Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CWNGFUJ GUNGHCOZ BAUGAU

——2011 Nienz 3 Nyied 5 Hauh Youq Gwnz Hoih Daih Cib'it Gaiq Daengx Guek Yinzminz Daibyauj Daihhoih Daihseiq Baez Veiyi

Vwnh Gyahbauj
  
【Cihsaw Hung’iq : hung rauh iq】  Dajyaenq
      
  Gak boux daibyauj:

  Seizneix, gou daibyauj Gozvuyen, yiengq daihhoih guh cwngfuj gunghcoz baugau, cingj gak boux daibyauj saemjlwnh, caemhcaiq cingj daengx guek cwnghez veijyenz daezok yigen.

  1. Dauqyawj “11•5” Seizgeiz Gozminz Ginghci Caeuq Sevei Fazcanj

  “11•5” seizgeiz dwg guek raeuz fazcanj doxbae ndaw de haj bi gig mbouj bingzciengz haenx. Doiq dangqnaj gij hingzseiq fukcab caeuq baenz buek fung`yiemj diuhcan hungnaek ndaw guek rog guek, Cunghgoz Gungcanjdangj doxgiet daiqlingx daengx guek gak cuz yinzminz, cienzmienh doicaenh gaijgwz hailangh caeuq yendaiva gensez, guekgya yienghsiengq fatseng le lizsijsing bienqvaq.

  —— Haj bi neix, guek raeuz sevei swnghcanjliz、 gyoebhab gueklig daezsang gig yienhda. Raeuz mizyauq wngqdoiq gozci ginhyungz veizgih cungdongj, baujciz ginghci fazcanj bingzonj haemq vaiq, caencingq guhbaenz gij cujyau muzbyauh caeuq yinvu “11•5” gveihva, gozminz ginghci yamq hwnj mbaek moq. Ndaw guek swnghcanj cungjciz dabdaengz 39.8 fanh ik maenz, moix bi bingzyaenz demlai 11.2%, caizcwng souhaeuj daj 3.16 fanh ik maenz demgya daengz 8.31 fanh ik maenz. Do vunz mbin hwnj mbwn、 aen gunghcwngz damqcaz ronghndwen、 cauhgiz gisongih daengj gohgi lingxdaeuz saedyienh cungbyoengq gig daih. Gozfangz caeuq ginhdui yendaiva gensez ndaej daengz cingzcik gig daih.

  —— Haj bi neix, gak hangh sevei saehnieb gyavaiq fazcanj、 yinzminz saedceij gaijndei yienhda. Gyauyuz、 gohgi、 vwnzva、 veiswngh、 dijyuz saehnieb cienzmienh cinbu. Hawsingz saen demgya couhnieb 5771 fanh vunz, senjnod lauzdungliz lajmbanj 4500 fanh vunz; gyoengq gihminz hawsingz moix vunz bingzyaenz ndaej ceiboiq souhaeuj caeuq gyoengq gihminz lajmbanj moix vunz bingzyaenz cingh souhaeuj bi bingzyaenz faenbied saedsaeh demlai 9.7% caeuq 8.9%; aen sevei baujcang dijhi cwgoemq hawsingz lajmbanj haenx cugbouh laeb caezcienz.

  —— Haj bi neix, gaijgwz hailangh ndaej fazcanj baenaj gig daih. Cungdenj lingjyiz caeuq gvanhgen vanzcez gaijgwz ndaej daengz cungbyoengq moq, seveicujyi hawciengz ginghci dijci engqgya caezcienz. Bi`gvaq doiq rog mouyiz cungjngeg dabdaengz 2.97 fanh ik Meijyenz, aen suijbingz gij ginghci hailangh haenx riengjvaiq daezswng.

  —— Haj bi neix, guek raeuz gozci diegvih caeuq yingjyangjliz daezsang gig yienhda. Raeuz youq gozci swvu ndaw de, fazveih gij gensezsing cozyung youqgaenj, mizrengz henhoh guekgya cawjgienz、 ancienz caeuq fazcanj leih`ik, gak fuengmienh vaigyauh ndaej fazcanj baenaj gig daih. Raeuz banh baenz Baekging Auyinvei、 Sanghaij Sibozvei, saedyienh le aen loqsiengj bak bi Cunghvaz minzcuz.

  —— Doengh gij cingzcik ronghsag neix, cungfaen yienh`ok le gij ndei yiengh seveicujyi miz Cungguek daegsaek haenx, baij ok le gij ligliengh hungmbwk gaijgwz hailangh, gig daih demgiengz le daengx guek gak cuz yinzminz gij simleix gag saenq bonjfaenh caeuq gag roxnyinh miznaj haenx, demgiengz le gij rengzcomzgiet caeuq rengzcohsim Cunghvaz minzcuz, bietdingh yaek gikcoi raeuz youq gwnz loh lizsij moq haenqrengz baenaj.

  Haj bi daeuj, raeuz cujyau guh le gij hong baihlaj neix:

  (1) Gyagiengz caeuq gaijndei hungzgvanh diuzgung, coicaenh ginghci bingzonj haemq vaiq fazcanj. Dou yawjnaek dawzndei gij fueng`yiengq、 cungdenj caeuq ligdoh hungzgvanh diuzgung, gaemmaenh gij gienzcawjdoengh ginghci gunghcoz. “11•5” duenh seizgeiz gonq de, cimdoiq douzswh demlai daiq vaiq、 mouyiz swnhca daiq daih、 hawciengz riuzdoeng hobi lw gvaqbouh, caeuq gezgousing、 suhyuzsing huqgyaq hwnjsang doengh gij vwndiz neix, yungh gij cwngcwz cosih deng haenx, mizyauq fuengzre le gij vwndiz ngamqngamq okyienh bienqbaenz gij vwndiz miz fazcanj seiqdaeuz、 gij vwndiz mbangj giz bienqbaenz gij vwndiz daengxbuenz. Gaenh song bi daeuj, doiq dangqnaj gij gozci ginhyungz veizgih cungdongj bak bi noix raen neix, dou dinghsim wngqdoiq, gohyoz guh gezcwz, byoengqbyat saedhengz gij caizcwng cwngcwz cizgiz caeuq gij hobi cwngcwz habdoh soengdoengh haenx. Genhciz saedhengz baenz gyoengq giva, daih gveihmoz demgya cwngfuj ceiok caeuq saedhengz gezgousing gemj suiq, daih fanveiz saedhengz aen gveihva diuzcwngj gaujhoengh gij canjnieb cungdenj, daihlig doicaenh gag guhcawj cauhmoq caeuq gyagiengz gohgi daemxcengj, daih fukdoh daezsang gij suijbingz sevei baujcang. Genhciz aen canloz fuengcim gyadaih ndaw guek hawciengz sihgiuz, yungh baenz buek cwngcwz cosih bae gujli siuhfei, demgya gij souhaeuj gyoengq gihminz hawsingz lajmbanj、 daegbied dwg gyoengq ginzcung souhaeuj noix haenx, siuhfei gveihmoz lienzdaemh gyadaih, gezgou mboujduenh swnggaep. Saedhengz aen douzswh giva song bi saen demgya 4 fanh ik maenz, ndaw de, saen demgya cunghyangh douzswh 1.18 fanh ik maenz. Aen gunghcwngz youqonj miz baujcang、 aen minzswngh gunghcwngz lajmbanj caeuq sevei saehnieb douzswh ciemq 43.7%, gag guhcawj cauhmoq、 gezgou diuzcwngj、 mbaet nwngzyenz gemj baizcuengq caeuq swnghdai gensez ciemq 15.3%, hwnqguh giekdaej sezsih hungnaek ciemq 23.6%, deng caihaih le hoizfuk dauqcungz hwnq ciemq 14.8%. Cwngfuj douzswh dazyinx daiqdoengh sevei douzswh, ndaw guek sihgiuz daih fukdoh demgya, mizyauq boujdauq gij mboujcuk baihrog sihgiuz, ndaw seizgan haemq dinj de, niujcienj aen seiqdaeuz ginghci gyavaiq gyod doxroengz, youq gwnz seiqgyaiq sien saedyienh hoizswng bienq ndei, gawq dwkhingz le gij hojnanz daegbied、 mizrengz bae baujcang caeuq gaijndei le gij saedceij beksingq, youh vih gyaeraez fazcanj roengz dingh le giekdaej maenhsaed.

  (2) Mbouj cuengqsoeng saek di bae guh ndei gij hong “sam nungz”, gyamaenh caeuq gyagiengz aen giek nungzyez. Cunghyangh caizcwng cuengq haeuj “sam nungz” bae gyoebsuenq miz gaenh 3 fanh ik maenz, bi bingzyaenz demgya fukdoh mauhgvaq 23%. Cienzbouh siu bae nungzyez suiq caeuq gak cungj soufeiq, gietsat gij lizsij bouxguhnaz ndaemnaz gyau suiq lo, moix bi gemjmbaeu diuz rap bouxguhnaz mauhgvaq 1335 ik maenz. Laebhwnj aen cidu boujdiep bouxguhnaz ndaemhaeux caeuq aen gihci boizbouj gij leih`ik dieg cujyau swnghcanj haeuxgwn, gij cienz boujdiep swnghcanj hawj bouxguhnaz haenx bi`gvaq gaenq dabdaengz 1226 ik maenz. Doiq cungdenj haeuxgwn binjcungj, saedhengz aen cwngcwz hanhdingh gij soucawx gyaqcienz ceiq daemq caeuq laemzseiz soucwk haenx, mienhsan、 haeuxnaz gij soucawx gyaqcienz ceiq daemq de daezsang le 25% daengz 40%. Yiemzgek baujhoh reihnaz. Roengzrengz doicaenh nungzyez gohgi cinbu. Haeuxgwn canjliengh baez doek baez cauh’ok gwnz lizsij ceiq sang, bi`gvaq dabdaengz 54641 fanh dunh, lienzdaemh 7 bi demgya canjliengh. Bouxguhnaz moix vunz bingzyaenz cingh souhaeuj dabdaengz 5919 maenz, saedyienh lienzdaemh haemq vaiq demlai. Lajmbanj gyoebhab gaijgwz onjbouh doi baenaj, gaijgwz aen cidu gienz ndoengfaex cizdij、 gaijgwz aen guenjleix dijci gij nungzcangz guekmiz cungj cienzmienh doihai guh. Gij giekdaej sezsih nungzyez caeuq lajmbanj gyavaiq hwnqguh, guhbaenz 7356 aen suijgu hung rauh caeuq cungdenj suijgu iq cawz yiemj gyamaenh, gaijgez aen vwndiz 2.15 ik vunz lajmbanj gwn raemx ancienz, gij saedceij bouxguhnaz yied daeuj yied ndei, lajmbanj fazcanj haeuj daengz aen seizdaih moq ndeu.

  (3) Daihlig doicaenh ginghci gezgou diuzcwngj, daezsang ginghci demlai cizlieng caeuq yauqik. It dwg gyavaiq canjnieb gezgou diuzcwngj caeuq gag guhcawj cauhmoq. Cizgiz doicaenh giyez gisuz gaijcauh caeuq gyan`gyoeb dauqcungz cujhab, gunghyez daegbied dwg canghbei ceiqcauh hangznieb cungjdaej suijbingz caeuq gingcwngh naengzlig daezsang yienhda. Canlozsing saenhwng canjnieb riengjvaiq fazcanj hwnjdaeuj. Gyavaiq gensez guekgya cauhmoq dijhi, hengzguh aen gunghcwngz cihsiz cauhmoq caeuq aen gunghcwngz gisuz cauhmoq, gungroengz le buek gisuz lingxdaeuz、 haedsim gisuz caeuq canghbei gisuz youqgaenj canjnieb fazcanj gip aeu yungh ndeu, baenz daih buek gohyenz cwngzgoj ndaej cienj baenz canjnieb lo. Hangz fugsaeh riengjvaiq fazcanj, youq gij swnghcanj cungjciz ndaw guek ciemqmiz beijlwd daezsang 2.5 aen bakfaendiemj. Hwnqguh giekdaej sezsih gyavaiq yienhda, haj bi hwnq baenz dietloh sienq moq 1.6 fanh goengleix; saen demgya goengloh 63.9 fanh goengleix, ndaw de gauhsuz goengloh 3.3 fanh goengleix; saen hwnq、 gaij hwnq gya’gvangq hwnq gihcangz 33 aen; saen hwnq caeuq gyamaenh haenz fuengz raemx 1.7 fanh goengleix. Ngeih dwg netsaed doicaenh mbaet nwngzyenz gemj baizcuengq、 swnghdai gensez caeuq vanzging baujhoh. Daezok gij hengzdoengh muzbyauh caeuq cwngcwz cosih 2020 nienz guek raeuz gaemhanh baizcuengq heiq ranzraeuj haenx, ceiqdingh saedhengz aen gyoebhab gunghcoz fangh`an mbaet nwngzyenz gemj baizcuengq. Daihlig fazcanj gij nwngzyenz cinghseuq, saen demgya fatdienh canghgih yungzliengh 4.45 ik cenhvaj, ndaw de raemx fatdienh 9601 fanh cenhvaj、 hwz fatdienh 384 fanh cenhvaj, gvendingz feiz fatdienh gihcuj iq 7210 fanh cenhvaj, cawz bae buek meizdan、 gangdiet、 suijniz、 ciuhdan canjnwngz doeklaeng ndeu. Doicaenh hwnqguh linzyez cungdenj swnghdai gunghcwngz, guhbaenz cauhndoeng 2529 fanh gunghgingj. Gyoebhab ceihleix raemx namh laesaet menciz 23 fanh bingzfueng goengleix, gyagiengz fuengzceih gij raemx uqlah cungdenj liuzyiz、 fuengzceih daihheiq uqlah caeuq ceihleix gij raemxfeiq、 nyaqfeiq caeuq heiqfeiq gunghyez. Daihlig fazcanj sinzvanz ginghci. Haj bi gyoebsuenq, danhvei ndaw guek swnghcanj cungjciz nwngzyenz siuhauq roengzdaemq 19.1%, vayoz aeu yungh yangj soqliengh、 wyangjvaliuz baizcuengq soqliengh faenbied roengzdaemq 12.45%、 14.29%. Sam dwg coicaenh gihyiz ginghci doxdaengh doxhuz fazcanj. Lozsiz gihyiz fazcanj cungjdaej canloz, fatbouh saedhengz daengx guek cawjdaej gunghnwngzgih gveihva, ceiqdingh Sihbu daih haifat cib bi cijdauj yigen moq caeuq baenz buek gihyiz fazcanj gveihva, doiok gij cosih moq coicaenh Sihcang caeuq seiq aen sengj dieg vunz Cangcuz comz youq de、 Sinhgyangh daengj dieg minzcuz yathamj fazcanj haenx. Cunghbu Sihbu caeuq dieg Doengbaek fazcanj gyavaiq, ginghci demlai suzdu daengj cujyau cijbyauh mauhgvaq daengx guek bingzyaenz suijbingz; dieg Dunghbu ginghci gezgou mboujduenh bienq ndei, gag guhcawj cauhmoq caeuq gingcwngh naengzlig cugbouh daezsang; gak dieg gihbwnj goenggungh fugsaeh cugciemh suksiuj cengca, gij gihyiz fazcanj gwzgiz gak giz gag miz daegsaek de cobouh cauxbaenz.

  (4) Giendingh mbouj bienq bae gyalaeg gaijgwz hailangh, demgiengz gij rengzhoengh ginghci sevei fazcanj bonjndang gyaeuhmiz de. Aen cidu caizcwng senjnod ceihawj haenx cugbouh laeb caezcienz, yienhgaep gihbwnj caizlig baujcang gihci cobouh laebbaenz, cwnghcizsui cienjhingz cienzmienh saedhengz, cwngzbinjyouz gyaqcienz caeuq suifei gaijgwz swnhleih doi baenaj, swhyenzsui gaijgwz hainduj guh sawqdiemj, aen giyez swhbwnj ndaw guek roxnaeuz swhbwnj rog guek banh de nabsuiq cidu cienzmienh dungjyiz. Doengh aen sanghyez ngaenzhangz hung guekmiz haenx gujfwnci gaijgwz swnhleih guhbaenz, doengh aen ginhyungz gihgou miz cwngcwz bangfuz haenx gaijgwz、 lajmbanj sinyungse gaijgwz cizgiz doi baenaj; bingzonj gaijgez gij vwndiz sangsi gunghswh gujdungh miz gij gujbyau doxdoengz hoeng mbouj miz gij gienzleih doxdoengz haenx, cang`yezbanj、 gujcij gizho caeuq yungzswh yungzgen swnhleih doiok, caigen hawciengz onjbouh fazcanj; haeujlaeg doicaenh baujyiemj hangznieb guh gaijgwz hailangh; yinzminzbi veiliz cauxbaenz gihci gaijgwz miz bouhloh doi baenaj, hamj gyaiq mouyiz yinzminzbi gietsuenq sawqdiemj mboujduenh gyadaih. Gij giyez guekmiz guh gunghswhci gujfwnci gaijgwz、 gaijgwz aen dijci gamguenj swhcanj guekmiz, cungj ndaej cizgiz guh roengzbae. Youzcwng dijci gaijgwz gyavaiq guh baenaj. Ceiqdingh saedhengz baenz buek cwngcwz coicaenh giyez rauh iq fazcanj caeuq ndawbiengz douzswh, gij fazcanj vanzging yiengh ginghci mbouj dwg gunghyoujci haenx mboujduenh gaijndei, lai cungj sojyoujci ginghci doengzcaez fazcanj.

  Mboujduenh gya’gvangq gyalaeg doiq rog hailangh, cingouj cuzgouj cungjngeg moix bi bingzyaenz demlai 15.9%, gezgou mboujduenh gaijndei. Mouyiz swnhca lienzdaemh song bi roengzdaemq, 2010 nienz beij bi gonq gemjnoix 6.4%. Aen suijbingz leihyungh swhbwnj guek rog daezsang yienhda. Gij yamqdin giyez “byaij okbae” gyavaiq yienhda, gyoebsuenq doiq rog cigsoh douzswh 2200 ik Meijyenz, doiq rog cingzbau gunghcwngz caeuq lauzvu doxgap yingzyez soqngeg 3352 ik Meijyenz. Cizgiz camgya cienz seiqgyaiq ginghci ceihleix gihci gaijgwz caeuq gihyiz doxgap gihci gensez, lai mbiengj、song mbiengj ginghmou doxgap laebdaeb gyalaeg. Aen gveihmoz doiq rog bangcoh laebdaeb gyadaih. Doiq rog hailangh, rengzrwd coicaenh le ginghci fazcanj caeuq gezgou diuzcwngj, demgya le couhnieb, supsou le senhcin gisuz caeuq guenjleix gingniemh, daihdaih daezsang le gij gozci diegvih guek raeuz.

  (5) Gyavaiq fazcanj sevei saehnieb, cietsaed baujcang caeuq gaijndei gij saedceij beksingq. Itloh cungj genhciz ginghci fazcanj caeuq sevei fazcanj doxdaengh doxhuz, hopheux gaijndei gij saedceij beksingq bae maeuz fazcanj. Dawz couhnieb cuengq youq ginghci sevei fazcanj aen diegvih baiz gonq haenx. Gyagiengz cizyez beizyin caeuq couhnieb fuzvu, coicaenh gyoengq bizyezswngh gauhdwngj yozyau、 gyoengq lauzdungliz lajmbanj yaek senjnod de、 gyoengq vunz youq hawsingz couhnieb hojnanz de bae couhnieb, guh ndei gij hong sawj bouxbing doiq ok ginhdui de miz hong guh. Saedhengz aen fap lauzdung habdoengz caeuq aen fap coicaenh couhnieb, bujben daezsang gij byauhcunj gunghswh ceiq daemq, doidoengh laebhwnj gij lauzdung gvanhaeh huzndei. Gensez aen sevei baujcang dijhi cwgoemq hawsingz lajmbanj haenx ndaej cungbyoengq gij gaeuq bae fazcanj, gyoengq cizgungh hawsingz gihbwnj ciengxlaux baujyiemj saedyienh sengjgaep dungjyiz suenqveh, saedhengz gij banhfap ciengxlaux baujyiemj gvanhaeh hamj sengj senjnod ciepswnj haenx, lienzdaemh 7 bi daezsang gij suijbingz cienz gihbwnj ciengxlaux gyoengq vunz duiyouh ndaw giyez, moix bi bingzyaenz demlai 10%; gij sawqdiemj yienghmoq lajmbanj sevei ciengxlaux baujyiemj haenx cwgoemq doengh aen yienh de ciemq 24%. Cizgiz onjdangq doicaenh yihyoz veiswngh dijci gaijgwz,cienzmienh laebhwnj hawsingz gihminz gihbwnj yihliuz baujyiemj cidu、 yienghmoq lajmbanj hozcoz yihliuz cidu, sawj 12.67 ik singz mbanj gihminz ndaej ndeicawq. Ceiq daemq swnghhoz baujcang cidu saedyienh cienzbouh cwgoemq,singz mbanj sevei gouqbang dijhi gihbwnj laebbaenz, sevei fukleih、 youhfuj anhci、 swzsienh caeuq bouxndangcanz saehnieb caiq ndaej fazcanj baenaj. Daengx guek sevei baujcang gihginh cwkrom miz 7810 ik maenz, beij haj bi gonq demgya 5800 lai ik maenz. Daihlig bae hwnq gij ranzyouq miz baujcang caeuq gaijcauh dieg ranzdiengz, sawj 1100 fanh aen gunnanz gyahdingz ndaej miz ranzmoq youq lo. Raeuz aeu ciengzgeiz guh roengzbae,roengzrengz sawj daengxcungq yinzminz geq miz vunz ciengx、 bingh miz cienz yw、youq cungj miz ranz.

  Ceiqdingh caeuq saedhengz guekgya cungciengzgeiz gyauyuz gaijgwz caeuq fazcanj gveihva ganghyau. Daengx guek caizcwng gyauyuz cei ok haj bi gyoebsuenq gungh 4.45 fanh ik maenz, moix bi bingzyaenz demlai 22.4%. Cienzmienh saedhengz singz mbanj mienxfeiq yivu gyauyuz, soj miz lwgnyez nienzgeij hab hwnjhag haenx cungj naengz “mbouj yungh cienz、ndaej haeuj hag”. Youq duenh yivu gyauyuz, lauxsae cizyau gunghswh cidu cienzmienh saedhengz. Cunghdwngj cizyez gyauyuz, doiq doengh boux hagseng lajmbanj ndaw ranz ginghci gunnanz、 hawsingz ndaw ranz souhaeuj noix caeuq conhyez nangq daengz nungzyez haenx saedhengz mienxfeiq. Gyavaiq saedhengz guekgya cuyoz cidu, caizcwng dwkhaeuj daj 2006 nienz 18 ik maenz demgya daengz 2010 nienz 306 ik maenz, daj gauhdwngj yozyau gya’gvangq cwgoemq daengz cunghdwngj cizyez yozyau caeuq bujdungh gauhcungh, gungh ok cienz bangcoh hagseng 2130 fanh boux, vanzlij vih 1200 lai fanh boux yivu gyauyuz gisuzswngh daezhawj swnghhoz bangbouj. Gyavaiq gaijcauh gij ranzvaih cunghsiujyoz lajmbanj caeuq hwnqguh gij giekdaej sezsih cizyez gyauyuz. Cienzmienh daezsang gij gyauyuz cizlieng caeuq suijbingz gauhdwngj gyauyuz, demgiengz gij cauhmoq naengzlig gauhdwngj yozyau. Ceiqdingh caemhcaiq saedhengz guekgya cungciengzgeiz gohyoz caeuq gisuz fazcanj gveihva ganghyau. Cunghyangh caizcwng gohgi dwkhaeuj 6197 ik maenz, moix bi bingzyaenz demlai 22.7%,aeu ndaej le baenz buek cwngzgoj hungnaek. Haenqrengz gyagiengz gensez gij naengzlig gihcwngz yihliuz veiswngh fuzvu. Guekgya caizcwng anbaiz cienhangh swhginh, gaijcauh caeuq saen hwnq 2.3 fanh aen yanghcin veiswnghyen、 1500 aen yienh yihyen、 500 aen yienh cunghyihyen caeuq 1000 aen yienh fuyou baujgen yen, laebhwnj le 2400 aen segih veiswngh fuzvu cungsim. Ceiqdingh caemhcaiq hengzguh guekgya cungciengzgeiz yinzcaiz fazcanj gveihva ganghyau. Yinzgouj gveihva muzbyauh swnhleih saedyienh. Vwnzva dijci gaijgwz aeu ndaej cincanj youqgaenj. Goenggungh vwnzva fuzvu dijhi gensez mingzyienj gyavaiq, vwnzva canjnieb fazcanj hoenghhwd. Cezyoz sevei gohyoz caeuq sinhvwnz okbanj、 gvangjbo yingjsi、 vwnzyoz yisuz fanzyungz cinbu. Singz mbanj goenggungh dijyuz sezsih gensez gyavaiq, daengxcungq yinzminz cangqndang hozdung cugciemh fazcanj baenz cungj fungheiq hoenghhwd ndeu. Fazci gensez cienzmienh doicaenh, “5•5” bujfaz swnhleih guhbaenz. Cauhmoq caeuq gyagiengz sevei guenjleix, sevei baujciz huzndei onjdingh.

  Aen doucwngh dingjhoenx gij daegdaih deihdoengh Vwnconh daengj yiemzcungh swyenz caihaih ndaej hingz gig daih, Vwnconh deng caihaih gvaqlaeng aen yinvu aeu sam bi hoizfuk dauqcunz hwnq haenx yungh song bi couh daihdaej guhbaenz, Yisu deng deihdoengh gig haenq caeuq Couhgiz deng daegdaih raemxrongz gwnz bya nizsizliuz caihaih gvaqlaeng hoizfuk dauqcungz hwnq, ndaej miz bouhloh bae doicaenh. Ginggvaq cainanh duenhlienh caeuq gaujniemh, Cungguek yinzminz engqgya cingzsug、 gagsaenq、 giengiengz, Cunghvaz minzcuz gij cingsaenz hungmbwk dai cungj mbouj fug、 gag ak mbouj dingz haenx, bouxlawz cungj hoenx mbouj hingz.

  Haj bi daeuj, raeuz mboujduenh gyalaeg guh hingzcwng guenjleix dijci gaijgwz, gyavaiq cienjbienq cwngfuj ciznwngz, cienzmienh guhbaenz le lwnz moq cwngfuj gihgou gaijgwz ndeu, haeujlaeg doicaenh ciuqfap hingzcwng, gensez fazci cwngfuj caeuq fuzvuhingz cwngfuj, doicaenh cwng’vu goenghai, gyagiengz hingzcwng gyaepdawz cwzyin, genhciz mbouj cuengqsoeng bae guh fanj nduknaeuh doucwngh, cwngfuj bonjfaenh gensez ndaej cizgiz guh baenaj.

  Haj bi gvaqbae neix,raeuz baez yamq baez yamq byaij gvaqdaeuj, Cungguek yinzminz miz leixyouz vih neix roxnyinh miznaj! Gij cingzcik haj bi neix aeu ndaej mbouj yungzheih. Neix dwg baengh miz aen Dangjcunghyangh aeu Huz Ginjdauh dungzci guh cungjsuhgi haenx doengjlamx daengxbuenz、 cingqdeng lingjdauj cij aeu ndaej, dwg daengx dangj daengx guek gak cuz yinzminz doengzcaez haenqrengz guh cij aeu ndaej. Youq gizneix, gou daibyauj Gozvuyen, yiengq daengx guek gak cuz yinzminz, yiengq gak minzcuj dangjbai、 gak yinzminz donzdij caeuq gak gyaiq yinzsw, byaujsi caensim docih! Yiengq gyoengq beixnuengx Yanghgangj Daegbied Hingzcwnggih、 gyoengq beixnuengx Aumwnz Daegbied Hingzcwnggih、 gyoengq beixnuengx Daizvanh caeuq gyoengq beixnuengx youq rog guek, byaujsi caensim docih! Yiengq gak guek cwngfuj、 gozci cujciz、 gak guek baengzyoux gvansim caeuq cihciz Cungguek yendaiva gensez haenx, byaujsi caensim docih!

  Raeuz cingsingj rox daengz, guek raeuz youq mwh fazcanj gij vwndiz mbouj bingzyaenx、 mbouj hezdiuz、 mbouj ndaej lienzdaemh haenx vanzlij doedyienh. Cujyau dwg: Gij swhyenz vanzging hanhhaed ginghci demlai haenx bienq haenq, douzswh caeuq siufeiq gvanhaeh mbouj doxdaengh, souhaeuj faenboiq cengca haemq daih, gohgi cauhmoq naengzlig mbouj ak, canjnieb gezgou mbouj hableix, nungzyez giekdaej vanzlij buegnyieg, singz mbanj gihyiz fazcanj mbouj doxdaengh doxhuz, couhnieb cungjliengh atlig caeuq gezgousing mauzdun caez youq, gij gazgiengh hanhhaed gohyoz fazcanj youz dijci gihci cauxbaenz haenx vanzlij haemq lai;fugsaeh hangznieb cwnghgyahciz caeuq couhnieb bijcung、 yenzgiu caeuq sawqniemh fazcanj ginghfei ceiok ciemq ndaw guek swnghcanj cungjciz bijcung, mbouj ndaej guhbaenz “11•5” gveihva muzbyauh. Di vwndiz vunzlai fanjyingj haenqrem haenx caengz ndaej daj goekgaen bae gaijgez,cujyau dwg:gij gyauyuz、 yihliuz swhyenz cizlieng ndei haenx, cungjliengh mbouj gaeuq、 faenbouh mbouj yinz; huqgyaq swnghwnj atlig gyadaih,mbangj hawsingz ranzyouq gyaqcienz swnghwnj fukdoh sang gvaqbouh; gij sevei mauzdun youz famhfap cwngdieg cek ranz buen ranz daengj yinxfat haenx dem lai; sizbinj ancienz vwndiz haemq youqgaenj, mbangj lingjyiz nduknaeuh yienhsiengq yiemzcungh. Raeuz itdingh aeu yungh gij cingsaenz doiq guekgya caeuq yinzminz gig fucwz haenx, doenggvaq sinhoj saeqnaeh gunghcoz caeuq genhciz mbouj cuengqsoeng roengzrengz guh, gyavaiq gaijgez doengh gij vwndiz neix, hawj yinzminz muenxeiq!

  Dauqyawj gij cwngfuj gunghcoz “11•5” seizgeiz, raeuz caenh’itbouh gyalaeg le geij fuengmienh yinsiz caeuq dijvei laj neix.

  It dwg bietdingh aeu genhciz gohyoz fazcanj. Raeuz hoenxhingz gak cungj diuhcan yiemzhaenq, dwg baengh fazcanj; gak lingjyiz aeu ndaej sojmiz cingzcik caeuq cinbu, dwg baengh fazcanj; gaijgez gij gunnanz caeuq vwndiz gwnz roen baenaj, vanzlij aeu baengh fazcanj. Guek raeuz vanzlij cawqyouq caemhcaiq yaek ciengzgeiz cawqyouq duenh cogaep seveicujyi, bietdingh aeu genhciz yungh ginghci gensez guh cungsim, genhciz gohyoz fazcanj. Aeu vunz guh goek, dawz baujcang caeuq gaijndei gij saedceij beksingq guh giz hwnj din caeuq giz dingz din soj miz gunghcoz, giendingh mbouj bienq byaij diuz roen doengzcaez fouqmiz, sawj fazcanj cingzgoj ndaej ikleih daengxcungq yinzminz; genhciz dungjcouz giem goq, coicaenh singz mbanj、 gihyiz、 ginghci sevei doxdaengh doxhuz fazcanj; gyavaiq cienjbienq ginghci fazcanj fuengsik, daihlig doicaenh gag guhcawj cauhmoq, mbaetyungh swhyenz caeuq baujhoh vanzging, sawj ginghci sevei fazcanj caeuq yinzgouj swhyenz vanzging doxdaengh doxhuz, gyalai guh daengz cienzmienh、 hezdiuz caeuq ndaej lienzdaemh bae fazcanj.

  Ngeih dwg bietdingh aeu genhciz cwngfuj diuzgung caeuq hawciengz gihci ndeindei dungjyiz. Gij hawciengz gihci caezcienz haenx, gij hungzgvanh diuzgung mizyauq haenx, cungj dwg seveicujyi hawciengz ginghci dijci aen gapbaenz bouhfaenh youqgaenj noix mbouj ndaej. Hawciengz cozyung lai di roxnaeuz cwngfuj cozyung lai di, bietdingh aeu cazyawj gihvei bae genj dingh. Youq mwh wngqdoiq gozci ginhyungz veizgih cunggik, raeuz gyagiengz caeuq gaijndei hungzgvanh diuzgung, gibseiz niujcingq gij hawciengz mbouj cingqciengz, boujdauq gij mboujcuk hawciengz saetlingz, fuengzre ginghci daih hwnq daih roengz, gij hengzguh gaenq cwngmingz cungj deng caez. Raeuz bietdingh aeu mbouj duenh laebndei seveicuyi hawciengz ginghci dijci, cungfaen fazveih hawciengz youq swhyenz boiqdap ndaw de miz gij gihcujsing cozyung haenx, gikfat gij rengzhoengh ginghci bonjndang gyaeuhmiz haenx, doengzseiz, gohyoz bae yungh hungzgvanh diuzgung soujduenh, coicaenh ginghci ciengzgeiz bingzonj haemq vaiq fazcanj.

  Sam dwg bietdingh aeu genhciz dungjcouz ndaw guek caeuq seiqgyaiq song aen daihbuenz. Youq ginghci cenzgiuzva haeujlaeg fazcanj caeuq doiq rog hailangh mboujduenh gyalaeg gij diuzgen neix, ginghci guek raeuz caeuq seiqgyaiq ginghci lienzhaeh ngoenz beij ngoenz gaenjmaed, dox doidoengh caeuq dox ingbaengh mboujduenh gyagiengz. Bietdingh aeu yawj daengz cienz seiqgyaiq, gyagiengz canloz swhveiz, gig rox daj seiqgyaiq hingzsi fazcanj bienqvaq ndaw de cungfaen gaemdawz fazcanj gihyi, onjdangq wngqdoiq fung’yiemj diuhcan, leihyungh ndei ndaw guek seiqgyaiq song aen hawciengz、 song cungj swhyenz, dungjcouz cawqleix ndei gij gvanhaeh ndaw guek fazcanj caeuq doiq rog hailangh, caencingq guh daengz ndaw rog giemgoq、 doxdaengh fazcanj.

  Seiq dwg bietdingh aeu genhciz dawz gaijgwz hailangh dangguh gij gaenbonj doenghlig ndaej sawj ginghci sevei fazcanj. Gaijgwz hailangh dwg diuz loh saedyienh guekgya giengzhoengh、 yinzminz vuenyungz bietdingh aeu byaij haenx, bietdingh aeu ronzdoeng daengx aen gocwngz seveicujyi yendaiva gensez. Raeuz aeu yungh gij gietsim caeuq damjliengh engq daih bae doicaenh gaijgwz, sawj gaijgwz gezcwz lai hab gohyoz, sawj gaijgwz cosih lai doxdaengh doxhuz, cienzmienh doicaenh ginghci、 cwngci、 vwnzva、 sevei daengj gak fuengmienh gaijgwz cauhmoq, daj goekgaen bae buqcawz dijci gihci gazngaih, ceiq daih hanhdoh gaijfang caeuq fazcanj swnghcanjliz, coicaenh sevei goengbingz cwng`yi,aeu genhciz dawz gaijndei gij saedceij yinzminz dangguh cingqdeng cawqleix gaijgwz fazcanj onjdingh gvanhaeh giz giethab de,dawz gij ligdoh gaijgwz、 gij suzdu fazcanj caeuq gij cingzdoh sevei souh ndaej haenx dungjyiz hwnjdaeuj,aeu gaijgwz coicaenh huzndei onjdingh, saedbauj yinzminz youq onj maij hong、 sevei anningz miz bouhloh、 guekgya ciengzgeiz bingzan.

  2. Gij Cujyau Muzbyauh Caeuq Yinvu “12•5” Seizgeiz

  Gaengawq 《Cunghgung Cunghyangh Gij Genyi Gvendaengz Ceiqdingh Gozminz Ginghci Caeuq Sevei Fazcanj Daih Cibngeih Aen Haj Bi Gveihva Haenx》, dou bienceiq le 《Gozminz Ginghci Caeuq Sevei Fazcanj Daih Cibngeih Aen Haj Bi Gveihva Ganghyau (Caujan)》, daezgyau daihhoih saemjlwnh.

  “12•5” dwg aen seizgeiz youqgaenj cienzmienh gensez siujgangh sevei, dwg aen seizgeiz ceiq hojnanz gyalaeg gaijgwz hailangh、 gyavaiq cienjbienq ginghci fazcanj fuengsik. Daj gwnz seiqgyaiq daeuj yawj, seiqgyaiq bienqbaenz miz lai aen cungsim、 ginghci cenzgiuzva haeujlaeg fazcanj, hozbingz、 fazcanj、 doxgap lij dwg seizdaih cauzliuz. Gozci ginhyungz veizgih yingjyangj laeggyae, seiqgyaiq ginghci gezgou gyavaiq diuzcwngj, cienz seiqgyaiq ginghci ceihleix gihci bengwz laegdaeuq, gohgi cauhmoq caeuq canjnieb cienjhingz cingq suenqveh guh cungbyoengq, gij guekgya cingqcaih fazcanj daegbied dwg gij guekgya saenhwng hawciengz haenx cingjdaej saedlig gaenq byaij haeuj duenh seizgeiz swnghwnj. Daj ndaw guek daeuj yawj, guek raeuz fazcanj gij diuzgen miz leih caeuq gij byaijyiengq ciengzgeiz coh ndei haenx mbouj gaijbienq, gunghyezva、 sinsizva、 cwngzcinva、 hawciengzvaq、 gozciva haeujlaeg fazcanj, gij rengzndumj hawciengz sihgiuz hungloet, swhginh gunghawj cukgaeuq, gohgi caeuq gyauyuz suijbingz cingjdaej daezswng, gij suciz lauzdungliz ndaej daezsang, giekdaej sezsih ngoenz beij ngoenz ndei, cwngfuj gij naengzlig guh hungzgvanh diuzgung caeuq wngqdoiq diuhcan hungnaek haenx ndaej demgiengz mingzyienj, sevei dagiz baujciz onjdingh. Gyoebhab buenqdingh gij hingzsi ndaw guek rog guek, guek raeuz fazcanj vanzlij cawqyouq mwh canloz seizgei youqgaenj ndaej daih guh saehcingz de.

  Raeuz aeu yaengx sang mbaw geiz hungmbwk yiengh seveicujyi miz Cungguek daegsaek, yungh Dwng Siujbingz Lijlun caeuq “Sam Aen Daibyauj” Cung’yau Swhsiengj guh cijdauj, haeujlaeg gvancez lozsiz gohyoz fazcanjgvanh, hab’wngq ndaw guek rog guek hingzsi gij bienqvaq moq de, swnh’wngq

  gak cuz yinzminz gij maqmuengh moq gvaq saedceij engq ndei de, yungh gohyoz fazcanjgvanh guh cawjdaez, yungh gyavaiq cienjbienq ginghci fazcanj fuengsik guh cawjsienq, gyalaeg gaijgwz hailangh, baujcang caeuq gaijndei gij saedceij beksingq, gyamaenh caeuq gyadaih gij cwngzgoj wngqdoiq gozci ginhyungz veizgih cunggik aeu ndaej haenx, coicaenh ginghci ciengzgeiz bingzonj haemq vaiq fazcanj caeuq sevei huzndei onjdingh, vih cienzmienh gensez siujgangh sevei roengz aen giekdaej miz gietdingh yiyi de.

  —— Raeuz aeu doidoengh ginghci fazcanj caiq hwnj mbaek moq. Baezlaeng haj bi, gij ginghci demlai yawhgeiz muzbyauh guek raeuz dwg youq gwnz giekdaej mingzyienj daezsang cizlieng caeuq yauqik neix, moix bi bingzyaenz demlai 7%. Ciuq 2010 nienz gyagwz daeuj suenq, 2015 nienz ndaw guek swnghcanj cungjciz yaek mauhgvaq 55 fanh ik maenz. Aeu laebdaeb gyagiengz caeuq gaijndei hungzgvanh diuzgung, baujciz gyagwz cungjdaej suijbingz gihbwnj onjdingh, dawz gij diuzgung cwngcwz seizgeiz dinj caeuq gij fazcanj cwngcwz ciengzgeiz haenx giethab hwnjdaeuj, genhciz saedhengz aen canloz gyadaih ndaw guek sihgiuz, cungfaen vat ok gij rengzndumj hungloet baihndaw sihgiuz guek raeuz, gyavaiq cauxbaenz aen gizmen moq siuhfei、 douzswh、 cuzgouj hezdiuz ragdoengh ginghci demlai.

  —— Raeuz aeu gyavaiq cienjbienq ginghci fazcanj fuengsik caeuq diuzcwngj ginghci gezgou. Genhciz byaij diuz roen gunghyezva yiengh moq miz Cungguek daegsaek, doidoengh sinsizva caeuq gunghyezva gyalaeg yungzhab, gaijcauh daezswng ceiqcauh hangznieb, gungganq fazcanj canlozsing saenhwng canjnieb, gyavaiq fazcanj fugsaeh hangznieb, fugsaeh hangznieb cwnghgyahciz youq ndaw guek swnghcanj cungjciz bijcung daezsang 4 aen bakfaendiemj. Cizgiz onjdangq doicaenh cwngzcinva, cwngzcinva beijlwd daj 47.5% daezsang daengz 51.5%, laebndei cwngzsiva baijbouh caeuq yienghceij,mboujduenh daezswng gij cizlieng caeuq suijbingz cwngzcinva. Laebdaeb gyagiengz gensez giekdaej sezsih, caenh’itbouh cuknet aen giekdaej ginghci sevei fazcanj. Daihlig fazcanj yienhdaih nungzyez, gyavaiq gensez seveicujyi lajmbanj moq. Haeujlaeg saedhengz gihyiz fazcanj cungjdaej canloz caeuq cawjdaej gunghnwngzgih canloz, cugbouh saedyienh gihbwnj goenggungh fuzvu ndaej bingzyaenz. Coicaenh singz mbanj、 gihyiz ndaej dox doidoengh ndei, it ngeih sam canjnieb doxdaengh doxhuz fazcanj.

  —— Raeuz aeu haenqrengz fazcanj sevei saehnieb. Genhciz sien fazcanj gyauyuz gonq, onjbouh daezswng gij souh gyauyuz cingzdoh daengxcungq yinzminz. Genhciz aen fuengcim gag guhcawj cauhmoq、 cungdenj yathamj、 cengjdingj fazcanj、 dazyinx daengzcog haenx, laeb caezcienz gohgi cauhmoq dijhi caeuq gij cwngcwz cihciz, roengzrengz doicaenh gij gohyoz gisuz hungnaek aeu ndaej cungbyoengq. Gij cienz yungh youq yenzgiu caeuq sawqniemh fazcanj haenx ciemq ndaw guek swnghcanj cungjciz bijcung dabdaengz 2.2%, coicaenh gohgi cwngzgoj engq ndei cienjvaq baenz swnghcanjliz. Hab’wngq yendaiva gensez aeu yungh, gyagiengz gungganq yinzcaiz, roengzrengz ganqok aen yinzcaiz duivuj suciz sang youh gveihmoz hungloet haenx. Roengzrengz gyagiengz vwnzva gensez, doidoengh vwnzva gaijgwz fazcanj saedyienh yathamj moq, sawj yinzminz ginzcung doengh cungj ngah aeu cingzsaenz vwnzva mboujduenh gyalai neix ndaej muenxcuk. Roengzrengz fazcanj dijyuz saehnieb. Caenh’itbouh gyalaeg yihyoz veiswngh dijci gaijgwz, laebcaez gihbwnj yihliuz veiswngh cidu, gyavaiq saedyienh gij muzbyauh bouxboux yiengjmiz gihbwnj yihliuz veiswngh fuzvu. Cauhmoq gij dijci gihci guenjleix sevei, gyagiengz gensez gij faplwd、 dijci、 naengzlig guenjleix sevei haenx, saedbauj sevei gawq gig miz rengzhoengh youh huzndei onjdingh.

  —— Raeuz aeu netsaed doicaenh mbaetyungh swhyenz caeuq baujhoh vanzging. Cizgiz wngqdoiq dienheiq bienqvaq. Gyagiengz mbaetyungh caeuq guenjleix swhyenz, daezsang gij naengzlig baujhoh swhyenz, lai roengzrengz baujhoh reihnaz caeuq vanzging, gyagiengz gensez swnghdai caeuq gensez fuengz cai gemj cai dijhi, cienzmienh gyaak gij naengzlig ndaej lienzdaemh fazcanj. Gij nwngzyenz mbouj dwg vasiz haenx, ciemq gij nwngzyenz baez ndeu siufeiq haenx bijcung daezsang daengz 11.4%, danhvei ndaw guek swnghcanj cungjciz siuhauq nwngzyenz caeuq wyangjvadan baizcuengq faenbied doekdaemq 16% caeuq 17%, gij doxgaiq uqlah ceiq youqgaenj haenx baizcuengq cungjliengh gemjnoix 8% daengz 10%, ndoengfaex cwkcomz soqliengh demgya 6 ik lizfanghmij, ndoengfaex cwgoemq bijliz dabdaengz 21.66%. Cietsaed gyagiengz gensez suijli giekdaej sezsih, doicaenh ceihleix gij dahnga youqgaenj dah hung、 huz caeuq dah rauh dah iq, mingzyienj daezsang gij suijbingz dwk raemx coq naz、 mizyauq leihyungh raemx swhyenz caeuq gij naengzlig fuengz raemxrongz.

  —— Raeuz aeu cienzmienh gaijndei gij saedceij yinzminz. Genhciz dawz demlai couhnieb dangguh ginghci sevei fazcanj aen muzbyauh ciemqgonq de, vih daengxcungq bouxguhhong cauh ok gij gihvei couhnieb goengbingz, hawsingz haj bi saen demgya couhnieb 4500 fanh vunz. Genhciz caeuq laeb caezcienz aen faenboiq cidu ciuq lauzdung faenboiq guh cawjdaej、 lai yiengh faenboiq fuengsik doengzseiz mizyouq haenx, roengzrengz saedyienh gihminz souhaeuj demlai caeuq ginghci fazcanj doengzbouh、 gyalai cienzhong caeuq lauzdung swnghcanj beijlwd daezsang doengzbouh, youq ndaw gozminz souhaeuj faenboiq cugbouh daezsang gij bijcung gihminz souhaeuj, youq ndaw codaeuz faenboiq daezsang gij bijcung cienzhong, gyavaiq guhbaenz aen gwzgiz souhaeuj faenboiq hableix haenx. Gyoengq gihminz hawsingz moix boux bingzyaenz ndaej ceiboiq souhaeuj caeuq gyoengq gihminz lajmbanj moix boux bingzyaenz cingh souhaeuj, bi bingzyaenz saedsaeh demlai mauhgvaq 7%. Daezsang banggungz byauhcunj, gemjnoix gij vunz gungzhoj. Gyavaiq laeb caezcienz sevei baujcang cidu, caenh’itbouh daezsang baujcang suijbingz. Singz mbanj gihbwnj ciengxlaux、 gihbwnj yihliuz baujcang cidu gizgiz cungj saedhengz, daezsang caiqlij onjdingh gij beijlwd singz mbanj camgya sam hangh gihbwnj yihliuz baujyiemj haenx, gij yihbauj gihginh ndaw cwngcwz fanveiz haenx ceihawj suijbingz daezdaengz 70% doxhwnj, daengx guek hawsingz gij baujcangsing ranzyouq haenx ciemq 20% baedauq. Genhciz aen gihbwnj gozcwz giva senglwg, cugbouh laeb caezcienz cwngcwz, coicaenh yinzgouj ciengzgeiz bingzyaenx fazcanj, bouxvunz yawhgeiz souhmingh daezsang 1 bi, dabdaengz 74.5 bi.

  —— Raeuz aeu cienzmienh gyalaeg gaijgwz hailangh. Engqgya yawjnaek gaijgwz caengzdingj sezgi caeuq daengxbuenz gveihva, roengzrengz doicaenh ginghci dijci gaijgwz, cizgiz onjdangq bae doicaenh cwngci dijci gaijgwz, gyavaiq doicaenh vwnzva dijci、 sevei dijci gaijgwz, mboujduenh laeb caezcienz seveicujyi hawciengz ginghci dijci, gyadaih seveicujyi minzcuj, laeb caezcienz seveicujyi fazci, sawj sangcwngz gencuz engqgya hab’wngq ginghci gihcuj fazcanj bienqvaq, vih gohyoz fazcanj daezhawj baujcang engq daeklig. Genhciz caeuq laeb caezcienz gihbwnj ginghci cidu, cauh ok aen dijci vanzging sawj gak cungj sojyoujci ginghci ciuq faplwd bingzdaengj sawjyungh swnghcanj yausu、goengbingz camgya hawciengz gingcwngh、 doengzdaengj ndaej daengz faplwd baujhoh haenx. Gyavaiq caizsui ginhyungz dijci gaijgwz, cizgiz cauhlaeb aen caizsui dijci doiq cienjbienq ginghci fazcanj fuengsik miz leih haenx, cauhlaeb aen ginhyungz dijhi cujciz miz lai yiengh、 fuzvu yauliz sang、 gamguenj siujsim dohdaengz、fung’yiemj ndaej gaemhanh haenx. Gyalaeg gaijgwz gij gyagwz swhyenzsing canjbinj caeuq vanzbauj soufeiq, laebhwnj laebcaez aen gihci cauxbaenz gij swhyenzsing canjbinj gyagwz ndaej lingzvued fanjyingj hawciengz gung gouz gvanhaeh、swhyenz giepnoix cingzdoh caeuq vanzging sonjhaih cingzbonj haenx. Saedhengz aen hailangh canloz engqgya cizgiz cawjdoengh, ganqok gij youhsi moq bae caeuq gak guek doxgap doxdax, caenh’itbouh cauxbaenz aen hailangh gwzgiz moq doxleih caezhingz haenx.

  —— Raeuz aeu mboujduenh gyagiengz cwngfuj bonjndang gaijgwz gensez. Sojmiz gij gienzlig cwngfuj cungj dwg yinzminz gyauhawj, bietdingh aeu doiq yinzminz fucwz, vih yinzminz maeuz leih’ik, ciepsouh yinzminz gamduk; bietdingh aeu ceiq gvangqlangh bae dung’yenz caeuq cujciz yinzminz ciuqfap guenjleix guekgya dem sevei hongsaeh, guenjleix ginghci caeuq vwnzva saehnieb; bietdingh aeu genhciz aen gihbwnj fanghloz ciuqfap guenjleix guekgya, gyagiengz gensez gij fazci henhoh cungqvunz leih’ik haenx, doicaenh ciuq fap hingzcwng; bietdingh aeu saedhengz gohyoz、 minzcuj guh gezcwz; laebhwnj laebcaez aen yinhhengz gihci sawj gezcwz、 caephengz、 gamduk gawq dox hanhhaed youh dox hezdiuz haenx, saedbauj gienzlig yungh ndaej deng; bietdingh aeu coengz cidu fuengmienh gaijbienq gij yienghceij gienzlig gyonjcomz gvaqbouh youh mbouj ndaej daengz hanhhaed haenx, genhgez ceihfad caeuq fuengzre nduknaeuh; bietdingh aeu baujcang gij minzcuj gienzlig caeuq habfap gienzik yinzminz, henhoh sevei goengbingz cwng`yi.

  Gyonj daeuj gangj, ginggvaq baihnaj haj bi roengzrengz, saedyienh “12•5” giva gak hangh muzbyauh, gij gyoebhab gueklig guek raeuz couh yaek ndaej daezswng engq daih, gij saedceij yinzminz couh yaek ndaej gaijndei engq daih, gij yienghsiengq guekgya couh yaek miz bienqvaq engq daih.

  3. Gij Hong 2011 Nienz

  2011 nienz, dwg bi haibuenz “12•5” gveihva, guh ndei gij hong bineix, doiq guhbaenz “12•5” gak hangh muzbyauh yinvu youqgaenj raixcaix. Bi ngamq gvaqbae neix, raeuz gak hangh hong cungj aeu ndaej cingzcik gig daih. Ndaw guek swnghcanj cungjciz demlai 10.3%, gihminz siuhfei gyagwz swnghwnj fukdoh gaemhanh youq 3.3%, hawsingz saen demgya couhnieb 1168 fanh vunz, gozci soucei canggvang miz di gaijndei. Neix vih guh ndei gij hong bineix roengz le aen giekdaej ndei.

  Bineix, guek raeuz fazcanj roebdaengz hingzsi vanzlij gig fukcab. Seiqgyaiq ginghci yaek laebdaeb menhmenh hoizfuk, hoeng aen giekdaej hoizfuk mbouj maenh. Doengh aen ginghcidij fatdad de ginghci demgya mbouj miz rengz, saetnieb bijliz lij sang nanz gyangqdaemq, mbangj guekgya cawjgienz caivu veizgih huxndumj lij caengz siucawz, doengh aen ginghcidij fatdad cujyau de caenh`itbouh doihengz gij hobi cwngcwz soeng`yungz haenx, daengx seiqgyaiq cienzngaenz riuzdoengh daihliengh demgya, gozci gij gyaqcienz daihbuek sanghbinj caeuq gij veiliz cujyau hobi hwnjroengz gyahaenq, gij swhcanj fugfauz saenhwng hawciengz caeuq ngaenz cienh huq bengz atlig gyadaih, baujhucujyi laebdaeb gyahaenq, gozci hawciengz gingcwngh engqgya haenqrem, gij yinhsu mbouj onjdingh mbouj doekdingh de vanzlij haemq lai. Guek raeuz ginghci yinhhengz ndaw de, mbangj vwndiz ciengzgeiz mizyouq caeuq mbangj vwndiz geizdinj mizyouq haenx doxsan doxgyaux, gij mauzdun dijci cauhbaenz caeuq gij vwndiz gezgou cauhbaenz haenx doxdab giz ndeu, sawj hungzgvanh diuzgung engq nanz guh lo. Raeuz aeu cinjdeng bae duenqdingh hingzsi, baujciz aen uk cingsingj, lai roxnyinh youheiq, guhndei cunjbei wngqdoiq fung`yiemj.

  Bineix gozminz ginghci caeuq sevei fazcanj gij cujyau yawhgeiz muzbyauh de dwg: Ndaw guek swnghcanj cungjciz demlai 8% baedauq; ginghci gezgou caenh`itbouh gaijndei; gihminz siuhfei gyagwz cungjdaej suijbingz hwnjsang gaemhanh youq 4% baedauq; hawsingz saen demgya couhnieb 900 fanh vunz doxhwnj, hawsingz daenggeiq saetnieb beijlwd gaemhanh youq 4.6% dauqndaw; gozci soucei canggvang laebdaeb gaijndei. Daengxbuenz ngeixnaemj dwg, vih cienjbienq ginghci fazcanj fuengsik cauh ok vanzging ndei, dazyinx gak fuengmienh dawz gunghcoz cungdenj cuengq youq gyavaiq ginghci gezgou diuzcwngj、 daezsang fazcanj cizlieng caeuq yauqik fuengmienh, cuengq youq demgya couhnieb、 gaijndei gij saedceij yinzminz、 coicaenh sevei huzndei fuengmienh.

  Saedyienh aen muzbyauh gwnzneix, aeu baujciz hungzgvanh ginghci cwngcwz ndaej lienzdaemh、 ndaej onjdingh, sawj de lai miz cimdoiq、 lai lingzvued、 lai mizyauq, cawqleix ndei gij gvanhaeh baujciz ginghci bingzonj haemq vaiq fazcanj、 diuzcwngj ginghci gezgou、 guenjleix yawhgeiz ngaenz cienh huq bengz, engqgya yawjnaek onjdingh huqgyaq cungjdaej suijbingz, fuengzre ginghci miz fwt hwnj fwt roengz.

  Laebdaeb saedhengz cizgiz caizcwng cwngcwz. Baujciz gij caizcwng cihhoengz caeuq gozcai gveihmoz habdangq. Bineix dajsuenq anbaiz caizcwng cihhoengz 9000 ik maenz, ndaw de cunghyangh caizcwng cihhoengz 7000 ik maenz, laebdaeb dingjlawh deihfueng fathengz caigen 2000 ik maenz caemhcaiq nabhaeuj deihfueng yawhsuenq, cihhoengz gveihmoz beij bi gonq yawhsuenq gemjnoix 1500 ik maenz, cihhoengz beijlwd doekdaengz 2% baedauq. Aeu haenqrengz gaijndei caizcwng ceiok gezgou, doiq “sam nungz”、 dieg mbouj fatdad、 gij saedceij yinzminz、 sevei saehnieb、 gezgou diuzcwngj、 gohgi cauhmoq daengj cungdenj ceiok aeu demgya; atsuk gij ceiok bingzciengz, yiemzgek gaemhanh dangjcwng gihgvanh hwnq laeuzbanhgoeng daengj louz dangz gvanj soj, gij cienz ok guek (gyaiq)、 cienz cawx ci dem yinhhengz、 cienz goengsaeh ciepdaih daengj ceiok cungjdaej daeuj gangj mbouj demgya, cietsaed gemjnoix hingzcwng cingzbonj. Laebdaeb saedhengz gezgousing gemj suiq. Ciuqfap gyagiengz sou guenj cienz suiq. Doiq gij caiq deihfueng cwngfuj guh cienzmienh saemjgeiq, saedhengz cienzmienh gamduk guenjleix, yenzgiu laebhwnj aen gihci deihfueng cwngfuj ciq caiq yungzswh hab gveihfan de.

  Saedhengz gij hobi cwngcwz onjdangq. Baujciz aen sevei yungzswh gveihmoz hableix, gvangjyi hobi demlai muzbyauh dwg 16%. Laebcaez aen cwngcwz gvaengxgyaq dwg hungzgvanh dohdaengz siujsim ndeu, gyoebhab yinhyungh gyagwz caeuq soqliengh gunghgi, sawj hobi cwngcwz hengz ndaej engqgya mizyauq. Daezsang gij bijcung cigsoh yungzswh, fazveih ndei gij cozyung gujbyau、 caigen、 canjnieb gihginh daengj yungzswh gunghgi, engq ndei bae muenxcuk gij sihgiuz douzswh yungzswh lai cungj lai yiengh haenx. Haenqrengz gaijndei sindai gezgou, dazyinx sanghyez yinzhangz gyadaih doiq cungdenj lingjyiz caeuq vanzcez buegnyieg guh sindai cihciz, yiemzgek gaemhanh daigvanj hawj gij hangznieb hauq nwngzyenz lai、 uqlah lai caeuq gij hangznieb canjnwngz lw gvaqbouh haenx. Caenh`itbouh laeb caezcienz aen gihci yinzminzbi veiliz cauxbaenz neix. Yiemzmaed gamduk gaemhanh gij swhbwnj hamj gyaiq haeujok haenx, fuengzre “yezcenz” roemx haeujdaeuj. Doiq gij swhcanj cwkrom guh douzswh caeuq gij fung`yiemj de aeu gyagiengz guenjleix, daezsang douzswh souik.

  Bineix, cungdenj aeu guhndei geij fuengmienh hong lajneix.

  (1) Baujciz huqgyaq cungjdaej suijbingz daihdaej onjdingh

  Dangqnaj, doxgaiq hwnj gyaq haemq vaiq, gij yawhgeiz ngaenz cienh huq bengz de gyarem, aen vwndiz neix nangqdaengz gij saedceij yinzminz、gvanhaeh daengxbuenz、 yingjyangj onjdingh. Aeu dawz onjdingh huqgyaq cungjdaej suijbingz dangguh hungzgvanh diuzgung aen yinvu daih`it, cungfaen fazveih guek raeuz cujyau gunghyez canjbinj cungjdaej gai lai gvaq cawx、 haeuxgwn romcang cukgaeuq、 vaivei cwkrom haemq lai daengj diuzgen mizleih, roengzrengz siucawz suhyuzsing、 gezgousing ngaenz cienh huq bengz gij yingjyangj mbouj ndei de, siuvaq gij atlig yausu cingzbonj swngsang, ndeindei dazyinx hawciengz yawhgeiz, genhgez naenxroengz aen seiqdaeuz gyagwz swngsang neix. Aeu yungh ginghci caeuq faplwd soujduenh guhgoek, aeu gij hingzcwng soujduenh noix mbouj ndaej haenx guh bangbouj, cienzmienh gyagiengz gyagwz diuzgung caeuq gamduk guenjleix. It dwg mizyauq guenjleix hawciengz cienzngaenz riuzdoengh, gaemhanh gij hobi diuzgen sawj huqgyaq hwnj sang daiq vaiq haenx. Dawzndei cwngfuj guenjleix sanghbinj caeuq fuzvu gyagwz gij diuzcwngj seizgei、 vaiqmenh caeuq ligdoh de. Ngeih dwg roengzrengz fazcanj swnghcanj, baujcang cujyau nungzcanjbinj、gij canjbinj ngoenznaengz gwndaenj noix mbouj ndaej、cung`yau swnghcanj swhliu swnghcanj caeuq gunghawj. Lozsiz “daehhaeux” swngjcangj fucwzci caeuq “swxbyaek” sicangj fucwzci. Sam dwg gyagiengz gensez nungzcanjbinj riuzdoeng dijhi, cizgiz guh “nungzcanjbinj caeuq cauhsi doxciep”, sawj diuz “doengloh saekheu” daehyinh nungzcanjbinj sienndip ndaej doengrat. Laeb caezcienz gij cidu cwkrom cung`yau sanghbinj caeuq gij cidu laemzseiz cwkrom cujyau nungzcanjbinj, dawzndei aen seizgei diuzcez gaemhanh guekgya cwkrom haeuj ok, guhndei cingouj cuzgouj diuzcez, gyaak gij naengzlig diuzcez gaemhanh hawciengz. Seiq dwg gyagiengz gyagwz gamguenj, henhoh hawciengz cizsi. Daegbied aeu gyagiengz gyagwz caepfap, yiemzsuk cazfad gij hingzveiz famh fap yakeiq cawx haeuj gai ok、 doxyuk hwnj gyaq、 daixram gyagwz daengj. Haj dwg laeb caezcienz gij cidu boujdiep, laebhwnj laebcaez aen lienzdoengh gihci sevei gouqbang、 baujcang byauhcunj caeuq huqgyaq hwnj sang doxngaeu neix, baenzbaenz mbouj ndaej hawj huqgyaq hwnj sang yingjyangj gij cingqciengz saedceij gyoengq ginzcung souhaeuj noix haenx.

  (2)Caenh`itbouh gyadaih ndaw guek sihgiuz daegbied dwg gij siuhfei sihgiuz gyoengq gihminz

  Gyadaih ndaw guek sihgiuz, dwg guek raeuz ginghci fazcanj aen ciengzgeiz canloz fuengcim caeuq giz ndwnmaenh de, hix dwg coicaenh ginghci doxdaengh fazcanj diuz roen gaenbonj caeuq gij baihndaw yauhgiuz de.

  Cizgiz gyadaih siuhfei sihgiuz. Laebdaeb demgya gij ceiok cwngfuj yungh youq gaijndei caeuq gyadaih siuhfei haenx, demgya gij boujdiep hawj gyoengq gihminz hawsingz caeuq bouxguhnaz souhaeuj noix haenx. Laebdaeb saedhengz gij cwngcwz soengq gyayungh dengi roengz mbanj caeuq aeu gaeuq vuenh moq. Gyagiengz gensez gij giekdaej sezsih lajmbanj caeuq hawsingz rauh iq sanghmou riuzdoeng、 vwnzva dijyuz、 lijyouz、 gvanhdaivangj daengj. Roengzrengz coicaenh vwnzva siuhfei、 lijyouz siuhfei caeuq ciengxlaux siuhfei. Doidoengh lajmbanj sanghyez doxlienz ginghyingz caeuq dungjyiz boiqsoengq, gaijndei hawsingz sanghyez vangjdenj ndalaeb, cizgiz fazcanj denswj sanghvu、 gwnz vangjloz cawx doxgaiq、 deihleix saenqsik doengh cungj fugsaeh yiengh moq neix. Roengzrengz cwngjdun caeuq gveihfan hawciengz cizsi, cietsaed henhoh gij gienzik bouxsiufeiq. Haeujlaeg guh gij cienhangh ceihleix hengzdoengh dwkceih ciemqfamh cihsiz canjgenz caeuq cauhguh gaiok sanghbinj gyaj yaez haenx.

  Roengzrengz gaijndei douzswh gezgou. Nyinhcaen lozsiz Gozvuyen 36 diuz moq gvendaengz gujli dazyinx ndawbiengz douzswh, cagaenj ceiqdingh gij hawciengz cinjhaeuj byauhcunj caeuq cihciz cwngcwz goenghai ronghcingx haenx, cietsaed cuengq gvangq hawciengz cinjhaeuj, caencingq buqcawz gak cungj gazngaih miz yiengh caeuq mbouj miz yiengh, gujli caeuq dazyinx swhbwnj ndawbiengz haeuj daengz giekdaej canjnieb caeuq giekdaej sezsih、 sicwng goeng`yungh saehnieb、 sevei saehnieb、 ginhyungz fuzvu daengj lingjyiz bae, doidoengh minzyingz giyez gyagiengz gag guhcawj cauhmoq caeuq cienjhingz swnggaep, gujli caeuq dazyinx swhbwnj ndawbiengz dauqcungz doxgap lienzhab caeuq camgya guekmiz giyez gaijgwz, gyagiengz doiq ndawbiengz douzswh guh fuzvu、cijdauj caeuq gveihfan guenjleix, coicaenh sevei douzswh onjdingh gyalai caeuq gezgou gaijndei. Cungfaen fazveih gij cozyung cwngfuj douzswh dazyinx gezgou diuzcwngj haenx, sien baujcwng cienzngaenz ceihawj gij cungdenj hanghmoeg cingqcaih hwnq、ciepswnj hwnq haenx, miz bouhloh bae hainduj hwnqguh gij hanghmoeg hungloet “12•5” gveihva. Fuengzre luenh douzswh caeuq doxcungz gensez. Yiemzgek caephengz douzswh hanghmoeg yunghdieg、 mbaet nwngzyenz、 vanzging baujhoh、 ancienz daengj cinjhaeuj byauhcunj, daezsang douzswh cizlieng caeuq yauqik.

  (3) Gyamaenh caeuq gyagiengz nungzyez giekdaej diegvih

  Genhciz dawz “sam nungz”gunghcoz cuengq youq ndaw cungdenj giz ceiq youqgaenj de, youq mwh gunghyezva、 cwngzcinva haeujlaeg fazcanj de doengzbouh doicaenh nungzyez yendaiva, gyamaenh caeuq fazcanj gij hingzsi ndei nungzyez lajmbanj.

  Saedbauj nungzcanjbinj gunghawj, lai roenloh bae demgya gij souhaeuj bouxguhnaz. Aeu dawz baujcang haeuxgwn ancienz dangguh aen muzbyauh daih`it, mbouj cuengqsoeng saek di bae ca ndei nungzyez swnghcanj. Onjdingh gij menciz dajndaem haeuxgwn, cihciz gij dieg ndei swnghcanj faiq、 youzliuh、 dangzliuh daengj canjbinj soqliengh ceiq lai haenx. Haenqrengz fazcanj hangz ciengx doihduz、 hangz ciengx bya dwk bya、 hangz gungganq caeuq baujhoh ndoengfaex. Cietsaed ca ndei lwnz moq gensez aen gunghcwngz “swxbyaek”, giz dieg henz hawsingz hung rauh aeu miz gij gihbwnj menciz diegbyaek caeuq miz gij naengzlig gunghawj gijgwn sienndip. Giengzvaq aeu gohgi cengjdingj nungzyez, fazcanj cangqvuengh hangz cehfaen loegcak, daih gveihmoz cauhguh canjlieng sang. Laebdaeb saedhengz gij cwngcwz soucawx haeuxgwn dingh miz gyaqcienz ceiq daemq, bineix mienhsan soucawx gyaqcienz ceiq daemq moix 50 goenggaen daezsang 5 daengz 7 maenz, haeuxnaz soucawx gyaqcienz ceiq daemq moix 50 goenggaen daezsang 9 daengz 23 maenz. Roengzrengz fazcanj lajmbanj gij canjnieb mbouj dwg nungzyez haenx, cangqhoengh gij ginghci ndaw yienh, daezsang bouxguhnaz gij naengzlig cizyez ginwngz caeuq cauhnieb、 racienz, coicaenh bouxguhnaz youq dangdieg、 dieg gyawj senjnod couhnieb. Daezsang gij byauhcunj bangfuz gungzhoj, gyarengz banggungz haifat.

  Daih gveihmoz hwnqguh suijli, cienzmienh gyagiengz gensez gij giekdaej sezsih nungzyez lajmbanj. Cungdenj gyagiengz reihnaz suijli gensez、 ceihleix dah rauh iq、 doiq suijgu iq caeuq gij doucabraemx vaih yiemj guh cawzyiemj gyamaenh dem fuengzceih raemxrongz ndoibya diciz caihaih. Guhndei gij sezsih baiz raemx dwk raemx, fazcanj mbaet raemx dwk raemx, gyamaenh faidah haenzdah, guh ndei gvetseuq namhnaez doeng raemx, siucawz gij huxndumj suijgu, gya`gvangq gyalaeg suijgu fuengz raemxrongz. Doenggvaq geij bi roengzrengz, cienzmienh daezsang gij naengzlig fuengz raemxrongz dingj mbwnrengx、 fuengz cai gemj cai. Daihlig doicaenh haifat cingjleix diegdeih lajmbanj, daih gveihmoz hwnqguh gij reihnaz byauhcunj sang rengx dumh bauj sou neix, gyavaiq gensez gij swnghcanj naengzlig daengx guek saen demlai cien ik gaen haeuxgwn haenx. Gyagiengz gensez gij raemx、 dienh、 loh、 heiq、 ranz lajmbanj, roengzrengz gaijndei gij diuzgen swnghcanj swnghhoz lajmbanj, roengzrengz vih bouxguhnaz hwnqguh aen ranzmbanj gyaeundei haenx.

  Gyadaih dwk haeuj “sam nungz”bae, laeb caezcienz gij cwngcwz sawj “sam nungz” ndaej maenh`ak ndaej ndeicawq. Caizcwng ceiok cungdenj ngengcoh nungzyez lajmbanj, saedbauj gij cungjsoq、 demgya soqliengh yungh youq nungzyez lajmbanj de cungj miz daezsang; gij guding swhcanj douzswh ndaw yawhsuenq, cungdenj yungh youq gensez gij giekdaej sezsih nungzyez lajmbanj, saedbauj cungjsoq caeuq bijcung caenh`itbouh daezsang; gij souik gaiok、 cienjnyiengh diegdeih ndaej haenx, cungdenj dwkhaeuj nungzyez diegdeih haifat、 reihnaz suijli caeuq gensez gij giekdaej sezsih lajmbanj, saedbauj lingx ok gaeuq soq、 dingh fueng`yiengq sawjyungh. Bineix cunghyangh caizcwng gij cienzngaenz yungh youq “sam nungz” neix, dajsuenq anbaiz 9884.5 ik maenz, beij bi gonq gyalai 1304.8 ik maenz. Laebdaeb demgya gij swnghcanj boujdiep hawj bouxguhnaz haenx, gij boujdiep demmoq haenx cungdenj ngengcoh cujcanjgih、 cungdenj binjcungj、 conhyez daihhoh、 nungzminz conhyez hozcoz cujciz. Doiq doengh aen yienh diuh’ok haeuxgwn、 youzliuh、duzmou lai haenx, demgya cunghyangh caizcwng gij itbuensingq conjyiz cihfu de, gyadaih gij gveihmoz caeuq fanveiz dajciengj bangbouj. Dazyinx ginhyungz gihgou demlai douzcuengq gij sindai nangqdaengz nungzyez haenx, saedbauj gij daigvanj nangqdaengz nungzyez haenx demgya soqliengh ciemq bijcung mbouj noix gvaq bi gonq. Cwngcwzsing ginhyungz aeu gyadaih ligdoh cihciz “sam nungz”. Laebcaez cwngcwzsing nungzyez baujyiemj cidu,laebhwnj aen gihci nungzyez caiq guh baujyiemj caeuq faensanq gij fung’yiemj caihaih hung.

  Gyalaeg lajmbanj gaijgwz, demgiengz gij fazcanj rengzhoengh lajmbanj. Genhciz caeuq laeb caezcienz gihbwnj ginghyingz cidu lajmbanj, laeb caezcienz gij gyahdingz cingzbau ginghyingz cidu cwgoemq daengz reihnaz、diegfaex、diegnywj daengj. Miz bouhloh bae doicaenh lajmbanj diegdeih guenjleix cidu gaijgwz. Damqra laebhwnj reihnaz baujhoh boizbouj gihci. Laebdaeb doicaenh lajmbanj gyoebhab gaijgwz. Cienzmienh saedhengz cunhgaep goeng’ik saehnieb gensez it saeh it lwnh caizcwng dajciengj boujdiep, daih fukdoh demgya gij cienzsoq ciengjli caeuq boujdiep. Gyavaiq fazcanj nungzminz conhyez hozcoz cujciz caeuq nungzyez seveiva fuzvu dijhi, daezsang nungzyez cujcizva cingzdoh. Nienzdaej gaxgonq, youq daengx guek bujben laebbaenz laebcaez yanghcin roxnaeuz gihyizsing nungzyez gisuz doigvangq、 fuengzre gaemhanh gij bingh doenghduz doenghgo、 gamguenj nungzcanjbinj cizlieng daengj goenggungh fugsaeh gihgou.

  Gaijgez aen gwn haeux vwndiz 13 ik vunz cungguek, itcig cungj dwg gienh daeuzdaengj daihsaeh ndeu,mboujlwnh seizlawz cungj mbouj ndaej yawjlawq. Raeuz miz saenqsim hix miz naengzlig banh ndei gienh daihsaeh neix.

  (4) Gyavaiq doicaenh ginghci gezgou guh canlozsing diuzcwngj

  Neix dwg cienjbienq ginghci fazcanj fuengsik aen cawjgung fueng`yiengq de. Aeu doidoengh ginghci caenhvaiq byaij hwnj diuz loh baengh rengz bonjndang demlai、baengh cauhmoq ndaej rengz baenaj haenx.

  Diuzcwngj gaijndei canjnieb gezgou. Gyavaiq cauhlaeb yienhdaih canjnieb dijhi, doidoengh canjnieb cienjhingz swnggaep. It dwg gaijcauh daezswng hangz ceiqcauh. Gyadaih gij ligdoh giyez gisuz gaijcauh, cungdenj demgiengz gij naengzlig haifat canjbinj moq caeuq gij naengzlig cauhlaeb binjbaiz, daezsang gij suijbingz gyoebhab leihyungh nwngzyenz swhyenz、 gij suijbingz gisuz gunghyi hidungj cizcwngz, daezsang canjbinj cizlieng、 gisuz hamzliengh caeuq fu’gyahciz. Doidoengh cungdenj hangznieb giyez hamj digih gyan’gyoeb dauqcungz cujhab. Laeb caezcienz canjnwngz doeklaeng doiqok gihci caeuq boiqdauq cwngcwz. Ngeih dwg gyavaiq gungganq fazcanj canlozsing saenhwng canjnieb. Cizgiz fazcanj gij saenqsik gisuz canjnieb daih moq, gensez gij gvanhdai sinsizvangj singnwngz sang haenx, gyavaiq saedyienh “sam vangj yungzhab”, coicaenh huqlienzvangj sifan wngqyungh. Daihlig doidoengh mbaet nwngzyenz vanzbauj、 nwngzyenz moq、 swnghvuz、 gauhdonh canghbei ceiqcauh、 caizliuh moq、 giceh yungh nwngzyenz moq daengj canjnieb fazcanj. Aeu cagaenj ceiqdingh byauhcunj, laeb caezcienz cwngcwz, gyagiengz cauhmoq naengzlig gensez, fazveih gij cozyung gohgihingz giyez rauh iq,coicaenh canlozsing saenhwng canjnieb cangqvuengh fazcanj, gyavaiq cauxbaenz swnghcanj naengzlig caeuq haedsim gingcwngh naengzlig. Sam dwg daihlig fazcanj fuzvuyez. Gyavaiq fazcanj swnghcanjsing fuzvuyez,cizgiz fazcanj swnghhozsing fuzvuyez. Daihlig fazcanj caeuq daezswng yonjgen canjnieb. Roengzrengz cauh ok gij hawciengz vanzging doiq fuzvuyez fazcanj mizleih haenx, gyavaiq laeb caezcienz gij cwngcwz dijhi coicaenh fuzvuyez fazcanj haenx. Caenhvaiq saedyienh loih fuzvuyez gujli banh haenx yungh dienh、 yungh raemx、 yungh heiq、 yungh ndat caeuq gunghyez daihdaej doengzgyaq. Seiq dwg gyagiengz gensez yienhdaih nwngzyenz canjnieb caeuq gyoebhab daehyinh dijhi. Cizgiz doidoengh nwngzyenz swnghcanj caeuq leihyungh fuengsik bengwz, daezsang nwngzyenz leihyungh yauliz. Doicaenh conzdungj nwngzyenz cinghseuq leihyungh, gyagiengz gensez cinwngz denvangj, daihlig fazcanj gij nwngzyenz cinghseuq. Dungjcouz fazcanj、 gyavaiq cauhlaeb gij gyoebhab daehyinh dijhi fuengbienh vaiqdangq、 ancienz、 ginghci、 yauliz sang haenx. Genhciz dungjcouz gwnz namh ndaw haij, doicaenh gij ginghci ndaw haij fazcanj.

  Coicaenh gihyiz doxdaengh doxhuz fazcanj. Cienzmienh lozsiz gihyiz fazcanj gveihva. Genhciz dawz saedhengz Sihbu daih haifat canloz, cuengq youq gihyiz fazcanj cungjdaej canloz giz ciemqgonq de, nyinhcaen lozsiz Sihbu daih haifat cib bi moq gij cwngcwz cosih de caeuq gak hangh cosih coicaenh Sihcang、Sinhgyangh daengj dieg yathamj fazcanj haenx. Cienzmienh gaujhoengh Doengbaek digih daengj gunghyez gihdi laux, laebdaeb doicaenh swhyenzhingz hawsingz cienjhingz. Daihlig coicaenh Cunghbu digih hwnghwnj, caenh’itbouh fazveih cungj gihvei youhsi ciep doeng lienz sae neix. Cizgiz cihciz Dunghbu digih lingxdaeuz fazcanj, youq gihci dijci cauhmoq caeuq fazcanj fuengsik cienjbienq fuengmienh byaij youq baihnaj daengx guek. Engq ndei fazveih Sinhcin daengj ginghci dwzgih、Sanghaij Bujdungh Sinhgih、 Denhcinh Binhhaij Sinhgih youq ndaw gaijgwz hailangh gij cozyung byaij gonq sawq gonq haenx. Gyadaih ligdoh cihciz gwzming laujgih、 minzcuz digih、 henzguek digih fazcanj, fatbouh saedhengz 2011-2020 nienz Cungguek lajmbanj fuzbinz haifat ganghyau, hainduj guh aen gunghcwngz ceiq nanz haenx, couh dwg doiq dieg daegbied gungzhoj doxlienz baenzbenq haenx guh banggungz haifat, gyavaiq yamqdin dieg gungzhoj duetgungz bienqfouq.

  Cizgiz onjdangq doicaenh cwngzcinva. Genhciz byaij diuz loh cwngzcinva miz Cungguek daegsaek, ciuqcoengz hawsingz fazcanj gvilwd, coicaenh cwngzcinva cangqvuengh fazcanj. Genhciz gohyoz gveihva,yiemzgek guenjleix. Gyagiengz ndawsingz giekdaej sezsih caeuq goenggungh fugsaeh sezsih gensez, demgiengz hawsingz gyoebhab dingjsouh naengzlig, daezsang guenjleix caeuq fuzvu suijbingz. Yawj cingzgvang dingh geiq, faen bouh doi baenaj, dawz gyoengq nungzminzgungh miz onjdingh lauzdung gvanhaeh、 youh youq hawsingz miz itdingh nienzhanh haenx, cugbouh cienj guh gihminz hawsingz. Doiq gyoengq nungzminzgungh caengz miz diuzgen cienj guh gihminz hawsingz haenx, aeu gaijgez ndei gij saedsaeh vwndiz gyoengqde youq lauzdung baucouz、 lwgnyez haeujhag、 goenggungh veiswngh、 coyungh ranzyouq、 sevei baujcang daengj. Doiq gij vwndiz haeuj hawsingz roxnaeuz louz youq lajmbanj neix, aeu cungfaen aeueiq nungzminz gij gienz gag guhcawj genj dingh haenx, cietsaed baujhoh bouxguhnaz dieg cingzbau、diegranz daengj fuengmienh gij gienzik habfap haenx. Cwngzcinva aeu caeuq nungzyez yendaiva、 lajmbanj moq gensez dox coicaenh, neix dwg aen fueng`yiengq deng bietdingh aeu genhciz haenx.

  Gyagiengz mbaet nwngzyenz vanzbauj caeuq swnghdai gensez, cizgiz wngqdoiq dienheiq bienqvaq. Gyarengz ca ndei gunghyez、 gencuz、 gyauhdungh yinsuh、 goenggungh gihgou daengj lingjyiz mbaet nwngzyenz. Laebdaeb saedhengz cungdenj mbaet nwngzyenz gunghcwngz. Daihlig gaihcanj gunghyez mbaet nwngzyenz, doigvangq mbaet nwngzyenz gisuz,yinhyungh mbaet nwngzyenz sezbei, daezsang nwngzyenz leihyungh yauliz. Doiq yienzmiz gencuz gyadaih douzhaeuj guh mbaet nwngzyenz gaijcauh, cizgiz doicaenh gij gencuz hwnq moq mbaetyungh nwngzyenz. Daihlig fazcanj sinzvanz ginghci. Doicaenh gij sawqdiemj hawsingz dan noix. Gyagiengz gensez gij naengzlig hab’wngq dienheiq bienqvaq、 daegbied dwg wngqdoiq gij dienheiq yakrwix raixcaix haenx. Laebhwnj laeb caezcienz gij cidu gyoebsuenq gamcaek baizcuengq heiq ranzraeuj caeuq mbaet nwngzyenz gemj baizcuengq haenx. Gyavaiq gveihva caeuq gensez hawsingz raemxuq guenj vangj、 nyapnyaj cawqleix sezsih, doigvangq raemxuq cawqleix dauqyungh. Gyagiengz guenjleix vayozbinj vanzging. Hainduj guh gij hong yenzmeiz dienhcangj duet siuh, gyalaeg fuengzceih gij uqlah doxgaiq baenz naed, gyagiengz ceihleix gij uqlah ndaw haij. Gyavaiq ceihleix cungdenj liuzyiz raemx uqlah、ceihleix daihheiq uqlah、ceihleix cungdenj digih cungginhsuz uqlah caeuq gyoebhab cingjceih gij vanzging lajmbanj, gamhanh lajmbanj gij uqlah menciz gvangq haenx. Laebdaeb saedhengz gij swnghdai coihguh gunghcwngz hungnaek, gyagiengz baujhoh caeuq guenjleix cungdenj swnghdai gunghnwngzgih,saedhengz denhyenzlinz swhyenz baujhoh daihngeih geiz gunghcwngz, lozsiz diegnywj swnghdai baujhoh boujdiep dajciengj cwngcwz, gyamaenh gij cwngzgoj doiq reihnaz fuk ndoengfaex、doiq ciengx doihduz fuk nywj daengj, daihlig gaihcanj ndaemfaex cauhndoeng, gyagiengz baujhoh caeuq dauqfuk diegdumz, doicaenh gyoebhab ceihleix vanghmozva、 sizmozva. Laeb caezcienz gij wngqgaep yianq fuengz cai gemj cai, gyavaiq gensez gij dijci doiq dieg yungzheih fatseng raemxrongz ndoibya diciz caihaih haenx guh diucaz bingzgyaq、 gamcaek yawhgingj、 fuengzceih wngqgaep daengj.

  (5) Daihlig saedhengz gohgyau hwng guek canloz caeuq yinzcaiz giengzguek canloz

  Gohgi、 gyauyuz caeuq yinzcaiz dwg guekgya fazcanj gij giekdaej caeuq gaenbonj de, bietdingh aeu itcig cungj cuengq youq giz canloz diegvih youqgaenj.

  Genhciz sien fazcanj gyauyuz gonq. Doidoengh gyauyuz saehnieb gohyoz fazcanj, vih gyoengqvunz daezhawj gij gyauyuz engq lai yiengh、 engq goengbingz、 cizlieng engq sang haenx. 2012 nienz caizcwngsing gyauyuz ginghfei ceiok, ciemq ndaw guek swnghcanj cungjciz bijcung dabdaengz 4%. Gyavaiq fazcanj gij gyauyuz mwh lwgnyez caengz haeujhag. Gunghban minzban doengzcaez guh, demgya gij gyauyuz swhyenz mwh lwgnyez caengz haeujhag, cagaenj gaijgez gij vwndiz “haeuj youwzyenz nanz ”. Coicaenh yivu gyauyuz ndaej bingzyaenx fazcanj. Gyagiengz yivu gyauyuz gaihdon yozyau byauhcunjva gensez, goenggungh swhyenz boiqnda cungdenj ngengcoh gij yozyau buegnyieg lajmbanj caeuq ndawsingz. Aeu gij cwngfuj dieg hagseng haeujhag haenx caeuq gunghban yozyau guhcawj, cietsaed baujcang gyoengq lwgnyez gaenriengz nungzminzgungh senj bae haenx bingzdaengj ciepsouh yivu gyauyuz. Cihciz dieg minzcuz fazcanj gyauyuz, guhndei gij hong “song cungj yijvwnz” gyauyoz. Cienzmienh doicaenh suciz gyauyuz. Gyavaiq gyauyuz gaijgwz,doiq diuzrap goyez naek gvaq bouh gyoengq cunghsiuj yozswngh, cietsaed gemjmbaeu bae, yawjnaek dazyinx caeuq son`gyauq gyoengq lwgnyez gij naengzlig doglaeb ngeixnaemj、 saedguh cauhmoq. Baujcwng cunghsiuj yozswngh moix ngoenz miz diemj cung ndeu youq ndaw yozyau guh dijyuz hozdung. Daihlig fazcanj cizyez gyauyuz. Dazyinx gauhcungh gaihdon yozyau caeuq gauhdwngj yozyau banh ok daegsaek, daezsang gyauyuz cizlieng, demgiengz hagseng gij naengzlig couhnieb cauhnieb. Gyagiengz gensez cungdenj yozgoh, gyavaiq gensez buek dayoz dwg seiqgyaiq daih’it daengj haenx. Cihciz fazcanj dwzsuh gyauyuz. Lozsiz caeuq laeb caezcienz guekgya cuyoz cidu, mboujlwnh aen gyauyuz gaihdon lawz, cungj aeu saedbauj moix boux lwgnyez mbouj aenvih ranzhoj cix mbouj ndaej doegsaw .

  Cienzmienh gyagiengz yinzcaiz gunghcoz. Aeu gyoengq vunz cwngzsw sang caeuq ginwngz ak guh cungdenj, gyavaiq gungganq son`gyauq ok buek gohgi yinzcaiz cauhmoq caeuq gij yinzcaiz giepnoix hoeng gipyungh haenx. Gyadaih yinzcaiz haifat douzhaeuj, doicaenh gij yinzcaiz gunghcwngz hungnaek, gyalaeg gaijgwz gij cidu genj vunz yungh vunz, roengzrengz cauh ok gij cidu caeuq sevei vanzging bingzdaengj goenghai、 gingcwngh genj ndei haenx. Gikleih gij yinzcaiz maenhndei nyoenx okdaeuj, cauh’ok cungj gizmen ndei bouxboux ndaej cungfaen dawzok bonjsaeh haenx.

  Daihlig doicaenh gohgi cauhmoq. Gyavaiq saedhengz gij gohgi cienhangh hungnaek guekgya, gungroengz buek haedsim gvanhgen gisuz ndeu. Daezswng gij naengzlig cizcwngz hungnaek cauhmoq. Gyagiengz gihcuj yenzgiu、 lingxdaeuz gisuz yenzgiu, demgiengz gij naengzlig cauhmoq codaeuz. Doidoengh laebhwnj gij dijci gihci giyez cujdauj gisuz yenzgiu haifat cauhmoq haenx. Gujli giyez doengzcaez ok cienz guh yenzgiu haifat gvanhgen gungsing gisuz, caez rap fung`yiemj, caemh yungh cwngzgoj, doiq gij hanghmoeg hab guekgya canloz fueng`yiengq haenx, cwngfuj aeu daj cwngcwz caeuq swhginh fuengmienh bae cihciz. Gyalaeg gohgi guenjleix dijci gaijgwz, coicaenh gohgi swhyen ndaej boiqnda ndei、 leihyungh ndei caeuq hailangh caemh yungh. Gikleih gohyenz yen soj、 gauhdwngj yozyau caeuq daengxcungq gohgi yinzyenz yungh lai cungj hingzsik caeuq giyez doxgap guh. Baujciz caizcwng gohgi douzhaeuj onjdingh demlai, daezsang gohyenz ginghfei sawjyungh yauliz. Giendingh mbouj bienq bae saedhengz guekgya cihsiz canjgienz canloz, daezswng gij naengzlig cauhguh、 wngqyungh、 baujhoh、 guenjleix cihsiz canjgienz, gikfat gij rengzhoengh cauhmoq daengx biengz.

  (6) Gyagiengz sevei gensez caeuq baujcang gaijndei gij saedceij yinzminz

  Ginghci yied fazcanj,yied aeu yawjnaek gyagiengz sevei gensez caeuq baujcang gaijndei gij saedceij yinzminz.

  Cien fueng bak geiq gyadaih couhnieb. Laebdaeb saedhengz gij couhnieb cwngcwz engqgya cizgiz. Bineix cunghyangh caizcwng dajsuenq douzhaeuj 423 ik maenz, yungh youq bangfuz caeuq coicaenh couhnieb. Aeu hab’wngq gij gezgou daegdiemj lauzdungliz guek raeuz, daihlig fazcanj gij canjnieb yungh vunz lai、 hangz fuzvu、 giyez iq giyez iqet caeuq gij gohgi giyez cauhmoq, roengzrengz muenxcuk mboujdoengz caengzsw couhnieb sihgiuz. Laebdaeb dawz gauhyau bizyezswngh couhnieb cuengq youq vih daih`it, guhndei gij hong gyoengq vunz cungdenj haenx couhnieb. Gyagiengz cizyez ginwngz beizyin, gujli gag guhcawj cauhnieb. Gyagiengz goenggungh couhnieb fuzvu, laeb caezcienz gij yinzliz swhyenz hawciengz dwg dungjyiz gveihfan lingzvued haenx. Gyavaiq gensez couhnieb saenqsik vangjloz, saedyienh daengx guek doxlienz doxdoeng. Gyagiengz lauzdung baujcang genhcaz caepfap, laeb caezcienz gij gihci cawqleix lauzdung doxceng haenx, ciuqfap henhoh gij gienzik bouxguhhong, cauhlaeb gij lauzdung gvanhaeh huzndei.

  Hableix diuzcwngj gij gvanhaeh souhaeuj faenboiq. Neix gawq dwg hangh yinvu ciengzgeiz, hix dwg gij hong gaenjbik dangqnaj. Bineix cungdenj yungh sam fuengmiemh cosih: It dwg roengzrengz daezsang gij gihbwnj souhaeuj gyoengq vunz souhaeuj noix hawsingz lajmbanj. Onjbouh daezsang gij byauhcunj gunghswh ceiq daemq gyoengq cizgungh、 gij byauhcunj gihbwnj cienzciengxlaux gyoengq vunz duiyouh ndaw giyez caeuq gij ceiq daemq swnghhoz baujcang gyoengq gihminz singz mbanj haenx. Laebhwnj laebcaez cizgungh gunghswh cingqciengz demlai gihci, yiemzgek caephengz ceiq daemq gunghswh cidu. Ngeih dwg gyadaih ligdoh diuzcez souhaeuj faenboiq. Daezsang gij byauhcunj gaeucawz goyinz sojdwzsui gunghsinh sojndaej feiqyungh, hableix diuzcwngj suiliz gezgou, cietsaed gemjmbaeu diuz rap suisouh boux souhaeuj cungdaengj、 souhaeuj noix haenx. Mizyauq diuzcez gij souhaeuj sang gvaqbouh,doiq gij gunghswh cungjngeg caeuq gunghswh suijbingz aen hangznieb souhaeuj sang gvaqbouh haenx gyagiengz guh song caengz diuzcez gaemhanh, yiemzgek gveihfan guenjleix gij gunghswh baucouz gyoengq gauhgiz guenjleix yinzyenz ndaw guekmiz giyez、 ginhyungz gihgou. Sam dwg daihlig cwngjdun caeuq gveihfan souhaeuj faenboiq cizsi. Genhgez gimqhaed gij souhaeuj mbouj habfap. Gyavaiq laebhwnj souhaeuj faenboiq gamcaek hidungj. Doenggvaq laebdaeb mboujduenh roengzrengz, caenhvaiq niujcienj gij seiqdaeuz souhaeuj faenboiq cengca gyadaih, roengzrengz sawj guengjdaih yinzminz ginzcung ndaej engq lai faenyiengj gij cwngzgoj gaijgwz fazcanj.

  Gyavaiq Laeb caezcienz gij sevei baujcang dijhi cwgoemq singz mbanj gihminz haenx. Dawz lajmbanj sevei ciengxlaux baujyiemj yienghmoq aen gvaengxlaengx sawqdiemj de, gya`gvangq daengz daengx guek 40% aen yienh. Doicaenh hawsingz gihminz ciengxlaux baujyiemj sawqdiemj, gaijgez gij vwndiz doenghbaez louz roengzdaeuj、gvendaengz gij ciengxlaux baujcang gyoengq vunz duiyouh ndaw cizdij giyez haenx, laebhwnj aen gihci cingqciengz diuzcwngj gij gihbwnj cienzciengxlaux boux duiyouh ndaw giyez. Cizgiz doicaenh gihgvanh caeuq swyez danhvei gaijgwz ciengxlaux baujyiemj cidu. Dawz guekmiz giyez、cizdij giyez boux “goengsieng laux” de nabhaeuj ndaw goengsieng baujyiemj cidu bae. Laeb caezcienz gij ceiq daemq swnghhoz baujcang cidu ndawsingz lajmbanj. Laebdaeb lai diuz roenloh demgya sevei baujcang gihginh. Dawz ciengx、 gyauyuz lwggyax caeuq sawj boux lwggyax ndangcanz dauqfuk ndangcangq daengj, nabhaeuj ndaw gvaengxlaengx caizcwng baujcang bae. Laebdaeb doicaenh gensez boux ndangcanz sevei baujcang dijhi caeuq fuzvu dijhi. Gyavaiq doicaenh sevei baujcang guenjleix saenqsikvaq. Fazveih gij cozyung sanghyez baujyiemj youq mwh laeb caezcienz sevei baujcang dijhi miz haenx. Daihlig fazcanj swzsienh saehnieb.

  Giendingh mbouj bienq bae guh ndei diuzgung fangzdicanj hawciengz. Gyavaiq laeb caezcienz gij gihci ciengzgeiz mizyauq diuzgung fangzdicanj hawciengz haenx,cungdenj gaijgez gij ranzyouq gunnanz ndaw hawsingz aen gyahdingz souhaeuj cungdaengj、 souhaeuj daemq haenx, cietsaed onjdingh fangzdicanj hawciengz gyagwz, muenxcuk gihminz gij ranzyouq sihgiuz hableix. It dwg caenh’it bouh gyadaih baujcangsing ranzyouq gensez gveihmoz. Bineix aeu caiq haigoeng hwnqguh baujcangsing ranzyouq、 gij ranzyouq gaijcauh dieg ranzdiengz gungh 1000 fan dauq, gaijcauh gij ranz yung`yiemj lajmbanj 150 fanh hoh. Cungdenj fazcanj gij ranz hawj vunzlai co youq haenx. Cunghyangh caizcwng yawhsuenq dajsuenq anbaiz gij cienz bangbouj 1030 ik maenz, beij bigonq demgya 265 ik maenz. Gak gaep cwngfuj aeu lai roenloh bae couzcomz cienz, daih fukdoh demgya dwkhaeuj. Cagaenj laebhwnj gij guenjleix cidu sawjyungh、 yinyingz、 doiqok baujcangsing ranzyouq daengj, gyalai goenghai cingzdoh, gyagiengz sevei gamduk, baujcwng aen gyahdingz hab diuzgen haenx ndaej souh’ik. Ngeih dwg caenh’itbouh lozsiz caeuq laeb caezcienz gij fangzdicanj hawciengz diuzgung cwngcwz,aeu genhgez naenxhaed aen seiqdaeuz mbangj hawsingz gyaqcienz ranz swnghwnj vaiq gvaqbouh. Ceiqdingh caemhcaiq yiengq sevei goengbouh nienzdoh ranzyouq gensez giva, youq saen dem gensez yunghdieg giva ndaw de, danlied baujcangsing ranzyouq yungh dieg, guh daengz wngdang bauj cienzbouh bauj. Cungdenj demgya hwnq gij ranz sanghbinj bingzciengz moix dauq menciz iq rauh haenx. Gveihfan fazcanj aen hawciengz co ranz. Yiemzgek lozsiz gij ranzyouq sindai、 suisouh cwngcwz miz cabied haenx, diuzcwngj laeb caezcienz fangzdicanj mizgven suisouh cwngcwz, gyagiengz suisouh cwngguenj, mizyauq bae naenxhaed douzgih douzswhsing cawx ranz. Gyagiengz gamcaek fangzdicanj hawciengz caeuq gamguenj hawciengz hingzveiz, yiemzhaenq cazcawq gak loih famhfap famhgvi hingzveiz. Sam dwg laebhwnj laebcaez aen gihci gaujhaed gyaepdawz cwzyin. Gij hong onjdingh gyaqcienz ranz caeuq ranzyouq baujcang, saedhengz sengjgaep yinzminz cwngfuj rap gij cwzyin goekdaeuz, si yen yinzminz cwngfuj rap cigsoh cwzyin. Mizgven bumwnz aeu gyavaiq laeb caezcienz gij cidu cunzcaz、 gaujbingz、 iekdamz、 gyaepdawz cwzyin, doiq gij deihfueng onjdingh gyaqcienz ranz、 doicaenh baujcangsing ranzyouq gensez gunghcoz mbouj daeklig、 baenzneix cix yingjyangj sevei fazcanj caeuq onjdingh de, aeu gyaepdawz cwzyin.

  Doicaenh yihyoz veiswngh saehnieb gaijgwz fazcanj. Bineix dwg yihgaij sam bi saedhengz fangh’an bi ceiq hojnanz de, aeu saedbauj guhbaenz gak hangh muzbyauh yinvu. It dwg youq gihcwngz cienzmienh hengzguh guekgya gihbwnj yozvuz cidu. Laebhwnj caezcienz gihbwnj yozvuz baujcang gung’wngq dijhi, gyagiengz gamguenj gij yw, saedbauj yungh yw ancienz, cietsaed gyangqdaemq gyaqcienz yw. Ngeih dwg ca ndei goenglaeb yihyen gaijgwz sawqdiemj. Gujli gak dieg youq yihyen guenjleix dijci、gij gyaqcienz yihliuz fuzvu cauxbaenz gihci caeuq gamguenj gihci daengj fuengmienh daihdamj damqra. Laeb caezcienz yihliuz doxceng diuzgaij cawqleix gihci, gaijndei gij gvanhaeh canghyw caeuq bouxbingh. Sam dwg daezsang gihbwnj yihliuz baujcang suijbingz. Onjdingh daezsang hawsingz cizgungh、 gihminz yihbauj canhbauj beijlwd caeuq sinhnungzhoz camgya beijlwd. Bineix aeu dawz sinhnungzhoz caeuq hawsingz gihminz yihbauj caizcwng bangbouj byauhcunj daezsang daengz 200 maenz. Seiq dwg guhbaenz gij yinvu lajmbanj sam gaep veiswngh fuzvu vangjloz caeuq hawsingz segih veiswngh fuzvu gihgou gensez. Bineix daengx guek moix vunz bingzyaenz gihbwnj goenggungh veiswngh fuzvu ginghfei byauhcunj daezsang daengz 25 maenz. Gyagiengz yawhfuengz gaemhanh caeuq gveihfan guenjleix gij binghlah hungnaek、 binghmansing、 binghcizyez、 binghdeihfueng ndij gij bingh cingsaenz fuengmienh. Gyagiengz mehmbwk lwgnyez baujgen gunghcoz, laebdaeb doicaenh yiengh baujcang sawqdiemj mienxfeiq genjcaz caeuq gouqyw gij bingh gunghgingjaiz、 yujsen’aiz mehmbwk. Nyinhcaen guhndei gij hong fuengzyw aiswhbing. Daihlig fazcanj cunghyihyoz caeuq minzcuz yihyoz saehnieb, lozsiz gak hangh cwngcwz bangfuz. Haj dwg gujli sevei swhbwnj banh yihliuz gihgou. Cuengqgvangq aen cinjhaeuj fanveiz sevei swhbwnj caeuq vaiswh banh yihliuz gihgou. Laeb caezcienz caeuq doicaenh aen cidu canghyw lai giz bae hawj vunz yw bingh, gujli canghyw youq gak loih yihliuz gihgou hableix riuzdoengh caeuq youq gihcwngz hailaeb cinjsoj, vih yinzminz ginzcung daezhawj gij yihliuz veiswngh fuzvu fuengbienh vaiqdangq haenx.

  Cienzmienh guh ndei gij hong yinzgouj caeuq giva senglwg. Laebdaeb onjdingh aen suijbingz senglwg noix. Doiq gyoengq vunz riuzdoengh guh ndei gij hong giva senglwg fuzvu guenjleix. Gyagiengz guenj gij saeh lwgnyez doekseng ndangdaej couh mbouj cingqciengz, caenh’itbouh gyadaih gij sawqdiemj vih seng lwg ndei caengz mizndang sien mienxfeiq genjcaz ndangdaej, guh ndei gij baujgen gunghcoz meh daiqndang、 meh naenghndwen caeuq lwgnding lwgnyez iq. Mehmbwk lajmbanj youq yihyen senglwg beijlwd dabdaengz 95% doxhwnj. Saedhengz lwnz moq mehmbwk lwgnyez fazcanj ganghyau,cietsaed baujhoh gij gienzik mehmbwk caeuq boux caengz baenz vunzhung. Gyavaiq laebhwnj laebcaez aen sevei fuzvu dijhi bouxgeq, gyagiengz gensez goeng’iksingq ciengxlaux fuzvu sezsih.

  Gyagiengz caeuq cauhmoq sevei guenjleix, giengzvaq cwngfuj sevei guenjleix ciznwngz, gvangqlangh dung`yenz ndij cujciz ginzcung ciuqfap camgya sevei guenjleix, fazveih gij cizgiz cozyung aen sevei cujciz, laeb caezcienz sevei guenjleix gwzgiz. Aeu singz mbanj segih guh caidij,aeu gihminz sihgiuz daeuj dazyinx fueng`yiengq, cingjhab yinzgouj、 couhnieb、 sebauj、 minzcwng、 veiswngh、 vwnzva daengj sevei guenjleix ciznwngz ndij fuzvu swhyenz, saedyienh cwngfuj hingzcwng guenjleix ndij gihcwngz ginzcung gagguenj mizyauq doxciep ndij ndeindei dox doidoengh. Gyavaiq laebhwnj laebcaez gij gihci henhoh ginzcung gienzik、 gij gihci hingzcwng gezcwz fung’yiemj bingzguj ndij niujcingq loengloek,gyagiengz gij hong saenqfangj、 yinzminz diuzgaij、 hingzcwng diuzgaij、 swhfaz diuzgaij,haigvangq gij roenloh biujdaz sevei cingzgvang beksingq sim`eiq,cietsaed gaijgez gij vwndiz ginzcung fanjyingj haenqrem luenh ciemq reihnaz、 famhfap ceksenj ranz daengj. Gyagiengz ndij laeb caezcienz goenggungh ancienz dijhi. Laebcaez gij dijci saehgienh fwtfat wngqgaep,daezsang gij naengzlig guenjleix daengx biengz veizgih caeuq dingj fung’yiemj. Gyagiengz gij hong saenqsik ancienz ndij baujsouj gihmiz,laeb caezcienz saenqsik vangjloz guenjleix. Gyagiengz sevei cianh gyoebhab ceihleix,yiemzmaed fuengzre、 ciuqfap dwkceih gak loih famhfap famhcoih hozdung. Lozsiz giyez ancienz swnghcanj ndij canjbinj cizlieng cawjdaej cwzyin, genhgez naenxhaed gij ancienz swnghcanj saehhux hungnaek、 daegbied hungnaek de. Laeb caezcienz gijgwn ancienz gamguenj dijci gihci, laebcaez fazci,yiemzgek byauhcunj, laeb caezcienz gamcaek bingzguj、 genjyen genjcwz dijhi,giengzvaq deihfueng cwngfuj gamguenj cwzyin,gyagiengz gamguenj caepfap,cienzmienh daezsang gij suijbingz baujcang gijgwn ancienz.

  Gak gaep cwngfuj itdingh aeu dawz sevei guenjleix ndij goenggungh fugsaeh baij daengz aen diegvih engqgya youqgaenj bae,cietsaed gaijgez gij leih’ik vwndiz yinzminz ginzcung ceiq gvansim ceiq cigsoh ceiq yienhsaed haenx.

  (7)Daihlig gyagiengz vwnzva gensez

  Vwnzva doiq minzcuz ndij guekgya gij yingjyangj de engq laegdaeuq、 engq gyaeraez. Aeu engq ndei bae muenxcuk yinzminz ginzcung lai caengz lai yiengh vwnzva sihgiuz, fazveih vwnzva gij goengnaengz dazyinx sevei、 gyauyuz yinzminz、 doidoengh fazcanj neix, demgiengz gij ligliengh gietcomz caeuq gij ligliengh cauhguh aen minzcuz raeuz. Gyagiengz gunghminz daudwz gensez, youq daengx biengz laebhwnj aen lijsiengj caeuq saenqniemh caezcaemh seveicujyi miz Cungguek daegsaek, gyavaiq cauhlaeb gij daudwz caeuq hingzveiz gveihfan ndaej ciepswnj Cunghvaz conzdungj meijdwz、 hab seveicujyi cingsaenz vwnzmingz iugouz、 hab’wngq seveicujyi hawciengz ginghci haenx. Gyagiengz gensez lauxsaed soujsaenq dijhi, laebhwnj mizgven cidu caeuq faplwd fapgvi. Demgiengz gij naengzlig gunghawj caeuq fuzvu goenggungh vwnzva canjbinj, cungdenj gyagiengz gensez gij vwnzva giekdaej sezsih dieg Cunghbu Sihbu caeuq singz mbanj gihcwngz, laebdaeb hengzguh aen gunghcwngz vwnzva ikleih beksingq. Bangfuz gij vwnzva saehnieb dwg goeng’iksingq haenx, gyagiengz baujhoh、 leihyungh caeuq cienzswnj vwnzva yizcanj. Caenh’itbouh gaujhoengh cezyoz sevei gohyoz. Fazcanj gij saehnieb sinhvwnz okbanj、gvangjbo yingjsi、 vwnzyoz yisuz、 dang’an. Gyagiengz leihyungh caeuq guenjleix vangjdoxlienz. Gyalaeg vwnzva dijci gaijgwz,cizgiz doicaenh ginghyingzsing vwnzva danhvei gaijci cienjbaenz giyez. Daihlig fazcanj vwnzva canjnieb, gungganq gij vwnzva canjnieb moq,doidoengh vwnzva canjnieb baenz gij canjnieb daemxcengj gozminz ginghci haenx. Daihlig guh cienzminz cangqndang hozdung, coicaenh ginzcung dijyuz caeuq ginggi dijyuz doxdaengh doxhuz fazcanj. Gyagiengz doiq rog vwnzva dijyuz gyauhliuz caeuq doxgap guh, mboujduenh gyadaih Cunghvaz vwnzva youq gwnz gozci yingjyangj,hawj gij Cunghvaz vwnzva gig gvangq gig laeg haenx caiq baij ok ronghsagsag.

  (8)Haeujlaeg doicaenh cungdenj lingjyiz gaijgwz

  Laebdaeb doicaenh guekmiz ginghci guh canlozsing diuzcwngj, laebcaez aen gihci guekmiz swhbwnj ndaej miz haeuj miz ok、 hableix riuzdoengh haenx. Laeb caezcienz aen dijci gamguenj guekmiz ginhyungz swhcanj、 gij swhcanj mbouj dwg ginghyingzsing caeuq swyenz swhyenz swhcanj, gyagiengz gamguenj gij guekmiz swhcanj youq rog guek haenx. Laebdaeb gujli、 cihciz caeuq dazyinx gij ginghci mbouj dwg gunghyoujci de fazcanj. Laebcaez gij caizsui dijci caizlig caeuq saehgienz ndaej doxboiq haenx, cingleix caeuq gyoebgyonj gij hanghmoeg cienhangh senjnod ceihawj, demgya gij senjnod ceihawj bingzciengz de, laebcaez yienhgaep gihbwnj caizlig baujcang gihci. Youq mbangj swnghcanjsing fuzvuyez lingjyiz doihengz cwnghcizsui gaijgwz sawqdiemj, doicaenh swhyenzsui gaijgwz. Gyalaeg yawhsuenq guenjleix cidu gaijgwz,cienzmienh bienguh cwngfujsing gihginh yawhsuenq,gyadaih aen gvaengxlaengx guekmiz swhbwnj ginghyingz yawhsuenq, sawq bien gij yawhsuenq sevei baujyiemj gihginh. Laebdaeb gyalaeg ginhyungz giyez gaijgwz, gyavaiq laebhwnj yienhdaih ginhyungz giyez cidu. Gyavaiq gungganq lajmbanj yiengh ginhyungz gihgou moq. Laebdaeb daihlig fazcanj ginhyungz hawciengz,gujli guh ginhyungz cauhmoq. Doicaenh liliz hawciengzvaq gaijgwz. Gyadaih yinzminzbi youq hamj gyaiq mouyiz caeuq douzswh ndaw de sawjyungh. Doicaenh gij hong yinzminzbi youq laj hangh swhbwnj ndaej caujvuenh. Gyagiengz caeuq gaijndei ginhyungz gamguenj, laebhwnj laebcaez hidungjsing ginhyungz fung’yiemj fuengzre yawhgingj dijhi caeuq cawqceq gihci. Laebndei gij gyagwz guhbaenz gihci cwngzbinjyouz、 denhyenzgi caeuq gak loih dienhgyaq dinghgyaq gihci. Doicaenh gaijgwz gij gyaqcienz raemx. Yenzgiu ceiqdingh gij cijdauj yigen gienz baizuq hawj cienz sawjyungh caeuq gyauhyiz sawqdiemj. Gyagwz gaijgwz aeu cungfaen naemj daengz gij dingjsouh naengzlig yinzminz ginzcung daegbied dwg gyoengq vunz souhaeuj noix haenx. Ciuq gij iugouz cwngfuj caeuq swyez danhvei faenhai、 swyez caeuq giyez faenhai、 guenj banh faenhai、 maeuzleih singqcaet caeuq mbouj dwg maeuzleih singqcaet faenhai neix,cizgiz onjdangq bae faenloih doicaenh swyez danhvei gaijgwz.

  (9) Caenh’itbouh daezsang gij suijbingz doiq rog hailangh

  Cungguek fazcanj mbouj liz ndaej seiqgyaiq. Aeu cizgiz fazcanj gij song mbiengj lai mbiengj ginghmou gvanhaeh doxleih doxndei haenx,mboujduenh hai gvangq gij hailangh lingjyiz caeuq gunghgenh moq. Laebdaeb doidoengh Dohhah Veizhoz damzbuenq,fanjdui gak cungj hingzsik baujhucujyi,coicaenh gozci ginghci cizsi coh aen fueng`yiengq engqgya goengcingq、 hableix、 caezhingz bae fazcanj.

  Cietsaed cienjbienq vaimou fazcanj fuengsik. Aeu youq gwnz giekdaej daihlig guhndei gezgou caeuq daezsang yauqik, baujciz doiq rog mouyiz onjdingh demlai. Mboujlwnh dwg itbuen mouyiz roxnaeuz dwg gyagoeng mouyiz cuzgouj, cungj aeu laebdaeb fazveih lauzdungliz swhyenz youhsi, cungj aeu gemj noix siuhauq nwngzyenz swhyenz, cungj aeu coh diuz lienh canjnieb gij gyaciz sang de bae gya raez, cungj aeu daezsang cizlieng、 dangsw caeuq gij gyaciz fouqgya. Cizgiz gyadaih cuzgouj gij canjbinj gag miz binjbaiz haenx. Daihlig fazcanj fuzvu mouyiz caeuq fuzvu vaibauh, mboujduenh daezsang gij bijcung fuzvu mouyiz. Genhciz cingouj caeuq cuzgouj caez yawjnaek, gyadaih cingouj gij gisuz sezbei senhcin、 gij lingzbugen youqgaenj caeuq nwngzyenz yienzliuh caizliuh, coicaenh daj aen guek ceiq mbouj fatdad caeuq aen guek dwg gij goekgaen cujyau swnhca haenx cingouj, cugbouh gaijndei gij canggvang mouyiz mbouj bingzyaenx, cawqleix ndei gij mouyiz doxdawz.

  Doidoengh doiq rog douzswh caeuq leihyungh vaiswh doxdaengh doxhuz fazcanj. Gyavaiq hengzguh aen canloz “byaij okbae”, laeb caezcienz mizgven cihciz cwngcwz, genjva saemjbae soujsuz, vih gij giyez ndij goyinz hab diuzgen de bae rog dieggyaiq douzswh daezhawj fuengbienh. Gujli giyez cizgiz miz bouhloh bae guh hamj guek ginghyingz. Gyagiengz hungzgvanh cijdauj doiq rog douzswh, laebcaez aen gihci coicaenh caeuq baujhoh douzswh, fuengzre douzswh fung’yiemj. Genhciz aen fuengcim cizgiz mizyauq bae leihyungh vaiswh, yawjnaek yinxhaeuj senhcin gisuz caeuq yinzcaiz、 ciliz swhyenz,gujli hamj guek gunghswh youq Cungguek laeb yenzgiu haifat cungsim, cietsaed daezsang leihyungh vaiswh cungjdaej suijbingz caeuq gyoebhab yauqik. Cagaenj coihgaij vaisangh douzswh canjnieb moegloeg, gujli vaiswh dwk haeuj gauhsinh gisuz、 mbaet nwngzyenz vanzbauj、 yienhdaih fuzvuyez daengj lingjyiz caeuq dieg Cunghbu Sihbu bae.

  (10) Gyagiengz gij hong lenzcwng gensez ndij fanj nduknaeuh

  Gensez aen cwngfuj cinghseuq dwg hangh yinvu naihnanz youh gaenjbik ndeu, dwg gij maqmuengh gaenjgip yinzminz. Aeu gyavaiq gaijgez fanj nduknaeuh dizcang cinghseuq gensez ndaw de gij vwndiz doedyienh haenx, netsaed doicaenh ceihfad ndij yawhfuengz nduknaeuh dijhi gensez, dawz cazbanh anq hung anq youqgaenj dangguh gij cosih youqgaenj fanj nduknaeuh, doengzseiz engq yawjnaek cidu gensez. It dwg nyinhcaen ceihleix gij vwndiz cwngfuj gunghcoz yinzyenz aeu gienz maeuz seileih ndij mbouj caenh cizcwz ciemqgienz. Cimdoiq gunghcwngz gensez、 diegdeih sawjyunghgienz cienjnyiengh ndij gvangcanj swhyenz haifat、 guekmiz canjgienz gyauhyiz、 cwngfuj dajcawx daengj cungdenj lingjyiz miz gij vwndiz neix, gyarengz guh gij hong cazcawq famhfap famhgij anqgienh, genhgez cawqfad nduknaeuh fwnswj. Ngeih dwg cietsaed gyagiengz cinghseuq gaghaed, nyinhcaen gvancez caephengz

  《Lenzcwng Cunjcwz》, lozsiz aen cidu dinghgeiz baugau gij cingzgvang lingjdauj ganbu souhaeuj、 fangzcanj、 douzswh caeuq gvan (yah) lwg guh gijmaz hong、 senj youq rog guek (gyaiq) daengj, gag rox ciepsouh gamduk. Gyagiengz gij hong saemjgeiq ndij gamcaz. Gyarengz gamduk hingzcwng gihgvanh lingjdauj ganbu caeuq bouxfucwz guekmiz giyez、 swyez danhvei. Sam dwg genhgez fanjdui saisaengq sajbaizciengz ndij hingzsizcujyi. Aeu cinggemj veiyi、 vwnzgen,cingleix caeuq gveihfan gak cungj dazbiuh、 bingzbeij、 biujcangh caeuq lundanz、 gingdenj daengj hozdung. Coengz ginghfei fuengmienh bae yiemzyiemz gaemhanh. Gveihfan guenjleix goengsaeh yungh ci faenboiq, caemhcaiq cizgiz doicaenh gaijgwz gij cidu goengsaeh yungh ci. Gyavaiq saedhengz caizcwng yawhsuenq goenghai,hawj yinzminz rox cwngfuj yungh bae geijlai cienz、 banh le gijmaz saeh. Gak gaep cwngfuj cungj aeu roengzrengz vih yinzminz banhsaeh; moix boux gunghvuyenz cungj aeu caencingq baenz boux fugsaeh yinzminz.

  Gak boux daibyauj!

  Gyamaenh caeuq fazcanj gak minzcuz daih doxgiet, dwg gij gaenbonj baujcwng guekgya ndaej ciengzgeiz andingh、 mwnhoengh hwngvuengh, gij gaenbonj leih’ik gak cuz yinzminz couh youq giz neix. Aen genhciz caeuq laeb caezcienz minzcuz gihyiz swci cidu, cienzmienh lozsiz gij cwngcwz cosih cunghyangh cihciz siujsoq minzcuz caeuq dieg minzcuz fazcanj haenx. Ceiqdingh hengzguh aen haj bi gveihva gvendaengz bangfuz doengh aen minzcuz vunz haemq noix de fazcanj、 doicaenh aen hengzdoengh hwng henzguek fouq lwgminz caeuq fazcanj siujsoq minzcuz saehnieb. Hawj raeuz doxgiet haenqguh baenaj,doengzcaez sij bien lizsij faenzcieng moq Cunghvaz minzcuz mwnhoengh fazcanj.

  Cienzmienh gvancez gij cunghgyau gunghcoz gihbwnj fuengcim aen dangj, haeujlaeg lozsiz 《Cunghgyau Swvu Diuzlaeh》, fazveih gij cizgiz cozyung doengh boux yinzsw cunghgyaugai caeuq gyoengq ginzcung saenq gyauq youq coicaenh ginghci fazcanj、sevei huzndei fuengmienh haenx.

  Laebdaeb gyagiengz gyauzvu gunghcoz, baujhoh gij gienzik cingqdangq gyoengq beixnuengx youq rog guek, baujhoh gij gienzik habfap gyoengq beixnuengx ma guek ndij gij lwgyah de, cungfaen fazveih gij cozyung daegbied gyoengqde youq ndaw coicaenh guekcoj dungjyiz ndij minzcuz saenqhwng haenx.

  Gak boux daibyauj!

  Laebhwnj gij gozfangz gaenjmaenh, gensez aen yinzminz ginhdui giengzak, dwg gij baujcang youqgaenj henhoh guekgya cawjgienz、 ancienz、fazcanj leih`ik ndij cienzmienh gensez siujgangh sevei. Aeu gaenjgaenj hopheux gij gunghcoz dagiz dangj ndij guekgya, coengz mizyauq hengzguh sigij moq gaihdon moq gij lizsij sijming ginhdui raeuz bae naemj, cienzmienh gyagiengz ginhdui gwzmingva yendaiva cwnggveihva gensez, mboujduenh daezsang gij naengzlig guhbaenz lai cungj lai yiengh ginhsw yinvu、 aeu gij naengzlig dwkhingz laj sinsizva diuzgen gizbu cancwngh guh haedsim haenx. Genhciz dawz swhsiengj cwngci gensez baij youq vih daih`it. Cizgiz bae guh gij ginhsw yinlen youq baihlaj sinsizva diuzgen haenx. Gyavaiq yamqdin cienzmienh gensez gij houginz yienhdaih. Doidoengh yiengh ginhminz yungzhab haenx fazcanj, gyagiengz gozfangz gohyenz ndij vujgi canghbei gensez. Cizgiz onjdangq doicaenh gozfangz caeuq ginhdui gaijgwz. Genhciz ciuqfap guenjleix ginhdui、 coengzyiemz guenjleix ginhdui. Genhgez guhbaenz ciengjyiemj gouqcai daengj gij yinvu gip hoj yiemj naek neix. Gensez yendaiva vujcangh gingjcaz ligliengh, demgiengz gij naengzlig dawzsouj、 cawqceq saehgienh fwtfat ndij fanj gungjbu hen onjdingh. Gyagiengz gozfangz dung`yenz caeuq gensez ligliengh bwhlaeng, gyamaenh ndij fazcanj ginhcwng ginhminz doxgiet.

  Gak boux daibyauj!

  Raeuz yaek giendingh mbouj bienq bae gvancez gij fuengcim “aen guek ndeu song cungj cidu”、 “vunz Yanghgangj guenjleix Yanghgangj”、 “vunz Aumwnz guenjleix Aumwnz”、 gag guenj cingzdoh gig sang neix, cienzlig cihciz Yanghgangj、 Aumwnz song aen daegbied hingzcwnggih fazcanj ginghci, gaijndei gij saedceij beksingq. Cihciz Yanghgangj gyamaenh ndij daezswng aen diegvih dwg gozci ginhyungz、 mouyiz、 hangzyin cungsim neix. Cihciz Aumwnz gensez seiqgyaiq lijyouz yietnaiq cungsim, coicaenh ginghci habdangq lai cungj lai yiengh bae fazcanj. Cungfaen fazveih Yanghgangj、 Aumwnz youq ndaw guekgya cingjdaej fazcanj canloz gij cozyung daegbied de. Caenh`itbouh daezsang diegndaw ndij Gangj Au doxgap gij gihciva suijbingz de, cihciz Yez Gangj Au gyalaeg gihyiz doxgap guh, saedyienh doxleih caezhingz. Youq ndaw lizsij cincwngz Cunghvaz minzcuz fukhwng hungmbwk, gyoengq yinzminz diegndaw guekcoj yaek ndij gyoengq beixnuengx Gangj Au gaemfwngz roengzrengz baenaj, caezyiengj gij cunhyenz ndij miznaj aen guekcoj hungmbwk raeuz!

  Raeuz yaek genhciz gij dacwng fuengcim ndij gak hangh cwngcwz youq hingzsi moq fazcanj song hamq gvanhaeh、coicaenh guekcoj hozbingz dungjyiz neix. Laebdaeb doicaenh song hamq doxyaeng, cizgiz lozsiz song hamq ginghci doxgap gvaengxgyaq hezyi, gyagiengz canjnieb doxgap guh, gyavaiq saenhwng canjnieb、 ginhyungz daengj yienhdaih fuzvuyez doxgap fazcanj, cihciz gij Daluz giyez miz diuzgen de bae Daizvanh douzswh. Cihciz gij ginghcigih hamq baihsae haijyaz youq ndaw doicaenh song hamq gyauhliuz doxgap fazveih gij cozyung sien byaij sien sawq. Haeujlaeg guh song hamq sevei gak gyaiq gyauhliuz, cizgiz gya`gvangq song hamq vwnzva gyauyuz doxgap. Demlai caemhcaiq coicaenh song hamq cwngci doxsaenq, gyamaenh gij cwngci giekdaej song hamq gvanhaeh hozbingz fazcanj, doengzcaez henhoh aen gizmen ndei song hamq gvanhaeh hozbingz fazcanj. Raeuz gig saenq, caenh`aeu gyoengq lwglan Cunghvaz ndaw guek rog guek laebdaeb doengzcaez roengzrengz buekguh, guekcoj hozbingz dungjyiz daihnieb couh itdingh ndaej saedyienh!

  Gak boux daibyauj!

  Raeuz yaek laebdaeb yaengx sang mbaw geiz hozbingz、 fazcanj、 doxgap neix, genhciz gij hozbingz vaigyauh cwngcwz doglaeb gag guhcawj neix, genhciz byaij diuz roen hozbingz fazcanj, genhciz ciuqhengz gij canloz hailangh doxleih caezhingz, genhciz doidoengh gensez aen seiqgyaiq huzndei naihnanz hozbingz、 doengzcaez mwnhoengh neix, hawj yendaiva gensez guek raeuz cauh gij baihrog vanzging ndij diuzgen engqgya mizleih.

  Raeuz aeu baujciz ndij cujyau guek hung gvanhaeh gengangh onjdingh fazcanj, cizgiz doicaenh doiqvah doxgap, gyadaih gij leih`ik caezcaemh ndij gij giekdaej doxgap. Genhciz gij seiqhenz vaigyauh fuengcim “ndij gekleiz doxndei, ndij gekleiz guhdoih” neix, gyalaeg gij doxgap gvanhaeh ndij guekgya seiqhenz doxhuz doxndei haenx, doicaenh aen cincwngz gihyiz ndij siuj gihyiz doxgap. Demlai caemhcaiq doicaenh ndij gyoengq guekgya cingqcaih fazcanj haenx gij conzdungj doxndei doxgap gvanhaeh de, caenh’itbouh lozsiz ndij gyadaih doxgap cingzgoj, doicaenh doxgap fuengsik cauhmoq ndij gihci gensez. Cizgiz guh lai mbiengj vaigyauh, aeu Ngeihcib Guek Cizdonz Funghvei daengj guh cujyau bingzdaiz, gyagiengz hungzgvanh ginghci cwngcwz hezdiuz, doidoengh gozci ginghci ginhyungz dijhi gaijgwz, coicaenh seiqgyaiq ginghci giengzak、 ndaej lienzdaemh、 bingzyaenx demlai, youq doidoengh gaijgez yezdenj vwndiz caeuq gij vwndiz gvendaengz cienz seiqgyaiq haenx fazveih gensezsing cozyung, hengzguh gij gozci cwzyin ndij yivu wnggai hengz haenx. Cungguek cwngfuj caeuq yinzminz nyienh ndij gozci sevei itheij, doengzcaez wngdoiq fung`yiemj diuhcan, doengzcaez faenyiengj fazcanj gihyi, vih vunzloih hozbingz ndij fazcanj aen saehnieb ceiq ndei neix guh ok gung`yen moq!

  Gak boux daibyauj!

  Dauqyawj doenghbaez, raeuz cauh ok le gij niebcik ronghsag mbouj bingzciengz;muenghyawj daengzcog, raeuz doiq guekgya gij gingjsaek gyaeundei baenaj cungmuenx saenqsim!Hawj raeuz youz aen Dangj Cunghyangh aeu Huz Ginjdauh dungzci guh cungjsuhgi neix daeuj lingjdauj, ndaetndaet gaemdawz lizsij gihyi, mbeihung mienhdoiq gak cungj diuhcan, hairoen baenaj, doxgiet haenqguh, netsaed guhhong, roengzrengz saedyienh “12•5” seizgeiz haidaeuz ndei, dawz aen saehnieb hungmbwk yiengh seveicujyi miz Cungguek daegsaek neix laebdaeb nyoengx baenaj!
Dozsiengq