Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

AEN CANGHCWNGZ CUNGHGOZ GUNGCANJDANGJ

(Cunghgoz Gungcanjdangj Daih Cibgouj Baez Daengx Guek Daibyauj Daihhoih bouhfaenh coihgaij, 2017 nienz 10 nyied 24 hauh doenggvaq)

  
【Cihsaw Hung’iq : hung rauh iq】  Dajyaenq
      
　　Cungjgang


　　Cunghgoz Gungcanjdangj dwg aen senhfunghdui gunghyinz gaihgiz Cungguek, doengzseiz dwg aen senhfunghdui yinzminz Cungguek caeuq Cunghvaz Minzcuz, dwg aen haedsim lingjdauj hangh saehnieb sevei cujyi miz gij daegsaek Cungguek, daibyauj gij iugouz fazcanj yiengh swnghcanjliz senhcin Cungguek, daibyauj aen fueng’yiengq baenaj yiengh vwnzva senhcin Cungguek, daibyauj gij leih’ik goekdaeuz gyoengq yinzminz ceiq guengjdaih Cungguek. Aen lijsiengj ceiq sang caeuq aen muzbyauh ceiq sat aen dangj dwg saedyienh gungcanj cujyi.


　　Cunghgoz Gungcanjdangj aeu Majgwzswh-Lezningz Cujyi、Mauz Cwzdungh Swhsiengj、Dwng Siujbingz Lijlun、“Sam Aen Daibyauj” Cung’yau Swhsiengj、Gohyoz Fazcanjgvanh、Aen Swhsiengj Yiengh Sevei Cujyi Miz Gij Daegsaek Cungguek Seizdaih Moq Siz Ginbingz dangguh aen hengzdoengh ceijnamz bonjfaenh.


　　Majgwzswh-Lezningz Cujyi biengjloh le gij gvilwd lizsij fazcanj aen biengz vunzloih, gij yienzleix goekdaeuz de it di mbouj loek, diuz mingh de geng dangqmaz. Aen lijsiengj ceiq sang gungcanj cujyi gyoengq vunz Cunghgoz Gungcanjdangj itsim gyaepgouz haenx, cijmiz youq gwnz giek aen biengz sevei cujyi cibcuk fazcanj caeuq fatdad raixcaix le cijndaej saedyienh. Fazcanj caeuq caezcienz aen cidu sevei cujyi dwg aen gocwngz lizsij ciengzgeiz ndeu. Genhciz gij yienzleix goekdaeuz Majgwzswh-Lezningz Cujyi, byaij diuz roen hab gij guekcingz Cungguek youz gyoengq yinzminz Cungguek gagnyienh genjdingh, gij saehnieb sevei cujyi Cungguek couh bietdingh yaek ceiq sat ndaej hingz.


　　Gyoengq vunz Cunghgoz Gungcanjdangj aeu Mauz Cwzdungh dungzci guh cujyau daibyauj haenx, dawz gij yienzleix goekdaeuz Majgwzswh-Lezningz Cujyi caeuq yiengh sizcen gidij Cungguek gwzming giethab hwnjdaeuj, cauhlaeb le Mauz Cwzdungh Swhsiengj. Mauz Cwzdungh Swhsiengj dwg Majgwzswh-Lezningz Cujyi youq Cungguek yinhyungh caeuq fazcanj, dwg gij lijlun yenzcwz caeuq gingniemh cungjgez cingqdeng gvendaengz Cungguek gwzming caeuq hwnqguh gaenq ndaej daengz sizcen cingqmingz, comzgiet le gij coengmingz gyoengq vunz Cunghgoz Gungcanjdangj. Baengh Mauz Cwzdungh Swhsiengj daeuj ceijyinx, Cunghgoz Gungcanjdangj lingjdauj daengx guek gak cuz yinzminz, ginggvaq aen doucwngh gwzming fanjdoiq digoz cujyi、funghgen cujyi、gvanhliuz swhbwnj cujyi gig raez he, hingz ndaej le aen gwzming saen minzcuj cujyi, laebbaenz le aen Cunghvaz Yinzminz Gunghozgoz caephengz gij conhcwng yinzminz minzcuj; Cungguek moq laebbaenz gvaqlaeng, swnhleih guh le sevei cujyi gaijcauh, guhbaenz daj saen minzcuj cujyi doh daengz sevei cujyi, laebdingh le aen cidu goekdaeuz sevei cujyi, fazcanj le gij ginghci、cwngci caeuq vwnzva sevei cujyi.


　　Cib’it Gaiq Sam Cung Cienzhoih doxdaeuj, gyoengq vunz Cunghgoz Gungcanjdangj aeu Dwng Siujbingz dungzci guh cujyau daibyauj haenx, cungjgez gij gingniemh deng loeng Cungguek moq laebbaenz gvaqlaeng, gaijfang swhsiengj, ciuq saedsaeh bae guh, dawz aen cungsim gunghcoz daengx dangj senj daengz ginghci gensez bae, saedhengz gaijgwz hailangh, haiok le mboengq moq fazcanj gij saehnieb sevei cujyi, cugbouh cauxbaenz le gij lohsienq、fuengcim、cwngcwz hwnqguh yiengh sevei cujyi miz gij daegsaek Cungguek, gangjmingz le aen vwndiz goekdaeuz baenzlawz youq Cungguek hwnqguh sevei cujyi、gyamaenh caeuq fazcanj sevei cujyi, cauhlaeb le Dwng Siujbingz Lijlun. Dwng Siujbingz Lijlun dwg gij yienzleix goekdaeuz Majgwzswh-Lezningz Cujyi caeuq gij sizcen Cungguek ciuhneix ndij gij daegdiemj seizdaih dox giethab cix ndaej ok, dwg youq laj lizsij diuzgienh moq ciepswnj caeuq fazcanj le Mauz Cwzdungh Swhsiengj, dwg Majgwzswh Cujyi youq Cungguek fazcanj daengz duenhmbaek moq, dwg yiengh Majgwzswh Cujyi Cungguek ciuhneix, dwg comzgiet le gij coengmingz gyoengq vunz Cunghgoz Gungcanjdangj, dazyinx gij saehnieb yendaiva sevei cujyi guek raeuz mboujduenh baenaj.


　　Cibsam Gaiq Seiq Cung Cienzhoih doxdaeuj, gyoengq vunz Cunghgoz Gungcanjdangj aeu Gyangh Cwzminz dungzci guh cujyau daibyauj haenx, youq ndaw sizcen hwnqguh yiengh sevei cujyi miz gij daegsaek Cungguek, gyalaeg nyinhrox le gijmaz dwg sevei cujyi、baenzlawz bae hwnqguh sevei cujyi caeuq aeu gensez aen dangj yienghlawz、baenzlawz bae gensez aen dangj, cwkrom le gij gingniemh dijbauj moq ceih dangj guenj guek, cauxbaenz le “Sam Aen Daibyauj” Cung’yau Swhsiengj. “Sam Aen Daibyauj”Cung’yau Swhsiengj ciepswnj caeuq fazcanj le Majgwzswh-Lezningz Cujyi、Mauz Cwzdungh Swhsiengj、Dwng Siujbingz Lijlun, fanjyingj le yiengh fazcanj bienqvaq aen seiqgyaiq caeuq Cungguek dangdaih doiq gaiq hongsaeh dangj caeuq guekgya daezok gij iugouz moq, dwg aen vujgi lijlun giengzdaih ndaej gyagiengz caeuq gaijndei gij gensez aen dangj、doicaenh sevei cujyi guek raeuz gag gaijndei caeuq fazcanj, dwg comzgiet le gij coengmingz gyoengq vunz Cunghgoz Gungcanjdangj, dwg gij swhsiengj dazyinx dangj raeuz bietdingh ciengzgeiz genhciz he. Seizseiz guh daengz “Sam Aen Daibyauj”, dwg gij goekgaen laeb dangj、gij giekdaej gaemgienz、gij goekmboq rengzlig aen dangj raeuz.


　　Cibroek Daih doxdaeuj, gyoengq vunz Cunghgoz Gungcanjdangj aeu Huz Ginjdauh dungzci guh cujyau daibyauj haenx, genhciz aeu Dwng Siujbingz Lijlun caeuq “Sam Aen Daibyauj” Cung’yau Swhsiengj guh dazyinx, gaengawq gij iugouz fazcanj moq, laegdaeuq nyinhrox caeuq hoizdap le doengh gij vwndiz hungnaek lumjbaenz youq laj hingzseiq moq saedyienh yiengh fazcanj lawz、baenzlawz bae fazcanj, cauxbaenz le aen Gohyoz Fazcanjgvanh aeu vunz guh goek、cienzmienh doxdaengh ndaej lienzdaemh fazcanj. Gohyoz Fazcanjgvanh dwg gij lijlun gohyoz caeuq Majgwzswh-Lezningz Cujyi、Mauz Cwzdungh Swhsiengj、Dwng Siujbingz Lijlun、“Sam Aen Daibyauj”Cung’yau Swhsiengj gawq dox ciepswnj youh caeuq seizdaih caez baenaj, dwg gij sigai’gvanh caeuq fanghfazlun Majgwzswh Cujyi gvendaengz fazcanj cungj gyonjcomz daejyienh he, dwg gij cwngzgoj hungnaek Majgwzswh Cujyi giethab guekcingz Cungguek he, dwg comzgiet le gij coengmingz gyoengq vunz Cunghgoz Gungcanjdangj, dwg gij swhsiengj dazyinx fazcanj yiengh sevei cujyi miz gij daegsaek Cungguek bietdingh aeu ciengzgeiz genhciz he.


　　Cibbet Daih doxdaeuj, gyoengq vunz Cunghgoz Gungcanjdangj aeu Siz Ginbingz dungzci guh cujyau daibyauj haenx, swnh’wngq seizdaih fazcanj, daj lijlun caeuq sizcen giethab fuengmienh bae hidungj hoizdap le youq aen seizdaih moq genhciz caeuq fazcanj yiengh sevei cujyi miz gij daegsaek Cungguek lawz、baenzlawz genhciz caeuq fazcanj yiengh sevei cujyi miz gij daegsaek Cungguek aen seizdaih goqdaez hungnaek neix, cauhlaeb le Aen Swhsiengj Yiengh Sevei Cujyi Miz Gij Daegsaek Cungguek Seizdaih Moq Siz Ginbingz. Aen Swhsiengj Yiengh Sevei Cujyi Miz Gij Daegsaek Cungguek Seizdaih Moq Siz Ginbingz dwg ciepswnj caeuq fazcanj le Majgwzswh-Lezningz Cujyi、Mauz Cwzdungh Swhsiengj、Dwng Siujbingz Lijlun、“Sam Aen Daibyauj” Cung’yau Swhsiengj、Gohyoz Fazcanjgvanh, dwg gij cwngzgoj ceiq moq Majgwzswh Cujyi giethab guekcingz Cungguek he, dwg comzgiet le gij gingniemh sizcen caeuq gij coengmingz gyoengq vunz dangj caeuq yinzminz, dwg bouhfaenh youqgaenj gapbaenz aen lijlun dijhi yiengh sevei cujyi miz gij daegsaek Cungguek, dwg gij hengzdoengh ceijnamz daengx dangj caeuq daengx guek yinzminz vih saedyienh Cunghvaz Minzcuz fukhwng hungmbwk bae haenqrengz buekguh, bietdingh aeu ciengzgeiz genhciz caemhcaiq mboujduenh fazcanj. Aeu Aen Swhsiengj Yiengh Sevei Cujyi Miz Gij Daegsaek Cungguek Seizdaih Moq Siz Ginbingz daeuj dazyinx, Cunghgoz Gungcanjdangj lingjdauj daengx guek gak cuz yinzminz, doengjlamx ciengz doucwngh hungmbwk、aen gunghcwngz hungmbwk、hangh saehnieb hungmbwk、aen loqsiengj hungmbwk, doidoengh yiengh sevei cujyi miz gij daegsaek Cungguek haeuj daengz le aen seizdaih moq.


　　Gaijgwz hailangh doxdaeuj, raeuz ndaej miz cingzcik caeuq cinbu laidaih baenzneix, diuz yienzaen goekgaen de gvigyonj hwnjdaeuj couh dwg: Haiok le diuz roen sevei cujyi miz gij daegsaek Cungguek, cauxbaenz le aen lijlun dijhi sevei cujyi miz gij daegsaek Cungguek, dinghlaeb le aen cidu sevei cujyi miz gij daegsaek Cungguek, fazcanj le yiengh vwnzva sevei cujyi miz gij daegsaek Cungguek. Diuz roen neix、aen lijlun dijhi neix、aen cidu neix、yiengh vwnzva neix, dwg aen dangj raeuz ginggvaq haujlai gannanz haemzhoj cij ndaej cauhlaeb, gyoengq dungzci daengx dangj aeu engqgya insik、ciengzgeiz genhciz caeuq mboujduenh bae fazcanj, yaengxsang fan geiz hungmbwk yiengh sevei cujyi miz gij daegsaek Cungguek, giendingh roenloh gagsaenq、lijlun gagsaenq、cidu gagsaenq、vwnzva gagsaenq, gvancez aen lijlun goekdaeuz、lohsienq goekdaeuz、fanghloz goekdaeuz dangj raeuz, vih saedyienh doicaenh gij gensez yendaiva、guhbaenz guekcoj doengjit、henhoh seiqgyaiq huzbingz caeuq coicaenh doengzcaez fazcanj sam hangh lizsij yinvu hungnaek neix, saedyienh gij muzbyauh buekguh “song aen bak bi”、saedyienh aen loqsiengj Cungguek Cunghvaz Minzcuz fukhwng hungmbwk bae haenqrengz buekguh.


　　Guek raeuz cingqcaih cawqyouq caemhcaiq yaek ciengzgeiz cawqyouq mboengq codaeuz sevei cujyi.Youq aen Cungguek bonjlaiz ginghci vwnzva doeklaeng baenzneix bae gensez yiengh yendaiva sevei cujyi, mboengq codaeuz neix dwg mboengq lizsij mbouj ndaej ndangq gvaqbae ndeu, aeu yungh baenz bak bi seizgan.Hwnqguh aen sevei cujyi guek raeuz, bietdingh aeu daj gij guekcingz guek raeuz guh hwnj, byaij diuz roen sevei cujyi miz gij daegsaek Cungguek.Youq mboengq yienhseiz, gij cujyau mauzdun ndawbiengz guek raeuz, dwg yinzminz doiq cungj swnghhoz gyaeundei aeuyungh ngoenz beij ngoenz demlai, hoeng fazcanj cix lij mbouj bingzyaenx mbouj cungfaen, muenxcuk mbouj ndaej cungj aeuyungh neix.Aenvih miz gij yinhsu ndaw guek caeuq gwnz seiqgyaiq daeuj yingjyangj, gij doucwngh ndaw gyang gaihgiz lij youq ndaw itdingh fanveiz ciengzgeiz mizyouq, youq baihlaj moux cungj diuzgienh lij aiq bienq haenqrem dem, danhseih gaenq mbouj dwg aen mauzdun cujyau. Gij gensez sevei cujyi guek raeuz, aen yinvu goekgaende, dwg caenh’itbouh gaijfang swnghcanjliz, fazcanj swnghcanjliz, cugbouh saedyienh yiengh yendaiva sevei cujyi, caemhcaiq vih neix bae gaijgwz ndaw swnghcanj gvanhaeh caeuq sangcwngz gencuz doengh fuengmienh nem doengh giz caeuq swnghcanjliz fazcanj mbouj dox hab’wngq haenx. Bietdingh aeu genhciz caeuq laebcienz aen ginghci cidu goekdaeuz aeu gunghyoujci guh cawjdaej、lai cungj sojyoujci ginghci doengzcaez fazcanj, genhciz caeuq laebcienz aen cidu faenboiq aeu ciuq lauzdung faenboiq guh cawjdaej、lai cungj faenboiq fuengsik caemhyouq, gujli bouhfaenh digih caeuq bouhfaenh vunz sien fouq hwnjdaeuj, cugbouh siumied gungzhoj, guh daengz doengzcaez fouqmiz, aeu swnghcanj fazcanj caeuq gij caizfouq ndawbiengz dem lai guh giek, mboujduenh muenxcuk cungj swnghhoz gyaeundei aeuyungh ngoenz beij ngoenz lai yinzminz, coicaenh bouxvunz cienzmienh fazcanj. Fazcanj dwg hangh yinvu youqgaenj daih’it aen dangj youq mwh gaemgienz hwng guek. Bietdingh aeu genhciz gij swhsiengj aeu yinzminz guh cungsim bae fazcanj, genhciz aen leixniemh baengh cauhmoq、doxdaengh、saekloeg、hailangh、caezndaej guh fazcanj. Gak hangh gunghcoz cungj aeu dawz doiq fazcanj gij swnghcanjliz aen biengz sevei cujyi mizik, doiq gyagiengz gij cunghab gueklig aen guekgya sevei cujyi mizik, doiq daezsang gij swnghhoz suijbingz gyoengq yinzminz mizik, dangguh aen moegdik caeuq biucinj cazniemh goekdaeuz, gingqcungh lauzdung、gingqcungh cihsiz、gingqcungh vunzcaiz、gingqcungh dajcauh, guh daengz vih yinzminz bae fazcanj、baengh yinzminz bae fazcanj、hawj yinzminz itcaez yiengjsouh gij cwngzgoj fazcanj. Yamq haeuj sigij moq, guek raeuz haeuj daengz mboengq fazcanj moq cienzmienh hwnqguh aen biengz siujgangh、gyavaiq doicaenh yiengh yendaiva sevei cujyi. Bietdingh aeu ciuq aen baijbouh doengbuenz“haj yiengh gyoeb baenz cingjdaej”caeuq aen baijbouh canloz“seiq aen cienzmienh”hangh saehnieb sevei cujyi miz gij daegsaek Cungguek, dungjcouz doicaenh gij gensez ginghci、gij gensez cwngci、gij gensez vwnzva、gij gensez sevei、gij gensez yiengh vwnzmingz swnghdai, doxdaengh doicaenh cienzmienh hwnqbaenz aen biengz siujgangh、cienzmienh gyalaeg gaijgwz、cienzmienh ciuqfap guenj guek、cienzmienh coengzyiemz ceih dangj. Youq sigij moq caeuq seizdaih moq, gij moegbiu aen canloz ginghci caeuq sevei fazcanj dwg, daengz mwh laeb dangj bak bi, cienzmienh hwnqbaenz aen biengz siujgangh; daengz mwh laeb guek bak bi,cienzmienh hwnqbaenz aen guekak yendaiva sevei cujyi.


　　Cunghgoz Gungcanjdangj youq mboengq codaeuz sevei cujyi, diuz lohsienq goekdaeuz de dwg: Lingjdauj caeuq comzgiet daengx guek gak cuz yinzminz, aeu ginghci gensez guh cungsim, genhciz seiq hangh yenzcwz goekdaeuz, genhciz gaijgwz hailangh, baengh rengz bonjfaenh, ganhoj cauhnieb, vih dawz guek raeuz hwnqbaenz aen guekak yendaiva sevei cujyi fouqgiengz、minzcuj、vwnzmingz、huzciz、gyaeundei ndeu cix haenqrengz buekguh.


　　Cunghgoz Gungcanjdangj youq ndaw saehnieb lingjdauj sevei cujyi, bietdingh aeu genhciz dawz ginghci gensez guh cungsim, gak hangh hongsaeh gizyawz cungj aeu fugcoengz aen cungsim neix, fugsaeh aen cungsim neix. Aeu hengzguh aen canloz baengh gohgi gyauyuz hwng guek、aen canloz baengh vunzcaiz hawj guekgya bienq ak、aen canloz baengh cauhmoq bae ragdoengh fazcanj、aen canloz saenqhwng lajmbanj、aen canloz diegrangh doxdaengh fazcanj、aen canloz ndaej laebdaeb fazcanj、aen canloz bing minz yungzhab fazcanj, cungfaen fazveih gij cozyung gohyoz gisuz dangbaenz aen swnghcanjliz daih’it, cungfaen fazveih gij cozyung cauhmoq dangguh cungj doenghlig daih’it bae dazyinx fazcanj, baengh gohgi cinbu, daezsang gij soqcaet bouxhong, doinyoengx gozminz ginghci engq miz caetliengh、engq miz yauqlwd、engqgya goengbingz、engq ndaej laebdaeb fazcanj.


　　Genhciz diuz roen sevei cujyi、genhciz yiengh conhcwng yinzminz minzcuj、 genhciz Cunghgoz Gungcanjdangj lingjdauj、genhciz Majgwzswh-Lezningz Cujyi Mauz Cwzdungh Swhsiengj seiq hangh yenzcwz goekdaeuz neix, dwg aen goekgaen ndalaeb guek raeuz. Youq ndaw daengx aen gocwngz hwnqguh yiengh yendaiva sevei cujyi, bietdingh aeu genhciz seiq hangh yenzcwz goekdaeuz, fanjdoiq yiengh swyouzva swhcanj gaihgiz.


　　Genhciz gaijgwz hailangh, dwg diuz roen ndaej hawj guek raeuz giengzak. Cijmiz gaijgwz hailangh, cijndaej fazcanj Cungguek、fazcanj sevei cujyi、fazcanj Majgwzswh Cujyi. Aeu cienzmienh gyalaeg gaijgwz, laebndei caeuq fazcanj aen cidu sevei cujyi miz gij daegsaek Cungguek, doicaenh aen dijhi ceihleix caeuq gij naengzlig ceihleix guekgya bienq yiengh yienhdaih.Aeu daj ndaw goekgaen bae gaijgwz aen dijci ginghci cughaed swnghcanjliz fazcanj, genhciz caeuq caezcienz aen dijci yiengh ginghci hawciengz sevei cujyi; caeuq neix dox hab’wngq, aeu guh gij gaijgwz cimdoiq aen dijci cwngci caeuq gij gaijgwz ndaw lingjyiz gizyawz.Aeu genhciz aen gozcwz goekdaeuz doiq rog hailangh, gaepsou caeuq ciuqhag sojmiz gij cwngzgoj vwnzmingz aen biengz vunzloih cauh’ok haenx. Gaijgwz hailangh wngdang daihdamj damqra, gamj bae haifwz, sawj gaijgwz gezcwz guh ndaej engq hab gohyoz, engqgya yawjnaek hawj gaijgwz engq baenz hidungj、engq baenz cingjdaej、engqgya doxdaengh, youq ndaw sizcen bae cauh’ok roen moq.


　　Cunghgoz Gungcanjdangj lingjdauj yinzminz fazcanj yiengh ginghci hawciengz sevei cujyi. Gyamaenh caeuq fazcanj yiengh ginghci gunghyoujci it di cungj mbouj doenghngauz, gujli、haeujcoengh、dazyinx yiengh ginghci feihgunghyoujci fazcanj it di cungj mbouj doenghngauz. Youq ndaw swhyenz boiqbaij fazveih gij cozyung hawciengz gietdingh, engq ndei fazveih gij cozyung cwngfuj, laebhwnj aen dijhi hungzgvanh diuzgung caezcienz. Doengjit maeuzveh singzmbanj fazcanj、diegrangh fazcanj、ginghci ndawbiengz fazcanj、vunz caeuq swhyienz huzciz fazcanj、ndaw guek fazcanj caeuq doiq rog hailangh, diuzcingj aen gvaenghgaq ginghci, cienjbienq gij fuengsik ginghci fazcanj, doicaenh gaijgwz gij gvaenghgaq mbiengj gunghawj. Coicaenh yiengh gunghyezva、saenqsikvaq、hawsingzvaq、nungzyez yendaiva moq doengzcaez fazcanj, hwnqguh yiengh lajmbanj moq sevei cujyi, byaij diuz roen gunghyezva yienghmoq miz gij daegsaek Cungguek, hwnqguh yiengh guekgya ak guh cauhmoq caeuq aen guekak gohgi gwnz seiqgyaiq.


　　Cunghgoz Gungcanjdangj lingjdauj yinzminz fazcanj yiengh minzcuj cwngci sevei cujyi. Genhciz dawz aen dangj lingjdauj、yinzminz danggya guhcawj、ciuqfap ceih guek sam yiengh neix gaenjmaed doxgyoeb youq itheij, byaij diuz roen fazcanj yiengh cwngci sevei cujyi miz gij daegsaek Cungguek, gyadaih gij minzcuj sevei cujyi, hwnqguh aen dijhi fapceih yiengh sevei cujyi miz gij daegsaek Cungguek, hwnqguh aen guekgya fapceih sevei cujyi, gyamaenh gij conhcwng yinzminz minzcuj, hwnqguh yiengh vwnzmingz cwngci sevei cujyi. Genhciz caeuq caezcienz aen cidu yinzminz daibyauj daihhoih、aen cidu lai dangj doxgap caeuq cwngci doxyaeng aeu Cunghgoz Gungcanjdangj lingjdauj、aen cidu dieg siujsoq minzcuz gag guenj caeuq aen cidu gyoengq cungqvunz gihcwngz gag guenj. Fazcanj yiengh yinzminz minzcuj engqgya gvangqlangh、engqgya cungfaen、engqgya caezcienz, doicaenh yiengh minzcuj doxyaeng gvangqlangh、lai caengz、baenz cidu bae fazcanj, saedcaih baujcang gij gienzleih guenjleix gaiq hongsaeh guekgya caeuq ndawbiengz、guenjleix gij saehnieb ginghci caeuq vwnzva yinzminz. Gingqcungh caeuq baujcang gij gienzleih bonjndang bouxvunz. Lai cauh diuzgienh hawj vunz gangj vah, laebhwnj caeuq laebcienz gij cidu ndij bouhloh guh minzcuj senjgij、minzcuj gezcwz、minzcuj guenjleix、minzcuj gamduk. Caezcienz aen dijhi faplwd yiengh sevei cujyi miz gij daegsaek Cungguek, gyagiengz gij hong hengzguh faplwd, sawj guekgya gak hangh hongsaeh cungj byaij hwnj diuz roen fapceih bae.


　　Cunghgoz Gungcanjdangj lingjdauj yinzminz fazcanj yiengh vwnzva senhcin sevei cujyi. Gensez gij vwnzmingz cingsaenz sevei cujyi, saedhengz ciuq faplwd ceihleix guekgya caeuq aeu daudwz guenjleix guekgya dox giethab, daezsang gij soqcaet swhsiengj daudwz caeuq gij soqcaet gohyoz vwnzva daengx aen minzcuz, vih gaijgwz hailangh caeuq gij gensez yiengh yendaiva sevei cujyi daezhawj gij swhsiengj baujcingq、cingsaenz doenghlig caeuq ciliz bangcoengh giengzdaih, hwnqguh aen guekak vwnzva sevei cujyi. Gyagiengz hwnqguh aen dijhi haedsim gyaciz sevei cujyi, genhciz gij cijdauj swhsiengj Majgwzswh Cujyi, laebhwnj aen lijsiengj caezcaemh yiengh sevei cujyi miz gij daegsaek Cungguek, hungzyangz gij cingsaenz minzcuz aeu gyaezguek cujyi guh haedsim caeuq gij cingsaenz seizdaih aeu gaijgwz cauhmoq guh haedsim, gungganq caeuq hengzguh aen gyacizgvanh haedsim sevei cujyi, daiqdaeuz dizcang gij gvanhnen yungznyaenq sevei cujyi, demgiengz cungj cingsaenz gaggingq、gagsaenq caeuq gag’ak minzcuz, dingjdangj gij swhsiengj nduknaeuh swhbwnj cujyi caeuq funghgen cujyi iemqmyaex, baetcawz gak cungj yienhsiengq coujcaq yakrwix ndawbiengz, roengzrengz sawj gyoengq yinzminz guek raeuz bienqbaenz gyoengq yinzminz miz lijsiengj、miz daudwz、miz vwnzva、miz gijliz. Doiq dangjyenz aeu yungh gij lijsiengj hunggyae gungcanj cujyi bae guh gyauyuz. Daihlig fazcanj gij saehnieb gyauyuz、gohyoz、vwnzva, doidoengh gij cienzdoengj vwnzva maenhndei Cunghvaz guh cangcausing cienjvaq、guh cangsinhsing fazcanj, ciepswnj gij vwnzva gwzming, fazcanj yiengh vwnzva senhcin sevei cujyi, daezsang gij saedlig’unq vwnzva guekgya. Gaemndaet aen gienz lingjdauj ndaw hong yisiz hingzdai, mboujduenh gyamaenh aen diegvih Majgwzswh Cujyi youq ndaw yisiz hingzdai guh dazyinx, gyamaenh aen giekdaej yiengh swhsiengj caezcaemh daengx dangj、 daengx guek yinzminz doxgiet buekguh.


　　Cunghgoz Gungcanjdangj lingjdauj yinzminz cauhlaeb aen biengz huzciz sevei cujyi. Ciuq aen iugouz goekdaeuz minzcuj fapceih、goengbingz cingqngeih、lauxsaed soujsaenq、doxndiep doxndei、cungrim rengzhoengh、andingh mbouj luenh、bouxvunz nem swhyienz huzciz caemhyouq caeuq gij yenzcwz itcaez hwnqguh、itcaez yiengjsouh, aeu baujcang caeuq gaijndei gij saedceij beksingq guh cungdenj, gaijgez ndei aen vwndiz gvendaengz gij leih’ik ceiq cigciep、ceiq yienhsaed、beksingq ceiq gvansim haenx, sawj aen cwngzgoj fazcanj ndaej engq lai engq goengbingz dwk ikleih daengxcungq yinzminz, sawj yinzminz ginzcung ndaej laebdaeb lai roxnyinh daengz gij ndei, roengzrengz cauhbaenz gij yienghsiengq daengxcungq yinzminz gak boux gag caenh gij naengzlig bonjfaenh、gak boux gag ndaej gij ndeicawq bonjfaenh youh ndaej huzciz caemhyouq haenx. Gyagiengz caeuq cauhmoq gaiq hong ceihleix ndawbiengz. Yiemzgek faen ok caeuq cingqdeng cawqceq gij mauzdun vunzdig caeuq gyoengqraeuz ndij gij mauzdun baihndaw yinzminz song loih mauzdun singqcaet mbouj doengz neix. Gyagiengz cunghab ceihleix cianh ndawbiengz, ciuqfap giengiet dwkceih gak cungj hozdung famhcoih caeuq gij vunz famhcoih sienghaih guekgya ancienz caeuq gij leih’ik guekgya、sienghaih ndawbiengz onjdingh caeuq ginghci fazcanj haenx, baujciz ndawbiengz ciengzgeiz onjdingh. Genhciz aen gvanhnen cungjdaej guekgya ancienz, giengiet henhoh gij cawjgienz、ancienz caeuq gij leih’ik fazcanj guekgya.


　　Cunghgoz Gungcanjdangj lingjdauj yinzminz hwnqguh yiengh swnghdai vwnzmingz sevei cujyi. Laebhwnj aen leixniemh swnghdai vwnzmingz gingqcungh swhyienz、swnh’wngq swhyienz、baujhoh swhyienz, demgiengz aen eiqsik raemx saw bya heu couh dwg bya gim bya ngaenz, genhciz aen gozcwz goekdaeuz mbaetyungh swhyenz caeuq baujhoh vanzging, genhciz diuz fuengcim mbaetyungh youq gonq、baujhoh youq gonq、gag ndaej hoizfuk guhcawj, genhciz byaij diuz roen vwnzmingz fazcanj swnghcanj fazcanj、swnghhoz fouqmiz、swnghdai maenhndei. Haeujrengz hwnqguh aen biengz mbaetyungh swhyenz、vanzging huzndei, saedhengz aen cidu baujhoh swnghdai vanzging ceiq yiemzgek haenx, cauxbaenz yiengh hoengqgan baijnda、aen gvaenghgaq canjnieb、gij fuengsik swnghcanj、gij fuengsik swnghhoz ndaej mbaetyungh swhyenz caeuq baujhoh vanzging haenx, vih yinzminz cauh ok aen vanzging maenhndei bae guh swnghcanj bae gvaq saedceij, hawj Cunghvaz Minzcuz ndaej ciengzlwenx lienzdaemh fazcanj.


　　Cunghgoz Gungcanjdangj genhciz cieddoiq lingjdauj yinzminz gaijfangginh caeuq gij ligliengh yinzminz vujcangh gizyawz, gyagiengz gensez yinzminz gaijfangginh, genhciz aeu cwngci gensez ginhdui、aeu gaijgwz gyaak ginhdui、aeu gohgi saenqhwng ginhdui、ciuq faplwd fapgvi guenjleix ginhdui, gensez aen yinzminz ginhdui dingq dangj cijveih、hoenx ndaej hingz、cozfungh geng ndei, saedcaih baujcingq yinzminz gaijfangginh mizyauq hengzguh gij yinvu sawjmingh ginhdui seizdaih moq, hawj yinzminz gaijfangginh youq ndaw gyamaenh gozfangz、hendawz guekcoj caeuq camgya aen yendaiva gensez sevei cujyi, ndaej gig ndei bae fazveih gij cozyung de.


　　Cunghgoz Gungcanjdangj henhoh caeuq fazcanj yiengh minzcuz gvanhaeh sevei cujyi bingzdaengj doxgaep doxbang huzciz, cizgiz gungganq、genjleh、daezswng gyoengq ganbu siujsoq minzcuz, bang gyoengq siujsoq minzcuz caeuq ranghdieg minzcuz fazcanj gij saehnieb ginghci、vwnzva caeuq sevei, couqmaenh cungj eiqsik caezcaemh aen Cunghvaz Minzcuz ndeu, saedyienh gak minzcuz itcaez doxgap haenqrengz buekguh、doengzcaez fazcanj mwnhoengh. Cienzmienh gvancez aen fuengcim goekdaeuz gaiq hong cunghgyau aen dangj, comzgiet gyoengq ginzcung saenqgyauq, vih ginghci sevei fazcanj guh gunghawj.


　　Cunghgoz Gungcanjdangj caeuq daengx guek gak minzcuz gunghyinz、nungzminz、cihsiz fwnswj doxgiet youq itheij, caeuq gak minzcuj dangjbai、gij vunz mbouj haeuj dangjbai、gij ligliengh gyaezguek gak minzcuz doxgiet youq itheij, caenh’itbouh fazcanj caeuq gyahung aen doengjit cansen gyaezguek ceiq gvangqlangh youz daengxcungq boux guhhong sevei cujyi、boux hwnqguh aen saehnieb sevei cujyi、boux gyaezguek yungjhu sevei cujyi、boux gyaezguek yungjhu guekcoj doengjit caeuq caenhrengz bae hawj Cunghvaz Minzcuz fukhwng hungmbwk de gapbaenz haenx. Mboujduenh gyagiengz daengx guek yinzminz baudaengz gyoengq beixnuengx Yanghgangj Daegbied Hingzcwnggih、gyoengq beixnuengx Aumwnz Daegbied Hingzcwnggih、gyoengq beixnuengx Daizvanh caeuq gyoengq beixnuengx vazgyauz rog guek doxgiet. Ciuq diuz fuengcim“aen guekgya ndeu、song cungj cidu”, coicaenh Yanghgangj、Aumwnz ciengzgeiz mwnhoengh onjdingh, guhbaenz aen saehnieb hungdaih guekcoj doengjit.


　　Cunghgoz Gungcanjdangj genhciz aen cwngcwz huzbingz vaigyauh doglaeb gag guhcawj, genhciz diuz roen huzbingz fazcanj, genhciz aen canloz hailangh doxik caezndaej, doengjit maeuzveh ndawguek rogguek song buenz geiz hung, remcieng fazcanj aen gvanhaeh doiq rog, roengzrengz vih gij gaijgwz hailangh caeuq yendaiva gensez guek raeuz ceng’aeu aen gozci vanzging ndei ndeu. Youq ndaw hongsaeh guek caeuq guek, genhciz gij gvanhnen dauhngeih leih’ik cingqdeng, henhoh gij doglaeb caeuq cawjgienz guek raeuz, fanjdoiq bagenz cujyi caeuq yiengh cwngci giengzgienz, henhoh seiqgyaiq huzbingz, coicaenh vunzloih cinbu, doidoengh cauxlaeb aen cingjdaej caez caemh minghyinh vunzloih, doidoengh hwnqguh aen seiqgyaiq huzciz doengzcaez mwnhoengh、huzbingz naihnanz. Aeu dox gingqcungh cawjgienz caeuq diegguek caezcingj、mbouj dox ciemqfamh、mbouj dox cabfwngz hongsaeh guekgya、bingzdaengj doxik、huzbingz caemhyouq haj hangh yenzcwz guh giek, fazcanj gij gvanhaeh guek raeuz caeuq seiqgyaiq gak guek. Mboujduenh caeuq doengh aen gueknden seiqhenz raeuz fazcanj gij gvanhaeh doxhuz doxndei, gyagiengz caeuq gij guekgya cingqcaih fazcanj haenx doxgiet caeuq gapguh. Ciuq aen yenzcwz doxyaeng caez guh caez ndaej, bae doicaenh hwnqguh “it rangh it loh”. Ciuq aen yenzcwz doglaeb gag guhcawj、vanzcienz bingzdaengj、dox guh gingqcungh、mbouj dox cabfwngz gij hongsaeh baihndaw doiqfueng, bae fazcanj gij gvanhaeh aen dangj raeuz caeuq doengh aen gungcanjdangj gak guek nem gij cwngdangj gizyawz.


　　Cunghgoz Gungcanjdangj yaek lingjdauj daengx guek gak cuz yinzminz saedyienh aen moegbiu buekguh“song aen bak bi”、saedyienh aen loqsiengj Cungguek sawj Cunghvaz Minzcuz fukhwng hungmbwk, bietdingh aeu gaenjmaed hopheux diuz lohsienq goekdaeuz aen dangj, genhciz dangj aeu guenj dangj、cienzmienh coengzyiemz ceih dangj, dawz dangj raeuz hwnqguh baenz aen dangj engq ak gaemgienz、engqgya senhcin engqgya seuqcingh, yungh gij cingsaenz gaijgwz cauhmoq bae cienzmienh doicaenh aen gunghcwngz hungmbwk moq gij gensez aen dangj, aeu gij cwngci gensez aen dangj guh doengjlingx, cienzmienh doicaenh aen cwngci gensez、swhsiengj gensez、cujciz gensez、cozfungh gensez、gijliz gensez dangj raeuz, dawz cidu gensez ronz gvaq doengh gij gensez neix, haeujlaeg doicaenh ciengz doucwngh fanj ndukbaih, cienzmienh daezsang gij gohyozva suijbingz aen dangj gensez. Genhciz laeb dangj vih guekgya、gaemgienz vih yinzminz, fazyangz gij cienzdoengj caeuq cozfungh maenhndei aen dangj, mboujduenh daezsang gij lingjdauj suijbingz caeuq gaemgienz suijbingz aen dangj, mboujduenh gyaak gij naengzlig dingj nduk fuengz bienq caeuq dingjdangj fung’yiemj, mboujduenh demgiengz gij naengzlig gag bienq seuq、gag caezcienz、gag gaijmoq、gag daezsang, mboujduenh gyamaenh aen giekdaej gaihgiz、gyadaih aen giekdaej ginzcung aen dangj, mboujduenh gyaak gij rengz dajcauh、rengz comzgiet、rengz dwkhoenx aen dangj, hwnqguh yiengh hagsib、yiengh fugsaeh、yiengh cauhmoq aen cwngdangj gaemgienz Majgwzswh Cujyi, sawj aen dangj raeuz itcig cungj byaij youq henznaj seizdaih, guh baenz aen haedsim giengiengz bae lingjdauj daengx guek yinzminz riengz diuz roen sevei cujyi miz gij daegsaek Cungguek mboujduenh baenaj. Gij gensez aen dangj bietdingh aeu giengiet saedyienh haj hangh iugouz goekdaeuz lajneix:


　　Daih’it, genhciz diuz lohsienq goekdaeuz aen dangj. Daengx dangj aeu yungh Dwng Siujbingz Lijlun、“Sam Aen Daibyauj”Cung’yau Swhsiengj、Gohyoz Fazcanjgvanh、Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz caeuq diuz lohsienq goekdaeuz aen dangj bae doengjit swhsiengj, doengjit hengzdoengh, caemhcaiq ciengzgeiz genhciz roengzbae it di cungj mbouj doenghngauz. Bietdingh aeu dawz gaijgwz hailangh caeuq seiq hangh yenzcwz goekdaeuz doengjit hwnjdaeuj, cienzmienh doeksaed diuz lohsienq goekdaeuz aen dangj, fanjdoiq sojmiz gij ginghyang loengloek “coj” caeuq you, aeu daezfuengz you, hoeng ceiq youqgaenj dwg aeu daezfuengz “coj”. Gyagiengz hwnqguh gak gaep lingjdauj banhswj, gungganq caeuq genjleh gyoengq ganbu maenhndei dangj caeuq yinzminz aeuyungh haenx, gungganq caeuq lienhbaenz cien bak fanh bouxciepban hawj aen saehnieb sevei cujyi, daj cujciz fuengmienh bae baujcingq gij lijlun goekdaeuz、lohsienq goekdaeuz、fanghloz goekdaeuz aen dangj ndaej gvancez doeksaed.


　　Daihngeih, genhciz gaijfang swhsiengj, ciuq saedsaeh bae guh, caeuq seizdaih caez baenaj, gouz caen guh saed. Diuz lohsienq swhsiengj aen dangj dwg yienghyiengh cungj daj saedsaeh guh hwnj, lijlun lienzhaeh saedsaeh, ciuq saedsaeh bae guh, youq ndaw sizcen cazniemh caenleix caeuq fazcanj caenleix. Daengx dangj bietdingh aeu genhciz diuz lohsienq swhsiengj neix, gaenx bae damqra, daihdamj sawqniemh, haifwz cauhmoq, rox ra banhfap moq bae guh hong, mboujduenh yenzgiu cingzgvang moq, cungjgez gingniemh moq, gaijgez vwndiz moq, youq ndaw sizcen fungfouq caeuq fazcanj Majgwzswh Cujyi, doinyoengx Majgwzswh Cujyi bienq ndaej habngamj gij guekcingz Cungguek.


　　Daihsam, genhciz itsim iteiq bae fugsaeh yinzminz.Dangj gaenjcij miz gij leih’ik gunghyinz gaihgiz caeuq gyoengq yinzminz ceiq guengjdaih haenx, cix mbouj miz saek di leih’ik daegbied bonjfaenh. Dangj mboujlwnh youq seizlawz cungj dawz gij leih’ik ginzcung cuengq youq vih daih’it, caeuq ginzcung haemz van caezcaemh, baujciz yiengh lienzhaeh ceiq maedcaed, genhciz vih yinzminz gaemgienz、vih yinzminz naemjsiengj、vih yinzminz maeuzleih, mbouj cinj boux dangjyenz lawz duetliz ginzcung, giengq hwnj gwnz dingjgyaeuj ginzcung bae. Gij cwngci youhsi ceiq daih aen dangj dwg maedcaed lienzhaeh ginzcung, aen dangj gaemgienz gvaqlaeng gij yung’yiemj ceiq daih de dwg duetliz ginzcung. Aen vwndiz dangjfungh、aen vwndiz dangj caeuq yinzminz ginzcung lienzhaeh, dwg gij vwndiz gvanhaeh daengz aen dangj dailix. Dangj youq ndaw hongsaeh bonjfaenh saedhengz diuz lohsienq ginzcung, yienghyiengh cungj vihliux ginzcung, yienghyiengh cungj ingbaengh ginzcung, daj ndaw ginzcung daeuj, daengz ndaw ginzcung bae, hawj ginzcung roxyiuj gij cawjcieng cingqdeng aen dangj caemhcaiq gagrox bae hengzguh.


　　Daihseiq, genhciz aen cidu minzcuj cizcungh. Aen cidu minzcuj cizcungh dwg gij cizcungh youq gwnz giekdaej minzcuj bae guh caeuq gij minzcuj aeu cizcungh dazyinx haenx dox giethab. De gawq dwg diuz cujciz yenzcwz goekgaen aen dangj, hix dwg diuz lohsienq ginzcung yungh haeuj gij swnghhoz aen dangj bae.Bietdingh aeu cungfaen fazyangz gij minzcuj ndaw dangj, gingqcungh gij cawjdaej diegvih gyoengq dangjyenz, baujcang gij gienzleih minzcuj gyoengq dangjyenz, fazveih gij cizgizsing cangcausing gak gaep cujciz aen dangj caeuq guengjdaih dangjyenz. Bietdingh aeu saedhengz yiengh cizcungh cingqdeng, laebmaenh gij eiqsik cwngci、gij eiqsik daihbuenz、gij eiqsik haedsim、gij eiqsik gaenhwnj, giendingh henhoh gij gienzvi caeuq gij cizcungh doengjit lingjdauj aen dangj cunghyangh aeu Siz Ginbingz dungzci guh haedsim haenx, baujcingq daengx dangj doxgiet doengjit caeuq hengzdoengh doxdoengz, baujcingq gij gietdingh aen dangj gvancez caephengz ndaej riengjvaiq mizyauq. Gyagiengz caeuq gveihfan gij cwngci swnghhoz ndaw dangj, sawj gij cwngci swnghhoz ndaw dangj engq lai gangj cwngci、hab seizdaih、gangj yenzcwz、ak dwkhoenx, fazcanj yiengh vwnzva cwngci ndaw dangj cizgiz gengangh, cauh ok cungj swnghdai cwngci maenhndei rumz seuq heiq cingq. Dangj youq ndaw cwngci swnghhoz bonjfaenh cingqdeng bae guh baebingz caeuq gag baebingz, youq yenzcwz vwndiz fuengmienh guh swhsiengj doucwngh, genhciz caenleix, coihcingq loengloek. Roengzrengz cauxbaenz yiengh cwngci gizmen youh miz cizcungh youh miz minzcuj、youh miz gijliz youh miz swyouz、youh miz doengjit eiqceiq youh miz gak vunz simsoeng sengdoengh vaijvued haenx.


　　Daihhaj, genhciz coengzyiemz guenj dangj ceih dangj.Cienzmienh coengzyiemz ceih dangj ciengzlwenx youq gwnz roen. Laj hingzseiq moq, dangj bungzdaengz yiengh gaujniemh gaemgienz、yiengh gaujniemh gaijgwz hailangh、yiengh gaujniemh ginghci hawciengz、yiengh gaujniemh vanzging baihrog de dwg ciengzgeiz、fukcab、yiemzhaenq, gij yung’yiemj cingsaenz soengse、naengzlig mbouj gaeuq、duetliz ginzcung、naiqheiq nduknaeuh neix engqgya soemraeh dwk baij youq dangqnaj daengx dangj. Aeu dawz gij biucinj haenqyiemz、cosih haenqyiemz de ronz daengz daengx gocwngz caeuq gak fuengmienh guenj dangj ceih dangj bae. Genhciz ciuq gvi ceih dangj、goek byai caez ceih, genhciz dawz gijliz baij youq vih daih’it, gyagiengz cujcizsing gijlizsing, youq dangqnaj gijliz aen dangj bouxboux bingzdaengj. Gyagiengz gij cawjdaej cwzyin caeuq gamduk cwzyin guenj dangj ceih dangj, gyagiengz doiq gij lingjdauj gihgvanh aen dangj caeuq gyoengq lingjdauj ganbu dangjyenz daegbied dwg boux lingjdauj ganbu cujyau de guh gamduk, mboujduenh laebndei aen dijhi ndaw dangj gamduk. Haeujlaeg doicaenh gij gensez dangjfungh lenzcwng caeuq gij doucwngh fanj ndukbaih, aeu yiengh mbouj yungznyaenx saek di bae ceihfad ndukbaih, cauxbaenz aen gihci mizyauq mbouj gamj ndukbaih、 mbouj ndaej ndukbaih、 mbouj siengj ndukbaih.


　　Cunghgoz Gungcanjdangj lingjdauj dwg gij daegdiemj ceiq bonjcaet yiengh sevei cujyi miz gij daegsaek Cungguek, dwg gij youhsi ceiqdaih aen cidu sevei cujyi miz gij daegsaek Cungguek.Dangj cwng ginh minz hag, fuengfuengmienhmienh, cungj aeu aen dangj lingjdauj. Dangj aeu hab ndaej gij iugouz gaijgwz hailangh caeuq hwnqguh yiengh yendaiva sevei cujyi, genhciz gohyoz gaemgienz、minzcuj gaemgienz、ciuq fap gaemgienz, gyagiengz caeuq gaijndei gij lingjdauj aen dangj. Dangj bietdingh aeu ciuq doengjlamx daengxbuenz、hezdiuz gak fueng aen yenzcwz neix, youq ndaw gak cungj cujciz doengz gaep fazveih gij cozyung guh baenz aen haedsim lingxdaeuz. Dangj bietdingh aeu comz rengz lingjdauj ginghci gensez, cujciz、hezdiuz gij ligliengh gak fuengmienh, doengzsim gaprengz, hopheux ginghci gensez guh hong, coicaenh ginghci sevei cienzmienh fazcanj. Dangj bietdingh aeu saedhengz yiengh gezcwz minzcuj gohyoz, ceiqdingh caeuq caephengz gij lohsienq、fuengcim、cwngcwz cingqdeng, guh ndei gij hong cujciz caeuq gij hong senhconz gyauyuz aen dangj, fazveih gij cozyung senhfungh mozfan daengxcungq dangjyenz. Dangj bietdingh aeu youq ndaw gvaengx yenzfaz caeuq faplwd hanhdingh haenx bae hozdung. Dangj bietdingh aeu baujcingq aen gihgvanh laebfap、swhfaz、hingzcwng、gamcaz guekgya, aen cujciz ginghci、vwnzva caeuq aen donzdij yinzminz ndaej remcieng cawjdoengh、doglaeb gag fucwz、doxdaz itcaez bae guh hong. Dangj bietdingh aeu gyagiengz doiq gunghvei、gungcanj cujyi cinghnenzdonz、aen lenzhozvei mehmbwk daengj doengh aen cujciz ginzcung guh lingjdauj, sawj gyoengqde baujciz caeuq demgiengz cwngcising、senhcinsing、ginzcungsing, cungfaen fazveih cozyung. Dangj bietdingh aeu hab’wngq hingzseiq fazcanj caeuq cingzgvang bienqvaq, laebcienz aen dijci lingjdauj, gaijcaenh gij fuengsik lingjdauj, gyaak gij naengzlig gaemgienz.Gungcanjdangjyenz bietdingh aeu caeuq gyoengq vunz rog dangj caenmaed doxgap guhsaeh, doengzcaez vih hwnqguh yiengh sevei cujyi miz gij daegsaek Cungguek haenqrengz buekguh.


　　Cieng Daih’it Dangjyenz


　　Diuz daih 1 Doengh boux senhcin ndaw gunghyinz、nungzminz、bouxbing、cihsiz fwnswj caeuq ndaw sevei gaihcwngz gizyawz Cungguek nienzgeij gaenq rim 18 bi haenx, swngznyinh gij ganghlingj caeuq canghcwngz aen dangj, nyienh’eiq camgya aen dangjcujciz ndeu caemhcaiq youq ndawde roengzrengz guhhong、caephengz gij gezyi aen dangj caeuq ciuqgeiz gyau dangjfei, couh ndaej sinhcingj gyahaeuj Cunghgoz Gungcanjdangj.


　　Diuz daih 2 Gij dangjyenz Cunghgoz Gungcanjdangj dwg boux senhfungh cansw miz gungcanj cujyi gyozvu ndaw gunghyinz gaihgiz Cungguek.


　　Gij dangjyenz Cunghgoz Gungcanjdangj bietdingh aeu itsim iteiq bae fugsaeh yinzminz, sijndaej bonjfaenh yienghmaz cungj mbouj aeu, vih saedyienh gungcanj cujyi haenqrengz buekguh baenz seiqvunz.


　　Gij dangjyenz Cunghgoz Gungcanjdangj ciengzlwenx dwg boux vunz bingzciengz ndaw lauzdung yinzminz ndeu. Cawz gij leih’ik goyinz caeuq aen cikgienz gunghcoz ndaw gvaengx faplwd ndij cwngcwz gvidingh caixvaih, sojmiz bouxvunz gungcanjdangj cungj mbouj ndaej maeuzaeu saek di seileih caeuq daeggienz.


　　Diuz daih 3 Dangjyenz bietdingh aeu hengzguh gij yivu lajneix:


　　(1)Nyinhcaen hag Majgwzswh-Lezningz Cujyi、Mauz Cwzdungh Swhsiengj、Dwng Siujbingz Lijlun、“Sam Aen Daibyauj”Cung’yau Swhsiengj、Gohyoz Fazcanjgvanh、Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz, hag gij lohsienq、fuengcim、cwngcwz caeuq gezyi aen dangj, hag gij gihbwnj cihsiz aen dangj, hag gohyoz、vwnzva、faplwd caeuq gij cihsiz yezvu, roengzrengz gyalai gij bonjsaeh fugsaeh yinzminz.


　　(2) Gvancez caephengz diuz lohsienq goekdaeuz caeuq gak hangh fuengcim、cwngcwz aen dangj, daiqdaeuz camgya gaijgwz hailangh caeuq hwnqguh yiengh yendaiva sevei cujyi, daiqdoengh ginzcung vih ginghci fazcanj caeuq sevei cinbu cix mbouj lau gannanz haemzhoj、haenqrengz buekguh, youq ndaw swnghcanj、gunghcoz、hagsib caeuq ndaw sevei swnghhoz guh’ok gij yienghndei mozfan daiqdaeuz.


　　(3) Genhciz gij leih’ik aen dangj caeuq gij leih’ik yinzminz beij gijmaz cungj sang, gij leih’ik goyinz fugcoengz gij leih’ik aen dangj caeuq yinzminz, dwgrengz bae gaxgonq, yiengjsouh youq doeklaeng, yiemzgek iugouz swhgeij, itsim vih goenggya, lailai guh gunghawj.


　　(4) Gagrox ciuqsouj gijliz aen dangj, sien dwg gij gijliz cwngci caeuq gij gvigawj cwngci aen dangj, mozfan ciuqsouj gij faplwd caeuq fapgvi guekgya, yiemzgek baujsouj gij mimiz aen dangj caeuq guekgya, caephengz gij gietdingh aen dangj, fugcoengz cujciz faenboiq, remcieng guhbaenz gij yinvu aen dangj.


　　(5) Henhoh aen dangj doxgiet caeuq doengjit, doiq dangj cungcig lauxsaed, gij gangj gij guh ndaw rog doxdoengz, giengiet fanjdoiq sojmiz baiqbied cujciz caeuq siuj cizdonz hozdung, fanjdoiq doengh gij hingzveiz guh bouxvunz song mbiengj、baihnaj eicoeng baihlaeng boihfamh caeuq sojmiz yaemmaeuz gveijgeiq.


　　(6) Saedcaih guh baebingz caeuq gag baebingz, gamj bae byoengqlaeuh caeuq niujcingq gij vahgangj nem hengzdoengh boihfanj gij yenzcwz aen dangj caeuq gij loengcawq、loengloek ndaw hong, giengiet caeuq gij yienhsiengq naiqheiq ndukbaih guh doucwngh.


　　(7) Maedcaed lienzhaeh ginzcung, yiengq ginzcung senhconz gij cawjcieng aen dangj, roeb saeh aeu caeuq ginzcung doxyaeng, dawz gij yigen caeuq iugouz ginzcung gibseiz naeuz aen dangj nyi, henhoh gij leih’ik cingqdangq ginzcung.


　　(8) Fazyangz gij rumzheiq moq sevei cujyi, daiqdaeuz hengzguh gij haedsim gyacizgvanh sevei cujyi caeuq gij gvanhnen yungznyaenq sevei cujyi, dizcang gij daudwz gungcanj cujyi, hungzyangz gij cienzdoengj meijdwz Cunghvaz Minzcuz, vihliux baujhoh gij leih’ik guekgya caeuq yinzminz, youq sojmiz doengh mwh gunnanz yung’yiemj haenx enjaek okdaeuj, gamj guh doucwngh, mbouj lau vutmingh.


　　Diuz daih 4 Dangjyenz yiengjmiz gij gienzleih lajneix:


　　(1) Camgya gij hoih mizgven aen dangj, yawj gij vwnzgen mizgven aen dangj, ciepsouh aen dangj gyauyuz caeuq gungganq.


　　(2)Youq gwnz hoih aen dangj caeuq gwnz bauqceij ganhvuz aen dangj, caeuqfaenh lwnh gij cwngcwz vwndiz aen dangj.


　　(3) Doiq gij hong aen dangj daezok genyi caeuq cang’yi.


　　(4) Youq gwnz hoih aen dangj miz baengzgawq dwk baebingz sojmiz gij cujciz aen dangj caeuq baebingz sojmiz dangjyenz, yiengq dangj fucwz dwk byoengqlaeuh、genjgij gij saedsaeh famh fap famh gijliz sojmiz gij cujciz aen dangj caeuq sojmiz dangjyenz, iugouz cawqfaen doengh boux dangjyenz famhfap luenhloengh haenx, iugouz baqmienx roxnaeuz vuenh doengh boux ganbu rap mbouj hwnj cizvu bae.


　　(5) Hengzsawj gij gienzleih byaujgez、gij gienzleih senjgij, miz gij gienzleih ndaej senjgij.


　　(6) Youq mwh gij cujciz aen dangj yaenglwnh gietdingh doiq dangjyenz guh dangjgij cawqfaen roxnaeuz guh’ok gamqdingh, bonjvunz miz gienz camgya caeuq bienqbuek, boux dangjyenz wnq ndaej bang de guhcingq caeuq gangjvah.


　　(7) Doiq gij gezyi caeuq cwngcwz aen dangj danghnaeuz miz mbouj doengz yigen, youq mwh bae giengiet caephengz, doengzseiz ndaej singmingz baujlouz, caemhcaiq ndaej dawz gij yigen bonjfaenh yiengq gij cujciz gaepgwnz aen dangj cigdaengz cunghyangh daezok.


　　(8) Yiengq gij cujciz gaepgwnz aen dangj cigdaengz cunghyangh daezok cingjgouz、sinhsu caeuq gunggau, caemhcaiq iugouz mizgven cujciz hawj gij dapfuk fucwz.


　　Mboujlwnh gij cujciz aen dangj gaep lawz cigdaengz cunghyangh, cungj mbouj miz gienz bokdued gij gienzleih dangjyenz gwnzneix gangj haenx.


　　Diuz daih 5 Fazcanj dangjyenz, bietdingh aeu dawz cwngci biucinj cuengq youq vih daih’it, ginggvaq dangjcihbu, genhciz aen yenzcwz guh gakboux gaepsou.


　　Boux sinhcingj haeujdangj, aeu dienzsij faenh saw gagnyienh haeujdangj, aeu miz song boux dangjyenz cingqsik guh bouxgaisau, aeu ginggvaq aen daihhoih cihbu doenggvaq caeuq gij cujciz aen dangj gaepgwnz baecinj, caemhcaiq ginggvaq geizyawhbwh gaujcaz, cijndaej baenz boux dangjyenz cingqsik.


　　Bouxgaisau aeu nyinhcaen liujgaij gij swhsiengj、binjcaet、ginglig caeuq gij biujyienh ndaw hong bouxsinhcingj, yiengq de cekgangj gij ganghlingj caeuq canghcwngz aen dangj, gangjmingz gij diuzgienh、yivu caeuq gienzleih dangjyenz, caemhcaiq yiengq gij cujciz aen dangj guh ok gij baugau fucwz.


　　Aen veijyenzvei dangjcihbu doiq gij vunz sinhcingj haeujdangj haenx, aeu louzsim cam gyoengq ginzcung mizgven ndaw dangj rog dangj, yawj gyoengqde miz maz yigen, guh yiemzgek saemjcaz, nyinhnaeuz habgek le menhcij daezgyau hawj aen daihhoih cihbu yaenglwnh.


　　Gij cujciz aen dangj gaep gwnz youq mwh caengz baecinj bouxsinhcingj haeujdangj, aeu baij vunz bae caeuq de damzvah, guh caenh’itbouh liujgaij, caemhcaiq bang de lai roxnaj aen dangj.


　　Youq mwh cingzgvang daegbied, aen dangj cunghyangh caeuq sengj、swcigih、cizyazsi veijyenzvei ndaej cigciep ciepsou dangjyenz.


　　Diuz daih 6 Boux dangjyenz yawhbwh bietdingh aeu youq dangqnaj fan geiz aen dangj guh gij senhsi haeujdangj. Gij vah senhsi de: Gou gagnyienh gyahaeuj Cunghgoz Gungcanjdangj, yungjhu gij ganghlingj aen dangj, ciuqsouj gij canghcwngz aen dangj, hengzguh gij yivu dangjyenz, caephengz gij gietdingh aen dangj, yiemzsouj gij gijliz aen dangj, baujsouj gij mimiz aen dangj, doiq dangj cungcig, cizgiz guhhong, vih gungcanj cujyi haenqrengz buekguh baenz seiqvunz, seizseiz cungj caepcawq vih dangj caeuq yinzminz cix bonjfaenh gijmaz cungj mbouj aeu, daengz dai cungj mbouj fanjgoet aen dangj.


　　Diuz daih 7 Aen geizyawhbwh boux dangjyenz yawhbwh de dwg bi ndeu. Gij cujciz aen dangj doiq boux dangjyenz yawhbwh wngdang guh nyinhcaen gyauyuz caeuq gaujcaz.


　　Gij yivu boux dangjyenz yawhbwh caeuq boux dangjyenz cingqsik doxdoengz. Gij gienzleih boux dangjyenz yawhbwh, cawz mbouj miz gij gienzleih byaujgez、gij gienzleih senjgij caeuq gij gienzleih ndaej senjgij caixvaih, hix caeuq boux dangjyenz cingqsik doxdoengz.


　　Aen geizyawhbwh boux dangjyenz yawhbwh de rim le, dangjcihbu wngdang gibseiz yaenglwnh de ndaej mbouj ndaej cienj baenz boux dangjyenz cingqsik. Doiq boux nyinhcaen hengzguh gij yivu dangjyenz, gaenq bwh miz gij diuzgienh dangjyenz haenx, wngdang ciuq geiz cienj baenz boux dangjyenz cingqsik; doiq boux aeuyungh laebdaeb gaujcaz caeuq gyauyuz haenx, ndaej gyaraez aen geizyawhbwh, hoeng mbouj ndaej mauhgvaq bi ndeu; doiq boux mbouj hengzguh gij yivu dangjyenz, mbouj bwh miz gij diuzgienh dangjyenz haenx, wngdang siu aen gij swhgwz boux dangjyenz yawhbwh de bae. Boux dangjyenz yawhbwh cienj baenz boux dangjyenz cingqsik, roxnaeuz gyaraez aen geizyawhbwh, roxnaeuz siu aen swhgwz boux dangjyenz yawhbwh de bae, cungj wngdang ginggvaq aen daihhoih cihbu yaenglwnh doenggvaq caeuq gij cujciz gaepgwnz aen dangj baecinj.


　　Aen geizyawhbwh boux dangjyenz yawhbwh, daj ngoenz daihhoih cihbu doenggvaq de guh boux dangjyenz yawhbwh haenx suenq hwnj.Gij dangjlingz boux dangjyenz, daj ngoenz geizyawhbwh de rim cienj baenz boux dangjyenz cingqsik haenx suenq hwnj.


　　Diuz daih 8 Moix boux dangjyenz, mboujlwnh cizvu sang daemq, cungj bietdingh aeu bien haeuj aen cihbu、siujcuj roxnaeuz gij cujciz daegdingh aen dangj gizyawz, camgya gij cujciz swnghhoz aen dangj, ciepsouh gyoengq ginzcung ndaw dangj rog dangj gamduk. Boux lingjdauj ganbu dangjyenz lij bietdingh aeu camgya gij minzcuj swnghhozvei dangjveij、dangjcuj. Mbouj cinjhawj miz saek boux dangjyenz daegbied ndaej mbouj camgya gij cujciz swnghhoz aen dangj、mbouj ciepsouh gyoengq ginzcung ndaw dangj rog dangj gamduk.


　　Diuz daih 9 Dangjyenz miz gij swyouz doiq dangj. Dangjyenz iugouz doiq dangj, wngdang ginggvaq aen daihhoih cihbu yaenglwnh le menhcij senhbu cawzmingz, caemhcaiq bauq hawj gij cujciz aen dangj gaepgwnz bwh’anq.


　　Dangjyenz mbouj miz gij eiqceiq gwzming, mbouj hengzguh gij yivu dangjyenz, mbouj hab gij diuzgienh dangjyenz, gij cihbu aen dangj wngdang gyauyuz de, iugouz de hanhgeiz gaijcingq; danghnaeuz ginggvaq gyauyuz lij mbouj cienjbienq, wngdang gienq de doiq dangj.Gienq dangjyenz doiq dangj, wngdang ginggvaq aen daihhoih cihbu yaenglwnh gietdingh, caemhcaiq bauq hawj cujciz gaepgwnz aen dangj baecinj.Danghnaeuz boux dangjyenz deng gienq doiq dangj haenx genhciz mbouj doiq, wngdang daezgyau hawj aen daihhoih cihbu yaenglwnh, gietdingh cawzmingz de bae, caemhcaiq bauq hawj gij cujciz gaepgwnz aen dangj baecinj.


　　Dangjyenz danghnaeuz mbouj miz gij leixyouz cingqdangq, lienzdaemh roek ndwen mbouj camgya gij cujciz swnghhoz aen dangj, roxnaeuz mbouj gyau dangjfei, roxnaeuz mbouj guh gij hong aen dangj faenbaij hawj haenx, couh deng nyinhnaeuz dwg gag duet dangj.Aen daihhoih cihbu wngdang gietdingh dawz yiengh dangjyenz neix cawzmingz bae, caemhcaiq bauq hawj gij cujciz gaepgwnz aen dangj baecinj.


　　Cieng Daihngeih Gij Cujciz Cidu Aen Dangj


　　Diuz daih 10 Dangj dwg aen cingjdaej doengjit ndeu, de dwg gaengawq gij ganghlingj caeuq canghcwngz bonjfaenh, ciuq gij cidu minzcuj cizcungh cujciz hwnjdaeuj. Gij yenzcwz goekdaeuz aen cidu minzcuj cizcungh aen dangj dwg:


　　(1) Dangjyenz goyinz fugcoengz gij cujciz aen dangj, siujsoq fugcoengz daihsoq, cujciz gaeplaj fugcoengz cujciz gaepgwnz, daengx dangj gak aen cujciz caeuq daengxcungq dangjyenzfugcoengz daengx guek daibyauj daihhoih caeuq Cunghyangh Veijyenzvei aen dangj.


　　(2) Gak gaep lingjdauj gihgvanh aen dangj, cawz aen daibyauj gihgvanh gyoengqde baij ok caeuq gij dangjcuj ndaw aen cujciz mbouj dwg dangj haenx caixvaih, cungj doenggvaq senjgij mizok.


　　(3) Aen lingjdauj gihgvanh ceiq sang aen dangj, dwg daengx guek daibyauj daihhoih aen dangj caeuq aen Cunghyangh Veijyenzvei youz de canjseng haenx. Deihfueng gak gaep lingjdauj gihgvanh aen dangj, dwg deihfueng gak gaep daibyauj daihhoih aen dangj caeuq aen veijyenzvei youz gyoengqde canjseng.Gak gaep veijyenzvei aen dangj yiengq aen daibyauj daihhoih doengz gaep fucwz caemhcaiq baugau gunghcoz.


　　(4) Gij cujciz gaepgwnz aen dangj aeu ciengzseiz dingqaeu gij yigen cujciz gaeplaj caeuq dangjyenz ginzcung, gibseiz gaijgez gij vwndiz gyoengqde daezok. Cujciz gaeplaj aen dangj gawq aeu yiengq cujciz gaepgwnz cingjsi caeuq baugau gunghcoz, youh aeu doglaeb fucwz bae gaijgez gij vwndiz ndaw gvaengxlaengx cizcwz bonjfaenh. Ndawgyang cujciz gaepgwnz gaeplaj aeu doxdoeng cingzbauq、dox cihciz dox gamduk. Gak gaep cujciz aen dangj aeu ciuq gvidingh goenghai gij hongsaeh aen dangj, sawj dangjyenz ndaej engq lai liujgaij nem caeuqfaenh gij hongsaeh ndaw dangj.


　　(5) Gak gaep veijyenzvei aen dangj saedhengz aen cidu cizdij lingjdauj caeuq goyinz faengoeng fucwz dox giethab. Fanzdwg gij vwndiz hungnaek cungj aeu ciuq aen yenzcwz cizdij lingjdauj、minzcuj cizcungh、gak boux gag caemciek、hai hoih gietdingh, youz veijyenzvei aen dangj cizdij yaenglwnh, guh ok gietdingh; gij vunz gapbaenz veijyenzvei aeu gaengawq cizdij gietdingh caeuq faengoeng, cietsaed bae hengzguh gij cizcwz bonjfaenh.


　　(6) Aen dangj gimqhaed sojmiz gij hingzsik goyinz cungzbai. Aeu baujcwng gij hozdung bouxdaeuz aen dangj seizseiz cungj deng aen dangj caeuq yinzminz gamduk, doengzseiz henhoh gij visaenq sojmiz doengh bouxdaeuz daibyauj gij leih’ik dangj caeuq yinzminz de.


　　Diuz 11 Gij daibyauj caeuq aen veijyenzvei gak gaep daibyauj daihhoih aen dangj canjseng, aeu daejyienh gij eiqceiq bouxsenjgij. Senjgij yungh aen fuengsik mbouj geiq mingzcoh douzbiuq.Gij mingzdan bouxdeqsienj aeu youz gij cujciz aen dangj caeuq bouxsenjgij cungfaen caemciek yaenglwnh. Ndaej cigciep yungh aen banhfap ca’ngeg senjgij vunzsoq bouxdeqsienj lai gvaq vunzsoq wngdang senjgij bae guh cingqsik senjgij. Hix ndaej sien yungh aen banhfap ca’ngeg senjgij bae guh yawhsenj, canjseng aen mingzdan bouxdeqsienj le, yienzhaeuh guh baez senjgij cingqsik. Bouxsenjgij miz gienzleih liujgaij gij cingzgvang bouxdeqsienj、iugouz gaijbienq bouxdeqsienj、mbouj senj moux bouxdeqsienj caeuq lingh senj bouxwnq. Mboujlwnh aen cujciz lawz caeuq boux vunz lawz, cungj mbouj ndaej yungh gijmaz fuengsik giengzbik bouxsenjgij bae senj roxnaeuz mbouj senj moux boux vunz.


　　Deihfueng gak gaep daibyauj daihhoih caeuq gij daibyauj daihhoih gihcwngz aen dangj guh senjgij, danghnaeuz fatseng gij cingzgvang famh dangjcangh, gij veijyenzvei aen dangj gaepgwnz ndeu ginggvaq diucaz haedsaed le, wngdang guh ok gij gietdingh senjgij fouzyauq caeuq yungh gij cosih doxwngq, caemhcaiq bauq hawj gij veijyenzvei aen dangj caiq sang gaep ndeu saemjcaz baecinj, cingqsik senhbu caephengz.


　　Gij daibyauj gak gaep daibyauj daihhoih aen dangj saedhengz aen cidu nyaemhgeiz.


　　Diuz 12 Cunghyangh caeuq deihfueng gak gaep veijyenzvei aen dangj youq mwh miz bizyau ciucomz aen hoih daibyauj, yaenglwnh caeuq gietdingh gij vwndiz hungnaek aeu gibseiz gaijgez de. Gij mingzngeg caeuq gij banhfap canjseng gyoengq daibyauj aen hoih daibyauj, youz aen veijyenzvei ciucomz aen hoih daibyauj de gietdingh.


　　Diuz 13 Fanzdwg laebbaenz gij cujciz moq aen dangj, roxnaeuz siu gij cujciz aen dangj yienzsien gaenq miz bae, itdingh aeu youz cujciz gaepgwnz aen dangj gietdingh.


　　Youq ndaw geizgan deihfueng gak gaep daibyauj daihhoih caeuq gij daibyauj daihhoih gihcwngz aen dangj sathoih, danghnaeuz gij cujciz gaepgwnz aen dangj nyinhnaeuz miz bizyau, ndaej diuhdoengh roxnaeuz ceijbaij gij bouxdaeuz cujciz gaeplaj aen dangj.


　　Cunghyangh caeuq deihfueng gak gaep veijyenzvei aen dangj ndaej baij ok aen gihgvanh daibyauj.


　　Diuz 14 Aen veijyenzvei cunghyangh caeuq gij veijyenzvei aen sengj、swcigih、cizyazsi aen dangj saedhengz aen cidu liebyawj, youq ndaw gaiq nyaemhgeiz ndeu, doiq gij cujciz aen dangj youq deihfueng、bouhmonz、aen danhvei giyez swyez youz de bonjfaenh guenjleix haenx saedyienh gizgiz liebyawj dohdaengz.


　　Aen dangjcuj（dangjveij） cunghyangh mizgven buveij caeuq guekgya gihgvanh bouhmonz gaengawq gunghcoz sihyau guh liebyawj.


　　Gij veijyenzvei aen si（di、couh、mungz） caeuq yienh（si、gih、giz） aen dangj laebhwnj aen cidu liedcaz.


　　Diuz 15 Gak gaep lingjdauj gihgvanh aen dangj youq mwh yaek doiq gij vwndiz youqgaenj caeuq cujciz gaeplaj mizgven haenx guh ok gietdingh, youq laj cingzgvang bingzciengz, aeu cam’aeu gij yigen cujciz gaeplaj. Aeu baujcwng cujciz gaeplaj ndaej cingqciengz hengzsawj gij cizgenz gyoengqde. Fanzdwg gij vwndiz wngdang youz cujciz gaeplaj cawqleix de, danghnaeuz mbouj miz gijmaz daegbied, aen lingjdauj gihgvanh gaepgwnz gaej bae capfwngz.


　　Diuz 16 Doengh gij vwndiz mizgven cwngcwz hungnaek nangqdaengz daengx guek de, cijmiz dangj cunghyangh miz gienz guh ok gietdingh, gij cujciz aen dangj gak bouhmonz、gak deihfueng ndaej yiengq cunghyangh daezok genyi, hoeng mbouj ndaej gag guh ok gietdingh caeuq doiq rog fatbiuj cawjcieng.


　　Cujciz gaeplaj aen dangj itdingh aeu genhgez caephengz gij gietdingh cujciz gaepgwnz.Cujciz gaeplaj danghnaeuz nyinhnaeuz gij gietdingh cujciz gaepgwnz mbouj hab gij saedceiq cingzgvang bonj digih、bonj bouhmonz, ndaej cingjgouz gaijbienq; danghnaeuz cujciz gaepgwnz genhciz gij gietdingh yienzlaiz, cujciz gaeplaj itdingh aeu caephengz, caemhcaiq mbouj ndaej goenghai fatbiuj gij yigen mbouj doengz, hoeng miz gienz yiengq aen cujciz caiq sang gaep ndeu baugau.


　　Gij bauqceij ganhvuz caeuq gij hongdawz senhconz gizyawz gak gaep cujciz aen dangj, itdingh aeu senhconz gij lohsienq、fuengcim、cwngcwz caeuq gezyi aen dangj.


　　Diuz 17 Gij cujciz aen dangj yaenglwnh gietdingh vwndiz, itdingh aeu caephengz aen yenzcwz dingznoix fugcoengz dingzlai. Gietdingh gij vwndiz youqgaenj, aeu guh byaujgez.Doiq gij yigen mbouj doengz siujsoq vunz, wngdang nyinhcaen ngeixnaemj. Danghnaeuz doiq gij vwndiz youqgaenj miz ok cenglwnh, song mbiengj vunzsoq dox ciepgaenh, cawzbae youq mwh cingzgvang gaenjgip itdingh aeu ciuq gij yigen dingzlai bae caephengz, wngdang camhseiz doilaeng guh ok gietdingh, caenh’itbouh diucaz yenzgiu, gyauvuenh yigen, baezlaeng cij byaujgez; youq mwh cingzgvang daegbied, hix ndaej dawz gij cingzgvang cenglwnh baugau hawj cujciz gaepgwnz, cingjgouz caizgiet.


　　Boux dangjyenz goyinz daibyauj cujciz aen dangj fatbiuj gij cawjcieng youqgaenj, danghnaeuz mauhgvaq aen gvaengxlaengx cujciz aen dangj gaenq miz gietdingh bae, itdingh aeu daezgyau hawj cujciz aen dangj de soj youq haenx yaenglwnh gietdingh, roxnaeuz cingjsi cujciz gaepgwnz aen dangj. Sojmiz dangjyenz mboujlwnh cizvu sang daemq, cungj mbouj ndaej goyinz gag gietdingh gij vwndiz hungnaek; danghnaeuz roeb mwh cingzgvang gaenjgip, itdingh aeu youz goyinz guh ok gietdingh, gvaqlaeng aeu ganjvaiq baugau hawj cujciz aen dangj. Mbouj cinjhawj bouxdaeuz lawz saedhengz goyinz gag guh gietdingh caeuq guhbaenz goyinz sang gvaq cujciz bae.


　　Diuz 18 Gij cujciz cunghyangh、deihfueng caeuq gihcwngz aen dangj, cungj itdingh aeu yawjnaek gij gensez aen dangj, ciengzseiz yaenglwnh caeuq genjcaz doengh gij hongsaeh senhconz、hongsaeh gyauyuz、hongsaeh cujciz、hongsaeh gijliz genjcaz、hongsaeh ginzcung、hongsaeh doengjit cansen aen dangj, louzsim yenzgiu gij canggvang swhsiengj cwngci ndaw dangj rog dangj.


　　Cieng Daihsam　Gij Cunghyangh Cujciz Aen Dangj


　　Diuz 19 Daengx guek daibyauj daihhoih aen dangj moix haj bi hai baez ndeu, youz Cunghyangh Veijyenzvei ciucomz.Danghnaeuz Cunghyangh Veijyenzvei nyinhnaeuz miz bizyau, roxnaeuz aen cujciz sengjgaep miz sam faenh cih it doxhwnj daezok iugouz, daengx guek daibyauj daihhoih ndaej daezgonq ciuhai; danghnaeuz mbouj miz gijmaz daegbied, mbouj ndaej doilaeng ciuhai.


　　Gij mingzngeg caeuq gij banhfap senjgij gyoengq daibyauj daengx guek daibyauj daihhoih, youz Cunghyangh Veijyenzvei gietdingh.


　　Diuz 20 Gij cizgenz daengx guek daibyauj daihhoih aen dangj dwg:


　　(1) Dingqaeu caeuq saemjcaz aen baugau Cunghyangh Veijyenzvei;


　　(2) Saemjcaz aen baugau Cunghyangh Gijliz Genjcaz Veijyenzvei;


　　(3) Yaenglwnh caemhcaiq gietdingh gij vwndiz hungnaek aen dangj;


　　(4) Coihgaij gij canghcwngz aen dangj;


　　(5) Senjgij Cunghyangh Veijyenzvei;


　　(6) Senjgij Cunghyangh Gijliz Genjcaz Veijyenzvei.


　　Diuz 21 Gij cizgenz daengx guek daibyauj veiyi aen dangj dwg: Yaenglwnh caeuq gietdingh gij vwndiz hungnaek; diuzcingj caeuq gyasenj mbangj cwngzyenz Cunghyangh Veijyenzvei、Cunghyangh Gijliz Genjcaz Veijyenzvei. Gij soqngeg diuzcingj caeuq gyasenj cunghyangh veijyenz caeuq gij cunghyangh veijyenz deqbouj, mbouj ndaej faenbied mauhgvaq haj faenh cih it aen cungjsoq gyoengq cunghyangh veijyenz caeuq gyoengq cunghyangh veijyenz deqbouj youz daengx guek daibyauj daihhoih aen dangj senj ok haenx.


　　Diuz 22 Cunghyangh Veijyenzvei aen dangj moix gaiq nyaemhgeiz haj bi. Daengx guek daibyauj daihhoih danghnaeuz daezgonq roxnaeuz doilaeng ciuhai, gij nyaemhgeiz de hix doxwngq gaijbienq.Gij veijyenz caeuq veijyenz deqbouj Cunghyangh Veijyenzvei itdingh aeu miz dangjlingz haj bi doxhwnj. Gij mingzngeg veijyenz caeuq veijyenz deqbouj Cunghyangh Veijyenzvei, youz daengx guek daibyauj daihhoih gietdingh. Gij veijyenz Cunghyangh Veijyenzvei hoengq vih, youz gij veijyenz deqbouj Cunghyangh Veijyenzvei ciuq gij biuqsoq soj ndaej daj lai daengz noix bae dembouj.


　　Gij daengxcungq veiyi aen veijyenzvei cunghyangh youz Cunghyangh Cwngcigiz ciucomz, moix bi ceiq noix ciuhai baez ndeu. Cunghyangh Cwngcigiz yiengq aen daengxcungq veiyi Cunghyangh Veijyenzvei baugau gunghcoz, ciepsouh gamduk.


　　Youq aen geizgan daengx guek daibyauj daihhoih sathoih, Cunghyangh Veijyenzvei caephengz gij gezyi daengx guek daibyauj daihhoih, lingjdauj sojmiz gunghcoz aen dangj, doiq rog daibyauj Cunghgoz Gungcanjdangj.


　　Diuz 23 Cunghyangh Cwngcigiz、Cunghyangh Cwngcigiz Cangzvu Veijyenzvei caeuq boux cungjsuhgi Cunghyangh Veijyenzvei aen dangj, youz baez daengxcungq veiyi aen Cunghyangh Veijyenzvei senjgij. Boux cungjsuhgi Cunghyangh Veijyenzvei itdingh aeu daj ndaw veijyenz Cunghyangh Cwngcigiz Cangzvu Veijyenzvei canjseng.


　　Cunghyangh Cwngcigiz caeuq aen cangzvu veijyenzvei de, youq ndaw geizgan daengxcungq veiyi aen Cunghyangh Veijyenzvei sathoih, hengzsawj gij cizgenz Cunghyangh Veijyenzvei.


　　Cunghyangh suhgicu dwg aen gihgou banhsaeh Cunghyangh Cwngcigiz caeuq aen cangzvu veijyenzvei de; cwngzyenz youz Cunghyangh Cwngcigiz Cangzvu Veijyenzvei daezmingz, aen daengxcungq veiyi Cunghyangh Veijyenzvei doenggvaq.


　　Boux cungjsuhgi Cunghyangh Veijyenzvei fucwz ciucomz aen veiyi Cunghyangh Cwngcigiz caeuq aen veiyi Cunghyangh Cwngcigiz Cangzvu Veijyenzvei, caemhcaiq cujciz gij hong cunghyangh suhgicu.


　　Gij vunz gapbaenz Cunghyangh Ginhsw Veijyenzvei aen dangj youz Cunghyangh Veijyenzvei gietdingh, Cunghyangh Ginhsw Veijyenzvei saedhengz aen cidu cujsiz fucwz.


　　Aen lingjdauj gihgou cunghyangh caeuq gyoengq bouxdaeuz cunghyangh youz moix gaiq Cunghyangh Veijyenzvei canjseng haenx, youq aen geizgan gaiq daengx guek daibyauj daihhoih laeng hai hoih, laebdaeb cujciz gij hong ciengzseiz aen dangj, cigdaengz gaiq Cunghyangh Veijyenzvei laeng canjseng aen lingjdauj gihgou cunghyangh caeuq gyoengq bouxdaeuz cunghyangh moq cij sat.


　　Diuz 24 Gij cujciz aen dangj Cungguek Yinzminz Gaijfangginh, gaengawq gij cijsi Cunghyangh Veijyenzvei bae guh hong. Cunghyangh Ginhsw Veijyenzvei fucwz gij hongsaeh aen dangj caeuq gij hongsaeh cwngci ndaw ginhdui, doiq gij cujciz dijci caeuq gihgou aen dangj ndaw ginhdui guh ok gvidingh.


　　Cieng Daihseiq　Gij Deihfueng Cujciz Aen Dangj


　　Diuz 25 Gij daibyauj daihhoih sengj、swcigih、cizyazsi aen dangj, gij daibyauj daihhoih doengh aen si laeb gih caeuq swcicouh, gij daibyauj daihhoih yienh (giz)、swciyienh、doengh aen si mbouj laeb gih caeuq doengh aen gih ndaw si guenj haenx, moix haj bi ciuhai baez ndeu.


　　Deihfueng gak gaep daibyauj daihhoih aen dangj youz aen veijyenzvei doengz gaep aen dangj ciucomz.Youq mwh cingzgvang daegbied, ginggvaq aen veijyenzvei gaepgwnz ndeu baecinj, ndaej daezgonq roxnaeuz doilaeng ciuhai.


　　Gij mingzngeg caeuq gij banhfap senjgij gyoengq daibyauj deihfueng gak gaep daibyauj daihhoih aen dangj, youz aen veijyenzvei doengz gaep aen dangj gietdingh, caemhcaiq bauq hawj veijyenzvei aen dangj gaepgwnz ndeu baecinj.


　　Diuz 26 Gij cizgenz deihfueng gak gaep daibyauj daihhoih aen dangj dwg:


　　(1) Dingqaeu caeuq saemjcaz gij baugau aen veijyenzvei doengz gaep;


　　(2) Saemjcaz gij baugau aen gijliz genjcaz veijyenzvei doengz gaep;


　　(3) Yaenglwnh gij vwndiz hungnaek ndaw gvaengxlaengx bonj digih caemhcaiq guh ok gezyi;


　　(4) Senjgij gij veijyenzvei aen dangj doengz gaep, senjgij aen gijliz genjcaz veijyenzvei aen dangj doengz gaep.


　　Diuz 27 Gij veijyenzvei aen sengj、swcigih、cizyazsi、 aen si laeb gih caeuq swcicouh aen dangj, moix gaiq nyaemhgeiz haj bi. Gyoengq veijyenz caeuq veijyenz deqbouj doengh aen veijyenzvei neix, itdingh aeu miz dangjlingz haj bi doxhwnj.


　　Gij veijyenzvei aen yienh (giz)、swciyienh、aen si mbouj laeb gih caeuq doengh aen gih ndaw si guenj haenx aen dangj, moix gaiq nyaemhgeiz haj bi. Gyoengq veijyenz caeuq veijyenz deqbouj doengh aen veijyenzvei neix, itdingh aeu miz dangjlingz sam bi doxhwnj.


　　Deihfueng gak gaep daibyauj daihhoih aen dangj danghnaeuz daezgonq roxnaeuz doilaeng ciuhai, gij nyaemhgeiz aen veijyenzvei youz de senjgij haenx caemh doxwngq gaijbienq.


　　Gij mingzngeg gyoengq veijyenz caeuq veijyenz deqbouj deihfueng gak gaep veijyenzvei aen dangj, faenbied youz aen veijyenzvei gaepgwnz ndeu gietdingh.Gij veijyenz deihfueng gak gaep veijyenzvei aen dangj hoengq vih, youz veijyenz deqbouj ciuq gij biuqsoq soj ndaej daj lai daengz noix bae dembouj.


　　Gij daengxcungq veiyi deihfueng gak gaep veijyenzvei aen dangj, moix bi ceiq noix ciuhai song baez.


　　Deihfueng gak gaep veijyenzvei aen dangj youq aen geizgan daibyauj daihhoih sathoih, caephengz gij cijsi gij cujciz aen dangj gaepgwnz caeuq gij gezyi aen daibyauj daihhoih aen dangj doengz gaep, lingjdauj gij hongsaeh bonj deihfueng, dinghgeiz yiengq gij veijyenzvei aen dangj gaepgwnz baugau gunghcoz.


　　Diuz 28 Gij daengxcungq veiyi deihfueng gak gaep veijyenzvei aen dangj, senjgij cangzvu veijyenzvei caeuq suhgi、fusuhgi, caemhcaiq bauq hawj gij veijyenzvei aen dangj gaepgwnz baecinj. Gij cangzvu veijyenzvei deihfueng gak gaep veijyenzvei aen dangj, youq ndaw geizgan aen daengxcungq veiyi veijyenzvei sathoih, hengzsawj gij cizgenz veijyenzvei; youq ndaw geizgan gaiq daibyauj daihhoih laeng hai hoih, laebdaeb cujciz gij hongsaeh ciengzseiz, cigdaengz canjseng aen cangzvu veijyenzvei moq cij sat.


　　Gij cangzvu veijyenzvei deihfueng gak gaep veijyenzvei aen dangj dinghgeiz yiengq baez daengxcungq veiyi veijyenzvei baugau gunghcoz, ciepsouh gamduk.


　　Diuz 29 Digih veijyenzvei aen dangj caeuq gij cujciz caemh dangq digih veijyenzvei haenx, dwg gij gihgvanh daibyauj aen veijyenzvei sengj、swcigih aen dangj baij youq ndaw gvaengxlaengx geij aen yienh、swciyienh、si de. De gaengawq aen veijyenzvei sengj、swcigih hawjgienz, lingjdauj gij hongsaeh bonj digih.


　　Cieng Daihhaj　Gij Gihcwngz Cujciz Aen Dangj


　　Diuz 30 Giyez、lajmbanj、gihgvanh、hagdangz、gohyenz yensoj、gaihdau segih、gij cujciz ndawbiengz、yinzminz gaijfangginh lenzdui caeuq gij gihcwngz danhvei gizyawz, fanzdwg doengh aen danhvei miz cingqsik dangjyenz sam boux doxhwnj, cungj wngdang laeb gij gihcwngz cujciz aen dangj.


　　Gij gihcwngz cujciz aen dangj, gaengawq gunghcoz sihyau caeuq dangjyenz vunzsoq, ginggvaq gij cujciz aen dangj gaepgwnz baecinj, faenbied laeb gihcwngz veijyenzvei、cungjcihbu veijyenzvei、cihbu veijyenzvei aen dangj. Gihcwngz veijyenzvei youz aen daihhoih dangjyenz roxnaeuz aen daihhoih daibyauj senjgij canjseng, cungjcihbu veijyenzvei caeuq cihbu veijyenzvei youz aen daihhoih dangjyenz senjgij canjseng, daezok bouxdeqsienj veijyenz aeu gvangqlangh cam’aeu gij yigen gyoengq dangjyenz caeuq ginzcung.


　　Diuz 31 Gij gihcwngz veijyenzvei、cungjcihbu veijyenzvei、cihbu veijyenzvei aen dangj moix gaiq nyaemhgeiz sam bi daengz haj bi. Boux suhgi、fusuhgi gihcwngz veijyenzvei、cungjcihbu veijyenzvei、cihbu veijyenzvei senjgij canjseng le, wngdang bauq hawj gij cujciz aen dangj gaepgwnz baecinj.


　　Diuz 32 Gij gihcwngz cujciz aen dangj, dwg aen baujleij hoenxciengq dangj youq ndaw gihcwngz cujciz gwnzbiengz, dwg aen giek sojmiz gunghcoz caeuq gij rengzhoenxciengq aen dangj. Gij gihbwnj yinvu de dwg:


　　(1) Senhconz caeuq caephengz gij lohsienq、fuengcim、cwngcwz aen dangj, senhconz caeuq caephengz gij gezyi dangj cunghyangh、cujciz gaepgwnz caeuq bonj cujciz, cungfaen fazveih gij cozyung senhfungh mozfan gyoengq dangjyenz, gaenx bae ciengj ak ceng ndei, comzgiet、cujciz gyoengq ganbu caeuq ginzcung ndaw dangj rog dangj, roengzrengz guhbaenz gij yinvu bonj danhvei rapdawz de.


　　(2) Cujciz dangjyenz nyinhcaen hag Majgwzswh-Lezningz Cujyi、Mauz Cwzdungh Swhsiengj、Dwng Siujbingz Lijlun、“Sam Aen Daibyauj”Cung’yau Swhsiengj、Gohyoz Fazcanjgvanh、Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz, doicaenh “song hag it guh” hagsib gyauyuz baenz gingciengz baenz cidu bae, hag gij lohsienq、fuengcim、cwngcwz caeuq gezyi aen dangj, hag gij gihbwnj cihsiz aen dangj, hag gij cihsiz gohyoz、vwnzva、faplwd caeuq yezvu.


　　(3) Gyauyuz、guenjleix、gamduk caeuq fugsaeh dangjyenz, daezsang gij suciz dangjyenz, giendingh lijsiengj saenqniemh, demgiengz dangjsing, yiemzgek gij cujciz swnghhoz aen dangj, guh bihbingz caeuq gag bihbingz, henhoh caeuq caephengz gij gijliz aen dangj, gamduk dangjyenz cietsaed hengzguh yivu, baujcang gij gienzleih dangjyenz mbouj deng ciemqfamh. Gyagiengz caeuq gaijndei guenjleix gij dangjyenz riuzdoengh.


　　(4) Maedcaed lienzhaeh ginzcung, ciengzseiz liujgaij ginzcung doiq dangjyenz caeuq gij gunghcoz aen dangj miz maz bihbingz caeuq yigen, henhoh gij gienzleih caeuq leih’ik cingqdangq ginzcung, guhndei gij hongsaeh swhsiengj cwngci ginzcung.


　　(5) Hawj gyoengq dangjyenz caeuq ginzcung lai gaenxguh lai dajcauh, yawjraen、gungganq caeuq doigawj gij vunzcaiz maenhndei ndaw gyoengqde, gujli caeuq cihciz gyoengqde youq ndaw gaijgwz hailangh caeuq gensez sevei cujyi yendaiva gung’yen gij coengmingz caeuq dungxcaiz bonjfaenh.


　　(6) Bae gyauyuz caeuq gungganq doengh boux cizgiz iugouz haeujdangj de, guhndei gij hong fazcanj dangjyenz aeu ciengzseiz guh haenx, yawjnaek youq swnghcanj、gunghcoz daih’it sienq caeuq ndaw bouxcoz fazcanj dangjyenz.


　　(7) Gamduk boux ganbu dangjyenz caeuq sojmiz gunghcoz yinzyenz gizyawz, hawj gyoengqde yiemzgek ciuqsouj gij faplwd fapgvi guekgya, yiemzgek ciuqsouj gij fapgvi caizcwng ginghci caeuq aen cidu vunzsaeh guekgya, mbouj ndaej ciemqaeu gij leih’ik guekgya、cizdij caeuq ginzcung.


　　(8) Gyauyuz dangjyenz caeuq ginzcung gagrox daeqceih gij ginghyang mbouj ndei, genhgez caeuq gak cungj hingzveiz famh gijliz、famh fap guh doucwngh.


　　Diuz 33 Gij gihcwngz veijyenzvei aen dangj ndaw gaihdau、yangh、cin caeuq gij cujciz aen dangj ndaw cunh caeuq segih, lingjdauj gij hongsaeh bonj digih caeuq gij sevei guenjleix gihcwngz, cihciz caeuq baujcwng aen cujciz hingzcwng、aen cujciz ginghci caeuq gij cujciz ginzcung gagguenj cungfaen hengzsawj cizgenz.


　　Gij dangjveij （dangjcuj） ndaw guekmiz giyez fazveih lingjdauj cozyung, dawz fueng’yiengq、guenj daihbuenz、bauj doeksaed, ciuq gvidingh yaenglwnh caeuq gietdingh gij saehhangh hungnaek ndaw giyez. Gij gihcwngz cujciz aen dangj ndaw giyez guekmiz caeuq giyez cizdij, hopheux gij swnghcanj ginghyingz ndaw giyez bae guh saeh. Baujcwng gamduk gij fuengcim、cwngcwz dangj caeuq guekgya youq bonj giyez ndaej gvancez caephengz; cihciz gujdunghvei、dungjswvei、genhswvei caeuq ginghlij (cangjcangj) ciuqfap hengzsawj cizgenz; cienzsim cienzeiq ingbaengh cizgungh ginzcung, cihciz cizgungh daibyauj daihhoih guh saeh; doiq gij vwndiz hungnaek ndaw giyez caeuqfaenh guh gezcwz; gyagiengz doiq gij cujciz aen dangj bonjndang guh gensez, lingjdauj gaiq hongsaeh swhsiengj cwngci、gaiq hongsaeh gensez yiengh vwnzmingz cingsaenz caeuq gunghvei、gungcinghdonz daengj doengh aen cujciz ginzdonz.


　　Gij gihcwngz cujciz aen dangj ndaw cujciz feihgunghyoujci ginghci, gvancez gij fuengcim cwngcwz aen dangj, dazyinx caeuq gamduk giyez ciuqsouj faplwd fapgvi guekgya, lingjdauj gunghvei、gungcinghdonz daengj doengh aen cujciz ginzdonz, doxgiet caeuq comzgiet cizgungh ginzcung, henhoh gij gienzik habfap gak fueng, coicaenh giyez cangqheiq fazcanj.


　　Gij gihcwngz cujciz aen dangj ndaw gij cujciz ndawbiengz, senhconz caeuq caephengz gij lohsienq、fuengcim、cwngcwz aen dangj, lingjdauj gunghvei、gungcinghdonz daengj doengh aen cujciz ginzdonz, gyauyuz guenjleix dangjyenz, yinxlingx fugsaeh ginzcung, doidoengh saehnieb fazcanj.


　　Gij gihcwngz cujciz aen dangj ndaw doengh aen swyez danhvei saedhengz yiengh cidu bouxdaeuz hingzcwng fucwz de, fazveih gij cozyung aen baujleij hoenxciengq.Gij gihcwngz cujciz aen dangj ndaw doengh aen swyez danhvei saedhengz yiengh cidu bouxdaeuz hingzcwng fucwz youq baihlaj dangjveij lingjdauj de, yaenglwnh caeuq gietdingh gij vwndiz hungnaek, doengzseiz baujcwng bouxdaeuz hingzcwng cungfaen hengzsawj gij cizgenz bonjfaenh.


　　Gij gihcwngz cujciz aen dangj ndaw gak gaep gihgvanh dangj caeuq guekgya, bang bouxdaeuz hingzcwng guhbaenz yinvu, gaijndei gunghcoz, gyauyuz、guenjleix、 gamduk moix boux dangjyenz baudaengz bouxdaeuz hingzcwng, mbouj lingjdauj gij hongsaeh yezvu bonj danhvei.


　　Diuz 34 Dangjcihbu dwg gij cujciz giekdaej aen dangj, rapdawz gij cizcwz cigciep gyauyuz dangjyenz、guenjleix dangjyenz、gamduk dangjyenz caeuq cujciz ginzcung、senhconz ginzcung、comzgiet ginzcung、fugsaeh ginzcung.


　　Cieng Daihroek　Gij Ganbu Aen Dangj


　　Diuz 35 Gij ganbu aen dangj dwg doengh boux dingxdaeuz ndaw saehnieb aen dangj, dwg boux banh goengsaeh hawj yinzminz, aeu guh daengz cungcig seuqcingh dangrap. Dangj ciuq aen yenzcwz dwz caiz giem miz、aeu dwz guh gonq bae genjleh ganbu, genhciz seiq fueng bet baih、yawj caiz yungh vunz, genhciz saehnieb youq gonq、goengdauh cingqbaiq, fanjdui yawj caen yungh vunz, roengzrengz sawj aen ganbu duivuj bienq ndaej engq gwzming、engq hauxseng、engq miz cihsiz、engqgya conhyez.


　　Dangj yawjnaek gyauyuz、gungganq、genjleh、gaujhaed caeuq gamduk ganbu, daegbied dwg gungganq、genjleh gij ganbu cozoiq maenhndei. Cizgiz doicaenh ganbu cidu gaijgwz.


　　Dangj yawjnaek gungganq、genjleh gij ganbu mehmbwk caeuq gij ganbu siujsoq minzcuz.


　　Diuz 36 Gak gaep lingjdauj ganbu aen dangj itdingh aeu giendingh saenqniemh、fugsaeh yinzminz、gaenxcwng saed guh、gamj rap cwzyin、ndang cingq fwngz seuq, mozfan bae hengzguh gak hangh yivu dangjyenz ndaw canghcwngz diuz daihsam gvidingh, caemhcaiq itdingh aeu bwh miz gij gihbwnj diuzgen lajneix:


　　(1) Miz gij suijbingz Majgwzswh-Lezningz Cujyi、Mauz Cwzdungh Swhsiengj、Dwng Siujbingz Lijlun、“Sam Aen Daibyauj”Cung’yau Swhsiengj、Gohyoz Fazcanjgvanh youq mwh hengzguh cizcwz aeu yungh daengz haenx, daiqdaeuz gvancez doeksaed Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz, roengzrengz yungh gij lizcangz、gvanhdenj、fuengfap Majgwzswh Cujyi bae faensik caeuq gaijgez gij vwndiz saedceiq, genhciz gangj yozsiz、gangj cwngci、gangj cingqheiq, dingj ndaej gak cungj gannanz yung’yiemj gaujniemh.


　　(2) Miz gij lijsiengj hunggyae gungcanj cujyi caeuq gij saenqniemh giendingh yiengh sevei cujyi miz gij daegsaek Cungguek, genhgez caephengz gij lohsienq goekdaeuz caeuq gak hangh fuengcim、cwngcwz aen dangj, laebceiq gaijgwz hailangh, vutndang hawj aen saehnieb yendaiva, youq ndaw gensez sevei cujyi sinhoj cauhnieb, laeb gij cwngcizgvanh cingqdeng, guh ok gij cingzcik saedcaih ging ndaej sizcen、yinzminz、lizsij gienjniemh de.


　　(3) Genhciz gaijfang swhsiengj, yawj saedsaeh bae guh, caeuq seizdaih caez baenaj, haifwz cauhmoq, nyinhcaen diucaz yenzgiu, ndaej dawz gij fuengcim、 cwngcwz aen dangj caeuq gij saedceiq cingzgvang bonj digih、bonj bouhmonz dox giethab, gig miz cingzyauq bae guh saeh, gangj vah lauxsaed, banh saeh saedcaih, gouz aeu yauqgoj saedcaih.


　　(4) Seizseiz cungj dawz gij saehnieb gwzming caeuq gij cwzyin cwngci cuengq youq ndaw sim, miz sizcen gingniemh, miz gij cujciz naengzlig、vwnzva suijbingz caeuq conhyez cihsiz rap ndaej hwnj lingjdauj gunghcoz de.


　　(5) Cingqdeng hengzsawj gij gienzlig yinzminz gyauhawj, genhciz yenzcwz, ciuqfap banhsaeh, ndang cingq fwngz seuq, vih beksingq gaenx banh goengsaeh, yungh hengzdoengh guh ok yienghndei, ganhoj giemhmbaet, maedcaed lienzhaeh ginzcung, genhciz diuz lohsienq ginzcung aen dangj, gagrox ciepsouh aen dangj caeuq ginzcung bihbingz caeuq gamduk, gyagiengz daudwz siuhyangj, gangj dangjsing、yawjnaek daudwz hingzveiz、daiqdaeuz guh yienghndei, guhdaengz gag siujsim、gag genjcaz、gag singjgaeh、gag coicaenh, fanjdui hingzsiz cujyi、gvanhliuz cujyi、yangjloz cujyi caeuq gij fungheiq saisaengq, fanjdui sojmiz gij hingzveiz luenh yungh cizgenz、maeuz aeu seileih.


　　(6) Genhciz caeuq henhoh gij cidu minzcuj cizcungh aen dangj, miz gij cozfungh minzcuj, miz aen gvanhnen daengxbuenz, rox comzgiet dungzci, baudaengz comzgiet doengh boux dungzci caeuq bonjfaenh yigen mbouj doxdoengz haenx itheij guh saeh.


　　Diuz 37 Boux ganbu dangjyenz aeu rox caeuq gyoengq ganbu rog dangj doxgap guh saeh, gingqcungh gyoengqde, hawsim hag gij ndei gij ak gyoengqde.


　　Gak gaep cujciz aen dangj aeu gigrox yawjraen caeuq doigawj doengh boux ganbu rog dangj caencingq miz bonjsaeh haenx bae raphwnj gij hongsaeh lingjdauj, baujcwng gyoengqde miz cizvu miz gienzlig, cungfaen fazveih gij cozyung gyoengqde.


　　Diuz 38 Gak gaep lingjdauj ganbu aen dangj, mboujlwnh dwg youz minzcuj senjgij okdaeuj, roxnaeuz dwg lingjdauj gihgvanh nyaemhmingh, gij cizvu gyoengqde cungj mbouj dwg ndaej dang baenz seiqvunz, cungj ndaej bienqdoengh roxnaeuz cawz bae.


　　Gij ganbu nienzgeij caeuq ndangdaej canggvang mbouj hab laebdaeb dangsaeh de, wngdang ciuq guekgya gvidingh duiyouh、lizyouh.


　　Cieng Daihcaet　Gij Gijliz Aen Dangj


　　Diuz 39 Gij gijliz aen dangj dwg gij hingzveiz gveihcwz gak gaep cujciz aen dangj caeuq daengxcungq dangjyenz itdingh aeu ciuqsouj de, dwg gij baujcwng henhoh aen dangj doxgiet doengjit、guhbaenz gij yinvu aen dangj. Gij cujciz aen dangj itdingh aeu yiemzgek caephengz caeuq henhoh gij gijliz aen dangj, gungcanjdangjyenz itdingh aeu gagrox ciepsouh gijliz aen dangj hanhhaed.


　　Diuz 40 Gij gijliz aen dangj cujyau baugvat yiengh gijliz cwngci、yiengh gijliz cujciz、yiengh gijliz lenzgez、yiengh gijliz ginzcung、yiengh gijliz gunghcoz、yiengh gijliz swnghhoz.


　　Genhciz ceih gonq re laeng、yw bingh gouq vunz, caephengz gijliz itdingh aeu yiemzgek、famhfanj gijliz itdingh aeu cazbanh, ca seiz caeux ca gij iq、fuengz iq bienq hung, ciuq gij singqcaet loengloek caeuq cingzcez naek mbaeu, bae guh bihbingz gyauyuz cigdaengz gijliz cawqfaen. Yungh “seiq yiengh hingzdai” gamduk caephengz gijliz, hawj“naj nding hanh conh”baenz gij yiengh ciengzseiz, dangjgij cawqfaen、cujciz diuzcingj baenz gij soujduenh youqgaenj guenj dangj ceih dangj, doengh boux dangjyenz famh gijliz、famh hingzsaeh faplwd youqgaenj haenx itdingh aeu haicawz dangjciz.


　　Ndaw dangj yiemzgek gimq yungh gij soujduenh famh dangjcangh famh faplwd guekgya bae doiqdaih dangjyenz, yiemzgek gimqhaed dwkceih boizhaemz caeuq bangjlaih amqhaih. Doengh aen cujciz roxnaeuz doengh boux goyinz famh gij gvidingh neix, itdingh aeu deng gij gijliz aen dangj caeuq gij faplwd guekgya bae cazdawz.


　　Diuz 41 Doiq dangjyenz guh gijliz cawqfaen miz haj cungj: Gingjgau、yiemzcungh gingjgau、siu gij cizvu ndaw dangj bae、louzdangj cazyawj、haicawz dangjciz.


　　Louzdangj cazyawj ceiq raez mbouj mauhgvaq song bi. Dangjyenz youq ndaw geizgan louzdangj cazyawj mbouj miz gij gienzleih byaujgez、gij gienzleih senjgij caeuq gij gienzleih ndaej senjgij. Dangjyenz ginggvaq louzdangj cazyawj, danghnaeuz gaenq caen gaijcingq loengloek, wngdang hoizfuk gij dangjyenz gienzleih de; danghnaeuz genhciz loengloek mbouj gaij, wngdang haicawz dangjciz.


　　Haicawz dangjciz dwg gij cawqfaen ceiq naek ndaw dangj.Gak gaep cujciz aen dangj youq mwh yaek gietdingh roxnaeuz baecinj haicawz gij dangjciz dangjyenz, wngdang cienzmienh yenzgiu gij caizliu caeuq yigen mizgven, daidu aeu cibfaen nyinhcaen siujsim.


　　Diuz 42 Doiq dangjyenz guh gijliz cawqfaen, itdingh aeu ginggvaq aen daihhoih cihbu yaenglwnh gietdingh, bauq hawj gihcwngz veijyenzvei aen dangj baecinj; danghnaeuz gij vwndiz nangqdaengz haenx haemq youqgaenj roxnaeuz fukcab, roxnaeuz yaek doiq dangjyenz guh gij cawqfaen haicawz dangjciz, wnggai faenbied cingzgvang mbouj doengz, bauq hawj gij gijliz genjcaz veijyenzvei aen dangj yienh gaep roxnaeuz yienh gaep doxhwnj saemjcaz baecinj. Youq mwh cingzgvang daegbied, gak gaep veijyenzvei caeuq gijliz genjcaz veijyenzvei aen dangj yienh gaep caeuq yienh gaep doxhwnj miz gienz cigciep gietdingh doiq dangjyenz guh gijliz cawqfaen.


　　Doiq doengh boux veijyenz、veijyenz deqbouj Cunghyangh Veijyenzvei aen dangj, yaek guh gij cawqfaen gingjgau、yiemzcungh gingjgau, youz Cunghyangh Gijliz Genjcaz Veijyenzvei Cangzvu Veijyenzvei saemjlwnh le, bauq hawj dangj cunghyangh baecinj. Doiq doengh boux veijyenz、veijyenz deqbouj deihfueng gak gaep veijyenzvei aen dangj, yaek guh gij cawqfaen gingjgau、yiemzcungh gingjgau, wngdang youz aen gijliz genjcaz veijyenzvei gaepgwnz ndeu baecinj, caemhcaiq bauq hawj aen veijyenzvei doengz gaep aen dangj bwh’anq.


　　Doiq doengh boux veijyenz、veijyenz deqbouj Cunghyangh Veijyenzvei caeuq deihfueng gak gaep veijyenzvei aen dangj, yaek guh gij cawqfaen siu cizvu ndaw dangj bae、louzdangj cazyawj roxnaeuz haicawz dangjciz, itdingh aeu youz sam faenh cih ngeih doxhwnj aen vunzsoq dingzlai baez daengxcungq veiyi aen veijyenzvei bonjvunz de youq haenx gietdingh. Youq aen geizgan daengxcungq veiyi sathoih, ndaej sien youz Cunghyangh Cwngcigiz caeuq aen cangzvu veijyenzvei ndaw deihfueng gak gaep veijyenzvei guh ok gij gietdingh cawqleix, daengz mwh veijyenzvei ciuhai daengxcungq veiyi menhcij bouj guh nyinhdingh.Doiq doengh boux veijyenz caeuq veijyenz deqbouj ndaw deihfueng gak gaep veijyenzvei guh gij cawqfaen gwnzneix gangj haenx, itdingh aeu ginggvaq aen cangzvu veijyenzvei ndaw gijliz genjcaz veijyenzvei gaepgwnz saemjlwnh, youz gaep gijliz genjcaz veijyenzvei neix bauq hawj gij veijyenzvei aen dangj doengz gaep baecinj.


　　Doengh boux veijyenz、veijyenz deqbouj Cunghyangh Veijyenzvei famh hingzsaeh faplwd youqgaenj de, youz Cunghyangh Cwngcigiz gietdingh haicawz gij dangjciz de; doengh boux veijyenz、veijyenz deqbouj deihfueng gak gaep veijyenzvei famh hingzsaeh faplwd youqgaenj de, youz gij cangzvu veijyenzvei aen veijyenzvei doengz gaep gietdingh haicawz gij dangjciz de.


　　Diuz 43 Gij cujciz aen dangj doiq dangjyenz guh ok gij gietdingh cawqfaen, wngdang ciuqsaed bae cazcing saehsaed. Gij caizliu saehsaed aen gietdingh cawqfaen guhbaenz gij gaengawq de caeuq aen gietdingh cawqfaen itdingh aeu hawj bonjvunz yawj gvaq, dingq bonjvunz gangjmingz cingzgvang caeuq bienqbuek.Danghnaeuz bonjvunz doiq aen gietdingh cawqfaen mbouj fug, ndaej daezok sinhsu, gij cujciz aen dangj mizgven itdingh aeu fucwz cawqleix roxnaeuz ganjvaiq cienj soengq, mbouj ndaej gaeuat. Doiq doengh boux caen dwg genhciz gij yigen loengloek caeuq gij iugouz mbouj miz dauhleix de, aeu doiq de guh bihbingz gyauyuz.


　　Diuz 44 Gij cujciz aen dangj danghnaeuz youq henhoh gij gijliz aen dangj fuengmienh mbouj caenh cizcwz, bietdingh aeu deng gyaepdawz cwzyin.


　　Doiq doengh gij cujciz aen dangj famh gij gijliz aen dangj youqgaenj、bonjndang youh mbouj ndaej gag niujcingq de, gij veijyenzvei aen dangj gaepgwnz ndeu ginggvaq cazmingz haedsaed le, wngdang yawj cingzcez naek mbaeu baenz yienghlawz, guh ok aen gietdingh gaijcuj roxnaeuz gaijsanq bae, caemhcaiq bauq hawj gij veijyenzvei aen dangj caiq gaepgwnz ndeu saemjcaz baecinj, cingqsik senhbu caephengz.


　　Cieng Daihbet　Gij Gihgvanh Gijliz Genjcaz Aen Dangj


　　Diuz 45 Cunghyangh Gijliz Genjcaz Veijyenzvei aen dangj youq baihlaj Cunghyangh Veijyenzvei aen dangj lingjdauj bae guh saeh. Deihfueng gak gaep gijliz genjcaz veijyenzvei caeuq gihcwngz gijliz genjcaz veijyenzvei aen dangj youq baihlaj doengh gij veijyenzvei aen dangj doengz gaep caeuq aen gijliz genjcaz veijyenzvei gaepgwnz songcungz lingjdauj bae guh saeh.Gijliz genjcaz veijyenzvei aen dangj gaepgwnz gyagiengz lingjdauj aen gijliz genjcaz veijyenzvei gaeplaj.


　　Gak gaep gijliz genjcaz veijyenzvei aen dangj moix gaiq nyaemhgeiz caeuq gij veijyenzvei aen dangj doengz gaep doxdoengz.


　　Gij daengxcungq veiyi Cunghyangh Gijliz Genjcaz Veijyenzvei aen dangj, senjgij cangzvu veijyenzvei caeuq suhgi、fusuhgi, caemhcaiq bauq hawj Cunghyangh Veijyenzvei aen dangj baecinj. Gij daengxcungq veiyi deihfueng gak gaep gijliz genjcaz veijyenzvei aen dangj, senjgij cangzvu veijyenzvei caeuq suhgi、fusuhgi, caemhcaiq youz gij veijyenzvei aen dangj doengz gaep doenggvaq, bauq hawj gij veijyenzvei aen dangj gaepgwnz baecinj. Gihcwngz veijyenzvei aen dangj dwg laeb gijliz genjcaz veijyenzvei, roxnaeuz dwg laeb gijliz genjcaz veijyenz, youz gij cujciz aen dangj gaepgwnz ndeu yawj gidij cingzgvang bae gietdingh.Cungjcihbu veijyenzvei caeuq cihbu veijyenzvei aen dangj laeb gijliz genjcaz veijyenz.


　　Gij gijliz genjcaz veijyenzvei cunghyangh caeuq deihfueng aen dangj yiengq gij gihgvanh aen dangj caeuq guekgya doengz gaep cienzmienh baij cap gijliz genjcazcuj aen dangj. Boux cujcangj gijliz genjcazcuj camgya doengh aen veiyi mizgven gij lingjdauj cujciz aen dangj aen bouhmonz de capyouq haenx.Gij lingjdauj cujciz aen dangj aen gihgvanh neix itdingh aeu cihciz gij gunghcoz gyoengqde.


　　Diuz 46 Gak gaep gijliz genjcaz veijyenzvei aen dangj dwg aen gihgvanh cienmonz fucwz gamduk ndaw dangj, cujyau yinvu dwg: Henhoh gij canghcwngz aen dangj caeuq gij fapgvi ndaw dangj gizyawz, genjcaz gij lohsienq、fuengcim、cwngcwz caeuq gezyi aen dangj caephengz ndaej baenzlawz yiengh, bang veijyenzvei aen dangj doicaenh cienzmienh coengzyiemz ceih dangj、gyagiengz dangjfungh gensez caeuq cujciz hezdiuz gij hong fanj ndukbaih.


　　Gij cizcwz gak gaep gijliz genjcaz veijyenzvei aen dangj dwg gamduk、caephengz gijliz、gyaepdawz cwzyin, aeu ciengzseiz gyauyuz gyoengq dangjyenz ciuqsouj gijliz, guh ok gij gietdingh gvendaengz henhoh gijliz aen dangj; doiq gij cujciz aen dangj caeuq boux lingjdauj ganbu dangjyenz hengzguh cizcwz、hengzsawj gienzlig guh gamduk; souhleix cawqceq doengh gij gienjgawj caeuq gawjbauq dangjyenz ginzcung, guh damzvah daezsingj、sij saenq cazcam； genjcaz caeuq cawqleix doengh gij anqgienh haemq youqgaenj roxnaeuz haemq fukcab gvendaengz gij cujciz aen dangj caeuq dangjyenz famhfanj gij canghcwngz aen dangj caeuq gij fapgvi ndaw dangj gizyawz, doiq doengh boux dangjyenz ndaw doengh gij anqgienh neix gietdingh cawqfaen roxnaeuz siubae cawqfaen; gyaepdawz cwzyin roxnaeuz daezok gij genyi gyaepdawz cwzyin；souhleix dangjyenz gunggau caeuq sinhsu; baujcang gij gienzleih dangjyenz.


　　Gak gaep gijliz genjcaz veijyenzvei cawqleix gij anqgienh daegbied youqgaenj roxnaeuz daegbied fukcab, aeu dawz gij vwndiz ndaw anqgienh caeuq aen gezgoj cawqleix baugau hawj gij veijyenzvei aen dangj doengz gaep.Deihfueng gak gaep gijliz genjcaz veijyenzvei caeuq gihcwngz gijliz genjcaz veijyenzvei aen dangj aeu doengzseiz baugau hawj aen gijliz genjcaz veijyenzvei gaepgwnz.


　　Gak gaep gijliz genjcaz veijyenzvei raen boux veijyenz ndaw veijyenzvei aen dangj doengz gaep miz gij hingzveiz famhfanj gijliz aen dangj, ndaej bae guh cobouh haedsaed gonq, danghnaeuz aeu laeb anq genjcaz, wngdang youq mwh baugau hawj gij veijyenzvei aen dangj doengz gaep, doengzseiz baugau hawj aen gijliz genjcaz veijyenzvei gaepgwnz ndeu；danghnaeuz nangqdaengz boux cangzvu veijyenz, baugau hawj aen gijliz genjcaz veijyenzvei gaepgwnz ndeu, youz aen gijliz genjcaz veijyenzvei gaepgwnz ndeu bae guh cobouh haedsaed, danghnaeuz yaek aeu saemjcaz, youz aen gijliz genjcaz veijyenzvei gaepgwnz ndeu bauq hawj aen veijyenzvei aen dangj caeuq de doengz gaep haenx baecinj.


　　Diuz 47 Aen gijliz genjcaz veijyenzvei gaepgwnz miz gienz genjcaz gij hong aen gijliz genjcaz veijyenzvei gaeplaj, caemhcaiq miz gienz baecinj caeuq gaijbienq gij gietdingh aen gijliz genjcaz veijyenzvei gaeplaj doiq anqgienh soj guh. Danghnaeuz gij gietdingh aen gijliz genjcaz veijyenzvei gaeplaj yaek aeu gaijbienq neix, gaenq ndaej daengz gij veijyenzvei aen dangj caeuq de doengz gaep baecinj gvaq, cungj gaijbienq neix itdingh aeu ginggvaq gij veijyenzvei aen dangj gaepgwnz de ndeu baecinj.


　　Deihfueng gak gaep gijliz genjcaz veijyenzvei caeuq gihcwngz gijliz genjcaz veijyenzvei aen dangj danghnaeuz doiq gij gietdingh gij veijyenzvei aen dangj doengz gaep cawqleix anqgienh haenx miz yigen mbouj doengz, ndaej cingjgouz aen gijliz genjcaz veijyenzvei gaepgwnz ndeu bae fukcaz; danghnaeuz yawjraen gij veijyenzvei aen dangj doengz gaep roxnaeuz gij cwngzyenz de miz gij cingzgvang famhfanj gijliz aen dangj, youq mwh aen veijyenzvei aen dangj doengz gaep mbouj hawj gaijgez roxnaeuz mbouj hawj cingqdeng gaijgez, miz gienz yiengq aen gijliz genjcaz veijyenzvei gaepgwnz daezok sinhsu, cingjgouz bang guh cawqleix.


　　Cieng Daihgouj　Dangjcuj


　　Diuz 48 Youq ndaw lingjdauj gihgvanh aen guekgya gihgvanh、yinzminz donzdij、ginghci cujciz、vwnzva cujciz cunghyangh caeuq deihfueng nem gij cujciz wnq mbouj dwg dangj de, ndaej ndalaeb dangjcuj. Dangjcuj fazveih aen cozyung lingjdauj haedsim. Gij yinvu dangjcuj, cujyau dwg fucwz gvancez caephengz gij lohsienq、fuengcim、cwngcwz aen dangj; gyagiengz lingjdauj bonj danhvei guh gij gensez aen dangj, hengzguh gij cwzyin cienzmienh coengzyiemz ceih dangj; yaenglwnh caeuq gietdingh gij vwndiz hungnaek aen danhvei bonjfaenh; guhndei gij hongsaeh guenjleix ganbu; yaenglwnh caeuq gietdingh gij saehhangh youqgaenj ndalaeb diuzcingj gij cujciz aen dangj ndaw gihcwngz caeuq fazcanj dangjyenz、cawqfaen dangjyenz daengj; doxgiet gij ganbu caeuq ginzcung rog dangj, guhbaenz gij yinvu dangj caeuq guekgya gyauhawj; lingjdauj gij hong aen cujciz aen dangj ndaw gihgvanh caeuq danhvei cigsug.


　　Diuz 49 Gij cwngzyenz dangjcuj, youz gij cujciz aen dangj baecinj ndalaeb dangjcuj de gietdingh. Dangjcuj laeb miz suhgi, mwh miz bizyau lij ndaej laeb fusuhgi dem.


　　Dangjcuj itdingh aeu fugcoengz gij cujciz aen dangj baecinj de laebbaenz haenx lingjdauj.


　　Diuz 50 Doengh aen gunghcoz bouhmonz guekgya doiq gij danhvei gaeplaj saedhengz cizcungh doengjit lingjdauj haenx ndaej ndalaeb dangjveij, gij banhfap canjseng dangjveij、gij cizgenz caeuq gunghcoz yinvu dangjveij, youz cunghyangh lingh guh gvidingh.


　　Cieng Daihcib　Gij Gvanhaeh Dangj Caeuq Gungcanj Cujyi Cinghnenzdonz


　　Diuz 51 Cungguek Gungcanj Cujyi Cinghnenzdonz dwg aen cujciz ginzdonz gyoengq bouxcoz senhcin youz Cunghgoz Gungcanjdangj lingjdauj he, dwg aen hagdangz hawj gyoengq bouxcoz lailangq youq ndaw sizcen hag gungcanj cujyi caeuq yiengh sevei cujyi miz gij daegsaek Cungguek, dwg boux bangfwngz caeuq gij ligliengh bwhlaeng aen dangj. Gungcinghdonz Cunghyangh Veijyenzvei youz Cunghyangh Veijyenzvei aen dangj bae lingjdauj.Doengh aen deihfueng gak gaep cujciz gungcinghdonz youz gij veijyenzvei aen dangj doengz gaep bae lingjdauj, doengzseiz youz aen cujciz gaepgwnz gungcinghdonz bae lingjdauj.


　　Diuz 52 Gak gaep veijyenzvei aen dangj aeu gyagiengz doiq gungcinghdonz guh lingjdauj, louzsim genjleh caeuq gungganq gij ganbu gungcinghdonz. Dangj aeu genhgez cihciz gungcinghdonz gaengawq gij daegdiemj caeuq sihyau gyoengq bouxcoz lailangq, sengdoengh hozboz、gig ak dajcauh bae guh gunghcoz, hawj gungcinghdonz lai miz gij cozyung duzgizdui caeuq gij cozyung aen giuz lienzhaeh gyoengq bouxcoz lailangq.


　　Boux suhgi gak gaep veijyenzvei gungcinghdonz yienh gaep caeuq yienh gaep doxroengz, boux suhgi aen veijyenzvei gungcinghdonz ndaw danhvei giyez swyez, danghnaeuz dwg dangjyenz, ndaej lezsiz gij veiyi aen veijyenzvei caeuq aen cangzvu veijyenzvei aen dangj doengz gaep.


　　Cieng Cib’it　Aen Veihcangh Caeuq Fan Geiz Aen Dangj


　　Diuz 53 Aen veihcangh Cunghgoz Gungcanjdangj dwg aen doz youz fag liemz caeuq ndaek cuiz gapbaenz.


　　Diuz 54 Fan geiz Cunghgoz Gungcanjdangj dwg fan geizhoengz, gwnz mienhgeiz cangdiemj miz aen doz veihcangh aen dangj saekhenjgim.


　　Diuz 55 Aen veihcangh caeuq fan geiz Cunghgoz Gungcanjdangj, dwg gij siengcwngh caeuq geiqhauh Cunghgoz Gungcanjdangj. Gak gaep cujciz aen dangj caeuq moix boux dangjyenz, cungj aeu henhoh gij cunhyenz aen veihcangh caeuq fan geiz aen dangj. Aeu ciuq gvidingh bae cauhguh caeuq sawjyungh aen veihcangh caeuq fan geiz aen dangj.
Dozsiengq