Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

YAENGX SANG MBAW GEIZHAUH HUNGMBWK DWNG SIUJBINGZ LIJLUN,DAWZ HWNQGUH YIENGH SAEHNIEB SEVEICUJYI MIZ DAEGSAEK CUNGGUEK CIENZMIENH DOI YIENGQ 21 SIGIJ 10

——Gij Baugau Youq Gwnz Aen Daihhoih Cungguek Gungcanjdangj Daih Cibhaj Baez Daengx Guek Daibyauj Davei
(1997 nienz 9 nyied 12 hauh)

Gyangh Cwzminz
  
【Cihsaw Hung’iq : hung rauh iq】  Dajyaenq
      
  10、Aen Cungguek Gungcanjdangj Najyiengq Sigij Moq

  Yaengx sang mbaw geizhauh hungmbwk Dwng Siujbingz Lijlun, saedyienh gij yinvu baez daihhoih neix dinghcinj haenx, dawz gij saehnieb raeuz cienzmienh doi yiengq 21 sigij, gvanhgen dwg aeu genhciz、gyagiengz caeuq gaijndei aen dangj lingjdauj, caenh’itbouh dawz dangj hwnqguh ndei.

  Cungguek Gungcanjdangj dwg aen lingjdauj haedsim daengx guek gak cuz yinzminz. Gij lingjdauj diegvih aen dangj dwg youz gij singqcaet dangj raeuz dwg gunghyinz gaihgiz senhfunghdui neix daeuj gietdingh, dwg ginggvaq ciengzgeiz doucwngh gaujniemh le cauxbaenz. Youq Cungguek, coengzlaiz mbouj miz aen cwngci cujciz lawz ndaej lumj dangj raeuz yienghneix gyonjcomz le baenzlai senhcin fwnswj, cujciz ndaej yienghneix yiemzmaed caeuq gvangqlangh, vih Cunghvaz Minzcuz guh ok baenzlai hihswngh, caeuq yinzminz baujciz maedcaed lienzhaeh, youq ndaw gocwngz baenaj gig rox cungjgez gingniemh、yiemzsuk nyinhcaen doiqdaih gij loekloeng swhgeij, yienghneix bae guhbaenz caemhcaiq genhciz gij lijlun caeuq lohsienq cingqdeng haenx. Lizsij dawz gij cwzyin hungnaek gyauhawj le dangj raeuz, yinzminz doiq dangj raeuz hix dakhawj gig daih maqmuengh. Dangj lingjdauj yinzminz youq 20 sigij sij baenz le gij biencieng ronghlwenq, hix itdingh naengzgaeuq youq 21 sigij caiq sij baenz gij biencieng ronghlwenq moq.

  Gij aen dangj lingjdauj caeuq aen dangj gensez, liglaiz dwg caeuq gij lizsij yinvu aen dangj, caeuq gij lijlun dem lohsienq dangj raeuz vih saedyienh doengh gij yinvu neix cix laeb hwnj haenx lienzhaeh youq itheij. Daih’it daih lingjdauj cizdij aeu Mauz Cwzdungh guh haedsim haenx, yungh Majgwzswh-Lezningzcujyi guh cijdauj, lienzhaeh diuz cwngci lohsienq dangj raeuz, baenzgoeng bae hengzguh aen gunghcwngz hungmbwk aen dangj gensez, hwnqguh baenz nga gunghyinz gaihgiz senhfunghdui lingjdauj yinzminz duedaeu sinhminzcujcujyi gwzming swngli、laeb hwnj seveicujyi cidu ndeu. Daihngeih daih lingjdauj cizdij aeu Dwng Siujbingz guh haedsim haenx, dawz Majgwzswh-Lezningzcujyi、Mauz Cwzdungh Swhsiengj cangcausing bae yungh youq dangdaih Cungguek, hopheux aen vwndiz gvendaengz youq laj diuzgienh gaijgwz hailangh caeuq yendaiva gensez neix yaek hwnqguh aen dangj yienghlawz、baenzlawz hwnqguh aen dangj neix, haicauh gunghcwngz hungmbwk moq aen dangj gensez. Mienhyiengq sigij moq, dangj cunghyangh lingjdauj daengx dangj cingqcaih laebdaeb doi aen gunghcwngz hungmbwk moq neix baenaj, couh dwg aeu dawz dangj hwnqguh baenz aen Majgwzswhcujyi cwngdangj yienghneix: Yungh Dwng Siujbingz Lijlun vujcangh hwnjdaeuj, itsim iteiq vih yinzminz fuzvu, swhsiengj fuengmienh cwngci fuengmienh cujciz fuengmienh vanzcenz gungjgu, naengzgaeuq gingsouh gak cungj fung’yiemj, itloh byaij youq baihnaj seizdaih, lingjdauj daengx guek yinzminz hwnqguh yiengh seveicujyi miz daegsaek Cungguek. Daengx dangj aeu ciuq aen cungj muzbyauh aen gunghcwngz hungmbwk moq haenx, coengz swhsiengj fuengmienh、cujciz fuengmienh、cozfungh fuengmienh cienzmienh gyagiengz aen dangj gensez, mboujduenh daezsang lingjdauj suijbingz caeuq cizcwng suijbingz, mboujduenh demgiengz gij naengzlig dingj myaex fuengz bienq, yungh gij yienghsiengq moq caeuq gij candouliz engqgya giengzdaih haenx, daiqlingx yinzminz bae guhbaenz aen lizsij yinvu moq.

  Gyagiengz gij swhsiengj gensez aen dangj, gij gaenbonj de dwg giendingh mbouj bienq bae yungh Dwng Siujbingz Lijlun vujcangh daengx dangj, cungfaen fazveih gij swhsiengj cwngci youhsi dangj raeuz. Dwng Siujbingz Lijlun vih dangj raeuz yinsiz seiqgyaiq caeuq gaijcauh seiqgyaiq daezhawj le aen giengzdaih swhsiengj vujgi moq he. Daengx dangj aeu yawjnaek yozsiz, gig rox bae yozsiz, hwng hwnj aen gauhcauz moq yozsiz Majlezcujyi、Mauz Cwzdungh Swhsiengj daegbied dwg Dwng Siujbingz Lijlun ndeu. Yaengx sang mbaw geizhauh hungmbwk Dwng Siujbingz Lijlun, gak gaep lingjdauj ganbu daegbied dwg geij bak boux cunghyangh veijyenz、geij cien boux swngj bu gaep ganbu rap miz gij cwzyin daegbied youqgaenj haenx, soujsien aeu daiqdaeuz hag ndei Dwng Siujbingz Lijlun, caezcingj、cunjgoz bae gaemdawz gij gohyoz dijhi aen lijlun neix, daj cungjdij bae roxyiuj gij gihbwnj gvanhdenj caeuq gihbwnj cingsaenz aen lijlun neix, youh coengz gij gunghcoz lingjyiz bonjfaenh doiq lijlun mizgven neiyungz guh hidungj conhyenz caeuq lijgaij. Laebdaeb youq ndaw yienhgaep doxhwnj lingjdauj ganbu guh gij dangjsing dangjfungh gyauyuz aeu gangj yozsiz、gangj cwngci、gangj cingqheiq guh cujyau neiyungz haenx. Youq daengx dangj cauhbaenz gij fungheiq nyinhcaen hagsib, gij fungheiq minzcuj daujlun, gij fungheiq cizgiz damqra, gij fungheiq gouz caen gangj saed. Genhciz lijlun lienzhaeh saedsaeh, vih yungh bae hag, daezsang Majgwzswhcujyi lijlun suijbingz, daezsang gij naengzlig gaijgez saedsaeh vwndiz, youq gaijcauh gwzgvanh seiqgyaiq doengzseiz gaijcauh cujgvanh seiqgyaiq.

  Gyagiengz gij cujciz gensez aen dangj, gij gaenbonj de dwg dawz aen dangj hwnqguh baenz aen lingjdauj haedsim giengiengz he, cungfaen fazveih gij cujciz youhsi dangj raeuz. Aen dangj raeuz miz 5800 fanh dangjyenz, miz 340 fanh aen gihcwngz dangj cujciz, aeu Majgwzswhcujyi bae cijdauj, ciuq minzcuj cizcunghci gapbaenz aen doengjit cingjdaej, vih saedyienh gunghdoengz muzbyauh bae haenqrengz guh, neix dwg gij cujciz youhsi hungmbwk. Youq baihlaj diuzgienh gaijgwz hailangh caeuq fazcanj seveicujyi hawciengz ginghci, minzcuj cizcunghci mboujdan mbouj ndaej gemjnyieg, caemhcaiq itdingh aeu guh caezcienz caeuq fazcanj. Aeu caenh’itbouh fazyangz minzcuj, baujcang gij minzcuj gienzleih dangjyenz, deudoeng caeuq vatgvangq diuz minzcuj miengloh ndaw dangj, cungfaen fazveih gij cizgizsing caeuq cangcausing daengx dangj; aeu henhoh gij gienzvi cunghyangh, youq swhsiengj fuengmienh、cwngci fuengmienh caeuq cunghyangh baujciz doxdoengz, baujcwng diuz lohsienq dangj raeuz caeuq gij gezcwz cunghyangh ndaej swnhleih gvancez caephengz; aeu laeb caezcienz aen daibyauj daihhoih cidu dangj raeuz, laeb caezcienz gij cidu gak gaep dangjveij cizdij lingjdauj caeuq goyinz faengoeng fucwz dox giethab, engq ndei bae fazveih deihfueng dangjveij youq doengzgaep gak cungj cujciz ndawde gij lingjdauj haedsim cozyungh de. Lingjdauj ganbu aeu daiqdaeuz cunhsouj minzcuj cizcunghci gak hangh gvidingh, henhoh dagiz, yiemz souj giliz, fuengzre goyinz gag guh gietdingh caeuq mbouj goq daengxbuenz gag vunz gag dauq, fanjdui miz lingh mbouj hengz、miz gimq mbouj dingz. Ciuq aen fuengcim gwzming’va、nenzginghva、cihsizva、conhyezva, hwnqguh nga ganbu duivuj hab’wngq seveicujyi yendaiva gensez sihyau、suciz youh sang ndeu, dwg aen gvanhgen gij saehnieb raeuz mboujduenh ndaej baenzgoeng haenx. Aeu dawz swhsiengj cwngci gensez guh cungdenj, dawz gak gaep lingjdauj banhswj hwnqguh baenz aen lingjdauj cizdij genhgez gvancez gij gihbwnj lijlun caeuq gihbwnj lohsienq aen dangj、cienz sim cienz eiq vih yinzminz fuzvu、miz naengzlig lingjdauj yendaiva gensez、doxgiet giengiengz haenx. Gyavaiq yamqdin ganbu cidu gaijgwz, gyadaih minzcuj、guh caezcienz gaujhaed、doicaenh gyauhliuz、gyagiengz gamduk, sawj gij yinzcaiz youhsiu ndaej bonghbiu okdaeuj, daegbied aeu youq ganbu ndaej hwnj ndaej roengz fuengmienh ndaej miz cincanj yienhda. Senjbaz ganbu, itdingh aeu cienzmienh gvancez aen yenzcwz daek caiz giem miz, genhciz yawj caiz yungh vunz, fanjdui yawj caen yungh vunz, fuengzre caeuq niujcingq yungh vunz fuengmienh gij fungheiq mbouj cingq haenx. Aeu dawz gij ganbu ginzcung goengnyinh dwg genhgez caephengz gij lohsienq aen dangj、cingzcik doedok、cingcingq lenzgez haenx gibseiz senjbaz daengz gwnz lingjdauj ganghvei daeuj. Doengh gij vunz famh gij lohsienq aen dangj haenx, doengh gij vunz damdoz seileih、loenghhaw guhgyaj、buet aeu heuh aeu guen dang haenx, nyenghdingh mbouj ndaej haeuj lingjdauj banhswj. Gungganq caeuq senjbaz daihbuek ganbu youhsiu nienzoiq ndaej rap yinvu naek hamj sigij haenx, dwg hangh canloz yinvu ndeu, itdingh aeu cagaenj guh ndei. Aeu yawjnaek gungganq caeuq senjbaz ganbu mehmbwk、ganbu siujsoq minzcuz caeuq gij ganbu mbouj dwg dangjyenz haenx. Laeb caezcienz ganbu lizduiyouh cidu, engq ndei bae daj cwngci fuengmienh gvansim、swnghhoz fuengmienh ciuqgoq ganbu geq, fazveih gij cozyungh gyoengqde. Gij gihcwngz cujciz aen dangj dwg aen giekdaej cienzbouh gunghcoz caeuq candouliz aen dangj. Gyagiengz caeuq gaijcaenh aen dangj gihcwngz cujciz gensez, aeu hopheux diuz gihbwnj lohsienq aen dangj, vih gij cungsim yinvu aen dangj fuzvu; yungh gaijgwz cingsaenz bae yenzgiu cingzgvang moq vwndiz moq, gaijcaenh gunghcoz fuengfap、gunghcoz cozfungh caeuq hozdung fuengsik; nyinhcaen guh ndei gij hong gyauyuz、guenjleix caeuq gamduk dangjyenz, demgiengz gij naengzlig gaijgez bonjndang mauzdun haenx. Gij gihcwngz cujciz aen dangj cungj aeu daj gij daegdiemj bonjfaenh guhhwnj, nyinhcaen caephengz gij cizcwz ndaw dangjcangh gvidingh haenx, roengzrengz bienqbaenz aen candou baujleij giengiengz ndaej gvancez gij lohsienq fuengcim cwngcwz aen dangj、donzgez caeuq daiqlingx ginzcung guhbaenz gij yinvu bonj danhvei.

  Gyagiengz gij cozfungh gensez aen dangj, gij gaenbonj de dwg genhciz aen cunghcij cienz sim cienz eiq vih yinzminz fuzvu, cungfaen fazveih aen youhsi dangj caeuq ginzcung maedcaed lienzhaeh neix. Gij cozfungh ndei lijlun lienzhaeh saedsaeh、maedcaed lienzhaeh ginzcung caeuq bihbingz dem gag guh bihbingz dangj youq ciengzgeiz doucwngh ndawde cauxbaenz haenx, daejyienh ok gij singqcaet caeuq cunghcij aen dangj, itdingh aeu giethab sizcen moq youq daengx dangj lailai fazyangz. Dangj raeuz dwg daj yinzminz daeuj, doek rag youq ndaw yinzminz, cix bae vih yinzminz fuzvu. Sojmiz gij gunghcoz hwnqguh yiengh seveicujyi miz daegsaek Cungguek, muzdiz caeuq gezgoj couh dwg cienz sim cienz eiq vih yinzminz maeuz leih’ik. Gungcanjdangjyenz aeu haeujsim dingq gij yigen caeuq iugouz ginzcung, gvansim ginzcung haemzhoj, vih ginzcung banh saehsaed、banh saehndei. Gij ganbu aen dangj daegbied dwg lingjdauj ganbu, itdingh aeu nyinhcaen caephengz gij lohsienq fuengcim cwngcwz aen dangj, nyenghdingh mbouj ndaej bienliz saek di; itdingh aeu cingqdeng hengzsawj gij gienzlig yinzminz gyauhawj haenx, nyenghdingh mbouj ndaej yungh gienzlig maeuz aeu seileih; itdingh aeu dawz doiq baihgwnz fucwz caeuq doiq ginzcung fucwz doengjit hwnjdaeuj, nyenghdingh mbouj ndaej dawz song yiengh neix gatmbek faenhai、doiqdingj hwnjdaeuj; itdingh aeu youq ndaw gunghcoz genhciz ginzcung lohsienq, haeuj daengz ndaw saedsaeh bae guh diucaz yenzgiu, nyenghdingh mbouj ndaej hengz gvanhliuzcujyi、hingzsizcujyi、giengzbik minghlingh. Yienghyiengh vihliux ginzcung, yienghyiengh siengsaenq ginzcung, yienghyiengh baenghgauq ginzcung, dangj raeuz couh ndaej miz aen goekmboq ligliengh aeu mbouj liux haenx.

  Fanjdui nduknaeuh dwg ciengz cwngci doucwngh yiemzhaenq gvanhaeh daengz dangj caeuq guekgya lixyouq roxnaeuz daimied haenx. Dangj raeuz dwg gijmaz vunzdig cungj at mbouj laemx、dwk mbouj baih. Baujleij ceiq yungzheih daj baihndaw gungbyoengq, itdingh mbouj ndaej swhgeij gauj vaih swhgeij. Danghnaeuz mbouj ndaej miz yauq ceihbanh nduknaeuh, dangj couh yaek saet bae yinzminz ginzcung saenqnyaemh caeuq cihciz. Youq daengx aen gaijgwz hailangh gocwngz ndawde cungj aeu fanjdu nduknaeuh, ciengzseiz roq yiengj gingjcung. Geiq aeu laebhwnj cungj swhsiengj dingjnanz hoenxciengq, youh aeu cug aen bae hoenx ndei duenhmbaeksing canyiz. Aeu laebdaeb ca ndei doengh gij gunghcoz lingjdauj ganbu lenzgez gag haed、cazbanh anq hung anq youqgaenj、niujcingq gij fungheiq mbouj cingq bouhmonz caeuq hangznieb. Gak gaep dangjveij itdingh aeu guh daengz geizhauh sienmingz, daidu giendingh, gunghcoz genhciz mbouj dingzduenh. Genhciz ceih biu youh ceih bonj,gyauyuz dwg giekdaej, fazci dwg baujcwng, gamduk dwg gvanhgen. Doenggvaq gyalaeg gaijgwz, mboujduenh cawz gij diegnamh banhraih dokfat yienhsiengq nduknaeuh haenx bae. Dangjveij doengjit lingjdauj, dangj cwng caez ca caemh guenj, giveij cujciz hezdiuz, bouhmonz gag raphwnj gij cwzyin de, baenghgauq ginzcung cihciz caeuq camgya, genhgez gaemhroengz yienhsiengq nduk naeuh. Lingjdauj ganbu soujsien dwg gauhgiz ganbu aeu caenndang guh yienghndei, mozfan bae souj giliz souj faplwd, gagrox ciepsouh gamduk, daeqceih swhsiengj nduknaeuh ciemqmyaex, guh gij yienghndei ganhoj haenqguh、fwngzseuq banh goengsaeh, daiqlingx ginzcung genhgez caeuq yienhsiengq nduknaeuh guh doucwngh. Aeu dawz fanj nduknaeuh doucwngh caeuq sawj dangj cujciz seuqcingh giethab hwnjdaeuj, youq ndaw dangj nyenghdingh mbouj cinjhawj nduknaeuh fwnswj miz giz ndojndang.

  Coengz yiemz guenj dangj, dwg gij baujcwng ndaej baujciz aen dangj senhcin caeuq seuqcingh, demgiengz gij ningzciliz caeuq candouliz aen dangj. Raeuz seizneix roengzrengz, dwg byaij coh aen ganghlingj ceiq sang ceiq sat saedyienh gungcanjcujyi, lumz aen muzbyauh gyae hung bae, mbouj dwg boux gungcanjdangjyenz habgek; mbouj vih saedyienh aen ganghlingj dangj youq aen duenhmbaek cogaep seveicujyi neix bae roengzrengz haenqguh, doengzyiengh mbouj dwg boux gungcanjdangjyenz habgek. Youq laj lizsij diuzgienh moq, gungcanjdangjyenz baujciz senhcinsing, aeu daejyienh seizdaih iugouz, guh daengz: Ndaw sim miz gungcanjcujyi lijsiengj gyaehung, daiqdaeuz caephengz dangj caeuq guekgya aen duenhmbaek seizneix gak hangh cwngcwz, gamj bae hailoh, cizgiz laebceiq baenaj, mbouj lau gunnanz, mbouj lau daemdengj; caen sim caen eiq vih yinzminz maeuz leih’ik, gwnhoj youq gaxgonq, yiengjsouh youq gaenlaeng, yiemzgek iugouz swhgeij bae banh goengsaeh, lai guh gung’yen; roengzrengz hag Majgwzswhcujyi lijlun, demgiengz gij naengzlig faenbied deng loek, rox ndaej gij cihsiz caeuq bonjsaeh ndaej guh ndei gij gunghcoz bonjfaenh haenx, roengzrengz cauh’ok gij cingzcik ceiq ndei daeuj; youq mwh yungyiemj gaenjgip daihdamj ndwn okdaeuj, henhoh gij leih’ik guekgya caeuq yinzminz, genhgez caeuq doengh gij hingzveiz sienghaih yinzminz、sienghaih ndawbiengz、sienghaih guekgya haenx guh doucwngh. Gak gaep dangjveij aeu genhciz diuz yenzcwz “dangj aeu guenj dangj”, dawz diuz fuengcim coengz yiemz guenj dangj gvancez daengz aen dangj gensez gak hangh gunghcoz ndawde bae, genhgez gaijbienq cungj yienhsiengq giliz soengse caeuq unqnyieg lanxsanj miz youq ndaw dangj haenx. Neix couh aeu yiemzgek ciuq dangjcangh banhsaeh, ciuq gij cidu caeuq gvidingh aen dangj banhsaeh; couh aeu doiq dangjyenz daegbied dwg lingjdauj ganbu yiemzgek iugouz, yiemzgek guenjleix, yiemzgek gamduk; couh aeu youq ndaw swnghhoz ndaw dangj gangj dangjsing, gangj yenzcwz, guh gij swhsiengj doucwngh cizgiz haenx, daihdaih fazyangz cingqheiq, fanjdui gij fungheiq mbouj cingq; couh aeu yiemzgek ciuq gij byauhcunj ndaw dangjcangh gvidingh haenx bae fazcanj dangjyenz, yiemzsuk cawqceq gij dangjyenz mbouj habgek; couh aeu yiemzgek caephengz gij giliz aen dangj, genhciz youq baihnaj giliz bouxboux bingzdwngj. Daengx dangj giliz yiemzmingz, cangqheiq hwnj fwdfwd, dangj raeuz couh ndaej daj swngli byaij coh swngli moq.

  Gak boux dungzci! Daj baez daihhoih neix daengz cibroek daih, yaek dwg haj bi raeuz souh gaujyen moq、duedaeu swngli moq haenx; yaek dwg haj bi yungh cingzcik moq yienh ok dangj raeuz ndaej ciepswnj gij ceiqnyienh Dwng Siujbingz dungzci louz roengzdaeuj, rap hwnj gij maqmuengh yinzminz, dwkhai saehnieb gizmen moq haenx; yaek dwg haj bi cienzmienh guhbaenz“9•5”giva, vih saedyienh 2010 nienz yenjgingj muzbyauh dajroengz giekdaej haenx. Seizneix vanzcenz ndaej miz bajaek bae naeuz, aen muzbyauh daengz bonj sigij satbyai dabdaengz siujgangh dangj raeuz youq gaijgwz hailangh cogeiz daez okdaeuj haenx, ndaej ciuq geiz saedyienh. Youq Cungguek aen guekgya miz cib lai ik vunz yienghneix ndawde, haeujdaengz caeuq hwnqguh aen biengz siujgangh, dwg gienh saehcingz miz yiyi hungmbwk ndeu. Neix yaek vih guekgya ciengzgeiz andingh dwkroengz giekdaej moq, vih engqgya haenqrem bae doicaenh seveicujyi yendaiva gensez cauh’ok haidaeuz moq.

  Raeuz baez daihhoih neix gij lingzhoenz de, couh dwg yaengx sang mbaw geizhauh hungmbwk Dwng Siujbingz Lijlun. Cibhaj daih mbouj miz ngeixvaeg yaek aeu diemj neix guh geiqhauh sij haeuj ndaw saw lizsij bae. Raeuz gaenq byaij ok diuz daihloh ronghsag ndeu, hoeng gwnzroen baihnaj cix mbouj cungj dwg bingzrwdrwd, lij yaek miz gak cungj gunnanz caeuq fung’yiemj, baudaengz gij ndaej liuh daengz caeuq gij nanz liuh daengz, gij daj ndaw guek daeuj caeuq gij daj rog guek daeuj, gij ndaw ginghci swnghhoz caeuq gij ndawbiengz cwngci swnghhoz. Mboujlwnh gijmaz gunnanz caeuq fung’yiemj, cungj mbouj ndaej doenghngauz raeuz doiq Dwng Siujbingz Lijlun gij saenqniemh giendingh haenx, cix cij itdingh sawj raeuz engqgya gagrox bae yungh aen lijlun neix bae haekfug gunnanz, hoenxhingz fung’yiemj, swngli baenaj. Genhciz Dwng Siujbingz Lijlun, youq ndaw sizcen laebdaeb fungfouq caeuq miz cangcausing bae fazcanj aen lijlun neix, neix dwg gij canghyenz lizsij cwzyin dangj cunghyangh lingjdauj cizdij caeuq daengx dangj dungzci.

  Raeuz baez daihhoih neix gij yinvu de, couh dwg dungyenz daengx dangj caeuq daengx guek gak cuz yinzminz doxgiet haenqrengz guh, cienzmienh doicaenh aen saehnieb hungmbwk hwnqguh yiengh seveicujyi miz daegsaek Cungguek. Doxgiet couh dwg dagiz, doxgiet couh dwg ligliengh. Soujsien dwg aen dangj doxgiet, daengx dangj gak gaep cujciz cungj aeu gyagiengz doxgiet, doengzseiz aeu gyagiengz dangj caeuq gak minzcuj dangjbai、gak fuengmienh baengzyoux caenmaed doxgap, gyagiengz dangj caeuq guengjdaih ginzcung gaenjmaed lienzhaeh, gyamaenh caeuq fazcanj daengx guek yinzminz daih doxgiet. Yiengh doxgiet neix, dwg laeb youq gwnz giekdaej leih’ik caezcaemh Cunghvaz Minzcuz saedyienh cienzmienh saenqhwng, dwg laeb youq gwnz giekdaej lijsiengj caezcaemh hwnqguh yiengh seveicujyi miz daegsaek Cungguek. Daengx dangj dungzci caeuq daengx guek gak cuz yinzminz mboujduenh henhoh caeuq gyagiengz cungj doxgiet neix, gij saehnieb raeuz couh yienghyiengh cungj ndaej guh baenz.

  Cingj raeuz yaengx sang mbaw geizhauh hungmbwk Dwng Siujbingz Lijlun, gaenjmaed comzgiet youq seiqhenz dangj cunghyangh, doengz sim doengz daek, mbouj ut mbouj fug, ganhoj haenqrengz guh, dawz aen saehnieb hungmbwk hwnqguh yiengh seveicujyi miz daegsaek Cungguek cienzmienh doi yiengq 21 sigij!

  (Gij swhliu Yinzminzvangj)

  
[1] [2] [3] [4] [5] [6] [7] [8] [9] [10]
Dozsiengq