Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CUNGHGUNG CUNGHYANGH AEN GIETDINGH GVENDAENGZ GIJ VWNDIZ HUNGNAEK BAE DOICAENH LAJMBANJ GAIJGWZ FAZCANJ HAENX 6

(2008 nienz 10 nyied 12 hauh Cungguek Gungcanjdangj Daihcibcaet Gaiq Cunghyangh Veijyenzvei Daihsam Baez Daengxcungq Veiyi doenggvaq)

  
【Cihsaw Hung’iq : hung rauh iq】  Dajyaenq
      
  6、Gyagiengz Caeuq Gaijndei Gij Lingjdauj Aen Dangj,Vih Doicaenh Lajmbanj Gaijgwz Fazcanj Daezhawj Yiengh Cwngci Baujcwng Giengiengz

  Doicaenh lajmbanj gaijgwz fazcanj, gvanhgen youq laeng aen dangj. Aeu dawz aen dangj gaemgienz naengzlig gensez caeuq senhcinsing gensez dangguh cawjsienq, yungh gij cingsaenz gaijgwz cauhmoq bae cienzmienh doicaenh lajmbanj aen dangj gensez, nyinhcaen bae guh gij hozdung haeujlaeg yozsiz sizcen gohyoz fazcanjgvanh, hawj gak gaep dangj cujciz lai miz gij rengzlig dajcauh、gij rengzlig comzgiet、gij rengzlig hoenxciengq, sawj aen dangj mboujduenh lai ak bae lingjdauj gij gunghcoz lajmbanj.

  (1) Laeb caezcienz yiengh dijci gihci ndei hawj aen dangj bae lingjdauj gij gunghcoz lajmbanj haenx. Gyagiengz yiengh lajmbanj gunghcoz lingjdauj dijci caeuq gunghcoz gihci youz dangjveij doengjit lingjdauj、dangjcwng caez ca gungh guenj、lajmbanj gunghcoz cunghab bouhmonz cujciz hezdiuz、mizgven bouhmonz gag rap gij cizcwz bonjfaenh haenx. Gak gaep dangjveij caeuq cwngfuj aeu genhciz dawz gij gunghcoz lajmbanj baij haeuj ngoenznaengz lwnhsaeh anbaiz youqgaenj bae, youq cwngcwz ceiqdingh、gunghcoz baijbouh、caizlig faenboiq、ganbu boiqhawj fuengmienh, saedcaih daejyienh aen canloz swhsiengj gij gunghcoz sam nungz dwg daengx dangj gij hong youqgaenj ndawde hangh ceiq youqgaenj haenx, gyagiengz doiq lajmbanj gaijgwz fazcanj lijlun caeuq sizcen vwndiz guh diucaz yenzgiu, genhciz ciuq gidij cingzgvang bae dingh banhfap habdangq、faenloih cijdauj, ak cauhmoq bae guh gunghcoz. Gij bouxdaeuz dangjveij caeuq cwngfuj aeu caenndang bae ca gij gunghcoz lajmbanj, sengj si yienh dangjveij aeu miz vunz fucwz bae faen guenj gij gunghcoz lajmbanj, yienh (si) dangjveij aeu dawz gunghcoz cungqsim caeuq cujyau cinglig cuengq youq fuengmienh gunghcoz lajmbanj. Gyagiengz hwnqguh dangjveij lajmbanj gunghcoz cunghab bouhmonz, laeb hwnj aen nungzyez hingzcwng guenjleix dijci ciznwngz mingzbeg doekdingh、gienzlig caeuq cwzyin doxdaengh、yinhcienj dawzbanj haenx. Yawjnaek genj ndei boiq ak yienh yangh dangjcwng lingjdauj banhswj daegbied dwg doengh boux guhdaeuz de. Genhciz caeuq laeb ndei “daehhaeux” swngjcangj fucwzci、“swxbyaek” sicangj fucwzci. Laeb ndei yiengh ganbu gaujhaed bingzgyaq dijhi ndaej daejyienh gohyoz fazcanjgvanh caeuq cwnggoz cwngcizgvanh iugouz haenx, dawz haeuxgwn swnghcanj、nungzminz gyalai souhaeuj、reihnaz baujhoh、vanzging ceihleix、huzciz onjdingh, dangguh aen neiyungz youqgaenj bae gaujhaed deihfueng daegbied dwg yienh (si) lingjdauj banhswj gij cingzcik yauqnaengz de. Haeujcoengh yinzda、cwnghez hengzguh ciznwngz, fazveih gij cizgiz cozyungh minzcuj dangjbai、yinzminz donzdij caeuq cujciz ndawbiengz, doengzcaez doicaenh lajmbanj gaijgwz fazcanj.

  (2) Gyagiengz hwnqguh gij gihcwngz cujciz lajmbanj. Gij gihcwngz cujciz lajmbanj aen dangj, dwg aen giekdaej gij gunghcoz youq lajmbanj aen dangj. Aeu lingjdauj banhswj gensez guh cungdenj、aeu laeb caezcienz gij cujciz aen dangj guh baujcwng、aeu gij hozdung sam gaep lienzhab cauhlaeb guh caidij, dawz dangj cujciz hwnqguh baenz aen lingjdauj haedsim giengiengz doidoengh gohyoz fazcanj、daz gyoengq nungzminz fatcaiz fouqmiz、maedcaed lienzhaeh cungqvunz、henhoh lajmbanj onjdingh haenx. Gaijgwz caeuq laeb ndei lajmbanj gihcwngz cujciz lingjdauj banhswj senjgij banhfap, ca ndei gij cunh gaep cujciz boiqdauq gensez aeu cunh dangj cujciz guh haedsim haenx, lingjdauj caeuq haeujcoengh cunhveijvei、cizdij ginghci cujciz、gungcinghdonz、fudaivei、minzbingh daengj cujciz caeuq yanghcin giyez gunghvei cujciz ciuq faplwd fapgvi dem canghcwngz bae guh gunghcoz. Cauhmoq lajmbanj aen dangj gihcwngz cujciz ndalaeb hingzsik, doigvangq yiengh guhfap youq ndaw lajmbanj segih、nungzminz ciennieb hozcozse、ciennieb hezvei caeuq canjyezlen laeb dangj cujciz haenx. Gyagiengz youq ndaw nungzminzgungh guh gij gunghcoz aen dangj. Laeb caezcienz yiengh gihci ndei hawj gij gihcwngz dangj cujciz hawsingz lajmbanj dox bangcoh, cauhlaeb yiengh gwzgiz moq gij gihcwngz dangjgen hawsingz lajmbanj dungjcouz haenx. Cagaenj hwnqguh gij hozdung cangzsoj cunh gaep cujciz, youq song bi ndawde sojmiz hingzcwngcunh cungj aeu hwnq baenz caez.

  (3) Gyagiengz hwnqguh gij gihcwngz ganbu duivuj lajmbanj. Hwnqguh aen gihcwngz ganbu duivuj lajmbanj souj saenqniemh、gangj fung’yen、miz bonjsaeh、binjdwz hingzveiz ndei ndeu, doiq guh ndei gij gunghcoz lajmbanj cibfaen youqgaenj. Roengzrengz haigvangq lajmbanj gihcwngz ganbu laizloh, daezsang gij suciz gyoengqde, siucawz gij youheiq raeblaeng gyoengqde, diuhdoengh gij gunghcoz cizgizsing gyoengqde. Yawjnaek daj ndaw lajmbanj doengh boux naengzganq ak fatcaiz、doengh bouxbing gaenq doiqvuj、doengh boux nungzminz ok rog dajgoeng dauqma ranzmbanj haenx genj aeu cunh ganbu. Dazyinx gauhyau bizyezswngh bae ndaw cunh dangsaeh, saedhengz aen giva moix aen cunh miz boux dayozswngh ndeu. Gujli dangjcwng gihgvanh caeuq giyez swyez danhvei gij ganbu oiq maenhndei de bae ndaw cunh bang guh gunghcoz. Lai roengzrengz daj ndaw gij cunh ganbu maenhndei gauj aeu yanghcin gunghvuyenz caeuq genj aeu yanghcin lingjdauj ganbu. Damqra cunh dangj cujciz boux suhgi de hamj mbanj dangsaeh. Doenggvaq caizcwng senj dieg ceihawj caeuq dangjfei bangbouj daengj roenloh, cauxbaenz lajmbanj gihcwngz cujciz gensez、cunh ganbu cienzhong caeuq ciengxlaux baujyiemj、dangjyenz ganbu beizyin swhginh baujcang gihci. Cingjhab beizyin swhyenz, lailai beizyin gij gihcwngz ganbu lajmbanj, sawj gyoengqde lai miz bonjsaeh bae daz nungzminz hwnqguh yiengh lajmbanj moq seveicujyi. Netsaed doicaenh lajmbanj dangjyenz ganbu yienhdaih yenjcwngz gyauyuz, youq song bi ndawde saedyienh daengx guek yangh cunh vangjloz daihdaej doeng caez.

  (4) Gyagiengz hwnqguh aen dangjyenz duivuj lajmbanj. Gyamaenh caeuq fazcanj gij cingzgoj senhcinsing gyauyuz hozdung, guh ndei gij hong fazcanj dangjyenz, gaijcaenh dangjyenz gyauyuz guenjleix, hawj dangjyenz geiqmaenh bonjfaenh dwg dangjyenz, hwnqguh aen dangjyenz duivuj lajmbanj suciz sang. Gyadaih ndaw dangj gihcwngz minzcuj, gingqcungh aen cawjdaej diegvih dangjyenz, baujcwng dangjyenz ciuq dangjcangh gvidingh bae hengzguh yivu、hengzsawj gienzleih. Cujciz gyoengq dangjyenz lajmbanj hag gij lijlun caeuq lohsienq fuengcim cwngcwz aen dangj、hag faplwd fapgvi、hag gij gisuz saedyungh. Lai gauj dangjyenz laeb ganghvei dingh cwzyin、ciuq ganghvei bae hengz wngqcingz、doxcanj guh senhcin maenhndei daengj hozdung. Gvansim in’gyaez dangjyenz, laeb hwnj laeb caezcienz yiengh gihci youq ndaw dangj dox gikleih、dox gvansim、dox bangfuz haenx, sawj dangj cujciz bienq ndaej engqgya caengaenh vunz haengj. Gyagiengz caeuq gaijcaenh gij banhfap guenjleix riuzdoengh dangjyenz, laeb hwnj laeb caezcienz hawsingz lajmbanj itcaez dangjyenz dungdai guenjleix gihci. Lai roengzrengz youq ndaw gij nungzminz hauxseng maenhndei haenx fazcanj dangjyenz. Damqra yiengh gihci moq fazcanj dangjyenz, sawj fazcanj dangjyenz caetliengh mboujduenh lai sang.

  (5) Gyagiengz gij dangjfungh lenzcwng gensez lajmbanj. Daihlig fazyangz gij conzdungj ndei caeuq cozfungh ndei aen dangj, maedcaed dangj caeuq cungqvunz gvanhaeh、ganbu caeuq cungqvunz gvanhaeh, dwg aen baujcwng youqgaenj bae guh ndei gij gunghcoz lajmbanj gaijgwz fazcanj. Genhciz gyauyuz、cidu、gamduk、gaijgwz、giuhfungh、fadceih dox giethab, doicaenh hwnqguh aen fadceih caeuq yawhfuengz nduknaeuh dijhi lajmbanj. Aeu laeb hwnj lijsiengj saenqniemh caeuq gyagiengz swhsiengj daudwz gensez guh giekdaej, haeujlaeg bae guh fanjdui nduknaeuh dizcang cinghseuq gyauyuz, daihlig fazyangz gij cozfungh gouz caen guh saed、goengdauh cingqbaiq、ganhoj buek guh, cuknet aen swhsiengj giekdaej dangjyenz、ganbu vih cungqvunz fuzvu、cinghseuq gag haed haenx. Aeu gveihfan caeuq hanhhaed gienzlig yinhhengz guh haedsim, cienzmienh doicaenh cwng’vu goenghai、cunhvu goenghai、dangjvu goenghai, laeb caezcienz lajmbanj cizdij swhginh、swhcanj、swhyenz guenjleix cidu, guh daengz yungh cidu bae guenj gienz、guenj saeh、guenj vunz. Aeu henhoh gij gienzik nungzminz guh cungdenj, hopheux gij cwngcwz lajmbanj aen dangj lozsiz cingzgvang bae gyagiengz gamduk genjcaz, saedcaih niujcingq doengh gij vwndiz sonjhaih leih’ik nungzminz youqgaenj, yiemzsuk cazbanh doengh gij anqgienh famh faplwd famh gijliz nangq daengz nungzyez dem nungzminz. Guengjdaih dangjyenz、ganbu aeu genhciz vih beksingq yungh gienz、vih beksingq yousim、vih beksingq maeuz leih’ik, gvansim gij haemzhoj cungqvunz, sijsaeq dingq gij yigen caeuq iugouz cungqvunz, comzgyonj gij dungxcaiz cungqvunz, gangj vahcaen、banh saehsaed、gouz saedyauq, genhgez fanjdui hingzsizcujyi、gvanhliuzcujyi, roengzrengz cauh’ok gij niebcik saedsaed caihcaih.

  Saedyienh hangh muzbyauh hungmbwk cienzmienh hwnqguh aen biengz siujgangh, gij yinzvu ceiq gannanz hungloet、ceiq naekcaem lairaeuh de dwg youq lajmbanj, gij giekdaej ceiq gvangqlangh、ceiq naekna de caemh dwg youq lajmbanj. Gyoengq dungzci daengx dangj aeu gaenjmaed comzgiet youq seiqhenz aen dangj cunghyangh aeu Huz Ginjdauh dungzci guh cungjsuhgi haenx, genhgez guh gaijgwz, gyavaiq bae fazcanj, youq gwnz roen doicaenh yiengh saehnieb seveicujyi hungmbwk miz daegsaek Cunggeuk, roengzrengz cauh’ok aen gizmen moq gij gunghcoz lajmbanj!

  (Gij swhliu Yinzminzvangj)

  
[1] [2] [3] [4] [5] [6]
Dozsiengq