Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CIENZMIEMH HWNQGUH AEN BIENGZ SIUJGANGH, CAUH’OK AEN GIZMEN MOQ YIENGH SAEHNIEB SEVEICUJYI MIZ DAEGSAEK CUNGGUEK 10

——Gij Baugau Youq Gwnz Aen Daihhoih Cungguek Gungcanjdangj Daih Cibroek Baez Daengx Guek Daibyauj Davei
(2002 nienz 11 nyied 8 hauh)

Gyangh Cwzminz
  
【Cihsaw Hung’iq : hung rauh iq】  Dajyaenq
      
  10、Gyagiengz Caeuq Gaijndei Aen Dangj Gensez

  Youq raeuz aen guek hung cingqcaih fazcanj youh minzcuz lai baenzneix, yaek dawz gij eiqceiq caeuq ligliengh daengxcungq yinzminz comz hwnjdaeuj, cienzmienh hwnqguh aen biengz siujgangh, gyavaiq doicaenh seveicujyi yendaiva, itdingh aeu cagaenj bae gyagiengz caeuq gaijndei aen dangj lingjdauj, cienzmienh doicaenh hangh gunghcwngz hungmbwk moq aen dangj gensez.

  Gyagiengz caeuq gaijndei aen dangj gensez, itdingh aeu yaengx sang mbaw geizhauh hungmbwk Dwng Siujbingz Lijlun, cienzmienh gvancez “Sam Aen Daibyauj” Cung’yau Swhsiengj, baujcwng gij lohsienq fuengcim cwngcwz aen dangj ndaej cienzmienh fanjyingj gij gaenbonj leih’ik yinzminz caeuq gij iugouz seizdaih fazcanj; itdingh aeu genhciz diuz fuengcim dangj aeu guenj dangj、coengz yiemz guenj dangj, caenh’itbouh gaijgez song aen lizsijsing goqdaez hung, hix couh dwg baenzlawz sawj aen dangj engq miz lingjdauj suijbingz caeuq gaemgienz suijbingz、baenzlawz sawj aen dangj engq ak fuengz nduknaeuh caeuq dingjdangj fung’yiemj; itdingh aeu dawzcinj diuz meg dangdaih Cungguek ndawbiengz baenaj haenx, gaijgwz caeuq guh caezcienz lingjdauj fuengsik caeuq gaemgienz fuengsik、lingjdauj dijci caeuq gunghcoz cidu aen dangj, sawj gij gunghcoz aen dangj engq miz rengzhoengh; itdingh aeu dawz swhsiengj gensez、cujciz gensez caeuq cozfungh gensez ndeindei giethab hwnjdaeuj, youq ndaw sam fuengmienh gunghcoz neix, seizseiz cungj dawzrem cidu gensez, gawq aeu guh ndei gij gunghcoz bingzciengz, youh aeu cagaenj gaijgez gij vwndiz doedmengx. Doenggvaq ciengzgeiz naebsim roengzrengz, baujcwng aen dangj raeuz itloh cungj dwg aen senhfunghdui Cungguek gunghyinz gaihgiz, doengzseiz dwg aen senhfunghdui Cungguek yinzminz caeuq Cunghvaz Minzcuz, itloh cungj dwg aen lingjdauj haedsim yiengh seveicujyi saehnieb miz daegsaek Cungguek, itloh cungj daibyauj gij senhcin swnghcanjliz fazcanj iugouz Cungguek, daibyauj aen fueng’yiengq baenaj senhcin vwnzva Cungguek, daibyauj gij gaenbonj leih’ik ceiq guengjdaih yinzminz Cungguek.

  (1) Haeujlaeg hagsib caeuq gvancez “Sam Aen Daibyauj” Cung’yau Swhsiengj, daezsang daengx dangj Majgwzswhcujyi lijlun suijbingz. Dangj youq swhsiengj lijlun fuengmienh ndaej daezsang, couh coengz swhsiengj fuengmienh baujcwng dangj caeuq guekgya saehnieb mboujduenh fazcanj. Aen dangj swhsiengj lijlun gensez itdingh aeu cuengq youq giz dieg engqgya yienhda de bae. Genhciz yungh Majgwzswh-Lezningzcujyi、Mauz Cwzdungh Swhsiengj caeuq Dwng Siujbingz Lijlun daeuj vujcangh daengx gyoengq dangjyenz, youq daengx dangj hwng hwnj aen gauhcauz moq hagsib gvancez “Sam Aen Daibyauj” Cung’yau Swhsiengj ndeu. Dangjyenz ganbu daegbied dwg gauhgiz cunghgiz ganbu aeu daiqdaeuz hagsib caeuq sizcen “Sam Aen Daibyauj” Cung’yau Swhsiengj, bienqbaenz boux mozfan gaenx hagsib、rox doengh’uk, baenz boux mozfan gaijfang swhsiengj、caeuq seizdaih caez baenaj, baenz boux mozfan gamj bae sizcen、gamj bae cauhmoq. Youq daengx dangj haeujlaeg guh Majgwzswhcujyi fazcanjsij gyauyuz, daihlig fazyangz gij cingsaenz gouz caen guh saed、gvakroen baenaj, mboujduenh lai rox gij gvilwd gungcanjdangj gaemgienz, lai rox gij gvilwd seveicujyi gensez, lai rox gij gvilwd vunzloih ndawbiengz fazcanj, mboujduenh fungfouq caeuq fazcanj Majgwzswhcujyi.

  (2) Gyagiengz hwnqguh gij naengzlig gaemgienz aen dangj, daezsang gij lingjdauj suijbingz caeuq gaemgienz suijbingz aen dangj. Seizneix gaemgienz diuzgen caeuq ndawbiengz vanzging gaenq miz gig daih bienqvaq, gak gaep dangjveij caeuq lingjdauj ganbu siengj mbouj diuqgah sawjmingh、dang ndaej daknaek, couh aeu hab’wngq gij iugouz hingzsi moq caeuq yinvu moq, youq ndaw sizcen hag rox cihsiz moq, cwkrom ginghyen moq, demlai bonjsaeh moq. Itdingh aeu gvangqlangh cazyawj seiqgyaiq, dawz cinj seizdaih fazcanj iugouz, rox bae guh lijlun ngeixnaemj caeuq canloz ngeixnaemj, mboujduenh daezsang gij naengzlig gohyoz buenqdingh hingzsi; itdingh aeu genhciz ciuq gwzgvanh gvilwd caeuq gohyoz gvilwd banhsaeh, gibseiz yenzgiu gaijgez gij cingzgvang moq vwndiz moq ndaw gaijgwz caeuq gensez, rox bae coemjdawz seizgei gyavaiq fazcanj, mboujduenh daezsang gij naengzlig gaemguenj hawciengz ginghci; itdingh aeu cingqdeng yinsiz caeuq cawqleix gak cungj mauzdun ndawbiengz, rox bae hezdiuz mbouj doengz leih’ik gvanhaeh caeuq haekfug gak cungj gunnanz, mboujduenh daezsang gij naengzlig wngqdoiq fukcab gizmen; itdingh aeu gyagiengz fazci gvanhnen, rox bae dawz genhciz aen dangj lingjdauj、yinzminz danggya guhcawj caeuq eifap guenjleix guekgya doengjit hwnjdaeuj, mboujduenh daezsang gij naengzlig eifap hengzsawj gienzlig; itdingh aeu fugcoengz aen gunghcoz dagiz daengx dangj daengx guek, giendingh mbouj bienq bae gvancez gij lohsienq fuengcim cwngcwz aen dangj, rox giethab saedsaeh, mdouj raih roengaeuq, cauhmoq gunghcoz, mboujduenh daezsang gij naengzlig doengjlamx daengxbuenz.

  (3) Genhciz caeuq laeb caezcienz minzcuj cizcunghci, demgiengz gij rengzhoengh caeuq doxgiet doengjit aen dangj. Minzcuj cizcunghci, dwg aen cidu youq gwnz giek minzcuj guh cizcungh caeuq youq laj cizcungh cijdauj bae gangj minzcuj, song fuengmienh dox giethab. Ndaw dangj minzcuj dwg diuz mingh aen dangj, doiq yinzminz minzcuj miz gij cozyungh sifan caeuq daiqdoengh youqgaenj. Aeu yungh baujcang dangjyenz minzcuj gienzleih guh giek, aeu laeb caezcienz gij daibyauj daihhoih cidu aen dangj caeuq gij veijyenzvei cidu aen dangj guh cungdenj, coengz gaijgwz dijci gihci roengzfwngz, laebhwnj laeb caezcienz yiengh minzcuj cidu ndaw dangj ndaej cungfaen fanjyingj gij simmuengh dangjyenz caeuq dangj cujciz haenx. Gyadaih youq si、yienh guh aen dangj daibyauj daihhoih cangzyinci sawqdiemj. Cizgiz damqra roenloh caeuq hingzsik moq, sawj gyoengq daibyauj youq mwh aen dangj daibyauj daihhoih sathoih geizgan ciuqyiengh ndaej fazveih cozyungh. Ciuq aen yenzcwz cizdij lingjdauj、minzcuj cizcungh、gak vunz caemciek、veiyi gietdingh, laeb caezcienz gij lwnhsaeh caeuq gezcwz gihci baihndaw dangjveij, caenh’itbouh fazveih aen dangj veijyenzvei daengxcungq veiyi gij cozyungh de. Gaijgwz caeuq laeb caezcienz gij senjgij cidu ndaw dangj. Laebhwnj caeuq laeb caezcienz ndaw dangj cingzgvang doengbauq cidu、cingzgvang fanjyingj cidu caeuq gezcwz hungnaek cam’aeu yigen cidu. Dangj caeuq guekgya ndaej cizcungh doengjit, gig hab gij gaenbonj leih’ik daengx guek gak cuz yinzminz. Youq cijdauj swhsiengj caeuq lohsienq fuengcim cwngcwz dem yenzcwz vwndiz hungnaek fuengmienh, daengx dangj daengx guek itdingh aeu doxdoengz liuxliux. Gyoengq dungzci daengx dangj itdingh aeu gag rox bae genhciz gij yenzcwz goyinz fugcoengz cujciz、vunznoix fugcoengz vunzlai、aen cujciz gaeplaj fugcoengz aen cujciz gaepgwnz、daengx dangj fugcoengz aen dangj daengx guek daibyauj daihhoih caeuq cunghyangh veijyenzvei, genhgez henhoh cunghyangh gienzvi, baujcwng gij cwngling cunghyangh doengswnh. Aen dangj gak gaep cujciz caeuq daengxcungq dangjyenz, daegbied dwg lingjdauj ganbu, cungj aeu yiemz souj gij gijliz aen dangj, baenzbaenz mbouj cinjhawj miz mingling mbouj hengz、miz gimqhaed mbouj dingz、gak boux gag hengz fueng ndeu.

  (4) Gensez aen lingjdauj ganbu duivuj suciz sang, cauxbaenz aen lingjdaujcwngz cingsaenz hwngqheiq, guh ndaej daih saehcingz haenx. Ciuq diuz fuengcim gwzmingva、nenzginghva、cihsizva、conhyezva, hwnqguh aen lingdauj ganbu duivuj suciz sang, ndaej dawz rapnaek、souh ndaej rumzlangh gaujniemh ndeu, daegbied dwg beizyangj gyauq ok daihbuek lingjdauj vunzcaiz ndei rox guenj dangj guenj guek guenj bing haenx, dwg aen gaenbonj daihgeiq sawj dangj caeuq guekgya ndaej ciengzgeiz onjdingh. Aeu nyinhcaen gvancez gij diuzlaeh genj yungh lingjdauj ganbu, yawjnaek youq ndaw gaijgwz caeuq gensez sizcen bae gaujcaz caeuq sizbez ganbu, dawz doengh boux daek caiz giem miz、cingzcik yienhda caeuq ginzcung caez nyinh haenx gibseiz senj daengz gwnz lingjdauj ganghvei bae. Gyadaih gij gunghcoz ligdoh beizyangj genj yungh doengh boux ganbu nienzoiq maenh’ak haenx, cujyau bangcoh gyoengqde gyagiengz dangjsing siuhyangj、lijlun hagsib caeuq sizcen muzlienh, cienzmienh daezsang bonjndang suciz. Caenh’itbouh guh ndei gij gunghcoz beizyangj genj yungh gij ganbu mehmbwk、gij ganbu siujsoq minzcuz caeuq gij ganbu rog dangj. Laebdaeb guh ndei lizyouh duiyouh ganbu gunghcoz. Aeu daezsang suciz、gaijndei gezgou、gaijcaenh cozfungh caeuq demgiengz doxgiet guh cungdenj, dawz gak gaep lingjdauj banhswj hwnqguh baenz aen giengiengz lingjdauj cizdij ndaej genhciz gvancez “Sam Aen Daibyauj” Cung’yau Swhsiengj haenx. Itdingh aeu mboujduenh beizyangj caeuq gyauq ok boux ciepban guh yiengh seveicujyi saehnieb miz daegsaek Cungguek, saedbauj gij saehnieb dangj caeuq yinzminz ndaej laebdaeb miz vunz swnjronh.

  (5) Cietsaed guh ndei gihcwngz dangjgen gunghcoz, demgiengz gij gaihgiz gihcuj aen dangj caeuq gyadaih gij ginzcung gihcuj aen dangj. Gij gihcwngz cujciz dangj raeuz dwg gij giekdaej cienzbouh gunghcoz caeuq candouliz aen dangj, youq mwh gvancez “Sam Aen Daibyauj” Cung’yau Swhsiengj, wnggai baenz boux cujciz、boux doidoengh caeuq boux sizcen de. Aeu genhciz hopheux cungsim、fuzvu dagiz, haigvangq lingjyiz、giengzvaq gunghnwngz, gyadaih gij gunghcoz fanveiz aen dangj, mboujduenh daezsang gij ningzciliz caeuq candouliz doengh aen gihcwngz cujciz dangj raeuz. Gyagiengz boiqdauq hwnqguh gij mbanj gaep cujciz aeu aen mbanj dangj cujciz guh haedsim haenx, ra aeu lohsoq mizyauq, sawj ganbu ndaej ciengzseiz souh gyauyuz、sawj nungzminz ciengzgeiz ndaej gij ndeicawq saedcaih. Banh ndei guekmiz giyez caeuq cizdij giyez, itdingh aeu genhciz itsim iteiq baenghgauq gunghyinz gaihgiz, gij dangj cujciz giyez aeu cizgiz bae caeuqfaenh gezcwz gij vwndiz hungnaek ndaw giyez, cungfaen fazveih cwngci haedsim cozyungh. Gyagiengz hwnqguh gij dangj cujciz ndaw feihgunghyoujci giyez, gij dangj cujciz ndaw giyez aeu gvancez gij fuengcim cwngcwz aen dangj, dazyinx caeuq gamduk giyez souj gij faplwd fapgvi guekgya, lingjdauj gunghvei caeuq gungcinghdonz daengj ginzcung cujciz, comzgiet gietcomz cizgungh ginzcung, henhoh gak fueng habfap gienzik, coicaenh giyez ndeindei fazcanj. Aeu gig yawjnaek segih dangj cujciz gensez, aeu vih ginzcung fuzvu guh cungdenj, cauhlaeb aen gwzgiz moq hawsingz segih dangjgen gunghcoz. Lai roengzrengz bae guh gij gunghcoz youq ndaw sevei donzdij caeuq sevei cunghgai cujciz laeb dangj cujciz haenx, cienzmienh guh ndei gij dangjgen gunghcoz ndaw gihgvanh caeuq gij dangjgen gunghcoz yozyau、gohyenz yensoj、vwnzva donzdij daengj swyez danhvei.

  Gungcanjdangjyenz itdingh aeu fazveih senhfungh mozfan cozyungh, gaenjmaenh laebhwnj aen lijsiengj hung gyae gungcanjcujyi caeuq aen giendingh saenqniemh guh yiengh seveicujyi miz daegsaek Cungguek, lauxlaux saedsaed bae vih saedyienh dangj youq gaihdon seixneix aen gihbwnj ganghlingj de bae haenqrengz guh. Aeu sizcen “Sam Aen Daibyaij” Cung’yau Swhsiengj guh cujyau neiyungz, youq daengx dangj gaihcanj gyauyuz hozdung, son gyoengq gungcanjdangjyenz baujciz senhcinsing. Cungdenj guh ndei gij gunghcoz youq gunghyinz、nungzminz、cihsiz fwnswj、ginhyinz caeuq ganbu ndawde fazcanj dangjyenz, sawj aen duivuj dangj raeuz gij ceiq gihbwnj gapbaenz bouhfaenh caeuq gij goetgan ligliengh de engq hung’ak. Louzsim youq ndaw swnghcanj、gunghcoz daih’it sienq caeuq ndaw gyoengq gauhgiz cihsiz fwnswj、ndaw gyoengq bouxcoz fazcanj dangjyenz. Doiq doengh boux senhcin fwnswj gizyawz gaihcwngz ndawbiengz swngznyinh gij ganghlingj caeuq canghcwngz aen dangj、gag rox vih diuz lohsienq caeuq ganghlingj aen dangj bae haenqrengz guh、ginggvaq ciengzgeiz gaujniemh、hab dangjyenz diuzgen haenx, aeu sou de haeuj ndaw dangj daeuj, demgiengz aen dangj youq daengx biengz gij yingjyangjliz caeuq ningzciliz de. Hab’wngq hingzsi moq, ra aeu gij gihci moq fuengfap moq guenjleix dangjyenz.

  (6) Gyagiengz caeuq gaijndei gij cozfungh gensez aen dangj, haeujlaeg gaihcanj fanj nduknaeuh doucwngh. Doicaenh gij cozfungh gensez aen dangj, haedsim dwg baujciz dangj caeuq yinzminz ginzcung gij lienzhaeh gig maedcaed de. Gij cwngci youhsi ceiq daih aen dangj raeuz, couh dwg maedcaed lienzhaeh ginzcung, aen dangj gaemgienz le, gij yung’yiemj ceiq daih de couh dwg duetliz ginzcung. Mboujlwnh youq seiz lawz yiengh cingzgvang lawz, cungj itdingh aeu genhciz diuz ginzcung lohsienq aen dangj, genhciz aen cunghcij itsim iteiq vih yinzminz fuzvu, raeuz guh sojmiz gunghcoz, cungj dwg vih gij leih’ik yinzminz ginzcung. Aeu dawz laeb dangj vih goeng、gaemgienz vih beksingq dangguh gaenbonj muzdiz, fazyangz gij conzdungj ndei caeuq cozfungh ndei dangj raeuz, ciuq “bet aen genhciz、bet aen fanjdui” cunghyangh daezok haenx, it baengh gyauyuz, ngeih baengh cidu, cingqdeng guh bihbingz caeuq gag guh bihbingz, roengzrengz gaijgez aen dangj youq swhsiengj cozfungh、yozfungh、gunghcoz cozfungh、lingjdauj cozfungh caeuq ganbu swnghhoz cozfungh fuengmienh gij vwndiz doedmengx haenx, daegbied dwg aeu fuengzre caeuq haekfug hingzsizcujyiz、gvanhliuzcujyi. Nyinhcaen yenzgiu gij bienqvaq moq ndaw ndawbiengz swnghhoz guek raeuz caeuq gij daegdiemj moq ndaw ginzcung gunghcoz, dawz gyagiengz caeuq gaijcaenh ginzcung gunghcoz, gvancez daengz aen dangj gensez caeuq cwnggenz gensez gak hangh gunghcoz ndawde bae. Gungcanjdangjyenz daegbied dwg gak gaep lingjdauj ganbu, cungj aeu roengzrengz yungh gangjfug gyauyuz、sifan dazyinx caeuq daezhawj fuzvu daengj fuengfap, guh ndei gij ginzcung gunghcoz ndaw hingzsi moq, comzgiet caeuq daiqlingx ginzcung mboujduenh baenaj.

  Genhgez fanjdui caeuq fuengzre nduknaeuh, dwg daengx dangj hangh cwngci yinvu hungnaek ndeu. Mbouj genhgez fadceih nduknaeuh, dangj caeuq yinzminz ginzcung gij lienzhaeh gig maedcaed de couh yaek deng sienghaih youqgaenj, gij diegvih gaemgienz dangj raeuz couh yaek miz gij yung’yiemj deng saet bae, dangj couh yaek miz gojnaengz deng gag daimied. Youq gij diuzgen ciengzgeiz gaemgienz, youq ndaw vanzging doiq rog hailangh caeuq fazcanj seveicujyi hawciengz ginghci, dangj itdingh aeu cibfaen yawjnaek daezfuengz gak cungj swhsiengj nduknaeuh, gaej hawj de cimqmyaex aen dangj, henhoh aen duivuj dangj raeuz cangqheiq cinghseuq. Gak gaep dangjveij gawq aeu cungfaen rox daengz fanj nduknaeuh doucwngh gig gaenjgip, youh yaek cungfaen rox daengz fanj nduknaeuh dwg hangh ciengzgeiz gunghcoz ndeu, giendingh saenqsim, lauxsaed gunghcoz, geizhauh sienmingz、it di cungj mbouj doenghngauz, haeujlaeg bae gauj gij doucwngh fanj nduknaeuh. Caenh’itbouh ca ndei gij gunghcoz lingjdauj ganbu lenzgez gag haed、cazcawq anq hung anq naek、niujcingq bumwnz caeuq hangznieb gij cozfungh mbouj cingq haenx. Genhciz aen fuengcim goek biu caez ceih、cunghhoz ceihleix haenx, cugbouh gya rengz bae ceih goek. Gyagiengz gyauyuz, fazcanj minzcuj, laeb caezcienz fazci, giengzvaq gamduk, cauhmoq dijci, gak hangh cung’yau cwngcwz cosih cungj hamz miz fanj nduknaeuh, coengz goekgaen bae yawhfuengz caeuq gaijgez nduknaeuh vwndiz. Genhciz caeuq laeb caezcienz gij lingjdauj dijci caeuq gunghcoz gihci fanj nduknaeuh, nyinhcaen lozsiz dangjfungh lenzcwng gensez cwzyinci, cauxbaenz gij rengzdoxgap fuengzre caeuq fadceih nduknaeuh. Lingjdauj ganbu daegbied dwg gauhgiz ganbu, itdingh aeu daiqdaeuz guh ndei, cingqdeng sawjyungh gij gienzlig ndaw fwngz, seizseiz cungj guh daengz cinghseuq lenzgez, gag rox bae caeuq gak cungj yienhsiengq nduknaeuh guh genhgez doucwngh. Doiq sojmiz nduknaeuh fwnswj, cungj itdingh aeu cazcawq daengzdaej、yiemz fad mbouj nyiuz.

  Gyoengq dungzci daengx dangj seizseiz cungj aeu baujciz gij yienghndei vunz gungcanjdangj, cingsaenz singjsak, damjceiq raehfwd, cingqheiq sadsad, ciengzlwenx caeuq yinzminz ginzcung sim lienz sim, yienghneix, gij giekdaej gaemgienz dangj raeuz, couh geng dangq rinbya bae.

  Gak boux dungzci! Cienzmienh hwnqguh aen biengz siujgangh, haicauh aen gizmen moq hwnqguh yiengh seveicujyi saehnieb miz daegsaek Cungguek, couh dwg aeu Cungguek Gungcanjdangj daeuj guh giengiengz lingjdauj, fazcanj seveicujyi hawciengz ginghci、seveicujyi minzcuj cwngci caeuq seveicujyi senhcin vwnzva, mboujduenh coicaenh seveicujyi vuzciz vwnzmingz、cwngci vwnzmingz caeuq cingsaenz vwnzmingz ndaej hezdiuz fazcanj, doicaenh Cunghvaz Minzcuz dauqcungz hwng’vuengh fatdad.

  Cungguek Gungcanjdangj roengzrag youq Cunghvaz Minzcuz gig laeg. Dangj coengz ngoenz laebbaenz de hwnj, couh dwg aen senhfunghdui Cungguek gunghyinz gaihgiz, doengzseiz dwg aen senhfunghdui Cungguek yinzminz caeuq Cunghvaz Minzcuz, rap miz gij canghyenz sawjmingh sawj Cunghvaz Minzcuz dauqcungz hwng’vuengh fatdad. Youq sinhminzcujcujyi gwzming seizgeiz, aen dangj raeuz comzgiet caeuq daiqlingx daengx guek gak cuz yinzminz guhbaenz le gij lizsij yinvu minzcuz doglaeb caeuq yinzminz gaijfang, vih saedyienh Cunghvaz Minzcuz dauqcungz hwng’vuengh fatdad cauxok le diuzgen. Cungguek moq laebbaenz le, aen dangj raeuz cauhmoq guhbaenz daj sinhminzcujcujyi gvaqdoh daengz seveicujyi, saedyienh gwnz lizsij Cungguek baez ndawbiengz bengwz ceiq hungmbwk ceiq haeujndok he, sawj Cunghvaz Minzcuz youq gwnz roen seveicujyi saedyienh fukhwng hungmbwk gij byaij lizsij roen’gyae neix hainduj lo. Cib’it gaiq sam cungh cenzvei doxdaeuj, aen dangj raeuz ra ndaej diuz roen ndei hwnqguh yiengh seveicujyi miz daegsaek Cungguek haenx, hawj minzcuz fukhwng ndaej miz rengzak moq. Cunghvaz Minzcuz baihnaj ronghsagsag, itdingh ndaej dauqcungz hwng’vuengh fatdad hwnjdaeuj.

  Cienzmienh hwnqguh aen biengz siujgangh, gyavaiq doicaenh seveicujyi yendaiva, sawj seveicujyi Cungguek fazcanj caeuq fouqgiengz hwnjdaeuj, vih vunzloih cinbu saehnieb guh’ok gung’yen engq daih, neix dwg gij lizsij yinvu aen dangj raeuz itdingh aeu daihdamj rap hwnjdaeuj he. Guhbaenz aen yinvu neix, itdingh aeu gaenjgaenj baenghgauq daengx dangj caeuq daengx guek gak cuz yinzminz doxgiet. Doxgiet couh miz ligliengh, doxgiet couh ndaej hingz. Aen dangj raeuz caeuq gij yinzminz raeuz ginggvaq le gannanz saetbaih, rom miz gingniemh gig lai, ngoenz beij ngoenz maenh’ak hwnjdaeuj lo. Mienhdoiq aen seiqgyaiq gig mbouj an’onj neix, mienhdoiq gij yinvu gannanz hungnaek haenx, gyoengq dungzci daengx dangj itdingh aeu lailai yousim, gvaq ngoenzndei siengj ngoenzvaih, singjsag yawjdaengz youz gij gozci gingcwngh ngoenz beij ngoenz haenqrem haenx daiq daeuj gij diuhcan haenqrem de, singjsag yawjdaengz gij gunnanz caeuq fung’yiemj gwnz roenloh raeuz baenaj haenx, engqgya aeu goq daengxbuenz, engqgya aeu insik doxgiet, engqgya aeu henhoh onjdingh.

  Gyoengq dungzci daengx dangj caeuq daengx guek gak cuz yinzminz, ndaetndaet dwk doxgiet youq seiqhenz dangj cunghyangh, fanh vunz doengz sim, roengzrengz haenqguh, dawz gij seveicujyi saehnieb miz daegsaek Cungguek haenx mboujduenh doi baenaj, doengzcaez bae cauxok gij saedceij vuenyungz caeuq ngoenzndei daengzcog!

  (Gij swhliu Yinzminzvangj)

  
[1] [2] [3] [4] [5] [6] [7] [8] [9] [10]
 
Dozsiengq