Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CUNGHGUNG CUNGHYANGH AEN GIETDINGH GVENDAENGZ GIJ VWNDIZ HUNGNAEK BAE DOICAENH LAJMBANJ GAIJGWZ FAZCANJ HAENX 5

(2008 nienz 10 nyied 12 hauh Cungguek Gungcanjdangj Daihcibcaet Gaiq Cunghyangh Veijyenzvei Daihsam Baez Daengxcungq Veiyi doenggvaq)

  
【Cihsaw Hung’iq : hung rauh iq】  Dajyaenq
      
  5、Gyavaiq Fazcanj Gij Goenggungh Saehnieb Lajmbanj,Coicaenh Lajmbanj Ndawbiengz Cienzmienh Cinbu

  Hwnqguh yiengh lajmbanj moq seveicujyi, cauxbaenz aen gwzgiz moq hawsingz lajmbanj ginghci ndawbiengz fazcanj yizdijva, bietdingh aeu dawz goenggungh caizcwng guenjgoq fanveiz gyadaih daengz lajmbanj bae, fazcanj gij goenggungh saehnieb lajmbanj, sawj guengjdaih nungzminz hag miz boux son、guh miz souhaeuj、bingh miz cienz yw、laux miz vunz ciengx、youq miz ranzndei.

  (1) Mwnhoengh fazcanj gij vwnzva lajmbanj. Hwnqguh yiengh vwnzva seveicujyi, dwg aen neiyungz youqgaenj caeuq baujcwng youqgaenj bae hwnqguh yiengh lajmbanj moq seveicujyi. Genhciz yungh yiengh vwnzva seveicujyi senhcin haenx bae hahciemq aen cindi lajmbanj, muenxcuk gyoengq nungzminz gij cingsaenz vwnzva sihgiuz ngoenz beij ngoenz gyalai haenx, daezsang gij swhsiengj daudwz suciz gyoengq nungzminz. Netsaed hwnqguh yiengh haedsim gyaciz dijhi seveicujyi, genhciz yungh yiengh lijlun dijhi seveicujyi miz daegsaek Cungguek bae vujcangh gyoengq dangjyenz lajmbanj、gyauyuz gyoengq nungzminz cungqvunz, dazyinx gyoengq nungzminz laeb maenh gij swhsiengj aigozcujyi、cizdijcujyi、seveicujyi. Doicaenh mbanjmbanj doeng gvangjbo densi、vwnzva saenqsik swhyenz doengzcaez yiengjyungh、hwnqguh yanghcin cunghab vwnzvacan caeuq cunh vwnzvasiz、lajmbanj cuengqingj denyingj、ranzsaw nungzgya daengj cungdenj vwnzva ik beksingq gunghcwngz, laeb hwnj aen lajmbanj vwnzva douzhaeuj baujcang gihci onjdingh, caenhliengh vaiq di cauxbaenz lajmbanj goenggungh vwnzva fuzvu dijhi caezcienz. Bangfuz cangcoz swnghcanj gij vwnzva canjbinj sij dizcaiz lajmbanj, guh gij vwnzva hozdung nungzminz haengj caeuqfaenh、fuengbienh caeuqfaenh haenx, laeb hwnj yiengh gihci ndaej ciengzseiz hawj vwnzva gohgi veiswngh “sam roengz mbanj”, haeujcoengh nungzminz banh heiqban caeuq gizyawz vwnzva donzdij, dazyinx gij vwnzva gihgou ndaw hawsingz roengz lajmbanj bae gauj fuzvu. Yawjnaek fungfouq gij vwnzva swnghhoz gyoengq nungzminzgungh, bang gyoengqde daezsang suciz. Gvangqlangh bae gauj vwnzmingz cunhcin、vwnzmingz hangzhaw、vwnzmingz hoh、ciyen fuzvu daengj doengh gij cingsaenz vwnzmingz cauhlaeb hozdung miz cungqvunz caeuqfaenh guh lai neix, cangdauj nungzminz gingqcungh gohyoz、lauxsaed saenqyungh、ciuqsouj faplwd、daeqceih maezsaenq、hwng fungsug ndei, ciuqsouj gunghminz gihbwnj daudwz gveihfan, lienh baenz gij swnghhoz fuengsik cangqheiq vwnzmingz, cauxbaenz yiengh funghsang ndawbiengz sai mbwk bingzdaengj、gingq vunzlaux maij lwgnyez、ranznden huzciz、gaenx guh fatcaiz、bang gungz gouq hoj haenx. Gyagiengz baujhoh gij vwnzvuz、gij feih vuzciz vwnzva yizcanj、gij hawgaeuq mbanjgaeuq lizsij vwnzva mizmingz lajmbanj. Fazcanj gij dijyuz saehnieb lajmbanj, bae guh gij hozdung bauj hawj nungzminz ndangcangq haenx.

  (2) Daihlig banh ndei gij gyauyuz saehnieb lajmbanj. Fazcanj gij gyauyuz lajmbanj, coicaenh gyauyuz goengbingz, daezsang gij gohyoz vwnzva suciz gyoengq nungzminz, gungganq gyoengq nungzminz yienghmoq miz vwnzva、rox gisuz、rox ginghyingz haenx. Gyamaenh lajmbanj yivu gyauyuz bujgiz cingzgoj, daezsang gij caetliengh yivu gyauyuz, laeb ndei yivu gyauyuz mienx cienz cwngcwz caeuq ginghfei baujcang gihci, baujcang gij lwgnyez doengh ranz gungzhoj、gij lwgnyez bohmeh okrog dajgoeng daegbied dwg lwgmbwk ndaej bingzdaengj haeuj hag doegsaw、ciepsouh caez yivu gyauyuz, gaij ndei gij yingzyangj canggvang gyoengq hagseng lajmbanj, coicaenh hawsingz lajmbanj yivu gyauyuz bingzyaenx fazcanj. Gyavaiq youq lajmbanj bujgiz gauhcungh gyauyuz, cungdenj gyavaiq fazcanj lajmbanj cunghdwngj cizyez gyauyuz caemhcaiq cugbouh saedhengz mienx cienzhag cienzsaw. Laeb caezcienz yienhfaenh cizyez gyauyuz beizyin vangjloz, gyagiengz nungzminz ginwngz beizyin, lailai gungganq gij vunzcaiz lajmbanj saedyungh haenx. Daihlig bangfuz gij lajmbanj gyauyuz giz dieg gungzhoj、giz dieg siujsoq minzcuz. Sawj gauhdwngj yenyau lai ak soengq vunzcaiz caeuq fuzvu hawj nungzyez caeuq lajmbanj, banh ndei gij yozgoh ciennieb nangq daengz nungzyez haenx, gujli vunzcaiz bae lajmbanj daih’it sienq guh gunghcoz, doiq gij bizyezswngh bae lajmbanj guh fuzvu haenx, bang gyau gij cienzhag de caeuq gij bang hag daigvanj de, youq mwh ciusou yenzgiuswngh caeuq genj lauxsae caiq hawj de ndaej yousien. Baujcang caeuq gaij ndei gij gunghswh daiyi caeuq gunghcoz diuzgienh gyoengq lauxsae lajmbanj, laeb caezcienz lauxsae lajmbanj gungganq beizyin cidu, daezsang gij suciz gyoengq lauxsae. Laeb caezcienz hawsingz lajmbanj lauxsae gyauhliuz gihci, laebdaeb genj baij gij lauxsae hawsingz roengz lajmbanj bae bangcoengh gyauyuz. Fazcanj gij yozcenz gyauyuz、daegbied gyauyuz、laebdaeb gyauyuz lajmbanj. Gyagiengz yenjcwngz gyauyuz, dawz gij gyauyuz swhyenz ndei gibseiz soengq roengz lajmbanj bae.

  (3) Coicaenh gij yihliuz veiswngh saehnieb lajmbanj fazcanj. Gihbwnj yihliuz veiswngh fuzvu gvanhaeh daengz guengjdaih nungzminz ndangcangq vuenyungz, bietdingh aeu caenhliengh vaiq di hawj daengxcungq nungzminz souh’ik. Gyamaenh caeuq fazcanj gij hozcoz yihliuz cidu yienghmoq lajmbanj, daezsang couzcienz byauhcunj caeuq caizcwng bangbouj suijbingz, genhciz cujyau dwg baujcang daih bingh louzyih、giemgoq baujcang mwnzcinj yawj bingh. Laeb caezcienz lajmbanj yihliuz banggouq cidu. Genhciz cwngfuj cujdauj, cingjhab gij veiswngh swhyenz hawsingz lajmbanj, laeb hwnj laeb caezcienz lajmbanj sam gaep yihliuz veiswngh fuzvu vangjloz, cungdenj banh ndei yienh gaep yihyen, caemhcaiq youq moix aen yanghcin banh ndei aen veiswnghyen ndeu, bangcoengh hwnqguh gij veiswnghsiz ndaw cunh, hawj nungzminz ndaej miz gij gihbwnj yihliuz fuzvu ancienz youh bienzngeiz haenx. Gyagiengz hwnqguh aen veiswngh vunzcaiz duivuj lajmbanj, dinghyiengq mienx cienz gungganq beizyin gij veiswngh vunzcaiz lajmbanj, dojdangq gaijgez gij boujdiep hawj gyoengq canghyw lajmbanj, laeb ndei hangh cidu hawj gyoengq canghyw hawsingz bae bangcoeng lajmbanj haenx. Genhciz yawhfuengz guhcawj, gyadaih lajmbanj mienx cienz goenggungh veiswngh fuzvu caeuq mienx cienz menjyiz fanveiz, lai roengzrengz bae fuengzyw gij bingh deihfueng、binghlah caeuq gij bingh bouxvunz caeuq doihduz ndaej itheij baenz haenx. Gyagiengz boiqsoengq caeuq gamguenj gij yw yungh youq lajmbanj. Cizgiz fazcanj cunghyih cunghyoz caeuq minzcuz yihyoz fuzvu. Gvangqlangh bae gauj gyaez guek veiswngh yinhdoengh, yawjnaek gij gyauyuz son vunz baujciz ndangcangq haenx. Gyagiengz bauj hawj gij mehmbwk lwgnyez lajmbanj ndangdaej cangqheiq, cugbouh doihengz hangh cwngcwz bang cienz hawj gij mehmbwk mizndang haenx bae yihyen seng lwgnyez. Genhciz hangh gihbwnj gozcwz giva seng lwg, doicaenh seng ndei ciengx ndei, onjdingh aen seng lwg suijbingz daemq lajmbanj, laeb ndei caeuq lozsiz giva seng lwg dajciengj bangfuz cidu, mizyauq ceihleix aen vwndiz okseng yinzgouj sai mbwk beijlaeh bienca daiq daih.

  (4) Laeb caezcienz aen ndawbiengz baujcang dijhi lajmbanj. Gvancez diuz yenzcwz lai baujcang、bauj gihbwnj、lai cwngzsw、ndaej lienzdaemh, gyavaiq laeb caezcienz aen ndawbiengz baujcang dijhi lajmbanj. Ciuq aen iugouz goyinz gyau cienz、cizdij bangbouj、cwngfuj boujdiep dox giethab, laeb hwnj aen lajmbanj ndawbiengz ciengxlaux baujyiemj cidu yienghmoq. Cauh diuzgienh damqra gij banhfap sawj hawsingz caeuq lajmbanj gij ciengxlaux baujyiemj cidu de ndaej mizyauq hamzciep haenx. Doiq gyoengq nungzminz deng cwng’yungh diegdeih haenx guh ndei ndawbiengz baujcang, guh daengz sien bauj menh cij cwng, sawj gyoengq nungzminz deng cwng’yungh diegdeih haenx gij gihbwnj swnghhoz de ndaej ciengzgeiz miz baujcang. Laeb ndei hangh ceiq daemq swnghhoz baujcang cidu lajmbanj, cunghyangh caeuq sengjgaep caizcwng lai roengzrengz bangbouj, guh daengz boux wnggai bauj couh caenhliengh bauj, mboujduenh daezsang baujcang byauhcunj caeuq bangbouj suijbingz. Cienzmienh lozsiz gij vujbauj gungciengx cwngcwz lajmbanj, saedbauj gungciengx suijbingz ndaej daengz dangdieg vunzmbanj bingzyaenz swnghhoz suijbingz. Laeb ndei gij cidu banggouq gyoengq vunz deng cai lajmbanj. Lozsiz ndei doengh gij youhfuj cwngcwz doiq ginhsuz、lezsuz caeuq doengh bouxbing doiqvuj dengsieng ndangfeiq baenzbingh haenx. Fazcanj gij ndawbiengz fukleih caeuq swnzsienh saehnieb aeu bangfuz bouxlaux、bangcoh bouxfeiq、banggouq bouxgyax、gouqcaeq bouxhoj、gouqcaeq bouxdengcai guh cungdenj haenx. Fazcanj lajmbanj laujlingz fuzvu. Gyagiengz lajmbanj gij hong yawhfuengz ndangfeiq caeuq bang bouxndangfeiq dauq ndei haenx, coicaenh gij saehnieb bouxndangfeiq lajmbanj fazcanj.

  (5) Gyagiengz hwnqguh gij giekdaej sezsih caeuq vanzging lajmbanj. Yaek dawz lajmbanj hwnqguh baenz aen ranzmbanj gyaeundei gyoengq nungzminz, bietdingh aeu saedcaih gaij ndei gij swnghcanj swnghhoz diuzgienh gyoengq nungzminz. Gohyoz ceiqdingh yanghcin gak mbanj hwnqguh gveihva. Gyavaiq hwnqguh gij raemxgwn ancienz gunghcwngz lajmbanj, haj bi ndawde gaijgez gij raemxgwn ancienz vwndiz lajmbanj. Gyagiengz hwnqguh gij goengloh lajmbanj, saedbauj daengz mwh daihcib’it aen haj bi giva yaek sat ndaej daihdaej saedyienh yanghcin doeng roenbwzyouz (roensuijniz), caiq roengzbae couh bujben saedyienh hingzcwngcunh doeng roenbwzyouz (roensuijniz), cugbouh cauxbaenz gij vangjloz daehhek hawsingz lajmbanj goenggungh gyaudoeng swhyenz dox hamzciep、fuengbienh vaiqdangq haenx. Doicaenh hwnqguh gij nwngzyenz lajmbanj, gyadaih denvangj gunghden yinzgouj fuzgai bijliz, doigvangq caujgi、leihyungh gij ganj nyaq loegcak、siuj suijden、funghnwngz、daiyangznwngz daengj caiqseng nwngzyenz gisuz, cauxbaenz aen lajmbanj nwngzyenz dijhi seuqcengh、bienzngeiz haenx. Hengzguh aen gunghcwngz seuqcengh lajmbanj, gyavaiq gaij raemx、gaij ranzdajcawj、gaij diegcuengqbyaij、gaij riengh doihduz, dawz nyapnyaj conz hwnjdaeuj doengjit cawqleix, mboujduenh gaij ndei gij veiswngh diuzgienh caeuq gij vanzging vunz youq lajmbanj. Doicaenh gvangjdenvangj、densinvangj、hulenzvangj “sam vangj yungzhab”, cizgiz fazveih sinsizva vih nungz fuzvu aen cozyungh neix. Fazcanj gij youzcwng fuzvu lajmbanj. Laeb caezcienz lajmbanj goenggungh sezsih veizhoh gihci, daezsang cunghab leihyungh yauqnaengz.

  (6) Doicaenh gij banggungz haifat lajmbanj. Guh ndei gij banggungz haifat duenhmbaek moq, doiq saedbauj daengxcungq beksingq doengzcaez yiengjsouh gij cingzgoj gaijgwz fazcanj miz eiqngeih hungnaek, bietdingh aeu dangguh aen lizsij yinvu ciengzgeiz bae naihnanz mbouj bienq ca gaenj ca ndei. Laeb ndei guekgya banggungz canloz caeuq cwngcwz dijhi, genhciz diuz fuengcim doenggvaq haifat bae banggungz, saedyienh lajmbanj ceiq daemq swnghhoz baujcang cidu caeuq banggungz haifat cwngcwz mizyauq hamzciep. Saedhengz yiengh banggungz byauhcunj moq, doiq gij vunz souhaeuj daemq lajmbanj cienzmienh saedhengz gij cwngcwz banggungz, dawz caenhliengh vaiq di onjdingh gaijgez boux deng banggungz haenx gwn imq daenj raeuj caemhcaiq saedyienh fatcaiz duet gungz, dangguh duenhmbaek moq banggungz haifat ndawde aen yinvu youqgaenj daih’it. Cungdenj hawj gij vunz gungzhoj lajmbanj lai ak gag fazcanj, doiq gij vunz gungzhoj mbouj miz lauzdungliz roxnaeuz lauzdung naengzlig saetbae haenx saedhengz ndawbiengz banggouq. Lai roengzrengz bae bangfuz giz dieg gwzming laujgih、giz dieg siujsoq minzcuz、giz dieg henzguek、giz dieg gungzhoj, hawj gyoengqde fazcanj hwnjdaeuj. Laebdaeb bae guh dangjcwng gihgvanh dinghdiemj banggungz caeuq dunghbu dem sihbu gaprengz banggungz, cungfaen fazveih giyez、hagdangz、gohyenz yensoj、bingdoih caeuq ndawbiengz gak gyaiq youq ndaw banggungz haifat gij cizgiz cozyungh de. Youq ndaw aen lingjyiz fanj gungzhoj gyagiengz guh gozci gyauhliuz hozcoz.

  (7) Gyagiengz hwnqguh gij naengzlig fuengz cai gemj cai lajmbanj. Gij lajmbanj guek raeuz swhyienz caihaih lai、gij diegdeih deng cai de gvangq、gij ligliengh fuengz cai dingj cai de nyieg, bietdingh aeu saedcaih gyagiengz gij gunghcoz fuengz cai gemj cai lajmbanj. Gyagiengz doiq gij mbwnheiq ndaej baenz caihaih、diciz caihaih、deihdoengh guh gamcaek caeuq yawhsien bauqgingj, daezsang gamcaek suijbingz, yawhsienh dingh ndei gij fueng’anq wngqdoiq cawqceq, gyagiengz hwnqguh ciennieb ligliengh, daezsang gij naengzlig guh wngqgip banggouq, senhconz bujgiz gij cihsiz fuengz cai gemj cai, daezsang gij naengzlig cawqceq caihaih, hawj nungzminz roxyiuj caeuq lai ak ndojbaex caihaih dem gag gouq. Gyagiengz hwnqguh gij sezsih fuengz raemxrongz、gak raemxdumh、dingj mbwnrengx caeuq gij naengzlig gamcaek dem yawhsien bauqgingj, gyavaiq gaijcauh gij ranz yaek doemq lajmbanj, sawj gij dingqroen、gungden、gungraemx、doengsaenq sezsih lajmbanj lai ak dingjdangj caihaih dem baujcang, doiq gij hagdangz、yihyen daengj goenggungh sezsih lajmbanj aeu daezsang gencuz caetliengh, lozsiz ancienz byauhcunj caeuq cwzyin. Cienzlig guh ndei gij hong dauqcungz hwnq gij lajmbanj Vwnconh deihdoengh caihgih, gyadaih douzhaeuj, duigouj bangcoengh, fatdoengh cungqvunz, gyavaiq dauqcungz hwnq gij ranzdoemq doengh hoh nungzminz deng cai haenx, dawz nungzyez swnghcanj sezsih dauqcungz hwnq ndei, caenhliengh caeux di hoizfuk nungzyez swnghcanj caeuq gij ginghci lajmbanj. Yungh cunghab cosih, coicaenh gij swnghdai vanzging giz dieg deng cai caenhliengh vaiq di dauqfuk caemhcaiq mboujduenh gaij ndei.

  (8) Gyagiengz gij ndawbiengz guenjleix lajmbanj. Genhciz vih nungzminz fuzvu、baenghgauq nungzminz, laeb ndei gij ndawbiengz guenjleix dijci gihci lajmbanj, gyagiengz hwnqguh gij segih lajmbanj, baujciz ndawbiengz lajmbanj huzciz onjdingh. Laeb caezcienz gij gihci henhoh nungzminz gienzik youz dangj caeuq cwngfuj bae cujdauj haenx, haigvangq roenloh, sawj gij cingzgvang ndawbiengz sim’eiq beksingq lajmbanj ndaej cungfaen fanjyingj dem byaujdaz, guh ndei gij sinfangj gunghcoz lajmbanj, gyagiengz yinzminz diuzgaij, gibseiz baizcaz vaqgej mauzdun caeuq doxceng. Gyoengq ganbu lajmbanj aeu guh ndei gij hong roengz mbanj cunz ranz, saedcaih dawz mauzdun caeuq vwndiz gaijgez youq gihcwngz, vaqgej youq mwh ngamq did ngamq hot. Haeujlaeg bae guh gij hozdung cauhlaeb bingzanh, gyagiengz gij cwngfaz gunghcoz lajmbanj, doicaenh gij gingjvu gensez lajmbanj, saedhengz cungqvunz fuengzre cungqvunz ceihleix, gauj ndei ndawbiengz cianh cunghab ceihleix. Laeb hwnj laeb caezcienz lajmbanj wngqgip guenjleix dijci, lai ak bae cawqceq gij cingzgvang yung’yiemj. Gyamaenh caeuq fazcanj yiengh minzcuz gvanhaeh seveicujyi bingzdaengj、doxgiet、doxbang、huzciz haenx. Cienzmienh gvancez diuz gihbwnj cunghgyau gunghcoz fuengcim aen dangj, ciuq faplwd bae guenjleix gij hongsaeh cunghgyau. Fanjdui caeuq mbouj hawj leihyungh gij seiqlig cunghgyau、gij seiqlig coengcug capfwngz guenj haeuj gij hongsaeh goenggungh lajmbanj bae, genhgez gimqcawz sezgyau cujciz, yiemzhaenq dwkceih gij seiqlig hwzsevei caeuq gij seiqlig yakrwix.

  
[1] [2] [3] [4] [5] [6]
Dozsiengq