Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

YAENGX SANG MBAW GEIZHAUH HUNGMBWK YIENGH SEVEICUJYI MIZ DAEGSAEK CUNGGUEK, VIH DUED’AEU CIENZMIENH HWNQGUH AEN BIENGZ SIUJGANGH CAIQ NDAEJ HINGZ BAE HAENQRENGZ BUEK GUH 6

——Gij Baugau Youq Gwnz Aen Daihhoih Cungguek Gungcanjdangj Daih Cibcaet Baez Daengx Guek Daibyauj Davei
( 2007 nienz 10 nyied 15 hauh)

Huz Ginjdauh
  
【Cihsaw Hung’iq : hung rauh iq】  Dajyaenq
      
  6、Giendingh Mbouj Bienq Bae Fazcanj Yiengh Minzcuj Cwngci Seveicujyi

  Yinzminz minzcuj dwg diuz sengmingh seveicujyi. Fazcanj seveicujyi minzcuj cwngci dwg aen fwndou muzbyauh dangj raeuz itcig cungj mbouj gaijbienq haenx. Gaijgwz hailangh doxdaeuj, raeuz cizgiz onjdangq bae doicaenh cwngci dijci gaijgwz, gij minzcuj cwngci seveicujyi guek raeuz yienh’ok gij fazcanj rengzmingh engqgya hoenghhwd. Cwngci dijci gaijgwz dwg guek raeuz cienzmienh gaijgwz ndawde aen gapbaenz bouhfaenh youqgaenj haenx, bietdingh aeu riengz ginghci ndawbiengz fazcanj cix mboujduenh gyalaeg, caeuq yinzminz mboujduenh lai haengj caeuqfaenh guh cwngci yiengh cingzgvang neix dox hab’wngq. Aeu genhciz diuz roen fazcanj gij seveicujyi cwngci miz daegsaek Cungguek, genhciz dawz aen dangj lingjdauj、yinzminz danggya guhcawj、ciuq fap ceihleix guekgya sam yiengh neix yungzhab youq itheij, genhciz caeuq laeb caezcienz aen cidu yinzminz daibyauj daihhoih、aen cidu lai dangj hozcoz caeuq cwngci hezsangh youz Cungguek Gungcanjdangj lingjdauj、aen cidu minzcuz gihyiz gag guenj caeuq aen cidu gihcwngz cungqvunz gag guenj, mboujduenh doicaenh gij cwngci cidu seveicujyi, sawj de gag laeb ndei caeuq fazcanj.

  Gyalaeg cwngci dijci gaijgwz, bietdingh aeu genhciz aen cwngci fueng’yiengq cingqdeng, aeu baujcwng yinzminz danggya guhcawj dangguh goekdaej, aeu gyagiengz gij rengzhoengh dangj caeuq guekgya、diuhdoengh gij cizgizsing gyoengq yinzminz dangguh muzbyauh, gyadaih seveicujyi minzcuj, hwnqguh seveicujyi fazci guekgya, fazcanj seveicujyi cwngci vwnzmingz. Aeu genhciz dangj raeuz doengjlamx daengxbuenz、hezdiuz gak fueng yiengh lingjdauj haedsim cozyungh neix, hawj dangj raeuz lai ak gohyoz gaemgienz、minzcuj gaemgienz、ciuq fap gaemgienz, baujcwng dangj raeuz ndaej lingjdauj yinzminz bae mizyauq ceihleix guekgya; genhciz guekgya sojmiz gienzlig cungj gvi yinzminz, daj gak aen cwngzsw、gak aen lingjyiz hawj gyoengq gunghminz lai ciuq bouhloh bae caeuqfaenh guh cwngci, ceiq gvangqlangh dwk dung’yenz caeuq cujciz gyoengq yinzminz bae ciuq fap guenjleix gij hongsaeh guekgya caeuq hongsaeh ndawbiengz、guenjleix gij saehnieb ginghci caeuq vwnzva; genhciz ciuq fap ceihleix guekgya aen gihbwnj fanghloz neix, laeb seveicujyi fazci lijnen, sawj guekgya gak hangh gunghcoz cungj ndaej ciuq fazci bae guh, baujcang gij gienzik habfap gyoengq gunghminz; genhciz gij daegdiemj caeuq youhsi seveicujyi cwngci cidu, sawj seveicujyi minzcuj cwngci yienghyiengh cungj guh daengz miz cidu、hab gveihfan、ciuq cwngzsi bae, vih dangj caeuq guekgya ciengzgeiz andingh daezhawj cwngci caeuq faplwd cidu baujcang.

  (1) Gyadaih yinzminz minzcuj, baujcwng yinzminz danggya guhcawj. Yinzminz danggya guhcawj dwg aen bonjcaet caeuq haedsim seveicujyi minzcuj cwngci. Aeu laeb caezcienz minzcuj cidu, hawj gij hingzsik minzcuj engq lai cungj lai yiengh, hawj gij monzloh minzcuj hai ndaej engq gvangq, ciuq fap saedhengz minzcuj senjgij、minzcuj gezcwz、minzcuj guenjleix、minzcuj gamduk, baujcang yinzminz miz gienz rox cingzgvang、miz gienz caeuqfaenh guh、miz gienz gangj siengjfap、miz gienz guh gamduk. Cihciz yinzminz daibyauj daihhoih ciuq fap hengz ciznwngz, rox dawz gij cawjcieng aen dangj doenggvaq gij cwngzsi fapdingh bienqbaenz gij eiqceiq guekgya; baujcang yinzda daibyauj ciuq fap hengzsawj cizvu gienzlig, sawj yinzda daibyauj caeuq beksingq maedcaed lienzhaeh, genyi cugbouh saedhengz hawsingz lajmbanj ciuq doxdoengz yinzgouj beijlaeh bae senjgij yinzda daibyauj; gyagiengz yinzda cangzveijvei cidu gensez, sawj gij vunz gapbaenz de cihsiz gezgou caeuq nienzlingz gezgou bienq ndaej engq ndei bae. Cihciz yinzminz cwnghez hopheux doxgiet caeuq minzcuj song aen cawjdaez hung neix bae hengz ciznwngz, doicaenh cwngci hezsangh、minzcuj gamduk、canhcwng yicwng cidu gensez; dawz cwngci hezsangh lied haeuj ndaw gezcwz cwngzsi bae, laeb caezcienz minzcuj gamduk gihci, hawj canhcwng yicwng lai miz saedcaih yauqgoj; gyagiengz cwnghez bonjndang gensez, fazveih hezdiuz gvanhaeh、gyonjcomz ligliengh、daez genyi ok geiqmaeuz、vih daengxbuenz guekgya daihsaeh fuzvu yiengh cozyungh youqgaenj neix. Genhciz gak aen minzcuz itlwd bingzdaengj, baujcwng doengh giz deihfueng minzcuz gag guenj haenx ciuq fap hengzsawj gij gienzlig gag guenj. Doicaenh gezcwz gunghcoz, sawj de bienq ndaej engq gohyoz、minzcuj bae, laeb caezcienz doengh gij hidungj ndaej doiq gezcwz gunghcoz guh saenqsik caeuq ciliz cihciz haenx, sawj gezcwz gocwngz engqgya ronghcingx、cungqvunz caeuqfaenh engq lai, youq mwh ceiqdingh doengh gij faplwd fapgvi dem goenggungh cwngcwz caeuq gij leih’ik cungqvunz gvanlienz maedcaed haenx, ciuq yenzcwz aeu goenghai dingqaeu yigen. Gyagiengz gunghminz yisiz gyauyuz, laeb seveicujyi minzcuj fazci、swyouz bingzdaengj、goengbingz cingqngeih yiengh lijnen neix. Cihciz gunghvei、gungcinghdonz、fulenz daengj yinzminz donzdij ciuq faplwd caeuq gij canghcwngz bonjfaenh bae guh gunghcoz, caeuqfaenh guenjleix ndawbiengz caeuq guh goenggungh fuzvu, henhoh gij gienzik habfap cungqvunz.

  (2) Fazcanj gihcwngz minzcuj, baujcang yinzminz ndaej miz gij minzcuj gienzleih engq lai engq saedcaih. Yinzminz ciuq fap cigciep hengzsawj minzcuj gienzleih, guenjleix gihcwngz goenggungh hongsaeh caeuq goeng’ik saehnieb, saedhengz gag guenjleix、gag fuzvu、gag gyauyuz、gag gamduk, doiq ganbu guh minzcuj gamduk, dwg yinzminz danggya guhcawj ndawde diuz roenloh ceiq mizyauq、ceiq gvangqlangh haenx, bietdingh aeu dangguh fazcanj seveicujyi minzcuj cwngci ndawde aen gunghcwngz dajdaej haenx bae cungdenj doicaenh. Aeu laeb caezcienz gij gihcwngz ginzcung gag guenj gihci youz gihcwngz dangj cujciz lingjdauj、gig miz rengzhoengh haenx, gya’gvangq aen gvaengxlaengx gihcwngz cungqvunz gag guenj, laeb caezcienz minzcuj guenjleix cidu, dawz gij segih hawsingz lajmbanj hwnqguh baenz aen ndawbiengz swnghhoz gungdungzdij guenjleix mbouj luenh、fuzvu dohdaengz、vwnzmingz huzciz haenx. Cienzsim cienzeiq baenghgauq gunghyinz gaihgiz, laeb caezcienz gij giyez swyez danhvei minzcuj guenjleix cidu aeu cizgungh daibyauj daihhoih guh gihbwnj hingzsik haenx, doicaenh hongsaeh ndaw cangj goenghai, cihciz cizgungh caeuqfaenh guenjleix, henhoh gij gienzik habfap gyoengq cizgungh. Gyalaeg yanghcin gihgou gaijgwz, gyagiengz gihcwngz cwnggenz gensez, laeb caezcienz hongsaeh cwngfuj goenghai、hongsaeh ndaw mbanj goenghai daengj cidu, sawj cwngfuj hingzcwng guenjleix caeuq gihcwngz cungqvunz gag guenj saedyienh mizyauq hamzciep caeuq lienzdoengh ndaej ndei. Dawz gij cujciz ndawbiengz youq gyalai cungqvunz caeuqfaenh、fanjyingj cungqvunz sim’eiq caeuq iugouz fuengmienh gij cizgiz cozyungh de fazveih okdaeuj, sawj gij goengnaengz ndawbiengz gag guenj bienq ndaej lai giengz.

  (3) Cienzmienh lozsiz ciuq fap ceihleix guekgya aen gihbwnj fanghloz neix, gyavaiq hwnqguh seveicujyi fazci guekgya. Ciuq fap ceihleix guekgya, dwg gij gihbwnj iugouz seveicujyi minzcuj cwngci. Aeu genhciz gohyoz laeb fap、minzcuj laeb fap, laeb caezcienz aen seveicujyi faplwd dijhi miz daegsaek Cungguek. Gyagiengz saedhengz fapgoek caeuq faplwd, genhciz gunghminz youq dangqnaj faplwd bouxboux bingzdaengj, henhoh ndawbiengz goengbingz cingqngeih, henhoh gij doengjit、cunhyenz、gienzvi seveicujyi fazci. Doicaenh ciuq fap hengzsawj guekgya gienzlig. Gyalaeg swhfaz dijci gaijgwz, dawz swhfaz cizgenz boiqbaij ndaej engq ndei bae, dawz swhfaz hingzveiz guh gveihfan bae, hwnqguh aen seveicujyi swhfaz cidu goengcingq、yauliz sang、miz gienzvi haenx, baujcwng saemjbuenq gihgvanh、genjcaz gihgvanh ciuq fap doglaeb goengcingq bae hengzsawj gij gienz saemjbuenq、gij gienz genjcaz. Gyagiengz cwngfaz duivuj gensez, guh daengz yiemzgek、goengcingq、vwnzmingz dwk caephengz faplwd. Haeujlaeg bae gauj fazci senhconz gyauyuz, hawj gij cingsaenz fazci fat ndaej engq hung engq hoengh, cauxbaenz gij heiqfaenh ndawbiengz vunzlai cungj gagrox hag faplwd ciuqsouj faplwd yinhyungh faplwd. Gingqcungh caeuq baujcang gij gienzleih bouxvunz, ciuq fap baujcwng sojmiz gyoengq vunz ndawbiengz cungj miz gij gienzleih bingzdaengj caeuqfaenh、bingzdaengj fazcanj. Gak gaep dangj cujciz caeuq daengxcungq dangjyenz aeu gagrox youq ndaw aen gvangxlaengx youz fapgoek caeuq faplwd hanhdingh haenx bae guh saehcingz, daiqdaeuz henhoh gij gienzvi fapgoek caeuq faplwd.

  (4) Hawj aen gyaezguek doengjit cansen bienq ndaej engq hung engq coek bae, comzgiet sojmiz gij ligliengh ndaej comzgiet haenx. Coicaenh cwngdangj gvanhaeh、minzcuz gvanhaeh、cunghgyau gvanhaeh、gaihcwngz gvanhaeh、ndaw guek rog guek beixnuengx gvanhaeh bienq ndaej huzciz, neix doiq gyalai doxgiet、gyonjcomz ligliengh miz gij cozyungh mbouj dingjlawh ndaej. Aeu gvancez diuz fuengcim ciengzgeiz caemhyouq、dox guh gamduk、simsaeh doxrox、yungznyaenq caezcaemh, gyagiengz caeuq minzcuj dangjbai hozcoz guh saeh, cihciz minzcuj dangjbai caeuq doengh boux yinzsw mbouj haeuj dangjbai haenx engq ndei bae hengz gij ciznwngz canhcwng yicwng、minzcuj gamduk, daj rog dangj genjleh caeuq doigawj engq lai ganbu maenhndei daeuj dangnyaemh lingjdauj cizvu. Dawz gak minzcuz doengzcaez doxgiet haenqrengz buek guh、doengzcaez mwnhoengh fazcanj aen cawjdaez neix gaem youq ndaw fwngz ndaetndaet bae, baujcang gij gienzik habfap gyoengq siujsoq minzcuz, gyamaenh caeuq fazcanj gij seveicujyi minzcuz gvanhaeh bingzdaengj doxgiet doxbang huzciz haenx. Cienzmienh gvancez diuz cunghgyau gunghcoz gihbwnj fuengcim aen dangj, hawj gij yinzsw cunghgyaugai caeuq gyoengq ginzcung saenqgyauq haenx youq coicaenh ginghci ndawbiengz fazcanj ndawde fazveih cizgiz cozyungh. Gujli gij yinzsw ndawbiengz gaihcwngz moq laemxsim caeuqfaenh hwnqguh yiengh seveicujyi miz daegsaek Cungguek. Cihciz gyoengq beixnuengx Vazgyauz rog guek、gyoengq Vazgyauz dauqma guekcoj dem gij vunz ndaw ranz de gvansim dem caeuqfaenh guh guekcoj yendaiva gensez caeuq huzbingz doengjit daihnieb.

  (5) Gyavaiq hingzcwng guenjleix dijci gaijgwz, hwnqguh yiengh cwngfuj vih ndawbiengz fuzvu haenx. Hingzcwng guenjleix dijci gaijgwz dwg bouh youqgaenj gyalaeg gaijgwz. Aeu dawzrem ceiqdingh hingzcwng guenjleix dijci gaijgwz cungjdaej fueng’anq, roengzrengz cienjbienq ciznwngz、leixswnh gvanhaeh、gaijndei gezgou、daezsang yaunwngz, cauxbaenz aen hingzcwng guenjleix dijci gienzlig caeuq cwzyin doxdaengh、faengoeng hableix、gezcwz gohyoz、caephengz ndaej swnh、gamduk daeklig haenx. Laeb caezcienz cwngfuj cizcwz dijhi, guh ndei goenggungh fuzvu dijhi, doihengz denjswj cwng’vu, giengzvaq ndawbiengz guenjleix caeuq goenggungh fuzvu. Gyavaiq doicaenh cwngfuj caeuq giyez faenhai、cwngfuj caeuq guekmiz swhcanj guenjleix dem ginghyingz faenhai、cwngfuj caeuq saehnieb danhvei faenhai、cwngfuj caeuq hawciengz cunghgai cujciz faenhai, gveihfan hingzcwng hingzveiz, gyagiengz hwnqguh hingzcwng caepfap bouhmonz, gemjnoix caeuq gveihfan hingzcwng saemjbae, cwngfuj noix guenj veizgvanh ginghci yinhhengz. Sawj doengh aen bouhmonz youz baihgwnz cuizciz guenjleix haenx caeuq deihfueng cwngfuj gij gvanhaeh de bienq gveihfan bae. Lai roengzrengz cingjhab gihgou, damqra saedhengz aen daih bouhmonz dijci ciznwngz gaenjmaed doengjit haenx, laeb caezcienz gij hezdiuz boiqhab gihci ndawgyang bouhmonz caeuq bouhmonz. Cinggemj caeuq gveihfan gak loih lwnhsaeh hezdiuz gihgou dem gij banhsaeh gihgou de, gemjnoix hingzcwng cwngzsw, gyangqdaemq hingzcwng cingzbonj, roengzrengz gaijgez doengh gij vwndiz gihgou cungzfuk ndalaeb、cizcwz dox gyauca faen mbouj cingcuj、doengz it gienh saeh cix youz haujlai bouhmonz gak aen gag guh gietdingh caeuq fatbouh hingzcwng minghlingh haenx. Doengbuenz suenqveh dangjveij、cwngfuj caeuq yinzda、cwnghez gihgou ndalaeb, gemjnoix lingjdauj cizvu soqliengh, yiemzgek gaemhanh benhci. Gyavaiq doicaenh saehnieb danhvei faenloih gaijgwz.

  (6) Laeb caezcienz hanhhaed caeuq gamduk gihci, baujcwng gij gienzlig yinzminz gyau hawj haenx seizseiz cungj yungh bae maeuz leih’ik hawj yinzminz. Yaek saedbauj gienzlig hengzsawj ndaej cingq ndaej deng, couh bietdingh aeu hawj gienzlig youq rog ndit yinhhengz, hawj beksingq ndaej yawjraen caeuq gamduk. Aeu genhciz yungh cidu bae guenj gienzlig、guenj hongsaeh、guenj vunz, laeb hwnj laeb caezcienz gij gienzlig gezgou caeuq yinhhengz gihci ndaej sawj gij gienzlig guh gezcwz、gij gienzlig bae caephengz、gij gienzlig guh gamduk gawq dox hanhhaed youh dox hezdiuz haenx. Laeb caezcienz cujciz fazci caeuq cwngzsi gveihcwz, baujcwng guekgya gihgvanh ciuq gij gienzhanh caeuq cwngzsi faplwd gvidingh haenx bae hengzsawj gienzlig、hengzguh cizcwz. Laeb caezcienz gak loih goenghai banh saeh cidu, hawj cwngfuj gunghcoz bienq ndaej engq lai ronghcingx, hawj cungqvunz engg lai saenqfug. Cungdenj gyagiengz doiq lingjdauj ganbu daegbied dwg cujyau lingjdauj ganbu、vunz caiz huq guenjleix sawjyungh、gvanhgen ganghvei guh gamduk, laeb caezcienz faekcam gij vwndiz miz ngeizvaeg、cazdawz cwzyin、ginghci cwzyin saemjgeiq、aenvih guh loek gag swzciz、baqmienx daengj cidu. Lozsiz ndaw dangj gamduk diuzlaeh, gyagiengz minzcuj gamduk, fazveih ndei gij cozyungh yizlun gamduk, sawj gamduk ndaej miz gaprengz engq lai、saedcaih yauqgoj engq ndei.

  Seveicujyi yied fazcanj, minzcuj hixcaemh yied fazcanj. Youq gwnz roen fazcanj yiengh seveicujyi miz daegsaek Cungguek, gyoengq vunz Cungguek Gungcanjdangj caeuq gyoengq yinzminz Cungguek raeuz, itdingh ndaej mboujduenh fazcanj gij seveicujyi minzcuj cwngci ak hung ak maj、rengzhoengh gig daih haenx.

  
[1] [2] [3] [4] [5] [6] [7] [8] [9] [10] [11] [12]
 
Dozsiengq