CUNGGUEK GUNGCANJDANGJ CANGHCWNGZ
(Cungguek Gungcanjdangj Daih Cibbet Baez Daengx Guek Daibyauj Daihhoih bouhfaenh coihgaij, 2012 nienz 11 nyied 14 hauh doenggvaq)
Cungjgangh
Cungguek Gungcanjdangj dwg aen senhfunghdui Cungguek gunghyinz gaihgiz, doengzseiz dwg aen senhfunghdui Cungguek yinzminz caeuq Cunghvaz Minzcuz, dwg aen lingjdauj haedsim yiengh seveicujyi saehnieb miz daegsaek Cungguek, daibyauj gij fazcanj iugouz Cungguek senhcin swnghcanjliz, daibyauj aen fueng’yiengq baenaj Cungguek senhcin vwnzva, daibyauj gij gaenbonj leih’ik Cungguek ceiq guengjdaih yinzminz. Aen lijsiengj ceiq sang caeuq aen muzbyauh ceiq sat aen dangj dwg saedyienh gungcanjcujyi.
Cungguek Gungcanjdangj aeu Majgwzswh-Lezningzcujyi、Mauz Cwzdungh Swhsiengj、 Dwng Siujbingz Lijlun、“Sam Aen Daibyauj” Cung’yau Swhsiengj caeuq Gohyoz Fazcanjgvanh dangguh aen hengzdoengh ceijnamz bonjfaenh.
Majgwzswh-Lezningzcujyi dawz vunzloih sevei lizsij fazcanj gvilwd buqcek hawj vunz rox, gij gihbwnj yienzleix de it di mbouj loek, diuz mingh de vuengh dangqmaz. Gungcanjcujyi aen lijsiengj ceiq sang、 gyoengq vunz Cungguek Gungcanjdangj itsim bae gyaepgouz neix, cijmiz daengz mwh seveicujyi sevei cibcuk fazcanj caeuq gig fatdad haenx cijndaej saedyienh. Fazcanj caeuq laeb caezcienz seveicujyi cidu dwg aen lizsij gocwngz ciengzgeiz ndeu. Genhciz gij gihbwnj yienzleix Majgwzswh-Lezningzcujyi, byaij diuz roen hab gij guekcingz Cungguek、 gyoengq yinzminz Cungguek gagnyienh genjdingh haenx, gij seveicujyi saehnieb Cungguek couh bietdingh yaek ceiq sat ndaej hingz.
Gyoengq vunz Cungguek Gungcanjdangj aeu Mauz Cwzdungh dungzci guh cujyau daibyauj haenx, dawz gij gihbwnj yienzleix Majgwzswh-Lezningzcujyi caeuq Cungguek gwzming gij gidij sizcen de giethab hwnjdaeuj, cauhlaeb le Mauz Cwzdungh Swhsiengj. Mauz Cwzdungh Swhsiengj dwg gij Majgwzswh-Lezningzcujyi youq Cungguek yinhyungh caeuq fazcanj haenx, dwg Cungguek gwzming caeuq gensez gij lijlun yenzcwz caeuq gingniemh cungjgez cingqdeng caemhcaiq gaenq youz sizcen cwngmingz gvaq haenx, dwg youz gij dungxcaiz caeuq coengmingz daengx aen Cungguek Gungcanjdangj comzgiet cij baenz. Baengh Mauz Cwzdungh Swhsiengj daeuj ceijyinx, Cungguek Gungcanjdangj lingjdauj daengx guek gak cuz yinzminz, ginggvaq ciengzgeiz gwzming doucwngh, bae fanjdui digozcujyi、funghgencujyi、gvanhliuz swhbwnjcujyi, cij guh sinhminzcujcujyi gwzming ndaej hingz, laebbaenz le aen Cunghvaz Yinzminz Gunghozgoz hengz yinzminz minzcuj conhcwng haenx; laeb guek gvaqlaeng, swnhleih guh le seveicujyi gaijcauh, daj sinhminzcujcujyi cugbouh raih daengz seveicujyi, laebdingh le gij gihbwnj cidu seveicujyi, fazcanj le gij ginghci、 cwngci caeuq vwnzva seveicujyi.
Cib’it gaiq sam cung cienzhoih doxdaeuj, gyoengq vunz Cungguek Gungcanjdangj aeu Dwng Siujbingz dungzci guh cujyau daibyauj haenx, dawz laeb guek doxdaeuj cingq byonj song fuengmienh gingniemh cungjgez dohcaez, gaijfang swhsiengj, daj ndaw saedsaeh gouz aeu caenleix, senj daengx dangj gunghcoz cungsim haeuj ginghci gensez bae, saedhengz gaijgwz hailangh, daz seveicujyi saehnieb fazcanj daengz aen seizgeiz moq, cugbouh cauxbaenz le gij lohsienq、 fuengcim、 cwngcwz bae gensez yiengh seveicujyi miz daegsaek Cungguek, gangjmingz le doengh gij gihbwnj vwndiz gvendaengz baenzlawz youq Cungguek gensez seveicujyi、 gyamaenh caeuq fazcanj seveicujyi, cauhlaeb le Dwng Siujbingz Lijlun. Dwng Siujbingz Lijlun dwg monz dauhleix youz gij gihbwnj yienzleix Majgwzswh-Lezningzcujyi doengz gij sizcen dangdaih Cungguek caeuq seizdaih daegcwng dox giethab haenx, dwg youq laj lizsij diuzgienh moq ciepswnj caeuq fazcanj le Mauz Cwzdungh Swhsiengj, dwg Majgwzswhcujyi youq Cungguek fazcanj daengz duenhmbaek moq, dwg gij Majgwzswhcujyi dangdaih Cungguek, dwg youz gij dungxcaiz caeuq coengmingz daengx aen Cungguek Gungcanjdangj comzgiet cij baenz, de dazyinx aen seveicujyi yendaiva saehnieb guek raeuz mboujduenh baenaj.
Cibsam gaiq seiq cung cienzhoih doxdaeuj, gyoengq vunz Cungguek Gungcanjdangj aeu Gyangh Cwzminz dungzci guh cujyau daibyauj haenx, youq ndaw gij sizcen hwnqguh yiengh seveicujyi miz daegsaek Cungguek, doiq gijmaz dwg seveicujyi、 baenzlawz bae gensez seveicujyi caeuq aeu gensez aen dangj yienghlawz、baenzlawz bae gensez aen dangj doengh gij vwndiz neix rox ndaej engqgya laegdaeuq, vih ceihleix aen dangj caeuq ceihleix guekgya caiq lai cwkrom le gingniemh dijbauj, cauxbaenz le “Sam Aen Daibyauj” Cung’yau Swhsiengj. “Sam Aen Daibyauj” Cung’yau Swhsiengj ciepswnj caeuq fazcanj le Majgwzswh-Lezningzcujyi、 Mauz Cwzdungh Swhsiengj、 Dwng Siujbingz Lijlun, fanjyingj ok dangdaih seiqgyaiq caeuq Cungguek fazcanj bienqvaq doiq dangj caeuq guekgya gunghcoz gij iugouz moq de, dwg aen lijlun vujgi giengzdaih ndaej yungh bae gyagiengz caeuq gaijndei aen dangj gensez、 doicaenh guek raeuz seveicujyi gag gaijndei caeuq fazcanj haenx, dwg youz gij dungxcaiz caeuq coengmingz daengx aen Cungguek Gungcanjdangj comzgiet cij baenz, dwg aen cijdauj swhsiengj dangj raeuz bietdingh aeu ciengzgeiz genhciz haenx. Seizseiz cungj guh daengz “Sam Aen Daibyauj”, dwg aen goekgaen laeb dangj、 aen giekdaej gaemgienz、 congh goengrengz okmboq aen dangj raeuz.
Cibroek daih doxdaeuj, gyoengq vunz Cungguek Gungcanjdangj aeu Huz Ginjdauh dungzci guh cujyau daibyauj haenx, genhciz aeu Dwng Siujbingz Lijlun caeuq “Sam Aen Daibyauj” Cung’yau Swhsiengj guh cijdauj, gaengawq gij fazcanj iugouz moq, laegdaeuq roxdaengz caeuq hoizdap le doengh gij vwndiz hungnaek youq laj hingzseiq moq saedyienh yiengh fazcanj lawz、baenzlawz bae fazcanj, cauxbaenz le aen Gohyoz Fazcanjgvanh aeu vunz guh goek、 cienzmienh doxdaengh ndaej lienzdaemh fazcanj haenx. Gohyoz Fazcanjgvanh, dwg aen gohyoz lijlun doengz Majgwzswh-Lezningzcujyi、 Mauz Cwzdungh Swhsiengj、 Dwng Siujbingz Lijlun、 “Sam Aen Daibyauj” Cung’yau Swhsiengj gawq dox ciepswnj youh caeuq seizdaih caez baenaj haenx, dwg gyonjcomz daejyienh gij sigai’gvanh caeuq fanghfazlun Majgwzswhcujyi gvendaengz fazcanj de, dwg Majgwzswhcujyi caeuq Cungguek saedsaeh giethab gij cwngzgoj ceiq moq de, dwg youz gij dungxcaiz caeuq coengmingz daengx aen Cungguek Gungcanjdangj comzgiet cij baenz, dwg aen cijdauj swhsiengj youq mwh fazcanj yiengh seveicujyi miz daegsaek Cungguek bietdingh aeu genhciz caeuq gvancez haenx.
Gaijgwz hailangh doxdaeuj raeuz ndaej miz cingzcik caeuq cinbu laidaih baenzneix, diuz yienzaen goekgaen de gvigyonj hwnjdaeuj couh dwg: Haiok le diuz roen seveicujyi miz daegsaek Cungguek, cauxbaenz le aen seveicujyi lijlun dijhi miz daegsaek Cungguek, dinghlaeb le aen seveicujyi cidu miz daegsaek Cungguek. Diuz roen neix、 aen lijlun dijhi neix、 aen cidu neix, dwg aen dangj raeuz ginggvaq haujlai gannanz haemzhoj cij ndaej cauhlaeb, daengx dangj dungzci aeu engqgya insik、 ciengzgeiz genhciz caeuq mboujduenh bae fazcanj de, yaengxsang fan geiz hungmbwk yiengh seveicujyi miz daegsaek Cungguek, vih saedyienh doicaenh yendaiva gensez、 guhbaenz guekcoj doengjit、 henhoh seiqgyaiq huzbingz caeuq coicaenh doengzcaez fazcanj sam hangh lizsij yinvu hungnaek neix bae haenqrengz buek guh.
Guek raeuz cingqcaih cawqyouq caemhcaiq yaek ciengzgeiz cawqyouq aen duenhmbaek codaeuz seveicujyi. Youq aen Cungguek ginghci vwnzva doeklaeng baenzneix bae gensez seveicujyi yendaiva, aen duenhmbaek codaeuz neix dwg aen lizsij duenhmbaek mbouj ndaej ndangq gvaqbae ndeu, aeu miz baenz bak bi seizgan. Gij seveicujyi gensez guek raeuz, bietdingh aeu daj gij guekcingz guek raeuz guh hwnj, byaij diuz roen seveicujyi miz daegsaek Cungguek. Youq aen duenhmbaek yienhseiz, gij cujyau mauzdun ndawbiengz guek raeuz, dwg yinzminz doiq vuzciz vwnzva sihyau ngoenz beij ngoenz lai, hoeng ndawbiengz swnghcanj cix lij doeklaeng, muenxcuk mbouj ndaej cungj sihyau neix. Aenvih miz gij yinhsu ndaw guek caeuq gwnz seiqgyaiq daeuj yingjyangj, gaihgiz doucwngh lij youq ndaw itdingh fanveiz ciengzgeiz mizyouq, youq baihlaj moux cungj diuzgienh lij aiq bienq haenqrem bae, danhseih gaenq mbouj dwg cujyau mauzdun. Gij seveicujyi gensez guek raeuz, aen yinvu goekgaen de, dwg caenh’itbouh gaijfang swnghcanjliz, fazcanj swnghcanjliz, cugbouh saedyienh seveicujyi yendaiva, caemhcaiq vih neix bae gaijgwz swnghcanj gvanhaeh caeuq sangcwngz gencuz ndawde doengh fuengmienh dem doengh giz caeuq swnghcanjliz fazcanj mbouj dox hab’wngq haenx. Bietdingh aeu genhciz caeuq laeb caezcienz gij gihbwnj ginghci cidu aeu gunghyoujci guh cawjdaej、 lai cungj sojyoujci ginghci doengzcaez fazcanj, genhciz caeuq laeb caezcienz gij faenboiq cidu aeu ciuq lauzdung faenboiq guh cawjdaej、 lai cungj faenboiq fuengsik caemhyouq, gujli it bouhfaenh digih caeuq it bouhfaenh vunz sien fouq hwnjdaeuj, cugbouh siumied gungzhoj, guh daengz doengzcaez fouqmiz, aeu swnghcanj fazcanj caeuq ndawbiengz caizfouq dem lai guh giek, bae mboujduenh muenxcuk yinzminz gij vuzciz vwnzva sihyau ngoenz beij ngoenz lai haenx, coicaenh bouxvunz cienzmienh fazcanj. Fazcanj dwg aen dangj raeuz youq gaemgienz hwng guek ndawde hangh yinvu youqgaenj daih’it haenx. Gak hangh gunghcoz cungj aeu dawz doiq fazcanj gij swnghcanjliz seveicujyi sevei mizik, doiq gyagiengz gij cunghab gueklig seveicujyi guekgya mizik, doiq daezsang gij swnghhoz suijbingz gyoengq yinzminz mizik, dangguh aen gunghcoz muzdiz caeuq cazniemh byauhcunj goekdaeuz, gingqcungh lauzdung、 gingqcungh cihsiz、 gingqcungh vunzcaiz、 gingqcungh dajcauh, guh daengz vih yinzminz bae fazcanj、 baengh yinzminz bae fazcanj、 hawj yinzminz doengzcaez yiengjsouh gij cwngzgoj fazcanj. Yamq haeuj sigij moq, guek raeuz haeuj daengz aen fazcanj duenhmbaek moq cienzmienh gensez siujgangh sevei、 gyavaiq doicaenh seveicujyi yendaiva. Bietdingh aeu ciuq aen doengbuenz baijbouh yiengh seveicujyi saehnieb miz daegsaek Cungguek, cienzmienh doicaenh ginghci gensez、 cwngci gensez、 vwnzva gensez、 ndawbiengz gensez、swnghdai vwnzmingz gensez. Youq sigij moq caeuq duenhmbaek moq, ginghci caeuq sevei fazcanj canloz muzbyauh dwg, gyamaenh caeuq fazcanj aen siujgangh suijbingz gaenq cobouh ndaej daengz, daengz mwh laeb dangj 100 hopbi, hwnqbaenz aen siujgangh sevei suijbingz engq sang, hawj cibgeij ik vunz cungj ndaej doengzcaez souh’ik; daengz mwh laeb guek 100 hopbi, moix vunz bingzyaenz ndaw guek swnghcanj cungjciz ndaej daengz gij suijbingz doengh aen guekgya cungdaengj fatdad haenx, daihdaej saedyienh yendaiva.
Cungguek Gungcanjdangj youq aen duenhmbaek codaeuz seveicujyi diuz gihbwnj lohsienq de dwg: Lingjdauj caeuq comzgiet daengx guek gak cuz yinzminz, aeu ginghci gensez guh cungsim, genhciz seiq hangh gihbwnj yenzcwz, genhciz gaijgwz hailangh, baengh rengz bonjfaenh, ganhoj cauhnieb, vih dawz guek raeuz gensez baenz aen seveicujyi yendaiva guekgya fouqgiengz、 minzcuj、 vwnzmingz、 huzciz ndeu bae haenqrengz buek guh.
Cungguek Gungcanjdangj youq ndaw lingjdauj seveicujyi saehnieb, bietdingh aeu genhciz dawz ginghci gensez dangguh cungsim, gizyawz gak hangh gunghcoz cungj aeu fugcoengz aen cungsim neix, vih aen cungsim neix fuzvu. Aeu dawz ndaet seizgei, gyavaiq fazcanj, saedhengz aen canloz baengh gohgi gyauyuz hwng guek、 aen canloz baengh vunzcaiz giengz guek caeuq aen canloz ndaej lienzdaemh fazcanj, cungfaen fazveih gohyoz gisuz gij cozyung dangguh daih’it swnghcanjliz de, baenghgauq gohgi cinbu, daezsang gij suciz bouxguhhong, hawj gozminz ginghci fazcanj ndaej youh ndei youh vaiq bae.
Genhciz diuz roen seveicujyi、genhciz yinzminz minzcuj conhcwng、genhciz Cungguek Gungcanjdangj lingjdauj、genhciz Majgwzswh-Lezningzcujyi Mauz Cwzdungh Swhsiengj seiq hangh gihbwnj yenzcwz neix, dwg aen goekgaen laeb guek raeuz. Youq ndaw seveicujyi yendaiva gensez daengx aen gocwngz, bietdingh aeu genhciz seiq hangh gihbwnj yenzcwz, fanjdui swhcanj gaihgiz swyouzva.
Genhciz gaijgwz hailangh, dwg diuz roen ndaej hawj guek raeuz giengzak. Cijmiz gaijgwz hailangh, cijndaej fazcanj Cungguek、 fazcanj seveicujyi、 fazcanj Majgwzswhcujyi. Aeu daj goekgaen bae gaijgwz doengh gij ginghci dijci cughaed swnghcanjliz fazcanj haenx, genhciz caeuq laeb caezcienz seveicujyi hawciengz ginghci dijci; caeuq neix dox hab’wngq, aeu guh cwngci dijci gaijgwz caeuq gizyawz lingjyiz gaijgwz. Aeu genhciz diuz gihbwnj gozcwz doiq rog hailangh, gaepsou caeuq hag’aeu sojmiz gij vwnzmingz cwngzgoj youz vunzloih sevei cauh okdaeuj haenx. Gaijgwz hailangh wngdang daihdamj damqra, gamj bae haifwz, sawj gaijgwz gezcwz guh ndaej engq hab gohyoz、 sawj gaijgwz cosih boiqhab ndaej engqgya doxngamj, youq ndaw sizcen cauh ok roenmoq.
Cungguek Gungcanjdangj lingjdauj yinzminz fazcanj yiengh hawciengz ginghci seveicujyi. Gyamaenh caeuq fazcanj gunghyoujci ginghci it di mbouj doenghngauz, gujli、 cihciz、 dazyinx feih gunghyoujci ginghci fazcanj it di mbouj doenghngauz. Youq ndaw swhyenz boiqbaij fazveih gij cozyung dajdaej aen hawciengz, laeb aen hungzgvanh diuzgung dijhi caezcienz. Doengbuenz suenqveh hawsingz lajmbanj fazcanj、 gihyiz fazcanj、 ginghci sevei fazcanj、 bouxvunz caeuq swhyienz huzciz fazcanj、 ndaw guek fazcanj caeuq doiq rog hailangh, diuzcingj ginghci gezgou, cienjbienq ginghci fazcanj fuengsik. Coicaenh gunghyezva、 sinsizva、 cwngzcinva、 nungzyez yendaiva doengzcaez fazcanj, gensez gij lajmbanj moq seveicujyi, byaij diuz roen gunghyezva yienghmoq miz daegsaek Cungguek, hwnqguh yiengh guekgya ak cauhmoq.
Cungguek Gungcanjdangj lingjdauj yinzminz fazcanj yiengh minzcuj cwngci seveicujyi. Genhciz dawz aen dangj lingjdauj、 yinzminz danggya guhcawj、 ciuq faplwd ceihleix guekgya sam yiengh neix gaenjmaed doxgyoeb youq itheij, byaij diuz roen fazcanj yiengh seveicujyi cwngci miz daegsaek Cungguek, gyadaih seveicujyi minzcuj, laeb caezcienz seveicujyi fazci, hwnqguh seveicujyi fazci guekgya, gyamaenh yinzminz minzcuj conhcwng, hwnqguh seveicujyi cwngci vwnzmingz. Genhciz caeuq laeb caezcienz aen cidu yinzminz daibyauj daihhoih、 aen cidu lai dangj doxgap caeuq cwngci hezsangh youz Cungguek Gungcanjdangj lingjdauj haenx、 aen cidu siujsoq minzcuz deihfueng gag guenj caeuq aen cidu gihcwngz cungqvunz gag guenj. Fazcanj yiengh yinzminz minzcuj engqgya gvangqlangh、 engqgya cungfaen、 engqgya caezcienz haenx, saedcaih baujcang gij gienzleih yinzminz, hawj gyoengqde ndaej caencingq guenjleix gij hongsaeh guekgya caeuq gij hongsaeh ndawbiengz、 guenjleix gij saehnieb ginghci caeuq vwnzva. Gingqcungh caeuq baujcang gij gienzleih bonjndang bouxvunz. Lai cauh diuzgienh hawj vunz gangj vah, laeb hwnj caeuq laeb caezcienz gij cidu caeuq bouhloh minzcuj senjgij、 minzcuj gezcwz、 minzcuj guenjleix、 minzcuj gamduk. Laeb caez aen seveicujyi faplwd dijhi miz daegsaek Cungguek, gyagiengz gij hong saedhengz faplwd, sawj guekgya gak hangh gunghcoz cugbouh byaij hwnj diuz roen yienghyiengh cungj hengz faplwd cidu bae.
Cungguek Gungcanjdangj lingjdauj yinzminz fazcanj yiengh senhcin vwnzva seveicujyi. Hwnqguh seveicujyi cingsaenz vwnzmingz, saedhengz ciuq faplwd ceihleix guekgya caeuq doenggvaq daudwz ceihleix guekgya dox giethab, daezsang gij swhsiengj daudwz suciz caeuq gohyoz vwnzva suciz daengx aen minzcuz, vih gaijgwz hailangh caeuq seveicujyi yendaiva gensez daezhawj gij swhsiengj baujcwng、 cingsaenz doenghlig caeuq ciliz cihciz giengzdaih, hwnqguh seveicujyi vwnzva giengzguek. Gyagiengz seveicujyi haedsim gyaciz dijhi gensez, genhciz gij cijdauj swhsiengj Majgwzswhcujyi, laeb hwnj aen lijsiengj caezcaemh guh yiengh seveicujyi miz daegsaek Cungguek, fazyangz gij minzcuz cingsaenz aeu aigozcujyi guh haedsim caeuq gij seizdaih cingsaenz aeu gaijgwz cauhmoq guh haedsim haenx, daiqdaeuz dizcang seveicujyi yungzyuzgvanh, hawj daengx aen minzcuz engq miz gij cingsaenz gag gingqcungh、 gag siengsaenq caeuq gag maenh’ak, dingjdangj gij swhsiengj nduknaeuh swhbwnjcujyi caeuq funghgencujyi iemqmyaex, baetcawz ndawbiengz gak cungj yienhsiengq coujcaq yakrwix, roengzrengz sawj gyoengq yinzminz guek raeuz bienqbaenz gyoengq yinzminz miz lijsiengj、 miz daudwz、 miz vwnzva、 miz gijliz haenx. Doiq dangjyenz lij aeu yungh gij lijsiengj hunggyae gungcanjcujyi bae guh gyauyuz dem. Daihlig fazcanj gyauyuz、 gohyoz、 vwnzva saehnieb, sawj gij vwnzva conzdungj ndei aen minzcuz raeuz ndaej daih fazyangz, sawj gij seveicujyi vwnzva raeuz ndaej mwnhoengh caeuq fazcanj.
Cungguek Gungcanjdangj lingjdauj yinzminz cauhlaeb aen biengz huzciz seveicujyi. Ciuq minzcuj fazci、 goengbingz cingqngeih、 lauxsaed soujsaenq、 doxndiep doxndei、 gig miz rengzhoengh、 andingh mbouj luenh、 bouxvunz caeuq swhyienz huzciz caemhyouq aen cienzmienh iugouz neix caeuq diuz yenzcwz doengzcaez hwnqguh、 doengzcaez miz faenh yiengjsouh, aeu baujcang caeuq gaijndei beksingq swnghhoz guh cungdenj, gaijgez ndei doengh gij leih’ik vwndiz gyoengq beksingq ceiq gvansim、 ceiq cigciep、 ceiq yienhsaed haenx, sawj fazcanj cwngzgoj ndaej engq lai engq goengbingz dwk hawj daengxcungq yinzminz souh’ik, roengzrengz cauhbaenz aen gizmen daengxcungq yinzminz gak boux gag caenh gij naengzlig bonjfaenh、 gak boux gag ndaej gij ndeicawq bonjfaenh youh ndaej huzciz caemhyouq haenx. Gyagiengz caeuq cauhmoq ndawbiengz guenjleix. Yiemzgek gibied caeuq cwnggoz cawqceq gij mauzdun vunzdig caeuq gyoengqraeuz dem gij mauzdun baihndaw yinzminz song loih mauzdun singqcaet mbouj doxdoengz neix. Gyagiengz ndawbiengz cianh cunghab ceihleix, ciuq faplwd genhgez dwkceih gak cungj hozdung famhcoih caeuq gij vunz famhcoih sienghaih guekgya ancienz caeuq leih’ik、 sienghaih ndawbiengz onjdingh caeuq ginghci fazcanj haenx, baujciz ndawbiengz ciengzgeiz onjdingh.
Cungguek Gungcanjdangj lingjdauj yinzminz hwnqguh seveicujyi swnghdai vwnzmingz. Laebhwnj yiengh swnghdai vwnzmingz leixniemh gingqcungh swhyienz、 swnh’wngq swhyienz、 baujhoh swhyienz, genhciz diuz gihbwnj gozcwz mbaetyungh swhyenz caeuq baujhoh vanzging, genhciz diuz fuengcim sien aeu mbaetyungh、 sien aeu baujhoh、 gag ndaej hoizfuk guhcawj, genhciz diuz roen vwnzmingz fazcanj swnghcanj fazcanj、 swnghhoz fouqmiz、 swnghdai ndei haenx. Roengzrengz hwnqguh aen biengz mbaetyungh swhyenz、 vanzging huzndei, cauxbaenz yiengh hoengqgan baijnda、 canjnieb gezgou、 swnghcanj fuengsik、 swnghhoz fuengsik mbaetyungh swhyenz caeuq baujhoh vanzging, vih yinzminz cauh ok aen vanzging ndei guh swnghcanj caeuq gvaq saedceij, hawj Cunghvaz Minzcuz ndaej ciengzlwenx lienzdaemh fazcanj.
Cungguek Gungcanjdangj genhciz doiq yinzminz gaijfangginh caeuq gizyawz yinzminz vujcangh ligliengh guh lingjdauj, gyagiengz gensez yinzminz gaijfangginh, saedcaih baujcwng yinzminz gaijfangginh hengz gij bingdoih lizsij sawjmingh sigij moq caeuq duenhmbaek moq, hawj yinzminz gaijfangginh youq ndaw gyamaenh gozfangz、 hendawz guekcoj caeuq camgya seveicujyi yendaiva gensez, ndaej cukgaeuq fazveih gij cozyung de.
Cungguek Gungcanjdangj henhoh caeuq fazcanj yiengh seveicujyi minzcuz gvanhaeh bingzdaengj doxgiet doxbang huzciz haenx, cizgiz gungganq、 genjleh、 daezswng gyoengq ganbu siujsoq minzcuz, bang gyoengq siujsoq minzcuz caeuq minzcuz digih fazcanj ginghci、 vwnzva caeuq ndawbiengz saehnieb, saedyienh gak minzcuz doengzcaez doxgiet haenqrengz buek guh、 doengzcaez fazcanj mwnhoengh. Cienzmienh gvancez diuz cunghgyau gunghcoz gihbwnj fuengcim aen dangj, comzgiet gyoengq ginzcung saenqgyauq haenx, vih ginghci sevei fazcanj guh gung’yen.
Cungguek Gungcanjdangj caeuq daengx guek gak minzcuz gunghyinz、 nungzminz、 cihsiz fwnswj doxgiet youq itheij, caeuq gak minzcuj dangjbai、 fouz dangjbai yinzsw、 gak minzcuz gij ligliengh gyaezguek de doxgiet youq itheij, caenh’itbouh fazcanj caeuq gyahung aen gyaezguek doengjit cansen ceiq gvangqlangh、 youz daengxcungq bouxguhhong seveicujyi、 bouxhwnqguh gij saehnieb seveicujyi、 bouxgyaezguek yungjhu seveicujyi、 bouxgyaezguek yungjhu guekcoj doengjit de gapbaenz haenx. Hawj daengx guek yinzminz baudaengz gyoengq beixnuengx Yanghgangj Daegbied Hingzcwnggih、 gyoengq beixnuengx Aumwnz Daegbied Hingzcwnggih、 gyoengq beixnuengx Daizvanh caeuq gyoengq beixnuengx Vazgyauz rog guek mboujduenh gyagiengz doxgiet. Ciuq diuz fuengcim “aen guekgya ndeu、 song cungj cidu”, coicaenh Yanghgangj、 Aumwnz ciengzgeiz mwnhoengh onjdingh, guhbaenz aen daih saehnieb guekcoj doengjit.
Cungguek Gungcanjdangj genhciz gij huzbingz vaigyauh cwngcwz doglaeb gag guhcawj, genhciz diuz roen huzbingz fazcanj, genhciz aen hailangh canloz doxik caez hingz, doengbuenz suenqveh ndaw guek rog guek song buenz geiz hung, cizgiz fazcanj doiq rog gvanhaeh, roengzrengz vih gij gaijgwz hailangh caeuq yendaiva gensez guek raeuz ceng’aeu aen gozci vanzging ndei ndeu. Youq ndaw gij hongsaeh guek caeuq guek, henhoh gij doglaeb caeuq cawjgienz guek raeuz, fanjdui bagenzcujyi caeuq giengzgienz cwngci, henhoh seiqgyaiq huzbingz, coicaenh vunzloih cinbu, roengzrengz doidoengh gensez aen seiqgyaiq huzciz doengzcaez mwnhoengh、 huzbingz naihnanz haenx. Aeu dox gingqcungh cawjgienz caeuq diegguek caezcingj、 mbouj dox ciemqfamh、 mbouj dox ganhsez neicwng、 bingzdaengj doxik、 huzbingz caemhyouq haj hangh yenzcwz guh giek, fazcanj guek raeuz caeuq seiqgyaiq gak guek gij gvanhaeh de. Mboujduenh caeuq doengh aen gueknden seiqhenz raeuz fazcanj gij gvanhaeh doxhuz doxndei, gyagiengz caeuq gij guekgya cingqcaih fazcanj haenx doxgiet hozcoz. Ciuq aen yenzcwz doglaeb gag guhcawj、 vanzcienz bingzdaengj、 dox gingqcungh、 mbouj dox ganhsez gij hongsaeh baihndaw doiqfueng, bae fazcanj aen dangj raeuz caeuq gak guek gungcanjdangj dem gizyawz cwngdangj gij gvanhaeh de.
Cungguek Gungcanjdangj yaek lingjdauj daengx guek gak cuz yinzminz saedyienh aen muzbyauh hungmbwk seveicujyi yendaiva, bietdingh aeu gaenjmaed hopheux diuz gihbwnj lohsienq aen dangj, dawz aen dangj hwnqguh ndaej engq ak gaemgienz、 engq senhcin caeuq engq seuqcingh bae, yungh gij cingsaenz gaijgwz cauhmoq bae cienzmienh doicaenh aen gunghcwngz hungmbwk moq aen dangj gensez, doengbuenz doicaenh aen dangj swhsiengj gensez、 cujciz gensez、 cozfungh gensez、 fanj nduknaeuh dizcang lenzgez gensez、 cidu gensez, cienzmienh daezsang gij gohyozva suijbingz aen dangj gensez. Genhciz laeb dangj vih goenggya、 gaemgienz vih beksingq, genhciz dangj aeu guenj dangj、 coengzyiemz guenj dangj, fazyangz gij conzdungj ndei caeuq cozfungh ndei aen dangj, sawj aen dangj mboujduenh lai ak lingjdauj caeuq lai ak gaemgienz, mboujduenh lai ak dingj nduk fuengz bienq caeuq dingjdangj fung’yiemj, mboujduenh gyamaenh gaihgiz giekdaej caeuq gyadaih ginzcung giekdaej, mboujduenh lai ak dajcauh、 lai ak comzgiet、 lai ak hoenxciengq, hwnqguh aen Majgwzswhcujyi cwngdangj rox hagsib、 guh fuzvu、 ak cauhmoq, sawj aen dangj raeuz itcig cungj byaij youq dangqnaj aen seizdaih, baenz aen giengiengz haedsim ndaej lingjdauj daengx guek yinzminz riengz diuz roen seveicujyi miz daegsaek Cungguek mboujduenh baenaj. Aen dangj gensez bietdingh aeu genhgez saedyienh seiq hangh gihbwnj iugouz lajneix:Daih’it, genhciz diuz gihbwnj lohsienq aen dangj. Daengx dangj aeu yungh Dwng Siujbingz Lijlun、“Sam Aen Daibyauj” Cung’yau Swhsiengj、Gohyoz Fazcanjgvanh caeuq diuz gihbwnj lohsienq aen dangj bae doengjit swhsiengj, doengjit hengzdoengh, caemhcaiq ciengzgeiz genhciz roengzbae it di mbouj doenghngauz. Bietdingh aeu dawz gaijgwz hailangh caeuq seiq hangh gihbwnj yenzcwz doengjit hwnjdaeuj, cienzmienh lozsiz diuz gihbwnj lohsienq aen dangj, cienzmienh caephengz dangj youq aen duenhmbaek codaeuz seveicujyi diuz gihbwnj ganghlingj de, fanjdui sojmiz gij ginghyang loengloek “coj” caeuq you, aeu daezfuengz you, hoeng ceiq youqgaenj dwg aeu daezfuengz “coj”. Gyagiengz hwnqguh gak gaep lingjdauj banhswj, genjleh daezswng sawjyungh gij ganbu youq gaijgwz hailangh caeuq seveicujyi yendaiva gensez ndawde cingzcik raen yienh、 cungqvunz saenq ndaej gvaq haenx, gungganq caeuq lienhbaenz cien bak fanh bouxciepban aen saehnieb seveicujyi, daj cujciz fuengmienh bae baujcwng gij gihbwnj lijlun、 gihbwnj lohsienq、 gihbwnj ganghlingj、 gihbwnj gingniemh aen dangj ndaej gvancez lozsiz.
Daihngeih, genhciz gaijfang swhsiengj, daj ndaw saedsaeh gouz aeu caenleix, caeuq seizdaih caez baenaj, gouz caen guh saed. Diuz swhsiengj lohsienq aen dangj dwg yienghyiengh cungj daj saedsaeh guh hwnj, lijlun lienzhaeh saedsaeh, daj ndaw saedsaeh gouz aeu caenleix, youq ndaw sizcen cazniemh caenleix caeuq fazcanj caenleix. Daengx dangj bietdingh aeu genhciz diuz swhsiengj lohsienq neix, gaenx bae damqra, daihdamj sawqniemh, haifwz cauhmoq, lai ra banhfap moq bae guh gunghcoz, mboujduenh yenzgiu cingzgvang moq, cungjgez gingniemh moq, gaijgez vwndiz moq, youq ndaw sizcen fungfouq caeuq fazcanj Majgwzswhcujyi, roengzrengz sawj Majgwzswhcujyi daiq miz gij daegsaek Cungguek.Daihsam, genhciz cienzsim cienzeiq vih yinzminz fuzvu. Dangj gaenjcij miz gij leih’ik gyoengq gunghyinz gaihgiz caeuq gyoengq beksingq ceiq guengjdaih haenx, cix mbouj miz saek di leih’ik daegbied bonjfaenh. Dangj mboujlwnh youq seizlawz cungj dawz gij leih’ik ginzcung cuengq youq vih daih’it, caeuq ginzcung haemz van caezcaemh, baujciz lienzhaeh ceiq maedcaed, genhciz gienz yungh hawj beksingq、 cingz cungh laeng beksingq、 leih maeuz hawj beksingq, mbouj cinj boux dangjyenz lawz duetliz ginzcung, giengq hwnj gwnz dingjgyaeuj ginzcung bae. Dangj youq ndaw gij gunghcoz bonjfaenh saedhengz ginzcung lohsienq, yienghyiengh cungj vihliux ginzcung, yienghyiengh cungj ingbaengh ginzcung, daj ndaw ginzcung daeuj, daengz ndaw ginzcung bae, hawj ginzcung roxyiuj gij cawjcieng cingqdeng aen dangj caemhcaiq gagrox bae hengzdoengh. Dangj raeuz aen cwngci youhsi ceiq daih de dwg maedcaed lienzhaeh ginzcung, aen dangj gaemgienz gvaqlaeng gij yung’yiemj ceiq daih de dwg duetliz ginzcung. Dangjfungh vwndiz、 dangj caeuq yinzminz ginzcung lienzhaeh vwndiz, dwg gij vwndiz gvanhaeh daengz aen dangj dailix. Dangj genhciz diuz fuengcim byai goek giem ceih、 cunghab ceihleix、 ceihfad caeuq yawhfuengz caez guh、 yawjnaek yawhfuengz, laeb hwnj caeuq laeb caezcienz aen dijhi ceihfad caeuq yawhfuengz nduknaeuh, genhciz mboujduenh fanjdui nduknaeuh, gyagiengz dangjfungh gensez caeuq lenzcwng gensez.
Daihseiq, genhciz minzcuj cizcungh cidu. Minzcuj cizcungh cidu dwg youz gij cizcungh aeu minzcuj guh giekdaej caeuq gij minzcuj aeu cizcungh bae cijdauj haenx dox giethab. De gawq dwg diuz gaenbonj cujciz yenzcwz aen dangj, hix dwg ginzcung lohsienq yungh haeuj gij swnghhoz aen dangj bae. Bietdingh aeu cungfaen fazyangz gij minzcuj ndaw dangj, aeueiq gij cawjdaej diegvih gyoengq dangjyenz, baujcang gij minzcuj gienzleih gyoengq dangjyenz, sawj gak gaep dangj cujciz caeuq guengjdaih dangjyenz lai cizgiz cawjdoengh guh gunghcoz, lai ak cauhmoq. Bietdingh aeu saedhengz gij cizcungh cingqdeng, baujcwng daengx dangj doxgiet doengjit caeuq hengzdoengh doxdoengz, baujcwng gij gietdingh aen dangj gvancez caephengz ndaej riengjvaiq mizyauq. Gyagiengz cujciz gijliz, youq dangqnaj gij gijliz aen dangj bouxboux bingzdaengj. Gyagiengz doiq gij lingjdauj gihgvanh caeuq dangjyenz lingjdauj ganbu daegbied dwg gij cujyau lingjdauj ganbu aen dangj guh gamduk, mboujduenh laeb caezcienz ndaw dangj gamduk cidu. Dangj youq ndaw gij cwngci swnghhoz bonjfaenh cwnggoz bae guh bihbingz caeuq gag bihbingz, youq yenzcwz vwndiz fuengmienh guh swhsiengj doucwngh, genhciz caenleix, coihcingq loengloek. Roengzrengz cauxbaenz yiengh cwngci gizmen sengdoengh hozboz、 youh miz cizcungh youh miz minzcuj、 youh miz gijliz youh miz swyouz、 youh miz doengjit eiqceiq youh miz gak vunz simsoeng haenx.
Aen dangj lingjdauj cujyau dwg cwngci、 swhsiengj caeuq cujciz lingjdauj. Dangj aeu hab ndaej gij iugouz gaijgwz hailangh caeuq seveicujyi yendaiva gensez, genhciz gohyoz gaemgienz、 minzcuj gaemgienz、 ciuq faplwd gaemgienz, gyagiengz caeuq gaijndei aen dangj lingjdauj. Dangj bietdingh aeu ciuq doengjlamx daengxbuenz、 hezdiuz gak fueng aen yenzcwz neix, youq doengz gaep gak cungj cujciz ndawde fazveih gij cozyung guh lingjdauj haedsim de. Dangj bietdingh aeu comz rengz lingjdauj ginghci gensez, cujciz、 hezdiuz gij ligliengh gak fuengmienh, doengzsim gaprengz, hopheux ginghci gensez bae guh gunghcoz, coicaenh ginghci sevei cienzmienh fazcanj. Dangj bietdingh aeu saedhengz minzcuj gohyoz gezcwz, ceiqdingh caeuq caephengz gij lohsienq、 fuengcim、 cwngcwz cingqdeng, guh ndei gij cujciz gunghcoz caeuq senhconz gyauyuz gunghcoz aen dangj, fazveih gij senhfungh mozfan cozyung daengxcungq dangjyenz. Dangj bietdingh aeu youq ndaw gvaengxlaengx fapgoek caeuq faplwd hanhdingh haenx bae hozdung. Dangj bietdingh aeu baujcwng guekgya laebfap、 swhfaz、 hingzcwng gihgvanh, ginghci、 vwnzva cujciz caeuq yinzminz donzdij ndaej cizgiz cawjdoengh、 doglaeb gag fucwz、 hezdiuz itheij bae guh gunghcoz. Dangj bietdingh aeu gyagiengz doiq gunghvei、 gungcanjcujyi cinghnenzdonz、 mehmbwk lenzhozvei daengj ginzcung cujciz guh lingjdauj, cungfaen fazveih gij cozyung gyoengqde. Dangj bietdingh aeu hab ndaej hingzseiq fazcanj caeuq cingzgvang bienqvaq, laeb caezcienz lingjdauj dijci, gaijcaenh lingjdauj fuengsik, gyaak gij naengzlig gaemgienz. Gungcanjdangjyenz bietdingh aeu caeuq gyoengq ginzcung rog dangj caenmaed doxgap guh saeh, doengzcaez vih hwnqguh yiengh seveicujyi miz daegsaek Cungguek bae haenqrengz buek guh.
Daih 1 Cieng Dangjyenz
Daih 1 diuz Cungguek gunghyinz、 nungzminz、 bouxbing、 cihsiz fwnswj caeuq gizyawz sevei gaihcwngz ndawde doengh boux vunz nienzgeij gaenq rim 18 bi、 swhsiengj cinbu、 suijbingz haemq sang haenx, danghnaeuz swngznyinh gij ganghlingj caeuq canghcwngz aen dangj, nyienh’eiq camgya aen dangj cujciz ndeu caemhcaiq youq ndawde roengzrengz gunghcoz、 caephengz gij gezyi aen dangj caeuq ciuqgeiz gyau dangjfei, couh ndaej sinhcingj gyahaeuj Cungguek Gungcanjdangj.
Daih 2 diuz Cungguek Gungcanjdangj dangjyenz dwg boux senhfungh cansw miz gungcanjcujyi gyozvu Cungguek gunghyinz gaihgiz.
Cungguek Gungcanjdangj dangjyenz bietdingh aeu cienzsim cienzeiq vih yinzminz fuzvu, sijndaej bonjfaenh yienghmaz cungj mbouj aeu, bae vih saedyienh gungcanjcujyi haenqrengz buek guh baenz seiqvunz.
Cungguek Gungcanjdangj dangjyenz ciengzlwenx dwg lauzdung yinzminz ndawde boux vunz bingzciengz ndeu. Cawz gij goyinz leih’ik caeuq gunghcoz cizgenz ndaw gvaengxlaengx faplwd dem cwngcwz gvidingh haenx caixvaih, sojmiz gungcanjdangjyenz cungj mbouj ndaej maeuzaeu saek di seileih caeuq daeggienz.
Daih 3 diuz Dangjyenz bietdingh aeu hengz gij yivu lajneix:
(1) Nyinhcaen hag Majgwzswh -Lezningzcujyi、 Mauz Cwzdungh Swhsiengj、 Dwng Siujbingz Lijlun、“Sam Aen Daibyauj” Cung’yau Swhsiengj caeuq Gohyoz Fazcanjgvanh, hag gij lohsienq、 fuengcim、 cwngcwz dem gezyi aen dangj, hag gij gihbwnj cihsiz aen dangj, hag gohyoz、 vwnzva、 faplwd caeuq yezvu cihsiz, roengzrengz gyalai gij bonjsaeh vih yinzminz fuzvu.
(2) Gvancez caephengz diuz gihbwnj lohsienq caeuq gak hangh fuengcim、 cwngcwz aen dangj, daiqdaeuz camgya gaijgwz hailangh caeuq seveicujyi yendaiva gensez, daiqdoengh ginzcung vih ginghci fazcanj caeuq ndawbiengz cinbu cix mbouj lau gannanz haemzhoj、 haenqrengz buek guh, youq swnghcanj、 gunghcoz、 yozsiz caeuq ndawbiengz swnghhoz ndawde guh’ok gij yienghndei mozfan daiqdaeuz.
(3) Genhciz gij leih’ik aen dangj caeuq gij leih’ik yinzminz beij gijmaz cungj lai dij, gij leih’ik goyinz fugcoengz gij leih’ik aen dangj caeuq yinzminz, dwgrengz bae gaxgonq, yiengjsouh youq doeklaeng, yiemzgek iugouz swhgeij, itsim vih goenggya, lailai guh gung’yen.
(4) Gagrox ciuqsouj gij gijliz aen dangj, mozfan ciuqsouj gij faplwd caeuq fapgvi guekgya, yiemzgek baujsouj gij mimiz aen dangj caeuq guekgya, caephengz gij gietdingh aen dangj, fugcoengz cujciz faenboiq, cizgiz guhbaenz gij yinvu aen dangj.
(5) Henhoh aen dangj doxgiet caeuq doengjit, doiq dangj cungcig lauxsaed, gangjvah caeuq hengzdoengh ndaw rog doxdoengz, genhgez fanjdui sojmiz baibez cujciz caeuq siuj cizdonz hozdung, fanjdui doengh gij hingzveiz guh bouxvunz song mbiengj、 youq dangqnaj gig goenggingq、 daengz raeblaeng cix boihfamh haenx caeuq sojmiz yaemmaeuz gvijgeiq.
(6) Saedcaih bae guh bihbingz caeuq gag bihbingz, gamj bae byoengqlaeuh caeuq niujcingq gij gezdenj、 loengloek ndaw gunghcoz, genhgez caeuq gij yienhsiengq siuhgiz nduknaeuh haenx guh doucwngh.
(7) Maedcaed lienzhaeh ginzcung, yiengq ginzcung senhconz gij cawjcieng aen dangj, roeb saehcingz caeuq ginzcung siengliengz, dawz gij yigen caeuq iugouz ginzcung gibseiz naeuz aen dangj nyi, henhoh gij leih’ik cingqdangq gyoengq ginzcung.
(8) Fazyangz gij funghsang moq seveicujyi, daiqdaeuz sizcen gij yungzyuzgvanh seveicujyi, dizcang gij daudwz gungcanjcujyi, vihliux baujhoh gij leih’ik guekgya caeuq yinzminz, youq sojmiz doengh mwh gunnanz yung’yiemj haenx enjaek okdaeuj, ak doucwngh gvaq vunz, mbouj lau baecaiz vutmingh.
Daih 4 diuz Dangjyenz yiengjmiz gij gienzleih lajneix:
(1) Camgya gij veiyi mizgven aen dangj, yawj gij vwnzgen mizgven aen dangj, ciepsouh aen dangj gyauyuz caeuq gungganq.
(2) Youq gwnz hoih aen dangj caeuq gwnz bauqceij ganhvuz aen dangj, caeuqfaenh daujlun gij cwngcwz vwndiz aen dangj.
(3) Doiq gij gunghcoz aen dangj daezok genyi caeuq cang’yi.
(4) Youq gwnz hoih aen dangj miz baengzgawq dwk bihbingz aen dangj mboujlwnh aen cujciz caeuq boux dangjyenz lawz, yiengq aen dangj fucwz dwk byoengqlaeuh、 genjgij aen dangj mboujlwnh aen cujciz caeuq boux dangjyenz lawz gij saehsaed famh fap famh gijliz de, iugouz cujfwnh doengh boux dangjyenz famh fap famh gijliz haenx, iugouz baqmienx roxnaeuz vuenh doengh boux ganbu rap mbouj hwnj cizvu bae.
(5) Hengzsawj gij gienz byaujgez、 gij gienz senjgij, miz gij gienz deng senjgij.
(6) Youq mwh dangj cujciz daujlun gietdingh doiq dangjyenz guh dangjgij cujfwnh roxnaeuz guh’ok gamqdingh, bonjvunz miz gienz camgya caeuq bienqbuek, gizyawz dangjyenz ndaej vih de guh cwngmingz caeuq bang de gangjvah.
(7) Doiq gij gezyi caeuq cwngcwz aen dangj danghnaeuz miz mbouj doengz yigen, youq mwh bae genhgez caephengz, doengzseiz ndaej singmingz baujlouz, caemhcaiq ndaej dawz gij yigen bonjfaenh yiengq aen dangj gaep cujciz baihgwnz cigdaengz cunghyangh daezok.
(8) Yiengq aen dangj gaep cujciz baihgwnz cigdaengz cunghyangh daezok cingjgouz、 sinhsu caeuq gunggau, caemhcaiq iugouz mizgven cujciz hawj gij dapfuk fucwz haenx. Aen dangj mboujlwnh gaep cujciz lawz cigdaengz cunghyangh, cungj mbouj miz gienz bokdued dangjyenz doengh gij gienzleih gwnzneix gangj.
Daih 5 diuz Fazcanj dangjyenz, bietdingh aeu ginggvaq dangj cihbu, genhciz aen yenzcwz gak boux gag gaepsou.
Boux sinhcingj haeuj dangj, aeu dienzsij faenh ciyensuh haeuj dangj, aeu miz song boux cingqsik dangjyenz guh bouxciumoiz, aeu ginggvaq cihbu daihhoih doenggvaq caeuq gaep dangj cujciz baihgwnz baecinj, caemhcaiq ginggvaq geizyawhbwh gaujcaz, cijndaej baenz boux cingqsik dangjyenz.
Bouxciumoiz aeu nyinhcaen liujgaij gij swhsiengj、 binjciz、 ginglig caeuq gunghcoz biujyienh bouxsinhcingj, yiengq de cekgangj gij ganghlingj caeuq canghcwngz aen dangj, gangjmingz gij diuzgienh、 yivu caeuq gienzleih dangjyenz, caemhcaiq yiengq dangj cujciz guh’ok gij baugau fucwz haenx.
Aen dangj cihbu veijyenzvei doiq gij vunz sinhcingj haeuj dangj haenx, aeu louzsim cam gyoengq ginzcung mizgven ndaw dangj rog dangj, yawj gyoengqde miz maz yigen, guh yiemzgek saemjcaz, nyinhnaeuz habgek le menhcij daezgyau cihbu daihhoih daujlun.
Gaep dangj cujciz baihgwnz youq mwh caengz baecinj bouxsinhcingj haeuj dangj, aeu baij vunz bae caeuq de damzvah, guh caenh’itbouh liujgaij, caemhcaiq bang de lai roxnaj aen dangj.
Youq mwh cingzgvang daegbied, aen dangj cunghyangh caeuq sengj、 swcigih、 cizyazsi veijyenzvei ndaej cigciep ciepsou dangjyenz.
Daih 6 diuz Yawhbwh dangjyenz bietdingh aeu youq dangqnaj fan geiz aen dangj guh haeuj dangj mieng gvaq. Doengh coenz vahmieng de dwg yienghneix: Gou gagnyienh gyahaeuj Cungguek Gungcanjdangj, yungjhu gij ganghlingj aen dangj, ciuqsouj gij canghcwngz aen dangj, hengz gij yivu dangjyenz, caephengz gij gietdingh aen dangj, yiemzsouj gij gijliz aen dangj, baujsouj gij mimiz aen dangj, doiq dangj cungcig, cizgiz gunghcoz, vih gungcanjcujyi haenqrengz buek guh baenz seiqvunz, seiqseiz cungj caepcawq vih dangj caeuq yinzminz cix bonjfaenh gijmaz cungj mbouj aeu, ciengzlwenx mbouj fanjgoet aen dangj.
Daih 7 diuz Yawhbwh dangjyenz aen geizyawhbwh de dwg bi ndeu. Dangj cujciz doiq yawhbwh dangjyenz wngdang guh nyinhcaen gyauyuz caeuq gaujcaz.
Gij yivu yawhbwh dangjyenz caeuq cingqsik dangjyenz doxdoengz. Gij gienzleih yawhbwh dangjyenz, cawz mbouj miz gij gienz byaujgez、 gij gienz senjgij caeuq gij gienz deng senjgij caixvaih, hix caeuq cingqsik dangjyenz doxdoengz.
Yawhbwh dangjyenz aen geizyawhbwh de rim le, dangj cihbu wngdang gibseiz daujlun de ndaej mbouj ndaej cienj baenz cingqsik dangjyenz. Doiq boux nyinhcaen hengz gij yivu dangjyenz, gaenq bwh miz gij diuzgienh dangjyenz haenx, wngdang ciuq geiz cienj baenz cingqsik dangjyenz; doiq boux sihyau laebdaeb gaujcaz caeuq gyauyuz haenx, ndaej gyaraez aen geizyawhbwh, hoeng mbouj ndaej mauhgvaq bi ndeu; doiq boux mbouj hengz gij yivu dangjyenz, mbouj bwh miz gij diuzgienh dangjyenz haenx, wngdang siu aen swhgwz yawhbwh dangjyenz de bae. Yawhbwh dangjyenz cienj baenz cingqsik dangjyenz, roxnaeuz gyaraez aen geizyawhbwh, roxnaeuz siu aen swhgwz yawhbwh dangjyenz de bae, cungj wngdang ginggvaq cihbu daihhoih daujlun doenggvaq caeuq gaep dangj cujciz baihgwnz baecinj.
Aen geizyawhbwh boux yawhbwh dangjyenz, daj ngoenz cihbu daihhoih doenggvaq de guh yawhbwh dangjyenz haenx suenq hwnj. Gij dangjlingz boux dangjyenz, daj ngoenz geizyawhbwh de rim cienj baenz cingqsik dangjyenz haenx suenq hwnj.
Daih 8 diuz Moix boux dangjyenz, mboujlwnh cizvu sang daemq, cungj bietdingh aeu bien haeuj aen dangj aen cihbu、 siujcuj roxnaeuz gizyawz cujciz daegdingh ndeu bae, camgya gij cujciz swnghhoz aen dangj, ciepsouh gyoengq ginzcung ndaw dangj rog dangj gamduk. Dangjyenz lingjdauj ganbu lij bietdingh aeu camgya gij minzcuj swnghhozvei dangjveij、 dangjcuj. Mbouj cinjhawj miz saek boux dangjyenz daegbied ndaej mbouj camgya gij cujciz swnghhoz aen dangj、 mbouj ciepsouh gyoengq ginzcung ndaw dangj rog dangj gamduk haenx.
Daih 9 diuz Dangjyenz miz gij swyouz doiq dangj. Dangjyenz iugouz doiq dangj, wngdang ginggvaq cihbu daihhoih daujlun le menhcij senhbu cawzmingz, caemhcaiq bauq hawj gaep dangj cujciz baihgwnz bwh’anq.
Dangjyenz mbouj miz gwzming eiqceiq, mbouj hengz gij yivu dangjyenz, mbouj hab gij diuzgienh dangjyenz, dangj cihbu wngdang gyauyuz de, iugouz de hanhgeiz gaijcingq; danghnaeuz ginggvaq gyauyuz lij mbouj cienjbienq, wngdang gienq de doiq dangj. Gienq dangjyenz doiq dangj, wngdang ginggvaq cihbu daihhoih daujlun gietdingh, caemhcaiq bauq hawj gaep dangj cujciz baihgwnz baecinj. Danghnaeuz boux dangjyenz deng gienq doiq dangj haenx genhciz mbouj doiq, wngdang daezgyau cihbu daihhoih daujlun, gietdingh cawzmingz de bae, caemhcaiq bauq hawj gaep dangj cujciz baihgwnz baecinj.
Dangjyenz danghnaeuz mbouj miz cingqdangq leixyouz, lienzdaemh 6 ndwen mbouj camgya gij cujciz swnghhoz aen dangj, roxnaeuz mbouj gyau dangjfei, roxnaeuz mbouj guh gij gunghcoz aen dangj faenbaij hawj haenx, couh deng nyinhnaeuz dwg gag duet dangj. Cihbu daihhoih wngdang gietdingh dawz yiengh dangjyenz neix cawzmingz bae, caemhcaiq bauq hawj gaep dangj cujciz baihgwnz baecinj.
Daih 2 Cieng Gij Cujciz Cidu Aen Dangj
Daih 10 diuz Dangj dwg aen doengjit cingjdaej ndeu, de dwg gaengawq gij ganghlingj caeuq canghcwngz bonjfaenh, ciuq minzcuj cizcungh cidu cujciz hwnjdaeuj. Aen dangj minzcuj cizcungh cidu gij gihbwnj yenzcwz de dwg:
(1) Dangjyenz goyinz fugcoengz dangj cujciz, siujsoq fugcoengz daihsoq, gaep cujciz baihlaj fugcoengz gaep cujciz baihgwnz, daengx dangj gak aen cujciz caeuq daengxcungq dangjyenz fugcoengz aen dangj daengx guek daibyauj daihhoih caeuq cunghyangh veijyenzvei.
(2) Aen dangj gak gaep lingjdauj gihgvanh, cawz doengh aen daibyauj gihgvanh gyoengqde baij ok haenx caeuq gij dangjcuj ndaw doengh aen cujciz mbouj dwg dangj haenx caixvaih, cungj doenggvaq senjgij canjseng.
(3) Aen dangj ceiq sang lingjdauj gihgvanh, dwg aen dangj daengx guek daibyauj daihhoih caeuq aen cunghyangh veijyenzvei youz de soj canjseng haenx. Aen dangj deihfueng gak gaep lingjdauj gihgvanh, dwg aen dangj deihfueng gak gaep daibyauj daihhoih caeuq aen veijyenzvei youz gyoengqde soj canjseng haenx. Aen dangj gak gaep veijyenzvei yiengq doengz gaep daibyauj daihhoih fucwz caemhcaiq baugau gunghcoz.
(4) Aen dangj gaep cujciz baihgwnz aeu ciengzseiz dingq gij yigen gaep cujciz baihlaj caeuq dangjyenz ginzcung, gibseiz gaijgez gij vwndiz gyoengqde daezok haenx. Aen dangj gaep cujciz baihlaj gawq aeu yiengq gaep cujciz baihgwnz cingjsi caeuq baugau gunghcoz, youh aeu doglaeb fucwz bae gaijgez doengh gij vwndiz ndaw cizcwz fanveiz bonjfaenh. Gij dangj cujciz gaep baihgwnz caeuq gaep baihlaj gyangde aeu doxdoeng cingzbau、 dox cihciz caeuq dox gamduk. Aen dangj gak gaep cujciz aeu ciuq gvidingh saedhengz hongsaeh aen dangj goenghai, sawj dangjyenz ndaej engq lai liujgaij caeuq camgya gij hongsaeh ndaw dangj.
(5) Aen dangj gak gaep veijyenzvei saedhengz aen cidu cizdij lingjdauj caeuq goyinz faengoeng fucwz dox giethab haenx. Fanzdwg gij vwndiz hungnaek, cungj aeu ciuq diuz yenzcwz cizdij lingjdauj、 minzcuj cizcungh、 gak boux gag caemciek、 hai hoih gietdingh, youz aen dangj veijyenzvei cizdij yaenglwnh, guh’ok gietdingh; gij vunz gap baenz veijyenzvei haenx aeu gaengawq cizdij gietdingh caeuq faengoeng, saedsaed caihcaih bae hengz gij cizcwz bonjfaenh.
(6) Aen dangj gimqhaed gij goyinz cungzbai sojmiz hingzsik. Aeu baujcwng gij hozdung bouxdaeuz aen dangj seizseiz cungj souh aen dangj caeuq yinzminz gamduk, doengzseiz henhoh gij visaenq sojmiz doengh bouxdaeuz daibyauj gij leih’ik dangj caeuq yinzminz haenx.
Daih 11 diuz Aen dangj gak gaep daibyauj daihhoih canjseng gij daibyauj caeuq aen veijyenzvei de, aeu daejyienh gij eiqceiq bouxsenjgij. Senjgij yungh aen fuengsik mbouj geiq mingzcoh douzbiuq. Gij mingzdanh bouxhousenj aeu youz dangj cujciz caeuq bouxsenjgij cungfaen caemciek yaenglwnh. Ndaej cigciep yungh gij vunzsoq bouxhousenj lai gvaq gij vunzsoq wngdang senjgij aen ca’ngeg senjgij banhfap neix bae guh cingqsik senjgij. Hix ndaej sien yungh ca’ngeg senjgij banhfap bae yawhsenj, doekdingh gij mingzdanh bouxhousenj le, yienzhaeuh cij guh cingqsik senjgij. Bouxsenjgij miz gienzleih liujgaij gij cingzgvang bouxhousenj、 iugouz gaijbienq bouxhousenj、 mbouj senjgij moux bouxhousenj caeuq lingh senjgij bouxwnq. Mboujlwnh aen cujciz lawz caeuq boux goyinz lawz, cungj mbouj ndaej yungh gijmaz fuengsik giengzbik bouxsenjgij senjgij roxnaeuz mbouj senjgij moux boux vunz.
Aen dangj deihfueng gak gaep daibyauj daihhoih caeuq gihcwngz daibyauj daihhoih gij senjgij de, danghnaeuz fatseng gij cingzgvang famh dangjcangh, aen dangj veijyenzvei gaep baihgwnz de ginggvaq diucaz haedsaed le, wngdang guh’ok gij gietdingh senjgij fouzyauq caeuq yungh gij cosih doxwngq, caemhcaiq bauq hawj gaep aen dangj veijyenzvei caiq baihgwnz de saemjcaz baecinj, cingqsik senhbu caephengz.
Aen dangj gak gaep daibyauj daihhoih daibyauj saedhengz nyaemhgeiz cidu.
Daih 12 diuz Aen dangj cunghyangh caeuq deihfueng gak gaep veijyenzvei youq mwh miz bizyau de ciucomz daibyauj veiyi, yaenglwnh caeuq gietdingh gij vwndiz hungnaek aeu gibseiz gaijgez haenx. Daibyauj veiyi gij daibyauj mingzngeg caeuq canjseng banhfap de, youz aen veijyenzvei ciucomz daibyauj veiyi haenx gietdingh.
Daih 13 diuz Fanzdwg laeb aen dangj cujciz moq, roxnaeuz siu aen dangj cujciz yienzlaiz gaenq miz de bae, bietdingh aeu youz gaep dangj cujciz baihgwnz gietdingh.
Youq mwh aen dangj deihfueng gak gaep daibyauj daihhoih caeuq gihcwngz daibyauj daihhoih haep hoih geizgan, danghnaeuz gaep dangj cujciz baihgwnz nyinhnaeuz miz bizyau, gojyij diuhdoengh roxnaeuz ceijbaij gij bouxdaeuz gaep dangj cujciz baihlaj.
Aen dangj cunghyangh caeuq deihfueng gak gaep veijyenzvei gojyij baij ok daibyauj gihgvanh.
Aen dangj cunghyangh caeuq sengj、 swcigih、 cizyazsi veijyenzvei saedhengz cunzyawj cidu.
Daih 14 diuz Aen dangj gak gaep lingjdauj gihgvanh yaek doiq gij vwndiz youqgaenj caeuq gaep cujciz baihlaj mizgven haenx guh’ok gietdingh, youq mwh cingzgvang bingzciengz, aeu cam gij yigen gaep cujciz baihlaj. Aeu baujcwng gaep cujciz baihlaj ndaej cingqciengz hengzsawj gij cizgenz gyoengqde. Fanzdwg gij vwndiz wngdang youz gaep cujciz baihlaj cawqceq haenx, danghnaeuz mbouj miz cingzgvang daegbied, gaep lingjdauj gihgvanh baihgwnz gaej bae guenj.
Daih 15 diuz Doengh gij cwngcwz vwndiz hungnaek nangq daengz daengx guek haenx, cijmiz dangj cunghyangh miz gienz guh’ok gietdingh, gij dangj cujciz gak bouhmonz、 gak deihfueng gojyij yiengq cunghyangh daezok genyi, hoeng mbouj ndaej gag guh’ok gietdingh caeuq doiq rog fatbiuj cawjcieng.
Aen dangj gaep cujciz baihlaj bietdingh aeu genhgez caephengz gij gietdingh gaep cujciz baihgwnz. Gaep cujciz baihlaj dangh nyinhnaeuz gij gietdingh gaep cujciz baihgwnz mbouj hab gij saedsaeh cingzgvang bonj digih、 bonj bouhmonz, gojyij cingjgouz gaijbienq; danghnaeuz gaep cujciz baihgwnz genhciz gij gietdingh yienzlaiz, gaep cujciz baihlaj bietdingh aeu caephengz, caemhcaiq mbouj ndaej goenghai fatbiuj gij yigen mbouj doengz, hoeng miz gienz yiengq gaep cujciz caiq baihgwnz de baugau.
Aen dangj gak gaep cujciz gij bauqceij ganhvuz caeuq gizyawz senhconz gunghgi de, bietdingh aeu senhconz gij lohsienq、 fuengcim、 cwngcwz caeuq gezyi aen dangj.
Daih 16 diuz Dangj cujciz yaenglwnh gietdingh vwndiz, bietdingh aeu caephengz diuz yenzcwz siujsoq fugcoengz daihsoq. Gietdingh vwndiz youqgaenj, aeu guh byaujgez. Doiq siujsoq vunz gij yigen mbouj doengz de, wngdang nyinhcaen ngeixnaemj. Danghnaeuz doiq gij vwndiz youqgaenj haenx fatseng cenglwnh, song mbiengj vunzsoq dox ciepgaenh, cawz youq mwh cingzgvang gaenjgip bietdingh aeu ciuq dingzlai yigen bae caephengz caixvaih, wngdang camhseiz noizlaeng gietdingh, caenh’itbouh diucaz yenzgiu, gyauvuenh yigen, baezlaeng menhcij byaujgez; youq mwh cingzgvang daegbied, hix ndaej dawz cenglwnh cingzgvang yiengq gaep cujciz baihgwnz baugau, cingjgouz caizgiet.
Dangjyenz goyinz daibyauj dangj cujciz fatbiuj gij cawjcieng youqgaenj, danghnaeuz mauhgvaq aen gvaengxlaengx dangj cujciz gaenq miz gietdingh haenx bae, bietdingh aeu daezgyau hawj aen dangj cujciz de soj youq haenx yaenglwnh gietdingh, roxnaeuz yiengq gaep dangj cujciz baihgwnz cingjsi. Sojmiz dangjyenz mboujlwnh cizvu sang daemq, cungj mbouj ndaej goyinz gag gietdingh gij vwndiz hungnaek; danghnaeuz roeb mwh cingzgvang gaenjgip, bietdingh aeu youz goyinz guh’ok gietdingh, gvaqlaeng aeu vaiq yiengq dangj cujciz baugau. Mbouj cinjhawj bouxdaeuz lawz saedhengz goyinz gag gangj couh baenz caeuq dawz goyinz giengq hwnj gwnz dingjgyaeuj cujciz bae.
Daih 17 diuz Aen dangj cunghyangh、 deihfueng caeuq gihcwngz cujciz, cungj bietdingh aeu yawjnaek aen dangj gensez, ciengzseiz yaenglwnh caeuq genjcaz doengh gij senhconz gunghcoz、 gyauyuz gunghcoz、 cujciz gunghcoz、 gijliz genjcaz gunghcoz、 ginzcung gunghcoz、 doengjit cansen gunghcoz aen dangj, louzsim yenzgiu gij swhsiengj cwngci canggvang ndaw dangj rog dangj.
Daih 3 Cieng Gij Cunghyangh Cujciz Aen Dangj
Daih 18 diuz Aen dangj daengx guek daibyauj daihhoih moix haj bi hai baez ndeu, youz cunghyangh veijyenzvei ciucomz. Danghnaeuz cunghyangh veijyenzvei nyinhnaeuz miz bizyau, roxnaeuz miz sam faenh cih it doxhwnj sengj it gaep cujciz daezok iugouz, daengx guek daibyauj daihhoih ndaej daezgonq ciuhai; danghnaeuz mbouj miz cingzgvang daegbied, mbouj ndaej noizlaeng ciuhai. Daengx guek daibyauj daihhoih gij daibyauj mingzngeg caeuq senjgij banhfap de, youz cunghyangh veijyenzvei gietdingh.
Daih 19 diuz Aen dangj daengx guek daibyauj daihhoih gij cizgenz de dwg:
(1) Dingqaeu caeuq saemjcaz cunghyangh veijyenzvei baugau;
(2) Dingqaeu caeuq saemjcaz cunghyangh gijliz genjcaz veijyenzvei baugau;
(3) Yaenglwnh caemhcaiq gietdingh gij vwndiz hungnaek aen dangj;
(4) Coihgaij gij canghcwngz aen dangj;
(5) Senjgij cunghyangh veijyenzvei;
(6) Senjgij cunghyangh gijliz genjcaz veijyenzvei.
Daih 20 diuz Aen dangj daengx guek daibyauj veiyi gij cizgenz de dwg: Yaenglwnh caeuq gietdingh gij vwndiz hungnaek; diuzcingj caeuq gyalai senjgij cunghyangh veijyenzvei、 cunghyangh gijliz genjcaz veijyenzvei bouhfaenh cwngzyenz. Diuzcingj caeuq gyalai senjgij cunghyangh veijyenz caeuq houbuj cunghyangh veijyenz, soqngeg mbouj ndaej faenbied mauhgvaq gyoengq cunghyangh veijyenz caeuq gyoengq houbuj cunghyangh veijyenz youz aen dangj daengx guek daibyauj daihhoih senjgij okdaeuj haenx gij cungjsoq de haj faenh cih it.
Daih 21 diuz Aen dangj cunghyangh veijyenzvei moix gaiq nyaemhgeiz haj bi. Daengx guek daibyauj daihhoih danghnaeuz daezgonq roxnaeuz noizlaeng ciuhai, gij nyaemhgeiz de hix doxwngq gaijbienq. Cunghyangh veijyenzvei veijyenz caeuq houbuj veijyenz bietdingh aeu miz dangjlingz haj bi doxhwnj. Gij mingzngeg cunghyangh veijyenzvei veijyenz caeuq houbuj veijyenz, youz daengx guek daibyauj daihhoih gietdingh. Cunghyangh veijyenzvei veijyenz hoengq vih, youz cunghyangh veijyenzvei houbuj veijyenz ciuq soj ndaej biuqsoq daj lai daengz noix ciep aeu bae swnjbouj.
Cunghyangh veijyenzvei daengxcungq veiyi youz cunghyangh cwngcigiz ciucomz, moix bi ceiq noix ciuhai baez ndeu. Cunghyangh cwngcigiz yiengq cunghyangh veijyenzvei daengxcungq veiyi baugau gunghcoz, ciepsouh gamduk. Youq daengx guek daibyauj daihhoih haep hoih geizgan, cunghyangh veijyenzvei caephengz gij gezyi daengx guek daibyauj daihhoih, lingjdauj aen dangj sojmiz gunghcoz, doiq rog daibyauj Cungguek Gungcanjdangj.
Daih 22 diuz Aen dangj cunghyangh cwngcigiz、 cunghyangh cwngcigiz cangzvu veijyenzvei caeuq cunghyangh veijyenzvei cungjsuhgi, youz cunghyangh veijyenzvei daengxcungq veiyi senjgij. Cunghyangh veijyenzvei cungjsuhgi bietdingh aeu daj ndaw cunghyangh cwngcigiz cangzvu veijyenzvei veijyenz canjseng. Cunghyangh cwngcigiz caeuq aen cangzvu veijyenzvei de, youq cunghyangh veijyenzvei daengxcungq veiyi haep hoih geizgan, hengzsawj gij cizgenz cunghyangh veijyenzvei.
Cunghyangh suhgicu dwg aen banhsaeh gihgou cunghyangh cwngcigiz caeuq aen cangzvu veijyenzvei de; cwngzyenz youz cunghyangh cwngcigiz cangzvu veijyenzvei daezmingz, cunghyangh veijyenzvei daengxcungq veiyi doenggvaq.
Cunghyangh veijyenzvei cungjsuhgi fucwz ciucomz cunghyangh cwngcigiz veiyi caeuq cunghyangh cwngcigiz cangzvu veijyenzvei veiyi, caemhcaiq cujciz gij gunghcoz cunghyangh suhgicu.
Aen dangj cunghyangh ginhsw veijyenzvei gij gapbaenz yinzyenz de youz cunghyangh veijyenzvei gietdingh.
Gij cunghyangh lingjdauj gihgou caeuq gyoengq bouxdaeuz cunghyangh youz moix gaiq cunghyangh veijyenzvei canjseng haenx, youq mwh gaiq daengx guek daibyauj daihhoih gaenlaeng hai hoih geizgan, laebdaeb cujciz gij gunghcoz gingciengz aen dangj, cigdaengz gaiq cunghyangh veijyenzvei gaenlaeng canjseng gij cunghyangh lingjdauj gihgou caeuq gyoengq bouxdaeuz cunghyangh moq de cij sat.
Daih 23 diuz Gij dangj cujciz Cungguek Yinzminz Gaijfangginh, gaengawq gij cijsi cunghyangh veijyenzvei bae guh gunghcoz. Cunghyangh ginhsw veijyenzvei aen cwngci gunghcoz gihgvanh de dwg Cungguek Yinzminz Gaijfangginh Cungjcwngcibu, cungjcwngcibu fucwz guenjleix doengh hangh aen dangj gunghcoz caeuq cwngci gunghcoz ndaw bingdoih. Gij cujciz dijci caeuq gihgou aen dangj ndaw bingdoih, youz cunghyangh ginhsw veijyenzvei guh’ok gvidingh.
Daih 4 Cieng Gij Deihfueng Cujciz Aen Dangj
Daih 24 diuz Aen dangj gij daibyauj daihhoih sengj、 swcigih、 cizyazsi, gij daibyauj daihhoih doengh aen si laeb gih caeuq swcicouh, gij daibyauj daihhoih yienh (giz)、 swciyienh、 doengh aen si mbouj laeb gih caeuq doengh aen gih ndaw si guenj, moix haj bi ciuhai baez ndeu.
Aen dangj deihfueng gak gaep daibyauj daihhoih youz doengz gaep aen dangj veijyenzvei ciucomz. Youq mwh cingzgvang daegbied, ginggvaq gaep veijyenzvei baihgwnz baecinj, ndaej daezgonq roxnaeuz noizlaeng ciuhai.
Aen dangj deihfueng gak gaep daibyauj daihhoih gij daibyauj mingzngeg caeuq senjgij banhfap de, youz doengz gaep aen dangj veijyenzvei gietdingh, caemhcaiq bauq hawj gaep aen dangj veijyenzvei baihgwnz baecinj.
Daih 25 diuz Aen dangj deihfueng gak gaep daibyauj daihhoih gij cizgenz de dwg:
(1) Dingqaeu caeuq saemjcaz doengz gaep veijyenzvei baugau;
(2) Dingqaeu caeuq saemjcaz doengz gaep gijliz genjcaz veijyenzvei baugau;
(3) Yaenglwnh gij vwndiz hunghaek ndaw gvaengxlaengx bonj digih caemhcaiq guh’ok gezyi;
(4) Senjgij aen dangj doengz gaep veijyenzvei, senjgij aen dangj doengz gaep gijliz genjcaz veijyenzvei.
Daih 26 diuz Aen dangj sengj、 swcigih、 cizyazsi、 doengh aen si laeb gih caeuq swcicouh gij veijyenzvei de, moix gaiq nyaemhgeiz haj bi. Gyoengq veijyenz caeuq houbuj veijyenz doengh aen veijyenzvei neix, bietdingh aeu miz dangjlingz haj bi doxhwnj.
Aen dangj yienh (giz)、 swciyienh、 doengh aen si mbouj laeb gih caeuq doengh aen gih ndaw si guenj haenx gij veijyenzvei de, moix gaiq nyaemhgeiz haj bi. Gyoengq veijyenz caeuq houbuj veijyenz doengh aen veijyenzvei neix, bietdingh aeu miz dangjlingz sam bi doxhwnj.
Aen dangj deihfueng gak gaep daibyauj daihhoih danghnaeuz daezgonq roxnaeuz noizlaeng ciuhai, gij nyaemhgeiz aen veijyenzvei youz de senjgij haenx caemh doxwngq gaijbienq.
Aen dangj deihfueng gak gaep veijyenzvei gij veijyenz caeuq houbuj veijyenz mingzngeg de, faenbied youz gaep veijyenzvei baihgwnz gietdingh. Aen dangj deihfueng gak gaep veijyenzvei veijyenz hoengq vih, youz houbuj veijyenz ciuq soj ndaej biuqsoq daj lai daengz noix ciep aeu bae swnjbouj.
Aen dangj deihfueng gak gaep veijyenzvei daengxcungq veiyi, moix bi ceiq noix ciuhai song baez.
Aen dangj deihfueng gak gaep veijyenzvei youq mwh daibyauj daihhoih haep hoih geizgan, caephengz gij cijsi gaep dangj cujciz baihgwnz caeuq gij gezyi aen dangj daibyauj daihhoih doengz gaep, lingjdauj gij gunghcoz bonj deihfueng, dinghgeiz yiengq gaep aen dangj veijyenzvei baihgwnz baugau gunghcoz.
Daih 27 diuz Aen dangj deihfueng gak gap veijyenzvei daengxcungq veiyi, senjgij cangzvu veijyenzvei caeuq suhgi、 fusuhgi, caemhcaiq bauq hawj gaep aen dangj veijyenzvei baihgwnz baecinj. Aen dangj deihfueng gak gaep veijyenzvei aen cangzvu veijyenzvei de, youq mwh veijyenzvei daengxcungq veiyi haep hoih geizgan, hengzsawj gij cizgenz aen veijyenzvei; youq mwh gaiq daibyauj daihhoih gaenlaeng hai hoih geizgan, laebdaeb cujciz gij gunghcoz gingciengz, cigdaengz aen cangzvu veijyenzvei moq de canjseng cij sat.
Aen dangj deihfueng gak gaep veijyenzvei aen cangzvu veijyenzvei de dinghgeiz yiengq veijyenzvei daengxcungq veiyi baugau gunghcoz, ciepsouh gamduk.
Daih 28 diuz Aen dangj digih veijyenzvei caeuq gij cujciz caemh dangq digih veijyenzvei haenx, dwg gij daibyauj gihgvanh youz aen dangj sengj、 swcigih veijyenzvei youq geij aen yienh、 swciyienh、 si gvaengxlaengx ndawde baijok haenx. De gaengawq sengj、 swcigih veijyenzvei soj hawj gienzlig, lingjdauj gij gunghcoz bonj digih.
Daih 5 Cieng Gij Gihcwngz Cujciz Aen Dangj
Daih 29 diuz Giyez、 lajmbanj、 gihgvanh、 hagdangz、 gohyenz yensoj、 gaihdau segih、 gij cujciz ndawbiengz、 yinzminz gaijfangginh lenzdui caeuq gizyawz gihcwngz danhvei, fanzdwg doengh aen danhvei miz cingqsik dangjyenz sam boux doxhwnj, cungj wngdang laeb gij gihcwngz cujciz aen dangj.
Gij gihcwngz cujciz aen dangj, gaengawq gunghcoz sihyau caeuq dangjyenz vunzsoq, ginggvaq gaep dangj cujciz baihgwnz baecinj, faenbied laeb aen dangj gihcwngz veijyenzvei、 cungjcihbu veijyenzvei、 cihbu veijyenzvei. Gihcwngz veijyenzvei youz dangjyenz daihhoih roxnaeuz daibyauj daihhoih senjgij canjseng, cungjcihbu veijyenzvei caeuq cihbu veijyenzvei youz dangjyenz daihhoih senjgij canjseng, daezok bouxhousenj veijyenz aeu gvangqlangh cam gij yigen gyoengq dangjyenz caeuq ginzcung.
Daih 30 diuz Gij gihcwngz veijyenzvei aen dangj moix gaiq nyaemhgeiz sam bi daengz haj bi, cungjcihbu veijyenzvei、 cihbu veijyenzvei moix gaiq nyaemhgeiz song bi roxnaeuz sam bi. Gij suhgi、 fusuhgi gihcwngz veijyenzvei、 cungjcihbu veijyenzvei、 cihbu veijyenzvei senjgij canjseng le, wngdang bauq hawj gaep dangj cujciz baihgwnz baecinj.
Daih 31 diuz Gij gihcwngz cujciz aen dangj, dwg dangj youq ndawbiengz gihcwngz cujciz ndawde aen candou baujleij haenx, dwg aen giek sojmiz gunghcoz caeuq candouliz aen dangj. Gij gihbwnj yinvu de dwg:
(1) Senhconz caeuq caephengz gij lohsienq、 fuengcim、 cwngcwz aen dangj, senhconz caeuq caephengz gij gezyi dangj cunghyangh、 gaep cujciz baihgwnz caeuq bonj cujciz, cungfaen fazveih gij senhfungh mozfan cozyung gyoengq dangjyenz, gaenx bae ciengj ak ceng ndei, comzgiet、 cujciz gyoengq ganbu caeuq ginzcung ndaw dangj rog dangj, roengzrengz guhbaenz gij yinvu bonj danhvei soj dangrap haenx.
(2) Cujciz dangjyenz nyinhcaen hag Majgwzswh-Lezningzcujyi、 Mauz Cwzdungh Swhsiengj、 Dwng Siujbingz Lijlun、 “Sam Aen Daibyauj” Cung’yau Swhsiengj caeuq Gohyoz Fazcanjgvanh, hag gij lohsienq、 fuengcim、 cwngcwz caeuq gezyi aen dangj, hag gij gihbwnj cihsiz aen dangj, hag gohyoz、 vwnzva、 faplwd caeuq yezvu cihsiz.
(3) Doiq dangjyenz guh gyauyuz、 guenjleix、 gamduk caeuq fuzvu, daezsang gij suciz gyoengq dangjyenz, gyagiengz dangjsing, yiemzgek gij cujciz swnghhoz aen dangj, guh bihbingz caeuq gag bihbingz, henhoh caeuq caephengz gij gijliz aen dangj, gamduk dangjyenz saedcaih hengz yivu, baujcang gij gienzleih gyoengq dangjyenz mbouj deng ciemqfamh. Gyagiengz caeuq gaijndei riuzdoengh dangjyenz guenjleix.
(4) Maedcaed lienzhaeh ginzcung, ciengzseiz liujgaij ginzcung doiq dangjyenz caeuq gij gunghcoz aen dangj miz maz bihbingz caeuq yigen, henhoh gij cingqdangq gienzleih caeuq leih’ik gyoengq ginzcung, guhndei ginzcung swhsiengj cwngci gunghcoz.
(5) Hawj gyoengq dangjyenz caeuq ginzcung lai gaenxguh lai dajcauh, yawjraen、 gungganq caeuq doigawj gij vunzcaiz maenhndei ndaw gyoengqde, gujli caeuq cihciz gyoengqde youq ndaw gaijgwz hailangh caeuq seveicujyi yendaiva gensez gung’yen gij coengmingz caeuq dungxcaiz bonjfaenh.
(6) Doiq doengh boux cizgiz iugouz haeuj dangj haenx guh gyauyuz caeuq gungganq, guhndei gij fazcanj dangjyenz gunghcoz aeu ciengzseiz guh haenx, yawjnaek youq swnghcanj、 gunghcoz daih’it sienq caeuq bouxcoz ndawde fazcanj dangjyenz.
(7) Gamduk dangjyenz ganbu caeuq gizyawz sojmiz gunghcoz yinzyenz, hawj gyoengqde yiemzgek ciuqsouj gij faplwd guekgya caeuq gij gijliz cwngfuj, yiemzgek ciuqsouj guekgya caizcwng ginghci fapgvi caeuq vunzsaeh cidu, mbouj ndaej ciemqaeu gij leih’ik guekgya、 cizdij caeuq ginzcung.
(8) Gyauyuz dangjyenz caeuq ginzcung gagrox daeqceih gij ginghyang mbouj ndei, genhgez caeuq gak cungj hingzveiz famhfap famhcoih haenx guh doucwngh.
Daih 32 diuz Aen dangj gihcwngz veijyenzvei ndaw gaihdau、 yangh、 cin caeuq gij dangj cujciz ndaw cunh caeuq segih, lingjdauj gij gunghcoz bonj digih, cihciz caeuq baujcwng hingzcwng cujciz、 ginghci cujciz caeuq ginzcung gagguenj cujciz cungfaen hengzsawj cizgenz.
Gij gihcwngz cujciz aen dangj ndaw guekmiz giyez caeuq cizdij giyez, fazveih cwngci haedsim cozyung, hopheux giyez swnghcanj ginghyingz bae guh gunghcoz. Baujcwng caeuq gamduk dangj caeuq guekgya gij fuengcim、 cwngcwz de ndaej youq bonj giyez gvancez caephengz; cihciz gujdunghvei、 dungjswvei、 genhswvei caeuq ginghlij (cangjcangj) ciuq faplwd hengzsawj cizgenz; cienzsim cienzeiq ingbaengh cizgungh ginzcung, cihciz cizgungh daibyauj daihhoih guh gunghcoz; doiq doengh gij vwndiz hungnaek ndaw giyez bae caeuqfaenh guh gezcwz; gyagiengz dangj cujciz bonjndang gensez, lingjdauj swhsiengj cwngci gunghcoz、 cingsaenz vwnzmingz gensez caeuq gunghvei、 gungcinghdonz daengj ginzcung cujciz. Gij gihcwngz cujciz aen dangj ndaw feih gunghyoujci ginghci cujciz, gvancez gij fuengcim cwngcwz aen dangj, dazyinx caeuq gamduk giyez ciuqsouj guekgya faplwd fapgvi, lingjdauj gunghvei、 gungcinghdonz daengj ginzcung cujciz, donzgez caeuq comzgiet cizgungh ginzcung, henhoh gij gienzik habfap gak fuengmienh, coicaenh giyez cangqheiq fazcanj.
Gij gihcwngz cujciz aen dangj ndaw doengh gij swyez danhvei saedhengz bouxdaeuz hingzcwng fucwz cidu haenx, fazveih cwngci haedsim cozyung. Gij gihcwngz cujciz aen dangj ndaw doengh gij swyez danhvei saedhengz dangjveij lingjdauj baihlaj bouxdaeuz hingzcwng fucwz cidu haenx, yaenglwnh caeuq gietdingh gij vwndiz hungnaek, doengzseiz baujcwng bouxdaeuz hingzcwng cungfaen hengzsawj gij cizgenz bonjfaenh.
Gij gihcwngz cujciz aen dangj ndaw gak gaep dangj caeuq guekgya gihgvanh, bang bouxdaeuz hingzcwng guhbaenz yinvu, gaijndei gunghcoz, doiq moix boux dangjyenz baudaengz bouxdaeuz hingzcwng guh gamduk, mbouj lingjdauj gij yezvu gunghcoz bonj danhvei.
Daih 6 Cieng Gij Ganbu Aen Dangj
Daih 33 diuz Gij ganbu aen dangj dwg gyoengq vunz dingxdaeuz guh gij saehnieb aen dangj, dwg boux banh goengsaeh hawj yinzminz. Dangj ciuq aen yenzcwz daek caiz giem miz、 aeu daek guh gonq bae genjleh caeuq daezswng ganbu, genhciz seiq fueng bet baih、 boux maenhndei cij yungh, fanjdui boux caengaenh cij yungh, roengzrengz saedyienh ganbu duivuj gwzmingva、 nenzginghva、 cihsizva、 conhyezva.
Dangj yawjnaek gyauyuz、 gungganq、 genjleh、 daezswng、 gaujhaed caeuq gamduk ganbu, daegbied dwg gungganq、 genjleh、 daezswng gij ganbu oiq maenhndei haenx. Cizgiz doicaenh ganbu cidu gaijgwz.
Dangj yawjnaek gungganq、 genjleh、 daezswng gij ganbu mehmbwk caeuq gij ganbu siujsoq minzcuz.
Daih 34 diuz Aen dangj gak gaep lingjdauj ganbu bietdingh aeu mozfan bae hengz gak hangh dangjyenz yivu bonj canghcwngz daihsam diuz soj gvidingh haenx, caemhcaiq bietdingh aeu bwh miz gij gihbwnj diuzgienh lajneix:
(1) Miz gij suijbingz Majgwzswh-Lezningzcujyi、 Mauz Cwzdungh Swhsiengj、 Dwng Siujbingz Lijlun youq mwh bae hengz cizcwz soj aeu yungh daengz haenx, nyinhcaen sizcen “Sam Aen Daibyauj” Cung’yau Swhsiengj, daiqdaeuz gvancez lozsiz Gohyoz Fazcanjgvanh, roengzrengz yungh gij lizcangz、 gvanhdenj、 fuengfap Majgwzswhcujyi bae faensik caeuq gaijgez saedsaeh vwndiz, genhciz gangj yozsiz、 gangj cwngci、 gangj cingqheiq, souh ndaej gvaq gak cungj gannanz yung’yiemj gaujniemh.
(2) Miz gij lijsiengj hunggyae gungcanjcujyi caeuq gij saenqniemh giendingh guh yiengh seveicujyi miz daegsaek Cungguek, genhgez caephengz diuz gihbwnj lohsienq caeuq gak hangh fuengcim、 cwngcwz aen dangj, laeb ceiqheiq gaijgwz hailangh, vutndang hawj yendaiva saehnieb, youq ndaw seveicujyi gensez sinhoj cauhnieb, laeb gij cwngcizgvanh cingqdeng, guh’ok gij cingzcik saedcaih souh ndaej gvaq sizcen、 yinzminz、 lizsij gienjniemh haenx.
(3) Genhciz gaijfang swhsiengj, daj ndaw saedsaeh gouz aeu caenleix, caeuq seizdaih caez baenaj, haifwz cauhmoq, nyinhcaen diucaz yenzgiu, ndaej dawz gij fuengcim cwngcwz aen dangj caeuq gij saedsaeh cingzgvang bonj digih、 bonj bouhmonz dox giethab, gig miz cingzyauq bae guh gunghcoz, gangj vah lauxsaed, banh saeh saedcaih, gouz aeu yauqgoj saedcaih, fanjdui hingzsizcujyi.
(4) Gig mizsim guh gwzming saehnieb caeuq roxnyinh cwngci cwzyin gig naek, miz sizcen gingniemh, miz gij cujciz naengzlig、 vwnzva suijbingz caeuq conhyez cihsiz rap ndaej hwnj lingjdauj gunghcoz haenx.
(5) Cwnggoz hengzsawj gij gienzlig yinzminz gyauhawj haenx, genhciz yenzcwz, ciuq faplwd banhsaeh, ndang cingq fwngz seuq, vih beksingq gaenx banh goengsaeh, yungh hengzdoengh guh’ok yienghndei, ganhoj giemhmbaet, maedcaed lienzhaeh ginzcung, genhciz diuz ginzcung lohsienq aen dangj, gagrox ciepsouh dangj caeuq ginzcung bihbingz caeuq gamduk, gyagiengz daudwz siuhyangj, gangj dangjsing、 yawjnaek daudwz hingzveiz、 daiqdaeuz guh yienghndei, guhdaengz gag siujsim、 gag genjcaz、 gag singjgaeh、 gag coicaenh, fanjdui gvanhliuzcujyi, fanjdui sojmiz gij guhfap mbouj cingqdangq luenh yungh cizgenz、 maeuz aeu seileih haenx.
(6) Genhciz caeuq henhoh gij minzcuj cizcungh cidu aen dangj, miz minzcuj cozfungh, miz daengxbuenz gvanhnen, rox comzgiet dungzci, baudaengz comzgiet doengh boux dungzci caeuq bonjfaenh yigen mbouj doxdoengz haenx itheij guh gunghcoz.
Daih 35 diuz Dangjyenz ganbu aeu rox caeuq gyoengq ganbu rog dangj doxgap guh saeh, gingqcungh gyoengqde, hawsim hag gij ndei gij ak gyoengqde. Aen dangj gak gaep cujciz aeu rox yawjraen caeuq doigawj doengh boux ganbu rog dangj caencingq miz bonjsaeh haenx bae guh lingjdauj gunghcoz, baujcwng gyoengqde miz cizvu miz gienzlig, cungfaen fazveih gij cozyung gyoengqde.
Daih 36 diuz Aen dangj gak gaep lingjdauj ganbu, mboujlwnh dwg youz minzcuj senjgij okdaeuj, roxnaeuz dwg lingjdauj gihgvanh nyaemhmingh, gij cizvu gyoengqde cungj mbouj dwg ndaej dang baenz seiqvunz, cungj gojyij bienqdoengh roxnaeuz cawz bae.
Gij ganbu nienzgeij caeuq ndangdaej canggvang mbouj hab laebdaeb guh gunghcoz haenx, wngdang ciuq guekgya gvidingh duiyouh、 lizyouh.
Daih 7 Cieng Gij Gijliz Aen Dangj
Daih 37 diuz Gij gijliz aen dangj dwg gij hingzveiz gveihcwz aen dangj gak gaep cujciz caeuq daengxcungq dangjyenz bietdingh aeu ciuqsouj haenx, dwg gij baujcwng henhoh aen dangj doxgiet doengjit、 guhbaenz gij yinvu aen dangj. Dangj cujciz bietdingh aeu yiemzgek caephengz caeuq henhoh gij gijliz aen dangj, gungcanjdangjyenz bietdingh aeu gagrox ciepsouh gij gijliz aen dangj hanhhaed.
Daih 38 diuz Dangj cujciz doiq doengh boux dangjyenz famh gijliz aen dangj haenx, wngdang ciuq aen cingsaenz hit gonq re laeng、 yw bingh gouq vunz, ciuq loengloek singqcaet caeuq cingzcez naek mbaeu, doiq de guh bihbingz gyauyuz cigdaengz gijliz cujfwnh.
Doengh boux dangjyenz famh hingzsaeh faplwd youqgaenj haenx bietdingh aeu haicawz dangjciz.
Ndaw dangj yiemzgek gimqhaed yungh gij soujduenh famh dangjcangh caeuq guekgya faplwd haenx bae doiqdaih dangjyenz, yiemzgek gimqhaed dwkceih boizhaemz caeuq bangjlaih amqhaih. Doengh aen cujciz roxnaeuz doengh boux goyinz famh gij gvidingh neix, bietdingh aeu souh daengz gij gijliz aen dangj caeuq gij faplwd guekgya bae cazdawz.
Daih 39 diuz Gij gijliz cujfwnh aen dangj miz haj cungj: Gingjgau、 yiemzcungh gingjgau、 siu gij cizvu ndaw dangj bae、 louzdangj cazyawj、 haicawz dangjciz.
Louzdangj cazyawj ceiq raez mbouj mauhgvaq song bi. Dangjyenz youq louzdangj cazyawj geizgan mbouj miz gij gienz byaujgez、 gij gienz senjgij caeuq gij gienz deng senjgij. Dangjyenz ginggvaq louzdangj cazyawj, danghnaeuz gaenq saedcaih gaijcingq loengloek, wngdang hoizfuk gij dangjyenz gienzleih de; danghnaeuz genhciz loengloek mbouj gaij, wngdang haicawz dangjciz. Haicawz dangjciz dwg gij cujfwnh ceiq naek ndaw dangj. Gak gaep dangj cujciz youq mwh yaek gietdingh roxnaeuz baecinj haicawz dangjyenz dangjciz, wngdang cienzmienh yenzgiu gij caizliu caeuq yigen mizgven, daidu aeu cibfaen nyinhcaen siujsim.
Daih 40 diuz Doiq dangjyenz guh gijliz cujfwnh, bietdingh aeu ginggvaq cihbu daihhoih yaenglwnh gietdingh, bauq hawj aen dangj gihcwngz veijyenzvei baecinj; danghnaeuz gij vwndiz nangq daengz haenx haemq youqgaenj roxnaeuz fukcab, roxnaeuz yaek doiq dangjyenz guh haicawz dangjciz cujfwnh, wnggai faenbied mbouj doengz cingzgvang, bauq hawj yienh gaep roxnaeuz yienh gaep doxhwnj aen dangj gijliz genjcaz veijyenzvei saemjcaz baecinj. Youq mwh cingzgvang daegbied, yienh gaep caeuq yienh gaep doxhwnj gak gaep aen dangj veijyenzvei caeuq gijliz genjcaz veijyenzvei miz gienz cigciep gietdingh doiq dangjyenz guh gijliz cujfwnh. Doiq aen dangj cunghyangh veijyenzvei caeuq deihfueng gak gaep veijyenzvei doengh boux veijyenz、 houbuj veijyenz de, yaek guh gij cujfwnh siu cizvu ndaw dangj bae、 louzdangj cazyawj roxnaeuz haicawz dangjciz, bietdingh aeu youz aen veijyenzvei bonjvunz de soj youq haenx daengxcungq veiyi aeu aen daihsoq sam faenh cih ngeih doxhwnj gietdingh. Youq mwh cingzgvang daegbied, gojyij sien youz cunghyangh cwngcigiz caeuq deihfueng gak gaep veijyenzvei cangzvu veijyenzvei guh’ok cawqleix gietdingh, daengz mwh ciuhai veijyenzvei daengxcungq veiyi menhcij bouj nyinhdingh. Yaek doiq deihfueng gak gaep veijyenzvei doengh boux veijyenz caeuq houbuj veijyenz de guh gij cujfwnh gwnzneix gangj, bietdingh aeu ginggvaq gaep aen dangj veijyenzvei baihgwnz baecinj.
Doengh boux cunghyangh veijyenzvei veijyenz、 houbuj veijyenz famh hingzsaeh faplwd youqgaenj haenx, youz cunghyangh cwngcigiz gietdingh haicawz gij dangjciz de; deihfueng gak gaep veijyenzvei doengh boux veijyenz、 houbuj veijyenz famh hingzsaeh faplwd youqgaenj haenx, youz doengz gaep veijyenzvei cangzvu veijyenzvei gietdingh haicawz gij dangjciz de.
Daih 41 diuz Dangj cujciz yaek doiq dangjyenz guh’ok cujfwnh gietdingh, wngdang dawz saehsaed caz cingcuj, mbouj ndaej gag siengj couh gag nyinhdingh. Gij saehsaed caizliu cujfwnh gietdingh soj baengzgawq haenx caeuq cujfwnh gietdingh bietdingh aeu hawj bonjvunz yawj gvaq, dingq bonjvunz gangjmingz cingzgvang caeuq bienqbuek. Danghnaeuz bonjvunz doiq cujfwnh gietdingh mbouj fug, gojyij daezok sinhsu, mizgven dangj cujciz bietdingh aeu fucwz cawqleix roxnaeuz vaiq cienj soengq, mbouj ndaej gaeuat. Doiq doengh boux caen dwg genhciz gij yigen loengloek caeuq gij iugouz mbouj miz dauhleix haenx, aeu doiq de guh bihbingz gyauyuz.
Daih 42 diuz Dangj cujciz danghnaeuz youq henhoh gij gijliz aen dangj fuengmienh mbouj caenh cizcwz, bietdingh aeu deng cazdawz.
Doiq doengh aen dangj cujciz famh gij gijliz aen dangj youqgaenj、 bonjndang youh mbouj ndaej gag niujcingq haenx, gaep aen dangj veijyenzvei baihgwnz ginggvaq cazmingz haedsaed le, wngdang gaengawq cingzcez naek mbaeu cingzdoh, guh’ok gietdingh gaijcuj roxnaeuz gaijsanq bae, caemhcaiq bauq hawj gaep aen dangj veijyenzvei caiq baihgwnz saemjcaz baecinj, cingqsik senhbu caephengz.
Daih 8 Cieng Gij Gijliz Genjcaz Gihgvanh Aen Dangj
Daih 43 diuz Aen dangj cunghyangh gijliz genjcaz veijyenzvei youq aen dangj cunghyangh veijyenzvei lingjdauj baihlaj bae guh gunghcoz. Aen dangj deihfueng gak gaep gijliz genjcaz veijyenzvei caeuq gihcwngz gijliz genjcaz veijyenzvei youq aen dangj doengz gaep veijyenzvei caeuq gaep gijliz genjcaz veijyenzvei baihgwnz songcungz lingjdauj baihlaj bae guh gunghcoz.
Aen dangj gak gaep gijliz genjcaz veijyenzvei moix gaiq nyaemhgeiz caeuq aen dangj doengz gaep veijyenzvei doxdoengz.
Aen dangj cunghyangh gijliz genjcaz veijyenzvei daengxcungq veiyi, senjgij cangzvu veijyenzvei caeuq suhgi、 fusuhgi, caemhcaiq bauq hawj aen dangj cunghyangh veijyenzvei baecinj. Aen dangj deihfueng gak gaep gijliz genjcaz veijyenzvei daengxcungq veiyi, senjgij cangzvu veijyenzvei caeuq suhgi、 fusuhgi, caemhcaiq youz doengz gaep aen dangj veijyenzvei doenggvaq, bauq hawj gaep aen dangj veijyenzvei baihgwnz baecinj. Aen dangj gihcwngz veijyenzvei dwg laeb gijliz genjcaz veijyenzvei, roxnaeuz dwg laeb gijliz genjcaz veijyenz, youz gaep dangj cujciz baihgwnz de gaengawq gidij cingzgvang bae gietdingh. Aen dangj cungjcihbu veijyenzvei caeuq cihbu veijyenzvei laeb gijliz genjcaz veijyenz.
Aen dangj cunghyangh gijliz genjcaz veijyenzvei gaengawq gunghcoz sihyau, gojyij yiengq cunghyangh it gaep dangj caeuq guekgya gihgvanh baij cap aen dangj gijliz genjcazcuj roxnaeuz gijliz genjcazyenz. Gijliz genjcazcuj cujcangj roxnaeuz gijliz genjcazyenz, gojyij lezsiz doengh aen veiyi mizgven gij dangj lingjdauj cujciz aen gihgvanh neix. Gij dangj lingjdauj cujciz aen gihgvanh neix bietdingh aeu cihciz gij gunghcoz gyoengqde.
Daih 44 diuz Aen dangj gak gaep gijliz genjcaz veijyenzvei gij cujyau yinvu de dwg: Henhoh gij canghcwngz aen dangj caeuq gizyawz gij fapgvi ndaw dangj, genjcaz gij lohsienq、 fuengcim、 cwngcwz caeuq gezyi aen dangj caephengz ndaej baenzlawz yiengh, bang aen dangj veijyenzvei gyagiengz dangjfungh gensez caeuq cujciz hezdiuz gij hong fanj nduknaeuh.
Gak gaep gijliz genjcaz veijyenzvei aeu ciengzseiz gyauyuz gyoengq dangjyenz ciuqsouj gijliz, guh’ok gij gietdingh gvendaengz henhoh gij gijliz aen dangj; doiq dangjyenz lingjdauj ganbu hengzsawj gienzlig guh gamduk; genjcaz caeuq cawqleix doengh gij anqgienh haemq youqgaenj roxnaeuz fukcab、 gvendaengz aen dangj cujciz caeuq dangjyenz famh gij canghcwngz aen dangj caeuq gizyawz gij fapgvi ndaw dangj haenx, doiq doengh boux dangjyenz ndaw gij anqgienh neix gietdingh cujfwnh roxnaeuz mbouj cujfwnh; ciepsouh cawqleix dangjyenz gunggau caeuq sinhsu; baujcang gij gienzleih gyoengq dangjyenz.
Gak gaep gijliz genjcaz veijyenzvei youq mwh cawqleix gij anqgienh daegbied youqgaenj roxnaeuz fukcab haenx, aeu dawz gij vwndiz caeuq cawqleix gezgoj de yiengq doengz gaep aen dangj veijyenzvei baugau. Aen dangj deihfueng gak gaep gijliz genjcaz veijyenzvei caeuq gihcwngz gijliz genjcaz veijyenzvei aeu doengzseiz yiengq gaep gijliz genjcaz veijyenzvei baihgwnz baugau.
Gak gaep gijliz genjcaz veijyenzvei raen doengz gaep aen dangj veijyenzvei veijyenz miz gij hingzveiz famh gijliz aen dangj, gojyij sien guh cobouh haedsaed, danghnaeuz sihyau laeb anq genjcaz, wngdang bauq hawj doengz gaep aen dangj veijyenzvei baecinj, danghnaeuz nangq daengz cangzvu veijyenz, ginggvaq yiengq doengz gaep aen dangj veijyenzvei baugau le caiq bauq hawj gaep gijliz genjcaz veijyenzvei baihgwnz baecinj.
Daih 45 diuz Gaep gijliz genjcaz veijyenzvei baihgwnz miz gienz genjcaz gij gunghcoz gaep gijliz genjcaz veijyenzvei baihlaj, caemhcaiq miz gienz baecinj caeuq gaijbienq gij gietdingh youz gaep gijliz genjcaz veijyenzvei baihlaj doiq anqgienh soj guh’ok haenx. Danghnaeuz gaep gijliz genjcaz veijyenzvei baihlaj neix gij gietdingh yaek deng gaijbienq de, gaenq youz aen dangj veijyenzvei doengz gaep de baecinj gvaq, cungj gaijbienq neix bietdingh aeu ginggvaq gaep aen dangj veijyenzvei baihgwnz de baecinj.
Aen dangj deihfueng gak gaep gijliz genjcaz veijyenzvei caeuq gihcwngz gijliz genjcaz veijyenzvei danghnaeuz doiq gij gietdingh doengz gaep aen dangj veijyenzvei cawqleix anqgienh haenx miz mbouj doengz yigen, gojyij cingjgouz gaep gijliz genjcaz veijyenzvei baihgwnz bae fukcaz; danghnaeuz raen doengz gaep aen dangj veijyenzvei roxnaeuz gij cwngzyenz de miz gij cingzgvang famh gijliz aen dangj, youq mwh doengz gaep aen dangj veijyenzvei mbouj hawj gaijgez roxnaeuz mbouj hawj cwnggoz gaijgez, miz gienz yiengq gaep gijliz genjcaz veijyenzvei baihgwnz daezok sinhsu, cingjgouz bang cawqleix.
Daih 9 Cieng Dangjcuj
Daih 46 diuz Youq ndaw cunghyangh caeuq deihfueng guekgya gihgvanh、 yinzminz donzdij、 ginghci cujciz、 vwnzva cujciz caeuq gizyawz gij cujciz mbouj dwg dangj haenx aen lingjdauj gihgvanh de, gojyij laeb dangjcuj. Dangjcuj fazveih lingjdauj haedsim cozyung. Gij yinvu aen dangjcuj, cujyau dwg fucwz gvancez caephengz gij lohsienq、 fuengcim、 cwngcwz aen dangj; yaenglwnh caeuq gietdingh gij vwndiz hungnaek bonj danhvei; guhndei ganbu guenjleix gunghcoz; comzgiet gij ganbu caeuq ginzcung rog dangj, guhbaenz gij yinvu dangj caeuq guekgya gyauhawj haenx; cijdauj gij hong gihgvanh caeuq cigsug danhvei dangj cujciz.
Daih 47 diuz Gij cwngzyenz aen dangjcuj, youz aen dangj cujciz baecinj laeb dangjcuj haenx gietdingh. Dangjcuj laeb suhgi, mwh miz bizyau lij gojyij laeb fusuhgi dem.
Dangjcuj bietdingh aeu fugcoengz aen dangj cujciz baecinj de laebbaenz haenx lingjdauj.
Daih 48 diuz Doengh aen guekgya gunghcoz bouhmonz doiq gij danhvei lajfwngz de saedhengz cizcungh doengjit lingjdauj haenx gojyij laeb dangjveij, gij canjseng banhfap、 cizgenz caeuq gunghcoz yinvu dangjveij, youz cunghyangh lingh guh gvidingh.
Daih 10 Cieng Gij Gvanhaeh Dangj Caeuq Gungcanjcujyi Cinghnenzdonz
Daih 49 diuz Cungguek Gungcanjcujyi Cinghnenzdonz dwg aen ginzcung cujciz gyoengq bouxcoz senhcin youh youz Cungguek Gungcanjdangj lingjdauj haenx, dwg aen hagdangz hawj guengjdaih bouxcoz youq sizcen ndawde hag gungcanjcujyi caeuq yiengh seveicujyi miz daegsaek Cungguek haenx, dwg boux bangfwngz caeuq gij ligliengh bwhlaeng aen dangj. Gungcinghdonz cunghyangh veijyenzvei youz aen dangj cunghyangh veijyenzvei bae lingjdauj. Gungcinghdonz deihfueng gak gaep cujciz youz doengz gaep aen dangj veijyenzvei bae lingjdauj, doengzseiz youz gaep gungcinghdonz cujciz baihgwnz bae lingjdauj.
Daih 50 diuz Aen dangj gak gaep veijyenzvei aeu gyagiengz doiq gungcinghdonz guh lingjdauj, louzsim genjleh daezswng caeuq gungganq gij ganbu gungcinghdonz. Dangj aeu genhgez cihciz gungcinghdonz gaengawq gij daegdiemj caeuq sihyau guengjdaih bouxcoz, sengdoengh hozboz、 gig ak cauhmoq bae guh gunghcoz, hawj gungcinghdonz lai dang duzgizdui, lai lienzhaeh guengjdaih bouxcoz.
Gungcinghdonz yienh gaep caeuq yienh gaep doxroengz gak gaep veijyenzvei suhgi, giyez swyez danhvei gungcinghdonz veijyenzvei suhgi, danghnaeuz dwg dangjyenz, gojyij lezsiz doengz gaep aen dangj veijyenzvei caeuq cangzvu veijyenzvei veiyi.
Daih 11 Cieng Aen Veihcangh Caeuq Fan Geiz Aen Dangj
Daih 51 diuz Aen veihcangh Cungguek Gungcanjdangj dwg aen doz youz fagliemz caeuq fagcuiz gapbaenz haenx.
Daih 52 diuz Fan geiz Cungguek Gungcanjdangj dwg fan geizhoengz, gwnz mienhgeiz neb miz aen veihcangh aen dangj saekhenjgim dwk.
Daih 53 diuz Aen veihcangh caeuq fan geiz Cungguek Gungcanjdangj, dwg gij siengcwngh caeuq geiqhauh Cungguek Gungcanjdangj. Aen dangj gak gaep cujciz caeuq moix boux dangjyenz, cungj aeu henhoh gij cunhyenz aen veihcangh caeuq fan geiz aen dangj. Aeu ciuq gvidingh bae cauhguh caeuq sawjyungh aen veihcangh caeuq fan geiz aen dangj.
