Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CUNGHGUNG CUNGHYANGH AEN GIETDINGH GVENDAENGZ GIJ VWNDIZ HUNGNAEK BAE DOICAENH LAJMBANJ GAIJGWZ FAZCANJ HAENX 4

(2008 nienz 10 nyied 12 hauh Cungguek Gungcanjdangj Daihcibcaet Gaiq Cunghyangh Veijyenzvei Daihsam Baez Daengxcungq Veiyi doenggvaq)

  
【Cihsaw Hung’iq : hung rauh iq】  Dajyaenq
      
  4、Cizgiz Fazcanj Yienhdaih Nungzyez,Daezsang Nungzyez Cunghab Swnghcanj Naengzlig

  Fazcanj yienhdaih nungzyez, bietdingh aeu ciuq gij iugouz canjliengh sang、binjcaet ndei、yauqik sang、swnghdai、ancienz, gyavaiq cienjbienq nungzyez fazcanj fuengsik, doicaenh nungzyez gohgi cinbu caeuq cauhmoq, gyagiengz nungzyez vuzciz gisuz canghbei, laeb caezcienz nungzyez canjnieb dijhi, daezsang diegdeih ok canjbinj bijliz、swhyenz leihyungh yauliz、lauzdung swnghcanj yauliz, sawj nungzyez lai ak dingjdangj fung’yiemj、lai ak guh gozci gingcwngh、lai ak ndaej lienzdaemh fazcanj. Aeu mingzbeg doekdingh muzbyauh、ceiqdingh gveihva、gyadaih douzhaeuj, conz rengz banh ndei doengh gij daihsaeh gvanhaeh daengxbuenz、yingjyangj gyaeraez haenx.

  (1) Saedbauj guekgya haeuxgwn ancienz. Haeuxgwn ancienz seizlawz cungj mbouj ndaej soengse, bietdingh aeu ciengzseiz dawz ndaet mbouj cuengq. Gyavaiq cauhlaeb aen haeuxgwn ancienz baujcang dijhi gunghawj onjdingh、bwhcwk cukgaeuq、diuzgung daeklig、yinhcienj yauliz sang haenx. Dawz fazcanj haeuxgwn swnghcanj cuengq youq yienhdaih nungzyez gensez ndawde aen diegvih youqgaenj daih’it, onjdingh doekceh menciz, gaij ndei binjcungj gezgou, daezsang danhcanj suijbingz, mboujduenh gyagiengz cunghab swnghcanj naengzlig. Gak digih cungj aeu mingzbeg doekdingh caeuq lozsiz haeuxgwn fazcanj muzbyauh, gyagiengz gij cwngcwz bangfuz, lozsiz gij yinvu bwhcwk, faen rap guekgya haeuxgwn ancienz cwzyin. Cagaenj saedhengz haeuxgwn canloz gunghcwngz, doicaenh hwnqguh guekgya haeuxgwn haedsim canjgih caeuq bwhlaeng canjgih, gyavaiq lozsiz daengx guek lingh gyalai cien ik gaen haeuxgwn swnghcanj naengzlig gensez gveihva, aeu yienh guh danhvei cizcungh douzhaeuj、cingjdaej haifat, daj bineix hwnj cujciz saedhengz. Gij cwngcwz cosih bangcoengh haeuxgwn swnghcanj haenx bien yiengq cujyau canjgih, laeb hwnj hangh cidu bouj leih’ik hawj cujyau canjgih, doiq okhaeux daih yienh lai guh caizcwng dajciengj caeuq lai roengzrengz bangfuz haeuxgwn canjnieb gensez hanghmoeg, gyavaiq saedyienh haeuxgwn lai ok canjliengh、nungzminz lai ndaej souhaeuj、caizlig lai ndaej gyagiengz sam fuengmienh dox hezdiuz, sawj nungzminz lai gaenx ndaem haeuxgwn、deihfueng lai gaenx ca haeuxgwn. Ceiqdingh ndei gij cwngcwz laeb haeuxgwn fung’yiemj gihginh, cugbouh mbouj aeu cujyau canjgih swhginh boiqdauq. Giz dieg haeuxgwn swnghcanj siugai bingzyaenx caeuq giz dieg cujyau siugai haeuxgwn aeu gyagiengz hwnqguh okhaeux daih yienh, saedbauj bonjdeih nazhaeux menciz mbouj gemjnoix、haeuxgwn gag gunghawj suijbingz mbouj doekdaemq. Genhciz hailangh hawciengz, cizgiz gaujhoengh riuzdoeng, guh ndei swnghcanj siugai dox hamzciep. Hawj daengx biengz lai rox aeu mbaetyungh haeuxgwn, coengz swnghcanj daengz siuhfei daengx aen gocwngz cungj gyagiengz gij cosih mbouj sainyaix haeuxgwn. Gyagiengz youq haeuxgwn lingjyiz guh gozci gyauhliuz hozcoz, vih gaij ndei gij haeuxgwn gunghawj daengx seiqgyaiq guh’ok gung’yen.

  (2) Doicaenh nungzyez gezgou canlozsing diuzcingj. Aeu hawciengz sihgiuz guh daujyang、aeu gohgi cauhmoq guh soujduenh、aeu caetliengh yauqik guh muzbyauh, cauhlaeb yienhdaih nungzyez canjnieb dijhi. Gauj ndei canjnieb baijbouh gveihva, gohyoz doekdingh gihyiz nungzyez fazcanj cungdenj, cauxbaenz doengh rangh canjnieb youhsi miz lai caeuq daegsaek sienmingz haenx, dazyinx gyagoeng、riuzdoeng、cwkyinh sezsih gensez conz haeuj doengh aen canjgih miz youhsi bae. Yungh cosih daeklig bangcoengh fazcanj youzliuh swnghcanj, daezsang youzdoenghgo gag gunghawj suijbingz. Gujli caeuq bangcoengh doengh aen canjgih miz youhsi haenx cizcungh fazcanj faiq、dangz、maenzdoengzlingz daengj gij canjbinj daihbuek lairaeuh haenx, doicaenh byaekgwn、mak、caz、va daengj yenzyi canjbinj cizyozva、sezsihva swnghcanj, gaengawq gij cingzgvang dangdieg bae fazcanj gij canjnieb miz daegsaek caeuq gij lijyouz hangznieb lajmbanj. Gyavaiq fazcanj gij hangznieb ciengx doihduz, bangcoengh baenz gveihmoz bae ciengx doihduz, gyagiengz gaij ndei binjcungj caeuq fuengzre gaemhanh binghraq. Doicaenh cangqheiq ndaem ciengx gij doenghgo doenghduz ndaw raemx, bangfuz caeuq cangqdaih aen hangznieb bae dieghaij gyae dwk bya. Fazcanj linzyez canjnieb, gauj hoengh gij ginghci diegbya. Fazcanj nungzyez canjyezva ginghyingz, coicaenh nungzcanjbinj gyagoeng hangznieb gezgou swnggaep, bangfuz cangqdaih lungzdouz giyez, gungganq gij binjbaiz mizmingz. Gyagiengz gij cwngcwz doiq cujyau nungzcanjbinj swnghcanj daih yienh guh caizcwng dajciengj, dingh ndei gij cwngcwz doenggvaq suisouh bae bangcoengh nungzcanjbinj gyagoeng hangznieb fazcanj haenx. Gyagiengz nungzyez byauhcunjva caeuq nungzcanjbinj caetliengh ancienz gunghcoz, doiq gij vanzging giz dieg’ok、gij doxgaiq sawjyungh haeujbae、swnghcanj gocwngz、canjbinj caetliengh guh daengx gocwngz yiemzgek gamguenj gaemhanh, saedcaih lozsiz nungzcanjbinj swnghcanj、soucawx、cwkyinh、gyagoeng、siugai gak aen vanzcez gij caetliengh ancienz gamguenj cwzyin de, genhgez mbouj hawj doengh gij canjbinj mbouj habgek haenx haeuj hawciengz bae. Bangcoengh fazcanj luzswz sizbinj caeuq youjgih sizbinj, lai roengzrengz bae baujhoh nungzcanjbinj cucwz sanghbyauh caeuq deihleix biugeiq. Gyagiengz haijyaz song hamq nungzyez hozcoz.

  (3) Gyavaiq nungzyez gohgi cauhmoq. Nungzyez yaek fazcanj, diuz roen goekgaen de dwg baengh gohgi cinbu. Swnh’wngq seiqgyaiq gohgi fazcanj cauzliuz, vihliux hwnqguh yienhdaih nungzyez, haenqrengz doicaenh nungzyez gohgi gag cauhmoq, gyagiengz daeuznduj cauhmoq、cizcwngz cauhmoq caeuq yinxhaeuj siuvaq gaepsou caiq cauhmoq, mboujduenh coicaenh nungzyez gisuz cizcwngzva、lauzdung gocwngz gihgaiva、swnghcanj ginghyingz sinsizva. Lai roengz cienzgoek haeuj nungzyez gohgi bae, laeb nungzyez gohgi cauhmoq gihginh, bangcoengh nungzyez gihcujsing、cenzyenzsing gohyoz yenzgiu, caenhrengz ceng’aeu youq gvanhgen lingjyiz caeuq haedsim gisuz fuengmienh ndaej miz cincanj hungnaek. Gyagiengz nungzyez gisuz yenzgiu haifat caeuq cizcwngz, cungdenj bangcoengh swnghvuz gisuz、gungganq ceh ndei、fungcanj dajndaem、nungzyez mbaetyungh raemx、yawhfuengz gaemhanh binghraq、fuengz cai gemj cai daengj lingjyiz guh gohgi cauhmoq, guh gij gohgi cienhangh hungnaek bae gungganq conjgihyinh swnghvuz binjcungj moq haenx, caenhliengh vaiq di aeu ndaej buek binjcungj ndei miz wngqyungh gyaciz youqgaenj ndeu. Hab’wngq nungzyez gveihmozva、cinghcunjva、sezsihva daengj iugouz, gyavaiq haifat gij nungzyez canghbei sezsih goengnaengz lai、cinwngzva、haemq bienzngeiz haenx, cungdenj youq ndaw naz cozyez、sezsih dajndaem、cangqheiq ndaem ciengx、cingsaeq gyagoeng、cwkyinh baujsien daengj vanzcez aeu ndaej cincanj moq. Doicaenh nungzyez saenqsik fuzvu gisuz fazcanj, cungdenj haifat saenqsik ropaeu、cingcinj cozyez caeuq guenjleix saenqsik、lajmbanj yenjcwngz suswva caeuq gojsiva、mbwnheiq yawhcaek yawhbauq caeuq caihaih yawhsien bauqgingj daengj gisuz. Gyalaeg gohgi dijci gaijgwz, gyavaiq hwnqguh nungzyez gohgi cauhmoq dijhi caeuq yienhdaih nungzyez canjnieb gisuz dijhi, gyagiengz bangcoengh gunghyizsing nungzyez gohyenz gihgou caeuq gij hagdangz nungzyez. Ingbaengh nungzyez gohyenz hanghmoeg hungnaek、cungdenj yozgoh、gohyenz gihdi, gyagiengz hwnqguh nungzyez gohgi cauhmoq donzdui, gungganq gij nungzyez gohgi vunzcaiz cwngzsw sang, daegbied dwg gij vunzcaiz ndaej daz roen baenaj haenx. Onjdingh caeuq cangqdaih nungzyez gohgi vunzcaiz duivuj, gyagiengz doigvangq bujgiz nungzyez gisuz, doiq nungzminz guh gisuz beizyin. Gyavaiq cienjvaq nungzyez gohgi cingzgoj, coicaenh swnghcanj sonhag yenzgiu、nungzyez gohgi gyauyuz dox giethab, bangcoengh gauhdwngj yozyau、gohyenz yen soj caeuq nungzminz ciennieb hozcozse、lungzdouz giyez、nungzhoh guh gij gisuz hozcoz lai cungj hingzsik. Laebdaeb banh ndei guekgya nungzyez gauhsinh gisuz canjnieb sifangih. Hawj guekmiz nungzcangz youq yinhyungh senhcin gisuz caeuq hwnqguh yienhdaih nungzyez fuengmienh fazveih sifan cozyungh.

  (4) Gyagiengz hwnqguh nungzyez giekdaej sezsih. Gij nungzyez giekdaej sezsih aeu reihnaz suijli guh cungdenj haenx, dwg gij vuzciz diuzgienh youqgaenj yienhdaih nungzyez. Daih gveihmoz bae cingjleix gaijcauh reihnaz, guh ndei gveihva、dungjcouz anbaiz、lienz benq doicaenh, gyavaiq gaijcauh gij reihnaz canjliengh mbouj sang, gujli nungzminz gaij ndei doemnamh, doigvangq caekdingh doemnamh boiqfueng dwk bwnh caeuq ndaem ndai mbouj buqvaih reihnaz, daezsang gij caetliengh reihnaz, hawj doengh gij reihnaz canjliengh sang youh onjdingh haenx aen bijcung de daih fukdoh gyalai. Hwnqguh ndei suijli giekdaej sezsih, gyagiengz ceihleix dahhung dinghhung, cizcungh hwnq baenz buek suijli guzgan gunghcwngz hung rauh ndeu, gyavaiq hwnqguh gij gvangih hung rauh、boiqdauq gaijcauh baizguenq bungcan、hwnqguh gij gunghcwngz goekraemx, roengzrengz ceng’aeu daengz 2020 nienz, daihdaej guhbaenz gij yinvu doiq gvangih hung laebdaeb hwnqguh boiqdauq caeuq mbaetyungh raemx gaijcauh. Gyavaiq doiq gij suijgu miz binghyiemj haenx guh cawz yiemj gya maenh, saedbauj 2010 nienz nienzdaej guhbaenz gij yinvu doiq suijgu hung rauh caeuq cungdenj suijgu iq guh cawz yiemj gya maenh. Cauhmoq douzswh gihci, yungh dajciengj dingjlawh boujhawj daengj hingzsik, gujli caeuq bangcoengh nungzminz lailai hwnqguh reihnaz suijli sezsih iq、cunghab ceihleix siuj liuzyiz daengj hanghmoeg. Doigvangq mbaetyungh raemx dwk reihnaz, gauj ndei gij gunghcwngz sifan yiengh nungzyez youq reihnaz rengx dajndaem. Bangcoengh fazcanj nungzyungh gunghyez, gyavaiq doicaenh nungzyez gihgaiva. Ciuq yendaiva suijbingz sang、sawjyungh fanveiz gvangq yiengh iugouz neix, gyagiengz hwnqguh cehndei gungganq fanzciz dijhi caeuq nungzcanjbinj baefat hawciengz vangjloz, gyavaiq hwnqguh yienhdaih haeuxgwn vuzliuz dijhi caeuq nungzcanjbinj sien lix lwngjlen vuzliuz hidungj.

  (5) Laeb hwnj aen nungzyez seveiva fuzvu dijhi yienghmoq. Hwnqguh aen seveiva fuzvu dijhi daengx gocwngz cungj guh fuzvu、cunghab boiqdauq、fuengbienh riengjvaiq yauliz sang haenx, dwg fazcanj yienhdaih nungzyez ndawde aen iugouz bietyienz ndeu. Gyavaiq cauhlaeb aen nungzyez seveiva fuzvu dijhi yienghmoq aeu goenggungh fuzvu gihgou guh ingbaengh、aeu hozcoz ginghci cujciz guh giekdaej、aeu lungzdouz giyez guh guzgan、aeu gizyawz ligliengh ndawbiengz guh bangbouj、gunghyizsing fuzvu caeuq ginghyingzsing fuzvu dox giethab、cienhangh fuzvu caeuq cunghab fuzvu dox hezdiuz ndeu. Gyagiengz hwnqguh nungzyez goenggungh fuzvu naengzlig, cauhmoq guenjleix dijci, daezsang gij suciz gyoengqvunz coengznieb, roengzrengz ceng’aeu sam bi ndawde youq daengx guek bujben laeb caezcienz yanghcin roxnaeuz gihyizsing nungzyez gisuz doigvangq、doenghduz doenghgo binghraq yawhfuengz gaemhanh、nungzcanjbinj caetliengh gamduk guenjleix daengj goenggungh fuzvu gihgou, cugbouh laeb baenz cunh gaep fuzvucan、fuzvudenj. Haeujcoengh gunghsiuh hozcozse、nungzminz ciennieb hozcozse、ciennieb fuzvu gunghswh、ciennieb gisuz hezvei、boux canghyouzyaz nungzminz、lungzdouz giyez daengj daezhawj gij swnghcanj ginghyingz fuzvu lai cungj hingzsik. Haigvangq gij hawciengz lajmbanj, doicaenh lajmbanj riuzdoeng yendaiva. Laeb caezcienz nungzcanjbinj hawciengz dijhi, laeb ndei nungzyez saenqsik ropaeu caeuq fatbouh cidu, fazcanj nungzcanjbinj yienhdaih riuzdoeng fuengsik, gemjmienx daehyinh siugai vanzcez soufeiq, ciengzgeiz saedhengz hangh cwngcwz hawj nungzcanjbinj daehyinh mbouj souh lanzdaengj, gyavaiq cauxbaenz aen nungzcanjbinj ginghyingz siugai vangjloz riuzdoeng cingzbonj daemq、yinhhengz yauliz sang haenx. Baujcang nungzyungh swnghcanj swhliu cukgaeuq gung’wngq, cwngjdun caeuq gveihfan gij cizsi hawciengz lajmbanj, yiemzhaenq fadceih doengh gij hingzveiz yaeuh nungzminz、haih nungzminz.

  (6) Coicaenh nungzyez ndaej lienzdaemh fazcanj. Ciuq aen iugouz hwnqguh swnghdai vwnzmingz, fazcanj yiengh nungzyez mbaetyungh、yiengh nungzyez sinzvanz、yiengh nungzyez swnghdai, gyagiengz baujhoh swnghdai vanzging. Laebdaeb doicaenh hwnqguh linzyez cungdenj gunghcwngz, ietraez hangh gunghcwngz baujhoh gij ndoengfaex sengcingz haenx aen saedhengz geizhanh de, laeb ndei cwngcwz、gyamaenh gij cingzgoj doiq ok dieg reihnaz dauq guh dieg ndoengfaex, bae gauj ndaem faex cauh ndoeng, daezsang ndoengfaex gyuemlumx bijliz. Saedhengz hangh gunghcwngz hwnqguh caeuq baujhoh diegnywj, doicaenh doiq ok dieg langh doihduz dauq guh dieg cueng nywj, fazcanj dwkraemx ndaem nywj, hawj gij diegnywj ndoq dauqcungz did nywj gyuem nywj. Gyagiengz baujhoh swhyenz raemx. Gyagiengz ciengx re gij doenghgo doenghduz sengmaj youq ndaw raemx, lai bouj cuengq byaceh roengz dah roengz dingh bae. Doicaenh cungdenj liuzyiz caeuq gihyiz cunghab fuengzceih raemx conx namh deuz, gyavaiq ceihleix doengh giz diegdeih bienq sa bienq req, gyagiengz hwnqguh swhyienz baujhugih. Baujhoh doengh gij vuzcungj caeuq cungjciz swhyenz dijbauj noix miz haenx, fuengzre gij binghraq doenghgo doenghduz caeuq gij vuzcungj miz haih haenx daj rog guek ciemq banh haeujdaeuj. Lai laizloh couzcomz ndoengfaex、diegnywj、raemxnamh baujciz daengj swnghdai yauqik dienzbouj swhginh, cugbouh daezsang dienzbouj byauhcunj. Cizgiz gungganq doengh cungj swnghvuzciz canjnieb aeu gij doenghgo mbouj dwg ok haeux ok youz guh yienzliuh haenx, doicaenh dawz nungzyez linzyez fucanjbinj caeuq gij ganj nyaq vut hoengq haenx bienqbaenz nwngzyenz、bienqbaenz swhyenz bae leihyungh. Doigvangq gij gisuz mbaetyungh nwngzyenz gemjnoix baizcuengq uqlah haenx, gyagiengz fuengzceih lajmbanj gunghyez、swnghhoz uqlah caeuq nungzyez menyenz uqlah.

  (7) Gyadaih nungzyez doiq rog hailangh. Genhciz “dax haeujdaeuj” caeuq “byaij okbae” dox giethab, daezsang gij naengzlig dungjcouz leihyungh ndaw guek rog guek song aen hawciengz、song cungj swhyenz, dawz nungzyez doiq rog hailangh guh ndaej engq gvangq engq laeg bae. Ciuq aen yenzcwz gujli cuzgouj gij canjbinj lauzdung comzmaed lai caeuq gisuz comzmaed lai、habdoh cingouj gij canjbinj raeuz mbouj miz roxnaeuz mbouj gaeuq yungh haenx, dingh ndei nungzcanjbinj cingouj cuzgouj canloz gveihva caeuq diuzgung gihci, gyagiengz gozci hawciengz yenzgiu caeuq saenqsik fuzvu. Gyagiengz doiq nungzcanjbinj cingouj cuzgouj guh gienjniemh cazbingh caeuq gamguenj, daezsang cuzgouj youhsi canjbinj fu’gyahciz caeuq caetliengh ancienz suijbingz. Dazyinx gij lauxbanj rog guek douzswh fazcanj yienhdaih nungzyez. Doiq gyoengq lauxbanj rog guek daeuj ginghyingz nungzcanjbinj caeuq nungzyez swnghcanj swhliu, laeb caezcienz gij cinjhaeuj cidu hab Seiqgyaiq Mouyiz Cujciz gveihcwz haenx, doiq gij swhbwnj rog guek daeuj gyoeb cawx ndaw guek gij giyez nangq daengz nungzyez haenx laeb hwnj ancienz saemjcaz gihci. Dungjcouz bae gauj doiq rog nungzyez hozcoz, gungganq nungzyez hamj guek ginghyingz giyez, cugbouh laeb hwnj nungzcanjbinj gozci swnghcanj、siugai、gyagoeng、bwhcwk、daehyinh dijhi. Cizgiz caeuqfaenh bae dingh gozci nungzcanjbinj mouyiz gveihcwz caeuq byauhcunj, coicaenh cauxbaenz yiengh mouyiz cizsi goengbingz hableix.

  
[1] [2] [3] [4] [5] [6]
Dozsiengq