Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

YAENGX SANG MBAW GEIZHAUH HUNGMBWK DWNG SIUJBINGZ LIJLUN,DAWZ HWNQGUH YIENGH SAEHNIEB SEVEICUJYI MIZ DAEGSAEK CUNGGUEK CIENZMIENH DOI YIENGQ 21 SIGIJ 2

——Gij Baugau Youq Gwnz Aen Daihhoih Cungguek Gungcanjdangj Daih Cibhaj Baez Daengx Guek Daibyauj Davei
(1997 nienz 9 nyied 12 hauh)

Gyangh Cwzminz
  
【Cihsaw Hung’iq : hung rauh iq】  Dajyaenq
      
  2、Gij Gunghcoz Haj Bi Gvaqbae Neix

  Daj 1992 nienz Dwng Siujbingz youq baihnamz damzvah caeuq aen dangj cibseiq daih doxdaeuj haj bi neix, dwg haj bi gig mbouj bingzciengz. Neix dwg haj bi aen dangj raeuz lingjdauj daengx guek gak cuz yinzminz, dingj ndaej gvaq gij gaujniemh yiemzhaenq cungj cwngci funghboh gwnz gozci caeuq ndaw guek fatseng youq 80 nienzdaih satbyai、90 nienzdaih codaeuz, laebdaeb riengz diuz loh seveicujyi miz daegsaek Cungguek daih yamq byaij baenaj haenx; dwg haj bi caenh’itbouh gaijfang swhsiengj, hailoh baenaj, gaijgwz hailangh caeuq yendaiva gensez saehnieb haeuj daengz duenhmbaek moq haenx; dwg haj bi youq ndaw cincwngz bengwz haeujlaeg laebhwnj yiengh hawciengz ginghci dijci seveicujyi, dojdangq cawqleix gaijgwz、fazcanj、onjdingh sam de gvanhaeh, youq gak aen lingjyiz ndaej daengz cingzcik hungloet haenx; hix dwg haj bi youq seiqgyaiq gwzgiz bienqdoengh haenqrem ndawde, gij gozci diegvih guek raeuz daezsang yienhda haenx.

  Aen dangj raeuz cibseiq daih guh ok sam hangh gezcwz daiq miz yiyi gyaelaeg: It dwg cadawz seizgei, gyavaiq fazcanj; ngeih dwg mingzbeg dinghcinj aen muzbyauh ginghci dijci gaijgwz guek raeuz dwg laebhwnj yiengh hawciengz ginghci dijci seveicujyi; sam dwg onjmaenh dinghlaeb Dwng Siujbingz aen lijlun gvendaengz hwnqguh yiengh seveicujyi miz daegsaek Cungguek haenx youq daengx dangj aen cijdauj diegvih de. Vih gvancez cibseiq daih cingsaenz, cunghyangh gonqlaeng ciuhai caet baez cienzhoih, faenbied cimdoiq laebhwnj yiengh hawciengz ginghci dijci seveicujyi、gyagiengz aen dangj gensez、ceiqdingh gozminz ginghci caeuq ndawbiengz fazcanj “9•5” giva caeuq 2010 nienz yenjgingj muzbyauh、gyagiengz seveicujyi cingsaenz vwnzmingz gensez daengj itlied vwndiz hungnaek gvanhaeh daengxbuenz haenx, guh’ok le gveihva caeuq baijbouh. Haj bi daeuj daengx dangj gunghcoz gij daegdiemj doedok de dwg, cienzmienh gvancez gij gihbwnj lijlun caeuq gihbwnj lohsienq aen dangj, nyinhcaen saedhengz doengh aen gezcwz youqgaenj cibseiq daih, daezok caemhcaiq gaemdawz diuz gihbwnj fuengcim “cadawz seizgei、gyalaeg gaijgwz、gya’gvangq hailangh、coicaenh fazcanj、baujciz onjdingh” neix ndaetndet, cienzmienh doicaenh vuzciz vwnzmingz caeuq cingsaenz vwnzmingz gensez. Gij ndawbiengz swnghcanjliz、cunghhoz gozliz caeuq yinzminz swnghhoz suijbingz guek raeuz, youh caiq ndaej swng hwnj mbaek moq ndeu.

  Haj bi daeuj, ginghci fazcanj ndaej daengz cingzcik yienhda. Daj 1992 nienz daengz 1996 nienz, ndaw guek swnghcanj cungjciz moix bi bingzyaenz demmaj 12.1%, geiq saedyienh le ginghci demmaj riengjvaiq, youh mizyauq hanhhaed le ngaenz cienh huq bengz, mienx bae le daih hwnj daih roengz. Ginghci gezgou diuzcingj miz cincanj yienhda. Nungzyez ndaej daengz gyagiengz, haeuxgwn daengj nungzcanjbinj onjdingh demmaj. Suijli、gyaudoeng、doengsaenq daengj gihcuj sezsih caeuq gangdiet、nwngzyenz daengj giekdaej gunghyez fazcanj riengjvaiq. Dunghbu digih ginghci demmaj gig vaiq, cunghsihbu digih ginghci fazcanj gyavaiq. “8•5” giva swngli guh baenz, hengzguh “9•5” giva miz le haidaeuz ndei.

  Gaijgwz hailangh caiq cungbyoengq lai giz. Ciuq gij iugouz laebhwnj yiengh hawciengz ginghci dijci seveicujyi, doidoengh caizcwng、suisouh、ginhyungz、vaimou、vaivei、giva、douzswh、gyagwz、riuzdoeng、ranzyouq caeuq ndawbiengz baujcang doengh hangh dijci gaijgwz neix yamq ok yamq hung, youq swhyenz boiqhawj fuengmienh gij giekdaej cozyungh hawciengz yienhda raen miz demgiengz, aen gvaenghgaq hungzgvanh diuzgung dijhi cobouh laeb hwnjdaeuj lo. Guekmiz giyez gaijgwz youq gwnz giekdaej sawqdiemj cizgiz doinyoengx baenaj. Aen gwzgiz aeu gunghyoujci guh cawjdaej、lai cungj ginghci cwngzfwn doengzcaez fazcanj haenx caenh’itbouh mbehai. Doiq rog ginghci、gisuz doxgap caeuq gyauhliuz laebdaeb gya’gvangq, doiq rog mouyiz caeuq leihyungh vaiswh daih fukdoh demmaj, guekgya cwkrom vaivei yienhda raen miz demgya.

  Cingsaenz vwnzmingz gensez yamq ok yamqdin moq. Gohgi、gyauyuz、vwnzva、veiswngh、dijyuz caeuq giva senglwg daengj gak hangh ndawbiengz saehnieb ndaej gij cingzcik de sawj vunz sim’angq. Senhconz yizlun gunghcoz caeuq swhsiengj daudwz gensez caenh’itbouh gyagiengz. Seveicujyi minzcuj caeuq fazci gensez miz cincanj hungloet, dingh le ithaehlied faplwd caeuq fapgvi hab’wngq seveicujyi hawciengz ginghci fazcanj haenx, gyagiengz le cizfaz caeuq swhfaz gunghcoz. Gyaezguek doengjit cansen fazcanj cangqvuengh, gak minzcuz daih doxgiet caenh’itbouh gyamaenh caeuq fazcanj. Aen cwngci gizmen ndawbiengz doxgiet onjdingh neix vih gaijgwz caeuq fazcanj daezhawj le baujcwng youqgaenj.

  Gozfangz yendaiva gensez miz cincanj moq. Bingdoih candouliz caenh’itbouh daezsang. Youq baujhoh guekgya ancienz、henhoh guekcoj doengjit caeuq camgya guekgya ginghci gensez、guhbaenz ciengj yiemj gouq cai daengj yinvu ndawde, yinzminz bingdoih guh’ok le gung’yen youqgaenj.

  Yinzminz swnghhoz suijbingz yienhda raen miz daezsang. Ndawsingz gihminz moix boux bingzyaenz swnghhozfei souhaeuj moix bi bingzyaenz saedsaeh demmaj 7.2%, lajmbanj gihminz moix boux bingzyaenz cingh souhaeuj moix bi bingzyaenz saedsaeh demmaj 5.7%, dwg aen seizgeiz demmaj ceiq vaiq ndawde aen ndeu. Hawciengz doxgaiq gig lai, gij diuzgienh daenj gwn youq yungh byaij yinzminz yienhda raen miz gaijndei. Ndawsingz lajmbanj gihminz romcienz daih fukdoh demmaj. Daengx guek lajmbanj gij vunz gungzhoj haenx gemjnoix le 3200 fanh.

  Haj bi daeuj, raeuz vih saedyienh guekcoj huzbingz doengjit guh le haujlai gunghcoz, doengh gij gunghcoz neix gig miz cwngzyau. Cwngfuj guek raeuz hoizfuk doiq Yanghgangj hengzsawj cawjgienz, dawz gij nyaenqnyug baenz bak bi Cunghvaz Minzcuz swiqseuq lo, ndaej sawj fouzsoq gwzming senhlez caeuq banlaux sim’onj hozroengz. Neix dwg gienh saeh hoengh sawj moix boux vunz Cungguek cungj roxnyinh sim’angq ndeu, hix ndaej daengz gozci sevei bujben haenhndei.

  Raeuz giendingh mbouj bienq bae gvancez aen huzbingz vaigyauh cwngcwz doglaeb gag guhcawj haenx, caenh’itbouh gaijndei le aen vanzging baihrog guek raeuz gaijgwz hailangh caeuq yendaiva gensez. Gij gozci yingjyangj guek raeuz ngoenz beij ngoenz gyadaih.

  Raeuz haenqrengz gyagiengz le aen dangj gensez. Daengx dangj hag Dwng Siujbingz aen lijlun gvendaengz hwnqguh yiengh seveicujyi miz daegsaek Cungguek haenx cugbouh haeujlaeg. Lingjdauj banhswj gensez caeuq ganbu duivuj gensez miz cincanj moq, daihbuek youhsiu ganbu nienzoiq haenx byaij hwnj lingjdauj ganghvei. Dangjfungh lenzcwng gensez caeuq fanj nduknaeuh doucwngh ligdoh gyadaih, aeu ndaej le duenhmbaeksing cwngzgoj. Gihcwngz cujciz gensez ndaej gyagiengz lo, guengjdaih gungcanjdangjyenz fazveih le senhfungh mozfan cozyungh. Ndaw dangj swnghhoz yiengq ciduva、gveihfanva yamq ok yamqdin moq.

  Raeuz singjsak yawj daengz, youq gwnzloh baenaj vanzlij miz mauzdun caeuq gunnanz mbouj noix, ndaw gunghcoz hix miz gezdenj caeuq mboujcuk. Cujyau dwg: Gozminz ginghci daengxbuenz suciz caeuq yauyiz mbouj sang, ginghci gezgou mbouj hableix, doengh gij mauzdun neix ciuqyiengh lij haemq doedok, daegbied dwg bouhfaenh guekmiz giyez rengzvuengh mbouj giengz; yinzminz ginzcung doiq dangjfungh、cwngfungh、ndawbiengz funghgi caeuq ndawbiengz cianh canggvang vanzlij mbouj habhoz, dam’aeu nduknaeuh、daih sai daih saengq daengj yienhsiengq ciuqyiengh lij cingqcaih banhraih dokfat, doengh gij vwndiz gvanhliuzcujyi、hingzsizcujyi、loengh haw cauh gyaj haenx haemq yiemzcungh; souhaeuj faenboiq gvanhaeh lij caengz leixswnh, digih fazcanj cengca vanzlij haemq daih, ndawsingz lajmbanj bouhfaenh ginzcung swnghhoz haemq gunnanz; yinzgouj demmaj、ginghci fazcanj doiq swhyenz caeuq vanzging daiq daeuj atlig gig daih daengjdaengj. Raeuz aeu gig yawjnaek doengh gij vwndiz lij mizyouq neix, lauxlaux saedsaed bae gaijgez.

  Dauqngeix gij gunghcoz haj bi gvaqdaeuj neix, gyonj daeuj yawj neix dwg aen seizgeiz gaijgwz caeuq fazcanj cungj haemq ndei. Aen lingjdauj cizdij dangj raeuz swnhleih saedyienh le laux oiq lawhvuenh, baujciz le lohsienq、fuengcim、cwngcwz ndaej lienzdaemh caeuq yiengh gizmen daengx guek ndawbiengz cwngci onjdingh, dojdangq cawqleix le ndaw guek caeuq doiq rog gvanhaeh ndawde itlied vwndiz hungloet, gyamaenh caeuq fazcanj le daj cib’it gaiq sam cung cienzhoih doxdaeuj aen hingzsi daih ndei haenx, daengx guek yinzminz sim’angq, hix ndaej daengz gozci yizlun bujben haenhndei. Haj bi sizcen cwngmingz, gij gezcwz cibseiq daih aen dangj raeuz guh ok haenx dwg deng, dangj raeuz miz naengzlig ndaej youq ndaw hingzsi fukcab ndaw guek rog guek gaemboek gizsi. Gij cingzcik haj bi daeuj, dwg daengx dangj caeuq daengx guek yinzminz doxgiet haenqrengz guh ndaej daeuj. Neix vih baezlaeng laebdaeb baenaj daj roengz gij giekdaej engq maenhsaed, cwkrom le gij gingniemh moq cibfaen dijbauj, itdingh yaek gig daih gujvuj raeuz yungh gij saenqsim caeuq yezcingz engq daih haenx bae dued aeu swngli moq.

  
[1] [2] [3] [4] [5] [6] [7] [8] [9] [10]
Dozsiengq