Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CIENZMIEMH HWNQGUH AEN BIENGZ SIUJGANGH, CAUH’OK AEN GIZMEN MOQ YIENGH SAEHNIEB SEVEICUJYI MIZ DAEGSAEK CUNGGUEK 3

——Gij Baugau Youq Gwnz Aen Daihhoih Cungguek Gungcanjdangj Daih Cibroek Baez Daengx Guek Daibyauj Davei
(2002 nienz 11 nyied 8 hauh)

Gyangh Cwzminz
  
【Cihsaw Hung’iq : hung rauh iq】  Dajyaenq
      
  2、Cienzmienh Gvancez “Sam Aen Daibyauj” Cung’yau Swhsiengj

  Haicauh daegsaek Cungguek seveicujyi saehnieb gizmen moq, itdingh aeu yaengx sang mbaw geizhauh hungmbwk Dwng Siujbingz Lijlun, genhciz gvancez “Sam Aen Daibyauj” Cung’yau Swhsiengj. “Sam Aen Daibyauj” Cung’yau Swhsiengj ciepswnj caeuq fazcanj le Majgwzswh-Lezningzcujyi、Mauz Cwzdungh Swhsiengj caeuq Dwng Siujbingz Lijlun, fanjyingj le dangdaih seiqgyaiq caeuq Cungguek fazcanj bienqvaq doiq dangj caeuq guekgya gunghcoz daezok gij yauhgiuz moq de, dwg gij lijlun vujgi giengzdaih ndaej gyagiengz caeuq gaijndei aen dangj gensez、doicaenh guek raeuz seveicujyi gag gaijndei caeuq fazcanj, dwg gij coengmingz dungxcaiz daengx dangj cizdij giet baenz, dwg gij cijdauj swhsiengj dangj raeuz itdingh aeu ciengzgeiz genhciz haenx. Seizseiz cungj guhdaengz “Sam Aen Daibyauj”, dwg gij goek laebdangj、gij giek gaemgienz、gij mboq ligliengh aen dangj raeuz.

  “Sam Aen Daibyauj” Cung’yau Swhsiengj, dwg youq gohyoz duenqdingh gij lizsij fueng’vih aen dangj le cij daez okdaeuj. Dangj raeuz ginglig le gwzming、gensez caeuq gaijgwz, gaenq daj aen dangj lingjdauj yinzminz vih duetaeu daengx guek cwnggenz cix haenqrengz guh, bienqbaenz aen dangj lingjdauj yinzminz gaemguenj daengx guek cwnggenz caemhcaiq ciengzgeiz gaemgienz; gaenq daj aen dangj youq laj diuzgen souh baihrog fungsaek caeuq saedhengz giva ginghci bae lingjdauj guekgya gensez, bienqbaenz aen dangj youq laj diuzgen doiq rog hailangh caeuq fazcanj seveicujyi hawciengz ginghci bae lingjdauj guekgya gensez. Raeuz itdingh aeu daj gij lizsij、yienhsaed caeuq daengzcog Cungguek dem seiqgyaiq bae yawj saehcingz, cinjdingh gaemdawz seizdaih daegdiemj caeuq gij yinvu aen dangj, gohyoz ceiqdingh caemhcaiq cingqdeng caephengz gij lusen fanghcinh cwngcwz aen dangj, nyinhcaen yenzgiu caeuq gaijgez gij vwndiz doidoengh Cungguek ndawbiengz cinbu caeuq gyagiengz aen dangj gensez, guhdaengz gawq mbouj gatduenh lizsij、youh mbouj gaujloeng fueng’yiengq, gawq mbouj doek youq baihlaeng seizdaih、youh mbouj roemxgvaq gaihdon, sawj gij saehnieb raeuz mboujduenh daj swngli byaij coh swngli.

  Gvancez “Sam Aen Daibyauj” Cung’yau Swhsiengj, gvanhgen dwg genhciz caeuq seizdaih caez baenaj, haedsim dwg genhciz gij senhcinsing aen dangj, bonjciz dwg genhciz vih beksingq gaemgienz. Gyoengq dungzci daengx dangj aeu ndaetndaet gaemdawz aen gihbwnj yauhgiuz neix, gagrox caeuq giendingh bae gvancez “Sam Aen Daibyauj” Cung’yau Swhsiengj.

  (1) Gvancez “Sam Aen Daibyauj” Cung’yau Swhsiengj, itdingh aeu sawj daengx dangj seizseiz cungj baujciz gij cingsaenz cangdai caeuq seizdaih caez baenaj, mboujduenh haicauh Majgwzswhcujyi lijlun fazcanj ginggai moq. Genhciz diuz swhsiengj lusen aen dangj raeuz, gaijfang swhsiengj、saedsaeh gouz dwg、caeuq seizdaih caez baenaj, dwg dangj raeuz genhciz senhcinsing caeuq demgiengz cangcauliz aen gietdingh yinhsu haenx. Caeuq seizdaih caez baenaj, couh dwg aen dangj cienzbouh lijlun caeuq gunghcoz aeu daejyienh sizdaising, gaemdawz gveihlizsing, lai miz cangcausing. Ndaej mbouj ndaej ciengzlwenx guhdaengz diemj neix, gietdingh daengz cenzduz caeuq minghyinh aen dangj dem guekgya.

  Cauhmoq dwg minzcuz cinbu aen lingzhoenz de, dwg moix aen guekgya hwng’vuengh fatdad gij doenghlig yungh mbouj caenh de, hix dwg gij goekrengz ndaej bauj aen cwngdangj ndeu ciengzlwenx hoenghhwd. Seiqgyaiq cingqcaih bienqvaq, guek raeuz gaijgwz hailangh caeuq yendaiva gensez cingqcaih yamq baenaj, yinzminz ginzcung gij sizcen hungmbwk de cingqcaih fazcanj baenaj, gijneix gaenjgip yauhgiuz dangj raeuz aeu yungh gij damjceiq Majgwzswhcujyi lijlun, cungjgez sizcen ginghyen moq, hag’aeu dangdaih vunzloih vwnzmingz cingzgoj miz ik, youq lijlun fuengmienh mboujduenh haicauh diendeih moq, guh’ok gaigoz moq. Cijmiz yienghneix, gij swhsiengj lijlun aen dangj cijndaej dazyinx caeuq gujvuj daengx dangj caeuq daengx guek yinzminz, dawz daegsaek Cungguek seveicujyi saehnieb mboujduenh nyoengx baenaj. Gij lijlun cauhmoq aeu sizcen guh giek de ndaej dazyinx ndawbiengz fazcanj caeuq bengwz. Doenggvaq lijlun cauhmoq bae doidoengh cidu cauhmoq、gohgi cauhmoq、vwnzva cauhmoq caeuq gizyawz gak fuengmienh cauhmoq, mboujduenh youq ndaw sizcen damqra baenaj, ciengzlwenx mbouj gag muenxcuk, ciengzlwenx mbouj soengse laihgik, neix dwg aen banhfap raeuz aeu ciengzgeiz genhciz yungh de bae guenj dangj guenj guek haenx.

  Cauhmoq couh aeu mboujduenh gaijfang swhsiengj、saedsaeh gouz dwg、caeuq seizdaih caez baenaj. Sizcen mbouj miz haenzhamq, cauhmoq hix mbouj miz haenzhamq. Raeuz aeu ak gvaq gij vunz ciuhgonq, gij vunz ciuhlaeng hix itdingh yaek ak gvaq raeuz. Neix dwg ndawbiengz baenaj gij gvilwd bietdingh de. Raeuz itdingh aeu hab’wngq sizcen fazcanj, yienghyiengh cungj aeu sizcen daeuj genjniemh, gagrox dawz swhsiengj yinsiz daj ndaw doengh gij gvanhnen、guhfap caeuq dijci mbouj hab seizdaih haenx gaijfang okdaeuj, daj ndaw doiq Majgwzswhcujyi gij lijgaij loengloek benmen caeuq gyaudiuzsiz de gaijfang okdaeuj, daj ndaw gazgyok cujgvanhcujyi caeuq hingzwzsangyoz gaijfang okdaeuj. Aeu genhciz Majgwzswhcujyi gihbwnj yenzlij, youh aeu sijok lijlun biencieng moq, aeu fazyangz gwzming conzdungj, youh aeu cauh’ok gingniemh singjsien. Lai rox youq mwh gaijfang swhsiengj bae doengjit swhsiengj, yungh gij Majgwzswhcujyi cingqcaih fazcanj haenx bae cijdauj sizcen moq.

  (2) Gvancez “Sam Aen Daibyauj” Cung’yau Swhsiengj, itdingh aeu dawz fazcanj dangguh aen dangj gaemgienz hwngguek hangh yinvu ceiq youqgaenj de, mboujduenh haicauh yendaiva gensez gizmen moq. Majgwzswhcujyi cizcwngdangj itdingh aeu cibfaen yawjnaek gaijfang caeuq fazcanj swnghcanjliz. Mbouj miz fazcanj, yaek genhciz aen dangj senhcinsing、fazveih seveicujyi cidu youhyezsing caeuq saedyienh beksingq fouqmiz guekgya giengzdaih, couh cungj dwg gangjndwi. Gij senhcinsing aen dangj, gawq gidij youh miz laizloh, itdingh aeu cuengq daengz doidoengh dangdaih Cungguek senhcin swnghcanjliz caeuq senhcin vwnzva fazcanj ndawde bae gaujcaz, cuengq daengz ndaw henhoh caeuq saedyienh ceiq guengjdaih yinzminz gaenbonj leih’ik gij haenqrengz guh de bae gaujcaz, gyonj daeuj gangj couh dwg aeu yawj aen dangj youq doidoengh lizsij baenaj miz gijmaz cozyungh.

  Cungguek dwg aen guekgya hung、cingqcaih fazcanj、ginghci vwnzva doeklaeng ndeu. Aen dangj raeuz youq aen guekgya baenzneix lingjdauj yinzminz guh yendaiva gensez, ndaej mbouj ndaej gaijgez ndei fazcanj vwndiz, cigsoh gvanhaeh daengz simvunz conz roxnaeuz sanq、saehnieb hwng roxnaeuz baih. Dangj aeu raphwnj gij lizsij cwzyin doidoengh Cungguek ndawbiengz cinbu, itdingh aeu seizseiz cungj gaemgaenj fazcanj aen daihsaeh ceiq youqgaenj neix, dawz genhciz aen dangj senhcinsing caeuq fazveih seveicujyi cidu youhyezsing, lozsiz daengz gwnz fazcanj senhcin swnghcanjliz、fazcanj senhcin vwnzva、saedyienh gij gaenbonj leih’ik ceiq guengjdaih yinzminz bae, doidoengh ndawbiengz cienzmienh cinbu, coicaenh bouxvunz cienzmienh fazcanj. Gaemgaenj diemj neix, couh ndaej daj goekgaen bae dawz deng gij simmuengh yinzminz, dawz deng gij bwnjciz seveicujyi yendaiva gensez, couh ndaej sawj “Sam Aen Daibyauj” Cung’yau Swhsiengj mboujduenh lozsiz, sawj gij cizcwng diegvih aen dangj mboujduenh gyamaenh, sawj gij iugouz guekgya mboujduenh giengzdaih, beksingq mboujduenh fouqmiz.

  Fazcanj itdingh aeu genhciz dawz ginghci gensez guh cungsim, goqdoh gij yienhsaed Cungguek, swnh’wngq seizdaih cauzliuz, mboujduenh haicauh gij roen moq coicaenh senhcin swnghcanjliz caeuq senhcin vwnzva fazcanj. Fazcanj itdingh aeu genhciz caeuq gyalaeg gaijgwz. Sojmiz gij swhsiengj gvanhnen lanzdangj fazcanj haenx cungj aeu genhgez buqcawz, sojmiz gij guhfap caeuq gvidingh hanhhaed fazcanj haenx cungj aeu genhgez gaijbienq, sojmiz gij dijci mbouj baenz yingjyangj fazcanj haenx cungj aeu genhgez siucawz. Fazcanj itdingh aeu saenq yinzminz baengh yinzminz, yinzminz dwg gij doenghlig doidoengh lizsij baenaj. Aeu cizcungh gij coengmingz caeuq ligliengh daengx guek yinzminz, dinghsim comzrengz gauj gensez, itsim iteiq gouz fazcanj.

  (3) Gvancez “Sam Aen Daibyauj” Cung’yau Swhsiengj, itdingh aeu ceiq gvangqlangh ceiq cungfaen bae diuhdoengh sojmiz cizgiz yinhsu, mboujduenh vih Cunghvaz Minzcuz ndaej daih dauqhwng bae gya rengz moq. Gij leih’ik ceiq daih dingzlai vunz caeuq gij cizgizsing cangcausing daengx biengz daengx minzcuz, doiq gij saehnieb dangj caeuq guekgya fazcanj, itcig cungj dwg aen yinhsu miz gietdingh cozyungh he. Youq guek raeuz ndawbiengz bengwz laegdaeuq、aen saehnieb dangj caeuq guekgya gig vaiq fazcanj ndawde, dojdangq cawqleix gak fuengmienh leih’ik gvanhaeh, dawz sojmiz cizgiz yinhsu cungfaen diuhdoengh caeuq gietcomz hwnjdaeuj, youqgaenj dangqmaz.

  Gaenriengz gaijgwz hailangh mboujduenh haeujlaeg caeuq ginghci vwnzva mboujduenh fazcanj, guek raeuz gunghyinz gaihgiz duivuj mboujduenh hungcoek, suciz mboujduenh daezsang. Aen gunghyinz gaihgiz baudaengz cihsiz fwnswj youq ndawde, guengjdaih nungzminz, seizseiz cungj dwg gij gaenbonj ligliengh doidoengh guek raeuz senhcin swnghcanjliz fazcanj caeuq ndawbiengz cienzmienh cinbu. Gij cangyez yinzyenz caeuq gisuz yinzyenz minzyingz gohgi giyez、gij gvanjlij gisuz yinzyenz youq ndaw vaiswh giyez dangsaeh、godijhu、swhyingz giyezcuj、gij cungzyez yinzyenz ndaw cunghgai cujciz、gij swyouz cizyez yinzyenz daengj gij gaihcwngz ndawbiengz youq ndawbiengz bengwz ndawde okyienh haenx, cungj dwg gij vunz bae hwnqguh aen seveicujyi saehnieb miz daegsaek Cungguek. Doiq gyoengqvunz ndawbiengz gak gaihcwngz vih guekcoj fouqgiengz gungyen ligliengh haenx cungj aeu comzgiet, doiq gij cauhnieb cingsaenz gyoengqde cungj aeu gujli, doiq gij habfap gienzik gyoengqde cungj aeu baujhoh, doiq doengh boux ceiq ndei ndaw gyoengqde cungj aeu byaujcangh, roengzrengz sawj daengxcungq yinzminz bouxboux cungj ndaej gag caenh goengrengz、gag ndaej leih’ik, youh ndaej huzciz caemhyouq.

  Itdingh aeu gingqcungh lauzdung、gingqcungh cihsiz、gingqcungh vunzcaiz、gingqcungh dajcauh, gijneix aeu dangguh dangj caeuq guekgya hangh fuengcim hungnaek ndeu, nyinhcaen gvancez roengz daengx biengz bae. Aeu gingqcungh caeuq baujhoh sojmiz gij lauzdung doiq yinzminz caeuq ndawbiengz mizik haenx. Mboujlwnh dwg dijliz lauzdung roxnaeuz naujliz lauzdung, mboujlwnh dwg genjdanh lauzdung roxnaeuz fuzcaz lauzdung, sojmiz gij lauzdung vih guek raeuz seveicujyi yendaiva gensez guh gungyen haenx, cungj dwg miznaj, cungj wnggai souh swngznyinh caeuq gingqcungh. Ndawguek rogguek gak loih douzswhcej youq ndaw gensez guek raeuz gij cauhnieb hozdung de cungj wnggai ndaej gujli. Sojmiz habfap lauzdung souhaeuj caeuq habfap feihlauzdung souhaeuj, cungj wnggai baujhoh. Mboujndaej genjdanh yungh miz mbouj miz caizcanj、miz geijlai caizcanj dangguh aen byauhcunj duenhdingh gyoengqvunz youq cwngci fuengmienh senhcin roxnaeuz doeklaeng, cujyau cix dwg wnggai yawj gij swhsiengj cwngci canggvang caeuq yienhsaed biujyienh gyoengqde, yawj gij caizcanj gyoengqde dwg baenzlawz ndaej daeuj caeuq baenzlawz cei yungh, yawj gyoengqde yungh gij lauzdung bonjfaenh doiq aen seveicujyi saehnieb miz daegsaek Cungguek guh ok gungyen lainoix. Aeu cauxbaenz gij swhsiengj gvanhnen dem cauhnieb gihci caeuq seveicujyi cogaep gaihdon gihbwnj ginghci cidu dox hab’wngq haenx, ganqbaenz gij ndawbiengz heiqfaenh gujli gyoengqvunz gauj saehnieb、cihciz gyoengqvunz guh baenz saehnieb, cuengqfwngz hawj sojmiz lauzdung、cihsiz、gisuz、guenjleix caeuq swhbwnj gij rengzhoengh de doxciengj biuconh okdaeuj, hawj sojmiz gij goekmboq cauh caizfouq ndawbiengz haenx cungj conh okdaeuj caez bae, cauhfuk hawj yinzminz.

  Youq mwh hwnqguh yiengh seveicujyi miz daegsaek Cungguek, gij gaenbonj leih’ik daengx guek yinzminz cungj dwg doxdoengz, gak cungj gidij leih’ik gvanhaeh caeuq neibu mauzdun gojyij youq gwnz aen giek neix bae diuzcez. Ceiqdingh caeuq gvancez gij fuengcim cwngcwz aen dangj, muzdiz dwg aeu daibyauj gij gaenbonj leih’ik ceiq guengjdaih yinzminz, cingqdeng fanjyingj caeuq giemgoq mboujdoengz fuengmienh ginzcung leih’ik, sawj daengxcungq yinzminz yiengq mbiengj doengzcaez fouqmiz onjbouh baenaj. Raeuz aeu baujhoh gij fazcanj hozliz fatdad digih、youhsi canjnieb caeuq gij vunz gaenxguh dem habfap ginghyingz cix sien fouq hwnjdaeuj haenx, gujli gyoengqde cizgiz cauh’ok caizfouq ndawbiengz, engq aeu cibfaen yawjnaek caeuq gvansim mbouj fatdad digih caeuq gij hangznieb dem ginzcung haemq gunnanz haenx, daegbied aeu sawj gij gihbwnj swnghhoz gyoengq gunnanz ginzcung ndaejdaengz baujcang, caemhcaiq cizgiz bangcoh gyoengqde gaijgez couhnieb vwndiz caeuq gaijndei swnghhoz diuzgen, sawj gyoengqde cietsaed roxnyinh aen biengz seveicujyi caen dwg raeujrubrub.

  (4) Gvancez “Sam Aen Daibyauj” Cung’yau Swhsiengj, itdingh aeu yungh gaijgwz cingsaenz bae doicaenh aen dangj gensez, mboujduenh gya rengzmoq haeuj aen dangj bae. Cibfaen yawjnaek caeuq mboujduenh gyagiengz bonjndang gensez, dwg aen daih fapbauj ndaej sawj dangj raeuz daj iq daengz hung、daj nyieg daengz ak, youq ndaw dieggungz yathwnj、youq ndaw dwkbaih gunnanz mboujduenh cingzsug haenx. Cungjgez dangj raeuz 80 lai bi daeuj lizsij ginghyen, diuz ceiq gaenbonj de, couh dwg aen dangj gensez itdingh aeu ciuq gij cwngci lusen aen dangj bae guh, hopheux gij cungsim yinvu aen dangj bae gauj, yiengq aen cungj muzbyauh aen dangj gensez bae gyagiengz, mboujduenh daezsang gij cangcauliz、ningzciliz caeuq candouliz aen dangj.

  Genhciz yungh seizdaih fazcanj yauhgiuz daeuj saemjyawj swhgeij, aeu gaijgwz cingsaenz bae gyagiengz caeuq gaijndei swhgeij, neix couh daj goekgaen bae baujcwng le dangj raeuz ciengzlwenx baujciz Majgwzswhcujyi bonjsaek、ciengzlwenx mbouj duetliz ginzcung caeuq ciengzlwenx miz rengzmoq hoenghhwd. Itdingh aeu gawq rox bae cungjgez gij ginghyen guh ndaej baenz, youh rox bae geiqmaenh gij gyauyin deng loengloek saetbaih; gawq rox doenggvaq daezok caeuq gvancez gij lijlun lusen cingqdeng, daz ginzcung baenaj, youh rox daj ndaw sizcen cangcau caeuq fazcanj yauhgiuz gyoengq ginzcung aeu ndaej gij doenghlig baenaj; gawq rox yinsiz caeuq gaijcau gwzgvanh seiqgyaiq, youh rox cujciz dazyinx ganbu caeuq dangjyenz, youq ndaw sizcen gyagiengz gaijcau cujgvanh seiqgyaiq. Aeu ciuq gij yauhgiuz yienghneix, guh daengz genhciz Majgwzswhcujyi gihbwnj yenzlij caeuq doicaenh lijlun cauhmoq dox doengjit, genhciz gij conzdungj aen dangj caeuq hungzyangz seizdaih cingsaenz dox doengjit, genhciz demgiengz gij gaihgiz gihcuj aen dangj caeuq gyadaih gij ginzcung gihcuj aen dangj dox doengjit, sawj aen dangj youq swhsiengj fuengmienh cwngci fuengmienh cujciz fuengmienh cungj ndaej cienzmienh gyamaenh, ndigah couh bienqbaenz aen lingjdauj haedsim giengiengz ndeu, seizseiz cungj ndwn youq dangqnaj seizdaih, daz daengx guek yinzminz doxgiet baenaj.

  Gyonj daeuj gangj, “Sam Aen Daibyauj” Cung’yau Swhsiengj hix dwg mboujduenh fazcanj、mboujduenh baenaj. Daengx dangj itdingh aeu youq swhsiengj fuengmienh mboujduenh caiq gaijfang dem, youq lijlun fuengmienh mboujduenh caiq fazcanj dem, youq sizcen fuengmienh mboujduenh caiq dajcauh dem, dawz “Sam Aen Daibyauj” Cung’yau Swhsiengj gvancez daengz seveicujyi yendaiva gensez gak aen lingjyiz bae, daejyienh youq aen dangj gensez gak aen fuengmienh bae, sawj dangj raeuz itcig cungj caeuq seizdaih fazcanj yamqdin doxdoengz, caeuq yinzminz ginzcung minghmeg caezcaemh.

  
[1] [2] [3] [4] [5] [6] [7] [8] [9] [10]
 
Dozsiengq