Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CIENZMIEMH HWNQGUH AEN BIENGZ SIUJGANGH, CAUH’OK AEN GIZMEN MOQ YIENGH SAEHNIEB SEVEICUJYI MIZ DAEGSAEK CUNGGUEK 5

——Gij Baugau Youq Gwnz Aen Daihhoih Cungguek Gungcanjdangj Daih Cibroek Baez Daengx Guek Daibyauj Davei
(2002 nienz 11 nyied 8 hauh)

Gyangh Cwzminz
  
【Cihsaw Hung’iq : hung rauh iq】  Dajyaenq
      
  4、Ginghci Gensez Caeuq Ginghci Dijci Gaijgwz

  Cienzmienh hwnqguh aen biengz siujgangh, gij ceiq gaenbonj de dwg genhciz aeu ginghci gensez guh cungsim, mboujduenh gaijfang caeuq fazcanj gij swnghcanjliz ndawbiengz. Gaengawq gij seiqdaeuz moq seiqgyaiq ginghci gohgi fazcanj caeuq gij iugouz ginghci fazcanj gaihdon moq guek raeuz, aen sigij neix haidaeuz 20 bi de, gij cujyau yinvu ginghci gensez caeuq gaijgwz dwg, laeb caezcienz yiengh hawciengz ginghci dijci seveicujyi, doidoengh ginghci gezgou guh canlozsing diuzcwngj, gihbwnj saedyienh gunghyezva, daihdaih doicaenh sinsizva, gyavaiq hwnqguh yendaiva, baujciz gozminz ginghci lienzdaemh riengjvaiq gengangh fazcanj, mboujduenh daezsang yinzminz swnghhoz suijbingz. 10 bi gaxgonq de aeu cienzmienh guhbaenz “10 •5”giva caeuq aen fwndou muzbyauh 2010 nienz, sawj ginghci cungjliengh、cunghab gueklig caeuq yinzminz swnghhoz suijbingz caiq hwnj mbaek sang ndeu, vih 10 bi gaenlaeng de ndaej engq daih fazcanj dwk roengz giekdaej ndei.

  (1) Byaij diuz roen gunghyezva yienghmoq, daihlig saedhengz gohgyau hwng guek canloz caeuq ndaej lienzdaemh fazcanj canloz. Saedyienh gunghyezva ciuqyiengh lij dwg guek raeuz yendaiva cincwngz ndawde aen lizsijsing yinvu gannanz hungloet ndeu. Guek raeuz yaek gyavaiq saedyienh gunghyezva caeuq yendaiva, couh bietdingh aeu gauj sinsizva. Genhciz aeu sinsizva daiqdoengh gunghyezva, aeu gunghyezva coicaenh sinsizva, byaij ok diuz roen gunghyezva yienghmoq baenzneix: Gohgi hamzliengh sang、ginghci yauyiz ndei、swhyenz siusied noix、vanzging uqlah siuj、yinzliz swhyenz youhsi ndaej cungfaen fazveih.

  Doicaenh canjnieb gezgou swnggaep bienq ndei, cauxbaenz aen canjnieb gwzgiz aeu gauhsinh gisuz canjnieb guh dazroen byaij gonq、gihcuj canjnieb caeuq cicauyez guh dingjdaemx、fuzvuyez cienzmienh fazcanj. Sien bae fazcanj sinsiz canjnieb, youq ginghci caeuq ndawbiengz lingjyiz lailai wngqyungh sinsiz gisuz. Cizgiz fazcanj gij gauhsinh gisuz canjnieb doiq ginghci demmaj miz duzbosing daiqdoengh cozyungh hungnaek haenx. Yungh gauhsinh gisuz caeuq senhcin habyungh gisuz gaijcau conzdungj canjnieb, haenqrengz saenqhwng canghbei cicauyez. Laebdaeb gyagiengz giekdaej sezsih gensez. Gyavaiq fazcanj yienhdaih fuzvuyez, daezsang daihsam canjnieb youq ndaw gozminz ginghci gij bijcung de. Dawz fazcanj gauhsinh gisuz canjnieb caeuq conzdungj canjnieb、swhginh gisuz mizcizhingz canjnieb caeuq lauzdung mizcizhingz canjnieb、hihnij ginghci caeuq sizdij ginghci gij gvanhaeh de cawqceq ndei bae.

  Byaij diuz roen gunghyezva yienghmoq, itdingh aeu fazveih gij cozyungh youqgaenj gohyoz gisuz cungj daih’it swnghcanjliz neix, yawjnaek baenghgauq gohgi cinbu caeuq daezsang gij suciz bouxguhhong, gaijndei ginghci demmaj cizlieng caeuq yauyiz. Gyagiengz gihcuj yenzgiu caeuq gauhgisuz yenzgiu, doicaenh gvanhgen gisuz cauhmoq caeuq hidungj cizcwngz, sawj gisuz ndaej yathamj fazcanj. Gujli gohgi cauhmoq, youq gvanhgen lingjyiz caeuq doengh gij gohgi fazcanj ceiq vaiq de gaemdawz haedsim gisuz caeuq gag miz buek cihsiz canjgenz ndeu. Gyalaeg gohgi caeuq gyauyuz dijci gaijgwz, gyagiengz gohgi gyauyuz caeuq ginghci dox giethab, laeb caezcienz gohgi fuzvu dijhi, gyavaiq gohgi cingzgoj cienjbaenz yienhsaed swnghcanjliz. Doicaenh guekgya cauhmoq dijhi gensez. Fazveih gij cozyungh fung’yiemj douzswh, cauxbaenz aen swhbwnj yincoz caeuq vunzcaiz gyonjcomz gihci ndaej coicaenh gohgi cauhmoq dem cauhnieb haenx. Laeb caezcienz cihsiz canjgenz baujhoh cidu. Itdingh aeu dawz ndaej lienzdaemh fazcanj cuengq youq giz dieg cibfaen yienhda de bae, genhciz hangh gihbwnj gozcwz giva senglwg、baujhoh vanzging caeuq baujhoh swhyenz. Dawz aen suijbingz senglwg noix onjdingh roengzdaeuj. Hableix haifat caeuq mbaetyungh gak cungj swyenz swhyenz. Gyagaenj gaijgez gij vwndiz mbangj dieg raemx mbouj gaeuq, hwnqguh aen gunghcwngz diuh raemx baihnamz bae baihbaek. Hengzguh haijyangz haifat, guh ndei diegguek swhyenz cunghab cingjceih. Laebhwnj cenzminz vanzbauj yisiz, guh ndei swnghdai baujhoh caeuq gensez.

  (2) Cienzmienh gaujhoengh lajmbanj ginghci, gyavaiq cwngzcinva cincwngz. Daengxbuenz anbaiz hawsingz lajmbanj ginghci ndawbiengz fazcanj, hwnqguh yienhdaih nungzyez, fazcanj lajmbanj ginghci, demgya nungzminz souhaeuj, dwg aen yinvu hungnaek cienzmienh hwnqguh aen biengz siujgangh. Gyagiengz nungzyez giekdaej diegvih, doicaenh nungzyez caeuq lajmbanj ginghci gezgou diuzcwngj, baujhoh caeuq daezsang haeuxgwn cunghab swnghcanj naengzlig, laeb caezcienz nungzcanjbinj cizlieng ancienz dijhi, demgiengz gij hawciengz gingcwngh naengzlig nungzyez. Cizgiz doicaenh nungzyez canjyezva ginghyingz, sawj nungzminz engq miz cujciz dwk haeuj hawciengz, daezsang nungzyez cunghab yauyiz. Fazcanj nungzcanjbinj gyagoeng hangznieb, hwng gij ginghci yienhfaenh. Haigvangq gij hawciengz lajmbanj, gaujhoengh nungzcanjbinj riuzdoeng, laeb caezcienz nungzcanjbinj hawciengz dijhi.

  Gij lauzdungliz yawz lajmbanj cienj haeuj hawsingz caeuq gij canjnieb mbouj dwg nungzyez bae, dwg aen seiqdaeuz gunghyezva caeuq yendaiva bietdingh yaek daiq daeuj. Aeu cugbouh daezsang cwngzcinva suijbingz, genhciz singz hung singz rauh singz iq caeuq haw iq hezdiuz fazcanj, byaij diuz roen cwngzcinva miz daegsaek Cungguek haenx. Fazcanj hawsingz iq aeu gij yienhsingz seizneix miz caeuq doengh aen cin gaenq laeb youh miz diuzgen de guh giekdaej, gohyoz gveihva, hableix baijbouh, caeuq fazcanj yanghcin giyez dem lajmbanj fuzvuyez giethab hwnjdaeuj. Siucawz doengh gij dijci caeuq cwngcwz gazngaih mbouj ik cwngzcinva fazcanj haenx bae, dazyinx gij lauzdungliz lajmbanj, hawj de riuzdoengh ndaej hableix mizbanj mizloh.

  Genhciz gij gihbwnj cwngcwz lajmbanj aen dangj, ciengzgeiz onjdingh caemhcaiq mboujduenh guh caezcienz sueng caengz ginghyingz dijci aeu gyahdingz cwngzbauh ginghyingz guh giekdaej、dungj faen giethab haenx. Doengh giz dieg miz diuzgen de, ndaej ciuq gij yenzcwz eifap、gagnyienh、miz daigya bae cienjnyiengh diegdeih cwngzbauh ginghyingzgenz, cugbouh fazcanj gveihmoz gingh yingz. Aeueiq gij hawciengz cawjdaej diegvih bouxdajndaem, doidoengh lajmbanj ginghyingz dijci cauhmoq. Demgiengz cizdij ginghci saedlig. Laebhwnj laeb caezcienz nungzyez seveiva fuzvu dijhi. Gyadaih douzhaeuj caeuq cihciz nungzyez, gyavaiq nungzyez gohgi cinbu caeuq lajmbanj gihcuj sezsih gensez. Gaijndei lajmbanj ginhyungz fuzvu. Laebdaeb doicaenh lajmbanj suifei gaijgwz, gemjmbaeu diuzrap nungzminz, baujhoh gij leih’ik nungzminz.

  (3) Cizgiz doicaenh fueng dieg baihsae daih haifat, coicaenh gihyiz ginghci hezdiuz fazcanj. Hengzguh fueng dieg baihsae daih haifat canloz, gvanhaeh daengx guek fazcanj buenzgeiz hung neix, gvanhaeh minzcuz doxgiet caeuq henzguek onjdingh. Aeu daj daej ndei bae, maenhsaed doi baenaj, cungdenj ca ndei gihcuj sezsih caeuq swnghdai vanzging gensez, ceng’aeu youq cib bi ndawde ndaej miz cincanj gig daih. Cizgiz fazcanj gij canjnieb miz youhsi miz daegsaek, doicaenh giz dieg cungdenj haifat. Fazcanj gohgi gyauyuz, gungganq caeuq yungh ndei gak loih vunzcaiz. Guekgya aeu youq douzswh hanghmoeg、sougvaeh cwngcwz caeuq caizcwng senjnod ceihawj daengj fuengmienh lai cihciz fueng dieg baihsae, cugbouh laebhwnj aen fueng dieg baihsae haifat swhginh laizloh ciengzgeiz onjdingh haenx. Roengzrengz gaijndei douzswh vanzging, dazyinx vaiswh caeuq gij swhbwnj ndaw guek camgya fueng dieg baihsae haifat. Fueng dieg baihsae aeu caenh’itbouh gaijfang swhsiengj, demgiengz gij naengzlig gag fazcanj, youq ndaw gaijgwz hailangh byaij ok diuz roen moq ndaej gyavaiq fazcanj ndeu.

  Fueng dieg cungqgyang aeu lai roengzrengz guh gezgou diuzcwngj, doicaenh nungzyez canjyezva, gaijcauh conzdungj canjnieb, gungganq doenghgij canjnieb moq ndaej sawj ginghci demmaj haenx, gyavaiq yamqdin gunghyezva caeuq cwngzcinva. Fueng dieg baihdoeng aeu gyavaiq canjnieb gezgou swnggaep, fazcanj yienhdaih nungzyez, fazcanj gauhsinh gisuz canjnieb caeuq gij gyagoeng cauhguh hangznieb fu’gyahciz sang haenx, caenh’itbouh fazcanj vaiyanghingz ginghci. Gujli ginghci dwzgih caeuq Sanghaij Bujdungh Sinhgih youq cidu cauhmoq caeuq gyadaih hailangh daengj fuengmienh byaij bae gaxgonq. Cihciz gij dieg doenghbaek daengj lauj gunghyez gihdi gyavaiq diuzcwngj caeuq gaijcauh, cihciz doengh aen hawsingz caeuq giz dieg cujyau haivat swhyenz haenx fazcanj gij canjnieb swnj laeng, cihciz gwzming laujgih caeuq siujsoq minzcuz digih gyavaiq fazcanj, guekgya aeu lailai bangfuz giz dieg cujyau swnghcanj haeuxgwn haenx. Gyagiengz fueng dieg baihdoeng、fueng dieg cungqgyang、fueng dieg baihsae ginghci gyaulouz caeuq doxgap, saedyienh youhsi doxbouj caeuq doengzcaez fazcanj, cauxbaenz lai aen ginghcigih caeuq ginghcidai gak miz daegsaek.

  (4) Genhciz caeuq laeb caezcienz gihbwnj ginghci cidu, gyalaeg gaijgwz guekmiz swhcanj guenjleix dijci. Gaengawq gij iugouz gaijfang caeuq fazcanj swnghcanjliz, genhciz caeuq laeb caezcienz aen gihbwnj ginghci cidu aeu gunghyoujci guh cawjdaej、lai cungj sojyoujci ginghci doengzcaez fazcanj haenx. Daih’it, itdingh aeu giendingh mbouj bienq bae gyamaenh caeuq fazcanj gunghyoujci ginghci. Fazcanj gaujhoengh guekmiz ginghci, guekmiz ginghci gaemguenj diuz minghmeg gozminz ginghci, doiq fazveih gij youhyezsing seveicujyi cidu, demgiengz gij ginghci saedlig、gozfangz saedlig caeuq minzcuz ningzciliz guek raeuz, miz gij cozyungh ceiq youqgaenj de. Cizdij ginghci dwg aen gapbaenz bouhfaenh youqgaenj gunghyoujci ginghci, doiq saedyienh doengzcaez fouqmiz miz cozyungh youqgaenj. Daihngeih, itdingh aeu giendingh mbouj bienq bae gujli、cihciz caeuq dazyinx feihgunghyoujci ginghci fazcanj. Doengh cungj feihgunghyoujci ginghci lumjbaenz godij、swhyingz daengj gak cungj hingzsik, dwg aen gapbaenz bouhfaenh youqgaenj seveicujyi hawciengz ginghci, doiq cungfaen diuhdoengh ndawbiengz gak fuengmienh cizgizsing、gyavaiq swnghcanjliz fazcanj miz cozyungh youqgaenj. Daihsam, genhciz aeu gunghyoujci guh cawjdaej, coicaenh feihgunghyoujci ginghci fazcanj, doengjit youq ndaw cincwngz seveicujyi yendaiva gensez, mbouj ndaej dawz song yiengh neix doiqdingj hwnjdaeuj. Gak cungj sojyoujci ginghci cungj ndaej youq ndaw hawciengz gingcwngh fazveih gij youhsi bonjfaenh, doxcoi doxcaenh, doengzcaez fazcanj.

  Laebdaeb diuzcwngj gij baijbouh caeuq gezgou guekmiz ginghci, gaijgwz guekmiz swhcanj guenjleix dijci, dwg hangh yinvu hungnaek gyalaeg ginghci dijci gaijgwz. Youq genhciz guekgya sojmiz yiengh cenzdiz neix lajde, cungfaen fazveih cunghyangh caeuq deihfueng song aen cizgizsing. Guekgya aeu ceiqdingh fazliz fazgveih, laebhwnj yiengh guekmiz swhcanj guenjleix dijci neix: Cunghyangh cwngfuj caeuq deihfueng cwngfuj faenbied daibyauj guekgya hengzguh gij cizcwz bouxokcienz, yiengjmiz gij gienzik bouxsojmiz, gienzleih、yivu caeuq cwzyin dox doengjit, guenj swhcanj caeuq guenj vunz、guenj saeh dox giethab. Doengh gij daihhingz guekmiz giyez、gihcuj sezsih caeuq cung’yau swyenz swhyenz gvanhaeh daengz gozminz ginghci minghmeg dem guekgya ancienz haenx, youz cunghyangh cwngfuj daibyauj guekgya hengzguh gij cizcwz bouxokcienz. Gizyawz guekmiz swhcanj youz deihfueng cwngfuj daibyauj guekgya hengzguh gij cizcwz bouxokcienz. Cunghyangh cwngfuj caeuq swngj、si (di) song gaep deihfueng cwngfuj laebhwnj guekmiz swhcanj guenjleix gihgou. Laebdaeb damqra gij dijci caeuq fuengsik ndaej mizyauq bae ginghyingz guekmiz swhcanj haenx. Gak gaep cwngfuj aeu yiemzgek caephengz guekmiz swhcanj guenjleix faplwd fapgvi, genhciz cwngfuj caeuq giyez faenhai, saedhengz sojyoujgenz caeuq ginghyingzgenz faenliz, sawj giyez gag guhcawj ginghyingz、gag bau coem canh, sawj guekmiz swhcanj ndaej bauj goek raen canh.

  Guekmiz giyez couh dangq ndaek saeu cengjdingx gij gozminz ginghci guek raeuz. Aeu gyalaeg guekmiz giyez gaijgwz, caenh’itbouh damqra lai cungj mizyauq saedyienh hingzsik gunghyoujci daegbied dwg gozyoujci, roengzrengz doicaenh giyez guh dijci、gisuz caeuq guenjleix cauhmoq. Cawz gig siujsoq giyez itdingh aeu youz guekgya dandog okcienz ginghyingz caixvaih, cizgiz doihengz gujfwnci, fazcanj gij sojyoujci ginghci doxgyaux haenx. Saedhengz douzswh cawjdaej lai cungj lai yiengh, gij giyez youqgaenj de youz guekgya gungguj. Ciuq gij iugouz yienhdaih giyez cidu, guekmiz dacunghhingz giyez laebdaeb saedhengz gij gunghswhci gaijgwz gveihfan haenx, laeb caezcienz fazyinz ceihleix gezgou. Doicaenh lungjdon hangznieb gaijgwz, cizgiz yinxhaeuj gingcwngh gihci. Doenggvaq hawciengz caeuq cwngcwz dazyinx, fazcanj doengh gij gunghswh hung giyez cizdonz hung miz gozci gingcwngh naengzlig haenx. Caenh’itbouh cuengqhai gaujhoengh guekmiz giyez rauh giyez iq. Gyalaeg cizdij giyez gaijgwz, laebdaeb cihciz caeuq bangcoh lai cungj hingzsik cizdij ginghci fazcanj.

  Cungfaen fazveih godij、swhyingz daengj feihgunghyoujci ginghci youq coicaenh ginghci demmaj、gya’gvangq couhnieb caeuq gaujhoengh hawciengz daengj fuengmienh gij cozyungh youqgaenj de. Cuengqsoeng gij diuzgen cinjhawj minzgenh swhbwnj ndaw guek haeuj hawciengz bae, youq douzswh yungzswh、suisouh、diegdeih sawjyungh caeuq doiq rog mouyiz daengj fuengmienh caijyungh cosih, saedyienh goengbingz gingcwngh. Ciuqfap gyagiengz gamduk caeuq guenjleix, coicaenh feihgunghyoujci ginghci cangqheiq fazcanj. Laeb caezcienz gij faplwd cidu baujhoh cienzcaiz seivunz.

  
[1] [2] [3] [4] [5] [6] [7] [8] [9] [10]
 
Dozsiengq