Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CUNGHGUNG CUNGHYANGH AEN GIETDINGH GVENDAENGZ GIJ VWNDIZ HUNGNAEK BAE DOICAENH LAJMBANJ GAIJGWZ FAZCANJ HAENX 2

(2008 nienz 10 nyied 12 hauh Cungguek Gungcanjdangj Daihcibcaet Gaiq Cunghyangh Veijyenzvei Daihsam Baez Daengxcungq Veiyi doenggvaq)

  
【Cihsaw Hung’iq : hung rauh iq】  Dajyaenq
      
  2、Gij Cijdauj Swhsiengj、Muzbyauh Yinvu、Yenzcwz Hungnaek Bae Doicaenh Lajmbanj Gaijgwz Fazcanj

  Youq laj hingzsi moq bae doicaenh lajmbanj gaijgwz fazcanj, aeu cienzmienh gvancez gij cingsaenz cibcaet daih aen dangj, yaengx sang mbaw geizhauh hungmbwk yiengh seveicujyi miz daegsaek Cungguek, aeu Dwng Siujbingz Lijlun caeuq “Sam Aen Daibyauj” Cung’yau Swhsiengj guh ceijyinx, haeujlaeg gvancez lozsiz gohyoz fazcanjgvanh, dawz hwnqguh yiengh lajmbanj moq seveicujyi dangguh canloz yinvu, dawz byaij diuz roen nungzyez yendaiva miz daegsaek Cungguek dangguh gihbwnj fueng’yiengq, dawz gyavaiq cauxbaenz aen gwzgiz moq hawsingz lajmbanj ginghci ndawbiengz fazcanj yizdijva haenx dangguh gaenbonj iugouz, genhciz diuz fuengcim gunghyez fanj bwnq nungzyez、hawsingz bangcoengh lajmbanj caeuq lai hawj noix aeu cuengq langh gauj hoengh, cauhmoq dijci gihci, gyagiengz nungzyez giekdaej, gyalai nungzminz souhaeuj, baujcang gij gienzik nungzminz, coicaenh lajmbanj huzciz, cungfaen diuhdoengh gij cizgizsing、cujdungsing、cangcausing gyoengq nungzminz, doidoengh gij ginghci ndawbiengz lajmbanj youh ndei youh vaiq fazcanj.

  Gaengawq aen iugouz moq saedyienh cienzmienh hwnqguh aen biengz siujgangh fwndou muzbyauh youz aen dangj cibcaet daih daezok haenx caeuq aen iugouz hwnqguh yiengh lajmbanj moq seveicujyi swnghcanj fazcanj、swnghhoz fouqmiz soeng’yungz、funghgi ndaw mbanj vwnzmingz、yienghsiengq aen mbanj caezcingj seuqcengh、guenjleix minzcuj haenx, daengz 2020 nienz, lajmbanj gaijgwz fazcanj aen gihbwnj muzbyauh yinvu de dwg: Gij ginghci dijci lajmbanj engqgya caezcienz, hawsingz lajmbanj ginghci ndawbiengz fazcanj yizdijva dijci gihci daihdaej laeb hwnjdaeuj; yienhdaih nungzyez gensez ndaej miz cincanj yienhda, nungzyez cunghab swnghcanj naengzlig mingzyienj daezsang, guekgya haeuxgwn ancienz caeuq cujyau nungzcanjbinj gunghawj ndaej mizyauq baujcang; nungzminz moix vunz bingzyaenz cingh souhaeuj beij 2008 nienz laihwnj doeb ndeu, siuhfei suijbingz daih fukdoh daezswng, gij yienhsiengq hojndoq daihdaej siucawz; lajmbanj gihcwngz cujciz gensez caenh’itbouh gyagiengz, gij cidu vunzmbanj gag guenj engqgya caezcienz, gij minzcuj gienzleih gyoengq nungzminz ndaej daengz saedcaih baujcang; hawsingz lajmbanj gihbwnj goenggungh fuzvu bienq doxdoengz bae mingzyienj doicaenh, gij vwnzva lajmbanj caenh’itbouh mwnhoengh, gij gihbwnj vwnzva gienzik gyoengq nungzminz lozsiz ndaej engq ndei, lajmbanj bouxboux cungj miz gihvei ciepsouh gij gyauyuz maenhndei, lajmbanj gihbwnj swnghhoz baujcang、gihbwnj yihliuz veiswngh cidu engqgya caezcienz, lajmbanj ndawbiengz guenjleix dijhi caenh’itbouh laeb caezcienz; yiengh nungzyez swnghcanj dijhi mbaetyungh swhyenz、mbouj sonjhaih vanzging haenx gihbwnj cauxbaenz, lajmbanj vunzyouq vanzging caeuq swnghdai vanzging mingzyienj gaij ndei, gij naengzlig ndaej lienzdaemh fazcanj haenx mboujduenh gyagiengz.

  Yaek saedyienh gij muzbyauh yinvu gwnzneix gangj, aeu ciuqcoengz doengh hangh yenzcwz hungnaek lajneix.

  Bietdingh aeu gyamaenh caeuq gyagiengz aen giekdaej diegvih nungzyez, itcig cungj dawz gaijgez ndei aen vwndiz hawj cib geij ik vunz miz haeux gwn, dangguh guenj guek an biengz ndawde gienh daihsaeh youqgaenj daih’it. Genhciz diuz fuengcim baengh ndaw guek saedyienh haeuxgwn daihdaej gag gaeuq gunghawj, guekgya lai roengzrengz bae bangcoengh baujhoh nungzyez, haeujlaeg saedhengz aen canloz doenggvaq gohgi gyauyuz bae hwng nungzyez, gyavaiq hwnqguh yienhdaih nungzyez, saedyienh nungzyez cienzmienh onjdingh fazcanj, vih doidoengh ginghci fazcanj、coicaenh ndawbiengz huzciz、henhoh guekgya ancienz dwk roengz aen giekdaej gaenjmaenh.

  Bietdingh aeu saedcaih baujcang gij gienzik nungzminz, sojmiz gij gunghcoz lajmbanj, itcig cungj aeu vihliux dawz gij gaenbonj leih’ik gyoengq nungzminz saedyienh ndei、henhoh ndei、fazcanj ndei. Genhciz aeu vunz guh goek, gingqcungh gij eiqnyienh nungzminz, roengzrengz gaijgez doengh gij leih’ik vwndiz gyoengq nungzminz ceiq gvansim ceiq cigciep ceiq yienhsaed haenx, baujcang gij cwngci、ginghci、vwnzva、ndawbiengz gienzik gyoengq nungzminz, daezsang gij cunghab suciz gyoengq nungzminz, coicaenh nungzminz cienzmienh fazcanj, cungfaen fazveih gyoengq nungzminz aen cawjdaej cozyungh caeuq yiengh cingsaenz dajcauh gonq vunz de, gaenjgaenj baenghgauq ikfanh nungzminz hwnqguh yiengh lajmbanj moq seveicujyi.

  Bietdingh aeu mboujduenh gaijfang caeuq fazcanj gij swnghcanjliz ndawbiengz lajmbanj, itcig cungj dawz gaijgwz cauhmoq dangguh aen gaenbonj doenghlig bae doidoengh lajmbanj fazcanj haenx. Genhciz mboujduenh doicaenh lajmbanj gaijgwz caeuq cidu cauhmoq, dawz gaijgwz gezcwz guh ndaej engq gohyoz bae, sawj gaijgwz cosih engqgya doxdaengh dawzbanj bae, hawj hawciengz youq swhyenz boiqbaij ndawde cungfaen fazveih gihcujsing cozyungh, gyagiengz caeuq gaij ndei guekgya doiq nungzyez lajmbanj fazcanj gij diuzgung caeuq dazyinx de, laeb caezcienz aen ginghci dijci lajmbanj hab gij iugouz yiengh hawciengz ginghci seveicujyi haenx, dawz doengh gij swnghcanj gvanhaeh caeuq sangcwngz gencuz mbouj hab lajmbanj ndawbiengz swnghcanjliz fazcanj iugouz haenx diuzcingj bae, sawj lajmbanj ginghci ndawbiengz fazcanj ndaej gig miz rengzhoengh.

  Bietdingh aeu dungjcouz hawsingz lajmbanj ginghci ndawbiengz fazcanj, itcig cungj dawz roengzrengz cauhlaeb gij gunghnungz gvanhaeh、hawsingz lajmbanj gvanhaeh yienghmoq, dangguh aen canloz hungnaek bae gyavaiq doicaenh yendaiva haenx. Dungjcouz gunghyezva、cwngzcinva、nungzyez yendaiva gensez, gyavaiq laeb hwnj laeb caezcienz yiengh gihci ndaej ciengzgeiz aeu gunghyez coicaenh nungzyez、aeu hawsingz daiqdoengh lajmbanj, diuzcingj gozminz souhaeuj faenboiq gwzgiz, gyamaenh caeuq laeb caezcienz gij cwngcwz gyagiengz nungzyez、hawj nungzminz lai ndaej ndeicawq haenx, dawz guekgya giekdaej sezsih gensez caeuq ndawbiengz saehnieb fazcanj cungdenj cuengq youq lajmbanj, doicaenh hawsingz lajmbanj gihbwnj goenggungh fuzvu bienq doxdoengz bae, saedyienh hawsingz lajmbanj、gihyiz hezdiuz fazcanj, sawj gyoengq nungzminz ndaej bingzdaengj caeuqfaenh gauj yendaiva、doengzcaez yiengjsouh gij cingzgoj gaijgwz fazcanj.

  Bietdingh aeu genhciz youz aen dangj bae guenj gij gunghcoz lajmbanj, itcig cungj dawz gyagiengz caeuq gaij ndei aen dangj doiq gunghcoz lajmbanj gij lingjdauj de, dangguh aen cwngci baujcwng bae doicaenh lajmbanj gaijgwz fazcanj haenx. Genhciz yienghyiengh cungj coengz saedsaeh bae ngeix bae guh, genhciz gij gihbwnj cwngcwz aen dangj youq lajmbanj saedhengz haenx, gyagiengz lajmbanj gihcwngz cujciz caeuq gihcwngz cwnggenz gensez, vih aen dangj bae guenj gij gunghcoz lajmbanj laeb ndei dijci gihci caeuq fuengsik fuengfap, baujciz dangj caeuq nungzminz ginzcung lienzhaeh maedcaed, gyamaenh dangj youq lajmbanj aen giek gaemgienz de, cauxbaenz aen hablig giengzdaih bae doicaenh lajmbanj gaijgwz fazcanj haenx.

  
[1] [2] [3] [4] [5] [6]
Dozsiengq