Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

YAENGX SANG MBAW GEIZHAUH HUNGMBWK YIENGH SEVEICUJYI MIZ DAEGSAEK CUNGGUEK, VIH DUED’AEU CIENZMIENH HWNQGUH AEN BIENGZ SIUJGANGH CAIQ NDAEJ HINGZ BAE HAENQRENGZ BUEK GUH 1

——Gij Baugau Youq Gwnz Aen Daihhoih Cungguek Gungcanjdangj Daih Cibcaet Baez Daengx Guek Daibyauj Davei
( 2007 nienz 10 nyied 15 hauh)

Huz Ginjdauh
  
【Cihsaw Hung’iq : hung rauh iq】  Dajyaenq
      
Gak boux dungzci:

  Seizneix, gou daibyauj daih cibroek gaiq cunghyangh veijyenzvei, yiengq daihhoih guh baugau.

  Baez Daihhoih Cungguek Gungcanjdangj Daih Cibcaet Baez Daengx Guek Daibyauj Davei, dwg baez daihhoih cibfaen youqgaenj ndeu, de youq guek raeuz gaijgwz fazcanj daengz aen duenhmbaek ceiq youqgaenj haenx ciuhai. Aen cawjdaez baez daihhoih neix dwg: Yaengx sang mbaw geizhauh hungmbwk yiengh seveicujyi miz daegsaek Cungguek, yungh Dwng Siujbingz Lijlun caeuq “Sam Aen Daibyauj” Cung’yau Swhsiengj bae cijdauj, haeujlaeg gvancez lozsiz gohyoz fazcanjgvanh, laebdaeb gaijfang swhsiengj, genhciz gaijgwz hailangh, doidoengh gohyoz fazcanj, coicaenh ndawbiengz huzciz, vih dued’aeu cienzmienh hwnqguh aen biengz siujgangh caiq ndaej hingz bae haenqrengz buek guh.

  Mbaw geizhauh hungmbwk yiengh seveicujyi miz daegsaek Cungguek, dwg mbaw geizhauh daz dangdaih Cungguek fazcanj cinbu, dwg mbaw geizhauh daz daengx dangj daengx guek gak cuz yinzminz doxgiet haenqrengz buek guh. Gaijfang swhsiengj dwg aen daih fapbauj fazcanj yiengh seveicujyi miz daegsaek Cungguek, gaijgwz hailangh dwg gij doenghlig giengzdaih fazcanj yiengh seveicujyi miz daegsaek Cungguek, gohyoz fazcanj、ndawbiengz huzciz dwg aen gihbwnj iugouz fazcanj yiengh seveicujyi miz daegsaek Cungguek, cienzmienh hwnqguh aen biengz siujgangh dwg aen muzbyauh dangj caeuq guekgya daengz 2020 nienz aeu haenqrengz buek guhbaenz haenx, dwg gij leih’ik goekgaen daengx guek gak cuz yinzminz.

  Aen seiqgyaiq seizneix cingqcaih fatseng gij bienqvaq gvangqlangh youh laegdaeuq, dangdaih Cungguek hix cingqcaih fatseng gij bienqgwz gvangqlangh youh laegdaeuq. Seizgei ndei doenghbaez caengz miz gvaq, diuhcan hix dwg doenghbaez caengz miz gvaq, hoeng seizgei ndei lai hung gvaq diuhcan. Daengx dangj bietdingh aeu giendingh mbouj bienq dwk yaengx sang mbaw geizhauh hungmbwk yiengh seveicujyi miz daegsaek Cungguek, daz yinzminz daj giz lizsij hwnjdin moq byaij baenaj, coemjdawz caeuq yungh ndei mwh canloz seizgei ndei youqgaenj neix, gouz caen guh saed, daihdamj haenqrengz baenaj, laebdaeb cienzmienh hwnqguh aen biengz siujgangh、gyavaiq doicaenh yiengh yendaiva seveicujyi, guhbaenz gij sawjmingh ceiq sang ceiq ndei seizdaih gyau hawj raeuz haenx.

  1、Gij Gunghcoz Haj Bi Gvaqbae Neix

  Cibroek daih doxdaeuj haj bi neix, dwg haj bi gig mbouj bingzciengz. Mienhdoiq aen gozci vanzging fukcab boekbienq caeuq aen yinvu gaijgwz fazcanj gannanz naekcaem, aen dangj raeuz daz daengx guek gak cuz yinzminz, yaengx sang mbaw geizhauh hungmbwk Dwng Siujbingz Lijlun caeuq “Sam Aen Daibyauj” Cung’yau Swhsiengj, dingj gvaq gak cungj gannanz caeuq fung’yiemj, cauh’ok le aen gizmen moq yiengh saehnieb seveicujyi miz daegsaek Cungguek, hai ok le aen dieggyaiq moq sawj Majgwzswhcujyi daiq miz gij daegdiemj Cungguek bae.

  Cibroek daih laebdingh aen cijdauj diegvih “Sam Aen Daibyauj” Cung’yau Swhsiengj, guh’ok aen canloz gezcwz cienzmienh hwnqguh aen biengz siujgangh. Vihliux gvancez gij cingsaenz cibroek daih, cunghyangh ciuhai caet baez daengxcungq veiyi, faenbied couh gyalaeg gihgou gaijgwz、laeb caezcienz yiengh hawciengz ginghci dijci seveicujyi、gyagiengz hwnqguh gij gaemgienz naengzlig aen dangj、ceiqdingh “11•5” gveihva、cauhlaeb aen biengz huzciz seveicujyi daengj doengh gij vwndiz hungnaek gvanhaeh daengxbuenz neix, guh’ok le gietdingh caeuq baijbouh, daezok caemhcaiq gvancez gohyoz fazcanjgvanh daengj canloz swhsiengj hungnaek, doidoengh gij gunghcoz aen dangj caeuq guekgya caiq aeundaej cwngzcik moq hungnaek.

  Ginghci saedlig daih fukdoh daezswng. Ginghci baujciz bingzonj riengjvaiq fazcanj, ndaw guek swnghcanj cungjciz bingzyaenz moix bi demmaj 10% doxhwnj, ginghci yauqik mingzyienj daezsang, caizcwng souhaeuj bi beij bi mingzyienj gyalai, huqgyaq daihdaej onjdingh. Hwnqguh yiengh lajmbanj moq seveicujyi netsaed doicaenh baenaj, gak dieg fazcanj engq lai hezdiuz. Hwnqguh yiengh guekgya ak cauhmoq haenx guh ndaej ndei, gij naengzlig gag cauhmoq daezsang haemq daih. Nwngzyenz、gyaudoeng、doengsaenq daengj gihcuj sezsih caeuq cungdenj gunghcwngz gensez cingzyauq lairaeuh. Dap vunz mbin hwnj dingjmbwn bae gaenq guhbaenz dahraix. Mbaet yungh nwngzyenz swhyenz caeuq baujhoh swnghdai vanzging youh ndaej fazcanj baenaj. “10•5” giva gaenq guhbaenz caez, “11•5” gveihva hengz ndaej swnhleih.

  Gaijgwz hailangh ndaej miz dwkboed hungnaek. Lajmbanj gyoebhab gaijgwz cugbouh gyalaeg, nungzyezsui、muzyezsui、dwzcanjsui cienzbouh siu bae, gij cwngcwz bang nungzyez ik nungzyez haenx mboujduenh gyagiengz. Guekmiz swhcanj guenjleix dijci、guekmiz giyez caeuq ginhyungz、caizsui、douzswh、gyagwz、gohgi daengj lingjyiz gaijgwz ndaej miz fazcanj hungnaek. Feihgunghyoujci ginghci caenh’itbouh fazcanj. Hawciengz dijhi mboujduenh laeb caezcienz, hungzgvanh diuzgung laebdaeb gaijndei, cwngfuj ciznwngz gyavaiq cienjbienq. Cingouj cuzgouj cungjngeg daih fukdoh gyalai, saedhengz aen canloz “byaij okbae” byaijok yamqdin onjmaenh, yiengh ginghci hailangh haenx gaenq haeuj duenhmbaek moq.

  Yinzminz swnghhoz mingzyienj gaijndei. Gij gihminz hawsingz lajmbanj souhaeuj gyalai haemq daih, gyadingz caizcanj bujben demlai. Aen gij Hawsingz lajmbanj gihminz ceiq daemq swnghhoz baujcang cidu cobouh laeb hwnjdaeuj, gyoengq vunz gungzhoj haenx gij gihbwnj swnghhoz de ndaej daengz baujcang. Gihminz siuhfei gezgou bienq ndei, gwn daenj youq yungh okroen suijbingz mboujduenh daezsang, gij goenggungh fuzvu ndaej yiengjsouh de mingzyienj lai giengz.

  Minzcuj fazci gensez caiq miz cinbu moq. Cwngci dijci gaijgwz yamqonj doicaenh. Hangh cidu yinzminz daibyauj daihhoih、hangh cidu lai dangj hozcoz caeuq cwngci hezsangh youz Cungguek Gungcanjdangj lingjdauj haenx、hangh cidu giz dieg siujsoq minzcuz gagguenj mboujduenh laeb caezcienz, gij rengzhoengh gihcwngz minzcuj bienq ndaej lai giengz. Gij saehnieb vunzgienz fazcanj cangqheiq. Gyaezguek doengjit cansen fazcanj hungcoek. Aen faplwd dijhi seveicujyi miz daegsaek Cungguek haenx daihdaej cauxbaenz, ciuq faplwd bae guenjleix guekgya aen gihbwnj fanghloz neix ndaej daengz saedcaih gvancez. Hingzcwng guenjleix dijci、swhfaz dijci gaijgwz mboujduenh gyalaeg.

  Vwnzva gensez haiok gizmen moq. Yiengh haedsim gyaciz dijhi seveicujyi netsaed doicaenh gensez, Majgwzswhcujyi lijlun yenzgiu caeuq gensez gunghcwngz cingzyauq mingzyienj. Swhsiengj daudwz gensez gvangqlangh bae guh, daengx biengz vwnzmingz cingzdoh caenh’itbouh daezsang. Vwnzva dijci gaijgwz ndaej miz fazcanj youqgaenj, vwnzva saehnieb caeuq vwnzva canjnieb fazcanj riengjvaiq, gij cingsaenz vwnzva swnghhoz gyoengq yinzminz engqgya lai cungj lai yiengh. Cienzminz cangqndang caeuq ginggi dijyuz aeundaej cingzcik moq.

  Ndawbiengz gensez cienzmienh guh hwnjdaeuj. Gak gaep gak loih gyauyuz gig vaiq fazcanj, lajmbanj mienx cienz yivu gyauyuz cienzmienh saedyienh. Couhnieb gveihmoz ngoenz beij ngoenz gyadaih. Ndawbiengz baujcang dijhi gensez caenh’itbouh gyagiengz. Dingjhoenx feihdenj ndaej hingz hungnaek, goenggungh veiswngh dijhi caeuq gihbwnj yihliuz fuzvu mboujduenh laeb caezcienz, yinzminz ndangcangq suijbingz mboujduenh daezsang. Ndawbiengz guenjleix cugbouh guh ndei, ndawbiengz daihbuenz onjdingh, beksingq youq onj maengx hong.

  Gozfangz caeuq bingdoih gensez ndaej miz lizsijsing cwngzcik. Yiengh bingsaeh bengwz miz daegsaek Cungguek haenx gyavaiq doicaenh, aen yinvu gemj bing 20 fanh vunz swnhleih guhbaenz, bingdoih gwzming’va、yendaiva、cwnggveihva gensez cienzmienh gyagiengz, gij naengzlig hengzguh aen lizsij sawjmingh sigij moq duenhmbaek moq ndaej daezsang lairaeuh.

  Gij gunghcoz doiq Yanghgangj dem Aumwnz caeuq gij gunghcoz doiq Daizvanh caenh’itbouh gyagiengz. Yanghgangj、Aumwnz baujciz mwnhoengh onjdingh, caeuq neidi gij ginghci mouyiz gvanhaeh de engqgya gaenjmaed. Song hamq cwngdangj gyauhliuz gaenq hainduj ndaej baenz, gyoengq vunz baedauq caeuq ginghci vwnzva gyauhliuz dabdaengz suijbingz moq. Ceiqdingh aen fap fanj faenmbek guekgya, genhgez henhoh guekgya cawjgienz caeuq diegguek caezcingj.

  Cienz fueng’vih vaigyauh ndaej miz fazcanj hungnaek. Genhciz gij huzbingz vaigyauh cwngcwz doglaeb gag guhcawj, gak hangh vaigyauh gunghcoz cizgiz bae guh, caeuq gak guek gyauhliuz hozcoz ndaej gvangqlangh gyagiengz, youq ndaw gij hongsaeh guek caeuq guek fazveih le yiengh gensezsing cozyungh youqgaenj, vih cienzmienh hwnqguh aen biengz siujgangh gaenq ceng’aeu ndaej aen gozci vanzging ndei ndeu.

  Hangh gunghcwngz hungmbwk moq aen dangj gensez netsaed doicaenh. Aen dangj naengzlig gaemgienz gensez caeuq senhcinsing gensez haeujlaeg bae guh. Lijlun cauhmoq caeuq lijlun vujcangh gig miz cingzyauq. Aen hozdung gyauyuz hawj gyoengq gungcanjdangjyenz baujciz senhcinsing haenx ndaej miz cingzgoj hungnaek. Gij minzcuj ndaw dangj mboujduenh gyadaih. Lingjdauj banhswj caeuq ganbu duivuj gensez daegbied dwg gyauyuz beizyin ganbu ndaej miz fazcanj youqgaenj, vunzcaiz gunghcoz caenh’itbouh gyagiengz, ganbu vunzsaeh cidu gaijgwz caeuq cujciz cidu cauhmoq mboujduenh guh haeujlaeg. Dangjfungh lenzcwng gensez caeuq fanj nduknaeuh doucwngh cingzyauq yienhda.

  Youq mwh yawj raen cingzcik, doengzseiz hix aeu singjsak roxdaengz, gij gunghcoz raeuz caeuq gij maqmuengh yinzminz lij cengca mbouj siuj, youq gwnz roen baenaj lij miz haujlai gunnanz caeuq vwndiz daengjnaj, gij ceiq doed de dwg: Vihliux ginghci demmaj cix ok swhyenz vanzging daiqgyaq daiq daih; hawsingz lajmbanj、dieg caeuq dieg、ginghci ndawbiengz fazcanj ciuqyiengh lij mbouj doengzbingz; nungzyez onjdingh fazcanj caeuq nungzminz lienzdaemh gyalai souhaeuj nanzdoh gyadaih; lauzdung couhnieb、ndawbiengz baujcang、souhaeuj faenboiq、gyauyuz veiswngh、gihminz ranzyouq、ancienz swnghcanj、swhfaz caeuq ndawbiengz cianh daengj fuengmienh doengh gij vwndiz gvanhaeh daengz leih’ik nemndang ginzcung haenx ciuqyiengh vanzlij haemq lai, bouhfaenh vunz souhaeuj haemq noix haenx swnghhoz lij haemq hojnanz; swhsiengj daudwz gensez lij aeu gyagiengz dem cij ndaej; gij naengzlig gaemgienz aen dangj caeuq hingzseiq moq yinvu moq mbouj vanzcienz dox hab’wngq, doiq gaijgwz fazcanj onjdingh ndawde mbangj di saedsaeh vwndiz hungnaek diucaz yenzgiu lij mbouj gaeuq haeujlaeg; mbangj di gihcwngz dangj cujciz unqnyieg lanxsanj; siujsoq dangjyenz ganbu cozfungh mbouj cingq, hingzsikcujyi、gvanhliuzcujyi vwndiz lij haemq duzcuz, gij yienhsiengq saisaengq lanhyungh、siuhgiz nduknaeuh haenx lij haemq yiemzcungh. Raeuz aeu gig yawjnaek doengh gij vwndiz neix, laebdaeb nyinhcaen bae gaijgez.

  Gyonj hwnjdaeuj gangj, haj bi neix, dwg haj bi gaijgwz hailangh caeuq cienzmienh hwnqguh aen biengz siujgangh ndaej miz fazcanj hungnaek, dwg haj bi guek raeuz gyoebhab gueklig daih fukdoh daezswng caeuq yinzminz ndaej daengz ndeicawq engq lai, dwg haj bi guek raeuz gozci diegvih caeuq yingjyangj ndaej mingzyienj daezsang, dwg haj bi gij rengzlig cauhmoq、gij rengzlig comzgiet、gij rengzlig hoenxciengq aen dangj raeuz ndaej mingzyienj gyagiengz, dwg haj bi daengx dangj daengx guek gak cuz yinzminz doxgiet ndaej engqgya gaenjmaed haenx. Sizcen cungfaen cwngmingz, gak hangh gezcwz hungnaek cibroek daih caeuq cibroek daih doxdaeuj cunghyangh soj guh’ok haenx dwg vanzcienz cingqdeng.

  Gij cwngzcik haj bi neix, dwg daengx dangj daengx guek gak cuz yinzminz doengzcaez haenqrengz buek guh cij ndaej daeuj. Gou daibyauj Cunghgung Cunghyangh, yiengq daengx guek gak cuz yinzminz, yiengq gak minzcuj dangjbai、gak yinzminz donzdij caeuq gij vunzmaenh gyaez guek gak gyaiq, yiengq gyoengq beixnuengx Yanghgangj Daegbied Hingzcwnggih、gyoengq beixnuengx Aumwnz Daegbied Hingzcwnggih caeuq gyoengq beixnuengx Daizvanh dem gyoengq beixnuengx vazgyauz, yiengq sojmiz ggyoengq baengzyoux gak guek gvansim caeuq cihciz gij yendaiva gensez Cungguek haenx, byaujsi saedcaih docih!

  
[1] [2] [3] [4] [5] [6] [7] [8] [9] [10] [11] [12]
Dozsiengq