Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

YAENGX SANG MBAW GEIZHAUH HUNGMBWK YIENGH SEVEICUJYI MIZ DAEGSAEK CUNGGUEK, VIH DUED’AEU CIENZMIENH HWNQGUH AEN BIENGZ SIUJGANGH CAIQ NDAEJ HINGZ BAE HAENQRENGZ BUEK GUH 7

——Gij Baugau Youq Gwnz Aen Daihhoih Cungguek Gungcanjdangj Daih Cibcaet Baez Daengx Guek Daibyauj Davei
( 2007 nienz 10 nyied 15 hauh)

Huz Ginjdauh
  
【Cihsaw Hung’iq : hung rauh iq】  Dajyaenq
      
  7、Doidoengh Yiengh Vwnzva Seveicujyi Daih Fazcanj Daih Mwnhoengh

  Aen seizdaih ngoenzneix, vwnzva yied baez yied bienqbaenz congh goengrengz okmboq youqgaenj ndaej sawj minzcuz comzgiet mbouj sanq caeuq ak guh cauhmoq, yied baez yied bienqbaenz aen yinhsu youqgaenj ndaw cunghab gueklig gingcwngh, gyoengq yinzminz guek raeuz, yied baez yied maqmuengh cingsaenz vwnzva swnghhoz engqgya fungcuk、lai cungj lai yiengh. Aeu genhciz aen fueng’yiengq baenaj seveicujyi senhcin vwnzva, hwng hwnj seveicujyi vwnzva gensez gauhcauz moq, gikfat gij rengzhoengh vwnzva cauhmoq daengx aen minzcuz, hawj aen guekgya raeuz engq miz vwnzva saedlig’unq, sawj gij gihbwnj vwnzva gienzik gyoengq yinzminz raeuz ndaej miz baujcang engq ndei, sawj gij vwnzva swnghhoz ndawbiengz engqgya fungcuk、lai cungj lai yiengh, sawj gij cingsaenz yienghsiengq gyoengq yinzminz raeuz engqgya maenghcaengq doxhwnj.

  (1) Gensez aen haedsim gyaciz dijhi seveicujyi, sawj gij yisiz hingzdai seveicujyi engq ak ciuyinx simvunz、comzgiet simvunz. Aen haedsim gyaciz dijhi seveicujyi, daj bonjcaet fuengmienh daejyienh le gij yisiz hingzdai seveicujyi. Aeu gyamaenh aen cijdauj diegvih Majgwzswhcujyi, genhciz mboujduenh yungh yiengh Majgwzswhcujyi miz daegsaek Cungguek haenx gij cingzgoj ceiq moq de bae vujcangh daengx dangj、gyauyuz yinzminz, yungh gij lijsiengj caezcaemh guh yiengh seveicujyi miz daegsaek Cungguek haenx bae comzgiet ligliengh, yungh gij minzcuz cingsaenz aeu aigozcujyi guh haedsim caeuq gij seizdaih cingsaenz aeu gaijgwz cauhmoq guh haedsim haenx bae hawj vunz simhoengz, yungh seveicujyi yungzyuzgvanh bae daz gij funghgi caeuq sibgvenq ndawbiengz seizhwng, gyamaenh aen swhsiengj giekdaej caezcaemh ndaej sawj daengx dangj daengx guek gak cuz yinzminz doxgiet haenqrengz buek guh haenx. Daihlig doicaenh lijlun cauhmoq, mboujduenh hawj gij Majgwzswhcujyi dangdaih Cungguek daiq miz gij sizcen daegsaek、minzcuz daegsaek、seizdaih daegsaek sienmingz. Senhconz bujgiz aen lijlun dijhi gvendaengz lwnh hwnqguh yiengh seveicujyi miz daegsaek Cungguek haenx, doidoengh cienzyiengz gij Majgwzswhcujyi dangdaih Cungguek, hawj cungqvunz cungj roxyiuj caez bae. Doicaenh aen gunghcwngz yenzgiu caeuq hwnqguh Majgwzswhcujyi lijlun, haeujlaeg hoizdap gij lijlun caeuq saedsaeh vwndiz hungnaek, gungganq ok buek canghlijlun Majgwzswhcujyi ndeu, daegbaed dwg buek canghlijlun cungnienz bouxcoz ndeu. Saedcaih dawz aen haedsim gyaciz dijhi seveicujyi yungz haeuj gozminz gyauyuz caeuq cingsaenz vwnzmingz gensez daengx aen gocwngz, hawj gyoengq yinzminz raeuz roxnyinh baenzneix guh dwg ndei caiq gagrox bae ciuq hengz. Cizgiz damqra gij roenloh ndaej mizyauq yinhyungh aen haedsim gyaciz dijhi seveicujyi bae daz gij swhcauz ndawbiengz haenx, cawjdoengh guh ndei gij hong yisiz hingzdai, gawq gingqcungh cabied、bauyungz lai yiengh, youh miz rengz daeqceih gij yingjyangj gak cungj swhsiengj loengloek caeuq swhsiengj nduknaeuh. Hawj cezyoz sevei gohyoz mwnhoengh fazcanj hwnjdaeuj, doicaenh yozgoh dijhi、yozsuz gvanhdenj、gohyenz fuengfap cauhmoq, gujli cezyoz sevei gohyoz gyaiq vih gij saehnieb dangj caeuq yinzminz lai doengh ukgyaeuj, fazveih gij cozyungh lumj aen cang coux rim coengmingz caeuq dungxcaiz nei, doidoengh gij cezyoz sevei gohyoz cingzgoj caeuq vunzcaiz ndei guek raeuz byaij coh seiqgyaiq.

  (2) Gensez gij vwnzva huzciz, gungganq gij funghgi caeuq sibgvenq vwnzmingz ndawbiengz seizhwng. Gij vwnzva huzciz dwg cungj cingsaenz youqgaenj ndeu, de ndaej dingxcengj daengxcungq yinzminz itcaez doxgiet cinbu. Aeu cizgiz fazcanj sinhvwnz okbanj、gvangjbo denyingj densi、vwnzyoz yisuz saehnieb, genhciz aeu fueng’yiengq cingqdeng bae dazyinx, sawj gij cingqheiq ndawbiengz hwngfat ndaej engq hung engq hoengh. Yawjnaek hawsingz lajmbanj caeuq deihfueng vwnzva doxdaengh fazcanj, roengzrengz sawj lajmbanj、giz dieg bienbik roen’gyae、gyoengq vunz haeuj singz dajgoeng haenx gij cingsaenz vwnzva swnghhoz de bienq ndaej fungcuk lai yiengh bae. Gyagiengz hwnqguh caeuq guenjleix vangjloz vwnzva, cauh’ok vangjloz vanzging ndei. Daihlig hungzyangz aigozcujyi、cizdijcujyi、seveicujyi swhsiengj, aeu gyalai gij yisiz lauxsaed soujsaenq guh cungdenj, gyagiengz sevei gunghdwz、cizyez daudwz、gyahdingz meijdwz、goyinz binjdwz gensez, fazveih daudwz mozfan buengjyiengh cozyungh, dazyinx gyoengqvunz gagrox hengzguh yivu fapdingh、ndawbiengz cwzyin、gyahdingz cwzyin. Gyagiengz caeuq gaijcaenh swhsiengj cwngci gunghcoz, yawjnaek yinzvwnz gvanhvaiz caeuq simleix suhdauj, yungh fuengsik deng bae cawqleix gij gvanhaeh vunz caeuq vunz. Dung’yenz ndawbiengz gak fuengmienh doengzcaez guh ndei bouxcoz nyezrauh swhsiengj daudwz gyauyuz gunghcoz, vih bouxcoz nyezrauh cangqheiq hungmaj cauh’ok ndawbiengz vanzging ndei. Ciu vunzlai haeujlaeg bae gauj gij hozdung cauhlaeb cingsaenz vwnzmingz, laeb caezcienz ndawbiengz gagnyienh fuzvu dijhi, youq ndawbiengz cauxbaenz gij funghgi caeuq sibgvenq sai mbwk bingzdaengj、gingq laux maij nomj、doxndiep doxbang、gamj hengz cingqngeih haenx. Hungzyangz gohyoz cingsaenz, bujgiz gohyoz cihsiz. Gvangqlangh bae gauj gij cangqndang yinhdoengh daengxcungq beksingq cungj caeuqfaenh haenx. Banh ndei 2008 nienz Auyinvei、Canzauvei caeuq 2010 nienz Sibozvei.

  (3) Hawj Cunghvaz vwnzva engq hwng engq hoengh, hwnqguh aen cingsaenz gyayienz doxcaeuq Cunghvaz Minzcuz. Cunghvaz vwnzva dwg gij doenghlig mboujduenh nyoengx hawj Cunghvaz Minzcuz daih ciep daih hwngfat、caezsim fad max baenaj haenx. Aeu cienzmienh yinsiz guekcoj raeuz gij vwnzva daj ciuhgonq cienz roengzdaeuj haenx, genjaeu gij ceiq ndei ceiq youqgaenj de, vut gij ceiq yaez ceiq mbouj miz gyaciz haenx bae, sawj de caeuq aen biengz dangdaih dox hab’wngq、caeuq gij vwnzmingz yienhdaih dox hezdiuz, baujciz gij daegsingq aen minzcuz, daejyienh gij daegsingq aen seizdaih. Lai roengzrengz yungh gij conzdungj ndei Cunghvaz vwnzva bae gyauyuz vunz, yinhyungh yienhdaih gohgi soujduenh haifat leihyungh gij swhyenz naekna minzcuz vwnzva. Lai roengzrengz vat aeu caeuq baujhoh gij vwnzva gak aen minzcuz, yawjnaek baujhoh vwnzvuz caeuq doengh gij vwnzva mbouj dwg aeu vuzciz hingzsik riuzcienz roengzdaeuj haenx, guh ndei hangh hong cingjleix gij sawging caeuq lauxbouh ciuhgonq. Lai roengzrengz guh doiq rog vwnzva gyauhliuz, gaepsou gij vwnzmingz cingzgoj ndei gak guek, hawj Cunghvaz vwnzva youq gwnz seiqgyaiq yingjyangj engq lai engq daih.

  (4) Doicaenh vwnzva cauhmoq, hawj vwnzva engq miz rengzhoengh fazcanj. Daj giz diegsang aen seizdaih guh hwnj, doidoengh vwnzva neiyungz hingzsik、dijci gihci、cienzbo soujduenh cauhmoq, gaijfang caeuq fazcanj vwnzva swnghcanjliz, dwg vwnzva mwnhoengh gocwngz ndawde diuz roen bietdingh aeu ginggvaq haenx. Aeu genhciz aen fueng’yiengq vih yinzminz fuzvu、vih seveicujyi fuzvu caeuq diuz fuengcim bak va caez hai、bak gya ceng lwnh, depgaenh saedsaeh、depgaenh swnghhoz、depgaenh cungqvunz, itcig cungj dawz ndawbiengz yauqik cuengq youq vih daih’it, guh daengz ginghci yauqik caeuq ndawbiengz yauqik song yiengh caez ndaej. Sij baenz caeuq cauh’ok engq lai cingsaenz vwnzva canjbinj ndei, bae fanjyingj gij cawjdaej diegvih caeuq yienhsaed swnghhoz gyoengq yinzminz, hawj cungqvunz haengj doeg maij yawj maengx dingq. Gyalaeg vwnzva dijci gaijgwz, dingh ndei gak hangh cwngcwz, bae bangfuz gij vwnzva saehnieb vih goenggungh leih’ik cij ndalaeb haenx, fazcanj vwnzva canjnieb, gujli vwnzva cauhmoq, cauxbaenz aen vanzging ndei ok cinghbinj、ok vunzcaiz、ok yauqik haenx. Genhciz dawz fazcanj gij vwnzva saehnieb vih goenggungh leih’ik cij ndalaeb haenx, dangguh diuz roenloh cawjdaeuz bae baujcang gij gihbwnj vwnzva gienzik gyoengq yinzminz, lai bued vunzcaiz cienzngaenz doxgaiq, gyagiengz hwnqguh gij vwnzva sezsih ndaw segih caeuq lajmbanj. Daihlig fazcanj vwnzva canjnieb, saedhengz aen canloz aeu gij vwnzva canjnieb hanghmoeg hungnaek bae daiqdoengh haenx, gyavaiq hwnqguh vwnzva canjnieb gihdi caeuq baenz gyoengq deihfueng daegsaek vwnzva canjnieb doxdep doxgaenh, gungganq vwnzva canjnieb guzgan giyez caeuq doengh boux guh canloz douzswh haenx, sawj vwnzva hawciengz mwnhoengh hwnjdaeuj, lai ak caeuq seiqgyaiq gak guek guh gingcwngh. Yinhyungh gauhsinh gisuz bae cauhmoq vwnzva swnghcanj fuengsik, gungganq gij vwnzva ginghyingz fuengsik moq, gyavaiq cauhlaeb aen vwnzva cienzbo dijhi cienzsoengq riengjvaiq、gyuem dieg gig gvangq haenx. Laeb hangh cidu youz guekgya hawj mingzdaeuz miznaj, bae byaujcangh gyoengq canghvwnzva gung’yen hungloet gvaq vunz haenx.

  Cunghvaz Minzcuz fukhwng hungmbwk, bietyienz yaek miz Cunghvaz vwnzva mwnhoengh daeuj gaenriengz. Youq vwnzva gensez ndawde, aeu cukgaeuq fazveih gij cawjdaej cozyungh gyoengq yinzminz, hawj gyoengq canghvwnzva lai maengx hong gaenx guh, engq gagrox、engq cawjdoengh bae doicaenh vwnzva daih fazcanj daih mwnhoengh, youq ndaw gij sizcen hungmbwk yiengh seveicujyi miz daegsaek Cungguek bae guh vwnzva dajcauh, hawj beksingq doengzcaez yiengjsouh gij cingzgoj vwnzva fazcanj.

  
[1] [2] [3] [4] [5] [6] [7] [8] [9] [10] [11] [12]
 
Dozsiengq