Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

YAENGX SANG MBAW GEIZHAUH HUNGMBWK YIENGH SEVEICUJYI MIZ DAEGSAEK CUNGGUEK, VIH DUED’AEU CIENZMIENH HWNQGUH AEN BIENGZ SIUJGANGH CAIQ NDAEJ HINGZ BAE HAENQRENGZ BUEK GUH 8

——Gij Baugau Youq Gwnz Aen Daihhoih Cungguek Gungcanjdangj Daih Cibcaet Baez Daengx Guek Daibyauj Davei
( 2007 nienz 10 nyied 15 hauh)

Huz Ginjdauh
  
【Cihsaw Hung’iq : hung rauh iq】  Dajyaenq
      
  8、Gyavaiq Doicaenh Gij Ndawbiengz Gensez Aeu Gaijndei gij Swnghhoz Beksingq Guh Cungdenj Haenx

  Ndawbiengz gensez caeuq gij ndangcangq bingzan vuenyungz gyoengq beksingq seizseiz cungj dox gvanlienz. Bietdingh aeu youq mwh ginghci gaenq fazcanj le, engqgya yawjnaek ndawbiengz gensez, roengzrengz baujcang caeuq gaijndei gij swnghhoz gyoengq beksingq, doicaenh ndawbiengz dijci gaijgwz, gyadaih goenggungh fuzvu, guh ndei ndawbiengz guenjleix, coicaenh ndawbiengz goengbingz cingqngeih, roengzrengz sawj daengxcungq beksingq doegsaw miz vunz son、guhhong miz souhaeuj、baenzbingh miz cienz yw、lauxgeq miz vunz ciengx、bouxboux miz ranz youq, doidoengh hwnqguh aen biengz huzciz.

  (1) Yousien fazcanj gyauyuz, hwnqguh aen guekak vunzlig swhyenz hoengh. Gyauyuz couh dangq ndaek ringiek demh hawj minzcuz saenqhwng haenx, ndawbiengz goengbingz dwg aeu gyauyuz goengbingz guh giekdaej youqgaenj. Aeu cienzmienh gvancez diuz gyauyuz fuengcim aen dangj, genhciz dawz gungganq bouxvunz dangguh goekdaej、dawz cwngci swhsiengj caeuq daudwz binjciz gyauyuz baij youq gaxgonq, saedhengz suciz gyauyuz, daezsang gyauyuz yendaiva suijbingz, gungganq gyoengq vunz hwnqguh caeuq ciepban seveicujyi, hawj gyoengqde dwz、ci、dij、meij cienzmienh fazcanj, banh ndei gij gyauyuz hab’eiq yinzminz haenx. Dawz gyauyuz gezgou laeb ndaej lai ndei bae, coicaenh yivu gyauyuz bingzyaenx fazcanj, gyavaiq bujgiz duenhmbaek gauhcungh gyauyuz, daihlig fazcanj cizyez gyauyuz, daezsang gauhdwngj gyauyuz caetliengh. Yawjnaek daj mwh caengz haeujhag couh doiq lwg’iq guh gyauyuz. Vuenhmoq gyauyuz gvanhnen, gyalaeg gaijgwz gij neiyungz fuengsik sonhag、gij cidu gaujsi caeuq ciusou hagseng、gij cidu bingzgyaq caetliengh daengj, hawj gyoengq hagseng cunghyoz siujyoz mbouj caiq hwnjdangz caeuq guh cozyez baenzlai, cix daezsang gij cunghab suciz gyoengqde. Genhciz aen singqcaet vih goenggungh leih’ik banh gyauyuz, caizcwng lai bued cienz hawj gyauyuz, sawj gyauyuz souhfei bienq gveihfan bae, bangfuz giz dieg gungzhoj、giz dieg siujsoq minzcuz banh gyauyuz, laeb caezcienz hangh cidu bangcienz hawj hagseng doegsaw, baujcang doengh ranz ginghci gunnanz、doengh boux haeuj singz dajgoeng haenx gij lwgnyez de ndaej bingzdaengj ciepsouh yivu gyauyuz. Gyagiengz hwnqguh aen duivuj lauxsae, cungdenj daezsang gij suciz gyoengq lauxsae lajmbanj. Gujli gij ligliengh ndawbiengz bae hwngbanh gyauyuz. Fazcanj yenjcwngz gyauyuz caeuq laebdaeb gyauyuz, hwnqguh aen biengz gaenx hag, hawj daengxcungq beksingq bouxboux cungj hag、baenz seiqvunz cungj hag.

  (2) Saedhengz aen fazcanj canloz gyadaih couhnieb, coicaenh doenggvaq cauhnieb bae daiqdoengh couhnieb. Ndaej couhnieb、miz hong guh, dwg aen goekdaej gij swnghhoz gyoengq beksingq. Aeu genhciz saedhengz doengh hangh cwngcwz cawjdoengh gaijgez couhnieb vwndiz haenx, cwngfuj lai roengzrengz dazyinx, laeb caezcienz hawciengz couhnieb gihci, gyadaih couhnieb gveihmoz, gaijndei couhnieb gezgou. Laeb caezcienz gij cwngcwz cihciz vunz gag cauhnieb、gag ra hong guh, lai son vunz laeb maenh gij swhsiengj couhnieb, sawj engq lai bouxguhhong bienqbaenz bouxcauhnieb. Laeb caezcienz cizyez gyauyuz beizyin cidu, hawj sojmiz bouxguhhong cungj ndaej sonhag gyauqlienh, gyagiengz doiq lajmbanj gij lauzdungliz lwyawz yaek senjdieg couhnieb haenx guh beizyin. Laeb aen vunzlig swhyenz hawciengz gveihfan doengjit haenx, cauxbaenz gij cidu hawj gyoengq bouxguhhong hawsingz lajmbanj ndaej bingzdaengj couhnieb. Laeb caezcienz gij couhnieb bangcoh cidu hawj sojmiz gunnanz ginzcung cungj souh’ik, gibseiz bang doengh ranz mbouj miz saek boux vunz couhnieb haenx gaijgez couhnieb gunnanz. Cizgiz guh ndei gij hong bang gyoengq hagseng dayoz bizyez haenx couhnieb. Gveihfan caeuq hezdiuz lauzdung gvanhaeh, laeb ndei caeuq lozsiz gij cwngcwz guekgya dingh hawj nungzminzgungh haenx, ciuq faplwd bae henhoh gij gienzik bouxguhhong.

  (3) Gyalaeg gaijgwz souhaeuj faenboiq cidu, hawj gyoengq beksingq hawsingz lajmbanj lai ndaej souhaeuj. Souhaeuj faenboiq cidu hableix, dwg ndawbiengz goengbingz gij daejyienh youqgaenj de. Aeu genhciz caeuq laeb ndei aen faenboiq cidu aeu ciuq lauzdung faenboiq guh cawjdaej、lai cungj faenboiq fuengsik doengzcaez mizyouq haenx, laeb caezcienz aen cidu hawj lauzdung、swhbwnj、gisuz、guenjleix daengj swnghcanj yausu ciuq gung’yen bae caeuqfaenh faenboiq, baez faenboiq daih’it caeuq baez faenboiq daihngeih cungj aeu cawqleix ndei aen gvanhaeh yauliz caeuq goengbingz, baez faenboiq daihngeih aeu engqgya yawjnaek goengbingz. Youq ndaw gozminz souhaeuj faenboiq, cugbouh daezsang aen bijcung gihminz souhaeuj, youq ndaw baez faenboiq daih’it, daezsang aen bijcung lauzdung baucouz. Roengzrengz hawj gij vunz souhaeuj daemq haenx lai ndaej souhaeuj, cugbouh daezsang banggungz byauhcunj caeuq ceiq daemq gunghswh byauhcunj, laeb aen gihci hawj giyez cizgungh ndaej cingqciengz lai gya gunghswh caeuq aen gihci baujcang ceihawj haenx. Cauh diuzgienh hawj engq lai ginzcung miz gij souhaeuj ndaej dangguh caizcanj haenx. Baujhoh gij souhaeuj habfap, diuzcez gij souhaeuj sang gvaqbouh, cawz gij souhaeuj mbouj habfap bae. Gyadaih senjdieg ceihawj, gyagiengz doenggvaq suisouh bae guh diuzcez, dwkbyoengq hangzsih gagciemq, cauh’ok gij gihvei goengbingz, cwngjdun faenboiq cizsi, cugbouh niujcienj aen seiqdaeuz souhaeuj faenboiq cengca bienq daih haenx.

  (4) Gyavaiq laeb aen ndawbiengz baujcang dijhi ndaej goqdoh gyoengq gihminz hawsingz lajmbanj haenx, baujcang beksingq daihdaej miz gwn miz daenj. Ndawbiengz andingh, aeu baengh ndawbiengz baujcang guh baujcwng youqgaenj. Aeu dawz ndawbiengz baujyiemj、ndawbiengz banggouq、ndawbiengz fukleih dangguh giekdaej, dawz gihbwnj ciengxlaux、gihbwnj yihliuz、ceiq daemq swnghhoz baujcang cidu dangguh cungdenj, dawz saehnieb swnzsienh、sanghyez baujyiemj dangguh bangbouj, gyavaiq laeb ndei ndawbiengz baujcang dijhi. Coicaenh giyez、gihgvanh、saehnieb danhvei gihbwnj ciengxlaux baujyiemj cidu gaijgwz, damqra sawq laeb gij ciengxlaux baujyiemj cidu lajmbanj. Youq hawsingz cizgungh gihbwnj yihliuz baujyiemj、hawsingz gihminz gihbwnj yihliuz baujyiemj、lajmbanj hozcoz yihliuz yienghmoq fuengmienh, cienzmienh doicaenh cidu gensez. Laeb caezcienz hawsingz lajmbanj gihminz ceiq daemq swnghhoz baujcang cidu, cugbouh daezsang baujcang suijbingz. Laeb caezcienz saetnieb、goengsieng、swnghyuz baujyiemj cidu. Daezsang dungjcouz cwngzsw, ceiqdingh aen ndawbiengz baujyiemj gvanhaeh senjdieg ciepswnj banhfap daengx guek doengjit haenx. Yungh lai cungj fuengsik cungsaed ndawbiengz baujcang gihginh, gyagiengz gamduk guenjleix gihginh, saedyienh baujciz cwnghciz. Laeb caezcienz ndawbiengz banggouq dijhi. Guh ndei gij hong youdaih fujsi anhci. Fazyangz yinzdaucujyi cingsaenz, fazcanj gij saehnieb bouxcanzcaed. Gyagiengz gij hong gvansim caeuq ciuqgoq bouxlaux bouxgeq. Giengzvaq gij hong fuengzcai gemjcai. Laeb caezcienz hangh cidu ranzyouq ngaenzco cienh, vih hawsingz doengh ranz souhaeuj daemq haenx vaiq di gaijgez ranzyouq gunnanz.

  (5) Laeb gihbwnj yihliuz veiswngh cidu, hawj daengxcungq beksingq ndangdaej engq lai cangqheiq. Bouxvunz yaek cienzmienh fazcanj, aeu ndangcangq daeuj guh giekdaej. Ndangcangq gvanhaeh daengz cien gya fanh hoh vuenyungz. Aeu genhciz aen singqcaet vih goenggungh leih’ik bae banh goenggungh yihliuz veiswngh, genhciz dawz yawhfuengz baij youq vih daih’it、aeu lajmbanj guh cungdenj、cunghyih caeuq sihyih doengzcaez yawjnaek, saedhengz cwngfuj caeuq saehnieb faenhai、bouxguenj caeuq bouxbanh faenhai、yihyen caeuq yw faenhai、vih canhcienz caeuq mbouj vih canhcienz faenhai, hawj cwngfuj lai rap cwzyin caeuq lai roengz bonjcienz, laeb caezcienz gij cwngcwz baujcang gyoengq beksingq ndaw guek ndangcangq, gujli gij ligliengh ndawbiengz bae caeuqfaenh guh, hwnqguh gij goenggungh veiswngh fuzvu dijhi、yihliuz fuzvu dijhi、yihliuz baujcang dijhi、gijyw gunghawj baujcang dijhi goqdoh gyoengq gihminz hawsingz lajmbanj haenx, hawj vunzlai ndaej miz gij yihliuz veiswngh fuzvu gawq ancienz mizyauq、youh fuengbienh bienzngeiz. Daezsang naengzlig, bae yawhfuengz gaemhanh gij binghcaed hungnaek caeuq wngqgip cawqceq gij goenggungh veiswngh saehgienh sawqmwh fatseng haenx. Gyagiengz hwnqguh lajmbanj sam gaep veiswngh fuzvu vangjloz caeuq hawsingz segih veiswngh fuzvu dijhi, gyalaeg gaijgwz gij yihyen youz goenggya banh haenx. Laeb guekgya gihbwnj yozvuz cidu, baujcwng beksingq gihbwnj yungh yw. Gyagiengz canghyw binjdwz cozfungh gensez, daezsang yihliuz fuzvu caetliengh. Saedbauj gijgwn gijyw ancienz. Genhciz diuz gihbwnj gozcwz ciuq giva seng ciengx lwgnyez, onjdingh aen suijbingz senglwg noix, hawj gij vunz ngamq oksengh haenx suciz lai sang. Bae guh gyaezguek veiswngh yinhdoengh, fazcanj gij veiswngh saehnieb mehmbwk lwg’iq.

  (6) Dawz ndawbiengz guenjleix ndei, henhoh ndawbiengz andingh doxgiet. Beksingq cungqvunz, cungj caez muengh ndawbiengz onjdingh; gaijgwz fazcanj, aeu ndawbiengz onjdingh guh diuzgienh doekgonq. Aeu laeb caezcienz aen ndawbiengz guenjleix gwzgiz youz dangjveij lingjdauj、cwngfuj fucwz、ndawbiengz gapdoengz boiqhab、cungqvunz caez caeuqfaenh guh, laeb caezcienz gihcwngz ndawbiengz guenjleix dijci. Ceiq daih hanhdoh gikfat gij rengzhoengh cauhmoq ndawbiengz, ceiq daih hanhdoh gyalai gij yinhsu huzciz, ceiq daih hanhdoh gemjnoix gij yinhsu mbouj huzciz. Dojdangq cawqleix gij mauzdun baihndaw yinzminz, laeb ndei sinfangj cidu, laeb caezcienz aen gihci youz dangj caeuq cwngfuj guhdaeuz bae henhoh gij gienzik cungqvunz haenx. Yawjnaek hwnqguh caeuq guenjleix gij cujciz ndawbiengz. Gyagiengz guenjleix riuzdoengh yinzgouj caemhcaiq lai vih gyoengqde fuzvu. Genhciz ancienz fazcanj, doiq ancienz swnghcanj dawzrem guenjleix caeuq gamduk, mizyauq naenxroengz gij ancienz saehhux hungnaek caeuq daegbied hungnaek. Laeb ndei aen gihci wngqgip guenjleix gij saehgienh sawqmwh fatseng haenx. Laeb caezcienz ndawbiengz cianh yawhfuengz gaemhanh dijhi, gyagiengz doiq ndawbiengz cianh guh cunghab ceihleix, haeujlaeg bae gauj gij hozdung cauhlaeb bingzan, gaijgwz caeuq gyagiengz gij gingjvu gunghcoz ndaw segih hawsingz lajmbanj, ciuq fap fuengzre caeuq dwkceih gij hozdung famhfap famhcoih, baujcang beksingq sengmingh caizcanj ancienz. Laeb ndei guekgya ancienz canloz, laeb caezcienz guekgya ancienz dijci, cibfaen singjgaeh caeuq genhgez fuengzre doengh gij hozdung gauj faenmbek、iemqhaeuj、boekfan buqvaih haenx, saedcaih henhoh guekgya ancienz.

  Aen biengz huzciz, aeu baengh daengx biengz doengzcaez bae hwnqguh. Raeuz aeu ingbaengh yinzminz ndaetndaet bae, diuhdoengh sojmiz cizgiz yinhsu, roengzrengz cauxbaenz aen gizmen gawq miz rengzhoengh youh gamjdoengh ndaej vunz ndeu, guh daengz ndawbiengz huzciz bouxboux cungj miz cwzyin、aen biengz huzciz bouxboux cungj caez miz faenh yiengjsouh.

  
[1] [2] [3] [4] [5] [6] [7] [8] [9] [10] [11] [12]
 
Dozsiengq