Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

YAENGX SANG MBAW GEIZHAUH HUNGMBWK YIENGH SEVEICUJYI MIZ DAEGSAEK CUNGGUEK, VIH DUED’AEU CIENZMIENH HWNQGUH AEN BIENGZ SIUJGANGH CAIQ NDAEJ HINGZ BAE HAENQRENGZ BUEK GUH 12

——Gij Baugau Youq Gwnz Aen Daihhoih Cungguek Gungcanjdangj Daih Cibcaet Baez Daengx Guek Daibyauj Davei
( 2007 nienz 10 nyied 15 hauh)

Huz Ginjdauh
  
【Cihsaw Hung’iq : hung rauh iq】  Dajyaenq
      
  12、Yungh Gij Cingsaenz Gaijgwz Cauhmoq, Bae Cienzmienh Doicaenh Aen Gunghcwngz Hungmbwk Moq Aen Dangj Gensez

  Aen seveicujyi saehnieb miz daegsaek Cungguek, dwg aen saehnieb gaijgwz cauhmoq. Dangj yaek ndwn youq dangqnaj aen seizdaih, daz yinzminz mboujduenh cauh’ok saehnieb fazcanj gizmen moq, couh bietdingh aeu yungh gij cingsaenz gaijgwz cauhmoq bae gyagiengz bonjndang gensez, itcig cungj baenz aen haedsim ndaej giengiengz lingjdauj aen seveicujyi saehnieb miz daegsaek Cungguek haenx.

  Dangj raeuz gaenq laeb ndaej 86 bi, youq daengx guek gaemgienz ndaej 58 bi, miz 7000 lai fanh dangjyenz, gij gyauyuz caeuq guenjleix yinvu aen dangj beij doenghbaez seizlawz cungj engq lai engq naek. Gij gaijgwz hailangh aen dangj lingjdauj haenx, gawq sawj aen dangj ndaej miz rengzhoengh hungloet, hoeng caemh sawj aen dangj roeb daengz haujlai gij goqdaez moq caeuq gaujniemh moq doenghbaez caengz miz gvaq haenx. Gij cingzgvang seiqgyaiq、gij cingzgvang guekgya、gij cingzgvang aen dangj gaenq miz fazcanj bienqvaq, couh gietdingh le aeu yungh gij cingsaenz gaijgwz cauhmoq bae gyagiengz aen dangj gensez, hix gietdingh le monz hong neix gawq cibfaenh youqgaenj youh cibfaenh gaenjbik. Bietdingh aeu dawz aen dangj gaemgienz naengzlig gensez caeuq senhcinsing gensez dangguh sienqmeh, genhciz dangj aeu guenj dangj、coengzyiemz ceihleix aen dangj, gvancez gij iugouz vih beksingq、guh saedsaeh、ndang cingq fwngz seuq, aeu giendingh lijsiengj saenqniemh guh cungdenj bae gyagiengz swhsiengj gensez, aeu gungganq ok gyoengq dangjyenz、aen ganbu duivuj suciz sang guh cungdenj bae gyagiengz cujciz gensez, aeu baujciz dangj caeuq yinzminz ginzcung gaenjmaed lienzhaeh guh cungdenj bae gyagiengz cozfungh gensez, aeu laeb caezcienz minzcuj cizcungh cidu guh cungdenj bae gyagiengz cidu gensez, aeu laeb caezcienz aen dijhi fadceih caeuq yawhfuengz nduknaeuh guh cungdenj bae gyagiengz fanjfuj canglenz gensez, sawj dangj itcig cungj baenz aen dangj gaemgienz hengz Majgwzswhcujyi、ndaej laeb dangj vih goenggya、gaemgienz vih beksingq, gouz caen guh saed、gaijgwz cauhmoq, mbouj lau ganhoj、haenqrengz buek guh、ndang cingq fwngz seuq, gig miz rengzhoengh、doxgiet huzciz haenx.

  (1) Haeujlaeg yozsiz gvancez aen lijlun dijhi guh yiengh seveicujyi miz daegsaek Cungguek, roengzrengz yungh cungj Majgwzswhcujyi miz daegsaek Cungguek haenx gij cingzgoj ceiq moq de bae vujcangh daengx dangj. Swhsiengj lijlun gensez dwg gij gaenbonj gensez aen dangj, aen dangj lijlun cauhmoq dazyinx gak fuengmienh cauhmoq. Aeu ciuq aen iugouz hwnqguh yiengh cwngdangj haengj hag gaenx hag haenx, gaenjmaed giethab gij sengdoengh sizcen gaijgwz hailangh caeuq yendaiva gensez, haeujlaeg bae hag Majgwzswh-Lezningzcujyi、Mauz Cwzdungh Swhsiengj、Dwng Siujbingz Lijlun caeuq “Sam Aen Daibyauj” Cung’yau Swhsiengj, youq daengx dangj guh aen hozdung haeujlaeg yozsiz caeuq sizcen gohyoz fazcanjgvanh, genhciz yungh gij Majgwzswhcujyi cingqcaih fazcanj haenx, bae cijdauj gaijcauh gwzgvanh seiqgyaiq caeuq cujgvanh seiqgyaiq, caenh’itbouh dawz ndei gij gvilwd gungcanjdangj gaemgienz、gij gvilwd seveicujyi gensez、gij gvilwd vunzloih ndawbiengz fazcanj, lai ak yinhyungh gohyoz lijlun bae faensik caeuq gaijgez saedsaeh vwndiz. Gyagiengz dangjyenz、ganbu lijsiengj saenqniemh gyauyuz caeuq swhsiengj daudwz gensez, sawj guengjdaih dangjyenz、ganbu baenz boux mozfan bae sizcen aen haedsim gyaciz dijhi seveicujyi, guh boux giendingh siengsaenq gij lijsiengj hunggyae gungcanjcujyi caeuq gij lijsiengj caezcaemh guh yiengh seveicujyi miz daegsaek Cungguek, guh boux cungcig caephengz gohyoz fazcanjgvanh, guh boux gagrox bae sizcen seveicujyi yungzyuzgvanh, guh boux cizgiz bae coicaenh ndawbiengz huzciz.

  (2) Laebdaeb gyagiengz aen dangj gaemgienz naengzlig gensez, roengzrengz hwnqguh gij lingjdauj banhswj suciz sang. Gij gaemgienz naengzlig gensez aen dangj, gvanhaeh daengxbuenz aen dangj gensez caeuq aen saehnieb seveicujyi miz daegsaek Cungguek, bietdingh aeu dawz daezsang lingjdauj suijbingz caeuq gaemgienz naengzlig, dangguh gak gaep lingjdauj banhswj gensez ndawde aen neiyungz haedsim haenx bae dawz gaenj dawz ndei. Aeu ciuq aen iugouz gohyoz gaemgienz、minzcuj gaemgienz、ciuq faplwd gaemgienz, gaijndei gij swhsiengj cozfungh aen lingjdauj banhswj, daezsang gij bonjsaeh gaemgienz gyoengq lingjdauj ganbu, gaijndei lingjdauj fuengsik caeuq gaemgienz fuengsik, laeb caezcienz lingjdauj dijci, laeb ndei deihfueng dangjveij lingjdauj banhswj boiqbwh gaijgwz gvaqlaeng gij gunghcoz gihci de, dawz gak gaep lingjdauj banhswj hwnqguh baenz aen lingjdauj cizdij giengiengz maenh’ak、ndaej giendingh gvancez gij lijlun caeuq lohsienq fuengcim cwngcwz aen dangj、rox lingjdauj gohyoz fazcanj haenx. Doenggvaq gyagiengz lingjdauj banhswj gaemgienz naengzlig gensez, bae yingjyangj caeuq daiqdoengh daengx dangj, sawj aen dangj sojmiz gunghcoz itcig cungj hab gij iugouz aen seizdaih, hab gij maqmuengh gyoengq yinzminz.

  (3) Cizgiz doicaenh ndaw dangj minzcuj gensez, roengzrengz gyagiengz aen dangj doxgiet doengjit. Miz ndaw dangj minzcuj, gyagiengz gij rengzhoengh cauhmoq aen dangj、gyamaenh aen dangj doxgiet doengjit cij ndaej miz baujcwng youqgaenj. Aeu doenggvaq gyadaih ndaw dangj minzcuj bae daiqdoengh yinzminz minzcuj, doenggvaq gyalai ndaw dangj huzciz bae coicaenh ndawbiengz huzciz. Gingqcungh aen cawjdaej diegvih gyoengq dangjyenz, baujcang gij minzcuj gienzleih gyoengq dangjyenz, doicaenh hongsaeh ndaw dangj goenghai, dajcauh aen vanzging ndei guh ndaw dangj minzcuj daujlun haenx. Laeb caezcienz aen dangj daibyauj daihhoih cidu, saedhengz aen dangj daibyauj daihhoih daibyauj nyaemhgeiz cidu, genjaeu mbangj di yienh (si、gih) sawqhengz aen dangj daibyauj daihhoih ciengznyaemh cidu. Laeb caezcienz aen dangj deihfueng gak gaep cenzveijvei、cangzveijvei gunghcoz gihci, fazveih cenzveijvei doiq vwndiz hungnaek gij gezcwz cozyungh de. Yiemzgek saedhengz minzcuj cizcungh cidu, laeb caezcienz aen cidu cizdij lingjdauj caeuq goyinz faengoeng fucwz dox giethab haenx, fanjdui caeuq fuengzre goyinz roxnaeuz siujsoq vunz gag luenh guh gietdingh. Doihengz aen cidu deihfueng dangjveij daujlun gietdingh vwndiz hungnaek caeuq nyaemhyungh ganbu youqgaenj seiz aeu doenggvaq douzbiuq gietdingh haenx. Laeb hwnj caeuq laeb caezcienz aen cidu youz cunghyangh cwngcigiz yiengq cunghyangh veijyenzvei daengxcungq veiyi、youz deihfueng gak gaep dangjveij cangzveijvei yiengq veijyenzvei daengxcungq veiyi dinghgeiz baugau gunghcoz caemhcaiq ciepsouh gamduk haenx. Gaijgwz gij senjgij cidu ndaw dangj, gaijcaenh bouxhousenj daezmingz cidu caeuq senjgij fuengsik. Doigvangq aen banhfap gihcwngz dangj cujciz lingjdauj banhswj cwngzyenz youz gyoengq dangjyenz caeuq ginzcung goenghai doigawj dem gaep dangj cujciz baihgwnz doigawj dox giethab haenx, cugbouh gyadaih gihcwngz dangj cujciz lingjdauj banhswj cigciep senjgij fanveiz, vih gyadaih ndaw dangj gihcwngz minzcuj ra ok lai cungj saedyienh hingzsik. Daengx dangj dungzci aeu genhgez henhoh aen dangj cizcungh doengjit, gagrox ciuqsouj gij cwngci gijliz aen dangj, seizseiz cungj caeuq dangj cunghyangh baujciz doxdoengz, genhgez henhoh gij gienzvi cunghyangh, saedcaih baujcwng cwngfuj faplingh hengz ndaej doengswnh.

  (4) Mboujduenh gyalaeg ganbu vunzsaeh cidu gaijgwz, roengzrengz gungganq aen ganbu duivuj caeuq vunzcaiz duivuj suciz sang. Genhciz diuz yenzcwz dangj guenj ganbu, genhciz minzcuj、goenghai、gingcwngh、genj aeu boux maenhndei, cauxbaenz aen gihci genjleh daezswng nyaemhyungh ganbu hab gohyoz haenx. Gveihfan ganbu nyaemhyungh daezmingz cidu, laeb ndei aen ganbu gaujhaed bingzgyaq dijhi ndaej daejyienh gij iugouz gohyoz fazcanjgvanh caeuq cingqdeng cwngcizgvanh, dingh ndei gij banhfap goenghai genjleh daezswng、gingcwngh hwnj ganghvei、ca’ngeg senjgij. Gyadaih ganbu gunghcoz minzcuj, sawj minzcuj doigawj、minzcuj gaujcaz bingzguj bienq ndaej engq gohyoz caeuq caensaed bae. Gyagiengz doiq ganbu genjleh daezswng nyaemhyungh gunghcoz daengx aen gocwngz guh gamduk. Laeb caezcienz lingjdauj ganbu cizvu nyaemhgeiz、veizbi、gyauhliuz cidu, laeb ndei gunghvuyenz cidu. Laeb caezcienz ganbu song cungz guenjleix dijci. Doicaenh guekmiz giyez caeuq swyez danhvei vunzsaeh cidu gaijgwz, gaengawq guekmiz giyez daegdiemj, dingh ndei gij banhfap guenjleix gyoengq vunz dangdaeuz de.

  Genhciz ciuq fueng’yiengq cingqdeng bae yungh vunz, ciuq diuz yenzcwz daek caiz giem miz、yawjnaek saedcaih cingzcik、cungqvunz goengnyinh haenx bae genjleh daezswng ganbu, sawj cungqvunz doiq genj vunz yungh vunz engq lai saenqfug. Lai roengzrengz gungganq genjleh daezswng gyoengq ganbu oiq maenhndei, gujli gyoengq ganbu oiq bae daengz gihcwngz caeuq doengh giz deihfueng gannanz haemzhoj haenx muzlienh hungmaj, hawj gyoengq ganbu oiq gij Majgwzswhcujyi lijlun suyangj caeuq cwngci suciz de bienq lai sang bae. Yawjnaek gungganq genjleh daezswng gyoengq ganbu mehmbwk、gyoengq ganbu siujsoq minzcuz. Daegbied gvansim caeuq yawjnaek gyoengq ganbu ciengzgeiz haenqrengz gunghcoz youq doengh giz deihfueng diuzgienh gannanz、gunghcoz hoj guh haenx, louzsim daj gihcwngz caeuq swnghcanj daih’it sienq genjleh daezswng ganbu ndei, bae cungsaed gak gaep dangjcwng lingjdauj gihgvanh. Laebdaeb daih gveihmoz beizyin ganbu, cungfaen fazveih gij cozyungh dangjyau、hingzcwng yozyen、ganbu yozyen, daih fukdoh daezsang gij suciz gyoengq ganbu. Cienzmienh guh ndei lizyouh duiyouh ganbu gunghcoz. Gvancez diuz fuengcim gingqcungh lauzdung、gingqcungh cihsiz、gingqcungh vunzcaiz、gingqcungh dajcauh, genhciz diuz yenzcwz dangj guenj vunzcaiz, aeu gij vunzcaiz cwngzsw sang caeuq gij vunzcaiz ginwngz ak guh cungdenj, doengbuenz suenqveh hwnqguh ndei gak loih vunzcaiz duivuj. Cauhmoq vunzcaiz gunghcoz dijci gihci, hawj gak loih vunzcaiz lai ak dajcauh caeuq lai haengj cauhnieb, cauxbaenz aen gizmen moq vunzcaiz bongh ok buek dem buek、boux miz bonjsaeh yungh ndaej caez.

  (5) Cienzmienh gyamaenh caeuq fazcanj gij cingzgoj senhcinsing gyauyuz hozdung, roengzrengz gyagiengz gihcwngz aen dangj gensez. Majgwzswhcujyi cwngdangj dwg baengh senhcinsing daeuj guh sengmingh caeuq goengrengz, hoeng senhcinsing cix aeu baengh ciencien fanhfanh dangjyenz suciz sang bae daejyienh. Aeu netsaed guh ndei dangjyenz duivuj gensez aen gunghcwngz dajdaej neix, genhciz mboujduenh daezsang gij suciz gyoengq dangjyenz. Nyinhcaen yozsiz caeuq ciuqsouj dangjcangh, hawj dangjyenz geiqmaenh bonjfaenh dwg dangjyenz, laeb dangjyenz dangjsing dinghgeiz faensik cidu, hai roen’gvangq hawj dangjyenz lai vih ginzcung fuzvu, cauhlaeb gij gunghcoz dijhi fuengbienh dangjyenz lienzhaeh ginzcung caeuq vih ginzcung fuzvu, laeb caezcienz gij gihci hawj dangjyenz ndaej ciengzseiz souh gyauyuz、ciengzlwenx baujciz senhcinsing, sawj dangjyenz caencingq baenz boux senhcin fwnswj geiqmaenh cunghcij、sim rangh ginzcung haenx. Gyagiengz caeuq gaijcaenh riuzdoengh dangjyenz guenjleix, youq gyoengq vunz haeuj singz dajgoeng ndawde gyagiengz gij gunghcoz aen dangj, laeb hwnj laeb caezcienz aen dangjyenz dungdai guenjleix gihci hawsingz caeuq lajmbanj gvanhaeh maedcaed haenx. Hawj fazcanj dangjyenz caetliengh bienq ndaej lai sang, hawj dangjyenz duivuj gezgou bienq ndaej lai ndei, gibseiz cawqceq gij dangjyenz mbouj habgek.

  Gij gihcwngz cujciz aen dangj dwg aen cujciz giekdaej daemxcengj aen dangj raeuz gaemgienz haenx. Aeu lozsiz aen dangj gensez gunghcoz cwzyin cidu, youq lajmbanj、giyez、hawsingz segih caeuq gihgvanh、hagdangz、gij cujciz moq ndawbiengz doengh giz neix, cienzmienh doicaenh gihcwngz dangj cujciz gensez, hawj cujciz ndalaeb ndaej engq ndei bae, hawj dangj cujciz ndalaeb ndaej engq lai engq gvangq, cauhmoq hozdung fuengsik, cungfaen fazveih gihcwngz dangj cujciz gij cozyungh doidoengh fazcanj、vih ginzcung fuzvu、comzgiet simvunz、coicaenh huzciz de. Aeu aen dangj gihcwngz cujciz gensez bae daiqdoengh gizyawz gak loih gihcwngz cujciz gensez. Youq aen dangj gihcwngz cujciz caeuq dangjyenz ndawde haeujlaeg bae gauj gij hozdung dajcauh senhcin ceng’aeu maenhndei. Laeb hwnj laeb caezcienz aen gihci hawj hawsingz caeuq lajmbanj gij gihcwngz dangj cujciz de ndaej doxhaeuj doxbang haenx. Youq daengx guek lajmbanj bujben bae gauj dangjyenz ganbu yienhdaih yenjcwngz gyauyuz. Laeb hwnj laeb caezcienz gij gikleih、gvansim、bangfuz gihci ndaw dangj, gvansim caeuq in’gyaez gihcwngz ganbu、dangjyenz lauxgeq caeuq gij dangjyenz swnghhoz gunnanz haenx. Yawjnaek gaijgez gihcwngz cujciz ginghfei baujcang caeuq hozdung cangzsoj daengj vwndiz.

  (6) Saedcaih gaijndei gij cozfungh aen dangj, roengzrengz gyagiengz fanjfuj canglenz gensez. Dangjfungh ndei, couh miz rengzhung bae comzgiet gij sim dangjyenz caeuq gij sim beksingq. Aeu genhciz aen lizsij veizvuzcujyi gvanhdenj nyinhdingh yinzminz dwg boux cauh’ok lizsij haenx, genhciz cienzsim cienzeiq vih yinzminz fuzvu, genhciz ginzcung lohsienq, caensim dingqaeu gij yigen caeuq iugouz cungqvunz, caensaed fanjyingj gij nyienhmuengh cungqvunz, caencingz gvansim gij haemzhoj cungqvunz, lai vih cungqvunz banh saehndei、banh saehsaed, guh daengz gienz yungh hawj beksingq、cingz cungh laeng beksingq、leih maeuz hawj beksingq. Yungh gij cozfungh gouz caen guh saed bae doidoengh gak hangh gunghcoz, lai guh gij saehcingz roengz giekdaej、ik baenaj gyaeraez haenx. Gyagiengz diucaz yenzgiu, gaijcaenh yozfungh caeuq vwnzfungh, cinggemj veiyi caeuq vwnzgen, fanjdui hingzsizcujyi、gvanhliuzcujyi, fanjdui loengh haw guh gyaj. Daiqdaeuz dizcang gaenxgiemh mbaet yungh、gaenxgiemh banh sojmiz saehnieb, fanjdui saisaengq baizciengz. Daengx dangj dungzci daegbied dwg lingjdauj ganbu cungj aeu gangj dangjsing、cungh binjhingz、guh buengjyiengh daiqdaeuz. Haeujlaeg bae gauj dangjfungh dangjgij gyauyuz, cizgiz guh bihbingz caeuq gag bihbingz, sawj lingjdauj ganbu gagrox ciuqsouj gij gijliz aen dangj caeuq gij faplwd guekgya, ciepswnj gij conzdungj ndei doenghbaez, hawj cingqheiq caeuq funghgi moq engqgya hwnghoengh, yungh dangjfungh ndei bae coicaenh cwngfungh daiqdoengh minzfungh.

  Gij singqcaet caeuq cunghcij Cungguek Gungcanjdangj, gietdingh le dangj caeuq gak cungj siuhgiz nduknaeuh yienhsiengq couh dangq raemx dem feiz mbouj doxyungz. Genhgez ceihfad caeuq mizyauq yawhfuengz nduknaeuh, gvanhaeh daengz simvunz conzsanq caeuq aen dangj dailix, dwg aen cwngci yivu hungnaek dangj raeuz bietdingh aeu itcig cungj guenj ndei haenx. Daengx dangj dungzci itdingh aeu cukgaeuq roxyiuj gij doucwngh fanj nduknaeuh dwg ciengzgeiz、fukcab youh gannanz hungloet, dawz fanjfuj canglenz gensez cuengq youq aen diegvih engqgya duzcuz, geizhauh sienmingz bae fanjdui nduknaeuh. Genhciz diuz fuengcim byai goek giem ceih、cunghab ceihleix、ceih fuengz caez guh、yawjnaek yawhfuengz, netsaed doicaenh hwnqguh aen dijhi fadceih caeuq yawhfuengz nduknaeuh, youq mwh genhgez ceihfad nduknaeuh, engqgya yawjnaek ceih goek, engqgya yawjnaek yawhfuengz, engqgya yawjnaek cidu gensez, haigvangq gij gunghcoz lingjyiz daj goekgaen bae fuengzceih nduknaeuh haenx. Yiemzgek caephengz dangjfungh lenzcwng gensez cwzyin cidu. Genhciz gyalaeg gaijgwz caeuq cauhmoq dijci, gyagiengz lenzcwng vwnzva gensez, cauxbaenz dingj nduk fuengz bienq gyauyuz cangzyau gihci、fanjfuj canglenz cidu dijhi、gienzlig yinhhengz gamduk gaemhanh gihci. Laeb caezcienz gijgenj genhcaz baij cap gihgou doengjit guenjleix, laeb ndei cunzcaz cidu. Gyagiengz gij hong hawj lingjdauj ganbu cinghseuq gag haed, sawj dangjyenz ganbu lai ak dingj nduk fuengz bienq. Genhgez niujcingq gij funghgi mbouj cingq sienghaih ginzcung leih’ik haenx, cietsaed gaijgez doengh gij vwndiz cungqvunz fanjyingj haenqrem de. Genhgez cazbanh gij anqgienh famh gijliz famh faplwd, doiq gij vunz nduknaeuh haenx, mboujlwnh dwg bouxlawz, cungj bietdingh aeu ciuq fap yiemz fad, baenzlawz cungj mbouj ciemcouh yungzcingz!

  Gak boux dungzci! Aen dangj raeuz daj ngoenz ngamq laeb de hwnj, couh daihdamj rapdawz aen lizsij sawjmingh daz Cungguek yinzminz dajcauh gij saedceij vuenyungz、saedyienh Cunghvaz Minzcuz fukhwng hungmbwk. Vihliux guhbaenz aen lizsij sawjmingh neix, gyoengq vunz Cungguek Gungcanjdangj daih dem daih, gyoengq gaxgonq hwnjbae gyoengq gaenlaeng ciep, fouzsoq gwzming senhlez lienz mingh cungj mbouj aeu. Gyoengq vunz Cungguek Gungcanjdangj dangdaih, bietdingh aeu laebdaeb rapdawz ndei aen lizsij sawjmingh neix. Gij gaijgwz hailangh caeuq seveicujyi yendaiva gensez aen dangj raeuz cingqcaih daz daengx guek gak cuz yinzminz bae guh haenx, ciepswnj caeuq fazcanj le guek raeuz daj Cungguek moq laebbaenz doxdaeuj gij seveicujyi gensez saehnieb hungmbwk de, ciepswnj caeuq fazcanj le Cungguek yinzminz daj ciuhgyawj doxdaeuj ceng’aeu minzcuz doglaeb、saedyienh guekgya fouqgiengz gij saehnieb hungmbwk de. Yawj gij saehcingz ngoenzneix, dauqngeix gij ginglig doenghbaez, raeuz roxnyinh gij sawjmingh gwnz mbaq gig sinzswng youh miznaj. Langh da yawj daengzcog, raeuz doiq saedyienh doicaenh yendaiva gensez、guhbaenz guekcoj doengjit、henhoh seiqgyaiq huzbingz caeuq coicaenh doengzcaez fazcanj sam aen lizsij yinvu hungloet neix gig miz saenqsim.

  Daengx dangj dungzci bietdingh aeu singjsak rox daengz, saedyienh aen muzbyauh cienzmienh hwnqguh aen biengz siujgangh, lij aeu laebdaeb haenqrengz buek guh cibgeij bi dem, gihbwnj saedyienh yendaiva, lij aeu laebdaeb haenqrengz buek guh geijcib bi dem, gyamaenh caeuq fazcanj seveicujyi cidu, cix aeu geij daih vunz、cibgeij daih vunz mizseiz lij aeu geijcib daih vunz genhciz mboujduenh haenqrengz buek guh dem cij ndaej. Yaek haenqrengz buek guh, couh miz gunnanz caeuq fung’yiemj daengjnaj. Raeuz itdingh aeu youq mwh an’onj couh lai ngeix seiz haemzhoj dwgrengz, itcig cungj doiq Majgwzswhcujyi、doiq yiengh seveicujyi miz daegsaek Cungguek、doiq saedyienh Cunghvaz Minzcuz fukhwng hungmbwk baujciz miz saenqniemh giendingh; itdingh aeu gaej ndaengndiengq gaej simfouz, mbouj lau dwgrengz sinhoj, laebdaeb haenqrengz buek guh, geiqmaenh gij gihbwnj guekcingz duenhmbaek codaeuz seveicujyi, vih gij saehnieb dangj caeuq yinzminz bae mboujduenh roengzrengz; itdingh aeu roengz goengfou lai yozsiz、ngaemgyaeuj dwk haenqrengz buek guh, mboujduenh cauh’ok gij niebcik souh ndaej sizcen、yinzminz、lizsij cazniemh haenx; itdingh aeu gyagiengz doxgiet、goqdoh daengxbuenz, gagrox henhoh aen dangj doxgiet doengjit, baujciz aen dangj caeuq yinzminz ginzcung maedcaed lienzhaeh, gyamaenh daengx guek gak cuz yinzminz daih doxgiet, gyagiengz Cunghvaz Minzcuz gyoengq lwglan youq ndaw guek rog guek haenx daih doxgiet, coicaenh Cungguek yinzminz caeuq seiqgyaiq gak guek yinzminz daih doxgiet, gapbaenz ligliengh giengzak, bae hoenx baih sojmiz gannanz yung’yiemj, doidoengh gij saehnieb dangj caeuq yinzminz caiq hingz ndaej engq lai engq daih bae.

  Cingj raeuz yaengx sang mbaw geizhauh hungmbwk yiengh seveicujyi miz daegsaek Cungguek, engqgya gaenjmaed doxgiet youq seiqhenz dangj cunghyangh, fanh cungq it sim, vuet roen baenaj, vih cienzmienh hwnqguh aen biengz siujgangh ndaej engqgya hingz lai hingz moq、hawj gij saedceij yinzminz ndaej engq gyaeu engq ndei bae haenqrengz buek guh!

  (Gij swhliu Yinzminzvangj)

  
[1] [2] [3] [4] [5] [6] [7] [8] [9] [10] [11] [12]
 
Dozsiengq