Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CIENZMIEMH HWNQGUH AEN BIENGZ SIUJGANGH, CAUH’OK AEN GIZMEN MOQ YIENGH SAEHNIEB SEVEICUJYI MIZ DAEGSAEK CUNGGUEK 9

——Gij Baugau Youq Gwnz Aen Daihhoih Cungguek Gungcanjdangj Daih Cibroek Baez Daengx Guek Daibyauj Davei
(2002 nienz 11 nyied 8 hauh)

Gyangh Cwzminz
  
【Cihsaw Hung’iq : hung rauh iq】  Dajyaenq
      
  8. “Aen Guekgya Ndeu Song Cungj Cidu” Caeuq Saedyienh Guekcoj Cienzbouh Doengjit

  Saedyienh guekcoj cienzbouh doengjit, dwg aen simmuengh doxdoengz gyoengq lwglan Cunghvaz ndaw guek rog guek. Raeuz gaenq gaijgez baenz Yanghgangj vwndiz caeuq Aumwnz vwndiz, cingqcaih vih caeux di gaijgez Daizvanh vwndiz、guhcaez guekcoj doengjit daihnieb bae laebdaeb haenqrengz guh.

  Yanghgangj caeuq Aumwnz gvidauq guekcoj, fungfouq le gij lijlun caeuq sizcen “aen guekgya ndeu song cungj cidu”. Saedsaeh cwngmingz, diuz fuengcim “aen guekgya ndeu song cungj cidu” gig deng, hengz ndaej doeng guenj ndaej nanz. Raeuz yaek giendingh mbouj bienq bae saedhengz diuz fuengcim neix, yiemzgek ciuq aen fapgiek Yanghgangj caeuq aen fapgiek Aumwnz banhsaeh, cienzlig cihciz Yanghgangj dem Aumwnz song aen daegbied hingzcwnggih neix gij hingzcwng cangjgvanh caeuq cwngfuj de gunghcoz, lailai comzgiet Gangj Au gak gyaiq yinzsw, doengzcaez henhoh caeuq coicaenh gij hwng’vuengh、onjdingh caeuq fazcanj Yanghgangj dem Aumwnz.

  Raeuz genhciz aen gihbwnj fuengcim “huzbingz doengjit、aen guekgya ndeu song cungj cidu” caeuq bet hangh cujcangh gvendaengz youq aen gaihdon seizneix fazcanj song hamq gvanhaeh、doicaenh guekcoj huzbingz doengjit haenx, caeuq gyoengq beixnuengx Daizvanh itheij, gyagiengz song hamq yinzyenz baedauq, gyagiengz ginghci vwnzva daengj fuengmienh gyauhliuz, genhgez fanjdui gij faenmbek seiqlig Daizvanh. Song hamq gvanhaeh aen gihbwnj gwzgiz caeuq fazcanj byaijyiengq de mbouj miz maz gaijbienq. Gij simmuengh gouz huzbingz、gouz onjdingh、gouz fazcanj gyoengq beixnuengx Daizvanh ngoenz haenq gvaq ngoenz, gyoengq faenmbek seiqlig Daizvanh gij faenmbek hozdung de famhhoz vunzlai.

  Genhciz diuz yenzcwz aen Cungguek dog, dwg aen giek fazcanj song hamq gvanhaeh caeuq saedyienh guekcoj huzbingz doengjit. Gwnz seiqgyaiq ngamq miz aen Cungguek dog, Dalu caeuq Daizvanh caez gvi aen Cungguek ndeu, gij cujgenz caeuq lingjduj caezcingj Cungguek mbouj ndaej faengat. Doiq sojmiz gij gangjvah caeuq hengzdoengh yaek siengj cauhbaenz “Daizvanh gag laeb guekgya”、“song aen Cungguek”、“aen Cungguek ndeu aen Daizvanh ndeu”haenx, raeuz cungj genhgez fanjdui. Gij roen baenaj Daizvanh aeu baenghdak guekcoj doengjit. Song hamq doiqvah, guh huzbingz doengjit damzbuenq, raeuz liglaiz cungj baenzneix cujcangh. Raeuz caiq iu baez dem, aeu diuz yenzcwz aen Cungguek dog guh goek, camhseiz mbouj bae saeq nyaemj mbangj di cwngci cenggingh, caenhliengh caeux di hoizfuk song hamq doiqvah caeuq damzbuenq. Caenh aeu doengzeiq aen Cungguek dog, gij vwndiz lawz cungj ndaej lwnh, ndaej lwnh gij vwndiz song hamq baenzlawz cingqsik mbouj caiq dox doiqdig, ndaej lwnh gij vwndiz Daizvanh digih youq gwnz seiqgyaiq aeu yiengh ndangfaenh lawz bae guh ginghci vwnzva ndawbiengz hozdung cij ngamj, hix ndaej lwnh doengh gij vwndiz gvendaengz gij cwngci diegvih Daizvanh danghgiz. Raeuz nyienh caeuq Daizvanh gak dangjbai dem gak gyaiq yinzsw couh fazcanj song hamq gvanhaeh、doicaenh huzbingz doengjit bae dox siengliengz.

  Gaijgez Daizvanh vwndiz、saedyienh guekcoj cienzbouh doengjit, raeuz dak muengh youq laeng gyoengq Daizvanh yinzminz. Gyoengq beixnuengx Daizvanh miz gij gyaezguek conzdungj najrongh de, dwg gij ligliengh youqgaenj fazcanj song hamq gvanhaeh. Raeuz cungfaen gingqcungh gij swnghhoz fuengsik caeuq gij simmuengh danggya guhcawj gyoengq beixnuengx Daizvanh. Song hamq wngdang lai gyauhliuz lai baedauq, doengzcaez daihlig fazyangz gij conzdungj ndei Cunghvaz vwnzva. Song hamq ndaej cigsoh doeng saenq fak doxgaiq、doeng ruz doeng feihgih caeuq guh seng’eiq, dwg gij leih’ik caezcaemh song hamq beixnuengx, vanzcenz wnggai yungh gij bouhloh saedcaih bae cizgiz doicaenh, cauh’ok aen gizmen moq song hamq ginghci doxgap.

  “Aen guekgya ndeu song cungj cidu” dwg song hamq doengjit aen fuengsik ceiq ndei de. Song hamq doengjit le, Daizvanh gojyij baujlouz gij cidu ndawbiengz yienzlaiz mbouj bienq, ndaej ceiq daih hanhdoh bae gag guenj. Gij swnghhoz fuengsik gyoengq beixnuengx Daizvanh mbouj bienq, gij leih’ik nemndang gyoengqde hix yaek ndaej cungfaen baujcang, ciengzlwenx ndaej an’onj gvaq saedceij. Daizvanh ginghci yaek caencingq ndaej aeu guekcoj daluz daeuj guh giz dieg ingbaengh gvangqmangmang, nyaemh de fazcanj. Gyoengq beixnuengx Daizvanh gojyij caeuq gyoengq beixnuengx daluz itheij, hengzsawj gij gienzleih guenjleix guekgya, doengzcaez yiengjsouh guekcoj hungmbwk youq gwnz seiqgyaiq gij cunhyenz caeuq mingzdaeuz miznaj de.

  Song cien sam bak fanh beixnuengx Daizvanh dwg gyoengq beixnuengx daep daw riengh saej raeuz, mbouj miz bouxlawz ndaej beij raeuz engq muengh doenggvaq huzbingz fuengsik gaijgez Daizvanh vwndiz. Raeuz yaek laebdaeb genhciz aen gihbwnj fuengcim “huzbingz doengjit、aen guekgya ndeu song cungj cidu”, gvancez bet hangh cujcangh, aeu ceiq daih caensim、caenh ceiq daih goengrengz bae ceng’aeu gij gojnwngz huzbingz doengjit. Raeuz baenzlawz cungj mbouj wngqcingz mbouj hoenx, hoeng baenzneix gangj, mbouj dwg cimdoiq gyoengq beixnuengx Daizvanh, cix dwg cimdoiq gij seiqlig guekwnq laengzlanz Cungguek doengjit caeuq gij faenmbek seiqlig Daizvanh siengj gauj “Daizvanh gag laeb guek” haenx. Henhoh guekcoj doengjit, gvanhaeh daengz gij gaenbonj leih’ik Cunghvaz Minzcuz, Cungguek yinzminz yaek genhgez henhoh guekgya cawjgienz caeuq lingjduj caezcingj, baenzbaenz mbouj hawj bouxlawz yungh yiengh fuengsik lawz, daj Cungguek gat Daizvanh deuz bae. Guekgya aeu doengjit, minzcuz aeu dauqhwng, Daizvanh vwndiz mbouj ndaej fouz hanhgeiz ruengzreh roengzbae. Raeuz onjsaenq, doenggvaq daengxcungq lwglan Cunghvaz doengzcaez roengzrengz, guekcoj cienzbouh doengjit, couh itdingh guhbaenz ndaej vaiq di.

  9、Gij Hingzsi Gwnz Gozci Caeuq Gij Gunghcoz Doiq Rog

  Huzbingz caeuq fazcanj ciuqyiengh lij dwg aen cawjdaez aen seizdaih seizneix. Henhoh huzbingz, coicaenh fazcanj, dwg gienh daihsaeh gvanhaeh daengz gij vuenyungz gak guek yinzminz, dwg gij simmuengh doxdoengz gak guek yinzminz, hix dwg gij lizsij cauzliuz laengzlanz mbouj ndaej. Seiqgyaiq dohgizva caeuq ginghci cenzgiuzva seiqdaeuz fazcanj, hawj seiqgyaiq huzbingz caeuq fazcanj daiq daeuj le seizgei ndei caeuq diuzgen mizleih. Lingh ciengz seiqgyaiq daih hoenx youq ndaw seizgeiz liuh ndaej raen de lij mbouj baenz hoenx. Ceng’aeu gij gozci vanzging huzbingz caeuq gij seiqhenz vanzging onj ndei aen seizgeiz haemq raez ndeu, neix guh ndaej daengz.

  Hoeng, gij gozci cwngci ginghci cizsi gaeuq mbouj goengcingq mbouj hableix haenx, lij caengz ndaej daj goekgaen bae gaijbienq. Gij yinhsu mbouj doekdingh yingjyangj huzbingz caeuq fazcanj haenx cingqcaih demgya. Conzdungj anhcenz veihhez caeuq feihconzdungj anhcenz veihhez yinhsu doxsan doxgeuj, gungjbucujyi baenz haih gyalai. Bagenzcujyi caeuq gyangzgenz cwngci youh miz lingh yiengh biujyienh. Minzcuz、cunghgyau mauzdun caeuq henzgyaiq、lingjduj doxceng yinxhwnj saek dieg doxdawz hix seiz hoenx seiz dingz. Namz baek cengca yied daeuj yied daih. Seiqgyaiq lij gig mbouj an’onj, haujlai diuhcan haenqrem cingq baij youq dangqnaj vunzloih.

  Mboujguenj lajmbwn hingzseiq baenzlawz boekbienq, raeuz itloh cungj giendingh mbouj bienq bae hengz diuz huzbingz vaigyauh cwngcwz doglaeb gag guhcawj. Gij cunghcij vaigyauh cwngcwz Cungguek, dwg henhoh seiqgyaiq huzbingz, coicaenh doengzcaez fazcanj. Raeuz nyienh caeuq gak guek yinzminz itheij, doengzcaez doicaenh seiqgyaiq huzbingz caeuq fazcanj aen saehnieb gig ik vunzloih neix.

  Raeuz cujcangh swnh’wngq lizsij cauzliuz, henhoh gij leih’ik caezcaemh daengx vunzloih. Raeuz nyienh caeuq gozci sevei doengzcaez roengzrengz, cizgiz coicaenh seiqgyaiq dohgizva, doidoengh lai cungj ligliengh huzciz caemhyouq, baujciz gozci sevei onjdingh; cizgiz coicaenh ginghci cenzgiuzva fazcanj gvaq mbiengj ndei ndaej saedyienh doengzcaez hwng’vuengh bae, raen miz ik couh gaen, bungz miz haih couh ndoj, sawj gak guek daegbied dwg gij guekgya cingqcaih fazcanj haenx cungj daj ndawde ndaej ndeicawq.

  Raeuz cujcangh laebhwnj aen gozci cwngci ginghci cizsi moq goengcingq hableix. Gak guek youq cwngci fuengmienh wngdang dox gingqcungh, doengzcaez siengliengz, cix mbouj wngdang dawz gij eiqceiq bonjfaenh giengzgya hawj vunz; youq ginghci fuengmienh wngdang dox coicaenh, doengzcaez fazcanj, cix mbouj wngdang cauxbaenz bouxmiz engq miz bouxgungz engq gungz; youq vwnzva fuengmienh wngdang dox doiqciuq doxhag, doengzcaez hoenghvuengh, cix mbouj wngdang vut gij vwnzva aen minzcuz wnq bae; youq ancienz fuengmienh wngdang dox saenqnyaemh, doengzcaez henhoh, laebhwnj cungj ancienz gvanhnen moq doxsaenq、doxik、bingzdwngj caeuq dox boiqhab haenx, doenggvaq doiqvah caeuq doxgap bae gaijgez doxceng, cix mbouj wngdang yungh cungqbauq dox nyingz roxnaeuz yungh cungqbauq bae hangz vunz. Fanjdui gak cungj hingzsik bagenzcujyi caeuq gyangzgenz cwngci. Cungguek ciengzlwenx mbouj guh vuengz, ciengzlwenx mbouj ciemqaeu gij dieg guekwnq.

  Raeuz cujcangh henhoh seiqgyaiq gij lai saek lai yiengh de, dizcang gozci gvanhaeh minzcujva caeuq fazcanj yienghsik ndaej miz lai cungj. Seiqgyaiq dwg vava loegloeg lai cungj lai yiengh. Youq gwnz seiqgyaiq, gak cungj vwnzmingz、gak cungj cidu ndawbiengz caeuq fazcanj roenloh wngdang dox gingqcungh, youq gingcwngh doxbeij ndawde doxhag doxbouj, youq gouz aeu gij doxdoengz baujlouz gij mboujdoengz ndawde caezcaemh fazcanj. Gij saehcingz gak guek wngdang youz gak guek yinzminz gag bae gietdingh, gij saehcingz gwnz seiqgyaiq wngdang youz gak guek bingzdaengj doxyaeng.

  Raeuz cujcangh fanjdui gij gungjbucujyi sojmiz hingzsik. Aeu gyagiengz gozci doxgap, ceih goek ceih biu, fuengzre caeuq dwkceih gungjbu hozdung, roengzrengz dawz gij goekrag doekseng gungjbucujyi haenx siucawz bae.

  Raeuz yaek laebdaeb caeuq fatdad guekgya gaijndei caeuq fazcanj gvanhaeh, dawz gij gaenbonj leih’ik gak guek yinzminz cuengq youq daih’it, mbouj bae ndaeksuenq gij cabied cidu ndawbiengz caeuq yisiz hingzdai, youq gwnz giek huzbingz caemh youq haj hangh yenzcwz, lai ra aeu giz leih’ik caezcaemh doxgyonj de, dojdangq gaijgez gij vwndiz yawjfap mbouj doxdoengz de.

  Raeuz yaek laebdaeb gyagiengz caeuq gij guekgya laenzgaenh doxhuz doxndei, genhciz aeu swnzsienh bae doiqdaih gij guekgya laenzgaenh、caeuq gij guekgya laenzgaenh guhdoih, gyagiengz gihyiz doxgap, dawz caeuq gij guekgya laenzgaenh gyauhliuz dem doxgap fazcanj daengz aen suijbingz moq bae.

  Raeuz yaek laebdaeb lailai caeuq daihsam seiqgyaiq guekgya doxgiet caeuq doxgap, gyalai doxrox doxsaenq, gyagiengz dox bangcoh dox cihciz, haigvangq doxgap lingjyiz, daezsang doxgap yaugoj.

  Raeuz yaek laebdaeb cizgiz camgya lai mbiengj vaigyauh hozdung, youq ndaw Lenzhozgoz caeuq gizyawz gozci dem gihyizsing cujciz fazveih cozyungh, cihciz doengh aen guekgya cingqcaih fazcanj haenx henhoh gij cingqdangq gienzik bonjfaenh.

  Raeuz yaek laebdaeb genhciz aen yenzcwz doglaeb gag guhcawj、vanzcenz bingzdaengj、dox gingqcungh、dox mbouj ganhsez gij saehcingz ndawguek doiqfueng, ndij gak guek gak digih cwngdangj caeuq cwngci cujciz fazcanj gyauhliuz caeuq doxgap.

  Raeuz yaek laebdaeb dauqcawq bae guh minzgenh vaigyauh, gyadaih doiq rog vwnzva gyauliuz, demlai gij cingzngeih yinzminz, doidoengh guekgya gvanhaeh fazcanj.

  Seiqgyaiq cingq byaij coh aen muzbyauh ronghsag caeuq cinbu. Roenloh yienznaeuz ngutngeuj, hoeng baenaj cix ronghsagsag. Gij ligliengh huzbingz、gij ligliengh cingqngeih、gij ligliengh cinbu, dauqdaej dwg dwk mbouj laemx law.

  
[1] [2] [3] [4] [5] [6] [7] [8] [9] [10]
 
Dozsiengq