Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

YAENGX SANG MBAW GEIZHAUH HUNGMBWK YIENGH SEVEICUJYI MIZ DAEGSAEK CUNGGUEK, VIH DUED’AEU CIENZMIENH HWNQGUH AEN BIENGZ SIUJGANGH CAIQ NDAEJ HINGZ BAE HAENQRENGZ BUEK GUH 10

——Gij Baugau Youq Gwnz Aen Daihhoih Cungguek Gungcanjdangj Daih Cibcaet Baez Daengx Guek Daibyauj Davei
( 2007 nienz 10 nyied 15 hauh)

Huz Ginjdauh
  
【Cihsaw Hung’iq : hung rauh iq】  Dajyaenq
      
  10、Doicaenh Gij Sizcen “Aen Guekgya Ndeu Song Cungj Cidu” Caeuq Aen Daih Saehnieb Guekcoj Huzbingz Doengjit

  Yanghgangj、Aumwnz dauqma guekcoj doxdaeuj, gij sizcen “aen guekgya ndeu song cungj cidu” ngoenz beij ngoenz fungfouq. “Aen guekgya ndeu song cungj cidu” it di mbouj loek, rengzhoengh lairaeuh, guh ndaej hwnj swnj ndaej bae. Ciuq “aen guekgya ndeu song cungj cidu” bae saedyienh guekcoj huzbingz doengjit, hab gij gaenbonj leih’ik Cunghvaz Minzcuz.

  Aen dangj raeuz youq baihlaj hingzseiq moq bae ceihleix guekgya caeuq dajleix gij hongsaeh cwngci, miz aen goqdaez hungnaek daengjnaj ndeu, couh dwg baujciz Yanghgangj、Aumwnz ciengzgeiz mwnhoengh onjdingh. Raeuz yaek giendingh mbouj bienq bae gvancez diuz fuengcim “aen guekgya ndeu song cungj cidu”、“vunz Yanghgangj gag guenj Yanghgangj”、“vunz Aumwnz gag guenj Aumwnz”、gag guenj cingzdoh gig sang haenx, yiemzgek ciuq aen fapgiek daegbied hingzcwnggih bae banh saeh; caenhrengz cihciz daegbied hingzcwnggih cwngfuj ciuq fap hengzguh cwngci cosih, roengzrengz fazcanj ginghci、gaijndei gij swnghhoz gyoengq beksingq、doicaenh minzcuj; gujli Yanghgangj、Aumwnz gak gyaiq yinzsw conz youq baihlaj mbaw geizhauh ndiepgyaez guekcoj ndiepgyaez Yanghgangj、ndiepgyaez guekcoj ndiepgyaez Aumwnz, doengzsim gaprengz, haekfug gunnanz, coicaenh ndawbiengz huzciz; gyagiengz neidi caeuq Yanghgangj、Aumwnz gyauhliuz hozcoz, saedyienh youhsi doxbouj、doengzcaez fazcanj; cizgiz cihciz Yanghgangj、Aumwnz caeuq baihrog baedauq, genhgez fanjdui gij seiqlig baihrog bae luenh gyongz gij hongsaeh Yanghgangj caeuq Aumwnz. Gyoengq beixnuengx Yanghgangj、gyoengq beixnuengx Aumwnz vanzcienz miz dungxcaiz miz naengzlig guenjleix ndei、hwnqguh ndei Yanghgangj caeuq Aumwnz, Yanghgangj caeuq Aumwnz gaenq vih caemhcaiq yaek laebdaeb vih guekgya yendaiva gensez fazveih cozyungh youqgaenj, aen guekcoj hungmbwk raeuz, ciengzlwenx cungj vih Yanghgangj、Aumwnz mwnhoengh onjdingh bae bangrengz cengjhwet.

  Gaijgez Daizvanh vwndiz、saedyienh guekcoj vanzcienz doengjit, dwg aen simmuengh caezcaemh daengxcungq lwglan Cunghvaz Minzcuz. Raeuz yaek ciuq diuz fuengcim “huzbingz doengjit、aen guekgya ndeu song cungj cidu” caeuq bet hangh cawjcieng gvendaengz youq duenhmbaek yienhseiz bae fazcanj song hamq gvanhaeh、doicaenh yamqdin guekcoj huzbingz doengjit haenx, genhciz diuz yenzcwz aen Cungguek dog baenzlawz cungj mbouj doenghngauz, roengzrengz ceng’aeu huzbingz doengjit baenzlawz cungj mbouj cuengqfwngz, gvancez diuz fuengcim dak muengh youq laeng gyoengq beksingq Daizvanh baenzlawz cungj mbouj gaijbienq, fanjdui gij faenmbek hozdung “Daizvanh doglaeb” baenzlawz cungj mbouj doiqnyiengh, dawz song hamq gvanhaeh huzbingz fazcanj aen cawjdaez neix gaem youq ndaw fwngz ndaetndaet bae, caensim saed’eiq vih gyoengq beixnuengx song hamq maeuz fukfaenh、vih Daizvanh Haijyaz digih maeuz huzbingz, henhoh guekgya cawjgienz caeuq diegguek caezcingj, henhoh gij gaenbonj leih’ik Cunghvaz Minzcuz.

  Genhciz diuz yenzcwz aen Cungguek dog, dwg aen cwngci giekdaej hawj song hamq gvanhaeh ndaej huzbingz fazcanj haenx. Caenhguenj song hamq caengz ndaej doengjit, hoeng daluz caeuq Daizvanh doengz gvi aen Cungguek dog yiengh saehsaed neix, cix coengzlaiz mbouj miz gaijbienq gvaq. Cungguek dwg aen ranzmbanj doxcaeuq gyoengq beixnuengx song hamq, gyoengq beixnuengx song hamq ciuq dauhleix wngdang dox daz fwngz dwk, henhoh ndei、hwnqguh ndei aen ranzmbanj doxcaeuq raeuz. Daizvanh mboujlwnh aen cwngdangj lawz, caenh’aeu swngznyinh song hamq doengz gvi aen Cungguek dog, raeuz cungj nyienh’eiq caeuq gyoengqde gyauhliuz doiqvah、siengliengz damzbuenq, gijmaz vwndiz cungj ndei gangj. Raeuz naeknaemq iuheuh, youq gwnz giek diuz yenzcwz aen Cungguek dog, siengliengz cingqsik gietsat song hamq digdoiq cangdai, dingh ndei huzbingz hezyi, cauhlaeb gij cujciz caeuq gezgou ndei hawj song hamq gvanhaeh huzbingz fazcanj haenx, dajcauh ok aen gizmen moq song hamq gvanhaeh huzbingz fazcanj.

  13 ik beixnuengx daluz caeuq 2300 fanh beixnuengx Daizvanh, caez dwg gyoengq vunz lwedmeg doxriengh、minghyinh doxdoengz ndeu. Famzdwg gij saehcingz doiq gyoengq beixnuengx Daizvanh mizik, famzdwg gij saehcingz doiq henhoh Daizvanh Haijyaz digih huzbingz mizik, famzdwg gij saehcingz doiq coicaenh guekcoj huzbingz doengjit mizik, raeuz cungj aeu caenhrengz guh ndei. Raeuz lijgaij、saenqlaih、gvansim gyoengq beixnuengx Daizvanh, yaek laebdaeb saedhengz caeuq cungsaed doengh gij cwngcwz cosih ik gyoengq beixnuengx Daizvanh haenx, ciuq fap baujhoh gij gienzik cingqdangq gyoengq beixnuengx Daizvanh, cihciz hamq haijyaz baihsae caeuq gizyawz doengh giz miz gyoengq canghseng’eiq Daizvanh douzswh siengdoiq conzcub haenx fazcanj ginghci. Gyoengq beixnuengx song hamq aeu gyagiengz baedauq, coicaenh song mbiengj ginghci vwnzva gyauhliuz haigvangq lingjyiz、daezsang cwngzsw, doidoengh cigciep “sam doeng”, sawj song doih gamjcingz engqgya doxnaek、hozcoz engqgya haeujlaeg, vih saedyienh Cunghvaz Minzcuz fukhwng hungmbwk bae doengzcaez roengzrengz.

  Seizneix, gij faenmbek seiqlig nauh “Daizvanh doglaeb” haenx gyagaenj guh faenmbek hozdung, yiemzcungh sienghaih song hamq gvanhaeh huzbingz fazcanj. Gyoengq beixnuengx song hamq aeu doengzcaez fanjdui caeuq naenxroengz gij faenmbek hozdung nauh “Daizvanh doglaeb” haenx. Cungguek cawjgienz caeuq diegguek caezcingj mbouj yungzhawj faengat. Famzdwg gij vwndiz nangq daengz Cungguek cawjgienz caeuq diegguek caezcingj haenx, cungj bietdingh aeu youz sojmiz Cungguek yinzminz hamz gyoengq beixnuengx Daizvanh youq ndawde bae doengzcaez gietdingh. Raeuz nyienh yungh gij caensim ceiq daih、caenh gij goengrengz ceiq daih bae saedyienh song hamq huzbingz doengjit, baenzlawz cungj mbouj hawj gijmaz vunz yungh gijmaz mingzdaeuz caeuq fuengsik, dawz Daizvanh daj ndaw guekcoj faengat okbae.

  Youq mwh Cunghvaz Minzcuz byaij coh fukhwng hungmbwk, lizsij bietyienz yaek conz hawj song hamq doengjit. Ndaw guek rog guek, gyoengq lwglan Cunghvaz Minzcuz raeuz gaenjmaed doxgiet、doengzcaez haenqrengz buek guh, ngoenz guekcoj ndaej vanzcienz doengjit haenx, couh itdingh ndaej daeujdaengz.

  
[1] [2] [3] [4] [5] [6] [7] [8] [9] [10] [11] [12]
 
Dozsiengq