Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CIENZMIEMH HWNQGUH AEN BIENGZ SIUJGANGH, CAUH’OK AEN GIZMEN MOQ YIENGH SAEHNIEB SEVEICUJYI MIZ DAEGSAEK CUNGGUEK 1

——Gij Baugau Youq Gwnz Aen Daihhoih Cungguek Gungcanjdangj Daih Cibroek Baez Daengx Guek Daibyauj Davei
(2002 nienz 11 nyied 8 hauh)

Gyangh Cwzminz 
  
【Cihsaw Hung’iq : hung rauh iq】  Dajyaenq
      
Gak boux dungzci:

  Seizneix, gou daibyauj daih cibhaj gaiq cunghyangh veijyenzvei yiengq daihhoih guh baugau.

  Aen daihhoih Cungguek Gungcanjdangj Daih Cibroek Baez Daengx Guek Daibyauj Davei, dwg aen dangj raeuz youq sigij moq ciuhai baez daibyauj daihhoih daih’it, hix dwg aen dangj raeuz youq ndaw hingzsi moq hainduj guh seveicujyi yendaiva gensez daihsam bouh canloz baijbouh, hai baez daibyauj daihhoih gig youqgaenj ndeu.

  Aen cawjdaez baez daihhoih neix dwg: Yaengx sang mbaw geizhauh hungmbwk Dwng Siujbingz Lijlun, cienzmienh gvancez “Sam Aen Daibyauj” Cung’yau Swhsiengj, ciep guh gij saehnieb gaxgonq, yamqyamq cungj gaen seizdaih, gvak roenmoq baenaj, cienzmienh hwnqguh aen biengz siujgangh, gyavaiq doicaenh seveicujyi yendaiva, vih cauh’ok aen gizmen moq yiengh seveicujyi saehnieb miz daegsaek Cungguek, bae haenqrengz guh.

  Youq mwh aen biengz vunzloih hamj haeuj 21 sigij, guek raeuz caemh byaij haeuj duenh moq cienzmienh hwnqguh aen biengz siujgangh, gyavaiq doicaenh seveicujyi yendaiva bae. Gozci gizsi cingqcaih fatseng bienqvaq laegdaeuq. Gij seiqdaeuz seiqgyaiq dohgizva caeuq ginghci cenzgiuzva, yienznaeuz fat ndaej mbouj swnh, hoeng hix fazcanj; gohgi cinbu ngoenz moq gvaq ngoenz, ndwen mbouj doengz ndwen; cunghab gueklig gingcwngh ngoenz beij ngoenz haenq. Hingzsi bik vunz, mbouj bae couh dauq. Dangj raeuz itdingh aeu ndwn youq dangqnaj seizdaih cauzliuz onjdup dwk, conzcub caeuq dazyinx daengx guek gak cuz yinzminz, saedyienh doicaenh yendaiva gensez、guhbaenz guekcoj doengjit、henhoh seiqgyaiq huzbingz caeuq coicaenh doengzcaez fazcanj sam daih lizsij yinvu neix, youq gwnz roen seveicujyi miz daegsaek Cungguek, sawj Cunghvaz Minzcuz ndaej daih dauqhwng. Lizsij caeuq seizdaih, gaenq dawz diuzrap naekcaem yiemzrwd neix, gyau hawj aen dangj raeuz.

  1、Gij Gunghcoz Haj Bi Gvaqdaeuj Caeuq Gij Gihbwnj Gingniemh Cibsam Bi Neix

  Dajswh cibhaj daih doxdaeuj, gaenq rim haj bi. Haj bi neix, raeuz yaengx sang mbaw geizhauh hungmbwk Dwng Siujbingz Lijlun、mboujduenh gvakroen cauhmoq; haj bi neix, raeuz gingsouh gvaq gak cungj gannanz caeuq fung’yiemj gaujniemh、laebdaeb riengz diuz roen seveicujyi miz daegsaek Cungguek swnhleih baenaj.

  Cibhaj daih laebdingh Dwng Siujbingz Lijlun guh gij cijdauj swhsiengj aen dangj raeuz, daezok dangj youq seveicujyi cogaep gaihdon aen gihbwnj ganghlingj de, mingzbeg doekdingh gij fwndou muzbyauh caeuq yinvu hamj sigij fazcanj guek raeuz. Vih gvancez gij cingsaenz cibhaj daih, cunghyangh gonqlaeng hai gvaq caet baez cienzhoih, faenbied couh nungzyez caeuq lajmbanj gunghcoz、guekmiz giyez gaijgwz caeuq fazcanj、ceiqdingh “10 •5” giva、gyagiengz caeuq gaijndei aen dangj cozfungh gensez daengj vwndiz hungnaek, guh’ok gietdingh caeuq anbaiz. Haj bi neix daeuj, raeuz byaij gvaq duenh roen gig mbouj bingzciengz ndeu, youq gaijgwz fazcanj onjdingh、neicwng vaigyauh gozfangz、guenj dangj guenj guek guenj bing gak fuengmienh, cungj aeundaej cingzcik gig hungmbwk.

  Gozminz ginghci lienzdaemh riengjvaiq gengangh fazcanj. Saedhengz aen fuengcim gyadaih ndaw guek sihgiuz, habseiz caijyungh gij caizcwng cwngcwz cizgiz caeuq gij hobi cwngcwz onjmaenh haenx, dawz Yacouh ginhyungz veizgih caeuq seiqgyaiq ginghci fubfab doiq guek raeuz gij yingjyangj mbouj ndei de siucawz bae, baujciz le ginghci demmaj haemq vaiq. Ginghci gezgou canlozsing diuzcwngj aeundaej cingzyauq, gij giekdaej diegvih nungzyez laebdaeb ndaej gyagiengz, conzdungj canjnieb ndaej daezswng, gauhsinh gisuz canjnieb caeuq yienhdaih fuzvuyez ndaej gyavaiq fazcanj. Gensez le daih buek suijli、gyaudoeng、doengsaenq、nwngzyenz caeuq vanzbauj daengj gihcuj sezsih gunghcwngz. fueng dieg baihsae daih haifat ndaej cincanj youqgaenj. Ginghci yauyiz caenh’itbouh daezsang, caizcwng souhaeuj mboujduenh demmaj. “9 •5” giva guh ndaej baenz caez, “10 •5” giva haibuenz ndaej ndei.

  Gaijgwz hailangh ndaej cingzgoj lailai. Seveicujyi hawciengz ginghci dijci cobouh laebbaenz. Gunghyoujci ginghci caenh’itbouh gyadaih, guekmiz giyez gaijgwz onjbouh doicaenh. Godij、swhyingz daengj feihgunghyoujci ginghci fazcanj haemqvaiq. Hawciengz dijhi gensez cienzmienh mbehai, hungzgvanh diuzgung dijhi mboujduenh caezcienz, cwngfuj ciznwngz cienjbienq gij yamqdin de gyavaiq. Caizsui、gyagwz、riuzdoeng、ranzyouq caeuq cwngfuj gihgou daengj gaijgwz laebdaeb gyalaeg. Gaihfanghingz ginghci fazcanj riengjvaiq, sanghbinj caeuq fuzvu mouyiz、swhbwnj riuzdoeng gveihmoz yienh raen gyadaih. Guekgya vaivei cwkrom daih fukdoh demgya. Guek raeuz gyahaeuj Simou Cujciz, doiq rog hailangh haeuj daengz duenh moq.

  Seveicujyi minzcuj cwngci caeuq cingsaenz vwnzmingz gensez cingzyauq raen yienh. Minzcuj fazci gensez laebdaeb doicaenh, cwngci dijci gaijgwz hamjok yamq moq. Gyaezguek doengjit cansen fazcanj hungcoek, minzcuz、cunghgyau caeuq gyauzvu gunghcoz ndaej cincanj moq. Ndawbiengz cianh cunghab ceihleix ndaej cingzyauq moq. Gohgi、gyauyuz、vwnzva、veiswngh、dijyuz caeuq giva senglwg daengj saehnieb cienzmienh cinbu. Senhconz yizlun gunghcoz caeuq swhsiengj daudwz gensez mboujduenh gyagiengz, ginzcung cingsaenz vwnzva swnghhoz ngoenz beij ngoenz fungfouq.

  Gozfangz caeuq bingdoih gensez hamjok yamq moq. Yinzminz gaijfangginh gwzmingva yendaiva cwnggveihva gensez laebdaeb gyagiengz, gozfangz saedlig caeuq bingdoih fuengzhen hoenxciengq naengzlig caenh’itbouh daezsang. Bingdoih、vujgingj dem minzbingh youq hendawz caeuq hwnqguh guekcoj fuengmienh fazveih cozyungh youqgaenj.

  Yinzminz swnghhoz cungjdaej haeuj daengz siujgangh suijbingz. Hawsingz lajmbanj gihminz souhaeuj onjbouh demmaj. Hawsingz lajmbanj hawciengz mwnhoengh, sanghbinj gung’wngq cungcuk, gihminz swnghhoz cizlieng daezsang, gwn daenj youq yungh okroen cungj bienq ndei haujlai. Ndawbiengz baujcang dijhi gensez cingzyauq yienhda. “Bet caet” banggungz gunghgenh giva gihbwnj guhbaenz.

  Guekcoj doengjit daihnieb aeundaej cincanj moq. Guek raeuz cwngfuj dauqfuk doiq Aumwnz hengzsawj cawjgienz. Genhciz gvancez diuz fuengcim “aen guekgya ndeu song cungj cidu”, yiemzgek caephengz Aen Fapgiek Yanghgangj Daegbied Hingzcwnggih caeuq Aen Fapgiek Aumwnz Daegbied Hingzcwnggih, Yanghgangj caeuq Aumwnz ndawbiengz ginghci onjdingh. Haijyaz song hamq yinzyenz baedauq caeuq ginghci vwnzva gyauhliuz mboujduenh gyagiengz. Fanjdui “Daizduz” daengj gak cungj faenmbek maeuzsuenq gij doucwngh de haeujlaeg gaihcanj.

  Doiq rog gunghcoz cauh’ok gizmen moq. Gaengawq gozci hingzsi fazcanj bienqvaq, genhciz gij doiq rog fuengcim caeuq cwngcwz cingqdeng, gvangqlangh gaihcanj song mbiengj caeuq lai mbiengj vaigyauh, cizgiz camgya gozci gyauhliuz caeuq doxgap, gij gozci diegvih guek raeuz caenh’itbouh daezsang.

  Aen dangj gensez cienzmienh gyagiengz. Daengx dangj mboujduenh haeujlaeg yozsiz Dwng Siujbingz Lijlun. Raeuz daezok caemhcaiq laegdaeuq cekgangj le “Sam Aen Daibyauj” Cung’yau Swhsiengj. “Sam gangj” cizcungh gyauyuz caeuq “Sam Aen Daibyauj” yozsiz gyauyuz hozdung gig miz cingzyauq. Gij swhsiengj、cujciz、cozfungh gensez aen dangj cienzmienh doicaenh, swhsiengj cwngci gunghcoz ndaej gyagiengz. Ganbu cidu gaijgwz hamjok yamq moq. Lenzcwng gensez caeuq fanj nduknaeuh doucwngh haeujlaeg gaihcanj, ndaej miz cingzyauq yienhda.

  Sizcen cwngmingz, gak hangh gezcwz hungnaek cibhaj daih caeuq cibhaj daih doxdaeuj cunghyangh guh’ok haenx cungj deng, hab gij gaenbonj leih’ik ceiq guengjdaih yinzminz. Doengh gij cingzcik raeuz, dwg baengh daengx dangj caeuq daengx guek gak cuz yinzminz doengzcaez haenqrengz guh cij ndaej, vih baezlaeng dangj caeuq guekgya saehnieb fazcanj dwk roengz le aen giek engqgya maenhsaed.

  Itdingh aeu singjsak yawjdaengz, gij gunghcoz raeuz ndawde, lij miz mbouj noix gunnanz caeuq vwndiz. Nungzminz caeuq hawsingz bouhfaenh gihminz souhaeuj demmaj haemq menh, gij vunz saetnieb demlai, mbangj ginzcung swnghhoz lij gig gunnanz; souhaeuj faenboiq gvanhaeh caengz leixswnh; hawciengz ginghci cizsi lij aeu laebdaeb cwngjdun caeuq gveihfan; mbangj deihfueng ndawbiengz cianh canggvang mbouj ndei; mbangj di dangjyenz lingjdauj ganbu hingzsizcujyi、gvanhliuzcujyi caeuq loenghhaw guh gyaj、saisaengq sajbaizciengz hingzveiz maqhuz yenzcung, mbangj di nduknaeuh yienhsiengq lij lai; gij lingjdauj fuengsik caeuq gaemgienz fuengsik aen dangj lij caengz cienzbouh hab’wngq gij iugouz hingzsi moq yinvu moq, mbangj di dangj cujciz unqnyieg sanqsa. Raeuz itdingh aeu cibfaen yawjnaek doengh gij vwndiz neix, laebdaeb yungh cosih daeklig bae gaijgez.

  Gij cingzcik haj bi neix, dwg aeu gaijgwz hailangh daegbied dwg 1989 nienz cibsam gaiq seiq cung cienzhoih doxdaeuj gij sizcen de guh giek cij ndaej daeuj. Cibsam bi neix daeuj, gozci gizsi fubfab bienqvaq, guek raeuz gaijgwz hailangh caeuq yendaiva gensez fazcanj hoenghhwd. 20 sigij 80 nienzdaih satbyai 90 nienzdaih cogeiz, ndaw guek fatseng yenzcung cwngci funghboh, Dungh’ouh daih boekbienq、Suhlenz boedbaih, gij seveicujyi gwnz seiqgyaiq deng daemdengj youqgaenj, guek raeuz seveicujyi saehnieb fazcanj bungz gij gunnanz caeuq atlig hungloet caengz raen gvaq. Youq aen lizsij gvandaeuz hungnaek gietdingh dangj caeuq guekgya cenzduz minghyinh neix, dangj cunghyangh gaenjgaenj baenghgauq gyoengq dungzci daengx dangj caeuq daengx guek gak cuz yinzminz, ciuq hengz diuz lohsienq cib’it gaiq sam cung cienzhoih doxdaeuj mbouj bienq, dingh onj le daengxbuenz gaijgwz caeuq fazcanj, henhoh le aen seveicujyi saehnieb hungmbwk miz daegsaek Cungguek haenx. Dwng Siujbingz dungzci baihnamz gangjvah gvaqlaeng, Cibseiq Daih doekdingh aen gaijgwz muzbyauh gauj yiengh hawciengz ginghci dijci seveicujyi, gaijgwz hailangh caeuq yendaiva gensez byaij haeuj duenh moq bae.Youq seveicujyi diuzgen lajde fazcanj hawciengz ginghci, dwg aen saehnieb hungmbwk caengz miz vunz guh gvaq ndeu, dwg gij vunz Cungguek Gungcanjdangj doiq Majgwzswhcujyi fazcanj guh’ok gij lizsijsing gungyen de, yienh’ok dangj raeuz genhciz lijlun cauhmoq、gaen seizdaih caez baenaj yiengh mbeidamj hungloet neix. Daj giva ginghci dijci cienjyiengq yiengh hawciengz ginghci dijci seveicujyi, sawj gaijgwz hailangh caiq ndaej miz lizsijsing duzbo, sawj guek raeuz ginghci、cwngci caeuq vwnzva fazcanj ndaej haiok aen gizmen moqsag ndeu. Dwng Siujbingz dungzci gvaqseiq le, raeuz yaengx sang mbaw geizhauh hungmbwk Dwng Siujbingz Lijlun, gvakroen baenaj, dawz aen seveicujyi saehnieb miz daegsaek Cungguek cienzmienh doicoh 21 sigij.

  Cibsam bi daeuj, raeuz swhsiengj doengjit, muzbyauh mingzbeg cinjdingh, gunghcoz lauxlaux saedsaed, aeundaej le lizsijsing cwngzciu hungnaek. 2001 nienz, guek raeuz ndaw guek swnghcanj cungjciz daemx 95933 ik maenz, beij 1989 nienz demmaj gaenh song boix, moix bi bingzyaenz demmaj 9.3%, ginghci cungjliengh gaenq baiz youq seiqgyaiq daih 6 vih. Yinzminz swnghhoz daengxbuenz daeuj gangj gaenq daj gwn imq daenj raeuj haeuj daengz siujgangh. Gyoengqvunz cungj naeuz, cibsam bi neix, dwg aen seizgeiz guek raeuz cunghab gueklig daih fukdoh yatsang、yinzminz ndaej saedcaih ndeicawq ceiq lai ndeu, dwg aen seizgeiz guek raeuz ndawbiengz ciengzgeiz baujciz andingh doxgiet、saehguek doengswnh beksingq huzciz ndeu, dwg aen seizgeiz guek raeuz gozci yingjyangj yienh raen gyadaih, minzcuz ningzciliz demgiengz gig lai ndeu. Aen dangj raeuz caeuq gyoengq yinzminz guek raeuz sinhoj haenqrengz guh, aeundaej cingzcik hungmbwk, daengx seiqgyaiq cungj raen, bietdingh yaek daeng haeuj bouh saw lizsij ronghsag geiqsij Cunghvaz Minzcuz gig daih dauqhwng haenx bae.

  
[1] [2] [3] [4] [5] [6] [7] [8] [9] [10]
 
Dozsiengq