Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

YAENGX SANG MBAW GEIZHAUH HUNGMBWK YIENGH SEVEICUJYI MIZ DAEGSAEK CUNGGUEK, VIH DUED’AEU CIENZMIENH HWNQGUH AEN BIENGZ SIUJGANGH CAIQ NDAEJ HINGZ BAE HAENQRENGZ BUEK GUH 2

——Gij Baugau Youq Gwnz Aen Daihhoih Cungguek Gungcanjdangj Daih Cibcaet Baez Daengx Guek Daibyauj Davei
( 2007 nienz 10 nyied 15 hauh)

Huz Ginjdauh
  
【Cihsaw Hung’iq : hung rauh iq】  Dajyaenq
      
  2、Aen Lizsij Cincwngz Hungmbwk Gaijgwz Hailangh

  Raeuz couh yaek coux daeuj gaijgwz hailangh 30 hopbi. 1978 nienz, aen dangj raeuz ciuhai aen cib’it gaiq sam cungh cenzvei miz lizsij yiyi hungnaek haenx, hainduj le aen lizsij seizgeiz moq gaijgwz hailangh. Daj mwhhaenx doxdaeuj, gyoengq vunz Cungguek Gungcanjdangj caeuq Cungguek yinzminz yungh gij cingsaenz mbouj lau gannanz haenqrengz roemx baenaj caeuq gij sizcen cauhmoq hunghung hoenghhoengh haenx, caiq sij ok le gij fwensei lizsij moq Cunghvaz Minzcuz gag ak mbouj dingz、haenqheiq baenaj haenx, gij yienghsiengq Cungguek yinzminz、gij yienghsiengq aen Cungguek hengz seveicujyi、gij yienghsiengq Cungguek Gungcanjdangj cungj fatseng le lizsijsing bienqvaq.

  Gaijgwz hailangh dwg ciengz gwzming hungmbwk moq aen dangj raeuz youq baihlaj gij seizdaih diuzgienh moq daz yinzminz bae guh haenx, muzdiz couh dwg aeu gaijfang caeuq fazcanj gij swnghcanjliz ndawbiengz, saedyienh guekgya yendaiva, hawj Cungguek yinzminz fouqmiz hwnjdaeuj, saenqhwng aen Cunghvaz Minzcuz hungmbwk raeuz; couh dwg aeu doidoengh gij cidu seveicujyi guek raeuz gag laeb caezcienz caeuq fazcanj, hawj seveicujyi lai miz rengzhoengh moq, hwnqguh caeuq fazcanj yiengh seveicujyi miz daegsaek Cungguek; couh dwg aeu youq ndaw dazyinx dangdaih Cungguek fazcanj cinbu bae gyagiengz caeuq gaijndei aen dangj gensez, baujciz caeuq fazcanj gij senhcinsing aen dangj, saedbauj aen dangj itcig cungj byaij youq baihnaj seizdaih.

  Raeuz aeu ciengzlwenx geiqmaenh, aen saehnieb hungmbwk gaijgwz hailangh, dwg youq aen dangj raeuz daih’it daih cunghyangh lingjdauj cizdij aeu Mauz Cwzdungh dungzci guh haedsim haenx cauhlaeb Mauz Cwzdungh Swhsiengj, daz daengx dangj daengx guek gak cuz yinzminz laeb aen Cungguek moq, aeundaej seveicujyi gwzming caeuq gensez cwngzcik hungmbwk caeuq sinhoj damqra gij gvilwd hwnqguh seveicujyi caiq aeundaej gingniemh dijbauj aen giekdaej neix gwnzde bae guh. Sinhminzcujcujyi gwzming ndaej hingz, gij gihbwnj cidu seveicujyi laeb hwnjdaeuj, vih dangdaih Cungguek sojmiz fazcanj cinbu dwkroengz le aen cwngci cenzdiz caeuq gij cidu giekdaej goekgaen.

  Raeuz aeu ciengzlwenx geiqmaenh, aen saehnieb hungmbwk gaijgwz hailangh, dwg aen dangj raeuz daihngeih daih cunghyangh lingjdauj cizdij aeu Dwng Siujbingz dungzci guh haedsim haenx daz daengx dangj daengx guek gak cuz yinzminz haicauh okdaeuj. Mienhdoiq aen gizmen yungyiemj gannanz youz 10 bi “Vwnzva Da Gwzming” cauhbaenz haenx, aen dangj raeuz daihngeih daih cunghyangh lingjdauj cizdij genhciz gaijfang swhsiengj、daj ndaw saehsaed ra aeu caenleix, yungh yiengh cwngci damjliengh caeuq lijlun damjliengh hungloet, gohyoz bingzgyaq Mauz Cwzdungh dungzci caeuq Mauz Cwzdungh Swhsiengj, cienzbouh foujdingh gij lijlun caeuq sizcen loengloek “aeu gaihgiz doucwngh guh cungsim” , guh’ok aen lizsijsing gezcwz dawz aen gunghcoz cungsim dangj caeuq guekgya cienj daengz ginghci gensez fuengmienh、saedhengz gaijgwz hailangh, laebdingh diuz gihbwnj lohsienq youq giz duenhmbaek cogaep seveicujyi, cawjcieng byaij diuz roen bonjfaenh、hwnqguh yiengh seiveicujyi miz daegsaek Cungguek, cauhlaeb le Dwng Siujbingz Lijlun, ceijyinx daengx dangj daengx guek gak cuz yinzminz youq gwnz roen hungmbwk gaijgwz hailangh yamq hung baenaj.

  Raeuz aeu ciengzlwenx geiqmaenh, aen saehnieb hungmbwk gaijgwz hailangh, dwg youz aen dangj raeuz daihsam daih cunghyangh lingjdauj cizdij aeu Gyangh Cwzminz dungzci guh haedsim haenx daz daengx dangj daengx guek gak cuz yinzminz ciepswnj、fazcanj caemhcaiq gig baenz nyoengx haeuj 21 sigij bae. Coengz cibsam gaiq seiq cungh cenzvei daengz cibroek daih, aen dangj raeuz daihsam daih cunghyangh lingjdauj cizdij youq mwh lizsij gvandaeuz youqgaenj ciep dawz rapnaek haenx, yaengx sang mbaw geizhauh hungmbwk Dwng Siujbingz Lijlun, genhciz gaijgwz hailangh、caeuq seizdaih caez baenaj, youq dangqnaj ndaw guek rog guek cwngci funghboh、ginghci fung’yiemj daengj gaujniemh yiemzhaenq, baenghgauq dangj caeuq yinzminz, hendawz yiengh seveicujyi miz daegsaek Cungguek, cauhlaeb yiengh hawciengz ginghci dijci moq seveicujyi, cauh’ok aen gizmen moq cienzmienh hailangh, doicaenh hangh gunghcwngz hungmbwk moq aen dangj gensez, cauhlaeb “Sam Aen Daibyauj” Cung’yau Swhsiengj, laebdaeb daz aen ruzhung gaijgwz hailangh riengz aen fueng’yiengq cingqdeng haenx buqlangh baenaj.

  Cibroek daih doxdaeuj, raeuz aeu Dwng Siujbingz Lijlun caeuq “Sam Aen Daibyauj” Cung’yau Swhsiengj bae cijdauj, swnh’wngq hingzseiq ndaw guek rog guek gij fazcanj bienqvaq de, coemjdawz aen canloz seizgei ndei youqgaenj, fazyangz gij cingsaenz gouz caen guh saed、hairoen baenaj, genhciz lijlun cauhmoq caeuq sizcen cauhmoq, roengzrengz doidoengh gohyoz fazcanj、coicaenh ndawbiengz huzciz, laeb caezcienz yiengh hawciengz ginghci dijci seveicujyi, youq ndaw sizcen cienzmienh hwnqguh aen biengz siujgangh, giendingh mbouj bienq dwk dawz aen saehnieb hungmbwk gaijgwz hailangh laebdaeb doinyoengx baenaj.

  Seizgeiz moq aen daegdiemj ceiq sienmingz de dwg gaijgwz hailangh. Daj lajmbanj daengz hawsingz、daj ginghci lingjyiz daengz gizyawz gak aen lingjyiz, aen seiqdaeuz cienzmienh gaijgwz lanzdangj mbouj ndaej, gig vaiq mbehai lo; daj henzhaij daengz henzdah henzguek, daj fueng dieg baihdoeng daengz fueng dieg cungqgyang dem fueng dieg baihsae, aen doulaux doiq rog hailangh mbouj gaw mbouj suk, byaengqbyat mbehai lo. Ciengz daih gaijgwz daih hailangh gwnz lizsij caengz miz gvaq neix, gig daih diuhdoengh le gij cizgizsing ik fanh yinzminz, sawj guek raeuz baenzgoeng saedyienh le aen lizsij cienjvan hungmbwk, coengz aen giva ginghci dijci gig cizcungh, cienj daengz yiengh hawciengz ginghci dijci seveicujyi gig miz rengzhoengh, coengz fungsaek buenq fungsaek cienj daengz cienz fueng’vih hailangh. Seizneix, aen Cungguek hengz seveicujyi、najyiengq yendaiva、najyiengq seiqgyaiq、najyiengq daengzcog ndeu, cingqcaih daengjsoengz youq mbiengj baihdoeng gwnz seiqgyaiq.

  Seizgeiz moq gij cwngzcik ceiq yienhda de dwg fazcanj riengjvaiq. Aen dangj raeuz saedhengz aen canloz yendaiva gensez “faen sam bouh byaij”, daz yinzminz ganhoj haenqrengz buek guh, doidoengh guek raeuz yungh gij sukdoh gwnz seiqgyaiq noix miz, lienzdaemh riengjvaiq fazcanj hwnjdaeuj. Gij ginghci guek raeuz coengz giz ceng di boedbaih fazcanj daengz cungjliengh yat daengz seiqgyaiq daihseiq、cingouj cuzgouj cungjngeg baiz youq seiqgyaiq daihsam, yinzminz swnghhoz daj gwn daenj mbouj gaeuq fazcanj daengz cungjdaej siujgangh, gij vunzgungz lajmbanj coengz 2 ik 5000 lai fanh gemjnoix daengz 2000 lai fanh, cwngci gensez、vwnzva gensez、ndawbiengz gensez aeundaej gij cwngzcik daengx seiqgyaiq cungj doeksaet. Cungguek fazcanj hwnjdaeuj, mboujdanh sawj Cungguek yinzminz onjdingh byaijhwnj le diuz roen gvangqlangh fouqmiz an’onj, caemhcaiq vih seiqgyaiq ginghci fazcanj caeuq vunzloih vwnzmingz cinbu guh’ok le gung’yen hungloet.

  Seizgeiz moq aen geiqhauh ceiq doed okdaeuj de dwg caeuq seizdaih caez baenaj. Aen dangj raeuz genhciz diuz swhsiengj lohsienq Majgwzswhcujyi, mboujduenh damqra caeuq hoizdap gijmaz dwg seveicujyi、baenzlawz hwnqguh seveicujyi, hwnqguh yiengh aen dangj lawz、baenzlawz hwnqguh aen dangj, saedyienh yiengh fazcanj lawz、baenzlawz fazcanj daengj lijlun hungnaek caeuq saedsaeh vwndiz, mboujduenh doicaenh Majgwzswhcujyi daiq miz gij daegdiemj Cungguek bae, genhciz caemhcaiq fungfouq gij gihbwnj lijlun、gihbwnj lohsienq、gihbwnj ganghlingj、gihbwnj gingniemh aen dangj. Seveicujyi caeuq Majgwzswhcujyi youq gwnz biengzdieg Cungguek fat ok rengzhoengh hwdhwd, daiq hawj yinzminz engq lai fukheiq, sawj Cunghvaz Minzcuz yamq hung gyaep hwnj aen cauzliuz seizdaih baenaj, byaij hwnj diuz roenrongh daih fukhwng.

  Saehsaed gaenq rengzrwd cwngmingz, gaijgwz hailangh dwg aen genjdingh youqgaenj bae gietdingh diuz minghyinh dangdaih Cungguek haenx, dwg diuz roen fazcanj yiengh seveicujyi miz daegsaek Cungguek、saedyienh Cunghvaz Minzcuz daih fukhwng cix bietdingh aeu byaij haenx; cijmiz seveicujyi cij ndaej gouq Cungguek, cijmiz gaijgwz hailangh cij ndaej fazcanj Cungguek、fazcanj seveicujyi、fazcanj Majgwzswhcujyi.

  Gaijgwz hailangh dangguh ciengz gwzming moq hungmbwk ndeu, mbouj gojnaengz itloh swnh rumz, hix mbouj gojnaengz mbat guh couh baenz caez. Gij ceiq gaenbonj de dwg, gaijgwz hailangh hab gij simmuengh aen dangj caeuq beksingq, swnh’wngq gij cauzliuz aen seizdaih, fueng’yiengq caeuq roenloh cungj deng caez, cingzyauq caeuq goengcik mbouj foujdingh ndaej, dingzgwx caeuq doiqdauq mbouj ndaej doing.

  Gaijgwz hailangh itloh gvaqdaeuj, aen dangj raeuz dawz genhciz gij gihbwnj yienzleix Majgwzswhcujyi caeuq doicaenh Majgwzswhcujyi daiq miz gij daegdiemj Cungguek bae giethab hwnjdaeuj, dawz genhciz seiq hangh gihbwnj yenzcwz caeuq genhciz gaijgwz hailangh giethab hwnjdaeuj, dawz gingqcungh yinzminz gij cingsaenz dajcauh gonq vunz de caeuq gyagiengz、gaijndei gij lingjdauj aen dangj giethab hwnjdaeuj, dawz genhciz gij gihbwnj cidu seveicujyi caeuq fazcanj hawciengz ginghci giethab hwnjdaeuj, dawz doidoengh ginghci gihcuj bengwz caeuq doidoengh sangcwngz gencuz gaijgwz giethab hwnjdaeuj, dawz fazcanj gij swnghcanjliz ndawbiengz caeuq daezsang gij vwnzmingz suciz daengx aen minzcuz giethab hwnjdaeuj, dawz daezsang yauliz caeuq coicaenh ndawbiengz goengbingz giethab hwnjdaeuj, dawz genhciz doglaeb gag guhcawj caeuq caeuqfaenh guh ginghci cenzgiuzva giethab hwnjdaeuj, dawz coicaenh gaijgwz fazcanj caeuq baujciz ndawbiengz onjdingh giethab hwnjdaeuj, dawz doicaenh yiengh saehnieb hungmbwk seveicujyi miz daegsaek Cungguek caeuq doicaenh hangh gunghcwngz hungmbwk moq aen dangj gensez giethab hwnjdaeuj, sawj raeuz aen guek hung miz cibgeij ik vunz youh cingqcaih fazcanj baenzneix youq baenzlawz bae baetduet gungzhoj、gyavaiq saedyienh yendaiva、gyamaenh caeuq fazcanj seveicujyi daengj fuengmienh, aeundaej le gij gingniemh dijbauj.

  Gaijgwz hailangh doxdaeuj raeuz aeundaej sojmiz cingzcik caeuq cinbu, aen yienzaen goekgaen de gvigyonj hwnjdaeuj couh dwg: Haicauh le diuz roen seveicujyi miz daegsaek Cungguek, cauxbaenz le aen lijlun dijhi guh yiengh seveicujyi miz daegsaek Cungguek. Yaengx sang mbaw geizhauh hungmbwk yiengh seveicujyi miz daegsaek Cungguek, gij ceiq gaenbonj de couh dwg aeu genhciz diuz roen neix caeuq aen lijlun dijhi neix.

  Diuz roen seveicujyi miz daegsaek Cungguek, couh dwg youq Cungguek Gungcanjdangj lingjdauj baihlaj, gaengawq gihbwnj guekcingz, aeu ginghci gensez guh cungsim, genhciz seiq hangh gihbwnj yenzcwz, genhciz gaijgwz hailangh, gaijfang caeuq fazcanj gij swnghcanjliz ndawbiengz, gyamaenh caeuq laeb caezcienz gij cidu seveicujyi, hwnqguh yiengh hawciengz ginghci seveicujyi、yiengh minzcuj cwngci seveicujyi、yiengh senhcin vwnzva seveicujyi、yiengh biengz huzciz seveicujyi, hwnqguh aen seveicujyi yendaiva guekgya fouqgiengz minzcuj vwnzmingz huzciz haenx. Diuz roen seveicujyi miz daegsaek Cungguek ndaej yienghyiengh cungj cingqdeng caez、ndaej daz Cungguek fazcanj cinbu, aen laizyouz ceiq youqgaenj de dwg raeuz gawq genhciz le gij gihbwnj yenzcwz gohyoz seveicujyi, youh gaengawq gij saedsaeh cingzgvang guek raeuz caeuq seizdaih daegcwng, hawj de daiq miz yiengh daegsaek Cungguek sienmingz haenx. Youq dangdaih Cungguek, genhciz diuz roen seveicujyi miz daegsaek Cungguek, couh dwg caencingq genhciz seveicujyi.

  Aen lijlun dijhi guh yiengh seveicujyi miz daegsaek Cungguek, couh dwg aen gohyoz lijlun dijhi bauhamz Dwng Siujbingz Lijlun、“Sam Aen Daibyauj” Cung’yau Swhsiengj dem gohyoz fazcanjgvanh daengj canloz swhsiengj hungnaek youq ndawde. Aen lijlun dijhi neix, genhciz caeuq fazcanj le Majgwzswh-Lezningzcujyi、Mauz Cwzdungh Swhsiengj, comzgiet le gij dungxcaiz caeuq lwedhanh geij daih vunz Cungguek Gungcanjdangj daz yinzminz mboujduenh damqra caeuq sizcen haenx, dwg aen cingzgoj ceiq moq sawj Majgwzswhcujyi daiq miz daegdiemj Cungguek bae, dwg gij cwngci caeuq cingsaenz caizfouq ceiq dijbauj aen dangj raeuz, dwg aen swhsiengj giekdaej caezcaemh coi daengx guek gak cuz yinzminz doxgiet haenqrengz buek guh haenx. Aen lijlun dijhi guh yiengh seveicujyi miz daegsaek Cungguek, dwg aen lijlun dijhi hailangh youh mboujduenh fazcanj ndeu.《Gungcanjdangj Senhyenz》fatbiuj doxdaeuj gaenh 160 bi, gij sizcen de cwngmingz, Majgwzswhcujyi cijmiz caeuq gij guekcingz bonj guek dox giethab、caeuq seizdaih fazcanj doengzcaez cinbu、caeuq yinzminz ginzcung caemh minghyinh, cij ndaej fatok gij rengzlig sengmingh、rengzlig cauhmoq、rengzlig gamjciu giengzdaih. Youq dangdaih Cungguek, genhciz aen lijlun dijhi guh yiengh seveicujyi miz daegsaek Cungguek, couh dwg caencingq genhciz Majgwzswhcujyi.

  Sizcen ciengzlwenx mbouj miz haenzhamq, cauhmoq hix ciengzlwenx mbouj miz haenzhamq. Gyoengq dungzci daengx dangj aeu engqgya insik、ciengzgeiz genhciz caeuq mboujduenh fazcanj diuz roen seveicujyi miz daegsaek Cungguek caeuq aen lijlun dijhi guh yiengh seveicujyi miz daegsaek Cungguek youz aen dangj raeuz ginggvaq gannanz haemzhoj cij dajcauh okdaeuj haenx, genhciz gaijfang swhsiengj、daj ndawj saehsaed ra aeu caenleix、caeuq seizdaih caez baenaj, gamj bae bengwz、gamj bae cauhmoq, ciengzlwenx mbouj bienq gaengjbanj、ciengzlwenx mbouj dingzgwz raengx youq, mbouj lau saek yiengh fung’yiemj, mbouj deng saek yiengh gauxca gaujluenh, sawj diuz roen seveicujyi miz daegsaek Cungguek yied byaij yied gvangq, hawj gij Majgwzswhcujyi dangdaih Cungguek fat ok gij caenleix engqgya ronghlwenq wenjda.

  
[1] [2] [3] [4] [5] [6] [7] [8] [9] [10] [11] [12]
 
Dozsiengq