Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CUNGHGUNG CUNGHYANGH AEN GIETDINGH GVENDAENGZ GIJ VWNDIZ HUNGNAEK BAE DOICAENH LAJMBANJ GAIJGWZ FAZCANJ HAENX 1

(2008 nienz 10 nyied 12 hauh Cungguek Gungcanjdangj Daihcibcaet Gaiq Cunghyangh Veijyenzvei Daihsam Baez Daengxcungq Veiyi doenggvaq)

  
【Cihsaw Hung’iq : hung rauh iq】  Dajyaenq
      
  Cungguek Gungcanjdangj Daihcibcaet Gaiq Cunghyangh Veijyenzvei Daihsam Baez Daengxcungq Veiyi cienzmienh faensik le hingzsi caeuq yinvu, nyinhnaeuz youq mwh gaijgwz hailangh 30 hopbi, cienzmienh dauqyawj cungjgez guek raeuz guh lajmbanj gaijgwz fazcanj doxdaeuj diuz roen ronghsag byaij gvaq de caeuq gij gingniemh dijbauj de, caenh’itbouh doengjit gij yinsiz daengx dangj daengx biengz, gyavaiq doicaenh hwnqguh yiengh lajmbanj moq seveicujyi, haenqrengz doidoengh hawsingz lajmbanj dungjcouz fazcanj, doiq cienzmienh gvancez gij cingsaenz cibcaet daih aen dangj, haeujlaeg gvancez lozsiz gohyoz fazcanjgvanh, hawj cienzmienh hwnqguh aen biengz siujgangh caiq lingh ndaej hingz、dajcauh ok aen gizmen moq yiengh saehnieb seveicujyi miz daegsaek Cungguek, miz eiqngeih hungnaek youh laeggyae. Cenzvei yenzgiu le gij vwndiz hungnaek gvendaengz youq baihlaj hingzsi moq bae doicaenh lajmbanj gaijgwz fazcanj haenx, guh’ok doengh hangh gietdingh lajneix.

  1、Gij Eiqngeih Hungnaek Youq Baihlaj Hingzsi Moq Bae Doicaenh Lajmbanj Gaijgwz Fazcanj

  Gij vwndiz nungzyez、nungzcunh、nungzminz, gvanhaeh daengz dangj caeuq guekgya saehnieb fazcanj daengxbuenz. Youq gwzming、gensez、gaijgwz gak aen lizsij seizgeiz, aen dangj raeuz genhciz dawz gij gihbwnj yienzleix Majgwzswhcujyi caeuq gij gidij saedsaeh guek raeuz dox giethab, itcig cungj cibfaen yawjnaek、nyinhcaen doiqdaih、roengzrengz gaijgez gij vwndiz nungzyez、nungzcunh、nungzminz, cauh’ok le diuz roen hawj gij gwzming sinhminzcujcujyi ndaej hingz caeuq diuz roen hawj gij saehnieb seveicujyi ndaej fazcanj.

  1978 nienz, aen dangj cib’it gaiq sam cungh cenzvei guh’ok lizsijsing gezcwz, dawz aen gunghcoz cungsim dangj caeuq guekgya senj daengz fuengmienh ginghci gensez、saedhengz gaijgwz hailangh. Aen dangj raeuz cienzmienh dawzdingh aen fazcanj daihbuenz ndaw guek rog guek, gingqcungh gyoengq nungzminz gij cingsaenz cauhguh gonq vunz de, soujsien daj lajmbanj gaijgwz guh hwnj, caemhcaiq cauxbaenz aen seiqdaeuz lanzdangj mbouj ndaej haenx bae daiqdoengh daengx guek, daz gyoengq yinzminz guh gaijgwz fazcanj, guh’ok le gij niebcik gwnz lizsij caengz miz. Youq gwnz roen gaijgwz hailangh hoenghhwd, aen dangj raeuz genhciz aeu Majgwzswhcujyi、Lezningzcujyi、Mauz Cwzdungh Swhsiengj、Dwng Siujbingz Lijlun caeuq “Sam Aen Daibyauj” Cung’yau Swhsiengj bae ceijyinx, haeujlaeg gvancez lozsiz gohyoz fazcanjgvanh, gaijfang swhsiengj、daj ndaw saehsaed ra aeu caenleix、caeuq seizdaih doengzcaez baenaj, mboujduenh doicaenh lajmbanj gaijgwz fazcanj, sawj gij lajmbanj guek raeuz bienqvaq ndaej mbwn byoek deih fan. Siu yinzminz gunghse bae, laebdingh yiengh song caengz ginghyingz dijci aeu gyadingz cwngzbauh ginghyingz guh giekdaej、doengj faen giethab haenx, cienzmienh hailangh nungzcanjbinj hawciengz, mbouj caiq cwngnab nungzyezsui, cigciep boujdiep hawj gyoengq nungzminz, cobouh cauxbaenz le yiengh ginghci dijci lajmbanj hab gij guekcingz guek raeuz caeuq hab swnghcanjliz ndawbiengz fazcanj iugouz haenx; haeuxgwn swnghcanj mboujduenh yat hwnj mbaek moq, nungzcanjbinj gung’wngq ngoenz beij ngoenz fungfouq, nungzminz souhaeuj daih fukdoh gyalai, banggungz haifat cingzyauq lairaeuh, gag baengh rengz bonjfaenh onjdingh gaijgez le aen vwndiz baujcwng 13 ik vunz miz haeux gwn; yanghcin giyez hwng hwnjdaeuj sadsad, hawsingz iq fazcanj hoenghhwd, lajmbanj hawciengz mwnmwn hoenghhoengh, gij lauzdungliz lajmbanj daih gveihmoz gaijhangz couhnieb, ikfanh nungzminzgungh bienqbaenz canjnieb gunghyinz ndawde aen gapbaenz bouhfaenh youqgaenj haenx, gij gunghyezva、cwngzcinva、nungzyez yendaiva miz daegsaek Cungguek haenx gyavaiq doicaenh, saedcaih gyamaenh le aen gunghnungz lenzmungz seizgeiz moq; lajmbanj seveicujyi minzcuj cwngci gensez caeuq cingsaenz vwnzmingz gensez mboujduenh gyagiengz, gij saehnieb ndawbiengz gyavaiq fazcvanj, mingzyienj daezsang le gij swhsiengj daudwz suciz、gohyoz vwnzva suciz caeuq ndangdaej suciz gyoengq nungzminz; lajmbanj aen dangj gensez mboujduenh gyagiengz, yiengh cunh gaep cujciz boiqdauq gensez aeu cunh dangj cujciz guh haedsim haenx cienzmienh doicaenh, dawz dangj youq lajmbanj aen giek gaemgienz de cuk ndaej engq net. Lajmbanj gaijgwz fazcanj yiengh sizcen hungmbwk baenzneix, gig daih diuhdoengh le gij cizgizsing ikfanh nungzminz, gig daih gaijfang caeuq fazcanj le gij swnghcanjliz ndawbiengz lajmbanj, gig daih gaij ndei le gij vuzciz vwnzva swnghhoz gyoengq nungzminz. Gij engq youqgaenj de dwg, lajmbanj gaijgwz fazcanj yiengh sizcen hungmbwk baenzneix, vih laeb hwnj caeuq laeb caezcienz gij gihbwnj ginghci cidu aen duenhmbaek codaeuz seveicujyi caeuq yiengh hawciengz ginghci dijci seveicujyi guek raeuz guh le cauhmoq damqra, vih saedyienh yinzminz swnghhoz daj gwn daenj mbouj gaeuq yathamj daengz daihdaej siujgangh、doicaenh seveicujyi yendaiva guh’ok le gung’yen hungloet, vih hoenx hingz gak cungj gunnanz caeuq fung’yiemj、baujciz ndawbiengz daihbuenz onjdingh dwk roengz le aen giekdaej gaenjmaenh, vih cauhbaenz diuz roen hwnqguh yiengh seveicujyi miz daegsaek Cungguek、cauxbaenz yiengh seveicujyi lijlun dijhi miz daegsaek Cungguek cwkrom le gingniemh dijbauj.

  Sizcen cungfaen cwngmingz, cij miz genhciz dawz gaijgez ndei gij vwndiz nungzyez、nungzcunh、nungzminz, dangguh daengx dangj gij hong youqgaenj ndawde hangh ceiq youqgaenj haenx, genhciz aen diegvih aeu nungzyez guh giekdaej, genhciz aen gaijgwz fueng’yiengq guh yiengh hawciengz ginghci seveicujyi, genhciz byaij diuz roen nungzyez yendaiva miz daegsaek Cungguek, genhciz baujcang gij vuzciz leih’ik caeuq minzcuj gienzleih gyoengq nungzminz, cij ndaej mboujduenh gaijfang caeuq fazcanj gij swnghcanjliz ndawbiengz lajmbanj, doidoengh gij ginghci ndawbiengz lajmbanj cienzmienh fazcanj.

  Seizneix, gozci hingzsi laebdaeb fatseng bienqvaq laegdaeuq, gij gaijgwz fazcanj guek raeuz gaenq haeuj daengz aen duenhmbaek ceiq youqgaenj haenx. Raeuz yaek coemjdawz caeuq yungh ndei mwh canloz seizgei youqgaenj, guh baenz aen muzbyauh hungmbwk cienzmienh hwnqguh aen biengz siujgangh, gyavaiq doicaenh yiengh yendaiva seveicujyi, couh aeu engqgya gagrox dawz laebdaeb gaijfang swhsiengj lozsiz daengz fuengmienh genhciz gaijgwz hailangh、doidoengh gohyoz fazcanj、coicaenh ndawbiengz huzciz bae, it di cungj mbouj doenghngauz bae doicaenh lajmbanj gaijgwz fazcanj. Laebdaeb gaijfang swhsiengj, bietdingh aeu giethab lajmbanj gaijgwz fazcanj aen sizcen hungmbwk neix, daihdamj damqra、gamj hai roenmoq, yungh gij lijnen caeuq swhlu moq bae buqgej doengh gij nanzdaez laengzlanz lajmbanj fazcanj haenx, vih doidoengh aen dangj lijlun cauhmoq、sizcen cauhmoq daezhawj aen goekmboq mbouj ndangj. Genhciz gaijgwz hailangh, bietdingh aeu dawzdingh lajmbanj gaijgwz aen cungdenj neix, youq dungjcouz hawsingz lajmbanj gaijgwz fuengmienh dwk boed gvaenghgaeuq, aeu ndaej cincanj hungloet, vih lajmbanj fazcanj caenq haeuj doenghlig moq, vih daengx aen ginghci ndawbiengz fazcanj gyalai vuedlig moq. Doidoengh gohyoz fazcanj, bietdingh aeu gyagiengz nungzyez fazcanj aen giekdaej neix, saedbauj guekgya haeuxgwn ancienz caeuq cujyau nungzcanjbinj mizyauq gunghawj, coicaenh nungzyez gyalai canjliengh、nungzminz lai ndaej souhaeuj、lajmbanj hwngfat mwnhoengh, vih gij ginghci ndawbiengz cienzmienh doxdaengh ndaej lienzdaemh fazcanj daezhawj yiengh daemxcengj rengzrwd. Coicaenh ndawbiengz huzciz, bietdingh aeu dawzdingh lajmbanj onjdingh aen daihbuenz neix, guh ndei lajmbanj ndawbiengz guenjleix, coicaenh ndawbiengz goengbingz cingqngeih, baujcwng nungzminz youq onj maengx hong, vih saedyienh guekgya ciengzgeiz andingh dwk roengz aen giekdaej gaenjmaenh.

  Gij lajmbanj guek raeuz cingqcaih fatseng bengwz moq, gij nungzyez guek raeuz caeuqfaenh guh gozci hozcoz caeuq gingcwngh cingqcaih roeb gizmen moq daengjnaj, doicaenh lajmbanj gaijgwz fazcanj miz haujlai diuzgienh mizleih, hix bungz mbouj noix gunnanz caeuq diuhcan, daegbied dwg gij mauzdun caengzlaeg youz hawsingz lajmbanj song aen gezgou mbouj doengz cix cauhbaenz haenx haenq lai. Gij ginghci dijci lajmbanj lij caengz laeb ndei, nungzyez swnghcanj ginghyingz cujcizva cingzdoh daemq, nungzcanjbinj hawciengz dijhi、nungzyez seveiva fuzvu dijhi、guekgya nungzyez cihciz baujhoh dijhi lij mbouj caezcienz, cauhlaeb hawsingz lajmbanj ginghci ndawbiengz fazcanj yizdijva dijci gihci yiengh iugouz neix gaenjbik; nungzyez fazcanj fuengsik ciuqyiengh lij co’nyauq banhsanq, nungzyez giekdaej sezsih caeuq gisuz canghbei doeklaeng, reihnaz daihliengh gemjnoix, yinzgouj swhyenz vanzging hanhhaed bienq ndaet, mbwnheiq bienqvaq yingjyangj gya haenq, swhyienz caihaih deihdeih fatseng, gozci haeuxgwn gunggouz mauzdun duzcuz, yaek baujcang guekgya haeuxgwn ancienz caeuq cujyau nungzcanjbinj gunggouz doxdaengh gij atlig de gyadaih; lajmbanj ndawbiengz saehnieb caeuq goenggungh fuzvu suijbingz haemq daemq, gak dieg fazcanj caeuq hawsingz lajmbanj gihminz souhaeuj cengca gyadaih, gaijbienq gij yienghsiengq doeklaeng lajmbanj yinvu hungloet gannanz; lajmbanj gij ndawbiengz leih’ik gwzgiz de bienqvaq laegdaeuq, mbangj di lajmbanj gihcwngz cujciz unqnyieg lanxsanj, gyagiengz lajmbanj minzcuj fazci gensez、gihcwngz cujciz gensez、ndawbiengz guenjleix yinvu hungnaek lairaeuh. Gyonj hwnjdaeuj gangj, nungzyez giekdaej ciuqyiengh lij buegnyieg, ceiq gaenj aeu gyagiengz; lajmbanj fazcanj ciuqyiengh lij nguhlaeng, ceiq gaenj aeu bangfuz; nungzminz gyalai souhaeuj ciuqyiengh lij hojnanz, ceiq gaenj aeu gyavaiq. Raeuz bietdingh aeu youq mwh an’onj couh ngeix daengz yung’yiemj、gyaboix roengzrengz, mboujduenh gyamaenh caeuq fazcanj gij hingzsi ndei lajmbanj.

  Daengx dangj bietdingh aeu laegdaeuq rox daengz, nungzyez dwg aen canloz canjnieb sawj lajmbwn andingh、sawj beksingq sim’onj haenx, mbouj miz nungzyez yendaiva couh mbouj miz guekgya yendaiva, mbouj miz lajmbanj mwnhoengh onjdingh couh mbouj miz daengx guek mwnhoengh onjdingh, mbouj miz nungzminz cienzmienh siujgangh couh mbouj miz daengx guek yinzminz cienzmienh siujgangh. Guek raeuz coengz cungjdaej daeuj gangj gaenq haeuj daengz aen duenhmbaek aeu gunghyez coicaenh nungzyez、aeu hawsingz daiqdoengh lajmbanj fazcanj, haeuj daengz mwh youqgaenj bae gyavaiq gaijcauh conzdungj nungzyez、byaij diuz roen nungzyez yendaiva miz daegsaek Cungguek, haeuj daengz mboengq seizgeiz youqgaenj bae roengzrengz buqcawz hawsingz lajmbanj song aen gezgou mbouj doxdoengz、cauxbaenz aen gwzgiz moq hawsingz lajmbanj ginghci ndawbiengz fazcanj yizdijva haenx. Raeuz aeu maenhmaenh dawzdingh gij gihbwnj guekcingz aen duenhmbaek codaeuz seveicujyi guek raeuz caeuq gij fazcanj daegcwng aen duenhmbaek seizneix, hab’wngq aen hingzsi moq lajmbanj gaijgwz fazcanj, swnh’wngq ikfanh nungzminz gij maqmuengh moq ndaej gvaq saedceij ndei de, coemjdawz seizgei、swnh seiq ganj hwnjbae, roengzrengz haiok diuz roen gvangqlangh guh yiengh nungzyez yendaiva miz daegsaek Cungguek, haenqrengz sawj hwnqguh yiengh lajmbanj moq seveicujyi ndaej cauxbaenz aen gizmen moqsag.

  
[1] [2] [3] [4] [5] [6]
Dozsiengq