Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CIENZMIEMH HWNQGUH AEN BIENGZ SIUJGANGH, CAUH’OK AEN GIZMEN MOQ YIENGH SAEHNIEB SEVEICUJYI MIZ DAEGSAEK CUNGGUEK 7

——Gij Baugau Youq Gwnz Aen Daihhoih Cungguek Gungcanjdangj Daih Cibroek Baez Daengx Guek Daibyauj Davei
(2002 nienz 11 nyied 8 hauh)

Gyangh Cwzminz
  
【Cihsaw Hung’iq : hung rauh iq】  Dajyaenq
      
  5、Cwngci Gensez Caeuq Cwngci Dijci Gaijgwz

  Fazcanj seveicujyi minzcuj cwngci, hwnqguh seveicujyi cwngci vwnzmingz, dwg aen muzbyauh youqgaenj cienzmienh hwnqguh aen biengz siujgangh. Itdingh aeu youq laj cenzdiz genhciz seiq hangh gihbwnj yenzcwz, laebdaeb cizgiz onjdangq bae doicaenh cwngci dijci gaijgwz, gyadaih seveicujyi minzcuj, laeb caezcienz seveicujyi fazci, hwnqguh seveicujyi fazci guekgya, gyamaenh caeuq fazcanj aen cwngci gizmen minzcuj doxgiet、sengdoengh hozboz、andingh huzswnh haenx.

  Aen dangj raeuz liglaiz cungj dawz saedyienh caeuq fazcanj yinzminz minzcuj dangguh gij cwzyin swhgeij. Gaijgwz hailangh doxdaeuj, raeuz giendingh mbouj bienq bae doicaenh cwngci dijci gaijgwz, mizrengz bae coicaenh le seveicujyi minzcuj cwngci gensez. Fazcanj seveicujyi minzcuj cwngci, ceiq gaenbonj dwg aeu dawz genhciz aen dangj lingjdauj、yinzminz danggya guhcawj caeuq eifap ceihleix guekgya ndeindei doengjit hwnjdaeuj. Aen dangj lingjdauj ndaej coengz goekgaen bae baujcwng yinzminz danggya guhcawj caeuq eifap ceihleix guekgya, yinzminz danggya guhcawj dwg gij bwnjciz iugouz seveicujyi minzcuj cwngci, eifap ceihleix guekgya dwg aen gihbwnj fanghloz dangj daeuj lingjdauj yinzminz bae guenjleix guekgya haenx. Cungguek Gungcanjdangj dwg aen lingjdauj haedsim yiengh seveicujyi saehnieb miz daegsaek Cungguek. Gungcanjdangj gaemgienz, couh dwg lingjdauj caeuq cihciz yinzminz danggya guhcawj, ceiq gvangqlangh bae dungyenz caeuq cujciz yinzminz ginzcung eifap guenjleix gij hongsaeh guekgya dem ndawbiengz, guenjleix ginghci caeuq vwnzva saehnieb, henhoh caeuq saedyienh gij gaenbonj leih’ik gyoengq yinzminz. Yenfaz caeuq faplwd daejyienh ok gij cujcangh aen dangj caeuq gij sim’eiq yinzminz dox doengjit. Itdingh aeu yiemzgek ciuq fap banhsaeh, mboujlwnh aen cujciz lawz caeuq bouxvunz lawz, cungj mbouj ndaej miz gij daeggienz ak gvaq yenfaz caeuq faplwd.

  Cwngci dijci gaijgwz dwg seveicujyi cwngci cidu gij gag gaijndei caeuq fazcanj de. Doicaenh cwngci dijci gaijgwz aeu ndei hawj dangj caeuq guekgya lai miz rengzhoengh, ndei ndaej fazveih gij daegdiemj caeuq youhsi seveicujyi cidu, cungfaen diuhdoengh gij cizgizsing cangcausing gyoengq yinzminz, henhoh guekgya doengjit、minzcuz doxgiet caeuq ndawbiengz onjdingh, coicaenh ginghci fazcanj caeuq ndawbiengz cienzmienh cinbu. Aeu genhciz coengz gozcingz guek raeuz hwnjdin, cungjgez gij sizcen ginghyen swhgeij, doengzseiz hag aeu gij cingzgoj mizik vunzloih cwngci vwnzmingz, nyengh mbouj ciuqbuen yiengh cwngci cidu Sihfangh guekgya. Aeu daegbied roengzrengz gyagiengz cidu gensez, sawj seveicujyi minzcuj cwngci ndaej saedyienh ciduva、gveihfanva caeuq cwngzsiva.

  (1) Genhciz caeuq laeb caezcienz seveicujyi minzcuj cidu. Laeb caezcienz minzcuj cidu, fungfouq minzcuj hingzsik, lai hawj gunghminz miz bouhloh bae caeuqfaenh cwngci, baujcwng yinzminz ndaej eifap saedhengz minzcuj senjgij、minzcuj gezcwz、minzcuj guenjleix caeuq minzcuj gamduk, yiengjmiz gienzleih caeuq swyouz gvangqlangh, gingqcungh caeuq baujcang yinzgenz. Genhciz caeuq laeb caezcienz yinzminz daibyauj daihhoih cidu, baujcwng yinzminz daibyauj daihhoih caeuq aen cangzveijvei de ciuq fap bae hengz ciznwngz, baujcwng laebfap caeuq gezcwz ndaej engq ndei daejyienh gij sim’eiq yinzminz. Gaijndei yinzda cangzveijvei gapbaenz yinzyenz gezgou. Genhciz caeuq laeb caezcienz aen cidu lai dangj doxgap caeuq cwngci hezsangh youz gungcanjdangj lingjdauj haenx. Genhciz aen fuengcim “ciengzgeiz caemhyouq、dox guh gamduk、simsaej dox rox、yungz nyaenq caezcaemh”, gyagiengz caeuq minzcuj dangjbai doxgap gunghsaeh, engq ndei bae fazveih gij daegdiemj caeuq youhsi seveicujyi cwngdangj cidu guek raeuz. Baujcwng yinzminz cwnghez fazveih gij cozyungh cwngci hezsangh、minzcuj gamduk caeuq canhcwng yicwng de. Gyamaenh caeuq fazcanj aen gyaez guek doengjit cansen ceiq gvangqlangh haenx. Cienzmienh gvancez gij minzcuz cwngcwz aen dangj, genhciz caeuq laeb caezcienz minzcuz gihyiz swci cidu, gyamaenh caeuq fazcanj aen seveicujyi minzcuz gvanhaeh bingzdwngj doxgiet doxbang haenx, coicaenh gak minzcuz doengzcaez hwng’vuengh cinbu. Cienzmienh gvancez gij cunghgyau sinyangj swyouz cwngcwz aen dangj, eifap guenjleix hongsaeh cunghgyau, cizgiz dazyinx cunghgyau caeuq aen biengz seveicujyi dox hab’wngq, genhciz aen yenzcwz gag guhcawj gagbanh. Nyinhcaen gvancez gij gyauzvu cwngcwz aen dangj.

  Gyadaih gihcwngz minzcuj, dwg gij gihcujsing gunghcoz fazcanj seveicujyi minzcuj. Laeb caezcienz gihcwngz swci cujciz caeuq minzcuj guenjleix cidu, guh ndei goenghai banhsaeh cidu, baujcwng yinzminz ginzcung ndaej eifap cigsoh hengzsawj minzcuj gienzleih, guenjleix gihcwngz gunghgung swvu caeuq goeng’ik saehnieb, doiq ganbu saedhengz minzcuj gamduk. Gauj ndei vunzmbanj gag guenj, laeb caezcienz gij vunzmbanj gag guenj gihci gig miz rengzhoengh youz ndaw mbanj dangj cujciz lingjdauj haenx. Laeb caezcienz hawsingz gihminz gag guenj, hwnqguh cungj segih moq guenjleix ndaej ndei、vwnzmingz huzciz haenx. Genhciz caeuq laeb caezcienz gij giyez swyez minzcuj guenjleix cidu lumjbaenz cizgungh daibyauj daihhoih dem gizyawz hingzsik haenx, baujcang gij habfap gienzik gyoengq cizgungh.

  (2) Gyagiengz seveicujyi fazci gensez. Genhciz miz fap ndaej ei、miz fap bietdingh aeu ei、hengzfap bietdingh aeu yiemz、famhfap bietdingh aeu fad. Hab’wngq gij hingzsi moq seveicujyi hawciengz ginghci fazcanj、ndawbiengz cienzmienh cinbu caeuq gyahaeuj Simou Cujciz, gyagiengz gij gunghcoz laebfap, daezsang laebfap cizlieng, daengz 2010 nienz cauxbaenz aen seveicujyi faplwd dijhi miz daegsaek Cungguek ndeu. Genhciz youq baihnaj faplwd bouxboux bingzdaengj. Gyagiengz gamduk gij hozdung hengzfap, doicaenh eifap hingzcwng, henhoh swhfaz goengcingq, daezsang hengzfap suijbingz, saedbauj faplwd ndaej yiemzgek saedhengz. Henhoh fazci doengjit caeuq viyiemz, daezfuengz caeuq haekfug gij baujhucujyi deihfueng dem bumwnz. Haigvangq caeuq gveihfan faplwd fuzvu, cizgiz gaihcanj faplwd bangcoh. Gyagiengz fazci senhconz gyauyuz, daezsang daengxcungq yinzminz faplwd suciz, daegbied aeu demgiengz gij fazci gvanhnen caeuq eifap banhsaeh naengzlig gyoengq vunz guenj goengsaeh haenx. Dangjyenz caeuq ganbu daegbied dwg lingjdauj ganbu, aeu baenz boux mozfan ciuqsouj yenfaz dem faplwd.

  (3) Gaijgwz caeuq guh caezcienz gij lingjdauj fuengsik caeuq gaemgienz fuengsik aen dangj. Neix doiq doicaenh seveicujyi minzcuj cwngci gensez, miz gij cozyungh yingjyangj daengxbuenz de. Aen dangj lingjdauj, cujyau dwg cwngci、swhsiengj caeuq cujciz lingjdauj, doenggvaq ceiqdingh dacwng fanghcinh, daezok laebfap genyi, doigawj ganbu youqgaenj, guh swhsiengj senhconz, fazveih gij cozyungh dangj cujciz caeuq dangjyenz, genhciz eifap gaemgienz, sawj aen dangj ndaej doiq guekgya caeuq ndawbiengz saedhengz lingjdauj. Dangjveij youq doengzgaep gak cungj cujciz ndawde fazveih lingjdauj haedsim cozyungh, comz cinglig ca ndei daihsaeh, cihciz gak fueng doglaeb fucwz、yamqdin caezcingj bae gaihcanj gunghcoz. Caenh’itbouh gaijgwz caeuq laeb caezcienz gij gunghcoz gihgou caeuq gunghcoz gihci aen dangj. Ciuq aen yenzcwz dangj aeu gaemguenj daengxbuenz、hezdiuz gak fueng haenx, gveihfan gij gvanhaeh dangjveij caeuq yinzda、cwngfuj、cwnghez dem yinzminz donzdij, cihciz yinzda eifap hengz gij ciznwngz guekgya gienzlig gihgvanh, ginggvaq fapdingh cwngzsi, sawj gij cujcangh aen dangj bienqbaenz guekgya eiqceiq, sawj gij vunz dangj cujciz doigawj de ndaej baenz boux lingjdauj yinzyenz ndaw guekgya cwnggenz gihgvanh, caemhcaiq doiq gyoengqde guh gamduk; cihciz cwngfuj hengz gij ciznwngz fapdingh, ciuq fap gaemgienz; cihciz cwnghez hopheux comzgiet dem minzcuj song aen cawjdaez hung neix bae hengz ciznwngz. Gyagiengz lingjdauj gunghvei、gungcinghdonz caeuq fulenz daengj yinzminz donzdij, cihciz gyoengqde ciuq faplwd caeuq gij canghcwngz bonjfaenh bae gaihcanj gunghcoz, sawj aen dangj ndaej doenggvaq gyoengqde engq ndei bae lienzhaeh guengjdaih yinzminz ginzcung.

  (4) Gaijgwz caeuq laeb caezcienz gezcwz gihci. Cingqdeng gezcwz dwg guhbaenz gak hangh gunghcoz aen cenzdiz youqgaenj de. Aeu laeb caezcienz aen gezcwz gihci gyalaeg liujgaij gij cingzgvang beksingq、cungfaen fanjyingj gij sim’eiq beksingq、dauqcawq comz aeu gij dungxcaiz beksingq、cietsaed insik gij goengrengz beksingq, doicaenh gezcwz gohyozva minzcujva. Gak gaep gezcwz gihgvanh cungj aeu laeb caezcienz gij gveihcwz caeuq cwngzsi guh gezcwz hungnaek, laebhwnj gij cidu fanjyingj ndawbiengz cingzgvang caeuq sim’eiq beksingq, laebhwnj ndawbiengz gunghsi cidu dem ndawbiengz dinghcwng cidu, goenghai banhleix doengh gij saehhangh hungnaek caeuq ginzcung leih’ik maedcaed gvanlienz haenx, laeb caezcienz conhgyah swhsinz cidu, saedhengz gezcwz luncwngci caeuq cwzyinci, mbouj hawj gezcwz guh ndaej daiq seizbienh.

  (5) Gyalaeg hingzcwng guenjleix dijci gaijgwz. Caenh’itbouh cienjbienq cwngfuj ciznwngz, gaijndei guenjleix fuengsik, doihengz denswj cwngvu, daezsang hingzcwng yauliz, gyangqdaemq hingzcwng cingzbonj, cauxbaenz aen hingzcwng guenjleix dijci hingzveiz gveihfan、yinconj hezdiuz、goengcingq ronghcingx、cinghseuq yauliz sang ndeu. Eifap gveihfan gij ciznwngz caeuq gienzhanh cunghyangh dem deihfueng, cingqdeng cawqleix doengh aen bumwnz cunghyangh cigsoh guenj caeuq deihfueng cwngfuj gij gvanhaeh de. Ciuq aen yenzcwz cinggemj、doengjit、yaunwngz caeuq gij yauhgiuz gezcwz、caephengz、gamduk dox hezdiuz haenx, laebdaeb doicaenh cwngfuj gihgou gaijgwz, gohyoz gveihfan bumwnz ciznwngz, hableix anlaeb gihgou, gaijndei yinzyenz gezgou, guh daengz doenggvaq faplwd hingzsik, dawz gihgou caeuq benhci doekdingh roengzdaeuj, caensaed gaijgez doengh aen vwndiz cwngzsw daiq lai、ciznwngz camca、vunz lai gvaq saeh、gienzlig caeuq cwzyin duetliz dem lai caengz lai mbiengj caepfap daengj. Ciuq aen yenzcwz hingzcwng swyez faenhai, gaijgwz swyez danhvei guenjleix dijci.

  (6) Doicaenh swhfaz dijci gaijgwz. Seveicujyi swhfaz cidu itdingh aeu baujcang youq daengx biengz saedyienh goengbingz caeuq cwngyi. Ciuq gij yauhgiuz goengcingq swhfaz caeuq yiemzgek caepfap, laeb caezcienz gij gihgou anlaeb、cizgenz vehfaen caeuq guenjleix cidu swhfaz gihgvanh, caenh’itbouh laeb caezcienz aen swhfaz dijci gienzlig cwzyin mingzbeg doekdingh、dox boiqhab、dox hanhhaed、gauhyau yinhhengz haenx. Coengz cidu fuengmienh baujcwng saemjbuenq gihgvanh caeuq genjcaz gihgvanh ndaej eifap doglaeb goengcingq bae hengzsawj sinjbangenz caeuq genjcazgenz. Laeb caezcienz susung cwngzsi, baujcang gij habfap gienzik gunghminz caeuq fazyinz. Caensaed gaijgez caephengz nanz vwndiz. Gaijgwz aen gunghcoz gihci caeuq vunz caiz huq guenjleix dijci ndaw swhfaz gihgvanh, cugbouh saedyienh swhfaz saemjbuenq caeuq genjcaz ndij swhfaz hingzcwng swvu dox faenliz. Gyagiengz gamduk swhfaz gunghcoz, fadceih gij nduknaeuh ndaw swhfaz lingjyiz. Gensez aen swhfaz duivuj cwngci giendingh、yezvu cingdoeng、cozfungh gig ndei、caepfap goengcingq ndeu.

  (7) Gyalaeg ganbu yinzsw cidu gaijgwz. Roengzrengz cauxbaenz aen yungh vunz gihci ndaej lai yungh gij vunz naengzganq、hawj bouxboux cungj ndaej dawz ok gij bonjsaeh de、hwnj ndaej roengz ndaej、rengzhoengh lairauh haenx, dawz gij vunzcaiz ceiq ndei de conz haeuj ndaw gak hangh saehnieb dangj caeuq guekgya bae. Aeu laebhwnj laeb caezcienz senjbaz nyaemhyungh caeuq guenjleix gamduk gihci guh cungdenj, aeu gohyozva、minzcujva caeuq ciduva guh muzbyauh, gaijgwz caeuq laeb caezcienz ganbu yinzsw cidu, laeb caezcienz gunghvuyenz cidu. Youq ganbu senjbaz nyaemhyungh fuengmienh, hawj dangjyenz caeuq ginzcung lai miz gienz rox cingzgvang、miz gienz bae caeuqfaenh、miz gienz bae genjleh caeuq miz gienz bae gamduk. Saedhengz dangj cwng lingjdauj ganbu cizvu yingizci、swzcizci caeuq yungh vunz loek cwzyin cuihgiuci. Laeb caezcienz aen cidu ganbu cizvu caeuq gaepbied dox giethab haenx, laebhwnj ganbu gizli caeuq baujcang gihci. Damqra caeuq laeb caezcienz aen ganbu yinzsw faenloih guenjleix cidu dangj cwng gihgvanh、swyez danhvei dem giyez. Gaijgwz caeuq laeb caezcienz ganbu suengcungz guenjleix dijci. Dwkbyoengq gij gvanhnen caeuq guhfap yawjnaj baizban genj vunz yungh vunz, coicaenh vunzcaiz hableix riuzdoengh, cizgiz cauh’ok aen vanzging ndei, hawj gij vunzcaiz ndei gak fuengmienh ndaej okdaeuj sadsad bae.

  (8) Gyagiengz doiq gienzlig guh hanhhaed caeuq gamduk. Laebhwnj gij gienzlig yinhhengz gihci gezgou hableix、boiqbaij gohyoz、cwngzsi yiemzmaed、hanhhaed mizyauq haenx, coengz gezcwz caeuq caephengz daengj vanzcez gyagiengz doiq gienzlig guh gamduk, baujcwng gij gienzlig yinzminz hawj haenx ndaej caencingq yungh daeuj maeuz leih’ik hawj yinzminz. Cungdenj gyagiengz doiq lingjdauj ganbu daegbied dwg cujyau lingjdauj ganbu guh gamduk, gyagiengz doiq vunz caiz huq guenjleix caeuq sawjyungh guh gamduk. Giengzvaq lingjdauj banhswj neibu gamduk, laeb caezcienz aen cwngzsi gietdingh saehhangh hungnaek caeuq ganbu youqgaenj nyaemhmienx haenx. Gaijgwz caeuq laeb caezcienz gij gijliz genjcaz dijci aen dangj, laebhwnj caeuq laeb caezcienz cunzyawj cidu. Fazveih gij cozyungh swhfaz gihgvanh caeuq hingzcwng gamcaz、saemjgeiq daengj ciznwngz bumwnz. Saedhengz aen cidu hawj lingjdauj ganbu yungh lai cungj hingzsik baugau bonjfaenh baenzlawz hengz cizcwz caeuq gauj lenzcwng, laeb caezcienz saehhangh hungnaek baugau cidu、cazcam cidu caeuq minzcuj bingzlwnh cidu. Nyinhcaen doihengz cwngvu goenghai cidu. Gyagiengz cujciz gamduk caeuq minzcuj gamduk, fazveih gij cozyungh yizlun gamduk.

  (9) Henhoh ndawbiengz onjdingh. Yaek guhbaenz aen yinvu naek gaijgwz caeuq fazcanj, itdingh aeu baujciz aen ndawbiengz vanzging ciengzgeiz huzciz onjdingh. Gak gaep dangjveij caeuq cwngfuj aeu gig yiedcingz bae gaijgez gij saedsaeh vwndiz yinzminz ginzcung youq ndaw gunghcoz caeuq swnghhoz bungzdaengz haenx. Aeu haeujlaeg diucaz yenzgiu, faenbied mbouj doengz cingzgvang, gyagiengz swhsiengj cwngci gunghcoz, cingqdeng bae yungh ginghci、hingzcwng caeuq faplwd daengj soujduenh, cawqleix ndei yinzminz neibu mauzdun daegbied dwg gij mauzdun nangq daengz gij leih’ik nemndang ginzcung, baujciz aen gizmen andingh doxgiet. Gyagiengz cwngfaz gunghcoz, ciuqfap yiemzhaenq dwkceih gak cungj famhcoih hozdung, fuengzre caeuq ceihfad gij famhcoih hozdung sezgyau cujciz, genhgez baetcawz gij yienhsiengq ndawbiengz coujcaq yakrwix haenx, caensaed baujcang yinzminz ginzcung sengmingh caizcanj ancienz. Genhciz dwkceih fuengzre giethab、yawhfuengz guhcawj, lozsiz ndawbiengz cianh gyoebhab ceihleix gak hangh cosih, gaijndei ndawbiengz guenjleix, baujciz ndawbiengz cizsi onjndei. Gyagiengz guekgya ancienz gunghcoz, daezfuengz gij digdoiq seiqlig ndaw guek rog guek iemqhaeuj、boekfan caeuq faenmbek guek raeuz.

  Seveicujyi minzcuj cwngci mingh gig niu, ndeicawq gig daih. Cungguek Gungcanjdangj caeuq Cungguek yinzminz gig maengx diuz roen cwngci fazcanj bonjfaenh gag genj, yaek giendingh mbouj bienq bae dawz yiengh seveicujyi cwngci gensez miz daegsaek Cungguek haenx nyoengx baenaj.

  
[1] [2] [3] [4] [5] [6] [7] [8] [9] [10]
 
Dozsiengq