Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CUNGHGUNG CUNGHYANGH AEN GIETDINGH GVENDAENGZ GIJ VWNDIZ HUNGNAEK BAE DOICAENH LAJMBANJ GAIJGWZ FAZCANJ HAENX 3

  
【Cihsaw Hung’iq : hung rauh iq】  Dajyaenq
      
  3、Daihlig Doicaenh Gaijgwz Cauhmoq, Gyagiengz Hwnqguh Gij Cidu Lajmbanj

  Yaek saedyienh aen canloz muzbyauh lajmbanj fazcanj, doicaenh yiengh nungzyez yendaiva miz daegsaek Cungguek, bietdingh aeu ciuq aen iugouz dungjcouz hawsingz lajmbanj fazcanj, cagaenj youq lajmbanj dijci gaijgwz fuengmienh doengh bouh ceiq youqgaenj de guh’ok daih cincanj, caenh’itbouh cuengq langh gauj hoengh gij ginghci lajmbanj, sawj gij vanzging baihrog lajmbanj fazcanj bienq ndei bae, gyagiengz yungh cidu bae baujcang lajmbanj fazcanj.

  (1) Onjdingh caeuq laeb caezcienz gij gihbwnj ginghyingz cidu lajmbanj. Yiengh song caengz ginghyingz dijci aeu gyadingz cwngzbauh ginghyingz guh giekdaej、doengj faen giethab haenx, dwg lajmbanj hangh gihbwnj ginghyingz cidu hab yiengh hawciengz ginghci dijci seveicujyi、hab gij daegdiemj nungzyez swnghcanj haenx, dwg aen goekdaej gij cwngcwz lajmbanj aen dangj, bietdingh aeu it di mbouj doenghngauz bae genhciz. Dawz gij gienz cwngzbauh ginghyingz diegdeih engqgya cungfaen youh miz baujcang haenx gyau hawj nungzminz, gij diegdeih cwngzbauh gvanhaeh yienhmiz aeu baujciz onjdingh caemhcaiq nanznanz mbouj bienq. Doicaenh nungzyez ginghyingz dijci gihci cauhmoq, gyavaiq nungzyez ginghyingz fuengsik cienjbienq. Gyadingz ginghyingz aeu cienjbienq gvaq mbiengj yungh gij gohgi caeuq swnghcanj soujduenh senhcin haenx bae, lai douzhaeuj gisuz、swhbwnj dwngj swnghcanj yausu, roengzrengz daezsang cizyozva suijbingz; doengjit ginghyingz aeu cienjbienq gvaq mbiengj fazcanj nungzhoh lienzhab caeuq hozcoz, cauxbaenz yiengh ginghyingz fuzvu dijhi lai cawjdaej、lai cwngzsw、lai hingzsik haenx bae, fazcanj cizdij ginghci、gyagiengz cizdij cujciz gij fuzvu goengnaengz de, gungganq gij nungzminz hozcoz cujciz yienghmoq, fazcanj gak cungj nungzyez seveiva fuzvu cujciz, gujli lungzdouz giyez caeuq nungzminz laebbaenz yiengh gihci dawz leih’ik gaenjmaed lienzgiet hwnjdaeuj haenx, roengzrengz daezsang cujcizva cingzdoh. Ciuq yiengh iugouz vih nungzminz fuzvu、haeuj ok swyouz、gienzleih bingzdaengj、guenjleix minzcuj, bangfuz nungzminz ciennieb hozcozse gyavaiq fazcanj, sawj de bienqbaenz yienhdaih nungzyez ginghyingz cujciz, daz gyoengq nungzminz bae caeuqfaenh guh ndaw guek rog guek hawciengz gingcwngh. Cienzmienh doicaenh cizdij linzgenz cidu gaijgwz, gyadaih guekmiz linzcangz caeuq cungdenj guekmiz linzgih linzgenz cidu gaijgwz sawqdiemj. Doicaenh guekmiz nungzcangz dijci gaijgwz. Onjdingh caeuq laeb ndei gij cidu cwngzbauh ginghyingz diegnywj.

  (2) Laeb caezcienz gij lajmbanj diegdeih guenjleix cidu yiemzgek gveihfan haenx. Aen cidu diegdeih dwg hangh cidu goekdaej lajmbanj. Ciuq diuz yenzcwz canjgenz mingzbeg cingcuj、yunghcawq deng gamguenj hanhhaed、mbaetyungh cizyoz、yiemzgek guenjleix, caenh’itbouh laeb ndei lajmbanj diegdeih guenjleix cidu. Genhciz gij reihnaz baujhoh cidu ceiq yiemzgek haenx, caengzcaengz lozsiz cwzyin, genhgez mbouj hawj reihnaz noix gvaq 18 ik moux. Vehdingh gij gihbwnj reihnaz ciengzlwenx ndaem haeuxgwn, laeb hwnj aen gihci baujhoh dienzbouj, saedbauj gihbwnj reihnaz cungjliengh mbouj gemjnoix、yunghcawq mbouj gaijbienq、caetliengh miz daezsang. Laebdaeb doicaenh cingjleix dem dauqcungz haifat diegdeih, reihnaz saedhengz sien dienzbouj haeuh ciemqyungh, mbouj ndaej hamj sengj gih si guh ciemqyungh dienzbouj rag bingz. Guh ndei gij hong lajmbanj diegdeih gienzik nyinhdingh、daenggeiq、fat dujdicwng hawj nungzminz. Doiq gij gienz cwngzbauh ginghyingz diegdeih haenx laeb ndei gij gienzlig caeuq ciznwngz de, ciuq fap baujcang nungzminz doiq gij diegdeih soj cwngzbauh haenx miz gienzleih bae ciemqmiz、sawjyungh、souik daengj. Gyagiengz doiq gij gienz cwngzbauh ginghyingz diegdeih guh riuzcienj guenjleix caeuq fuzvu, laeb hwnj laeb caezcienz aen hawciengz riuzcienj gij gienz cwngzbauh ginghyingz diegdeih haenx, ciuq diuz yenzcwz eifap gagnyienh miz daiqgyaq, cinjhawj nungzminz doenggvaq cienjbau、cuengqco、doxvuenh、cienjnyiengh、gujfwn hozcoz daengj hingzsik riuzcienj gij gienz cwngzbauh ginghyingz diegdeih, fazcanj gij habdoh gveihmoz ginghyingz lai cungj hingzsik. Doengh giz miz diuzgienh de, gojyij fazcanj ciennieb daihhoh、gyadingz nungzcangz、nungzminz ciennieb hozcozse daengj gveihmoz ginghyingz cawjdaej. Riuzcienj gij gienz cwngzbauh ginghyingz diegdeih, mbouj ndaej gaijbienq diegdeih gvi cizdij sojmiz aen singqcaet neix, mbouj ndaej gaijbienq gij yunghcawq diegdeih, mbouj ndaej sonjhaih gij gienzik gyoengq nungzminz cwngzbauh diegdeih haenx. Saedhengz gij cidu mbaetyungh diegdeih ceiq yiemzgek haenx, coengz yiemz gaemhanh hawsingz lajmbanj hwnqguh yungh dieg cungj gveihmoz. Laeb caezcienz gij cidu diegranz lajmbanj, yiemzgek guenjleix diegranz, ciuq fap baujcang diegranz nungzhoh gij yungh’ik vuzgenz de. Lajmbanj gij diegdeih doenggvaq cingjleix aen mbanj caeuq diegranz soj hoengq okdaeuj haenx, soujsien aeu dauqcungz guh reihnaz, danghnaeuz yaek hwnqguh yiengh’wnq roengzbae, bietdingh aeu hab diegdeih leihyungh gveihva、gvi haeuj nienzdoh hwnqguh yungh dieg giva, caemhcaiq aeu yousien muenxcuk cizdij hwnqguh yungh dieg. Gaijgwz gij cidu cwng’yungh diegdeih, yiemzgek gyaiqdingh gunghyizsing caeuq ginghyingzsing hwnqguh yungh dieg, cugbouh sukiq gij fanveiz cwng’yungh diegdeih, laeb caezcienz gij gihci cwng’yungh caeuq dienzbouj diegdeih. Ciuq fap cwngsou gij diegdeih cizdij lajmbanj, ciuq aen yenzcwz doengz dieg doengz gyaq, gibseiz cuksoq hableix dienzbouj hawj gij cizdij cujciz lajmbanj caeuq nungzminz, vih gij nungzminz deng cwng’yungh diegdeih haenx gaijgez ndei couhnieb、ranzyouq、ndawbiengz baujcang. Youq baihrog aen fanveiz hawsingz hwnqguh yungh dieg youz diegdeih leihyungh gveihva doekdingh haenx, ginggvaq baecinj ciemqyungh gij diegdeih cizdij lajmbanj bae hwnqguh gij hanghmoeg mbouj dwg gunghyizsing haenx, cinjhawj nungzminz ciuq fap doenggvaq lai cungj fuengsik bae caeuqfaenh guh haifat ginghyingz caemhcaiq baujcang gij gienzik habfap nungzminz. Cugbouh laeb hwnj gij hwnqguh yungh dieg hawciengz hawsingz lajmbanj doengjit haenx, doiq gij lajmbanj cizdij ginghyingzsing hwnqguh yungh dieg ciuq fap aeu ndaej haenx, bietdingh aeu doenggvaq aen hawciengz diegdeih doengjit miz hingzyiengh、yungh gij fuengsik goenghai gveihfan, bae cienjnyiengh gij gienz sawjyungh diegdeih, youq baihlaj aen cenzdiz hab gveihva caeuq gij diegdeih guekmiz yiengj miz gij gienzik bingzdaengj. Cagaenj laeb caezcienz gij faplwd fapgvi caeuq boiqdauq cwngcwz dox gvanlienz, gveihfan doicaenh lajmbanj diegdeih guenjleix cidu gaijgwz.

  (3) Laeb caezcienz gij cidu bangcoengh caeuq baujhoh nungzyez. Laeb caezcienz hangh cidu baujcang nungzyez douzhaeuj, diuzcingj caizcwng ceiok、guding swhcanj douzswh、sindai douzcuengq gezgou, baujcwng gak gaep caizcwng doiq nungzyez douzhaeuj laihwnj fukdoh sang gvaq ginghcangzsing souhaeuj laihwnj fukdoh, daih fukdoh gyalai guekgya doiq lajmbanj giekdaej sezsih gensez caeuq ndawbiengz saehnieb fazcanj gij douzhaeuj de, daih fukdoh daezsang cwngfuj gai dieg souik、gij suiq ciemq yungh reihnaz saen gyalai souhaeuj yungh youq nungzyez haenx aen beijlaeh de, daih fukdoh gyalai doiq cunghbu sihbu digih lajmbanj gunghyizsing gensez hanghmoeg gij douzhaeuj de. Doengh gij binghyiemj suijgu cawz yiemj gya maenh、swnghdai gensez daengj gunghyizsing gensez hanghmoeg guekgya youq cunghbu sihbu digih anbaiz haenx, cugbouh mbouj aeu yienhgaep roxnaeuz yienhgaep doxroengz swhginh boiqdauq. Haigvangq nungzyez douzhaeuj laizloh, cingjhab douzswh hanghmoeg, gyagiengz douzswh gamguenj, daezsang swhginh sawjyungh yauqik. Laeb caezcienz gij cidu boujdiep hawj nungzyez, gyadaih fanveiz, daezsang byauhcunj, dingh ndei banhfap, daegbied aeu bangcoengh gyalai swnghcanj haeuxgwn gyalai souhaeuj, cug bi haemq daih fukdoh gyalai nungzminz ndaem haeux boujdiep. Laeb caezcienz yiengh nungzswh cunghab boujdiep dungdai diuzcingj gihci caeuq nungzyez swnghcanj swhliu hwnj gyaq dox venj ngaeu haenx. Laeb caezcienz gij cidu baujhoh nungzcanjbinj gyagwz, laeb ndei aen dijhi diuzgung nungzcanjbinj hawciengz, onjbouh daezsang haeuxgwn ceiq daemq soucawx gyagwz, gaij ndei gij banhfap baujhoh gizyawz cujyau nungzcanjbinj gyagwz, cungsaed cujyau nungzcanjbinj bwhcwk, gaij ndei nungzcanjbinj cingouj cuzgouj caeuq souhaeuj cuengqok diuzcez gihci, baujciz nungzcanjbinj gyagwz suijbingz hableix. Guh ndei haeuxgwn daengj cujyau nungzcanjbinj gyagwz cauxbaenz gihci, leixswnh bijgya gvanhaeh, cungfaen fazveih hawciengz gyagwz doiq demcanj demsou gij coicaenh cozyungh de. Laeb caezcienz nungzyez swnghdai vanzging bujcangz cidu, cauxbaenz yiengh gikleih gihci ndei bae baujhoh reihnaz、diegraemx、ndoengfaex、diegnywj、diegmbaeq daengj swhyienz swhyenz caeuq nungzyez vuzcungj swhyenz haenx.

  (4) Laeb hwnj gij yienhdaih ginhyungz cidu lajmbanj. Gij ginhyungz lajmbanj dwg aen haedsim yienhdaih ginghci lajmbanj. Cauhmoq gij ginhyungz dijci lajmbanj, cuengqsoeng gij cwngcwz cinjhaeuj ginhyungz lajmbanj, gyavaiq laeb hwnj lajmbanj aen ginhyungz dijhi youz sanghyezsing ginhyungz、hozcozsing ginhyungz、 cwngcwzsing ginhyungz dox giethab, swhbwnj cukgaeuq、goengnaengz caezcienz、fuzvu dohdaengz、yinhhengz ancienz haenx. Lai roengzrengz doiq lajmbanj ginhyungz guh cwngcwz bangcoengh, haigvangq gij miengloh yungzswh, cunghab yinhyungh caizsui gangganj caeuq hobi cwngcwz gunghgi, dinghyiengq saedhengz suisouh gemjmienx caeuq feiqyungh boujdiep, dazyinx engq lai sindai swhginh caeuq ndawbiengz swhginh cuengq roengz lajmbanj bae. Gak loih ginhyungz gihgou cungj aeu cizgiz bangcoengh lajmbanj gaijgwz fazcanj. Genhciz aen fueng’yiengq nungzyez ngaenzhangz vih nungz fuzvu, gyagiengz ciznwngz、lozsiz cwzyin, onjdingh caeuq fazcanj gij fuzvu vangjloz lajmbanj. Gyagvangq nungzyez fazcanj ngaenzhangz gij lingjyiz bang nungz de, gyadaih cwngcwzsing ginhyungz doiq nungzyez haifat caeuq lajmbanj giekdaej sezsih gensez guh cunggeiz ciengzgeiz sindai bangcoengh. Gyadaih youzcwng cuzcuz ngaenzhangz gij yezvu fanveiz nangq daengz nungzyez de. Yienhfaenh ngaenzhangz hangznieb ginhyungz gihgou gij cunzgvanj saen gaepsou ndaej haenx, cujyau yungh youq dangdieg cuengq daigvanj. Gaij ndei lajmbanj sinyungse fazyinz ceihleix gezgou, baujciz yienh (si) se fazyinz diegvih onjdingh, dawzok yiengh cozyungh guh aen ligliengh cujyau vih nungzminz fuzvu haenx. Gveihfan fazcanj gij lajmbanj ginhyungz gihgou yienghmoq lai cungj hingzsik caeuq gij digihsing ngaenzhangz rauh iq cujyau dwg vih lajmbanj fuzvu haenx. Gyagiengz gamduk guenjleix, daihlig fazcanj gij saenqyungh daigvanj soqngeg iq, gujli fazcanj gak cungj veizhingz ginhyungz fuzvu hab gij daegdiemj caeuq sihyau lajmbanj haenx. Cinjhawj gij ginhyungz cujciz iq lajmbanj daj ginhyungz gihgou yungz haeuj swhginh. Cinjhawj doengh aen nungzminz ciennieb hozcozse miz diuzgienh haenx bae guh saenqyungh hozcoz. Gveihfan caeuq dazyinx ndawbiengz dox ciqcienz cangqheiq fazcanj. Gyavaiq hwnqguh aen saenqyungh dijhi lajmbanj. Laeb hwnj aen lajmbanj sindai danhbauj gihci youz cwngfuj bangfuz、miz lai mbiengj caeuqfaenh、ciuq hawciengz yinhhengz haenx. Gyadaih lajmbanj gij doxgaiq ndaej guh mizyauq danhbauj haenx aen fanveiz de. Fazcanj gij baujyiemj saehnieb lajmbanj, laeb caezcienz cwngcwzsing nungzyez baujyiemj cidu, gyavaiq laeb hwnj nungzyez caiq baujyiemj caeuq caihaih hungloet fung’yiemj faensanq gihci. Gyagiengz hwnqguh nungzcanjbinj gizhoq hawciengz.

  (5) Laeb hwnj gij cidu coicaenh hawsingz lajmbanj ginghci ndawbiengz fazcanj yizdijva. Caenhliengh vaiq di youq hawsingz lajmbanj gveihva、canjnieb baijbouh、giekdaej sezsih gensez、goenggungh fuzvu yizdijva daengj fuengmienh ndaej miz cincanj moq, coicaenh goenggungh swhyenz youq ndawgyang hawsingz lajmbanj bingzyaenx boiqbaij、swnghcanj yausu youq ndawgyang hawsingz lajmbanj swyouz riuzdoengh, doidoengh hawsingz lajmbanj ginghci ndawbiengz fazcanj yungzhab. Dungjcouz diegdeih leihyungh caeuq hawsingz lajmbanj gveihva, hableix anbaiz aen yienh aen si cwngzcin gensez、reihnaz baujhoh、canjnieb conzyouq、ranzmbanj faenbouh、swnghdai hanzyangj daengj gunggan baijbouh. Dungjcouz hawsingz lajmbanj canjnieb fazcanj, sawj gij canjnieb gezgou lajmbanj bienq ndei, fazcanj gij fuzvu hangznieb lajmbanj caeuq yanghcin giyez, dazyinx hawsingz swhginh、gisuz、vunzcaiz、guenjleix daengj swnghcanj yausu yiengq lajmbanj riuzdoengh. Dungjcouz hawsingz lajmbanj giekdaej sezsih gensez caeuq goenggungh fuzvu, cienzmienh daezsang caizcwng doiq gij goenggungh saehnieb lajmbanj aen baujcang suijbingz de, cugbouh laeb hwnj aen goenggungh fuzvu cidu hawsingz lajmbanj doengjit haenx. Dungjcouz hawsingz lajmbanj lauzdung couhnieb, gyavaiq laeb hwnj gij vunzlig swhyenz hawciengz hawsingz lajmbanj doengjit haenx, dazyinx nungzminz miz cizsi dwk ok rog bae couhnieb, gujli nungzminz couh gaenh gaijhangz couhnieb, bangfuz nungzminzgungh dauqma ranzmbanj cauhnieb. Gyagiengz baujhoh gij gienzik nungzminzgungh, cugbouh guh daengz nungzminzgungh youq cienzhong、lwgnyez haeuj hag doegsaw、goenggungh veiswngh、ranzyouq co cawx daengj fuengmienh caeuq gyoengq gihminz hawsingz yiengjmiz doengzdaengj daiyi, gaij ndei nungzminzgungh gij lauzdung diuzgienh de, baujcang swnghcanj ancienz, hawj engq lai nungzminzgungh ndaej caeuqfaenh goengsieng、ywbingh、ciengxlaux baujyiemj, caenhliengh vaiq di ceiqdingh caeuq saedhengz gij banhfap sawj nungzminzgungh senj dieg hix ndaej ciepswnj ciengxlaux baujyiemj gvanhaeh haenx. Dungjcouz hawsingz lajmbanj ndawbiengz guenjleix, doicaenh hugouj cidu gaijgwz, cuengqsoeng gij diuzgienh youq ndaw hawsingz rauh iq roengz hugouj, sawj gij nungzminz youq hawsingz onjdingh couhnieb caeuq miz ranzyouq haenx miz cizsi dwk cienjbienq baenz gij gihminz hawsingz. Doidoengh riuzdoengh yinzgouj fuzvu caeuq guenjleix dijci cauhmoq. Gyadaih gij gienzhanh hawj yienhfaenh gag guhcawj fazcanj, gyalai doiq yienhfaenh guh yizbanhsing senjdieg ceihawj、coicaenh caizlig caeuq saehgienz gap ndaej doxngamj, gyagiengz gij rengzhoengh caeuq saedlig yienhfaenh ginghci. Doicaenh sengj cigciep guenjleix yienh (si) caizcwng dijci gaijgwz, yousien dawz nungzyez daih yienh gvi haeuj gaijgwz fanveiz. Doengh giz deihfueng miz diuzgienh de ndaej ciuq fap damqra yiengh dijci youz sengj cigciep guenj yienh (si) haenx. Genhciz byaij diuz roen cwngzcinva miz daegsaek Cungguek, fazveih ndei hawsingz hung rauh doiq lajmbanj gij fuzse daiqdoengh cozyungh de, ciuq fap dawz gij hingzcwng guenjleix gienzhanh doxwngq gyauhawj doengh aen haw iq ginghci fazcanj vaiq、ak ciuyinx gaepsou yinzgouj haenx, coicaenh gij hawsingz hung rauh iq caeuq haw iq doxdaengh fazcanj, cauxbaenz yiengh gihci hawj cwngzcinva caeuq lajmbanj moq gensez ndaej dox coicaenh caeuq doengzcaez fazcanj haenx. Cizgiz doicaenh dungjcouz hawsingz lajmbanj cunghab boiqdauq gaijgwz sawqniemh.

  (6) Laeb caezcienz gij minzcuj guenjleix cidu lajmbanj. Genhciz dawz aen dangj lingjdauj、yinzminz danggya guhcawj、ciuq fap ceihleix guekgya gaenjmaed doengjit youq itheij, fazcanj gij gihcwngz minzcuj lajmbanj, aeu gyadaih miz cizsi bae caeuqfaenh guh、doicaenh saenqsik goenghai、guh caezcienz lwnhsaeh siengliengz、gyagiengz gienzlig gamduk guh cungdenj, gyagiengz gihcwngz cwnggenz gensez, gyadaih gij fanveiz vunzmbanj gag guenj, baujcang nungzminz yiengjmiz gij minzcuj gienzleih engq lai engq saedcaih. Cugbouh saedhengz hawsingz lajmbanj ciuq aen yinzgouj beijlaeh doxdoengz bae senjgij yinzda daibyauj, gyadaih nungzminz youq ndaw yienh yangh yinzda daibyauj gij beijlaeh de, sawj yinzda daibyauj caeuq nungzminz lienzhaeh maedcaed bae. Laebdaeb doicaenh lajmbanj cunghab gaijgwz, 2012 nienz daihdaej guhbaenz yanghcin gihgou gaijgwz yinvu, roengzrengz gyagiengz gij ndawbiengz guenjleix caeuq goenggungh fuzvu ciznwngz aen yanghcin cwngfuj. Laeb caezcienz yiengh yanghcin guenjleix gihci caeuq nungzminz cwngci caeuqfaenh cizgizsing mboujduenh daezsang dox hab’wngq haenx, saedhengz cwng’vu goenghai, ciuq fap baujcang gij gienz rox cingzgvang、gij gienz caeuqfaenh guh、gij gienz gangj okdaeuj、gij gienz guh gamduk gyoengq nungzminz. Laeb caezcienz yiengh vunzmbanj gag guenj gihci gig miz vuedlig youz aen cunh dangj cujciz lingjdauj haenx, haeujlaeg bae gauj gij minzcuj senjgij sizcen aeu cigciep senjgij、goengcingq miz cizsi guh gihbwnj iugouz, gij minzcuj gezcwz sizcen aeu vunzmbanj veiyi、vunzmbanj daibyauj veiyi、vunzmbanj lwnhsaeh guh cujyau hingzsik, gij minzcuj guenjleix sizcen aeu gag gyauyuz、gag guenjleix、gag fuzvu guh cujyau muzdiz, gij minzcuj gamduk sizcen aeu hongsaeh ndaw mbanj goenghai、caizvu gamduk、cungqvunz bingzlwnh guh cujyau neiyungz haenx, doicaenh vunzmbanj gag guenj ciduva、gveihfanva、cwngzsiva. Gyagiengz lajmbanj fazci gensez, laeb caezcienz gij faplwd fapgvi nangq daengz nungzyez haenx, gyagiengz gij naengzlig ciuq fap hingzcwng, doiq gij hangznieb nangq daengz nungzyez haenx gyagiengz guh cizfaz gamduk caeuq swhfaz baujhoh. Gyagiengz lajmbanj fazci senhconz gyauyuz, gauj ndei faplwd fuzvu, daezsang gij faplwd yisiz gyoengq nungzminz, doicaenh lajmbanj ciuq fap ceihleix. Gungganq gij fuzvusing、gunghyizsing、hucusing ndawbiengz cujciz lajmbanj, laeb caezcienz gij goengnaengz ndawbiengz gag guenj. Yungh lai cungj cosih gyagiengz gij caizlig gihcwngz, cugbouh gaijgez gij vwndiz mbangj di hingzcwngcunh yinhcienj gunnanz haenx, cizgiz onjdangq bae hoizgej gij caivu ndaw yangh ndaw cunh. Laebdaeb guh ndei gij hong gamjduk guenjleix nungzminz fudanh, dingh ndei gij banhfap hawj vunzmbanj ciuq it gienh saeh yaenglwnh it mbat bae couq cienzngaenz couq vunzhong haenx, laeb caezcienz aen gihci bae hwnqguh gij goeng’ik saehnieb lajmbanj.

  
[1] [2] [3] [4] [5] [6]
Dozsiengq