Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

YAENGX SANG MBAW GEIZHAUH HUNGMBWK DWNG SIUJBINGZ LIJLUN,DAWZ HWNQGUH YIENGH SAEHNIEB SEVEICUJYI MIZ DAEGSAEK CUNGGUEK CIENZMIENH DOI YIENGQ 21 SIGIJ 5

——Gij Baugau Youq Gwnz Aen Daihhoih Cungguek Gungcanjdangj Daih Cibhaj Baez Daengx Guek Daibyauj Davei
(1997 nienz 9 nyied 12 hauh)

Gyangh Cwzminz
  
【Cihsaw Hung’iq : hung rauh iq】  Dajyaenq
      
  5、Ginghci Dijci Gaijgwz Caeuq Ginghci Fazcanj Canloz

  Daj seizneix hwnj daengz aen sigij laeng cib bi gaxgonq, dwg aen seizgeiz youqgaenj guek raeuz saedyienh daihngeih bouh canloz muzbyauh、yamq coh daihsam bouh canloz muzbyauh. Raeuz aeu cizgiz doicaenh ginghci dijci caeuq ginghci demmaj fuengsik gaenbonj cienjbienq, roengzrengz saedyienh “9•5” giva caeuq 2010 nienz yenjgingj muzbyauh, vih youq geizgyang aen sigij laeng gihbwnj saedyienh yendaiva dwk roengz gij giekdaej maenhsaed. Youq aen seizgeiz neix, laebhwnj aen yiengh hawciengz ginghci dijci seveicujyi haemq caezcienz haenx, baujciz gozminz ginghci ndaej lienzdaemh riengjvaiq gengangh fazcanj, dwg song aen godiz hung itdingh aeu gaijgez ndei haenx. Aeu genhciz gij gaijgwz fueng’yiengq seveicujyi hawciengz ginghci, sawj gaijgwz youq mbangj di hungnaek fuengmienh caiq ndaej lingh miz cungbyoengq, caemhcaiq youq youhva ginghci gezgou、fazcanj gohyoz gisuz caeuq daezsang doiq rog hailangh suijbingz daengj fuengmienh ndaej daengz cincanj hungnaek, caencingq byaij ok diuz roenloh ginghci hezdiuz fazcanj suzdu haemq vaiq、yauyiz haemq ndei、cingjdaej suciz mboujduenh daezsang haenx daeuj.

  (1) Diuzcingj caeuq guh caezcienz sojyoujci gezgou. Gunghyoujci guh cawjdaej、lai yiengh sojyoujci ginghci doengzcaez fazcanj, dwg hangh gihbwnj ginghci cidu aen duenhmbaek cogaep seveicujyi guek raeuz. Laebdingh aen cidu neix, dwg youz seveicujyi singqcaet caeuq gij guekcingz aen duenhmbaek cogaep daeuj gietdingh: Daih’it, guek raeuz dwg seveicujyi guekgya, itdingh aeu genhciz gunghyoujci guh aen giekdaej seveicujyi ginghci cidu; daihngeih, guek raeuz lij cawqyouq aen duenhmbaek cogaep seveicujyi, sihyau youq laj diuzgienh gunghyoujci guh cawjdaej haenx fazcanj lai cungj sojyoujci ginghci; daihsam, sojmiz doengh gij sojyoujci hingzsik habngamj “sam aen mizleih” de cungj ndaej caemhcaiq wnggai yungh daeuj vih seveicujyi fuzvu.

  Cib’it gaiq sam cung cienzhoih doxdaeuj, aen dangj raeuz nyinhcaen cungjgez gij gingniemh gyauyin gwnz sojyoujci vwndiz doenghbaez, ceiqdingh ok aen fuengcim aeu gunghyoujci guh cawjdaej、lai cungj ginghci cwngzfwn doengzcaez fazcanj, cugbouh siucawz doengh gij cingzgvang aenvih sojyoujci gezgou mbouj hableix cix gazgiengh swnghcanjliz fazcanj haenx, okyienh gij gizmen gunghyoujci saedyienh hingzsik lai cungj lai yiengh caeuq lai cungj ginghci cwngzfwn doengzcaez fazcanj. Laebdaeb diuzcingj caeuq laeb caezcienz sojyoujci gezgou, caenh’itbouh gaijfang caeuq fazcanj swnghcanjliz, dwg gij yinvu hungnaek ginghci dijci gaijgwz.

  Aeu cienzmienh yinsiz gij eiqsei gunghyoujci ginghci. Gunghyoujci ginghci mboujdan baudaengz guekmiz ginghci caeuq cizdij ginghci, lij baudaengz doengh gij guekmiz cwngzfwn caeuq cizdij cwngzfwn ndaw vwnhoz sojyoujci ginghci. Gij cawjdaej diegvih gunghyoujci cujyau daejyienh youq: Gunghyouj swhcanj youq ndaw ndawbiengz cungj swhcanj ciemq youhsi; guekmiz ginghci gaemguenj gij minghmeg gozminz ginghci, doiq ginghci fazcanj miz cujdauj cozyungh. Neix dwg doiq daengx guek daeuj gangj, miz di deihfueng、miz mbangj canjnieb ndaej miz di cabied. Gunghyouj swhcanj ciemq youhsi, aeu miz soqliengh youhsi, engq aeu yawjnaek daezsang caetliengh. Guekmiz ginghci miz cujdauj cozyungh, cujyau daejyienh youq gij ligliengh gaemguenj fuengmienh. Aeu daj gwnz canloz bae diuzcingj guekmiz ginghci baijbouh. Doiq doengh gij hangznieb youqgaenj caeuq lingjyiz youqgaenj gvanhaeh daengz gij minghmeg gozminz ginghci haenx, guekmiz ginghci itdingh aeu ciemq youq aen diegvih ndaej dazyinx caeuq gaemguenj haenx. Youq gizyawz lingjyiz, gojyij doenggvaq dauqcungz gapbaenz swhcanj caeuq diuzcingj gezgou, daeuj gyagiengz cungdenj, daezsang gij cingjdaej caetliengh guekmiz swhcanj. Cijaeu genhciz gunghyoujci guh cawjdaej, guekgya gaemguenj gij minghmeg gozminz ginghci, gij ligliengh gaemguenj caeuq gij naengzlig gingcwngh guekmiz ginghci ndaej demgiengz, youq laj aen cenzdiz neix, gij bijcung guekmiz ginghci gemjnoix saek di. Mbouj yingjyangj daengz gij seveicujyi singqcaet guek raeuz.

  Cizdij sojyoujci ginghci dwg gij gapbaenz bouhfaenh youqgaenj gunghyoujci ginghci. Cizdij ginghci gojyij daejyienh aen yenzcwz doengzcaez ndaej fouq, gojyij gvangqlangh supsou doengh gij swhginh faensanq youq ndaw biengz haenx, sawj gij atlig couhnieb ndaej soengrungq, demgya goenggungh cwkrom caeuq guekgya suisouh. Aeu cihciz、gujli caeuq bangcoh ndawsingz lajmbanj fazcanj lai cungj hingzsik cizdij ginghci. Neix doiq fazveih gij cawjdaej cozyungh gunghyoujci ginghci miz yiyi hungnaek.

  Gij gunghyoujci saedyienh hingzsik gojyij caemhcaiq wngdang lai cungj lai yiengh. Sojmiz gij ginghyingz fuengsik caeuq cujciz hingzsik fanjyingj seveiva swnghcanj gvilwd haenx cungj gojyij daihdamj leihyungh. Aeu roengzrengz bae ra aeu gij gunghyoujci saedyienh hingzsik ndaej gig daih coicaenh swnghcanjliz fazcanj de. Gujfwnci dwg cungj swhbwnj cujciz hingzsik yienhdaih giyez, doiq faenliz sojyoujgenz caeuq ginghyingzgenz mizleih, doiq daezsang giyez caeuq swhbwnj yincoz yauliz mizleih, swhbwnjcujyi yungh ndaej, seveicujyi hix yungh ndaej. Mbouj ndaej loengxdoengj bae gangj gujfwnci dwg gunghyouj roxnaeuz dwg swhyouj, gvanhgen aeu yawj gunggujgenz gaem youq ndaw fwngz bouxlawz. Guekgya caeuq cizdij gungguj, miz gij gunghyoujsing yienhda, neix doiq gyadaih gij cihbei fanveiz gunghyouj swhbwnj, demgiengz gij cawjdaej cozyungh gunghyoujci mizleih. Nganxcienz ndawsingz lajmbanj daihliengh okyienh lai cungj lai yiengh gujfwn hozcozci ginghci, dwg gij swvuz moq ndaw gaijgwz, aeu cihciz caeuq dazyinx, mboujduenh cungjgez gingniemh, sawj de cugbouh guh caezcienz bae. Doengh gij cizdij ginghci aeu bouxguhhong lauzdung lienzhab caeuq bouxguhhong bonjcienz lienzhab guhcawj haenx, daegbied aeu dizcang caeuq gujli.

  Feihgunghyoujci ginghci dwg aen gapbaenz bouhfaenh youqgaenj ndaw seveicujyi hawciengz ginghci guek raeuz. Doiq godij、swhyingz daengj gij ginghci mbouj dwg gunghyoujci haenx aeu laebdaeb gujli、dazyinx, sawj de ndaej gengangh fazcanj. Neix doiq muenzcuk cungqvunz lai cungj lai yiengh sihyau, demgya couhnieb, coicaenh gozminz ginghci fazcanj miz cozyungh youqgaenj.

  Aeu laeb caezcienz caizcanj faplwd cidu, ciuq fap baujhoh gij habfap gienzik caeuq goengbingz gingcwngh gak loih giyez, caemhcaiq doiq gyoengqde gamduk guenjleix.

  (2) Gyavaiq doicaenh guekmiz giyez gaijgwz. Guekmiz giyez dwg gij donghsaeu gozminz ginghci guek raeuz. Guh ndei guekmiz giyez gaijgwz, doiq laebhwnj yiengh hawciengz ginghci dijci seveicujyi caeuq gyamaenh seveicujyi cidu, miz gij yiyi gig youqgaenj haenx.

  Laebhwnj yienhdaih giyez cidu dwg aen fueng’yiengq guekmiz giyez gaijgwz. Aeu ciuq aen iugouz “canjgienz cingcuj、gienzleih cwzyin mingzbeg、cwng gi faenhai、guenjleix gohyoz”, doiq guekmiz da cunghhingz giyez ciuq gij gunghswhci gveihfan haenx bae saedhengz gaijgwz, sawj giyez ndaej baenz gij fazyinz sizdij caeuq gingcwngh cawjdaej hab’wngq hawciengz haenx. Caenh’itbouh mingzbeg doekdingh gij gienzleih caeuq cwzyin guekgya caeuq giyez. Guekgya ciuq douzhaeuj giyez gij swhbwnj cungj soq lai noix bae yiengj miz sojyoujcej gienzik, doiq gij caiq giyez rap dawz gij cwzyin mizhanh; giyez ciuq fap gag guhcawj bae ginghyingz, gag rap canh sied. Cwngfuj mbouj ndaej cigsoh guenj gij ginghyingz hozdung giyez, giyez hix mbouj ndaej mbouj souh sojyoujcej guenjhaed, sonjhaih gij gienzik sojyoujcej. Aeu yungh lai cungj fuengsik, baudaengz cigsoh yungzswh, cungsaed giyez swhbwnjginh. Gungganq caeuq fazcanj lai cungj lai yiengh douzswh cawjdaej, doidoengh cwng gi faenhai caeuq giyez cienjvuenh ginghyingz gihci.

  Dawz guekmiz giyez gaijgwz caeuq gaijcuj、gaijcauh、gyagiengz guenjleix giethab hwnjdaeuj. Aeu yungh sim daengz banh ndei daengx aen guekmiz ginghci bae, ca ndei gij hung, cuengq hoengh gij iq, doiq guekmiz giyez saedhengz canlozsing gaijcuj. Aeu swhbwnj guh diuz sainiengq, doenggvaq hawciengz cauxbaenz gij giyez cizdonz hung hamj digih、hamj hangznieb、hamj sojyoujci caeuq hamj guek ginghyingz miz gingcwnghliz haemq giengz haenx. Yungh gaijcuj、lienzhab、doxgyoeb、cociq、cwngzbauh ginghyingz caeuq gujfwn hozcozci、gai ok daengj hingzsik, gyavaiq gij yamqdin cuengqhai gaujhoengh guekmiz siujhingz giyez. Aeu doicaenh giyez gisuz cinbu, gujli、dazyinx gij swhginh giyez caeuq ndawbiengz douzhaeuj gisuz gaijcauh bae, cauxbaenz gij gihci haifat canjbinj moq caeuq gisuz cauh moq cohyiengq hawciengz haenx. Aeu gyagiengz gohyoz guenjleix, damqra gij giyez lingjdauj dijci caeuq cujciz guenjleix cidu hab hawciengz ginghci gvilwd caeuq gozcingz guek raeuz haenx, laebhwnj gezcwz、caephengz caeuq gamduk dijhi, cauxbaenz gij gikleih caeuq hanhhaed gihci mizyauq haenx. Aeu hwnqguh ndei giyez lingjdauj banhswj, fazveih gij cwngci haedsim cozyungh aen dangj cujciz ndaw giyez, genhciz aen fuengcim itsim iteiq baenghgauq gunghyinz gaihgiz.

  Saedhengz gujli doxgyoeb、gveihfan bocanj、roengz gang faenriuz、gemj vunz dem yauq caeuq caiq couhnieb gunghcwngz, cauxbaenz giyez aen gingcwngh gihci ndei louz yaez loenq. Riengz giyez gaijgwz haeujlaeg、gisuz cinbu caeuq ginghci gezgou diuzcingj, yinzyenz liuzdung caeuq cizgungh roengz gang couh nanz mienx. Neix yaek sawj mbangj cizgungh deng camhseiz gunnanz, hoeng daj gaenbonj daeuj gangj, doiq ginghci fazcanj mizleih, hab aen leih’ik gyaeraez gunghyinz gaihgiz. Dangj caeuq cwngfuj aeu yungh cizgiz cosih, baenghgauq ndawbiengz gak fuengmienh ligliengh, gvansim caeuq anbaiz ndei gij swnghhoz gyoengq cizgungh roengz gang, banh ndei cizyez beizyin, haigvangq couhnieb monzloh, doicaenh caiq couhnieb gunghcwngz. Guengjdaih cizgungh aeu cienjbienq couhnieb gvanhnen, daezsang gij suzciz bonjndang, roengzrengz hab’wngq gij iugouz moq gaijgwz caeuq fazcanj.

  Cizgiz doicaenh gak hangh boiqdauq gaijgwz. Laebhwnj gij guekmiz swhcanj guenjleix、gamduk caeuq yingzyin gihci mizyauq haenx, baujcwng guekmiz swhcanj ndaej baujciz cwnghciz, fuengzre guekmiz swhcanj saetsanq. Laebhwnj ndawbiengz baujcang dijhi, saedhengz aen ciengx laux、yihliuz baujyiemj cidu ndawbiengz dungjcouz caeuq goyinz canghu doxgiethab, guh caezcienz saetnieb baujyiemj caeuq ndawbiengz gouqcaeq cidu, daezhawj gij ndawbiengz baujcang ceiq gihbwnj haenx. Laebhwnj ndawsingz ranzyouq gunghcizginh, gyavaiq gaijgwz ranzyouq cidu.

  Gyalaeg guekmiz giyez gaijgwz, dwg daengx dangj gij yinvu youqgaenj youh gannanz haenx. Aeu giendingh saenqsim, gamj bae damqcaz, daihdamj sizcen, haenqrengz ceng’aeu daengz aen sigij neix satbyai daih dingzlai guekmiz da cunghhingz guzgan giyez cobouh laebhwnj yienhdaih giyez cidu, ginghyingz canggvang mingzyenj gaijndei,haicaux guekmiz giyez gaijgwz caeuq fazcanj gizmen moq.

  (3) Guh ndei caezcienz faenboiq gezgou caeuq faenboiq fuengsik. Genhciz gij cidu aeu ciuq lauzdung lainoix bae faenboiq haenx guh cawjdaej、lai cungj faenboiq fuengsik caemh youq haenx. Dawz ciuq lauzdung faenboiq caeuq ciuq swnghcanj yausu faenboiq giethab hwnjdaeuj, genhciz yauliz ciemq gonq、giemgoq goengbingz, doiq youhva swhyenz boiqceiq, coicaenh ginghci fazcanj, baujciz ndawbiengz onjdingh mizleih. Ciuqfap baujhoh gij souhaeuj habfap, cinjhawj caeuq gujli bouhfaenh vunz ndeu doenggvaq lauxsaed lauzdung caeuq habfap ginghyingz sien fouq hwnjdaeuj, cinjhawj caeuq gujli swhbwnj、gisuz daengj swnghcanj yausu camgya souik faenboiq. Gimqhaed gij souhaeuj mbouj habfap, doiq gij gyangwn caizcanj goenggya caeuq yungh ndoj gvaeh deuz gvaeh、gienz ngaenz doxguh gaicawx daengj soujduenh mbouj habfap maeuzaeu leih’ik de, genhgez ciuq fap ceihbanh. Cwngjdun gij souhaeuj mbouj hableix, doiq gij baengh hangznieb lungjdon caeuq moux di dwzsuh diuzgienh aeu ndaej goyinz ngeg’vaih souhaeuj de, bietdingh aeu niujcingq bae. Diuzcez gij souhaeuj sang gvaqbouh haenx, laeb caezcienz goyinz sojdwzsuici, hai sou yizcanjsui daengj suicungj moq. Gveihfan souhaeuj faenboiq, sawj souhaeuj cengca cugciemh hableix bae, fuengzre boux gungz yied gungz boux fouq yied fouq.

  Cizcungh caizliz, saenqhwng guekgya caizcwng, dwg gij diuzgienh youqgaenj baujcwng ginghci ndawbiengz gak hangh saehnieb fazcanj haenx. Aeu cingqdeng cawqleix gij faenboiq gvanhaeh guekgya、giyez、goyinz gyang de caeuq cunghyangh dem deihfueng gyang de, cugbouh daezsang gij bijcung caizcwng souhaeuj ciemq ndaw gozminz swnghcanj cungjciz caeuq gij bijcung cunghyangh caizcwng souhaeuj ciemq daengx guek caizcwng souhaeuj haenx, caemhcaiq hab’wngq sojyoujci gezgou bienqvaq caeuq cwngfuj ciznwngz cienjbienq, diuzcingj caizcwng soucei gezgou, laebhwnj gij guekgya caizcwng onjmaenh、bingzyaenx haenx.

  
[1] [2] [3] [4] [5] [6] [7] [8] [9] [10]
Dozsiengq