Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

YAENGX SANG MBAW GEIZHAUH HUNGMBWK DWNG SIUJBINGZ LIJLUN,DAWZ HWNQGUH YIENGH SAEHNIEB SEVEICUJYI MIZ DAEGSAEK CUNGGUEK CIENZMIENH DOI YIENGQ 21 SIGIJ 9

——Gij Baugau Youq Gwnz Aen Daihhoih Cungguek Gungcanjdangj Daih Cibhaj Baez Daengx Guek Daibyauj Davei
(1997 nienz 9 nyied 12 hauh)

Gyangh Cwzminz
  
【Cihsaw Hung’iq : hung rauh iq】  Dajyaenq
      
  8、Doicaenh Guekcoj Huzbingz Doengjit

  Saedyienh guekcoj cienzbouh doengjit, dwg gij simmuengh caezcaemh ndaw guek rog guek daengxcungq vunz Cungguek. Gyoengqvunz Cungguek Gungcanjdangj raeuz dawz guhbaenz guekcoj huzbingz doengjit daihnieb dangguh gij lizsij rapnaek swhgeij, caemhcaiq vih neix ciengzgeiz mbouj rwnh bae haenqrengz guh lo. Dwng Siujbingz gij gohyoz gousiengj “aen guekgya ndeu song cungj cidu” neix, haenqrem doidoengh le guekcoj huzbingz doengjit cincwngz.

  Yanghgangj dauqgvi guekcoj, biumingz le gij gousiengj “aen guekgya ndeu song cungj cidu” ndaej baenzgoeng hungmbwk, biumingz Cungguek yinzminz youq gwnz loh guhbaenz guekcoj doengjit daihnieb byaijok le yamq youqgaenj ndeu. Yanghgangj dauqgvi le, gij fuengcim “aen guekgya ndeu song cungj cidu”、“vunz Yanghgangj gagguenj Yanghgangj”、gauhdu swci haenx ndaej cietsaed gvancez saedhengz, baujciz le aen gizmen mwnhoengh onjdingh. Saehsaed dingh yaek cwngmingz, Yanghgangj Daegbied Hingzcwnggih cwngfuj caeuq beixnuengx Yanghgangj itdingh naengz ciuq Aen Fapgiek Yanghgangj Daegbied Hingzcwnggih, bae guenjleix ndei Yanghgangj.

  Aumwnz yaek youq 1999 nienz dauqgvi ndaw rungj guekcoj, neix youh dwg Cunghvaz Minzcuz gienh saehhoengh ndeu. Gak hangh cunjbei gunghcoz gvendaengz Aumwnz dauqgvi haenx cingqcaih cizgiz youh miz cizsi bae guh. Aumwnz itdingh ndaej saedyienh bingzonj gvaqdoh、swnhleih gyauciep, caemhcaiq baujciz ciengzgeiz fazcanj caeuq onjdingh.

  Gij gousiengj “aen guekgya ndeu song cungj cidu” dwg Dwng Siujbingz Lijlun ndawde aen gapbaenz bouhfaenh youqgaenj ndeu. Gij gihbwnj neiyungz de dwg youq laj cenzdiz guekcoj doengjit neix, guekgya cujdij genhciz seveicujyi cidu, doengzseiz youq Daizvanh、Yanghgangj、Aumwnz baujciz gij swhbwnjcujyi cidu caeuq swnghhoz fuengsik yienzbonj miz haenx ciengzgeiz mbouj bienq. Aen gousiengj neix, geiq daejyienh le gij yenzcwzsing saedyienh guekcoj doengjit、henhoh guekgya cujgenz, youh cungfaen naemj daengz gij lizsij caeuq yienhsaed Daizvanh、Yanghgangj、Aumwnz, daejyienh ok lingzhozsing gig sang, dwg gij gihbwnj fuengcim doicaenh guekcoj huzbingz doengjit daihnieb. Saedhengz “aen guekgya ndeu song cungj cidu”, doiq guekcoj doengjit caeuq minzcuz saenqhwng mizleih, doiq seiqgyaiq huzbingz caeuq fazcanj mizleih.

  Souh gij gihbwnj fuengcim dem gak hangh cwngcwz “huzbingz doengjit、aen guekgya ndeu song cungj cidu” doidoengh, haijyaz song hamq gvanhaeh miz le gig daih fazcanj. Yanghgangj swnhleih dauqgvi caemhcaiq baujciz ciengzgeiz mwnhoengh onjdingh, bietdingh yaek vih gaijgez Daizvanh vwndiz cauh’ok diuzgienh mizleih. Danhseih, ndaw dauj Daizvanh gij faenmbek ginghyang de miz fazcanj caeuq mbangj di guekrog fanj Vaz seiqlig daeuj ganlanz, yiemzcungh gazgiengh huzbingz doengjit cincwngz, lwnhleix bietdingh deng Cungguek yinzminz baudaengz gyoengq beixnuengx Daizvanh genhgez fanjdui.

  Aeu genhciz gij gihbwnj fuengcim “huzbingz doengjit、aen guekgya ndeu song cungj cidu” caeuq bet hangh cujcangh gvendaengz fazcanj song hamq gvanhaeh、doicaenh guekcoj huzbingz doengjit cincwngz haenx. Aeu genhciz gij yenzcwz aen Cungguek ndeu, fanjdui faenmbek, fanjdui “Daizvanh doglaeb”, fanjdui ceiqcauh “song aen Cungguek”、“it Cung it Daiz”, fanjdui guekrog seiqlig ganlanz, nyenghdingh mbouj cinjhawj yiengh seiqlig lawz yungh yiengh fuengsik lawz gaijbienq gij diegvih Daizvanh dwg Cungguek it bouhfaenh ndeu. Aeu roengzrengz yungh huzbingz fuengsik saedyienh doengjit, hoeng mbouj ndaej wngqswngz mbouj sawjyungh vujliz, neix itdingh mbouj dwg cimdoiq beixnuengx Daizvanh, dwg cimdoiq gij maeuzsuenq seiqlig guekrog ganlanz Cungguek doengjit caeuq gauj “Daizvanh doglaeb” haenx. Aeu haenqrengz fazcanj song hamq ginghci gyauhliuz caeuq doxgap, gyavaiq saedyienh song hamq cigsoh dunghyouz、dunghhangz、dunghsangh, laebdaeb gyagiengz song hamq yinzyenz baedauq caeuq youq gohgi、vwnzva daengj gak aen lingjyiz guh gyauhliuz. Raeuz dak maqmuengh youq gwnz ndang gyoengq beixnuengx Daizvanh miz gvanghyungz aigozcujyi conzdungj haenx. Cawz gig siujsoq vunz vanzgu genhciz aen lizcangz “Daizvanh doglaeb” haenx caixvaih, angqcoux Daizvanh gak dangjbai、gak gyaiq yinzsw caeuq raeuz gyauvuenh gij yigen mizgven song hamq gvanhaeh dem huzbingz doengjit haenx.

  Raeuz caiq nyinhcaen hemqheuh baez: Dangguh yamq daih’it, haijyaz song hamq ndaej sien couh “youq laj yenzcwz aen Cungguek ndeu, cingqsik gietsat song hamq digdoiq cangdai” guh danzban, caemhcaiq dabbaenz hezyi; youq gwnz giekdaej neix, doengzcaez rap miz yivu, henhoh Cungguek cujgenz caeuq diegguek caezcingj, caemhcaiq doiq baezlaeng song hamq gvanhaeh fazcanj guh gveihva. Muengh Daizvanh danghgiz nyinhcaen hoizwngq gij genyi caeuq cujcangh raeuz, vaiqdi caeuq raeuz guh cwngci danzban. Youq laj cenzdiz aen Cungguek ndeu, gijmaz vwndiz cungj ndaej damz. Cijaeu dwg gij yigen caeuq genyi doiq guekcoj doengjit mizleih haenx, cungj ndaej daez okdaeuj. Guekcoj doengjit vwndiz, wngdang youz song hamq vunz Cungguek swhgeij gaijgez.

  Gij roennaj Daizvanh riengh youq guekcoj doengjit, faenmbek haengjdingh mbouj miz loh byaij. Raeuz vanzcenz miz gietsim、miz naengzlig doeksat gaijgez Daizvanh vwndiz. Mboujguenj youq gwnz loh saedyienh guekcoj cienzbouh doengjit lij miz geijlai gannanz yungyiemj, haijyaz song hamq daengxcungq vunz Cungguek caeuq sojmiz lwglan Cunghvaz, daj gij gaenbonj leih’ik Cunghvaz Minzcuz bae naemj, fwngz gaem fwngz caez baenaj, guekcoj cienzbouh doengjit caeuq minzcuz cienzmienh saenqhwng, itdingh ndaej saedyienh.

  9、Gozci Hingzsi Caeuq Doiq Rog Cwngcwz

  Dangqnaj seizneix gozci hingzsi cungjdij dwg laebdaeb cohyiengq soengrungq. Huzbingz caeuq fazcanj dwg gij cawjdaez aen seizdaih seizneix. Gij seiqdaeuz dohgizva youq ndaw gvaengxlaengx daengx seiqgyaiq roxnaeuz digih, youq cwngci、ginghci daengj lingjyiz cungj miz fazcanj moq, gwnz seiqgyaiq gak cungj ligliengh okyienh gij faenvaq caeuq cujhab moq haenx. Gij gvanhaeh guek hung caeuq guek hung ndawde ginglig le gij diuzcingj hungnaek youh laegdaeuq haenx. Gak cungj gihyizsing、couhcising hozcoz cujciz beij doenghbaez seizlawz cungj hozyoz ndaej lai. Gij cungjdij saedlig gyoengq guekgya cingqcaih fazcanj haenx ndaej demgiengz. Gij seiqdaeuz dohgizva miz fazcanj doiq seiqgyaiq huzbingz、onjdingh caeuq mwnhoengh mizleih. Gak guek yinzminz gij singhemq iugouz bingzdwngj doxdaih、doxndei caemhyouq haenx ngoenz beij ngoenz sang. Aeu huzbingz、gouz doxgap、coi fazcanj gaenq baenz le seizdaih cujliuz. Gij yinhsu henhoh seiqgyaiq huzbingz haenx cingqcaih mboujduenh demmaj. Youq duenh seizgeiz maqhuz raez ndeu ndawde, baexmienx ndaej seiqgyaiq dacan moq dwg miz gojnaengz, ceng’aeu aen gozci huzbingz vanzging caeuq seiqhenz vanzging ndei ndeu dwg guh ndaej daengz.

  Danhseih, lwngjcan swhveiz ciuqyiengh lij miz, bagenzcujyi caeuq giengzgienz cwngci vanzlij dwg gij cujyau goekgaen bikmwg seiqgyaiq huzbingz dem onjdingh haenx. Gyadaih bingsaeh cizdonz、gyagiengz bingsaeh dungzmungz doiq henhoh huzbingz、baujcang ancienz mbouj miz maz bangcoh. Gij gozci ginghci cizsi gaeuq mbouj goen gcingq、mbouj hableix haenx lij cingq sonjhaih gij leih’ik doengh aen guekgya cingqcaih fazcanj haenx. Gungz fouq cengca mboujduenh gyadaih. Gij yienhsiengq leihyungh “vunzgienz” daengj vwndiz ganlanz gij neicwng guek wnq haenx lij gig youqgaenj. Mbangj giz deihfueng gij doxdawz aenvih minzcuz、cunghgyau、diegguek daengj yinhsu cix yinxfat haenx seiz hwnj seiz roengz. Seiqgyaiq ciuqyiengh lij mbouj anningz.

  Aeu genhciz gij vaigyauh swhsiengj Dwng Siujbingz, itloh mbouj bienq bae hengz gij huzbingz vaigyauh cwngcwz doglaeb gag guhcawj haenx. Doiq sojmiz gij hongsaeh gwnz gozci, raeuz cungj aeu daj gij gaenbonj leih’ik Cungguek yinzminz caeuq seiqgyaiq yinzminz bae naemj, gaengawq saehcingz bonjndang deng loek, gietdingh gij lizcangz caeuq cwngcwz swhgeij, mbouj utcoengz sojmiz gij atlig daj baihrog daeuj haenx, mbouj caeuq aen guek hung roxnaeuz aen guekgya cizdonz lawz giet baenz dungmungz, mbouj gauj bingsaeh cizdonz, mbouj camgya ginhbei doxdax, mbouj guh bingsaeh gozcangh.

  Aeu fanjdui bagenzcujyi, henhoh seiqgyaiq huzbingz. Guek caeuq guek ndawde wngdang doenggvaq hezsangh huzbingz gaijgez gij doxnauh doxdawz song mbiengj, mbouj wnggai doenghyungh vujliz roxnaeuz yungh vujliz daeuj haephangz, mbouj ndaej yungh yiengh gyaijgangj lawz daeuj ganlanz gij neicwng aen guekgya wnq, engq mbouj ndaej baengh ak hangz nyieg, ciemqaeu、heifouh caeuq boekfan aen guekgya wnq. Raeuz mbouj dawz gij cidu ndawbiengz caeuq yisiz hingzdai swhgeij nyengh gya hawj bouxwnq, hix itdingh mbouj cinjhawj guekgya wnq dawz gij cidu ndawbiengz caeuq yisiz hingzdai gyoengqde nyengh gya hawj raeuz.

  Aeu roengzrengz bae doidoengh laebhwnj gij gozci cwngci ginghci cizsi moq goengcingq hableix haenx. Cungj gozci cizsi moq neix dwg aeu huzbingz caemhyouq haj hangh yenzcwz guh giekdaej, habngamj gij cunghcij caeuq yenzcwz lenzhozgoz yencangh, fanjyingj le huzbingz caeuq fazcanj aen seizdaih cauzliuz neix.

  Aeu gingqcungh seiqgyaiq dohyangsing. Aen seiqgyaiq seizneix dwg lai saek lai yiengh. Gak aen guekgya cungj miz gienz bae genj aeu gij cidu ndawbiengz、fazcanj canloz caeuq swnghhoz fuengsik habngamj gij guekcingz bonj guek haenx. Gij saehcingz gak aen guekgya aeu youz gak guek yinzminz gag guhcawj, gij saehcingz gwnz gozci aeu youz daihgya siengliengz gaijgez.

  Aeu genhciz caeuq gueknden doxhuz doxndei. Neix dwg guek raeuz itloh cujcangh yienghneix, nyenghdingh mbouj gaijbienq. Doiq doengh gij doxcwngq vwndiz guek raeuz caeuq gueknden miz haenx, wnggai coengz henhoh aen dagiz huzbingz caeuq onjdingh neix bae naemj, doenggvaq doxndei siengliengz caeuq danzban bae gaijgez. Danghnaeuz it seiz gaijgez mbouj ndaej, gojyij camhseiz cuengq roengzdaeuj gonq, ra aeu gij doxdoengz louzce gij mbouj doengz.

  Aeu caenh’itbouh gyagiengz caeuq daihsam seiqgyaiq guekgya doxgiet dem doxgap. Henhoh guekgya doglaeb、saedyienh ginghci fazcanj, aen gaenbonj muzbyauh neix doiq gij guekgya cingqcaih fazcanj haenx daeuj gangj cungj doxdoengz. Cungguek yaek caeuq doenghbaez ityiengh, caeuq guengjdaih guekgya cingqcaih fazcanj haenx youq gak fuengmienh dox cihciz, maedcaed boiqhab, doengzcaez henhoh cingqdangq gienzik.

  Aeu youq gwnz giekdaej huzbingz caemhyouq haj hangh yenzcwz, laebdaeb caeuq doengh aen guekgya fatdad haenx gaijndei caeuq fazcanj gvanhaeh. Guek caeuq guek wnggai hamj gvaq mbouj doengz cidu ndawbiengz caeuq yisiz hingzdai, dox aeueiq, doxndei caemhyouq. Wnggai ra aeu giz hoihcomz gunghdoengz leih’ik, gyagvangq doxleih doxgap, doengzcaez doiqfouq vunzloih swnghcunz caeuq fazcanj soj bungz daengz doengh gij diuhcan haenx. Doiq gij yigen mbouj doxdoengz, song mbiengj aeu genhciz doiqvah, mbouj bae doiqdingj, daj gij leih’ik gyaeraez song mbiengj dem aen dagiz seiqgyaiq huzbingz caeuq fazcanj hwnjdin, dojdangq bae gaijgez, fanjdui dek di couh cicaiz roxnaeuz yungh cicaiz daeuj haep vunz.

  Aeu genhciz aen yenzcwz bingzdwngj doxleih, caeuq seiqgyaiq gak guek dem digih gvangqlangh gaihcanj mouyiz baedauq、ginghci gisuz doxgap caeuq gohyoz vwnzva gyauhliuz, coicaenh doengzcaez fazcanj.

  Aeu cizgiz camgya laibien vaigyauh hozdung, youq ndaw lenzhozgoz caeuq gizyawz gozci cujciz cungfaen fazveih gij cozyungh guek raeuz.

  Aeu genhciz youq gwnz giekdaej aen yenzcwz doglaeb gag guhcawj、cienzbouh bingzdwngj、dox gingqcungh、mbouj dox ganhsez gij hongsaeh baihndaw, caeuq sojmiz gak guek cwngdangj nyienh caeuq dangj raeuz baedauq haenx fazcanj dangj caeuq dangj gyauhliuz caeuq doxgap gvanhaeh moq, coicaenh guekgya gvanhaeh fazcanj.

  Cungguek dwg gij giendingh ligliengh henhoh seiqgyaiq huzbingz caeuq digih onjdingh. Raeuz guh seveicujyi yendaiva gensez, aeu miz aen gozci vanzging ciengzgeiz huzbingz daegbied dwg aen couhbenh vanzging ndei he. Cungguek fazcanj le mbouj doiq aen guekgya lawz cauxbaenz veihhez, baezlaeng Cungguek fatdad hwnjdaeuj le, hix ciengzlwenx mbouj ei seiq hangz vunz. Cungguek yinzminz caengzging ciengzgeiz deng liedgiengz cinhloz、apbik caeuq hangzhaep gvaq, ciengzlwenx mbouj dawz cungj inget haemzhoj neix bae gya hawj vunz.

  Gij roen seiqgyaiq baenaj ronghsag, hoeng diuz loh haenx ngutngut ngeujngeuj. Cungguek yinzminz nyienh caeuq seiqgyaiq gak guek yinzminz itheij, vih coicaenh huzbingz caeuq fazcanj aen saehnieb cungzgauh neix, vih vunzloih haicaux aen daengzcog engq gyaeundei haenx, mboujduenh roengzrengz bae guh.

  
[1] [2] [3] [4] [5] [6] [7] [8] [9] [10]
Dozsiengq