiq gij yingjyangj vanzging baihrog bienqvaq daiq hawj couhnieb， gibseiz fatbouh saedhengz gij guhfap onjdingh couhnieb. Haenqrengz doinyoengx doeksaed gij cwngcwz lai gya gij cienzhong fukleih hawj boux lauxsae guh gaiq hong duenh yivu gyauyuz， gyarengz hwnqguh gij hagdangz iq lajmbanj caeuq gij hagdangz dozninz yanghcin, coicaenh gauhdwngj gyauyuz guh yiengh hwngfat hoengh ndaw. Laebhwnj aen cidu cunghyangh diuz bouj cungj gihginh baujyiemj giekbonj ciengxlaux hawj gyoengq cizgungh giyez，lai gya gij cienz goek ciengxlaux hawj boux duiyouh，gij cienz ciengxlaux giekdaej boux gihminz singzmbanj ceiq daemq daj moix ndwen 70 maenz gyalai daengz 88 maenz. Laebdaeb daezsang gij biucinj youhfuj、 dihbauj daengj，“song hangh boujdiep” bouxndangcanz hawj sojmiz boux hab diuzgen de cungj ndaej ndei daengz fwngz. Gyarengz guh gij hong fugsaeh guenjleix bouxbing doiqok bingdoih， henhoh gij gienzik habfap bouxbing doiqok bingdoih. Gyalaeg doxgaen doxriengz bae gaijgwz ywbingh、yihbauj、gijyw. Yamqonj doicaenh faengaep yawjbingh ywbingh. Daezsang aen biucinj yihbauj giekbonj bangbouj caeuq aen beijlaeh baujyiemj bauqsiu bingh hung ginhminz singzmbanj. Gyavaiq gaijgwz saemjbingz saemjbae yw moq，17 cungj yw dingj bingh'aizcwng ndaej roengzgyaq caemhcaiq nabhaeuj ndaw moegloeg yihbauj guekgya bae. Gyavaiq doicaenh aen gunghcwngz hawj vwnzva ikleih lwgminz， lienzdaemh gyarengz guh gij fugsaeh vwnzva goenggungh caengzgiek. Cienzminz cangqndang ndaej mbeguh hoenghhwd，boux dijyuz ak de youq gwnz gozci beijak youqgaenj caiq aeundaej cingzcik ndei.
Bet dwg doicaenh cauhlaeb aen cwngfuj fapceih caeuq cauhmoq ceihleix，baujciz ndawbiengz huzndei onjdingh. Gij yian daezcingj Daengx Guek Yinzda Cangzveijvei saemjlwnh faplwd de miz 18 gienh， ceiqdingh coihdingh gij fapgvi hingzcwng 37 bouh. Gaijgwz diuzcingj ndabaij cwngfuj gihgou caeuq boiqceiq ciznwngz. Haeujlaeg haiguh Gozvuyen daih dukcaz, doinyoengx doeksaed gij cwngcwz caeuq baijbouh gaijgwz hwngfat. Aeu saemjgeiq langh rengz guh gamduk. Gaijgwz laebndei gij guhfap ceihleix caengzgiek singzmbanj. Cauhmoq gij fuengsik guh gaiq hong sinfangj. Gaijgwz caeuq gyahaenq guenjleix wngqgip，gibseiz mizyauq bae wngqdoiq diencai hungnaek，aen cungjliengh saehhux swnghcanj ancienz caeuq gij soqliengh saehhux hungnaek daegbied hungnaek laebdaeb doekdaemq. Gyarengz gamguenj gijgwn gijyw ancienz，yiemzhaenq cazbanh gij anqgienh yizmyauz miz vwndiz de lumjbaenz Cangzcunh Cangzswngh Gunghswh daengj. Laebmaenh aen dijhi guekgya ancienz. Gyarengz gyoebhab ceihleix cianh ndawbiengz，cienhangh baetcawz seiqlig yaksieb，ciuqfap dwkceih gak loih famhfap famhcoih，gij hong cauhlaeb Cungguek bingzan caiq ndaej guh baenaj.
Nyinhcaen gvancez aen canloz baijbouh coengzyiemz guenjdangj Dangjcunghyangh，gyarengz cauhlaeb dangjfungh lenzcwng. Doicaenh “song hag it guh” hagsib gyauyuz bienqbaenz cidu bingzciengz bae. Coengzyiemz doeksaed gij cingsaenz Bet Hangh Gvidingh Cunghyangh caeuq gij banhfap ciengzsaeq hengzguh de，giendingh mbouj bienq bae niujcingq “seiq cungj cozfungh”. Dawzyiemz cazcawq gak loih hingzveiz famh faplwd famh gvidingh，ceihfad boux gauj nduknaeuh， ciengz doucwngh fanj nduknaeuh ndaejdaengz mbat hingz lanzdangj mboujndaej.
Bi gvaqbae neix，cungj vaigyauh guek hung miz gij daegsaek Cungguek aeundaej cingzcik moq. Guhbaenz gij vaigyauh hozdung aen cawjciengz hungnaek, lumjbaenz aen nienzhoih Bozauz Yacouh Lundanz、aen hoih gaep sang Cinghdauj Sanghaij Hozcoz Cujciz、aen hoih gaep sang Baekging Cungh Feih Hozcoz Lundanz daengj. Siz Ginbingz cujsiz daengj boux lingjdauj guekgya okbae cunzfangj lai aen guekgya，camgya lai cungj hozdung hungnaek, lumjbaenz aen hoih mbouj dwg cingqsik bouxdaeuz Yadai Ginghci Hozcoz Cujciz、aen hoih bouxdaeuz gaep sang Ngeihcib Guek Cizdonz、 bouxdaeuz Guekgya Gimcien doxraen、aen hoih bouxdaeuz Ya Ouh、gij hoih baenzroix bouxdaeuz Dunghya Gapguh daengj. Gij gvanhaeh caeuq aen guek hung ceiq youqgaenj de cungjdaej onjdingh，gij gvanhaeh caeuq aen guek seiqhenz cienzmienh hwngfat， gij gvanhaeh caeuq gij guekgya cingqcaih hwngfat de doxgiet gapguh engqgya gaenjmaenh. Doinyoengx cauhlaeb yiengh gozci gvanhaeh moq，doinyoengx cauhlaeb aen minghyinh caezcaemh vunzloih. Giendingh henhoh gij cawjgienz、ancienz、leih'ik hwngfat guekgya. Yiengh vaigyauh ginghci、yiengh gyaulouz yinzvwnz soundaej baenzroix. Cungguek roengzrengz coicaenh seiqgyaiq hozbingz caeuq hwngfat, guh'ok le gij gunghawj youqgaenj vunz biengz caez raen.
Gak boux daiqbiuj！
Gij cingzcik bi gvaqbae neix aeundaej，dwg aen Dangjcunghyangh aeu Siz Ginbingz dungzci guh cehsim akrengz dazyinx ndaej daeuj，dwg Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz ceijyinx habngamj gohyoz ndaej daeuj, dwg daengx Dangj daengx ginh daengx guek gak cuz lwgminz doxgiet buekguh ndaej daeuj. Gou daiqbiuj Gozvuyen, caensim docih daengx guek gak cuz lwgminz, gak aen minzcuj dangjbai、 gak aen donzdij lwgminz caeuq doengh bouxmizmingz gak gyaiq! Caensim docih gyoengq beixnuengx Yanghgangj Dwzbez Hingzcwnggih、gyoengq beixnuengx Aumwnz Dwzbez Hingzcwnggih、gyoengq beixnuengx Daizvanh caeuq gyoengq beixnuengx youq rogguek! Caensim docih gak guek cwngfuj、gozci cujciz caeuq gyoengq baengzyoux gak guek gvansim caeuq haeujcoengh Cungguek cauhlaeb yendaiva!
Lai ngeix seiz nanh cij ndaej gvaq seiz onj. Youq mwh cungfaen haengjdingh cingzcik， doengzseiz aeu singjsak yawj daengz gij vwndiz caeuq deuqnyex guek raeuz hwngfat bungzdaengz. Gij ginghci gwnz seiqgyaiq demmaj gemjmenh, baujhu cujyi、danhbenh cujyi gyahaenq， gij gyaqcienz cungj sanghbinj soqliengh lai de yaep hwnj yaep roengz, gij yinhsu mbouj onjdingh mbouj doekdingh de demgya yienhda, gij fungyiemj baihrog cienz haeujdaeuj de swnghwnj. Geu rengz gyodroengz ginghci ndawguek gyahung，yamqdin demgya siuyungh gemjmenh，gij douzswh mizyauq de demmaj mbouj rengz. Yiengh ginghci saeddaej gunnanz haemq lai， aen vwndiz giyez minzyingz、giyez iq saeq couzcienz hojnanz、couzcienz cingzbonj sang caengz ndaej mizyauq hoizrwnh， aen vanzging gaicawx caeuq gij simmuengh cawjdaej hawciengz lij cengca haemq lai. Gij bonjlingx gag guhcawj cauhmoq mbouj ak, aen vwndiz giepnoix gij gisuz cehsim ceiq youqgaenj de doedyienh. Mbangjdi deihfueng caizcwng sou noix yungh lai, haemq hoj cawqleix. Gij huxndumj fungyiemj ginhyungz daengj lingjyiz vanzlij mbouj noix. Gizdieg gungzhoj raixcaix de duetgungz gunnanz haemq lai. Diuz rap baujhoh swnghdai caeuq fuengzceih uqlah vanzlij naekcaem. Youq gyauyuz、yihliuz、ciengxlaux、ranzyouq、gijgwn gijyw ancienz、souhaeuj faenboiq daengj fuengmienh，vunzlai lij miz haujlai giz mbouj habhoz. Bi'gvaq lij ok lai gienh saehhux goenggungh ancienz caeuq saehhux hungnaek swnghcanj ancienz， hitget dangqmaz. Cwngfuj lij miz giz guh mbouj daengz de，mbangj guhfap gaijgwz hwngfat doeksaed mbouj daengz dieg，hingzsi cujyi、 gvanhliuz cujyi vanzlij doedyienh，dukcaz genjcaz gaujhaed youh lai youh deih、yawjnaek hingzsik cix yawjmbaeu gij cingzcik caensaed， gya naek diuz rap caengzgiek. Siujsoq ganbu gik guh yak daih goengsaeh. Mbangjdi lingjyiz aen vwndiz nduknaeuh vanzlij miz lai. Raeuz itdingh aeu yiemzsuk nyinhcaen doiqdaih vwndiz caeuq deuqnyex, gamj bae dangrap, yiemz souj cizcwz, caenhrengz guh ndei hongsaeh, baenzlawz cungj mbouj hawj lwgminz saetmuengh！
Ngeih、 Aen Iugouz Cungjdaej Caeuq Aen Byaijyiengq Cwngcwz Ginghci Sevei Hwngfat 2019 Nienz
Bineix dwg laebbaenz Cungguek moq 70 hopbi， dwg bi ceiq youqgaenj cienzmienh hwnqbaenz aen biengz siujgangh、guhbaenz aen moegbiu buekguh aen bak bi daih'it. Yaek guh ndei hong cwngfuj， aeu eibaengh aen Dangjcunghyangh aeu Siz Ginbingz dungzci guh cehsim akrengz dazyinx， aeu yungh Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz daeuj ceijyinx，cienzmienh gvancez gij cingsaenz Cibgouj Daih caeuq Cibgouj Gaiq Ngeih Cungh、Sam Cungh Cienzhoih Cunghgoz Gungcanjdangj，doengjit suenqveh doicaenh daengx aen baijbouh “haj yiengh gap baenz aen”, doxdaengh doicaenh aen canloz baijbouh “seiq aen cienzmienh”, dingjmaenh aen diuhgoek guhhong youq ndaw bingzonj gouz baenaj, dingjmaenh aen leixniemh hwngfat moq，dingjmaenh doinyoengx yiengh hwngfat caetliengh sang，dingjmaenh aeu gaijgwz gij gvaenghgyaq mbiengj gunghawj guh cawjsienq，dingjmaenh gyalaeg guh yiengh gaijgwz aeu hawciengz dazyinx、gyahung yiengh hailangh mbaek sang， gyavaiq cauhlaeb aen ginghci dijhi yendaiva，laebdaeb dwk ndei sam ciengz ciengq hung ceiq hoj gung，roengzrengz gikfat gij rengzhoengh aen cawjdaej iq saeq，cauhmoq caeuq laebndei hungzgvanh diuzgung，cingjdaej suenqveh doicaenh gij hong onjdingh demmaj、coicaenh gaijgwz、diuzcingj gvaenghgyaq、hawj leih lwgminz、fuengzre fungyiemj、baujcang onjdingh，hawj ginghci yinhhengz baujciz youq ndaw gvaengh daegdingh hableix，caiq coisawj couhnieb onjdingh、ginhyungz onjdingh、 vaimou onjdingh、vaiswh onjdingh、douzswh onjdingh、yawhgeiz onjdingh，gikhwnj aen saenqsim hawciengz， hawj gyoengq lwgminz roxnyinh lai soundaej、lai vuenyungz、lai ancienz，baujciz ginghci hwngfat ndaej lienzdaemh cangqheiq caeuq aen daihbuenz ndawbiengz onjdingh， youq mboengq sathong cienzmienh hwnqbaenz aen biengz siujgangh dwkroengz aen giekdaej baujmaenh，aeu gij cingzcik maenhndei bae angqhoh Cunghvaz Yinzminz Gunghozgoz laebbaenz 70 hopbi.
Gyoebhab faensik gij hingzseiq ndawguek rogguek， bineix aen vanzging hwngfat guek raeuz bungzdaengz engqgya fukcab engqgya yiemzhaenq，gij fungyiemj deuqnyex ndaej liuhraen caeuq nanz ndaej liuhraen de engq lai engq hung，aeu cungfaen bwhndei hoenx gij ciengq ganhoj. Hojnanz mboujndaej guj daemq，saenqsim mboujndaej soenghonz，rengz guh mboujndaej gemjnyieg. Guek raeuz hwngfat vanzlij cawqyouq mwh canloz seizgei gig youqgaenj，miz rengznyangq cukgaeuq、rengzndumj hungloet caeuq rengzhoengh cauhmoq mboujduenh sanqfat，gyoengq lwgminz simmuengh gyaepgouz yiengh saedceij engq ndei cibfaen haenqrem. Raeuz miz eiqceiq giendingh caeuq naengzlig dwk hingz gak cungj gunnanz deuqnyex, aen seiqdaeuz ginghci ciengzgeiz yiengq ndei caengz gaijbienq hix mbouj aiq gaijbienq.
Aen moegbiu yawhgeiz ceiq youqgaenj ginghci sevei hwngfat bineix dwg： Gij swnghcanj cungjciz ndawguek demmaj 6％－6.5％； hawsingz caiq miz 1100 fanh vunz doxhwnj miz hong guh，aen beijlwd saetnieb diucaz hawsingz 5.5％ baedauq， aen beijlwd saetnieb roengzbouh hawsingz 4.5％ doxdauq；gij gyaqcienz siuyungh gihminz swnghwnj 3％ baedauq； gozci soucei daihdaej doxdaengh， cingouj cuzgouj youq ndaw bingzonj daezsang caetliengh， aen beijlwd dawzcaiq caeuq swnghcanj cungjciz ndawguek daihdaej onjdingh，gij fungyiemj ginhyungz caizcwng ndaej fuengzre gaemhanh ndei； gij vunz gungzhoj lajmbanj ndaej gemjnoix 1000 fanh doxhwnj， gij souhaeuj gihminz demmaj caeuq ginghci demmaj daihdaej doxha； swnghdai vanzging caiq ndaej gaijndei，danhvei swnghcanj cungjciz ndawguek siuyungh nwngzyenz gyangqdaemq 3％ baedauq， aen soq baizcuengq gij huq uqlah ceiq youqgaenj de laebdaeb gemjnoix. Aen moegbiu yawhgeiz ceiq youqgaenj gwnzneix gangj，daejyienh le gij iugouz doinyoengx hwngfat caetliengh sang，hab gij saedsaeh hwngfat guek raeuz，caeuq aen moegbiu cienzmienh hwnqbaenz aen biengz siujgangh doxciep， gaenxmaenx youh onjdangq. Yaek dabdaengz gij moegbiu neix，aeu ok rengz haenq guh cijndaej.
Aeu dengcinj gaemdawz gij byaijyiengq hungzgvanh cwngcwz. Laebdaeb saedhengz gij cwngcwz caizcwng gaenxmaenx caeuq gij cwngcwz cienzngaenz onjmaenh， saedhengz aen cwngcwz couhnieb ciemqgonq， coisawj cwngcwz boiqdauq boiqhab ndaej ndei, saedbauj ginghci yinhhengz youq ndaw gvaengh daegdingh hableix， coicaenh ginghci hwngfat ndaej lienzdaemh cangqheiq.
Aen cwngcwz caizcwng gaenxmaenx de aeu gyarengz daezsang yauqlwd. Bineix dajsuenq anbaiz ceiok lai gvaq souhaeuj 2.8％， sang gvaq gij yawhsuenq bi'gvaq 0.2 aen bakfaendiemj；caizcwng ceiok lai gvaq souhaeuj 2.76 fanh ik maenz，ndawde cunghyangh caizcwng ceiok lai gvaq souhaeuj 1.83 fanh ik maenz，deihfueng caizcwng ceiok lai gvaq souhaeuj 9300 ik maenz. Habdoh daezsang aen beijlwd ceiok lai gvaq souhaeuj，gyoebhab ngeixnaemj le caizcwng soucei、fathengz caigen cienhangh daengj yinhsu，hix naemj daengz vih wngqdoiq gij fungyiemj baezlaeng aiq miz ce ok aen hoenggan cwngcwz. Bineix caizcwng ceiok mauhgvaq 23 fanh ik maenz， demmaj 6.5％. Cunghyangh caizcwng gij vih bingzyaenx cix cienjok ceihawj deihfueng de demmaj 10.9％. Gaijgwz laebndei aen gihci baujcang gij daihdaej yungh cienz yienhgaep，gejsoeng gij atlig caizcwng yinhcienj dieg hojnanz，baenzlawz cungj mbouj hawj bauj lwgminz gwndaenj oksaeh.
Aen cwngcwz cienzngaenz onjmaenh de aeu soengndaet habngamj. Aen soqliengh gvangjyi hobi M2 nem sevei yungzswh demmaj lainoix aeu caeuq gij swnghcanj cungjciz ndawguek mingzdaeuz demmaj lainoix doxdaengh， yawhbienh engq ndei hawj ginghci yinhhengz youq ndaw gvaengh daegdingh hableix de. Youq mwh caencingq guh， geiq aeu dawz ndei aen doucab gunghawj cienzngaenz，mbouj guh“hai raemx hung guenq roenx”，youh aeu lingzvued bae yungh lai cungj hongdawz cwngcwz cienzngaenz，deudoeng miengloh cienzyinx cwngcwz cienzngaenz，hawj cienzngaenz riuzdoengh ndaej hableix youh cukgaeuq, mizyauq gejrwnh aen vwndiz couzcienz hojnanz、 couzcienz cingzbonj sang aen saeddaej ginghci daegbied dwg giyez minzyingz caeuq giyez iq saeq, fuengzre siucawz gij fungyiemj ginhyungz. Gyalaeg cungj gaijgwz youz hawciengz dingh leihlwd， gyangqdaemq aen suijbingz saedsaeh leihlwd. Laebndei aen gihci cauxbaenz veiqlwd， baujciz yinzminzbi veiqlwd youq gwnz suijbingz hableix bingzyaenx daihdaej onjdingh.
Aen cwngcwz couhnieb ciemqgonq aeu cienzmienh fatrengz. Couhnieb dwg gij gaenbonj beksingq gwndaenj, dwg gij goekmboq cienzcaiz. Bineix baez daih'it dawz aen cwngcwz couhnieb ciemqgonq cuengq youq hungzgvanh cwngcwz fuengmienh，dwg vihliux caiq gyahaenq aen fuengyiengq dazyinx gak fuengmienh yawjnaek couhnieb、haeujcoengh couhnieb. Seizneix caeuq baezlaeng mboengq ndeu，aen cungjliengh couhnieb guek raeuz atlig mbouj noix、gij mauzdun daj ndaw gvaenghgyaq miz ok de doedyienh, gij yinhsu yingjyangj moq de vanzlij demgya, bietdingh aeu dawz couhnieb cuengq daengz gizdieg engqgya doedyienh bae. Yaek hawj demmaj onjdingh sien bauj couhnieb doekgonq，bineix hawsingz saen gya couhnieb aeu youq gwnz giekdaej guhbaenz aen moegbiu yawhgeiz，roengzrengz hawj saedsaeh couhnieb dabdaengz gij soq couhnieb geij bi neix，geiq baujcang gij lauzdungliz hawsingz couhnieb， youh ce ok hoenggan hawj gij lauzdungliz lwyawz nungzyez senj dieg guh hong. Cijaeu couhnieb onjdingh、souhaeuj demlai, raeuz couh engq miz saenqsim lo.
Aeu laebdaeb dingjmaenh dawz gaijgwz gij gvaenghgyaq mbiengj gunghawj guh sienqmeh， youq “gyamaenh、dem'ak、daezswng、deudoeng” bet cih saw neix yungh rengz. Lai yungh gij banhfap gaijgwz，lai yungh gij soujduenh hawciengz、fapceih，gyamaenh gij soundaej“sam gemj it gyangq it bouj”，dem'ak gij rengzhoengh aen cawjdaej saeqset，daezswng aen suijbingz diuz lienh canjnieb，hawj gozminz ginghci sinzvanz doengswnh，doinyoengx ginghci hwngfat ndei hwnj mbaek sang.
Aeu laeblaeb dwk ndei sam ciengz ciengq hung ceiq hoj gung，dawzcinj okrengz、 gangjgouz saedyauq. Yaek fuengzre siucawz fungyiemj hungnaek aeu gyarem daejsienq ngeixnaemj，dingjmaenh ciuq lingjyiz、 hangznieb、 giyez mbouj doengz bae gemj dawzcaiq， fuengzre hawciengz ginhyungz fubfab mbouj hableix， onjdangq cawqleix gij fungyiemj dawzcaiq deihfueng cwngfuj，fuengzre gaemhanh gij fungyiemj daj rog cienz daeuj. Dawzcinj duetgungz aeu gaemmaenh gij biucinj seizneix， hopheux gizdieg gungzhoj raixcaix caeuq gyoengq vunz gungzhoj daegbied de， gyarengz gunggeng，daezsang gij caetliengh duetgungz. Fuengzceih uqlah aeu hopheux guh ndei gij hong cungqdiemj lumjbaenz baujhoh mbwn lamz daengj， dungjcouz giemgoq、goek byai caez ceih， laebdaeb gaijndei gij caetliengh swnghdai vanzging.
Yaek guh ndei gij hong cwngfuj bineix，aeu yawjnaek dawz ndei gij gvanhaeh lajneix. It aeu dungjcouz ndei gij gvanhaeh ndawguek caeuq rogguek， caez sim comz rengz guh ndei gij saeh bonjfaenh. Guek raeuz lij cawqyouq caemhcaiq yaek ciengzgeiz cawqyouq mboengq cogaep sevei cujyi，vanzlij dwg aen guekgya cingqcaih hwngfat ceiq hung gwnz seiqgyaiq. Hwngfat dwg gij giekdaej caeuq bouh ceiq youqgaenj gaijgez sojmiz vwndiz guek raeuz，bietdingh aeu gaem ndaet hawj ginghci dem'ak aen cungsim neix，giendingh mbouj bienq bae dingjmaenh yiengh canloz swhsiengj hwngfat dwg gienh saeh ceiq hung、hwngfat wnggai dwg cungj hwngfat gohyoz caeuq cungj hwngfat ndei hwnj mbaek sang， mboujduenh gejcuengq caeuq hwngfat swnghcanjliz ndawbiengz. Youq ndaw aen hingzseiq fukcab boekbienq seiqgyaiq，raeuz aeu youq gwnz canloz baujciz dinghlig，ciuq gij moegbiu caeuq baijbouh doekdingh bae guh，yungh ndei song aen hawciengz song cungj swhyenz ndawguek rogguek， gamj bae wngqdoiq deuqnyex, maenh rox bienq yungyiemj baenz seizgei, hawj hingzseiq ndeileih guek raeuz hwngfat. Ngeih aeu cawqleix ndei gij gvanhaeh onjdingh demmaj caeuq fuengzre fungyiemj，saedbauj ginghci hwngfat ndaej lienzdaemh cangqheiq. Haujlai huxndumj fungyiemj ciengzgeiz cwkrom roengzdaeuj bietdingh aeu gyarengz bae siucawz，hoeng aeu ciuqsouj gvilwd, yawjnaek fuengsik fuengfap，ciuq gij iugouz giendingh、 gaemhanh ndaej、miz bouhloh、habdoh，youq mwh hwngfat baezyamq bae siucawz，baenzlawz cungj aeu baexmienx yiengh fungyiemj baenzroix、lah rangh. Seizneix geu rengz gyodroengz ginghci gyahung， youq laj cingzgvang neix， fatbouh cwngcwz caeuq guhfap aeu ikleih yawhgeiz onjdingh、demmaj onjdingh、 diuzcingj gvaenghgyaq，aeu gaem ndei gij vaiqmenh caeuq naekmbaeu fuengzre gaemhanh fungyiemj， fuengzre gij yauqwngq gaenjsuk daeb gya、bienq hung， baenzlawz cungj mbouj hawj ginghci yinhhengz gyod ok aen gvaengh daegdingh hableix. Doengzseiz，hix mboujndaej dan goq dangqnaj，yungh gij cwngcwz gikcoi haenqrem geizdinj daeuj sonjhaih yiengh hwngfat ciengzgeiz，miz ok huxndumj fungyiemj moq. Sam aeu cawqleix ndei gij gvanhaeh cwngfuj caeuq hawciengz， baengh gaijgwz hailangh gikfat gij rengzhoengh aen cawjdaej hawciengz. Cijaeu cawjdaej hawciengz miz rengzhoengh, couh ndaej dem'ak geu rengz doinyoengx hwngfat gyaeuhmiz, dingjdauq geu rengz gyodroengz ginghci. Aeu roengz rengz hung bae doicaenh gaijgwz hailangh, gyavaiq laebhwnj aen dijhi hawciengz yienhdaih baenz cingjdaej hailangh、miz diuzleix beijak de, cuengqsoeng cinjhaeuj hawciengz, gyahaenq goengcingq gamguenj, cauh ok yiengh vanzging gaicawx ciuqfap guenjleix、habngamj gozci、engqgya bienhleih，hawj gak loih cawjdaej hawciengz engq miz rengzhoengh. Gangj daengz ndaw goek, gij rengzhoengh hawciengz caeuq rengzak cauhnduj ndawbiengz daj ndaw maij hong gaenx guh ikfanh lwgminz cuengqlangh okdaeuj. Aeu dingjmaenh gij swhsiengj hwngfat aeu lwgminz guh cungsim，baedrengz bae guh、aenqrengz bae hengz， cietsaed baujcang gij gwndaenj lwgminz，doinyoengx gaijgez aen vwndiz gij gwndaenj youqgaenj lwgminz， coicaenh ndawbiengz goengbingz cingqngeih, hawj lwgminz ndaej gvaq saedceij ndei. Lwgminz Cungguek gaenxguh coengmingz、rengzndumj cauhmoq cauhnduj danhmboenmboen, cijaeu lailai sanqfat okdaeuj, Cungguek hwngfat couh itdingh ndaej miz aen hoenggan engqgya gvangqlangh.
Sam、 Gij Yinvu Hongsaeh Cwngfuj 2019 Nienz
Gij ginghci sevei hwngfat bineix yinvu naek、 nanzdaez lai、iugouz sang. Raeuz aeu hawj giz naek de doedyienh、dawzndei bouh youqgaenj，lauxsaed guhndei gak hangh hongsaeh.
（It） Laebdaeb cauhmoq caeuq laebndei hungzgvanh diuzgung，saedbauj ginghci yinhhengz youq ndaw gvaengh daegdingh hableix. Laebdaeb yungh gij roennaemj caeuq banhfap aeu hawciengz dazyinx gaijgwz bae buqgej aen daez nanz hwngfat， hawj hungzgvanh cwngcwz langh rengz guh nyig cougeiz diuzcez, gyalai caeuq lingzvued yungh ndei gij hongdawz cwngcwz caizcwng、cienzngaenz、couhnieb, hawj diuzgung ndaej hab yawhcaek、guh doiq dieg、engq mizyauq，cauh diuzgienh hawj ginghci bingzonj yinhhengz.
Saedhengz gemj gvaeh mienh gvangq soq lai. Geiq guh gij gemj gvaeh ndei doh vunzlai, youh gaengawq lingjyiz、hangznieb、giyez bae gemj gvaeh, cungqdiemj gemjmbaeu diuzrap nabgvaeh hangznieb dajcauh caeuq giyez iq saeq. Haeujlaeg gaijgwz cwnghcizsui，dawz gij suiqlwd 16％ hangz dajcauh daengj hangznieb seizneix hengz gyangqdaemq daengz 13％，dawz gij suiqlwd 10％ gyaudoeng daehyinh、hangz dajhwnq daengj hangznieb seizneix hengz gyangqdaemq daengz 9％， saedbauj diuz rap nabgvaeh aen hangznieb ceiq youqgaenj de ndaej gyangqdaemq yienhda; gij suiqlwd 6％ mbaek neix baujciz mbouj bienq，hoeng doenggvaq yungh gij guhfap boiqdauq de, lumjbaenz doiq aen hangznieb fugsaeh swnghcanj、swnghhoz de demgya dingjgaeu cienzgvaeh daengj, saedbauj sojmiz hangznieb nabgvaeh dan gemj mbouj gya，laebdaeb byaij coh aen fuengyiengq doicaenh suiqlwd sam mbaek gyoebbaenz song mbaek、hawj aen cidu sougvaeh bienq genjdanh bae. Cagaenj doeksaed ndei aen cwngcwz gemj gvaeh leih doh giyez iq saeq nienzco fatbouh saedhengz. Baez gemj gvaeh neix, daj “cuengq raemx ciengx bya”、gyaak gij rengzlaeng hwngfat bae naemj, caeuq caiq ngeix daengz caizcwng ndaej lienzdaemh demsou, dwg gij guhfap youqgaenj gemjmbaeu diuz rap giyez、gikfat gij rengzhoengh hawciengz, dwg gij gaijgwz youqgaenj laebndei cidu sougvaeh、coisawj aen gvaenghgek faenboiq souhaeuj bienqndei, dwg gij genjdingh youqgaenj hungzgvangh cwngcwz haeujcoengh onjdingh demmaj、bauj couhnieb、diuz gvaenghgyaq.
Yienhda gemjmbaeu diuz rap giyez gyau cienz sebauj. Gyangqdaemq aen beijlaeh danhvei gyau gij cienz baujyiemj ciengxlaux giekbonj boux cizgungh hawsingz， gak dieg ndaej gyangqdaemq daengz 16％. Onjdingh gij fuengsik sougyau seizneix， gak dieg youq ndaw bouhloh gaijgwz aen dijci cwngsou mboujndaej yungh gij guhfap gyanaek diuz rap saedsaeh gyaucienz giyez iq saeq， mboujndaej gag doiq gij cienz gaxgonq yiemq gyau guh gyonj suenq comz gyau. Laebdaeb saedhengz aen cwngcwz gyangqdaemq aen beijlwd cienz baujyiemj saetnieb caeuq goengsieng mboengq seizgan ndeu. Bineix bietdingh aeu hawj diuz rap gyau cienz sebauj aen giyez daegbied dwg giyez iq saeq caensaed ndaej gemjmbaeu. Gyavaiq doicaenh sengjgaep gaijgwz gij dungjcouz baujyiemj ciengxlaux，laebdaeb daezsang aen beijlaeh cunghyangh diuz bouj aen gihginh baujyiemj ciengxlaux giekbonj hawj gyoengq cizgungh giyez，laebdaeb vehbued cienjhawj mbangj swhbwnj guekmiz bae cungsaed sebauj gihginh. Raeuz geiq aeu gemjmbaeu diuz rap giyez gyaucienz, youh aeu baujcang gij cienzciengxlaux caeuq fukleih boux cizgungh camgya sebauj de mbouj deng yingjyangj、cienzciengxlaux hableix demmaj caemhcaiq ciuqseiz fathawj gaeuqsoq, hawj sebauj gihginh ndaej lienzdaemh、giyez caeuq cizgungh cungj ndaej souh'ik.
Saedbauj gemj gvaeh gyangq feiq doeksaed daengz vih. Gemj gvaeh gyangq feiq rongj daengz giz dot caeuq giz nanz aen cawjdaej hawciengz seizneix, dwg aen cwngcwz geiq goengbingz youh miz yauqlwd. Daengx bi yaek gemjmbaeu diuz rap cienzgvaeh caeuq gyaucienz sebauj giyez gaenh 2 fanh ik maenz. Neix yaek daiq atlig gig daih hawj gak gaep caizcwng. Vihliux haeujcoengh giyez gemjrap, gak gaep cwngfuj aeu haed saivaq gvaq saedceij, siengj ok banhfap couzcienz. Cunghyangh caizcwng aeu lai sou noix cei, hawj aen ginhyungz gihgou guekmiz daegdingh caeuq cunghyangh giyez lai gyau leihyinh, itbuen ceiok atgemj 5% doxhwnj、 ginghfei “sam goeng” caiq atgemj 3% baedauq, gij cienz ciengzgeiz cuengq hoengq de itlwd sou dauq. Deihfueng cwngfuj hix aeu gag rox bae vatra rengzndumj, haenqrengz gaijndei gij gvaenghgyaq ceiok, lai diuz roenloh yungh ndei gak loih cienzngaenz caeuq swhcanj. Raeuz aeu caensaed hawj aen cawjdaej hawciengz daegbied dwg giyez iq saeq roxnyinh gemj gvaeh gyangq feiq yienhda, baenzlawz cungj aeu ciuq gij wngqcingz doiq giyez caeuq ndawbiengz de bae guh. Gunnanz caiq lai hix itdingh aeu banh ndei gienh saeh hung neix.
Baedrengz gejrungq aen vwndiz giyez couzcienz hojnanz、couzcienz cingzbonj sang. Gaijgwz laebndei aen gihci douzcuengq gij cienzngaenz saenqyungh daigvanj， habseiz yungh aen soujduenh soqliengh lainoix caeuq gyaqcienz sangdaemq lumjbaenz gyangqdaemq aen beijlwd cienzbwh romngaenz、leihlwd daengj， dazyinx ginhyungz gihgou lai cuengq saenqyungh daigvanj， gyangqdaemq gij cingzbonj daigvanj, dawzcinj mizyauq haeujcoengh yiengh ginghci saeddaej, mboujndaej hawj cienzngaenz cienjhoengq roxnaeuz duetliz saeddaej ginghci rih aeu ca'gyaq. Lai roengzrengz hawj ngaenzhangz rauh iq dinghyiengq gyangqdaemq cienzbwh romngaenz，gij cienzngaenz cuengq ok de cienzbouh yungh youq daigvanj hawj giyez minzyingz caeuq giyez iq saeq. Haeujcoengh sanghyez ngaenzhangz hung lai diuz roenloh bae boujcung swhbwnj，gyaak gij naengzlig cuengq saenqyungh daigvanj，gikcoi gyalai gij daigvanj cunggeiz ciengzgeiz caeuq gij daigvanj saenqyungh hawj hangznieb dajcauh. Bineix aen sanghyez ngaenzhangz hung guekmiz daigvanj hawj giyez iq saeq aeu demmaj 3 cingz doxhwnj. Cingleix gvidingh gij soucienz ngaenzhangz caeuq cunghgai fuzvu. Laebndei aen gihci baihndaw gaujhaed ginhyungz gihgou, gikcoi caeuq gyarengz guh yiengh fugsaeh aeu ginhyungz lailai hawj ndei, caencingq hawj yiengh couzcienz gaenjcieng giyez rauh、iq、saeq gaijndei yienhda, gij cingzbonj gyoebhab couzcienz doekdaemq yienhda.
Hawj gij caigen deihfueng cwngfuj yungh ok cingzyauq daeuj. Bineix dajsuenq anbaiz gij caigen cienhangh deihfueng cwngfuj 2.15 fanh ik maenz，beij bi'gvaq gyalai 8000 ik maenz，daezgung cienzngaenz bae haeujcoengh hwnqguh hanghmoeg cungqdiemj，hix cauh diuzgienh hawj deihfueng cwngfuj engq ndei fuengzre siucawz gij fungyiemj dawzcaiq. Hableix gyahung aen gvaengh sawjyungh caigen cienhangh. Laebdaeb fathengz gij caigen gvidingh soqliengh dingjvuenh cienzcaiq deihfueng cwngfuj， gemjnoix diuz rap leihsik deihfueng. Gikcoi yungh aen fuengsik hawciengz, dojdangq gaijgez aen vwndiz cienzcaiq daengz geiz aen yungzswh bingzdaiz, mboujndaej buenqbangh cuengqfwngz mbouj leix.
Lai yiengh banhfap caez yungh onjdingh caeuq gyahung couhnieb. Netsaed guhndei gij hongsaeh couhnieb gyoengqvunz cungqdiemj de，lumjbaenz gyoengq hagseng bizyez aen gauhyau、gyoengq bouxbing doiqok bingdoih、gyoengq nungzminzgungh daengj，lai roengzrengz bangfuz doengh boux vunz hoj ra hong ndaw hawsingz ndaej miz hong guh. Doiq gak loih giyez ciuaeu vunzgungz lajmbanj、boux saetnieb hawsingz hwnjbouh buenq bi doxhwnj， ndaw sam bi hawj gemjmienx gij gvaeh feiq dinghngeg de. Gyarengz haeujcoengh lingzvued couhnieb、hingzyiengh moq couhnieb. Itdingh aeu fuengzre caeuq niujcingq gij yienghsiengq youq ndaw couhnieb mbouj bingzdaengj doiqdaih sai mbwk caeuq ndangfaenh. Hengzguh aen hengzdoengh daezswng cizyez ginwngz, daj ndaw soqyawz saetnieb baujyiemj gihginh dawzok 1000 ik maenz, yungh youq sonlienh cizgungh daezswng ginwngz caeuq cienj gang'vih cienjnieb, hawj 1500 fanh vunz baez doxhwnj souh'ik. Laebndei gij gihci caeuq cwngcwz hwngfat cungj cizyez gisuz gunghyinz. Gyavaiq hwngfat gij cizyez gyauyuz yienhdaih, geiq ikleih gejrungq gij atlig couhnieb seizneix, hix dwg gij banhfap ndei gaijgez aen vwndiz giepnoix vunzcaiz dinfwngz soemraeh. Gaijgwz laebndei gij banhfap gaujsi ciu hagseng doengh aen gauhciz yenyau, gikcoi gyoengq vunz baugauj engq lai, lumjbaenz gij vunz bineix doeg sat gauhcungh、bouxbing doiqok bingdoih、boux cizgungh saetnieb、 nungzminzgungh daengj, bineix gauhciz yenyau lai ciu 100 fanh vunz. Hawj engq lai hagseng ndaej gij cienz dajciengj bang hag aen gauhciz yenyau, daezsang aen biucinj bangbouj， gyavaiq mbawcingq yozliz caeuq mbawcingq daengjgaep cizyez ginwngz doxdoeng doxciep. Gaijgwz aen dijci banhhag gauhciz yenyau, gyarengz cauhlaeb aen doih lauxsae, daezsang gij caetliengh banhhag. Dazyinx buek bujdungh bwnjgoh gauhyau ndeu cienjbaenz cungj daihhag wngqyungh loihhingz. Cunghyangh caizcwng lailai demgya douzhaeuj gauhciz yenyau, deihfueng caizcwng hix aeu gyarengz haeujcoengh. Youq cunghdwngj cizyez gyauyuz ndalaeb guekgya ciengjyozginh. Haeujcoengh giyez caeuq gij ligliengh ndawbiengz banh cizyez gyauyuz, gyavaiq cauhlaeb giz dieg saed lienh swnghcanj gyauyoz yungzhab. Raeuz doenggvaq lailai gaijgwz lailai hwngfat yiengh cizyez gyauyuz yienhdaih, gyavaiq gungganq gak loih vunzcaiz gisuz ginwngz, hawj bouxcoz engq lai baengh dinfwngz soemraeh bonjfaenh saedyienh gij gyaciz goyinz, hawj sam bak roekcib hangz vunz ak comz nyaed、 deih lumj ndaundeiq.
（Ngeih）Gikfat gij rengzhoengh aen cawjdaej hawciengz，baedrengz gaijndei gij vanzging gaicawx. Guek raeuz miz baenz ik aen cawjdaej hawciengz， caemhcaiq lij lai gya dem. Yaek coicaenh ginghci bingzonj demmaj, bouh ceiq youqgaenj de dwg hawj gij rengzhoengh cawjdaej hawciengz lienzdaemh caemhcaiq yied daeuj yied lai. Aeu haeujlaeg gaijgwz “cuengqgienz、guenjleix、fugsaeh”，gyangqdaemq gij cingzbonj gaicawx cidu daiqdaeuj, roengz goengfou engq lai dajcauh ndei gij vanzging unq hwngfat.
Doenggvaq gemjnoix saemjbae、gaijndei fugsaeh， bienhleih douzswh hwng nieb. Hawciengz boiqbaij swhyenz dwg gij hingzsik ceiq mizyauq de. Aeu caiq sukgemj mbawdan gimqhaed haeuj hawciengz， doinyoengx bujben doeksaed “mbouj gimq couh haeuj”. Cwngfuj aeu laemxsim gyau gij saehhangh mbouj wnggai guenj de hawj hawciengz, ceiq lai bae gemjnoix cigsoh boiqbaij swhyenz, gij saehhangh saemjbae de ndaej gemj caenhliengh gemj, gij caen aeu saemjbae de hix aeu gemjnoix bouhloh caeuq hothoh, hawj giyez lai miz seizgan doisiu canjbinj、noix sai seizgan buet saemjbae. Bineix doiq sojmiz saehhangh nangqdaengz cinjhawj giyez ginghyingz de, guh yiengh gaijgwz “cwng cau faenliz”，hawj giyez aeundaej yingzyez cizcau engqgya fuengbienh, caemhcaiq caenhvaiq cingqciengz haihong, laemxsim siucawz cungj yienghsiengq “hawj haeuj mbouj hawj haihong”; youq daengx guek gaijgwz aen cidu saemjbae gij hanghmoeg hwnqguh gunghcwngz、daj goek daengz byai ndaej vaiqvaiq banh roengz hanghmoeg. Laebdaeb atsuk gij seizgan saemjcaz conhli caeuq cucwz sanghbyauh. Doinyoengx gwnz vangj saemjbae caeuq fugsaeh，cagaenj hwnqbaenz aen bingzdaiz daengx guek baenz cingjdaej gwnzvangj hongsaeh guenjleix guekgya fugsaeh, vaiqdi guhbaenz aen vangj ndeu cungj banh ndaej、dieg wnq hix banh ndaej，hawj haujlai saehhangh mbouj raennaj cungj ndaej banhleix，gij caen aeu daengz ciengz banh de aeu “aen cueng ndeu souhleix、hanh seiz banh caez” “ceiq lai buet mbat ndeu”. Lienzdaemh mbeguh gij gaijgwz hengzdoengh “gemj cwng fuengbienh lwgminz”，mboujndaej hawj giyez caeuq vunzlai vih banh gij cwngmingz saepsoiq cix buet bae buet dauq. Laebhwnj aen cidu “bingz ndei bingz yaez” yiengh fugsaeh hongsaeh cwngfuj，fugsaeh ndei mbouj ndei hawj giyez caeuq lwgminz daeuj bingz. Cwngfuj bouhmonz guh ndei fugsaeh dwg wnggai， fugsaeh mbouj ndei dwg hong guh mbouj daengz.
Doenggvaq goengcingq gamguenj bae coicaenh goengbingz beijak. Goengbingz beijak dwg aen cehsim ginghci hawciengz, goengcingq gamguenj ndaej baujcang goengbingz beijak. Gaijgwz laebndei aen cidu saemjcaz caeuq goengcingq gamguenj goengbingz beijak，gyavaiq cingleix doengh hangh gvidingh caeuq guhfap gazngaih hawciengz baenz cingjdaej nem goengbingz beijak de. Cwngling genjmingz yungzheih caephengz. Gveihcwz yied genjdanh ronghcingx，gaemguenj yied mizrengz mizyauq. Doiq guekgya daeuj gangj aeu lai cuengq rengz dingh gij gveihcwz caeuq biucinj gaemguenj doengzcaemh de，doiq cwngfuj deihfueng daeuj gangj aeu comz rengz guh gij gamguenj goengcingq de. Doicaenh yiengh lienzhab gamguenj hamj bouhmonz “song yiengh seizbienh、yiengh goenghai ndeu”，doihengz gaijgwz saenqyungh gamguenj caeuq “hulenzvangj ＋ gamguenj”，gaijndei fuengsik caepfap, lumjbaenz vanzbauj、 suivu、hawciengz gamguenj daengj, doiq boux famhfap de ciuqfap fad haenq、doiq boux soujfap de fouz saeh mbouj caujfanz. Haeujlaeg gaijgwz gij hingzcwng caepfap gyoebhab de，cingleix gvidingh gij saehhangh hingzcwng cawqfad，laemxsim ceihleix lai giz giemjcaz、fanfoek giemjcaz. Doiq boux gaemguenj hix aeu guenj haenq、laeb gvigawj，baenzlawz cungj mbouj hawj genj guh caepfap、seizbienh caepfap，baenzlawz cungj mbouj hawj diuqnanz giyez caeuq beksingq. Ciuqfap dwkceih doengh gij hingzveiz famhfap lumjbaenz cauhguh siugai huqgyaj huqyaez huq mauhbaiz daengj，ceihfad boux famhfap youqgaenj hawj de souh mboujndaej bae. Laebndei aen gihci lienzhab ceihfad saetsaenq, coicaenh gak loih cawjdaej hawciengz souj fap souj saenqyungh ginghyingz. Yungh goengcingq gamguenj guenj ok goengbingz、guenj ok yauqlwd、guenj ok rengzhoengh.
Doenggvaq gaijgwz bae doinyoengx gyangqdaemq gij soucienz nangqdaengz giyez. Gyalaeg gaijgwz hawj hawciengz diuzcez denliz，cingleix gij soucienz bengxgya gyaqdienh，gyangqdaemq gij cingzbonj yungh dienh aen hangznieb dajcauh，gij gyaqdienh itbuen gunghsanghyez bingzyaenz caiq gyangqdaemq 10％. Gyalaeg gaijgwz aen cidu gvaq goengloh soucienz，doinyoengx gvaq loh gvaq giuz siuj sou cienz，ceihleix doiq cihek cihuq saemjbae mbouj hableix caeuq luenh soucienz、luenh fadcienz. Ndaw song bi neix youq daengx guek daihdaej siu bae doengh aen souhfeican gwnz goengloh gauhsuz henzgyaiq gak sengj，guh daengz mbouj dingz ci vaiqdangq soucienz，gemjnoix saek ci、fuengbienh vunzlai. Siubae roxnaeuz gyangqdaemq gij soucienz buek dietloh、sokruz ndeu. Cienhangh ceihleix gij soucienz cunghgai fuzvu. Laebdaeb cingleix gvidingh gij soucienz hingzcwng saehnieb singqcaet. Gyavaiq cauhlaeb “vangj ndeu” mbawdan soucienz， hawj soucienz goenghai ronghcingx, hawj luenh soucienz mboujmiz dieg ndoj.
（Sam）Dingjmaenh cauhmoq dazyinx hwngfat， ganq hung geu rengz doinyoengx moq. Langh ok gij ak gyoebhab guek raeuz lumjbaenz goengrengz lai vunzcaiz lai、hawciengz ndawguek hungloet daengj, gaijgwz cauhmoq aen gihci yenzgiu haifat gohgi caeuq wngqyungh guh baenz canjnieb bae， roengz rengz hung ganq ok gij cingsaenz ciennieb, coicaenh gij rengz nyoengx moq gaeuq ciepswnj cienjvuenh.
Doinyoengx gaijcauh daezswng canjnieb cienzdoengj. Hopheux doinyoengx hangznieb dajcauh hwngfat ndei hwnj mbaek sang， gya'ak aen giekdaej gunghyez caeuq gij naengzlig cauhmoq gisuz，coisawj hangznieb dajcauh ceiq ndei caeuq hangznieb fugsaeh yienhdaih yungzhab hwngfat， gyavaiq cauhlaeb aen guekgya ak dajcauh. Dajcauh aen bingzdaiz gunghyez hulenzvangj， mbeguh “cinwngz ＋”，gyarengz hawj hangznieb dajcauh cienjhingz swnggaep. Haeujcoengh giyez lai vaiq gaijcauh gisuz caeuq lawhvuenh sezbei moq，dawz gij cwngcwz gyavaiq cietgaeuq guding swhcanj ndaej ndeicawq gya'gvangq daengz sojmiz hangznieb dajcauh bae. Gyarengz hawj aen giekdaej daemxcengj caetliengh，doinyoengx biucinj caeuq gij suijbingz ceiq ndei gwnz gozci doxciep，hawj gij canjbinj caeuq fugsaeh engq lai engq ndei，hawj gij vunz ndawguek rogguek engq lai genjyungh gij doxgaiq Cungguek cauh、yiengh fugsaeh Cungguek guh.
Coicaenh canjnieb ngamqhwng gyavaiq hwngfat. Gyalaeg yenzgiu haifat caeuq wngqyungh daihsoqgawq、yinzgungh cinwngz daengj，gungganq gij canjnieb ngamqhwng comzgyoengq hwngfat lumjbaenz daih saenqsik gisuz moq、cangboiq gaepsang、swnghvuz yihyoz、giceh nwngzyenz moq、caizliuh moq daengj， guhhung soqcih ginghci. Genhciz bauyungz siujsim gamguenj，haeujcoengh hwngfat yienghnieb moq vunqsik moq，coicaenh yiengh ginghci bingzdaiz、yiengh ginghci caezyungh de ndaej cangqheiq majhung. Gyavaiq youq gak hangznieb gak lingjyiz doicaenh “hulenzvangj ＋” . Lienzdaemh coisawj vangjloz cienzsoengq lai vaiq soucienz gemj noix. Youq ndaw singz mbeguh yienghndei cien cau gvanhdai haeuj ranz，gaijcauh daezswng gij vangjloz gwnz vangj gyauyuz、gwnz vangj ywbingh， doinyoengx yizdung vangjloz gyadaih yungzliengh swnggaep，hawj gyoengq vunz sawjyungh caencingq roxnyinh daengz hwnj vangj engq vaiq engq onjdingh. Bineix gij cienz yungh gvanhdai aen giyez rauh iq bingzyaenz caiq gyangqdaemq 15％，gij cienz yungh yizdung vangjloz liuzlieng bingzyaenz caiq gyangqdaemq 20％ doxhwnj，youq daengx guek hawj “daiq hauhmax cienj vangj”，gvidingh ndalaeb gij swhfei baenzdauq de，hawj soucienz gemj noix saedsaedcaihcaih、hawj bouxsiufeiq cingcingcujcuj.
Daezswng gij naengzlig cengjdaemx aen gohgi. Lai gyarengz haeujcoengh guh gihcuj yenzgiu caeuq gihcuj yenzgiu wngqyungh，lai gyariengz guh gij cauhmoq daeuznduj，lai gyarengz gungroengz gij gisuz cehsim ceiq youqgaenj de. Cagaenj ndabaij gij sizyensiz guekgya, dauqlaeb aen dijhi sizyensiz cungqdiemj guekgya. Laebndei cujciz guenjleix gij hanghmoeg gohgi hungnaek. Laebndei aen gihci cauhmoq swnghcanj sonhag gohyenz gapbaenz cingjdaej aeu giyez guh cawjdaej haenx, haeujcoengh giyez yiendaeuz hengzguh hanghmoeg gohgi hungnaek. Gyavaiq cauhlaeb aen bingzdaiz hailangh caezyungh gij swhyenz cauhmoq gohgi, gyarengz fugsaeh giyez rauh iq cauhmoq gisuz. Gya'gvangq caeuq gozci gapguh cauhmoq. Cienzmienh gyarengz baujhoh cihsiz canjgenz, laebndei aen cidu fad boiz ciemqfamh cihsiz canjgenz，aeu neix bae coicaenh cauh ok gisuz moq caeuq cienjvaq yinhyungh gisuz moq. Gij bonjcaet cauhmoq gohgi dwg gij hozdung bouxvunz guh dajcauh. Aeu lailai yawjnaek caeuq siengsaenq boux guh hong gohyenz， lailai hawj aen donzdui caeuq boux vunzcaiz daiqdaeuz guh cauhmoq de miz gienz yungh vunz yungh cienz yungh huq caeuq miz gienz gietdingh lohsienq gisuz. Caiq daezsang aen beijlaeh gij ginghfei ganciep guh gij hanghmoeg gihcuj yenzgiu，mbeguh sawqdiemj hanghmoeg ginghfei “bauhganh”，mbouj nda dingh hanhhaed aen beijlaeh gohmuz，hawj aen donzdui gohyenz gag dingh baenzlawz yungh. Laebndei aen gihci bingzgyaq gij soundaej gohgi. Aeu youq doinyoengx gij banhfap gaijgwz aen dijci gohgi caen ok yaugoj roengz goengfou，baenzlawz cungj mboujndaej hawj gij cwngcwz gaijgwz dan dingzlouz youq bak gangj、ndaw saw. Haenqrengz gemjnoix gij saeh saepsoiq，hawj boux guh hong gohyenz naebsim yenzgiu、cauhmoq cungbyoengq. Lai gyarengz cauhlaeb gij lunzlij caeuq yozfungh gohyenz，fad gij yozsuz mbouj cingq de， haenqrengz gaiqcawz sim fouz guh saeh. Guek raeuz miz aen doih gohgi yinzcaiz gwnz seiqgyaiq vunzsoq ceiq lai, caux ok aen gohyenz vanzging ndei，couh itdingh ndaej coux daeuj aen geizseiq sengdoengh vunzcaiz gohgi maenh'ak buek dam buek、cwngzgoj cauhmoq nyoenx mboujdingz.
Caiq yinx vunzlai cauhnieb、cauhmoq haeuj laeg bae. Gikcoi gij cawjdaej ndawbiengz engq lai cauhmoq cauhnieb, hai gvangq gizdieg ginghci sevei hwngfat, lai gyarengz daj gak fuengmienh bae fugsaeh, hawj dieg yienghndei cauhnieb cauhmoq langh rengz daiqdoengh. Gyarengz guh yiengh bangcoengh ndei doh vunzlai, doeksaed ndei gij cwngcwz gemj gvaeh lumjbaenz hawj bouxnabsuiq noix de daj aen soq ndwen gai 3 fanh maenz couh aeu gyau goyinz cwnghcizsui gyalai daengz 10 fanh maenz cij gyau. Gaijgwz laebndei aen gihci ginhyungz bangcoengh, ndalaeb gohcangbanj caemhcaiq sawqhengz aen cidu roengzbouh bwh'anq fathengz gujbyau, gikcoi vih cauhnieb cauhmoq fathengz cienhangh ginhyungz caigen, gya'gvangq aeu cihsiz canjgenz daejat couzcienz, haeujcoengh hwngfat cauhnieb douzswh. Gaijgwz caeuq laebndei aen gihci gungganq、sawjyungh、bingzgyaq vunzcaiz, engq ndei bae fugsaeh boux louzhag dauqma caeuq gij vunzcaiz daj guekrog daeuj. Hawj naj doiq gij aeuyungh hawciengz caeuq cienzhwng yiengh cingsaenz yinzvwnz giethab hwnjdaeuj, engq ndei ciucomz sawjyungh gak loih vunzcaiz, Cungguek cauhmoq itdingh hwngfat ndaej engq ndei, engq lai ok rengz hawj vunzbiengz vwnzmingz baenaj.
(Seiq) Coicaenh cauxbaenz aen hawciengz ndawguek giengzdaih de, lienzdaemh langh ok gij rengzndumj aeuyungh ndawguek. Lailai hawj siuyungh langh rengz guh giek、hawj douzswh langh rengz guh saeu, onjdingh yiengh aeuyungh mizyauq ndawguek, mizrengz cengjdaemx ginghci bingzonj yinhhengz.
Coicaenh siuyungh onjdingh demmaj. Lai cungj banhfap caez yungh coicaenh gihminz singzmbanj demsou, gyaak geu rengz siuyungh. Doeksaed ndei aen fap goyinz sojdwzsui mboengqgonq ngamq guh coihdingh de, hawj daih'iek 8000 fanh bouxnabsuiq hab aen cwngcwz gemjgvaeh de caencingq ndaej souh'ik. Aeu swnh'wngq yiengh bienqvaq moq aeuyungh siufeiq, lai miengloh demgya gij canjbinj maenhndei caeuq gunghawj fugsaeh, gyavaiq buqcawz giz gaz swhbwnj ndawbiengz haeujbae. Guek raeuz gij vunz 60 bi doxhwnj gaenq miz 2.5 ik. Aeu roengzrengz hwngfat gij hangznieb ciengxlaux, daegbied dwg gij hangznieb fugsaeh ciengxlaux segih, doiq doengh aen gihgou youq segih guh fugsaeh lumjbaenz doengxngoenz ciuqgoq、hohleix hoizfuk ndangcangq、 bwnq gwn rex byaij daengj, youq gemjmienx ngaenzgvaeh、cienzngaenz haeujcoengh、yungh dienh yungh heiq gyaqcienz bienzngeiz daengj fuengmienh bae bangfuz, doengh giz comz hwnq ranzyouq moq de wnggai boiqdauq hwnqguh gij sezsih segih fugsaeh ciengxlaux daengj, gyarengz hwnqguh gij sezsih fugsaeh ciengxlaux lajmbanj, gaijgwz laebndei gij cwngzcwz yw ciengx giethab, gyalai gij sawqdiemj saedhengz aen cidu baujyiemj ciengzgeiz hohleix de, hawj bouxnienzlaux ndaej vuenyungz gvaq gij ndwenngoenz seizgeq, bouxlaeng couh deq ndaejdaengz yiengh ngoenzndei daengzcog. Gij saeh bang ganq bang dawz lwgnding lwg'iq nangqdaengz cien gya fanh hoh. Aeu cimdoiq yiengh cingzgvang moq saedhengz aen cwngcwz cienzmienh hawj seng song lwg, gyavaiq hwng guh yiengh fugsaeh lai yiengh bang dawz bang ganq lwgnding lwg'iq, bangcoengh gij goengrengz ndawbiengz haibanh aen gihgou dak dawz dak ganq, lai roengzrengz bae baujcang lwgnyez ancienz. Coicaenh hangznieb fugsaeh gyadingz daez caet gya lai. Hwngfat baeyouz daengx ranghdieg, guh hung aen canjnieb baeyouz. Onjdingh aen hawciengz cawx ci, laebdaeb caephengz aen cwngcwz ndei doh cawx aeu gij ci nwngzyenz moq，doinyoengx hwnqguh cung dienh、 gya gingh daengj sezsih. Hwngfat gij yienghnieb moq vunqsik moq siuyungh, coicaenh yungzhab hwngfat gij siuyungh sienq gwnz sienq laj, gungganq diemj demmaj moq siuyungh. Laebndei aen vangjloz riuzdoeng lajmbanj, haeujcoengh hwngfat densangh caeuq vaiqsoengq. Gyarengz baujhoh gij gienzik boux siuyungh, hawj vunzlai cuengqsim siuyungh、bienhleih siuyungh.
Hableix gyahung yiengh douzswh mizyauq de. Hop gaenj aen canloz hwngfat guekgya, gyavaiq saedhengz buek hanghmoeg cungqdiemj ndeu. Guhbaenz douzswh dietloh 8000 ik maenz、douzswh goengloh roenraemx daehyinh 1.8 fanh ik maenz，caiq haigoeng guh buek suijli gunghcwngz hungnaek he, gyavaiq gviveh hwnqguh diuz dietloh Conh Cang, dem rengz hung douzswh hwnqguh sezsih giekdaej, lumjbaenz gij gyaudoeng singz singz lienzciep、canjbinj riuzdoengh、hongsaeh guenjleix hawsingz、fuengzceih caihaih、hangzgungh minzyungh caeuq doeng'yungh daengj. Gyarengz hwnqguh gij sezsih giekdaej saenqsik daih moq. Bineix gij douzswh ndaw yawhsuenq cunghyangh anbaiz 5776 ik maenz, beij bi'gvaq lai gya 400 ik maenz. Cauhmoq gij fuengsik hanghmoeg couzcienz, habdangq gyangqdaemq aen beijlaeh cienzgoek hanghmoeg lumjbaenz gij sezsih giekdaej daengj, yungh ndei gij hongdawz ginhyungz daiqmiz yiengh singqcaet haifat de, supyinx swhbwnj ndawbiengz engq lai caeuqfaenh hwnqguh gij hanghmoeg ndaw lingjyiz cungqdiemj. Doeksaed gij cwngcwz haeujcoengh ndawbiengz douzswh, miz bouhloh bae doicaenh cwngfuj caeuq swhbwnj ndawbiengz gapguh. Gaijgwz laebndei aen cidu ciubiu douzbiu. Cwngfuj aeu daiqdaeuz gangj saenqyungh、souj iekdingh, baenzlawz cungj mboujndaej “hak moq mbouj nyinh caiq gaeuq”, doiq gij cienzngaenz cwngfuj yiemq giyez de nienzdaej gaxgonq aeu boiz dingz ndeu doxhwnj, baenzlawz cungj mbouj hawj yiemq caiq moq.
(Haj) Doiqbiu aen yinvu cienzmienh hwnqbaenz aen biengz siujgangh, maenhsaed doicaenh duetgungz gunggeng caeuq saenqhwng lajmbanj. Dingjmaenh hawj nungzyez caeuq lajmbanj ciemqgonq hwngfat, gyarengz dungjcouz hamzciep duetgungz gunggeng caeuq saenqhwng lajmbanj, saedbauj ciuq seiz guhbaenz aen moegbiu duetgungz gunggeng、hawj gij saedceij nungzminz dabdaengz aen suijbingz siujgangh.
Dwk hingz ciengz ciengq gunggeng dawzcinj duetgungz. Comzrengz gaijgez gij vwndiz doedyienh youq mwh guhbaenz “song mbouj you sam baujcang”bungzdaengz, roengz rengz hung youq gizdieg gungzhoj raixcaix de lumjbaenz “sam gih sam couh”daengj duetgungz gunggeng, gyarengz hwnqguh sezsih giekdaej, doeksaed gij banhfap baujcang gyoengq vunz gungzhoj daegbied de. Duetgungz baenz fouq aeu baengh canjnieb daeuj cengjdaemx, aeu haenqrengz bangfuz dieg gungzhoj hwngfat gij canjnieb miz daegsaek youh ndei gvaq vunz de. Youq dieg gungzhoj cienhangh mbeguh haed dingzhag bauj hag、hawj aen beijlwd hagseng dingzhag gyangqdaemq yienhda, laebdaeb hawj aen gauhyau cungqdiemj de demgya gij vunzsoq cienhangh ciuaeu hagseng lajmbanj caeuq dieg gungzhoj, yungh ndei gyauyuz aen banhfap neix, daj goekgaen bae gatduenh daih dem daih gungzhoj. Daihdaej guhbaenz gij hong gviveh hwnqguh senj dieg buen ranz banggungz ndaw “Cibsam Haj”vehdingh, gyarengz duenhlaeng fuzrex. Doiq gij cwngcwz fuzrex aen yienh duetgungz ndek mauh、gyoengq vunz duetgungz de aeu ietraez mboengq ndeu, fuengzre youh dauq bienq gungz. Laebndei gaujhaed gamduk, yungh ndei gij soundaej cunghyangh cienhangh liebyawj duetgungz gunggeng. Yied daengz mboengq ceiq youqgaenj duetgungz gunggeng, yied aeu ca saed ca saeq gak hangh hongsaeh, saedbauj duetgungz miz saedyauq、ndaej lienzdaemh、souh ndaej lizsij cazniemh.
Ca'ndei nungzyez daegbied dwg swnghcanj haeuxgwn. Aen vanjhaeux gaenh 14 ik vunz Cungguek， bietdingh aeu gaemndaet youq ndaw fwngz swhgeij. Aeu onjdingh gij canjliengh haeuxgwn，gaijndei gij gvaenghgyaq binjcungj. Gyarengz hwnqguh reihnaz suijli, lai demgya reihnaz biucinj sang 8000 fanh moux doxhwnj. Onjdingh ciengx doihduz lumjbaenz ciengx mou daengj， guh ndei gij hong fuengzre gaemhanh binghraq lumjbaenz mouraq Feihcouh daengj. Gyavaiq gaijgwz cauhmoq gij gohgi nungzyez, roengz rengz hung hwngfat hangz cehfaen yienhdaih, gyarengz doigvangq gij gisuz senhcin habyungh de, hengzguh aen gunghcwngz baujhoh gij doxgaiq reihnaz ok miz deihleix biugeiq, doihaeuj nungzyez yungh gihgi ndaem、ndai、sou、gyagoeng. Ganqfat doengh aen ginghyingz cawjdaej yienghmoq lumjbaenz nungzcangz gyadingz、nungzminz hozcozse daengj，gyarem yiengh fugsaeh ndawbiengz naj yiengq hoh ndaem reihnaz noix de，hwngfat lai cungj hingzsik gveihmoz ginghyingz. Bangfuz dieg cujyau swnghcanj de cingsaeq gyagoeng nungzcanjbinj. Haeujcoengh dauqma ranzmbanj、haeuj daengz lajmbanj cauhnieb cauhmoq， doinyoengx it ngeih sam canjnieb yungzhab hwngfat, guhhung gij ginghci yienhfaenh. Nungzminz demsou daih dingzlai dwg baengh dajgoeng ndaej cienz. Aeu daj ndaw goekgaen bae ceihleix aen vwndiz yiemq gij cienzhong nungzminzgungh, cagaenj dingh ok gij fapgvi hingzcwng cienmonz de, saedbauj boux nungzminzgungh sai hanh dwgrengz guhhong ndaej ciuqseiz lingx daengz gij cienzhong bonjfaenh.
Netsaed doicaenh gij hong hawj lajmbanj bienq ndei. Gohyoz bienguh caeuq saedhengz gviveh hwnqguh, roengz rengz hung gaijndei gij diuzgienh swnghcanj swnghhoz. Gyavaiq saedhengz aen gunghcwngz gyamaenh daezswng gij raemxgwn ancienz lajmbanj, bineix bilaeng aeu gaijgez ndei aen vwndiz raemxgwn ancienz hawj gyoengq vunz giepnoix raemxgwn de, daezsang aen suijbingz baujcang gung raemx hawj 6000 fanh vunz lajmbanj. Guhbaenz lwnz moq swnggaep gaijcauh denvangj lajmbanj. Saen guh gaij guh goengloh lajmbanj 20 fanh goengleix. Laebdaeb doicaenh gaijcauh ranzvaih lajmbanj. Yawj dieg dingh geiq bae cingjceih aen vanzging youq vunz lajmbanj, doicaenh daj goekgaen bae gaijbienq diengzhaex, ceihleix nyapnyaj raemxuq, cauhlaeb yiengh mbanj gyaeundei.
Cienzmienh gyalaeg gij gaijgwz lajmbanj. Doigvangq gij soundaej sawq hawj lajmbanj cwng dieg、gij dieg dajhwnq cizdij ginghyingz haeuj hawciengz、gaijgwz aen cidu diegranz. Gyalaeg gaijgwz cizdij canjgenz、cizdij linzgenz、linzcangz linzgih guekmiz、nungzgwnj、 gungsiuhse daengj. Gaijgwz laebndei aen dijhi haeujcoengh baujhoh nungzyez, laebndei aen gihci hawj hawciengz daeuj dingh gij gyaqcienz haeuxliengz, gyalai sawqdiemj gaijgwz yiengh baujyiemj nungzyez miz cwngcwz haeujcoengh de, cauhmoq caeuq gyahaenq gij ginhyungz fugsaeh lajmbanj. Lienzdaemh gyalaeg gij gaijgwz lajmbanj, gizdieg gvangqlangh lajmbanj itdingh ndaej sanqfat rengzhoengh moq.
(Roek) Coicaenh ranghdieg doxdaengh hwngfat, hawj gij cwngzcinva yienghmoq guh ndaej engq ndei. Hopheux gaijgez gij vwndiz hwngfat mbouj doxdaengh mbouj cukgaeuq, gaijgwz laebndei gij gihci caeuq cwngcwz doxgven, coicaenh gij fugsaeh goenggungh giekbonj de bienq bingzyaenz bae, doinyoengx gizak ranghdieg dox bouj、singzmbanj yungzhab hwngfat.
Engq ndei baijbouh ranghdieg hwngfat. Dingh ok gij cwngcwz guhfap moq haifat hailangh Baihsae, gij cwngcwz daengz geiz de lumjbaenz youq ranghdieg Baihsae gemjmienx giyez sojdwzsui daengj aeu laebdaeb caephengz. Doeksaed caeuq laebndei gij guhfap gaijgwz cauhmoq coicaenh cienzmienh saenqhwng Doengbaek、 ranghdieg Cungqgyang hwnghwnj、Baihdoeng daiqdaeuz hwngfat. Baekging、Denhcinh、Hozbwz dox boiqhab hwngfat yungh rengz youq gejsoeng gij goengnaengz mbouj dwg soujduh Baekging、biucinj sang hwnqguh Yungzanh Sinhgih. Doeksaed aen gviveh ganghyau cauhlaeb Yez Gangj Au Davanhgih, coicaenh gveihcwz hamzciep, doinyoengx swnghcanj yausu riuzdoeng caeuq hawj vunz baedauq engqgya bienhleih. Hawj ranghdieg Cangzgyangh Sanhgozcouh gyoebhab hwngfat swnghwnj baenz aen canloz guekgya, nda dingh aen ganghyau hengzguh gviveh hwngfat. Rangh ginghci Dahcangzgyangh hwngfat aeu dingjmaenh duenhgwnz duenhgyang duenhlaj boiqhab hwngfat, gyarengz baujhoh coihfuk swnghdai caeuq hwnqguh aen dijhi gyaudoeng daehyinh gyoebhab de, dajcauh ranghdieg ginghci hwngfat ceiq ndei. Haeujcoengh gizdieg dan baengh swhyenz hwngfat guh ginghci cienjhingz. Gyavaiq hawj dieg doenghbaez guh gwzming、ranghdieg minzcuz、 ranghdieg henz guek、ranghdieg gungzhoj hwngfat bouj caez benjdinj. Roengz rengz hung hwngfat yiengh ginghci gwnz haij, baujhoh aen vanzging haijyangz, cauhlaeb aen guekak haijyangz.
Haeujlaeg doicaenh cungj cwngzcinva yienghmoq. Laebdaeb aeu aen singz cungsim dazyinx hawsingz comzgyoengq hwngfat. Guh ndei gij hong hawj boux vunz cienj ok nungzyez de roengzhoh, doinyoengx guh daengz hawj gij vunz ciengzseiz youq ndaw singz engq lai ndaejdaengz yiengh fugsaeh caezcaemh giekbonj. Gaijgez aen vwndiz ranzyouq vunzlai ndei bae, doeksaed aen cwzyin cawjdaej hawsingz，gaijgwz laebndei aen dijhi hawciengz ranzyouq caeuq aen dijhi bauj miz ranzyouq， coicaenh hawciengz fangzdicanj hwngfat ndaej bingzonj cangqheiq. Laebdaeb doinyoengx hwnqguh gij ranzyouq baujcang caeuq gaijcauh gij ranzdiengz hawsingz，bauj hawj gyoengq vunz gungzhoj miz ranz daeuj youq. Laebdaeb youq lajdeih hwnqguh gij gvanjdau cunghab. Gij siujgih gaeuqgeq ndaw hawsingz youh lai youh gvangq， aeu roengz rengz hung bae gaijcauh daezswng，lawhvuenh sezsih boiqdauq moq lumjbaenz raemx、 dienh、roen、heiq daengj，haeujcoengh gya an dendih caeuq guh diuz roen mboujmiz gazngaih，laebndei gij sezsih fugsaeh lwgminz gwndaenj lumjbaenz aen hawciengz bienhleih、aen diemq bienhleih、diuz gai vunz byaij、dieg daengx ci daengj. Cwngzcinva yienghmoq aeu gizgiz daejyienh aeu vunz guh cehsim，hawj ceihleix engqgya unqswnh、fugsaeh engqgya cingsaeq，hawj hawsingz engq hab vunz youq，engqgya bauyungz caeuq engq raeuj simvunz.
（Caet）Lai roengzrengz bae fuengzceih uqlah caeuq cauhlaeb swnghdai，roengzrengz doinyoengx vanzbauj、cinghseuq hwngfat. Vanzbauj、cinghseuq hwngfat dwg gij iugouz bietyienz cauhlaeb aen dijhi yendaiva ginghci，dwg gij banhfap daj goekgaen bae gaijgez aen vwndiz uqlah. Aeu gaijgwz laebndei gij cidu doxgven de， boiqhab doinyoengx hwngfat ndeindei caeuq baujhoh swnghdai vanzging.
Lienzdaemh doicaenh gij hong fuengzceih uqlah. Gyamaenh gyadaih gij soundaej ciengz ciengq baujhoh mbwn lamz，bineix，aeu hawj wyangjvaliuz、 danyangjvavuz baizcuengq doekdaemq 3％，hawj gij naedfaenx mokmong (PM2.5) gizdieg cungqdiemj de laebdaeb bienq damh. Lienzdaemh gung roengz giz ceiq hojnanz ceihleix gij uqlah daihheiq gizdieg Baekging Denhcinh Hozbwz、 Cangzgyangh Sanhgozcouh、 Fwnzvei Bingzyenz daengj，lai roengzrengz bae ceihleix gunghyez、coemh meiz、gihdungceh sam daih goek uqlah. Guh ndei gij hong seizdoeng cinghseuq aeu raeuj fueng dieg baihbaek，saedbauj lwgminz ndaej raeuj gvaq doeng. Gyarengz fuengzceih raemx、namh uqlah， bineix aeu hawj vayoz yungh yangj、anhdan baizcuengq faenbied doekdaemq 2%. Gyavaiq ceihleix gij raemx haeu bienq ndaem de，fuengzceih gij uqlah giz goek baenz benq nungzyez，doicaenh gyoebhab cingjceih liuzyiz cungqdiemj caeuq henzhamq haij. Lai yunghrengz bae faenloih cawqceq gij huqfeiq baenzndaek caeuq gij nyapnyaj hawsingz，coicaenh gemj soqliengh、baenz swhyenz、mboujmiz haih bae. Gyarengz gunggvan gohgi hungnaek fuengzceih uqlah. Giyez guhbaenz aen cawjdaej fuengzceih uqlah, itdingh aeu ciuqfap hengzguh aen cwzyin vanzbauj. Gaijgwz cauhmoq gij fuengsik ceihleix vanzging，doiq giyez geiq aeu ciuq faplwd ciuq gvidingh gamduk，youh aeu yawjnaek gij geqgouz hableix gyoengqde、gyarengz bangrex ceijyinx gyoengqde，doiq gij aeu cingjgaij dabbiu de aeu hawj mboengq gvaqdoh hableix ndeu，baexmienx genjdanh moegdoeg bae cawqceq、gven'gvak sat saeh. Giyez miz gij rengz gag rox hwngfat caeuq gij rengzat baihrog le，fuengzceih uqlah itdingh guh ndaej engq ndei.
Guhhung gij canjnieb cinghseuq vanzbauj. Dingjmaenh ceihleix goekdaeuz，gyavaiq gaijcauh hangznieb hojden、gangdiet baenz baizcuengq gig noix bae，gaijcauh gij hangznieb uqlah haenq lai baenz hab biucinj baizcuengq bae. Diuzcingj aen gvaenghgyaq nwngzyenz hawj de bienq ndei. Doicaenh yungh meiz engqgya cinghseuq. Laebcienz aen dijhi canj、gung、 cwk、gai denhyenzgi. Roengzrengz hwngfat gij nwngzyenz ndaej caiqseng，gyavaiq gaijgez aen vwndiz baenzlawz cawqleix comz caeng gij uqlah dienhrumz、 dienhndit、dienhraemx. Gyarengz hwnqguh aen guenjvangx raemxuq caeuq doengh gaiq siu uq hawsingz hung. Coicaenh mbaetyungh cizyoz caeuq sinzvanz leihyungh swhyenz，doigvangq gij gencuz ancienz vanzbauj、yiengh gvaidi dajbau ancienz de. Gaijgwz laebndei yiengh ginghci cwngcwz nangqdaengz vanzging，laebndei aen cidu gaicawx gij gienz baizuq， gyavaiq hwngfat yiengh ginhyungz ndeileih vanzging， gungganq buek giyez guzgan conhyez vanzbauj ndeu， gyaak yiengh naengzlig loegsaek hwngfat.
Gyarengz coihfuk baujhoh aen hidungj swnghdai. Doicaenh genj dieg sawq guh aen gunghcwngz coihfuk baujhoh gij swnghdai bya、raemx、ndoeng、naz、huz、diegnywj，laebdaeb ca ndei gaiq hong diegguek ndaem faex ndaem nywj，lai rengz fuengz sa ceih sa、ceihleix raemx namh laesaet. Gya rengz baujhoh swnghvuz lai yiengh. Laebdaeb mbeguh daengx ndaem reihnaz hoizfuk diegndoeng diegnywj diegcumx. Gyalaeg gaijgwz aen dijci gunghyenz guekgya. Laebndei aen gihci dienzbouj swnghdai. Loegsaek hwngfat bouxboux miz faenh，ceiq nanzndaej dwg doenghfwngz bae guh、mbouj soengheiq couh guh ndaej baenz. Raeuz aeu doengzcaemh haenqrengz，hawj gyoengq vunzlai cungj ndaej youq gizdieg vanzging gyaeundei hab youq.
（Bet） Gyalaeg gaijgwz gizdieg cungqdiemj， gyavaiq laebndei aen gihci hawciengz. Hopheux gij mauzdun doedyienh caeuq hothoh youqgaenj， doinyoengx yiengh gaijgwz mizgven haeuj daengz gizlaeg, laebndei aen dijci gihci habngamj ceiq ndei bae hwngfat， hawj hawciengz fatok rengzdoengh caeuq ndawbiengz fatok rengzak dajcauh.
Gyavaiq gaijgwz swhcanj guekmiz、giyez guekmiz. Gyarengz guh ndei gij hong gamguenj swhcanj guekmiz，doicaenh genj dieg sawq guh gaijgwz gij swhbwnj douzswh、aen yinyingz gunghswh guekmiz，coi hawj swhcanj guekmiz mbouj bienq cienh caiqlij lai dij cienz dem. Gag rox gaenxmaenx onjdangq bae doicaenh gij hong gaijgwz yiengh sojyoujci doxgyaux de. Laebndei aen gvaenghgyaq ceihleix gunghswh，laebndei aen gihci ciuq hawciengz ginghyingz，laebhwnj aen cidu boux cienmonz guh hong guenjleix daengj. Ciuqfap cawqceq“aen giyez daigyaengj”. Gyalaeg gaijgwz hangz dienhlig、hangz youzheiq、hangz dietloh daengj，gaengawq gij daegdiemj hangznieb mbouj doengz, doiq doengh hangz gag baenz lungjdon de aeu vangj yin faenliz，dawz gij hong ndaej lai aen cawjdaej ciengj guh de cienzmienh doi coh hawciengz. Giyez guekmiz aeu gag baengh gaijgwz cauhmoq、 lienh ndang cangqcwt，mboujduenh dem'ak gij rengzhoengh hwngfat caeuq geu rengz beijak ceiq youqgaenj de.
Roengz rengz hung hawj gij vanzging minzyingz ginghci hwngfat bienq ndei. Dingjmaenh“song aen giendingh mbouj bienq”，gikcoi、haeujcoengh、 dazyinx yiengh ginghci mbouj dwg gunghyoujci de hwngfat. Ciuq aen yenzcwz goengcingq goengbingz， youq aeundaej yausu、cinjhawj haeujbae、ginghyingz yinhhengz、cwngfuj dajcawx、ciubiu douzbiu daengj fuengmienh，itlwd bingzdaengj doiqdaih gij giyez gak yiengh sojyoujci. Aeu hawj cwngfuj caeuq canghseng'eiq laebhwnj cungj gvanhaeh caengaenh cinghseuq moqsak， laebndei aen gihci cwngfuj caeuq giyez gaeudoeng， gikfat gij cingsaenz canghgiyez，coicaenh minzyingz ginghci hwngfat swnggaep. Baujhoh canjgienz itdingh aeu giendingh mbouj bienq，aeu ciuqfap fadceih ciemqgienz，doiq anq loek anq ienuengj de, miz loeng itdingh aeu niujcingq. Aeu roengzrengz dajcauh aen vanzging gaicawx ndeindei，hawj canghgiyez ansim guh seng'eiq、 cuengqsim banh giyez.
Gyalaeg gaijgwz aen dijci caizsui ginhyungz. Gyarengz hawj yawhsuenq engqgya goenghai， cienzmienh saedhengz guenjleix gij cizyau yawhsuenq. Haeujlaeg guh yiengh gaijgwz vehfaen gij caizcwng saehgienz nem ceiok cwzyin cunghyangh caeuq deihfueng，doicaenh gaijgwz vehfaen gij souhaeuj cunghyangh caeuq deihfueng. Laebndei aen cidu cienjok ceihawj. Laebndei aen dijhi gvaehsuiq deihfueng， yamqonj doicaenh laebhwnj aen fap gvaehsuiq fangzdicanj. Gveihfan yiengh gihci aen cwngfuj deihfueng ciqcaiq couzcienz. Aeu fugsaeh yiengh ginghci saeddaej dazyinx fuengyiengq，gaijgwz hawj aen gvaenghgyaq ginhyungz dijhi mboujduenh bienq ndei， hwngfat yiengh ngaenzhangz minzyingz caeuq yiengh ngaenzhangz segih. Gaijgwz laebndei yiengh cidu demh giek hawciengz swhbwnj，coicaenh aen hawciengz swhbwnj lai caengz de hwngfat ndaej cangqheiq onjdingh，daezsang aen beijlaeh cigciep yungzswh daegbied dwg gujgenz yungzswh. Gyaak gij goengnaengz bauj oksaeh dienzboiz hangznieb baujyiemj. Gyarengz bae gamcaek yawhgingj caeuq vaqgej cawqceq yiengh yungyiemj ginhyungz. Aen dijhi caizcwng ginhyungz guek raeuz cungjdaej onjmaenh，gij cwngcwz hongdawz ndaej yungh de lai，raeuz miz naengzlig souj ndaej diuz daejsienq mbouj ok yiengh fungyiemj baenz rangh baenz roix.
（Gouj） Doinyoengx sojmiz fuengmienh doiq rog hailangh，gungganq gij rengzak moq guh gozci ginghci doxgap caeuq beijak. Caiq gya'gvangq gizdieg hailangh、hawj yiengh baijbouh hailangh bienq ndei bae，laebdaeb doinyoengx hailangh sanghbinj caeuq yausu riuzdoengh, engqgya yawjnaek hailangh cidu lumjbaenz gveihcwz daengj，aeu cungj hailangh suijbingz sang bae daiqdoengh cienzmienh gyalaeg gaijgwz.
Coicaenh vaimou youq mwh bingzonj mboujduenh bienq ndei. Doinyoengx aen hawciengz cuzgouj bienq baenz lai yiengh. Lai hawj cuzgouj miz yiengh baujyiemj saenqyungh. Gaijgwz laebndei aen cwngcwz bangrex yienghnieb moq lumjbaenz densangh hamj gyaiq daengj. Doinyoengx yiengh fugsaeh mouyiz cauhmoq hwngfat， dazyinx yiengh mouyiz gyagoeng de cienjhingz swnggaep、senj daengz Cungqgyang Baihsae bae， ndeindei hawj cunghhoz baujsuigih langh rengz okdaeuj. Mboujduenh gaijndei aen gvaenghgyaq cingouj， gaenxmaenx gyadaih cingouj. Banh ndei Gaiq Daihngeih Cunghgoz Gozci Cingouj Bozlanjvei. Lai hawj doenggvan engq fuengbienh engq vaiqdangq.
Gyarengz supyinx swhbwnj guekrog. Caiq cuengqgvangq cinj haeuj hawciengz，sukgemj mbawdan gimqhaed swhbwnj guekrog haeujbae，cinj hawj swhbwnj guekrog youq lingjyiz engq lai ndaej gag okcienz ginghyingz. Doeksaed gij guhfap gaijgwz hailangh ginhyungz daengj hangznieb，laebndei gij cwngcwz hailangh aen hawciengz caigen. Vaiqvaiq caeuq gij gveihcwz ginghmou gozci doenghengz de doiqciep， hawj cwngcwz engq ronghcingx caeuq caephengz engq doxdoengz，caux aen vanzging bingzdaengj doiqdaih gij giyez neiswh vaiswh，hawj gyoengqde ndaej goengbingz beijak. Lai roengzrengz baujhoh gij gienzik habfap canghseng'eiq guekrog. Hawj dieg sawq guh swyouz mouyiz de lai miz gienz gag guhcawj gaijgwz cauhmoq， dem laeb benq dieg moq hawj Sanghaij sawq guh swyouz mouyiz，doicaenh hwnqguh gizdieg sawq guh swyouz mouyiz Haijnanz、damqra hwnqguh dieg sok swyouz mouyiz miz gij daegsaek Cungguek. Haeujcoengh aen ginghci gaihfazgih、gauhsinh gisuz gaihfazgih、 sinhgih gaep guekgya ndalaeb sawqdiemj de haiguh yiengh gaijgwz nangqdaengz gizdieg sawq guh swyouz mouyiz，gyaak geu rengz fatsanq daiqdoengh de， dajcauh diegsang moq gaijgwz hailangh. Gij vanzging douzswh Cungguek itdingh yaek yied daeuj yied ndei， gij seizgei giyez gak guek youq Cungguek hwngfat itdingh yaek yied daeuj yied lai.
Doinyoengx caez laeb “it rangh it loh”. Dingjmaenh caez yaeng caez laeb caez ndaej leih，ciuqsouj aen yenzcwz hawciengz caeuq gij yenzcwz gozci doeng'yungh，hawj aen cawjdaej giyez langh rengz okdaeuj，doinyoengx gij sezsih giekdaej de dox lienz dox doeng，gyarengz hwnj gwnz gozci bae gapguh canjnwngz，gya'gvangq yiengh gapguh hawciengz fueng daihsam. Banhndei Gaiq Daihngeih “It Rangh It Loh” Gozci Hozcoz Gauhfungh Lundanz. Doinyoengx doiq rog douzswh gapguh cangqheiq miz bouhloh hwngfat.
Coicaenh gij hong hawj mouyiz caeuq douzswh bienq ndaej swyouz、fuengbienh bae. Cungguek giendingh henhoh ginghci byaij coh seiqgyaiq caeuq swyouz mouyiz，gaenxmaenx caeuqfaenh gaijgwz Simou Cujciz. Gyavaiq cauhlaeb aen vangjloz swyouz mouyiz biucinj sang，doicaenh gij damzbuenq gvendaengz aen hezding ranghdieg ginghci cienzmienh gapdoih、aen swmougih Cungh Yiz Hanz、aen hezding Cungh Ouh douzswh, laebdaeb doinyoengx Cungh Meij lailai siengliengz ginghci mouyiz. Cungguek gaemdawz aen leixniemh gapguh doxleih、caez ndaej hwngfat，soqlaiz cawjcieng doenggvaq bingzdaengj doxyaeng bae gaijgez gij doxdawz ndaw mouyiz，nyinhcaen ciuq gij wngqcingz gaenq guh ok bae guh，baenzlawz cungj henhoh gij gienzik habfap bonjndang.
（Cib）Gyavaiq hwngfat gij saehnieb ndawbiengz， engq ndei baujcang caeuq gaijndei gij gwndaenj lwgminz. Bineix gij atlig caizcwng soucei doxdaengh yienznaeuz gyahung，hoeng saedbauj gij cienzngaenz itdingh aeu cuengq youq gij gwndaenj lwgminz de dan gya mbouj gemj. Daemxcengj goengrengz ndawbiengz gyalai gunghawj yiengh fugsaeh mbouj dwg goenggungh giekbonj de，hawj gij aeuyungh lai mbaek、lai yiengh vunzlai cungj ndaej muenxcuk.
Hwngfat gij gyauyuz engq ndei engq goengbingz de. Haeujlaeg gaijgwz gyauyuz gyauyoz. Doicaenh gij yivu gyauyuz singzmbanj gyoebhab hwngfat，gyavaiq gaijndei gij diuzgienh banhhag hagdangz lajmbanj，lai gyarengz cauhlaeb aen doih lauxsae lajmbanj，cagaenj gaijgez gij vwndiz “aen ban vunzsoq daiq lai” aen hagdangz ndaw singz，baujcang gij lwgnyez gaenriengz bohmeh haeuj singz dajgoeng de ndaej haeuj hag doegsaw， hwngfat “hulenzvangj ＋ gyauyuz”, coicaenh caemh yungh swhyenz ceiq ndei. Lai diuz roenloh bae gyadaih gunghawj gij gyauyuz duenh caengz haeujhag， youwzyenz mboujlwnh dwg goengbanh roxnaeuz minzbanh，cijaeu hab aen biucinj ancienz、cienzhag hableix、gyahcangj cuengqsim，cwngfuj cungj aeu haeujcoengh. Doicaenh bujgiz gij gyauyuz duenh gauhcungh，banhndei minzcuz gyauyuz、daegbied gyauyuz、laebdaeb gyauyuz，ciuqfap haeujcoengh hwngfat gij gyauyuz minzban. Laebdaeb ca ndei doeksaed gij cienzhong fukleih gyoengq lauxsae guh gaiq hong yivu gyauyuz. Doicaenh hwnqguh aen daihhag ceiq ndei caeuq aen yozgoh ceiq ak，haeujcoengh Cungqgyang、Baihsae hwnqguh aen daihhag miz daegsaek、suijbingz sang. Bineix caizlig yienznaeuz gaenj lai，aen beijlaeh gij ginghfei guekgya caizcwng bued guh gyauyuz ciemq aen swnghcanj cungjciz ndawguek laebdaeb baujciz youq 4％ doxhwnj, cunghyangh caizcwng anbaiz ceiok hawj gyauyuz yaek mauhgvaq 1 fanh ik maenz. Raeuz aeu cietsaed yungh ndei gij cienzngaenz dijbauj de, roengzrengz banhndei gij gyauyuz lwgminz habhoz, dak hwnj aen maqmuengh daengzcog.
Baujcang yiengh fugsaeh yihliuz veiswngh giekbonj. Laebdaeb daezsang aen suijbingz baujcang yihbauj giekbonj caeuq baujyiemj bingh hung hawj gihminz singzmbanj， aen biucinj caizcwng bangbouj gihminz yihbauj moix vunz bingzyaenz demgya 30 maenz，dingz ndeu yungh youq yiengh baujyiemj bingh hung. Gyangqdaemq diuz sienq ceiqdaemq bauqsiu baujyiemj bingh hung caemhcaiq gak dieg doxdoengz，aen beijlaeh bauqsiu daj 50% daezsang daengz 60%，caiq gemjnoix diuz rap ywbingh boux baenz bingh hung、gyoengq vunz hojnanz. Lai yunghrengz fuengzyw binghnaek. Youq guek raeuz, doengh ranz deng gij bingh’aizcwng geujnaux de baenz cien baenz fanh, aeu bae hengzguh fuengzyw bingh’aizcwng, doihaeuj yawhfuengz raengcaz、caeux yawj caeux yw caeuq gohyenz gunggvan, baedrengz hawj gizin beksingq ndaej hoizrungq. Guh ndei gaiq hong fuengzyw binghmansing, dawz gij yw mwnzcinj yungh lumjbaenz bingh hezyaz sang、binghnyouhdangz daengj nabhaeuj yihbauj bauqsiu. Gyavaiq yenzgiu haifat gij yw lwgnyez. Lai gyarengz baujcang gij yw bingh noix raen. Haeujlaeg gaijgwz gij fuengsik yihbauj ceihawj，guhndei gij gvaenghgyaq yihbauj ceiok. Cagaenj doeksaed caeuq laebndei gij cwngcwz hamj sengj youq dieg wnq ywbingh ndaej cigciep gietsuenq，caenhvaiq hawj boux youq dieg wnq ywbingh de youq sojmiz gij yihyen dinghdiemj ndaej dawz gaj yawj bingh、dangseiz gietsuenq, cietsaed fuengbienh doengh boux riuzdoengh caeuq bouxgeq gaenriengz haenx. Laebndei aen gihci cizcungh dajcawx caeuq sawjyungh gijyw. Gyalaeg gyoebhab gaijgwz yihyen goenglaeb. Coicaenh ndawbiengz banh yihyen. Hwngfat “hulenzvangj ＋ yihliuz gengangh”，gyavaiq laebhwnj aen dijhi fugsaeh gwnzvangj yawjbingh ywbingh，lai yunghrengz hawj gij yihliuz veiswngh gihgou caengzgiek engq ak caeuq gungganq gij canghyw husw caengzgiek，engq ndei bae guh faengaep yawjbingh ywbingh caeuq iekdingh canghyw daengz ranz fugsaeh. Laebdaeb aeu fuengzre guhgoek，dawz gij cienzngaenz caizcwng bangbouj gihbwnj gunghgung veiswngh fuzvu saen demgya de cienzbouh yungh youq ndaw mbanj caeuq segih, itdingh aeu hawj gyoengq vunzlai caengzgiek souh'ik. Ca ndei fuengzceih binghlah、bingh deihfueng、bouxcoz nyezrauh dagaenhyanx. Guhndei aen cwngcwz boiqdauq senglwg，lai yunghrengz fugsaeh mehmbwk lwgnyez cangqndang. Haeujcoengh gij saehnieb cunghyihyoz doenggvaq cienzswnj cauhmoq bae hwngfat. Lai yunghrengz son cungqvunz baenzlawz guh ndang cij ndei. Gijyw yizmyauz cigciep nangqdaengz diuz mingh vunz ancienz, bietdingh aeu lai yunghrengz guh daengx roen gamguenj，doiq boux famhfap de fad naek mbouj louzcingz，doiq boux mbouj souj ndei cizcwz luenh yungh gienzlig de aeu yiemzsuk cazbanh，baenzlawz cungj aeu soujndei diuz sienq fuengzhen diuz mingh cangqvuengh vunzlai.
Laebndei gij cidu caeuq cwngcwz ndawbiengz baujcang. Doicaenh cauhlaeb aen dijhi baujcang ciengxlaux lai mbaek. Laebdaeb demgya gij cienz ciengxlaux wng miz hawj boux duiyouh. Doeksaed ndei gij dakdaih baujcang bouxbing doiq ok bingdoih, laebndei gij cwngcwz swnjciep gij ciengxlaux wng miz、gij baujyiemj ywbingh wng miz hawj bouxbing doiq ok bingdoih. Habdangq daezsang doengh gij biucinj dihbauj singzmbanj、cienhangh gouqbang, gyarengz baujcang boux lwgnyez loemq hoj. Gyarengz bang gyoengq cizgungh hawsingz hojnanz de duetgungz. Engq ndei bae fuengzre ndangcanz, bang bouxndangcanz hoizfuk ndangcangq. Cwngfuj aeu caenhrengz bang vunzlai gouqgip gejhoj、doek nae soengq danq， diuz daejsienq bauj hawj lwgminz senglix itdingh aeu soujmaenh.
Gyalai gij cinghsinz vwnzva swnghhoz hawj gyoengq vunzlai. Gungganq caeuq hengzguh aen gyacizgvanh cehsim sevei cujyi，gvangqlangh hawj vunzlai caeuqfaenh cauhlaeb cinghsinz vwnzmingz，roengzrengz cienzhwng cungj cingsaenz haenqguh、cungj cingsaenz gohyoz、cungj cingsaenz lauzmoz、cungj cingsaenz lauxcangh, gyonj hwnj gij rengz hung'ak baenaj haeuj ndei. Gyavaiq cauhlaeb yiengh cezyoz sevei gohyoz miz gij daegsaek Cungguek. Lai yunghrengz demgya gij neiyungz hulenzvangj. Gaujhoengh vwnzyi cangcoz，hwngfat gij saehnieb sinhvwnz okbanj、gvangjbo yingjsi caeuq dangjan daengj. Lai yunghrengz baujhoh、leihyungh vwnzvuz caeuq cienzciep feihvuzciz vwnzva yizcanj. Doinyoengx gaijgwz hwngfat hangh saehnieb vwnzva caeuq aen canjnieb vwnzva，hawj caengzgiek gyaak gij bonjsaeh aeu vwnzva fugsaeh cungqvunz. Lai yinx vunzlai doegsaw，doicaenh hwnqguh aen biengz maij hag. Gyalaeg caeuq rogguek gyaulouz yinzvwnz. Gvangqlangh guh gij hozdung bouxboux lienh ndang. Netsaed guh ndei gij hong caepcawq camgya 2020 nienz Auyinvei、 Canzauvei，cingsim couzbanh Baez Auyinvei Seizdoeng Baekging、Baez Canzauvei Seizdoeng Baekging，banh ndei Gaiq Daihcaet Bouxbing Seiqgyaiq Yindung'vei. Gyoengq lwgminz ndangdaej simleix cangqheiq, ndawbiengz couh gig miz rengzhoengh, guekgya couh mwnhoengh hwngvuengh.
Gyarengz caeuq cauhmoq ceihleix ndawbiengz. Doinyoengx rapnaek ceihleix ndawbiengz senj roengz caengzgiek bae，doigvangq gij “gingniemh Funghgyauz” coicaenh ndawbiengz huzndei, cauhlaeb aen gvaenghgek moq ceihleix segih singzmbanj. Dazyinx caeuq haeujcoengh gij cujciz ndawbiengz、gij gaeuqbang yinzdau、gij fugsaeh gagnyienh nem gij saehnieb swnzsienh cangqheiq hwngfat. Laebndei aen dijhi saenqyungh ndawbiengz. Baujcang gij gienzik habfap mehmbwk、lwgnyez、bouxgeq、bouxndangcanz. Gaijndei gij hong sinfangj，ciuqfap gibseiz gaijgez gij geqgouz hableix vunzlai. Lai yunghrengz guh sevei sinhlij fuzvu. Laebndei aen dijhi wngqgip guekgya，gyaak yiengh naengzlig fuengzcai gemjcai gouqcai. Gyarengz hawj swnghcanj ancienz，fuengzre caeuq naenxhaed saehhux hungnaek、daegbied hungnaek. Guhndei gij hong deihdoengh、diensiengq、suijvwnz、deihcaet、rauveh daengj. Laebndei aen dijhi yungh faplwd fugsaeh cungqvunz，gyalaeg guh bujfaz senhconz gyauyuz. Lai yunghrengz gyaak gij naengzlig henhoh guekgya ancienz. Laebndei aen dijhi lai mbaek yawhfuengz gaemguenj cianh ndawbiengz， haeujlaeg doicaenh hangh doucwngh cienmonz baetcawz seiqlig yaksieb，ciuqfap fadceih doengh gij famhfap famhcoih lumjbaenz caeg、ciengj、yaeuh、biuz、doj、doeg daengj，dwkceih gij ginghci famhcoih mbouj habfap comzcienz、cienzsiu daengj， cingjceih gij vwndiz doedyienh lumjbaenz ciemqfamh gij saenqsik goyinz gunghminz daengj，baenzlawz cungj aeu henhoh ndei gij saedceij an'onj vunzlai.
Gak boux daiqbiuj！
Hingzseiq moq yinvu moq，youh doiq gij hong cwngfuj daez ok le iugouz engq sang. Gak gaep cwngfuj aeu laebmaenh “seiq cungj eiqsik”，giendingh “seiq yiengh gagsaenq”，baenzlawz cungj aeu guh daengz “song aen henhoh”，gagrox youq gwnz swhsiengj、gwnz cwngci、gwnz hengzdoengh caeuq aen Dangjcunghyangh aeu Siz Ginbingz dungzci guh cehsim de doxdoengz caez，doeksaed gij iugouz cienzmienh yiemzhaenq guenj Dangj，gamj daj goekgaen bae gaijbienq bonjfaenh，haeujlaeg doicaenh gemj cwng cuengq gienz，gyavaiq cienjbienq ciznaengz、 daezswng yauqnaengz，lai gya gij rengzgoengsaenq caeuq rengzcaephengz cwngfuj，engq ndei muenxcuk gij deqmuengh moq lwgminz siengj gvaq yiengh saedceij engq ndei.
Laebdaeb ciuqfap cienzmienh hengzguh cizcwz. Haeujlaeg gvancez gij gihbwnj fanghloz cienzmienh ciuqfap guenj guek，yiemz souj yenfaz caeuq faplwd， coisawj gij hozdung cwngfuj ndaej cienzmienh nabhaeuj diuz roen fapceih. Gak gaep cwngfuj aeu ciuqfap ciepsouh doengz gaep yinzda caeuq aen cangzveijvei de gamduk， gagrox ciepsouh yinzminz cwnghez minzcuj gamduk， gag bae ciepsouh ndawbiengz caeuq yizlun gamduk, hawj gienzlig ndaej youq baihnaj cungqvunz bae yungh. Gij saeh cwngfuj guh，cungj wnggai dwg gij saeh lwgminz muengh guh. Aeu dingjmaenh gohyoz、 minzcuj、 ciuqfap gezcwz，nyinhcaen dingqaeu gij yigen yinzda daiqbiuj、cwnghez veijyenz，dingqaeu gij yigen minzcuj dangjbai、gunghsanghlenz、boux mizmingz mbouj haeuj dangjbai caeuq gak yinzminz donzdij，dingqaeu gij yigen giyez caeuq cungqvunz ndawbiengz，hawj gak hangh cwngcwz hab gij guekcingz giekbonj caeuq gij saedsaeh gyaeuhmiz，engqgya depgaenh beksingq、engqgya hab hoz lwgminz. Cienzmienh doicaenh goenghai hongsaeh guenjleix guekgya. Haeujcoengh aen donzdij cujciz vunzlai lumjbaenz gunghvei、gungcinghdonz、fulenz daengj lailai ok rengz ndeindei ok rengz. Cienzmienh doeksaed aen cidu hengzguh gij cwzyin hingzcwng caepfap caeuq aen cidu gyaepcaz cwzyin，doiq sojmiz gij guhfap famh fap famh gvi cungj aeu haenqsim cazcawq，doiq sojmiz gij yienhsiengq caepfap mbouj goengcingq mbouj vwnzmingz de cungj aeu haenqsim cingjceih，doiq sojmiz gij vunz mbouj caenhsim banh goengsaeh de cungj aeu haenqsim gyaepcaz cwzyin.
Haeujlaeg doicaenh cauhlaeb dangjfungh lenzcwng. Netsaed mbeguh aen cujdiz gyauyuz “mbouj lumz simnduj、geiqmaenh sawjmingh”. Nyinhcaen gvancez doeksaed Cunghyangh Bet Hangh Gvidingh caeuq gij banhfap ciengzsaeq hengzguh de，dingjmaenh naihnanz bae niujcingq cingjceih “seiq cungj cozfungh”. Gyarengz cauhlaeb aen cwngfuj cinghseuq，cingjdaej doicaenh aen gihci hawj vunz mbouj gamj nduknaeuh、mboujndaej nduknaeuh、mbouj siengj nduknaeuh. Lai yunghrengz guh saemjgeiq gamduk. Doengh boux guhhong ndaw cwngfuj aeu gagrox ciepsouh faplwd gamduk、genhcaz gamduk caeuq lwgminz gamduk. Dagrau niebcik doeksat dwg yawj guh ndaej baenz gijmaz. Gak gaep cwngfuj aeu laemxsim fanjdoiq caeuq cingjceih sojmiz hingzsi cujyi、 gvanhliuz cujyi，hawj ganbu daj ndaw vwnzgen baenz ndoi hai hoih baenzraeuh、daj ndaw ciep bingzguj coux genjcaz、daj ndaw caizliuh bauqbiuj duetndang okdaeuj，dawz goengrengz yungh youq gaijgez gij vwndiz saedsaeh. Gemjnoix caeuq gveihfan gij saehhangh dukcaz genjcaz gaujhaed，hengzguh “hulenzvangj ＋ dukcaz”. Gemjnoix hai hoih gemjnoix fat vwnzgen， bineix Gozvuyen caeuq gij bouhmonz de aeu daiqdaeuz lailai gemjnoix hai hoih、laemxsim gemjnoix vwnzgen sam faenh cih it doxhwnj.
Cietsaed gyarengz rapdawz cwzyin. Gij cingzcik gig ndei gaijgwz hwngfat Cungguek，dwg gyoengq ganbu vunzlai vuet oen vuet cah、gwn haemz gwn hoj guh okdaeuj. Yaek guhbaenz aen moegbiu buekguh “song aen bak bi”，guhbaenz yiengh vuenyungz caeuq gyaepgouz lwgminz Cungguek，lij aeu ciengzgeiz haenqrengz guh cijndaej. Goengcingq guh saeh, haep bak guh hong. Gak gaep cwngfuj caeuq gij vunz guhhong ndaw cwngfuj aeu gangj caen gouz saed、baedrengz gaiqcawz rog wenj ndaw nyauq，aeu gij soundaej doinyoengx gaijgwz hwngfat daeuj gangjvah，aeu gij cingzcik saedcaih guhsaeh cauhnieb daeuj gyau mbawgienj. Laebndei aen gihci gikcoi gamhanh caeuq aen gihci caenh cizcwz mienx gyaep cwzyin，dajcauh ok aen vanzging hawj ganbu nyienh guh saeh、gamj guh saeh、guh baenz saeh. Hawj cunghyangh caeuq deihfueng engq gaenxmaenx bae guh，gingqcungh gij cingsaenz cauhnduj gyoengq vunzlai caengzgiek，vih deihfueng daihdamj bae damqra daezhawj gikcoi、louz gaeuq hoenggan. Gyoengq ganbu aeu miz gij sim guh saehnieb caeuq gij sim gouz baenaj giengzhaenq，bungz nanz mbouj veqdeuz、gangj ngeih mbouj vut rap，ngaemgyaeuj haenqguh、giethab saedsaeh ak cauhmoq bae guh，roengzrengz guh'ok gij niebcik moq doiq ndaej hwnj lwgminz，guh'ok yiengh ronghlwenq moq Cungguek hwngfat.
Gak boux daiqbiuj！
Raeuz aeu dingjmaenh caeuq laebndei aen cidu dieg minzcuz gagguenj，cienzmienh gvancez aen minzcuz cwngcwz Cunghgoz Gungcanjdangj，gyalaeg son'gyauq minzcuz doxgiet cinbu，couq maenh gij eiqsik caezcaemh aen Cunghvaz Minzcuz ndeu，coicaenh gak minzcuz doxhuz caemhyouq、caezsim cawz hoj、huzndei hwngfat. Gyarengz haeujcoengh dieg minzcuz caeuq aen minzcuz vunz haemq noix de hwngfat，haeujlaeg saedhengz aen hengzdoengh coisawj henzguek hwngvuengh lwgminz fouqmiz，caezsim gaprengz cauhlaeb aen ranzmbanj gyaeundei 56 aen minzcuz doengzcaez doxgiet buekguh、doengzcaez mwnhoengh hwngfat.
Raeuz aeu cienzmienh gvancez aen fuengcim giekbonj guh gaiq hong cunghgyau Cunghgoz Gungcanjdangj， laebdaeb hawj cunghgyau guek raeuz ciuq aen fuengyiengq habngamj guekcingz Cungguek bae hwngfat，ciuqfap guenjleix hongsaeh cunghgyau，hawj boux vunz mizmingz ndaw gyaiq cunghgyau caeuq gyoengq vunz saenqgingq cunghgyau de langh rengz coicaenh ginghci sevei hwngfat.
Raeuz aeu nyinhcaen doeksaed aen cwngcwz gyauzvu，baujcang gij gienzik habfap gyoengq beixnuengx vazgyauz rogguek caeuq gyoengq vazgyauz ma guek nem vunz ndaw ranz gyoengqde，gaijndei caeuq gyarengz fugsaeh，hawj gyoengqde dawz ok yiengh'ak daegbied caeuq geu rengz youqgaenj，veh nduen aen gyuen doengzsim ceiq hung gyoengq lwglan Cunghvaz ndawguek rogguek, gietcomz geu rengz hwnghoengh caez bae dajcauh yiengh ronghsag lwenqda.
Gak boux daiqbiuj！
Bi gvaqbae neix，gyaak gozfangz caeuq bingdoih ndaej netsaed doicaenh，aen saehnieb hawj bingdoih giengzak yienh'ok haujlai yienghsiengq moq cingzcik moq. Bineix，yaek laebdaeb aeu aen moegbiu Dangj youq seizdaih moq hawj bingdoih giengzak daeuj ceijyinx，youq mwh demgiengz gozfangz caeuq bingdoih，laeb maenh gij diegvih ceijyinx aen swhsiengj hawj bingdoih giengzak Siz Ginbingz，haeujlaeg doicaenh baengh cwngci demgiengz bingdoih、baengh gaijgwz hawj bingdoih giengzak、baengh gohgi saenqhwng bingdoih、ciuqfap guenjleix bingdoih. Dingjmaenh aen yenzcwz caeuq cidu gaenbonj Dangj baenzbaenz aeu dazyinx bingdoih，cienzmienh haeujlaeg gvancez ginhveij cujsiz fucwzci. Gvancez aen canloz fuengcim bingsaeh seizdaih moq，daezsang gij suijbingz lumj caen hoenx bae lienh bing，baenzlawz cungj aeu henhoh gij cawjgienz、ancienz、leih'ik hwngfat guekgya. Laebdaeb gyalaeg gaijgwz gozfangz caeuq bingdoih， laebhwnj laebndei aen cidu dijhi yiengh ginhsw cwngcwz sevei cujyi miz gij daegsaek Cungguek. Gyarengz caeuq laebndei aen dijhi gozfangz gyauyuz、gozfangz dungyenz，lai demrem gij eiqsik gozfangz daengxcungq lwgminz. Haeujlaeg hengzguh aen canloz ginh minz yungzhab hwngfat，gyavaiq yamqdin cauhmoq gij gohgi gozfangz. Gak gaep cwngfuj aeu haenqrengz gvansim haeujcoengh demgiengz gozfangz caeuq bingdoih， haeujlaeg bae guh gij hozdung “song yungj”，hawj gofaex ginhcwng ginhminz doxgiet goek laeg、 mbaw mwn、ciengzlwenx heuyau.
Gak boux daiqbiuj！
Raeuz aeu laebdaeb cienzmienh dengcinj bae gvancez diuz fuengcim “aen guekgya ndeu song cungj cidu”、 “vunz Yanghgangj guenjleix Yanghgangj”、 “vunz Aumwnz guenjleix Aumwnz”、 yienghsaeh gagguenj lailai，yiemzgek ciuq yenfaz caeuq gihbwnjfaz banhsaeh. Haenqrengz haeujcoengh aen cwngfuj caeuq boux hingzcwng cangjgvanh Yanghgangj、Aumwnz Dwzbez Hingzcwnggih ciuqfap yunghgienz. Haeujcoengh Gangj Au gaemdawz aen seizgei hungnaek doengzcaez cauhlaeb “it rangh it loh” caeuq Yez Gangj Au Davanhgih，engq ndei bae dawz ok gij ak bonjfaenh，caeuq Diegndaw cienzmienh gyalaeg doxleih gapguh. Raeuz gig saenq，Yanghgangj、Aumwnz itdingh ndaej caeuq Diegndaw guekcoj doengzcaez hwngfat itheij baenaj、itdingh ndaej baujciz ciengzgeiz mwnhoengh onjdingh.
Raeuz aeu dingjmaenh aen fuengcim cwngcwz hungnaek guh gij hong mizgven Daizvanh. Cienzmienh gvancez doeksaed gij cingsaenz aen gangjvah youqgaenj Siz Ginbingz cungjsuhgi youq gwnz hoih geiqniemh 《Mbaw Saw Lwnh Beixnuengx Daizvanh Nyi》 fatbiuj 40 hopbi gangj haenx，dawzmaenh gij yenzcwz aen Cungguek dog caeuq “Gij Nyinhrox Doxdoengz Goujngeih Nienz”，doicaenh song hamq gvanhaeh hozbingz hwngfat, doicaenh yamqdin guekcoj hozbingz gyoebhab. Baenzlawz cungj aeu fanjdoiq caeuq gaemhnaenx gij maeuzsuenq nem hengzdoengh guh faenmbek siengj hawj “Daizvanh doglaeb”，baenzlawz cungj aeu henhoh gij cawjgienz caeuq diegguek caezcingj guekgya. Gyalaeg song hamq yungzhab hwngfat， lienzdaemh hawj song hamq youq ginghci vwnzva fuengmienh gyalai gyaulouz gapguh. Beixnuengx song hamq caemh goek doxrangh、caemh mingh doxlienz， wnggai dazfwngz doengzcaez dajcauh、yiengjsouh ngoenz ndei daengzcog daengxcungq vunz Cungguek.
Gak boux daiqbiuj！
Aen seiqgyaiq seizneix bungzdaengz yiengh hingzseiq boekbienq bak bi caengz miz. Raeuz aeu giendingh mbouj bienq byaij diuz roen hozbingz hwngfat、ciuqhengz aen canloz hailangh doxleih caez ndaej， giendingh henhoh lai mbiengj camgya caeuq aen dijhi gozci aeu Lenzhozgoz guh cehsim. Gaenxmaenx caeuqfaenh gaijgwz laebndei aen dijhi ceihleix cienz seiqgyaiq，giendingh henhoh yiengh seiqgyaiq ginghci hailangh de，doinyoengx cauhlaeb aen cingjdaej caezcaemh minghyinh vunzloih. Gyarengz caeuq aen guek hung ceiq youqgaenj de gaeudoeng doiqvah nem boiqhab gapguh，caeuq aen guekgya seiqhenz gyalaeg gvanhaeh，caeuq aen guekgya cingqcaih hwngfat de gya'gvangq doxleih gapguh. Vih onjdangq wngqdoiq gij deuqnyex yingjyangj seiqgyaiq caeuq gaijgez gij vwndiz ndatfoed ranghdieg，Cungguek yaek gaenxmaenx dawz ok fueng'anq habyungh engq lai. Cungguek nyienh caeuq gak guek dazfwngz gapguh、caezsim roengzrengz，vih coicaenh seiqgyaiq hozbingz naihnanz caeuq doengzcaez hwngfat caiq ok baez rengz moq daeuj dem.
Gak boux daiqbiuj！
Buekguh cauh ok lizsij，saedguh ndaej baenz gingjgyaeu daengzcog. Raeuz aeu engqgya gaenjmaed gietcomz youq seiqhenz aen Dangjcunghyangh aeu Siz Ginbingz dungzci guh cehsim，yaengx hwnj fan geiz hungmbwk sevei cujyi miz gij daegsaek Cungguek，aeu Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz daeuj ceijyinx，coh nanz roemx bae、laemxsim haenq guh，aeu gij cingzcik gig ndei ginghci sevei hwngfat ciepcoux Cunghvaz Yinzminz Gunghozgoz laebbaenz 70 hopbi，vih hingzndaej cienzmienh hwnqbaenz aen biengz siujgangh、ceng'aeu mbat hingz hungmbwk yiengh sevei cujyi miz gij daegsaek Cungguek seizdaih moq，vih dawz guek raeuz hwnq baenz aen guekak sevei cujyi yendaiva fouqgiengz、 minzcuj、vwnzmingz、doxhuz、gyaeundei ndeu, vih guhbaenz aen loqsiengj Cungguek Cunghvaz Minzcuz fukhwng hungmbwk haenqrengz buekguh！
由国家民委提供，中国民族语文翻译局翻译
