Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

YAENGX SANG MBAW GEIZHAUH HUNGMBWK DWNG SIUJBINGZ LIJLUN,DAWZ HWNQGUH YIENGH SAEHNIEB SEVEICUJYI MIZ DAEGSAEK CUNGGUEK CIENZMIENH DOI YIENGQ 21 SIGIJ 3

——Gij Baugau Youq Gwnz Aen Daihhoih Cungguek Gungcanjdangj Daih Cibhaj Baez Daengx Guek Daibyauj Davei
(1997 nienz 9 nyied 12 hauh)

Gyangh Cwzminz
  
【Cihsaw Hung’iq : hung rauh iq】  Dajyaenq
      
  3、Gij Lizsij Diegvih Caeuq Cijdauj Yiyi Dwng Siujbingz Lijlun

  Youq aen seizgeiz moq seveicujyi gaijgwz hailangh caeuq yendaiva gensez, youq gwnz roenloh moq hamj gvaq sigij, itdingh aeu yaengx sang mbaw geizhauh hungmbwk Dwng Siujbingz Lijlun, yungh Dwng Siujbingz Lijlun daeuj cijdauj daengx aen saehnieb caeuq gak hangh gunghcoz raeuz. Neix dwg dangj daj lizsij caeuq yienhsaed ndawde ndaej ok aen gezlun mbouj doenghngauz ndaej haenx.

  Cungguek Gungcanjdangj dwg aen dangj gig yawjnaek lijlun cijdauj ndeu. Cungguek yinzminz ra daengz le Majgwzswh-Lezningzcujyi, gij yienghsiengq Cungguek gwzming couh bienq ndaej moqsak. Majgwzswh-Lezningzcujyi caeuq Cungguek saedsaeh doxgiethab miz song baez lizsijsing feihyoz, miz ok le song aen lijlun cwngzgoj hung. Aen lijlun cwngzgoj daih’it baez feihyoz dwg gij cingqdeng lijlun yenzcwz caeuq gingniemh cungjgez gvendaengz Cungguek gwzming caeuq gensez youh gaenq ndaej daengz sizcen cwngmingz haenx, boux cujyau cauhlaeb de dwg Mauz Cwzdungh, dangj raeuz cwng de guh Mauz Cwzdungh Swhsiengj. Gij lijlun cwngzgoj daihngeih baez feihyoz dwg aen lijlun gvendaengz yiengh seveicujyi miz daegsaek Cungguek, boux cujyau cauhlaeb de dwg Dwng Siujbingz, dangj raeuz cwng de guh Dwng Siujbingz Lijlun. Song daih lijlun cwngzgoj neix cungj dwg dangj caeuq yinzminz sizcen gingniemh caeuq cizdij civei giet baenz.

  Dangj daj ngoenzseng haenx hwnj, couh dawz Majgwzswh-Lezningzcujyi dinghlaeb guh aen cijdauj swhsiengj swhgeij. Ginggvaq Cunhyi Veiyi caeuq Yenzanh cwngjfungh, aen dangj caet daih youh dawz aen swhsiengj Majgwzswh-Lezningzcujyi lijlun caeuq Cungguek gwzming sizcen doengjit baenz haenx —— Mauz Cwzdungh Swhsiengj, dinghlaeb guh gij cijdauj swhsiengj aen dangj. Neix dwg aen lizsijsing gezcwz cungjgez aen dangj laeb ndaej 24 bi gingniemh le cij guh’ok haenx. Seizneix, youq gwnz giekdaej cib’it gaiq sam cung cienzhoih caeuq cibngeih daih、cibsam daih、daegbied dwg cibseiq daih, cunghyangh genyi cibhaj daih youq ndaw dangjcangh dawz Dwng Siujbingz Lijlun dingh guh cijdauj swhsiengj, mingzbeg gvidingh: Cungguek Gungcanjdangj aeu Majgwzswh-Lezningzcujyi、Mauz Cwzdungh Swhsiengj、Dwng Siujbingz Lijlun daeuj guh gij hengzdoengh ceijnamz swhgeij. Neix dwg aen dangj raeuz ginggvaq gaenh ngeih cib bi gaijgwz hailangh caeuq seveicujyi yendaiva gensez baenzgoeng sizcen guh’ok gij lizsijsing gezcwz haenx. Guh’ok aen gezcwz neix, biujmingz le cunghyangh lingjdauj cizdij caeuq daengx dangj gij gietsim caeuq saenqsim dawz aen saehnieb hwnqguh yiengh seveicujyi miz daegsaek Cungguek youz Dwng Siujbingz haicaux haenx cienzmienh doi yiengq sigij moq bae, hix fanjyingj le gij doengzcaez yawjfap caeuq simmuengh daengx guek yinzminz.

  Sizcen cwngmingz, Dwng Siujbingz Lijlun ciepswnj caeuq fazcanj le Mauz Cwzdungh Swhsiengj, dwg gij cingqdeng lijlun ceijyinx Cungguek yinzminz youq gaijgwz hailangh ndawde swngli saedyienh seveicujyi yendaiva. Youq dangdaih Cungguek, cijmiz gij Dwng Siujbingz Lijlun dawz Majgwzswhcujyi caeuq gij sizcen dem seizdaih daegdiemj dangdaih Cungguek giethab hwnjdaeuj neix, cix mbouj miz lingh yiengh lijlun ndaej gaijgez seveicujyi roennaj caeuq minghyinh vwndiz. Dwng Siujbingz Lijlun dwg gij Majgwzswhcujyi dangdaih Cungguek, dwg Majgwzswhcujyi youq Cungguek fazcanj haeuj daengz aen duenhmbaek moq.

  Dwng Siujbingz Lijlun sojlaiz ndaej baenz Majgwzswhcujyi youq Cungguek fazcanj haeuj daengz aen duenhmbaek moq, dwg aenvih:

  Daih’it, Dwng Siujbingz Lijlun genhciz gaijfang swhsiengj、saedsaeh gouz dwg, youq gwnz giekdaej sizcen moq ciepswnj boux gonq youh cungbyoengq gij gvigawj gaeuq, haicaux le Majgwzswhcujyi aen cingzdoh moq. Saedsaeh gouz dwg dwg gij ukngviz Majgwzswh-Lezningzcujyi, dwg gij ukngviz Mauz Cwzdungh Swhsiengj, hix dwg gij ukngviz Dwng Siujbingz Lijlun. 1978 nienz Dwng Siujbingz bien gangjvah《Gaijfang Swhsiengj, Saedsaeh Gouz Dwg, Doxgiet Itsim Yawj Baenaj》neix, dwg bien senhyenzsuh youq aen lizsij gvanhdouz youqgaenj “Vwnzva Dagwzming” gietsat gvaqlaeng, Cungguek baihnaj bungzdaengz yaek byaij haeuj gizlawz bae neix, cungbyoengq “song aen famzdwg” gimqhaed, haibik seizgeiz moq roenloh moq、haicaux gij lijlun moq gvendaengz hwnqguh yiengh seveicujyi miz daegsaek Cungguek haenx. 1992 nienz Dwng Siujbingz youq baihnamz damzvah, youh caiq dwg bien senhyenzsuh gaijfang swhsiengj、saedsaeh gouz dwg youq aen lizsij gvanhdouz youqgaenj ndaw guek rog guek cwngci rumzlangh gaujniemh haenqrem neix, genhciz gij lijlun caeuq lohsienq cib’it gaiq sam cung cienzhoih doxdaeuj, laegdaeuq hoizdap le haujlai yinsiz vwndiz hungnaek ciengzgeiz cughaed gij swhsiengj cungqvunz, dawz gaijgwz hailangh caeuq yendaiva gensez doi yiengq duenhmbaek moq bae. Youq aen hingzsi moq yamqhaeuj sigij moq neix lajde, doiq baihnaj haujlai vwndiz hungnaek gannanz raeuz soqlaiz mbouj caengz bungzdaengz gvaq haenx, Dwng Siujbingz Lijlun iugouz raeuz demgiengz caeuq daezsang gij genhdingsing caeuq sw’gyozsing gaijfang swhsiengj、saedsaeh gouz dwg neix, gijmaz cungj aeu dwg mbouj dwg doiq fazcanj gij swnghcanjliz ndawbiengz seveicujyi mizleih、doiq demgiengz seveicujyi guekgya cunghhoz gozliz mizleih、doiq daezsang yinzminz swnghhoz suijbingz mizleih “sam aen mizleih” neix daeuj guh gaenbonj buenqduenh byauhcunj, mboujduenh haicaux gij gizmen moq aen saehnieb raeuz.

  Daihngeih, Dwng Siujbingz Lijlun genhciz gij gihbwnj cwngzgoj gohyoz seveicujyi lijlun caeuq sizcen, cadawz “gijmaz dwg seveicujyi、baenzlawz hwnqguh seveicujyi” aen gaenbonj vwndiz neix, laegdaeuq bae biengjhai seveicujyi bwnjciz, dawz doiq seveicujyi yinsiz daezsang daengz aen gohyoz suijbingz moq bae. Gij swhsiengj gaijfang seizgeiz moq, gvanhgen couh dwg youq gwnz aen vwndiz neix swhsiengj gaijfang. Guek raeuz seveicujyi youq gaijgwz hailangh gaxgonq soj ginglig gij ngutngeuj caeuq loekcak haenx, gaijgwz hailangh doxdaeuj youq mwh byaij baenaj bungzdaengz saek di siengj mbouj doeng, gangj daengz goek cungj dwg aenvih doiq aen vwndiz neix mbouj caengz cienzbouh loengh cingcuj. Bued luenh dauq cingq, cienzmienh gaijgwz, daj aeu gaihgiz doucwngh guh gang cienj daengz aeu ginghci gensez guh cungsim, daj fungsaek buenq fungsaek daengz gaijgwz hailangh, daj giva ginghci daengz seveicujyi hawciengz ginghci, gaenh ngeih cib bi lizsijsing cienjbienq, couh dwg aen cincwngz cugbouh loengh cingcuj aen gaenbonj vwndiz neix. Aen cincwngz neix, vanzlij yaek youq ndaw sizcen baezlaeng laebeaeb byaij roengzbae.

  Daihsam, Dwng Siujbingz Lijlun genhciz yungh Majgwzswhcujyi aen lwgda yawj daej gvangqlangh haenx bae cazyawj seiqgyaiq, doiq gij seizdaih daegdiemj seizneix caeuq daengx aen gozci hingzsi, doiq gwnz seiqgyaiq gizyawz seveicujyi guekgya baenz roxnaeuz baih, gij guekgya cingqcaih fazcanj haenx maeuzgouz fazcanj ndawde gij ndaej roxnaeuz saet, gij seiqdaeuz caeuq mauzdun fatdad guekgya fazcanj, guh le cingqdeng fwnhsiz, guh’ok le gij gohyoz duenhdingh moq. Seiqgyaiq bienqvaq gig daih gig vaiq, daegbied dwg gohyoz gisuz cinbu ngoenz vaiq gvaq ngoenz, laegdaeuq gaijbienq le caemhcaiq yaek laebdaeb gaijbienq dangdaih ginghci ndawbiengz swnghhoz caeuq seiqgyaiq mienhmauh, mboujguenj boux Majgwzswhcujyicej aen guekgya lawz cungj mbouj ndaej mbouj nyinhcaen doiqdaih. Dwng Siujbingz Lijlun cingq dwg gaengawq cungj hingzsi neix, dinghcinj gij lohsienq caeuq gozci canloz aen dangj raeuz, iugouz raeuz yungh gvanhdenj moq daeuj yinsiz、ciepswnj caeuq fazcanj Majgwzswhcujyi, giengzdiuh cijmiz yienghneix cij dwg gij Majgwzswhcujyi caencingq, soujndaet gvigawj gaeuq mbouj bienq couh cijnaengz cauxbaenz doeklaeng engqdaengz saetbaih. Neix dwg Dwng Siujbingz Lijlun gij seizdaih cingsaenz gig sienmingz haenx.

  Daihseiq, gyonj daeuj gangj, Dwng Siujbingz Lijlun cauxbaenz le gij gohyoz dijhi moq aen lijlun gvendaengz hwnqguh yiengh seveicujyi miz daegsaek Cungguek haenx. De dwg youq aen lizsij diuzgienh huzbingz caeuq fazcanj bienqbaenz seizdaih cawjdaez neix, youq guek raeuz gaijgwz hailangh caeuq yendaiva gensez sizcen ndawde, youq gwnz giekdaej cungjgez gij lizsij gingniemh guek raeuz seveicujyi swngli caeuq daemdengj caemhcaiq doiqciuq gizyawz seveicujyi guekgya gij lizsij gingniemh hwngvuengh doekbaih, cugbouh cauxbaenz caeuq fazcanj hwnjdaeuj. De daih’it baez haemq hidungj bae cobouh hoizdap le Cungguek seveicujyi fazcanj roenloh、fazcanj duenhmbaek、gaenbonj yinvu、fazcanj doenghlig、diuzgienh baihrog、cwngci baujcwng、canloz bouhloh、aen dangj lingjdauj caeuq baengh gauq gij ligliengh lawz lienzdaengz guekcoj doengjit daengj itlied gihbwnj vwndiz, cijdauj dangj raeuz ceiqdingh le youq seveicujyi cogaep duenhmbaek gihbwnj lohsienq. De dwg aen gohyoz dijhi haemq caezcienz laegdaeuq ronzdoeng cezyoz、cwngci ginghciyoz、gohyoz seveicujyi daengj lingjyiz, bauhamz ginghci、cwngci、gohgi、gyauyuz、vwnzva、minzcuz、bingsaeh、vaigyauh、doengjit cansen、aen dangj gensez daengj fuengmienh, youh dwg aen gohyoz dijhi sihyau daj gak fuengmienh bae caenh’itbouh fungfouq fazcanj ndeu.

  Dwng Siujbingz dwg boux Majgwzswhcujyicej hungmbwk. De vih Cunghvaz Minzcuz ndaej doglaeb caeuq gaijfang, vih Cungguek seveicujyi cidu ndaej laebbaenz, vih Cungguek gaijgwz hailangh caeuq yendaiva gensez, laebroengz le gij goenglauz ciengzlwenx mbouj muzmied haenx. De dawz daengx ciuh simsei cinglig cungj goenggingq soengq hawj Cungguek yinzminz lo, gijmaz cungj daj gij leih’ik yinzminz bae ngeix bae guh. De doiq dangj、doiq yinzminz、doiq Majgwzswhcujyi gij gung’yen ceiq daih de, gij yizcanj dijbauj de louz hawj raeuz haenx, couh dwg Dwng Siujbingz Lijlun. Aen lijlun neix, cizcungh daejyienh youq cib’it gaiq sam cung cienzhoih doxdaeuj gij Dwng Siujbingz cucoz caeuq dangj dem guekgya cungyau vwnzyen haenx ndawde.

  Majgwzswhcujyi dwg gohyoz, de daj nduj daengz laeng yiemzgek aeu gwzgvanh saehsaed guh gaengawq. Danhseih saedsaeh swnghhoz cungj dwg mboujduenh bienqdoengh, cungj bienqdoengh neix, gaenh bak lai bi daeuj haenqrem caeuq laegdaeuq daengz aen cingzdoh vunz ciuhgonq nanz ndaej siengj daengz haenx. Ndigah, Majgwzswhcujyi bietdingh yaek riengz seizdaih、sizcen caeuq gohyoz fazcanj cix mboujduenh fazcanj, mbouj gojnaengz mbouj bienq saek di. Doiqdaih Majgwzswhcujyi, miz aen yozfungh vwndiz he: Dauqdaej dwg daj bonjsaw hwnjdin ne, roxnaeuz dwg yungh gij lizcangz gvanhdenj fuengfap Majgwzswhcujyi daeuj yenzgiu caeuq gaijgez gij yienhsaed vwndiz Cungguek raeuz. Mauz Cwzdungh youq mwh Yenzanh cwngjfungh couh giengzdiuh naeuz: “Wnggai dinghcinj aen fuengcim aeu yenzgiu Cungguek gwzming saedsaeh vwndiz guh cungsim, aeu Majgwzswh-Lezningzcujyi gihbwnj yenzcwz guh cijdauj, feiqcawz gij fuengfap dinghgwx caeuq godog bae yenzgiu Majgwzswh-Lezningzcujyi haenx bae.” Seizneix daezok yungh Dwng Siujbingz Lijlun bae vujcangh daengx dangj, daezok yozsiz Majgwzswh-Lezningzcujyi、Mauz Cwzdungh Swhsiengj, cungsim neiyungz dwg yozsiz gij lijlun hwnqguh yiengh seveicujyi miz daegsaek Cungguek, couh dwg fazyangz aen conzdungj ceiq ndei neix. Majgwzswh-Lezningzcujyi、Mauz Cwzdungh Swhsiengj itdingh mbouj ndaej vut, vut bae le couh mbouj miz goekgaen lo. Doengzseiz itdingh aeu dawz gij saedsaeh vwndiz guek raeuz gaijgwz hailangh caeuq yendaiva gensez、dawz gij saehcingz raeuz cingqcaih guh haenx guh cungsim, yungh sim haeuj yinhyungh Majgwzswhcujyi lijlun bae, yungh sim haeuj doiq saedsaeh vwndiz guh lijlun ngeixnaemj bae, yungh sim haeuj gij sizcen moq caeuq fazcanj moq bae. Lizhai bonj guek saedsaeh caeuq seizdaih fazcanj bae gangj Majgwzswhcujyi, mbouj miz yiyi. Dinghgwx caeuq godog bae yenzgiu Majgwzswhcujyi, dawz Majgwzswhcujyi caeuq de youq ndaw yienhsaed swnghhoz gij sengdoengh fazcanj haenx faen’gvej okdaeuj、doiqlaeb hwnjdaeuj, couh mbouj miz roen byaij. Youq dangdaih Cungguek, Majgwzswh-Lezningzcujyi、Mauz Cwzdungh Swhsiengj、Dwng Siujbingz Lijlun, dwg gij gohyoz dijhi doengjit youh it daih ciep it daih doxriengz haenx. Genhciz Dwng Siujbingz Lijlun, couh dwg caencingq genhciz Majgwzswh-Lezningzcujyi、Mauz Cwzdungh Swhsiengj; yaengx sang mbaw geizhauh Dwng Siujbingz Lijlun, couh dwg caencingq yaengx sang mbaw geizhauh Majgwzswh-Lezningzcujyi、Mauz Cwzdungh Swhsiengj.

  
[1] [2] [3] [4] [5] [6] [7] [8] [9] [10]
Dozsiengq