Gij Gangjvah Youq Gwnz Daih Cibngeih Gaiq Daengx Guek Yinzminz Daibyauj Daihhoih Daih’it Baez Veiyi
(2013 nienz 3 nyied 17 hauh)
Siz Ginbingz
Gak boux daibyauj:
Baez daihhoih neix sienj gou dang Cunghvaz Yinzminz Gunghozgoz cujsiz， doiq gak boux daibyauj caeuq daengx guek gak cuz yinzminz saenqnyaemh gou， gou biujsiq caensim docih！
Gou gig rox, dangnyaemh guekgya cujsiz aen cizvu hungsang neix, sawjmingh miznaj, cwzyin hungnaek. Gou yaek cungsaed hengzguh aen cizcwz yenfaz gyauhawj haenx, doiq guekcoj cungcig, doiq yinzminz cungcig, guh ndei gunghcoz, hwnzngoenz vih guekgya, fugsaeh yinzminz, vih guekgya caenh rengz, gagrox ciepsouh yinzminz gamduk, itdingh aeu doiq ndaej hwnj gij saenqnyaemh caeuq daknaek gak boux daibyauj caeuq daengx guek gak cuz yinzminz.
Gak boux daibyauj!
Cunghvaz Yinzminz Gunghozgoz byaij gvaq le gij ginglig ronghlwenq. Youq aen dangj daih’it daih cunghyangh lingjdauj cizdij aeu Mauz Cwzdungh dungzci guh haedsim、 aen dangj daihngeih daih cunghyangh lingjdauj cizdij aeu Dwng siujbingz dungzci guh haedsim、 aen dangj daihsam daih cunghyangh lingjdauj cizdij aeu Gyangh Cwzminz dungzci guh haedsim、 aen dangj cunghyangh aeu Huz Ginjdauh dungzci guh cungjsuhgi haenx lingjdauj baihlaj, daengx guek gak cuz yinzminz caezsim gaprengz、 doxciep buekguh, hoenxhingz gwnz roen baenaj gak cungj gannanz yung’yiemj, aeundaej le gij cingzcik hungloet daengx seiqgyaiq cungj cimyawj haenx.
Ngoenzneix, aen yinzminz gunghozgoz raeuz cingq yungh cungj yienghsiengq manghcangq neix, sangswt daengj youq baihdoeng seiqgyaiq.
Huz Ginjdauh dungzci dang guekgya cujsiz 10 bi ndawde, yungh gij cwngci coengmingz fungfouq、 gij lingjdauj caiznaengz gig ak、 gij guhhong cingsaenz gaenxmienx, vih genhciz caeuq fazcanj yiengh seveicujyi miz Cungguek daegsaek laebhwnj le goenglauz gig hung, ndaejdaengz le daengx guek gak cuz yinzminz caensim ndiepgyaez caeuq gozci sevei caez haenh ndei. Raeuz yiengq Huz Ginjdauh dungzci, biujsiq caensim docih caeuq gingqeiq gig sang!
Gak boux daibyauj!
Cunghvaz Minzcuz miz gij vwnzmingz lizsij 5000 lai bi lienzdaemh mboujduenh, cauh’ok le gij Cunghvaz vwnzva gvangqlangh laegluemx, vih vunzloih vwnzmingz cinbu guh’ok le gij gunghawj mbouj ndaej muzmied. Ginggvaq geij cien bi ndwenngoenz daih bienqvaq, gij ndaej dawz 56 aen minzcuz、 13 ik lai vunz guek raeuz gaenjgaenj comzgiet youq itheij de, dwg gij haenqguh mbouj bingzciengz raeuz doengzcaez ginglig haenx, dwg gij ranzmbanj gyaeundei raeuz doengzcaez dajcauh haenx, dwg gij minzcuz cingsaenz raeuz doengzcaez gungganq haenx, hoeng gij ronzdoeng baihndaw de、 gij ceiq youqgaenj de, dwg gij lijsiengj saenqniemh raeuz doengzcaez soujdawz haenx.
Saedyienh aen muzbyauh buekguh cienzmienh hwnqbaenz aen biengz siujgangh、 hwnqbaenz aen seveicujyi yendaiva guekgya fouqgiengz minzcuz vwnzmingz, saedyienh aen loqsiengj Cungguek sawj Cunghvaz Minzcuz daih fukhwng, couh dwg aeu saedyienh guekgya fouqgiengz、 minzcuz saenqhwng、 yinzminz vuenyungz, gawq gig daih daejyienh le aen lijsiengj vunz Cungguek ngoenzneix, hix gig daih fanjyingj le gij conzdungj miznaj vunz banlaux raeuz mboujduenh buekguh gyaepgouz cinbu haenx.
Mienhdoiq aen seizdaih ciuzlouz hungloet baenaj foedfoed neix, mienhdoiq gij simmuengh gaenjbik yinzminz ginzcung yaek gvaq saedceij engq ndei neix, raeuz mbouj ndaej miz saek di swhmuenx, mbouj ndaej miz saekdi soengse gikgyang, bietdingh aeu laebdaeb roengzrengz、 itloh roemx baenaj, laebdaeb dawz aen seveicujyi saehnieb miz Cungguek daegsaek raeuz doi baenaj, laebdaeb vih saedyienh aen loqsiengj Cungguek sawj Cunghvaz Minzcuz daih fukhwng bae haenqrengz buekguh.
—— Saedyienh gij loqsiengj Cungguek bietdingh aeu byaij diuz roen Cungguek. Neix couh dwg diuz roen seveicujyi miz Cungguek daegsaek. Diuz roen neix ndaej daeuj mbouj yungzheih, de dwg youq gaijgwz hailangh 30 lai bi sizcen hungmbwk ndawde byaij okdaeuj, dwg youq Cunghvaz Yinzminz Gunghozgoz laebbaenz 60 lai bi lienzdaemh damqra ndawde byaij okdaeuj, dwg youq laegdaeuq cungjgez ciuhgyawj doxdaeuj 170 lai bi Cunghvaz Minzcuz fazcanj ginglig ndawde byaij okdaeuj, dwg youq ciepswnj Cunghvaz Minzcuz 5000 lai bi vwnzmingz gyaenanz ndawde byaij okdaeuj, miz lizsij goekdaeuz laegna caeuq yienhsaed giekdaej gvangqlangh. Cunghvaz Minzcuz dwg aen minzcuz gig ak cauhguh, raeuz cauh’ok le Cunghvaz vwnzmingz hungmbwk, raeuz hix ndaej laebdaeb haigvangq caeuq byaij ndei diuz roen fazcanj hab guekcingz Cungguek. Daengx guek gak cuz yinzminz itdingh aeu demgiengz gij lijlun gagsaenq、 roenloh gagsaenq、 cidu gagsaenq aen seveicujyi miz Cungguek daegsaek haenx, giendingh mbouj bienq riengz diuz roen Cungguek cingqdeng haenx haenqrengz baenaj.
—— Saedyienh gij loqsiengj Cungguek bietdingh aeu daihlig fazyangz Cungguek cingsaenz. Neix couh dwg gij minzcuz cingsaenz aeu aigozcujyi guh haedsim haenx, gij seizdaih cingsaenz aeu gaijgwz cauhmoq guh haedsim haenx. Cungj cingsaenz neix dwg gij hoenz hwng guek、 gij hoenz giengz guek ndaej gyonj sim comz rengz. Aigozcujyi itcig dwg gij cingsaenz ligliengh dawz Cunghvaz Minzcuz giengiengz doxgiet youq itheij, gaijgwz cauhmoq itcig dwg gij cingsaenz ligliengh gikcoi raeuz youq gaijgwz hailangh ndawde caeuq seizdaih caez baenaj. Daengx guek gak cuz yinzminz itdingh aeu daihlig fazyangz cungj minzcuz cingsaenz caeuq seizdaih cingsaenz hungmbwk neix, mboujduenh demgiengz diuz sai cingsaenz doxgiet itsim、 gij cingsaenz doenghlig gag ak mbouj dingz haenx, ciengzlwenx cingsaenz gvaekgvaek yamq haeuj daengzcog.
—— Saedyienh gij loqsiengj Cungguek bietdingh aeu gyonjcomz ligliengh Cungguek. Neix couh dwg gij ligliengh Cungguek gak cuz yinzminz daih doxgiet. Gij loqsiengj Cungguek dwg aen loqsiengj minzcuz, caemh dwg aen loqsiengj moix boux vunz Cungguek. Cijaeu raeuz gaenjmaed doxgiet, fanh vunz it sim, vih saedyienh gij loqsiengj doengzcaez bae buekguh, gij ligliengh saedyienh loqsiengj couh giengzdaih fouzbeij, raeuz moix boux vunz roengzrengz bae saedyienh gij loqsiengj swhgeij, couh miz diendeih gvangqlangh. Gyoengq Cungguek yinzminz swnghhoz youq aen guekcoj hungmbwk caeuq seizdaih hungmbwk raeuz, doengzcaez ndaej miz seizgei biujyienh ok gij ndei seiqvunz, doengzcaez ndaej miz seizgei loqsiengj bienqbaenz caensaed, doengzcaez ndaej miz seizgei caeuq guekcoj dem seizdaih itheij majhung、 cinbu. Miz loqsiengj, miz seizgei, miz buekguh, sojmiz doxgaiq gyaeundei cungj ndaej cauh okdaeuj. Daengx guek gak cuz yinzminz itdingh aeu geiqmaenh sawjmingh, sim coh giz ndeu siengj, rengz coh giz ndeu sawj, yungh gij dungxcaiz caeuq ligliengh 13 ik vunz, gyonjcomz baenz gij ligliengh hungloet mbouj deng gijmaz dwk baih.
Gij loqsiengj Cungguek, gangj daengz daej dwg gij loqsiengj yinzminz, bietdingh aeu gaenjgaenj baenghgauq yinzminz daeuj saedyienh, bietdingh aeu mboujduenh vih yinzminz cauhfuk.
Raeuz aeu genhciz aen dangj lingjdauj、 yinzminz danggya guhcawj、 ciuqfap guenj guek ndeindei doengjit, genhciz yinzminz cawjdaej diegvih, gyadaih yinzminz minzcuj, doicaenh ciuqfap guenj guek, genhciz caeuq laeb caezcienz hangh gaenbonj cwngci cidu yinzminz daibyauj daihhoih cidu, hangh cidu lai dangj doxgap caeuq cwngci doxyaeng youz Cunghgoz Gungcanjdangj lingjdauj、 hangh cidu dieg minzcuz gagguenj caeuq hangh cidu gihcwngz ginzcung gagguenj daengj gihbwnj cwngci cidu, gensez aen cwngfuj ak fugsaeh、 aen cwngfuj miz cwzyin、 aen cwngfuj hengz fapceih、 aen cwngfuj seuqcingh, cungfaen diuhdoengh gij cizgizsing gyoengq yinzminz.
Raeuz aeu genhciz aen canloz swhsiengj fazcanj dwg dauhleix geng, genhciz aeu ginghci gensez guh cungsim, cienzmienh doicaenh seveicujyi ginghci gensez、 cwngci gensez、 vwnzva gensez、 sevei gensez、 swnghdai vwnzmingz gensez, gyalaeg gaijgwz hailangh, doidoengh gohyoz fazcanj, mboujduenh cukmaenh gij vuzciz vwnzva giekdaej saedyienh aen loqsiengj Cungguek.
Raeuz aeu seizseiz haeujsim dingq gij hemqgouz yinzminz、 hoizwngq gij maqmuengh yinzminz, baujcwng yinzminz gij gienzleih bingzdaengj camgya、 bingzdaengj fazcanj haenx, henhoh sevei goengbingz cingqngeih, youq hag miz vunz son、 guhhong ndaej cienz、 bingh miz ngaenz yw、 laux miz vunz ciengx、 miz ranz ndaej youq fuengmienh neix, laebdaeb aeundaej cingzcik moq, mboujduenh saedyienh ndei、 henhoh ndei、 fazcanj ndei gij gaenbonj leih’ik gyoengq yinzminz ceiq lai haenx, sawj fazcanj cwngzgoj engq lai engq goengbingz dwk hawj daengxcungq yinzminz ndaej ndeicawq, youq gwnz giekdaej ginghci sevei mboujduenh fazcanj, riengz aen fuengyiengq doengzcaez fouqmiz yamqonj baenaj.
Raeuz aeu gyamaenh caeuq fazcanj aen gyaezguek doengjit cansen ceiq gvangqlangh haenx, gyagiengz Cunghgoz Gungcanjdangj caeuq minzcuj dangjbai、 fouz dangjbai yinzsw doxgiet doxgap, gyamaenh caeuq fazcanj yiengh seveicujyi minzcuz gvanhaeh bingzdaengj doxgiet doxbang huzndei haenx, sawj doengh boux cunghgyau gyaiq caeuq gyoengq ginzcung saenq cunghgyau youq ndaw coicaenh sevei ginghci fazcanj fazveih gij cozyung ndei de, ceiq daih hanhdoh comzgiet gij ligliengh ndaej comzgiet haenx.
Gak boux daibyauj!
“Ceiq hung laebbaenz daih goengcik, gaenx guh cauhbaenz daih goengnieb.” Guek raeuz vanzlij cawqyouq caemhcaiq yaek ciengzgeiz cawqyouq duenh cogaep seveicujyi, saedyienh gij loqsiengj Cungguek, cauh’ok gij saedceij engqgya gyaeundei hawj daengxcungq yinzminz, rap naek youh roen gyae, aeu raeuz moix boux vunz laebdaeb mboujduenh gaenx guh caeuq ganhoj roengzrengz.
Daengx guek guengjdaih gunghyinz、 nungzminz、 cihsiz fwnswj, aeu dawz ok coengmingz caizhag, gaenx bae guhhong, cizgiz youq ginghci sevei fazcanj ndawde fazveih cujlizginh caeuq swnghlizginh cozyung. Sojmiz guekgya gihgvanh gunghcoz yinzyenz, aeu yiemzgek iugouz swhgeij bae banh goengsaeh, ndangseuq gaemgienz caenh ndei cizcwz, gvansim yinzminz haemzhoj, vih yinzminz banh saedsaeh. Cunghgoz Yinzminz Gaijfangginh daengxcungq cijcanyenz, Cunghgoz Yinzminz Vujcangh Gingjcaz Budui daengxcungq guenbing, aeu ciuq aen muzbyauh sawj bingdoih maenhak dingq dangj cijveih、 ndaej hoenx hingz ciengq、 cozfungh maenhndei neix, daezsang gij naengzlig hengzguh sawjmingh, giengiet henhoh gij cawjgienz、 ancienz、 fazcanj leih’ik guekgya, giengiet henndei yinzminz sengmingh caizcanj ancienz. Sojmiz doengh boux guh gij ginghci mbouj dwg gunghyoujci caeuq gizyawz doengh boux sevei gaihcwngz moq, aeu fazyangz lauzdung cauhguh cingsaenz caeuq cauhnieb cingsaenz, hoizbauq sevei, cauhfuk yinzminz, guh boux gensez aen seveicujyi saehnieb miz Cungguek daegsaek habgek ndeu. Daengx guek gyoengq bouxcoz nyezrauh, aeu miz ceiqheiq hung, demlai caizhag, muzlienh eiqceiq, hawj mwhcoz youq ndaw seizdaih cinbu sanqfat ok saekrongh gyaeundei.
Gyoengq beixnuengx Yanghgangj Daegbied Hingzcwnggih、 gyoengq beixnuengx Aumwnz Daegbied Hingzcwnggih, aeu gig yawknaek gij cingjdaej leih’ik guekgya caeuq Yanghgangj、 Aumwnz, doengzcaez henhoh caeuq coicaenh Yanghgangj、 Aumwnz ciengzgeiz hwnghoengh onjdingh. Guengjdaih beixnuengx Daizvanh caeuq beixnuengx daluz aeu yien fwngz hwnjdaeuj, cihciz、 henhoh、 doidoengh song hamq gvanhaeh hozbingz fazcanj, demcaenh gij fukheiq beixnuengx song hamq, doengzcaez haicauh roenloh moq Cunghvaz Minzcuz. Guengjdaih vazgyauz beixnuengx rogguek, aeu daihlig fazyangz gij conzdungj ndei gaenx guh simsienh Cunghvaz Minzcuz, roengzrengz vih coicaenh guekcoj fazcanj、 coicaenh Cungguek yinzminz caeuq dangdieg yinzminz cingzngeih guh’ok gungyen.
Cungguek yinzminz gyaez hozbingz. Raeuz yaek yaengx sang mbaw geiz hozbingz、 fazcanj、 doxgap、 caezhingz, itcig mbouj bienq dwk byaij diuz roen hozbingz fazcanj, itcig mbouj bienq dwk ciuqhengz aen hailangh canloz doxleih caezhingz, roengzrengz bae caeuq seiqgyaiq gak guek fazcanj doxndei doxgap, hengzguh gij gozci cwzyin caeuq yivu wngdang guh, laebdaeb caeuq gak guek yinzminz itheij doicaenh aen saehnieb hungsang vunzloih hozbingz caeuq fazcanj.
Gak boux daibyauj!
Cunghgoz Gungcanjdangj dwg gij haedsim ligliengh lingjdauj caeuq comzgiet daengx guek gak cuz yinzminz hwnqguh yiengh seveicujyi saehnieb hungmbwk miz Cungguek daegsaek, rapdawz lizsij cwzyin naek, gingsouh seizdaih gaujniemh, bietdingh aeu genhciz laeb dangj vih guekgya、 gaemgienz vih beksingq, genhciz dangj aeu guenj dangj、 coengzyiemz guenj dangj, cienzmienh gyagiengz gensez aen dangj, mboujduenh daezsang gij lingjdauj suijbingz caeuq gaemgienz suijbingz aen dangj、 daezsang gij naengzlig dingj nduk fuengz bienq caeuq dingjdangj fung’yiemj. Daengxcungq gungcanjdangjyenz daegbied dwg doengh boux lingjdauj ganbu aen dangj, aeu giendingh lijsiengj saenqniemh, seizseiz dawz yinzminz cuengq youq ndawsim giz diegvih ceiq sang, daihlig fazyangz gij conzdungj miznaj caeuq cozfungh ndei aen dangj, giengiet fanjdui hingzsizcujyi、 gvanhliuzcujyi, giengiet fanjdui cungj fungheiq gangjgouz gwnz ndei youq lag、 saisaengq sajbaizciengz haenx, giengiet caeuq sojmiz siuhgiz nduknaeuh yienhsiengq guh doucwngh, ciengzlwenx baujciz gij cwngci bonjsaek vunz gungcanjdangj, laebsim mbouj bienq vih saehnieb dangj caeuq yinzminz bae buekguh.
Gak boux daibyauj!
Saedyienh muzbyauh hungmbwk aeu giendingh mboujduenh bae roengzrengz. Daengx guek gak dangjbai、 gak donzdij、 gak minzcuz、 gak gaihcwngz、 gak gyaiq yinzsw, aeu engqgya gaenjmaed dwk doxgiet youq seiqhenz Cunghgung Cunghyangh, cienzmienh gvancez lozsiz Cunghgung Cibbet Daih cingsaenz, aeu Dwng Siujbingz Lijlun、 “Sam Aen Daibyauj” Cung’yau Swhsiengj、 Gohyoz Fazcanjgvanh guh cijdauj, seizseiz giemhaw nyinhcaen、 ganhoj buekguh, seizseiz ngaemgyaeuj haenqguh、 laebsim baenaj, mboujduenh duedaeu cienzmienh hwnqbaenz aen biengz siujgangh、 gyavaiq doicaenh seveicujyi yendaiva gensez caiq ndaejhingz, mboujduenh vih vunzloih guh’ok gungyen moq engq daih!
