CUNGHGOZ GUNGCANJDANGJ DAIH CIBBET GAIQ CUNGHYANGH VEIJYENZVEI DAIHSAM BAEZ DAENGXCUNGQ VEIYI GUNGHBAU
（2013 nienz 11 nyied 12 hauh Cunghgoz Gungcanjdangj Daih Cibbet Gaiq Cunghyangh Veijyenzvei Daihsam Baez Daengxcungq Veiyi doenggvaq）
Cunghgoz Gungcanjdangj Daih Cibbet Gaiq Cunghyangh Veijyenzvei Daihsam Baez Daengxcungq Veiyi，2013 nienz 11 nyied 9 hauh daengz 12 hauh youq Baekging gawjhengz.
Gij vunz cuzsiz baez cienzhoih neix，miz cunghyangh veijyenz 204 boux， houbuj cunghyangh veijyenz 169 boux. Cunghyangh Gijliz Genjcaz Veijyenzvei Cangzvu Veijyenzvei veijyenz caeuq mizgven fuengmienh fucwz dungzci lezsiz le veiyi. Ndaw daibyauj Cibbet Daih aen dangj mbangj gihcwngz dungzci caeuq conhgyah yozcej caemh lezsiz le veiyi.
Baez cienzhoih neix youz Cunghyangh Cwngcigiz fucwz gaemguenj. Cunghyangh Veijyenzvei cungjsuhgi Siz Ginbingz guh le gangjvah youqgaenj.
Cienzhoih dingqaeu caeuq yaenglwnh le aen gunghcoz baugau Cunghyangh Cwngcigiz dak Siz Ginbingz guh haenx，saemjlwnh doenggvaq le 《Cunghgung Cunghyangh Aen Gietdingh Gvendaengz Doengh Gij Vwndiz Hungnaek Cienzmienh Gyalaeg Gaijgwz》. Siz Ginbingz couh 《Gietdingh （Faenh Gauj Yaenglwnh）》, yiengq cienzhoih guh le gangjmingz.
Cienzhoih cungfaen haengjdingh le gij hong Cunghyangh Cwngcigiz daj Cibbet Daih aen dangj doxdaeuj soj guh haenx. Itheij nyinhnaeuz，mienhdoiq gij gozci hingzseiq cibfaen fukcab caeuq gij yinvu gaijgwz fazcanj onjdingh gannanz naekcaem ndaw guek，Cunghyangh Cwngcigiz cienzmienh gvancez gij cingsaenz Cibbet Daih caeuq Cibbet Gaiq It Cung、Ngeih Cung Cienzhoih aen dangj，yaengx sang mbaw geiz hungmbwk seveicujyi miz Cungguek daegsaek，aeu Dwng Siujbingz Lijlun、“Sam Aen Daibyauj” Cung’yau Swhsiengj、Gohyoz Fazcanjgvanh daeuj dazyinx，doxgiet daengx dangj daengx ginh daengx guek gak cuz yinzminz， genhciz aen gunghcoz cawjdiuh youq ndaw onjmaenh gouz baenaj，roengzrengz bae guh onjdingh demmaj、diuzcingj gezgou、coicaenh gaijgwz，simdingh bae wngqdoiq gak cungj fung’yiemj deuhcen，cienzmienh bae doicaenh seveicujyi ginghci gensez、 cwngci gensez、vwnzva gensez、ndawbiengz gensez、swnghdai vwnzmingz gensez， cienzmienh bae doicaenh aen gunghcwngz hungmbwk moq dangj raeuz gensez， maenhsaed bae doicaenh aen ginzcung lohsienq gyauyuz sizcen hozdung dangj raeuz， gak hangh hong aeu ndaej cincanj moq，doidoengh fazcanj cingzgoj engq lai engq goengbingz bae hawj daengxcungq yinzminz souh’ik，saedyienh le aen haibuenz ndei bi daih’it gvancez lozsiz gij cingsaenz Cibbet Daih aen dangj.
Cienzhoih doiq Cib’it Gaiq Sam Cung Cienzhoih ciuhai 35 bi doxdaeuj gaijgwz hailangh aeu ndaej gij saedguh baenzgoeng caeuq cingzcik hungmbwk haenx bingzgyaq gig sang，yenzgiu le doengh aen vwndiz hungnaek gvendaengz cienzmienh gyalaeg gaijgwz，nyinhnaeuz gaijgwz hailangh dwg dangj raeuz youq laj seizdaih diuzgen moq daiqlingx daengx guek gak cuz yinzminz guh cungj gwzming hungmbwk moq ndeu，dwg gij daegsaek ceiq ronghsien dangdaih Cungguek，dwg baez genjleh youqgaenj gietdingh diuz mingh dangdaih Cungguek，dwg aen fapbauj youqgaenj saehnieb dangj caeuq yinzminz ndaej yamq hung gyaephwnj seizdaih. Mienhdoiq hingzseiq moq yinvu moq， yaek cienzmienh hwnqbaenz siujgangh sevei， youq gwnz giekdaej neix hwnqbaenz aen seveicujyi yendaiva guekgya fouqak minzcuj vwnzmingz huzndei ndeu、saedyienh aen loqsiengj Cungguek Cunghvaz Minzcuz daih fukhwng，itdingh aeu youq gwnz aen lizsij hwnjdin moq bae cienzmienh gyalaeg gaijgwz.
Cienzhoih giengzdiuh，yaek cienzmienh gyalaeg gaijgwz，itdingh aeu yaengx sang mbaw geiz hungmbwk seveicujyi miz Cungguek daegsaek，aeu Majgwzswh-Lezningzcujyi、 Mauz Cwzdungh Swhsiengj、 Dwng Siujbingz Lijlun、 “Sam Aen Daibyauj” Cung’yau Swhsiengj、Gohyoz Fazcanjgvanh daeuj dazyinx， giendingh saenqsim，gietcomz gij yawjfap doxdoengz，doengjcouz suenqveh， boiqhab doicaenh，genhciz aen gaijgwz fueng’yiengq seveicujyi hawciengz ginghci， aeu coicaenh ndawbiengz goengbingz cwng’yi、demlai yinzminz vuenyungz guh gizhwnjdin caeuq gizroengzdin， caenh’itbouh gaijfang swhsiengj、gaijfang caeuq fazcanj sevei swnghcanjliz、gaijfang caeuq demgiengz ndawbiengz rengzhoengh， giengiet buqcawz dijci gihci fuengmienh gij mbouj ndei de，roengzrengz hai ok aen gingjgyae engqgya gvangqlangh yiengh saehnieb seveicujyi miz Cungguek daegsaek.
Cienzhoih ceijok，aen cungjmuzbyauh cienzmienh gyalaeg gaijgwz dwg laebndei caeuq fazcanj yiengh cidu seveicujyi miz Cungguek daegsaek，doicaenh guekgya ceihleix dijhi caeuq ceihleix naengzlig yendaiva. Itdingh aeu engqgya yawjnaek gij hidungjsing、 cwngjdijsing、 hezdungzsing gaijgwz，gyavaiq fazcanj seveicujyi hawciengz ginghci、minzcuj cwngci、senhcin vwnzva、ndawbiengz huzndei、 swnghdai vwnzmingz，hawj sojmiz gij rengzhoengh lauzdung、cihsiz、gisuz、 guenjleix、swhbwnj ndaej doxcanj biu okdaeuj，hawj sojmiz aen goekmboq cauh’ok cienzcaiz ndawbiengz ndaej cungfaen nyoenx okdaeuj，hawj fazcanj cingzgoj engq lai engq goengbingz bae hawj daengxcungq yinzminz souh’ik.
Cienzhoih ceijok，aeu ndaetndaet hopheux hawj hawciengz youq ndaw boiqceiq swhyenz miz gietdinghsingq cozyung bae gyalaeg gaijgwz ginghci dijci， genhciz caeuq laebndei gihbwnj ginghci cidu， gyavaiq laebndei yienhdaih hawciengz dijhi、hungzgvanh diuzgung dijhi、yiengh ginghci dijhi hailangh，gyavaiq cienjbienq ginghci fazcanj fuengsik，gyavaiq hwnqguh aen guekgya ak cauhmoq，doidoengh ginghci engq miz yauliz、engqgya goengbingz、engq ndaej lienzdaemh fazcanj；ndaetndaet hopheux genhciz dangj raeuz lingjdauj、yinzminz danggya guhcawj、 ciuqfap guenj guek ndeindei doengjit bae gyalaeg gaijgwz cwngci dijci，gyavaiq doicaenh seveicujyi minzcuj cwngci ciduva、gveihfanva、cwngzsiva，hwnqguh seveicujyi fapceih guekgya，fazcanj yiengh yinzminz minzcuj engqgya gvangqlangh、 engqgya cungfaen、engqgya caezcienz de；ndaetndaet hopheux hwnqguh aen haedsim gyaciz dijhi seveicujyi、aen vwnzva guekak seveicujyi bae gyalaeg gaijgwz vwnzva dijci，gyavaiq laebndei vwnzva guenjleix dijci caeuq vwnzva swnghcanj ginghyingz gihci，laebhwnj laebcaez yienhdaih goenggungh vwnzva fuzvu dijhi、yienhdaih vwnzva hawciengz dijhi，doidoengh seveicujyi vwnzva daih fazcanj daih mwnhoengh；ndaetndaet hopheux engq ndei baujcang caeuq gaijndei saedceij beksingq、coicaenh ndawbiengz goengbingz cwng’yi bae gyalaeg gaijgwz sevei dijci，gaijgwz souhaeuj faenboiq cidu，coicaenh doengzcaez fouqmiz，doicaenh sevei lingjyiz cauhmoq cidu， doicaenh gihbwnj goenggungh fuzvu bienq doxbingz bae，gyavaiq guhbaenz aen sevei ceihleix dijci gohyoz mizyauq haenx，saedbauj ndawbiengz gawq ndaej gig miz rengzhoengh youh ndaej huzndei mbouj luenh；ndaetndaet hopheux hwnqbaenz aen Cungguek gyaeundei bae gyalaeg gaijgwz swnghdai vwnzmingz dijci，gyavaiq laebhwnj swnghdai vwnzmingz cidu，laebcaez aen dijci gihci haifat hoengqgan diegguek、mbaetyungh swhyenz、baujhoh swnghdai vanzging，doidoengh guhbaenz aen yendaiva gensez gwzgiz moq vunz caeuq swyenz ndaej doxhuz fazcanj haenx；ndaetndaet hopheux daezsang gij suijbingz gohyoz gaemgienz、minzcuj gaemgienz、 ciuqfap gaemgienz bae gyalaeg gaijgwz gij cidu dangj raeuz gensez，gyagiengz gensez minzcuj cizcungh cidu，laebndei aen lingjdauj dijci caeuq gij gaemgienz fuengsik dangj raeuz，baujciz dangj raeuz senhcin caeuq cinghseuq，vih gaijgwz hailangh caeuq seveicujyi yendaiva gensez daezhawj cwngci baujcwng maenh’ak.
Cienzhoih ceijok， yaek cienzmienh gyalaeg gaijgwz，itdingh aeu ndwn youq aen saedceiq ceiq hung guek raeuz ciengzgeiz lij cawqyouq mboengq cogaep seveicujyi，genhciz aen canloz duenhdingh hungnaek fazcanj vanzlij dwg gij ceiq youqgaenj gaijgez sojmiz vwndiz guek raeuz，aeu ginghci gensez guh cungsim，fazveih gij dazyinx cozyung ginghci dijci gaijgwz，doidoengh swnghcanj gvanhaeh caeuq swnghcanjliz、sangcwngz gencuz caeuq ginghci giekdaej dox hab’wngq， doidoengh ginghci sevei lienzdaemh cangqvuengh fazcanj.
Cienzhoih ceijok，ginghci dijci gaijgwz dwg aen cungdenj cienzmienh gyalaeg gaijgwz，haedsim vwndiz dwg cawqleix ndei gij gvanhaeh cwngfuj caeuq hawciengz，hawj hawciengz youq ndaw boiqceiq swhyenz miz gietdinghsingq cozyung caeuq engq ndei bae fazveih gij cozyung cwngfuj.
Cienzhoih giengzdiuh，gij saedguh baenzgoeng gaijgwz hailangh vih cienzmienh gyalaeg gaijgwz daezhawj le gingniemh youqgaenj，itdingh aeu ciengzgeiz genhciz. Gij ceiq youqgaenj de dwg，genhciz dangj raeuz lingjdauj，gvancez diuz gihbwnj lohsienq dangj raeuz，mbouj byaij diuz roengaeuq fungsaek gaengjbanj，mbouj byaij diuz roenloek gaijvuenh geizhauh，genhciz byaij diuz roen seveicujyi miz Cungguek daegsaek，itloh saedbauj aen fueng’yiengq gaijgwz cingqdeng；genhciz gaijfang swhsiengj、ciuq saedsaeh bae guh、caeuq seizdaih caez baenaj、gouzcaen guhsaed，yienghyiengh daj saedceiq hwnjdin，cungjgez gij guhfap baenzgoeng ndaw guek，supaeu gij gingniemh mizik rog guek，gamj bae doicaenh cauhmoq lijlun caeuq saedguh；genhciz aeu vunz guh goek，gingqcungh aen cawjdaej diegvih yinzminz，fazveih gij cingsaenz cauxdaeuz cungqvunz，ndaetndaet baenghgauq yinzminz bae doidoengh gaijgwz，coicaenh boux vunz ndaej cienzmienh fazcanj；genhciz cingqdeng bae cawqleix gij gvanhaeh gaijgwz fazcanj onjdingh， damjliengh aeu hung、yamqdin aeu maenh，gyagiengz caengzdingj suenqveh caeuq lumh rin gvaq dah dox giethab，cingjdaej doicaenh caeuq cungdenj cungbyoengq dox coicaenh，daezsang gij gohyozsing gaijgwz gezcwz，gvangqlangh gietcomz gij yawjfap doxdoengz，cauxbaenz gij rengzgyoeb gaijgwz.
Cienzhoih iugouz，daengz 2020 nienz，youq aen lingjyiz youqgaenj caeuq aen vanzcez gvanhgen guh gaijgwz aeu ndaej gij cingzgoj miz gietdingh yiyi de， guhbaenz aen cidu dijhi hidungj caezcienz、gohyoz gveihfan、yinhhengz mizyauq de，hawj gak aen fuengmienh cidu engqgya cingzsug engqgya dinghhingz.
Cienzhoih doiq cienzmienh gyalaeg gaijgwz guh ok le hidungj baijbouh， giengzdiuh genhciz caeuq laebndei gihbwnj ginghci cidu，gyavaiq laebndei yienhdaih hawciengz dijhi，gyavaiq cienjbienq gij ciznwngz cwngfuj，gyalaeg gaijgwz caizsui dijci，laebcaez gij dijci gihci hawsingz lajmbanj habbaenz cingjdaej fazcanj， cauhlaeb aen dijci moq yiengh ginghci hailangh de，gyagiengz gensez seveicujyi minzcuj cwngci cidu，doicaenh gensez fapceih Cungguek，giengzvaq aen dijhi hanhhaed caeuq gamduk gienzlig yinhhengz， doicaenh cauhmoq vwnzva dijci gihci， doicaenh gaijgwz cauhmoq saehnieb ndawbiengz，cauhmoq ndawbiengz ceihleix dijci， gyavaiq gensez swnghdai vwnzmingz cidu，gyalaeg gaijgwz gozfangz caeuq ginhdui， gyagiengz caeuq gaijndei dangj raeuz doiq cienzmienh gyalaeg gaijgwz guh lingjdauj.
Cienzhoih daezok，aen gihbwnj ginghci cidu aeu gunghyoujci guh cawjdaej、 lai cungj sojyoujci ginghci caezcaemh fazcanj haenx，dwg diuz dongh youqgaenj cengjdingj yiengh cidu seveicujyi miz Cungguek daegsaek，hix dwg aen giekdaej seveicujyi hawciengz ginghci dijci. Gunghyoujci ginghci caeuq cungj ginghci mbouj dwg gunghyoujci cungj dwg aen bouhfaenh youqgaenj gapbaenz seveicujyi hawciengz ginghci，cungj dwg aen giekdaej youqgaenj guek raeuz ginghci sevei fazcanj. Itdingh aeu giendingh mbouj bienq bae gyamaenh caeuq fazcanj gunghyoujci ginghci，genhciz aen cawjdaej diegvih gunghyoujci，fazveih gij cujdauj cozyung guekmiz ginghci，mboujduenh demgiengz gij rengzhoengh、rengzgaemhanh、rengzyingjyangj guekmiz ginghci. Itdingh aeu giendingh mbouj bienq bae gujli、 cihciz、dazyinx cungj ginghci mbouj dwg gunghyoujci de fazcanj，gikfat gij rengzhoengh caeuq rengzdajcauh cungj ginghci mbouj dwg gunghyoujci de. Aeu laebndei aen cidu baujhoh canjgienz，cizgiz fazcanj gij sojyoujci ginghci doxcab de， doidoengh guekmiz giyez guhndei yienhdaih giyez cidu，cihciz cungj ginghci mbouj dwg gunghyoujci de cangqvuengh fazcanj.
Cienzhoih daezok，gensez aen hawciengz dijhi doengjit hailangh、miz bouhloh gingcwngh haenx，dwg aen giekdaej hawj hawciengz youq ndaw boiqceiq swhyenz miz gietdinghsingq cozyung. Itdingh aeu gyavaiq guhbaenz aen yienhdaih hawciengz dijhi giyez ndaej gag guhcawj ginghyingz、goengbingz gingcwngh，bouxsiufeiq ndaej swyouz genjleh、gag guhcawj siufeiq，sanghbinj caeuq yausu ndaej swyouz riuzdoengh、bingzdaengj doxvuenh haenx，roengzrengz bae siucawz gij laengzlanz gwnz hawciengz，hawj swhyenz boiqceiq engq miz yauliz caeuq engq goengbingz. Aeu laebhwnj aen hawciengz gveihcwz goengbingz hailangh ronghcingx haenx， laebndei aen gihci cujyau youz hawciengz bae gietdingh gyaqcienz，laebhwnj aen hawciengz gensez yunghdieg singz mbanj doengjit haenx，laebndei ginhyungz hawciengz dijhi，gyalaeg gaijgwz gohgi dijci.
Cienzhoih daezok，hungzgvanh diuzgung ndaej hab gohyoz，cwngfuj ceihleix ndaej mizyauq，dwg fazveih gij youhsi seveicujyi hawciengz ginghci dijci bietyienz iugouz yienghneix. Itdingh aeu cietsaed cienjbienq cwngfuj ciznwngz，gyalaeg gaijgwz hingzcwng dijci，cauhmoq hingzcwng guenjleix fuengsik，demgiengz cwngfuj goengsaenqlig caeuq caephengz naengzlig，gensez fapceih cwngfuj caeuq aen cwngfuj ak fuzvu. Aeu laebcaez hungzgvanh diuzgung dijhi，cienzmienh cingqdeng hengzguh cwngfuj ciznwngz，youhva cwngfuj cujciz gezgou，daezsang gohyoz guenjleix suijbingz.
Cienzhoih daezok，caizcwng dwg aen giekdaej caeuq diuzdongh youqgaenj cengjdingj guekgya ceihleix，aen caizsui dijci gohyoz de dwg aen cidu baujcang youhva boiqceiq swhyenz、henhoh hawciengz doengjit、doicaenh sevei goengbingz、saedyienh guekgya ciengzgeiz onjdingh. Itdingh aeu guhndei laebfap、mingzbeg saehgienz、gaijgwz sougvaeh cidu、onjdingh gvaehsuiq rapdawz、hawj yawhsuenq ronghcingx、daezsang yauliz，laebhwnj yienhdaih caizcwng cidu，fazveih cunghyangh caeuq deihfueng song aen cizgizsing. Aeu gaijndei yawhsuenq guenjleix cidu， laebndei gvaehsuiq cidu，laebhwnj aen cidu hawj saehgienz caeuq ceiok cwzyin doxhab’wngq haenx.
Cienzhoih daezok，hawsingz lajmbanj wyenz gezgou dwg gij gazngaih youqgaenj hanhhaed hawsingz lajmbanj habbaenz cingjdaej fazcanj. Itdingh aeu laebcaez dijci gihci，guhbaenz yiengh gungh nungz singz mbanj gvanhaeh moq aeu gunghyez coicaenh nungzyez、aeu hawsingz daiqdoengh lajmbanj、gungh nungz caez ndaej leih、hawsingz lajmbanj habbaenz cingjdaej de，hawj guengjdaih nungzminz bingzdaengj bae gyahaeuj yendaiva cincwngz、doengzcaez yiengjsouh gij cingzgoj yendaiva. Aeu gyavaiq cauxlaeb yiengh nungzyez ginghyingz dijhi moq，hawj nungzminz miz caizcanj gienzleih engq lai， doicaenh hawsingz lajmbanj bingzdaengj doxvuenh yausu caeuq bingzyaenx boiqceiq goenggungh swhyenz，laebndei aen dijci gihci coicaenh cwngzcinva cangqheiq fazcanj.
Cienzhoih daezok，hab’wngq aen hingzseiq moq ginghci cenzgiuzva，itdingh aeu doidoengh doiq ndaw doiq rog hailangh dox coicaenh、yinx haeujdaeuj caeuq byaij okbae giethab ndaej engq ndei，coicaenh gij yausu ndaw guek rog guek miz bouhloh bae swyouz riuzdoengh、swhyenz boiqceiq yauliz sang、hawciengz yungzhab ndaej ndei，gyavaiq gungganq aen youhsi moq caeuqfaenh caeuq dazyinx gozci ginghci gapguh doxdax，yungh hailangh coicaenh gaijgwz.Aeu cuengqsoeng cinjhaeuj douzswh，gyavaiq gensez swyouz mouyizgih，gya’gvangq hailangh henzgyaiq diegndaw.
Cienzhoih daezok，fazcanj seveicujyi minzcuj cwngci，itdingh aeu baujcwng yinzminz danggya guhcawj guh gaenbonj，genhciz caeuq laebndei yinzminz daibyauj daihhoih cidu、aen cidu lai dangj doxgap caeuq cwngci hezsangh youz Cunghgoz Gungcanjdangj lingjdauj haenx、minzcuz gihyiz swci cidu caeuq gihcwngz ginzcung swci cidu，engqgya yawjnaek laebcaez minzcuj cidu、fungfouq minzcuj hingzsik， cungfaen fazveih gij youhyezsing seveicujyi cwngci cidu guek raeuz. Aeu doidoengh yinzminz daibyauj daihhoih cidu caeuq seizdaih caez baenaj，doicaenh hezsangh minzcuj fazcanj baenz gvangqlangh lai caengz caeuq fazcanj baenz cidu，fazcanj gihcwngz minzcuj.
Cienzhoih daezok，gensez fapceih Cungguek，itdingh aeu gyalaeg gaijgwz swhfaz dijci，gyavaiq gensez gij seveicujyi swhfaz cidu goengcingq gienzvi yauliz sang haenx，henhoh yinzminz gienzik. Aeu henhoh gij gienzvi yenfaz faplwd，gyalaeg gaijgwz hingzcwng caepfap dijci，saedbauj ciuqfap duzliz goengcingq hengzsawj saemjbuenqgienz genjcazgienz，laebcaez aen gihci yinhhengz swhfaz gienzlig，laebndei yinzgenz swhfaz baujcang cidu.
Cienzhoih daezok，genhciz yungh cidu guenj gienz guenj saeh guenj vunz，hawj yinzminz gamduk gienzlig，hawj gienzlig goenghai ronghcingx bae yinhhengz，dwg aen gaenbonj fuengfap ndaej dawz gienzlig gyaeng haeuj ndaw loengz cidu bae. Itdingh aeu ndaqlaeb aen gienzlig yinhhengz dijhi ndaej hawj gezcwz gohyoz、caephengz genhgez、gamduk mizrengz haenx，laebcaez aen dijhi fadceih caeuq yawhfuengz nduknaeuh，gensez cwngci cinghseuq，roengzrengz saedyienh ganbu ndangseuq goengcingq、cwngfuj seuqcengh、cwngci gangj faplwd miz diuzleix. Aeu guhbaenz aen gihci hanhhaed caeuq hezdiuz gienzlig gohyoz mizyauq haenx，gyagiengz fanj nduknaeuh dijci gihci cauhmoq caeuq cidu baujcang，laebcaez aen cidu ndaej seizseiz gaijndei cozfungh haenx.
Cienzhoih daezok，gensez aen seveicujyi guekgya vwnzva maenh’ak，demgiengz gij saedlig’unq guekgya vwnzva，itdingh aeu genhciz aen fueng’yiengq baenaj seveicujyi senhcin vwnzva，genhciz diuz roenloh fazcanj yiengh seveicujyi vwnzva miz Cungguek daegsaek，genhciz aen gunghcoz daujyang saeh saeh vih yinzminz，caenh’itbouh gyalaeg gaijgwz vwnzva dijci. Aeu laebndei vwnzva guenjleix dijci，laebhwnj laebcaez aen vwnzva hawciengz dijhi yienhdaih，hwnqlaeb aen dijhi yienhdaih goenggungh vwnzva fuzvu，daezsang gij suijbingz vwnzva hailangh.
Cienzhoih daezok，saedyienh fazcanj cingzgoj engq lai engq goengbingz bae hawj daengxcungq yinzminz souh’ik，itdingh aeu gyavaiq gaijgwz sevei saehnieb，gaijgez ndei gij leih’ik vwndiz yinzminz ceiq gvansim ceiq cigciep ceiq yienhsaed de，engq ndei muenxcuk yinzminz sihgiuz. Aeu cunghab gyalaeg gaijgwz gyauyuz lingjyiz，laebcaez gij dijci gihci ndaej coicaenh couhnieb cauhnieb haenx，guhbaenz aen gwzgiz faenboiq souhaeuj hableix miz cizsi de，laebhwnj aen sevei baujcang cidu engqgya goengbingz youh ndaej lienzdaemh haenx，gyalaeg gaijgwz yihyoz veiswngh dijci.
Cienzhoih daezok，cauhmoq sevei ceihleix，itdingh aeu ok henhoh gij gaenbonj leih’ik gyoengq beksingq ceiq guengjdaih haenx bae naemj，ceiq daih hanhdoh bae demgya gij yinhsu huzndei，demgiengz gij vuedlig sevei fazcanj，daezsang gij suijbingz ceihleix sevei，henhoh guekgya ancienz，saedbauj yinzminz andingh gvaq saedceij、sevei andingh miz cizsi. Aeu gaijndei gij fuengsik ceihleix sevei，gikfat gij vuedlig sevei cujciz，cauhmoq aen dijci ndaej mizyauq yawhfuengz caeuq vaqgaij sevei mauzdun，laebcaez goenggungh ancienz dijhi. Laeb Guekgya Ancienz Veijyenzvei，laebndei guekgya ancienz dijci caeuq guekgya ancienz canloz， saedbauj guekgya ancienz.
Cienzhoih daezok，gensez swnghdai vwnzmingz， itdingh aeu laebhwnj aen cidu dijhi swnghdai vwnzmingz hidungj caezcingj de，yungh cidu baujhoh swnghdai vanzging. Aeu laebcaez aen canjgienz cidu caeuq aen cidu guenjceiq yunghcawq gvendaengz swyenz swhyenz swhcanj haenx，vehdingh diuz sienqhoengz baujhoh swnghdai，saedhengz aen cidu gyaucienz sawjyungh swhyenz caeuq aen cidu dienzbouj swnghdai，gaijgwz aen dijci baujhoh guenjleix swnghdai vanzging.
Cienzhoih daezok，ndaetndaet hopheux aen muzbyauh dangj raeuz youq laj hingzseiq moq hawj ginhdui giengzak de, couh dwg gensez aen yinzminz ginhdui dingq dangj cijveih、hoenxciengq ndaej hingz、cozfungh ndei ndeu，yunghrengz gaijgez gij mauzdun caeuq vwndiz doedok hanhhaed gozfangz caeuq ginhdui gensez fazcanj de，cauhmoq fazcanj ginhsw lijlun，gyagiengz ginhsw canloz cijdauj，laebndei gij ginhsw canloz fuengcim aen seizgeiz moq，hwnqlaeb aen yienhdaih ginhsw ligliengh dijhi miz Cungguek daegsaek. Aeu gyalaeg diuzcingj gaijgwz ginhdui dijci benhci，doicaenh diuzcingj gaijgwz ginhdui cwngcwz cidu，doidoengh ginhminz yungzhab fazcanj haeuj laeg bae.
Cienzhoih daezok，cienzmienh gyalaeg gaijgwz itdingh aeu gyagiengz caeuq gaijndei dangj raeuz lingjdauj，cungfaen fazveih gij lingjdauj haedsim cozyung dangj raeuz cienzmienh dawzndei daengxbuenz、hezdiuz gak fueng haenx，daezsang gij lingjdauj suijbingz caeuq gij naengzlig gaemgienz dangj raeuz，saedbauj gaijgwz guh ndaej baenz. Cunghyangh laebbaenz Cienzmienh Gyalaeg Gaijgwz Lingjdauj Siujcuj， fucwz gaijgwz cungjdaej sezgi、dungjcouz hezdiuz、cingjdaej doicaenh、dukcoi lozsiz. Gak gaep dangjveij aeu cietsaed hengzguh gij cwzyin lingjdauj gaijgwz. Aeu gyalaeg gaijgwz ganbu yinzsw cidu，laebhwnj aen dijci gihci gyonjcomz vunzcaiz，cungfaen fazveih gij cizgizsing、cujdungsing、cangcausing yinzminz ginzcung，gujli deihfueng、gihcwngz caeuq ginzcung daihdamj damqra，gibseiz cungjgez gingniemh.
Cienzhoih faensik le gij hingzseiq caeuq yinvu dangqnaj，giengzdiuh daengx dangj dungzci aeu dawz swhsiengj caeuq hengzdoengh doengjit daengz gwnz baijbouh gezcwz hungnaek cunghyangh gvendaengz cienzmienh gyalaeg gaijgwz haenx，lai rox roengzrengz baenaj、lai rox gaemdawz seizgei、lai rox miz cwzyin，dawzmaenh fueng’yiengq，daihdamj sizcen damqra，yawjnaek dungjcouz hezdiuz， gietcomz gaijgwz fuengmienh gij yinsiz doxdoengz de，lozsiz lingjdauj cwzyin，giendingh mbouj bienq saedyienh cunghyangh gij gezcwz baijbouh mizgven gaijgwz haenx. Aeu ciuq gij gezcwz baijbouh cunghyangh，genhciz youq ndaw onjdingh gouz baenaj、youq ndaw onjdingh guh ok cingzcik，cietsaed guh ndei gak hangh gunghcoz，baujciz aen seiqdaeuz ginghci sevei fazcanj，gvansim ginzcung daegbied dwg gyoengq ginzcung gwndaenj hojnanz de，coicaenh sevei huzndei onjdingh，laebdaeb netsaed doicaenh dangj raeuz aen hozdung guh ginzcung lohsienq gyauyuz sizcen，roengzrengz saedyienh gij yawhgeiz muzbyauh ginghci sevei fazcanj.
Cienzhoih haucau，daengx dangj dungzci aeu gaenjmaed doxgiet youq seiqhenz aen dangj cunghyangh aeu Siz Ginbingz dungzci guh cungjsuhgi haenx，laemxsim guh baenaj，gungroengz hojnanz，raiz ok bien lizsij moq aen saehnieb hungmbwk gaijgwz hailangh，vih cienzmienh guhbaenz siujgangh sevei、mboujduenh duedaeu yiengh seveicujyi miz Cungguek daegsaek caiq ndaej hingz、saedyienh aen loqsiengj Cungguek Cunghvaz Minzcuz fukhwng hungmbwk bae buekguh！
HAWJ MBAW GEIZ GAIJGWZ YOUQ GWNZ DIUZLOH CUNGGUEK BIUFIEGFIEG
Yinzminz Yizbau Selun
1978 nienz doxdaeuj，moix baez sam cung cienzhoih cungj dwg aen lizsij hangzbiu gaijgwz ndeu. Youq mwh caezgya cungj gvansim ndij deqmuengh de，Cibbet Gaiq Sam Cung Cienzhoih dangj raeuz hai sat caezcup lo. Gij gaijgwz Cungguek ndwn daengz giz lizsij hwnjdin moq lo.
Baez hoih neix dwg baez hoih youqgaenj ndeu，dwg youq guek raeuz gaijgwz hailangh aen seizgei youqgaenj de ciuhai. Cienzhoih dingqaeu caeuq yaenglwnh le aen gunghcoz baugau Cunghyangh Cwngcigiz dak Siz Ginbingz dungzci guh de， saemjlwnh doenggvaq le 《Cunghgung Cunghyangh Aen Gietdingh Gvendaengz Doengh Gij Vwndiz Hungnaek Cienzmienh Gyalaeg Gaijgwz》. Ciuhai baez hoih neix， ndaej gig youqgaenj bae senhsi caeuq daejyienh aen dangj raeuz genhciz aeu Dwng Siujbingz Lijlun、“Sam Aen Daiqbiuj” Cung’yau Swhsiengj、Gohyoz Fazcanjgvanh guh dazyinx，youq laj hingzseiq moq giendingh mbouj bienq bae gvancez gij gihbwnj lohsienq、gihbwnj ganghlingj、gihbwnj gingniemh、 gihbwnj iugouz dangj raeuz，giendingh mbouj bienq bae yaengx sang mbaw geiz gaijgwz hailangh，caiq baez bae cungjdaej anbaiz、cungjdaej dungyenz cienzmienh gyalaeg gaijgwz，itdingh ndaej doiq doidoengh yiengh seveicujyi saehnieb miz Cungguek daegsaek miz ok yingjyangj hungnaek youh gyaeraez.
Cienzhoih doiq gij gunghcoz Cunghyangh Cwngcigiz ok Cibbet Daih aen dangj doxdaeuj de bingzgyaq gig sang. Caezcaemh nyinhnaeuz，mienhdoiq aen gozci hingzseiq gig fukcab caeuq aen yinvu gaijgwz fazcanj ndaw guek hojnanz naekcaem de，aen dangj cunghyangh aeu Siz Ginbingz dungzci guh cungjsuhgi neix doxgiet daiqlingx daengx dangj daengx ginh daengx guek gak cuz yinzminz，genhciz aen gunghcoz cawjdiuh youq ndaw onjdingh gouz baenaj， roengzrengz onjdingh demmaj、 diuzcingj gezgou、coicaenh gaijgwz， simdingh bae wngqdoiq gak cungj fung’yiemj deuhcen，cienzmienh doicaenh seveicujyi ginghci gensez、cwngci gensez、vwnzva gensez、sevei gensez、swnghdai vwnzmingz gensez，cienzmienh doicaenh dangj raeuz gensez aen gunghcwngz hungmbwk moq de，maenhsaed doicaenh dangj raeuz ginzcung lohsienq gyauyuz sizcen hozdung，gak hangh gunghcoz caiq ndaej guh baenaj，doidoengh fazcanj cingzgoj ndaej engq lai engq goengbingz bae hawj daengxcungq yinzminz souh’ik，saedyienh le gvancez lozsiz gij cingsaenz Cibbet Daih aen dangj youq bi nduj haibuenz guh ndaej ndei.
Gaijgwz hailangh dwg aen genjleh youqgaenj ndaej gietdingh diuzmingh dangdaih Cungguek de. Ok Cib’it Gaiq Sam Cung Cienzhoih dangj raeuz guh ok aen lizsijsing gezcwz dawz gunghcoz cungsim dangj caeuq guekgya cienj daengz ginghci gensez，saedhengz gaijgwz hailangh doxdaeuj，gij yienghsiengq Cungguek yinzminz、yienghsiengq seveicujyi Cungguek、yienghsiengq Cunghgoz Gungcanjdangj ndaej miz bienqvaq laegdaeuq baenzneix，guek raeuz ndaej youq gozci sevei miz diegvih youqgaenj， dwg baengh genhciz mbouj cuengqsoeng bae doicaenh gaijgwz hailangh. 《Cunghgung Cunghyangh Aen Gietdingh Gvendaengz Doengh Gij Vwndiz Hungnaek Cienzmienh Gyalaeg Gaijgwz》 cienzhoih doenggvaq haenx，laegdaeuq buqcek gij lijlun hungnaek caeuq gij vwndiz ndaw sizcen guek raeuz gaijgwz fazcanj onjdingh dangqnaj bungzdaengz de，gangjmingz le gij yiyi hungnaek caeuq aen fueng’yiengq daengzcog cienzmienh gyalaeg gaijgwz，daezok le gij cijdauj swhsiengj、 muzbyauh yinvu、yenzcwz hungnaek cienzmienh gyalaeg gaijgwz，veh ok gij lamzdoz moq、siengjmuengh moq、muzbyauh moq cienzmienh gyalaeg gaijgwz，hableix baijbouh le gij canloz cungdenj、gij gonqlaeng yousien、 aen fueng’yiengq cawjgung、gij gihci guh hong、gij fuengsik doicaenh caeuq seizgan biuj、lohsienq doz gyalaeg gaijgwz，gyonjcomz le gij swhsiengj moq、lwnhduenh moq、cosih moq cienzmienh gyalaeg gaijgwz，cauxbaenz youq gaijgwz lijlun caeuq cwngcwz fuengmienh ndaej miz baenzroix cungbyoengq hungnaek，dwg gij gohyoz ceijnamz caeuq hengzdoengh ganghlingj dangj raeuz youq gwnz giz lizsij haidin moq bae cienzmienh gyalaeg gaijgwz.
Aen cungjmuzbyauh cienzmienh gyalaeg gaijgwz，dwg laebndei caeuq fazcanj aen seveicujyi cidu miz Cungguek daegsaek，doicaenh guekgya ceihleix dijhi caeuq ceihleix naengzlig yendaiva. 《Gietdingh》 dinghlaeb aen cungjmuzbyauh neix， laegdaeuq biujmingz le gij singciz ronghsien caeuq gaenbonj yinvu gaijgwz. Mbaw geiz gaijgwz hailangh itdingh aeu yaengx sang sang，aen fueng’yiengq cingqdeng diuzloh seveicujyi miz Cungguek daegsaek itdingh aeu genhciz maenhmaenh bae.
Cienzmienh gyalaeg gaijgwz dwg aen canloz baijbouh hungnaek gvanhaeh daengz dangj caeuq guekgya saehnieb fazcanj daengxbuenz de，mbouj dwg youq moux aen lingjyiz moux aen fuengmienh guh danhangh gaijgwz. Ndaetndaet hopheux hawj hawciengz youq swhyenz boiqceiq ndawde miz gietdinghsingq cozyung bae gyalaeg gaijgwz ginghci dijci，ndaetndaet hopheux genhciz aen dangj lingjdauj、yinzminz danggya guhcawj、ciuqfap ceihleix guekgya ndeindei doengjit bae gyalaeg gaijgwz cwngci dijci，ndaetndaet hopheux gensez seveicujyi haedsim gyaciz dijhi、seveicujyi vwnzva guekak bae gyalaeg gaijgwz vwnzva dijci，ndaetndaet hopheux engq ndei baujcang caeuq gaijndei saedceij beksingq、coicaenh sevei goengbingz cwng’yi bae gyalaeg gaijgwz sevei dijci，ndaetndaet hopheux gensez aen Cungguek gyaeundei bae gyalaeg gaijgwz gij dijci swnghdai vwnzmingz，ndaetndaet hopheux daezsang gij naengzlig gohyoz gaemgienz、minzcuj gaemgienz、ciuqfap gaemgienz bae gyalaeg gaijgwz gij cidu aen dangj gensez. “Roek aen ndaetndaet hopheux” neix，gawq cungbyoengq gij gazgit swhsiengj gvanhnen，youh cungbyoengq gij hanhhaed leih’ik dinghmaenh，daejyienh le gaijgwz gij hidungjsing、cwngjdijsing、hezdungzsing de， bietdingh ndaej hawj sojmiz gij rengzhoengh lauzdung、cihsiz、gisuz、guenjleix、swhbwnj ndaej doxcanj biu okdaeuj，hawj sojmiz gij goekmboq cauh’ok sevei caizfouq de ndaej cungfaen nyoenx okdaeuj，hawj fazcanj cingzgoj ndaej engq lai engq goengbingz bae hawj daengxcungq yinzminz souh’ik.
Ginghci dijci gaijgwz dwg gij cungdenj cienzmienh gyalaeg gaijgwz， haedsim dwg cawqleix ndei gij gvanhaeh cwngfuj caeuq hawciengz，hawj hawciengz youq swhyenz boiqceiq ndawde miz gietdinghsingq cozyung caeuq engq ndei fazveih gij cozyung cwngfuj，neix dwg aen lijlun gvanhdenj hungnaek ndaw 《Gietdingh》 daezok ndeu. Fazveih ginghci dijci gaijgwz gij cozyung bengrag de，doidoengh swnghcanj gvanhaeh caeuq swnghcanjlig、sangcwngz gencuz caeuq ginghci giekdaej doxhab’wngq，doidoengh ginghci sevei lienzdaemh riengjvaiq cangqheiq fazcanj，aen swhlu mingzbeg doekdingh neix，daejyienh le aen saedceiq ceiq hung guek raeuz ciengzgeiz cawqyouq duenh cogaep seveicujyi neix，hix caeuq aen canloz buenqduenh hungnaek fazcanj lij dwg gij gvanhgen ndaej gaijgez sojmiz vwndiz guek raeuz de doxhab.
Gaijgwz sien ngaih laeng hoj，engq aeu gungroengz hojnanz；gaijgwz dwg aenvih miz vwndiz bik raeuz mbouj ndaej mbouj guh，youh youq mwh mboujduenh gaijgez vwndiz ndaej gyalaeg. 《Gietdingh》 aeu gij vwndiz hungnaek dangqnaj aeu gaenjgip gaijgez de guh yinxlingx，gidij baijbouh gij cujyau yinvu caeuq gij cosih hungnaek cienzmienh gyalaeg gaijgwz：Genhciz caeuq laebndei gihbwnj ginghci cidu，gyavaiq laebndei yienhdaih hawciengz dijhi，gyavaiq cienjbienq cwngfuj ciznwngz， gyalaeg caizsuiq dijci gaijgwz，laebcaez aen dijci gihci singz mbanj fazcanj yizdijva，cauxlaeb yiengh ginghci dijci moq hailangh de，gyagiengz seveicujyi minzcuj cwngci cidu gensez，doicaenh fapceih Cungguek gensez，giengzvaq aen dijhi ndaej hanhhaed caeuq gamduk gienzlig yinhhengz de，doicaenh vwnzva dijci gihci cauhmoq，doicaenh sevei saehnieb gaijgwz cauhmoq，cauhmoq sevei ceihleix dijci，gyavaiq swnghdai vwnzmingz cidu gensez，gyalaeg gozfangz caeuq ginhdui gaijgwz. Giendingh gij saenqsim gaijgwz，yungh gij cwngci damjliengh caeuq dungxcaiz engq lai de， gij cosih caeuq banhfap engq miz rengz de bae doicaenh gaijgwz， raeuz couh itdingh ndaej daengz mwh 2020 nienz youq aen lingjyiz youqgaenj caeuq aen vanzcez gvanhgen gaijgwz fuengmienh aeu ndaej gij cingzgoj miz gietdingh yiyi de. Ndaej naeuz，ngoenz guhbaenz gij muzbyauh aen 《Gietdingh》 Cibbet Gaiq Sam Cung Cienzhoih de，hix couh dwg seiz ndaej cienzmienh hwnqbaenz siujgangh sevei. Daengz seizhaenx，yienghsiengq Cungguek itdingh miz gij bienqvaq moq dwg lizsijsing de，gij gingjsaek baihnaj aen saehnieb yiengh seveicujyi miz Cungguek daegsaek de itdingh engqgya gvangqlangh.
Gaijgwz hailangh dwg gij gwzming hungmbwk moq aen dangj raeuz youq laj seizdaih diuzgen moq daiqlingx daengx guek gak cuz yinzminz bae guh haenx， dwg dangdaih Cungguek gij daegsaek ceiq sienmingz de. Fazcanj yiengh seveicujyi miz Cungguek daegsaek dwg hangh lizsij yinvu ciengzgeiz youh dwgrengz ndeu. Gvancez gij cingsaenz Cibbet Gaiq Sam Cung Cienzhoih dangj raeuz，cienzmienh gyalaeg gaijgwz hailangh，couh dwg raeuz youq ndaw cincwngz fazcanj yiengh seveicujyi miz Cungguek daegsaek，guh ciengz doucwngh hungmbwk miz lizsij daegdiemj moq ndeu. “Cingq aenvih hojnanz，cij yawj ok de mbeilaux maenh’ak；cingq aenvih ciensim bae saedhengz，cij engqgya cigndaej in’gyaez yawjnaek.” Raeuz aeu gaenjmaed doxgiet youq seiqhenz aen dangj cunghyangh aeu Siz Ginbingz dungzci guh cungjsuhgi neix，laemxsim guh baenaj，gungroengz hojnanz，raiz ok bien lizsij moq aen saehnieb hungmbwk gaijgwz hailangh，vih cienzmienh hwnqbaenz siujgangh sevei、mboujduenh duedaeu yiengh seveicujyi miz Cungguek daegsaek caiq ndaej hingz、saedyienh aen loqsiengj Cungguek Cunghvaz minzcuz fukhwng hungmbwk bae buekguh！
（2013 nienz 11 nyied 13 hauh 《Yinzminz Yizbau》）
