Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CWNGFUJ GUNGHCOZ BAUGAU

——2010 Nienz 3 Nyied 5 Hauh Youq Gwnz Hoih Daih Cib’it Gaiq Daengx Guek Yinzminz Daibyauj Daihhoih Daihsam Baez Veiyi

Gozvuyen cungjlij  Vwnh Gyahbauj
  
【Cihsaw Hung’iq : hung rauh iq】  Dajyaenq
      

  Gak boux daibyauj:

  Seizneix, gou daibyauj gozvuyen yiengq daihhoih baugau   cwngfuj   gunghcoz, cingj saemjlwnh, caemhcaiq cingj Daengx Guek Cwnghez gak boux veijyenz daezok yigen.

  1、 Ngeuxyawj Gij Gunghcoz 2009 Nienz

  2009 nienz dwg haeuj sigij moq doxdaeuj guek raeuz ginghci fazcanj bi ceiq hojnanz de. Bi’gvaq mwh neix, gozci ginhyungz veizgih vanzlij banhlah, seiqgyaiq ginghci doekbaih youqgaenj, guek raeuz ginghci deng cungdongj gig haenq, cuzgouj daih fukdoh doekdaemq, mbouj noix giyez ginghyingz hojnanz, miz mbangj lij deng dingzcanj haepdou, gyoengq vunz saetnieb daihliengh demgya, nungzminzgungh daihbuek dauqma ranzmbanj, ginghci demlai suzdu sawqmwh doekdaemq. Youq gij cingzgvang hojnanz dangqmaz neix, daengx guek gak cuz yinzminz miz Cunghgoz Gungcanjdangj lingjdauj, giendingh saenqsim, nyig nanz baenaj, haenqrengz buekguh, coengzyungz wngqdoiq gozci ginhyungz veizgih cungdongj, youq daengx seiqgyaiq lingxdaeuz saedyienh ginghci dauqhwnj bienqndei, gaijgwz hailangh caeuq seveicujyi yendaiva gensez caiq ndaejdaengz cingzcik hungloet. Ndaw guek swnghcanj cungjciz dabdaengz 33.5 fanh ik maenz, beij bigonq demlai 8.7%; caizcwng souhaeuj 6.85 fanh ik maenz, demlai 11.7%; haeuxgwn canjliengh 53082 fanh dunh, caiq cauh’ok gij canjliengh lizsij ceiq sang, saedyienh lienzdaemh 6 bi demcanj; hawsingz saendem couhnieb 1102 fanh vunz; hawsingz gihminz moix vunz bingzyaenz ndaej ceiboiq souhaeuj 17175 maenz, lajmbanj gihminz moix vunz bingzyaenz cingh souhaeuj 5153 maenz, saedceih demlai 9.8% caeuq 8.5%.   Guek raeuz youq gwnz roen cienzmienh gensez siujgangh sevei youh byaij ok yamq maenh’onj   ndeu. Sizcen caiq baez cwngmingz, gijmaz gannanz yung’yiemj cungj lanzdangj mbouj ndaej gij lizsij cincwngz Cunghvaz Minzcuz dauqndaej hwngvuengh hungmbwk.

  Bi gvaqbae neix, gig mbouj bingzciengz, sawj vunz haenqrengz hwnjdaeuj. Raeuz lungzcung angqhoh Cungguek moq laebbaenz 60 hopbi. Yawjraen seizneix dauqngeix doenghbaez,gij cingzcik gig ndei aen guekcoj hungmbwk raeuz, gig daih gikfat le daengx guek yinzminz, sawj daihgya roxnyinh miz saenqsim miznaj, gig daih demgiengz le gij rengzgietcomz daengx Cunghvaz Minzcuz, gig daih daezswng le gij gozci diegvih caeuq yingjyangjliz guek raeuz, gijneix bietdingh yaek gikleih raeuz youq gwnz roen gensez yiengh seveicujyi miz Cungguek daegsaek haenx laebdaeb haenqrengz baenaj. Bi ndeu daeuj, raeuz cujyau guh le gij hong laj neix: (1) Gyagiengz caeuq gaijndei hungzgvanh diuzgung, coicaenh ginghci bingzonj haemq vaiq fazcanj.

  Raeuz saedhengz cizgiz caizcwng cwngcwz caeuq habdoh soengyungz hobi cwngcwz, cienzmienh saedhengz caemhcaiq mboujduenh dinghndei   buek giva wngqdoiq gozci ginhyungz veizgih haenx. Daih gveihmoz demgya caizcwng ceiok caeuq saedhengz gezgousing gemjgvaeh, baujciz hobi sindai riengjvaiq demlai, daezsang hobi cwngcwz ndaej lienzdaemh saedhengz, gyadaih cigsoh yungzswh gveihmoz, muenxcuk ginghci sevei fazcanj gij swhginh aeuyungh de, mizyauq gyadaih le ndaw guek sihgiuz, gig vaiq niujcienj le gij seiqdaeuz ginghci demlai suzdu   doekdaemq haenx. Roengzrengz gyalai gihminz siuhfei. Gij cwngcwz raeuz gujli siuhfei haenx, lingjyiz baenz gvangq、 ligliengh baenz hung、 souh’ik mienh baenz hung, dwg coengzlaiz mboujcaengz miz gvaq. Cunghyangh caizcwng dwkhaeuj swhginh 450 ik maenz, boujdiep gyadienh giceh mozdozceh roengzmbanj、 giceh gyadienh aeu gaeuq vuenh moq caeuq nungzgih nungzgi dajcawx. Gemj buenq cwngsou siuj baizliengh giceh goucisui, gemjmienx gij suisouh mizgven ranzyouq gaicawx, cihciz gij siuhfei cawx ranz gag youq. Daengx bi giceh gai ok 1364 fanh aen, demlai 46.2%; sanghbinjfangz gai ok 9.37 ik bingzfanghmij, demlai 42.1%;sevei siuhfeibinj gailingz cungjngeg saedsaeh demlai 16.9%, siuhfei doiq ragdoengh ginghci demlai gij cozyung de demgiengz gig yienhda.

  Coicaenh douzswh demlai riengjvaiq. Raeuz fazveih cwngfuj douzswh gij cozyung“seiq liengz ngauz cien gaen” haenx, dazyinx daiqdoengh sevei douzswh. Saedhengz song bi   saendem 4 fanh ik maenz douzswh giva. 2009 nienz cunghyangh cwngfuj gunghgung douzswh 9243 ik maenz, beij bigonq yawhsuenq demgya 5038 ik maenz, ndaw de, baujcangsing ranzyouq、 lajmbanj minzswngh gunghcwngz、 sevei saehnieb douzswh ciemq 44%, gag guhcawj cauhmoq、 gezgou diuzcingj、 mbaet nwngzyenz gemj baizcuengq caeuq swnghdai gensez ciemq 16%, gij giekdaej sezsih gensez hungloet ciemq 23%, deng caihaih gvaqlaeng hoizfuk dauqcungz gensez ciemq 14%.   Daengx sevei guding swhcanj douzswh demlai 30.1%, douzswh gezgou caenh’itbouh gaijndei. Douzswh riengjvaiq demlai, mizyauq boujdauq le guekrog sihgiuz doekdaemq gij mboujgaeuq de, gyagiengz le giz buegnyieg de, vih ginghci sevei fazcanj gyaeraez dwk roengz le aen giekdaej maenhsaed.

  Raeuz gyavaiq doicaenh Vwnconh deihdoengh caihaih gvaqlaeng hoizfuk dauqcungz hwnqguh, dieg dengcai naek gaenq guhbaenz douzswh 6545 ik maenz, ciemq gveihva cungj douzswh 65.5%. Miz guekgya daihlig cihciz, miz daengx guek yinzminz fouzsei bangcoh,gyoengq ginzcung diegcai haenqrengz buekguh, sawj aen diegcai deng sonjsaet youqgaenj ndaej okyienh yienghceij moqsaksak.   Aen dem aen hawsingz moq yat maj hwnjdaeuj, aen dem aen mbanj moq hoenghhwdhwd.   Gijneix cungfaen daejyienh le Cunghvaz Minzcuz doxndiep doxgyaez gangj mbouj caenh,gig mizrengz yienh’ok le seveicujyi cidu gij ndeicawq fouzbeij de.

  (2) Daihlig diuzcingj ginghci gezgou, vih fazcanj ndaej gyaenanz roengzmaenh giekdaej.   Raeuz dawz bauj demlai caeuq diuzcingj gezgou gaenjmaed giethab hwnjdaeuj, gyavaiq gaijgez gij gezgousing mauzdun   hanhhaed ginghci fazcanj haenx.

  “Sam nungz” gunghcoz caenh’itbouh gyagiengz. Cunghyangh caizcwng yungh youq   “sam nungz”   ceiok 7253 ik maenz, demlai 21.8%. Daih fukdoh daezsang haeuxgwn ceiqdaemq soucawx gyaqcienz. Haidoengh saedhengz daengx guek saendem cien ik gaen haeuxgwn swnghcanj naengzlig gensez gveihva. Laebdaeb gaijndei lajmbanj swnghcanj swnghhoz diuzgen, lajmbanj gwnraemx ancienz gunghcwngz sawj   6069 fanh boux nungzminz souh’ik, saendem 510 fanh ranz yungh caujgi, saen hai caeuq gaijcauh lajmbanj goengloh 38 fanh goengleix、 lajmbanj denvangj senlu 26.6 fanh goengleix, youh miz 80 fanh hoh ranzvaih lajmbanj ndaej daengz gaijcauh, 9.2 fanh hoh youzlangh muzminz miz ranz dinghyouq. Raeuz gyadaih fuzbinz ligdoh, dieg gungzhoj swnghcanj swnghhoz diuzgen ndaej gaijndei gig yienhda.

  Canjyez gezgou diuzcingj ligdoh gyadaih. Ceiqdingh caemhcaiq saedhengz cib daih cungdenj canjyez diuzcingj saenqhwng giva.   Gujli giyez gyavaiq gisuz gaijcauh, anbaiz 200 ik maenz gigaij cienhangh swhginh cihciz 4441 aen gigaij hanghmoeg. Cungdenj hangznieb gyan’gyoeb cungzcuj ndaejdaengz cincanj moq. Roengz daih rengz naenxhaed bouhfaenh hangznieb canjnwngz lw gvaqbouh caeuq cungzfuk gensez, gvendingz siujhojden gihcuj 2617 fanh cienvaj, cawz bae gij lienhgang canjnwngz doeklaeng 1690 fanh dunh、 lienhdiet canjnwngz doeklaeng 2110 fanh dunh、 suijniz canjnwngz doeklaeng   7416 fanh dunh、 ciuhdan canjnwngz doeklaeng 1809 fanh dunh. Gyavaiq saedhengz guekgya gohgi   cienhangh hungnaek, cunghyangh caizcwng yungh youq gohgi ceiok 1512 ik maenz, demlai 30%. Cizgiz cihciz gag guhcawj cauhmoq canjbinj doigvangq wngqyungh,  nwngzyenz cinghseuq、 daihsam daih yizdung dunghsin daengj buek canjyez saenhwng he ndaej riengjvaiq fazcanj. Daihlig gyagiengz giekdaej sezsih gensez, gij dietloh saen guh douzhaeuj yinhhengz yingzyez 5557 goengleix, gauhsuz gunghlu saen guh doengci 4719 goengleix, hawsingz gveijdau gyauhdungh gensez gyavaiq, saen guh、 gaijcauh gya’gvangq

  minzyung gihcangz 35 aen; saendem fatdienh canghgih 8970 fanh cienvaj, heiq baihsae soengq baihdoeng ngeih sienq duenh baihsae gunghcwngz saedyienh gungheiq, raemx baihnamz diuh baihbaek gunghcwngz gensez gyavaiq doicaenh, 6183 aen suijgu miz yungyiemj haenx, cawz yiemj gyamaenh gunghcoz haigoeng gensez.

  Mbaet nwngzyenz gemj baizcuengq   caeuq vanzging baujhoh netsaed doi baenaj.   Anbaiz gij douzswh ndaw yawhsuenq, cihciz cungdenj mbaet nwngzyenz gunghcwngz、 sinzvanz ginghci daengj hanghmoeg 2983 aen; saedhengz aen gunghcwngz mbaet nwngzyenz canjbinj hawj beksingq ndaej ndeicawq, doigvangq mbaet nwngzyenz gunghdiuz 500 lai fanh aen、 gij daeng ciuqrongh gauhyau   1.5 ik aen. Laebdaeb doicaenh linzyez cungdenj swnghdai gunghcwngz gensez, cauhbaenz ndoengfaex 588 fanh gunghgingj, ndoengfaex goebcw bijliz dabdaengz 20.36%. Gyoebhab ceihleix raemxnamh riuzsaet menciz 4.8 fanh bingzfueng goengleix. Gyagiengz “sam dah sam huz ”   daengj cungdenj liuzyiz raemx uqlah fuengzceih caeuq gunghyez raemxfeiq heiqfeiq nyaqfeiq ceihleix. “11·5” seiq bi gonq de, gyoebsuenq hwnjdaeuj danhvei ndaw guek swnghcanj cungjciz nwngzyenz siuhauq doekdaemq 14.38%, vayoz yungh yangj soqliengh、 wyangjvaliuz baizcuengq soqliengh faenbied doekdaemq 9.66% caeuq 13.14%.   Cizgiz guh gij hong wngqdoiq gihou bienqvaq, mingzbeg daezok 2020 nienz guek raeuz gaemhanh vwnhsiz gidij baizcuengq hengzdoengh muzbyauh caeuq cwngcwz cosih. Gisieng yawhbauq yawhgingj caeuq deihdoengh gamcaek gunghcoz ndaejdaengz gyagiengz, caihaih   fuengzceih naengzlig mboujduenh daezswng.

  Gihyiz hezdiuz fazcanj byaij ok yamqdin moq. Haeujlaeg saedhengz gihyiz fazcanj cungjdaej canloz, ceiqdingh lai aen gihyiz fazcanj gveihva caeuq cwngcwz hungloet. Cunghbu Sihbu caeuq Dunghbwz digih gyavaiq hailangh haifat, cizgiz ciepsou canjyez senjnod,aen giekdaej fazcanj mboujduenh dwksaed; Dunghbu digih gyavaiq gezgou diuzcingj caeuq gag guhcawj cauhmoq, ginghci fazcanj rengzhoengh demgiengz. Gihyiz fazcanj okyienh gij yienghceij caeuq hingzsi ndei bugiz gaijndei、 gezgou bienq ndei、 hezdiuzsing daezsang neix.

  (3) Genhciz gyalaeg guh gaijgwz hailangh, mboujduenh laebndei gij dijci gihci doiq gohyoz fazcanj mizik haenx. Raeuz dawz gyalaeg gaijgwz hailangh, dangguh gij giengzdaih doenghlig wngqdoiq gozci ginhyungz veizgih, roengzrengz siucawz dijci gazlaengz, mboujduenh daezsang doiqrog hailangh suijbingz.

  Cungdenj lingjyiz caeuq gvanhgen vanzcez gaijgwz gyavaiq doicaenh. Cwnghcizsui conjhingz cienzmienh saedhengz. Cwngzbinjyouz gyagwz caeuq suifei gaijgwz swnhleih doicaenh, aen cwngzbinjyouz gyagwz cauxbaenz gihci moq gaenq ciuq gveihfan yinhhengz. Guekgya Gaihfaz Yinzhangz sanghyezva conjhingz caeuq Nungzyez Yinzhangz gujfwnci gaijgwz netsaed doi baenaj, hamj gyaiq mouyiz yinzminzbi gietsuenq sawqdiemj haidaeuz saedhengz. Cang’yezbanj cingqsik okdaiz, vih gag guhcawj cauhmoq caeuq gizyawz gij cang’yez giyez ndaej majhung haenx, haiok le diuz miengloh yungzswh moq. Deihfueng cwngfuj gihgou gaijgwz miz banjloh bae guh, swyez danhvei faenloih gaijgwz sawqdiemj onjbouh bae guh. Cizdij linzgenz cidu gaijgwz cienzmienh doihai, 1 ik gunghgingj dieg ndaemfaex doekdingh gienzleih daengz ranz, ciemq daengx guek cizdij dieg ndaemfaex   menciz 60%, neix dwg riengz dujdi gyahdingz cwngzbauh gvaqlaeng, guek raeuz lajmbanj ginghyingz cidu youh guh mbat bengwz hungloet ndeu.

  Gaihfanghingz ginghci suijbingz mboujduenh daezsang. Okdaiz baenzroix cwngcwz cosih bae onjdingh guekrog sihgiuz, yungh gij fuengsik hab gozci gvenqlaeh haenx cihciz cuzgouj giyez, guhbaenz geizdinj cuzgouj saenqyungh baujyiemj rapdawz baujyiemj 900 ik meijyenz, anbaiz 421 ik meijyenz   dahingz baenzdauq sezbei cuzgouj yungzswh baujyiemj. Gujli demgya cingouj. Bi’gvaq byonghbilaeng hainduj cingouj cuzgouj doekdaemq fukdoh gemjnoix yienhda, gozci hawciengz faenhngeg ndaejdaengz gyamaenh, daengx bi cingouj cuzgouj cungjngeg 2.2 fanh ik meijyenz. Niujcienj aen   gizmen leihyungh vaiswh doekdaemq, daengx bi saedsaeh leihyungh canghseng’eiq guekrog cigsoh douzswh 900 ik meijyenz. Giyez “byaij okbae” nyig hingzseiq swnghwnj, doengh loih mbouj dwg ginhyungz doiqrog cigsoh douzswh caeuq doiqrog gunghcwngz cwngzbauh yingzyez soqngeg, faenbied dabdaengz 433 ik meijyenz caeuq 777 ik meijyenz. Cizgiz camgya gozci hungzgvanh ginghci cwngcwz doiqvah hezdiuz caeuq ginghmou ginhyungz dox gapguh, youq doengzcaez wngqdoiq gozci ginhyungz veizgih ndaw de, fazveih le gij cozyung ik gaijgez vwndiz haenx.

  (4) Roengzrengz gaijndei minzswngh, gyavaiq fazcanj sevei saehnieb. Youq wngqdoiq gozci ginhyungz veizgih cungj cingzgvang neix, dou engqgya yawjnaek baujcang caeuq gaijndei minzswngh, cietsaed gaijgez gij leih’ik vwndiz yinzminz ginzcung ceiq gvansim、 ceiq cigciep、 ceiq yienhsaed haenx.

  Saedhengz gij couhnieb cwngcwz engqgya cizgiz.   Gyagiengz cwngfuj gij cwzyin coicaenh couhnieb. Cunghyangh caizcwng anbaiz couhnieb cienhangh swhginh 426 ik maenz, beij bigonq demlai 59%. Saedhengz gij cwngcwz gunnanz giyez doilaeng gyau sevei baujyenjfei roxnaeuz gyangqdaemq bouhfaenh feiliz、

  gemjmienx gij cienzgvaeh dauqcungz couhnieb caeuq daezhawj mizgven boujdiep daengj, gujli giyez onjdingh caeuq demgya couhnieb. Guh baenzroix couhnieb fuzvu hozdung, lai diuz miengloh haiok gunghyizsing couhnieb gangjvei, coicaenh gauhyau bizyezswngh roengz gihcwngz couhnieb、 bae budui dangbing caeuq bae giyez swyez danhvei couhnieb gensiz. Daengx bi cujciz 2100 fanh bouxguhhong singz mbanj camgya cizyez beizyin. Doengh gij cosih neix coicaenh couhnieb ndaej gihbwnj onjdingh.

  Gyavaiq laebndei sevei baujcang dijhi.   Bujben laebhwnj ciengxlaux baujyiemj swngjgaep dungjcouz cidu, okdaiz cwngzcin giyez cizgungh baudaengz nungzminzgungh gij ciengxlaux baujyiemj gvanhaeh cienj ok caeuq ciepswnj banhfap de. Youq 320 aen yienh, guh gij sawqdiemj lajmbanj sevei ciengxlaux baujyiemj moq, doidoengh guek raeuz sevei baujcang cidu gensez byaij ok gij yamqdin miz lizsij yiyi he. Cunghyangh caizcwng anbaiz sevei baujcang swhginh 2906 ik maenz, beij bigonq demlai 16.6%. Giyez duiyouh yinzyenz gihbwnj yangjlaujginh lienzdaemh 5 bi ndaej demgya, bi’gvaq youh bingzyaenz moix vunz daezsang 10%. Lajmbanj vujbaujhu gungciengx suijbingz、 youhfuj duisieng fujsiz bangbouj byauhcunj、 singz mbanj boux ndaej daengz ceiqdaemq swnghhoz baujcang de baujcang suijbingz cungj miz daezsang moq. Cunghyangh caizcwng anbaiz baujcangsing anhgih gunghcwngz gensez swhginh 551 ik maenz, beij bigonq demlai 2 boix. Saen guh、 gaij guh caeuq gyahung gak loih baujcangsing ranzyouq 200 fanh dauq, dieg ranzdiengz gaijcauh gaijgez ranzyouq 130 fanh dauq. Daengx guek sevei baujcang gihginh rom ndaej 6927 ik maenz, beij bigonq demlai 44.2%. Sevei baujcang dijhi ndaejdaengz gyagiengz.

  Caenh’itbouh coicaenh gyauyuz goengbingz. Daih fukdoh demgya daengx guek gyauyuz ceiok, ndaw de cunghyangh caizcwng ceiok 1981 ik maenz,beij bigonq demlai 23.6%.

  Cienzmienh lozsiz singz mbanj yivu gyauyuz cwngcwz, cunghyangh buedroengz lajmbanj yivu gyauyuz ginghfei 666 ik maenz, daezgonq bi ndeu saedyienh aen muzbyauh lajmbanj cungh、 siujyozswngh moix vunz goengyungh ginghfei 500 maenz caeuq 300 maenz neix. Saedhengz yivu gyauyuz gaihdon lauxsae cizyau gunghswh cidu. Cunghdwngj cizyez yozyau gij hagseng lajmbanj gyahdingz ginghci gunnanz、 caeuq gij hagseng conhyez gvendaengz nungzyez haenx, mbouj sou yozfei diuz cwngcwz neix haidaeuz saedhengz. Guekgya cuyoz cidu mboujduenh laebndei,yungh cienz bangcoh hagseng 2871 fanh vunz, gihbwnj baujcang le gij lwgnyez ranzgungz haenx mbouj aenvih gungzhoj cix mbouj ndaej haeujhag doegsaw.

  Onjbouh doicaenh yihyoz veiswngh saehnieb gaijgwz fazcanj. Cujciz saedhengz yihyoz veiswngh dijci gaijgwz. Cunghyangh caizcwng yihliuz veiswngh ceiok 1277 ik maenz, beij bigonq demlai 49.5%. Cwngzcin cizgungh caeuq cwngzcin gihminz gihbwnj yihliuz baujyiemj cambauj 4.01 ik vunz, yiengh lajmbanj hozcoz yihliuz cidu moq goemqcw 8.3 ik vunz.   Cunghyangh caizcwng anbaiz 429 ik maenz, gaijgez gij yihliuz baujyiemj vwndiz gyoengq duiyouh yinzyenz ndaw guekmiz giyez haepdou bocanj haenx. Gihbwnj yozvuz cidu youq 30% gihcwngz yihliuz veiswngh gihgou saedhengz.   Cunghyangh caizcwng cihciz hwnqguh le buek yienhgaep yihyen、 yanghcin cungsim veiswnghyen caeuq segih veiswngh fuzvu cungsim ndeu. Hainduj saedhengz gyadaih yizganh yizmyauz dajcim daengj gunghgung veiswngh fuzvu cienhangh hungnaek. Gyagiengz sizbinj、 yozbinj ancienz cienhangh   cingjceih. Mienhdoiq bingh Gyazhingz H1N1 Liuzganj banhlah, raeuz eiqfap gohyoz miz bouhloh bae guh gij hong fuengzre gaemhanh, mizyauq baujcang le yinzminz ginzcung sengmingh ancienz, henhoh le sevei cingqciengz cizsi.

  Youq gozci ginhyungz veizgih cungdongj haenqrem、 seiqgyaiq ginghci doekdaemq yiengh beigingj neix, guek raeuz ndaejdaengz gij cingzcik yienghneix saedcaih mbouj yungzheih. Neix dwg miz aen dangj cunghyangh aeu Huz Ginjdauh dungzci guh cungjsuhgi haenx dungjlamx daengxbuenz、 cingqdeng lingjdauj cij ndaejdaeuj, dwg daengx dangj daengx ginh daengx guek gak cuz yinzminz caezsim gaprengz、 doxgiet haenqguh cij ndaejdaeuj. Youq gizneix, gou daibyauj Gozvuyen, yiengq daengx guek gak cuz yinzminz, gak minzcuj dangjbai、 gak yinzminz donzdij caeuq gak gyaiq yinzsw, byaujsi caencingz docih! Yiengq Yanghgangj Daegbied Hingzcwnggih beixnuengx、 Yiengq Aumwnz Daegbied Hingzcwnggih beixnuengx、 Daizvanh beixnuengx caeuq gyoengq beixnuengx youq guekrog, byaujsi caencingz docih! Yiengq doengh aen guekgya cwngfuj、 gozci cujciz caeuq gak guek baengzyoux gvansim caeuq cihciz Cungguek yendaiva gensez haenx, byaujsi caencingz docih!

  Bi ndeu gvaqdaeuj, raeuz nyinhcaen gvancez lozsiz gohyoz fazcanjgvanh, cizgiz wngqdoiq gozci ginhyungz veizgih, cienzmienh guhndei cwngfuj gunghcoz, miz laj neix geij diemj dijvei: Bietdingh aeu genhciz yungh hawciengz gihci caeuq hungzgvanh diuzgung song cungj soujduenh, youq mwh genhciz hawciengz ginghci gaijgwz fuengyiengq、 fazveih hawciengz boiqbaij swhyenz gihcujsing cozyung、 gikfat gij rengzhoengh hawciengz, doengzseiz cungfaen fazveih guek raeuz seveicujyi cidu gezcwz yauliz sang、 cujciz daeklig、 gyoebcomz ligliengh banh daihsaeh gij youhsi neix. Bietdingh aeu genhciz cawqleix ndei geizdinj caeuq ciengzgeiz song fuengmienh gvanhaeh, yawjnaek gyae’gyawj giethab、 goekbyai caezceih, gawq haekfuk gij gunnanz geizdinj、 gaijgez gij mauzdun doedyienh, youh gyagiengz cungdenj lingjyiz caeuq buegnyieg vanzcez、 vih gyaeraez fazcanj roengzmaenh giekdaej. Bietdingh aeu genhciz dungjcouz ndawguek rogguek song aen dagiz, dawz gyadaih ndawguek sihgiuz dangguh ciengzgeiz canloz fuengcim, giendingh mbouj bienq bae saedhengz aen gaihfang canloz doxleih caez hingz, gyavaiq guhbaenz aen gwzgiz ndawguek rogguek sihgiuz hezdiuz ragdoengh ginghci demlai haenx. Bietdingh aeu genhciz fazcanj ginghci caeuq gaijndei minzswngh、 henhoh sevei goengbingz cwng’yi baihndaw dungjyiz, hopheux gaijndei minzswngh mouz fazcanj, dawz gaijndei minzswngh dangguh ginghci fazcanj giz haidin、 giz roengzdin caeuq gij doenghlig dingjnanz, yawjnaek henhoh goengbingz cwng’yi, hawj daengxcungq yinzminz doengzcaez yiengjsouh gaijgwz fazcanj cwngzgoj, coicaenh sevei doxhuz onjdingh. Bietdingh aeu genhciz fazveih cunghyangh caeuq deihfueng song aen cizgizsing, gawq giengzdiuh dungjyiz swhsiengj、 goq daengz cienzmienh, youh gujli ciuq saedsaeh dingh geiq、 damqra cauhmoq, cauhbaenz gij giengzdaih hablig doengzcaez haekfuk dangqnaj gannanz haenx. Doengh gij gingniemh neix, doiq raeuz genhciz byaij diuz roen seveicujyi miz Cungguek daegsaek, daezsang gij naengzlig gaemguenj seveicujyi hawciengz ginghci, doicaenh yendaiva cincwngz, cungj miz gij yiyi youqgaenj youh gyaeraez.

  2、 Gij Cujyau Yinvu   2010 Nienz

  Bineix dwg   bi ceiq youqgaenj laebdaeb wngqdoiq gozci ginhyungz veizgih、 baujciz ginghci bingzonj haemq vaiq fazcanj、 gyavaiq cienjbienq ginghci fazcanj fuengsik de, dwg bi youqgaenj cienzmienh saedyienh “11·5” gveihva muzbyauh、 vih “12·5” fazcanj roengz ndei giekdaej de.

  Bineix fazcanj vanzging yienznaeuz aiq ndei gvaq bi’gvaq, danhseih gij hingzsi baihnaj gig fukcab. Gak cungj cizgiz bienqvaq caeuq gij yingjyangj mbouj leih gizneix mizok gizhaenx siubae, gij vwndiz geizdinj caeuq gij mauzdun ciengzgeiz doxsan   doxgeuj, ndawguek yinhsu caeuq rogguek yinhsu dox yingjyangj, ginghci sevei fazcanj ndaw de “song nanz” vwndiz demlai. Coengz gozci bae yawj, seiqgyaiq ginghci mizmuengh ndaej hoizfuk demlai, gozci ginhyungz hawciengz cugbouh onjdingh, ginghci cenzgiuzva haeujlaeg fazcanj aen daih seiqdaeuz neix mbouj miz gaijbienq, seiqgyaiq ginghci gwzgiz daih bengwz、 daih diuzcingj ndaw de hamz miz fazcanj seizgei moq. Doengzseiz, seiqgyaiq ginghci hoizfuk gij giekdaej lij buegnyieg, ginhyungz lingjyiz fung’yiemj lij caengz cienzbouh siucawz, gak guek gikcoi cwngcwz doiqok gezcwz gannanz, gozci daihbuek sanghbinj gyagwz caeuq cujyau hobi veiliz aiq gyarem fubfab hwnjroengz, mouyiz baujhucujyi yo’gyaeuj yienhda,caiq gya dienheiq bienqvaq、 haeuxgwn ancienz、nwngzyenz swhyenz daengj cenzgiuzsing vwndiz doxsan doxcab, baihrog vanzging mbouj onjdingh、 mbouj doekdingh yinhsu vanzlij gig lai. Coengz ndawguek daeuj yawj, guek raeuz vanzlij cawqyouq mboengq canloz gihyi youqgaenj. Ginghci dauqswng bienq ndei gij giekdaej de caenh’itbouh gyamaenh,hawciengz saenqsim demgiengz, gyadaih ndawguek sihgiuz caeuq gaijndei minzswngh gij cwngcwz yauying de laebdaeb yienh okdaeuj, giyez gij naengzlig caeuq gingcwnghliz hab’wngq hawciengz bienqvaq de mboujduenh daezsang. Danhseih, ginghci sevei fazcanj ndaw de, vanzlij miz mbangjdi mauzdun caeuq vwndiz doedyienh. Ginghci demlai rengzndaw mbouj cuk, gag guhcawj cauhmoq naengzlig mbouj ak, bouhfaenh hangznieb canjnwngz lw gvaqbouh gij mauzdun neix doedyienh, gezgou diuzcingj nanzdoh gyadaih; couhnieb atlig cungjdaej daeuj gangj lienzdaemh demgya caeuq gezgouzsing yunghgoeng giepnoix gij mauzdun neix caez miz; nungzyez onjdingh fazcanj caeuq nungzminz lienzdaemh demsou aen giekdaej de mbouj onjmaenh, caizcwng ginhyungz lingjyiz gij fung’yiemj ndumjyouq haenx gyalai; yihliuz、 gyauyuz、 ranzyouq、 souhaeuj faenboiq、 sevei guenjleix daengj fuengmienh, gij vwndiz doedyienh haenx gaenjaeu gaijgez. Raeuz bietdingh aeu cienzmienh、 cingqdeng bae buenqdingh hingzseiq,baenzbaenz mbouj ndaej dawz ginghci dauqswng bienq ndei aen seiqdaeuz neix caeuq ginghci yinhhengz gaenbonj   cienj ndei yawj baenz yiengh ndeu. Aeu demgya youheiq yisiz, cungfaen leihyungh gij diuzgen ndei caeuq gij yinhsu cizgiz, roengzrengz vaqgej mauzdun, engqgya coumaed bae guh ndei cunjbei wngqdoiq gak cungj fung’yiemj caeuq diuhcan, gaemmaenh gunghcoz cujdunggenz.

  Guh ndei gij cwngfuj gunghcoz bineix, aeu nyinhcaen gvancez lozsiz aen dangj cibcaet daih caeuq cibcaet gaiq sam cungh、 seiq cungh cenzvei cingsaenz, aeu Dwng Siujbingz Lijlun caeuq “Sam Aen Daibyauj” Cung’yau Swhsiengj guh cijdauj, haeujlaeg gvancez lozsiz gohyoz fazcanjgvanh, roengzrengz gauj ndei hungzgvanh diuzgung caeuq baujciz ginghci bingzonj haemq vaiq fazcanj, roengzrengz gyavaiq ginghci fazcanj fuengsik cienjbienq caeuq ginghci gezgou diuzcingj, roengzrengz doicaenh gaijgwz hailangh caeuq gag guhcawj cauhmoq, roengzrengz gaijndei minzswngh caeuq coicaenh sevei doxhuz onjdingh, cienzmienh doicaenh seveicujyi ginghci gensez、 cwngci gensez、 vwnzva gensez、 sevei gensez caeuq swnghdai vwnzmingz gensez, gyavaiq bae cienzmienh hwnqguh siujgangh sevei, roengzrengz saedyienh ginghci sevei fazcanj youh ndei youh vaiq.

  Bineix ginghci sevei fazcanj cujyau yawhgeiz muzbyauh dwg: Ndawguek swnghcanj cungjciz demlai 8% baedauq; cwngzcin saendem couhnieb 900 fanh vunz doxhwnj, cwngzcin dwnghgi saetnieb bijliz gaemhanh youq 4.6% dauqndaw; gihminz siuhfei gyagwz hwnjsang fukdoh 3% baedauq; gozci sou cei cingzgvang ndaej gaijndei. Gizneix aeu daegbied gangjmingz, daezok ndawguek swnghcanj cungjciz demlai 8% baedauq, cujyau dwg giengzdiuh aeu ndei guhdaeuz, dazyinx gak fuengmienh dawz gunghcoz cungdenj cuengq daengz cienjbienq ginghci fazcanj fuengsik、 diuzcingj ginghci gezgou bae. Daezok gihminz siuhfei gyagwz hwnjsang fukdoh 3% baedauq,gyoebhab ngeixnaemj le bi’gvaq gyagwz bienqdoengh aen yinhsu ndiengqrieng haenx、 gozci daihbuek sanghbinj gyagwz gij conzdauj yauying de、 ndawguek hobi sindai demlai gij nguhlaeng yingjyangj caeuq gihminz gij dingjsouh naengzlig de, caemhcaiq vih swhyenz vanzging suifei caeuq swhyenzsing canjbinj gyagwz gaijgwz louz miz itdingh gunghgenh.

  Bineix yaek cungdenj guh ndei bet fuengmienh gunghcoz:

  (1) Daezsang hungzgvanh diuzgung suijbingz, baujciz ginghci bingzonj haemq vaiq fazcanj

  Aeu laebdaeb saedhengz cizgiz caizcwng cwngcwz caeuq gij hobi cwngcwz habdoh soengyungz haenx, baujciz cwngcwz ndaej lienzdaemh caeuq onjdingh, gaengawq hingzsi moq cingzgvang moq, mboujduenh sawj cwngcwz miz cimdoiq caeuq ndaej lingzvued,gaemdawz ndei cwngcwz saedhengz ligdoh、 cezcou caeuq cungdenj. Cawqleix ndei gij gvanhaeh baujciz ginghci bingzonj haemq vaiq fazcanj、 diuzcingj ginghci gezgou caeuq guenjleix dunghcang yawhgeiz. Gawq aeu baujciz cwngcwz ligdoh cukgaeuq、 gyamaenh   ginghci dauqswng bienq ndei aen seiqdaeuz neix, youh aeu gyavaiq ginghci gezgou diuzcingj、 doidoengh ginghci fazcanj fuengsik cienjbienq ndaejdaengz saedcaih cincanj, vanzlij aeu guenjleix ndei dunghcang yawhgeiz、 onjdingh vuzgya cungj suijbingz.

  Laebdaeb saedhengz cizgiz caizcwng cwngcwz. It dwg baujciz gij caizcwng cihhoengz caeuq gozcai gveihmoz habdangq. Bineix dajsuenq anbaiz caizcwng cihhoengz 10500 ik maenz, ndaw de cunghyangh caizcwng cihhoengz 8500 ik maenz, laebdaeb bang fat gij caiq deihfueng 2000 ik maenz caemhcaiq gyoeb haeuj deihfueng caizcwng yawhsuenq bae. Yienghneix anbaiz cujyau dwg naemj daengz bineix caizcwng soucei mauzdun vanzlij cibfaen doedyienh. Coengz caizcwng souhaeuj bae yawj, bigonq gij daegbied demsou cosih dwg mbatdog haenx, mbouj miz roxnaeuz gemjnoix lo, vanzlij aeu laebdaeb saedhengz gezgousing gemjsui cwngcwz, caizcwng souhaeuj demlai mbouj vaiq geijlai; coengz caizcwng ceiok bae yawj, laebdaeb saedhengz baenz gyoengq giva wngqdoiq gozci ginhyungz veizgih haenx, guhbaenz gij hanghmoeg cingqcaih guh、 gyagiengz buegnyieg vanzcez、 doicaenh gaijgwz、 gaijndei minzswngh、 henhoh onjdingh daengj cungj aeu demgya douzhaeuj. Ngeih dwg laebdaeb saedhengz gezgouzsing gemjsuiq cwngcwz,coicaenh gyadaih ndawguek sihgiuz caeuq ginghci gezgou diuzcingj. Sam dwg gaijndei caizcwng ceiok gezgou, miz bauj miz naenx,cienz aeu yungh youq giz ceiq mizyungh de. Laebdaeb lai yungh youq

  “sam nungz”、 minzswngh、 sevei saehnieb daengj lingjyiz, cihciz mbaet nwngzyenz youh vanzbauj、 gag guhcawj cauhmoq caeuq gensez dieg mbouj fatdad haenx. Yiemzgek gaemhanh itbuenqsingq ceiok, daihlig atsuk goengyungh ginghfei. Seiq dwg cietsaed gyagiengz cwngfujsing caivu guenjleix, demgiengz gij ligliengh   hanhhaed baihndaw baihrog, mizyauq bae fuengzre caeuq vaqgej gij caizcwng fung’yiemj ndumjyouq. Doengzseiz, aeu ciuqfap gyagiengz suisouh cwngguenj caeuq guenjleix gij souhaeuj mbouj dwg cienzgvaeh, yiemzhaenq dwkceih ndojgvaeh yaeuhgvaeh hingzveiz, guh daengz wnggai sou cungj sou caez.

  Laebdaeb saedhengz gij hobi cwngcwz habdangq soengyungz. It dwg baujciz hobi sindai hableix cukgaeuq. Bineix gvangjyi hobi M2 demlai muzbyauh dwg 17% baedauq, saen dem yinzminzbi daigvanj 7.5 fanh ik maenz baedauq. Song aen cijbyauh neix yienznaeuz cungj daemq gvaq aen soq bi’gvaq saedsaeh saedhengz haenx, hoeng vanzlij dwg gij cwngcwz muzbyauh habdangq soengyungz de, ndaej muenxcuk ginghci sevei fazcanj gij swhginh sihgiuz hableix de. Doengzseiz hix ikleih guenjleix ndei huq bengz ngaenz cienh yawhgeiz、 sawj ginhyungz engq ndaej lienzdaemh cihciz ginghci fazcanj. Ngeih dwg gaijndei sindai gezgou. Lozsiz gij sindai cwngcwz miz bauj miz haed, gyagiengz cihciz cungdenj lingjyiz caeuq hothoh buegnyieg、 mizyauq hoizsoeng aen vwndiz nungzhoh caeuq giyez iq yungzswh nanz, yiemzgek gaemhanh ciq cienz hawj gij hangznieb haunwngz sang、 uqlah lai caeuq gij hangznieb canjnwngz lw gvaqbouh. Daigvanj gvaqlaeng aeu gyagiengz guenjleix, saedbauj cienz sindai ndaej cihciz saeddaej ginghci. Sam dwg cizgiz gyadaih cigciep yungzswh. Laebndei aen swhbwnj hawciengz dijhi miz lai cwngzsw de, gyahung gujgenz caeuq caiqgienq yungzswh gveihmoz, engq ndei bae muenxcuk lai cungj lai yiengh douzswh yungzswh aeuyungh. Seiq dwg gyagiengz fung’yiemj guenjleix, engqgya mizyauq bae gamguenj ginhyungz. Damqra laebhwnj hangh hungzgvanh guenjleix cidu dwg siujsim youh maedsaed haenx, engqgya mizyauq bae gaemhaed gij swhbwnj hamj gyaiq riuzdoengh de, fuengzre gak loih ginhyungz fung’yiemj. Laebdaeb laebndei yinzminzbi veiliz cauxbaenz gihci, baujciz yinzminzbi veiliz youq gwnz suijbingz hableix、 bingzyaenx de gihbwnj onjdingh.

  Cizgiz gyadaih gihminz siuhfei sihgiuz. Laebdaeb daezsang nungzminz souhaeuj、 giyez duiyouh yinzyenz gihbwnj yangjlaujginh、 bouhfaenh youhfuj doiqsiengq daiyi caeuq singz mbanj gihminz ceiq daemq swnghhoz baujcang suijbingz, demgiengz gij siuhfei naengzlig gihminz daegbied dwg doengh boux souhaeuj daemq、 cungdaengj haenx. Gyamaenh gyadaih conzdungj siuhfei, cizgiz gungganq saenqsik、 lijyouz、 vwnzva、 cangqndang、 beizyin、 ciengxlaux、 gyahdingz fuzvu daengj siuhfei yezdenj, coicaenh siuhfei gezgou ndaej gaijndei swnggaep. Gyadaih siuhfei sindai. Gyagiengz hwnqguh gij giekdaej sezsih sanghmou riuzdoeng dijhi daengj, cizgiz fazcanj denswj sanghvu. Cingjdun caeuq gveihfan hawciengz cizsi, roengzrengz cauh baenz aen siuhfei vanzging   bienhleih、 ancienz、 cuengqsim haenx. Laebdaeb saedhengz caeuq laebndei gak hangh cwngcwz cosih gujli siuhfei. Daih fukdoh daezsang gyadienh roengz mbanj canjbinj ceiq sang hanhgyaq, demgya binjcungj caeuq hingzhauh, gyadaih boujdiep fanveiz, laebndei boujdiep byauhcunj caeuq banhfap, gyagiengz guenjleix caeuq gaujhwz doengh aen giyez douzbyauh ndaej dawz de, daezsang canjbinj caetliengh caeuq fuzvu suijbingz; laebndei gij cwngcwz gyadienh、 giceh yungh gaeuq vuenh moq caeuq giceh mozdozceh roengz mbanj, gij goucisui siuj baizliengh giceh ciuq 7.5% cwngsou. Raeuz itdingh aeu lozsiz ndei doengh gij cwngcwz cosih neix, dawz saeh ndei banh ndei bae, caencingq hawj gyoengq ginzcung ndaej daengz ndeicawq.

  Haenqrengz gaijndei douzswh gezgou. Gak gaep cwngfuj douzswh cungj aeu gyoebcomz ligliengh bauj cungdenj, yiemzgek gaemhanh gij hanghmoeg saen haihong, swhginh anbaiz cujyau yungh youq gij hanghmoeg swnj guh caeuq satbyai, cietsaed fuengzre okyienh “buenqgyaengh”gunghcwngz. Netsaed doicaenh dieg deihdoengh souh cai hoizfuk dauqhwnq, bauj caetliengh caeuq soqliengh guhbaenz yinvu. Gujli gyadaih ndawbiengz douzswh, laebndei caeuq lozsiz gij cwngcwz mizgven coicaenh ndawbiengz douzswh. Gyagiengz caeuq gaijcaenh douzswh guenjleix, yiemzgek caephengz doengh gij hawciengz cinjhaeuj byauhcunj caeuq canjyez cwngcwz gvendaengz yungh dieg、 mbaet nwngzyenz、 vanzbauj、 ancienz daengj, cietsaed fuengzre cungzfuk hwnqguh. Doiq gij hwnqguh hanghmoeg miz caizcwng swhginh dwkhaeuj haenx, aeu daj gyaeuj daengz rieng gyagiengz gamduk, giengiet baexmienx yungh gyadaih ndaw guek sihgiuz guh mingzdaeuz, gauj gij yienghsiengq gunghcwngz caeuq cwngciz gunghcwngz lwgminz sinhoj saiyaix cienzcaiz haenx. Genhciz gohyoz minzcuj gezcwz, saedbauj gunghgung douzswh caencingq yungh daengz doicaenh ginghci sevei fazcanj caeuq gaijndei yinzminz swnghhoz, souh ndaej sizcen caeuq lizsij gienjniemh.

  (2) Gyavaiq cienjbienq ginghci fazcanj fuengsik, diuzcingj gaijndei ginghci gezgou

  Cienjbienq ginghci fazcanj fuengsik mbouj ndaej menh saek di. Aeu daihlig doidoengh ginghci haeuj diuz fazcanj roenloh cauhmoq doidoengh、 swhgeij gag saedyienh demlai bae.

  Laebdaeb doicaenh cungdenj canjyez diuzcingj caeuq saenqhwng. It dwg gyadaih gisuz gaijcauh ligdoh. Yungh ndei cienhangh gigaij swhginh, dazyinx giyez haifat canjbinj moq caeuq mbaetyungh nwngzyenz gemjnoix siuhauq. Ngeih dwg coicaenh giyez gyan’gyoeb dauqlaeb. Dwkbyoengq hangznieb lungjdon caeuq digih fungsuj, doidoengh youhsi giyez bae gyan’gyoeb aen giyez gannanz, gyavaiq cawz bae gij canjnwngz doeklaeng. Sam dwg cienzmienh daezswng canjbinj caetliengh. Dazyinx giyez yungh binjbaiz、 byauhcunj、 fuzvu caeuq yauqik guh cungdenj, laeb caezcienz caetliengh guenjleix dijhi, giengzvaq sevei cwzyin. Cietsaed gyagiengz gensez hawciengz gamguenj dijhi caeuq gangj lauxsaed souj saenqyungh dijhi, roengzrengz dawz gij canjbinj caetliengh guek raeuz daezsang daengz aen suijbingz moq bae.

  Daihlig gungganq canlozsing saenhwng canjyez. Gozci ginhyungz veizgih cingqcaih coi ok gohgi gwzming caeuq canjyez gwzming moq. Fazcanj canlozsing saenhwng canjyez, ciengjciemq giz diegsang ginghci gohgi, gietdingh guekgya daengzcog, itdingh aeu cadawz gihyi, mingzbeg cungdenj, guh ok cingzcik. Aeu daihlig fazcanj nwngzyenz moq、 caizliuh moq、 mbaet nwngzyenz vanzbauj、 swnghvuz yihyoz、 sinsiz vangjloz caeuq gauhdonh cauhguh canjyez. Cizgiz doicaenh nwngzyenz moq giceh、“sam vangj” yungzhab ndaej miz saedcaet guh baenaj, gyavaiq yenzgiu haifat caeuq wngqyungh vuzlenzvangj. Gyadaih dwkhaeuj caeuq yungh cwngcwz cihciz gij canjyez saenhwng miz canlozsing haenx.

  Caenh’itbouh coicaenh giyez iq rauh fazcanj. It dwg laebhwnj caeuq laebndei giyez iq rauh fuzvu dijhi. Cagaenj coihdingh aen byauhcunj vehfaen giyez iq rauh, gyavaiq hwnqguh giyez iq rauh gunghgung fuzvu bingzdaiz、 saenqsik fuzvu vangjloz caeuq   giyez iq cauhnieb gihdi, caenh’itbouh gemjnoix、 genjva hingzcwng saemjbae, giengiet cingleix caeuq siubae gij soufeiq mbouj hableix. Ngeih dwg laebdaeb lozsiz aen cwngcwz caizcwng cihciz giyez iq rauh. Cunghyangh caizcwng bangfuz giyez iq rauh fazcanj cienhangh swhginh anbaiz 106 ik maenz. Doiq bouhfaenh giyez iq leih noix haenx, saedhengz sojdwzsui youhvei cwngcwz. Gij gisuz gaijcauh cienhangh douzswh ndaw cunghyangh caizcwng yawhsuenq haenx, aeu goebcw daengz giyez iq rauh, deihfueng cwngfuj caemh aeu gyadaih dwkhaeuj. Sam dwg gyagiengz doiq giyez iq rauh guh ginhyungz cihciz. Laebndei giyez iq sindai gaujhwz dijhi. Gujli laebhwnj giyez iq daigvanj fung’yiemj dienzbouj gihginh. Giyez iq rauh daigvanj nabgvaeh gaxgonq cienzngeg bued ok bwhmiz sonjsaet cienzbwh. Fazcanj lai cwngzsw giyez iq rauh saenqyungh danhbauj dijhi, lozsiz ndei aen cwngcwz doiq gij giyez iq rauh saenqyungh danhbauj gihgou hab diuzgienh haenx mienx sou yingzyezsui、 daez aeu cienzbwh caeuq bang dienz sonjsaet youq nabgvaeh gaxgonq gaeucawz. Haigvangq diuz miengloh yungzswh giyez iq rauh, cietsaed gaijgez aen vwndiz giyez iq rauh daegbied dwg giyez iq nanz yungzswh haenx.

  Gyavaiq fazcanj fuzvuyez. Caenh’itbouh daezsang fuzvuyez fazcanj suijbingz caeuq de youq ndaw gozminz ginghci gij bijcung de. Daihlig fazcanj ginhyungz、 vuzliuz、 saenqsik、 yenzgiu haifat、 gunghyez sezgi、 sanghvu、 mbaet nwngzyenz vanzbauj fuzvu daengj doengh gij fuzvuyez mienhyiengq swnghcanj neix, coicaenh fuzvuyez caeuq yienhdaih cicauyez ndaej ndeindei yungzhab hwnjdaeuj. Daihlig fazcanj sicwng goengyungh saehnieb、 fangzdicanj caeuq vuzyez fuzvu、 segih fuzvu daengj doengh gij fuzvuyez mienhyiengq minzswngh neix, gyavaiq fazcanj lijyouzyez, cizgiz haigvangq sinhhingz fuzvu lingjyiz. Lajmbanj fuzvuyez giekdaej buegnyieg、 fazcanj rengzndumj hung, aeu gvavaiq cauhlaeb caeuq laebndei aen lajmbanj swnghcanj swnghhoz fuzvu dijhi yungh swnghcanj siugai、 gohgi saenqsik caeuq ginhyungz fuzvu guh cawjdaej haenx. Gyavaiq laebhwnj aen fuzvuyez cinjhaeuj cidu dwg goenghai bingzdaengj gveihfan haenx, gujli sevei swhbwnj haeujbae. Caenh’itbouh laebndei gij cwngcwz coicaenh fuzvuyez fazcanj, cugbouh saedyienh loih fuzvuyez guekgya gujli haenx youq yungh dienh、yungh raemx、 yungh heiq、 yungh ndat fuengmienh caeuq gunghyez gihbwnj doengz gyaq.

  Hoenx hingz ciengz gunghgenhcan caeuq cizgiujcan mbaetyungh nwngzyenz gemjnoix baizcuengq. It aeu dawz gunghyez、 gyaudoeng、 gencuz guh cungdenj, daihlig doicaenh mbaetyungh nwngzyenz, daezsang nwngzyenz yauliz. Netsaed doicaenh cib daih cungdenj mbaetyungh nwngzyenz gunghcwngz、 cien gya giyez mbaetyungh nwngzyenz hengzdoengh caeuq mbaetyungh nwngzyenz canjbinj ikleih beksingq gunghcwngz, cauhbaenz yiengh funghsang ndei cienz sevei mbaetyungh nwngzyenz. Bineix aeu caiq demgya mbaetyungh nwngzyenz naengzlig 8000 fanh dunh byauhcunj meiz. Sojmiz doengh aen gihcuj coemh meiz cungj aeu gyavaiq hwnqguh caemhcaiq yinhhengz gij sezsih siu bae gij liuz ndaw hoenz. Ngeih aeu gyagiengz vanzging baujhoh. Cizgiz doicaenh doengh gij gunghcoz cungdenj liuzyiz gihyiz vanzging ceihleix caeuq hawsingz raemxuq nyapnyaj cawqleix、 ceihleix gij uqlah daj ndaw nungzyez swnghcanj miz okdaeuj haenx、 gyoebhab cingjceih gij uqlah cungginhsuz haenx daengj. Saen demgya hawsingz cawqleix raemxuq naengzlig moix ngoenz 1500 fanh lizfanghmij、 cawqleix nyapnyaj naengzlig moix ngoenz 6 fanh dunh. Sam aeu cizgiz fazcanj sinzvanz ginghci caeuq mbaetyungh nwngzyenz vanzbauj canjyez. Cihciz sinzvanz ginghci gisuz yenzgiu haifat、 sifan doigvangq caeuq naengzlig gensez. Ca’ndei gij hong mbaet nwngzyenz、 mbaet raemx、 mbaet dieg、 mbaet caizliuh. Doicaenh gvangcanj swhyenz gyoebhab leihyungh、 dauqsou leihyungh gunghyez feiqhuq、 yungh ndat lw atlig lw fatdienh caeuq leihyungh ngoenznaengz nyapnyaj bienqbaenz swhyenz. Seiq aeu cizgiz wngqdoiq dienheiq bienqvaq. Gyagiengz hwnqguh gij naengzlig hab’wngq caeuq gemjmenh dienheiq bienqvaq. Daihlig haifat dihdan gisuz, doigvangq gij gisuz naengzyauq sang ndaej mbaetyungh nwngzyenz, cizgiz fazcanj nwngzyenz moq caeuq nwngzyenz ndaej caiqseng, gyagiengz hwnqguh cinwngz denvangj. Gyavaiq guh hawj diegguek bienq heu, demgya ndoengfaex comz dingh gij danq, saen demgya cauh ndoeng menciz mbouj noix gvaq 592 fanh gunghgingj. Aeu roengzrengz hwnqguh gij canjyez dijhi caeuq siuhfei vunqsik yungh baizcuengq danq noix guh dwzcwngh haenx, cizgiz camgya gozci hozcoz wngqdoiq dienheiq bienqvaq, doidoengh cienz seiqgyaiq wngqdoiq dienheiq bienqvaq aeu ndaej cincanj moq.

  Doicaenh gihyiz ginghci hezdiuz fazcanj. Laebdaeb haeujlaeg doicaenh Sihbu daih haifat, cienzmienh saenqhwng Dunghbwz digih daengj laux gunghyez gihdi, daihlig coicaenh Cunghbu digih hwnghwnj, cizgiz cihciz Dunghbu digih sien fazcanj gonq. Nyinhcaen lozsiz gak hangh gveihva caeuq cwngcwz coicaenh gihyiz ginghci sevei fazcanj. Gyavaiq doicaenh hwnqguh cawjdaej gunghnwngzgih. Gyagiengz cihciz gwzming laujgih、 minzcuz digih、 gij dieg henzguek caeuq gij dieg gungzhoj. Cungdenj ca’ndei yiengh hong ceiqdingh caeuq saedhengz Sihcang ndij seiq swngj Cangcuz digih、 Sinhgyangh ginghci sevei fazcanj cwngcwz. Saedhengz gihyiz fazcanj cungjdij canloz, yawjnaek fazveih gij youhsi gak dieg doxbeij raen miz haenx, miz cimdoiq bae gaijgez gij mauzdun caeuq vwndiz doedyienh youq ndaw gak dieg fazcanj miz haenx; yawjnaek niujcienj gihyiz ginghci sevei fazcanj cengca gyadaih aen cohyiengq neix, demgiengz fazcanj hezdiuzsing; yawjnaek gyavaiq gaijndei gunghgung caizcwng dijhi, coicaenh gihbwnj gunghgung fuzvu bienq ndaej doxdaengj.

  (3) Gyadaih ligdoh dungjcouz singz mbanj fazcanj, giengzvaq nungzyez nungzcunh fazcanj giekdaej

  Youq lienzdaemh 6 bi ndaej demcanj demsou le, engq aeu mbouj soengse saekdi bae ca’ndei gij hong “sam nungz”. Aeu ciuq gij iugouz dungjcouz hawsingz lajmbanj fazcanj, genhciz dawz gaijgez ndei “sam nungz” vwndiz, dangguh cienzbouh hong youqgaenj ndaw de yiengh ceiq youqgaenj de, caenh’itbouh giengzvaq aen cwngcwz hawj “sam nungz” bienq giengz、 ndaej ndeicawq, hezdiuz doicaenh gunghyezva、 cwngzcinva caeuq nungzyez nungzcunh yendaiva, gyamaenh caeuq fazcanj nungzyez nungzcunh hingzsik ndei.

  Coicaenh nungzyez onjdingh fazcanj caeuq nungzminz lienzdaemh demsou. Onjdingh haeuxgwn swnghcanj, gyalai youzliuh dajndaem menciz, demgya gunghawj gij nungzcanjbinj youqgaenj cix giepnoix haenx, daih gveihmoz gaihcanj cauhlaeb gij haeux faiq youz dangz canjliengh sang haenx, daih gveihnmoz gaihcanj cauhlaeb yenzyi canjbinj swnghcanj caeuq ciuq byauhcunj bae ciengx doihduz ciengx doenghduz doenghgo ndaw raemx, baujcang “daeh haeux”、 “swx byaek” ndaej ancienz. Laebdaeb saedhengz cigciep boujdiep boux nungzminz ndaem haeux, demgya nungzswh gyoebhab boujdiep、 ceh ndei boujdiep、 cawx nungzgih nungzgi boujdiep, cunghyangh caizcwng dajsuenq anbaiz cienz boujdiep 1335 ik maenz, beij bigonq demgya 60.4 ik maenz. Caenh’itbouh daezsang haeuxgwn ceiq daemq soucawx gyaqcienz, haeuxciem caeux、haeuxciem miuzngeih caeuq haeuxciem laeng、 haeuxsuen moix 50 goenggaen faenbied daezsang 3 maenz、 5 maenz caeuq 10 maenz, mienhsaeq moix 50 goenggaen daezsang 3 maenz, laebdaeb saedhengz aen cwngcwz laemzseiz sourom nungzcanjbinj youqgaenj, hawj nungzminz ndaej daengz engq lai saedcaih ndeicawq. Gyagiengz doiq aen yienh ok haeux lai、 aen yienh ciengx mou lai、 aen yienh ciengx cwz vaiz lai guh caizcwng cihciz. Daihlig fazcanj nungzcanjbinj gyagoengnieb, doicaenh nungzyez canjyezva ginghyingz, cihciz baefat hawciengz caeuq nungzmou hawciengz swnggaep gaijcauh, doidoengh swnghcanj caeuq hawciengz doiqciep. Coicaenh nungzminz couhnieb cauhnieb, daj lai roenloh bae demgya nungzminz souhaeuj. Caenh’itbouh gyadaih fuzbinz haifat ligdoh. Raeuz aeu genhciz mbouj cuengqsoeng bae siucawz gungzhoj doeklaeng, hawj nungzminz ginzcung ndaej caeux di gvaq gij saedceij fouqmiz cangqonj.

  Gyagiengz hwnqguh nungzyez giekdaej sezsih. Genhciz caizcwng ceiok sien cihciz nungzyez nungzcunh fazcanj, ndaw yawhsuenq guding swhcanj douzswh sien dwkhaeuj nungzyez giekdaej sezsih caeuq lajmbanj minzswngh gunghcwngz, gij souhaeuj oknyiengh diegdeih ndaej haenx, sien yungh youq haifat reihnaz nungzyez caeuq hwnqguh lajmbanj giekdaej sezsih. Cunghyangh caizcwng dajsuenq anbaiz “sam nungz” dwkhaeuj 8183 ik maenz, beij bigonq demgya 930 ik maenz, deihfueng gak gaep caizcwng caemh aeu demgya dwkhaeuj. Dawz dieg cujyau swnghcanj haeuxgwn guh cungdenj, cienzmienh saedhengz daengx guek saen demgya cien ik gaen haeuxgwn swnghcanj naengzlig gensez gveihva. Aeu nungzdenz suijli guh cungdenj, gyagiengz hwnqguh nungzyez giekdaej sezsih, gyavaiq boiqdauq gaijcauh dahingz cunghhingz dieg dwk raemx, gyadaih mbaet dwk raemx menciz, hwnqguh gij reihnaz byauhcunj sang, guhbaenz aen yinvu siucawz gij yung’yiemj caeuq gyamaenh doengh aen suijgu hung rauh caeuq cungdenj suijgu iq miz yung’yiemj haenx. Dawz gungganq ceh ndei guh cungdenj, gyavaiq nungzyez gohgi cauhmoq caeuq doigvangq, saedhengz ndei aen gohgi cienhangh hungnaek gungganq conjgihyinh swnghvuz binjcungj moq. Cizgiz doicaenh hwnqguh aen sifangih yienhdaih nungzyez. Gyavaiq hwnqguh gij gunghgung fuzvu gihgou youq yanghcin caeuq mbangj dieg guh nungzyez gisuz doigvangq、 fuengzre gaemhanh doenghduz doenghgo binghraq、 gamguenj nungzcanjbinj caetliengh haenx.

  Gyalaeg lajmbanj gaijgwz. Hauz mbouj doenghngauz bae genhciz lajmbanj gihbwnj ginghyingz cidu, gyavaiq laebndei mizgven fazliz fazgveih caeuq cwngcwz, gij diegdeih cwngzbauh gvanhaeh seizneix, aeu baujciz onjdingh caemhcaiq ciengzgeiz mbouj bienq. Gyagiengz guenjleix caeuq fuzvu diegdeih cwngzbauh ginghyingzgenz riuzcienj, youq gwnz giekdaej ciuq fap gag nyienh miz boizbouj riuzcienj de, bae fazcanj lai cungj hingzsik gveihmoz ginghyingz. Laebdaeb doicaenh lajmbanj gyoebhab gaijgwz. Laebndei cizdij linzgenz cidu gaijgwz boiqdauq cwngcwz. Haidaeuz guh guekmiz linzcangz gaijgwz. Laebdaeb doicaenh caujyenz gihbwnj ginghyingz cidu gaijgwz. Fazcanj nungzminz ciennieb hozcozse, daezsang gij cingzdoh nungzyez cujcizva. Gyavaiq gungganq siujhingz nungzcunh ginhyungz gihgou, cizgiz doigvangq lajmbanj siujngeg saenqyungh daigvanj, cietsaed gaijndei lajmbanj ginhyungz fuzvu. Haeujlaeg doicaenh yanghcin gihgou gaijgwz.

  Dungjcouz doicaenh cwngzcinva caeuq lajmbanj moq gensez. Genhciz byaij diuz roen cwngzcinva miz Cungguek daegsaek, coicaenh hawsingz hung rauh iq caeuq cwngzcin iq ndaej hezdiuz fazcanj, roengzrengz daezsang cwngzcin gyoebhab dangrap naengzlig, fazveih hawsingz doiq lajmbanj gij fuzse daiqdoengh cozyung de, coicaenh cwngzcinva caeuq lajmbanj moq gensez ndaej doxbang bienq ndei. Gyahung yenyiz ginghci, daihlig gyagiengz hwnqguh yienhsingz caeuq aen cin cungsim gij giekdaej sezsih caeuq vanzging, dazyinx feihnungz canjyez caeuq vunz lajmbanj miz bouhloh comz haeuj cwngzcin iq, gujli doengh boux nungzminzgungh dauqma ranzmbanj haenx youq dangdieg cauhnieb. Hwnqguh singz mbanj cungj aeu genhciz hangh cidu baujhoh reihnaz  ceiq yiemzgek caeuq hangh cidu mbaetyungh diegdeih ceiq yiemzgek, cietsaed baujhoh gij habfap gienzik nungzminz. Doicaenh huciz cidu gaijgwz, cuengqsoeng gij diuzgienh roengz hugouj haeuj hawsingz rauh iq caeuq cwngzcin iq. Miz giva miz bouhloh bae gaijgez ndei gij vwndiz nungzminzgungh youq ndaw cwngzcin couhnieb caeuq swnghhoz, cugbouh saedyienh nungzminzgungh youq cienzhong、 lwgnyez haeuj hag、 gunghgung veiswngh、 co ranz cawx ranz dem sevei baujcang fuengmienh, caeuq boux gihminz ndaw cwngzcin ndaej yiengjsouh dakdaih doxdoengz. Caenh’itbouh demgya lajmbanj swnghcanj swnghhoz sezsih gensez douzhaeuj, caiq haidoengh baez gaijcauh lajmbanj denvangj ndeu, gyadaih gveihmoz hwnqguh lajmbanj caujgi, bineix caiq gaijgez 6000 fanh boux vunz lajmbanj aen vwndiz gwn raemx ancienz, saedhengz lajmbanj cinghseuq gunghcwngz, gaijndei lajmbanj swnghcanj swnghhoz diuzgienh. Raeuz aeu hawj doengh boux daj nungzyez senj daeuj youh hab diuzgienh de, cugbouh bienqbaenz cwngzcin gihminz, hix aeu hawj nungzminz miz aen ranzmbanj gyaeundei ndaej gvaq saedceij vuenyungz ndeu.

  (4) Cienzmienh saedhengz aen canloz gohgyau hwng guek caeuq aen canloz yinzcaiz giengz guek

  Gyauyuz、 gohgi caeuq yinzcaiz, dwg ndaek ringiek sawj guekgya maenh’ak、 minzcuz hwngvuengh, hix dwg aen haedsim gyoebhab gueklig.

  Sien fazcanj gyauyuz saehnieb gonq. Yaek sawj guekgya maenh’ak bietdingh aeu sien sawj gyauyuz maenh’ak. Cijmiz gij gyauyuz daih’it daengj, cijndaej ganq ok gij yinzcaiz daih’it daengj, hwnqguh aen guekgya daih’it daengj. Aeu cagaenj haidoengh saedhengz guekgya cunggeiz ciengzgeiz gyauyuz gaijgwz caeuq fazcanj gveihva ganghyau. Comzrengz ca’ndei haj aen fuengmienh: It dwg doicaenh gyauyuz gaijgwz. Aeu gaijfang swhsiengj, daihdamj dwkbyoengq, gamj bae cauhmoq, gujli sawqniemh, doiq banhhag dijci、 sonhag neiyungz、 gyauyuz fuengfap、 bingzgyaq cidu daengj guh hidungj gaijgwz. Genhciz ganq vunz guh goek, daihlig doicaenh suciz gyauyuz. Damqra gij yozyau guenjleix dijci caeuq banhhag vunqsik ndaej hab’wngq mbouj doengz loihhingz gyauyuz caeuq yinzcaiz hungmaj haenx, daezsang banhhag caeuq yinzcaiz gungganq suijbingz. Gujli sevei ligliengh hwngbanh gyauyuz, muenxcuk cungqvunz gij gyauyuz sihgiuz miz lai yiengh haenx. Ngeih dwg coicaenh yivu gyauyuz bingzyaenx fazcanj. Youq gwnz giekdaej hableix baijbouh, gyavaiq doicaenh Cunghbu Sihbu digih cuhcungh ranzhag gaijcauh caeuq daengx guek cunghyoz siujyoz ranzhag ancienz gunghcwngz, caenhvaiq sawj sojmiz yozyau gij ranzhag、 sezbei caeuq lauxsae cungj dabdaengz gvidingh byauhcunj. Vih lajmbanj cunghyoz siujyoz bangaep boiq hawj dohmeizdij gizgyae gyauyuz sezbei, hawj gyoengq lwgnyez youq guengjdaih lajmbanj caeuq dieg bien dieg gyae haenx, ndaej doengzcaez yiengjsouh gyauyuz swhyenz ndei. Gyagiengz hwnqguh gij yozyau yozcenz gyauyuz caeuq daegbied gyauyuz. Gyarengz cihciz siujsoq minzcuz caeuq minzcuz digih gyauyuz. Sam dwg laebdaeb gyagiengz cizyez gyauyuz. Aeu couhnieb guh muzbyauh, cingjhab gyauyuz swhyenz, gaijcaenh sonhag fuengsik, haenqrengz gungganq hagseng gij naengzlig couhnieb cauhnieb de. Seiq dwg doicaenh gauhdwngj yozyau guenjleix dijci caeuq cauhswngh cidu gaijgwz. Caenh’itbouh lozsiz gauhdwngj yozyau banhhag swcujgenz, gujli gauhdwngj yozyau hab’wngq couhnieb caeuq ginghci sevei fazcanj sihyau, diuzcingj anlaeb conhyez caeuq gocwngz, doidoengh gauhdwngj yozyau dawz gungganq yinzcaiz、 gohgi cauhmoq caeuq yozsuz fazcanj gaenjmaed giethab, gikcoi lauxsae ciensim guh gyauyuz, roengzrengz hwnqguh aen dayoz miz daegsaek、 suijbingz sang haenx. Cauhguh lai aen daih’it daengj dayoz, gungganq gij yinzcaiz gig maenh’ak. Cunghyangh caizcwng aeu gyadaih cihciz fazcanj Cunghbu Sihbu gauhdwngj gyauyuz. Haj dwg gyagiengz hwnqguh lauxsae duivuj. Daj lai fuengmienh yungh cosih, gaepyinx gij yinzcaiz ndei bae guh gyauyuz saehnieb, gujli gyoengqde baenzseiq guh lauxsae. Cungdenj gyagiengz beizyin gij lauxsae caeuq yaucangj doengh aen hagdangz guh lajmbanj yivu gyauyuz, gujli lauxsae ndei daengz dieg gungzhoj lajmbanj bae sonhag. Gyagiengz swhdwz gyauyuz, demgiengz gij cwzyinganj caeuq sijmingganj gyoengq lauxsae. Gyauyuz dakmiz ik fanh gyahdingz doiq saedceij gyaeundei gij maqmuengh haenx, gvanhaeh daengz minzcuz suciz caeuq guekgya daengzcog. Gyauyuz mbouj bujgiz mbouj daezsang, guekgya couh mbouj ndaej giengzdaih hwngvuengh. Aen dauhleix neix raeuz aeu ciengzlwenx geiq maenh.

  Daihlig fazcanj gohyoz gisuz. Aeu nyinhcaen gvancez aen fuengcim gag guhcawj cauhmoq, cienzmienh doicaenh hwnqguh aen guekgya ak cauhmoq, gyavaiq saedhengz gohgi hungnaek cienhangh. Haenqrengz dwkbyoengq gij gvanhgen gohgi vwndiz ndaej daiqdoengh gisuz gwzming、 coicaenh canjyez saenqhwng haenx, dwkbyoengq gij gunghyizsing gohgi vwndiz hungnaek ndaej daezsang ndangcangq suijbingz、 baujcang gaijndei minzswngh haenx, dwkbyoengq gij canloz gauh gisuz vwndiz ndaej demgiengz gozci gingcwnghliz、 henhoh guekgya ancienz haenx. Yawj ndaej engq gyae bae baijbouh swnghvuz、 nazmij、 liengswj diuzgung、 saenqsik vangjloz、 dienheiq bienqvaq、 gunghdenh haijyangz daengj lingjyiz doengh gij giekdaej yenzgiu caeuq gij gisuz lingxdaeuz yenzgiu. Gyalaeg gohgi dijci gaijgwz, roengzrengz gaijgez aen vwndiz gohgi caeuq ginghci dox faenhai, doidoengh hwnqguh aen gisuz cauhmoq dijhi aeu giyez guh cawjdaej、 hawciengz guh dazyinx、 swnghcanj gyauyoz yenzgiu dox giethab haenx, coicaenh gohgi swhyenz youhva boiqnda、 hailangh caez yungh caeuq yauliz sang bae leihyungh. Aeu daihlig saedhengz cihsiz canjgenz canloz, gyagiengz cihsiz canjgenz cauhguh、wngqyungh caeuq baujhoh. Caenh’itbouh gikfat gij cauhmoq rengzhoengh gyoengq gohgi gunghcozcej caeuq daengx aen sevei.

  Gyavaiq haifat yinzcaiz swhyenz. Yinzcaiz dwg daih’it swhyenz. Aeu dungjcouz doicaenh gensez gak loih yinzcaiz duivuj, gyarengz gungganq gij gohgi yinzcaiz ak cauhmoq、 gij cienmonz yinzcaiz caeuq ginwngz sang yinzcaiz ndaw ginghci sevei fazcanj cungdenj lingjyiz, cizgiz yinxhaeuj gij yinzcaiz caengzsoq sang rog guek. Laebhwnj caezcienz cwngfuj、 sevei、 yungh vunz danvih caeuq goyinz daengj doengh gij yinzcaiz gungganq douzhaeuj gihci lai yiengh haenx, cungfaen fazveih aen gihcujsing cozyung hawciengz boiqnda yinzcaiz swhyenz, roengzrengz cauh baenz aen cidu vanzging sawj yinzcaiz ndaej buek dem buek nyoenx okdaeuj、 bouxboux ndaej cungfaen dawzok bonjsaeh, hwnqguh aen guekgya yinzcaiz swhyenz gig lai.

  (5) Daihlig gyagiengz vwnzva gensez

  Guekgya fazcanj、 minzcuz saenqhwng, mboujdanh aeu miz gij ginghci ligliengh giengzdaih, engq aeu miz vwnzva ligliengh giengzdaih. Vwnzva dwg gij cingsaenz caeuq lingzhoenz aen minzcuz, dwg gij yinhsu ndaej gietdingh aen minzcuz caencingq miz ligliengh haenx, ndaej laegdaeuq yingjyangj gij fazcanj cincwngz aen guekgya ndeu, gaijbienq gij minghyinh aen minzcuz ndeu. Mbouj miz senhcin vwnzva fazcanj, mbouj miz daengx minzcuz vwnzmingz suciz daezsang, couh mbouj ndaej caencingq saedyienh yendaiva. Gij seizdaih cingsaenz gaijfang swhsiengj、 gaijgwz hailangh, gaenq baenz gij senhcin vwnzva ligliengh doidoengh sevei baenaj, sawj Cunghvaz Minzcuz hwngfat fwdfwd、 rengzhoengh cukgaeuq.

  It bi gvaqdaeuj, raeuz daihlig fazcanj gunghyizsing vwnzva saehnieb, gyavaiq doicaenh vwnzva dijci gaijgwz, gyagiengz hwnqguh gunghgung vwnzva fuzvu dijhi, coicaenh vwnzva canjyez majhung gig vaiq, gaujhoengh vwnzva hawciengz, mizyauq gyahung le gij ndaw guek aeuyungh de. Youq ndaw bimoq, raeuz aeu engqgya yawjnaek caeuq daihlig gyagiengz vwnzva gensez. Swnjciep caeuq hungzyangz gij conzdungj vwnzva gig ndei Cunghvaz Minzcuz, gaepsou caeuq camciuq yungh gij vwnzmingz cwngzgoj seiqgyaiq gak guek, hwnqguh gij cingsaenz ranzmbanj Cunghvaz Minzcuz caezmiz haenx. Cwngfuj aeu engq ndei bae hengzguh gij cwzyin fazcanj gunghyizsing vwnzva saehnieb, baujcang gij gihbwnj sihgiuz caeuq gienzik yinzminz ginzcung. Hwnqguh vwnzva giekdaej sezsih caeuq boiqnda gunghgung vwnzva swhyenz, aeu lai yungh daengz gihcwngz、 daegbied dwg lajmbanj dem dieg Cunghbu Sihbu, doicaenh meijsuzgvanj、 duzsuhgvanj、 vwnzva’gvanj、 bozvuzgvanj mienxfeiq hailangh, fungfouq gij cingsaenz vwnzva swnghhoz yinzminz ginzcung. Aeu laebdaeb doicaenh vwnzva dijci gaijgwz, bangfuz gunghyizsing vwnzva saehnieb, fazcanj vwnzva canjyez, gujli vwnzva cauhmoq, gungganq guzgan vwnzva giyez, swnghcanj ok engq lai vwnzva canjbinj swhsiengj neiyungz ndei, muenxcuk yinzminz ginzcung gij vwnzva sihgiuz lai cungj lai yiengh haenx. Coicaenh cezyoz sevei gohyoz、 gvangjbo yingjsi、 sinhvwnz cuzbanj、 dang’an saehnieb fazcanj, gaujhoengh vwnzyoz yisuz cangcoz, gyagiengz vwnzvuz caeuq feih vuzciz vwnzva yizcanj baujhoh. Cizgiz guh doiq rog vwnzva gyauhliuz, sawj Cunghvaz vwnzva lai miz gozci yingjyangj. Daihlig fazcanj gunghgung dijyuz saehnieb, gvangqlangh bae guh cenzminz cangqndang yindung, daezsang yinzminz ndangdaej suciz. Cunghvaz Minzcuz mboujdanh ndaej cauh’ok gij ginghci mbouj bingzciengz, hix itdingh ndaej cauh’ok gij vwnzva moq ronghsagsag.

  (6) Haenqrengz baujcang caeuq gaijndei minzswngh, coicaenh sevei huzndei cinbu

  Gaijndei minzswngh dwg aen gaenbonj muzdiz ginghci fazcanj. Cijmiz haenqrengz baujcang caeuq gaijndei minzswngh, ginghci fazcanj cij miz aen doenghlig dingj ndaej nanz, sevei cinbu cij miz giekdaej onjmaenh, guekgya cij ndaej ciengzlwenx onjdingh.

  Cien fueng bak geiq bae gyadaih couhnieb. Neix dwg gienh daeuzdaengj daihsaeh baujcang caeuq gaijndei minzswngh. Bineix couhnieb hingzsi ciuqyiengh lij yiemzhaenq, gunghcoz fuengmienh mbouj ndaej   soengse saek di. Aeu laebdaeb saedhengz aen couhnieb cwngcwz dwg cizgiz de. Cunghyangh caizcwng dajsuenq dwkhaeuj 433 ik maenz yungh bae coicaenh couhnieb. Cungdenj guhndei gij hong sawj gauhyau bizyezswngh、 nungzminzgungh、 boux couhnieb hojnanz ndaej miz hong guh caeuq anbaiz duivuj conjyez ginhyinz couhnieb. Aen cwngcwz bangfuz couhnieb “haj menh seiq gemj sam boujdiep”   2009 nienz daengzgeiz neix yaek lai gya bi ndeu. Gyagiengz cwngcwz cihciz caeuq guh couhnieb cijdauj, gujli gauhyau bizyezswngh daengz hawsingz lajmbanj gihcwngz、 dieg Cunghbu Sihbu caeuq giyez rauh iq bae couhnieb; haigvangq diuz miengloh couhnieb、 genjnieb、 cauhnieb, gujli gag guhcawj cauhnieb、 gag ra hong guh daengj yungh lai cungj hingzsik bae lingzvued couhnieb, aeu cauhnieb daiqdoengh couhnieb. Laebhwnj caezcienz aen gihci gunghgung douzswh daiqdoengh couhnieb. Laebdaeb gyagiengz cizyez ginwngz beizyin, cungdenj daezsang gij couhnieb naengzlig gyoengq nungzminzgungh caeuq gij saen dem lauzdungliz hawsingz lajmbanj. Laebndei couhnieb fuzvu dijhi, laebcienz aen gihci sawj dieg soengqok lauzdungliz caeuq dieg ciepsou lauzdungliz ndaej doxbang doxgap, dazyinx lauzdungliz daegbied dwg nungzminzgungh ndaej miz bouhloh riuzdoengh. Gyavaiq laebhwnj aen yinzliz swhyenz hawciengz dwg dungjyiz gveihfan haenx. Henhoh gij gienzik habfap bouxguhhong, cauhlaeb aen lauzdung gvanhaeh huzndei. Raeuz aeu doenggvaq roengzrengz dingjnanz bae guh, cauh ok engq lai couhnieb gihvei, hawj daengxcungq bouxguhhong moix boux cungj ndaej caenh naengzlig swhgeij、 moix boux cungj ndaej anbaiz habdangq.

  Gyavaiq laebndei aen sevei baujcang dijhi ndaej goemq daengz gyoengq gihminz hawsingz lajmbanj. Netsaed doicaenh yiengh lajmbanj sevei ciengxlaux baujyiemj moq sawqdiemj, sawqdiemj fanveiz gyadaih daengz 23% aen yienh. Doiq cizdij giyez duiyouh yinzyenz caengz camgya baujyiemj   gihbwnj ciengxlaux baujcang daengj gij vwndiz doenghbaez louz roengzdaeuj de, aeu gyavaiq gaijgez. Dawz daengx guek 130 fanh boux “laux goengsieng”, cienzbouh nabhaeuj goengsieng baujyiemj fanveiz. Cizgiz doicaenh nungzminzgungh camgya sevei baujyiemj. Gyagiengz guh gij hong hawsingz lajmbanj ceiqdaemq swnghhoz baujcang, cugbouh daezsang baujcang suijbingz, cietsaed guh daengz dungdai guenjleix、 wnggai bauj couh caenhliengh bauj. Gyagiengz boux ndangcanz sevei baujcang caeuq fuzvu dijhi gensez, caenh’itbouh lozsiz ndei gak hangh cwngcwz bangfuz boux ndangcanz, vih gyoengqde bingzdaengj camgya sevei swnghhoz cauh’ok gij vanzging engq ndei. Giyez duiyouh yinzyenz gij cienz gihbwnj ciengxlaux de, bineix caiq daezsang 10%. Gak gaep cwngfuj doiq sevei baujcang aeu caenh’itbouh demgya douzhaeuj, cunghyangh caizcwng dajsuenq anbaiz 3185 ik maenz. Aeu lai roenloh demgya daengx guek sevei baujcang gihginh, gyagiengz gamguenj, saedyienh bauj goek ok leih. Gujli caeuq cihciz swzsan saehnieb fazcanj. Raeuz aeu gyavaiq cauhlaeb aen sevei baujcang ancienz vangj engqgya caezcienz haenx, sawj yinzminz gwndaenj miz gihbwnj baujcang、 mbouj you goq laeng.

  Gaijgwz souhaeuj faenboiq cidu. Gij souhaeuj faenboiq cidu hableix, dwg sevei goengbingz cwng’yi aen daejyienh youqgaenj ndeu. Raeuz mboujdan aeu doenggvaq fazcanj ginghci, dawz sevei caizfouq aen “dangauh” neix guhhung, hix aeu doenggvaq gij souhaeuj faenboiq cidu hableix haenx dawz aen “dangauh” neix faen ndei. Aeu genhciz caeuq laebndei aen faenboiq cidu ciuq lauzdung faenboiq guhgoek、 lai cungj faenboiq fuengsik caez youq, giemgoq yauliz caeuq goengbingz, byaij diuz roen ndaej doengzcaez fouqmiz. It aeu cagaenj ceiqdingh gij cwngcwz cosih diuzcingj gozminz souhaeuj faenboiq gwzgiz, cugbouh daezsang gihminz souhaeuj youq ndaw gozminz souhaeuj faenboiq gij bijcung de, daezsang lauzdung baucouz youq ndaw daih’it baez faenboiq gij bijcung de. Gyadaih caizcwng、 suisouh youq ndaw souhaeuj daih’it baez faenboiq caeuq caiq baez faenboiq gij diuzcez cozyung de. Cauh diuzgen hawj engq lai ginzcung miz caizcanjsing souhaeuj. Ngeih aeu gyalaeg gaijgwz lungjdon hangznieb souhaeuj faenboiq cidu. Laebndei gij cwngcwz doiq lungjdon hangznieb cienzhong cungjngeg caeuq cienzhong suijbingz guh song cungz diuzgung. Yiemzgek gveihfan gij souhaeuj guekmiz giyez、 ginhyungz gihgou ginghyingz guenjleix yinzyenz daegbied dwg gij gauhgiz guenjleix yinzyenz de, laebndei gamguenj banhfap. Sam aeu caenh’itbouh gveihfan souhaeuj faenboiq cizsi. Baujhoh gij souhaeuj habfap, diuzcez gij souhaeuj sang gvaqbouh, siu bae gij souhaeuj mbouj habfap, cugbouh cauhbaenz gij souhaeuj faenboiq cizsi goenghai ronghcingx、 goengcingq hableix haenx, giengiet niujcienj aen cohyiengq souhaeuj cengca gyadaih.

  Coicaenh fangzdicanj hawciengz bingzonj cangqvuengh fazcanj. Aeu giengiet naenxhaed mbangj hawsingz aen seiqdaeuz gyaqcienz ranz swnghwnj vaiq gvaqbouh, muenxcuk yinzminz ginzcung gij gihbwnj ranzyouq sihgiuz de. It dwg laebdaeb daih gveihmoz saedhengz aen baujcangsing youqonj gunghcwngz. Cunghyangh caizcwng dajsuenq anbaiz baujcangsing ranzyouq cienhangh bangbouj swhginh 632 ik maenz, beij bigonq demgya 81 ik maenz. Hwnqguh baujcangsing ranzyouq 300 fanh dauq,   gak loih dieg ranzdiengz gaijcauh ranzyouq 280 fanh dauq. Gyadaih lajmbanj ranzvaih gaijcauh sawqdiemj fanveiz. Gak gaep cwngfuj aeu cietsaed raphwnj cwzyin, yiemzgek caephengz nienzdoh gensez giva, saedbauj diegdeih、 cienzngaenz caeuq youhvei cwngcwz lozsiz daengzvih. Ngeih dwg laebdaeb cihciz gihminz gij ranzyouq siuhfei dwg gag youq de. Demgya gung’wngq gij dieg hwnq bingzciengz sanghbinjfangz dwg gyaqcienz daemq gyaqcienz cungdaengj、 moix dauq menciz iq rauh de, gyavaiq bingzciengz sanghbinjfangz hanghmoeg saemjbae caeuq hwnqguh cindu. Gveihfan fazcanj ranzngeihsouj hawciengz, dizcang dazyinx co ranz youq. Gaujhoengh co ranz hawciengz. Sam dwg naenxhaed douzgihsing cawx ranz. Gyarengz caephengz gij sindai、 suisouh cwngcwz miz cabied haenx. Laebndei sanghbinjfangz yawhgai cidu. Seiq dwg daihlig cwngjdun caeuq gveihfan fangzdicanj hawciengz cizsi. Laebndei diegdeih souhaeuj guenjleix sawjyungh banhfap, naenxhaed diegdeih gyagwz swnghwnj vaiq gvaqbouh. Gyarengz cazcawq gij famhfap famhgvi hingzveiz gvaengx dieg mbouj hwnq、 goemq buenz mbouj gai、 ramrumj daiz sang gyaqcienz ranz daengj.

  Gyavaiq doicaenh yihyoz veiswngh saehnieb gaijgwz fazcanj. Cizgiz onjdangq doicaenh yihyoz veiswngh dijci gaijgwz, cienzmienh lozsiz haj hangh cungdenj gunghcoz. Laebdaeb gyadaih gihbwnj yihliuz baujcang cwgoemq fanveiz. Bineix aeu dawz hawsingz gihminz gihbwnj yihbauj caeuq gij lajmbanj hozcoz yihliuz cidu moq caizcwng bangbouj byauhcunj daezsang daengz 120 maenz, beij bigonq demlai 50%, caemhcaiq habdangq daezsang gakvunz gyaucienz byauhcunj. Doiq lajmbanj lwgnyez bwzhezbing、 simdaeuz sengcingz miz bingh guh yihliuz baujcang sawqdiemj, caenhrengz vih doengh gij lwgnyez caeuq aen ranz boihseiz de daezhawj engq lai bangcoh. Youq 60% gihcwngz yihliuz veiswngh gihgou youz cwngfuj gawjbanh haenx, saedhengz gihbwnj yozvuz cidu, gizyawz yihliuz gihgou caemh aeu sien genjyungh gihbwnj yozvuz. Doicaenh gihbwnj yozvuz cizcungh dajcawx caeuq dungjyiz boiqsoengq. Gihbwnj guhbaenz hawsingz lajmbanj gihcwngz yihliuz veiswngh gihgou gensez gveihva, daih gveihmoz gungganq caeuq beizyin gij yinzcaiz habngamj. Caenh’itbouh laebndei gij cwngcwz cosih cihciz lajmbanj veiswnghsiz gensez caeuq lajmbanj canghyw fazcanj. Laebndei gihcwngz yihliuz veiswngh gihgou dienzbouj gihci, lozsiz gangjvei cizyau gunghswh. Guh sien youq segih yawjbingh sawqdiemj, doidoengh guhbaenz aen fuzvu dijhi gihcwngz yihliuz veiswngh gihgou caeuq yihyen goengnaengz doxfaen hableix、 boiqhab doxbang、 doxcienj ywbingh haenx. Cietsaed gyagiengz fuengzre gaemhanh Gyazhingz H1N1 Liuzganj daengj gij binghlah hungnaek caeuq fuengz yw mansingbing、 cizyezbing、 binghdeihfueng, daezsang gij naengzlig wngqdoiq cawqceq gij gunghgung veiswngh saehgienh sawqmwh fatseng. Guh goengbanh yihyen gaijgwz sawqdiemj, genhciz gihbwnj yihliuz goeng’iksingq fuengyiengq, cauhmoq dijci gihci, cungfaen diuhdoengh gij cizgizsing gyoengq yihvu yinzyenz, daezsang fuzvu caetliengh, gaemhanh yihliuz feiqyungh, gaijndei gij gvanhaeh canghyw caeuq bouxbingh. Daihlig cihciz sevei swhbwnj hwngbanh yihliuz veiswngh gihgou, youq fuzvu cinjhaeuj、 yihbauj dinghdiemj daengj fuengmienh ndaej doengzyiengh doiqdaih. Bangfuz caeuq coicaenh cunghyihyoz、 minzcuz yihyoz saehnieb fazcanj. Yihyoz veiswngh saehnieb gaijgwz fazcanj gvanhaeh daengz yinzminz ndangdaej cangqheiq caeuq gyaranz vuenyungz, raeuz aeu haekfug sojmiz hojnanz, gaijgez ndei aen nanzdaez cienz seiqgyaiq cungj miz neix.

  Guh ndei gij hong yinzgouj caeuq giva senglwg. Laebdaeb onjdingh aen suijbingz senglwg noix. Doiq gyoengq vunz riuzdoengh guh ndei giva senglwg fuzvu gunghcoz. Lozsiz ndei gij cwngcwz bangbouj lajmbanj mehmbwk dinghgeiz genjcaz gij bingh mehmbwk caeuq haeuj yihyen senglwg. Gyagiengz guenj gij saeh lwgnyez doekseng ndangdaej couh mbouj cingqciengz, guh gij sawqdiemj vih seng lwg ndei caengz mizndang sien genjcaz ndangdaej cix mbouj sou cienz, guh ndei meh daiqndang、 meh naenghndwen caeuq lwgnding lwgnyez iq baujgen gunghcoz. Laebdaeb hengzguh lajmbanj mbangj giva senglwg gyahdingz dajciengj bangfuz cidu caeuq Sihbu digih noix seng vaiq fouq gunghcwngz. Cietsaed baujhoh ndei gij gienzik mehmbwk caeuq boux caengz baenz vunzhung. Gyagiengz guh aen canloz yenzgiu wngqdoiq yinzgouj laujlingzva, gyavaiq laebhwnj laebcaez sevei ciengxlaux fuzvu dijhi, hawj gyoengq bouxgeq ndaej an’onj yiengjsouh gij saedceij nienzlaux.

  (7) Giendingh mbouj bienq bae doicaenh gaijgwz, caenh’itbouh gyadaih hailangh

  Bineix aeu laebdaeb gyalaeg doiq gij cungdenj lingjyiz caeuq gvanhgen vanzcez guh gaijgwz, roengzrengz saedyienh cungbyoengq moq.

  Raeuz aeu laebdaeb doicaenh guekmiz ginghci baijbouh caeuq gezgou guh canlozsing diuzcingj. Gyavaiq doiq guekmiz giyez hungloet daegbied dwg cunghyangh giyez aen gunghswh meh de guh gunghswhci gaijgwz, saedyienh canjgienz miz bienq lai cungj lai yiengh, laebndei fazyinz ceihleix gezgou. Gyavaiq doicaenh lungjdonsing hangznieb gaijgwz, doicaenh goengyungh saehnieb gaijgwz, cietsaed cuengqsoeng hawciengz cinjhaeuj, cizgiz yinxhaeuj gingcwngh gihci. Roengzrengz dajcauh gij hawciengz vanzging sawj lai cungj sojyoujci ginghci ndaej goengbingz gingcwngh haenx, engq ndei bae coicaenh fazcanj gij ginghci mbouj dwg gunghyoujci.

  Gyalaeg doiq swhyenzsing canjbinj gyagwz caeuq vanzbauj soucienz guh gaijgwz, dwg gij cosih youqgaenj mbaetyungh nwngzyenz swhyenz、 baujhoh vanzging、 saedyienh ndaej laebdaeb fazcanj. Aeu gyadaih yunghdienh daihhoh caeuq fatdienh giyez guh cigsoh gaicawx sawqdiemj, doihengz gihminz yungh dienh yungh raemx miz mbaeklae gyagwz cidu, laebcaez gij nwngzyenz ndaej caiqseng haenx fatdienh dinghgyaq caeuq cienzyungh faenrap gihci. Laebndei nungzyez yungh raemx gyagwz cwngcwz. Gaijgwz raemxuq cawqleix、 nyapnyaj cawqleix soucienz cidu. Gyadaih baizuq gienz gyauhyiz sawqdiemj. Youq mwh doicaenh doengh gij gaijgwz neix, aeu louzsim hezdiuz ndei gak fuengmienh leih’ik gvanhaeh, itdingh mbouj ndaej hawj gij gihbwnj swnghhoz gyoengq ginzcung souhaeuj noix de deng yingjyangj.

  Aeu laebdaeb doicaenh caizsui dijci gaijgwz. Laebcaez gunghgung caizcwng dijhi. Laebndei caizcwng conjyiz ceihawj cidu, gyadaih itbuensingq conjyiz ceihawj, demgiengz deihfueng cwngfuj gij naengzlig daezhawj gihbwnj gunghgung fuzvu. Laebcaez sengj doxroengz caizcwng guenjleix dijci, laebndei yienhgaep gihbwnj caizlig baujcang gihci, doicaenh sengj cigsoh guenj yienh caizcwng guenjleix fuengsik gaijgwz. Cienzmienh bienguh cunghyangh caeuq deihfueng cwngfujsing gihginh yawhsuenq, sawqbien sevei baujyiemj gihginh yawhsuenq, laebndei guekmiz swhbwnj ginghyingz yawhsuenq cidu. Hawj caizcwng yawhsuenq lai ronghcingx. Laebdaeb guh ndei gij hong cwnghcizsui cienjhingz. Doicaenh swhyenzsui gaijgwz. Dungjyiz neiswh vaihswh giyez caeuq goyinz hawsingz gensez suiq、 gyauyuzfei fouqgya cidu.

  Laeb caezcienz ginhyungz dijhi dwg hangh cosih youqgaenj wngqdoiq gozci ginhyungz veizgih cungdongj. Aeu laebdaeb laebndei guekmiz gungguj ginhyungz gihgou gunghswh ceihleix, gaijndei ginghyingz guenjleix gihci, daezsang fung’yiemj gaemguenj naengzlig. Laebdaeb doidoengh cwngcwzsing ginhyungz gihgou gaijgwz. Onjbouh doicaenh swhcanj guenjleix gunghswh cienjhingz. Gyalaeg lajmbanj sinyungse gaijgwz. Doidoengh gij ginhyungz gihgou rauh iq gveihfan fazcanj. Daihlig fazcanj ginhyungz hawciengz, gujli ginhyungz cauhmoq. Doicaenh hamj gyaiq mouyiz yinzminzbi gietsuenq sawqdiemj, cugbouh fazcanj rog gyaiq yinzminzbi ginhyungz yezvu. Doicaenh cunzcienz baujyiemj cidu gensez. Gyavaiq fazcanj nungzyez baujyiemj.

  Aeu ciuq gij iugouz cwngfuj swyez faenhai、 swyez giyez faenhai caeuq guenj banh faenliz, youq gwnz giekdaej gohyoz faenloih, cizgiz onjdangq bae doicaenh swyez danhvei gaijgwz. Gij gaijgwz raeuz dwg cienzmienh gaijgwz, baudaengz ginghci dijci gaijgwz、 cwngci dijci gaijgwz caeuq gij gaijgwz gizyawz gak aen lingjyiz. Mbouj miz cwngci dijci gaijgwz, ginghci dijci gaijgwz caeuq yendaiva gensez couh mbouj gojnwngz guh ndaej baenz. Aeu fazcanj seveicujyi minzcuj, cietsaed baujcang gij minzcuj gienzleih yinzminz danggya guhcawj, daegbied dwg gij gienz senjgij、 gij gienz rox cingzgvang、 gij gienz camgya、 gij gienz byaujdaz caeuq gij gienz gamduk. Caenh’itbouh gyadaih gihcwngz minzcuj, laeb caezcienz gihcwngz swci cujciz caeuq minzcuj guenjleix cidu, hawj guengjdaih ginzcung engq ndei bae camgya guenjleix gij gunghgung hongsaeh gihcwngz. Aeu ciuqfap guenj guek, laeb caezcienz fazci, daegbied dwg aeu yawjnaek gensez doengh gij faplwd cidu gveihfan caeuq gamduk gienzlig yinhhengz haenx. Cauhmoq cwngfuj laebfap gunghcoz fuengfap caeuq gihci, hawj cungqvunz lai camgya gij hong laebfap.

  Raeuz aeu cienzmienh hab’wngq gij iugouz gozci hingzsi bienqvaq caeuq ndaw guek fazcanj, gya’gvangq caeuq gyalaeg doiq rog hailangh.

  Onjdingh fazcanj doiq rog mouyiz. Bineix cujyau aeu roengzrengz bae hai hawciengz、 diuz gezgou、 coi bingzyaenx. Genhciz saedhengz aen canloz hawciengz lai cungj lai yiengh caeuq aen canloz aeu caetliengh bae hingz vunz, lozsiz caeuq laebndei cuzgouj doiqsuiq、 cuzgouj sindai、 cuzgouj saenqyungh baujyiemj daengj gak hangh cwngcwz cosih, laebdaeb gaijndei haijgvanh、 caetliengh genjcaz、 vaivei daengj fuengmienh fuzvu. Hen ndei conzdungj hawciengz, daihlig haiok gij hawciengz saenhwng. Youhva cuzgouj canjbinj gezgou, onjdingh gij canjbinj aeu yungh vunzhong maeddeih haenx cuzgouj, gyadaih gihden canjbinj caeuq gauhsinh gisuz canjbinj cuzgouj, daihlig fazcanj fuzvu mouyiz caeuq fuzvu vaibauh, roengzrengz gungganq cuzgouj binjbaiz caeuq siugai vangjloz, laebdaeb yiemzgek gaemhanh cuzgouj gij canjbinj siuhauq nwngzyenz lai、 uqlah lai、 swhyenzhingz. Cizgiz doicaenh gyagoeng mouyiz cienjhingz swnggaep. Coicaenh cingouj cuzgouj bingzyaenx fazcanj, cungdenj gyadaih cingouj senhcin gisuz canghbei、 gij lingzbugen youqgaenj caeuq gij doxgaiq ndaw guek giepnoix haenx, onjdingh gak hangh cwngcwz coicaenh cingouj caeuq gij cosih bienhleih cingouj haenx, coisawj gij guekgya fatdad cuengqsoeng gauhsinh gisuz canjbinj cuzgouj hanhhaed.

  Doidoengh leihyungh swhbwnj guekrog caeuq doiq rog douzswh hezdiuz fazcanj. Youhva gij gezgou leihyungh swhbwnj guekrog, gujli swhbwnj guekrog dwkhaeuj gauhdonh cicauyez、 gauhsinh gisuz canjyez、 yendai fuzvuyez、 nwngzyenz moq caeuq mbaet nwngzyenz vanzbauj canjyez bae, gujli gij gunghswh hamj guek de youq Cungguek laeb aen digih cungjbu daengj gak loih gunghnwngzsing gihgou, gujli ndaw guek rog guek giyez gyagiengz doxgap guh yenzgiu haifat. Gujli swhbwnj guekrog camgya gij giyez ndaw guek gaijcuj gaijcauh caeuq gyonjgyoeb dauqlaeb, gyavaiq laebhwnj swhbwnj guekrog cawx gyoeb ancienz saemjcaz cidu. Coicaenh “yinx cienzngaenz”caeuq “yinx vunzcaiz” dox giethab. Dazyinx swhbwnj guekrog yiengq Cunghbu Sihbu digih senjnod caeuq demgya roengz bonjcienz. Gyavaiq hengzguh aen canloz “byaij okbae”, gujli gij hangznieb hab rog guek hawciengz sihgiuz haenx miz bouhloh yiengq rog guek senj bae swnghcanj naengzlig, cihciz gij giyez miz diuzgen de bae rog guek cawx gyoeb, gyalaeg doiq gij swhyenz rog guek guh gij hozcoz doxleih, daezsang gij caetliengh doiq rog bau gunghcwngz caeuq lauzvu gapguh. Caenh’itbouh genjva gak loih saemjbae soujsuz, lozsiz giyez gij gienz gag guhcawj youq rog guek douzswh. Gij giyez “byaij okbae”de, aeu ciuqfap ginghyingz, ndoj fung’yiemj, fuengzre gij gingcwngh hougoj gig rwix, henhoh guekgya daengxbuenz leih’ik caeuq gij yienghsiengq ndei.  Gyalaeg lai mbiengj song mbiengj ginghmou gapguh. Gyagiengz dem gaijndei caeuq fatdad guekgya gij ginghmou gvanhaeh de, gyalaeg caeuq gij guekgya cingqcaih fazcanj guh gij gapguh doxleih de, nyinhcaen lozsiz bet hangh cosih moq gvendaengz Cungguek caeuq Feihcouh gij caensaed gapguh haenx. Fazveih gij cozyung ginghci caengzsang doiqvah caeuq song mbiengj ginghmou lenzveijvei. Gyavaiq gij yamqdin swyouz mouyizgih gensez. Cizgiz camgya Dohhah Veizhoz damzbuenq, doidoengh caeux di dabbaenz gij damzbuenq gezgoj engqgya hableix、 bingzyaenx de. Fanjdui gak cungj hingzsik baujhucujyi, cawqleix ndei mouyiz doxdawz. Sanghaij Sibozvei couh yaek raghai baengzmuq. Aeu gyagiengz caeuq gak aen guekgya camgya canjlanj de、 digih dem gozci cujciz gapguh, dawz Sanghaij Sibozvei banh baenz gaiq hoihhoengh baenzgoeng、 gig ndei、 nanzlumz ndeu, banh baenz gaiq hoihhoengh coicaenh vunzloih vwnzmingz cinbu, coicaenh gohgi cauhmoq, coicaenh guek raeuz caeuq seiqgyaiq gak guek gyauhliuz gapguh、 doengzcaez fazcanj ndeu.

  (8) Roengzrengz gensez aen cwngfuj ak fuzvu yinzminz habhoz

  Bi ndeu daeuj, cwngfuj bonjndang gaijgwz caeuq gensez ndaej caiq fazcanj baenaj. Vih wngqdoiq gak cungj gunnanz, raeuz daegbied louzsim fazyangz minzcuj、 haeujsim dingqaeu gij yigen gihcwngz ginzcung, yawjnaek henhoh gij leih’ik ginzcung. Guengjdaih gunghvuyenz nyinhcaen fucwz、 gaenx guh goengsaeh, vih bauj demlai、 bauj gij saedceij beksingq、 bauj onjdingh guh’ok le cizgiz gung’yen. Hoeng gij hong cwngfuj caeuq gij maqmuengh yinzminz lij miz cengca haemq lai. Ciznwngz cienjbienq mbouj daengzvih, doiq veizgvanh ginghci guenj lai gvaqbouh, sevei guenjleix caeuq gunghgung fuzvu haemq buegnyieg; mbangj gunghcoz yinzyenz gij yisiz ciuqfap hingzcwng mbouj giengz; mbangj lingjdauj ganbu duetliz ginzcung、 duetliz saedsaeh, hingzsizcujyi、 gvanhliuzcujyi yiemzcungh; mbangj aen lingjyiz gij yienhsiengq nduknaeuh yungzheih fat、 lai fat. Raeuz yaek aeu cienjbienq ciznwngz guh haedsim, gyalaeg hingzcwng guenjleix dijci gaijgwz, daihlig doicaenh gensez aen cwngfuj ak fuzvu haenx, roengzrengz vih gak cungj hawciengz cawjdaej cauh’ok aen fazcanj vanzging goengbingz, vih yinzminz ginzcung daezhawj gij gunghgung fuzvu ndei, henhoh sevei goengbingz cwng’yi.

  Raeuz aeu cienzmienh cingqdeng hengzsawj gij ciznwngz cwngfuj, engqgya yawjnaek gunghgung fuzvu caeuq sevei guenjleix. Gyavaiq laeb caezcienz gij gunghgung fuzvu dijhi goemq daengz daengxcungq beksingq haenx, cienzmienh demgiengz gihbwnj gunghgung fuzvu naengzlig. Laeb caezcienz swyenz caihaih hungnaek、 gunghgung ancienz saehgienh fwtfat wngqgip cawqleix gihci. Gyagiengz fuengz cai gemj cai naengzlig gensez. Gyagiengz gijgwn gijyw caetliengh gamguenj, guh ndei gij hong ancienz swnghcanj, naenxhaed gij saehhux hungnaek、 daegbied hungnaek de fatseng.

  Aeu hab’wngq hingzsi moq, doicaenh sevei guenjleix dijci gaijgwz caeuq cauhmoq, hableix diuzcez sevei leih’ik gvanhaeh. Nyinhcaen gaijgez youq giyez gaijci、 cwngdieg ceksenj、 vanzging baujhoh、 lauzdung cengnauh、 nangq daengz faplwd nangq daengz hwnjgauq daengj lingjyiz gij vwndiz doedyienh sonjhaih ginzcung   leih’ik haenx, baujcang gij gienzik habfap yinzminz ginzcung. Gyagiengz caeuq gaijcaenh sinfangj gunghcoz. Gaijndei gij vunz riuzdoengh guenjleix caeuq fuzvu. Gyagiengz sevei cianh gyoebhab cawqleix, roengzrengz gaijgez gij cianh vwndiz doedyienh, fuengzre caeuq ciuqfap yiemzhaenq dwkceih gak loih famhfap famhcoih hozdung, henhoh guekgya ancienz caeuq sevei onjdingh.

  Aeu roengzrengz daezsang gij ligliengh caephengz caeuq gij ligliengh hawj vunzlai saenqnyaemh. Genhciz gezcwz hab gohyoz、 miz minzcuj, sawj gak hangh cwngcwz ndaej engqgya hab saedsaeh、 dingj ndaej gienjniemh. Gyagiengz genjcaz gamduk cwngcwz caephengz cingzgvang, guh daengz lingh hengz gimq dingz. Giengzvaq hingzcwng gyaepdawz cwzyin, doiq gij hingzveiz mbouj caenh cizcwz、 mbouj banhsaeh caeuq luenh banhsaeh de, aeu yiemzsuk cazdawz cwzyin. Gak digih、 gak bumwnz doiq gij gezcwz baijbouh cunghyangh aeu haenqrengz caephengz, baenzbaenz mbouj hawj gak boux gag guh. Gak gaep hingzcwng gihgvanh caeuq gunghvuyenz aeu gagrox ciuqsouj yenfaz caeuq faplwd, yiemzgek ciuqfap hengzsawj guekgya gienzlig. Cietsaed gaijndei hingzcwng caepfap gunghcoz, roengzrengz guhdaengz gveihfan caepfap、 goengcingq caepfap、 vwnzmingz caepfap. Gyavaiq laebhwnj laebcaez aen hingzcwng yinhhengz gihci gezcwz、 caephengz、 gamduk dox hanhhaed youh dox boiqhab habdangq haenx.

  Aeu dawz fanj nduknaeuh dizcang cinghseuq gensez cuengq youq aen diegvih youqgaenj, neix cigsoh gvanhaeh daengz gaemmaenh cwnggenz. Gak gaep lingjdauj ganbu daegbied dwg gauhgiz ganbu, aeu giengiet caephengz cunghyangh gij gvidingh gvendaengz baugau goyinz ginghci caeuq caizcanj haenx, baudaengz souhaeuj、 ranzyouq、 douzswh, caeuq gvan (baz)、 lwg guh gijmaz hong daengj saehhangh hungnaek, caemhcaiq gagrox ciepsouh gijgenj bumwnz gamduk. Aeu dawz cazcawq gij anq hung anq youqgaenj famhfap famhgij de, dangguh aen yinvu youqgaenj fanj nduknaeuh. Cungfaen fazveih gij cozyung gamcaz、 saemjgeiq bumwnz, gyagiengz gamduk hingzcwng gienzlig yinhhengz. Aeu laebhwnj laebcaez gak hangh cidu ceihfad caeuq yawhfuengz nduknaeuh dijhi, daegbied aeu laebcaez gij guenjleix cidu gunghgung swhyenz faenboiq、 gunghgung swhcanj gaicawx、 gunghgung canjbinj swnghcanj doengh aen lingjyiz neix, demgiengz gij ligliengh cidu hanhhaed. Aeu genhciz gaenxmbaet hingzcwng, fanjdui saisaengq sajbaizciengz, mboujduenh gyangqdaemq hingzcwng cingzbonj. Yiemzgek gaemhanh   hwnqguh laeuz dangz gvanj soj, gimq yungh gyagwz sang dajcang bangunghlouz, gyavaiq gaijgwz gij cidu gunghvu ciepdaih、 goengci sawjyungh daengj, coengzyiemz gaemhanh yungh cienz goenggya ok guek ok gyaiq. Cietsaed cinggemj veiyi caeuq vwnzgen, daegbied aeu gemjnoix gij veiyi、 gingdenj caeuq lundanz hingzsik naek gvaq neiyungz haenx. Aeu haeujlaeg doicaenh cwng’vu goenghai, laebndei gak loih goenghai banhsaeh cidu caeuq hingzcwng fuzyi cidu, cauh’ok diuzgen hawj yinzminz bihbingz cwngfuj、 gamduk cwngfuj, doengzseiz cungfaen fazveih gij gamduk cozyung sinhvwnz yizlun, hawj gienzlig youq laj ndit yinhhengz. Sojmiz gij raeuz guh de, cungj dwg yaek hawj yinzminz saedceij gvaq ndaej engqgya vuenyungz、 engqgya miznaj, hawj sevei engqgya goengcingq、 engqgya doxhuz.

  Gak boux daibyauj!

  Coicaenh minzcuz doxgiet, saedyienh doengzcaez cinbu, dwg gij sengmingh、 ligliengh caeuq maqmuengh Cunghvaz Minzcuz. Aeu gyamaenh caeuq fazcanj gij seveicujyi minzcuz gvanhaeh bingzdaengj、 doxgiet、 doxbang、 doxhuz haenx. Nyinhcaen lozsiz gij cwngcwz cosih cunghyangh cihciz siujsoq minzcuz caeuq minzcuz digih fazcanj haenx, sien cihciz henzguek minzcuz digih gyavaiq fazcanj. Gyavaiq guhliux henzguek itsienq digih   ranz yung’yiemj ranzgaeuq gaijcauh, hengzguh aen gunghcwngz hawj gij beksingq youzlangh ciengx doihduz de miz ranz dinghyouq. Cungj lajmbanj sevei ciengxlaux baujyiemj moq, aeu sien youq aen yienh henzguek、 aen yienh gungzhoj minzcuz digih guh sawqdiemj. Gyarengz bangfuz doengh aen minzcuz vunz haemq noix haenx fazcanj. Laebdaeb doicaenh aen hengzdoengh hwng henzguek fouq beksingq. Yawjnaek baujhoh gij vwnzva yizcanj siujsoq minzcuz caeuq gij swnghdai vanzging minzcuz digih. Cietsaed guh ndei gij hong siujsoq minzcuz riuzdoengh yinzgouj gunghgung fuzvu、 couhnieb caeuq guenjleix, baujcang gij gienzik habfap gyoengqde. Doengzseiz, gyagiengz guekgya yisiz、 gunghminz yisiz gyauyuz, geizhauh sienmingz bae fanjdui minzcuz faenmbek, henhoh guekcoj dungjyiz. Aeu hawj siujsoq minzcuz caeuq minzcuz digih gak cuz ginzcung cungfaen roxnyinh daengz aen ranz hung guekcoj raeujrubrub.

  Raeuz aeu cienzmienh gvancez gij gihbwnj fuengcim cunghgyau gunghcoz aen dangj, ciuqfap guenjleix gij hongsaeh cunghgyau. Youq coicaenh ginghci fazcanj caeuq sevei doxhuz ndaw de, fazveih gij cizgiz cozyung doengh boux yinzsw cunghgyaugai caeuq gyoengq ginzcung saenq gyau de.

  Raeuz aeu nyinhcaen gvancez gij gyauzvu cwngcwz aen dangj. Henhoh gij gienzik habfap gyoengq beixnuengx rog guek、 gyoengq beixnuengx ma guek dem vunz ndaw ranz de, cihciz gyoengqde cienzswnj Cunghvaz vwnzva, camgya guekcoj yendaiva gensez caeuq coicaenh hozbingz dungjyiz daihnieb.   Gak boux daibyauj!  Bi gvaqbae neix, gozfangz caeuq ginhdui yendaiva gensez aeu ndaej cingzcik moq. Yinzminz gaijfangginh caeuq vujgingj budui gig ndei bae guhbaenz gozging soujduh yezbingh、 youq cungdenj digih henhoh onjdingh daengj yinvu hungnaek, vih henhoh guekgya ancienz caeuq fazcanj leih’ik fazveih le cozyung youqgaenj. Bi moq neix, aeu gaenjgaenj hopheux dangj caeuq guekgya gunghcoz dagiz, daj cienzmienh hengzguh sigij moq gaihdon moq ginhdui lizsij sijming bae naemj, ciuq aen yenzcwz gwzmingva yendaiva cwnggveihva dox dungjyiz neix, gyagiengz ginhdui cienzmienh gensez. Aeu demgiengz gij naengzlig dwkhingz sinsizva diuzgen laj de gizbu cancwngh guh haedsim, daezsang gij naengzlig wngqdoiq lai cungj ancienz vihaep、 guhbaenz lai cungj lai yiengh ginhsw yinvu. Daihlig gyagiengz ginhdui swhsiengj cwngci gensez. Gyavaiq gij yamqdin cienzmienh gensez yendai houginz. Gyagiengz gensez gozfangz gohyenz caeuq vujgi canghbei. Ciuqfap guenj ginhdui、 coengz yiemz guenj ginhdui, daezsang ginhdui cwnggveihva suijbingz. Cizgiz onjdangq bae gyalaeg gozfangz caeuq ginhdui gaijgwz. Gyagiengz vujgingj budui yendaiva gensez, demgiengz gij naengzlig dawzsouj、 cawqceq saehgienh sawqmwh fatseng、 fanjgungj、 henhoh onjdingh. Gyagiengz gozfangz dung’yenz caeuq gensez ligliengh bwhlaeng. Gak gaep cwngfuj aeu lumj doenghbaez ityiengh, gvansim cihciz gozfangz caeuq ginhdui gensez, gyamaenh caeuq fazcanj ginhdui caeuq cwngfuj、 ginhdui caeuq beksingq doxgiet.

  Gak boux daibyauj!

  Raeuz yaek giendingh mbouj bienq bae gvancez aen fuengcim “aen guekgya ndeu song cungj cidu”、 “vunz Yanghgangj guenj Yanghgangj”、 “vunz Aumwnz guenj Aumwnz”、 gag guenj cingzdoh sang, cienzlig cihciz Yanghgangj、 Aumwnz baujciz ciengzgeiz mwnhoengh onjdingh. Cihciz Yanghgangj gyamaenh caemhcaiq daezswng   aen diegvih dwg gozci ginhyungz、 mouyiz、 hangzyin cungsim de, fazcanj youhsi canjyez, gungganq giz ginghci demlai moq. Cihciz Aumwnz fazcanj lijyouz yietnaiq canjyez, coicaenh ginghci habdangq miz lai cungj lai yiengh. Aeu nyinhcaen hengzguh aen gaijgwz fazcanj gveihva ganghyau Cuhgyangh Sanhgozcouh digih, cizgiz doicaenh gensez aen giuz hung Gangj Cuh Au daengj gihcuj sezsih hung youh hamjgyaiq caeuq haifat Cuhhaij Hwngzginz Dauj, gyalaeg Gvangjdungh Yanghgangj Aumwnz dox gapguh, maedcaed gij ginghci lienzhaeh neidi caeuq Gangj Au. Aen guekcoj hungmbwk ciengzlwenx dwg aen giengiengz ingbaengh Yanghgangj、 Aumwnz. Cijaeu daegbied hingzcwnggih cwngfuj caeuq gak gyaiq yinzsw doengzsim gaprengz, bauyungz doxbang, doengzcaez henhoh aen dagiz mwnhoengh onjdingh fazcanj, Yanghgangj、 Aumwnz ngoenzcog itdingh engqgya gyaeundei.

  Bi gvaqbae neix, gij gvanhaeh song hamq youq gwnz lizsij haidaeuz moq aeundaej cincanj youqgaenj, yienh ok hozbingz fazcanj seiqdaeuz ndei. Song hamq gyauhliuz doxgap mboujduenh haeujlaeg, cienzmienh cigsoh sueng yiengq “sam doeng” ndaej saedyienh. Ginghci gvanhaeh cwngcangzva yamq ok yamqdin youqgaenj, ginghci hozcoz ciduva gensez cugbouh doicaenh. Song hamq gvanhaeh laebdaeb gaijndei caeuq fazcanj, hawj song hamq beixnuengx daiqdaeuj le gij leih’ik saedsaed caihcaih. Youq ndaw bi moq neix, raeuz aeu laebdaeb genhciz gij dacwng fuengcim fazcanj song hamq gvanhaeh、 coicaenh guekcoj hozbingz dungjyiz, gaemmaenh   aen cawjdaez song hamq gvanhaeh hozbingz fazcanj, mboujduenh haicauh song hamq gvanhaeh hozbingz fazcanj gizmen moq. Maedcaed song hamq ginghmou ginhyungz baedauq, gyalaeg canjyez dox gapguh, cihciz gij Daizswh giyez youq daluz de fazcanj, henhoh gij gienzik habfap beixnuengx Daizvanh. Gujli doengh aen daluz giyez miz diuzgen haenx bae Daizvanh douzswh. Cihciz haijyaz hamq baihsae ginghcigih youq song hamq gyauhliuz doxgap ndaw de fazveih gij cozyung sien guh sien sawq. Doenggvaq siengliengz ciemdingh song hamq ginghci hozcoz gvaengxgyaq hezyi, coicaenh dox leih caez ndei, laebhwnj aen ginghci hozcoz gihci miz song hamq daegsaek haenx. Haigvangq   vwnzva gyauyuz gyauhliuz, doengzcaez hungzyangz Cunghvaz vwnzva. Gyagiengz song hamq beksingq caeuq sevei gak gyaiq gyauhliuz, doengzcaez faenyiengj gij cingzgoj song hamq gvanhaeh hozbingz fazcanj, caenh’itbouh gietcomz gij yinsiz doxdoengz doidoengh song hamq gvanhaeh hozbingz fazcanj haenx. Genhciz daluz caeuq Daizvanh caemh gvi aen Cungguek ndeu, gyamaenh gij cwngci giekdaej song hamq gvanhaeh hozbingz fazcanj, demgiengz song hamq cwngci doxsaenq. Raeuz gig saenq, daengxcungq lwglan Cunghvaz caezsim roengzrengz, aen saehnieb hungmbwk guekcoj cienzbouh dungjyiz itdingh ndaej saedyienh!

  Gak boux daibyauj!

  Bi gvaqbae neix, vaigyauh gunghcoz caiq aeu ndaej cingzcik hungnaek. Guek raeuz cizgiz camgya wngqdoiq gozci ginhyungz veizgih、 dienheiq bienqvaq daengj gozci gapguh, youq baenzroix lai mbiengj veiyi hungnaek gwnz de, fazveih le gij gensezsing cozyung daegbied. Raeuz cizgiz guh cienzmienh vaigyauh, caeuq gak aen guek hung、 aen guekgya seiqhenz raeuz caeuq haujlai aen guekgya cingqcaih fazcanj gij doiqvah dox gapguh de onjbouh doicaenh. Daihlig gyagiengz yinzvwnz daengj lingjyiz vaigyauh. Mizyauq henhoh gij gienzik habfap boux gunghminz caeuq fazyinz guek raeuz youq guekrog haenx.

  Cungguek moq vaigyauh byaij gvaq le 60 bi ginglig ronghlwenq, youq gwnz gozci vujdaiz ce miz rizdin ronghmyanz. Raeuz yaek ciepswnj caeuq fazyangz gij conzdungj miznaj, itcig yaengx sang mbaw geiz hozbingz、 fazcanj、 doxgap, genhciz aen hozbingz vaigyauh cwngcwz doglaeb gag guhcawj, genhciz byaij diuz roen hozbingz fazcanj, ciuqhengz aen hailangh canloz doxleih caez hingz, doidoengh gensez aen seiqgyaiq doxhuz ciengzgeiz hozbingz、 doengzcaez mwnhoengh haenx, vih guek raeuz yendaiva gensez cauh aen baihrog vanzging ndei ndeu. Bi moq neix, raeuz yaek laebdaeb aeu 20 guek cizdonz ginhyungz funghvei daengj lai mbiengj hozdung hungnaek guh cujyau bingzdaiz, cizgiz camgya aen cincwngz gozci dijhi bengwz, henhoh gij leih’ik doengh aen guekgya cingqcaih fazcanj. Dungjcouz hezdiuz ndei song mbiengj vaigyauh caeuq lai mbiengj vaigyauh、 guek caeuq guek gihyiz vaigyauh caeuq gak lingjyiz vaigyauh gunghcoz, doidoengh gij gvanhaeh guek raeuz caeuq gak aen guek hung、 doengh aen guekgya seiqhenz guek raeuz caeuq doengh aen guekgya cingqcaih fazcanj de cienzmienh haeujlaeg fazcanj. Gaenjgaenj dawzndaet Cunghgoz — Dunghmungz swmougih cienzmienh guhbaenz、 Sanghaij hozcoz cujciz ciuhai funghvei daengj seizgei ndei, cizgiz doicaenh gihyiz dox gapguh. Caenh’itbouh guh ndei gij doiq rog gunghcoz wngqdoiq dienheiq bienqvaq、 nwngzyenz swhyenz gapguh daengj fuengmienh, youq gaijgez ndei yezdenj vwndiz caeuq cenzgiuzsing vwndiz ndaw de, fazveih gensezsing cozyung. Cungguek cwngfuj caeuq yinzminz nyienh caeuq gozci sevei dazfwngz roengzrengz, doengzcaez wngqdoiq fung’yiemj diuhcan, doengzcaez faenyiengj fazcanj seizgei, vih seiqgyaiq hozbingz caeuq fazcanj guh’ok gung’yen moq!

  Gak boux daibyauj!

  Sinhoj cijndaej guhbaenz saehnieb hungmbwk, roengzrengz cijndaej cauh’ok ronghsag. Hawj raeuz youq aen dangj cunghyangh aeu Huz Ginjdauh dungzci guh cungjsuhgi haenx lingjdauj laj de, gietcomz gij coengmingz caeuq ligliengh ik fanh yinzminz, laebdaeb roengzrengz, hailoh baenaj, cienzmienh guhbaenz gak hangh yinvu“11·5” gveihva, mboujduenh duedaeu gaijgwz hailangh caeuq seveicujyi yendaiva gensez saehnieb caiq ndaej hingz!

  

Dozsiengq