Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CIENZMIEMH HWNQGUH AEN BIENGZ SIUJGANGH, CAUH’OK AEN GIZMEN MOQ YIENGH SAEHNIEB SEVEICUJYI MIZ DAEGSAEK CUNGGUEK 8

——Gij Baugau Youq Gwnz Aen Daihhoih Cungguek Gungcanjdangj Daih Cibroek Baez Daengx Guek Daibyauj Davei
(2002 nienz 11 nyied 8 hauh)

Gyangh Cwzminz
  
【Cihsaw Hung’iq : hung rauh iq】  Dajyaenq
      
  6、Vwnzva Gensez Caeuq Vwnzva Dijci Gaijgwz

  Cienzmienh hwnqguh aen biengz siujgangh, itdingh aeu daihlig fazcanj seveicujyi vwnzva, hwnqguh seveicujyi cingsaenz vwnzmingz. Aen seiqgyaiq seizneix, vwnzva caeuq ginghci ndij cwngci dox yungzhab, youq gyoebhab gueklig gingcwngh ndawde miz diegvih caeuq cozyungh yied daeuj yied daih. Gij ligliengh vwnzva, laeglaeg yungz youq ndaw swnghmingliz、cangcauliz caeuq ningzciliz aen minzcuz. Gyoengq dungzci daengx dangj doiq gij canloz yiyi vwnzva gensez aeu rox ndaej gig cingcuj, doidoengh seveicujyi vwnzva fazcanj hwng’vuengh.

  (1) Dawzmaenh aen fueng’yiengq baenaj senhcin vwnzva. Youq dangdaih Cungguek, fazcanj senhcin vwnzva, couh dwg fazcanj gij minzcuz gohyoz dacung seveicujyi vwnzva mienhyiengq yendaiva、mienhyiengq seiqgyaiq、mienhyiengq daengzcog haenx, baenzneix daeuj mboujduenh fungfouq gij cingsaenz seiqgyaiq gyoengqvunz, demgiengz gij cingsaenz ligliengh gyoengqvunz. Itdingh aeu genhciz Majgwzswh-Lezningzcujyi、Mauz Cwzdungh Swhsiengj caeuq Dwng Siujbingz Lijlun youq yisiz hingzdai lingjyiz gij cijdauj diegvih de, yungh “Sam Aen Daibyauj” Cung’yau Swhsiengj dungjguenj seveicujyi vwnzva gensez. Genhciz aen fueng’yiengq vih yinzminz fuzvu、vih seveicujyi fuzvu caeuq diuz fuengcim bak va caez hai、bak gya cenglwnh haenx, hungzyangz cujcenzliz, dizcang lai cungj lai yiengh. Genhciz aeu gij gohyoz lijlun bae vujcangh vunz, aeu gij cingqdeng yizlun bae dazyinx vunz, aeu gij cingsaenz gauhsang bae sucau vunz, aeu gij cozbinj ndei bae gujvuj vunz. Daihlig fazcanj senhcin vwnzva, cihciz gij vwnzva cangqheiq mizik, roengzrengz gaijcauh gij vwnzva doeklaeng, genhgez daeqceih gij vwnzva nduknaeuh. Vwnzyi gunghcozcej aeu roengz ndaw ginzcung bae、roengz ndaw swnghhoz bae, vih yinzminz dawz ok engq lai gij cozbinj doiq ndaej gvaq seizdaih haenx. Sinhvwnz okbanj caeuq gvangjbo yingjsi itdingh aeu genhciz cingqdeng daujyang, hulenzvangj vangjcan aeu bienqbaenz aen cindi youqgaenj cienzyiengz senhcin vwnzva haenx. Aeu gij sizcen gaijgwz hailangh dem yendaiva gensez guh goek, aeu caenx haeuj seiqgyaiq vwnzva fazcanj giz ceiq vaiq ceiq ndei de guh muzdiz, fazyangz gij conzdungj ndei minzcuz vwnzva, sup aeu gij ndeicawq seiqgyaiq gak minzcuz, youq neiyungz caeuq hingzsik fuengmienh cizgiz cauhmoq, sawj gij seveicujyi vwnzva miz daegsaek Cungguek haenx ndaej mboujduenh hawj vunz lai maengx, hawj vunz lai souh gamjdoengh.

  (2) Genhciz daihlig fazyangz caeuq gungganq minzcuz cingsaenz. Aen minzcuz ndeu yaek senglix caeuq fazcanj, couh aeu baengh minzcuz cingsaenz daeuj dingjdaemx. Aen minzcuz ndeu, mboujmiz gij cingsaenz singjsak caeuq gij binjgwz gauhsang, couh mbouj gojnaengz ndaej gag ndwnmaenh youq luengq seiqgyaiq minzcuz. Youq haj cien lai bi fazcanj ndawde, Cunghvaz Minzcuz cauxbaenz le cungj minzcuz cingsaenz hungmbwk baenzneix: Aeu aigozcujyi guh haedsim, doxgiet doengjit、hauqgyaez huzbingz、gaenxguh mizdamj、gag haenqrengz mbouj dingz, mbouj giengzak mbouj fug. Aen dangj raeuz lingjdauj yinzminz youq ciengzgeiz sizcen ndawde, mboujduenh giethab seizdaih caeuq ndawbiengz fazcanj iugouz, fungfouq le aen minzcuz cingsaenz neix. Mienhdoih seiqgyaiq fanveiz gak cungj swhsiengj vwnzva dox cungdongj, itdingh aeu dawz daihlig fazyangz caeuq gungganq minzcuz cingsaenz dangguh vwnzva gensez aen yinvu gig youqgaenj haenx, gvihaeuj daengx aen gocwngz gozminz gyauyuz, gvihaeuj daengx aen gocwngz cingsaenz vwnzmingz gensez, sawj daengxcungq yinzminz seizseiz cungj baujciz aen cingsaenz cangdai singjsak sadsad.

  (3) Cietsaed gyagiengz swhsiengj daudwz gensez. Eifap ceihleix guekgya caeuq yungh daudwz ceihleix guekgya dwg doxbouj doxbang. Aeu laebhwnj aen seveicujyi swhsiengj daudwz dijhi caeuq seveicujyi hawciengz ginghci dox hab’wngq、caeuq seveicujyi faplwd gvaehfan dox hezdiuz、caeuq Cunghvaz Minzcuz conzdungj daudwz ndei dox ciepswnj haenx. Haeujlaeg bae senhconz gij gihbwnj lijlun、gihbwnj lohsienq、gihbwnj ganghlingj caeuq “Sam Aen Daibyauj” Cung’yau Swhsiengj aen dangj, gyauyuz dazyinx gyoengqvunz laebhwnj aen gunghdoengz lijsiengj yiengh seveicujyi miz daegsaek Cungguek, laebhwnj gij sigaigvanh、yinzswnghgvanh caeuq gyacizgvanh cingqhangq. Nyinhcaen gvancez gunghminz daudwz gensez saedhengz ganghyau, daihlig fazyangz aigozcujyi cingsaenz, aeu vih yinzminz fuzvu guh haedsim、aeu cizdijcujyi guh yenzcwz、aeu lauxsaed soujsaenq guh cungdenj, gyagiengz ndawbiengz gunghdwz、cizyez daudwz caeuq gyahdingz meijdwz gyauyuz, daegbied dwg aeu gyagiengz doiq lwgnyezrauh caeuq bouxcoz guh swhsiengj daudwz gensez, dazyinx gyoengqvunz mboujdan ciuq aen gihbwnj hingzveiz cunjcwz bae guh, caiq bae gouz aeu gij swhsiengj daudwz muzbyauh engq sang dem. Gyagiengz caeuq gaijndei swhsiengj cwngci gunghcoz, dauqcawq cungj guh aen hozdung youz vunzlai bae cauhlaeb cingsaenz vwnzmingz.

  (4) Haenqrengz fazcanj gyauyuz caeuq gohyoz saehnieb. Gyauyuz dwg aen giek fazcanj gohyoz gisuz caeuq beizyangj vunzcaiz, youq ndaw yendaiva gensez miz gij cozyungh bae gonq daz roen caeuq yingjyangj daengxbuenz de, itdingh aeu baij youq giz canloz diegvih sien aeu fazcanj. Cienzmienh gvancez aen gyauyuz fuengcim dangj raeuz, genhciz gyauyuz vih seveicujyi yendaiva gensez fuzvu, vih yinzminz fuzvu, caeuq swnghcanj lauzdung dem ndawbiengz sizcen dox giethab, ganq ok gyoengqvunz ndaej ciepban hwnqguh seveicujyi dwz ci dij meij cienzmienh fazcanj haenx. Genhciz gyauyuz cauhmoq, gyalaeg gyauyuz gaijgwz, gaijndei gyauyuz gezgou, hableix boiqbaij gyauyuz swhyenz, daezsang gyauyuz cizlieng caeuq guenjleix suijbingz, dawz suciz gyauyuz cienzmienh doicaenh baenaj, ganq ok soq ik boux guhhong suciz sang、soq cienfanh cienmonz vunzcaiz caeuq daihbuek vunzcaiz gig coengmingz gig ak cauhmoq haenx. Gyagiengz hwnqguh lauxsae duivuj, daezsang gij swhsiengj daudwz caeuq yezvu suijbingz gyoengq lauxsae. Laebdaeb bujgiz gouj bi yivu gyauyuz. Gyagiengz cizyez gyauyuz caeuq beizyin, fazcanj laebdaeb gyauyuz, cauhlaeb aen gyauyuz dijhi son hag baenz seiqvunz. Lailai bued cienz banh gyauyuz caeuq haenqrengz fuzrex lajmbanj gyauyuz, gujli gij ligliengh ndawbiengz banh hagdangz. Laeb caezcienz gij cwngcwz caeuq cidu guekgya ok cienz bang doengh boux hagseng gungzhoj. Ceiqdingh gohyoz caeuq gisuz gij fazcanj gveihva gyaeraez haenx. Gyagiengz hwnqguh gohyoz gihcuj sezsih. Bujgiz gohyoz cihsiz, daihlig fazyangz gohyoz cingsaenz. Genhciz sevei gohyoz caeuq swyenz gohyoz doengzyiengh yawjnaek, youq ndaw ginghci caeuq ndawbiengz fazcanj, cungfaen fazveih gij cozyungh youqgaenj cezyoz sevei gohyoz. Youq daengx biengx cauhbaenz gij heiqfaenh ndei gingqcungh gohyoz、gujli cauhmoq、fanjdui maezsaenq caeuq gohyoz gyaj.

  (5) Cizgiz fazcanj vwnzva saehnieb caeuq vwnzva canjnieb. Fazcanj gak loih vwnzva saehnieb caeuq vwnzva canjnieb, cungj aeu gvancez aen yauhgiuz fazcanj senhcin vwnzva, seizseiz cungj dawz gij yauyiz ndawbiengz cuengq youq daih’it vih. Guekgya cihciz caeuq baujcang gij vwnzva saehnieb doiq daengx biengz cungj mizik haenx, caemhcaiq gujli doengh gij hangznieb neix gag ak fazcanj. Genhciz caeuq laeb caezcienz gij cwngcwz cosih cihciz doengh cungj vwnzva saehnieb doiq daengx biengz cungj mizik haenx fazcanj, bangfuz gij sinhvwnz meizdij caeuq sevei gohyoz yenzgiu gihgou youqgaenj dangj caeuq guekgya, bangfuz gij vwnzva hanghmoeg hungnaek caeuq gij yisuz yendonz ndaej daejyienh minzcuz daegsaek caeuq guekgya suijbingz haenx, bangfuz gij gunghcoz baujhoh vwnzva yizcanj youqgaenj caeuq gij yisuz gig ndei ndawbiengz, bangfuz doengh dieg gwzming laujgih、dieg siujsoq minzcuz、dieg biengyae dieg gungzhoj caeuq cunghbu sihbu digih fazcanj vwnzva. Gyagiengz hwnqguh vwnzva gihcuj sezsih, fazcanj gak loih ginzcung vwnzva. Cizgiz doicaenh gaijgwz caeuq fazcanj veiswngh dijyuz saehnieb, gaihcanj aen yindung hawj daengxcungq yinzminz cangqndang, daezsang gij gengangh suijbingz daengxcungq yinzminz. Roengzrengz banh ndei 2008 nienz Auyinvei. Youq laj diuzgen hawciengz ginghci, fazcanj vwnzva canjnieb dwg diuz roenloh youqgaenj ndaej gauj hoengh seveicujyi vwnzva、muenxcuk yinzminz ginzcung cingsaenz vwnzva sihgiuz. Laeb caezcienz vwnzva canjnieb cwngcwz, cihciz vwnzva canjnieb fazcanj, demgiengz gij daengxbuenz saedlig caeuq gingcwngh naengzlig aen vwnzva canjnieb guek raeuz.

  (6) Laebdaeb gyalaeg vwnzva dijci gaijgwz. Gaengawq gij daegdiemj caeuq gvilwd seveicujyi cingsaenz vwnzmingz gensez, bae hab’wngq gij yauhgiuz seveicujyi hawciengz ginghci fazcanj, doicaenh vwnzva dijci gaijgwz. Cagaenj ceiqdingh aen cungjdij fangh’an vwnzva dijci gaijgwz. Dawz gyalaeg gaijgwz ndij diuzcwngj gezgou caeuq coicaenh fazcanj giethab hwnjdaeuj, leixswnh gij gvanhaeh cwngfuj caeuq vwnzva giyez swyez danhvei, gyagiengz vwnzva fazci gensez, gyagiengz hungzgvanh guenjleix, gyalaeg vwnzva giyez swyez danhvei guh baihndaw gaijgwz, cugbouh laebhwnj gij vwnzva guenjleix dijci caeuq yinhingz gihci doiq diuhdoengh gij cizgizsing gyoengq vwnzva gunghcozcej mizleih, ndaej doidoengh vwnzva cauhmoq, lai ok doxgaiq ndei、lai ok vunzcaiz haenx. Ciuq aen fuengcim fwngz ndeu ca hoenghvuengh、fwngz ndeu ca guenjleix, laeb caezcienz vwnzva hawciengz dijhi, laeb caezcienz vwnzva hawciengz guenjleix gihci, vih hoenghvuengh seveicujyi vwnzva cauxbaenz gij ndawbiengz vanzging ndei. Cunghvaz vwnzmingz gvangqlangh fungfouq、goek laeg nga sang, vih vunzloih vwnzmingz cinbu ok rengz hungloet gvaq. Youq mwh dangdaih Cungguek yinzminz daih haenqrengz guh, bietdingh yaek ndaej cauxbaenz aen gauhcauz moq seveicujyi vwnzva gensez, cauh’ok gij senhcin vwnzva engqgya ronghsagsag.

  7、Gozfangz Caeuq Bingdoih Gensez

  Laebhwnj aen gozfangz gaenjmaenh, dwg aen canloz yinvu yendaiva gensez guek raeuz, baengh de cij bauj ndaej henhoh guekgya ancienz doengjit caeuq cienzmienh hwnqguh aen biengz siujgangh. Genhciz aen fuengcim gozfangz gensez caeuq ginghci gensez hezdiuz fazcanj, youq gwnz giek ginghci fazcanj bae doicaenh gozfangz caeuq bingdoih yendaiva.

  Genhciz aeu Mauz Cwzdungh bingsaeh swhsiengj、Dwng Siujbingz seizgeiz moq bingdoih gensez swhsiengj daeuj dazyinx, cienzmienh gvancez “Sam Aen Daibyauj” Cung’yau Swhsiengj, ciuq aen cungj yauhgiuz cwngci habgek、bingsaeh maenh’ak、cozfungh gig ndei、gijliz yiemzmingz、baujcang daeklig, gaenjgaenj hopheux hoenx ndaej hingz、mbouj bienqcaet song aen lizsijsing godiz neix, giendingh mbouj bienq bae byaij diuz roen cingbing miz daegsaek Cungguek, gyagiengz bingdoih gwzmingva yendaiva cwnggveihva gensez.

  Seizseiz cungj dawz swhsiengj cwngci gensez baij youq bingdoih gak hangh gensez vih daih’it, ciengzlwenx baujmaenh gij singcaet、bonjsaek caeuq cozfungh yinzminz bingdoih. Dangj doiq bingdoih cezdui lingjdauj, dwg aen bingdoih raeuz diuz lingzhoenz caeuq minghmeg ciengzlwenx mbouj bienq de, aeu genhciz gij gaenbonj yenzcwz caeuq cidu dangj lingjdauj yinzminz bingdoih, mbouj ndaej doenghngauz saek di.

  Gvancez aen bingsaeh canloz fuengcim cizgiz fuengzhen, gya ak gij naengzlig youq laj diuzgen gauh gisuz bae fuengzhen hoenxciengq. Hab’wngq gij byaijyiengq seiqgyaiq bingsaeh bengwz, saedhengz aen canloz doenggvaq gohgi sawj bingdoih bienq ak, gyagiengz cizlieng gensez. Dawz gyauyuz yinlen baij youq canloz diegvih, haeujlaeg gaihcanj gohgi lienh bing, gyagiengz hwnqguh bingdoih yenyau, gungganq ok daihbuek bingsaeh vunzcaiz suciz sang yienghmoq haenx. Cauhmoq caeuq fazcanj bingsaeh lijlun. Roengzrengz guhbaenz gihgaiva caeuq sinsizva gensez song cungz lizsij yinvu neix, sawj gij bingdoih yendaiva guek raeuz ndaej yathamj fazcanj baenaj.

  Damqra gij daegdiemj caeuq gvilwd youq laj lizsij diuzgen moq guenj bing, doicaenh gozfangz caeuq bingdoih gensez gak hangh gaijgwz. Guh ndei bingdoih benhcwngz caeuq gezgou, diuzcwngj caeuq laeb caezcienz cwngcwz cidu. Genhciz coengzyiemz guenj bing, laeb caezcienz bingsaeh fazgveih dijhi, daezsang gij suijbingz ciuq fap guenj bing. Genhciz gaenxgiemh hwnqguh bingdoih, laebhwnj caeuq laeb caezcienz aen lenzginz baujcang dijci baenzneix: Luz haij gungh sam cungj bing neix doxgap itheij、bingyungh caeuq minzyungh dox giem、mwh bingzseiz caeuq mwh hoenxciengq dox giethab. Gyalaeg gozfangz gohgi gunghyez dijci gaijgwz, genhciz gyaux bing youq luengq beksingq, laebhwnj laebcaez gingcwngh、bingzgyaq、gamduk caeuq gizli gihci, gyaak gij naengzlig ndaej gag cauhmoq, gyavaiq fazcanj gozfangz gohgi caeuq vujgi canghbei. Laeb caezcienz gozfangz dung’yenz dijci, gyagiengz minzbingh caeuq yibeiyiz budui gensez, fazcanj gij canloz cansuz youq laj diuzgen gauh gisuz hoenx yinzminz cancwngh. Vujcangh gingjcaz budui aeu gyagiengz cienzmienh hwnqguh, ciengzlwenx guh bouxbing cungcig, henhoh dangj caeuq yinzminz.

  Gak gaep dangj cujciz caeuq yinzminz cwngfuj、guengjdaih yinzminz ginzcung aeu gvansim、cihciz gozfangz caeuq bingdoih gensez. Bingdoih aeu cizgiz cihciz caeuq camgya guekgya gensez. Gyagiengz gozfangz gyauyuz, demgiengz gij gozfangz gvanhnen daengxcungq yinzminz. Yungjhu yinzminz bingdoih, daihndei gij vunz ndawranz bouxbing, bingdoih yungjhu cwngfuj ndiepgyaez yinzminz, gyamaenh bingdoih caeuq cwngfuj、bingdoih caeuq yinzminz doxgiet.

  
[1] [2] [3] [4] [5] [6] [7] [8] [9] [10]
 
Dozsiengq