CWNGFUJ GUNGHCOZ BAUGAU
2015 Nienz 3 Nyied 5 Hauh Youq Gwnz Daih Cibngeih Gaiq Daengx Guek Yinzminz Daibyauj Daihhoih Daihsam Baez Veiyi
Gozvuyen cungjlij Lij Gwzgyangz
Gak boux daibyauj:
Seizneix, gou daibyauj Gozvuyen, yiengq daihhoih baugau gij hong cwngfuj, cingj saemjlwnh, caemhcaiq cingj Daengx Guek Cwnghez gak boux veijyenz daezok yigen. It、Dauqyawj Gij Hong Bi 2014
Bi gvaqbae neix, guek raeuz fazcanj bungz daengz gij vanzgingj fukcab yiemzhaenq ndawguek rogguek haenx. Cienz seiqgyaiq ginghci hoizfuk gannanz daemdengj, cujyau ginghcidij baeyiengq faenvaq. Gij atlig ginghci ndawguek doekdaemq haenx laebdaeb gyadaih, lai caengz hojnanz caeuq diuhcan doxsan. Baengh aen dangj cunghyangh aeu Siz Ginbingz dungzci guh cungjsuhgi neix giengiengz lingjdauj, daengx guek gak cuz yinzminz caezgya itsim, haekfug hojnanz, guhbaenz le aen cujyau muzbyauh yinvu daengx bi ginghci sevei fazcanj, cienzmienh laeb baenz aen biengz siujgangh yamq ok yamqdin maenhsaed, cienzmienh gyalaeg gaijgwz saedyienh haibuenz ndei, cienzmienh ciuqfap guenj guek hai ok loh moq baenaj, cienzmienh coengzyiemz ceih dangj caiq ndaej guh baenaj.
Bi ndeu daeuj, guek raeuz ginghci sevei fazcanj cungjdaej bingzonj, ndaw bingzonj miz baenaj. Gij cujyau biugeiq “onj” dwg, ginghci yinhhengz cawqyouq ndaw gvaengh hableix. Demlai suzdu onj, ndawguek swnghcanj cungjciz dabdaengz 63.6 fanh ik maenz, beij bigonq demlai 7.4%, youq ndaw seiqgyaiq cujyau ginghcidij baiz mingz baihnaj. Couhnieb onj, hawsingz caiq demgya couhnieb 1322 fanh vunz, lai gvaq bi’gvaq. Gyagwz onj, gihminz siufeiq gyagwz hwnjsang 2%. Gij cungjdaej daegdiemj “baenaj”dwg, fazcanj gij dox boiqhab caeuq gij ndaej lienzdaemh de demgiengz. Ginghci gezgou caiq miz gaijndei, haeuxgwn canjliengh dabdaengz 6.07 ik dunh, siufeiq doiq ginghci demlai gij gunghawj beijlwd de swnghwnj 3 aen bakfaendiemj, dabdaengz 51.2%, fugsaeh hangznieb cwnghgyahciz bijcung youz 46.9% daezsang daengz 48.2 %, canjnieb moq、niebdaiq moq、sanghyez yienghsik moq mboujduenh nyoenx okdaeuj. Dieg cungqgyang dieg baihsae ginghci demgya vaiq gvaq dieg baihdoeng. Fazcanj caetliengh caiq miz daezswng, itbuen goenggungh yawhsuenq souhaeuj demlai 8.6%, gij ginghfei yenzgiu caeuq sawqniemh fazcanj ceiok caeuq ndawguek swnghcanj cungjciz aen beij de mauhgvaq 2%, nwngzyenz siuhauq giengzdoh doekdaemq 4.8%, dwg gaenh bi daeuj aen gyangqdaemq fukdoh ceiq hung. Yinzminz saedceij caiq miz gaijndei, daengx guek gihminz moix vunz bingzyaenz ndaej ceiboiq souhaeuj saedsaeh demlai 8%, vaiq gvaq ginghci demlai; lajmbanj gihminz moix vunz bingzyaenz ndaej ceiboiq souhaeuj saedsaeh demlai 9.2%, vaiq gvaq hawsingz gihminz souhaeuj demlai; lajmbanj boux gungzhoj gemjnoix 1232 fanh vunz; aen vwndiz 6600 lai fanh vunz lajmbanj gwn raemx ancienz neix ndaej daengz gaijgez; ok gyaiq bae youz mauhgvaq 1 ik vunzbaez. Gaijgwz hailangh caiq miz cungbyoengq, cienzmienh gyalaeg gaijgwz baenzbuek cungdenj yinvu hainduj guh, bonj gaiq cwngfuj aen muzbyauh gemjnoix 1/3 hingzcwng saemjbae saehhangh neix daezgonq saedyienh. Ndaej mbaw dan cingzcik neix saedcaih mbouj yungzheih, de comzgiet le gij simlwed raemxhanh daengx guek gak cuz yinzminz, giendingh le raeuz aen gietsim caeuq saenqsim haenqrengz baenaj neix.
Bi gvaqbae neix, hojnanz caeuq diuhcan beij yawhsiengj lij hung. Dou dingj nanz bae guh, cujyau guh le gij hong laj neix.
It dwg youq ndaw gvaengh diuzcez gaemhanh gwnz giekdaej neix, bae guh dinghyiengq diuzcez gaemhanh, bauj hawj ginghci onjdingh demlai. Mienhdoiq gij hingzseiq ginghci doekdaemq atlig gyadaih, dou baujmaenh canloz dinghlig, onjdingh hungzgvanh ginghci cwngcwz, mbouj miz yungh gij gikcoi cosih haenqrem youh dwg geizdinj, dauq dwg laebdaeb cauhmoq gij lohnaemj caeuq fuengsik hungzgvanh diuzgung, saedhengz dinghyiengq diuzgung, gikok rengzhoengh、boujgya gij nyieg、gyagiengz saeddaej. Dawzndei aen gvaengh ginghci yinhhengz hableix gij hanhdoh ceiq sang caeuq ceiq daemq de, cadawz ndaw fazcanj gij mauzdun doedyienh caeuq gezgousing vwndiz haenx, dinghyiengq yungh banhfap, gyonjcomz youq aen simbek, cingcinj okrengz. Yiengq coicaenh gaijgwz aeu doenghlig, yiengq diuzcingj gezgou aeu rengzcoengh, yiengq ikleih beksingq aeu rengzndumj, gawq gyadaih hawciengz aeuyungh, youh demgya mizyauq gunghawj, roengzrengz guh daengz gezgou diuz ndei cix mbouj deng menh.
Mizyauq bae saedhengz gij caizcwng cwngcwz gaenxmaenx caeuq gij hobi cwngcwz onjmaenh. Saedhengz dinghyiengq gemj suiq caeuq bujben gyangqfeiq, gyagvangq aen gvaengh sousuiq youhvei cwngcwz gij giyez iq caeuq giyez iqet, gyalai gij sawqdiemj “yingzyezsui gaijbaenz cwnghcizsui”. Gyavaiq caizcwng ceiok cindu, gaenxmaenx buenzhoengh gij swhginh soqliengh gaemmiz. Lingzvued yinhyungh hobi cwngcwz gunghgi, yungh gij cosih dinghyiengq gyangqdaemq romcienz cunjbeiginh beijlwd、dinghyiengq caiq daigvanj、mbouj doengzbouh gyangqdaemq leihsik daengj, gya rengz haeujcoengh gij hothoh buegnyieg ndaw ginghci sevei fazcanj, giyez iq caeuq giyez iqet、“sam nungz”daigvanj demvaiq beij gak hangh daigvanj bingzyaenz demvaiq faenbied sang 4.2 caeuq 0.7 aen bakfaendiemj. Doengzseiz, guhndei gamguenj ginhyungz, giengiet soujmaenh diuz daejsienq mbouj fatseng baenz fueng dieg、baenz aen hidungj fungyiemj.
Ngeih dwg gyalaeg gaijgwz hailangh, gikfat gij rengzhoengh ginghci sevei fazcanj. Cimdoiq gij dijci gihci gazngaih cughaed fazcanj haenx, dou doenggvaq cienzmienh gyalaeg gaijgwz, aeu cuengqok gij rengzhoengh hawciengz daeuj doiqcung gij atlig ginghci roengzdaemq, gaet le mbouj noix ndok genq, ginghci、 cwngci、vwnzva、sevei、swnghdai vwnzmingz daengj dijci gaijgwz cienzmienh doi baenaj.
Netsaed doidoengh cungdenj gaijgwz. Ceiqdingh caemhcaiq saedhengz aen cungjdaej fangh’an gyalaeg caizsui dijci gaijgwz, yawhsuenq guenjleix cidu caeuq sousuiq cidu gaijgwz ndaej fazcanj baenaj hungnaek, cienhangh senjnod ceiok hanghmoeg beij bi gonq gemjnoix 1/3 doxhwnj, itbuen senjnod ceiok bijcung demgya, guenjleix gij caiq deihfueng cwngfuj ndaej daengz gyagiengz. Aen gvaengh romcienz liliz caeuq veiliz fouzdoengh haenx ndaej gyahung, minzyingz ngaenzhangz sawqdiemj byaij ok yamq moq, hainduj guh gij sawqdiemj “Hu Gangj gujbyau hawciengz doxdoeng”, haigvangq aen gvaengh rombwh vaivei、yinhyungh baujyiemj swhginh. Nwngzyenz、yaudoeng、vanzbauj、doengsaenq daengj lingjyiz gyavaiq guh gyagwz gaijgwz. Hainduj gaijgwz gohgi swhginh guenjleix、gaujsi ciuseng、huciz、 gihgvanh swyez danhvei ciengxlaux baujyiemj cidu daengj.
Laebdaeb dawz gemj cwng cuengq gienz、cuengq guenj giethab dangguh gaijgwz gij youqgaenj de. Gozvuyen gak bouhmonz daengx bi siu bae caeuq cuengqroengz baihlaj 246 hangh hingzcwng saemjbae saehhangh, siubae bingzbeij dabbiu byaujcangh hanghmoeg 29 hangh、cizyez swhgwz cinjhawj caeuq nyinhdingh saehhangh 149 hangh, caiq baez coihdingh douzswh hanghmoeg haedcinj moegloeg, daih fukdoh sukgemj aen gvaengh haedcinj. Roengzrengz gaijgwz aen cidu sanghyez hongsaeh, saen daenghgeiq cucwz hawciengz cawjdaej dabdaengz 1293 fanh hoh, ndawde gij giyez saen daenghgeiq cucwz demlai 45.9%, cauxbaenz gij cauhnieb hingzseiq hoenghhwd moq. Ginghci demgya suzdu cuengq menh, caiq demgya couhnieb mbouj gemjnoix dauq gyalai, yienh ok le gaijgwz gij vilig hungloet de caeuq hawciengz gij rengzndumj fouzhanh de.
Aeu hailangh coicaenh gaijgwz coicaenh fazcanj. Gya’gvangq aen gvaengh Sanghaij Swyouz Mouyiz Sawqniemh Gih, saen laeb Gvangjdungh、Denhcinh、 Fuzgen Swyouz Mouyiz Sawqniemh Gih. Onjdingh cuzgouj, demgya cingouj, cuzgouj ciemq gozci hawciengz faenhngeg laebdaeb daezswng. Saedsaeh sawjyungh canghseng’eiq guekrog cigsoh douzswh 1196 ik meijyenz, baiz youq seiqgyaiq vih daih’it. Doiq rog cigsoh douzswh 1029 ik meijyenz, caeuq leihyungh swhbwnj guekrog doengzcaez guh baenaj. Hainduj guh Cungguek caeuq Binghdauj、Suisw swmougih, Cungguek Hanzgoz、Cungguek Audaliya swmougih guhbaenz saedcaetsingq damzbuenq. Dietloh、dienhlig、youzheiq、doengsaenq daengj lingjyiz doiq rog gapguh ndaej cwngzgoj youqgaenj, gij canghbei Cungguek cingqcaih yamq hung byaij coh seiqgyaiq.
Sam dwg gya rengz diuzcingj gezgou, dem’ak gij rengzlaeng fazcanj. Youq gij cingzgvang gezgousing mauzdun doedyienh neix, dou gaenxmaenx bae guh, miz bangfuz miz gaemhanh, lai banh gij saeh dangqnaj gip aeu guh youh ikleih gyaeraez de, cuk maenh aen goekgaen ginghci sevei fazcanj.
Mboujduenh gyamaenh aen giekdaej nungzyez. Gyadaih ligdoh yungh cwngcwz hawj nungzyez ak、hawj nungzyez ndeicawq、hawj nungzyez fouq, saedyienh haeuxgwn canjliengh cib’it bi lienzdaemh demlai、nungzminz souhaeuj haj bi lienzdaemh demlai vaiq. Gij naengzlig nungzyez gyoebhab swnghcanj onjbouh daezsang, nungzyez gohgi caeuq gihgaiva suijbingz laebdaeb daezswng, hwnqguh aen suijli gunghcwngz hungnaek cindu gyavaiq, saen dem mbaet raemx dwkraemx menciz 223 fanh gunghgingj, saen guh gaij guh gij goengloh lajmbanj 23 fanh goengleix. Hainduj guh lwnz moq doiq raeq fuk ndoeng fuk nywj. Diegdeih lajmbanj doekdingh gienzleih、daenghgeiq、fat mbawcingq cungj miz bouhloh bae guh, nungzyez gij ginghyingz cawjdaej yienghmoq de gyavaiq hungmaj.
Daihlig diuzcingj canjyez gezgou. Roengzrengz gungganq diemjdemlai moq, coicaenh fugsaeh hangznieb gyavaiq fazcanj, haeujcoengh fazcanj canlozsing saenhwng canjnieb, lumjbaenz yizdung vangjdoxlienz、cizcwngz denlu、gauhdonh canghbei ceiqcauh、giceh yungh nwngzyenz moq daengj, gij ginhyungz vangjdoxlienz ligliengh moq sawqmwh hwnghwnj, denswj sanghvu、huqliuz vaiqsoengq daengj niebdaiq moq riengjvaiq fazcanj, gig lai “bouxcauhmoq” cienzbouh dawz ok bonjsaeh, vwnzva cauhmoq yisiz canjnieb hoenghhwd fazcanj. Doengzseiz, laebdaeb vaqgej canjnwngz lw gvaqbouh, gangdiet、suijniz daengj 15 aen cungdenj hangznieb gij nienzdoh yinvu raengcawz canjnwngz doeklaeng de ciuqgeiz guhliux. Gyagiengz ceihleix mokfaenx, gij cijbyauh raengcawz civuengzbiu caeuq ci gaeuqgeq haenx mauhngeg guhliux.
Doicaenh hwnqguh giekdaej sezsih caeuq gak dieg dox boiqhab fazcanj. Bwzgingh Denhcinh Hozbwz dox boiqhab fazcanj、dajcauh rangh dieg ginghci Dahcangzgyangh ndaej guh baenaj youqgaenj. Saen hwnq dietloh douzcanj lijcwngz 8427 goengleix, gauhsuz dietloh yinhhengz yingzyez lijcwngz dabdaengz 1.6 fanh goengleix, ciemq seiqgyaiq 60% doxhwnj. Gauhsuz goengloh doengci lijcwngz dabdaengz 11.2 fanh goengleix, hwnqguh lohraemx、minzhangz、gvanjdau caenhitbouh gyagiengz. Gaijcauh nungzvangj onjbouh bae guh. Gvanhdai yunghhoh mauhgvaq 7.8 ik hoh. Ginggvaq lai bi roengzrengz, raemx namz diuh baek cungsienq it geiz gunghcwngz cingqsik doeng raemx, sawj ikfanh ginzcung henz sienq ndaej ndeicawq.
Saedhengz aen canloz aeu cauhmoq doidoengh fazcanj. Haenqrengz haidoeng diuz doengloh cienjvaq gohgi cwngzgoj, gyadaih aen gvaengh saedhengz gij cwngcwz Cunghgvanhcunh Guekgya Guhcawj Cauhmoq Sifangih sawqdiemj, doicaenh gohgi swhyenz hailangh caezyiengj, gij rengzhoengh cauhmoq gyoengq vunz guh gohgi mboujduenh cuengq okdaeuj. Mauhgaep geiqsuenq、aen gunghcwngz damqcaz ronghndwen、wngqyungh veisingh daengj gohyenz hanghmoeg hungnaek caiq ndaej cungbyoengq, gij gwzgih sienqnga guek raeuz gag yenzgiu ceiqcauh haenx mbin hwnj mbwn bae.
Seiq dwg daemj maed daemj maenh aen muengx baujcang gij gwndaenj beksingq, demcaenh gij fukheiq yinzminz. Dou genhciz aeu vunz guh haedsim, laebdaeb demgya cuengq haeuj gij gwndaenj beksingq bae, bauj gihbwnj、bauj daejsienq、laeb gihci, caenhguenj caizcwng souhaeuj demvaiq suzdu cuengqmenh、 ceiok atlig gyadaih, hoeng caizcwng aen beijlaeh yungh youq gij gwndaenj beksingq haenx dabdaengz 70% doxhwnj.
Gyagiengz couhnieb caeuq sevei baujcang. Laebndei gij cwngcwz coicaenh couhnieb, doiok aen giva yinxlingx cauhnieb, gauhyau bizyezswngh couhnieb onjdingh youh miz daezswng. Doengjit singz mbanj gihminz gihbwnj ciengxlaux baujyiemj cidu, boux duiyouh ndaw giyez gihbwnj cienzciengxlaux suijbingz youh daezsang 10%. Saen haigoeng gij gunghcwngz youqonj miz baujcang 740 fanh dauq, daihdaej hwnqbaenz 511 fanh dauq. Cienzmienh laeb miz gij cidu laemzseiz gouqbang, singz mbanj aen biucinj ceiqdaemq gwndaenj baujcang faenbied daezsang 9.97% caeuq 14.1%, bouxbing ndangcanz、lezsuz caeuq bouxbing fuzyenz geq daengj youhfuj duisieng, aen biucinj fujsiz caeuq gwndaenj bangbouj haenx daezsang 20% doxhwnj.
Laebdaeb coicaenh gyauyuz goengbingz. Gyagiengz hwnqguh gij yozyau dieg gungzhoj yivu gyauyuz buegnyieg, lai hawj cienz bangcoengh boux hagseng ndaw ranz ginghci hojnanz, guekgya bangcoengh hagseng daigvanj aen biucinj bangcoengh de daih fukdoh diuz sang. Cungdaengj cizyez yozyau mienx yozfei bangbouj cwngcwz gyalai daengz sam bi. Saedhengz gij cwngcwz yivu gyauyuz mienx gaujsi couhgaenh haeujhag, 28 aen sengjfaenh saedyienh le gyoengq lwg nungzminzgungh riengzsenj haenx youq dieg riuzhaeuj camgya gauhgauj. Gyoengq hagseng lajmbanj dieg gungzhoj, gij vunzsoq hwnj cungdenj gauhyau de lienzdaemh song bi demlai 10% doxhwnj. Ginggvaq roengzrengz, daengx guek caizcwngsing gyauyuz ginghfei ceiok, ciemq ndawguek swnghcanj cungjciz beijlaeh mauhgvaq 4%.
Haeujlaeg doicaenh yihyoz veiswngh gaijgwz fazcanj. Singz mbanj gihminz binghhung baujyiemj sawqdiemj gya’gvangq daengz sojmiz sengjfaenh, daihdaej laebbaenz aen cidu wngqgip gouqbang baenzbingh, daengxcungq yinzminz yihliuz baujyiemj guenj daengz vunzsoq mauhgvaq 95%. Gihcwngz yihliuz veiswngh gihgou gyoebhab gaijgwz gyalaeg, yienh yangh cunh fugsaeh vangjloz cugbouh guhndei. Goenglaeb yihyen gaijgwz sawqdiemj yienh si dabdaengz 1300 lai aen.
Gaenxmaenx fazcanj vwnzva saehnieb caeuq vwnzva canjnieb. Doicaenh hwnqguh aen vwnzva hanghmoeg hungnaek ik beksingq, aen gunghcwngz “mbanjmbanj doeng” gvangjbo densi haenx yiengq “ranzranz doeng” swnggaep. Saedhengz aen canloz vwnzyi cozbinj ndei, laebndei aen vwnzva hawciengz dijhi yienhdaih. Vunzlai cangqndang hozdung guh ndaej hoenghhwdhwd, banh baenz Nanzgingh Cingh’auvei.
Haj dwg cauhmoq bae ceihleix sevei, coicaenh huzndei onjdingh. Dou habdangq wngqdoiq swyenz caihaih caeuq saehgienh fwtfat, miz bouhloh vaqgej sevei mauzdun, laebhwnj laebcaez gihci, gyagiengz fuengzre goekgyaeuj, baujcang yinzminz sengmingh ancienz, henhoh gij sevei cizsi ndei.
Bi’gvaq Yinznanz Lujden、Gingjguz daengj dieg fatseng deihsaenq haemq giengzlied, raeuz gibseiz gig mizyauq bae guh dingj deihsaenq gouq caihaih, caihaih gvaqlaeng dauqfuk cungzhwnq swnhleih doi baenaj. Gaenxmaenx bangcoengh Feihcouh dingj yw gij binghlah Aihbozlah, mizyauq fuengzre gaemhanh binghlah cienz haeujdaeuj. Gyagiengz gij hong ancienz swnghcanj, saehhux cungjliengh、 saehhux hungnaek caeuq saehhux daegbied hungnaek、 saehhux cungdenj hangznieb lienzdaemh doekdaemq. Roengzrengz ceihleix gij uqlah gwnz daizhaeux, gijgwn gijyw ancienz hingzseiq cungjdaej onjdingh.
Dou daihlig doicaenh ciuqfap hengzsawj guekgya gienzlig, Gozvuyen daezcingj Daengx Guek Yinzda Cangzveijvei ceiqdingh coihdingh aen fap gijgwn ancienz daengj faplwd 15 gienh, ceiqdingh coihdingh giyez saenqsik gunghsi camhhengz diuzlaeh daengj hingzcwng fapgvi 38 gienh. Goenghai cwngci hongsaeh haeujlaeg doicaenh, cwngfuj gij gezcwz caeuq cwngcwz hungnaek de, yungh lai cungj hingzsik yiengq sevei gvangqlangh cam’aeu yigen. Guhliux daihsam baez daengx guek ginghci bujcaz. Gaijgwz gij cidu hong sinfangj. Aen gvaengh faplwd bangcoengh, daj gyoengq vunz ndaej ceiqdaemq gwndaenj baujcang gyagvangq daengz gyoengq vunz souhaeuj noix. Gyagiengz hwnqguh gij segih singz mbanj, hangznieb hezvei sanghvei daengj seiq loih sevei cujciz saedyienh cigsoh daenghgeiq. Yiemzhaenq dwkceih gak loih famhcoih hozdung, giengzvaq sevei cianh gyoebhab ceihleix, henhoh le guekgya ancienz caeuq goenggungh ancienz.
Dou yiemzgek doeksaed gij cingsaenz dangj cunghyangh bet hangh gvidingh, ciengzgeiz mbouj bienq bae guh niujcingq “seiq cungj cozfungh”. Yiemzgek caephengz Gozvuyen “iek fap sam cieng”, gij laeuz dangz gvanj soj cwngfuj guh、 gij bienceiq boux ndaw gihgvanh saehnieb danhvei、“sam goeng” ginghfei ndaej daengz mizyauq gaemhanh. Gyadaih ligdoh guh hingzcwng gamcaz caeuq saemjgeiq gamduk, doicaenh cauhlaeb dangjfungh lenzcwng caeuq fanj baihrwix doucwngh, yiemzyiemz cazbanh gij anqgienh famh gijliz famh faplwd, buek vunz baihrwix ndeu deng fadceih caen biuhhoz.
Dou haenqca doeksaed gij cwngcwz cosih hungnaek, nyinhcaen guh gamduk genjcaz, yinxhaeuj daihsam fueng bingzguj caeuq sevei bingzgyaq, laebhwnj aen gihci ciengzgeiz mizyauq, mizrengz coicaenh le gak hangh hong.
Bi ndeu daeuj, gij hong vaigyauh cwngzgoj laidaih. Siz Ginbingz cujsiz daengj bouxdaeuz guekgya okbae fangjvwn lai aen guek, camgya Ngeihcib Guek Cizdonz Bouxdaeuz Funghvei、ciengim guekgya bouxdaeuz doxraen、Sanghaij Hozcoz Cujciz Funghvei、Dunghya doxgap bouxdaeuz baenzroix hoih、aen hoih bouxdaeuz Ya Ouh、Dazvozswh Lundanz daengj hozdung hungnaek. Banhbaenz Yadai Ginghhoz Cujciz Daih Ngeihcibngeih Baez Bouxdaeuz Aen Hoih Mbouj Cingqsik、Yasin Veiyi Daihseiq Baez Funghvei、Bozauz Yacouh Lundanz. Gaenxmaenx caeuqfaenh laebhwnj lai mbiengj gihci caeuq ceiqdingh gozci gveihcwz. Guekhung vaigyauh onj youh miz baenaj, seiqhenz vaigyauh yienh ok gizmen moq, caeuq doengh aen guekgya cingqcaih fazcanj doxgap guh caiq ndaej fazcanj baenaj, ginghci vaigyau cwngzgoj gig yienhda. Doicaenh hwnqguh rangh dieg ginghci diuz roen seicouz neix caeuq 21 sigij diuz roen seicouz gwnz haij haenx, couzveh laeb Yacouh giekdaej sezsih douzswh ngaenzhangz, laeb gij gihginh roensei. Raeuz caeuq gak guek baedauq doxgap yied daeuj yied gaenjmaed, Cungguek youq gwnz gozci daizheiq, aen yienghsiengq guek hung rapdawz cwzyin neix ngoenz beij ngoenz sienmingz yienh okdaeuj.
Gak boux daibyauj!
Gij cingzcik bi ndeu daeuj aeu ndaej haenx, dwg aen dangj cunghyangh aeu Siz Ginbingz dungzci guh cungjsuhgi neix doengjlamx daengxbuenz、gohyoz gezcwz cij ndaej guhbaenz, dwg daengx dangj daengx ginh daengx guek gak cuz yinzminz doengzcaez roengzrengz、haenqguh mbouj cuengqsoeng cij ndaej guhbaenz. Gou daibyauj Gozvuyen, caensim docih daengx guek gak cuz yinzminz, caensim docih gak minzcuj dangjbai、gak yinzminz donzdij caeuq gak gyaiq vunzmaenh! Caensim docih gyoengq beixnuengx Yanghgangj Daegbied Hingzcwng Gih、gyoengq beixnuengx Aumwnz Daegbied Hingzcwng Gih、gyoengq beixnuengx Daizvanh caeuq gyoengq beixnuengx dinghyouq guekrog! Caensim docih gak guek cwngfuj、 gozci cujciz caeuq gak guek baengzyoux gvansim caeuq haeujcoengh Cungguek hwnqguh yendaiva saehnieb haenx!
Raeuz gawq aeu yawjraen cingzcik, engq aeu yawjraen gij hojnanz caeuq diuhcan mwh baenaj. Douzswh demlai mbouj miz rengz, siufeiq yezdenj moq mbouj lai, gozci hawciengz mbouj miz daih cienjndei, onj demlai nanzdoh gyadaih, mbangj lingjyiz lij miz fung’yiemj huxndumj. Gij gyaqcienz gunghyez canjbinj lienzdaemh doekdaemq, swnghcanj yausu cingzbonj swnghwnj, giyez iq caeuq giyez iqet yungzswh nanz yungzswh bengz gij vwndiz neix doedyienh, giyez swnghcanj ginghyingz hojnanz demlai. Ginghci fazcanj fuengsik lij haemq genjdanh, cauhmoq naengzlig mbouj gaeuq, canjnwngz lw gvaqbouh gij vwndiz neix doedyienh, aen giekdaej nungzyez buegnyieg. Vunzlai doiq ywbingh、ciengxlaux、ranzyouq、 gyaudoeng、gyauyuz、souhaeuj faenboiq、gijgwn ancienz、sevei cianh daengj lij miz mbouj noix deihfueng mbouj hab’eiq. Miz mbangj deihfueng vanzgingj uqlah yiemzcungh, seiz mbouj seiz ok ancienz saehhux hungnaek. Gij hong cwngfuj lij miz mboujcuk, miz mbangj cwngcwz cosih doeksaed mbouj daengz vih. Siujsoq gunghcoz yinzyenz ndaw cwngfuj gihgvanh luenh guh, saekdi baihrwix vwndiz hawj vunz yawjraen doeksaet, mbangj boux dangguen mbouj guh saeh, ciemq aen vih de, mbouj guh gij saeh de, gij saeh hab banh cix mbouj banh. Raeuz aeu nyinhcaen doiqdaih vwndiz, bingzan mbouj lumz yungyiemj, ceih mbouj lumz luenh. Gamj bae dangrap, doiq ndaej hwnj lizsij sawjmingh, doiq ndaej hwnj gij daknaek yinzminz. Ngeih、Aen Cungjdaej Baijbouh Gij Hong Bi 2015
Guek raeuz dwg gwnz seiqgyaiq aen guekgya cingqcaih fazcanj ceiq hung ndeu, vanzlij cawqyouq caemhcaiq yaek ciengzgeiz cawqyouq duenh cogaep seveicujyi, fazcanj dwg baenzbaenz aeu guh, dwg gij giekdaej caeuq bouh ceiq youqgaenj gaijgez sojmiz vwndiz. Vaqgej gak cungj mauzdun caeuq fungyiemj, hamjgvaq “conghloemq cungdaengj souhaeuj cix ginghci dingznywngh”, saedyienh yendaiva, goekgaen dwg aeu baengh fazcanj, fazcanj bietdingh aeu miz gij demlai suzdu hableix. Doengzseiz, guek raeuz ginghci fazcanj haeuj aen cangdai cingqciengz moq, cingq cawqyouq aen gvandaeuz dangq benz ndoi gvaq geng, dijci gihci beihbingh caeuq gezgousing mauzdun dangq duzguk laengz roen, mbouj gyalaeg gaijgwz caeuq diuzcingj ginghci gezgou, couh nanz ndaej saedyienh bingzonj cangqheiq fazcanj. Raeuz bietdingh aeu hauz mbouj doenghngauz genhciz aeu dajcauh ginghci guh cungsim, cietsaed ca ndei fazcanj aen yinvu ceiq youqgaenj gaemgienz hwng guek neix. Bietdingh aeu genhciz mbouj soeng bae baengh gaijgwz doidoengh gohyoz fazcanj, gyavaiq cienjbienq ginghci fazcanj fuengsik, saedyienh miz caetliengh miz yauqik ndaej lienzdaemh bae fazcanj.
Seizneix, seiqgyaiq ginghci cingq cawqyouq ndaw dohlaeg diuzcingj, hoizfuk doenghlig mbouj gaeuq, deihyienz cwngci yingjyangj gyanaek, gij yinhsu mbouj doekdingh demlai, doidoengh demlai、demgya couhnieb、diuzcingj gezgou baenz gij nyinhrox doxdoengz gozci sevei. Gij atlig ginghci guek raeuz doekdaemq vanzlij cingqcaih gyadaih, ndaw fazcanj gij mauzdun caengz laeg doedyienh, gij hojnanz bineix bungz daengz de, aiq beij bi’gvaq lij haemq hung dem. Doengzseiz, guek raeuz fazcanj lij cawqyouq mwh canloz seizgei youqgaenj ndaej guhbaenz daihsaeh, miz gij rengzndumj、giengiengz cingsaenz caeuq diegyawz bienqdoeng gig daih. Gij gunghyezva、sinsizva、cwngzcinva、nungzyez yendaiva yienghmoq lienzdaemh doi baenaj, aen giekdaej fazcanj ngoenz beij ngoenz cungcuk, gaijgwz hoengzleih cingqcaih cuengq okdaeuj, hungzgvanh diuzgung cwkrom le haujlai gingniemh. Raeuz bietdingh aeu lai rox daengz haemzhoj youheiq, giendingh aen saenqniemh bietdingh aeu hingz, gaemmaenh gij gienz cawjdoengh bae fazcanj.
Bi moq neix dwg bi ceiq youqgaenj cienzmienh gyalaeg gaijgwz, dwg bi haidaeuz bae cienzmienh doicaenh ciuq fap guenj guek, hix dwg bi youqgaenj onjdingh demlai diuzcingj gezgou. Gij hong cwngfuj cungjdaej iugouz dwg: Yaengx sang mbaw geiz hungmbwk yiengh seveicujyi miz Cungguek daegsaek, aeu Dwng Siujbingz lijlun、“Sam Aen Daibyauj” Cung’yau Swhsiengj、Gozyoz Fazcanjgvanh guh cijdauj, cienzmienh gvancez gij cingsaenz aen dangj Cibbet Daih caeuq Cibbet Gaiq Sam Cungh、Seiq Cungh Cienzhoih, gvancez doeksaed gij cingsaenz Siz Ginbingz cungjsuhgi baenzroix gangjvah youqgaenj, ciuq gij canloz baijbouh“seiq aen cienzmienh”, cawjdoengh hab’wngq caeuq yinxlingx ginghci fazcanj aen cangdai cingqciengz moq, genhciz aen gunghcoz cungjgihdiu ndaw onjdingh gouz baenaj, baujciz ginghci yinhhengz youq ndaw gvaengh hableix, roengzrengz daezsang ginghci fazcanj caetliengh caeuq yauqik, dawz cienjbienq fuengsik diuzcingj gezgou cuengq daengz aen diegvih engqgya youqgaenj bae, haenqrengz ca gaijgwz gungroengz hojnanz, doedok cauhmoq bae doidoengh, gyagiengz fuengzre gaemhanh fungyiemj, gyagiengz baujcang beksingq gwndaenj, cawqleix ndei gij gvanhaeh gaijgwz fazcanj onjdingh, cienzmienh doicaenh dajcauh seveicujyi ginghci、dajcauh cwngci、dajcauh vwnzva、dajcauh aen biengz、dajcauh swnghdai vwnzmingz, coicaenh ginghci bingzonj cangqheiq fazcanj caeuq sevei huzndei onjdingh.
Raeuz aeu dawzndei cungjdaej iugouz, coengz baujciz demlai haemq vaiq caeuq yamq haeuj suijbingz haemq sang“song aen muzbyauh”bae ngeixnaemj, genhciz onjdingh cwngcwz onjdingh yawhgeiz caeuq coicaenh gaijgwz diuzcingj gezgou “song yiengh giethab”, dajcauh vunzlai cauhnieb、vunzlai cauhmoq caeuq demgya goenggungh canjbinj、goenggungh fugsaeh “song yiengh ragdoengh”, doidoengh fazcanj diuzcingj vaiqmenh mbouj gemj seiqdaeuz、soqliengh demlai caetliengh engq ndei, saedyienh Cungguek ginghci daezsang caetliengh dem yauq swnggaep.
Bineix ginghci sevei fazcanj cujyau yawhgeiz muzbyauh dwg: Ndawguek swnghcanj cungjciz demlai 7% baedauq, gihminz siufeiq gyagwz swnghwnj fukdoh 3% baedauq, hawsingz caiq demgya couhnieb 1000 fanh vunz doxhwnj, hawsingz daenghgeiq saetnieb beijlwd youq ndaw 4.5%, cingouj cuzgouj demlai 6% baedauq, gozci soucei daihdaej doxdaengh, gihminz souhaeuj demlai caeuq ginghci fazcanj doengzbouh. Nwngzyenz siuhauq giengzdoh doekdaemq 3.1% doxhwnj, laebdaeb gemjnoix baizcuengq gij huq uqlah cujyau.
Ginghci demlai yawhgeiz 7% baedauq, naemj daengz le aeumiz ndij aiq guh ndaej daengz, caeuq aen muzbyauh cienzmienh laebbaenz aen biengz siujgangh dox hamzciep, caeuq gij iugouz ginghci cungjliengh gyadaih、gezgou swnggaep neix dox hab’wngq, hab fazcanj gvilwd, hab gwzgvanh saedsaeh. Aeu yiengh suzdu neix baujciz fazcanj seizgeiz haemq raez, gij vuzciz giekdaej saedyienh yendaiva couh engqgya cungcuk. Onjdingh demlai hix dwg vihliux bauj couhnieb, gaenriengz fugsaeh hangznieb bijcung swngsang、giyez iq caeuq giyez iqet demlai caeuq ginghcidij soqliengh gya hung, aen suzdu 7% baedauq ndaej saedyienh couhnieb haemq cungfaen. Gak dieg aeu coengz saedsaeh bae naemj, gaenxmaenx guh baenaj, vatra rengzndumj, roengzrengz ceng’aeu guh ndaej engq ndei.
Yaek guh ndei gij hong cwngfuj bineix, aeu dawzndei sam diemj lajneix.
Daih’it, onjdingh caeuq laebndei hungzgvanh ginghci cwngcwz. Laebdaeb saedhengz aen caizcwng cwngcwz gaenxmaenx caeuq aen hobi cwngcwz onjdangq, engqgya yawjnaek yawhsien diuzgung caeuq siuj fukdoh diuzgung, engqgya yawjnaek dinghyiengq diuzgung, yungh ndei gij soqliengh demgya, gaujhoengh gij soqliengh gaemmiz, cungdenj haeujcoengh hothoh buegnyieg. Aeu veizgvanh vuedlig cengjdingj hungzgvanh onjdingh, aeu cauhmoq gunghawj daiqdoengh gyadaih aeuyungh, aeu diuzcingj gezgou coicaenh cungjliengh doxdaengh, saedbauj ginghci yinhhengz youq ndaw gvaengh hableix.
Gij caizcwng cwngcwz gaenxmaenx aeu gya rengz dem yauq. Bineix dajsuenq anbaiz caizcwng cihhoengz 1.62 fanh ik maenz, beij bi’gvaq demgya 2700 ik maenz, cihhoengz beijlwd coengz bi’gvaq 2.1% daezsang daengz 2.3%. Ndawde, cunghyangh caizcwng cihhoengz 1.12 fanh ik maenz, demgya 1700 ik maenz; deihfueng caizcwng cihhoengz 5000 ik maenz, demgya 1000 ik maenz. Cawqleix ndei aen gvanhaeh guenjleix yiemqcaiq caeuq onjmaenh demlai, cauhmoq caeuq laebndei aen gihci deihfueng cwngfuj ciq caiq yungzswh. Habdangq fathengz cienhangh caigen. Baujcang gij hanghmoeg cingqcaih hwnqguh hab diuzgen de ndaej swnjlaeng yungzswh, fuengzre caeuq vaqgej gij huxndumj fungyiemj. Gaijndei caizcwng ceiok gezgou, roengzrengz buenzhoengh gij swhginh soqliengh gaemmiz, daezsang sawjyungh yauqlwd. Laebdaeb saedhengz gezgousing gemj suiq caeuq bujben gyangq feiq, caenh’itbouh gemjmbaeu diuzrap giyez daegbied dwg giyez iq caeuq giyez iqet.
Gij hobi cwngcwz onjdangq aeu soeng ndaet habdoh. Gvangjyi hobi M2 yawhgeiz demlai 12% baedauq, saedsaeh bae guh seiz, gaengawq ginghci fazcanj aeuyungh, hix ndaej loq sang di. Gyagiengz caeuq gaijndei hungzgvanh siujsim guenjleix, lingzvued yinhyungh goenghai hawciengz cauhcoz、liliz、cunzcienz cunjbeiginhliz、caiq daigvanj daengj hobi cwngcwz gunghgi, baujciz hobi sindai caeuq sevei yungzswh gveihmoz bingzonj demlai. Gyavaiq cienzngaenz coucienj, gaijndei sindai gezgou, daezsang gij bijcung cigsoh yungzswh, gyangqdaemq gij cingzbonj sevei yungzswh, hawj gij cienzngaenz riuzdoengh de lae haeuj saeddaej ginghci bae.
Daihngeih, baujciz onjdingh demlai caeuq diuzcingj gezgou doxdaengh. Guek raeuz fazcanj bungzdaengz geiz vuenhdang、geiz in baenzraq、geiz siuvaq “sam geiz daeb gya” mauzdun, swhyenz vanzgingj hanhhaed gyadaih, lauzdungliz daengj yausu cingzbonj swngsang, aen fazcanj fuengsik douzhaeuj lai、siuhauq lai、bien naek gyadaih soqliengh neix gaenq nanz ndaej guh roengzbae, bietdingh aeu doidoengh ginghci youq ndaw demlai gaijndei gezgou. Gawq aeu vaiqmenh onjdingh, saedbauj ginghci bingzonj yinhhengz, saedbauj gihminz couhnieb caeuq souhaeuj laebdaeb demgya, vih diuzcingj gezgou cienjbienq fuengsik cauh ok diuzgen mizleih; youh aeu diuzcingj gezgou, cuksaed aen giekdaej onjdangq demlai. Aeu demgya cuengqhaeuj yenzgiu haifat bae, daezsang cienzbouh yausu swnghcanj yauqlwd, gyagiengz caetliengh、biucinj caeuq binjbaiz dajcauh, coicaenh fugsaeh hangznieb caeuq gij canjyez moq miz canlozsing haenx daezsang bijcung、daezswng suijbingz, gaijndei ginghci fazcanj hoenggan gwzgiz, gyavaiq gungganq diemj demlai moq caeuq giz demlai moq, saedyienh youq ndaw fazcanj bae swnggaep, youq ndaw swnggaep bae fazcanj.
Daihsam, gungganq caeuq coiseng ginghci sevei fazcanj doenghlig moq. Dangqnaj, ginghci demlai cienzdoengj doenghlig gemjnyieg, bietdingh aeu gyadaih ligdoh guh gezgousing gaijgwz, gyavaiq saedhengz aen canloz aeu cauhmoq doidoengh fazcanj, gaijcauh gij doenghlig cienzdoengj, dajcauh gij doenghlig moq. Fuengmienh ndeu, demgya gunghawj goenggungh canjbinj caeuq fugsaeh, gyadaih cwngfuj dwkhaeuj gyauyuz、veiswngh daengj, gujli sevei caeuqfaenh guh, daezsang gunghawj yauqlwd. Neix gawq ndaej bouj giepnoix、ik gij senggeiq beksingq, hix ikleih gyadaih aeuyungh、coicaenh fazcanj. Lingh fuengmienh, doidoengh vunzlai cauhnieb、vunzlai cauhmoq. Neix gawq ndaej gyadaih couhnieb、demgya gihminz souhaeuj, hix ikleih coicaenh ndawbiengz gwnz laj riuzdoengh caeuq goengbingz leixcingq. Guek raeuz miz 13 ik vunz、 9 ik lauzdungliz swhyenz, yinzminz gaenxguh youh coengmingz, cangzmiz naengzlig cauhmoq fouzhanh, ciencien-fanhfanh aen hawciengz sibauh saetdoengh hwnjdaeuj, bietdingh yaek comz baenz gij doenghnaengz hungloet fazcanj, itdingh dingj ndaej gij atlig ginghci rodroengz, hawj Cungguek ginghci itcig cungj hoenghhwdhwd. Cwngfuj aeu gamj gag guh gwzming, hawj hawciengz caeuq ndawbiengz louz ok hoenggan cukgaeuq, vih goengbingz gingcwngh dap ndei daizheiq. Gak vunz caeuq giyez gamj guh cauhnieb cauhmoq, daengx biengz aeu ndaem laeg cauhnieb cauhmoq vwnzva, hawj gyoengq vunz youq ndaw cauh vuzciz cienzcaiz, engq ndei dwk saedyienh cingsaenz gyaepgouz caeuq gyaciz bonjndang.
Bineix dwg bi gatsat“12•5”, raeuz aeu youq mwh guhbaenz“12•5”ginghci sevei fazcanj muzbyauh yinvu, doengzseiz aeu gij cingsaenz gaijgwz、gij leixniemh cauhmoq caeuq gij fuengfap hab gohyoz, guhndei gij hong bienguh “13•5”gveihva ganghyau, maeuzveh ndei aen fazcanj lamzdoz haj bi gaenlaeng.Sam、Dawz Gaijgwz Hailangh Netsaed Doi Haeujlaeg Baenaj
Gaijgwz hailangh dwg aen fapbauj ndaej guhbaenz doidoengh fazcanj. Bietdingh aeu dawz ginghci dijci gaijgwz guh cungdenj bae cienzmienh gyalaeg gaijgwz, doengjit suenqveh giemgoq lai fueng, caen ca saed guh, youq gij gaijgwz yiendoengh daengxbuenz haenx aeundaej cungbyoengq moq, dem’ak gij doenghnaengz moq fazcanj.
Gyadaih ligdoh guh gij gaijgwz gemj cwng cuengq gienz、cuengq guenj giethab. Bineix caiq siubae、cuengq roengzbae buek hingzcwng saemjbae saehhangh ndeu, cienzbouh siubae gij saemjbae mbouj dwg hingzcwng cinjhawj haenx, laebhwnj gij guenjleix cidu bae gveihfan hingzcwng saemjbae haenx. Gyalaeg gaijgwz gij cidu hongsaeh sanghyez, caenh’itbouh genjva cucwz swhbwnj daenghgeiq, cugbouh saedyienh gunghsangh yingzyez cizcau、cujciz gihgou daimajcwng caeuq suivu dwnghgicwng “sam cingq hab it”, cingleix gveihfan cunghgai fugsaeh. Ceiqdingh mbaw cingdan gimq cinjhaeuj hawciengz, goengbouh sengjgaep cwngfuj mbaw cingdan gienzlig、mbaw cingdan cwzyin, cietsaed guh daengz faplwd mbouj hawj gienz couh mbouj ndaej guh、gij cizcwz fapdingh cix bietdingh aeu guh. Doiq gij gienzlig wngdang cuengq hawj hawciengz caeuq sevei haenx, deihfueng cwngfuj bietdingh aeu cuengq liux bae、mbouj laengzlouz, doiq gij saemjbae saehhangh gaepgwnz cuengq roengzbae haenx, aeu ciep ndaej dawz、guenj ndaej ndei. Gyagiengz gamguenj saehcingz ndawde、saehcingz gvaqlaeng, laebcaez aen doengjit fugsaeh dijhi ndeu vih giyez caeuq sevei fugsaeh, doicaenh cauhlaeb sevei saenqyungh dijhi, laebhwnj aen sevei saenqyungh daihmax cidu caeuq aen bingzdaiz caezyungh doxvuenh saenqyungh saenqsik dwg daengx guek doengjit haenx, ciuqfap baujhoh giyez caeuq gakvunz saenqsik ancienz. Daih dauhleix gig genjdanh, miz gienz mbouj ndaej luenh yungh. Gak gaep cwngfuj cungj aeu laebhwnj aen gihci mizrengz doidoengh gemj cwng cuengq gienz、cienjbienq ciznwngz, hawj giyez cuengqsoeng hanhhaed, vih cauhnieb daezhawj bienhleih, cauh ok aen vanzgingj goengbingz gingcwngh. Sojmiz hingzcwng saemjbae saehhangh cungj aeu gaij cwngzsi genjdanh bae, mingzbeg doekdingh seizhanh, yungh gij “gemjfap”cwngfuj gienzlig, bae vuenh’aeu gij “swngzfap” hawciengz rengzhoengh.
Lai fuengmienh roengzfwngz gaijgwz douzswh yungzswh dijci. Daih fukdoh sukgemj aen gvaengh cwngfuj haedcinj douzswh hanghmoeg, cuengq roengzbae haedcinj gienzhanh. Daih fukdoh gemjnoix douzswh hanghmoeg geizgonq saemjbae, saedhengz hanghmoeg haedcinj gwnz vangjloz doxlienz banhleix. Daih fukdoh cuengqsoeng aen hawciengz cinjhaeuj ndawbiengz douzswh, gujli gij swhbwnj ndawbiengz fathwnj laebbaenz gujgenz douzswh gihginh. Cwngfuj yungh gij banhfap bangbouj douzswh、roengz bonjcienz、laeb gihginh daengj, dazyinx swhbwnj ndawbiengz dwkhaeuj cungdenj hanghmoeg bae. Aeu yungh ndei dietloh fazcanj gihginh guh giz gaem, gyalaeg gaijgwz dietloh douzswh yungzswh. Youq giekdaej sezsih、 goeng’yungh saehnieb daengj lingjyiz, gaenxmaenx doigvangq aen fuengsik cwngfuj caeuq swhbwnj ndawbiengz gapguh.
Mbouj saet seizgei bae gyavaiq gaijgwz gyagwz. Gaijgwz fuengyiengq dwg hawj hawciengz youq ndaw boiqbaij swhyenz miz gietdingh cozyung, daih fukdoh sukgemj cwngfuj dinghgyaq cungjloih caeuq hanghmoeg, gij sanghbinj caeuq fugsaeh gyagwz bwhmiz gingcwngh diuzgienh de itbuen cungj aeu cuengqhai. Daih dingzlai gijyw cwngfuj dinghgyaq aeu siubae, cuengq roengzbae buek gienz dinghgyaq sou cienz gihbwnj goenggungh fugsaeh ndeu. Gyadaih aen sawqdiemj gaijgwz soengq boiq dienhgyaq, doicaenh gaijgwz gyaqcienz raemx nungzyez, laeb caezcienz gij gyagwz cwngcwz mbaet nwngzyenz vanzbauj haenx. Laebndei swhyenzsing canjbinj gyagwz, cienzmienh saedhengz aen cidu gihminz gyagwz baenz mbaek. Doengzseiz bietdingh aeu gyagiengz gamguenj gyagwz, gveihfan hawciengz cizsi, saedbauj gij gihbwnj gwndaenj gyoengq vunz souhaeuj daemq.
Doidoengh caizsui dijci gaijgwz caiq ndaej guh baenaj. Saedhengz aen yawhsuenq guenjleix cidu cienzmienh gveihfan、goenghai ronghcingx, cawz ok gij saenqsik nangqdaengz mimiz fap dingh de, cunghyangh caeuq deihfueng sojmiz bouhmonz cungj aeu goenghai yawhsuenq gietsuenq, cienzmienh ciepsouh ndawbiengz gamduk. Daezsang aen beijlaeh guekmiz swhbwnj ginghyingz yawhsuenq diuhhaeuj itbuen goenggungh yawhsuenq haenx. Doihengz cunggeiz caizcwng gveihva guenjleix. Dingh’ok aen banhfap mizyauq buenzhoengh gij cienzngaenz caizcwng gaemmiz. Roengzrengz cengaeu cienzmienh guhbaenz “yingzyezsui gaijbaenz cwnghcizsui”, diuzcingj laebndei aen cwngcwz cwngsou siuhfeisui, gya’gvangq aen gvaengh coengz gyaq geiq sou swhyenzsui. Daezcingj coihdingh aen fap cwngsou cienzgvaeh. Gaijgwz aen cidu cienjok ceihawj, laebndei cunghyangh caeuq deihfueng saehgienz dem ceiok cwzyin, hableix diuzcingj cunghyangh caeuq deihfueng souhaeuj vehfaen.
Hopheux fugsaeh saeddaej ginghci doicaenh ginhyungz gaijgwz. Doidoengh gij swhbwnj ndawbiengz bwhmiz diuzgienh de, ciuqfap fathwnj laeb cunghsiujhingz ngaenzhangz daengj ginhyungz gihgou, cingzsug gya ndeu, baecinj gya ndeu, mbouj laeb hanhngeg. Gyalaeg gaijgwz lajmbanj sinyungse, onjdingh yienhfaenh fazyinz diegvih. Fazveih ndei haifatsingq ginhyungz、cwngcwzsing ginhyungz youq ndaw demgya gunghawj goenggungh canjbinj gij cozyungh de. Doiok cunzcienz baujyiemj cidu. Doicaenh liliz hawciengzvaq gaijgwz, laeb caezcienz cunghyangh ngaenzhangz aen gvaenghgyaq diuzgung liliz. Baujhawj yinzminzbi veiliz cawqyouq aen suijbingz hableix doxdaengh, demgiengz yinzminzbi veiliz gij hwnj roengz fouzdoengh de. Yamqonj saedyienh yinzminzbi swhbwnj hanghmoeg ndaej caujvuenh, gyadaih yinzminzbi gozci sawjyungh, gyavaiq cauhlaeb aen hidungj yinzminzbi hamj gyaiq ceihawj, laebndei aen dijhi yinzminzbi cienz seiqgyaiq cingsuenq fugsaeh, guh gij sawqdiemj goyinz bouxdouzswh youq rog gyaiq douzswh, habseiz hai guh gij sawqdiemj “Sinh Gangj gujbyau hawciengz dox doeng”. Gyagiengz laebguh aen swhbwnj hawciengz dijhi miz lai caengz, hengzguh gij gaijgwz cucwz fathengz gujbyau, fazcanj aen gihyizsing gujgenz hawciengz fugsaeh giyez rauh iq, guh gij sawqdiemj gujgenz cungqvunz maeuzveh yungzswh, doidoengh saenqdaiq swhcanj cwnggenva, gyadaih aen gveihmoz giyez fathengz caigen, fazcanj ginhyungz yenjswnghbinj hawciengz. Doiok caihaih hung baujyiemj、goyinz suisouh diyenzhingz sanghyez ciengxlaux baujyiemj. Cauhmoq gamguenj ginhyungz, fuengzre caeuq vaqgej ginhyungz fungyiemj. Daihlig fazcanj bujvei ginhyungz, hawj sojmiz hawciengz cawjdaej cungj ndaej faenyiengj gij ndeicawq ginhyungz fugsaeh.
Gyalaeg gaijgwz gij giyez guekmiz caeuq gij swhbwnj guekmiz. Cinjdeng vehdingh gij goengnaengz mbouj doengz guekmiz giyez, faenloih doicaenh gaijgwz. Gyavaiq guekmiz swhbwnj douzswh gunghswh、yinhhengz yingzyez gunghswh sawqdiemj, dajcauh aen bingzdaiz ciuq hawciengz sihgiuz bae guh, daezsang gij swhbwnj guekmiz yinhhengz yingzyez yauqlwd. Miz bouhloh bae saedhengz gij giyez guekmiz guh lai cungj sojyoujci doxgyaux gaijgwz, gujli caeuq gveihfan douzswh hanghmoeg yinxhaeuj gij swhbwnj mbouj dwg guekmiz de haeujguj. Gyavaiq gaijgwz dienhlig、youzheiq daengj dijci. Lai miengloh gaijgez giyez diuzrap banh sevei caeuq gij vwndiz gaxgonq louz roengzdaeuj, baujcang gij gienzik habfap gyoengq cizgungh. Laebndei yienhdaih giyez cidu, gaijgwz caeuq laeb caezcienz gij gihci gikcoi hanhhaed boux ginghyingz giyez. Aeu gyagiengz gamguenj gij swhcanj guekmiz, fuengzre gij swhcanj guekmiz deng riuzsaet, cietsaed daezsang gij ginghci yauqik aen giyez guekmiz.
Gij ginghci mbouj dwg gunghyoujci, dwg aen gapbaenz bouhfaenh youqgaenj ginghci guek raeuz. Bietdingh aeu hauz mbouj doenghngauz bae gujli、 haeujcoengh、dazyinx gij ginghci mbouj dwg gunghyoujci haenx fazcanj, yawjnaek fazveih gij bonjsaeh boux giyezgyah, cienzmienh doeksaed aen cwngcwz cosih coicaenh minzyingz ginghci fazcanj, demgiengz gij rengzhoengh gak loih sojyoujci ginghci, sawj gij caizcanjgenz gak loih giyez fazyinz ciuqfap ndaej daengz baujhoh.
Laebdaeb doicaenh gohgi、gyauyuz、vwnzva、yihyoz veiswngh、 ciengxlaux baujyiemj、saehnieb danhvei、ranzyouq gunghcizginh daengj lingjyiz gaijgwz. Fazcanj aeu miz gaijgwz daeuj gya doenghlig, cungqvunz maqmuengh gaijgwz miz saedyauq, raeuz aeu roengzrengz gyauok faenh gaijgwz dapgienj vih fazcanj gya rengz、hawj yinzminz ndaej ik ndeu.
Hailangh hix dwg gaijgwz. Bietdingh aeu saedhengz lwnz moq doiq rog hailangh suijbingz sang ndeu, gyavaiq cauxlaeb aen dijci moq dwg ginghci hailangh loihhingz, aeu cawjdoengh hailangh hingz ndaej cawjdoengh fazcanj、cawjdoengh guh gozci gingcwngh.
Doidoengh vaimou cienjhingz swnggaep. Laebndei aen gihci rapdawz cuzgouj doiqsuiq, daj 2015 nienz hwnj aen bouhfaenh demliengh de youz cunghyangh caizcwng cienzbouh rapdawz, hawj deihfueng caeuq giyez cuengqsim. Cingleix gveihfan gij soucienz hothoh cingouj cuzgouj, laebhwnj caemhcaiq goenghai mbaw cingdan sou cienz hanghmoeg. Saedhengz gij cwngcwz cosih gungganq vaimou gingcwngh youhsi moq, coicaenh gyagoeng mouyiz cienjhingz, fazcanj vaimou gyoebhab fugsaeh bingzdaiz caeuq hawciengz dajcawx mouyiz, gyadaih hamj gyaiq denswj sanghvu gyoebhab sawqdiemj, demgya aen soqliengh sifan hawsingz fugsaeh gyauhawj lingh fueng guh, daezsang fugsaeh mouyiz bijcung. Saedhengz aen cingouj cwngcwz engqgya ikleih haenx, gyadaih cingouj senhcin gisuz、gij sezbei youqgaenj、 gij lingzgen bugen youqgaenj daengj.
Engqgya gaenxmaenx mizyauq bae leihyungh swhbwnj guekrog. Coihdingh aen moegloeg dazyinx bouxseng’eiq guekrog douzswh canjnieb, cungdenj gyadaih hailangh hangznieb fugsaeh caeuq aen hangznieb dajcauh itbuen de, dawz gij diuzmoeg doengh loih hanhhaed bouxseng’eiq guekrog douzswh haenx sukgemj bae dingz ndeu. Cienzmienh doihengz gij guenjleix cidu bujben bwhanq、mizhanh haedcinj, daih fukdoh cuengq roengzbae gij gienz haedcinj loih hanghmoeg gujli guh de, gaenxmaenx damqra gij guenjleix yienghsik cinjhaeuj gaxgonq ndaej miz gozminz daiyi caiq gya mbaw cingdan gimq cinjhaeuj de. Coihdingh bouxseng’eiq guekrog douzswh mizgven faplwd, laeb caezcienz aen dijhi gamguenj bouxseng’eiq guekrog douzswh, dajcauh gij vanzgingj guh seng’eiq onjdingh goengbingz ronghcingx ndaej yawhgeiz.
Gyavaiq saedhengz aen canloz byaij okbae. Gujli giyez caeuqfaenh hwnqguh gij giekdaej sezsih rog gyaiq caeuq swnghcanj naengzlig gapguh, doidoengh dietloh、dienhlig、doengsaenq、gunghcwngz gihgai caeuq giceh、feihgih、denswj daengj Cungguek canghbei byaij yiengq seiqgyaiq, coicaenh yejginh、gencaiz daengj canjnieb doiq rog douzswh. Saedhengz gij doiqrog douzswh guenjleix fuengsik aeu bwh’anq guhcawj haenx. Gyadaih aen gveihmoz cuzgouj saenqyungh baujyiemj, doiq daihhingz baenzdauq sezbei cuzgouj yungzswh gij wngdang baujyiemj de caenhliengh baujyiemj. Haigvangq gij miengloh cwkrom yinhyungh vaivei, laeb caezcienz ginhyungz、saenqsik、faplwd、baujhoh lingjsw daengj fugsaeh. Yawjnaek fuengzre fung’yiemj, daezsang aen naengzlig baujcang gij gienzik youq rogguek. Hawj giyez Cungguek byaij ndaej okbae、byaij ndaej onjmaenh, youq ndaw gozci gingcwngh nyinz nyangq ndok genq、fazcanj hungcoek.
Cauxlaeb aen gwzgiz moq cienz fueng’vih doiq rog hailangh. Doicaenh rangh ginghci diuz roen seicouz caeuq 21 sigij diuz roen seicouz gwnz haij doxgap hwnqguh. Gyavaiq cauhguh dox lienz dox doeng、daih doenggvan caeuq diuz daih doengloh gozci vuzliuz. Cauxlaeb Cungh-Bah、Mung-Cungh-Yin-Menj daengj ginghci coujlangz. Gyadaih hailangh neiluz caeuq henz gyaiq, coicaenh ginghci gisuz gaihfazgih cauhmoq fazcanj, daezsang aen fazcanj suijbingz henz gyaiq ginghci hozcozgih、hamj gyaiq ginghci hozcozgih. Gaenxmaenx doicaenh cauhlaeb Sanghaij caeuq Gvangjdungh、Denhcinh、Fuzgen swmou siyengih, youq daengx guek doigvangq gij gingniemh cingzsug de, guhbaenz giz diegsang gaijgwz hailangh gak miz daegsaek.
Cingjdaej suenqveh lai fueng、song fueng caeuq gihyiz hailangh gapguh. Henhoh lai fueng mouyiz dijci, doidoengh gya’gvangq aen gvaengh saenqsik gisuz hezding, gaenxmaenx caeuqfaenh vanzgingj canjbinj、cwngfuj dajcawx daengj guh gozci damzbuenq. Gyavaiq hengzguh swmougih canloz, caenhvaiq ciemdingh Cungguek Hanzgoz、Cungguek Audaliya swmou hezding, gyavaiq Cungh-Yiz-Hanz swmougih damzbuenq, doidoengh caeuq Haijvanh Ahlahbwz Gozgyah Hozcoz Veijyenzvei、Yijswzlez daengj swmougih damzbuenq, roengzrengz ceng’aeu guhbaenz Cungguek-Dunghmungz Swmougih swnggaep damzbuenq caeuq gihyiz cienzmienh ginghci hojban gvanhaeh hezding damzbuenq, hwnqguh Yadai swmougih. Doicaenh Cungh Meij、Cungh Ouh douzswh hezding damzbuenq. Cungguek dwg aen guekgya rap cwzyin、gamj dang saeh ndeu, raeuz nyienh guh boux hengzguh aen fazcanj leixniemh dox ik caez hingz、boux cauhlaeb cenzgiuz ginghci dijhi, boux doidoengh ginghci cenzgiuzva.Seiq、Hezdiuz Doidoengh Ginghci Onjdingh Demlai Caeuq Gaijndei Gezgou
Onjdingh demlai caeuq diuzcingj gezgou doxbouj doxbang. Raeuz gawq aeu caenhrengz baujhawj ginghci youq ndaw gvaengh hableix de yinhhengz, youh aeu gaenxmaenx coicaenh ginghci cienjhingz swnggaep、hengz onj bae gyae.
Gyavaiq gungganq giz demmaj siufeiq. Gujli vunzlai siufeiq, gaemhanh “sam goeng” siufeiq. Coicaenh ciengxlaux gyahcwng gengangh siufeiq, sawj saenqsik siufeiq bienq ak, daezswng lijyouz youqndwi siufeiq, doidoengh loegsaek siufeiq, onjdingh ranzyouq siufeiq, gyadaih gyauyuz vwnzva dijyuz siufeiq. Cienzmienh doicaenh “sam vangj” yungzhab, gyavaiq hwnqguh gvanghsenh vangjloz, daih fukdoh daezsang gvanhdai vangjloz suzdu, fazcanj vuzliuz vaiqsoengq, dawz gij siufeiq ngamqhwng doenggvaq vangjdoxlienz guh caidij、gwnz vangj laj vangj dox lienzdoengh haenx, gauj ndaej hoenghhwdhwd bae. Laebhwnj laebcaez cungj cidu gamguenj、ragoek、ciudauq siuhfeibinj caetliengh ancienz，yiemzsuk cazcawq gij hingzveiz cauh gai huqgyaj huqrwix，baujhoh gij habfap gienzik bouxsiufeiq. Gyadaih siufeiq aeu comz rij iq baenz dah hung, hawj gij rengzndumj siufeiq ikfanh vunzlai ndaej baenz gij doenghlig rengzrwd bae ragdoengh ginghci demlai.
Demgya goenggungh canjbinj mizyauq douzswh. Saedbauj guhbaenz “12•5” gveihva gij yinvu cungdenj cauhguh，haidoengh saedhengz buek gunghcwngz hanghmoeg hungloet moq ndeu. Cujyau dwg：Gaijcauh dieg ranzdiengz caeuq ranzyiemj、 guenjmuengx lajnamh hawsingz daengj minzswngh hanghmoeg，dieg cungqgyang baihsae dietloh caeuq goengloh、gij doengloh dahndawguek daengj gyaudoeng hanghmoeg hungnaek，suijli、reihnaz biucinj sang daengj nungzyez hanghmoeg，saenqsik、dienhlig、youzheiq daengj vangjloz hanghmoeg hungnaek， nwngzyenz cinghseuq caeuq youzheiq gvangcanj swhyenz baujcang hanghmoeg， gaijcauh cienzdoengj canjnieb gisuz daengj hanghmoeg，mbaetnwngz vanzbauj caeuq swnghdai gensez hanghmoeg. Bineix cunghyangh yawhsuenq ndawde douzswh demgya daengz 4776 ik maenz，hoeng cwngfuj mbouj ciengq “heiq boux dog yienj”， aeu engq lai bae gikfat gij douzswh rengzhoengh ndawbiengz，dazyinx swhbwnj ndawbiengz dwk haeuj engq lai lingjyiz bae. Dietloh aeu baujciz douzswh 8000 ik maenz doxhwnj，gij lijcwngz douzcanj moq de 8000 goengleix doxhwnj，youq daengx guek daihdaej saedyienh gauhsuz goengloh denswj mbouj daengx ci soufeiq lienzvangj，hawj gyaudoeng caencingq baenz “boux byaij gonq” fazcanj. 57 aen hanghmoeg gij suijli gunghcwngz hungnaek gaenq haigoeng de aeu gyavaiq hwnqguh， bineix caiq haigoeng 27 aen hanghmoeg，gij suijli gunghcwngz hungnaek cingqcaih hwnqguh de douzswh gveihmoz mauhgvaq 8000 ik maenz. Gaijcauh ranzdiengz、 dietloh、 suijli daengj douzswh lai yiengh caez guh， cungdenj nyengqcoh fueng dieg cungqgyang baihsae，hawj cungj aeuyungh ndawguek hungloet de ndaej cuengq okdaeuj engq lai.
Gyavaiq doicaenh nungzyez yendaiva. Genhciz “sam nungz” aen diegvih ceiq naek neix mbouj gaijbienq，gyavaiq cienjbienq nungzyez fazcanj fuengsik， hawj nungzyez engq giengzak、nungzminz engq fouqmiz、lajmbanj engq gyaeundei.
Bineix haeuxgwn canjliengh aeu onjdingh youq 5.5 ik dunh doxhwnj， baujcang haeuxgwn ancienz caeuq gunghawj cujyau nungzcanjbinj. Soujndei diuz sienqhoengz reihnaz，cienzmienh mbeguh hangh hong vehdingh reihnaz goek ciengzlwenx，saedhengz aen hengzdoengh baujhoh caeuq daezswng reihnaz caetliengh， doicaenh cingjceih diegdeih， demgya gij diegdeih caelaeg namhmboeng 1333 fanh gunghgingj，gyagiengz reihnaz suijli gihbwnj cauhguh，daihlig fazcanj mbaet raemx nungzyez. Gyavaiq yenzgiu haifat doigvangq sawjyungh gisuz moq、 binjcungj moq、nungzgih moq. Dazyinx nungzminz liuqcinj hawciengz diuzcingj aen gezgou dajndaem dajciengx， haeujcoengh nungzcanjbinj gyagoeng daegbied dwg gij haeuxgwn dieg cujyau swnghcanj de youq dangdieg cienjvaq，guh gij sawqdiemj dawz ndaem doenghgo haeuxgwn gaij guh ndaem doenghgo gijgueng. Gyoebhab ceihleix nungzyoz souyoz canzlouz daengj vwndiz，cienzmienh daezsang gij caetliengh nungzcanjbinj caeuq sawj gijgwn lai ancienz.
Hwnqguh lajmbanj moq aeu hawj guengjdaih nungzminz ndaej ndeicawq. Daegbied aeu gyagiengz guhndei gij raemx ndij loh lajmbanj，bineix caiq gaijgez aen vwndiz 6000 fanh vunz lajmbanj gwn raemx ancienz，saen guh gaij ndei goengloh lajmbanj 20 fanh goengleix，cienzmienh guhcaez aen yinvu youq giz diegbya bien’gyae baihsae cauh giuz lawh diuzcag gvaqdah. Roengzrengz ceng’aeu hawj dan lw 20 lai fanh vunz caengz miz dienh sawj de cungj ndaej miz dienh yungh. Dawz labsab、raemxgyuek guh cungdenj gyagiengz ceihleix vanzgingj，hwnqbaenz aen mbanj gyaeundei hab vunz youq. Lai miengloh bae coicaenh nungzminz demgya souhaeuj，baujciz aen seiqdaeuz singzmbanj gihminz souhaeuj doxca suksiuj neix. Lienzdaemh hoenx ndei ciengz ciengq gungroengz hojnanz bae banggungz， haeujlaeg doicaenh dieg daegbied gungzhoj gyonjcomz lienzbenq guh banggungz haifat，saedhengz cingcinj banggungz、cingcinj duetgungz. Nanzdoh caiq hung， bineix hix aeu caiq gemjnoix bouxgungz lajmbanj 1000 fanh vunz doxhwnj.
Doicaenh nungzyez yendaiva，gaijgwz dwg bouh ceiq youqgaenj. Aeu youq gwnz giekdaej onjdingh gyadingz ginghyingz neix，bae haeujcoengh ranz dajndaem dajciengx lai、gyadingz nungzmuzcangz、nungzminz hozcozse、 canjyezva lungzdouz giyez daengj ginghyingz cawjdaej yienghmoq fazcanj，gungganq ciknieb nungzminz yienghmoq， doicaenh lai cungj hingzsik habdoh miz gveihmoz ginghyingz. Guh ndei hangh hong dingh gienz diegdeih、daenghgeiq、fathawj mbaw cingq，maedsaed siujsim bae guh cwngsou diegdeih lajmbanj、gij diegdeih yungh guh cizdij ginghyingzsing gensez de haeuj hawciengz、diegranz cidu、cizdij canjgienz cidu daengj gaijgwz sawqdiemj，youq ndaw gaijgwz，saedbauj reihnaz soqliengh mbouj gemjnoix、caetliengh mbouj doekdaemq、leih’ik nungzminz miz baujcang. Gyalaeg gaijgwz gunghsiuhse、nungzgwnj、cehfaen canjnieb、linzcangz linzgih guekmiz daengj， banh ndei lajmbanj gaijgwz siyengih caeuq yienhdaih nungzyez sifangih. Laebndei hangh cwngcwz gyaqcienz soucawx haeuxgwn ceiq daemq caeuq laemzseiz soucwk haeuxgwn，gaijcaenh nungzcanjbinj moegbiu gyagwz boujdiep banhfap. Gyagiengz cingjdaej suenqveh cingjhab caeuq guenjleix cungj swhginh nangqdaengz nungzyez de. Mboujlwnh caizcwng miz geijlai hojnanz，gij cwngcwz ikleih nungzminz haenx cijnaengz gyagiengz mbouj ndaej soeknyieg，gij swhginh bangcoengh nungzminz de cijnaengz demgya mbouj ndaej gemjnoix.
Doicaenh hawsingzvaq yienghmoq caiq aeu ndaej cungbyoengq. Hawsingzvaq dwg diuz roen daj goekgaen bae gaijgez singz mbanj cengca，caemh dwg cungj ndaw guek aeuyungh ceiq hung haenx. Aeu genhciz aeu vunz guh haedsim， dawz gaijgez gij vwndiz sam aen 1 ik vunz guh gizroengzrengz，fazveih ndei hawsingzvaq gij yunghcawq daiqdoengh fazcanj yendaiva haenx.
Gyadaih ligdoh gaijcauh dieg ranzdiengz caeuq gij ranz yung’yiemj hawsingz lajmbanj. Bineix aen gunghcwngz youqonj daiqmiz baujcang singqcaet de saen anbaiz 740 fanh dauq，ndawde gaijcauh dieg ranzdiengz 580 fanh dauq，demgya 110 fanh dauq，dawz gaijcauh gij ranz yung’yiemj hawsingz gvihaeuj ndaw cwngcwz gaijcauh dieg ranzdiengz. Lajmbanj gaijcauh ranz yung’yiemj 366 fanh hoh，demgya 100 fanh hoh，cingjdaej suenqveh doicaenh gaijcauh ranz lajmbanj dingj deihsaenq. Ranzyouq baujcang cugbouh saedhengz saedhuq baujcang caeuq ngaenzcienz boujdiep caez hengz，dawz mbangj gij ranzcunzliengh cienj guh ranzco goenggya caeuq ranz anbaiz vunz youq. Doiq gij dihbauj gyadingz ranzyouq daegbied hojnanz de，daezgung ranzyouq banggouq. Genhciz faenloih cijdauj，yawj dieg bae guh， doeksaed gij cawjdaej cwzyin deihfueng cwngfuj，haeujcoengh gihminz gij iugouz cawx ranz gag youq caeuq miz gij ranz gaijndei，coicaenh fangzdicanj hawciengz bingzonj cangqheiq fazcanj.
Yungh cungj banhfap gaijgwz bae gaijgez gij nanzdiemj vwndiz hawsingzvaq. Cagaenj saedhengz huciz cidu gaijgwz，doeksaed gij cwngcwz cuengqsoeng senj hugouj. Doiq gij vunz daj rog daeuj gaenq youq hawsingz couhnieb caeuq youqdingh hoeng caengz roengz hugouj de，aeu gihcucwng guh baengzgawq ndaej gunghawj doxwngq gihbwnj goenggungh fugsaeh，siubae gihcucwng soufeiq. Laebhwnj gij gihci caizcwng senjnod ceihawj caeuq siminzva doxngaeu de，hableix faenrap cungj cingzbonj nungzminzgungh bienqbaenz vunz hawsingz. Laebhwnj caeuq gveihfan gij hawsingz hwnqguh douzswh yungzswh gihci miz lai cungj youh ndaej lienzdaemh haenx. Genhciz mbaetyaej cizyoz sawjyungh diegdeih，onjdangq laebhwnj aen hawciengz hwnqguh yungh dieg singz mbanj doengjit haenx，laebndei caeuq gya’gvangq aen sawqdiemj singz mbanj hwnqguh yungh dieg demgya gemjnoix doxngaeu de. Lai yungh swhginh caeuq cwngcwz haeujcoengh，gyahung cungj gyoebhab sawqdiemj hawsingzvaq yienghmoq.
Lai ak bae guh hawsingz gveihva hwnqguh guenjleix. Ceiqdingh saedhengz gij gveihva hawsingz gyoengq，miz bouhloh bae doicaenh gihcuj sezsih caeuq gihbwnj goenggungh fugsaeh doengzsingzvaq. Laebndei aen biucinj ndalaeb hawsingz，guh cungj sawqdiemj hawj aen cin daegbied hung haenx gyalai gienzlig demgya ciznwngz，gaemhanh gij yinzgouj gveihmoz aen hawsingz hung gvaqmauh， hawj digiz si、yienhsingz caeuq aen cin cungsim daezswng gij naengzlig cangcoux canjnieb caeuq yinzgouj de，fuengbienh nungzminz youq henzgyawj bienqbaenz vunz hawsingz. Fazcanj aen hawsingz coengmingz，baujhoh caeuq cienzswnj lizsij、
vwnzva fuengdieg de. Gyagiengz hwnqguh hawsingz gij sezsih gung raemx gung heiq gung dienh、goenggungh gyaudoeng caeuq fuengz raemxrongz fuengz raemxdumh daengj. Giengiet ceihleix uqlah、gyaudoeng deng saek doengh gij bingh hawsingz neix，hawj okrog engq fuengbienh，vanzgingj engq ngamj youq.
Gya’gvangq gak dieg fazcanj hoenggan moq. Cingjdaej suenqveh saedhengz aen canloz gyoebhab “seiq daih banjgvaij” caeuq “sam rangh dieg cengjdaemx” neix. Youq dieg baihsae haihong hwnqguh buek hanghmoeg hungnaek ndeu gyoebhab gyaudoeng、nwngzyenz、suijli、swnghdai、minzswngh daengj， doeksaed ndei gij cwngcwz cosih cienzmienh saenqhwng dieg doengbaek daengj gunghyez gihdi geq，gyavaiq hwnqguh gij gyoebhab gyaudoeng suhniuj caeuq vangjloz dieg cungqgyang，haeujcoengh dieg baihdoeng fazcanj gonq，gya rengz haeujcoengh gwzming laujgih、dieg minzcuz、dieg henzguek、dieg gungzhoj， laebndei gij cwngcwz miz cabied bae fazcanj gak dieg. Dawz hwnqguh “it rangh dieg it diuz loh” caeuq gak dieg haifat hailangh giethab hwnjdaeuj，gyagiengz hwnqguh Ya Ouh Daluzgyauz moq、dieghawq henzhaij goujan cihdenj. Doicaenh Bwzgingh Denhcinh Hozbwz dox boiqhab fazcanj，youq gyaudoeng yizdijva、swnghdai vanzbauj、canjnieb swnggaep senjnod daengj fuengmienh ndaej miz saedcaet cungbyoengq gonq. Doicaenh hwnqguh rangh dieg ginghci Dahcangzgyangh，miz bouhloh haihong ceihleix diuz lohraemx dijbauj、guh goujan baksok henzdah daengj hanghmoeg hungnaek，laebhwnj gyoebhab laebdaej daih doengloh，cauhlaeb canjnieb senjnod sifangih，dazyinx canjnieb daj baihdoeng yiengq baihsae faen mbaek senj bae. Gyavaiq sawj aen hawsingz swhyenz raeg de cienjhingz swnggaep. Gyagiengz hwnqguh gij cungdenj gaihfazgih dieg cungqgyang dieg baihsae，gyalaeg fueng dieg henz Cuhgyangh Sanhgoz daengj doxgap guh.
Guek raeuz dwg aen guek miz dieghaij lai ndeu，aeu guh’ok caemhcaiq saedhengz aen canloz gveihva dieghaij，fazcanj dieghaij ginghci，baujhoh dieghaij swnghdai vanzgingj，daezsang dieghaij gohgi suijbingz，giengzvaq dieghaij gyoebhab guenjleix，gyagiengz dajcauh gij ligliengh gwnz haij, giengiet henhoh gij gienzik dieghaij guekgya，cawqleix ndei gij cengnauh gvendaengz gwnz haij，gaenxmaenx haigvangq song mbiengj caeuq lai mbiengj dieghaij gapguh，yiengq aen muzbyauh dieghaij giengzguek yamq bae.
Doidoengh canjnieb gezgou byaijcoh daengjgaep haemq sang. Aen hangznieb dajcauh dwg gij canjnieb maenh’ak raeuz，aeu saedhengz “Cungguek dajcauh 2025”，genhciz cauhmoq guh doidoengh、cinwngz cienjhingz、giengzvaq giekdaej、loegsaek fazcanj，gyavaiq daj aen guek hung dajcauh byaij coh aen guek ak dajcauh. Yungh caizcwng diepsik、gyavaiq cietgaeuq daengj cosih，doidoengh gaijcauh cienzdoengj canjnieb gisuz. Genhciz miz bauj miz at，vaqgej swnghcanj naengzlig lai gvaqbouh，haeujcoengh giyez gyan’gyoeb dauqlaeb，youq ndaw hawciengz gingcwngh louz ndei vut yaez. Coicaenh gunghyezva caeuq saenqsikvaq dohlaeg yungzhab，haifat leihyungh vangjlozva、 suswva、 cinwngzva daengj gisuz， roengzrengz youq mbangj aen lingjyiz youqgaenj ciengj ciemq baihnaj、aeundaej cungbyoengq.
Gij canjnieb saenhwng caeuq gij niebdaiq saenhwng dwg giz diegsang daihgya guh gingcwngh. Aeu hengzguh gij hanghmoeg hungnaek, lumjbaenz gauhdonh canghbei、saenqsik vangjloz、cizcwngz denlu、nwngzyenz moq、caizliu moq、 swnghvuz yihyoz、hangzgungh fazdunggih、yenzgi lunzgih daengj，dawz buek canjnieb saenhwng ndeu ganq baenz cujdauj canjnieb. Ceiqdingh “vangjdoxlienz ＋” hengzdoengh giva，doidoengh yizdung vangjdoxlienz、yinzgeiqsuenq、soqgawq hung、 huqlienzvangj daengj caeuq aen hangznieb dajcauh yienhdaih dox giethab，coicaenh denswj sanghvu、gunghyez vangjdoxlienz caeuq ginhyungz vangjdoxlienz cangqheiq fazcanj，dazyinx aen giyez vangjdoxlienz haigvangq gozci hawciengz. Guekgya gaenq laeb 400 ik maenz hangznieb saenhwng cauhnieb douzswh dazyinx gihginh， yaek cingjhab couzcomz engq lai swhginh，vih canjnieb cauhmoq gya youz coengh rengz.
Fugsaeh hangznieb couhnieb yungzlieng daih，fazcanj baihnaj gvangq. Aeu gyalaeg fugsaeh hangznieb gaijgwz hailangh，doeksaed gij cwngcwz haeujcoengh caizsuiq、diegdeih、gyagwz daengj caeuq aen cidu lingx cienzyiengj youhgyaj， daihlig fazcanj lijyouz、gengangh、ciengxlaux、gij sezgi miz siengjfap moq daengj swnghhoz caeuq swnghcanj fugsaeh hangznieb. Gyalaeg gaijgwz riuzdoeng dijci， gyagiengz hwnqguh daihhingz nungzcanjbinj baefat、cangcwk caeuq dohraeuj daemq yocuengq daehyinh daengj yienhdaih vuzliuz sezsih，roengzrengz daih fukdoh gyangqdaemq riuzdoeng cingzbonj.
Aeu dijci cauhmoq doidoengh gohgi cauhmoq. Cauhmoq dajcauh ceiq youqgaenj dwg bouxvunz. Aeu gyavaiq gaijgwz gohgi cwngzgoj sawjyungh cawqceq caeuq souik guenjleix，gyahung aen gvaengh saedhengz gij cwngcwz aeu gujgienz caeuq faenhoengz guh gikcoi，laebndei gij faplwd cidu gvendaengz gohgi cwngzgoj cienjvaq、cizvu fatmingz，hawj gij vunzcaiz cauhmoq faenyiengj cwngzgoj souik. Ceiqdingh gij cwngcwz coicaenh gohyenz yinzyenz riuzdoengh，gaijgwz gij cidu gohgi bingzgyaq、cizcwngh bingzdingh caeuq guekgya dajciengj，doicaenh gohyenz yen soj faenloih gaijgwz. Yinxhaeuj gij vunzcaiz caeuq caizhag caetliengh sang rog guek. Haeujlaeg saedhengz cihsiz canjgienz canloz hengzdoengh giva， ciuqfap dwkceih ciemqgienz hingzveiz，cietsaed baujhoh fatmingz dajcauh，hawj cauhmoq lumj gofaex nye lai mbaw mwn nei.
Giyez dwg aen cawjdaej gisuz cauhmoq. Aeu doeksaed caeuq laebndei gij bujveising cwngcwz, lumjbaenz giyez yenzgiu haifat feiqyungh gya haeuj geiqsuenq gaeucawz、bangfuz aen giyez gisuz sang moq daengj，gujli giyez demgya douzhaeuj cauhmoq. Haeujcoengh giyez engq lai bae caeuqfaenh saedhengz gohgi hanghmoeg hungnaek、cauhlaeb gohyenz bingzdaiz，doicaenh gij canj yoz yenz youz giyez dazyinx de dox boiqhab cauhmoq. Daihlig fazcanj aen hoenggan vunzlai cauhmoq， demlaeb gij sifangih guekgya gag guhcawj cauhmoq， banhndei guekgya gauhsinhgih， fazveih gyonjcomz cauhmoq yausu gij lingxdaeuz cozyungh de. Giyez rauh、 giyez iq caeuq giyez iqet daih miz guhdaeuz，aeu ruz hwnj max，soeng mboengq ndeu，sawj beksingq cauhmoq hoenghhwdhwd、dauqcawq haiva.
Daezsang cauhmoq yauqlwd aeu dawz cungdenj cuengq youq gaijndei gohgi swhyenz boiqceiq. Aeu gaijgwz cunghyangh caizcwng gohgi giva guenjleix fuengsik，laebhwnj aen guekgya gohgi guenjleix bingzdaiz goenghai doengjit de. Cwngfuj cungqdiemj haeujcoengh gihcuj yenzgiu、yenzgiu gij gisuz ceiq moq ceiq ndei caeuq gij gvanhgen gungsing gisuz hungnaek，gujli gij cauhmoq codaeuz， gyavaiq saedhengz guekgya gohgi hanghmoeg hungnaek，yiengq sevei cienzmienh hailangh gohgi yenzgiu giekdaej sezsih hungnaek caeuq daihhingz gohgi yenzgiu yizgi. Dawz gij dungxcaiz coengmingz ikfanh yinzminz diuhdoengh hwnjdaeuj， couh itdingh ndaej coux daengz aen langhciuz vunzlai cauhmoq. Haj、Lienzdaemh Doicaenh Gaijndei BeksingqSenggeiq Caeuq Dajcauh Aen Biengz
Gij dauhleix laebguek，caenh hawj beksingq fouq. Aeu gyalai gij fukheiq beksingq senggei guh muzdiz，gyavaiq fazcanj sevei saehnieb, gaijgwz laebndei souhaeuj faenboiq cidu，cien fueng bak geiq demgya gihminz souhaeuj，coicaenh ndawbiengz goengbingz cingqngeih caeuq huzndei cinbu.
Roengzrengz coicaenh cauhnieb couhnieb. Genhciz dawz couhnieb baiz youq gonq，aeu cauhnieb daiqdoengh couhnieb. Bineix miz gauhyau bizyezswngh 749 fanh boux，dwg gwnz lizsij vunz ceiq lai. Aeu gyagiengz dazyinx couhnieb caeuq son’gyauq cauhnieb，doeksaed gauhyau bizyezswngh couhnieb coicaenh giva，gujli bae gihcwngz couhnieb. Saedhengz ndei dayozswngh cauhnieb yinxlingx giva， haeujcoengh gyoengqde bae saenhwng canjnieb cauhnieb. Guhndei hangh hong diuzcingj gezgou、vaqgej swnghcanj naengzlig lai gvaqbouh ndawde gyoengq vunz saetnieb haenx dauqcungz couhnieb. Cingjdaej suenqveh lajmbanj senjnod lauzdungliz、hawsingz boux gungzhoj、bouxbing duiyiz bae couhnieb， saedhengz aen giva daezswng gij ciknieb gisuz naengzlig nungzminzgungh，doeksaed caeuq laebndei aen cwngcwz aeu saetnieb baujyiemj haeujcoengh giyez onjdingh couhnieb gangjvei. Cienzmienh ceihleix gij vwndiz niengqyiemq cienzhong nungzminzgungh，laebcaez gij gihci gamcaz lauzdung caeuq cawqleix doxcwngq，hawj faplwd baenz goeng saenz henhoh gij gienzik bouxguhhong.
Gyagiengz sevei baujcang caeuq demgya gihminz souhaeuj. Aen biucinj gihbwnj cienzciengxlaux boux doiqyouh ndaw giyez daezsang 10％. Singzmbanj gihminz gihcuj cienzciengxlaux biucinj doengjit daj 55 maenz daezsang daengz 70 maenz. Doicaenh hawsingz cizgungh gihcuj cienzciengxlaux daengx guek doengjit couzcomz. Gyangqdaemq saetnieb baujyiemj、hongsieng baujyiemj gyaufeiq beijlwd. Laebndei ceiq daemq gunghswh biucinj diuzcingj gihci. Doeksaed gihgvanh swyez danhvei ciengxlaux baujyiemj cidu gaijgwz cosih，doengzbouh laeb caezcienz gunghswh cidu， cwngcwz aeu lai ciuqgoq boux youq gihcwngz gunghcoz de. Youq aen gihgvanh yienhgaep doxroengz de, laebhwnj yiengh cidu gunghvuyenz cizvu caeuq cizvu gaepbied caez hengz. Gyagiengz gouqbang yw boux binghnaek、bingh daegbied naek，cienzmienh saedhengz gij gouqbang cidu laemzseiz，hawj doengh boux ginzcung bungzdaengz gaenjgip cainanh caeuq daegbied hojnanz de miz monzloh gouz bangcoh、gibseiz ndaej bangcoh. Doiq gyoengq vunz daegbied hojnanz de, lumjbaenz gij lwgnyez hojnanz、bouxgeqget caeuq bouxgeq saet bae naengzlig、 bouxndangcanz yiemzcungh caeuq bouxndangcanz gungzhoj daengj，laebcaez fukleih baujcang cidu caeuq fugsaeh dijhi. Laebdaeb daezsang singzmbanj dihbauj suijbingz， doiq boux ndaej daihndei caeuq bangcoengh haenx, daezsang gij biucinj fujsiz caeuq swnghhoz bangbouj de. Aen cwngcwz daezsang cienzhong caeuq daezsang baujcang biucinj daengj souh ik vunzsoq lai，gak gaep cwngfuj itdingh aeu doeksaed daengz vih. Gij haemzhoj beksingq，dwg saehnaek guekgya，raeuz aeu caenh sim caenh rengz，giengiet cadawz dawzmaenh gij daejsienq beksingq senggeiq.
Coicaenh gyauyuz goengbingz fazcanj caeuq daezswng caetliengh. Gyauyuz dwg gij saehnieb ngoenzneix、gij maqmuengh ngoenzcog. Aeu genhciz yungh daudwz son vunz ganq vunz，demgiengz gij sevei cwzyinganj、cauhmoq cingsaenz、saedguh naengzlig gyoengq hagseng，son’gyauq ok gyoengq vunz ciepban caeuq hwnqguh aen seveicujyi miz Cungguek daegsaek. Gyalaeg bae cingjdaej suenqveh gaijgwz sengjgaep cwngfuj gyauyuz、gyoebhab gaijgwz gauhdwngj yenyau caeuq gaijgwz gaujsi ciuseng cidu. Gyavaiq hwnqguh gij yivu gyauyuz yozyau hab biucinj bae，gaijndei gij gihbwnj banhhag diuzgienh aen yozyau buegnyieg caeuq aen yozyau saedhengz dozyouq. Doiq gyoengq lwgnyez nungzminzgungh gaenriengz senj dieg haenx, doeksaed gij cwngcwz hawj youq giz dieg senjhaeuj de ciepsouh yivu gyauyuz，laebndei gij cwngcwz cieplaeng swnghag. Cienzmienh doicaenh laebndei yienhdaih ciknieb gyauyuz dijhi. Dazyinx bouhfaenh deihfueng bwnjgoh gauhyau yiengq ying’yunghingz cienjbienq，doenggvaq giz doiq giz bangcoh daengj fuengsik, haeujcoengh dieg cungqgyang、dieg baihsae gauhdwngj fazcanj gyauyuz，laebdaeb daezsang dieg cungqgyang、dieg baihsae caeuq aen sengj vunz lai gij gauhgauj loegaeu beijlwd de，cauhlaeb seiqgyaiq itlouz dayoz caeuq itlouz yozgoh. Gyagiengz daegbied gyauyuz、mwh caengz haeujhag gyauyuz、laebdaeb gyauyuz caeuq dieg minzcuz gak loih gyauyuz. Coicaenh minzbanh gyauyuz cangqheiq fazcanj. Gyagiengz dajcauh lauxsae duivuj, vih cietsaed banhndei gyauyuz saehnieb，raeuz aeu baujcwng douzhaeuj，yungh ndei moix faen ngaenz. Aeu sawj hagseng lajmbanj caeuq hagseng dieg gungzhoj miz miengloh daj laj doeng daengz gwnz riuzdoengh， hawj bouxboux cungj miz gihvei doenggvaq gyauyuz gaijbienq minghyinh swhgeij.
Gyavaiq laebcaez gihbwnj yihliuz veiswngh cidu. Laebndei singzmbanj gihminz gihbwnj yihbauj，caizcwng bangbouj biucinj daj moix boux bingzyaenz 320 maenz daezsang daengz 380 maenz，daihdaej saedyienh gihminz cienz yw bingh youq ndaw sengj cigsoh gietsuenq，onjbouh doihengz cienz yw bingh boux duiyouh hamj sengj cigsoh gietsuenq. Cienzmienh saedhengz singzmbanj gihminz bingh hung baujyiemj cidu. Gyalaeg gihcwngz yihliuz veiswngh gihgou gyoebhab gaijgwz， gyagiengz cauhlaeb gij cidu cenzgoh canghyw，laebndei aen dijhi faengaep yawjbingh ywbingh. Cienzmienh doihai yienhgaep goenglaeb yihyen gyoebhab gaijgwz，youq 100 aen hawsingz digiz gaep doxhwnj haenx, guh gij sawqdiemj gaijgwz goenglaeb yihyen，buqcawz aeu cienzyw ciengx yihyen，gyangqdaemq cienzyw hawsang， hableix diuzcingj gij gyaqcienz yihliuz fugsaeh，doenggvaq yihbauj ceihawj daengj fuengsik bingzyaenx feiqyungh, roengzrengz gemjmbaeu diuzrap ginzcung. Gikcoi canghyw bae gihcwngz lai giz ywbingh，fazcanj sevei haibanh yihyen. Haiguh sengjgaep gyalaeg yihliuz gaijgwz gyoebhab sawqdiemj. Gyavaiq laebhwnj gij gihci fuengzre diuzgaij yihliuz doxcwngq. Gij biucinj bangbouj gihbwnj goenggungh veiswngh fugsaeh ginghfei, youz moix vunz bingzyaenz 35 maenz daezsang daengz 40 maenz，gij soqliengh gyalai de cienzbouh yungh daeuj ceihawj gij gihbwnj goenggungh veiswngh fugsaeh lajmbanj yihliuz, fuengbienh geij ik nungzminz youq dangdieg couhgaenh yawjbingh ywbingh. Gyagiengz fuengzre gaemhanh binghhung binghnaek. Gaenxmaenx fazcanj cunghyihyoz caeuq minzcuz yihyoz saehnieb. Doicaenh giva swnghyuz fugsaeh guenjleix gaijgwz. Ndangcangq dwg gij gihbwnj iugouz gyoengq ginzcung，raeuz aeu mboujduenh daezsang yihliuz veiswngh suijbingz, dajcauh aen Cungguek cangqheiq.
Hawj yinzminz ginzcung yiengj miz vwnzva fazcanj cwngzgoj engq lai engq ndei. Vwnzva dwg gij cingsaenz minghmeg minzcuz caeuq gij rengzgoek cauhguh. Aeu hengzguh aen haedsim gyacizgvanh seveicujyi, daihlig fatyiengz gij vwnzva conzdungj ndei Cunghvaz. Gaujhoengh fazcanj cezyoz sevei gohyoz，fazcanj vwnzyoz yisuz、sinhvwnz okbanj、gvangjbo denyingj densi、dang’an daengj saehnieb， yawjnaek baujhoh vwnzvuz、gij vwnzva yizcanj mbouj dwg vuzciz. Daezgung engq lai vwnzyi cozbinj ndei，dizcang dazyinx daengxcungq beksingq doegsaw，dajcauh aen biengz bouxboux gyaez doegsaw, daezsang guekminz suzciz. Gyalaeg gaijgwz vwnzva dijci，cugbouh doicaenh gihbwnj goenggungh vwnzva fugsaeh hab biucinj bienq bingzyaenz， gya’gvangq aen gvaengx mienxfeiq hailangh goenggungh vwnzva sezsih, fazveih gij cozyung gihcwngz doengh gij vwnzva fugsaeh cungsim dwg gyoebhab singqcaet haenx, coicaenh cienzdoengj meizdij caeuq gij meizdij saenhwng haenx yungzhab fazcanj. Gya’gvangq ndawguek caeuq rogguek yinzvwnz gyauhliuz， gyagiengz dajcauh gij naengzlig gozci cienzboq. Fazcanj cienz guek bouxboux lienhndang、dijyuz doxdax caeuq dijyuz canjnieb，guh ndei gij hong sinhcingj banh 2022 nienz Doenggeiq Auyinvei.
Gyagiengz caeuq cauhmoq sevei ceihleix. Gyalaeg gaijgwz sevei cujciz guenjleix cidu，gyavaiq hangznieb hezvei、sanghvei caeuq hingzcwng gihgvanh duetngaeu. Haeujcoengh ginzcung donzdij cujciz ciuqfap camgya ceihleix ndawbiengz，fazcanj sevei gunghcoz ciennieb、gagnyienh fugsaeh caeuq swzsienh saehnieb. Gujli gij ligliengh ndawbiengz hwngbanh ciengxlaux sezsih，fazcanj segih caeuq youqranz ciengxlaux. Vih gij lwgnyez、mehmbwk、bouxlaux louzsouj lajmbanj daezgung gvansim gyaezhoh fugsaeh，cauhlaeb aen cidu baujhoh ndawbiengz boux caengz maj hung, cietsaed baujcang gij gienzik mehmbwk lwgnyez. Daezsang cungj naengzlig fuengzre cawqceq gij goenggungh saehgienh sawqmwh fatseng caeuq gij naengzlig fuengz cai gouq cai gemj cai. Guhndei gij hong deihsaenq、 diensiengq、rauveh、diciz daengj. Haeujlaeg guh fazci senhconz gyauyuz， gyagiengz gij hong yinzminz diuzgaij，laebndei faplwd bangcoh cidu，doeksaed aen gihci bingzguj gezcwz hungnaek sevei onjdingh fungyiemj, mizyauq yawhfuengz caeuq vaqgej mauzdun ndawbiengz. Dawz sinfangj nabhaeuj diuzroen ciuqfap guenjleix bae， gibseiz youq dangdieg gaijgez gij soqgouz hableix ginzcung. Gyalaeg dajcauh aen Cungguek bingzan，laeb caezcienz gij sevei cianh yawhfuengz gaemguenj dijhi doxdoeng doxlienz haenx，ciuqfap fadceih gij famhfap famhcoih hingzveiz bauqlig gungjbu、ndauq doj doeg、sezgyau、coujswh daengj，fazcanj caeuq gveihfan vangjloz hoenggan，saedbauj guekgya ancienz caeuq goenggungh ancienz. Sengmingh bouxvunz ceiq dijbauj, aeu yungh gij cosih engqgya giengiet, cienzmienh giengzvaq ancienz swnghcanj, daj daeuz daengz byai baujcang gijgwn gijyw ancienz.
Hoenx ndei ciengz ciengq gunggeng mbaet nwngzyenz gemj baizcuengq caeuq ceihleix vanzgingj. Vanzgingj uqlah dwg gij huxhaih beksingq，dwg gij indot minzsim, aeu gengndongj mizrengz bae ceihleix. Bineix, wyangjvadan baizcuengq giengzdoh aeu gyangqdaemq 3.1% doxhwnj, vayoz yungh yangj soqliengh、anhdan baizcuengq cungj aeu gemjnoix 2% baedauq, wyangjvaliuz、danyangjvavuz baizcuengq aeu faenbied gemjnoix 3% baedauq caeuq 5% baedauq. Haeujlaeg hengzguh aen hengzdoengh giva fuengzceih daihheiq uqlah, saedhengz gak dieg lienzfuengz lienzguenj, gyagiengz meizdan cinghseuq yauliz sang bae leihyungh, doidoengh aen dencangj coemh meiz de gaijcauh baenz baizcuengq gig noix, coicaenh giz dieg cungdenj yungh meiz mbouj miz demlai. Doigvangq gij giceh yungh nwngzyenz moq，ceihleix gij heiqfeiq riengci，daezsang gij biucinj caeuq caetliengh youz canjbinj， youq fueng dieg cungdenj ndawde aen singz cungdenj cienzmienh gung’wngq gij ciyungh giyouz caizyouz guek haj biucinj haenx. Gij civuengzbiu youq 2005 nienz daej gaxgonq cucwz yinhhengz haenx bineix aeu cienzbouh cawz bae mbouj yungh. Gaenxmaenx wngqdoiq dienheiq bienqvaq, gyadaih gij sawqdiemj gaicawx dan gienzbaizcuengq. Saedhengz aen hengzdoengh giva fuengzceih raemx uqlah， gyagiengz ceihleix dah、huz、haij raemx uqlah、gizgoek raemx uqlah caeuq nungzyez gij uqlah dauqcawq baizcuengq，saedhengz daj goekraemx daengz suijlungzdouz itloh cungj gamguenj. Gyagiengz fuengzceih namh uqlah. Doihengz youz daihsam fueng ceihleix vanzgingj uqlah. Guh ndei gij hong vanzbaujsui laebfap. Raeuz itdingh aeu yiemzgek vanzgingj caepfap, doiq boux caeg baizcuengq de coengznaek ceihfad, hawj de deng ok daigya naekcaem; doiq boux yungzcingz mbouj hanhhaed de coengzyiemz cazdawz cwzyin, sawj de deng habdangq cawqfad.
Swnghcanj nwngzyenz caeuq siufeiq gwzming，gvendaengz fazcanj caeuq beksingq senggeiq. Aeu daihlig fazcanj dienhrumz、gvanghfuz fatdienh、swnghvuz ciznwngz，gaenxmaenx fazcanj dienhraemx，ancienz fazcanj hwzden，haifat leihyungh heiqrin’gyap、heiqcaengzmeiz. Gaemhanh gij cungjliengh nwngzyenz siufeiq，gyagiengz gunghyez、gyaudoeng、gencuz daengj cungdenj lingjyiz mbaetyungh nwngzyenz. Gaenxmaenx fazcanj sinzvanz ginghci, roengzrengz doicaenh dawz huqfeiq gunghyez caeuq nyapnyaj gwndaenj bienqbaenz swhyenz bae leihyungh. Guek raeuz gij rengzndumj aen hawciengz mbaetyungh nwngzyenz baujhoh vanzgingj haenx gig daih，aeu dawz aen canjnieb mbaetyungh nwngzyenz baujhoh vanzgingj dajcauh baenz aen canjnieb donghsaeu saenhwng.
Ndoengfaex diegnywj、diuzdah diegcumx dwg gij caizfouq daswyenz lok hawj vunz raeuz，bietdingh aeu gyaboix insik. Aeu doicaenh hwnqguh swnghdai gunghcwngz hungnaek, gya’gvangq aen swnghdai gunghnwngzgih youqgaenj， banh ndei gij sifangih swnghdai vwnzmingz guh gonq haenx，guh gij sawqdiemj gyoebhab cingjceih diegguek caeuq diuzdah，gyadaih gij sawqdiemj dieg dah duenhgwnz duenhlaj yiengqvang boizbouj gihci，baujhoh ndei goekraemx Dahcangzgyangh、Dahvangzhoz、Dahlanzcanghgyangh. Gyadaih aen gvaengh baujhoh ndoengfaex dienseng，miz bouhloh dingz raemj gij ndoengfaex dienseng bae gai. Bineix caiq demgya doiq raeq fuk ndoeng ndaem nywj 66.7 fanh gunghgingj, cauh ndoeng 600 fanh gunghgingj. Swnghdai vanzbauj ceiq youqgaenj dwg hengzdoengh, yaek guhbaenz cix aeu genhciz, raeuz bietdingh aeu cagaenj mbouj cuengqsoeng, itdingh aeu saedyienh gwnzmbwn ciengzseiz heu、raemx saw ciengzseiz lae、ciengzlwenx laebdaeb fazcanj. Roek、Cietsaed Gyagiengz Guhndei Cwngfuj Bonjndang
Raeuz aeu cienzmienh doicaenh ciuq fap guenj guek， gyavaiq cauhlaeb aen cwngfuj fapceih、 aen cwngfuj cauhmoq、 aen cwngfuj seuqcengh caeuq aen cwngfuj rox fugsaeh， sawj cwngfuj lai ak caephengz caeuq hawj vunzlai lai saenqfug, coicaenh guekgya ceihleix dijhi caeuq ceihleix naengzlig yendaiva.
Genhciz ciuq yenfaz hengzguh hongsaeh cwngci，ciuq fap hengzsawj guekgya gienzlig，dawz hong cwngfuj cienzmienh nabhaeuj diuzroen fapceih bae. Yenfaz dwg gij hozdung cunjcwz gaenbonj raeuz, gak gaep cwngfuj caeuq gij gunghcoz yinzyenz de cungj bietdingh aeu yiemzgek ciuqsouj. Aeu gingq fap、hag fap、souj fap、yungh fap，ciuqfap cienzmienh hengzguh cizcwz. Sojmiz hingzcwng hingzveiz cungj aeu miz faplwd baengzgawq，aen cwngfuj bouhmonz lawz cungj mbouj ndaej youq rog faplwd laeb gienz. Gyalaeg gaijgwz hingzcwng caepfap dijci，yiemzgek gveihfan goengcingq vwnzmingz caepfap，gyavaiq doicaenh gyoebhab caepfap, cienzmienh doeksaed hingzcwng caepfap cwzyinci. Sojmiz gij hingzveiz famh fap famh gvi de cungj aeu gyaepcaz, sojmiz gij yienhsiengq caepfap mbouj goengcingq mbouj vwnzmingz de cungj bietdingh aeu niujcingq.
Genhciz cauhmoq guenjleix，giengzvaq fugsaeh，roengzrengz daezsang gij yaunwngz cwngfuj. Daezgung gihbwnj goenggungh fugsaeh，caenhliengh yungh cungj fuengsik cawx fugsaeh，gij fugsaeh guenjleix hongsaeh daihsam fueng daezgungh ndaej haenx，gyau hawj hawciengz roxnaeuz ndawbiengz bae banh. Netsaed guh cwngfuj doxyaeng, gaenxmaenx doicaenh gezcwz hab gohyoz、miz minzcuj，yawjnaek fazveih gij yunghcawq aencang dungxcaiz. Cienzmienh saedhengz goenghai hongsaeh cwngfuj，doigvangq denswj cwng’vu caeuq gwnz vangjloz banhsaeh. Gak gaep cwngfuj aeu gagrox ciepsouh doengzgaep yinzda caeuq aen cangzveijvei de gamduk, ciepsouh yinzminz cwnghez guh minzcuj gamduk, nyinhcaen dingqaeu gij yigen yinzda daibyauj、cwnghez veijyenz、 minzcuj dangjbai、 gunghsanghlenz、fouz dangjbai yinzsw caeuq gak yinzminz donzdij. Sojmiz gij hong raeuz cungj aeu cienzmienh ciepsouh yinzminz gamduk, cungfaen daejyienh gij sim’eiq yinzminz.
Genhciz ciuqfap yungh gienz， dizcang mbaet gwn mbaet yungh， ceihleix daih sai daih saengq， haeujlaeg doicaenh gij hong dangjfungh lenzcwng gensez caeuq fanj baihrwix. Nyinhcaen doeksaed gij cingsaenz dangj cunghyangh bet hangh gvidingh， genhciz mbouj cuengqsoeng bae niujcingq“seiq cungj cozfungh”，laebdaeb yiemzgek caephengz Gozvuyen“iekfap sam cieng”. Baihrwix yienhsiengq aen daegdiemj doxdoengz de，couh dwg ra vunz daeuj co gienzlig，aeu doenggvaq gienzlig bienq iq cix sawj lenzcwng bienq ak，dawzyiemz gij cidu guenj gienz hanh gienz, giengiet dwkloemq gij hoenggan ra vunz co，roengzrengz vatcawz gij namh baihrwix bae. Gyagiengz hingzcwng gamcaz，fazveih gij cozyung saemjgeiq gamduk，doiq gij swhginh goenggungh、gij swhyenz goenggungh、gij swhcanj guekmiz，aeu yiemzyiemz gamguenj. Itloh baujciz gij seiqdaeuz yiemzhaenq fanj baihrwix，doiq boux baihrwix hauz mbouj yungznyaenx、yiemzhaenq cazcawq. Doiq gij hingzveiz baihrwix, mboujlwnh miz youq lingjdauj gihgvanh, roxnaeuz miz youq henz ndang ginzcung, cungj bietdingh aeu coengzyiemz ceihfad.
Genhciz cawjdoengh bae guh，haenq ca doeksaed，cietsaed guh daengz gaenx guh goengsaeh vih lwgminz. Ginghci fazcanj haeuj daengz gij cangdai cingqciengz moq，cingsaenz mienhmauh aeu miz yienghceij moq. Guengjdaih gunghvuyenz daegbied dwg lingjdauj ganbu, aeu seizseiz dawz vih yinzminz maeuz fazcanj dem fukheiq dangguh gij cwzyin ceiq hung，seizseiz dawz gij sawjmingh hwnqguh yendaiva gwed youq gwnz mbaq, seizseiz dawz gij caepndat youangq ginzcung cuengq youq ndaw sim. Gak gaep cwngfuj aeu cietsaed hengzguh cizcwz, haenq ca gvancez doeksaed, cauhmoq bae guhhong. Laebndei gij gihci gaujhaed bingzgyaq nyaemhcik niebcik，doiq boux saedcik doedok de aeu daihlig dajciengj gujli；doiq boux guhhong mbouj daeklig de aeu iekdamz gienqmienx; doiq boux dangguen mbouj guh saeh、gik guh goengsaeh de aeu goenghai biengjloh, giengiet gyaepcaz cwzyin.
Gak boux daibyauj！
Guek raeuz dwg aen guekgya minzcuz lai doengjit ndeu，gyamaenh caeuq fazcanj gij seveicujyi minzcuz gvanhaeh bingzdaengj doxgiet doxbang huzndei haenx， dwg gij leihik gaenbonj caeuq aen cwzyin caezcaemh daengx guek gak cuz yinzminz. Aeu genhciz caeuq laebndei gij cidu dieg minzcuz gagguenj, gya rengz haeujcoengh dieg minzcuz mbouj fatdad haenx，bangfuz doengh aen minzcuz vunz haemq noix haenx fazcanj，doicaenh aen hengzdoengh hwng henzguek fouq beksingq， baujhoh caeuq fazcanj gij cienzdoengj vwnzva ndei siujsoq minzcuz caeuq aen haw mbanj miz daegsaek，coicaenh gak minzcuz dox baedauq、dox gyaulouz、dox gyauyungz. Cujciz ndei gij hozdung angqhoh Sihcang Swcigih laebbaenz 50 hopbi caeuq Sinhgyangh Veizvuzwj Swcigih laebbaenz 60 hopbi. Gak cuz yinzminz doxhuz caemhyouq、caezsim cawz hoj，huzndei fazcanj，Cunghvaz Minzcuz aen gyadingz hung raeuz itdingh ndaej engqgya hoenghvuengh fatdad、vuenyungz an’onj！
Raeuz aeu cienzmienh gvancez diuz gihbwnj fuengcim hong cunghgyau aen dangj，coicaenh cunghgyau gvanhaeh huzndei，henhoh gij gienzik habfap cunghgyaugai，doiq gij vunzmaenh cunghgyaugai caeuq gyoengq vunz saenqyiengj cunghgyau, aeu fazveih gyoengqde youq coicaenh ginghci sevei fazcanj gij cozyung ndei de.
Raeuz aeu engq ndei bae fazveih beixnuengx vazgyauz rogguek caeuq gyoengq vazgyauz dauqma guekcoj dem gij vunz ranz de camgya hwnqguh guekcoj yendaiva、coicaenh guekcoj hozbingz doengjit、doicaenh ndawguek rogguek gyaulouz gapguh gij cozyung daegbied neix，sawj gij rengzcohsim lwglan Cunghvaz ndawguek rogguek mboujduenh demgiengz.
Gak boux daibyauj！
Dajcauh gij gozfangz maenhsaed caeuq aen ginhdui maenh’ak，dwg daj goekgaen bae baujcang henhoh guekgya cawjgienz、ancienz caeuq fazcanj leih’ik. Aeu gaenjgaenj hopheux dangj youq hingzseiq moq gij muzbyauh sawj ginhdui maenh’ak haenx，genhciz diuz gaenbonj yenzcwz aen dangj raeuz cieddoiq lingjdauj ginhdui，cingjdaej suenqveh ca’ndei gak fuengmienh gak lingjyiz ginhsw doucwngh caepcawq，bauj hawj henzguek、 gwnzhaij、 gwnzmbwn fuengzhen ancienz onjdingh. Cienzmienh gyagiengz dajcauh yienhdaih houginz，lai roengzrengz dajcauh gozfangz gohyoz gisuz yenzgiu caeuq gauhsinh gisuz vujgi canghbei，fazcanj gozfangz gohgi gunghyez. Gyalaeg gaijgwz gozfangz caeuq ginhdui，lai rox yungh fapceih bae dajcauh gozfangz caeuq ginhdui. Gyagiengz dajcauh yendaiva vujcangh gingjcaz ligliengh. Demgiengz cienzminz gozfangz yizsiz, doicaenh gozfangz dungyenz caeuq laebndei gij ligliengh bwhlaeng. Genhciz dajcauh gozfangz caeuq cauhguh ginghci doxhuz fazcanj, coicaenh ginhminz yungzhab fazcanj haeujlaeg. Gak gaep cwngfuj aeu itloh mbouj bienq gvansim caeuq haeujcoengh gozfangz caeuq dajcauh ginhdui， giendingh mbouj bienq bae gyamaenh caeuq coicaenh ginhcwng、ginhminz doxgiet.
Gak boux daibyauj！
Raeuz yaek giendingh mbouj bienq bae gvancez diuz fuengcim “aen guekgya ndeu song cungj cidu”、“vunz Yanghgangj guenj Yanghgangj”、“vunz Aumwnz guenj Aumwnz”、gagguenj cingzdoh gig sang neix, yiemzgek eiciuq yenfaz caeuq gihbwnjfaz banhsaeh. Caenhrengz haeujcoengh Yanghgangj、Aumwnz Daegbied Hingzcwnggih hingzcwng cangjgvanh caeuq cwngfuj ciuqfap saedhengz cwngci cosih，fazcanj ginghci, gaijndei saedceij beksingq, doicaenh minzcuj，coicaenh huzndei. Gyagiengz diegndaw caeuq Yanghgangj、Aumwnz gak aen lingjyiz gyaulouz gapguh, laebdaeb fazveih Yanghgangj、Aumwnz youq ndaw guekgya gaijgwz hailangh caeuq yendaiva gensez gij cozyung daegbied de. Dou giensaenq，miz cunghyangh cwngfuj itcig mboujduenh haenqrengz haeujcoengh，mboujduenh daezswng gij gingcwngh naengzlig Yanghgangj、 Aumwnz bonjndang， Yanghgangj、 Aumwnz couh itdingh ndaej baujciz ciengzgeiz hoenghvuengh onjdingh.
Raeuz yaek genhciz gij dacwng fuengcim doiq Daizvanh gunghcoz，gyamaenh song hamq genhciz gij cwngci gihcuj “aen yawjfap doxdoengz 1992 nienz”、 fanjdoiq “Daizvanh doglaeb”，bauj hawj song hamq gvanhaeh coh aen fuengyiengq cingqdeng bae hozbingz fazcanj. Roengzrengz doicaenh song hamq doxyaeng doiqvah, doidoengh ginghci doxleih yungzhab， gyagiengz gihcwngz caeuq bouxcoz gyaulouz. Ciuqfap baujhoh gij gienzik beixnuengx Daizvanh， hawj engq lai beksingq bae faenyiengj gij cwngzgoj song hamq gvanhaeh hozbingz fazcanj. Raeuz deqmuengh gyoengq beixnuengx song hamq mboujduenh demgya roxyiuj doxsaenq， maedcaed goetyiet caencingz，rag gaenh simleix，vih saedyienh guekcoj hozbingz doengjit bae ok rengz. Dou giensaenq, song hamq gvanhaeh hozbingz fazcanj dwg aen lizsij ciuzlouz laengzdangj mbouj ndaej, nyigcienj mbouj ndaej.
Gak boux daibyauj！
Raeuz yaek laebdaeb yaengx sang mbaw geiz hozbingz fazcanj doxgap caezhingz, cingjdaej suenqveh ndawguek rogguek song aen daihbuenz， itcig mbouj bienq bae byaij diuz roen hozbingz fazcanj，itcig mbouj bienq bae ciuqhengz aen hailangh canloz doxleih caezhingz, giengiet henhoh guekgya cawjgienz ancienz fazcanj leih’ik， henhoh goengminz caeuq fazyinz guek raeuz gij gienzik habfap youq rog guek haenx，doidoengh laebhwnj gij gozci gvanhaeh yienghmoq aeu doxgap caezhingz guh haedsim haenx. Gyalaeg caeuq gak aen guekhung guh canloz doiqvah dem saedcaih gapguh，cauhlaeb gij gvaengxgyaq daihguek gvanhaeh cangqcwt onjdingh. Cienzmienh doicaenh gij vaigyauh seiqhenz，dajcauh gij minghyinh gungdungzdij seiqhenz. Gyagiengz caeuq gij guekgya cingqcaih fazcanj haenx doxgiet gapguh，henhoh gij leih’ik caezcaemh. Gaenxmaenx camgya gozci lai mbiengj hongsaeh，doidoengh gozci dijhi caeuq cizsi coh aen fuengyiengq engqgya goengcingq hableix bae fazcanj. Banh ndei geiqniemh seiqgyaiq fanj fazsihswh cancwngh caeuq Cungguek yinzminz Gang Yiz Cancwngh ndaejhingz 70 hopbi mizgven hozdung, caeuq gozci sevei doengzcaez henhoh gij cwngzgoj youq Daihngeih Baez Seiqgyaiq Dacan ndaejhingz caeuq gozci goengbingz cwngyi. Raeuz nyienh caeuq seiqgyaiq gak guek cingfwngz itheij, henhoh gij hozbingz engqgya naihnanz, cauhlaeb aen seiqgyaiq engqgya hoenghvuengh.
Gak boux daibyauj！
Seizdaih hawj aen lizsij seizgei sawj Cungguek fazcanj hwng’vuengh. Hawj raeuz gaenjmaed doxgiet youq seiqhenz aen dangj cunghyangh aeu Siz Ginbingz dungzci guh cungjsuhgi neix，yaengx sang mbaw geiz hungmbwk yiengh seveicujyi miz Cungguek daegsaek，caez sim comz rengz，hailoh cauhmoq，roengzrengz guhbaenz gij muzbyauh yinvu ginghci sevei fazcanj bineix，vih saedyienh gij buekguh muzbyauh “song aen it bak bi”、laebbaenz aen seveicujyi yendaiva guekgya fouqgiengz minzcuj vwnzmingz huzndei、saedyienh Cunghvaz Minzcuz daih fukhwng aen siengjmuengh Cungguek neix caiq gunghawj engq daih！
