Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

YAENGX SANG MBAW GEIZHAUH HUNGMBWK DWNG SIUJBINGZ LIJLUN,DAWZ HWNQGUH YIENGH SAEHNIEB SEVEICUJYI MIZ DAEGSAEK CUNGGUEK CIENZMIENH DOI YIENGQ 21 SIGIJ 4

——Gij Baugau Youq Gwnz Aen Daihhoih Cungguek Gungcanjdangj Daih Cibhaj Baez Daengx Guek Daibyauj Davei
(1997 nienz 9 nyied 12 hauh)

Gyangh Cwzminz
  
【Cihsaw Hung’iq : hung rauh iq】  Dajyaenq
      
  4、Diuz Gihbwnj Lohsienq Caeuq Aen Ganghlingj Duenhmbaek Cogaep Seveicujyi

  Cib’it gaiq sam cung cienzhoih doxdaeuj, aen dangj raeuz cingqdeng bae faensik gozcingz, guh’ok gij gohyoz lwnhduenh naeuz guek raeuz vanzlij cawqyouq aen duenhmbaek cogaep seveicujyi. Raeuz gangj yienghyiengh daj saedsaeh hwnjdin, gij saedsaeh ceiq hung haenx couh dwg Cungguek seizneix cawqyouq caemhcaiq yaek ciengzgeiz cawqyouq aen duenhmbaek cogaep seveicujyi. Raeuz gangj aeu loengh cingcuj “gijmaz dwg seveicujyi、baenzlawz hwnqguh seveicujyi”, couh bietdingh aeu loengh cingcuj gijmaz dwg gij seveicujyi cingq cawqyouq aen duenhmbaek cogaep haenx, youq aen duenhmbaek cogaep baenzlawz hwnqguh seveicujyi. Cib’it gaiq sam cung cienzhoih gaxgonq, raeuz youq mwh hwnqguh seveicujyi okyienh loengloek, gaenbonj yienzaen ndawde miz aen ndeu, couh dwg aenvih daezok mbangj yinvu caeuq cwngcwz mauhgvaq le aen duenhmbaek cogaep seveicujyi. Gaenh 20 bi gaijgwz hailangh caeuq yendaiva gensez guh ndaej baenzgoeng, gaenbonj yienzaen ndawde miz aen ndeu, couh dwg haekfug le doengh gij gvanhnen caeuq cwngcwz loengloek mauhgvaq duenhmbaek haenx, youh daeqceih gij cujcangh loengloek vut aen gihbwnj cidu seveicujyi bae. Yienghneix guh, mbouj lizhai seveicujyi, dwg cingqcaih din dab saeddeih bae hwnqguh seveicujyi, sawj seveicujyi youq Cungguek caencingq ndwetlwed caeuq hwngvuengh hwnjdaeuj, guengjdaih yinzminz ginggvaq caenndang gamjsouh le engqgya yungjhu seveicujyi.

  Baez daihhoih neix caenh’itbouh giengzdiuh aen vwndiz neix, dwg aenvih: Mienhdoiq gij yinvu gannanz hungnaek gaijgwz gunghgenh caeuq haicauh gizmen moq haenx, raeuz gaijgez gak cungj mauzdun, loengh cingcuj gak cungj ngeizvaeg, nyinhrox vihmaz bietdingh aeu saedhengz yiengh lohsienq caeuq cwngcwz seizneix, cix mbouj ndaej saedhengz yiengh lohsienq caeuq cwngcwz wnq, gvanhgen lij dwg doiq gij gihbwnj gozcingz cawqyouq aen duenhmbaek cogaep seveicujyi, aeu miz doengjit yinsiz caeuq gaem ndaej cinj.

  Seveicujyi dwg aen duenhmbaek cogaep gungcanjcujyi, Cungguek youh cawqyouq aen duenhmbaek cogaep seveicujyi, couh dwg aen duenhmbaek mbouj fatdad haenx. Youq raeuz aen guek hung baihdoeng yienghneix, ginggvaq sinhminzcujcujyi byaij hwnj diuz loh seveicujyi, neix dwg gij swngli hungmbwk. Hoeng, guek raeuz mwh haeuj daengz seveicujyi, aeu swnghcanjliz fazcanj suijbingz daeuj gangj, beij fatdad guekgya lij doeklaeng gig gyae. Neix couh gietdingh le bietdingh youq laj seveicujyi diuzgienh ginggvaq aen duenhmbaek cogaep maqhuz raez ndeu, bae saedyienh gunghyezva caeuq ginghci seveiva、sicangzva、yendaiva. Neix dwg aen lizsij duenhmbaek mbouj ndaej hamj hoengq gvaq bae haenx.

  Youq ndaw ganghlingj aen dangj mingzbeg daezok aen duenhmbaek cogaep seveicujyi aen gohyoz gainen neix, neix youq gwnz Majgwzswhcujyi lizsij dwg baez daih’it. Dwng Siujbingz youq mwh gangj daengz hwnqguh gij seveicujyi aen duenhmbaek cogaep haenx daegbied giengzdiuh: “Gij saehnieb raeuz seizneix guh, dwg hangh saehnieb moq ndeu. Majgwzswh caengz gangj gvaq, gij vunz ciuhgonq raeuz caengz guh gvaq, gizyawz seveicujyi guekgya hix caengz guh gvaq, ndigah, mbouj miz gij gingniemh baenzdauq ndaej ciuq hag. Raeuz cijnaengz doq guh doq hag, youq ndaw sizcen bae damqra.” Neix couh dwg naeuz, youq Cungguek, caen yaek hwnqguh seveicujyi, yienghhaenx couh cijnaengz yienghyiengh daj gij saedsaeh aen duenhmbaek cogaep seveicujyi hwnjdin, cix mbouj ndaej daj cujgvanh simmuengh hwnjdin, mbouj ndaej daj gij vunqyiengh guekrog yienghneix yienghhaenx hwnjdin, mbouj ndaej daj gaengjbanj bae lijgaij mbangj aen lwnhduenh ndaw cucoz Majgwzswhcujyi caeuq dawz moux di lundenj loengloek dem bengx aen mingzdaeuz Majgwzswhcujyi bae hwnjdin.

  Aen duenhmbaek cogaep seveicujyi, dwg aen lizsij duenhmbaek cugbouh baetduet gij yienghceij mbouj fatdad, daihdaej saedyienh seveicujyi yendaiva haenx; dwg aen lizsij duenhmbaek daj aen nungzyezgoz nungzyez yinzgouj ciemq cingzsoq gig daih、cujyau baengh soujgungh lauzdung, cugbouh cienjbienq baenz aen guekgya gunghyezva feih nungzyez yinzgouj ciemq dingzlai、bauhamz miz yienhdaih nungzyez caeuq yienhdaih fuzvuyez haenx; dwg aen lizsij duenhmbaek daj swyenz ginghci buenq swyenz ginghci ciemq cingzsoq gig daih, cugbouh cienjbienq baenz ginghci sicangzva cingzdoh haemq sang haenx; dwg aen lizsij duenhmbaek daj vwnzmangz buenq vwnzmangz yinzgouj ciemq cingzsoq gig daih、gohgi gyauyuz vwnzva doeklaeng, cugbouh cienjbienq baenz gohgi gyauyuz vwnzva haemq fatdad haenx; dwg aen lizsij duenhmbaek daj gungzhoj yinzgouj ciemq cingzsoq gig daih、yinzminz swnghhoz suijbingz haemq daemq, cugbouh cienjbienq baenz daengxcungq yinzminz haemq fouqmiz haenx; dwg aen lizsij duenhmbaek daj digih ginghci vwnzva gig mbouj bingzyaenx, doenggvaq miz gonq miz laeng bae fazcanj, cugbouh sukiq cengca haenx; dwg aen lizsij duenhmbaek doenggvaq gaijgwz caeuq damqra, laebhwnj caeuq laeb caezcienz gij yiengh hawciengz ginghci dijci seveicujyi haemq cingzsug youh gig miz rengzhoengh、seveicujyi minzcuj cwngci dijci caeuq gizyawz fuengmienh dijci haenx; dwg aen lizsij duenhmbaek guengjdaih yinzminz gaenjmaenh laebhwnj gij lijsiengj doengzcaemh hwnqguh yiengh seveicujyi miz daegsaek Cungguek, gag haenqrengz guh mbouj dingz, ceiqheiq genhgez, naebsim baenaj, ganhoj haenqrengz guh, gaenxgiemh hwnqguh guekgya, youq hwnqguh vuzciz vwnzmingz doengzseiz roengzrengz hwnqguh cingsaenz vwnzmingz haenx; dwg aen lizsij duenhmbaek cugbouh suksiuj caeuq seiqgyaiq senhcin suijbingz cengca, youq gwnz giekdaej seveicujyi saedyienh Cunghvaz Minzcuz caiq daih hwngvuengh baez ndeu. Gij lizsij cincwngz yienghneix, ceiq noix aeu miz 100 bi seizgan. Gangj daengz gyamaenh caeuq fazcanj seveicujyi cidu, lij aeu seizgan engqgya raez dem, aeu baengh geij ciuh vunz、cib geij ciuh vunz, engqdaengz geij cib ciuh vunz genhciz mbouj rwnh bae roengzrengz haenqguh.

  Daj 50 nienzdaih cunggeiz guek raeuz haeuj daengz aen duenhmbaek cogaep seveicujyi hainduj daengz seizneix, ginggvaq 40 lai bi daegbied dwg gaenh 20 bi neix fazcanj, gij swnghcanjliz guek raeuz daezsang gig daih, gak hangh saehnieb cinbu gig daih. Hoeng coengz daengxdaej daeuj gangj, gij canggvang vunz lai、daej bueg, digih fazcanj mbouj bingzyaenx, swnghcanjliz mbouj fatdad haenx caengz ndaej daj goekgaen bae gaijbienq; seveicujyi cidu lij caengz caezcienz, yiengh hawciengz ginghci dijci seveicujyi lij caengz cingzsug, seveicujyi minzcuj fazci lij mbouj gaeuq caezcienz, gij swhsiengj nduknaeuh funghgencujyi、swhbwnjcujyi caeuq siujswnghcanj sibgvenq seiqlig youq gwnzbiengz lij miz yingjyangj gvangqlangh. Aen biengz seveicujyi guek raeuz ciuqyiengh lij cawqyouq aen duenhmbaek cogaep.

  Gij gaenbonj yinvu seveicujyi dwg fazcanj gij swnghcanjliz ndawbiengz. Youq aen duenhmbaek cogaep seveicujyi, engqgya aeu dawz gyonjcomz ligliengh fazcanj gij swnghcanjliz ndawbiengz baij youq giz diegvih daih’it. Guek raeuz ginghci、cwngci、vwnzva caeuq ndawbiengz swnghhoz gak fuengmienh miz gak cungj gak yiengh mauzdun, gaihgiz mauzdun aenvih gij yinhsu ndaw guek rogguek lij yaek youq itdingh fanveiz ndawde ciengzgeiz mizyouq, hoeng ndawbiengz cujyau mauzdun dwg yinzminz gij vuzciz vwnzva sihyau ngoenz beij ngoenz demmaj haenx caeuq gij swnghcanj ndawbiengz doeklaeng miz mauzdun, aen cujyau mauzdun neix ronzdoeng guek raeuz aen duenhmbaek cogaep seveicujyi daengx aen gocwngz caeuq ndawbiengz swnghhoz gak aen fuengmienh. Neix couh gietdingh le raeuz bietdingh aeu dawz ginghci gensez dangguh aen cungsim daengx dangj daengx guek gunghcoz, gak hangh gunghcoz cungj aeu fugcoengz caeuq vih aen cungsim neix fuzvu. Cijmiz ca ndaet aen cujyau mauzdun caeuq gunghcoz cungsim neix, cij ndaej cingsingj bae cazyawj caeuq gaemmaenh daengxbuenz mauzdun ndawbiengz, mizyauq bae coicaenh gaijgez gak cungj mauzdun ndawbiengz. Fazcanj dwg dauhleix geng, Cungguek aen gvanhgen gaijgez sojmiz vwndiz dwg youq baenghgauq bonjfaenh fazcanj.

  Youq aen duenhmbaek cogaep seveicujyi, hopheux aen gaenbonj yinvu fazcanj swnghcanjliz ndawbiengz, aeu dawz gaijgwz dangguh gij dungliz doicaenh hwnqguh yiengh seveicujyi saehnieb miz daegsaek Cungguek ndawde gak hangh gunghcoz. Gaijgwz dwg cienzmienh gaijgwz, dwg youq laj cenzdiz genhciz seveicujyi gihbwnj cidu, gag rox bae diuzcingj swnghcanj gvanhaeh caeuq sangcwngz gencuz gak aen fuengmienh caeuq vanzcez, daeuj hab’wngq gij lizsij iugouz aen duenhmbaek cogaep swnghcanjliz fazcanj suijbingz caeuq saedyienh yendaiva haenx. Dawz seveicujyi caeuq hawciengz ginghci giethab hwnjdaeuj, dwg aen canggij hungmbwk ndeu. Neix couh aeu cizgiz damqra, daihdamj sawqniemh, gingqcungh gyoengq vunzlai gij cingsaenz dingxdaeuz haicauh haenx; aeu gyalaeg gaijgwz, gaijgez gij mauzdun caengzlaeg caeuq gvanhgen vwndiz ndaw dijci cienjbienq; aeu gyadaih hailangh, supsou caeuq ciqyungh gij senhcin gisuz caeuq guenjleix gingniemh seiqgyaiq gak guek baudaengz swhbwnjcujyi fatdad guekgya.

  Youq aen duenhmbaek cogaep seveicujyi, cingqdeng cawqleix gaijgwz、fazcanj caeuq onjdingh gvanhaeh, baujciz cwngci vanzging caeuq ndawbiengz cizsi onjdingh, miz gij yiyi gig youqgaenj. Mbouj miz onjdingh, gijmaz saeh cungj guh mbouj baenz. Bietdingh aeu genhciz aen dangj lingjdauj caeuq yinzminz minzcuj conhcwng, genhciz gij fuengcim vuzciz vwnzmingz caeuq cingsaenz vwnzming song fwngz ca、song fwngz cungj aeu geng neix, baetcawz sojmiz gij yinhsu buqvaih onjdingh, fanjdui swhcanj gaihgiz swyouzva, singjgaeh ndaw guek rog guek digdoiq seiqlig caeg’iemq、boekfan caeuq faenmbek hozdung. Bietdingh aeu dawz gaijgwz ligdoh、fazcanj suzdu caeuq aen cingzdoh ndawbiengz gojyij swngzsouh haenx doengjit hwnjdaeuj, youq mwh ndawbiengz cwngci onjdingh doicaenh gaijgwz、fazcanj, youq mwh gaijgwz、fazcanj saedyienh ndawbiengz cwngci onjdingh.

  Youq aen lizsij seizhaek dawz gij saehnieb raeuz cienzmienh doi yiengq 21 sigij neix, bietdingh aeu gig nyinhcaen yiemzsuk ceijok: Daengx dangj aeu hauz mbouj doenghngauz bae genhciz diuz gihbwnj lohsienq aen dangj youq aen duenhmbaek cogaep seveicujyi haenx, dawz aeu ginghci gensez guh cungsim caeuq seiq hangh gihbwnj yenzcwz、gaijgwz hailangh song aen gihbwnjdenj neix doengjit youq aen sizcen hungmbwk hwnqguh yiengh seveicujyi miz daegsaek Cungguek haenx. Neix dwg gaenh ngeihcib bi daeuj gij gingniemh ceiq dijbauj aen dangj raeuz, dwg gij saehnieb raeuz ndaej swngli baenaj aen baujcwng ceiq saenq ndaej gvaq haenx. Aeu singjgaeh you, hoeng cujyau dwg fuengzre “coj”, aeu seizseiz singjsag, haekfug gak cungj gauxca, genhciz Dwng Siujbingz Lijlun caeuq gihbwnj lohsienq mbouj doenghngauz. Gaengawq aen lijlun caeuq diuz gihbwnj lohsienq neix, hopngomx gij muzbyauh hwnqguh aen seveicujyi yendaiva guekgya fouqgiengz minzcuj vwnzmingz haenx, caenh’itbouh mingzbeg doekdingh gijmaz dwg aen duenhmbaek cogaep seveicujyi gij ginghci、cwngci caeuq vwnzva yiengh seveicujyi miz daegsaek Cungguek haenx, baenzlawz bae hwnqguh gij ginghci、cwngci caeuq vwnzva yienghneix, dwg miz bizyau.

  —— Gensez yiengh ginghci seveicujyi miz daegsaek Cungguek, couh dwg youq laj diuzgienh seveicujyi bae fazcanj hawciengz ginghci, mboujduenh gaijfang caeuq fazcanj swnghcanjliz. Neix couh aeu genhciz caeuq laeb caezcienz aen gihbwnj ginghci cidu aeu seveicujyi gunghyoujci guh cawjdaej、lai yiengh sojyoujci ginghci doengzcaez fazcanj haenx; genhciz caeuq laeb caezcienz seveicujyi hawciengz ginghci dijci, sawj hawciengz youq guekgya hungzgvanh diuzgung lajde doiq swhyenz boiqceiq ndaej miz gihcujsing cozyungh; genhciz caeuq laeb caezcienz lai cungj faenboiq fuengsik aeu ciuq lauzdung bae faenboiq guh cawjdaej haenx, cinjhawj mbangj di digih mbangj di vunz sien fouq hwnjdaeuj, daiqdoengh caeuq bangcoh doengh gij caengz fouq de, cugbouh byaij yiengq doengzcaez fouqmiz; genhciz caeuq guh caezcienz doiq rog hailangh, cizgiz camgya gozci ginghci doxgap caeuq gingcwngh. Baujcwng gozminz ginghci ndaej lienzdaemh riengjvaiq gengangh fazcanj, yinzminz ndaej doengzcaez yiengjyungh ginghci fanzyungz cwngzgoj.

  —— Gensez yiengh cwngci seveicujyi miz daegsaek Cungguek, couh dwg youq baihlaj Cungguek Gungcanjdangj lingjdauj, youq gwnz giekdaej yinzminz danggya guhcawj, eiciuq faplwd guenjleix guekgya, fazcanj seveicujyi minzcuj cwngci. Neix couh aeu genhciz caeuq guh caezcienz cungj yinzminz minzcuj conhcwng youz gunghyinz gaihgiz lingjdauj、aeu gungh nungz lenzmungz guh giekdaej haenx; genhciz caeuq guh caezcienz aen yinzminz daibyauj daihhoih cidu caeuq aen cidu lai dangj doxgap、cwngci hezsangh youz Gungcanjdangj lingjdauj haenx dem aen cidu minzcuz gihyiz swci; fazcanj minzcuj, gencenz fazci, hwnqguh aen fazci guekgya seveicujyi. Saedyienh cungj cwngci gizmen ndawbiengz andingh, cwngfuj lenzgez gauhyau, daengx guek gak cuz yinzminz doxgiet doxndei, swnghdung hozboz haenx.

  —— Gensez yiengh vwnzva seveicujyi miz daegsaek Cungguek, couh dwg yungh Majgwzswhcujyi daeuj cijdauj, aeu gung ok gij gunghminz miz lijsiengj、miz daudwz、miz vwnzva、miz giliz guh muzbyauh, fazcanj yiengh seveicujyi vwnzva gvi minzcuz gohyoz daihcungq youh mienhyiengq yendaiva、mienhyiengq seiqgyaiq、mienhyiengq ngoenzlaeng haenx. Neix couh aeu genhciz yungh aen lijlun Dwng Siujbingz vujcangh daengx dangj, gyauyuz yinzminz; roengzrengz daezsang gij swhsiengj daudwz suciz caeuq gyauyuz gohyoz vwnzva suijbingz daengx aen minzcuz; genhciz aen fueng’yiengq vih yinzminz fuzvu、vih seveicujyi fuzvu caeuq aen fuengcim bak va caez hai、bak gya cenglwnh, haenqrengz bae hwnqguh, fanzyungz yozsuz caeuq vwnzyi. Gensez aen seveicujyi cingsaenz vwnzmingz ndwn youq yienhsaed Cungguek、ciepswnj gij lizsij vwnzva conzdungj ndei、supsou ndaw vwnzva guekrog gij cwngzgoj mizik haenx.

  Aen gihbwnj muzbyauh caeuq gihbwnj cwngcwz hwnqguh yiengh ginghci、cwngci、vwnzva seveicujyi miz daegsaek Cungguek gwnzneix gangj, youjgih doengjit, mbouj ndaej faengat, gapbaenz aen gihbwnj ganghlingj dangj youq aen duenhmbaek cogaep seveicujyi. Aen ganghlingj neix, dwg gij neiyungz youqgaenj Dwng Siujbingz Lijlun, dwg diuz gihbwnj lohsienq aen dangj youq ginghci、cwngci、vwnzva daengj fuengmienh mbehai, dwg cungjgez doengh gij gingniemh ceiq cujyau doengh bi neix.

  
[1] [2] [3] [4] [5] [6] [7] [8] [9] [10]
Dozsiengq